На Го́споди, воззва́х: стихи́ры на 6, глас 4.

Подо́бен: Зва́нный свы́ше:

Иже безсме́ртныя жи́зни сподо́блен,/ егда́ Единосу́щнаго и Соприсносу́щнаго/ Отцу́ Безнача́льному Роди́телю/ Сы́на и Сло́ва, Животода́вца Христа́ пропове́дал еси́,/ тогда́ о́гненным твои́м язы́ком попали́л еси́ вещь ересе́й, сла́вне,/ отгна́в от це́ркве Христо́вы А́рия,/ и Боже́ственными словесы́ просвети́л еси́/ благочести́вых сердца́ му́дре,/ покланя́тися Тро́ице во Еди́ном Существе́.

Я́ко река́ Бо́жия, напо́лнена вод духо́вных,/ яви́лся еси́, пречу́дне,/ наводне́на Боже́ственными уче́нии,/ и напая́я церко́вное все исполне́ние,/ погружа́я же собо́р еретико́в/ пучи́ною Боже́ственных твои́х слове́с, о́тче,/ и во глубине́ твои́х разуме́ний./ Ты бо, прему́дре, Единосу́щнаго ро́ждшему Отцу́/ Влады́ку Христа́ пропове́дал еси́,/ Боже́ственный Афана́сие пребога́те.

Я́ко тайносказа́тель и Боже́ственный святи́тель/ беды́ претерпе́л еси́, и гоне́ния терпели́вно,/ и наве́ты, блаже́нне, и изгна́ния многовре́менна/ ве́ры ра́ди Христо́вы,/ я́сно Единосу́щнаго, и Соприсносу́щнаго,/ и Равноде́теля, и Собезнача́льна Христа́ пропове́дая/ Первонача́льному и Собезнача́льному Отцу́./ Те́мже тя Сам украси́ пресве́тлыми я́ве науче́нии/ и пресве́тла всей вселе́нней показа́.

И́ны стихи́ры, глас 5.

Подо́бен: Преподо́бне о́тче:

Преподо́бне о́тче, Богоявле́ние Афана́сие,/ от младе́нства позна́лся еси́ Це́ркви свети́льник,/ сия́я виде́нии пресве́тлыми/ и вся́цем же о́бразом богате́яся доброде́телей,/ словесы́ огнедухнове́нными попаля́я е́реси,/ ве́рныя же вся наставля́я,/ Тро́ицы сия́нием пребоже́ственным,/ в Божестве́ Еди́ном разумева́емыя/ и соприсносу́щную сла́ву иму́щия./ Ту моли́ и Той моли́ся всегда́/ дарова́ти вселе́нней единомышле́ние,/ мир и ве́лию ми́лость.

Преподо́бне о́тче, Богоглаго́ливе Афана́сие,/ тезоимени́т вле́поту безсме́ртия нарече́н быв,/ сего́ хода́тайствующею ше́ствовал еси́ стезе́ю,/ жития́ све́тлостию обога́щся я́ве,/ ум чист, Богому́дре, стяжа́в,/ Сло́ву побо́рник обре́лся еси́ и по Ду́се дыха́я Пресвяте́м,/ И́мже просвеща́емь, побежда́л еси́ враги́ твоя́,/ И́мже огражда́емь, неутоли́м яви́лся еси́,/ И́мже и обожа́емь,/ Ему́же и прича́стник, свя́те,/ всем испроси́дарова́ти единомышле́ние,/ мир и ве́лию ми́лость.

Преподо́бне о́тче, Богопропове́дниче Афа́насие,/ беды́ претерпе́в и ча́стыя напа́сти,/ пи́щи ра́йския ны́не сподо́бился еси́,/ внутрь быв Боже́ственных оби́телей,/ к дре́ву прибли́жился еси́ жи́зни нетле́нныя,/ я́ко победи́тель, пра́ведным венце́м укра́шен, блаже́нне,/ и диади́мою Вы́шняго Ца́рствия испещре́н,/ и добро́тою сия́я./ Христо́ви помоли́ся, у Христа́, Богому́дре, проси́/ дарова́ти Це́ркви единомышле́ние,/ мир и ве́лию ми́лость.

Сла́ва, глас 6:

Христо́ва святи́теля воспое́м еси́, Афана́сия,/ я́ко А́риева уче́ния вся упраздни́в,/ и Святы́я Тро́ицы держа́ву во всем ми́ре я́сно возвеща́ет,/ Еди́наго Бо́га, в Трех Ли́цех Неразде́льна,/ Его́же и мо́лит о нас,/ ве́рою соверша́ющих па́мять его́.

И ныне, праздника.

На стихо́вне Трио́ди, Сла́ва, свята́го. Глас 3. Ге́рманово:

Па́ки нам златоте́чный Нил/ и безсме́ртия тезоимени́т, ле́тною па́мятию прише́д,/ до́брыми восхожде́ньми наводня́ет/ златостру́йная безсме́ртия лия́ния/ и пи́щу нетле́ния плододая́ высо́ким благовеща́нием:/ Тро́ицы неразде́льней держа́ве учи́т покланя́тися/ и источа́ет Боже́ственная уче́ния,/ ве́рных напоя́ет помышле́ния/ и мо́лится о душа́х на́ших.

И ны́не, пра́здника.

Тропа́рь, глас 3:

Столп был еси́ правосла́вия,/ Боже́ственными догма́ты подтвержда́я Це́рковь,/ священнонача́льниче Афана́сие:/ Отцу́ бо Сы́на Единосу́щна пропове́дав,/ посрами́л еси́ А́рия./ Отче преподо́бне,/ Христа́ Бо́га мо́ли/ дарова́ти нам ве́лию ми́лость.

Кано́н пра́здника со ирмосо́м на 6 и свята́го на 6, его́же краегране́сие: Афана́сий похвала́ правосла́вия бысть. Творе́ние Феофа́ново, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Афана́сию приноша́ю похвалу́,/ я́ко доброде́тель восхваля́я, к Бо́гу приноша́ю па́че похвале́ние,/ от Него́же челове́ком дае́тся достохва́льно дарова́ние доброде́тели,/ е́йже бысть одушевле́н о́браз и печа́ть.

Богому́дрия был еси́ испо́лнен/ и, па́че со́лнца а́нгельским, блаже́нне, житие́м облиста́в ны́не, преподо́бне,/ превозше́л еси́ похва́л зако́ны, и́же от нас,/ но приими́, о́тче, а́ще и не по достоя́нию похвале́ние.

Достодо́лжно у́бо песнь плете́м, во сла́вней твое́й па́мяти,/ но лиша́емся бо́льших, Афана́сие, по достоя́нию пе́сней твои́х,/ про́сим проще́ние нам да́ти и незави́стную благода́ть тобо́ю Ду́ха.

Ю́ношески плотски́х страсте́й игра́ние умертви́л еси́,/ в ю́ности твое́й стяжа́в му́дрость ста́рческую и благоуста́вно, Афана́сие блаже́нне,/ жела́нием бо прему́дрости вся чу́вства испра́вил еси́.

Богоро́дичен: Вопло́щшагося нас ра́ди, Всенепоро́чная,/ И́же пре́жде Безпло́тнаго, Богонача́льнаго Сло́ва О́тча родила́ еси́,/ о де́вственная похвало́, и прия́телище чистоты́, и храм очище́ния,/ Влады́чице ми́ра, Богоневе́сто.

Песнь 3

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́,/ еди́не Человеколю́бче.

Очи́стив от вся́кия скве́рны ду́шу же и те́ло, Афана́сие,/ храм яви́лся еси́, досто́ин Бо́гу,/ те́мже Тро́ицы исполне́ние почи́ в тебе́, священнотаи́нниче пребога́те.

Твою́ ду́шу, я́коже жела́ше, Уте́шителева благода́ть от страсте́й очище́ну обре́тши,/ я́ве в ней де́йственная показу́ет/ и пресве́тло свети́ло, о́тче, ми́ру тя полага́ет.

Святи́тельства у́бо пра́вило святи́телем показа́лся еси́,/ де́тельнаго же подписа́ние жития́;/ сло́во же твое́ я́сно, виде́ния о́браз, прему́дре,/ Богосло́вия же твоего́ преде́л уче́ние яви́ся.

Богоро́дичен: Херуви́м и Серафи́м превы́шши яви́лася еси́, Богоро́дице:/ Ты бо еди́на прия́ла еси́ Невмести́маго Бо́га во Твое́м чре́ве, Нескве́рная./ Те́мже, ве́рнии, Тя вси пе́сньми, Чи́стая, ублажа́ем.

По 3-й пе́сни конда́к и и́кос пра́здника. Та́же седа́лен свята́го, глас 8.

Подо́бен: Прему́дрости:

Прему́дрости сло́ва навы́к,/ А́риеву лесть низложи́в, ми́рови пропове́дал еси́ правосла́вную ве́ру:/ Отца́ бо Сло́во, Христа́, жизнь на́шу,/ вои́стинну бы́ти уясни́л еси́ сопресто́льна./ Те́мже единому́дренно Це́рковь сла́вит Тро́ицу Единосу́щную,/ во Еди́нице Божества́, Богоно́се Афана́сие./ Моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, пра́здника.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Все тебе́ вдохну́ живоно́сное дыха́ние свы́ше,/ пе́рвее прише́дшее боголе́пно, Дух Христов в го́рнице, и ученики́ насы́щшее,/ апо́стола тя показа́ тринадеся́таго, о́тче, правосла́вную ве́ру пропове́дающаго.

Ты, Боже́ственною ре́вностию зело́ распаля́емь, собо́ру споспе́шествовал еси́/ и пре́жде, е́же соверши́ти тя председа́теля, в Нике́и пропове́дал еси́ Единосу́щное./ Те́мже Це́ркве Христо́с пастыренача́льника и учи́теля тя поставля́ет.

Вруче́на име́я церко́вная корми́ла от промышле́ния Боже́ственнаго, Афана́сие,/ еретико́в душевре́дная вся языкобо́лия, я́коже не́кая секи́ра, посе́кл еси́,/ искореня́я, я́коже те́рние, и се́мя слове́сное напая́я, му́дре воздела́л еси́.

От твоего́ язы́ка о́гненнаго сожже́ся А́риево сро́дное разделе́ние и слия́ние Саве́ллиево,/ я́же от безме́рия зла, и к нече́стию единоче́стна,/ и вся с ни́ми хуле́ния ерети́ческая, о Афана́сие!

Богородичен: Нов Ада́м за пе́рваго Ты был еси́ от Де́вы,/ за прама́терь – Изба́витель всех и Спас,/ за смерть – и́стинная Жизнь безсме́ртная./ Те́мже Тя ро́ждшую Богоро́дицу ве́дуще, по достоя́нию, Чи́стая, ублажа́ем.

Песнь 5

Ирмос: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Христа́ име́я, глаго́люща, о́тче, во орга́не доброгла́снем язы́ка твоего́,/ посрами́л еси́ у́бо и́долов напи́сание е́ресь,/ заблужде́нныя наставля́я и обраща́я ко и́стинному Бо́гу, Афана́сие.

Губи́тельныя е́реси вся, о́тче, изобличи́л еси́ словесы́ и писа́ньми,/ разли́чную лесть изгоня́я му́дрыми показа́ньми из вселе́нныя,/ уясня́я невоспротивосло́вне правосла́вную ве́ру, блаже́нне.

Тя учи́теля вои́стинну вели́ка учи́телей му́дрых, Афана́сие, нело́жно сказу́ет/ и со апо́столы причте́ Це́рковь Христо́ва, о́тче,/ изъявля́юща сло́во ве́ры непоро́чное.

Богородичен: Ма́тернее дерзнове́ние к Сы́ну Твоему́ стяжа́вши, Всечи́стая,/ сро́днаго промышле́ния, е́же о нас не пре́зри, мо́лимся:/ я́ко Тя и еди́ну христиа́не ко Влады́це очище́ние ми́лостивно предлага́ем.

Песнь 6

Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Чужда́го се́мене се́ятель яви́вся Аполлина́рий,/ земна́го словесе́ и ума́ Христо́во вочелове́чение,/ кре́пко изобличи́ся от Тебе́, преблаже́нне, я́коже несмы́слен и умовре́ден.

Глаго́л твои́х, блаже́нне, Богодухнове́нных си́ла, я́ко глас гро́ма,/ во у́ши, Богоприя́тне, я́ве возгреме́ ерети́чествующих/ и ли́ца их очерни́.

Диви́тся всяк твои́м, о́тче, вле́поту списа́ниям му́дрым,/ любе́зно вмеща́я, хотя́щая бы́ти прозябе́ния ересе́й/ прови́дя, отвраща́емая от Тебе́ проро́чески.

Богородичен: Сын Единоро́дный и пре́жде век неви́димый,/ в после́дния дни Пе́рвенец быеть, зрим в телеси́ из Тебе́, Богома́ти,/ Бог спасе́ния моего́.

Кондак, глас 2.

Подобен: Крове́й Твои́х:

Правосла́вия насади́в уче́ния,/ злосла́вия те́рния изсе́кл еси́,/ умно́жив се́мя ве́ры одожде́нием Ду́ха, преподо́бне,/ те́мже тя пое́м, Афана́сие.

Икос:

Быстрины́ слове́с твои́х источи́в Боже́ственнаго уче́ния ми́рови,/ ду́ши ве́рных напои́л еси́, Афана́сие,/ и ерети́ческия предста́тели потопи́л еси́, я́ко други́я еги́птяны,/ зако́н нам богоначерта́нный дав правосла́вия,/ покланя́ние Тро́ицы во Еди́ном Божестве́ чти́ти,/ Е́юже нас соблюди́, от враг неви́димых избавля́я,/ те́мже тя пое́м, Афана́сие.

Песнь 7

Ирмос: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Единоче́стное, Сопресто́льное Отцу́ Сло́во,/ Единоро́дна же Сы́на правосла́вно пропове́дав,/ безсме́ртия, о́тче тезоимени́те, а́бие науча́еши, Ду́ху Сопресто́льна,/ и Единосу́щна, и Соприсносу́щна.

Учи́теля тя и пропове́дника священноявле́нна Трисо́лнечнаго Све́та,/ возвеща́юща ве́ру правосла́вия да́же до коне́ц земли́,/ нече́стия зря роди́тель, изгна́ния на тя воздвиза́ет.

Беды́ безме́рныя я́же подъя́л еси́, блаже́нне, подвиза́яся по благоче́стию,/ венцы́ же, та́кожде све́тлии,/ и́бо адама́нт был еси́ бию́щим,/ к себе́ же, я́ко магни́т, привлача́л еси́ вся.

Стра́нныя догма́ты, чу́ждия же Це́ркве Христо́вы, изгна́л еси́,/ Тро́ицу богосло́вив Ипоста́сьми, Божество́м же Еди́ницу, Ю́же пел еси́:/ благослове́н Бог оте́ц на́ших.

Богородичен: В ле́то Безле́тнаго, Неискусобра́чна еди́на бы́вши,/ Я́же пе́рвее Безпло́тное Сло́во, пло́ти прия́тием, Де́во, родила́ еси́,/ Ему́же пое́м, согла́сно зову́ще:/ благослове́н Бог оте́ц на́ших.

Песнь 8

Ирмос: Седмери́цею пещь/ халде́йский мучи́тель/ Богочести́вым неи́стовно разжже, ́/ си́лою же луч́шею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Святи́телей украше́ние благосла́вное, Афана́сие,/ сто́лпе све́та и Це́ркве утвержде́ние,/ Тро́ицы побо́рниче, Богосло́вия трубо́ злата́я,/ жития́ же мона́шескаго изве́стный законописа́телю, с на́ми пра́зднуеши,/ иере́и соверша́я, лю́ди ве́рныя приводя́ Христу́ во ве́ки.

Безсме́ртия был еси́ вои́стинну тезоимени́т, де́тельныя бо сло́вом превозше́л еси́,/ иску́сных же в сло́ве изве́стием жития́ побежда́я,/ во обои́х преше́л еси́ край./ Те́мже, непрело́жною доброде́телию просия́в,/ безсме́ртную стяжа́л еси́ па́мять во ве́ки.

Ты све́тлейшее показа́л еси́, тайнонебе́сниче Богоприя́тне, святи́тельство/ до́блими страда́ньми твои́ми,/ пре́лесть изгна́л еси́ твои́ми изгна́нии ча́стыми по Тро́ице, Ю́же пропове́дуя, вопие́ши:/ Отцу́ поклони́теся, Сы́на богосло́вите, Ду́ха воспо́йте во вся ве́ки.

Богородичен: Све́та незаходи́маго была́ еси́ прия́телище, Пречи́стая,/ Свет бо су́щим во тьме и се́ни бысть,/ просвеща́я вся́ческая Богоразу́мия благода́тию,/ Его́же непреста́нно, ве́рнии, во вся ве́ки пое́м.

Песнь 9

Ирмос: Ужасе́ся о сем не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Просия́ жити́ем, я́ко мо́лния,/ излия́ся же, о́тче, всем веща́ние твое́, я́коже гром,/ и́хже со́лнце назира́ет,/ с Небесе́ бо име́л еси́ свы́ше вдохнове́ние и́стинно./ Те́мже не угаси́ твоея́ па́мяти хода́тай забве́ния гроб, Афана́сие.

Све́том трисо́лнечным и трисия́нным яснейше ны́не осия́емь,/ певце́м твои́м осия́ние зареви́дное явля́еши,/ я́ко зерца́лом, свы́ше испуща́я со́лнечне,/ и ты соста́ви, блаже́нне, а́ще вели́ко и ма́ло па́че досто́инства проси́мое.

Пою́ще, мо́лим тя приле́жно: о Це́ркви помоли́ся,/ кресто́м побе́ды дарова́ти во́инству,/ правосла́вней же ве́ре кре́пость на е́реси враго́в,/ нам же спасе́ние, мир же ми́ру в твое́й па́мяти, Афана́сие.

Богородичен: Всех Предста́тельнице христиа́н, Богома́ти Де́во Пренепоро́чная,/ я́ко Ми́лостива, изба́ви от бед и напа́стей оскорбле́нныя рабы́ Твоя́,/ и неду́гующия лю́тых струп я́звами, и боле́зньми ран боля́щия изврачу́й.

Светилен.

Подобен: Све́те неизме́нный:

Река́ златото́чная яви́лся еси́,/ уче́ний вода́ми напая́я,/ служи́тель Тро́ицы, святи́телей украше́ние,/ ты бо А́риево уче́ние, Афана́сие, разори́л еси́ уче́нии твои́ми.

Слава, ин.

Подобен: Не́бо звезда́ми:

Архиере́ев сла́ву и Еги́пта воспита́ние, безсме́ртия украше́ние,/ воспои́м во хвале́нии Афана́сия вели́каго,/ я́ко низложи́теля А́риева и ве́рных засту́пника.

И ныне, праздника.

На хвалитех стихиры на 4, глас 4.

Подобен: Я́ко до́бля:

О́гненными твои́ми уче́нии/ ересе́й вся́ка хвра́стная вещь попаля́ется, пресла́вне,/ глубино́ю разуме́ний потопля́ется/ во́инство непокори́вых злочести́вое,/ Афана́сие преподо́бне,/ твои́ми же уче́нии удобря́ется, блаже́нне,/ на ки́йждо день ве́рных Це́рковь,/ велегла́сно почита́ющи тя.

От Христо́вы Це́ркве мы́сленныя во́лки отгна́л еси́, прему́дре,/ жезло́м уче́ний твои́х/ и сию́ о́крест огради́л еси́ слове́с утвержде́ньми/ и предста́вил еси́ Христу́ недви́жиму и непоколеби́му./ Его́же моли́ от тли и бед изба́витися/ ве́рою соверша́ющим всечестну́ю па́мять твою́.

Слове́с твои́х Боже́ственных светлостьми́, преподо́бне,/ Це́рковь вся украша́ется,/ и благоче́стно удобря́ется кра́сными добро́тами,/ и почита́ет достодо́лжно всепра́зднственную па́мять твою́, Афана́сие,/ свяще́нников сла́во,/ благоче́стия све́тлый и вели́кий пропове́дниче,/ Тро́ицы побо́рниче.

Слава, глас тойже. Германа Патриарха:

Вели́кая церко́вная и́стинная трубо́,/ многострада́льный Афана́сий/ к благохвале́нию днесь созыва́ет вселе́нную све́тло./ Ве́рнии вси, к торжеству́ предусря́щим до́браго па́стыря,/ пе́сньми почита́юще свяще́нныя его́ труды́,/ я́ко да моли́твами его́/ прии́мем от Христа́ Бо́га ве́лию ми́лость.

И ныне, праздника.

На стиховне праздника. Слава, глас 3:

Вели́кое украше́ние святи́телей,/ Афана́сия, непобеди́маго предста́теля, священноле́пно да восхва́лим:/ сей бо, ересе́й ссек полки́ си́лою Пресвята́го Ду́ха,/ правосла́вию побе́дная воздви́же по всей вселе́нней,/ сочета́я благоче́стно Тро́йческое та́инство сво́йством Лиц,/ и па́ки совокупля́я несме́сно во Еди́но Существа́ то́ждеством,/ и херуви́мски богосло́вя,/ мо́лит при́сно о душа́х на́ших.

И ныне, праздника.

НА ЛИТУРГИИ

Блаженны праздника, песнь рядовая и святаго песнь 3-я. Прокимен, глас 7: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми?Апостол ко Евреем, зачало 318. Аллилуия, глас 2: Свяще́нницы Твои́ облеку́тся в пра́вду,/ и преподо́бнии Твои́ возра́дуются. Евангелие от Матфея, зачало 11. Причастен: В па́мять ве́чную бу́дет пра́ведник:

Молитва

О всехва́льный и пресла́вный святи́телю Афана́сие Вели́кий, за ве́ру Правосла́вную ты был еси́ в до́лзех труде́х, мно́зех по́двизех, в пятикра́тных изгна́ниих и бе́гствех, претерпе́л еси́ мно́ги клеветы́ и оболга́ния, мно́гажды за ню хоте́ша врази́ твои́ уби́ти тя, и то́кмо Сам Бог чуде́сно сохрани́ тя от сме́рти. И все сие́ ты претерпе́л еси́ от нечести́вых еретико́в – ариа́н, с ни́ми же и боро́лся еси́, и и́хже, в пучи́не слове́с погрузи́в, терпе́нием твои́м препобеди́л еси́, и, злове́рие их от Це́ркве отгна́в и правосла́вное уче́ние насади́в, умно́жил еси́ се́мя ве́ры Христо́вой. Вои́стинну ты еси́ хра́брый во́ин Христо́в, я́ко во́ин бо, до конца́ дний твои́х сла́вно боро́лся еси́ за пра́вую ве́ру со еретики́. Вои́стинну ты еси́ столп ве́ры Правосла́вныя, и́бо ника́коже поколеба́ся ве́ра твоя́ Правосла́вная от сих гоне́ний ерети́ческих, но па́че утверди́ся и укрепи́ся, и не то́кмо у тя и у па́ствы твоея́, но и во всей Це́ркви Христо́вей. К тебе́ мо́лимся, уго́дниче Бо́жий, испроси́ у Христа́ Бо́га на́шего и нам име́ти ве́ру непоколеби́му и не уклони́тися от пра́ваго пути́ ея́, но до конца́ дний свои́х пребы́ти на нем, не боя́щеся ни ле́сти, ни преще́ния, ни да́же гоне́ния, и унасле́довати Ца́рство Небе́сное во сла́ве Бо́га Отца́ и Сы́на и Свя́таго Ду́ха, иде́же ты и вси святи́и пребыва́ют. Ами́нь.