НА МА́ЛОЙ ВЕЧЕ́РНИ
На Го́споди, воззва́х:стихи́ры, глас 1.
Подо́бен: Небе́сных чино́в:
Небе́сным светлоли́тием озаря́емь,/ боговиде́ньми досто́йно сия́я,/ свяще́нства са́ном почте́н, Богому́дре,/ и Боже́ственнаго сподо́блен блаже́нства,/ не преста́й моля́ся Христу́/ о чту́щих святу́ю па́мять твою́.
Небе́снаго весе́лия соприча́стник,/ мы́сленых сил зри́тель быв, о́тче,/ зарю́ Боже́ственную прия́т чуде́с дарова́ний,/ тя обогаща́ющу,/ не преста́й моля́ся Христу́/ о чту́щих святу́ю па́мять твою́.
Небе́сныя ра́дости при́сно наслажда́яся,/ Богому́дре святи́телю Фили́ппе,/ неприкоснове́ннаго Све́та луча́ми Боже́ственными сия́я,/ не преста́й моля́ся Христу́/ о чту́щих святу́ю па́мять твою́.
Сла́ва, глас то́йже, самогла́сен:
Река́, и́же в тебе́, духо́вных дарова́ний/ церко́вное напоя́ет исполне́ние./ Многосве́тлое со́лнце яви́ся ми́рови,/ чуде́с заря́ми облиста́еши,/ отце́м украше́ние, святи́телю Фили́ппе,/ и ны́не в честне́м твое́м пренесе́нии/ цельбоно́сная ра́ка моще́й твои́х/ исто́чник яви́ся приснотеку́щий,/ ве́рным источа́я во́ды исцеле́ний,/ Го́споду тя проелавля́ющу/ и е́же Того́ ра́ди по́двиги твоя́ всем показу́ющу,/ Его́же моли́ о чту́щих святу́ю па́мять твою́.
И ны́не, Богоро́дичен.
На стихо́вне стихи́ры, глас 2.
Подо́бен: До́ме Евфра́фов:
Дом Пресвята́го Ду́ха яви́ся,/ от ю́ности до́льняя презре́в,/ я́ко не су́ща,/ к Бо́гу еди́ному ум впери́л еси́,/ святи́телю Фили́ппе.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Дом чистоты́ богоде́ланен и храм одушевле́н,/ вселе́ние Христо́во/ был еси от ма́терних пеле́н,/ святи́телю Фили́ппе.
Стих: Честна́ пред Го́сподем/ смерть преподо́бных Его́.
Дом доброде́телей/ и Боже́ственныя прему́дрости быв,/ уясни́л еси́ сла́ву Христо́ву/ жития́ све́тлостию,/ святи́телю Фили́ппе.
Сла́ва, и ны́не, глас и подо́бен то́йже:
До́ме святы́я сла́вы, Влады́чице,/ воздежи́ пречи́стыя Своя́ ру́це/ ко из Тебе́ рожде́нному Душелю́бцу и Соде́телю/ и моли́ся со святи́телем/ поми́ловати и спасти́ ду́ши на́ша.
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
На Го́споди, воззва́х:стихи́ры, глас 4.
Подо́бен: Я́ко до́бля:
Я́ко со́лнце незаходи́мое,/ столп светоявле́н Правосла́вия,/ любве́ струю́ неистощи́мую,/ бога́тство некра́домо благоче́стия,/ церко́вное утвержде́ние,/ свети́льника, чуде́с луча́ми сия́юща,/ духо́вными арома́ты в честне́м того́ пренесе́нии ве́рных сердца́ облагоуха́юща,/ Боже́ственнаго Фили́ппа ублажи́м.
Я́ко свещу́ неугаси́мую,/ исто́чник дарова́ний приснотеку́щий,/ чудесы́ напоя́ющ всю подсо́лнечную,/ Боже́ственный орга́н и светоно́сный,/ испове́дания цевни́цу Боговеща́нную,/ ре́вности угль Богосия́нный,/ суему́дренных шата́ний обличи́теля,/ свяще́ннаго Фили́ппа честно́е воспое́м пренесе́ние.
Я́ко лоза́ живоно́снаго виногра́да,/ кра́сны плоды́ прине́сл еси́,/ свяще́нства и страда́ния блиста́ньми украша́яся,/ Богонача́льным трисо́лнечным озаря́емь сия́нием,/ я́ко звезда́ светлообра́зна,/ на тве́рди церко́вней сия́еши све́тлостию чуде́с твои́х,/ Богому́дре святи́телю Фили́ппе,/ пе́сньми воспева́ем честно́е твое́ пренесе́ние.
Я́ко рай присноцвету́щ и благосия́нен,/ я́ко цвет проле́тный неувяда́емь,/ исцеле́ний исто́чник неисчерпа́емый,/ цельбоно́сная и свяще́нная ра́ка моще́й твои́х,/ Фили́ппе, святи́телю Богосве́тлый, ми́ру свети́льниче,/ воспева́ющих тя любо́вию в честно́е твое́ пренесе́ние/ сердца́ напая́ет благода́тию.
Сла́ва, глас 8:
Днесь пресве́тлая нам возсия́ па́мять/ всеблаже́ннаго отца́ на́шего Фили́ппа./ Прииди́те, о празднолю́бцы и святи́телей сосло́вие,/ духо́вный лик соста́вим,/ во псалме́х и пе́ниих ликовству́юще/ и чуде́сную того́ превожделе́нную нам лобыза́юще ра́ку, си́це рцем:/ ра́дуйся, многоце́ннаго ми́ра ковче́же животво́рный,/ облагоуха́я нас Боже́ственными арома́ты./ Ра́дуйся, одушевле́ннаго зла́та храни́ло всеосвяще́нное/ и виногра́де духо́вный,/ име́я в себе́ плод присноцвету́щий –/ Богоно́снаго отца́ цельбоно́сныя мо́щи,/ и́хже любе́зне целу́юще, ве́рнии, те́пле возопии́м:/ о святи́телем и страда́льцем украше́ние,/ святы́м А́нгелом равностоя́телю,/ моли́ Христа́ Бо́га о воспева́ющих при́сно/ ра́достную и свяще́нную па́мять твою́.
И ны́не, Богоро́дичен: Царь Небе́сный:
Вход. Проки́мен дне. И чте́ния 3 святи́тельская.
На лити́и стихи́ры, глас 1:
Гусль сладкоглаго́ланная,/ испове́дания труба́ богодохнове́нная,/ святи́телю о́тче, был еси́,/ неизрече́нным Пресвята́го Ду́ха обогати́ся сия́нием,/ ре́вности Боже́ственныя испо́лнися,/ я́коже тьму не́кую не́мощну,/ све́та наше́ствием разсы́пал еси́ суему́дренных шата́ния,/ све́тлостию слове́с твои́х ве́рных сердца́ утверди́л еси́,/ те́мже честно́е твое́ воспева́юще пренесе́ние,/ Боже́ственнаго человеколю́бия улучи́ти мо́лимся/ твои́ми к Бо́гу моли́твами.
Глаго́л твои́х ору́жием/ лука́ваго супротивобо́рца уязви́л еси́,/ всеору́жством Ду́ха победи́л еси́ льсти́вное врага́ супротивле́ние/ и, того́ меч исто́рг,/ пробо́л еси́ немощно́е того́ ополче́ние,/ сего́ ра́ди, обличи́в лесть,/ за Христа́ пострада́л еси,/ те́мже честно́е твое́ воспева́юще пренесе́ние,/ изба́витися мо́лимся свере́пства лука́ваго/ и Боже́ственнаго улучи́ти человеколю́бия/ твои́ми к Бо́гу моли́твами.
Гла́сы священнослове́сными/ честно́е моще́й твои́х пренесе́ние/ ра́достною мы́слию воспева́ем, святи́телю:/ яви́лся еси́ доброде́телей забра́ло непоколеби́мое,/ струя́ми слез твои́х душе́вную бразду́ изря́дно напои́л еси́,/ неукло́нною мы́слию ко Христу́ воззре́в,/ жела́емаго тобо́ю блаже́нства дости́гл еси́,/ те́мже, воспева́юще тя, мо́лимся/ Боже́ственнаго улучи́ти человеколю́бия/ твои́ми к Бо́гу моли́твами.
Сла́ва, глас то́йже:
Досто́йными до́блестей твои́х/ благода́ти дар прия́л еси́,/ ниже́ гроб, хода́тай забве́ния,/ лучу́ твои́х доброде́телей возмо́же покры́ти глубино́ю молча́ния,/ но, я́ко со́лнечныя лучи́,/ Богодаро́ванная твоя́ чудеса́ трубы́ о́бразом вопию́т,/ всем явля́юще я́же о Бо́зе ре́вности твоя́ и страда́ния./ Ликовству́ет ны́не Це́рковь Госпо́дня,/ име́я в себе́ пренесе́нное неистощи́мое сокро́вище –/ всечестны́я мо́щи твоя́,/ благода́тных луч сия́ний испо́лнены,/ и́хже любе́зне лобыза́юще,/ мо́лимся Боже́ственнаго улучи́ти человеколю́бия/ твои́ми к Бо́гу моли́твами.
И ны́не, Богоро́дичен.
На стихо́вне стихи́ры, глас 5.
Подо́бен: Ра́дуйся:
Ра́дуйся, свяще́нная главо́,/ Правосла́вия сто́лпе неподви́жимый,/ Тро́ицы чи́стое жили́ще,/ церко́вное утвержде́ние,/ невеще́ственным светоли́тием сия́я,/ ве́рных чуде́с луча́ми озаря́еши,/ Небе́сный челове́че и земны́й А́нгеле,/ Христу́ моли́ся, святи́телю и испове́дниче,/ пра́зднующим ве́рою и любо́вию/ честно́е моще́й твои́х пренесе́ние/ дарова́ти мир и ве́лию ми́лость.
Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.
Ра́дуйся, и́же, Боже́ственною ре́вностию распала́емь,/ разори́л еси тьму нече́стия,/ му́дростию слове́с твои́х царя́ му́жески обличи́л еси́,/ правосла́вных едине́ние утверди́л еси́,/ Пресвята́го Ду́ха обогати́вся сия́нием,/ уясни́л еси́ всем Боже́ственное веле́ние,/ апо́столом единообра́зне,/ Христа́ моли́, святи́телю и испове́дниче,/ воспева́ющим честно́е твое́ пренесе́ние/ дарова́ти мир и ве́лию ми́лость.
Стих: Уста́ пра́веднаго поуча́тся прему́дрости/ и язы́к его́ возглаго́лет суд.
Ра́дуйся, свяще́нный у́ме,/ Пресвята́го Ду́ха благово́нный сосу́де,/ Це́ркви све́тлое украше́ние,/ Христо́вым за́поведей изве́стный храни́телю,/ Того́ законоположе́нием после́дуя,/ я́ко и́стинный па́стырь/ о и́скренних спасе́нии ева́нгельски ду́шу положи́л еси,/ страда́льческим венце́м увязе́ся,/ Христа́ моли́, святи́телю и испове́дниче,/ пра́зднующим честно́е твое́ пренесе́ние/ дарова́ти мир и ве́лию ми́лость.
Сла́ва, глас то́йже. Самогла́сен:
Востру́бим трубо́ю пе́сней/ и взыгра́ем пра́зднственная,/ вопие́т бо днесь све́тло Бо́жия Це́рковь свята́я,/ к духо́вному весе́лию созыва́ет, глаго́лющи:/ прииди́те, о празднолю́бцы,/ и сра́дуйтеся со мно́ю,/ я́ко сотвори́ мне вели́чие Си́льный,/ воздаде́ ми красоту́ моего́ благоле́пия –/ Боже́ственную ле́торасль и грозд виногра́да духо́внаго,/ его́же насади́х воздержа́нием в земли́ боготво́рнаго смире́ния/ и напои́х слеза́ми умиле́ния./ Процвете́ же цве́ты свяще́нных доброде́телей/ и принесе́ гобзова́нен и красе́н плод страда́ния./ Си́цева добро́та моего́ благоле́пия,/ е́юже мя украси́ днесь Жени́х Небе́сный,/ кра́сный добро́тою па́че сыно́в челове́ческих,/ Ему́же, ве́рнии, возопие́м:/ о Благи́й всех Го́споди,/ прославля́емый си́це во святы́х Свои́х/ Твоего́ служи́теля моли́твами,/ чту́щим свято́е пренесе́ние/ низпосли́ Твое́ человеколю́бие,/ я́ко да ми́лость и благода́ть обря́щем в День Су́дный.
И ны́не, Богоро́дичен:
Востру́бим трубо́ю пе́сней:/ прекло́ншеся бо свы́ше, Всецари́ца, Ма́ти Де́ва,/ благослове́ньми венчава́ет воспева́ющих Ю./ Ве́рнии лю́ди да стеку́тся,/ и Цари́це да воспле́щут в пе́снех,/ Царя́ ро́ждшей,/ И́же сме́ртию одержи́мыя пе́рвее разреши́ти человеколю́бно благоизво́лившаго./ Па́стырие и учи́́телие,/ До́браго Па́стыря Пречи́стую Ма́терь, соше́дшеся, восхва́лим,/ све́щник златоза́рный, светоно́сный о́блак,/ Небе́с простра́ннейшую,/ одушевле́нный же киво́т, огнезра́чный Влады́чень Престо́л,/ манноприе́мную злату́ю ста́мну,/ заключе́нную Сло́ва дверь,/ всех христиа́н прибе́жище,/ пе́сньми Богогла́сными похваля́юще, си́це рцем:/ пала́то Сло́ва,/ сподо́би смире́нных нас Небе́снаго Ца́рствия,/ ничто́же бо невозмо́жно хода́тайству Твоему́.
Тропа́рь, глас 5:
Ра́достный возсия́ день све́тлаго торжества́:/ днесь церко́вная расширя́ются не́дра,/ прие́млюще духо́вных даро́в неоскуде́емо боготво́рное сокро́вище,/ струю́ благода́тей неисчерпа́емую,/ исто́чника чудесе́м оби́льна,/ чудотвори́выя и свяще́нныя мо́щи твоя́,/ святи́телю Фили́ппе./ Тем же моли́ просла́вившаго тя Дарода́теля Христа́ Бо́га/ о воспева́ющих тя/ и кла́няющихся свяще́нным моще́м твои́м.
НА У́ТРЕНИ
На Бог Госпо́дь:тропа́рь святи́теля, два́жды. Сла́ва, и ны́не,Богоро́дичен.
По 1-м стихосло́вии седа́лен, глас 1:
Я́ко звезда́ днесь пресве́тла, от земны́х недр возсия́л еси́/ и Це́рковь Бо́жию украси́л еси́,/ сия́нием Боже́ственных дарова́ний просвеща́еши/ ду́ши ве́рою и любо́вию песносло́вящих тя, святи́телю,/ огнепа́льная страсте́й на́ших стремле́ния ороша́я Боже́ственными твои́ми моли́твами.
Сла́ва, и ны́не, Богоро́дичен:
Яд змии́н, вше́дший го́рько во у́ши Е́вы,/ потреби́ла еси́ Боже́ственным Рождество́м Свои́м, Пресвята́я Де́во Влады́чице,/ горо́ Бо́жия благослове́нная,/ ю́же Богооте́ц воспе́т, ту́чную и усыре́нную, всем земны́м украше́ние,/ изба́ви нас от се́ти льсти́ваго Боже́ственными Твои́ми моли́твами.
По 2-м стихосло́вии седа́лен, глас 4:
Боже́ственным светоли́тием просвети́ вся,/ я́ко угль мы́сленный, разжже́ся тепло́тою Ду́ха,/ мраз бесо́вский растопи́л еси́ цве́том воздержа́ния,/ я́ко фи́никс, процвете́, ми́ро благово́нно от честны́х твои́х моще́й источа́еши,/ Боже́ственными арома́ты благоуха́я всех воспева́ющих тя.
Сла́ва, и ны́не, Богоро́дичен:
Божества́ прия́телище, златоза́рный и светоно́сный о́блаче,/ Серафи́м честне́йши вои́стинну, Богоотрокови́це Всепе́тая,/ затворе́ная Сло́ва дверь,/ е́юже проше́д Плотоно́сец, Еди́н Госпо́дь, Бог Изра́илев,/ спаса́яй всех, воспева́ющих Тя.
По полиеле́и седа́лен, глас 8:
У́гльми чистоты́ ду́шу очи́стив,/ Све́ту невеще́ственному прибли́жися, огне́м Ду́ха распала́яся,/ меч обоюдуо́стр яви́ся, посека́я злосла́вных веле́ния,/ Боже́ственною ре́вностию зе́льне дыха́я,/ я́ко вещь удо́бь пали́мую, огне́м попали́л еси́ суему́дреных смы́слы, пла́менем слове́с твои́х,/ Фили́ппе святи́телю, моли́ Христа́ Бо́га грехо́в оставле́ние дарова́ти/ пра́зднующим любо́вию свяще́нное честны́х твои́х моще́й пренесе́ние.
Сла́ва, и ны́не, Богоро́дичен:
Угль Божества́ неопа́льно прие́мши,/ Вели́каго Сове́та А́нгела, возсия́вшаго безле́тно от Отца́, родила́ еси́ пло́тию,/ Бо́жий гра́де одушевле́нный, Неискусобра́чная Де́во Влады́чице,/ и на руку́ я́ко Младе́нца носи́ла еси́,/ на плещу́ Херуви́мску стра́шно носи́маго,/ Его́же, Преблагослове́нная, моли́ согреше́ний оставле́ние дарова́ти/ воспева́ющим досто́йно сла́ву Твою́.
По 50-м псалме́ стихи́ра, глас 6:
Челове́че Бо́жий и ве́рный ра́бе,/ слуго́ Госпо́день,/ му́жу жела́ний,/ сосу́де избра́нный,/ сто́лпе и утвержде́ние Це́ркве,/ Ца́рствия насле́дниче,/ не премолчи́, вопия́ о нас ко Го́споду.
Кано́н, глас 1.
Песнь 1
Ирмо́с: Столпо́м о́гненным и о́блачным Изра́иля наставле́й я́ко Бог/ мо́ре разве́рже,/ колесни́цы же фарао́новы глубино́ю покры́,/ пои́м песнь побе́дную,/ я́ко Еди́н просла́вися.
Авраа́му яви́выйся трисоста́вен, Еди́ница, естество́м неслия́нна,/ Трисия́тельный Божества́ Све́те,/ непристу́пнаго Твоего́ сия́ния луче́ю мра́чный ми ум просвети́, молю́ся,/ Твоего́ святи́теля свяще́нных моще́й воспе́ти честно́е и свято́е пренесе́ние.
Боже́ственный орга́н духодви́жимый быв, свяще́нне,/ духо́вным бряца́лом ударя́емь, Соде́теля воспева́я,/ отве́рзи ми уста́ благода́тию,/ да ра́достною душе́ю воспою́ ти песнь хва́ления/ в честно́е и свято́е твое́ пренесе́ние.
Весели́тся Це́рковь Бо́жия в радостотво́рный сей день,/ я́ко ца́рствия багряни́цею крася́щися, прие́мши мо́щи твоя́ в себе́, святи́телю,/ чуде́с Боже́ственными де́йствы облиста́вша цельбоно́сней твое́й ра́це покланя́ющихся,/ ве́рою и любо́вию воспева́ющих честно́е и свято́е твое́ пренесе́ние.
Богоро́дичен: Глас Арха́нгелов вопие́м Ти:/ ра́дуйся, о́блаче Со́лнца сла́вы, Обра́дованная в жена́х, Всепе́тая Цари́це Богоро́дице,/ Сла́вы присносу́щныя селе́ние,/ сла́вы венца́ сподо́би воспева́ющих ве́рою служи́теля Твоего́ честно́е и свято́е пренесе́ние.
Песнь 3
Ирмо́с: Утверди́ мене́, Христе́, на недви́жимом ка́мени за́поведей Твои́х/ и просвети́ мя све́том лица́ Твоего́:/ несть бо свят, па́че Тебе́, Человеколю́бче.
Ду́ха благода́тных луч сия́нием днесь, я́ко со́лнце,/ от земны́х недр возсия́ша честны́я твоя́ мо́щи, святи́телю,/ я́ко кипари́с мироуха́нен благоуха́ют пою́щих Го́сподеви:/ несть свят, паче Тебе́, Человеколю́бче.
Естества́ преде́лы преше́д безве́щным житие́м,/ пло́тный на земли́ А́нгел был еси́,/ я́ко крин, миродохнове́нен, доброде́тельми процвете́,/ благово́нно ми́ро от честны́х твои́х моще́й источа́еши,/ благоуха́я ду́ши пою́щих Го́сподеви:/ несть свят, па́че Тебе́, Человеколю́бче.
Богоро́дичен: Зако́ны естества́ упраздни́шася о Тебе́, Богоблагода́тная, ми́ру Влады́чице,/ па́че бо ума́ и сло́ва Законода́вца без се́мене родила́ еси́,/ обожи́вшаго земноро́дных существо́, вопию́щих Ему́:/ несть свят, па́че Тебе́, Человеколю́бче.
Седа́лен, глас 8:
Я́ко крин, в мы́сленых се́лех процве́л еси́, на колесни́це доброде́телей взима́яся,/ страда́ния высоты́ дости́гл еси, ре́вностию Боже́ственною распаля́емь,/ я́ко Све́та сын возлю́блен, тьмы нача́льника посрами́л еси́,/ разсы́пав того́ кова́рства тве́рдостию слове́с твои́х/ терпе́ния столп непрекло́нен яви́ся, за и́стину пострада́в,/ низложи́л еси́ суему́дренных шата́ние,/ Фили́ппе святи́телю, моли́ Христа́ Бо́га грехо́в оставле́ние пода́ти/ пою́щим честно́е и свято́е твое́ пренесе́ние.
Сла́ва, и ны́не, Богоро́дичен:
Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́нию мя су́ща скве́рно жили́ще/ и де́монов игра́лище, в ра́зуме бы́вша,/ потщи́ся от сих злоде́йствия мя изба́вити, све́тло жили́ще доброде́тельми соде́лавши,/ Светода́тельная и Нетле́нная, разжени́ о́блак страсте́й/ и Вы́шняго прича́стия сподо́би, и све́та невече́рняго моли́твами Твои́ми.
Песнь 4
Ирмо́с: Ро́да челове́ча обновле́ние/ дре́вле, поя́, проро́к Авваку́м предвозвеща́ет,/ ви́дети неизрече́нно сподо́бився о́браз:/ млады́й Младе́нец бо из горы́ – Де́вы, изы́де/ люде́й во обновле́ние, Сло́во.
Зе́млю, я́ко тле́ния жили́ще, оста́вив,/ преми́рнаго Ца́рства дости́гл еси́,/ рай доброде́телей возде́лав непоро́чно, вене́ц страда́ния нося́,/ в черто́зе сла́вы неизрече́нныя возлеже́, с ли́ки Безпло́тных водворя́яся.
И́же до́лу пле́жущии мудрова́нием,/ зря́ще тя уста́в непревра́тен ве́ры и Правосла́вия столп одушевле́н,/ вои́стинну дивля́хуся, ка́ко вои́стинне пре́был еси́ непрело́жен/ и, я́ко зла́то, искуше́но я́звеным горни́лом, очи́щся, святи́телю.
Иису́са, Влады́ки своего́, законоположе́нием после́дуя,/ того́ Боже́ственное подо́бие в себе́ вообража́я,/ ду́шу о ста́де положи́л еси́, же́ртва всеосвяще́нна принесе́ся Бо́гови,/ и, я́ко ми́ро благово́нно, весь преложи́лся еси́ в воню́ благоуха́ния.
Богоро́дичен: К Твои́м щедро́там прибеже́, о Све́та прия́телище, раю́ прекра́сный,/ посреде́ имы́й дре́во живота́ – Христа́ Иису́са Го́спода, Де́во Влады́чице,/ не преста́й Того́ моля́щи,/ я́ко да ми́лостив бу́дет ми в День Су́дный.
Песнь 5
Ирмо́с: От но́щи у́тренююще, пое́м Тя, Христе́,/ Отцу́ Собезнача́льна и Спа́са душ на́ших,/ мир ми́рови пода́ждь, Человеколю́бче.
Лик страстоте́рпческий весели́тся/ и лику́ет святи́телей собо́р и пра́ведных, совсе́льника тя прие́мше, блаже́нне,/ с ни́миже в невече́рнем све́те лику́еши, венце́м испове́дания све́тло украша́емь,/ моли́ о воспева́ющих ве́рою свято́е твое́ пренесе́ние.
Небосажде́нна лоза́, при Боже́ственных исхо́дищих любе́зных вод прозя́бл еси́,/ гобзова́нен плод благоче́стия доброде́телей,/ вку́пе и чуде́с подава́я к цельбоно́сней твое́й ра́це притека́ющим,/ ве́рою и любо́вию воспева́ющим свято́е твое́ пренесе́ние.
Богоро́дичен: Огнеобра́зная колесни́це Сло́ва, Пречи́стая Де́во Влады́чице,/ ро́ждшая челове́ком Ко́рмчию и Го́спода,/ страсте́й на́ших непостоя́нное и лю́тое отжени́ смуще́ние,/ Тя бо непобори́му Предста́тельницу стяжа́хом, су́щую Богороди́тельницу.
Песнь 6
Ирмо́с: Я́ко Ио́ну проро́ка,/ возведи́, Христе́ Бо́же, живо́т мой от тли,/ вопию́ Ти, Человеколю́бче,/ я́ко жизнь у тебе́ есть,/ и нетле́ние, и си́ла.
Путь морски́й неистовя́щийся жития́ теку́щих молв пе́нами невла́жно преше́л еси́,/ безпло́тным житие́м те́ло, я́ко зве́ря, обузда́л еси́,/ столп о́гненный чистоты́ яви́ся,/ преше́л еси́ на зе́млю обетова́ния и к самому́ возвы́сися Бо́жию селе́нию.
Разре́шшимся зерца́лом плотски́м ны́не не в гада́ниих,/ лице́м же па́че к лицу́ зри́ши сла́ву, ю́же возжеле́л еси, блаже́нне,/ в черто́зе Вы́шняго Ца́рствия Жениху́ Безсме́ртному досто́йно свеселя́ся, святи́телю Богоблаже́нне.
Све́тлостию жития́ поднебе́сную освети́л еси́,/ Ду́ха Свята́го це́рковь быв, свяще́нне,/ высокотво́рным пои́стинне смире́нием на высоту́ вознесе́ся доброде́телей,/ я́ко и́стинен священнотаи́нник, заре́ю благода́ти сия́я,/ чи́сто Бо́гови прине́сл еси́ служе́ние.
Богоро́дичен: Тя, Всенепоро́чная, Ма́ти Присноде́во, спасе́ние позна́хом, земноро́днии,/ Сы́на бо, безле́тно от Отца́ возсия́вшаго,/ несказа́нно родила́ еси́./ Того́, Чи́стая, я́ко Бо́га моля́щи не преста́й/ спасти́ ве́рою Тя я́ко и́стинную Богома́терь велича́ющих.
Конда́к, глас 3:
Я́ко со́лнце, днесь от земны́х недр возсия́ша/ честны́я твоя́ мо́щи, святи́телю./ Зе́млю же и возду́х ше́ствием твои́м освети́л еси́/ и всех ве́рных чуде́с богозна́меньми облиста́л еси́,/ чудотво́рец преди́вен и моли́твенник к Бо́гу о ми́ре изя́щен яви́ся./ Сего́ ра́ди вопие́м ти:/ спаса́й нас те́плым свои́м предста́тельством,/ я́ко учени́к Бо́жия благода́ти.
И́кос:
Я́ко вои́стинну Боже́ственною и непреобори́мою си́лою Уте́шителя обо́лкся,/ гро́мом слове́с твои́х разруши́л еси́ кре́пость льсти́ваго,/ столп Правосла́вия непоколеби́м яви́ся,/ на зла́це кра́сне оте́ческих преда́ний пребыва́ти ста́до свое́ наставля́я тве́рдостию ра́зума непрекло́нно,/ по и́стине побора́я, му́жески царя́ обличи́л еси́,/ и́мже в заточе́ние отсыла́емь, непра́ведно от престо́ла отгоня́ешися,/ нов, я́ко вторы́й Златоу́ст, о́наго бо подо́бник по́двигом показа́ся, блаже́нне./ Во изгна́нии мно́ги ско́рби и беды́ подъя́л еси́,/ до́блественне терпя́ разлуче́ние вруче́ннаго ти ста́да,/ о не́мже страда́льчески кончи́ну подъя́л еси́;/ к нему́ же днесь а́бие Бо́жиим манове́нием возвраща́ешися ра́достно,/ чудесы́ озаря́я вопию́щих ти ве́рою:/ спаса́й нас те́плым свои́м предста́тельством,/ я́ко учени́к Бо́жия благода́ти.
Песнь 7
Ирмо́с: О́бразу служи́ти/ мусики́йскому согла́сию созыва́ющу лю́ди,/ от пе́сней сио́нских пою́ще оте́чески, о́троцы Дави́довы/ мучи́телево разори́ша злочести́вое веле́ние/ и пла́мень в ро́су преложи́ша,/ песнь воспева́юще:/ превозноси́мый отце́в и наш Бо́же, благослове́н еси́.
Ум влады́ку поста́вль, стремле́ние па́губных страсте́й удержа́л еси́,/ безстра́стия ри́зою укра́шен, к ве́чней ра́дости восте́кл еси́,/ со А́нгелы в невече́рнем све́те ликовству́еши, вопия́:/ превозноси́мый отце́в Бо́же, благослове́н еси́.
Фарао́на мы́сленнаго и триста́ты его́ бе́сы потопи́л еси́ ре́ками слез твои́х,/ христоподо́бным твои́м смире́нием возвы́шенную того́ горды́ню низложи́л еси́,/ у Престо́ла всех Царя́ ликовству́еши, вопия́:/ превозноси́мый отце́в Бо́же, благослове́н еси́.
Хва́лящим тя усе́рдно и тща́щимся поклони́тися свяще́нным моще́м твои́м в честно́е твое́ пренесе́ние,/ волну́яся пе́нами, а́бие водостла́нен гроб бысть,/ сквозе́ мо́ре Бо́жиим повеле́нием сих, о но́вый Богови́дче,/ жезло́м богоприя́тных твои́х моли́тв к земли́ и́стинней обетова́ния прево́диши, пою́щих:/ превозноси́мый отце́в Бо́же, благослове́н еси́.
Богоро́дичен: От Безнача́льна Отца́ безле́тно возсия́вшаго Сы́на/ несказа́нно родила́ еси́, Чи́стая Де́во Влады́чице,/ и, ро́ждши, Де́вою пребыва́еши,/ вся бо твори́т Соприсносу́щный Отцу́ из Тебе́ Плотоно́сец проше́дый,/ спаса́яй вопию́щих Ему́:/ превозноси́мый отце́в Бо́же, благослове́н еси́.
Песнь 8
Ирмо́с: В пла́мени о́гненне горя́щия пещи́/ сохра́ншаго де́ти/ и во зра́це А́нгела снизше́дшаго к ним,/ по́йте Го́спода/ и превозноси́те Его́ во ве́ки.
Цельба́м исто́чник приснотеку́щий,/ благода́тных дарова́ний богатотво́рное сокро́вище,/ прокаже́нным очище́ние, слепы́м свет яви́ся свяще́нная твоя́ ра́ка, святи́телю,/ и всем врачевство́ безме́здно, ве́рою притека́ющим и зову́щим:/ по́йте Го́спода и превозноси́те Его́ во ве́ки.
Честна́я мирополо́жница Пресвята́го Ду́ха цельбо́носныя твоя́ мо́щи, святи́телю,/ чуде́с пучи́на неисчерпа́ема яви́шася,/ я́ко ча́ша всезла́та, пи́во Боже́ственное точа́щи/ и веселя́щи ду́ши в честне́м твое́м пренесе́нии воспева́ющих тя ве́рою и зову́щих:/ по́йте Го́спода и превозноси́те Его́ во ве́ки.
Шата́ние беззако́ннующих не поколеба́ се́рдца твоего́ столпа́, святи́телю,/ но, я́ко и́стинен страда́лец, сла́вою муче́ния освяти́ся, блаже́нне,/ венце́м Боже́ственнаго благоле́пия прекра́сно удобря́емь,/ во све́те непристу́пнем лику́еши, зовы́й:/ по́йте Го́спода и превозноси́те Его́ во ве́ки.
Богоро́дичен: Щито́м неусы́пных Твои́х моли́тв, Пресвята́я Де́во Влады́чице,/ невреди́мо ста́до Твое́ от наве́т льсти́ваго соблюди́/ и грехо́в мои́х плени́цы расто́ргни, Богоневе́сто,/ Я́же у́зы а́довы расто́ргши Боже́ственным Рождество́м Свои́м,/ да Тя я́ко Богоро́дицу пое́м и превозно́сим во ве́ки.
Песнь 9
Ирмо́с: Тебе́, ви́денную дверь Иезекии́лем проро́ком,/ е́юже никто́же про́йде, то́кмо Бог еди́н,/ Богоро́дице Де́во, пе́сньми почита́ем.
Еди́нственнаго Трисо́бства Трисия́тельный Божества́ Свет благослови́л еси́,/ Того́ еди́наго по достоя́нию от всех земны́х предпоче́л еси́,/ те́мже телесе́ о́блак совле́к, Престо́лу Того́ сла́вы предстои́ши./ Дерзнове́ние я́ко име́я мно́го, о воспева́ющих тя моли́ся,/ о святи́телю блаже́нне.
Ю́ность – наказа́ние, ста́рость – жезл,/ сироты́ – отца́, оби́димии – предста́теля,/ печа́льнии – ми́лостивное утеше́ние –/ вси воспое́м гото́ваго и те́плаго засту́пника,/ очи́ма и устна́ми любе́зне свяще́нную того́ ра́ку лобыза́юще и вопию́ще:/ о воспева́ющих тя моли́ся, о святи́телю блаже́нне.
Я́ко цвет Боже́ственнаго са́да неувяда́емь,/ я́ко крин присноцвету́щ и благосия́нен,/ животво́рных вод струя́ нетле́нная/ цельбоно́сныя и свяще́нныя твоя́ мо́щи, сия́нием Пресвята́го Ду́ха осеня́еми,/ Боже́ственными арома́ты благоуха́юще пою́щих тя любо́вию, о святи́телю блаже́нне.
Богоро́дичен: О Богоза́рный све́щниче Све́та,/ о Боже́ственныя и Присносу́щныя Сла́вы всесия́тельное селе́ние,/ Де́во Неискусобра́чная, святи́телем и проро́ком сла́во и всея́ тва́ри украше́ние,/ Боже́ственную трапе́зу Хле́ба жи́зни имену́ем Тя,/ престо́л высо́кий и превзя́тый, на не́мже почи́ Бог,/ спаса́яй воспева́ющих Тя, Богоотрокови́це Всепе́тая.
Свети́лен:
Свет жития́ твоего́ церко́вное просвети́ исполне́ние,/ богосия́нно свети́ло яви́лся еси́ ми́рови,/ я́ко кипари́с мироуха́нен, доброде́тельми процвете́,/ благово́нно ми́ро от честны́х твои́х моще́й источа́еши,/ благоуха́я воспева́ющих честны́х твои́х моще́й пренесе́ние.
Сла́ва, и ны́не, Богоро́дичен:
Све́ту невече́рнему жили́ще Богоприя́тное Твое́ чре́во бысть, Влады́чице,/ вселе́нней похвало́, Де́во Преблагослове́нная,/ спаси́ воспева́ющих служи́теля Твоего́ честны́х моще́й пренесе́ние.
На хвали́тех стихи́ры, глас 1.
Подо́бен: Прехва́льнии му́ченицы:
Похва́льными пе́сньми,/ свяще́нную ра́ку твою́ обстоя́ще,/ воспева́ем тя и Боже́ственнаго благоуха́ния исполня́емся, святи́телю,/ смра́да страсте́й избавля́ющеся;/ моли́ся, мо́лимся, Христо́ви/ дарова́ти душа́м на́шим мир и ве́лию ми́лость.
Пото́к сый, я́ве испо́лнь вод Боже́ственных,/ свяще́нная ра́ка моще́й твои́х, Фили́ппе святи́телю,/ Ду́ха благода́тию осеня́ема, свяще́нне,/ точа́щи исцеле́ния,/ воспева́ющих тя ве́рою сердца́ напоя́ет благода́тию.
Прему́дрости Боже́ственныя рачи́тель быв, свяще́нне,/ сла́дкия Того́ любве́ стрело́ю уязви́ся,/ тьму пре́лести отгна́л еси,/ я́ко у́тро благоле́пно,/ Це́ркви возсия́л еси́, святи́телю.
Сла́ва, глас 6: Челове́че Бо́жий:(зри выше)
И ны́не, Богоро́дичен:
Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы/ поми́ловати ду́ши на́ша.
На Литурги́и слу́жба вся святи́телю.
Моли́тва
О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́лпый наш засту́пниче, святи́телю Фили́ппе! Предстоя́ у Престо́ла всех Царя́, и наслажда́яся Све́та Единосу́щныя Тро́ицы, и херуви́мски со А́нгелы возглаша́я песнь Трисвяту́ю, вели́кое и неизсле́дованное дерзнове́ние име́я ко Всеми́лостивому Влады́це, моли́ся па́ствы Христо́вы спасти́ лю́ди, благостоя́ние святы́х церкве́й утверди́, архиере́и благоле́пием святи́тельства укра́си, мона́шествующих к по́двигам до́браго тече́ния укрепи́, град Москву́ и вся гра́ды и страны́ до́бре сохрани́ и ве́ру святу́ю непоро́чну соблюсти́ умоли́. Мир весь умири́, от гла́да и па́губы изба́ви ны и от нападе́ния иноплеме́нных сохрани́, ста́рыя уте́ши, ю́ныя накажи́, безу́мныя умудри́, вдови́цы поми́луй, сироты́ заступи́, младе́нцы возрасти́, плене́нныя возврати́, немощству́ющия исцели́ и везде́ те́пле призыва́ющих тя и с ве́рою притека́ющих к тебе́ и усе́рдно припа́дающих и моля́щихся от вся́ких напа́стей и бед хода́тайством твои́м свободи́. Моли́ о нас Всеще́драго и Человеколюби́ваго Христа́ Бо́га на́шего, да и в день стра́шнаго прише́ствия Его́ шу́ияго стоя́ния изба́вит ны и ра́дости святы́х прича́стники сотвори́т со все́ми святы́ми во ве́ки. Ами́нь.
