Преподобному́ченика Мака́рия, архимандри́та Ка́невскаго, О́вручскаго
НА ВЕЛИ́ЦЕЙ ВЕЧЕ́РНИ
На Го́споди, воззва́х:стихи́ры глас 1.
Подо́бен: Небе́сных чино́в:
Воспои́м, лю́дие,/ честно́е житие́ отца́ на́шего Мака́рия,/ гра́да О́вруча свято́е прозябе́ние,/ благоче́стия рачи́теля,/ нече́стия же обузда́теля,/ и тому́ ны́не помо́лимся:/ Христа́ моли́, Христу́ помоли́ся, преподобному́чениче,/ дарова́ти Це́ркви единомы́слие,/ мир и ве́лию ми́лость.
Яви́лся еси́, о́тче наш Мака́рие,/ разсужде́ния пра́вило изря́днейшее,/ егда́, Мака́рию Вели́кому подо́бяся,/ вмени́л еси́ воздержа́ние в пи́щу сла́достную,/ нищету́ же, я́коже и той, в бога́тство вмени́в/ и во́льное уничиже́ние во благосла́вие,/ уго́ден Бо́гу был еси́./ Сего́ ра́ди вопие́м ти:/ Христа́ моли́, Христу́ помоли́ся, преподобному́чениче,/ дарова́ти Це́ркви единомы́слие,/ мир и ве́лию ми́лость.
Всю отложи́в на Небеса́ наде́жду,/ вся кра́сная ми́ра сего́ в уме́ты вмени́л еси́,/ Всевы́шняго же Бо́га Го́спода благоволе́ния ища́,/ святу́ю во́лю благогове́йно исполня́л еси́./ Сего́ ра́ди еди́н от ли́ка святы́х Бо́жиих яви́лся еси́./ Те́мже вопие́м ти:/ Христа́ моли́, Христу́ помоли́ся, преподобному́чениче,/ дарова́ти Це́ркви единомы́слие,/ мир и ве́лию ми́лость.
И́стинному благоче́стию обучи́тися жела́я,/ неоскверне́на себе́ от ми́ра грехо́внаго сохрани́ти тща́лся еси́,/ убо́гих же, вдов и сиро́т помо́щник и засту́пник бы́ти./ Сего́ ра́ди раб Бо́жий благи́й и ве́рный был еси́./ Те́мже вопие́м ти:/ Христа́ моли́, Христу́ помоли́ся, преподобному́чениче,/ дарова́ти Це́ркви единомы́слие,/ мир и ве́лию ми́лость.
И́ны стихи́ры, глас 2.
Подо́бен: Егда́ от Дре́ва:
Егда́ узре́л еси́, о́тче Мака́рие,/ в земли́ твое́й от униа́тов/ поврежда́ему святу́ю ве́ру Правосла́вную,/ противоста́л еси́ им/ и опло́т Правосла́вия яви́лся еси́./ Сего́ ра́ди изгна́ния мно́га от униа́тов претерпе́л еси́./ Те́мже тя почита́ем и ублажа́ем.
Егда́ ско́рби мно́ги от еретико́в прия́л еси́,/ тогда́ святы́х апо́стол глаго́лы послу́шая,/ я́ко Бо́гу па́че, не́же лю́дем,/ повинова́тися подоба́ет,/ непрекло́нно в послуша́нии Це́ркви пребы́л еси́/ и па́ству ты сему́ послуша́нию науча́л еси́./ Те́мже тя почита́ем и ублажа́ем.
Егда́ к неве́рным ага́ряном,/ уби́ти тя и́щущим,/ со кресто́м честны́м изше́д,/ небоя́зненно пред ни́ми стал еси́,/ тогда́, мече́м от них усече́н быв,/ тече́ние жи́зни твоея́ пра́ведно сконча́л еси́./ Те́мже тя почита́ем и ублажа́ем.
Сла́ва, глас и подо́бен то́йже:
Посто́м и послуша́нием,/ слеза́ми и моли́твою/ по́хоть пло́ти, по́хоть оче́с и го́рдость жите́йскую,/ о́тче Мака́рие, из ко́рене посека́вый,/ кончи́ною му́ченическою за Христа́/ по́двиги твоя́ запечатле́л еси́./ Те́мже и па́мять твою́ любо́вию почита́ем.
И ны́не, пра́здника.
Вход. Проки́мен дне. И чте́ния 3 преподо́бническая
На лити́и стихи́ра хра́ма и преподо́бнаго, глас 8:
Дом роди́телей со благодаре́нием оста́вивый,/ во оби́тель по́стническую гра́да О́вруча всели́лся еси́,/ проти́ву же ко́знем диа́вола подвиза́лся еси́/ и во́лю свою́ за враты́ сея́ оби́тели оста́вити себе́ понужда́л еси́,/ храни́тель же тве́рдый свята́го Правосла́вия быв,/ изгна́ния мно́гащи от еретико́в поне́сл еси́.
Блаже́нне Богому́дре Мака́рие,/ чи́стая твоя́ душа́/ правове́рным смы́слом сия́ющи,/ облиста́ доброде́телей све́тлостию,/ озаря́ет ве́рных исполне́ние,/ бесо́в тьму отгоня́ющи,/ те́мже, я́ко прича́стника благода́ти невече́рния,/ тя благоче́стно вси почита́ем, досточу́дне.
Кончи́ну же жития́ до́блественне от неве́рных ага́рян прие́м,/ пресла́внаго чудоде́йства от Бо́га сподо́бился еси́./ Но моли́ за ны, святу́ю па́мять твою́ соверша́ющия,/ мир нам, па́дшим, пода́ти,/ житие́ же на́ше испра́вите/ и черто́гов Небе́сных сподо́бити нас,/ по вели́цей ми́лости Еди́наго Человеколю́бца.
Име́я я́ко му́ченик непобеди́м/ ко Влады́це Христу́ дерзнове́ние благоприя́тно,/ я́ко зако́нен страда́лец благопода́тно слы́шание О́наго,/ мольба́ми не преста́й, досточу́дне,/ па́мять творя́ о ве́рно пою́щих тя,/ напа́стей сих изыма́я и обстоя́ния.
Ковче́г свяще́ния моще́й твои́х ра́ка яви́ся,/ цвет исцеле́ния испуща́ющи,/ и, я́ко река́, нело́жных дарова́ний испо́лнена,/ врачевство́ безме́здно,/ из нея́же почерпа́ем здра́вие присноживо́тно,/ приходя́щии ве́рно, му́чениче сла́вне,/ в тебе́ вои́стинну чу́днаго Бо́га сла́вяще.
Сла́ва, глас то́йже:
Прииди́те, свяще́нных собо́ри/ и правосла́вных исполне́ние,/ прииди́те, мона́хов совокупле́ние,/ и вни́дите, ра́дующеся, в це́рковь Бо́га на́шего,/ чудотво́рную ра́ку преподо́бнаго отца́ Мака́рия обы́мем ра́достно,/ я́ко чуде́с сокро́вище неотъе́млемо,/ и, честны́я его́ мо́щи любо́вию лобыза́юще,/ разли́чных неду́г свободи́мся/ и душа́м спасе́ние прие́млем, вопию́ще ему́:/ о всеблаже́нне о́тче Мака́рие,/ моли́ Преблага́го Бо́га на́шего/ дарова́ти стране́ на́шей на враги́ побе́ду/ и спасти́ ду́ши на́ша.
И ны́не, Богоро́дичен, глас то́йже:
На Него́же Херуви́мы зре́ти не мо́гут,/ Сего́ ма́терски на объя́тиих носи́ла еси́, Чи́стая;/ тем Тя, я́ко Херуви́м Сла́внейшую,/ во гла́сех пе́ний велича́ем/ и, припа́дающе, зове́м:/ моли́ Сы́на Твоего́ и Бо́га на́шего/ за непотре́бныя рабы́ Твоя́.
На стихо́вне стихи́ры, глас 5.
Подо́бен: Ра́дуйся:
Ра́дуйся, уго́дниче Христо́в Мака́рие,/ ум влады́ку на стра́сти па́губныя поста́вивый,/ во е́же плоть неудобопокори́вую ду́ху порабо́тити./ Тем и мы се́рдцем смире́нным,/ к тебе припа́дающе, проси́м/ ко одолева́нию страсте́й твоея́ по́мощи/ и в ско́рбех благоду́шия.
Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
Ра́дуйся, уго́дниче Христо́в Мака́рие,/ ду́шу бо твою́ от грехо́вныя непра́вды очи́стив,/ увеща́л еси́ лю́ди преоби́дети сла́дкая,/ в любви́ же нелицеме́рней с боя́щимися Бо́га жи́ти./ Сего́ ра́ди мно́гия от прегреше́ний отврати́в,/ к житию́ благоче́стному наста́вил еси́.
Стих: Насажде́ни в дому́ Госпо́днем,/ во дво́рех Бо́га на́шего процвету́т.
Ра́дуйся, уго́дниче Христо́в Мака́рие,/ о́браз пра́ведныя жи́зни в себе́ яви́вый,/ обхожде́ние бо а́нгельское и плач радостотво́рный,/ кро́тость боголюбе́зную,/ любо́вь же ми́лующую моли́твою стяжа́л еси́./ Тем к тебе́, я́ко ди́вному уго́днику Бо́жию, припа́дающе, про́сим:/ моли́ся Го́сподеви/ мир ми́ру дарова́ти/ и душа́м на́шим ве́лию ми́лость.
Сла́ва, глас 7:
Христа́ всели́в в ду́шу твою́, о́тче Мака́рие,/ Исто́чника жи́зни,/ нра́вы благи́ми процве́л еси́./ Тем моли́ Его́ благосты́ню/ ниспосла́ти нам по́мощь/ во е́же стра́сти мно́гия, от ю́ности нас борю́щия, одоле́ти/ и Го́сподеви рабо́тати.
И ны́не, Богоро́дичен, или́ пра́здника.
Тропа́рь, глас 4:
Христу́, нас ра́ди с Небе́с соше́дшему,/ после́довал еси́ в по́двизех твои́х,/ Мака́рие, о́тче наш./ Его́же моли́ о нас, ублажа́ющих тя,/ проще́ние прегреше́ний дарова́ти нам,/ любо́вию же и смире́нием сердца́ на́ша озари́ти/ и спасти́ ду́ши на́ша.
Ин тропа́рь, глас то́йже:
Боже́ственным жела́нием весь сам себе́ от ю́наго во́зраста Го́сподеви возложи́в,/ яви́лся еси́ свети́льник све́тлый гра́ду твоему́,/ поуча́я всех и́стинней ве́ре и житию́ богоуго́дному,/ священному́чениче Мака́рие, О́вручская похвало́./ Сего́ ра́ди, я́ко а́гнец непоро́чный, гони́мый от распрелюби́вых враго́в,/ возше́л еси́ во оби́тель Ка́невскую,/ иде́же, я́ко па́стырь до́брый, ду́шу твою́ положи́л еси́ за о́вцы твоя́./ И ны́не ко всечестне́й ра́це многоцеле́бных моще́й твои́х/ мы, гре́шнии, со умиле́нием притека́юще,/ дар исцеле́ния прие́млем, многострада́льне:/ ты бо при́сно источа́еши боля́щим здра́вие, печа́льным утеше́ние/ и всем, чту́щим тя, вся́кое исполня́еши тре́бование,/ моля́ся Христу́ Бо́гу спасти́ся душа́м на́шим.
Ин тропа́рь, глас 8:
Ко всечестне́й ра́це многоцеле́бных моще́й твои́х,/ преподобному́чениче Мака́рие,/ мы, гре́шнии, притека́юще, дар исцеле́ния прие́млем:/ ты бо при́сно источа́еши боля́щим здра́вие, печа́льным утеше́ние/ и всех, чту́щих тя, вся́кое исполня́еши тре́бование,/ моля́щеся Христу́ Бо́гу спасти́ся душа́м на́шим.
НА У́ТРЕНИ
На Бог Госпо́дь:тропа́рь пра́здника, дважды. Сла́ва,свята́го. И ны́не,пра́здника.
На 1-м стихосло́вии седа́лен, глас 7:
Па́стырскому худо́жеству незло́бием обучи́вся,/ оте́чески па́ству твою́ науча́л еси́ стра́ху Бо́жию и е́же позна́ти рече́нное:/ да не хва́лится прему́дрый прему́дростию свое́ю,/ и да не хва́лится си́льный си́лою свое́ю,/ и да не хва́лится бога́тый бога́тством свои́м,/ но о сем да хва́лится хваля́йся,/ е́же разуме́ти и зна́ти Го́спода/ и твори́ти суд и пра́вду посреде́ земли́.
Сла́ва, и ны́не, Богоро́дичен:
Но́сиши вся Нося́щего и дои́ши всем пи́щу Даю́щего:/ ве́лие и стра́шное, е́же па́че ума́, Твое́ та́инство,/ ковче́же честны́я святы́ни, Де́во Богоро́дице,/ тем Тя ве́рно ублажа́ем.
По 2-м стихосло́вии седа́лен, глас 4:
Сокро́вища ве́ка сего́ со тща́нием оста́вил еси́,/ Небе́сная сла́достныя све́тлости ища́, о́тче Мака́рие,/ те́мже и слы́шиши от Го́спода:/ о ма́ле был еси́ ве́рен и над мно́гими тя поста́влю,/ вни́ди в ра́дость Го́спода твоего́.
Сла́ва, и ны́не, Богоро́дичен:
Чи́ни а́нгельстии, Пречи́стая, ны́не немо́лчно Твое́ Рождество́ почита́ют,/ в чину́ бо стоя́т, взира́юще,/ весе́лия Его́ насыща́ющеся, и Тя, Богоро́дицу, непреста́нно велича́ют.
По полиеле́и седа́лен, глас 6:
Ско́рби, изгна́ния и напа́сти терпели́вно поне́сл еси́, о́тче наш Мака́рие,/ крестоноше́ния за́поведь соблюда́я;/ и ны́не со Безпло́тными в весе́лии сра́дуяся,/ моли́ся о нас, честну́ю и свяще́нную па́мять твою́ соверша́ющих.
Сла́ва, и ны́не, пра́здника
По 50-м псалме́ стихи́ра, глас 6:
Просия́ днесь па́мять твоя́, Мака́рие многострада́льнее созыва́ющи нас, празднолю́бцев,/ ко благохвале́нию и сла́ве Христа́ Бо́га на́шего,/ те́мже и притека́юще к ра́це моще́й твои́х,/ исцеле́ний дарова́ния прие́млем/ и венча́вша тя Спа́са Христа́/ воспева́ем во ве́ки, непреста́нно сла́вяще.
Кано́н пра́здника и преподобному́ченика Мака́рия, глас 5, его́же краегране́сие: Мака́рия уго́дника па́мять честну́ю пою́.
Песнь 1
Ирмо́с: Спаси́телю Бо́гу,/ в мо́ри лю́ди немо́крыми нога́ми наста́вльшему/ и фарао́на со всевоинством потопльшему,/ Тому Единому пои́м, я́ко просла́вися.
Мака́рия честну́ю па́мять ка́ко воспою́, гре́шен сый и устне́ нечи́стыя имы́й?/ Но помози́ ми сие́ соверши́ти, Христе́,/ прези́рая моя́ прегреше́ния и подава́я сло́во усто́м мои́м.
Ада́мова зла́го нра́ва,/ непослуша́нием кля́тву ми́рови наве́дшаго, бе́гая, Мака́рие о́тче святы́й,/ от мла́да во́зраста послуша́нию обучи́тися тща́лся еси́.
Ко хра́му Бо́жию, о́трок сый, приходя́,/ моли́твою же и благода́тию церко́вною освяща́яся,/ в жили́ще Го́споду себе́ очища́л еси́.
Богоро́дичен: Се вре́мя наста́ моего́ уны́ния,/ воста́ни, Пречи́стая Влады́чице, и пода́ждь ми ру́ку,/ Ты бо мир Боже́ственнаго весе́лия испо́лнила еси́.
Ин кано́н свята́го, глас 4.
Песнь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль/ крестообра́зныма Моисе́овыма рука́ма/ Амали́кову си́лу в пусты́ни победи́л есть.
Свет от Све́та, Христе́ Бо́же,/ от Отца́ пре́жде век рожде́йся/ и искони́ Сый со Отце́м и Ду́хом,/ мрак души́ моея́ отгна́в, озари́ ум мой, молю́ся,/ я́ко да возмогу́ пе́ти Твоего́ уго́дника, Мака́рия свяще́ннаго.
Бога́тыми сия́нии Ду́ха облия́й/ светоно́сный сей и честны́й пра́здник твой чту́щия,/ страсте́й мглы изба́ви и напа́стей,/ преподобному́чениче Мака́рие.
Му́чеников све́тло обогати́л еси́ благосла́вие Боже́ственное,/ па́стырскими укра́шся добро́тами/ и обагри́в кро́вию свяще́ннаго страда́ния твоего́ одея́ние, Богоблаже́нне.
Разори́в вра́жия многоплете́нныя ко́зни у́зами страда́ний твои́х,/ неде́йственна сего́ пове́ргл еси́ на зе́млю, Мака́рие,/ и нога́ми твои́ми попра́л еси́.
Испо́лнен сый благода́ти, испо́лнен и ра́зума Бо́жия,/ име́л еси́ в тебе́ живу́щую Ду́ха Боже́ственную си́лу, Богому́дре/ ея́же ра́ди, я́ко со́лнце, просия́л еси́, просвеща́я ве́рныя.
Богоро́дичен: Естество́м Соде́теля родила́ еси́,/ нас обожи́вшаго па́че ума́ соедине́нием и́стинным, Богоро́дице Пресвята́я,/ Его́же приле́жно моли́ просвети́ти пою́щия Тя.
Песнь 3
Ирмо́с: Си́лою Креста́ Твоего́, Христе́,/ утверди́ мое́ помышле́ние,/ во е́же пе́ти и сла́вити/ спаси́тельное Твое́ Вознесе́ние.
Аще не Госпо́дь сози́ждет дом, всу́е труди́шася зи́ждущии./ Сим глаго́лом псалмопе́вца после́дуя, о́тче Мака́рие,/ ю́ностное самонаде́яние отлага́я,/ помо́щи Бо́жия в де́лех и по́двизех взыска́л еси́.
Ре́вность духо́вную от ю́ности показу́я,/ еди́ну от пе́рвейших доброде́телей исправля́ти понужда́л еси́ себе́,/ е́же язы́ка обузда́нием осужде́ния и праздносло́вия уклони́тися.
Иису́са, Бо́га, во пло́ти я́вльшагося/ и в до́ме Ио́сифа древоде́ла тружда́вшагося, воспомина́я,/ и сам, о́тче Мака́рие, те́ло твое́ труды́ утомля́л еси́.
Я́ко ю́ностных по́хотей победи́тель бы́ти жела́я,/ собла́знов ми́ра прелюбоде́йнаго приле́жно уклоня́лся еси́, о́тче Мака́рие.
Богоро́дичен: От вся́каго искуше́ния соблюди́ к Тебе́ прибега́ющих, Богоро́дице,/ упова́ние на́ше.
Ин
Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Иноста́сною Му́дростию, Христе́,/ несть бо свят, па́че Тебе́, Человеколю́бче.
Кре́пость ти дае́т Христо́с – Вели́кий Страстополо́жник,/ погуби́ти пре́лесть и посрами́ти врага́,/ хва́лящася безсту́дно и су́етно свире́пеющаго.
Просвеще́н измла́да ра́зум име́л еси́/ и да́же до ста́рости и престаре́ния, Богоно́се, Бо́гу угожда́я,/ отту́ду сла́ву получи́л еси́.
Посе́кл еси́ пре́лести те́рние мече́м духо́вным,/ Христо́вы ве́ры плод неле́стно прине́сл еси́, всеблаже́нне, стори́чный –/ боле́зни твоя́ Влады́це твоему́.
Твоя́ кра́сныя я́вственно, преподо́бне, име́л еси́ но́ги,/ муче́ния к стезя́м ступа́ющия све́тло/ и главы́ вра́жия сокруша́ющия, Мака́рие многострада́льне.
Богоро́дичен: Изба́ви мя от вся́каго прило́га сопроти́внаго, Ма́ти Де́во Всечи́стая,/ и се́рдце мое́ просвети́, ве́рою Тя сла́вящаго, Всенепоро́чная.
Ин конда́к, глас 2:
По́стническое и равноа́нгельное житие́ твое́/ страда́льческими уясни́л еси́ по́двиги/ и А́нгелом совсе́льник, Богоблаже́нне, яви́лся еси́, Мака́рие,/ с ни́миже Христу́ Бо́гу моля́ся не преста́й/ о всех нас.
Ин и́кос:
По́стников све́тлую добро́ту, Це́ркве Христо́вы утвержде́ние,/ ны́не Мака́рия восхва́лим:/ но́вый бо столп о́гнен яви́ся,/ попаля́я гла́вы ерети́чествующих, ве́рных же просвеща́я ду́ши,/ в ве́ре пра́вей в Боже́ственный град Вы́шний Иерусали́м,/ я́коже друга́го Изра́иля, вводя́,/ к нему́же согла́сно вопие́м:/ всеблаже́нне о́тче,/ не забу́ди Христу́ моля́ся непреста́нно о всех нас.
Седа́лен, глас 4:
Мужа́тися и потерпе́ти Го́спода, я́коже учи́т псало́мник, подвиза́яся,/ терпе́нием и ве́рою ко́зни бесо́вския побежда́л еси́, о́тче Мака́рие,/ тем и благода́ть от Христа́ прие́м, чуде́с дея́ния явля́еши пресла́вно./ Сего́ ра́ди вопие́м ти:/ моли́ Христа́ Бо́га прегреше́ний оставле́ние дарова́ти/ пою́щим свяще́нную па́мять твою́.
Сла́ва Отцу́, и Сы́ну, и Свято́му Ду́ху:
По́стнически лука́ваго попра́в, страда́льчески, му́чениче Христо́в, просла́вился еси́,/ претерпе́в му́жески соверше́нным умо́м,/ те́мже причта́лся еси́ лико́м му́ченическим/ и ве́чнующее ца́рство стяжа́л еси́,/ помяни́ нас, соверша́ющих ве́рою па́мять твою́.
И ны́не, Богоро́дичен:
Попече́ньми жите́йскими и молво́ю многомяте́жною побежда́еми и грехми́ отягча́еми,/ к Тебе́, Блага́я Влады́чице, прибега́ем, моля́щеся:/ страсте́й на́ших грехо́вных умири́ смуще́ние/ и Вы́шняго прича́стия сподо́би нас,/ благоче́стно покланя́ющихся всесвято́му рождеству́ Твоему́.
Песнь 4
Ирмо́с: Услы́шах слух си́лы Креста́,/ я́ко рай отве́рзеся им,/ и возопи́х:/ сла́ва си́ле Твое́й, Го́споди.
Умноже́ние печа́лей и молвы́ жите́йския,/ с жи́знию бра́чною соедине́нныя, зря, о́тче Мака́рие,/ житие́ мона́шеское избра́л еси́.
Го́спода Еди́наго зна́ти/ и па́че Его́ ни ко еди́ному от челове́к любо́вию прилепля́тися,/ живо́т же свой в Бо́зе от люде́й сокры́ти иска́л еси́, о́тче,/ мона́шества и́го восприе́мый.
Отца́ Небе́снаго умоля́я о е́же насу́щных потре́бное дарова́ти тебе́,/ о земне́м бога́тстве и стяжа́нии, о́тче, небре́гл еси́.
Доброде́тельми де́вственныя чистоты́,/ поста́ же и бде́ния по́двиги теле́сныя испра́вил еси́, о́тче.
Богоро́дичен: От востаю́щих на мя напа́стей го́рько,/ спаси́ мя, Ма́ти Го́спода моего́ Пренепоро́чная.
Ин
Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Превознесе́ннаго держа́вою нече́стия го́рдаго мучи́теля/ ко Влады́це Боже́ственными воззре́нии разрази́л еси́, взыва́я:/ сла́ва си́ле Твое́й, Го́споди.
Страда́лец зако́нен, боле́зньми по благоче́стии обложи́вся,/ яви́лся еси́, пребога́те,/ мучи́телей суровства́ не ужаса́яся.
Ше́ствия твоя́, Ду́хом Боже́ственным иду́ща, запя́ша ше́ствия лука́ваго/ и путь прав мно́гим яви́шася.
Тве́рдым умо́м беззако́ннующему сопроти́влься,/ муче́ния вене́ц прия́л еси́,/ му́жески пострада́в, свяще́нне.
Богоро́дичен: Отягче́на сном уны́ния,/ к покая́ния у́тру мя Твое́ю неусы́пною моли́твою, Влады́чице, воздви́гни,/ моля́ Сы́на Твоего́,/ и спаси́ мя, Еди́на Спа́са ро́ждшая.
Песнь 5
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве бо Тебе́, ино́го не зна́ем.
Ничто́же от жития́ потре́бных веще́й иска́ти тща́лся еси́,/ но сия́ моли́твою со благодаре́нием от Бо́га испроша́ти навыка́л еси́,/ всем живо́т, и дыха́ние, и вся подаю́щего.
И бли́жних, научи́ти их моли́тве, проси́вших тя,/ сию́ иеполня́ти разсуди́тельно наставля́л еси́,/ в се́рдцы свое́м моли́тве Госпо́дней – О́тче наш – поуча́шеся.
Ко Го́споду, по псало́мнику, ру́це простира́л еси́,/ испове́даяся Ему́ о пра́ведных суде́х Его́.
А́ще в согреше́ние не́кое впа́сти тебе́ ви́дел еси́,/ покая́ние сла́дкое показу́я,/ не́мощь и вину́ твою́ Го́спода отпусти́ти тебе́ серде́чно умоля́л еси́.
Богоро́дичен: Иму́ще Тя сте́ну необори́му,/ искуше́ний же и печа́лей избавля́емся, Пречи́стая.
Ин
Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ О́теческия сла́вы Сия́ние Божества́,/ от но́щи у́тренююще,/ воспева́ем Тя, Человеколю́бче.
Му́ченическими венча́ по́честьми по́стническия твоя́ труды́ и́стинно, преподо́бне Мака́рие,/ Подвигополо́жник Еди́н Бог наш,/ на уби́йцы укрепи́вый тя.
Нога́ твоя́ ста проро́чески, му́чениче, на правоте́,/ непреста́чнным мудрова́нием подпина́ющи многоко́зненнаго,/ стезя́ми муче́ния удобря́емая.
Струя́ми страда́льческими крове́й твои́х/ потопи́л еси́ мо́ре безбо́жия,/ ре́ки же исцеле́ния, Мака́рие, источи́л еси́.
Преподо́бен в преподо́бных показа́лся еси́, сла́вне,/ и, в му́ченицех све́тло чу́дно пострада́в,/ бори́теля победи́л еси́, Мака́рие чу́дне.
Богоро́дичен: Заче́нши, родила́ еси́ Бо́га Емману́ила на обновле́ние челове́ком,/ Пресвята́я Чи́стая, плоть бы́вша,/ Его́же моли́ при́сно спасти́ ду́ши на́ша.
Песнь 6
Ирмо́с: Обы́де мя бе́здна,/ гроб мне кит бысть,/ аз же возопи́х к Тебе́, Человеколю́бцу,/ и спасе́ мя десни́ца Твоя́, Го́споди.
Па́стырскаго служе́ния дар от Ду́ха Свята́го прие́м,/ трудолю́бно возде́лывал еси́ моли́твою о па́стве твое́й/ и поуче́нии оте́ческими.
Апо́столу Па́влу подража́л еси́,/ па́ству твою́ покая́нию и ве́ре в Го́спода Иису́са/ науча́л еси́, о́тче Мака́рие.
Мы́сльми прельсти́тельными лука́ваго врага́ обольсти́ти пасо́мых твои́х и́щущаго,/ сего́ умышле́ния зло́бныя им раскрыва́л еси́.
Я́ко Па́вел апо́стол, не себе́ пропове́дал еси́,/ но Христа́ Иису́са Го́спода,/ себе́ же раба́ па́ствы твоея́ помышля́л еси́ Иису́са ра́ди.
Богоро́дичен: И́же нра́вом прельще́н есмь,/ без отве́та сый, Богоро́дице зову́:/ вся́ческих мя изба́ви зол.
Ин
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
Источа́я твой медото́чный язы́к уче́ния медото́чная,/ го́рести безбо́жия вои́стинну изба́ви/ благопоко́рно тебе́ притека́ющия, му́чениче Мака́рие.
Пото́цы крове́й твои́х, му́чениче,/ му́тных беззако́ния пото́ков и рек безбо́жия ле́стныя и лука́выя изсуши́ша струи́,/ исцеле́ний же ве́рных неизчерпа́емая пучи́на яви́шася.
Вы́шший страсте́й и мук быв,/ пло́ти отсече́ния претерпе́л еси́, сла́вне,/ Христа́ бо Помо́щника и Соде́теля име́л еси́ Споспе́шника.
Све́том благода́ти озаря́емь, страстоте́рпче прему́дре,/ невозвра́тно ше́ствовал еси́ путе́м, вводя́щим к Вы́шнему Иерусали́му,/ Святы́й бо Дух наста́ви тя,/ обита́яй в се́рдце твое́м, Мака́рие.
Богоро́дичен: Свята́го святы́х неизрече́нно родила́ еси́, Пресвята́я Де́во,/ ве́рныя при́сно освяща́ющаго/ и му́ченическия ли́ки со А́нгелы совокупи́вшаго.
Конда́к, глас 4:
Нетле́нною красото́ю смире́ннаго жития́ твоего́/ Бо́га на земли́ просла́вил еси́/ и Боже́ственныя ве́ры чистоту́/ сохраня́ти лю́ди научи́л еси́,/ страда́льческими же по́двиги кончи́ну прие́м,/ от Бо́га просла́влен яви́лся еси́,/ преподобному́чениче Мака́рие, о́тче наш.
И́кос:
Сокрове́нную в Бо́зе чистоту́ жития́ твоего́ ка́ко пове́дати мо́щно есть,/ но на моли́твы пра́ведника, я́же суть моли́твы твоя́, наде́ющеся,/ те́ми ве́лию ми́лость от Го́спода низпосла́ти нам про́сим,/ преподобному́чениче Мака́рие, о́тче наш.
Песнь 7
Ирмо́с: В пещи́ о́гненней/ песносло́вцы спасы́й о́троки,/ благослове́н Бог/ оте́ц на́ших.
Терпе́нием и пожда́нием лю́ди удиви́л еси́/ и бесо́вския злохи́трости потреби́л еси́, благода́тию Бо́жиею.
Ча́шу жития́ Твоего́, Го́споди, пи́ти подвиза́вшагося,/ Мака́рия преподобному́ченика нетле́нием и чудесы́ просла́вил еси́.
Ева́нгельски блаже́нства наслажда́ешися, благоче́стно, Мака́рие, пожи́в/ и напа́сти и изгна́ния от еретико́в поне́сл еси́.
Богоро́дичен: Без ума́ себе́ вся́ческими поработи́вша паде́ньми, Богоро́дице, вопию́:/ мольба́ми Твои́ми пода́ждь ми свобо́ду, Всепе́тая.
Ин
Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
С Вы́шними ликостоя́нии, я́ко му́ченик, ра́дуяся, лику́еши, блаже́нне,/ на Небесе́х и воспева́еши, веселя́ся:/ благослове́н еси́ в хра́ме сла́вы Твоея́, Го́споди.
Преукра́шен Боже́ственною сла́вою и благода́тию, му́чениче страстоте́рпче,/ сия́еши светови́дно и просвеща́еши зову́щия:/ благослове́н еси́ в хра́ме сла́вы Твоея́, Го́споди.
Па́че естества́ просвеще́нием, Мака́рие, ум просвети́в твой,/ бу́дущих, блаже́нне, зна́нием обогати́лся еси́, Влады́це зовы́й:/ благослове́н еси́, Бо́же оте́ц на́ших.
Благода́ть свы́ше исцеле́ния прие́м,/ неду́ги отъе́млеши, му́чениче,/ и лука́выя отгоня́еши ду́хи, вопия́:/ благослове́н еси́, Бо́же оте́ц на́ших.
Богоро́дичен: От Де́вы Нетле́нныя па́че естества́ рожда́ется Сло́во,/ И́же сло́вом вся содева́яй, безслове́сия хотя́ изба́вити во́льное славосло́вящия Того́ сни́тие.
Песнь 8
Ирмо́с: Из Отца́ пре́жде век рожде́ннаго Сы́на и Бо́га/ и в после́дняя ле́та воплоще́ннаго от Де́вы Ма́тере,/ свяще́нницы, по́йте,/ лю́дие, превозноси́те во вся ве́ки.
Стра́сти Христо́вы, о́тче Мака́рие, воспомина́я,/ страда́льческими по́двиги по́стническое житие́ твое́ уясни́л еси́.
Теле́сныя му́ки от неве́рных ага́рян прия́ти угото́вавыйся,/ со кресто́м Боже́ственным к ним изше́л еси́.
Ничто́же предпочита́ти па́че любве́ Христо́вы ева́нгельски научи́вся/ и жизнь свою́ за Христа́ положи́л еси́.
Ум твой Небе́снаго блаже́нства наде́ждою озари́в/ и благода́тию в по́двизе утверди́вся,/ муче́ния путь сконча́л еси́.
Богоро́дичен: Я́ко ро́ждшая Творца́ и Царя́ вся́ческих,/ Богоро́дице Всенепоро́чная, Чи́стая,/ Ты мя изба́ви вся́каго скве́рнаго согреше́ния.
Ин
Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.
Омрачи́л еси́ все вра́жие неи́стовство, сла́вне,/ и боре́ния, неотъе́млемою си́лою Христа́ облече́н,/ и, победоно́сец быв, му́чениче Мака́рие, вопия́л еси́:/ благослови́те, вся дела́ Госпо́дня, Го́спода.
Чуде́с твои́х мно́жество па́че ума́ дарова́ния, я́же тебе́ подаде́ Христо́с,/ всем показу́ет сла́ву и благода́ть исцеле́ния,/ я́же па́че сло́ва я́ве твою́ благода́ть пропове́дует нам, вопию́щим:/ благослови́те, вся дела́ Госпо́дня, Го́спода.
Неми́лостивно твою́ главу́ враг сокруши́,/ но Бог тя во высоча́йших венце́м венча́ победи́тельным, вене́чниче многострада́льне,/ сла́во му́чеников и всех преподо́бных.
Ра́дуйся, страда́льцев и́стине;/ ра́дуйся, удобре́ние ве́ры и украше́ние;/ ра́дуйся, пресве́тлый му́чеников светоно́сче,/ и́же лесть разори́вый страда́нием твои́м/ и свет просия́вый ми́рови, Мака́рие преподо́бне и прему́дре.
Богоро́дичен: Се вси ро́ди, Отрокови́це, я́коже прорекла́ еси́, Тя ублажа́ют, Бо́га Блаже́ннаго ро́ждшую,/ блаже́нныя содева́ющего, и́же повеле́нием Его́ после́дующия ве́рою и вопию́щия:/ благослови́те, вся дела́ Госпо́дня, Го́спода.
Песнь 9
Ирмо́с: Тя, па́че ума́ и словесе́ Ма́терь Бо́жию,/ в ле́то Безле́тнаго/ неизрече́нно ро́ждшую,/ ве́рнии, единому́дренно велича́ем.
Юдо́ль земну́ю проше́д,/ Небе́снаго блаже́нства, о́тче, дости́гл еси́.
Пе́ние по́двиг твои́х от нас, недосто́йных, приими́, Мака́рие,/ и грехо́вныя нищеты́ на́шея не возгнуша́йся.
О, ка́ко грехи́ мно́гими тя́жце обремени́хомся,/ о, ка́ко тала́нты, от Бо́га прия́тыя, окая́нне расточи́хом!/ Но не лиши́ и нас, гре́шных, твоего́ заступле́ния, Мака́рие, о́тче наш.
Ю́жский преде́л страны́ Ру́сския, тебе́ при́сный, о́тче Мака́рие,/ от искуше́ний и бед сохрани́.
Богоро́дичен: Я́ко Ма́ти Бо́жия, моли́ из Тебе́ ро́ждшагося Го́спода Бо́га и Царя́,/ е́же изба́вится вся́каго преще́ния/ и лука́ваго обы́чая Твоему́ рабу́, Чи́стая,/ на Тя наде́ющемуся из чре́ва моея́ ма́тери, Влады́чице.
Ин
Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.
Предстоя́ у Престо́ла всех Влады́ки, Богови́дче Мака́рие,/ творя́щим честно́е твое́ пра́зднество здра́вие да́руй/ и гра́ду на́шему изба́вится от напа́стей и бед,/ побе́ду стране́ на́шей на проти́вныя враги́ испроси́ моли́твами твои́ми.
Моле́ний и пе́ний гла́сы услы́ши, Богоно́се о́тче Мака́рие,/ в ве́ре же и любви́ лю́ди утверди́/ и оте́чества побори́ враги́, о́тче, вою́ющия на ны,/ свы́ше благода́тию покрыва́я хва́лящия тя.
Пою́ще, моли́м тя приле́жно:/ о Це́ркви помоли́ся, Кресто́м побе́ды дарова́ти,/ правосла́вной ве́ре кре́пость на е́реси враго́в да́руй моли́твами твои́ми,/ нам же спасе́ние и мир ми́ру в твое́й па́мяти, Мака́рие.
Страну́ на́шу от вся́ких бед защити́,/ богозда́нный Правосла́вия щи́те, преподобному́чениче Мака́рие,/ во благоче́стии церкве́й Бо́жиих благострое́ние даждь/ и свы́ше Небе́сную по́мощь.
Богоро́дичен: О Пресвята́я Влады́чице Богоро́дице,/ не и́мамы ины́я по́мощи, ра́зве Тебе́,/ моли́ся Сы́ну Твоему́ и Бо́гу на́шему с преподо́бным Мака́рием,/ да соблюде́т и сохрани́т страну́ на́шу неруши́му/ и да спасе́т ны, Тя велича́ющия.
Светилен:
О́вруча благо́е воспита́ние, Мака́рия свята́го восхва́лим вси,/ я́ко ве́ры непоро́чныя испове́дника,/ я́ко благоче́стия столпа́/ и я́ко моли́твенника те́плаго о душа́х на́ших.
Сла́ва Отцу́, и Сы́ну, и Свято́му Ду́ху:
Све́тило, нам просия́вшее в после́днее вре́мя,/ просвети́ ны, твоя́ певцы́, святы́й преподо́бне Мака́рие,/ и моли́ Го́спода за ны, чту́щия па́мять твою́.
И ны́не, пра́здника.
На хвали́тех стихи́ры глас 8:
О, пресла́внаго слы́шания!/ Госпо́дь всех и Ца́рь ми́ра,/ Ему́же со стра́хом слу́жат а́нгельская во́инства,/ ли́ца своя́ закрыва́юща,/ на ве́чери ученико́в Свои́х но́зе умыва́ше./ Его́же уничиже́ния о́бразу после́дуя, Мака́рие святы́й,/ нача́льства духо́внаго са́ном облече́н,/ я́ко после́днейша и ме́ньша себе́ име́ти подвиза́яся,/ ева́нгельски па́стве свое́й служа́ше.
О, бла́гости Бо́га на́шего!/ Ко бли́жним состра́стие,/ а́ще и ма́ло быва́ет,/ а́ще и в ча́ши студе́ныя воды́ подая́ние показу́ется,/ награ́ды своея́ у Го́спода не погубля́ет./ Е́же воспомина́я, Мака́рий святы́й/ нищелю́бие стяжа́ти/ и в печа́лех и напа́стех су́щия утеша́ти подвиза́шеся.
О, ти́хости безстра́стныя!/ Ско́рби и напа́сти от еретико́в подъе́мля,/ Мака́рий святы́й незло́бие и братолю́бие сохраня́ше,/ ко враго́м доброжела́телен быва́я.
О, чуде́с мно́гих!/ Послуша́ние и смире́ние свята́го Мака́рия,/ Пра́ведный Судия́ на земли́ превозно́сит,/ нетле́нием и чудесы́ разли́чными/ уго́дность пред Ним моли́тв его́ показу́я.
Сла́ва, глас то́йже:
Не возмо́гут словеса́ на́ша/ твои́х доброде́телей воспе́ти, Мака́рие,/ но сокруше́нным се́рдцем к тебе́ припа́дающе, про́сим,/ е́же моли́тися Го́сподеви/ умири́ти мир и спасти́ ду́ши на́ша.
И ны́не, Богоро́дичен или пра́здника.
Славосло́вие вели́кое, ектении́ и отпу́ст.
На Литурги́и слу́жба преподо́бническая.
Моли́тва
О пресла́вный преподобному́чениче Мака́рие, ско́рый помо́щниче и те́плый засту́пниче всех, притека́ющих к тебе́, предста́тельством свои́м пред Го́сподом умоли́ Спа́са на́шего, да обрати́т ду́ши на́ша к покая́нию и исправле́нию, да да́рует мир оте́честву на́шему и всей земли́ и да помо́жет всем нам тве́рдыми бы́ти в ве́ре Правосла́вней и де́лех благи́х, да отжене́т от нас дух зло́бы и лука́вства и братолю́бие всели́т в нас, и да прино́сим во всем житии́ на́шем плоды́ духо́вныя: любо́вь, бла́гость, милосе́рдие, ве́ру нелицеме́рную, кро́тость и воздержа́ние, и да, распя́вше на земли́ плоть на́шу со страстьми́ и похотьми́ и ду́хом живу́ще и ходя́ще, сподо́бимся жи́зни ве́чныя в ве́це гряду́щем, и, ра́йския сла́дости при́сно наслажда́ющеся с тобо́ю и со все́ми святы́ми, просла́вим Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.
