Стихи́ры святы́я, глас 8.

Подо́бен: О, пресла́внаго чудесе́:

Заре́ю де́вства сия́ющи,/ Феодо́сие честна́я,/ и порфи́рою кров́е/ муче́ния, всему́драя, обагре́ною,/ све́тло оде́яна,/ и в преми́рный Христо́в черто́г все́льшися,/ отрокови́це веенепоро́чная,/ лику́еши с чи́нми а́нгельскими,/ вои́стинну неразори́мое ликова́ние, сла́вная.

Му́ченице де́во,/ всехва́льная Феодо́сие,/ Христа́ вседу́шно возжела́вши,/ муче́ния претерпе́ла еси́ ра́ны,/ до́блественне ураня́ема за твоего́ Рачи́теля/ и стру́жема ногты́ по ре́бром./ О, по́двигов твои́х тве́рдаго противле́ния,/ и́миже на зе́млю вои́стинну/ низве́ргла еси́ го́рдаго.

Добро́тою души́ же и телесе́/ укра́шена све́тло,/ Христу́ пренесла́ся еси́,/ сла́вы венце́м жела́ющи от Него́ увязти́ся,/ Феодо́сие, му́ченице всесла́вная,/ и Ца́рствия я́ве диади́му, вои́стинну многоце́нну,/ досто́йно прия́ти твоему́ верху́,/ неве́ста нетле́нная я́вльшися, всему́драя.

Стихи́ры Богоро́дицы, глас и подо́бен то́йже:

Ра́дуйся, душ просвеще́ние,/ согреша́ющих проще́ние, неради́вых исправле́ние./ Ра́дуйся, утеше́ние и ра́дость, скорбя́щих Помо́щнице./ Ра́дуйся, Блага́я, немощны́х душ исцеле́ние./ Ра́дуйся, примире́ние к Бо́гу и Хода́таице,/ Серафи́м всех я́ко су́щи святе́йши, Чи́стая.

Плоть от крове́й Твои́х прие́м, Преве́чный Бог/ Тя Предста́тельницу показа́ челове́ком, Чи́стая./ Те́мже изба́ви рабы́ Твоя́ от вся́кия беды́ и обстоя́ния/ и се́тей лука́ваго врага́/ и сия́ния причасти́тися сподо́би избра́нных,/ вся сла́вящия и покланя́ющияся Тебе́.

Спаси́ мя, Влады́чице Пречи́стая,/ Я́же Спа́са Христа́ неизрече́нно ро́ждшая:/ Тя бо еди́ну стяжа́х Предста́тельницу,/ и необори́мую сте́ну, и покро́в, и ра́дование,/ и души́ моея́ Боже́ственное утеше́ние./ Ты у́бо мя изба́ви неусыпа́ющаго че́рвия/ и огня́ ве́чнующаго, Ма́ти Христа́ Бо́га.

Сла́ва, и ны́не:

Да гла́сы велича́ю Тя/ ра́достными, Чи́стая,/ и сла́влю пучи́ну человеколю́бия Твоего́,/ от бед спаси́/ и изми́ мя душетле́нных стрел/ неви́димаго и вселука́ваго врага́:/ Тя бо предлага́ю на него́, Богоневе́сто,/ ору́жие тве́рдо и непобеди́мо,/ Ма́ти Христа́ Бо́га.

Крестобогоро́дичен:

Что́ зри́мое виде́ние,/ е́же Мои́ма очи́ма ви́дится, о Влады́ко!/ Содержа́й всю тварь, на Дре́во воздви́жен быв,/ и умира́еши, всем дая́й жизнь, –/ Богоро́дица, пла́чущися, глаго́лаше,/ егда́ узре́ на Кресте́ возноси́ма/ из Нея́ неизрече́нно возсия́вшаго Бо́га и Челове́ка.

Тропа́рь, глас 4:

Доброде́тель благоприя́тно, му́ченице, пости́гла еси́,/ Христо́во прия́телище бы́вши чи́стое/ и Свята́го Ду́ха дом возлю́блен;/ отню́дуже посрами́ла еси́ врага́, борю́щего род челове́ческий,/ до́бре страда́вшая,/ и посе́кла еси́ Копрони́ма, Феодо́сие, мече́м ве́ры,/ и к черто́гу Небе́сному преста́вилася еси́, ра́дующися./ Тебе́ ве́рою чту́щим/ при́сно проси́ ве́лия ми́лости.

Кано́н, его́же краегране́сие: Феодо́сии му́ченицы пою сла́ву.Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав, Изра́иль/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Бог тебе́, Феодо́сие, бысть путь страда́ния,/ на Крест во́лею возше́дый, низложи́в мучи́теля,/ я́коже пти́це, наруга́тися, от му́ченик соде́ла.

Благомо́щно, Феодо́сие всечестна́я, на земли́ разори́ла еси́ нача́льника пре́лести,/ кре́пко пострада́вши, прехва́льная,/ и сла́вы вене́ц я́ко победоно́сица, му́ченице, прия́ла еси́.

Дре́вле велехва́льство име́вый, ны́не низложи́ся,/ твоему́ терпе́нию, му́ченице, прирази́вся:/ Креста́ бо си́лу восприе́мши, посрами́ла еси́ безме́рно того́ шата́ющася.

Богоро́дичен: Лука́вно прельсти́ мя змий, взят плене́нна, обожи́тися жела́ние ми вложь;/ Тобо́ю же, Пречи́стая, призва́н быв, обожи́хся непреме́нно вои́стинну.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Жела́ние Боже́ственное, Феодо́сие,/ тя че́стну показа́ неве́сту, Христо́ву му́ченицу,/ Того́ Крест возлюби́вшую.

Пло́ти тлетво́рное оста́вльше, о честна́я, промышле́ние,/ Животворя́щим Ду́хом живе́ши, Феодо́сие пресла́вная.

Уврачу́й мой ум, Богодарова́нною твое́ю, честна́я, благода́тию,/ и ду́шу, страстьми́ разсла́бленную, исцели́.

Богоро́дичен: Возста́вила еси, о Чи́стая, па́дший мой зрак,/ ро́ждши Нача́льника, Влады́чице, всех нас воскресе́ния.

Ин конда́к, глас 4:

Боже́ственная па́мять твоя́, Феодо́сие,/ днесь возсия́вши,/ яви́ся ми́рови я́ко со́лнце,/ сказу́ющи житие́ твое́./ Ты бо воздержа́нием плотска́я двиза́ния разо́рши/ и страда́ния кро́вию уневе́стилася еси Христо́ви./ Те́мже хва́лящия тя изба́ви от вся́ких зол,/ да зове́м ти:/ ра́дуйся, ма́ти преподо́бная.

Седа́лен, глас 8.

Подо́бен: Прему́дрости:

Крове́й твои́х струя́ми всю кре́пость лука́ваго диа́вола/ я́ко вои́стинну погрузи́вши, сла́вная,/ прешла́ еси́ невре́дно мук всевели́кую пучи́ну/ ив земли́ святе́й я́ве всели́лася еси́,/ по́честь трудо́в досто́йно прие́мши,/ черто́га вхо́да Небе́снаго сподо́билася еси́, Феодо́сие прехва́льная./ Моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Богоро́дичен:

Небе́сную дверь и киво́т,/ пресвяту́ю го́ру, све́тлый о́блак воспои́м,/ неопали́мую купину́, слове́сный рай, Е́вы воззва́ние,/ вселе́нныя всея́ вели́кое сокро́вище,/ я́ко спасе́ние в ней соде́лася ми́рови и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся Всесвято́му Рождеству́ Твоему́.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Шата́яся, мучи́тель ра́нами устраши́ти кре́пость твоего́ терпе́ния хотя́ше окая́нный:/ ты же, прехва́льная, – сла́ва Бо́гу моему́, – взыва́ла еси́.

Богода́нным и Боже́ственным именова́нием/ проуве́денно обогати́лася еси́, му́ченице страстоно́сице:/ да́ние бо была́ еси́ Бо́жие, нас веселя́щее,/ ве́рою тя и любо́вию почита́ющия.

Укра́шеною, Богому́драя Феодо́сие, му́ченическою кро́вию твое́ю,/ омоче́ною оде́яна оде́ждею, –/ теку́ во след Тебе́, – любо́вию Жениху́ твоему́ взыва́ла еси́.

Богоро́дичен: Воплоще́нно Сло́во, Чи́стая Де́во,/ боголе́пно родила́ еси́ и пребыва́еши Де́ва./ Те́мже немо́лчными гла́сы, ра́дуйся, Тебе́, Влады́чице,/ ве́рою несумне́нною взыва́ем.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Ми́ро излия́вшееся, Христа́ возлю́бльши, отрокови́це,/ богому́дренно после́довала еси́ Сему́, пе́сньми сла́вящи.

Ве́чную жизнь вре́менною измени́ла есть,/ кро́вию ма́лою Небе́сное Ца́рство му́ченица насле́дова.

Источа́ют, я́ко исто́чницы, му́ченическия мо́щи цельбы́ неду́гующим/ и душе́вныя неду́ги ве́рою исцеля́ют.

Богоро́дичен: Кто мо́жет Твое́ сказа́ти та́инство, Всенепоро́чная?/ Зижди́теля бо, невмести́маго все́ми, во чре́ве Твое́м вмести́ла еси́.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

По Тебе́ со тща́нием смерть приима́ше Феодо́сия му́ченица,/ преще́ния мучи́телей не убоя́вшися,/ Твое́й стра́сти уподо́бився, Христе́, во́льней.

Удо́бно Кресто́м Твои́м жены́ укрепи́вшеся,/ главы́ змие́в, я́коже предре́кл еси́, Спа́се, попира́ют, Твое́ю любо́вию уязвля́емы/ и Боже́ственным Твои́м жела́нием.

Богоро́дичен: Всю Тя, Голуби́цу соверше́нну и предобру́, издале́ча обре́т,/ крин и удо́льный цвет, о Богома́ти,/ Жени́х мы́сленный в Тя всели́ся.

Конда́к, глас 2.

Подо́бен: Вы́шних ища́:

Труда́ми живо́т нетру́дный дости́гла еси́,/ кро́вию же Копрони́ма удави́ла еси́, му́ченице,/ скве́рнаго врага́ Христо́вы Це́ркве, всеблаже́нная Феодо́сие,/ и с Вы́шними ра́дуешися во́инствы,/ чту́щия па́мять твою́ покрыва́ющи.

Песнь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Тя, богода́нными укра́шену, му́ченице, добро́тами, ве́рою зря́ще,/ пе́сньми све́тло Жениху́ твоему́ взыва́ем:/ благослове́н еси́ в хра́ме сла́вы Твоея́, Го́споди.

С де́вами свещено́сицами в Небе́сный, му́ченице, ны́не черто́г,/ ра́дующися, со Христо́м возшла́ еси́, взыва́ющи:/ благослове́н еси́ в хра́ме сла́вы Твоея́, Го́споди.

Богоро́дичен: На престо́ле превознесе́нне седя́й,/ престо́л Тя на земли́, Де́во, богоподо́бен обре́т, почи́л есть:/ благослове́на Ты в жена́х еси́, Пренепоро́чная Влады́чице.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Разреши́вшися соу́з плотски́х, Феодо́сие честна́я,/ возлете́ла еси́, ра́дующися, к светообра́зному черто́гу, неве́стнически лику́ющи,/ и муче́ния червле́ною кро́вию блеща́щися, и вопию́щи:/ благослови́те, вся дела́ Госпо́дня, Го́спода.

В черто́зе Небе́снем жи́ти сподо́билася еси́ све́тло, Феодо́сие честна́я,/ ве́чнующее благосла́вие обре́тши, всеприснопа́мятная,/ и му́жества твоего́ плодо́м вои́стинну обогати́вшися, вопию́щи:/ благослови́те, вся дела́ Госпо́дня, Го́спода.

Украси́лася еси́ тезоимени́тством я́ве, Феодо́сие честна́я:/ Бо́жие бо да́ние нам изря́дно даде́ся, всему́драя,/ даро́в па́че ума́ воздаю́щи ре́ки, ве́рою пою́щим:/ благослови́те, вся дела́ Госпо́дня, Го́спода.

Богоро́дичен: Вои́стинну ро́ждши Бо́га,/ вои́стинну Пречи́стая Ма́ти нарекла́ся еси́ Бо́гу,/ и́стинно нося́щи, по ко́емждо рожде́нии, Богоиме́нство./ Те́мже Тя, ве́рнии, сла́вим, Богоро́дицу, богому́дренно, Всенепоро́чная Влады́чице.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́,/ тем, веселя́щеся, Тя, Богоро́дице, велича́ем.

Разреши́ плени́цы согреше́ний благоче́стно тя воспева́ющих/ твои́ми мольба́ми, Богому́драя Феодо́сие, му́ченице прехва́льная,/ Бо́гу Вседержи́телю, предстоя́щи, всечестна́я.

Е́вы прама́тере жела́ние худо́жно прия́т, воззре́нием к Бо́гу обоже́на/ и бы́вши Боже́ственным прича́стием бог./ Те́мже тя, всеблаже́нная Феодо́сие, велича́ем.

Весь сла́дость есть твой Жени́х, страстоте́рпице,/ весь душе́вное утеше́ние, Феодо́сие му́ченице, Христо́с,/ Его́же ны́не наслажда́ющися, твои́ми моли́твами нас помина́й.

Богоро́дичен: Пло́тию приити́ восхоте́в, украси́вый вся сло́вом/ в Тя всели́ся, еди́ну, Святе́йшу всех, обре́т,/ и Богоро́дицу показа́ и́стинную, Ма́ти Де́во.