НА МА́ЛОЙ ВЕЧЕ́РНИ
Поста́вим стихи́ 4 и пое́м стихи́ры самогла́сны, глас 5:
Ве́рою и любо́вию соше́дшеся, празднолю́бцы,/ псалмы́ и пе́сньми восхва́лим дне́сь Небе́снаго челове́ка/ и земна́го А́нгела,/ к нему́же возопие́м:/ о всеблаже́нне преподо́бне,/ по́стников похвало́ и му́чеников!/ о нас моли́ся к Бо́гу,/ о́тче наш Ники́то,/ поми́ловатися душа́м на́шим.
Честны́й и светоно́сный наста́ пра́здник,/ испо́лнь ра́дости, и весе́лия, и духо́внаго торжества́./ Те́мже, соше́дшеся, мона́хов мно́жества/ и христоимени́тии лю́дие,/ любо́вию восхваля́юще,/ блажи́м Боже́ственная дея́ния твоя́:/ я́ко бо крин удо́льный, процве́т,/ благоуха́еши душе́вная на́ша чу́вства./ Ники́то о́тче наш,/ моли́ спасти́ ду́ши на́ша.
Я́ко уязвился еси́ жела́нием Боже́ственным,/ преподо́бне о́тче Ники́то,/ взем бо крест твой, после́довал еси́ Влады́це Христу́./ Тогда́, вся́кая плотска́я мудрова́ния умертви́в,/ насле́довал еси́ кро́тких зе́млю,/ прича́стием бо обожа́емь/ и неизрече́ннаго о́наго весе́лия наслажда́яся,/ помина́й нас, творя́щих всесвяту́ю твою́ и пречестну́ю па́мять.
Сла́ва, глас 8:
Преподо́бне и Богоблаже́нне о́тче Ники́то,/ вои́стинну сподо́бился еси́ Боже́ственныя жи́зни,/ посто́м и бде́нием изнуря́я те́ло твое́,/ те́мже и о́браз был еси́ мона́хов,/ а́ще бо и теле́сный язы́к умолча́,/ но чудеса́ свиде́тельствуют./ Дре́вний град Переясла́вль, пропове́дуя, хва́лится,/ име́я в себе́ неистощи́мое сокро́вище:/ са́ми бо, зря́ще честну́ю ра́ку моще́й твои́х/ и чудеса́ быва́емая,/ прославля́ют просла́вльшаго тя Го́спода./ Ему́же моли́ся, преподо́бне,/ дарова́ти вселе́нней мир и ве́лию ми́лость.
На стихо́вне стихи́ры, глас 2.
Подо́бен: До́ме Евфра́фов:
Изше́д из до́му,/ гра́да Переясла́вля,/ преподо́бне о́тче Ники́то,/ и доше́д тезоимени́таго Ла́вры,/ ту показа́лся еси́ дом Пресвята́го Ду́ха.
Стих: Честна́ пред Го́сподем/ сме́рть преподо́бных Его́.
Дом духо́вный бы́ти/ сподо́бился еси́, о́тче Ники́то,/ от удивле́ния бра́шен ужасну́вся,/ я́ко ка́мень, согражде́н/ Боже́ственною благода́тию.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Зако́н прие́м от наста́вника/ тезоимени́таго Ла́вры,/ и мирска́я мудрова́ния оста́вль,/ яви́лся еси́ дом/ Пресвята́го Ду́ха.
Богоро́дичен:
Ра́дуйся, Я́же ра́дость/ ми́ру прие́мшая/ и утоли́вшая печа́ль,/ Де́во, прама́терню,/ Христа́ Жизнода́вца поро́ждши.
Тропа́рь преподо́бнаго, глас 4 (зри на велицеи вече́рни).
Сла́ва, и ны́не, Богоро́дичен.
НА ВЕЛИ́ЦЕЙ ВЕЧЕ́РНИ
Пое́м, Блаже́н муж:На Го́споди, воззва́х:стихи́ры, глас 4.
Подо́бен: Я́ко до́бля:
Воздержа́ния стрела́ми врага́ уязви́л еси́/ и сего́ разори́л еси́ полки́./ Тем побе́ды прия́т на враги́, блаже́нне преподо́бне,/ на сего́ держа́вно тя, Ники́то, Христу́ укре́пльшу./ Его́же моли́ от тли и бед изба́вити/ соверша́ющих при́сно честну́ю па́мять твою́.
На лу́чшая виде́ния вшед, блаже́нне,/ земна́я вся и тле́ющая преходя́щая/ в телеси́, преподо́бне, презре́л еси́, житие́ безвеще́ственное/ на земли́, Ники́то, пожи́л еси́, сла́вя Христа́./ Его́же моли́ от тли и бед изба́вити/ чту́щия при́сно честну́ю па́мять твою́.
Дарова́нии Ду́ха,/ Боже́ственными сия́нии просве́щся,/ приенопа́мятне Ники́то,/ свети́льник показа́лся еси́ конце́м,/ боле́зней зол и тьму́ страсте́й отгоня́я моли́твами твои́ми,/ избавля́я неду́г, и скорбе́й, и бед/ ве́рою соверша́ющих при́сно честну́ю па́мять твою́.
И́ны стихи́ры, глас то́йже.
Подо́бен: Дал еси́ зна́мение:
Я́ко глас проро́ческий услы́шав:/ измы́йтеся, и чи́сти бу́дете;/ и от сего́ умиле́ние в се́рдцы прие́м,/ и всего́ себе́ слеза́ми облива́я,/ воспомина́я своя́ соде́янная,/ и ничто́же моги́й веща́ти,/ то́кмо во уме́ свое́м к Бо́гу глаго́лаше:/ наста́ви мя на стези́ пра́вы,/ и пойду́ во и́стине Твое́й,/ исполня́я Твоя́ повеле́ния.
Егда́ друго́м и зна́емым со́званным/ и потре́бным устро́енным/ зна́мение стра́шно показа́ся:/ пе́на с кро́вию, от сосу́да исходя́щи,/ и сне́дная на мно́ги у́ды челове́ческия претвори́шася,/ и, ве́лиим стра́хом одержи́м быв,/ ско́ро от до́му изы́де,/ и, ко оби́тели устреми́вся,/ во уме́ свое́м к Бо́гу моля́шеся.
Егда́ от до́му изше́д,/ слеза́ми пу́ть омочи́л еси́,/ оби́тели достиза́еши и наста́внику духо́вне бесе́довал еси́,/ обе́ты твоя́ Бо́гу воздава́я,/ пло́ти твоея́ не пощади́л еси́,/ мра́вию и мши́цам сию́ в сне́дь пре́дал еси́/ и сим врага́ до конца́ посрами́л еси́.
Сла́ва, глас 6:
Мир возненави́дев, Христа́ возлюби́л еси́/ и, Тому́ после́довав,/ вери́ги тя́жки на те́ле твое́м носи́л еси́,/ посто́м и бде́нием себе́ удруча́я,/ я́ко безпло́тен, на земли́ пожи́л еси́;/ ду́шу же пресве́тлу Бо́гу предста́вив,/ дарова́ний чуде́с сподо́бился еси́./ Тем мо́лим тя, о́тче Ники́то преподо́бне,/ моли́ спасти́ся душа́м на́шим.
И ны́не, Богоро́дичен.
Вход. Проки́мен дне. Чте́ния три.
Проро́чества Иса́иина чте́ние(глава́ 43):
Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́, я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаго́лет Госпо́дь Бог,/ и о́трок, его́же избра́х,/ да позна́ете, и ве́руете Ми,/ и разуме́ете, я́ко Аз е́смь,/ пре́жде Мене́ не бы́сть ин бог и по Мне не бу́дет./ Аз е́смь Бог, и не́сть, ра́зве Мене́, спаса́яй./ Аз возвести́х и спасо́х,/ уничижи́х и не бе в вас чу́ждий./ Вы Мне свиде́тели, и Аз Госпо́дь Бог,/ и еще́ от нача́ла Аз е́смь,/ и не́сть, от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас Святы́й Изра́илев.
Проро́чества Иса́иина чте́ние(глава́ 62):
Та́ко глаго́лет Госпо́дь:/ на стена́х твои́х, Иерусали́ме, устро́их стра́жи ве́сь де́нь и всю но́щь,/ и́же до конца́ не премо́лкнут, помина́юще Го́спода:/ не́сть бо вам подо́бен,/ а́ще испра́виши и сотвори́ши, Иерусали́ме, непрезо́рство на земли́./ Кля́тся Госпо́дь си́лою Свое́ю и кре́постию мы́шцы Своея́:/ а́ще ктому́ отда́м пшени́цу твою́ и бра́шно твое́ враго́м твои́м,/ и а́ще ктому́ испию́т вино́ твое́ сы́нове чужди́и, о не́мже труди́лся еси́,/ но собира́ющим снедя́т е и восхва́лят Го́спода,/ и е́млющии испию́т е во дво́рех святы́х Мои́х./ Ше́ствуйте враты́ Мои́ми, и пу́ть сотвори́те лю́дем Мои́м,/ и ка́мение, е́же на пути́, размещи́те,/ и воздви́гните зна́мение во язы́ки./ Се бо Госпо́дь слы́шано сотвори́ до после́дних земли́,/ и рече́те дще́ри Сио́нове:/ се Спаси́тель твой прихо́дит, имы́й мзду с Собо́ю,/ и де́ло Его́ пред лице́м Его́./ И нарече́т я лю́ди свя́ты, изба́влены Го́сподем,/ ты же нарече́шися взы́скан град и не оста́влен.
Прему́дрости Соломо́ни чте́ние (главы́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́/ и вооружи́т тва́рь в ме́сть враго́м./ Облече́тся в броня́ пра́вды и возложи́т шлем – суд нелицеме́рен./ Прии́мет щит непобеди́мый преподо́бне,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды./ Вознегоду́ет на них вода́ морска́я, ре́ки же потопя́т я на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества и гордя́щиися о наро́дах язы́к,/ я́ко дана́ е́сть от Го́спода держа́ва вам/ и си́ла от Вы́шняго.
На лити́и стихи́ры, глас 4:
Преподо́бне о́тче Ники́то,/ ты врач душа́м и те́лом яви́лся еси́,/ источа́я неду́жным исцеле́ния струи́,/ да́ром же благода́тным украша́емь, да́льнаго ра́ди ше́ствия/ тя́жким неду́гом обдержи́маго кня́зя здра́ва сотвори́л еси́,/ воздаю́ща хвалу́ Бо́гу,/ такова́ да́ра сподо́бльшему тя,/ и, обра́щшагося к пу́тному ше́ствию, глаго́лавша:/ моли́, преподо́бне, о чту́щих любо́вию пречестну́ю па́мять твою́,/ спасти́ ду́ши на́ша.
Богому́дре Ники́то,/ сла́ву маловре́менную оста́вль,/ в тезоимени́таго Ла́вру всели́лся еси́, о́тче,/ и, Тро́ице чи́стый дом показа́вся, блаже́нне,/ си́лою и де́йствием Свята́го Ду́ха те́мныя полки́ прогоня́еши,/ и зми́я среди́ ке́ллии ме́ртва сотвори́л еси́:/ живя́ше бо в тебе́ Христо́с Бог наш,/ Его́же моли́, преподо́бне,/ спасти́ ду́ши на́ша.
Мирски́й мяте́ж оста́вль/ и взем крест твой,/ после́довал еси́ Христу́ невозвра́тным по́мыслом./ Из до́му изше́л еси́,/ супру́гу и бли́жними я́ко нивочто́же вмени́в,/ и дости́гл еси́ тезоимени́таго в му́ченицех Ла́вры,/ душе́вныя стра́сти из ко́рене исторга́я,/ тя́жкая желе́за на вы́ю возложи́л еси́,/ и ча́стых ра́ди бде́ний и моли́тв благода́ть восприе́м, преподо́бне,/ исцеля́ти разли́чныя неду́ги./ А́нгелом собесе́дниче и преподо́бным сожи́телю,/ о́тче Ники́то, моли́ся Го́сподеви/ спасти́ ду́ши на́ша.
Сла́ва, глас 5:
Преподо́бне о́тче,/ не дал еси́ сна твои́ма очи́ма,/ ни ве́ждома дрема́ния,/ до́ндеже ду́шу и те́ло от страсте́й свободи́л еси́/ и себе́ угото́вал еси́ Ду́ху жили́ще:/ прише́д бо, Христо́с со Отце́м оби́тель в тебе́ сотвори́,/ и Единосу́щныя Тро́ицы уго́дник быв,/ великопропове́дниче, о́тче наш Ники́то,/ моли́ спасти́ся нам.
И ны́не, Богоро́дичен.
На стихо́вне стихи́ры, глас 8.
Подо́бен: О, преславнаго чудесе́:
Преподо́бне о́тче Ники́то,/ слепы́м дае́ши свет,/ боля́щим исцеле́ние,/ хромы́м здра́вие/ и ми́лостивно преклоня́ешися/ приходя́щим с ве́рою ко хра́му твоему́,/ прося́щим по́мощи твоея́:/ се бо засту́пника и предста́теля, ве́рнии вси, обрето́хом,/ восхваля́ющии тя, всече́стне.
Стих: Честна́ пред Го́сподем/ сме́рть преподо́бных Его́.
Преподо́бне о́тче всече́стне,/ доброде́тельми благи́ми вшел еси́,/ я́ко на о́гненней колесни́це, к Бо́гу/ и побе́дными венцы́ увя́зался еси́,/ я́ко мони́сты, на те́ле твое́м носи́л еси́ честны́я вери́ги;/ на гро́бе же положены́, источа́ют исцеле́ния/ и прогоня́ют ду́хи лука́выя./ Тем блажи́м тя, прехва́льне Ники́то.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Лико́м по́стническим сочта́лся еси́, преподо́бне,/ и мона́шеским украси́лся еси́, блаже́нне, житие́м,/ и ны́не в Небе́сных весели́шися селе́ниих,/ иде́же лику́ют А́нгели,/ све́том Боже́ственным вои́стинну обожа́емь./ Помина́й вы́ну/ блажа́щих тя на земли́/ и пресвято́е твое́ творя́щих успе́ние, Ники́то.
Сла́ва, глас 3:
Глас проро́ка, велегла́сно вопию́ща:/ измы́йтеся, и чи́сти бу́дете,/ моля́щу ти ся во святи́лиши, услы́шав,/ возстена́л еси́ из глубины́ се́рдца, глаго́ля:/ Бо́же, очи́сти мя./ И учрежде́ние сотвори́л еси́ в до́му клевре́т ра́ди твои́х,/ и уви́дением бра́шен ужа́слся,/ и отто́ргнулся еси́, я́ко се́рна, от тене́т,/ земна́я мудрова́ния оплева́в./ И ны́не, преподо́бне о́тче Ники́то,/ не пре́зри моли́твы раб твои́х, моля́щихся тебе́,/ испроси́ у Христа́ Бо́га/ поми́ловати ду́ши на́ша.
И ны́не, Богоро́дичен.
Тропа́рь, глас 4:
Правосла́вным смы́слом ю́ношская возжеле́ния возненави́дев/ и до́блественныя нра́вы восприи́м, врага́ победи́л еси́,/ и во благоразу́мии Бо́гу угоди́л еси́,/ и свы́ше от Него́ прие́м дар чуде́с,/ бе́сы прогоня́ти, неду́ги исцеля́ти,/ Ники́то пресла́вне,/ моли́ Христа́ Бо́га, да спасе́т ду́ши на́ша.
Ин тропа́рь, глас то́йже:
Христо́ву му́ченику тезоимени́т был еси́, преподо́бне,/ мно́ги по́двиги и труды́ претерпе́л еси́ Христа́ ра́ди,/ Его́же ра́ди вери́ги носи́л еси́, блаже́нне,/ Того́ ны́не о нас моли́, Ники́то преподо́бне,/ душе́вныя на́ша и теле́сныя стра́сти уврачева́ти,/ и́же ве́рою и любо́вию/ почита́ющих при́сно па́мять твою́.
НА У́ТРЕНИ
По 1-й стихоло́гии седа́лен, глас 4:
Во оби́тели тезоимени́таго тебе́ страстоте́рпца жи́знь препроводи́л еси́,/ и вси, приходя́щии к тебе́, а́ки ко исто́чнику благотеку́щему,/ ра́достно отходя́ще, Христа́ прославля́ют.
Сла́ва, и ны́не, Богоро́дичен:
Воста́ния безпло́тных враг и зло́бы, изба́ви мя, Богоро́дице,/ и Твое́ю моли́твою сих прожени́:/ Тя бо и́мам те́плое заступле́ние, и по́мощь, и тве́рдое прибе́жище.
По 2-й стихоло́гии седа́лен, глас 3:
Не то́кмо во гра́де твое́м слы́шано бы́сть,/ но и во вся страны́ и гра́ды произы́де сла́ва и́мене твоего́, преподо́бне,/ и вси, призыва́ющии с ве́рою тебе́ на по́мощь,/ неду́гов исцеле́ние прие́млют.
Сла́ва, и ны́не, Богоро́дичен:
Предста́тельнице и покро́в Ты еси́, Пречи́стая,/ изба́ви ны от бед лю́тых и обстоя́ний/ и ду́ши на́ша спаси́ Боже́ственными Твои́ми моли́твами.
По полиеле́и седа́лен, глас 2:
Ко́е похвале́ние принесе́м тебе́, преподо́бне?/ а́нгельски бо на земли́ пожи́л еси́,/ дре́вних же по́стник воздержа́нием дости́г,/ к му́чеником приложи́лся еси́, я́ко ну́ждную сме́рть прия́вый./ Тем мо́лим тя, Ники́то:/ моли́ Христа́ Бо́га о всех нас.
Сла́ва, и ны́не, Богоро́дичен:
Прия́т во чре́ве Невмести́маго Бо́га,/ Херуви́м и Серафи́м вы́шши яви́лася еси́, Влады́чице,/ тем, вси ве́рнии, воспева́ем Рождество́ Твое́, Пречи́стая.
Степе́нна, 1-й антифо́н 4-го гла́са. Проки́мен: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние:Ева́нгелие от Матфе́я, зача́ло 43.
По 50-м псалме́ стихи́ра, глас 6:
Преподо́бне о́тче,/ егда́ от до́му изше́л еси́,/ ни на град озре́лся еси́,/ ни друго́в соедине́ния,/ ни супру́жницы любве́ помышля́я,/ но ку́пно вся земна́я возненави́дев,/ на Небе́сная же взира́я/ и к сим ра́зум твой возвыша́я:/ и я́коже обеща́лся еси́,/ та́ко благоче́стно соверши́л еси́./ Тем па́мять твою́ почита́ем, досточу́дне.
Кано́н, глас 4.
Пе́снь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Све́том благода́ти озаря́емь, преподо́бне,/ ве́рою па́мять твою́ торжеству́ющия светови́дную/ тьмы́ грехо́вныя моли́твами твои́ми изба́ви,/ Ники́то пресла́вне.
К Бо́гу вводя́щ несовра́тно ше́ствовал еси́ пу́ть,/ ко гра́ду Небе́сному, Ники́то, дости́гл еси́,/ и́бо Святы́й наста́ви тя Дух, почива́яй в се́рдцы твое́м.
Вознося́щее смире́ние, Ники́то, име́л еси́, тем мо́лимся тебе́:/ уще́дри, преподо́бне, смире́ние на́ше/ и боле́зни вся облегчи́ серде́ц на́ших.
Богоро́дичен: Ра́дости нам Хода́таица,/ я́ко прие́мши исполне́ние всего́ Божества́, яви́лася еси́, Всенепоро́чная,/ тем вси Тебе́, ра́дуйся, А́нгелово согла́сно зове́м, Богора́дованная.
Други́й кано́н, име́яй краегране́сие: Пе́ние приношу́ моле́бно преди́вному отцу́ Ники́те.Глас 8.
Пе́снь 1
Ирмо́с: Сокруши́вшему бра́ни мы́шцею Свое́ю/ и прове́дшему Изра́иля сквозе́ Чермно́е мо́ре,/ пои́м Ему́, я́ко Изба́вителю на́шему Бо́гу,/ я́ко просла́вися.
Пе́ние приими́ от усте́н недосто́йных, Человеколю́бче Го́споди,/ и пода́ждь ми отверзе́ние усто́м и глас умиле́ния,/ да возмогу́ воспе́ти уго́дника Твоего́, Ники́ту преди́внаго.
Не́навистию возненави́дев суету́ ми́ра,/ вся соде́янная с пла́чем испове́дал еси́ духо́вному твоему́ наста́внику/ и запреще́ние любе́зно от души́ восприя́л еси́.
Ели́ко име́я друго́в любле́ния,/ и подру́жия совокупле́ния, и домо́вное пребыва́ние,/ во́лею всех оттщети́вся, Христа́ еди́наго приобре́л еси́.
Богоро́дичен: Мольбу́ приноша́ю от усте́н недосто́йных, сию́ приими́, Влады́чице,/ я́ко вдо́выя о́ныя две ца́те, неде́йственна бо е́сть./ Те́мже со умиле́нием вопию́ Ти:/ о Пребога́тая, сла́ва Рождеству́ Твоему́, Пречи́стая!
Пе́снь 3
Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́,/ не́сть бо свят, па́че Тебе́, Человеколю́бче.
Пре́жднее весе́лие измени́л еси́/ бу́дущих ра́ди благи́х же́стостию, доброде́тельно пожи́в, блаже́нне,/ на исто́чнице в гора́х, я́ко вели́кий Илия́, пребыва́я.
Пу́ть пра́вый, его́же возжеле́в поще́ния ра́ди,/ удивле́нием бра́шен тебе́ показа́ Бог,/ его́же обре́л еси́ безме́здно я́коже приста́нище, му́дре.
Ко́леблемых разли́чными страстьми́ ко твоему́ столпу́, Ники́то, приходя́щих,/ честны́м твои́м хода́тайством всех нас посети́,/ моля́ Человеколю́бца.
Богоро́дичен: Тя Му́дрость Бо́жия всечестны́й орга́н обре́тши,/ от Твои́х чи́стых крове́й воплоща́ется/ и по рождестве́ нетле́нну показа́.
Ин
Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.
Матфе́й, мы́тницу оста́вль, евангели́ст показа́ся;/ ты же, преподо́бне, суету́ ми́ра отве́рг/ в мона́шеская оде́явся, Христу́ угоди́л еси́/ и чудотво́рец показа́лся еси́.
Лука́вое со́нмище оста́вль,/ Христо́в яре́м на ся возложи́л еси́,/ труды́ же и по́двиги твои́ми всех удивля́я и ко спасе́нию наставля́я.
Блу́днаго гла́сом вопия́ и со воздыха́нием в пе́рси бия́,/ Бо́гу прибли́жился еси́ и ра́дости ве́чныя сподо́бился еси́/ и непреста́ннаго, Ники́то, весе́лия.
Богоро́дичен: Напа́стьми мно́гими одержи́м с боле́зньми и пла́чем вопию́ Ти:/ изба́ви, Богоро́дице, от одержа́щих мя скорбе́й и ве́чнаго муче́ния/ и Ца́рствия Сы́на Твоего́ сподо́би мя.
Ин и́кос:
А́ще и челове́к, о́тче, по естеству́,/ но па́че естества́ челове́ческаго стяжа́л еси́,/ вся бо в ми́ре сла́дкая и кра́сная преоби́дев, после́довал еси́ Христу́,/ те́мже и от всех слы́шиши:/ ра́дуйся, я́ко Пречи́стою наставля́емь, пусты́ню дости́гл еси́;/ ра́дуйся, я́ко в ней прече́стен храм Бо́жией Ма́тери воздви́гл еси́;/ ра́дуйся, я́ко та́мо в нем Бог тобо́ю прославля́ется;/ ра́дуйся, я́ко вшел еси́ на столп, преподо́бне;/ ра́дуйся, я́ко пло́ть порабо́тил еси́ ду́ху;/ ра́дуйся, я́ко твоему́ житию́ А́нгели удиви́шася;/ ра́дуйся, я́ко тобо́ю челове́цы по́льзовашася;/ ра́дуйся, я́ко чудесы́ удиви́вый вся;/ ра́дуйся, я́ко на Небесе́х предстоя́ Тро́ице, о нас мо́лишися;/ ра́дуйся, исто́чниче чудесе́м неисчерпа́емый;/ ра́дуйся, Ники́то преподо́бне, моли́твенниче о душа́х на́ших.
Седа́лен, глас 5:
Те́лом возше́д на столп, ум же возвы́сив на преми́рная,/ труды́ ко трудо́м прилага́еши, жела́я дости́гнути угото́ванных тебе́ благ на Небесе́х,/ и́хже получи́в, помина́й нас, почита́ющих свяще́нную па́мять твою́.
Други́й седа́лен, глас 4:
Я́ко всесве́тлая звезда́, возсия́в светоза́рными доброде́тельми, Богоно́се,/ всю ду́шу просвети́л еси́ Ду́хом./ Тем преше́л еси́ к невече́рнему Све́ту,/ разреша́я страсте́й на́ших те́мныя о́блаки,/ па́мять твою́ при́сно творя́щих се́рдца пра́востию.
Сла́ва, и ны́не, Богоро́дичен:
Нечи́стых по́мысл мои́х мно́жество/ и безме́стных мы́слей обурева́ния/ кто изрещи́ мо́жет, Всенепоро́чная?/ Настоя́ния же безпло́тных враг мои́х кто испове́сть и сих зло́бу?/ Но Твое́ю мольбо́ю, Блага́я, сих мне всех избавле́ние да́руй.
Пе́снь 4
Ирмо́с: Седя́й в Сла́ве на Престо́ле Божества́,/ во о́блаце ле́гце/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Столпу́, Богоно́се, согражда́ему непоколе́блемою душе́ю/ сам ся пре́дал еси́, бу́дущую жи́знь предзря́,/ ея́же улучи́ти жела́я, я́ко храбр во́ин.
Ла́вры честны́я дости́гл еси́, му́дре,/ возвы́сився смире́нием, верхи́ де́монския смири́л еси́/ и в ней до́блествовал еси́, сла́ва мона́хов и утвержде́ние.
Моли́твами и посто́м вооружи́вся/ и стра́хом себе́ умертви́в Госпо́дним, блаже́нне,/ отсту́пника изсека́еши, неви́димаго зми́я, о́тче, побе́дник был еси́.
Ве́сь Боже́ственным Ду́хом разжже́н быв, о́тче,/ труды́ подъя́л еси́ на мно́га ле́та, в хлеви́не у́зце терпя́,/ взыска́я Го́спода, благода́тию тя Боже́ственною укрепля́ющаго.
Богоро́дичен: На престо́ле высо́це стра́шно седя́й/ на ма́тернюю ру́ку, Младе́нец быв, седи́т,/ низпа́дший о́браз возводя́ и обоже́ние су́щим подава́я.
Ин
Ирмо́с: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Твое́й, сла́ва снизхожде́нию Твоему́.
При́сно име́л еси́ к Бо́гу моли́твенника,/ духо́внаго твоего́ наста́вника, я́коже втора́го Моисе́я,/ изве́дшаго из Еги́пта дре́вняго Изра́иля, науча́юща тя воспева́ти:/ сла́ва си́ле Твое́й, Го́споди.
Не довле тебе́, преподо́бне, многотру́дное пребыва́ние,/ желе́за тя́жкая на ся возлага́еши/ и труды́ к трудо́м прилага́еши, вопия́ Христу́:/ сла́ва си́ле Твое́й, Го́споди.
Ше́ствия Небеси́ явля́я, столп водрузи́л еси́/ и от сего́ стезю́ в моли́твенный храм ископа́л еси́,/ иде́же приле́жно вопия́ Христу́:/ сла́ва си́ле Твое́й, Го́споди.
Богоро́дичен: Возста́ви мя, ни́зу лежа́щаго, моли́твами Твои́ми, Пречи́стая,/ и на покая́ния стези́ наста́ви,/ да, возбну́в от глубины́ неча́яния, узрю́ свет Богоразу́мия/ и воспою́ заступле́ние Твое́, Препе́тая.
Пе́снь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Иеискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Ходи́л еси́, преподо́бне, по у́зкому пути́,/ Боже́ственными восхожде́нии се́рдца распространя́яся/ и прича́стием обожа́яся, всему́дре./ Тем был еси́ мона́хом све́тлость.
О́ко очи́стившу у́мное, преподо́бне,/ благода́ть даде́ся тебе́, а́ки проро́ку,/ е́же пре́дняя предзре́ти и предглаго́лати я́ко су́щая да́льняя и безве́стная.
Боле́знь облегчи́ ми грехо́в и скорбе́й,/ и преста́ви се́рдца моего́ боле́зни,/ и согреше́ний разреше́ние да́руй, Благоде́теля Бо́га име́я,/ послу́шающаго честны́х твои́х моли́тв.
Богоро́дичен: Ума́ моего́ исцели́ превраще́ние, Пречи́стая,/ уврачу́й стра́сти души́ моея́ и ле́ностную тьму́ отжени́,/ я́ко да хвала́ми Тя при́сно ублажа́ем, Всенепоро́чная.
Ин
Ирмо́с: Го́споди Бо́же наш, мир да́ждь нам,/ Го́споди Бо́же наш, стяжи́ ны,/ Го́споди, ра́зве Тебе́, ино́го не ве́мы,/ И́мя Твое́ имену́ем.
Пе́ния соверша́я, исходя́ в но́щи от столпа́, два исто́чника ископа́л еси́,/ от ни́хже и до ньше, с ве́рою почерпа́юще,/ прие́млют благода́ть исцеле́ний.
Сопе́рник прелука́вый, а́ки змий превели́к,/ посреде́ ке́ллии твоея́ изы́де, устраша́я тя,/ ты же сего́, блаже́нне, попра́л еси́/ и без ве́сти моли́твою до конца́ сотвори́л еси́.
Неду́г ослабле́ния удо́в име́я, благочести́вый Михаи́л,/ княже́ние тогда́ содержа́й во гра́де Черни́гове,/ моли́твами твои́ми исцеле́ние получи́.
Богоро́дичен: Христа́ Иису́са ро́ждшая, Пречи́стая,/ Сего́ моли́ при́сно изба́вити от бед рабы́ Твоя́, ве́рою и́мя Твое́ призыва́ющия:/ ра́зве бо Тебе́, Влады́чице, ино́го заступле́ния не и́мамы.
Пе́снь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Умертви́л еси́ стра́сти теле́сныя,/ я́ко дре́во ви́деся высокове́рхо, плоды́ чуде́с принося́,/ Ники́то, Богоблаже́нне.
И́же безчи́сленным боле́знем прибли́жихся,/ те́лом не́мощен пребы́в, преподо́бне./ Тем зову́ ти веюою:/ боле́зни уста́ви се́рдца моего́.
От душе́вных не́мощей, о́тче, коле́блемых, ве́рою тя призыва́ющих ны́не посети́/ моли́твами твои́ми, я́же к Бо́гу,/ я́ко да благоче́стно тя сла́вим.
Богоро́дичен: Еди́на Помо́щнице, помози́ ми, погиба́ющу,/ и ру́ку ми простри́, и ко приста́нищу наведи́ покая́ния,/ Де́во Богора́дованная.
Ирмо́с: Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на, та́ко вопию́ Ти:/ возведи́ от тли живо́т мой,/ Благоутро́бне Го́споди.
Преди́вно бы́сть чу́до: еще́ бо держа́вному Михаи́лу, ни оби́тели дости́гшу,/ ни столпа́ ви́девшу, то́кмо жезл твой в ру́це прии́м/ и о сем укрепи́вся, исцеле́ние получи́/ и прии́де во оби́тель твою́ здрав.
Ра́достно благочести́вый Михаи́л кня́зь, прие́мля от Тебе́ благослове́ние,/ сам тебе́ испове́да, ка́ко велиа́р во о́бразе чернца,/ двакра́ты поноси́ тебе́, сказу́я тебе́, от жития́ сего́ отше́дша.
Держа́вный Михаи́л кня́зь, доше́д ме́ста, иде́же исцеле́ние получи́,/ повеле́ водрузи́ти Честны́й Крест в сла́ву Бо́гу/ и в па́мять чудеси́ преди́внаго отца́.
Богоро́дичен: Все вре́мя живота́ моего́ во страсте́х изжи́х/ и ны́не моле́ния приноша́ю Ти, Пречи́стая:/ разреше́ние пода́ждь ми, Всепе́тая, и ве́чнаго мя изба́ви осужде́ния,/ Ты бо ми́ру Блага́я Помо́щница.
Конда́к, глас 8:
Христа́ ра́ди от твои́х рабо́в ну́ждную сме́рть претерпе́л еси́/ и вене́ц нетле́ния от Него́ восприя́л еси́,/ приходя́щим же с ве́рою от честна́го твоего́ гро́ба подае́ши цельбы́,/ о Ники́то преподо́бне,/ моли́твенниче о душа́х на́ших.
И́кос:
Земны́й А́нгел, Небе́сный челове́к был еси́, преподо́бне,/ посто́м и бде́нием ду́шу просвети́в,/ алка́нием, и жа́ждею, и на земли́ лега́нием Бо́гу угоди́л еси́/ и вся́ку доброде́тель мона́шескаго жития́ испра́вил еси́,/ к сим же и ну́ждную сме́рть от твои́х рабо́в восприи́м,/ возше́л еси́ к жела́емому Христу́, ра́дуяся, о Ники́то преподо́бне,/ моли́твенниче о душа́х на́ших.
Пе́снь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Се́рдце твое́ Тро́ическое жили́ще соде́лав,/ три кресты́ и тя́жкая желе́за, Ники́то, на себе́ поне́с,/ от ни́хже Боже́ственною благода́тию цельбы́ истека́ют/ на просвеще́ние и очище́ние ве́рно притека́ющим ти.
Душа́ твоя́ светозаре́нием Боже́ственнаго Ду́ха сия́ющи при́сно,/ ду́ши ви́дяще притека́ющих ти ве́рою све́тло, блаже́нне, проро́ческими прорече́нии,/ тем тя ублажа́ем.
Неду́гов тружда́ющих, блаже́нне, ду́ши и телеса́/ твои́ми святы́ми моли́твами вско́ре измени́ и пе́ти сотвори́:/ препе́тый отце́в Госпо́дь и Бог, благослове́н еси́.
Богоро́дичен: Непреме́ннаго ро́ждши, еди́на Богора́дованная,/ десни́цею Его́, Чи́стая, премени́ти ми ум на лу́чшее молю́ Ти ся,/ лю́те превраща́емый жите́йскими упраждне́нии.
Ин
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
Не ржа покры́ тя́жкая о́на желе́за,/ но труды́ твоя́ и по́ты сих просвети́ша, и, я́ко зла́то, блеща́хуся:/ любве́ же ра́ди Госпо́дни не чул еси́ сих на телеси́ твое́м, усе́рдно вопия́:/ оте́ц на́ших Бо́же, благослове́н еси́.
Му́тнии умо́м уби́йцы, зря́ще блиста́ние о́но на телеси́ твое́м,/ мня́ще мно́жество зла́та нося́щу ти,/ о уби́йстве твое́м умы́слиша./ Ты же от сих, преподо́бне, ну́ждную сме́рть восприя́л еси́, вопия́ Христу́:/ оте́ц на́ших Бо́же, благослове́н еси́.
Обрето́ша во вре́мя у́тренняго клепа́ния честно́е те́ло твое́, те́пло лежа́що,/ ду́шу же отше́дшу ко Го́споду,/ оби́тели же, испо́лньшися благово́ния, вси возопи́ша со слеза́ми:/ оте́ц на́ших Бо́же, благослове́н еси́.
Богоро́дичен: Це́рковь освяще́на Бо́гу бы́вши, Мари́е Богороди́тельнице,/ Сего́ моли́, я́ко Человеколю́бца, Чи́стая, уще́дрити лю́ди согреши́вшия/ и спасти́ от бед лю́тых и страсте́й треволне́ния.
Пе́снь 8
Ирмо́с: О́троки благочести́выя в пещи́/ Рождество́ Богоро́дичо спасло́ е́сть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Стоя́ на сто́лпе вы́спрь,/ я́ко на све́щнице свеща́, преподо́бне, светя́щи,/ всем ра́зумы ве́рным просвеща́я,/ пока́зовал еси́ до́бре словесы́ и дея́нии стезю́ живота́/ и возводи́л еси́ сия́ Боже́ственным смы́слом к высоте́ безстра́стия.
Ум безстра́стием очи́щ, бесе́довал еси́ ко Го́споду Вседержи́телю,/ от Него́же неизрече́нным, преподо́бне, навыка́я,/ проро́чески предглаго́лал еси́,/ просвеща́я ду́ши, я́ко вели́кий, преблаже́нне, проро́к;/ тем тя согла́сно ве́рою воспева́ем.
Наидо́ша ми ра́ны тя́жкия, и неду́зи ча́сто тружда́ют,/ тех мя измени́, о́тче, молю́ ти ся,/ я́ко от Бо́га прии́м, Ники́то,/ благода́ть исцеля́ти стра́сти и боле́зни облегча́ти.
Тро́ичен: Со все́ми Го́рними во́инствы Отца́ и Сы́на и Свята́го Ду́ха,/ Тро́ицу Неразде́льну, Несозда́нно Божество́, пееносло́вяще,/ Свят, Свят, Свят, возопие́м ра́достно,/ Еди́на Вла́сть, Нача́ло и Ца́рство.
Богоро́дичен: И́же все́ми непристу́пен Сый Зижди́тель Го́рними, Отрокови́це, чи́нми,/ всели́вся в ложесна́ Твоя́, неопа́льну соблюде́ Тя и по рождестве́ нетле́нну./ Ему́же ны́не при́сно пое́м:/ Го́спода воспева́йте дела́ и превозноси́те Его́ во вся ве́ки.
Ин
Ирмо́с: Покрыва́яй вода́ми превы́спренняя Своя́,/ полага́ли мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит пе́снь вся тва́рь,/ я́ко Соде́телю всех во ве́ки.
Неразу́мнии они́ уби́йцы жела́емаго зла́та не получи́ша,/ честны́я же вери́ги в реку́ Во́лгу вверго́ша;/ пресве́тлым луча́м над ни́ми в нощи́ я́вльшимся,/ я́ко и ве́сь град Яросла́вль осия́вшим.
Кресты́ три и вери́ги тя́жки,/ верху́ во́ды пла́вающии, обрето́шася,/ и сих боголюби́вии взе́мше, во град Яросла́вль внесо́ша,/ и мно́зи, разли́чными неду́ги одержи́мии,/ исцеле́ние от сих получи́ша.
Ты сам, преподо́бне, обре́тшему яви́вся,/ три кресты́, рекл еси́, и тя́жкая желе́за,/ по́честь трудо́в мои́х, ско́ро положе́ни да бу́дут на гро́бе мое́м./ Он же, стра́хом и ра́достию одержи́м быв,/ по словеси́ твоему́ та́ко сотвори́.
Богоро́дичен: Твоя́ ми́лости на мне удиви́вши, Чи́стая,/ уя́звенную ду́шу мою́ исцели́,/ и бу́дущаго муче́ния изба́ви,/ и Ца́рствия Сы́на Твоего́ сподо́би мя.
Пе́снь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Воздвиза́я ру́ки твоя́ к Бо́гу, моли́лся еси́,/ крепя ум твой удержа́ти от страсте́й,/ а́ки А́нгел, в телеси́, о́тче, ты был еси́./ Тем со А́нгелы всегда́ на Небесе́х живе́ши, сла́вному престо́лу предстоя́,/ Све́та невече́рняго исполня́емь.
Я́ко на Небеси́, в хлеви́не у́зце пожи́л еси́, преподо́бне:/ тем ти умири́шася ди́вии зве́рие,/ покори́вшему стра́сти теле́сныя и злостремле́ния, Ники́то преподо́бне./ Сего́ ра́ди ве́рою тя почита́ем.
Твоя́ честны́я и святы́я мо́щи, во гро́бе лежа́ще, погружа́ют неду́ги,/ и попаля́ют толпы́ де́монския всегда́,/ преподо́бне Ники́то, Боже́ственною благода́тию,/ и источа́ют всем исцеле́ния, ве́рно тя блажа́щим.
Уже́ к Бо́гу приближа́яся я́сне и чи́сте,/ помяни́ ве́рою тя, Ники́то, помина́ющих,/ грехо́в оставле́ние нам испроси́, и неду́гов всех избавле́ние,/ и Бо́жия Ца́рства селе́ние.
Богоро́дичен: Све́том мя озари́ Твои́м, Непоро́чная, ро́ждшая Свет непристу́пный,/ разжени́ о́блак страсте́й души́ моея́,/ и от тьмы́ изми́, молю́ Ти ся,/ и Боже́ственнаго спасе́ния сподо́би, Чи́стая, еди́на Присноде́ва.
Ин
Ирмо́с: Тя, Неискусобра́чную Ма́терь Бо́га Вы́шняго,/ Тя, па́че ума́ ро́ждшую сло́вом вои́стинну Бо́га,/ вы́шшую пречи́стых сил,/ немо́лчными славословле́нии велича́ем.
Моли́ за ны, о́тче преподо́бне, держа́вный вопия́ше,/ и испроси́ ми́ру мир, нам же здра́вие и на враги́ одоле́ние:/ тебе́ бо моли́твенника те́пла ко Влады́це предлага́ем.
Ра́ку твою́ лобыза́юще, лю́дие благочести́вии уми́льно глаго́лют:/ испроси́ у Христа́, преподо́бне,/ нам же и ча́дом на́шим здра́вие, и спасе́ние и ве́лию ми́лость.
Ку́пно за оте́чество, и святи́телей, и за вся правосла́вныя моли́ся, преподо́бне,/ да вси, па́мять твою́ све́тло пра́зднующе,/ в пе́снех Христа́ велича́ем.
Богоро́дичен: Льва́ рыка́ющаго на мя утиши́, Пречи́стая,/ мене́ же цельбы́ Боже́ственныя сподо́би,/ да узрю́ свет Богоразу́мия и ра́достно воспою́ Рождество́ Твое́, Богоро́дице.
Свети́лен:
Вся жития́ оста́вль, Христа́ приобре́л еси́,/ трудополо́жно пожи́в/ и сме́рть ну́ждную восприе́мь;/ тем па́мять твою́, Ники́то, почита́ем.
Сла́ва, и ны́не, Богоро́дичен:
Бо́га нам, Пречи́стая, родила́ еси́,/ и вси, прароди́тельныя кля́твы изба́вльшеся,/ воспева́ем Тя, Препе́тая.
На хвали́тех стихи́ры на 4, глас 8.
Подо́бен: О, пресла́внаго чудесе́:
О, пресла́внаго чудесе́!/ Ка́ко премени́ся ра́зум твой/ от суеты́ ми́ра на благоче́стие?/ Смире́н и целому́др показа́ся/ мона́хом наста́вник ко спасе́нию,/ по́стников похвала́,/ молча́льников удобре́ние./ Те́мже любо́вию па́мять твою́,/ Ники́то преподо́бне, ублажа́ем.
Моли́твенник к Бо́гу кре́пок был еси́,/ чистоты́ рачи́тель,/ целому́дрия о́браз,/ терпе́ния столп,/ а́нгельски на земли́ пожи́л еси́,/ и, я́ко звезда́ пресве́тлая, показа́лся еси́,/ и был еси́ мно́гим во́ждь ко спасе́нию./ Те́мже любе́зно/ па́мять твою́, Ники́то преподо́бне, восхваля́ем.
О́бразом ангелоле́пен показа́лся еси́,/ седи́на честна́, посто́м укра́шена,/ воздержа́нием сия́я, братолю́бием цветы́й,/ кро́ток взо́ром,/ и тих хожде́нием,/ и умиле́н виде́нием,/ и смире́н се́рдцем, высо́к доброде́тельным житие́м./ Те́мже любо́вию/ па́мять твою́, Ники́то преподо́бне, ублажа́ем.
Сла́ва, глас то́йже. Самогла́сен:
Преподо́бне о́тче Ники́то,/ в мона́шестве пожи́л еси́ непоро́чно/ и благоуго́дно Го́сподеви,/ и, ели́ко трудополо́жно нача́л еси́,/ изря́дно и чу́дно сконча́л еси́/ и всесоверше́нно во стра́се Бо́жий,/ и чуде́с дарова́ний сподо́бился еси́,/ е́же исцеля́ти неду́ги разли́чныя/ и прогоня́ти ду́хи лука́выя./ Тем па́мять твою́ почита́ем, досточу́дне.
И ны́не, Богоро́дичен.
Славосло́вие вели́кое, И отпу́ст.
Моли́тва
О всечестна́я главо́, преподо́бне о́тче преблаже́нне, Ники́то преподо́бному́чениче! Не забу́ди ни́щих твои́х до конца́, но помина́й нас всегда́ во святы́х свои́х и благоприя́тных моли́твах к Бо́гу и не забу́ди присеща́ти чад свои́х. Моли́ за ны, о́тче благи́й и избра́нниче Христо́в, я́ко име́яй дерзнове́ние к Небе́сному Царю́, и не премолчи́ за ны ко Го́споду, и не пре́зри нас, ве́рою и любо́вию чту́щих тя. Помина́й нас, недосто́йных, у Престо́ла Вседержи́телева и не преста́й моля́ся за нас ко Христу́ Бо́гу: тебе́ бо дана́ бы́сть благода́ть моли́тися за ны. Не мним бо тя ме́ртва су́ща, а́ще бо и те́лом преста́вился еси́ от нас, но и по сме́рти у́бо жив пребыва́еши. Не отступа́й от нас ду́хом, сохраня́я и соблюда́я нас от стрел вра́жиих и вся́кия пре́лести бесо́вския, засту́пниче и моли́твенниче наш до́брый. А́ще бо и моще́й твои́х ра́ка пред очи́ма на́шима ви́дима е́сть всегда́, но свята́я твоя́ душа́ со а́нгельскими вои́нствы, со Безпло́тными ли́ки, с Небе́сными си́лами у Престо́ла Вседержи́теля Бо́га досто́йно весели́тся. Ве́дуще у́бо тя вои́стинну и по сме́рти жи́ва су́ща, тебе́ припа́даем, и тебе́ мо́лимся, и ми́лися де́ем, е́же моли́тися о нас Всеси́льному Бо́гу о по́льзе душ на́ших, и испроси́ нам вре́мя на покая́ние и невозбра́нно прейти́ от земли́ на Не́бо и го́рьких мыта́рств, и возду́шных князе́й, и ве́чныя му́ки изба́вится нам, и Небе́сному Ца́рствию насле́дником бы́ти со все́ми пра́ведными, от ве́ка угоди́вшими Ему́, Го́споду на́шему Иису́су Христу́. Ему́же подоба́ет вся́кая сла́ва, че́сть и поклоне́ние со Безнача́льным Его́ Отце́м и Святы́м Ду́хом, ны́не, и при́сно, и во ве́ки веко́в. Ами́нь.
