Стихи́ры, глас 1.

Подо́бен: Всехва́льнии му́ченицы:

Багряни́цею от кро́ве твоея́ све́тло, всечестна́я, оде́явшися,/ востекла́ еси́, к Нему́же вожделе́ла еси́,/ Царю́, и Зижди́телю всех, и Го́споду,/ от Него́же побе́дный вене́ц вои́стинну прия́ла еси́,/ с Ни́мже ны́не ца́рствуеши,/ я́ко де́ва и му́ченица многострада́льная.

Огня́ паля́щаго стремле́ние стерпе́ла еси́, прехва́льная,/ и строга́ния вся теле́сная,/ взира́ющи к воздая́нием та́мошним, всечестна́я,/ я́же еди́ный Иису́с предугото́ва лю́бящим/ и те́пле Того́ жела́ющим,/ я́ко Жениха́ душ красне́йшаго.

Ослади́вшися любо́вию Христо́вою,/ бо́ги возненави́дела еси́ язы́ческия/ и безду́шныя истука́нныя,/ Ири́но сла́вная:/ Богоразу́мия столп явле́ннейший/ себе́ зря́щим возста́вила еси́,/ я́ко пострада́вши, и тече́ние сконча́вши,/ и ве́ру непоро́чну соблю́дши.

Сла́ва, и ны́не, пра́здника.

Тропа́рь, глас 4:

А́гница Твоя́, Иису́се, Ири́на,/ зове́т ве́лиим гла́сом:/ Тебе́, Женише́ мой, люблю́,/ и, Тебе́ и́щущи, страда́льчествую,/ и сраспина́юся, и спогреба́юся Креще́нию Твоему́,/ и стражду́ Тебе́ ра́ди,/ я́ко да ца́рствую в Тебе́, и умира́ю за Тя,/ да и живу́ с Тобо́ю,/ но я́ко же́ртву непоро́чную приими́ мя, с любо́вию поже́ршуюся Тебе́./ Тоя́ моли́твами,/ я́ко Ми́лостив, спаси́ ду́ши на́ша.

Кано́н, его́же краегране́сие: Твои́ми мя моли́твами, му́ченице Ири́но, покры́й.Глас 4.

Песнь 1

Ирмо́с: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу.

Вене́ц сый страстоно́сицы, сея́, Христе́, моли́твами мир ми́ру/ и сла́ву неувяда́ему пою́щим Тя да́руй.

Заре́ю сия́ющи де́вства, укра́шена добро́тою твоего́ муче́ния,/ Ири́но великоимени́тая, твоему́ Жениху́ предстои́ши.

Ми́лостиву бы́ти Це́рквам твоего́ моли́ Жениха́, Ири́но Богому́драя,/ согреше́ний же оставле́ние пода́ти чту́щим тя.

Богоро́дичен: Плоть бы́вша Бо́га Сло́ва и су́щаго, я́ко мы, Свята́я Де́во,/ неизрече́нно родила́ еси́, па́че сло́ва и ра́зума.

Песнь 3

Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Ми́ра излия́вшагося чу́вствующи и вселе́нную облагоуха́вшаго благода́тию прии́мши,/ воспери́ся к жела́нию сего́, сла́вная.

Име́ла еси́ Бо́га помо́щника во твои́х по́двизех и защища́юща, всему́драя,/ сего́ ра́ди венча́вшися, мучи́теля победи́ла еси́.

Столп доброде́телей непрекло́нен, и благоче́стия жили́ще бысть,/ и му́жества, и целому́дрия прия́телище, всехва́льная.

Богоро́дичен: Те́кши до Тебе́, смерть ста,/ прирази́вшися из Тебе́ рожде́нному, Всенепоро́чная,/ сего́ ра́ди бессме́ртия нача́ток Тя имену́ем.

Конда́к, глас 4.

Подо́бен: Яви́лся еси́:

Де́вства добро́тами преиспещре́нна, де́во,/ страда́льчеством была́ еси́ красне́йшая, Ири́но,/ кровьми́ твои́ми исте́кшими обагре́на,/ пре́лесть же низложи́вшая безбо́жия./ Сего́ ра́ди и прия́ла еси́ по́чести побе́ды руко́ю Созда́теля твоего́.

Седа́лен, глас 8.

Подо́бен: Воскре́сл еси́:

Мир тебе́ мног прибы́сть, му́ченице,/ разре́шшися пло́ти по боле́знех мно́гих:/ ра́дуяся бо, Жени́х на Небесе́х тя горе́ прия́т, всепросвеще́ну, и страда́нием облиста́ющу,/ и в черто́г Боже́ственный введе́ ра́дующуся.

Сла́ва, и ны́не, пра́здника.

Песнь 4

Ирмо́с: Твоего́ на земли́ явле́ния, Христе́ Бо́же,/ пропове́дуя проро́к прише́ствие,/ с весе́лием вопия́ще:/ сла́ва си́ле Твое́й, Го́споди.

И́же мир тебе́ подава́яй, мироимени́тая, ми́ра ра́ди посо́бствующу тя ви́дя,/ мужеподо́бным ра́зумом, му́ченице, и кре́постию испо́лни.

Кре́пким усе́рдием превозше́дши же́нскую не́мощь, преблаже́нная,/ тве́рдо изобличи́ла еси́, му́ченице, ле́сти служа́щия.

Боже́ственное терпе́ние показа́вши, мучи́телей де́рзости низложи́ла еси́,/ твоему́ Жениху́ зову́щи:/ сла́ва си́ле Твоей, Го́споди.

Песносло́вием немо́лчным и мольба́ми Влады́ку, Богому́драя, песносло́вила еси́,/ и, к Нему́ восте́кши, сла́ву зри́ши неизрече́нную.

Богоро́дичен: Ра́достно Тебе́, веселя́щеся, гла́сы, Пречи́стая, Тебе́ ра́ди спа́сшиися, взыва́ем:/ ра́дуйся, Де́во Всечестна́я, ра́дуйся, Богоро́дице Всепе́тая.

Песнь 5

Ирмо́с: Просвеще́ние Твое́, Го́споди, ниспосли́ нам,/ и от мглы прегреше́ний разреши́ ны, Бла́же,/ Твой мир да́руяй.

Му́жеским, сла́вная, ра́зумом Христа́, Бо́га всех я́сно испове́дала еси́,/ сло́вом же тве́рдым сопротивоборца́, страстоте́рпице, посрами́ла еси́.

После́довати возжеле́ла еси́ стра́сти Христо́ве/ и подо́бием те́пле после́довала еси́,/ подви́жно стра́ждущи по Влады́це, пребога́тая.

Полки́ му́ченик, сла́вная, привела́ еси́ Христу́ твое́ю му́дростию и Богосло́вием,/ сия́ и́стинно тайноуча́щи сло́вом ве́ры.

Богоро́дичен: Научи́вшеся та́йны зача́тия Твоего́/ и неизрече́ннаго и Боже́ственнаго Твоего́ рождества, Де́во,/ ны́не всеблагоче́стно песносло́вим Тя, Богоро́дице Всепе́тая.

Песнь 6

Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.

Испра́вила еси́ прама́тере Е́вы паде́ние, страстоте́рпице,/ врага́ низложи́вши си́лу/ и победи́вши о́наго шата́ние Боже́ственною благода́тию.

Кре́пость стяжа́вши, Ири́но, ра́зума,/ мучи́телем супроти́вилася еси́ души до́блестию/ и венце́м побе́дным от Христа́ Бо́га венча́лася еси́.

Кро́вию страда́ния, му́ченице,/ светле́йшу соде́лала еси́ есте́ственную добро́ту, чи́стая,/ до́блественныя по́двиги подъе́мши тве́рдо, до́брая де́во.

Богоро́дичен: Прояви́ та́йну Твоего́ рождества́ Богови́дец,/ горя́щу купину́ ви́дев, и неопаля́ему, Богоро́дице Чи́стая Присноде́во.

Конда́к и и́кос пра́здника.

Песнь 7

Ирмо́с: Авраа́мстии иногда́ в Вавило́не о́троцы/ пе́щный пла́мень попра́ша, пе́сньми взыва́юще:/ оте́ц на́ших Бо́же, благослове́н еси́.

Венцено́сно, му́ченице, предстоя́щи престо́лу твоего́ Влады́ки,/ соблюди́ ве́рою зову́щия:/ оте́ц на́ших Бо́же, благослове́н еси́.

В Небе́сных селе́ниих ликова́ти, му́ченице, сподо́билася еси́,/ досточу́дная Ири́но, зову́щи:/ оте́ц на́ших Бо́же, благослове́н еси́.

Жела́ющи улучи́ти Рачи́теля твоего́ добро́ты,/ муче́ния боле́зни претерпе́ла еси́, Ири́но, зову́щи:/ оте́ц на́ших Бо́же, благослове́н еси́.

Богоро́дичен: Глаго́лом усте́н Твои́х после́дующе,/ ве́рою Тя, Богома́ти, ублажа́ем, вопию́ще Рождеству́ Твоему́:/ оте́ц на́ших Бо́же, благослове́н еси́.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Пострада́ла еси́, Ири́но блаже́нная, до́бле и мучи́теля низложи́ла еси́,/ иму́щи посо́бие непобеди́мое, Влады́ки твоего́ си́лу, соде́йствующую тебе́,/ и, Го́спода по́йте, – вопия́ла еси́, – и превозноси́те Его́ во ве́ки.

Ю́ношескою любо́вию уя́звена, во след твоего́ Жениха́ после́довала еси́,/ Сего́ страда́ния, му́ченице, и ра́ны на те́ле твое́м нося́щи и вопию́щи:/ Го́спода по́йте, дела́, и превозноси́те Его́ во ве́ки.

Твое́, е́же в му́ках, терпе́ние, Ири́но венцено́сице,/ посмея́ся су́етию и безбо́жию наде́ющимся, сла́вная, ве́рою же поя́ше:/ Го́спода воспева́йте, дела́, и превозноси́те Его́ во ве́ки.

Богоро́дичен: Му́дрость Бо́жия, всех Хитре́ц, во Твое́ чре́во, Богома́ти, все́льшися,/ храм созда́, разу́мен же и одушевле́н, Себе́ и спасе́ мир, зову́щий:/ Го́спода воспева́йте, дела́, и превозноси́те Его́ во ве́ки.

Песнь 9

Ирмо́с: Е́ва у́бо неду́гом преслуша́ния кля́тву всели́ла есть;/ Ты же, Де́во Богоро́дице,/ прозябе́нием чревоноше́ния/ ми́рови благослове́ние процвела́ еси́./ Тем Тя вси вели́чаем.

О́крест твоего́ Рачи́теля лику́ющи в вы́шних, до́брая де́во,/ испроси́ ми́ру мир, Ири́но, и согреше́ний оставле́ние/ ве́рою творя́щим па́мять твою́ светоно́сную и свяще́нную.

Внутрь тя черто́га Христо́с я́ко му́ченицу и де́ву всели́,/ иде́же с де́вами ра́дуешися и с му́ченическими во́инствы,/ Ири́но венцено́сные всехва́льная,/ те́мже тя вси ублажа́ем.

Две́ри отве́рз Небе́сныя, прия́т ду́шу твою́ всенепоро́чную/ Еди́н, все́ми ца́рствуяй, и пра́вды Строи́тель,/ Ири́но, Боже́ственнаго ми́ра тезоимени́тая,/ Те́мже тя вси ублажа́ем.

Богоро́дичен: Иму́щи к Твоему́ Сы́ну, Пренепоро́чная, дерзнове́ние непосты́дно,/ Сего́ умоли́ низпосла́ти ми́ру ми́рно устрое́ние и всем Це́рквам единомышле́ние,/ да Тя вси велича́ем.