Стихи́ры Епифа́ния, глас 5.

Подо́бен: Ра́дуйся:

Ра́дуйся, по́стником вои́стинну,/ па́лицею прему́дрых уче́ний твои́х/ упасы́й а́гнца сего́/ на па́житех вои́стинну правосла́вия, Епифа́ние,/ Христа́ Пастыренача́льника/ кро́ткое овча́, е́же на траве́ воспита́ное воздержа́ния/ и все́льшееся ны́не во огра́де Вы́шния жи́зни,/ иде́же со святи́тели лику́я и му́ченики,/ всем, Богому́дре, любо́вию соверша́ющим па́мять твою́,/ всегда́ моли́ся/ мир дарова́ти нам и ве́лию ми́лость.

Ра́дуйся, благоче́стия свети́ло,/ заря́ми о́гненных слове́с твои́х просвети́вый вселе́нную/ и попали́вый враго́в хвра́стная уче́ния, Епифа́ние, огне́м,/ и́же в бу́ри неве́дения су́щия,/ к приста́нищу Богоразу́мия благоути́шному призыва́я:/ орга́н оглаша́емь дыха́ния Ду́ха,/ цве́том чуде́с непреста́нно источа́я пучи́ну/ и сме́рти избавля́я./ Христа́ умоли́/ душа́м на́шим дарова́ти ве́лию ми́лость.

Ра́дуйся, мы́сленная реко́,/ испо́лнена вод духо́вных,/ украше́ние церко́вное,/ священнонача́лия пра́вило,/ мона́шествующих столп, Епифа́ние,/ основа́ние правосла́вных,/ церко́вное водруже́ние,/ столп кре́пости, нече́стию супроти́вниче,/ трубо́ Богогла́сная,/ слави́й многовеща́нный,/ небе́сный у́ме, бо́дрый язы́че,/ и́же зако́ну Боже́ственному поучи́вся благода́тию Христо́вою./ Его́же моли́/ душа́м на́шим да́ти ве́лию ми́лость.

И́ны стихи́ры свята́го Ге́рмана, глас 1.

Подо́бен: Всехва́льнии му́ченицы:

Лео́нтиево мудрова́ние тве́рдо, Ге́рмане, низложи́л еси́,/ и́же, злоче́стия испо́лнь,/ поклоне́ния честны́х ико́н Христо́вых окая́нный/ и всех святы́х отве́ржеся,/ но, словесы́ твои́ми, Богоявле́ние,/ изобличи́вся, я́ко безу́мен/ и несмы́слен пребы́сть.

Лев, безбо́жный зверь,/ и́же Бо́га ненави́дя,/ анти́христов предте́ча,/ поклоне́ние Христо́ва о́браза отве́рг, преподо́бне,/ насле́дия ве́рных изве́ржеся./ Те́мже мо́лим тя:/ я́коже о́наго, моли́твами твои́ми/ настоя́щее отжени́ смуще́ние.

Жела́ние улучи́л еси́,/ е́же тебе́, Богоявле́нне,/ издале́че жела́емое явле́нно,/ и́бо ко Влады́це твоему́ со дерзнове́нием, Ге́рмане блаже́нне,/ ны́не священноле́пно вшел еси́./ Ему́же предстоя́, наслажда́ешися обоже́ния,/ мир ми́рови испроси́.

Сла́ва, и ны́не, пра́здника.

Тропа́рь, глас 4:

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их/ в ми́ре упра́ви живо́т наш.

Сла́ва, и ны́не, пра́здника.

Кано́н свята́го Епифа́ния, творе́ние Иоа́нна мона́ха, глас 1.

Песнь 1

Ирмо́с: Твоя́ победительная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глубины́ новосоде́лавшая.

Во уго́днем ве́рою пожи́в зако́не писа́ний, Влады́чний подъя́л еси́ яре́м,/ украси́вся же, пребога́те, свети́льник показа́лся еси́,/ земны́я просвеща́я концы́.

Жела́нием Боже́ственнаго зако́на объя́т быв/ и непра́веднаго разсуди́в пра́ведное, о́тче Епифа́ние,/ обра́зно прия́л еси́ спаси́тельную ве́ру Тро́йческую,/ я́коже от Боже́ственнаго проразуме́ния.

Цели́тель пло́ти же и души́, богови́ден бысть тебе́ челове́к,/ подъяре́мником твои́м страстно́е уби́л есть стремле́ние,/ и исцели́ души́ неве́рное мудрова́ние.

Богоро́дичен: Весь о́браз мой прие́м, И́же во о́бразе Бо́жий пе́рвее зри́мый,/ весь обнови́л есть, во Твою́ утро́бу боголе́пно все́лься, Чи́стая./ Те́мже Богоро́дицу ве́рою Тя вси сла́вим.

Ин кано́н свята́го Ге́рмана, творе́ние Феофа́на, глас 1.

Песнь 1. Ирмо́с то́йже

Свяще́ния оде́ждою укра́шен, блаже́нне, пожи́л еси́,/ сло́вом же благода́ти ве́рных пречестны́я собо́ры,/ яви́лся еси́, Богоявле́ние, просвеща́я уче́нии.

Колесни́ца был еси́ доброде́телей, на ню́же всед, к Бо́гу отше́л еси́,/ ми́ра красоту́ оста́вль и гнилу́ю сла́ву,/ Небе́сный таи́нник свое́ю прему́дростию быв.

От промышле́ния проуве́ден быв, я́ко свяще́нник богогла́сен сый, о́тче,/ избе́гл еси́ томи́тельнаго скве́рнаго уби́йства, преподо́бне,/ Бо́гу соблюда́ющу тя десни́цею вседержи́тельною.

Богоро́дичен: Ку́ю Ти досто́йную песнь на́ше принесе́т неможе́ние?/ То́кмо обра́довательную, е́йже нас Гаврии́л научи́:/ Ра́дуйся: Богоро́дице Де́во, Ма́ти Неневе́стная.

Песнь 3

Ирмо́с: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нныя славы Твоея́, Человеколю́бче.

Черну́ оде́жду ви́дев пода́вшаго, проси́вшу ми́лости, теле́сныма очи́ма,/ све́тлою же ри́зою оде́яна разу́мно узре́в,/ Боже́ственною благода́тию просвети́лся еси́ к ве́ре непоро́чней.

Слы́шав глаго́лы благочести́выя, ве́щи возгнуша́лся еси́ у́бо/ и, житие́ возжела́в невеще́ственно, я́ко и кро́ви соприча́стну твое́й/ и ра́зума прича́стну прии́м сестру́, яви́стася супру́га блаже́нная.

Ме́ртвых помышле́ний отврати́вся, преблаже́нне Епифа́ние, возжела́л еси́ живо́му служи́ти Бо́гу/ и к Боже́ственному хра́му ве́рно прите́кл еси́,/ прие́м о́браз све́тлый, пребо́гате, ме́ртвых твои́х явля́я отпаде́ние.

Богоро́дичен: Святы́х Свята́го Христа́ свя́то породила́ еси́,/ Святы́ни свято́е селе́ние, во святы́х почива́ющего, Ему́же вопие́м:/ Свята́ Це́рковь одушевле́нная пречи́стыя сла́вы Твоея́, Человеколю́бче.

Ин. Ирмо́с то́йже

И́же Боже́ственным проразуме́нием прове́дый/ твоего́ нра́ва свобо́дное и душе́вное, му́дре, благоро́дие,/ рука́ми беззако́нных убие́ну бы́ти тебе́ Бог возбрани́/ и де́вственных чи́ну скопле́ние прему́дро обличи́.

Ви́дети жела́я я́ве, блаже́нне, све́тлость мы́сленную Боже́ственнаго обоже́ния,/ священнонача́лие твое́ украси́л еси́ житие́м целому́дренным/ и му́дрыми уче́ньми правосла́вно направил еси́ ста́до.

На вели́кое седа́лище вшед,/ вельми́ просвети́л еси́ церко́вное, о́тче, исполне́ние уче́ний пе́сньми,/ Ге́рмане прехва́льне, святи́телю преподо́бне/ и свети́льниче вселе́нныя прече́стне.

Богоро́дичен: Из Тебе́ процвете́, Чи́стая, Цвет неувяда́емый,/ благоуха́я все челове́чество Боже́ственным ми́ром Своего́ естества́,/ Отцу́ Собезнача́льный, и из Тебе́ быв под ле́том, Дево Всенепоро́чная.

Седа́лен, глас 8.

Подо́бен: Прему́дрости:

Ног твои́х обу́щи, я́коже Моисе́й, во святе́м ме́сте отложи́в,/ Боже́ственным та́йнам научи́лся еси́ духо́вным/ и, воздержа́ния боле́зньми умертви́в те́ло твое́,/ пресла́вных чуде́с тварь испо́лнил еси́./ Те́мже и Богодохнове́ннаго Писа́ния неизрече́нная всем благоразсуди́л еси́,/ Богоно́се о́тче наш, святи́телю Епифа́ние,/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, ин седа́лен, глас то́йже:

Во свяще́нную обле́клся оде́жду, показа́лся еси́ посо́бник Христо́ви,/ не убоя́вся беззако́ннаго царя́, о́тче наш,/ вы́и не преклони́л еси́ безбо́жному веле́нию,/ зауше́ния терпя́, поноше́ния и преще́ния./ Те́мже льстец, я́ростию разгоре́вся,/ в темни́це тя затвори́, да́же до кончи́ны, блаже́нне./ Сего́ ра́ди вопие́м ти:/ моли́ Христа́ Бо́га грехо́в оставле́ние дарова́ти нам,/ чту́щим любо́вию святу́ю па́мять твою́.

И ны́не, пра́здника.

Песнь 4

Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.

Моли́твенник, я́коже раб, присту́пль ко креще́нию, сыноположи́лся еси́ им/ и насле́дник и́стинен Бо́жий, Епифа́ние, и Христу́ снасле́дник был еси́,/ боголе́пно Тому́ пожи́в.

Зрит твое́ многоукра́шено лице́/ и неизрече́нною Па́стырь сла́вою и венце́м благоле́пным сла́вную главу́ твою́/ па́че естества́ венча́ну, сла́вне, чи́стаго твоего́ се́рдца о́бразы.

Был еси́ прия́телище Боже́ственныя благода́ти, преподо́бне,/ и расточи́л еси́ мудре бога́тство вре́менное Христу́,/ и, име́нием Небе́сным обога́щся, некра́домое сокры́л еси́,/ я́коже разу́мный суди́я, Епифа́ние.

Ю́ных отве́ргл еси́ в ю́ности мудрова́ние,/ укре́пль же ся ста́рческими от му́дрых и разу́мных, стра́хом, блаже́нне, Боже́ственным,/ поуче́нием слове́с духо́вных рачи́тель прему́дрости был еси́.

Богоро́дичен: Святы́х Свята́я Богоро́дице Всепе́тая, ча́яние язы́ков и спасе́ние ве́рных,/ из Тебе́ возсия́ Изба́витель, и Жизнода́вец, и Госпо́дь,/ Его́же моли́ спасти́ся рабо́м Твои́м.

Ин. Ирмо́с то́йже

Умертви́в, прему́дре, пло́ти взыгра́ния, священнотаи́нниче Ге́рмане,/ любому́дрия просвеще́нием ум уясни́л еси́,/ духо́вным та́йно наставле́нием укра́шен, Христу́ зовы́й:/ сла́ва си́ле Твое́й, Го́споди.

Отврещи́ся пречестны́х Христо́вых изображе́ний злочести́вый враг пону́ди тя,/ в неразу́мие бо вве́ргся, твои́ми изобличи́ся я́ве уче́нии, сла́вне,/ но, неисце́льно неду́гуя, нечу́вствен пребы́сть.

Глаго́л обличе́ние твои́х зря, звероимени́тый, му́дре,/ зверообра́зным умо́м с престо́ла низведе́ свяще́ннаго,/ но вме́сто сего́ обогати́лся еси́ священноде́йством, всеблаже́нне, Небе́сным.

Богоро́дичен: Ра́дость Тебе́ я́ве от Небе́с принося́, Архистрати́г, Чи́стая, благовести́, рек:/ Бог прии́дет с пло́тию из Тебе́, Де́во Пречи́стая,/ на спасе́ние любо́вию пою́щим Тя.

Песнь 5

Ирмо́с: Просвети́вый сия́нием прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно по́ющих Тя.

Преподо́бно твое́ чре́во хле́бом и водо́ю утесни́л еси́,/ я́ко ва́риво име́в соль,/ и стра́сти удержа́л еси́ пло́ти, во пло́ти житию́ Безпло́тных подо́бяся.

Уще́дрил еси́ та́ющих в жа́жди зно́я и зной премени́л еси́,/ боголе́пно зна́мения начиная́, я́ко служи́тель изря́ден,/ твоему́ подо́бяся Влады́це, ви́но в во́ду преложи́л еси́, блаже́нне.

Избе́гл еси́ тщи́я челове́к сла́вы/ и в пусты́ню, я́коже твой Влады́ка, всели́лся еси́,/ искуше́нии, му́дре, Влады́чними к боре́нию неви́димых неможе́ние твое́ укрепля́я.

Богоро́дичен: Сло́во Боже́ственное сло́вом во утро́бе вмести́ла еси́ па́че сло́ва, Богоро́дице,/ Того́ у́бо моли́ от бесслове́сных дея́ний и сласте́й смертоно́сных/ свободи́ти рабы́ Твоя́.

Ин. Ирмо́с то́йже

До конца́ Христа́ возлю́бль, Богоприя́тне,/ возлю́блен был еси́ от Него́ досто́йно и прия́л еси́ дарова́ний пучи́ну,/ и́бо, му́дре, уче́нии твои́ми Це́рковь просвети́л еси́.

Пе́сньми, Ге́рмане, Богодохнове́нными/ уясни́л еси́ ли́ки ве́рных и Боже́ственная исполне́ния,/ и́бо все подо́бное утвержде́ние, о́тче, твоего́ се́рдца правосла́вныя просвети́.

Ра́дуйся, му́чеников страда́ние,/ и побе́ды обличи́в похвала́ми и словесы́ сложе́нными,/ и а́бие, сла́вне, обра́зными шароде́йствы во еди́но совокупля́я обоя́.

Богоро́дичен: Веселя́тся Небе́сныя си́лы, зря́ще Тя,/ ра́дуются с ни́ми челове́ков собра́ния:/ Рождество́м бо Твои́м соедини́шася, Де́во Богоро́дице,/ Его́же досто́йно сла́вим.

Песнь 6

Ирмо́с: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.

Бесо́встии тя подо́бницы окружи́вше, ага́рянстии вну́чата,/ Влады́це же подо́бяся твоему́, супроти́вящегося возблагоде́тельствовал еси́/ и све́тло показа́л еси́, о́тче, друго́е о́ко.

Соде́тель твой, в тебе́ почи́вый, Ду́ха тя орга́н/ и Бо́га, я́коже Моисе́я, фарао́ну показа́, ара́вским жили́щем:/ вои́стинну бо яви́лся еси́, о́бразу Сего́ подо́бяся.

Сотрясе́ ассири́йскаго царя́, дух гоня́щего,/ бысть же ве́стник твое́й, о́тче, доброде́тели и Боже́ственныя благода́ти,/ и́бо того́ весть сла́вити Бог сла́вящия.

Богоро́дичен: Веселя́тся о Тебе́, Де́во Пречи́стая, ро́да на́шего пра́отцы,/ Еде́м восприе́мше Тобо́ю, его́же преступле́нием погуби́ша:/ Ты бо Чиста́ и пре́жде рождества́, и по рождестве́ еси́.

Ин. Ирмо́с то́йже

Напоя́ется уче́нии твои́ми, всему́дре, и словесы́ ца́рское свяще́ние,/ лю́дие же Христо́ви возлю́бленнии, богозва́ннии/ и к Бо́гу наставля́ются наказа́нии твои́ми.

Помина́й тя пою́щия, преподо́бне, Бо́гу ны́не предстоя́,/ испо́лнен Боже́ственныя добро́ты и нетле́нныя красоты́,/ и к животу́ наста́ви моли́твами твои́ми.

Восхожде́ние, му́дре, житию́ положи́л еси́ от сла́вы и си́лы/ к Небе́сней сла́ве и кре́пости, сла́вне, премину́я воздержа́нии,/ до́ндеже Христу́ жела́емому, ра́дуяся, бесе́довал еси́.

Богоро́дичен: Ны́не, Пречи́стая, Твоего́ раба́ изба́ви от вся́каго обстоя́ния,/ треволне́ния же и бу́ри страсте́й/ и к Твоему́ приста́нищу наста́ви:/ Ты бо еси́ мне Предста́тельница и исправле́ние.

Конда́к, глас 4.

Подо́бен: Вознесы́йся:

Священнонача́льник чу́дную дво́ицу восхва́лим, ве́рнии, по до́лгу,/ с Ге́рманом Боже́ственнаго Епифа́ния:/ си́и бо попали́ша безбо́жных язы́ки,/ догма́ты прему́дрейшия возло́жше всем,/ правосла́вно пою́щим при́сно благоче́стия вели́кое та́инство.

И́кос:

Я́ко свяще́нных добро́ту и сла́ву правосла́вных,/ дво́ицу святу́ю почти́м досто́йно:/ си́и бо яви́шася нам столпи́ утвержде́ния/ на враги́ неви́димыя и ви́димыя всегда́,/ ве́ры же столпи́ непрекло́ннии и Це́ркве украше́ние красно́./ Его́же нося́щи, пра́во исправля́ет, у́мно вопию́щи:/ возвесели́ся во мне дух мой вои́стинну,/ оде́жду мою́, я́коже пре́жде, восприе́мши, ю́же еретицы́ растерза́ша,/ не пою́ще благоче́стия вели́кое та́инство.

Песнь 7

Ирмо́с: Тебе́, у́мную, Богоро́дице, пещь/ разсмотря́ем, ве́рнии:/ я́коже бо о́троки спасе́ три превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.

От Боже́ственныя десни́цы прие́м чуде́с дар,/ прося́щим у тебе́ ту́не, о́тче, исцеле́ния всем разда́л еси́,/ я́коже Влады́ка тебе́ повеле́,/ хва́льный отце́в Бог и препросла́влен.

Па́дает, на ногу́ твое́ю валя́яся, ассири́йский царь,/ стыде́тися бо доброде́тели весть и сопоста́т./ Вся́каго же покаря́ет Еди́ный, во святы́х почива́я, хва́льный отце́в Бог и препросла́влен.

Сло́во молчи́т, исправле́ния твоя́ и чуде́с мно́жество ника́коже возмо́же сказа́ти, всеблаже́нне:/ песка́ бо премину́ет, е́же Христо́с тебе́ дарова́,/ хва́льный отце́в Бог и препросла́влен.

Тро́ичен: Трисве́тлая Еди́нице, неоску́дный безме́рныя бе́здны Све́те,/ назира́еши Твоя́ певцы́:/ превозноси́мый Безнача́льный О́тче, и Сы́не Собезнача́льный, и Ду́ше Соприсносу́щный,/ хва́льный отце́в Бог и препросла́влен.

Богоро́дичен: Ты, Исто́чник жи́зни ро́ждши,/ умерщвле́на мя лю́те бесо́вскими наведе́нии,/ Чи́стая Всенепоро́чная, оживи́ моли́твами Твои́ми,/ Твоему́ Сы́ну воспева́юща:/ хва́льный отце́в Бог и препросла́влен.

Ин. Ирмо́с то́йже

Весь в тебе́ Свята́го Ду́ха излия́ся исто́чник:/ источа́еши бо, я́ко ре́ки, о́тче досточу́дне,/ за́поведи спаси́тельныя и богокра́сная уче́ния,/ прехва́льнаго велича́я Бо́га во вся ве́ки.

Песносло́вя благоче́стно, уясни́л еси́ Влады́чния пра́здники,/ воспева́я пе́сненно, обоже́н быв,/ вся святы́я же твои́ми мусики́ями к доброде́тели помазу́я, му́дре, ве́рою пою́щия:/ хва́льный отце́в Бо́же и препросла́влен.

Тро́ичен: Еди́но нача́ло во Еди́нстве непресеко́мем,/ во Ипоста́сех Трие́х богосло́вным язы́ком вопия́,/ всем пропове́дал еси́ Безнача́льна Роди́теля,/ Единоро́днаго же Собезнача́льна Сы́на/ и Соесте́ственна Боже́ственнаго Ду́ха я́сно и Единосу́щна.

Богоро́дичен: На Тебе́, Чи́стая Богоро́дице, положи́х всю наде́жду и к Тебе́ прибега́ю всегда́:/ спаси́ мя, Всенепоро́чная, и изба́ви моли́твами Твои́ми/ одержа́щия молвы́ и смуще́ния, лю́тых мои́х страсте́й и паде́ний.

Песнь 8

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Ты сло́вом обличи́л еси́ му́дре ересе́й пре́лесть/ и сия́нием благоче́стия отгна́л еси́ ту́ю, вопия́, Епифа́ние:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

На престо́л возне́сся высо́к, над страстьми́ бо ца́рствовал еси́, плоть же удержа́в,/ ты упа́сл еси́ Христо́во ста́до, зовы́й:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Да лику́ет вся́ко мы́сленное и слове́сное существо́/ в па́мять святи́теля и уго́дника Христо́ва, ве́рно зову́щее:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Богоуго́дно ты богосло́вив, я́ко основа́ние учений/ всем богословие оставил еси́ твое, и́мже, о́тче, пое́м:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Богоро́дичен: Ра́дуйся, престо́ле сла́вный Бо́жий,/ ра́дуйся, ве́рных стено́,/ е́юже свет су́щим во тьме возсия́, Христо́с./ И, Тя блажа́ще, вопие́м:/ вся дела́, Де́ву благослови́те и славосло́вите пречи́стое Ея́ Рождество́.

Ин. Ирмо́с то́йже

Сия́ний блиста́нии све́та трисо́лнечнаго,/ свеще́ю, священноявле́нне, наслажда́яся,/ ны́не зове́ши, ра́дуяся:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Мно́гаго све́та и сия́ния, о́тче, сподо́блен,/ в се́лех Небе́сных и в жили́щах нас, вопию́щих, помяни́:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Я́ко соблю́д богови́дно и по о́бразу Бо́жию, ико́ны святы́х воздви́гл еси́,/ ве́дый на первообра́зное преходи́ти, вся́ку честь же, прехва́льне, и сла́ву,/ Го́спода по́йте, вопия́, и превозноси́те Его́ во вся ве́ки.

Богоро́дичен: Новообра́зно па́че естества́, Де́во, заче́нши Сло́во,/ Отцу́ соесте́ственна Сы́на,/ Де́вою пребыла́ еси́./ Тем Тя пое́м, вся дела́, и ра́дуйся Тебе́ вопие́м,/ и превозно́сим, Чи́стая, во вся ве́ки.

Песнь 9

Ирмо́с: О́браз чи́стаго Рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти мо́лимся пещь,/ да Тя, Богоро́дице,/ непреста́нно велича́ем.

Преде́л де́тели житие́ твое́ и виде́ния Божественнаго, отче,/ словеса твоя богомудрым вои́стинну лю́дем оста́вися, Епифа́ние блаже́нне сла́вне./ Те́мже тя по достоя́нию, восхваля́юще, велича́ем.

Неве́сте Христо́ве предста́, Це́ркви, сла́вне Епифа́ние,/ и ути́ши я́же на Ню воздви́женую, моли́твами твои́ми, свере́пую бу́рю,/ я́ко име́я дерзнове́ние ко Влады́це и Человеколю́бцу.

Тро́ичен: Царю́ царе́й, Свята́я Единонача́льная Тро́ице, все́ми влады́чествующая,/ пою́щим Тя согреше́ний проще́ние и жити́я всего́ устрое́ние/ неотъе́млемо пода́ждь Епифа́ния моли́твами.

Богоро́дичен: О, па́че ума́ чуде́с Твои́х!/ Бо́жие бо Сло́во, плоть бы́вшее, еди́на родила́ еси́ нам па́че естества́, Ма́ти Де́во,/ вся́ческая Боже́ственною во́лею я́ве содержа́ща,/ Его́же о всех умоли́.

Ин. Ирмо́с то́йже

Реши́ти и вяза́ти согреше́ния власть с Небесе́ прие́м по зако́ну/ я́ко свяще́нник, преблаже́нне, пою́щим тя, о́тче, оставле́ние моли́твами твои́ми пода́ждь,/ да тя вси ублажа́ем.

Обре́л еси́ воздая́ния боле́зней твои́х священноявле́нно, Ге́рмане всеблаже́нне,/ блаже́нную прии́м кончи́ну и жизнь ве́чную восприи́м,/ Боже́ственнаго виде́ния непреста́нно наслажда́ешися.

Весь себе́ возложи́л еси́ Всеви́дцу Сло́ву/ и Вседержи́телю добра́ слу́жба показа́лся еси́ свяще́нная,/ же́ртву прия́тну и благоуго́дну принося́ Го́сподеви,/ твои́х трудо́в пе́ния.

Богоро́дичен: Уста́ви плотско́е мудрова́ние и страсте́й, Де́во, утиши́ смуще́ние/ прибега́ющего, Богороди́тельнице, к покро́ву Твоему́,/ и наде́жды основа́ние Тя иму́щего,/ и Боже́ственным предста́тельством обога́щшася и заступле́нием.

Све́тилен.

Подо́бен: Жены́, услы́шите:

Прииди́те, ве́рнии, почти́м Боже́ственное и всесвяще́нное иера́рхов совокупле́ние,/ в пе́ниих пе́сненных Боже́ственнаго Епифа́ния и Ге́рмана,/ разори́вшия ересе́й омраче́ние и благоче́стия заре́ю просве́щшия всю тварь.

Сла́ва, и ны́не, пра́здника.

НА ЛИТУРГИ́И

Проки́мен, глас 1: Уста́ моя́ возглаго́лют прему́дрость/ и поуче́ние се́рдца моего́ ра́зум.Стих: Услы́шите сия́, вси язы́цы, внуши́те, вси, живу́щии по вселе́нней.Апо́стол ко Евре́ем, зача́ло 318. Аллилу́ия,глас 2: Уста́ пра́веднаго поуча́тся прему́дрости:Стих: Зако́н Бо́га его́ в се́рдце его́,/ и не за́пнутся стопы́ его́.Ева́нгелие от Матфе́я, зача́ло 11. Прича́стен: В па́мять ве́чную бу́дет пра́ведник: