ВЕ́ЧЕР
На Го́споди, воззва́х:стихи́ры глас 4.
Подо́бен: Я́ко до́бля:
Све́тло возсия́, я́ко со́лнце,/ светоза́рная па́мять твоя́,/ луча́ми облиста́ющи твои́х доброде́тельных дея́ний,/ всеблаже́нне Иси́доре,/ и озаря́ющи ве́рных ра́зумы/ све́том чуде́с твои́х./ Сию́ у́бо пра́зднующе,/ ра́достно тя сла́вим и ве́рно ублажа́ем,/ уго́дниче Христа́ Бо́га на́шего,/ Его́же моли́ от тли и бед изба́витися/ ве́рою пра́зднующим всечестно́е твое́ успе́ние.
Земны́й а́нгел и небе́сный челове́к/ яви́лся еси́, преблаже́нне,/ исто́чник умиле́ния,/ ми́лости тече́ние,/ пучи́на чуде́с, струя́ исцеле́ний,/ Иси́доре досточу́дне,/ ма́слина Бо́жия, вои́стинну плодови́та,/ еле́ем трудо́в твои́х/ просвеща́я ве́рно хва́лящих тя/ и моля́ Человеколю́бца от бед изба́вити/ любо́вию чту́щия всечестну́ю па́мять твою́.
Ра́зум твой, блаже́нне,/ Боже́ственным све́том сия́я,/ теле́сныя стра́сти превзы́де,/ не приме́сен до́льним нося́ о́браз/ и вообража́я себе́ Боже́ственными доброде́тельми,/ показа́ся весь светообра́зен/ поспеше́нием Ду́ха Пресвята́го,/ Иси́доре Богому́дре,/ пра́ведным похвала́./ С ни́миже моли́ Христа́ Бо́га на́шего/ от бед изба́вити пою́щия тя.
И́ны стихи́ры глас 8.
Подо́бен: О, пресла́внаго чудесе́:
Блаже́нне Иси́доре Богому́дре,/ чи́стая твоя́ душа́,/ правове́рным смы́слом сия́ющи,/ облиста́ющи доброде́телей светлостьми́,/ озаря́ет ве́рных исполне́ние,/ бесо́вскую тьму отгоня́щи./ Те́мже я́ко прича́стника тя невече́рней благода́ти/ ублажа́ем благоче́стно вси, досточу́дне.
Име́я ду́шу ми́лостивну,/ и чист по́мысл,/ и се́рдце бо́дро, ве́ру небла́знену/ и любо́вь вои́стинну нелицеме́рну,/ от земли́ преста́вился еси́ к Небе́сным/ и с ли́ки пра́ведных водворя́ешися./ Те́мже тя почита́ем свяще́нными пе́сньми/ и благоче́стно вси сла́вим,/ досточу́дне Иси́доре.
Боже́ственными уче́нии укрепля́яся,/ стра́сти плотски́я от души́ отгна́л еси́/ и Святе́й Тро́ице селе́ние преочище́нное был еси́./ Тем к Боже́ственней жи́зни преста́вился еси́,/ Бо́гу соблюда́ющу,/ и ны́не невреди́мо твое́ блаже́нное те́ло/ Боже́ственным судо́м, и́мже Сам весть,/ прославля́яй тя я́ве, Иси́доре.
Сла́ва, глас 1:
Я́ко тече́ние до́бре сконча́вшему,/ и ве́ру соблю́дшему непоро́чну,/ и враги́ безпло́тныя терпе́нием свои́м попра́вшему,/ возложи́ся на честны́й твой верх/ побе́ды вене́ц пресве́тел/ от руки́ Вседержи́теля Бо́га,/ Его́же ра́ди мир и я́же в нем су́етства преоби́дел еси́./ Тем и свята́я твоя́ чи́стая душа́/ на Небеса́ востече́, ра́дующися,/ пра́ведных же ли́цы срето́ша тя, веселя́щеся,/ и Небе́сная селе́ния све́тло восприя́ша;/ блаже́нное же и честно́е те́ло твое́/ на земли́ пребыва́ет нетле́нно,/ ве́рным подая́ исцеле́ние./ Те́мже ве́рою пра́вою и те́плым жела́нием/ свято́му твоему́ гро́бу припа́дающе,/ Богому́дре Иси́доре,/ про́сим испроси́ти у Христа́ Бо́га на́шего,/ гра́ду твоему́ нелоколеби́му и безмяте́жну/ пребы́ти от наве́т вра́жиих и пога́нскаго наше́ствия,/ во́инству на́шему побе́ды на враги́,/ умире́ния ми́ру/ и спасе́ния душа́м на́шим.
И ны́не, пра́здника или́ Богоро́дичен.
Чтения 3 (зри 21 мая)
На стихо́вне стихи́ры глас 2.
Подо́бен: До́ме Евфра́фов:
Дом и жили́ще Ду́ха Пресвята́го,/ му́дре Иси́доре, был еси́,/ те́мже и нас/ до́мы Тому́ соде́лай,/ святу́ю твою́ па́мять почита́ющих.
Стих: Возвесели́тся пра́ведник о Го́споде/ и упова́ет на Него́.
Житие́ твое́, я́ко со́лнце,/ в сердца́ ве́рных возсия́,/ зарю́ чуде́с испуща́я./ Те́мже и нас све́том невече́рним озари́,/ всечестну́ю твою́ па́мять почита́ющих.
Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
Не преста́й моля́ся, Иси́доре,/ о при́сных твои́х рабе́х,/ и́хже духо́вным твои́м житие́м просвети́л еси́,/ да вси честно́е твое́ успе́ние,/ веселя́щеся, почита́ем.
Сла́ва, глас то́йже. Самогла́сен:
От нече́стия во благоче́стие прише́дый,/ све́том разу́мным от Бо́га просвеще́н быв,/ возненави́дел еси́ оте́ческое безбо́жие/ и возлюби́л еси́ и́стинную ве́ру Христо́ву,/ гра́да на́шего я́ко дости́гнув/ ив нем чи́стым и непоро́чным житие́м Го́сподеви угоди́л еси́/ и мно́гия лю́ди удиви́л еси́ чудесы́,/ Богоблаже́нне Иси́доре./ Но ны́не име́я дерзнове́ние ко Влады́це всех Бо́гу,/ моли́ о и́же ве́рою творя́щих всечестну́ю твою́ па́мять,/ притека́ющих со усе́рдием к чуде́сному гро́бу твоему́,/ изба́витися страсте́й душе́вных же вку́пе и теле́сных/ и вся́ческих бед и искуше́ний/ и спасти́ся душа́м на́шим.
И ны́не, пра́здника или́ Богоро́дичен.
Тропа́рь, глас 4:
Просвети́вся Боже́ственною благода́тию, Богому́дре,/ целому́дрием мно́гим и терпе́нием/ во вре́менней жи́зни тече́ние до́бре сконча́л еси́./ Тем и по сме́рти яви́ тя све́тлость жития́ твоего́:/ источа́еши бо исцеле́ний благода́ть/ и́же с ве́рою притека́ющим ко свято́му твоему́ гро́бу,/ Иси́доре блаже́нне,/ моли́ Христа́ Бо́га,/ да спасе́т ду́ши на́ша.
Ин тропа́рь, глас то́йже:
От земли́ Воззва́вый тя на ве́чныя оби́тели,/ соблюда́ет и по сме́рти те́ло твое́ невреди́мо,/ свя́те Иси́доре,/ ты бо в целому́дрии и чистоте́ жития́ пожи́л еси́, блаже́нне,/ не оскверни́в своего́ телесе́,/ те́мже со дерзнове́нием Христа́ Бо́га моли́/ спасти́ся душа́м на́шим.
Ин тропа́рь, глас 1:
Боже́ственною свы́ше просвети́вся благода́тию, Богому́дре,/ мно́гим терпе́нием во вре́менней жи́зни тече́ние соверши́л еси́,/ те́мже и по успе́нии источа́еши чудеса́/ и́же с ве́рою приходя́щим к ра́це моще́й твои́х, Иси́доре всеблаже́нне./ Сла́ва Да́вшему ти кре́пость,/ сла́ва Просла́вльшему тя в чудесе́х,/ сла́ва Де́йствующему тобо́ю всем исцеле́ния.
НА У́ТРЕНИ
По 1-й стихоло́гии седа́лен, глас 8.
Подо́бен: Прему́дрости:
От ю́ности, я́ко свети́льник, возсия́л еси́, блаже́нне,/ зе́льным воздержа́нием умертви́л еси́ плотска́я взыгра́ния,/ тем и на высоту́ восте́кл еси́ Богоразу́мия, пресла́вне,/ пожи́в в ми́ре богоуго́дно,/ посрами́л еси́ бесо́вская ополче́ния, Иси́доре всеблаже́нне./ Сего́ ра́ди вопие́м ти:/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, пра́здника или Богоро́дичен:
В ти́ну впад грехо́в, и несть мне постоя́ния,/ лю́те потопи́ мя бу́ря прегреше́ний./ Но я́ко ро́ждши Сло́ва, еди́наго Человеколю́бца,/ на мя, раба́ Твоего́, при́зри и изба́ви мя вся́каго греха́,/ и страсте́й душетле́нных, и вся́каго озлобле́ния лука́ваго уби́йцы,/ Богоро́дице Неискусому́жная/ моли́ Христа́ Бо́га грехо́в оставле́ние да́ти ми,/ Тебе́ бо наде́жду и́мам, раб Твой.
По 2-й стихоло́гии седа́лен, глас 4:
Я́ко в дому́ вои́стинну, на ме́сте пу́сте,/ посреди́ безу́мных челове́к всели́вся, Богому́дре Иси́доре,/ вся́ко озлобле́ние претерпева́я, до́брыя де́тели, я́коже фимиа́м благово́нен/ и же́ртву благоприя́тну, Бо́гу прине́сл еси́./ Те́мже, дерзнове́ние стяжа́в к Нему́,/ моли́ дарова́ти очище́ние согреше́ний/ ве́рою хва́лящим святу́ю па́мять твою́.
Сла́ва, и ны́не, пра́здника или́ Богоро́дичен:
Прибе́жище су́щим в лю́тых,/ премене́ние к Бо́гу согреша́ющим, Пречи́стая Влады́чице,/ спаси́ нас от вся́каго обстоя́ния, и озлобле́ния челове́ческа,/ и стра́шнаго муче́ния, и страсте́й безче́стия,/ несумне́нною ве́рою Тя при́сно призыва́ющих, Де́во Всепе́тая.
По полиеле́и седа́лен, глас 8.
Подо́бен: Прему́дрости:
Я́ко врача́ прему́дра и уго́дника Госпо́дня богоприя́тна,/ к чуде́сному твоему́ гро́бу прикаса́ющеся, Богому́дре,/ соше́дшеся любо́вию и ве́рою, во псалме́х и пе́ниих возра́дуемся, сла́вяще Христа́,/ такову́ю благода́ть тебе́ дарова́вшаго исцеле́ний, Иси́доре всеблаже́нне./ Моли́ Христа́ Бо́га согреше́ний оставле́ние дарова́ти/ ве́рою и любо́вию пра́зднующим всечестну́ю па́мять твою́.
Сла́ва, и ны́не, пра́здника или́ Богоро́дичен:
Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.
Степе́нна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде/ и упова́ет на Него́.Стих: Услы́ши, Бо́же, глас мой, внегда́ моли́ти ми ся к Тебе́. Ева́нгелие от Матфе́я, зача́ло 43.
По 50-м псалме́ стихи́ра, глас 6:
Челове́че Бо́жий,/ ве́рный ра́бе, уго́дниче Христо́в,/ соверши́телю Того́ Боже́ственных,/ му́жу ди́вный в чудесе́х,/ сто́лпе и утвержде́ние гра́ду на́шему,/ Ца́рствия Небе́снаго насле́дниче,/ Богоблаже́нне Иси́доре,/ дерзнове́ние име́я ко Христу́ Бо́гу,/ не преста́й моля́ся о душа́х на́ших.
Кано́н пра́здника со ирмосо́м на 6 и свята́го на 8, глас 8.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.
Выспрь житие́ стяжа́в благодея́нием Боже́ственным/ и весь светообра́зен быв, просвеще́ние ми ниспосли́,/ я́ко да, ра́дуяся, восхвалю́ пресве́тлое житие́ твое́,/ е́же до́бре соверши́в, восприя́л еси́, я́же угото́ва Бог лю́бящим Его́,/ Богому́дре Иси́доре.
Боже́ственным разже́гся жела́нием, вся оте́ческия отве́ргл еси́ нра́вы,/ Христа́ же обрести́ потща́лся еси́./ И сего́ ра́ди, бе́гая, удали́вся нечести́вых сожи́тельства,/ благоче́стия све́том озаре́н был еси́/ и Боже́ственными доброде́тельми укра́шен, досточу́дне Иси́доре.
Дрема́ния ве́ждома не дал еси́, блаже́нне Иси́доре,/ ниже́ поко́я твоему́ те́лу, до́ндеже сном пра́ведным почи́в,/ и непоколеби́м был еси́, я́ко столп, враг неви́димых ополче́нием,/ Бо́гу при́сно предстоя́ во всено́щном стоя́нии и славосло́вии,/ те́мже от Него́ ны́не просла́вился еси́.
Богоро́дичен: Я́ко ло́жницу Боже́ственную и ле́ствицу,/ к Небе́сней возводя́щую высоте́ челове́ческое естество́,/ кади́льницу же Невеще́ственнаго и Светоно́снаго У́гля,/ в ложесне́х поне́сшу Богоизбра́нную Отрокови́цу Мари́ю, вси ублажа́ем, зову́ще:/ ра́дуйся, Чи́стая, ро́ждшая Нача́льника жи́зни на́шея.
Катава́сия пра́здника.
Песнь 3
Ирмо́с: Утвержде́й в нача́ле небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, еди́не Человеколю́бче.
Глаго́лом Боже́ственным после́дуя и сим вы́ну поуча́яся,/ испо́лнился еси́ вод благода́тных, и источи́л еси́ пото́ки чуде́с,/ и, чуждь быв вся́каго плотска́го жела́ния,/ воспева́я, глаго́лал еси́ Бо́гу, Иси́доре:/ несть свят, па́че Тебе́, Человеколю́бче.
Благоутро́бие стяжа́л еси́, ми́лостивому Бо́гу подо́бствовав,/ расточи́л еси́ бога́тство убо́гим;/ те́мже на Небесе́х присносу́щее блаже́нство тебе́ угото́вася,/ его́же получи́в, Иси́доре, вопие́ши:/ несть свят, па́че Тебе́, Человеколю́бче.
Благоугоди́в Зижди́телю де́лы Боже́ственными, насле́довал еси́ благи́х восприя́тие;/ дре́ва у́бо живо́тнаго при́сно наслажда́яся, блаже́нне Иси́доре, воспева́еши непреста́нно:/ несть свят, па́че Тебе́, Человеколю́бче.
Богоро́дичен: Святы́х А́нгел су́щи святе́йши, Я́же сих Соде́теля во Твое́й утро́бе поне́сшая/ и ро́ждшая, Богоотрокови́це Чи́стая, Изба́вителя челове́ком./ Те́мже Ти согла́сно вопие́м:/ несть свя́ты и пречи́сты, ра́зве Тебе́, Влады́чице.
Ин конда́к, глас 4:
Ве́рою па́мять твою́, блаже́нне, соверша́ющия,/ соблюда́й от вся́кия зло́бы и собла́зна змии́на,/ и́маши бо дерзнове́ние ко всех Влады́це, Христу́ Бо́гу,/ Его́же моли́ изба́витися от бед и напа́стей рабо́м твои́м,/ Богому́дре Иси́доре.
Седа́лен, глас 4:
От земли́ Воззва́вый тя на ве́чныя оби́тели/ соблюда́ет и по сме́рти неврежде́но те́ло твое́, свя́те:/ ты бо в целому́дрии и чистоте́ житие́ по́жил еси́,/ не порабо́тився плотски́м страсте́м, Иси́доре Богому́дре./ Те́мже тя любо́вию почита́ем.
Сла́ва, и ны́не, пра́здника или́ Богоро́дичен:
Стена́ непобеди́мая нам, христиа́ном, еси́, Богоро́дице Де́во:/ к Тебе́ бо прибега́юще, невреди́ми пребыва́ем/ и, па́ки согреша́юще, и́мамы Тя Моли́твенницу./ Тем, благодаря́ще, вопие́м Ти:/ ра́дуйся, Благода́тная, Госпо́дь с Тобо́ю.
Песнь 4
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
За́поведей Боже́ственным соверши́тель яви́вся,/ неукло́нным ра́зумом, всеблаже́нне, оте́ческаго небре́гл еси́ неве́рствия,/ от ю́ности бо житие́ име́л еси́ нескве́рно/ и ми́лостивей ра́зум, досточу́дне, зовы́й непреста́нно:/ си́ле Твое́й сла́ва, Человеколю́бче.
Ни ми́ра возмуще́ние, ни вла́сти удержа́ние, ни сла́ва вре́менная,/ ниже́ тле́емое бога́тство твоея́ к Бо́гу любве́ возмого́ша уклони́ти, Иси́доре./ Но благоволи́л еси́ вои́стинну житие́ изря́дно,/ Боже́ственным раче́нием укрепля́емь, взыва́я при́сно:/ си́ле Твое́й сла́ва, Человеколю́бче.
Возвыша́яся Боже́ственными повеле́нии вы́ну,/ враг неви́димых смири́л еси́ возвыше́ния умиле́ния слеза́ми,/ я́коже кедр, при́сно сый напоя́емь, прия́л еси́ исцеле́ний де́тель, Иси́доре,/ судо́м пра́ведным вся́ческая оправда́ющего, Ему́же предстоя́, вопие́ши:/ си́ле Твое́й сла́ва, Человеколю́бче.
Богоро́дичен: Преукра́шена Боже́ственною сла́вою,/ вся́ческая от не су́щих сло́вом соста́вльшаго Бо́га Сло́ва родила́ еси́,/ Челове́ка вои́стинну бы́вша,/ Его́же о нас, рабе́х Твои́х, моля́щи не преста́й,/ Богоро́дице Ма́ти Присноде́во, ве́рою Тебе́ зову́щих:/ си́ле Твое́й сла́ва, Влады́чице.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя напра́ви, молю́ся.
Све́том невеще́ственным трисия́ннаго Божества́ озаре́н, досточу́дне Иси́доре,/ нощь жития́ настоя́щего непоткнове́нно преше́л еси́/ и ны́не, в ве́чных оби́телех с ли́ки преподо́бных водворя́яся,/ помина́й нас, всечестну́ю твою́ па́мять на земли́ торжеству́ющих.
Ны́не е́же о тебе́ чу́до ве́лие зри́мо есть/ и у́жаса испо́лнено, Богоблаже́нне Иси́доре:/ ка́ко на мно́га ле́та земле́ю покрове́нно нетле́нно твое́ те́ло,/ во гро́бе лежа́що, соблюда́ется,/ судьба́ми, и́миже весть Бог, прославля́я тя.
Богоприя́тному твоему́ начина́нию и чу́дному соверше́нию по Христе́ жития́ твоего́/ А́нгельстии чи́ни удиви́шася, Богому́дре Иси́доре,/ и́бо во пло́ти сый, тех житию́ подража́тель яви́лся еси́./ Те́мже и дар прозре́ния от Бо́га прия́л еси́,/ е́же пресла́вная твори́ти чудеса́.
Богоро́дичен: Моли́ из Тебе́ ро́ждшагося Го́спода, Де́во Отрокови́це Чи́стая,/ сохрани́ти рабы́ Твоя́ от сопроти́вных обстоя́ний и бесо́вскаго искуше́ния,/ Тя, вои́стинну Бо́жию Ма́терь, испове́дающих,/ и страсте́й душетле́нных свободи́ти, и ве́чнаго осужде́ния.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Струи́ благода́ти, я́ко ми́ро благово́нно, от свята́го твоего́ гро́ба истека́ют, всебога́те,/ веселя́ще сердца́ ве́рных, от любве́ к тебе́ приходя́щих,/ и прогоня́юще кова́рства духо́в лука́вых/ си́лою Ду́ха Пресвята́го, Иси́доре.
Во дво́рех Го́спода Савао́фа насажде́н, я́коже фи́никс, процве́л еси́, Богому́дре,/ и страсте́й вои́стинну тлетво́рных победи́тель/ яви́лся еси́, Иси́доре, поспеше́нием Боже́ственным./ Те́мже и ра́дости пра́ведных сподо́бился еси́, досточу́дне.
Ца́рствия Бо́жия возжела́в, тече́ние до́бре сконча́л еси́/ и ве́ру соблю́л еси́ нескве́рнену,/ виногра́д быв благопло́ден, Богозва́нне Иси́доре,/ принося́ всекра́сныя гро́зды доброде́тели Соде́телю всех, Бо́гу,/ венце́м нетле́ния тебе́ украси́вшему.
Богоро́дичен: Избра́ Тебе́ Госпо́дь во всех ро́дех,/ благослове́нная в жена́х, непоро́чная Де́во Богоро́дице,/ я́ко прекра́сное селе́ние простра́нное, Боже́ственную ло́жницу,/ и киво́т святы́ни, и све́щник, и трапе́зу, Чи́стая.
Конда́к, глас 8
Подо́бен: Взбра́нной:
Взбра́нному и ди́вному в пра́ведницех,/ и́же у́бо от Христа́ дар чуде́с прии́мшему,/ похва́льныя ны́не принесе́м глаго́лы,/ но я́ко име́я дерзнове́ние ко Святе́й Тро́ице,/ Ю́же моли́ изба́витися от бед рабо́м твои́м, да зове́м ти:/ ра́дуйся, Богому́дре Иси́доре.
И́кос:
Ка́ко возмогу́, гре́шный и скве́рный, аз вку́пе душе́ю и те́лом исписа́ти,/ е́же во пло́ти сый, равноа́нгельное житие́ твое́ и пресла́вная чудеса́?/ А́ще у́бо мно́зи прему́дрии не дости́гнут испове́дати/ мно́гаго твоего́ терпе́ния, и смире́ния, и те́плыя ко Христу́ любве́,/ но, оба́че наде́яся на твое́ беззло́бие, о блаже́нне, си́це вопию́ ти:/ ра́дуйся, пресве́тлая звездо́, от за́пада возсия́вшая и к восто́ку прише́дшая./ Ра́дуйся, возненави́девый оте́ческую и богоме́рзкую ве́ру,/ Христа́ же еди́наго, над все́ми су́щаго Бо́га, всем се́рдцем возлюби́вый/ и Тому́ невозвра́тным жела́нием после́довавый./ Ра́дуйся, бу́йственное и юро́дственное е́же по апо́столу, жи́тельство избра́вый./ Ра́дуйся, премени́вый тле́нная и настоя́щая наде́ждею бу́дущих благ./ Ра́дуйся, дре́внему И́ову уподо́бивыйся терпе́нием./ Ра́дуйся, страстоте́рпче Христо́в непобеди́мый,/ но при́сно победи́вый диа́вола твои́м смире́нием./ Ра́дуйся, я́ко дре́вний он Ла́зарь ни́щий, почива́я ны́не в ло́нех Авраа́млих./ Ра́дуйся, и́же по отше́ствии ми́ра сего́/ су́щим в беда́х и искуше́ниих гото́в обрета́яся предста́тель и засту́пник./ Ра́дуйся, везде́ призыва́ющих тя бы́стро предваря́яй./ Ра́дуйся, Богому́дре Иси́доре.
Песнь 7
Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Си́лою укрепля́емь всемогу́щего Бо́га, плоть умертви́л еси́/ и я́же до́лу влеку́щая мудрова́ния, всебога́те, чистото́ю и бде́нием непреста́нным/ и ра́зум горе́ стяжа́л еси́, вопия́ непреста́нно, Иси́доре:/ благослове́н еси́, Бо́же оте́ц на́ших.
Све́тлости ра́ди жития́ твоего́ удиви́ тя Госпо́дь в чудесе́х, Богому́дре Иси́доре:/ купцу́ у́бо, в мо́ри утопа́ющу, скоре́йшим явле́нием предста́л еси́, досточу́дне,/ и от глубины́ сего́ изба́вил еси́, вопию́ща:/ благослове́н еси́, Бо́же оте́ц на́ших.
Го́рнее Ца́рствие, весе́лие присносу́щное и сла́ву неувяда́ющую,/ бога́тство неистощи́мое и е́же преподо́бных наслажде́ние,/ по́честь трудо́в твои́х восприя́л еси́ от Бо́га, Благоде́теля всех,/ Ему́же ны́не предстоя́, вопие́ши:/ благослове́н еси́, Бо́же оте́ц на́ших.
Богоро́дичен: Его́же родила́ еси́, Го́спода, Влады́чице Чи́стая, не преста́й моля́щи,/ изъя́ти мя при́сно от враг, оскорбля́ющих мя,/ и тя́жкое бре́мя грехо́в мои́х расточи́ти, Богоневе́стная,/ я́ко да, ра́дуяся, вопию́:/ благослове́н, Пречи́стая, Плод Твоего́ чре́ва.
Песнь 8
Ирмо́с: Седмери́цею пещь/ халде́йский мучи́тель,/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Не то́кмо в жити́и сый,/ но и по отше́ствии ми́ра мно́жайшая чудеса́ от честна́го твоего́ гро́ба содева́ются/ приходя́щим с ве́рою, всеблаже́нне Иси́доре,/ и́бо неду́ги прого́ниши си́лою духо́вною и от бед изыма́еши./ Те́мже, не престаю́ще, вопие́м:/ свяще́нницы, воспо́йте, лю́дие, превозноси́те во вся ве́ки.
Дерзну́вша у́бо иере́я извеще́ние прия́ти о святе́м телеси́ твое́м,/ Боже́ственная а́бие си́ла напра́сно порази́,/ но твои́ми моли́твами исцеле́ние получи́, всехва́льне Иси́доре./ Те́мже и мы, веселя́щеся, вопие́м:/ свяще́нницы, воспо́йте, лю́дие, превозноси́те во вся ве́ки.
Доброде́тельным нра́вом и се́рдцем смире́нным/ ми́лостив ты яви́лся еси́, досточу́дне Иси́доре, тре́бующим от Тебе́ по́мощи,/ при́сно помога́я и чуде́с дея́нием удивля́я ве́рою Го́сподеви вопию́щия:/ свяще́нницы, по́йте, лю́дие, превозноси́те во вся ве́ки.
Богоро́дичен: Ада́ма Соде́тель в ложесна́х Твои́х, Чи́стая, зи́ждется/ и млеко́м пита́ется, пита́яй вся́ко дыха́ние, Де́во Богоро́дице./ Те́мже я́ко Ма́терь Бо́жию, ве́рнии, Тя прославля́ем/ и превозно́сим Чи́стую во веки.
Песнь 9
Ирмо́с: Ужасе́ся о сем Не́бо,/ и земли́ удиви́шася концы́,/ я́ко Богяви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют.
Зре́ти при́сно возжела́в сла́ву Бо́га на́шего, Иси́доре,/ мно́гих доброде́телей разли́чными о́бразы себе́ удобри́л еси́/ и, свещу́ нося́, укра́шену еле́ем терпе́ния твоего́,/ возше́л еси́ в светоно́сный черто́г,/ со А́нгелы сый ясне́е наслажда́ешися Боговиде́ния.
Я́ко у́треннее со́лнце, возсия́ па́мять твоя́ в ми́ре су́щим,/ сердца́ озаря́ющи Боже́ственною све́тлостию:/ ты бо све́та и дне я́ко вои́стинну сын яви́лся еси́, Богому́дре Иси́доре,/ те́мже тя непреста́нно ублажа́ем.
Прему́дростию украша́яся и ра́зумом просвеща́яся, смире́нием се́рдца ра́дуяся,/ высото́ю же жития́ сия́я, досточу́дне,/ в Небе́сная селе́ния преше́л еси́ и та́мо, в ли́це пра́ведных предстоя́,/ нас помина́й, чту́щих тя, блаже́нне Иси́доре.
Богоро́дичен: Света́ Боже́ственнаго прия́телище, луча́ми Божества́ мир озари́вшаго,/ ви́дена была́ еси́, Богоблагода́тная,/ мост же и ле́ствица, на высоту́ земны́я возводя́щи, Де́во./ Те́мже, ве́рнии, ублажа́ющи, Тя велича́ем.
Свети́лен.
Подо́бен: Жены́, услы́шите:
Удали́вся, бе́гая мирски́х сожи́тельства,/ Христу́, над все́ми Бо́гу на́шему,/ непоро́чным житие́м благоугоди́л еси́, всеблаже́нне Иси́доре,/ Его́же ны́не моли́ о нас, рабе́х твои́х,/ ве́рою пра́зднующих всечестну́ю па́мять твою́.
Богоро́дичен:
Му́дрость Ипоста́сную, и Сло́во пресу́щное,/ и врача́ всех, Христа́ ро́ждшая, Де́во,/ стру́пы и я́звы души́ моея́ исцели́, лю́тыя и многовре́менныя,/ и се́рдца моего́ стра́стная утоли́ помышле́ния.
На хвали́тех стихи́ры на 4, глас 4.
Подо́бен: Дал еси́ зна́мение:
Дал еси́ при́тчу терпе́ния и му́жества,/ преблаги́й Го́споди,/ пра́веднаго Иси́дора и многочуде́снаго/ доброде́тельми, и словесы́,/ и де́лы сия́юща,/ целому́дрием украша́ема и кро́тостию./ Тем Твое́ неизрече́нное смотре́ние сла́вим,/ Иису́се всеси́льне/ и Спа́се душ на́ших.
Пра́веден и незло́бив,/ и́стинен же, и непоро́чен, и ве́рен,/ уклоня́яся от вся́кия зло́бныя ве́щи,/ показа́лся еси́, Иси́д043Eре блаже́нне,/ просвеще́н доброде́тельми/ и благоче́стием сия́я./ Тем тя ублажа́ем/ и свято́е твое́ и честно́е днесь пра́зднуем успе́ние,/ ра́дующеся, Богому́дре.
Целому́дрием и благове́рием,/ я́ко багряни́цею многоце́нною, оде́явся, Иси́доре,/ пра́вдою же и кро́тостию,/ я́ко Боже́ственным венце́м, венча́лся еси́,/ со стра́ждущими Христа́ ра́ди/ ца́рствовати возжеле́л еси́./ И ны́не Царю́ сил предстои́ши,/ Иису́су всеми́лостивому/ и Спа́су душ на́ших.
Сла́ва, глас 8:
Доброде́телей твои́х, Богому́дре Иси́доре,/ исправле́ния уясни́ша ве́рных сердца́:/ кто бо слы́ша безме́рное твое́ смире́ние/ и терпе́нию не удиви́ся?/ Я́же ко всем кро́тости и беззло́бию,/ к скорбя́щим ми́лованию/ и к су́щим в беда́х ско́рому поможе́нию,/ к пла́вающим немяте́жному приста́нищу/ и в путь ше́ствующим благо́му поспеше́нию./ Вся боголе́пно научи́л еси́, досточу́дне,/ и ны́не неувяда́емым венце́м/ венча́лся еси́ от руки́ Вседержи́теля Бо́га./ Его́же моли́ спасти́ся душа́м на́шим.
И ны́не, пра́здника или́ Богоро́дичен.
Славосло́вие вели́кое. И отпу́ст.
НА ЛИТУРГИ́И
Блаже́нны, пе́сни 3-я и 6-я. Проки́мен: Честна́ пред Го́сподем смерть/ преподо́бных Его́. Стих: Что́ возда́м Го́сподеви о всех, я́же воздаде́ ми?Апо́стол к Гала́том, зача́ло 213. Аллилуи́я: Блаже́н муж, боя́йся Го́спода, в за́поведех Его́ восхо́щет зело́.Ева́нгелие от Матфе́я, зача́ло 10. Прича́стен: В па́мять ве́чную бу́дет пра́ведник:
