На ма́лой вече́рни хотя́й бде́ние сотвори́ти предстоя́тель да пое́т стихи́ры свята́го апо́стола Андрони́ка, еди́наго от седми́десяти.
НА ВЕЛИ́ЦЕЙ ВЕЧЕ́РНИ
Бла́жен муж:1-й антифо́н. На Го́споди, воззва́х:поста́вим стихо́в 8 и пое́м стихи́ры глас 4.
Подо́бен: Зва́нный свы́ше:
Вы́шнее получи́в зва́ние осия́нием,/ егда́ пло́ти твоея томле́ние удруча́ше мы́сли,/ тогда́ па́че на наде́жду Христо́ву неукло́нно воззре́л еси́/ и отту́ду кре́пкия си́лы прито́ргл еси́;/ суеты́ жела́ние у́мному покори́в ду́ху,/ я́коже магни́т, привле́кл еси́/ тве́рдаго по́двига терпе́ние./ Те́мже и вене́чник показа́лся еси́, Нико́лае,/ живода́тельною десни́цею увенчава́емь Бо́жия Сло́ва,/ Его́же моли́ спасти́ и просвети́ти ду́ши на́ша.
Вы́шняго ликостоя́ния раче́нием уязвле́н,/ егда́ тя сопроти́вных наве́т в темни́це затвори́,/ тогда́ па́че жела́нием бу́дущих ду́шу распали́в,/ я́коже адама́нт, нетоми́мо свое́ утверди́л еси́ се́рдце/ и к страда́нию поте́кл еси́,/ я́коже к исто́чнику жа́ждавый,/ отону́дуже ка́менным мета́нием посы́пан, Нико́лае,/ красе́н вои́стинну Краеуго́льному предста́л еси́,/ Его́же моли́ спасти́ и просвети́ти ду́ши на́ша.
Свы́ше тя зва́нна коне́ц веще́й показа́,/ егда́ низувлеку́щая мудрова́ния повину́л еси́ лу́чшему,/ тогда́, во мно́зей ме́ртвости свою́ прозре́в ду́шу,/ устреми́лся еси́ в безсме́ртие преложи́ти ю страда́нием,/ мук терпе́нием угнета́емь,/ топта́вшей души́ твое́й/ точи́ло соде́лался еси́,/ весе́лия вино́, кровь твою́, точа́щее, Нико́лае,/ вся́кую му́ку пренебре́г о укрепля́ющем тя Христе́,/ Его́же моли́ спасти́ и просвети́ти ду́ши на́ша.
Свы́ше соше́дшее безме́рныя ра́ди любве́ Бо́жие Сло́во,/ егда́ твоея́ души́ нра́ва незы́блемую предузре́ си́лу,/ тогда́ лию́щий грозу́ исто́чник мы́слей затвори́,/ отверза́я ти дея́ние к виде́ния восхо́ду,/ я́коже льва стра́шна к звере́м боя́зненным, укрепи́ тя/ и, я́коже иаки́нф зла́чному по́лю,/ украси́ тя страда́нием, Нико́лае,/ и ны́не, дерзнове́нный му́ченик, предстои́ши Ему́,/ Его́же моли́ спасти́ и просвети́ти ду́ши на́ша.
Сла́ва, глас 3:
Прииди́те, ве́рнии,/ све́тлый по́двиг му́ченика Никола́я торжеству́им/ и пресла́вному Бо́га на́шего смотре́нию удиви́мся:/ ка́ко обновля́ет естество́, обложе́нное страстьми́!/ Ка́ко персть Небе́сным сопричте́ си́лам!/ Ка́ко насле́дники Своего́ Ца́рствия земны́х устро́и,/ я́коже до́блесть явля́ет но́ваго страда́льца,/ смерть животу́ предпоче́тшаго Христа́ ра́ди/ и в чи́не му́ченик Престо́лу Бо́жия сла́вы ны́не предстоя́щаго!/ К нему́ у́бо с ра́достию возопии́м, глаго́люще:/ о му́чеников украше́ние и ве́ры неруши́мый сто́лпе,/ пе́рваго в му́ченицех подо́бниче всехва́льный,/ многострада́льне побе́дниче Нико́лае,/ я́ко име́я дерзнове́ние ко Христу́ Бо́гу,/ моли́ изба́витися нам ви́димых и неви́димых враг/ и всех спасти́ся душа́м,/ и́же при́сно почита́ющих честну́ю па́мять твою́.
И ны́не, пра́здника или́ Богоро́дичен: Ка́ко не диви́мся:
Вход. Проки́мен дне. И чте́ния 3 му́ченическая
(зри 15 мая)
На литии стихиры самогласны, глас 1:
Смире́нием души́ па́мять му́чеников пра́зднуим, ве́рнии,/ вме́сто о́ных до́блестей к лу́чших жела́нию всегда́ простира́еми,/ презира́юще печа́льная па́мятию ве́чных благ;/ вме́сто крове́й свое́ излива́юще к Бо́гу се́рдце/ и не и́мать его́ уничижи́ти сокруше́нна и смире́нна,/ благоволи́т же па́че вся́кия же́ртвы приноше́ния./ Си́це обновля́ется обетша́вшее грехо́м естество́,/ я́ко да, доброде́тельми возводи́ми,/ в чи́не му́ченик со дерзнове́нием предста́нем,/ иде́же Свет незаходи́мый и жизнь присносу́щная./ И́хже моли́твами, Христе́ Бо́же наш,/ всех нас Ца́рствия Твоего́ сподо́би,/ я́ко Благ и Человеколю́бец.
Глас 2: Мудрова́ния плотска́я и вети́йства,/ я́ко дым, ве́тром прогоня́емь, обличи́шася днесь:/ безкни́жный превзы́де си́лою ду́ха/ возмо́жных кре́постию сло́ва и де́лы/ победи́ ди́вный в му́ченицех вои́стинну Никола́й./ Сей бо, на суди́щи стоя́,/ Христа́ испове́да, Бо́га и Творца́ вся́кия тва́ри,/ и нему́дрых мудреце́в терпе́нием посрами́,/ да в сро́дных нас труды́ свои́ми/ соверше́ние ве́ры укрепи́т./ Преоби́дев плоть, преступле́ние пра́деднее в свое́м те́ле испра́ви/ и рай восприя́т,/ отону́дуже Ада́м ниспаде́;/ разреши́в же соу́з естества́ страда́нием,/ вы́сшею связа́ себе́ я́же с Бо́гом жи́знию/ и мо́лится непреста́нно о душа́х на́ших.
Глас 3: Собо́р сво́дит благочести́вых до́бляго му́ченика па́мять,/ и́же вчера́ на́ми зри́мый виде́нием/ преложи́ся днесь ди́вно страда́нием./ Сей бо, муче́нием угнета́емь,/ лу́чших бога́тство и вы́сших сла́ву/ простото́ю победи́ и ра́вный ученико́м Госпо́дним чин получи́,/ свою́ ду́шу земна́го бога́тства лу́чшую непщева́в/ и по Христе́ усе́рдие кровь свою́ пролия́в./ Да постыдя́тся ны́не высокому́дреннии, неве́рием одержи́мии,/ несть бо си́льнейше па́че благоче́стия,/ ниже́ крепча́йше па́че я́же к Бо́гу наде́жды./ Моли́твами Твоего́ му́ченика, Христе́ Бо́же наш,/ Це́рковь Твою́ утверди́ и спаси́ ду́ши на́ша, я́ко Человеколю́бец.
Глас 4: Ра́дуйся о Го́споде, гра́де Софи́е,/ блаже́нна бо земля́ твоя́,/ напи́вшися крове́й му́ченик,/ и́же из тебе́ на Не́бо пресе́льшеся,/ а́нгельския ли́ки сведо́ша,/ к страда́нию их подвиза́ющия,/ и Царя́ сла́вы Христа́ недомы́сленне с высоты́ призре́ти сотвори́ша,/ побе́дныя тем венцы́ простира́юща./ О, та́инства вели́каго:/ земна́я Не́бо бы́ша и челове́к в А́нгела преложи́ся!/ О, глубины́ бога́тства и прему́дрости и ра́зума Бо́жия,/ я́ко иде́же умно́жися грех преступле́нием,/ преизоби́лова благода́ть послуша́нием./ Тля сме́рти жи́знию попра́на бысть/ и свет благоче́стия ве́рным возсия́./ Го́споди, му́ченик Твои́х моли́твами/ мир гра́ду Твоему́ низпосли́/ и вселе́нней да́руй ве́лию ми́лость.
Сла́ва, глас 5:
Воспои́м пра́зднественная,/ торжество́ смотря́юще разу́мныя си́лы,/ я́же, сво́йство до́льних муче́нием претвори́вши,/ превзы́де всяк ум./ Простото́ю бо уче́ния и нра́вы ра́зума в мо́ри бу́рнем плову́ще,/ ры́барския мре́жи Христо́вых лове́ц/ му́ченицы собо́ю испо́лниша/ и чу́дныя бы́ша же́ртвы за ны поже́ршагося Сло́ва Бо́жия./ Прииди́те у́бо, стеце́мся вси,/ и любо́вию се́рдца воззове́м к ним, глаго́люще:/ о победи́телие пресла́внии,/ и́же ве́ры соблюде́нием чин земноро́дных превозше́дшии,/ Гео́ргии прозва́нием единоиме́ннии/ и страда́ний произволе́нием ра́внии,/ Нико́лае же многострада́льне и крепкоду́шне,/ дерзнове́ние я́ко иму́ще ко Христу́ Бо́гу,/ ми́ра ми́рови испроси́те/ и певце́м ва́шим ве́лия ми́лости.
И ны́не, пра́здника или́ Богоро́дичен:
Храм и дверь еси́,/ пала́та и престо́л Царе́в,/ Де́во Всечестна́я,/ Е́юже Изба́витель мой, Христо́с Госпо́дь,/ во тьме спя́щим яви́ся,/ Со́лнце Сый Пра́вды, просвети́ти хотя́,/ я́же созда́ по о́бразу Своему́ рукою Свое́ю./ Те́мже, Всепе́тая,/ я́ко Ма́терне дерзнове́ние к Нему́ стяжа́вшая,/ непреста́нно моли́ спасти́ся душа́м на́шим.
На стихо́вне стихи́ры, глас 8.
Подо́бен: О, пресла́внаго чудесе́:
О, пресла́внаго чудесе́,/ и́же существо́, потемне́вшее преступле́нием/ и тле́нию подпа́дшее Бо́жия руки́ созда́ние/ злым наве́том с небесе́ све́рженнаго денни́цы,/ па́ки исправля́ет Бог Сло́во обновле́нием,/ я́же по нас восприя́тыя пло́ти/ и, прибы́в к естеству́ на́шему, де́йство претвори́,/ отону́дуже отбеже́ тьма гоня́щая/ и нощь просвеще́ния нам возсия́,/ в лу́чшую и соверше́нную нас возводя́ жизнь./ О, каково́ дарова́ние земны́м даде́ся,/ и́мже, Христе́, спаси́ ду́ши на́ша,/ я́ко Милосе́рд.
Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
О, пресла́внаго чудесе́,/ и́же пре́жде нрав сла́бости явля́ше,/ ны́не страда́ния ра́ди/ му́ченическим лико́м совокупля́ется;/ и́же настоя́щая презира́яй,/ а́нгельскими си́лами ужа́сно смотря́ется;/ терпе́нием бо вся́кую скве́рну души́ умы́в,/ ба́нею пакибытия́ кро́ве своея́ оде́явся,/ свы́ше восприя́т чистоты́ осия́ние,/ к нему́же про́чее не каса́ется поро́к страсте́й,/ немощно́е бо естества́ па́че вся́кия си́лы яви́ся,/ и́мже, Христе́, спаси́ ду́ши на́ша,/ я́ко Милосе́рд.
Стих: Насажде́ни в дому́ Госпо́дни/ во дво́рех Бо́га на́шего процвету́т.
О, пресла́внаго чудесе́,/ и́же пре́жде сном до́льних упражня́яйся/ ны́не с Небе́сными си́лами Го́рняя пра́зднует;/ к земны́м влеку́щаго стремле́ния отто́ргся,/ Вы́шняго Ца́рствия насле́дник яви́ся;/ после́дний в му́ченицех бы́вый,/ пе́рвых страда́льцев ра́вным увязе́ся венце́м/ и ра́вную мзду пе́рвых де́лателей бога́тне восприя́,/ вседо́блий страда́лец Христо́в Никола́й,/ тече́ние бо соверши́ ве́ры соблюде́нием./ О, ка́ко подвиза́ся и ка́ко пострада́,/ и́мже, Христе́, спаси́ ду́ши на́ша,/ я́ко Милосе́рд.
Сла́ва, глас 6:
Тезоиме́нное стяжа́вшаго побе́ды и́мя/ страда́нием ве́ры ра́ди, я́же во Христа́ Бо́га,/ ве́село пра́зднественная торжеству́им, ве́рнии,/ и во гла́се хвале́ния воспои́м его́, глаго́люще:/ ра́дуйся, обновле́ние страда́льцев Христо́вых и похвало́,/ и́же собо́ю дерзнове́ние к терпе́нию вдохну́вый всем;/ ра́дуйся, я́ко пе́рвому в му́ченицех Стефа́ну/ ка́меннаго ра́ди побие́ния/ подо́бник све́тел яви́выйся./ Ра́дуйся, я́ко мы́сленным осия́нием Небеса́ отверзо́шася тебе́/ и Сы́на Бо́жия, вене́ц побе́ды тебе́ простира́юща,/ у́мныма све́тло усмотре́л еси́ очи́ма./ Того́ приле́жно моли́, многострада́льне Нико́лае,/ умири́ти язы́ческая, я́же на ны, возноше́ния/ и спасти́ ду́ши на́ша.
И ны́не, пра́здника или́ Богоро́дичен: Творе́ц и Изба́витель мой, Пречи́стая:
На благослове́нии хле́бов тропа́рь свята́го, два́жды и Богоро́дице Де́во:еди́ножды.
Тропа́рь свята́го, глас 3:
Заре́ю Ду́ха обогати́вся, сла́вне,/ и отту́ду восприи́м дерзнове́ние,/ испове́дал еси́ на суди́щи му́жески Тро́ицу Единосу́щную,/ те́мже и ка́мением побива́емь,/ не покори́лся еси́./ Огне́м же сожига́емь,/ обличи́л еси́ пре́лесть безбо́жных,/ многострада́льне свя́те Нико́лае./ Сего́ ра́ди мо́лим тя:/ испроси́ душа́м на́шим/ ве́лию ми́лость.
НА У́ТРЕНИ
На Бог Госпо́дь:тропа́рь пра́здника, два́жды. Сла́ва, свята́го. И ны́не,пра́здника.
По 1-м стихосло́вии седа́лен, глас 1.
Подо́бен: Ка́мени запеча́тану:
Ка́мением по Христе́ побие́н, му́чениче сла́вне,/ Ка́мени краеуго́льному приложи́лся еси́, досточу́дне./ И, земна́я пренебре́г, в Небе́сных вита́еши селе́ниих,/ и́хже ра́ди земноро́дных удиви́л еси́ терпе́нием,/ а́нгельския же чи́ны ра́дости испо́лнил еси́,/ и́же, о́бщее с на́ми соста́вльше весе́лие, взыва́ют:/ сла́ва Да́вшему ти кре́пость,/ сла́ва Венча́вшему тя,/ сла́ва Явльшему тобо́ю всем до́блесть терпе́ния твоего́.
Сла́ва, и ны́не, пра́здника или Богоро́дичен:
Гаврии́лу веща́вшу Тебе́, Де́во, ра́дуйся,/ со гла́сом воплоща́шеся всех Влады́ка в Тебе́, Святе́м Киво́те,/ я́коже рече́ пра́ведный Дави́д:/ яви́лася еси́ ши́ршая Небе́с, поноси́вши Зижди́теля Твоего́./ Сла́ва Все́льшемуся в Тя,/ сла́ва Проше́дшему из Тебе́,/ сла́ва Свободи́вшему нас рождество́м Твои́м.
По 2-м стихосло́вии седа́лен, глас 4.
Подо́бен: Удиви́ся Ио́сиф:
Удиви́шася вси мы́сленных сил чи́нове,/ па́че естества́ в тебе́ до́блесть смотря́юще,/ я́ко ра́вным произволе́нием пе́рвых после́довавша/ и кре́пкую ка́мением ле́ствицу к Небеси́ себе́ испра́вльша,/ схожде́ньми и восхожде́ньми А́нгелов окруже́нную,/ на не́йже Бо́га утвержде́нна обре́л еси́, тебе́ вене́ц подаю́ща./ Си́лы Небе́сныя возвесели́л еси́, Нико́лае, и бе́сы посрами́л еси́,/ мы же, покланя́ющеся, сла́вим Христа́, тебе́ укре́пльшаго.
Сла́ва, и ны́не, пра́здника или́ Богоро́дичен:
Удиви́ся Ио́сиф, е́же па́че естества́ зря, и внима́ше мы́слию,/ и́же на руно́ дождь, в безсе́меннем зача́тии Твое́м, Богоро́дице,/ купину́, огне́м неопали́мую,/ жезл Ааро́нов прозя́бший,/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет и по рождестве́ па́ки Де́вою пребыва́ет.
По полиеле́и седа́лен, глас 8.
Подо́бен: Прему́дрость и Сло́во:
До́блий по́двиг твой, му́чениче чу́дне, украси́ восто́к сия́нием,/ за́пад же озари́ луче́ю позна́ния,/ я́коже бо от све́та чу́вственнаго у́мными восхожде́ньми твои́ми подсо́лнечная вся преизоби́лова./ Кто бо, слы́шав по́двиг твоего́ терпе́ния, не удиви́тся:/ ка́ко, смире́нный, тесноту́ приско́рбнаго пути́ проше́л еси́,/ и креще́ние пакибытия́ обнови́л еси́ свое́ю кро́вию,/ и, па́че све́та блиста́яся, своему́ предста́л еси́ Царю́?/ Те́мже, я́ко хра́брый во́ин, дерзнове́ние к Нему́ име́я,/ помина́й пою́щия тя, страстоте́рпче Нико́лае,/ моля́ Его́ непреста́нно грехо́в оставле́ние дарова́ти/ чту́щим любо́вию честны́я по́двиги твоя́.
Сла́ва, и ны́не, пра́здника или́ Богоро́дичен:
В напа́сти многоплете́нныя впадо́х,/ воста́ бо на мя бу́ря мы́сленнаго движе́ния/ и потопи́ша мя сла́стныя греха́ во́лны;/ весь обнажи́хся духо́вныя кре́пости, окая́нный,/ и прибли́жихся а́ду злых дел закосне́нием;/ и кончи́ны моея́ пости́же мя печа́ль,/ боя́знь бо грози́т мя зде́шних разлуче́ния,/ бесо́вскаго нападе́ния и возду́шных князе́й стра́шнаго истяза́ния./ Те́мже потщи́ся в ну́ждный час исхо́да моего́/ и бесо́вскаго мя кова́рства вы́сша покажи́,/ я́ко да во гла́се ра́дования воспою́ ти:/ Богоро́дице, помози́ ми, согреше́ний проще́ние да́рующи,/ Тебе́ бо стяжа́х наде́жду, раб Твой.
Та́же степе́нна, 1-й антифо́н 4-го гла́са. Проки́мен, глас 4: Пра́ведник, я́ко фи́никc, процвете́т/ я́ко кедр, и́же в Лива́не, умножи́тся. Стих: Насажде́ни в дому́ Госпо́дни во дво́рех Бо́га на́шего процвету́т.Вся́кое дыха́ние:Ева́нгелие от Матфе́я, зача́ло 36.
По 50-м псалме́ стихи́ра, глас 6:
Днесь му́ченичестии ли́цы, в ра́дости пра́зднующее к торжеству́ нас созыва́ют/ ди́внаго в му́ченицех страстоте́рпца Никола́я,/ и́же обновле́ние бысть пресла́вныя па́мяти их,/ не ле́тными кру́ги сие́ соверша́я,/ но свое́ю кро́вию Христа́ просла́вив/ и Правосла́вную ве́ру собо́ю уясни́в./ Укрепи́вый того́, Го́споди, сла́ва Тебе́.
Кано́н свята́го, глас 2, его́же краегране́сие: Но́ваго му́ченика побе́ду воспева́ю, Сло́ве.А в Богоро́дичных сло́зех: Андре́ова.
Песнь 1
Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.
Припе́в: Святы́й му́чениче Нико́лае, моли́ Бо́га о нас.
Несозда́ннаго всех Соде́теля, И́же дре́вле в мо́ри чудоде́йствовавшаго/ и всю си́лу фарао́ню пото́пльшаго,/ му́чеников же в страда́ниих благода́тию укре́пльшаго, совоку́пно воспои́м, я́ко просла́вися.
Огненным твои́м по Христе́ искуше́нием чи́ны преми́рных А́нгел удиви́л еси;/ мы же, восхваля́юще кре́пкое твое́ страда́ние, мо́лим тя:/ испроси́ нам соверше́нное избавле́ние у Го́спода, я́ко просла́вися.
Ве́лия прему́дрость Бо́га на́шего:/ ве́дый созда́ний существо́ пре́жде быти́я/ и ви́дев твоея́ души́ бо́дренное к Нему́ стремле́ние,/ многострада́льным иску́сом изъяви́ жития́ твоего́ исправле́ние, и́мже просла́вися.
Припе́в: Святи́и трие́ му́ченицы, моли́те Бо́га о нас.
А́ще и многомяте́жно жития́ мо́ре,/ но долувлеку́щая страсте́й мечта́ния, до́блии страда́льцы, терпе́нием попра́ша,/ и ти́хому приста́нищу себе́ возложи́ша,/ и произволе́нием муче́ния град Софи́йский просла́виша.
Богоро́дичен: Ада́мский род, к Твоему́ притека́яй покро́ву, Пречи́стая Де́во,/ я́ко си́льна, в кре́пости предвари́ и вся́ких душевою́ющих напа́стей изба́ви,/ ми́лостива су́щи, я́ко Ма́ти Взе́млющаго грехи́ ми́ра.
Песнь 3
Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.
Мученику: Го́рькаго муче́ния многоте́сную проше́д стезю́,/ широ́каго же и па́губнаго уклони́вся пути́,/ ны́не Ца́рствия Небе́снаго селе́ние, я́ко труда́ возме́здие,восприя́л еси́/ и со а́нгельскими си́лами ликова́ние.
Очеса́ устреми́в души́ твоея́ к жела́нию бу́дущих,/ несмуще́нне к страда́нию поте́кл еси́,/ его́же ра́ди безсме́ртия венце́м от Христа́ увяза́лся еси́, Нико́лае,/ и я́ко красе́н победи́тель Ему́ предста́л еси́.
Маловре́менную сла́ву земна́го жития́, я́ко мно́гаго су́етства испо́лненную, презре́л еси́,/ страда́ти же па́че по Христе́ изволя́я, и, ка́мением за Него́ побие́н быв,/ сын и насле́дник Ца́рствия яви́лся еси́.
Мучеником: Умре́ти по Христе́ восхоте́вше, присносла́внии,/ мирска́я пристра́стия и боя́знь жесто́каго муче́ния не поколеба́ша ва́шея ве́ры основа́ния,/ те́мже ны́не, в де́лех жела́ния ва́шего все́льшеся, при́сно ра́дуетеся.
Богоро́дичен: Ни песка́ морска́го исчести́ кто мо́жет,/ ни глубины́ изсле́дити бе́зднам,/ ни Твои́м косну́тися та́инством, Богоро́дице,/ вся бо преми́рныя си́лы превосхо́диши че́стностию./ Те́мже по вели́чию мы́шцы Своея́ снабди́ рабо́в умерщвле́нных,/ ве́рою Сы́ну Твоему́ при́сно покланя́ющихся.
Седа́лен, глас 8
Подо́бен: Прему́дрость и Сло́во:
Прему́дростию па́че слове́с,/ от не́мощи в си́лу по Бо́зе дерзнове́нием к дея́нию себе́ возве́л еси́;/ к виде́нию же восте́к Боже́ственных позна́ний/ и высоту́ дости́г соверше́ннаго богосло́вия тве́рдаго ка́мене ве́ры,/ мглы грехо́вныя а́бие от души́ прогна́л еси́ и дерзну́л еси́ к супоста́том,/ и́же ка́мением ри́зу души́ твоея́ испра́ша/ и подо́бника тя Влады́це твоему́ показа́ша,/ от Едо́ма восходя́щу оброщвле́нну оде́ждею и червле́ну от Восо́ра./ Те́мже кро́вию восхо́д получи́л еси́ Ца́рствия Бо́жия/ и неизрече́нная восприя́л еси́ блага́я,/ страстоте́рпче Нико́лае, моли́ Христа́ Бо́га грехо́в оставле́ние дарова́ти/ чту́щим любо́вию честну́ю па́мять твою́.
Сла́ва, и ны́не, пра́здника или́ Богоро́дичен:
Прему́дрость и О́тчее Сло́во в Тебе́ непреме́нно воплоти́ся во обои́х существа́х кра́йним смотре́нием/ и воста́ви естество́, па́дшее преступле́нием,/ многосмра́дныя скве́рны мир свободи́в./ Того́ моли́ со дерзнове́нием, Ма́ти Чи́стая,/ дарова́ти безме́стным дея́нием исправле́ние/ и ту́нею бла́гостию грехо́м оставле́ние./ Ми́лостива бо еси́ Тя пою́щим/ и вско́ре отвраща́еши сугу́бых враго́в наве́ты./ Те́мже потщи́ся от всего́ се́рдца Тебе́ вопию́щим,/ согреше́ний проще́ние да́рующи,/ Тя бо и́мамы наде́жду, раби́ Твои́.
Песнь 4
Ирмо́с: Услы́шах, Го́спода,/ сла́вное Твое́ смотре́ние/ и просла́вих, Человеколю́бче,/ непостижи́мую Твою́ си́лу.
Мученику: Челове́к сый, сверхчелове́ческая дости́гл еси́, сла́вне Нико́лае,/ исто́чник бо кро́ве и струи́ страда́ния по Христе́ излия́в/ и непостижи́мыя высоты́ косну́вся,/ неизрече́нных ны́не наслажда́ешися благи́х,/ с му́ченическими ли́ки ра́дуяся.
Его́же трепе́щут бе́здны и преиспо́дняя,/ не стерпе́л еси́ ага́ряны злочести́выми в тварь своди́тися,/ де́лом па́че, не́жели сло́вом, кре́пость мудрова́ния своего́ уверя́я,/ го́рькия бо сме́рти не убоя́вся,/ всех ужаси́л еси́ терпе́нием свои́м и Бо́гови присво́ился еси́.
Напа́дшия тя ме́рзости злоче́стия совле́кся/ и вся преоби́дев маловре́менная,/ Христа́ по существу́ Бо́га бы́ти на суди́щи злочести́вых испове́дал еси́/ и добро́ту прекра́сныя твоея́ души́ в терпе́нии твое́м стяжа́ти потща́лся еси́.
Мучеником: Изве́стнаго раче́ния вожделе́вше, присносла́внии му́ченицы,/ ве́чнующаго весе́лия и николи́же ско́рбными прило́ги та́емаго,/ вконе́ц горя́щею любо́вию му́ки усво́исте/ и, ны́не в преми́рная жили́ща все́льшеся,/ с Небе́сными ли́ки при́сно весели́теся.
Богоро́дичен: Де́во Ма́ти Бо́жия,/ Его́же во пло́ти Христа́ породила́ еси́,/ непрело́жна пребы́вша си́лою Божества́ и де́йством,/ Того́ приле́жно со все́ми святы́ми моли́ грехо́м на́шим да́ти соверше́нное разреше́ние/ и пре́жде конца́ жития́ на́шего исправле́ние.
Песнь 5
Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.
Му́ченику: Коль неизсле́дованная насле́дия получи́л еси́ терпе́нием, Нико́лае,/ я́же земны́х ни о́ко ви́де, ни у́хо слы́ша,/ ниже́ на се́рдце челове́ку взыдо́ша когда́,/ но, муче́нием измени́вся, широту́ неизглаго́ланную дости́гл еси́ весе́лия и незаходи́маго све́та.
А́нгельскою любо́вию вои́стинну ко Христу́ распала́емь/ и жела́ние к подо́бию простира́я,/ о́браз честна́го первообра́зия, я́коже сокро́вище, в не́дрех скрыл еси́/ и написа́ние ца́рския печа́ти,/ во́инство же своея́ ве́ры Царю́ своему́ возложи́в, кровь свою́ по Нем пролия́л еси́.
По́двига твоего́ терпе́ние изве́стно всем показа́/ и наде́жду твою́ несолга́нну яви́ Христо́с,/ на Него́же упова́л еси́, Нико́лае;/ сего́ ра́ди ве́рнии ужаса́ются, малоду́шнии:/ отку́ду кре́пость ра́зуму подаде́ся ти,/ а́ще не Призва́вшим тя к страда́нию, присносла́вне.
Мучеником: Оте́ческаго до́ма возвраще́ния/ и, я́же на три́знищи, побе́дных по́честей жела́юще,/ ели́цы до́брыя па́мяти су́ще незабы́тливи,/ ва́ия взе́мше, цве́ты доброде́телей, му́чеников усря́щим, хвалу́ Бо́гови возсыла́юще,/ их ра́ди всем нам да́рующему ве́лию ми́лость.
Богоро́дичен: Раб Твой аз и сын рабы́ни Твоея́, держа́вная всех Цари́це,/ за неусыпа́ющую мольбу́ я́же к Сы́ну Твоему́ и Бо́гу/ приими́ моего́ се́рдца сокруше́ние и оче́с сле́зы,/ моля́щи рожде́ннаго от Тебе́ Судию́,/ я́ко да десны́я ча́сти сподо́бит мя в день Суда́.
Песнь 6
Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
Му́ченику: Быв умерщвле́н, неве́рие зде́шних непщева́ше тя погреши́ти благонаде́ждия путь/ и в мо́ри погруже́нна волна́ми отчая́ния,/ но ты, я́коже Ио́на из чре́ва ки́това, малоденству́я, воззва́в,/ от Го́спода Бо́га твоего́ услы́шан был еси́.
Его́ призыва́ющим Ско́рый Послу́шатель Бог тебе́ в волне́нии жре́бий возложи́,/ в пучи́ну страда́ний самоизво́льне вве́ргнутися,/ но, я́коже по Бо́зе жив от них изше́д,/ градово́м пропове́дуеши спасе́ния покая́ние му́ченическим терпе́нием твои́м.
Де́лом по́двига твоего́ леня́щимся/ проре́кл еси́ не отчаява́ти своего́ спасе́ния,/ но от пре́жних злых отступа́ти и смире́ние лобза́ти:/ страда́нием бо твои́м чу́дный яви́лся еси́ пропове́дник благода́ти позна́ния,/ кровь твою́ неща́дно за Христа́ пролия́в, Нико́лае.
Мучеником: У́бо тве́рдость терпе́ния ва́шего, Гео́ргие,/ земны́ми вещми́ изобрази́ти немо́щно кому́ николи́же:/ в безду́шных адама́нта, в одушевле́нных же се́рдца ва́шего ничто́же крепча́йше,/ вели́ким бо упова́нием с Гео́ргием други́м и Никола́ем сла́вным преидо́сте отсю́ду, ра́дующеся.
Богоро́дичен: Еда́ ли когда́ не вско́ре явля́ешися взира́ющим на си́льный Твой покро́в, Влады́чице ми́ра?/ Ины́я бо наде́жды несть спасе́ния рабо́м Твои́м по Бо́зе,/ зане́ вы́сшую Тебе́ дарова́ сла́ву Рожде́йся из Тебе́/ и прекланя́ется проше́нию Твоему́, Тебе́ то́кмо хотя́щей.
Конда́к, глас 2.
Подо́бен: Вы́шних ища́:
Благоче́стия и́стиннаго побо́рника/ и в беда́х непобеди́маго помо́щника,/ Боже́ственнаго Никола́я в пе́снех восхва́лим:/ сей бо яви́ся в после́дняя ле́та звезда́ пресве́тлая,/ просвеща́ющая ве́рных сердца́,/ и, со А́нгелы ны́не Тро́ице предстоя́,/ непреста́нно мо́лится о всех нас.
И́кос:
Свяще́нный соверша́ет Це́рковь днесь пра́здник,/ све́тло пропове́дающи до́блественныя боле́зни но́ваго му́ченика Никола́я/ и я́же па́че естества́ боре́ния,/ и́миже низложи́в многоко́зненнаго врага́,/ бысть сла́ва страда́льцев и похвала́,/ му́жества же столп и свети́льник всем, благоче́стив того́ чту́щим./ Но я́ко пропове́дник и́стины и вене́чник,/ со А́нгелы ны́не Тро́ице предстоя́,/ непреста́нно мо́лится о всех нас.
Песнь 7
Ирмо́с: Вети́и яви́шася о́троцы любому́дрейшии дре́вле,/ от богоприя́тныя бо души́, богосло́вяще устна́ми, поя́ху:/ Пребоже́ственный отце́в и наш Бо́же,/ благослове́н еси́.
Му́ченику: Всели́в в ду́шу твою́ трие́х, и́же в Вавило́не, отроко́в терпе́ние, присносла́вне,/ превозше́л еси́ я:/ ти́и бо позна́вше, прореко́ша себе́ избавле́ние,/ ты же проста́го страда́ния и сме́рти произво́лил еси́, зовы́й:/ оте́ц на́ших Бо́же, благослове́н еси́.
Отда́в Бо́гу плоть свою́,/ дар соверше́н себе́ вручи́л еси́, многострада́льне;/ по сме́рти же те́ло твое́ огню́ преда́вше злочести́вии,/ я́ко зла́то в горни́ле, очи́стиша/ и нам всесожже́ние Боже́ственное оста́виша, пою́щим:/ оте́ц на́ших Бо́же, благослове́н еси́.
Сокруше́н ка́мением исхо́д твой неве́рным вмени́ся/ и безу́мие им смерть твоя́ возмне́ся,/ но упова́ние твое́, безсме́ртия испо́лнено, яви́л еси́/ и страда́ния о́браз всем показа́лся еси́, пою́щим:/ оте́ц на́ших Бо́же, благослове́н еси́.
Му́чеником: Пою́щих вас и ве́рою покланя́ющихся честны́м ва́шим страда́нием/ ду́ши спасти́ и мир умири́ти моли́теся, святи́и му́ченицы,/ я́коже бо све́та ко тьме ра́знствие,/ си́це выспрь от нас возлете́сте, зову́ще:/ оте́ц на́ших Бо́же, благослове́н еси́.
Богоро́дичен: Обрела́ся еси́ в ро́дех челове́ческих, Богома́ти Присноде́во,/ еди́на До́брая и Преблаже́нная,/ пло́тски объя́вшая и воздои́вшая Его́же трепе́щет вся тварь;/ Того́ приле́жно моли́ упова́ющим на Тя ве́чных благ не погреши́ти.
Песнь 8
Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.
Му́ченику: Е́же к тебе́ на́шего любле́ния не забу́ди, присносла́вне Нико́лае,/ та́мо ны́не водворя́яся, иде́же шум пра́зднующих му́ченик и А́нгел,/ но, я́коже сам измени́лся еси́ лу́чшею жи́знию,/ моли́ся преме́ншимся нам недале́че тебе́ яви́тися, пою́щим:/ благослови́те, вся дела́ Госпо́дня, Го́спода.
Вели́ким страда́нием и кро́ве излия́нием о́гненный столп целому́дрия яви́лся еси́,/ разреши́ша бо ся земна́го естества́ омраче́ния/ и све́тел храм себе́ очи́стил еси́ Пресвято́му Ду́ху,/ Его́же ны́не соверше́ние в себе́ позна́в, зове́ши:/ благослови́те, вся дела́ Госпо́дня, Го́спода.
Адама́нтски кровь свою источи́л еси́, не посрами́в упова́ния своего́,/ но восте́кл еси́ в соверше́нную к Царю́ всех высоту́,/ Его́же приле́жно моли́ ка́плей слез на́ших не отврати́тися,/ с пла́чем и се́тованием Ему́ зову́щих:/ благослови́те, вся дела́ Госпо́дня, Го́спода.
Мучеником: Ю́же ны́не пра́зднуем,/ честна́я па́мять ва́ша у́тро яви́ся духо́внаго и при́снаго весе́лия гра́ду ва́шему,/ в не́мже пострада́вшие, вели́ких и ди́вных сподо́бистеся,/ но и вся подсо́лнечная ва́ше му́дрое терпе́ние ублажа́ет, воспева́ющи:/ благослови́те, вся дела́ Госпо́дня, Го́спода.
Богоро́дичен: Весе́лие ве́чное и ра́дость ми́ру ро́ждшая, возвесели́ ду́ши на́ша,/ я́ко да в тишине́ се́рдца богоуго́дни всегда́ яви́мся,/ за́поведь Сы́на Твоего́ соверша́юще,/ И́же в не́мощь на́шу нас ра́ди обо́лкся,/ си́льных нас в кре́пости Боже́ственней соде́ла.
Песнь 9
Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.
Му́ченику: Си́льных в сло́ве и кре́пких держа́вою прови́дев злове́рие, Нико́лае,/ и ме́рзость вмени́в с ни́ми вселе́ние,/ сла́дце па́че восприя́л еси́ сме́ртию ско́рою избежа́ти тех злово́ния/ и, ка́мением побие́н, ко Христу́ восте́кл еси́, ра́дуяся.
Лжу тще́тну вмени́в ага́рян пре́ния,/ не уве́девших смотре́ния Бо́жия, ни та́йны позна́вших,/ но усты́ ху́льными глаго́лавших на Бо́га непра́вду,/ Христа́, Бо́жию си́лу и Прему́дрость, пред ни́ми испове́дал еси́/ и Его́ ра́ди стра́шныя всем сме́рти не ужа́снулся еси́.
О́ком мы́сленным разсмотре́в привре́менная,/ я́ко вся се́ни и сну подо́бна,/ сме́рти же не убоя́вся, но па́че бла́го вмени́в, е́же по Христе́ во́лею умре́ти,/ с Ним просла́вился еси́ и стра́шен сме́рти показа́лся еси́,/ сию́ попра́в во́льным терпе́нием, подо́бяся Влады́це своему́.
Ве́ру не на́гу показа́л еси́ Бо́гу твоему́, Нико́лае,/ па́че же сопря́гл еси́ ей дела́ пра́вды терпе́нием:/ что бо си́льнейше твои́х муче́ний и что приболе́зненно па́че сме́рти,/ на ню́же ты укрепи́вся во́льным произволе́нием,/ Го́сподеви обе́ты своя́ в де́лех ве́ры прине́сл еси́.
Му́чеником: Е́же о́ко не ви́де, ни у́хо слы́ша,/ ни на се́рдце челове́ка взы́де угото́ванное вам возме́здие,/ его́же ра́ди до́брыми преложе́ньми во́льную по Христе́ смерть восприя́сте,/ и ны́не, со А́нгелы водворя́ющеся, при́сно мо́лите Христа́ Бо́га на́шего,/ да сопричте́мся ва́шему ликостоя́нию.
Богоро́дичен: А́ще и согреша́ем, раби́ Твои́, Ма́ти Жива́го Бо́га,/ но оба́че, Твои́ми хода́тайствы объе́мши,/ моли́ Сы́на Твоего́, да не вконе́ц разгори́тся на нас я́рость Его́,/ ино́го бо Бо́га не ве́мы, ра́зве Того́, смире́ннии,/ ниже́ крепча́йшия по́мощи и́мамы, ра́зве Тебе́, Влады́чице ми́ра.
Свети́лен, глас 3
Подо́бен: Посети́л ны есть:
Посеще́ния от преми́рныя сподо́блься сла́вы, великому́чениче Нико́лае,/ и муче́ние терпе́нием победи́в,/ А́нгелы удиви́л еси́ и бе́сы посрами́л еси́/ простото́ю нра́ва Христа́ Бо́га на́шего.
Сла́ва, и ны́не, пра́здника или́ Богоро́дичен:
Покажи́ ско́ро си́лу Твою́, Ма́ти Жива́го Бо́га,/ и кре́пость дел Твои́х на нас, под кров Твой прибега́ющих,/ ничто́же бо сопротивля́ется вла́сти Твое́й, Влады́чице Всемогу́щая.
На хвали́тех поста́вим стихо́в 4 и пое́м стихи́ры, глас 4.
Подо́бен: Я́ко до́бля:
Сла́вных по́двиг твои́х терпе́нием, страстоте́рпче Нико́лае,/ А́нгелы с челове́ки удиви́л еси́:/ ка́ко, пло́ти сопряже́нный,/ боле́зни попра́л еси́/ любве́ ра́ди Христо́вы/ и, я́коже и́скра о́гненная,/ на Не́бо вскочи́л еси́ си́лою ду́ха,/ иде́же ны́не досто́йно ублажа́ешися,/ я́ко учени́к и́стинный/ во́лею по нас пострада́вшаго Христа́ Бо́га на́шего,/ Его́же моли́ от тли и бед изба́витися/ ве́рою соверша́ющим всечестну́ю па́мять твою́.
Твои́м Христа́ раче́нием, страстоте́рпче Нико́лае,/ кре́пкою любо́вию и си́лою ду́ха,/ по́двигом терпе́ния и ра́нами муче́ний/ торжествова́ти с Небе́сными земны́х устро́ил еси́,/ и во еди́но обои́х собра́/ ди́вное твоего́ испове́дания вели́чество,/ е́же си́льных чу́вства потрясе́,/ твое́й дивя́щихся непоколеби́мей ве́ре/ в Христа́ Бо́га на́шего,/ Его́же моли́ от тли и бед изба́витися/ ве́рою соверша́ющим всечестну́ю па́мять твою́.
Яко преизя́щнаго любому́дрия,/ страстоте́рпче Нико́лае,/ и си́лы духо́внаго ра́зума испо́лнен,/ про́стаго же и нехи́тростнаго нра́ва,/ вети́йная плете́ния посрами́л еси́/ твоего́ смы́сла крепкоду́шием/ и я́ко река́, наводне́на и́стинныя прему́дрости/ и орга́н изря́ден показа́лся еси́ Боже́ственнаго Ду́ха,/ и дом красе́н Святы́я Тро́ицы, Бо́га на́шего,/ Его́же моли́ от тли и бед изба́вится/ ве́рою соверша́ющим всечестну́ю па́мять твою́.
И́стины позна́ние и правосла́вия путь/ не си́лою сло́ва яви́ша нам, до́блии страда́льцы,/ но дея́нием потща́шася на себе́ показа́ти,/ терпе́нием и ра́нами свое́ обложи́вше те́ло:/ ов у́бо, огню́ зе́льному совоку́плься, всесожже́ние Бо́гу яви́ся,/ ов же, в высоту́ пове́шен, к животу́ Небе́сному пре́йде,/ сей же, ка́мением посыпа́н, Краеуго́льному присво́ися./ Те́мже получи́ша Ца́рство безсме́ртное, ра́дующеся,/ и мо́лятся Бо́гу о душа́х на́ших.
Сла́ва, глас 8:
И́стинный и́же по о́бразу соблю́дше, му́ченицы, ум-влады́ку/ и не просте́рше мы́сленных рук к отрече́нному ра́зума дре́ву,/ кра́сному виде́нием и сме́ртному дея́нием,/ пра́деднее обнаже́ние покры́та кре́постию страда́ния/ и, я́ко лучи́ но́выя луны́, источи́ша осия́ние,/ к ни́мже воззове́м, глаго́люще:/ о сердики́йская похвало́/ и вселе́нныя в ве́ре утвержде́ние,/ я́ко иму́ще дерзнове́ние ко Христу́ Бо́гу на́шему,/ ми́ра ми́рови проси́те/ и душа́м на́шим ве́лия ми́лости.
И ны́не, пра́здника или́ Богоро́дичен:
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
Славосло́вие вели́кое и отпу́ст.
НА ЛИТУРГИ́И
Блаже́нны от кано́на свята́го пе́сни 3-я и 6-я. Проки́мен, глас 4: Возвесели́тся пра́ведник о Го́споде/ и упова́ет на Него́.Стих: Услы́ши, Бо́же, глас мой, внегда́ моли́ти ми ся к Тебе́.Апо́стол к Тимофе́ю, зача́ло 292. Аллилу́ия, глас 4: Святы́м, и́же суть на земли́ Его́, удиви́ Госпо́дь вся хоте́ния Своя́ в них.Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся.Ева́нгелие от Иоа́нна, зача́ло 52. Прича́стен: В па́мять ве́чную: