Стихи́ры, глас 2.

Подо́бен: Егда́ от Дре́ва:

Егда́ манове́нием Боже́ственным/ Боже́ственными огласи́лася еси́ глаго́лы, блаже́нная,/ я́коже земля́, сла́вная, тучна́,/ прия́ла еси́ серде́чными брозда́ми се́мя слове́сное/ и стори́чествующий клас прорасти́ла еси́/ всем, ве́рно чту́щим тя, му́ченице, вои́стинну, Пелаги́е,/ сердца́ благода́тию наслажда́ющи.

Еди́наго рачи́теля Христа́ добро́ту взыска́вши,/ добро́ты ми́ра ми́мо текла́ еси́,/ к присноживы́м же исто́чником потща́лася еси́ свята́го Креще́ния,/ и, сих напо́лньшися,/ жа́ждею страда́ния а́бие распали́лася еси́./ Те́мже, зело́ в разжже́н сосу́д вше́дши усе́рдно,/ конца́ Боже́ственнаго сподо́билася еси́.

Неве́ста избра́нна и чиста́,/ от Неискусому́жныя Рожде́нному неве́ста была́ еси́,/ пе́рвее вре́меннаго жениха́, сла́вная,/ ума́ пра́востию твое́ю возгнуша́вшися/ и земны́я обагре́ныя оде́жды:/ те́мже ве́чную сла́ву и одея́ние нетле́ния,/ му́ченице Пелаги́е, ны́не восприя́ла еси́.

Сла́ва, и ны́не, пра́здника.

Тропа́рь, глас 4:

А́гница Твоя́, Иису́се, Пелаги́я/ зове́т ве́лиим гла́сом:/ Тебе́, Женише́ мой, люблю́,/ и, Тебе́ и́щущи, страда́льчествую,/ и сраспина́юся, и спогреба́юся Креще́нию Твоему́,/ и стражду́ Тебе́ ра́ди,/ я́ко да ца́рствую в Тебе́, и умира́ю за Тя,/ да и живу́ с Тобо́ю,/ но я́ко же́ртву непоро́чную приими́ мя, с любо́вию поже́ршуюся Тебе́./ Тоя́ моли́твами,/ я́ко Ми́лостив, спаси́ ду́ши на́ша.

Кано́н, его́же краегране́сие: Пелаги́и хвалу́ и́стинно плету́. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Пучи́ну твои́х чуде́с пла́вающу,/ хлад духо́вный ны́не ми пода́ждь, му́ченице Христо́ва Пелаги́е прехва́льная,/ и ко приста́нищу благоути́шному твои́х похвале́ний наста́ви.

От младе́нства проразуме́нно Зижди́телю твоему́ возложи́вшися, честна́я,/ тле́нных отве́ргла еси́ любо́вь, Пелаги́е всесла́вная,/ му́жески же стра́сти Боже́ственною си́лою попра́ла еси́.

Ба́ни Боже́ственныя жела́ющи, сла́вная, прия́ти Креще́ния,/ святи́теля обре́тши Христо́ва, Пелаги́е, притекла́ еси́/ и, приобщи́вшися, све́та Боже́ственнаго, му́ченице, испо́лнилася еси́.

Богоро́дичен: Святы́х святе́йши была́ еси́, Де́во Чи́стая,/ святы́х Свята́го Христа́ на руку́ носи́вши,/ Боже́ственными си́лами всю тварь содержа́щаго.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Я́коже земля́ блага́, прие́мши слове́сная се́мена, му́ченице Христо́ва всему́драя,/ сия́ бога́тно израсти́ла еси́.

Упра́вилася еси́, я́ко избра́нна, ко Влады́це и Бо́гу тща́щися,/ му́ченице Христо́ва сла́вная,/ Боже́ственными укрепля́ема уче́нии.

Богоро́дичен: Возста́вила еси́, о Чи́стая, па́дший мой о́браз,/ ро́ждши я́ве Вино́внаго па́че есте́ственнаго воскресе́ния.

Конда́к святы́я, глас 3.

Подо́бен: Де́ва днесь:

Вре́менная презре́вши/ и Небе́сных благ прича́стница бы́вши,/ вене́ц страда́ния ра́ди прии́мши,/ Пелаги́е всечестна́я,/ я́ко дар принесла́ еси́ кро́вныя пото́ки Влады́це Христу́./ Моли́ от бед изба́вити нас,/ твою́ па́мять почита́ющих.

Та́же, седа́лен, глас 1.

Подо́бен: Гроб Твой, Спа́се:

Любо́вию Христо́вою ду́шу распа́льши,/ вошла́ еси́ му́жески в зело́ разжже́нный, Богому́драя, коно́б, Пелаги́е,/ и была́ еси́ Влады́це твоему́ благово́нная же́ртва./ Те́мже днесь, всесвяту́ю твою́ па́мять творя́ще, воспева́ем тя.

Сла́ва, и ны́не, пра́здника.

Песнь 4

Ирмо́с: Вознесе́на Тя ви́девши Це́рковь на Кресте́/ Со́лнце пра́ведное/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Влады́чнею багряни́цею оде́яна,/ ба́нею, пресла́вная, пакибытия́ всея́ жите́йския кра́сныя багряни́цы совлекла́ся еси́,/ му́ченице Пелаги́е всечестна́я.

Жела́нием небе́сных красо́т, я́же на земли́ омрачи́вши жела́ния, страстоно́сице,/ те́мже окрили́лася еси́, Христу́ вопию́щи и глаго́лющи:/ сла́ва си́ле Твое́й, Го́споди.

Оскверне́нную ве́ру оста́вльши,/ ко Христу́ притекла́ еси́ му́дре, Пелаги́е му́ченице всесла́вная,/ и́дольскую попра́вши вся́ку пре́лесть, Богоприя́тная.

Богоро́дичен: Неискусобра́чно родила́ еси́, о Де́во,/ и по рождестве́ яви́лася еси́, де́вствующи па́ки./ Те́мже немо́лчными гла́сы,– ра́дуйся, Влады́чице,– Тебе́ ве́рою несумне́нною взыва́ем.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет святы́й, обраща́яй из мра́чна неве́дения/ ве́рою воспева́ющия Тя.

Возмогла́ еси́ вра́жие разруши́ти свире́пство, прехва́льная Пелаги́е,/ кресто́м Влады́чним укре́пльшися и благода́тию.

Ны́не ра́дуешися вои́стинну, сочета́вшися Жениху́ твоему́, пресве́тлая, муче́нием,/ твоего́ де́вства свещу́ иму́щи.

Богоро́дичен: Госпо́дь в Тя, Богома́ти, всели́ся,/ челове́ка назида́я, в тле́ние па́дшаго пре́лестию змии́ною.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х исте́кшею кро́вию.

Зако́нно Христу́ уневе́стившися, сконча́ла еси́ муче́ния тече́ние/ и, призыва́ющи твоего́ Жениха́, в приста́нище ти́хое Сего́ утверди́лася еси́.

Изплете́ся твоему́ верху́ прекра́сен вене́ц пра́вды,/ Богому́драя Пелаги́е, му́ченице венцено́сице,/ ве́ру бо да́же до конца́ соблюла́ еси́ безпоро́чно.

Богоро́дичен: Яд пе́рвее во у́ши Е́вы излия́ стропо́тный змий;/ Ты же сего́ еди́на оттрясла́ еси́, Богома́ти, губи́теля тому́ ро́ждши.

Конда́к и и́кос пра́здника.

Песнь 7

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Пе́щным о́бразом, сокрове́нным, му́ченице, орга́ном,/ Боже́ственною распала́ема любо́вию Христо́вою, терпя́щи, взыва́ла еси́:/ благослове́н еси́ в хра́ме сла́вы Твоея́, Го́споди.

Одева́яй не́бо о́блаки, сла́вная му́ченице,/ обнаже́ну су́щу Боже́ственныя оде́жды, просвети́ тя, пою́щую:/ благослове́н еси́ в хра́ме сла́вы Твоея́, Го́споди.

Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́на Ты в жена́х еси́, Всенепоро́чная Влады́чице.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́; о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Я́ко му́ченица, я́ко зело́ нело́жна Христо́ва, прехва́льная,/ Сего́ си́лу богосло́вила еси́, всех богому́дренно науча́ющи,/ и к благоче́стию лю́ди привлекла́ еси́, пою́щия:/ благослови́те, вся дела́ Госпо́дня, Го́спода.

Я́ве уневе́стившися Христу́, мучи́теля стремле́ние все погаси́ла еси́,/ прему́дрости пучи́ну источа́ющи, Пелаги́е всечестна́я,/ и венцы́ треми́, му́ченице, украси́лася еси́, пою́щи:/ благослови́те, вся дела́ Госпо́дня, Го́спода.

Богоро́дичен: Из Отца́ Безнача́льнаго Сы́на и Ду́ха Свята́го испове́дуем, ве́рнии,/ из Тебе́, Всенепоро́чная, глаго́люще воплоти́тися/ Собезнача́льное, Единоро́дное Сло́во Отцу́ и Боже́ственному Ду́ху,/ и вопие́м: благослови́те, вся дела́ Госпо́дня, Го́спода.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Сло́во изрещи́ не мо́жет твои́х похва́л, Пелаги́е,/ пучи́ну бо чуде́с источа́еши твоего́ Жениха́ си́лою и благода́тию,/ Его́же ны́не моли́ вся спасти́, пою́щия тя.

Ста́вши на суди́щи, неве́сто, венцено́сице Пелаги́е,/ жела́нию кра́йнему сподо́билася еси́, му́ченице, предста́ти/ и пи́щу восприя́ла еси́ ве́чнаго наслажде́ния.

Ми́ру мир пода́ти твоего́ Жениха́ умоли́, му́ченице Пелаги́е Богому́драя,/ Це́рковь сохрани́ти от напа́стей/ и благода́тию тя пою́щия озари́ти.

Богоро́дичен: Яви́лася еси́ Де́ва и Ма́ти, па́че естества́, Богороди́тельнице,/ Сло́во, заче́ншая О́тчее, воплоще́нно Сие́ ро́ждши,/ И́мже ны́не спаса́еми, Тя, Богоро́дице, велича́ем.

ВЕ́ЧЕР

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

Преподо́бнии отцы́ Богому́дрии,/ слепы́м дае́те свет,/ боля́щим исцеле́ние/ и хромы́м здра́вие,/ ми́лостивно приклоня́ющеся к приходя́щим ве́рою ко хра́му ва́шему/ и прося́щим по́мощи ва́шея,/ засту́пники бо и предста́тели, ве́рнии вси, обрето́хом,/ восхваля́юще вас.

Преподо́бнии отцы́ всечестни́и,/ доброде́тельми возше́дше на колесни́цу,/ к Бо́гу востеко́сте,/ побе́дные по́чести прие́млюще,/ и, я́ко ми́лоть, нам телеса́ ва́ша,/ положе́на во гробе́х, отцы́, оста́вили есте́,/ источа́ти исцеле́ния и прогони́ти ду́хи лука́выя,/ те́мже блажи́м вас, прехва́льнии.

Лико́м по́стническим сочета́стеся/ и укра́шшеся, блаже́ннии, по́стническим житие́м,/ и ны́не в Небе́сных оби́телех живете́, веселя́щеся,/ иде́же лику́ют А́нгели,/ и, све́том Боже́ственным вои́стинну обожа́еми,/ помина́йте любо́вию блажа́щих вас на земли́/ и свято́е ва́ше творя́щих пра́зднество.

Сла́ва, глас 6:

Преподо́бнии отцы́,/ Ники́то, Кири́лле, Ники́форе, Кли́менте и Исаа́кие!/ Во всю зе́млю изы́де веща́ние исправле́ний ва́ших,/ тем на Небесе́х обрето́сте мзду трудо́в ва́ших,/ де́монов разруши́сте полки́/ и А́нгелов достиго́сте чи́ны,/ и́хже житию́ непоро́чно поревнова́сте,/ дерзнове́ние иму́ще ко Го́споду,/ мир испроси́те душа́м на́шим.

И ны́не, Богоро́дичен.

Вход. Проки́мен дне. И чте́ния 3 преподо́бническая

На стихо́вне стихи́ры, глас 4.

Подо́бен: Я́ко до́бля:

Во Христа́ обле́кшеся,/ тле́емаго челове́ка богому́дренно совле́кшеся,/ тем, духо́вною благода́тию при́сно просвеща́еми,/ я́ко зве́зды све́тлыя, ми́рови просия́ли есте́,/ моля́щеся от тли и бед изба́витися/ ве́рою соверша́ющим при́сно честну́ю па́мять ва́шу.

Стих: Честна́ пред Го́сподем/ смерть преподо́бных Его́.

Ны́не пи́щу восприе́млюще,/ и све́том огражда́еми,/ и жизнь ве́чную насле́дствующе,/ к вам прибега́ющия от бед изба́вите,/ и искуше́ний разли́чных, и вся́каго озлобле́ния,/ богому́дренно к Бо́гу дерзнове́ние стяжа́вше/ и любо́вь показу́юще вои́стинну христоподо́бную.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Богоно́сцы вседи́внии,/ Тро́ицы побо́рницы,/ к миродержи́телеву боре́нию му́жескою му́дростию ополчи́вшеся,/ и того́ низложи́сте тве́рдыми сплете́нии,/ и побе́дными увязо́стеся венцы́,/ сего́ ра́ди Боже́ственную и светоно́сную соверша́ем ва́шу па́мять,/ освяща́еми благода́тию.

Сла́ва, глас 8:

Преподо́бнии отцы́,/ Ники́то, Кири́лле, Ники́форе, Кли́менте и Исаа́кие,/ ми́ра красоты́ и пи́щи вре́менныя отню́д возненави́девше,/ и мона́шеское житие́ па́че возлю́бльше,/ А́нгелом собесе́дницы бы́сте/ и свети́льницы многосве́тлии вселе́нней,/ чудесы́, я́коже второ́е со́лнце сия́ете,/ но всех нас помина́йте,/ соверша́ющих свяще́нную па́мять ва́шу,/ мы бо, ча́да ва́ша и о́вцы слове́сных ва́ших уче́ний,/ вас на по́мощь призыва́ем,/ прося́ще ва́ми прия́ти/ мир и ве́лию ми́лость.

И ны́не, Богоро́дичен: Безневе́стная Де́во:

Тропа́рь, глас 1:

Послу́шаша Госпо́дня гла́са,/ до́брии рачи́тели бы́вше,/ благи́й Его́ яре́м на ся взе́мше,/ усе́рдно понесо́сте/ и по́стничества путь дости́гше,/ преподо́бнии отцы́, святи́и чудотво́рцы,/ во́ини Небе́снаго Царя́ Христа́,/ Ники́то, Кири́лле, Ники́форе, Кли́менте и Исаа́кие,/ сего́ ра́ди от Вседержи́тельныя десни́цы венцы́ неувяда́емыми увязо́стеся,/ и Небе́сною сла́вою оде́ястеся,/ и чудотворе́нии обогати́стеся,/ те́мже и о нас моли́ти не преста́йте,/ да получи́м ве́чных благ,/ мы же си́це взыва́ем:/ сла́ва Да́вшему вам к по́двигу кре́пость,/ сла́ва Венча́вшему вас,/ сла́ва Даю́щему ва́ми всем исцеле́ния.

Ин тропа́рь, глас 8:

Свети́льницы све́тлии я́вльшеся,/ добро́ту земну́ю му́дренно оста́виша,/ и всю доброде́тель извы́кли есте́,/ и обрето́ша безсме́ртие,/ посто́м и бде́нием и про́чим воздержа́нием себе́ приноша́ху,/ и ны́не со А́нгелы на Небесе́х Престо́лу Христо́ву предстои́те,/ моли́теся Бо́гу, му́дрии,/ Ники́то, Кири́лле, Ники́форе, Кли́менте и Исаа́кие преподо́бнии,/ умири́ти мир и спасти́ ду́ши на́ша, пою́щих,/ и согреша́ющим оставле́ние грехо́в дарова́ти,/ чту́щим святу́ю па́мять ва́шу.

Сла́ва, и ны́не, Богоро́дичен.

НА У́ТРЕНИ

На Бог Госпо́дь: тропа́рь преподо́бных, дважды. Сла́ва, и ны́не, Богоро́дичен.

По 1-м стихосло́вии седа́лен, глас 4.

Подо́бен: Ско́ро предвари́:

Свети́льницы пресве́тлии и́стины Христо́вы/ Ники́то, Кири́лле, Ники́форе, Кли́менте и Исаа́кие,/ мир просвети́сте уче́нием ва́шим, отцы́ Богоглаго́ливии,/ погуби́вше е́реси злове́рных ху́льник,/ погаси́сте пла́менная ху́лящих смуще́ния,/ тем, я́ко Христо́ви уго́дницы, всех просвеща́ете.

Сла́ва, и ны́не, Богоро́дичен:

Де́во Всенепоро́чная, Я́же Пресу́щнаго Бо́га ро́ждшая,/ со преподо́бными Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая.

По 2-м стихосло́вии седа́лен, глас 8:

Отреко́стеся пло́ти Христа́ ра́ди/ и духо́внии яви́вшеся лю́дем води́телие,/ услы́шасте словеса́ та́йных уче́ний,/ мона́хом же яви́стеся пра́вило пра́вости,/ стра́сти вся кре́постию попра́вше,/ тем и кова́рства бесо́в до конца́ попали́вше,/ и к Нему́ изря́дно всегда́, Богоно́снии отцы́, моли́теся/ грехо́в оставле́ние пода́ти чту́щим любо́вию святу́ю па́мять ва́шу.

Сла́ва, и ны́не, Богоро́дичен:

Се Тебе́ ро́ди родо́в сла́вят, я́коже прорекла́ еси́, Отрокови́це,/ Созда́теля бо всех бысть пала́та и Боже́ственный храм,/ в не́мже всели́ся Вы́шний и пло́тию обложи́ся, да спасе́т нас.

Велича́ние и псало́м избра́нный о́бщии преподо́бным.

По полиеле́и седа́лен, глас 8.

Подо́бен: Прему́дрости:

Егда́, блаже́ннии, к Боже́ственному жела́нию ум свой впери́сте,/ тогда́ оста́вили есте́ вся до́лу влеку́щая мудрова́ния/ и, в пусты́ню все́льшеся, я́ко крин, процвето́сте доброде́тельми, прекра́снии,/ страсте́й искорени́вше те́рние, и в ней насади́сте плоды́ трудо́в ва́ших./ Те́мже и пожа́вше рукоя́ти бога́тство неотъе́млемо на Небесе́х,/ отцы́ преподо́бнии,/ Ники́то, Кири́лле, Ники́форе, Кли́менте и Исаа́кие,/ моли́те Христа́ Бо́га согреше́ний оставле́ние дарова́ти/ чту́щим ве́рою святу́ю па́мять ва́шу.

Сла́ва, и ны́не, Богоро́дичен:

О Тебе́ ра́дуется, Благода́тная, вся́кая тварь,/ а́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́, из Нея́же Бог воплоти́ся и Младе́нец бысть пре́жде век Сый Бог наш,/ ложесна́ бо Твоя́ престо́л сотвори́/ и чре́во Твое́ простра́ннее Небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

И́же на земли́ А́нгели/ и на Небеси́ челове́цы Бо́жии,/ Ники́то, Кири́лле, Ники́форе, Кли́менте и Исаа́кие,/ ми́ра благо́е украше́ние/ и благи́х пита́телей удобре́ние,/ мона́хов и преподо́бных похвалу́,/ вели́ких отце́в почти́м,/ насажде́ни бо в дому́ Госпо́дни/ и процвето́ша пра́ведно, я́ко ке́дри в пусты́ни,/ и умно́жили есте́ ста́до Христо́во слове́сных ове́ц/ в преподо́бии и пра́вде.

Кано́н преподо́бным, глас 8.

Песнь 1

Ирмо́с: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще,/ пои́м Тебе́, Еди́ному Влады́це.

Песнь возсле́м, ве́рнии, Творцу́ на́шему,/ свобо́ждшему уго́дник Свои́х от душегу́бных сете́й врага́,/ и напра́вльшему стези́ их на путь ми́рен,/ и поче́тшему я целе́бными да́ры,/ те́мже и моле́бне возглаго́лем:/ моли́твами святы́х Твои́х спаси́ ду́ши на́ша, Христе́ Бо́же наш, Еди́ный Влады́ко.

Песнь возсыла́ем по́стником Богому́дрым,/ преподо́бным отце́м: Ники́те, побе́де тезоимени́тому,/ и пречестно́му его́ купноро́дному бра́тству, пяточи́сленному ли́ку,/ сии́ бо мо́лят за ны Христа́ Бо́га на́шего, Еди́наго Влады́ку.

Пе́сненно моле́бная приноше́ния от нас прие́млюще, святи́и,/ моли́ти не преста́йте о поле́зных нам, е́же тре́буем:/ Правосла́вию соедине́ния, и на враги́ побе́ды,/ и от всех лют душе́вных и теле́сных избавле́ния,/ я́ко да во хвале́нии пое́м Христа́ Бо́га на́шего, Еди́наго Влады́ку.

Богоро́дичен: Песнь возсле́м, ве́рнии, Пресвято́й Де́ве,/ Честне́йшей Херуви́мов, Ма́тери Небе́снаго Царя́, Христа́ Бо́га на́шего,/ Сия́ бо к Нему́ Засту́пница и Моле́бница за ны непосты́дна и Хода́таица непрело́жна,/ я́ко Небе́сным и земны́м еди́на Влады́чица.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Ты еси́, Миротво́рче Го́споди, дарова́л гра́ду сему́ святы́х Твои́х,/ моле́бников ве́рных и храни́телей кре́пких,/ боля́щим же целе́бников ско́рых./ Ты же дал еси́ власть сим изгоня́ти ду́хов нечи́стых от всех стра́ждующих,/ сего́ ра́ди пое́т Тя дух мой.

Ты еси́ утверже́ние дал, Го́споди, гра́ду сему́ – лик пяточи́сленных святы́х бра́тий,/ Ты же дарова́ им подава́ти свет ослепле́нным,/ сего́ ра́ди пое́т Тя дух мой.

Ты еси́ укрепле́ние хромы́м дарова́л, Го́споди, полк Богому́дрых бра́тий,/ Ты же си́ми подае́ши и разсла́бленным возставле́ние,/ сего́ ра́ди пое́т Тя дух мой.

Богоро́дичен: Ты еси́, Пречи́стая, заступле́ние притека́ющим Ти, Богоро́дице Де́во,/ Ты же родила́ еси́ Христа́ Бо́га на́шего, Све́та омраче́нным,/ и пое́т Тя дух мой.

Ин конда́к, глас 8:

К Бо́гу все свое́ у́мное жела́ние впери́сте/ и к Тому́ невозвра́тно от души́ после́довали есте́,/ а́нгельское житие́ на земли́ пожи́вше,/ и мно́гим бы́сте путь ко спасе́нию,/ отсю́ду же и Христо́с вас просла́ви и да́ром чуде́с обогати́,/ те́мже вси, притека́юще к моще́м ва́шим, зове́м:/ ра́дуйтеся, преподо́бнии отцы́, Ники́то, Кири́лле, Ники́форе, Кли́менте и Исаа́кие,/ моли́твенницы те́плии о душа́х на́ших.

Седа́лен, глас 4:

Я́ко Тро́ицы уго́дницы, и А́нгелом подо́бницы, и святы́м соприча́стницы,/ вели́кому же Новугра́ду свети́льницы,/ преподо́бнии отцы́, святи́и чудотво́рцы,/ пяточи́сленная бра́тия, Ники́то, Кири́лле, Ники́форе, Кли́менте и Исаа́кие,/ Ца́рствие Небе́сное насле́довавше и у Престо́ла Госпо́дня с ли́ки святы́х предстоя́ще,/ моли́те непреста́нно за ду́ши на́ша.

Сла́ва, и ны́не, Богоро́дичен:

Стена́ непобеди́мая нам, христиа́ном, еси́, Богоро́дице Де́во,/ к Тебе́ бо прибега́юще,/ невреди́ми пребыва́ем/ и, па́ки согреша́юще, и́мамы Тя Моли́твенницу,/ тем, благодаря́ще, вопие́м Ти:/ ра́дуйся, Обра́дованная, Госпо́дь с Тобо́ю.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Услы́шаша, Го́споди, святи́и Твои́ пресла́дкий благи́й Твой глас,/ призыва́ющ тружда́ющихся и обремене́нных в поко́й,/ сего́ ра́ди честна́я пяточи́сленная бра́тия, тру́ждшеся, всели́шася во блага́я/ и прия́ша чуде́с да́ры, прославля́ют Твое́ Божество́.

Услы́шасте, прему́дрии, глас Сы́на Бо́жия,/ повелева́ющ взя́ти и́го Его́ свято́е на ся и бре́мя ле́гкое понести́,/ сего́ ра́ди сие́ подъе́мше, всели́стеся во блага́я,/ сла́вяще Его́ Божество́.

Услы́шасте, преподо́бнии отцы́, глас Кро́ткаго Учи́теля своего́ – Христа́,/ сего́ ра́ди, ревну́юще Кро́ткому, смире́ни се́рдцы и кро́тцы нра́вы бы́вше,/ насле́дуете зе́млю благи́х, сла́вяще Его́ Божество́.

Богоро́дичен: Услы́шахом, Госпоже́ Пречи́стая Богоро́дице Де́во,/ от богогла́сных и вои́стинну уразуме́хом и ве́руем благоче́стне,/ я́ко Ты еси́ родила́ Христа́ Бога́, Творца́ на́шего,/ Сему́ у́бо душе́ю и те́лом честь и поклоне́ние прино́сим/ и прославля́ем Его́ Божество́.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Вску́ю помышле́ние свое́ соверша́ше и́нок,/ узре́вый вас, святи́и, верху́ земли́, нетле́нно почива́ющих,/ у́бо пе́рстию покры́ти дерзну́,/ и́скуса же пи́смене не ве́де, я́ко вели́цы есте́ пред Го́сподем, но моле́бне глаго́ля:/ Све́те Незаходи́мый, пути́ моя́ напра́ви, молю́ся.

Вску́ю ны, о и́ноче, пе́рстию покрыва́еши?/ Зау́тра телеса́, версе́ земли́ преподо́бных бра́тий явля́ема, я́ко глаго́лют:/ вонми́ у́бо сим вторы́м явле́нием на́ю и уве́ждь,/ я́ко в жи́зни вре́менней не покры́ ны тьма грехо́вная,/ но обрати́ ны к Себе́ Свет Незаходи́мый и пути́ наши́ испра́ви,/ Ему́же и ны́не о ве́рных мо́лимся.

Вску́ю у́бо мних челове́ческо внят,/ па́ки свети́ла, под спу́дом покрыва́ема вчера́, от него́ погребе́нная,/ днесь же па́ки версе́ земли́ возсия́вшая, па́ки сокрыва́ет,/ но Свет Незаходи́мый трети́цею вас проявля́ет,/ наставля́я того́ в пока́зание о и́стине,/ он же моле́бне возопи́:/ о Све́те Незаходи́мый, пути́ моя́ испра́ви, молю́ся.

Богоро́дичен: Вску́ю у́бо отри́нухся беззако́нии аз, окая́нный,/ от лица́ Твоего́, Ма́ти Све́та Незаходи́маго,/ покры́ бо мя чужда́я тьма, скве́рнаго./ Но, о Пресвята́я Деви́це, Ма́ти Бо́жия,/ обрати́ мя к све́ту за́поведей Сы́на Твоего́/ и пути́ моя́ напра́ви, молю́ся.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Моли́тву пролия́ ко Го́споду,/ прии́де ко святи́телю ста́рец и тому́ возвести́ ви́денная:/ ка́ко у́бо свята́я ва́ю пятиза́рная телеса́/ узре́ версе́ земли́, трегу́бейши возсия́вшая,/ и я́ко сугу́бо покрыва́я вы пе́рстию;/ то́йже, я́ко Боже́ственных таи́нник о ле́пых устрое́ниих, о вас сего́ наказа́в и научи́в вопи́ти:/ я́ко Ио́ну от тли, та́ко и святы́х, от земли́ нетле́нных, Бо́же мой, яви́л еси́.

Моли́тву пролия́ ко Го́споду в ца́рствующем гра́де разсла́блен сый власти́тель,/ и, услы́шан быв, от вас исцели́ся,/ и, запове́данная ва́ми соверши́в,/ пресла́вным свиде́тель и це́лых теле́с ва́ших зри́тель бысть, па́стырю благовести́,/ сей же о вас досто́йная сотвори́ ко Го́споду, вопия́:/ я́ко Ио́ну, си́це и блаже́нных сих телеса́ от тли, Бо́же, сохрани́л еси́.

Моли́тву пролива́юща ко Го́споду,/ прите́кшая к честне́й ра́це ва́шей, преподо́бнии,/ у́бо жена́ главоболе́зненная и де́ва беснова́вшаяся,/ зна́менавшася же у святы́х ва́ших моще́й,/ а́бие целе́б сподо́бишася и ко Го́споду возопи́ша:/ я́ко Ио́ну от тли, Бо́же наш,/ та́ко и от боле́зни сея́ святы́х ра́ди Твои́х уздра́вил ны еси́.

Богоро́дичен: Моли́тву пролива́ю к Тебе́, Пресвяте́й Бо́жии Ма́тери, аз, окая́нный,/ и Тебе́ возвеща́ю печа́ль мою́,/ я́ко зол душа́ моя́ напо́лнися и живо́т мой а́ду прибли́жися,/ но молю́ся, я́ко Ио́на:/ от тли, Бо́же, возведи́ мя.

Конда́к, глас 8:

Благода́ть прие́мше исцеле́нием,/ простира́ете здра́вие су́щим в боле́знех,/ преподо́бнии отцы́ и чудотво́рцы сла́внии,/ Ники́то чу́дне, и Кири́лле блаже́нне,/ и Ники́форе прече́стне, Кли́менте свя́те и Исаа́кие преподо́бне,/ но моли́твами ва́ю проти́вных шата́ние разори́те,/ и боле́зни на́ша исцели́те,/ и грехо́в проще́ние испроси́те,/ да благода́рне воззове́м вам:/ ра́дуйтеся, вели́кому Новугра́ду похвало́ и утвержде́ние.

И́кос:

Всечестны́х Бо́жиих уго́дников, единоро́дных бра́тий/ пяточи́сленный лик пе́сньми и пе́нии духо́вными почти́м,/ Ники́ту преподо́бнаго и Кири́лла преблаже́ннаго,/ Ники́фора всехва́льнаго, и Кли́мента прему́драго,/ и Исаа́кия Богодухнове́ннаго, к ним же воззове́м, си́це глаго́люще:/ ра́дуйтеся, непреобори́мии к Бо́гу подви́жницы;/ ра́дуйтеся, за́поведей Его́ кре́пцыи храни́тели;/ ра́дуйтеся, по́стницы, благоче́стия иску́снии./ Ра́дуйтеся, страда́льцы, проти́ву тьмообра́зных произволе́нием честни́и;/ ра́дуйтеся, во́ини Небе́снаго Царя́ Христа́ вооруже́ннии посто́м и моли́твами./ Ра́дуйтеся, я́ко честна́я своя́ телеса́ от тле́ния чистото́ю жития́ своего́ соблю́дшии;/ ра́дуйтеся, лука́вым духо́м прогони́тели и боля́щим цели́тели./ Ра́дуйтеся, Вели́кому Новугра́ду похвало́ и утвержде́ние.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

И́же от гра́да ва́ю прине́сшаяся ро́ждшими боля́щая де́ва ко всечестне́й ва́шей ра́це, святи́и,/ и моли́твовавши, а́бие цельбы́ сподо́бися/ и, здра́вствовавши, с су́щими с не́ю вопия́ше:/ просла́вивый святы́х, благослове́н Бог оте́ц на́ших.

И́же боле́знию чре́ва и ногу́ одержи́мая иноки́ня, доше́дши к вам, Богому́дрии,/ и моли́тву сотвори́вши, ско́ро цельбу́ получи́/ и, благодаря́щи Бо́га, вопия́ше:/ почти́вый целе́бными да́ры преподо́бных, благослове́н Бог оте́ц на́ших.

И́же от оби́тели ва́ю иноки́ня, боле́зновавшая мно́го руко́ю,/ вы же, преподо́бнии,/ яви́стеся, цельбу́ подаю́ще ей, умаща́юще тро́стию,/ у́бо же моле́бствовавши вы, исцеле́ние прия́т, вопия́ше:/ да́вый целе́б дар пра́ведником сим, благослове́н Бог оте́ц на́ших.

Богоро́дичен: И́же от пра́веднику произше́дшую, от Иоаки́ма и А́нны,/ Пречи́стую Де́ву и Бо́гу Ма́терь/ при́сно пе́сньми почти́м/ и Сы́ну Ея́, Бо́гу на́шему, благодари́в вопие́м:/ благослове́н Бог оте́ц на́ших.

Песнь 8

Ирмо́с: Царя́ Небе́снаго,/ Его́же пою́т во́и а́нгельстии,/ хвали́те и превозноси́те во вся ве́ки.

Царя́ Небе́снаго с во́и а́нгельскими моля́ще, святи́и,/ свяще́нничу супру́жницу, разсла́блену су́щу, исцели́сте,/ у́бо же и мы возвели́чившаго вы Го́спода пое́м и превозно́сим во ве́ки.

Царя́ Небе́снаго с Вы́шними во́инствы мольбо́ю свое́ю на ми́лость преклони́сте, блаже́ннии,/ диа́кону, боле́вшу ногою́, цельбу́ пода́сте,/ вопию́щему просла́вльшаго сих святы́х чудесы́:/ лю́дие, Го́спода по́йте и превозноси́те Его́ во ве́ки.

Царя́ Небе́снаго со все́ми святы́ми Небе́сными си́лами умоли́вше, преподо́бнии,/ бесну́ющуюся жену́ уцелому́дристе,/ и, здра́ва бы́вши, си́це взыва́ше Дарова́вшему очище́ние неду́жным си́ми блаже́нными:/ лю́дие, Го́спода по́йте и превозноси́те Его́ во ве́ки.

Богоро́дичен: Царя́ Небе́снаго ро́ждшую,/ всем святы́м Небе́сным си́лам Цари́цу Де́ву Богоро́дицу,/ Тя мы, смире́ннии, мо́лим изба́вити нас от всех зол,/ да Сы́на Твоего́ и Бо́га на́шего пое́м и превозно́сим во ве́ки.

Песнь 9

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Вои́стинну во Христа́ обле́кшеся, преподо́бная бра́тия/ Боже́ственный по́двиг сконча́вше,/ сего́ ра́ди в ра́йских селе́ниих почива́нием ликовству́юще, блаже́ннии,/ моли́теся о всех нас.

Вои́стинну у́бо вы, преподо́бнии, слу́ги Бо́жии есте́/ и раби́ Госпо́дни и́скреннии,/ и бли́жнии свиде́тельствуют нам целе́бныя да́ры, от ва́ю точа́щаяся,/ но, я́ко име́юще дерзнове́ние к Небе́сному Царю́,/ о всех нас моли́тися не преста́йте, блаже́ннии.

Вои́стинну во Христа́ обле́кшиися и́менем,/ то́кмо аз, окая́нный, де́лы же нечи́ст и скве́рнен есмь,/ но, оба́че любо́вию понужда́емь,/ сие́ вам, преподо́бным, отце́м, моле́ние принесо́х,/ но а́ще что и не удовли́х, проще́ние да получу́ и грехо́в оставле́ние,/ и злых ве́ка сего́ избу́ду, и ве́чных мук свобожде́ние богоприя́тными ва́ю моли́твами.

Богоро́дичен: Вои́стинну у́бо Ты, Пресвята́я Богоро́дице,/ непосты́дная Хода́таица к Бо́гу за ны, многогре́шныя,/ и ны́не у́бо не преста́й, о Пречи́стая Присноблаже́нная Де́во, Засту́пнице на́ша кре́пкая,/ умоля́ющи Сы́на Своего́ и Бо́га на́шего о соедине́нии Правосла́вия,/ и о побе́де на супоста́ты,/ и о ми́ре и здра́вии правосла́вному наро́ду на́шему и всей стране́,/ и буду́щия гее́нны о́гненныя и всех лю́тых муче́ний свободи́ Свои́ми Богома́терними моли́твами.

Свети́лен.

Подо́бен: Посети́л ны есть:

Процвели́ есте́, я́ко фи́никс, дави́дски, отцы́,/ оби́тели яви́стеся Ду́ха Пресвята́го и сла́вни вселе́нней показа́стеся,/ о нас непреста́нно моли́те, почита́ющих ве́рою пречестну́ю па́мять ва́шу, преподо́бнии.

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и но́сиши на Боже́ственную руку́ Пребога́тое Сло́во непреме́нно и неизме́нно.

На хвали́тех стихи́ры, глас 4.

Подо́бен: Дал еси́ зна́мение:

Светле́йше просия́вши, я́коже со́лнце, преподо́бнии,/ всепра́зднственная па́мять ва́ша/ луча́ми облистава́ет ва́ших доброде́тельных дея́ний, блаже́ннии,/ озаря́ющи ве́рных чу́вства све́том чуде́с ва́ших,/ сию́ у́бо пра́зднующе,/ ра́достию вас восхваля́ем/ и ве́рно ублажа́ем всепра́зднственную па́мять ва́шу.

Я́коже друзи́и А́нгели земни́и, пожи́ли есте́,/ воздержа́нием те́ло свое́ удручи́вше, всесла́внии,/ бде́нием и па́мятию сме́ртною/ приле́жно помышля́юще,/ Боже́ственная, отцы́, возраща́ху/ вели́кими восхожде́нии к жела́нию верхо́вному./ Тем вои́стинну прибли́жилися есте́/ к Самому́ Ка́меню краеуго́льному – Христу́.

Стра́сти теле́сныя воздержа́нием утоми́ли есте́,/ и приле́жным моле́нием/ зми́я льсти́ваго сле́зными пото́ки удави́ли есте́,/ отцы́ преподо́бнии,/ и угоди́ли есте́ Бо́гу па́че ине́х, досточу́днии./ Тем вас украси́ Небе́сными дарова́ньми/ Иису́с Человеколю́бец/ и Спас душ на́ших.

Сла́ва, глас 8:

Преподо́бнии отцы́,/ Ники́то, Кири́лле, Ники́форе, Кли́менте и Исаа́кие,/ поучи́вшеся день и нощь в зако́не Госпо́дни,/ сподо́бистеся дре́ва живо́тнаго снасажде́ни бы́ти,/ и плод ва́шего страда́ния венцы́ процвете́,/ дерзнове́ние иму́ще к Подвигополо́жнику Бо́гу,/ и нам испроси́те очище́ние и ве́лию ми́лость.

И ны́не, Богоро́дичен: Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 4: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся. Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 67. Прича́стен: В па́мять ве́чную: