НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: О, ди́вное чу́до:

О, ди́вное чу́до:/ Пречи́стый лик Богома́тере самопису́ется,/ и у́жаса исполня́ются Ея́ повеле́нием/ муси́ю кладу́щии гре́честии иконопи́сцы/ в небеси́ подо́бней це́ркви Пече́рстей/ и тре́петно взыва́ют к Первообра́зней:/ Чи́стая, ра́дуйся, нас не оставля́ющая,/ Госпо́дь с Тобо́ю.

Непости́жно явле́ние ико́ны Богоро́дицы/ на стене́ Пече́рския це́ркве/ и ди́вно сия́ние, со́лнца светле́йшее, исходя́щее от нея́,/ превосхо́дит же ум земноро́дный/ и ужаса́ет явле́ние Ду́ха Всепречи́стаго/ из о́браза чуде́снаго, я́ко го́лубя,/ подаю́щаго нам собо́ю ве́лию ми́лость.

Пресла́вное ны́не чу́до,/ ди́вно явле́ние све́тлаго о́браза Пречи́стыя Богоро́дицы/ с Предве́чным Младе́нцем ви́дяще,/ иконопи́сцы гре́честии вку́пе с преподо́бным Али́пием/ от души́ сла́вляху Ю,/ с ни́ми же и мы недосто́йными усты́/ от се́рдца вопие́м Обра́дованней:/ ра́дуйся, Цари́це, нас не оставля́ющая.

Сла́ва, глас 5:

Кто не удиви́тся и не просла́вит/ Засту́пницу ро́да на́шего,/ чуде́сно явля́ющую е́же о нас промышле́ние/ в сия́ющем ли́ке Свое́м,/ незри́мо изображе́нном/ в благода́ти испо́лненной це́ркви Пече́рстей,/ е́же ви́дяще и благогове́йно воспомина́юще,/ благода́рно вси воззове́м Обра́дованней:/ ра́дуйся, на́ша и́стинная Ма́ти,/ Пече́рская похвало́.

И ны́не, пра́здника.

Вход. Проки́мен дне. И чте́ния.

Бытия́ чте́ние (глава 28):

Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий,/ и сия́ врата́ Небе́сная.

Проро́чества Иезекии́лева чте́ние (главы 43 и 44):

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х,/ су́щих к се́веру, пря́мо хра́му, и ви́дех,/ и се испо́лнь сла́вы храм Госпо́день.

При́тчей чте́ние (глава 9):

Прему́дрость созда́ Себе́ дом/ и утверди́ столпо́в седмь./ Закла́ своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне,/ и тре́бующим ума́ рече́:/ прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживе́те,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному, и приложи́т приима́ти./ Нача́ло прему́дрости – страх Госпо́день,/ и сове́т святы́х – ра́зум:/ разуме́ти бо зако́н, по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.

На лити́и стихи́ры, глас 3:

Прииди́те, любопра́зднственнии собо́ри,/ воспои́м неусыпа́ющую в моли́твах Богоро́дицу/ и, с серде́чною ве́рою Ея́ о́бразу кла́няющеся,/ потщи́мся подража́ти Ей в милосе́рдии и кро́тости,/ да обря́щем Ея́ заступле́нием/ ми́лость у Христа́ Бо́га на́шего.

Прииди́те, богокра́сный ли́че Пече́рских отце́в/ и убо́зии подража́тели их,/ воспо́йте Ма́терь Бо́га на́шего/ и всемо́щную Храни́тельницу оби́тели сея́,/ из глубины́ души́ прося́ще пред чуде́сным Ея́ о́бразом/ ми́ра и спасе́ния душа́м на́шим.

Прииди́те, вси, ве́дущии Бо́га,/ к Небе́сней Цари́це и Ма́тери всех,/ прославля́юще Ея́ снизхожде́ние к ро́ду на́шему,/ и в избра́нном уде́ле Пече́рстем источи́те сле́зы души́ своея́/ пред незри́мо Су́щей зде,/ умиле́нием и любо́вию зову́ще к Ней:/ ра́дуйся, Обра́дованная,/ ве́рных Свои́х рабо́в не оставля́ющая.

Сла́ва, и ны́не, пра́здника.

На стихо́вне стихи́ры, глас 2.

Подо́бен: До́ме Евфра́фов:

Пречи́стый дом/ и пресла́вный жре́бий/ Бо́жия Ма́тере/ све́тло торжеству́ет/ явле́ние в нем Богоро́дицы.

Стих: Слы́ши, Дщи, и виждь,/ и приклони́ ухо Твое́.

Ра́дуется лик/ преподо́бных Пече́рских/ и со А́нгелы сла́вит/ безме́рную ми́лость/ Присноде́вы.

Стих: Кля́тся Госпо́дь Дави́ду и́стиною/ и не отве́ржется ея́.

С ве́рою и любо́вию/ взира́юще на Пече́рский о́браз/ Бо́жия Ма́тере,/ ра́достно да воспои́м/ Первообра́зную.

Сла́ва, глас 6:

Я́ко ве́рнии сы́ны Небе́сныя Ма́тере,/ усе́рдно ны́не теце́м к Ея́ благода́тному о́бразу/ и, уми́льно взыва́юще благода́рственная,/ обря́щем Небе́сную благода́ть душа́м на́шим.

И ны́не, пра́здника.

Тропа́рь, глас 4:

Днесь све́тло торжеству́ет Пече́рская оби́тель/ и ра́дуется явле́нием о́браза Богома́тере/ безме́рный лик Пече́рских отце́в,/ с ни́миже и мы непреста́нно вопие́м:/ ра́дуйся, Благода́тная, Пече́рская похвало́.

НА У́ТРЕНИ

По 1-м стихосло́вии седа́лен, глас 4.

Подо́бен: Воззре́вши на гро́бе:

Воззре́вше на пресла́вный лик Богома́тери,/ чуде́сно явле́нный в це́ркви Пече́рстей,/ богоизбра́ннии иконопи́сцы удиви́шася снизхожде́нию Присноде́вы/ и, зря́ще Ду́ха Свята́го, я́ко го́лубя, исходя́ща от о́браза,/ сла́вляху Го́спода и Творца́ вся́ческих,/ кла́няющеся Обра́дованней Де́ве и Ма́тери на́шей.

По 2-м стихосло́вии седа́лен, глас 4.

Подо́бен: Удиви́ся Ио́сиф:

Удиви́ся Али́пий преподо́бный, наста́вник наш,/ ви́дя незри́мо изображе́нную ико́ну Пречи́стыя и Вседи́вныя Ма́тере Спа́совой/ на стене́ це́ркве Пече́рския,/ и в себе́ помышля́ше недоуме́нно:/ что сие́ стра́нное та́инство,/ я́ко Присносу́щная в хра́ме Вседе́ва посеща́ет его́ ви́димо, благода́тию сия́ющи?

По полиеле́и седа́лен, глас 8.

Подо́бен: Повеле́нное та́йно:

Да ликовству́ет Пече́рская Ла́вра,/ прославля́ющи пресла́вное чу́до явле́ния Пречи́стаго ли́ка Богоро́дицы/ в небеси́ подо́бней и благода́тней Ея́ це́ркви,/ да игра́ет лик а́нгельский, зря неизрече́нную ми́лость к нам Присноде́вы,/ Е́йже благода́рно пое́м:/ ра́дуйся, чу́до Пече́рское.

По 50-м псалме́ стихи́ра, глас 6:

Прииди́те, ве́рнии,/ любо́вию облобыза́ем чуде́сный о́браз Богома́тере,/ я́вно явля́ющий пред все́ми держа́вный покро́в Ея́ над на́ми,/ в него́же прибега́юще, преклоня́ем коле́на се́рдца на́шего и ве́рно зове́м:/ сохрани́ и спаси́, Богоро́дице, всех притека́ющих к Тебе́/ и чу́дному о́бразу Твоему́ кла́няющихся.

Кано́н Богоро́дице ра́ди ико́ны Ея́, имену́емыя Пече́рская-Нерукотворе́нная. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Сло́во ми даждь, Пречи́стая,/ да ве́рою и любо́вию воспою́/ е́же к нам Твое́ безме́рное снизхожде́ние.

Покро́в Твой, Богороди́тельнице, ви́дяще над на́ми/ в явле́нии чу́днаго о́браза Твоего́,/ благода́рственная от души́ воспева́ем.

А́нгельстии ли́цы удиви́шася,/ зря́ще Твое́ промышле́ние, е́же о нас,/ и с тре́петом окружи́ша Твой Пречи́стый лик.

Си́лою Бо́жиею украша́ющий Твой храм, Богоро́дице,/ иконопи́сцы вку́пе с Али́пием преподо́бным/ со мно́гою хвало́ю воспе́ша Тя, чу́дно им я́вльшуюся.

Из уст Твои́х, Пречи́стая,/ явля́я благода́тное освяще́ние це́ркви Пече́рской, излете́ го́лубь,/ я́ко о́браз Ду́ха Свята́го, все́льшагося зде.

Ин кано́н Богоро́дице ра́ди ико́ны Ея́, имену́емыя Све́нская-Пече́рская. Глас 8.

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Помо́щница и Покрови́тельница еси́ оби́тели Пече́рския, Де́во Чи́стая,/ помози́ нам вы́ну просла́вити Тя/ и разреше́ние прегреше́ний пода́ждь, мо́лимся, Всенепоро́чная.

Владе́тель земли́ Черни́говския Рома́н зре́ния лиши́ся/ и, уве́дев о чудесе́х, от ико́ны Твоея́ Пече́рския бы́вших,/ приле́жно моля́шеся Тебе́.

Архимандри́т Пече́рский, вне́мля проше́нию боголюби́ваго Рома́на,/ совеща́шеся с бра́тиею/ и отпусти́ святу́ю Твою́ ико́ну со иере́ем в ладии́ по Десне́ реце́.

А́нгельское пе́ние подоба́ше приноси́ти Тебе́, Ма́тери Бо́жией,/ Тво́рца бо всех родила́ еси́ стра́нно,/ но и от нас приими́, Влады́чице, смире́нныя сия́ похвалы́.

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Просвети́ся весь о́браз Твой, Богоро́дице,/ и, све́том Небе́сным осиява́еми,/ иконопи́сцы падо́ша ниц, ужаса́ющеся.

Ра́достию одержи́м бе/ явле́нием Ду́ха Свята́го в виде́нии голуби́не преподо́бный Али́пий,/ с ве́рою и любо́вию зря́ще Тя, Богома́ти.

Егда́ узре́ша го́лубя, восходя́ща из уст Богома́тере ко о́бразу Спа́сову,/ ви́девший его́ хотя́ху поима́ти, но не можа́ху.

Чист и бел, а́ки снег, го́лубь,/ бя́ше во о́браз Всесвята́го и Пречи́стаго Ду́ха Бо́жия,/ лета́ше по це́ркви, на ли́ки святы́х возседа́я.

Излета́ше многокра́тно сей го́лубь из уст Богома́тере к лико́м Спа́сову и святы́х,/ облета́я всю це́рковь,/ показу́я многосугу́бую благода́ть Ду́ха Свята́го,/ в хра́ме Пече́рском пребыва́ющую.

Ин

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

Утверди́ сердца́ на́ша во упова́нии на Тя, Пречи́стая Госпоже́,/ я́ко утверди́ша ве́ру Рома́на, раба́ Твоего́, да вопие́м:/ несть свят, я́ко Госпо́дь, и несть пра́веден, я́ко Бог наш.

У́тру бы́вшу, ико́ны Твое́й не обре́теся в ладии́,/ и, обре́тше ю на дре́ве, вверху́ бре́га, ра́довашеся.

О сем ди́вном Твое́м смотре́нии возвести́ша боголюби́вому Рома́ну,/ и сей, ра́дости и умиле́ния испо́лненный,/ от глубины́ серде́чныя со слеза́ми моля́шеся Тебе́,/ те́мже и на́ша во умиле́нии приноси́мыя похвалы́ и проше́ния не пре́зри.

О Пречу́дная Влады́чице Богоро́дице, Ма́ти Христа́ Бо́га на́шего, –/ рече́ слепы́й владе́тель, –/ да́руй ми прозре́ти,/ да ви́жу свет и лицезре́ю чу́дный о́браз Твой.

Седа́лен, глас 4:

Егда́ яви́ся о́браз Твой, Пречи́стая, в це́ркви Пече́рстей,/ тогда́ воспе́ша Ти вси, ви́девшии чу́до сие́,/ с ни́ми же и мы, ве́дуще в явле́нии сем сугу́бую благода́ть в оби́тели на́шей,/ ра́достно взыва́ем Ти и любо́вию чтим лик Пречи́стый Твой, Богообра́дованная,/ при́сно нас снабдева́ющая любо́вию Свое́ю.

Сла́ва, и ны́не:

Све́тлое днесь Госпожи́ на́шея Пресвяты́я наста́ торжество́,/ весели́ся, пречу́дный Али́пие со и́ноки Пече́рстими,/ да ликовству́ют вси боголюби́вии собо́ри:/ созыва́ет бо нас Пресвята́я Богоро́дица просла́вити чу́дную Свою́ ико́ну,/ луча́ми ми́лости не то́кмо оби́тель Пече́рскую,/ но и зе́млю Бря́нскую просвеща́ющую,/ те́мже, ра́дующеся, вси вопие́м:/ спаси́ ны, Де́во Чи́стая.

Песнь 4

Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Сия́ние о́браза Твоего́, Богома́ти,/ просвети́ всю це́рковь/ и ослепи́ у́жасом испо́лненный иконописа́телей лик.

То́нко и непостижи́мо бысть сие́ сия́ние,/ я́ко снизше́ствие Ду́ха Преве́чнаго,/ небеса́м отве́рстым в небеси́ подо́бную це́рковь.

Али́пий бо преподо́бный та́ко и разуме́ сие́ явле́ние,/ а́ки о́браз благода́ти Ду́ха Свята́го в це́ркви Пече́рстей.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Боголюби́вый Рома́н, я́коже иногда́ Закхе́й,/ ра́дости испо́лнь, вопия́ше Тебе́, Пречи́стая;/ ели́ка и до́ле узрю́ с ме́ста сего́ на все четы́ре страны́,/ толи́ко прида́м к до́му Твоему́ и сози́жду храм и оби́тель,/ иде́же Ты возлюби́ла ме́сто сие́.

Егда́ прибли́жися к дре́ву, иде́же бе ико́на Твоя́,/ па́ки сей раб Твой вопия́ше Тебе́:/ Пресвята́я Влады́чице, услы́ши глас моли́твы моея́/ и да́руй свет оча́м мои́м.

Услы́шавши сие́ приле́жное моле́ние раба́ Твоего́, Пречи́стая Влады́чице,/ а́бие испо́лнила еси́ проше́ние его́;/ та́ко внемли́ мольба́м и нас, смире́нных и недосто́йных.

Зря́ше сие́ ди́вное зна́мение ми́лости Твоея́,/ архиере́й земли́ тоя́, и́ноцы и вси лю́дие ра́дости испо́лнишася/ и восхвали́ша Тя.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Я́ве узре́ша в сем чу́де непостижи́мую ми́лость Богома́тере,/ вси, су́щии в це́ркви, просла́виша Го́спода,/ такову́ю благода́ть нам дарова́вшего.

Удивля́ет наш ум и разжига́ет се́рдце/ воспе́ти сие́ пресла́вное чу́до –/ явле́ние ли́ка Богома́тери в це́ркви Пече́рстей.

Безу́мный то́кмо не разуме́ет в сем безме́рную ми́лость Присноде́вы/ и благода́ть Бо́жию к уде́лу Пече́рскому Пречи́стыя.

Отсю́ду разуме́вше незри́мый покро́в Влады́чицы над сим благода́тным уде́лом,/ устна́ми и се́рдцем принесе́м хвалу́ Пречи́стей.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Виждь, Преблагослове́нная, от но́щи у́тренюющих чад па́ствы Твоея́,/ ны́не окружа́ющих честну́ю и достохва́льную ико́ну Твою́,/ велича́ющих безме́рную Твою́ ми́лость/ и прося́щих разреше́ние грехо́в и жития́ исправле́ние,/ не отри́ни нас от светоно́снаго ли́ка Твоего́.

Архиере́й земли́ Бря́нския,/ прие́м в ру́це свои́ от дре́ва чу́дную ико́ну Твою́,/ благогове́йно облобыза́ ю и моле́бныя пе́ния воспе́ Тебе́.

Сия́ честна́я ико́на Твоя́, от Пече́рския оби́тели принесе́нная/ и от руки́ преподо́бнаго Али́пия начерта́нная,/ благослове́ние святы́я Ла́вры – до́ма Твоего́, на зе́млю Бря́нскую излия́ша,/ и мы, сему́ ра́дующеся, благода́рственными словесы́ воспева́ем Тя.

Боголюби́вый князь Рома́н, благодаре́ния Тебе́, Всечи́стая, испо́лнь,/ храм во имя́ Успе́ния Твоего́ сооруди́/ и оби́тель и́ноческую учреди́,/ да непреста́нно славосло́вится вели́чие Твое́.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Горе́ вознесе́м сердца́/ и ве́рою и любо́вию притеце́м под всемо́щный покро́в Богоро́дицы,/ дела́ подража́ния Ей принося́ще.

А́нгельски воспева́я Обра́дованную,/ потщи́мся яви́ти хвалу́ Ей ве́рою, кро́тостию и милосе́рдием.

Госпо́дни ве́дуще за́поведи,/ просла́вим Пречи́стую Ма́терь Спа́сову,/ исполня́юще зако́н Христо́в.

Омыва́я грехи́ и беззако́ния жи́зни своея́ слеза́ми покая́ния,/ потщи́мся чи́стою душе́ю облобыза́ть Пече́рский о́браз Богома́тере.

Ин

Ирмо́с: Очисти́ мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Сла́ва ико́ны Твоея́, от оби́тели Пече́рския принесе́нная,/ озаря́ше не то́кмо зе́млю Бря́нскую,/ но и до гра́да Москвы́ достиго́ше,/ сего́ ра́ди вопие́м Ти:/ ра́дуйся, всея́ зе́мли на́шея похвало́.

Три ле́та ико́на Твоя́, Влады́чице, пребыва́ше во гра́де Москве́/ и а́бие со сла́вою принесе́на бысть во оби́тель Све́нскую,/ мы же ны́не прославля́ем Тя,/ сего́ ра́ди невреди́мы нас сотвори́.

Честна́я Твоя́ ико́на яви́ся вои́стинну покро́в держа́вный лю́дем Твои́м,/ я́ко не то́кмо и́ноцы Пече́рстии,/ но и лю́дие да́льнии обрето́ша Твою́ по́мощь и заступле́ние.

В лю́тое ле́то наше́ствия двана́десяте язы́к/ лю́дие гра́да Бря́нска изнесо́ша честну́ю ико́ну Твою́ Пече́рскую/ и со слеза́ми мно́гими моля́хуся,/ Твоего́ заступле́ния и́щуще.

Конда́к, глас 3:

Де́ва днесь неви́димо предстои́т в це́ркви/ и с ли́ки Пече́рских отце́в мо́лится о нас,/ благогове́йно велича́ющих Ея́ безме́рную ми́лость к ро́ду на́шему,/ я́вльшуюся в чу́дном о́бразе Ея́,/ оби́тель Пече́рскую украша́ющем.

И́кос:

Огради́ моя́ помышле́ния, Пречи́стая,/ и Небе́сным Твои́м благослове́нием/ подви́гни мя досто́йно воспе́ти сла́ву Твою́ на ме́сте святе́м сем,/ да, наде́яся на ми́лость Твою́, дерзну́ убо́гим язы́ком воззва́ти к Тебе́:/ ра́дуйся, Пече́рская сла́во, от лет дре́вних нас освяща́ющая;/ ра́дуйся, Небе́сная Игу́мения оби́тели на́шей,/ при́сно зде пребыва́ющая любо́вию и милосе́рдием;/ ра́дуйся, упова́ние и кре́пость рабо́в Твои́х, на ме́сте сем служа́щих Ти;/ ра́дуйся, незри́мо нас благода́тию осеня́ющая в о́бразе Твое́м,/ оби́тель Пече́рскую украша́ющем.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Мно́жество соде́янных лю́тых помышля́я, окая́нный,/ трепе́щу и с ве́рою взыва́ю Ти, Богороди́тельнице,/ я́ко Ма́ти милосе́рдия, проще́ния ища́.

Освети́тся и наша́ душа́ све́том благода́ти Христо́вой,/ егда́ в покая́нии и моли́тве притеце́м/ к неусыпа́ющей о нас в заступле́нии Богоро́дице.

Наде́яся на ми́лость Обра́дованной,/ с ве́рою воззове́м Сы́ну Ея́:/ поми́луй нас, Бо́же, по моли́тве Ма́тери Свое́й.

А́ще и немощни́ ду́хом и те́лом,/ но да посети́т нас благода́ть Бо́жия,/ в не́мощех соверша́ющаяся.

Хотя́ще восприя́ти Ду́ха Всесвята́го,/ принесе́м в сей храм Богома́тери чи́стую ду́шу и ве́ру в любви́.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Лю́дие, обре́тше ди́вное заступле́ние от Твоея́ пречи́стыя ико́ны, Пече́рскою имену́емыя,/ хвале́бными гла́сы воспева́ху:/ оте́ц на́ших Бо́же, благослове́н еси́.

В пещи́ искуше́ний и бед опаля́емых ороси́, Богома́ти, струя́ми Твои́х щедро́т,/ я́коже дре́вле яви́ла еси́ по́мощь рабо́м Твои́м,/ внегда́ врази́ ослепле́ни бы́ша/ и вся сокро́вища во оби́тель возврати́ша, да зове́м велегла́сно:/ оте́ц на́ших Бо́же, благослове́н еси́.

Я́коже изба́вила еси́ не́когда игу́мена Мартиниа́на с бра́тиею от сме́рти внеза́пныя,/ та́ко и нас, гре́шных, в покая́нии зову́щих, услы́ши/ и уми́лостиви Сы́на Твоего́, да зове́м Ему́:/ оте́ц на́ших Бо́же, благослове́н еси́.

Ты – весе́лие в оби́телех Твои́х живу́щих/ и градо́в дре́вних утеше́ние и похвала́, Де́во Мари́е,/ Препе́тая и Превозноси́мая во ве́ки.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Анто́ния и Феодо́сия преподо́бных с со́нмом Пече́рских отце́в дви́жа на моли́тву о нас,/ просла́вим Пречи́стую усе́рдием к оби́тели Ея́.

Анто́ний преподо́бный вку́пе с Феодо́сием единонра́вным/ предстоя́т у ли́ка Богома́тере и мо́лятся Ей/ о покрове́нии ме́ста сего́ и ве́рою чту́щих его́.

Ны́не взира́я на милосе́рдный лик Присноде́вы,/ испро́сим у Нея́ и Предве́чнаго Сы́на Ея́, в объя́тиях держи́маго Е́ю,/ ми́лость к нам, гре́шным.

Твои́м матери́нским покро́вом, Пречи́стая,/ да защища́еши и ны́не сей уде́л Твой/ и ве́рою служа́щих Ти в нем.

Ин

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

По́йте, и́ноцы Пече́рстии вку́пе с бра́тиею Све́нскою,/ прославля́й, земле́ Ки́евская и Бря́нская, Благу́ю Влады́чицу,/ ико́ною Свое́ю источа́ющую струи́ чуде́с и благодея́ний,/ мы же хва́лим, благослови́м, покланя́емся Ти, Богоро́дице,/ пою́ще и превознося́ще во вся ве́ки.

Ди́вныя зна́мения ми́лости от ико́ны Твоея́ Пече́рския источи́ла еси́, Влады́чице:/ духо́в злых отгна́ла еси́,/ отрокови́це Екатери́не, я́коже Рома́ну, зре́ние дарова́ла еси́,/ сего́ ра́ди превозно́сим Тя во вся ве́ки.

Явле́ние ико́ны Твоея́/ сердца́ и́ноков, в посте́ и моли́тве подвиза́ющихся, возвесели́ло есть,/ и тем го́ршее устремле́ние к Небе́сному Ца́рствию им внуши́ло есть,/ та́ко и нас, немощны́х, ускори́ на по́двиги,/ да превозно́сим Тя во вся ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Одержи́ми ра́достию в сей све́тлый день пра́здника Богома́тере,/ все упова́ние на Ню возложи́м в ско́рбех и печа́лех жи́зни на́шея.

Не усыпа́ет о нас в моли́твах Пречи́стая Ма́терь Спа́сова/ и явля́ет чу́дное Свое́ милосе́рдие ко всем,/ ве́рою чту́щим Ея́ о́браз святы́й.

Иису́са Христа́ светле́йшее и́мя призыва́юще,/ ве́рою просла́вим безсме́ртную Ма́терь Его́,/ спаса́ющеся в жи́зни сей.

Я́ко Ма́ти всех нас милосе́рдно приими́, Преблагослове́нная,/ сие́ убо́гое сло́во Твоего́ после́дняго раба́/ и сохрани́ его́ и всех нас в уде́ле Твое́м во ве́ки веко́в.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Прииди́те вси, благода́рственными пе́сньми возвели́чим Ма́терь Бо́жию/ и к ди́вному Ея́ о́бразу благогове́йно припаде́м,/ положи́вшую с на́ми заве́т ми́лости,/ просла́вим Обра́дованную воскресе́нием Сы́на Своего́.

Богоро́дице Де́во, упова́ние христиа́ном,/ проба́ви и на́шему ро́ду ми́лости Твоя́,/ бы́вшия отце́м на́шим во оби́тели сей,/ разори́ сове́т нечести́вых, возстаю́щих на ны,/ и сей дом Твой пресла́вно соблюди́.

Пресвята́я Госпоже́ на́ша, помина́я неисче́тная Твоя́ благодея́ния,/ и́миже удиви́ла еси́ оби́тель сию́ от лет дре́вних,/ Тя, Ма́терь Бо́жию, велича́ем.

Свята́я оби́тель Пече́рская ку́пно с дще́рию свое́ю по ду́ху оби́телию Све́нскою,/ днесь сою́зом любве́ совоку́плени,/ я́ко всея́ тва́ри честне́йшую и земны́х всех сла́внейшую Тя, Богоотрокови́це,/ зря́ще на ико́не Твое́й Пече́рстей, ублажа́ем.

Свети́лен:

Све́том озари́вшая це́рковь Пече́рскую от пречу́днаго ли́ка Твоего́, Богоро́дице,/ возсия́й ми свет спасе́ния огне́м покая́ния,/ да ве́рою и любо́вию сла́влю Тя, Приснопрославля́емую.

На хвали́тех стихи́ры, глас 5.

Подо́бен: Ра́дуйся:

Ра́дуйся, горо́ Пече́рская,/ усыре́нная моли́твами сыно́в твои́х/ и украше́нная ны́не явле́нием чу́днаго о́браза Богома́тери,/ вои́стинну Небе́сной Игу́мении оби́тели на́шея,/ при́сно охраня́ющей,/ от язв душе́вных и теле́сных врачу́ющей/ и незри́мо чудоде́йствующей ко всем,/ ве́рою чту́щим Ю/ и о́бразу Ея́ кла́няющимся.

Ра́дуйся, все мно́жество Пече́рских отце́в,/ ви́дяще явле́ние Богома́тери/ на ме́сте по́двигов ва́ших/ и всемо́щную благода́ть Всесвята́го Ду́ха,/ обита́ющую на ме́сте святе́м сем,/ Ея́же снизше́ствие благогове́йно воспомина́юще/ и благове́рно чту́ще,/ воспои́м от се́рдца Засту́пницу ро́да на́шего,/ при́сно моля́щую о нас Христа́ Бо́га на́шего.

Ра́дуйся, свята́я оби́тель Пече́рская,/ в благознамени́тый день явле́ния в тебе́/ безме́рной ми́лости Богоро́дицы,/ и, ра́достно воспева́юще благода́рственная устна́ми сыно́в твои́х и любо́вию,/ да просла́виши о́браз Игу́мении свое́й,/ при́сно храни́ти тя обеща́вшей,/ а́ще ве́ра и любо́вь не оскуде́ют на ме́сте сем.

Сла́ва, глас 6:

Прииди́те, вси празднолю́бцы,/ к Пренепоро́чней Засту́пнице на́шей/ и, упова́ние возло́жше на Ню,/ воспои́м ра́достно,/ устна́ми и се́рдцем взыва́я:/ ра́дуйся, Обра́дованная,/ Пече́рская похвало́.

И ны́не, пра́здника.

На Литурги́и слу́жба Богоро́дице.

Моли́тва

О, Пресвята́я и Пренепоро́чная Де́во Богоро́дице, на́ша Пече́рская похвало́ и украше́ние, держа́вный покро́ве свята́го ме́ста сего́, и́стинная Влады́чице избра́ннаго уде́ла Своего́. Приими́ нас, недосто́йных рабо́в Твои́х, убо́гое моле́ние, с ве́рою и любо́вию принося́щих пред чу́дным о́бразом Твои́м, да посети́ши ми́лостивно грехо́вное житие́ на́ше, просвеща́ющи его́ све́том покая́ния, осени́ нас, обремене́нных скорбьми́ мно́гими, Твое́ю Небе́сною ра́достию, сподо́би нас при́сно сла́вити Тя в ми́ре и благоче́стии на ме́сте святе́м сем, да, без поро́ка преше́дше путь жития́ на́шего, по́мощию Твое́ю дости́гнем ве́чнаго весе́лия во све́тлости святы́х и Богоно́сных оте́ц на́ших Анто́ния и Феодо́сия и всех преподо́бных Пече́рских и еди́ными усты́ и се́рдцы воспои́м Тя с Предве́чным Сы́ном Твои́м и Безнача́льным Его́ Отце́м и Пресвяты́м, Животворя́щим, Всеблаги́м и Единосу́щным Его́ Ду́хом во ве́ки веко́в. Ами́нь.

НА МА́ЛОЙ ВЕЧЕ́РНИ

Стихи́ры, глас 1.

Подо́бен: Небе́сных чино́в:

И́стинен и непоро́чен,/ преподо́бен же и незло́бив/ и вся́кия злы́я ве́щи огреба́яся/ позна́н был еси́, блаже́нне,/ укра́шен доброде́тельми я́ко вои́стинну/ и благоче́стием сия́я./ Те́мже ублажа́ем тя/ и свято́е твое́ днесь и честно́е,/ ра́дующеся, пра́зднуем успе́ние.

Непоро́чнаго и честне́йшаго, превысо́каго столпа́/ и непобеди́маго хитростьми́ вра́жиими,/ вси ублажа́ем и ве́рно восхваля́ем/ Феодо́сия вели́каго,/ уго́дника Христо́ва бы́вшаго и Пречи́стыя Его́ Ма́тере/ и сего́ приле́жно моля́ща/ спасти́ от бед ду́ши на́ша.

Мона́шеское житие́ ты уясни́л еси́,/ от земли́ Русския возсия́в, я́коже со́лнце,/ воздержа́нием бо те́ло твое огра́ждь,/ страстна́я движе́ния умертви́л еси́ моли́твами и бде́нии./ Тем тя мо́лим, Феодо́сие преблаже́нне:/ не оскудева́й, помога́я нам/ и присеща́я рабы́ твоя́.

Слава, глас 6:

Прииди́те, ве́рных сосло́вие, ве́село днесь,/ прииди́те вси ра́достно в честну́ю це́рковь,/ Богоно́сных оте́ц воспое́м/ и рука́ми воспле́щим в пресве́тлой их па́мяти,/ и́хже просла́ви Христо́с, Бог наш./ Тем во гла́се ра́дости и чи́стей со́вести возопие́м, глаго́люще:/ ра́дуйся, земны́й А́нгеле и небе́сный челове́че,/ Анто́ние преблаже́нне,/ преподо́бных ссе́льниче;/ ра́дуйся, восто́чная звездо́ златоза́рная,/ Феодо́сие о́тче,/ мона́шествующих свети́ло и па́стырю./ Ра́дуйтеся, на́ша похвало́,/ вселе́нныя ра́дование и помо́щницы,/ со А́нгелы водворя́ющеся во све́те Святы́я Тро́ицы, вас венча́вшия./ Приле́жно моли́те изба́вити нас от враг ви́димых и неви́димых/ и от вся́кия беды́,/ ве́рою и любо́вию творя́щих всепра́зднственную па́мять ва́шу.

И ны́не, пра́здника.

На стихо́вне стихи́ры, глас 2.

Подо́бен: До́ме Евфра́фов:

У́тро и день све́тел/ твой пра́здник яви́ся,/ просвеща́я на́ша сердца́,/ ве́рою хва́лящих честны́я по́двиги твоя́,/ о́тче Феодо́сие.

Стих: Честна́ пред Го́сподем/ смерть преподо́бных Его́.

Яви́ся день спасе́ния/ и пра́здник весе́лия,/ стеце́мся, ве́рнии,/ очи́стивше ду́ши,/ воспе́ти преблаже́ннаго Феодо́сия.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Я́ко со́лнце, на земли́ Анто́ния обре́т,/ сия́юща доброде́тельми,/ светле́йшая показа́лся еси́ звезда́,/ тя пою́щия ко Влады́це помяни́,/ преподо́бне Феодо́сие.

Сла́ва, и ны́не, Богоро́дичен:

Ра́дуйся,/ Я́же ра́дость ми́ру прие́мшая,/ Христа́ Жизнода́вца,/ и утоли́вшаго, Де́во,/ печа́ль прама́тернюю.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 5.

Подо́бен: Преподо́бне о́тче:

Преподо́бне о́тче Богоно́се Феодо́сие,/ вельми́ подвиза́вся во вре́менней жи́зни/ пе́сньми, посто́м и бде́нием,/ о́браз был еси́ твои́м ученико́м/ и ны́не у́бо лику́еши со Безпло́тными,/ Христа́ непреста́нно славосло́вя,/ от Бо́га Бо́жие Сло́во и Изба́вителя,/ прекло́ншаго главу́ на Кресте́/ и изба́вивша ле́сти род челове́ч./ Того́ моли́, Тому́ помоли́ся, преподо́бне,/ дарова́ти вселе́нней мир и ве́лию ми́лость.

Преподо́бне о́тче Богоно́се Феодо́сие,/ вои́стинну сподо́бился еси́ Боже́ственныя жи́зни,/ чистото́ю и поще́нием сию́ обре́т,/ жив бо преста́вился еси́ на и́стинный живо́т, всех отре́кся,/ со Безпло́тными Христа́ непреста́нно славосло́вя,/ от Де́вы неизрече́нно плоть прие́мша,/ испрове́ргшаго ад и воскреси́вшаго ме́ртвыя, я́же от ве́ка./ Того́ моли́, Тому́ помоли́ся, преподо́бне,/ дарова́ти вселе́нней мир и ве́лию ми́лость.

Преподо́бне о́тче Богоно́се Феодо́сие,/ обре́л, я́коже возлюби́л еси́, чи́стую твою́ ду́шу,/ благода́ть бо Всесвята́го Ду́ха в тебе́ всели́ся,/ я́ко пречи́ст свет,/ Его́же поспеше́нием све́тло озаре́н,/ Христа́ непреста́нно славосло́вил еси́,/ во двою́ существу́ еди́наго Бо́га,/ пострада́вшего пло́тию на Кресте́/ и Божество́м безстра́стна пребы́вша./ Того́ моли́, Тому́ помоли́ся, преподо́бне,/ дарова́ти вселе́нней мир и ве́лию ми́лость.

Слава, глас 8:

Прииди́те, стеце́мся вси к Боже́ственней па́мяти отца́ на́шего Феодо́сия:/ той бо, от ю́ности зва́ние свы́ше прие́м,/ от иере́я Богода́нный дар именова́ся./ Те́мже христолюби́вым князе́м учи́тель пра́выя ве́ры,/ вельмо́жам тве́рдое защище́ние,/ си́рым оте́ц милосе́рд,/ вдови́цам те́плое заступле́ние,/ скорбя́щим утеше́ние, ни́щим сокро́вище,/ мона́шескому ли́ку ле́ствица, возводя́щая на высоту́ небе́сную,/ и про́сто к нему́ притека́ющим исто́чник приснотеку́щия воды́ быв,/ мо́лит непреста́нно спасти́ся душа́м на́шим.

И ны́не, пра́здника. Вход. И чте́ния три.

Прему́дрости Соломо́ни чте́ние (главы 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ради прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бне,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́ни чте́ние (глава 3):

Пра́ведных ду́ши в руце́ Бо́жией,/ и не прикосне́тся их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоугоде́н Бо́гови быв, возлю́блен бысть/ и живы́й посреде́ гре́шных преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 1:

Прииди́те, празднолю́бцы днесь,/ лик совокупи́вше, благоче́стно торжеству́ем/ вели́каго отца́, всеми́рнаго свети́льника,/ пресла́вную и честну́ю па́мять/ и сла́вно почти́м, глаго́люще:/ ра́дуйся, Феодо́сие, преподо́бных и пра́ведных единокро́вниче;/ ра́дуйся, честны́х оте́ц пресве́тлый полк совокупи́вый;/ ра́дуйся, служи́телю и строи́телю ве́рный оби́тели Бо́жия Ма́тере;/ и́же изря́дный соста́вил еси́ храм в сла́ву Бо́жию,/ в не́мже пою́ще, мо́лим тя;/ моли́ изба́вити нас от вся́каго искуше́ния, и бед,/ и ва́рварскаго наше́ствия/ и спасти́ ду́ши на́ша.

Глас 2: Учени́че Спа́сов, о́тче Богому́дре Феодо́сие,/ богодви́жимая цевни́це, богосказа́нная уста́,/ духо́вный воево́да, па́стырю до́брый,/ преподо́бных похвало́./ Ты Бо́га взыска́л еси́/ и Сего́ просвети́лся еси́ боголу́чными сия́ньми,/ Бо́гу бесе́довал еси́ непреста́нными очище́нии и сия́нии,/ сле́зными исто́чники просвети́в мы́сли,/ столп всесве́тел и огнесия́нен яви́лся еси́, всеблаже́нне,/ мона́хов похвала́, отце́в сла́ва/ и Тро́ицы служи́тель,/ и ны́не нас всех сохрани́ хода́тайством твои́м.

Преподо́бне о́тче Феодо́сие,/ ты уще́дрил еси́ та́ющих в жа́жди зно́я,/ возме́здил еси́ боголе́пно, зна́меньми нача́льствуя,/ я́ко служи́тель изря́ден твоему́ Влады́це подо́бяся./ Вино́ умно́жил еси́,/ и жи́тницы пра́здны повеле́нием твои́м муки́ напо́лнил еси́,/ и сосу́д оскуде́вший ме́ду изоби́ловати сотвори́л еси́./ Неявле́нная уве́дав, Це́рковь уясни́л еси́,/ му́ченически показа́в страда́ния,/ исцеле́ний мно́жества пода́л еси́,/ ни́щих возлюби́л еси́,/ челове́ки уще́дрив обы́чаи твои́ми,/ и твое́ чре́во хле́бом и водо́ю утесни́л еси́,/ в пло́ти житию́ Безпло́тных подо́бяся./ И́хже ра́ди сла́ву приноша́ем ти, моля́щеся:/ не остави́ нас,/ сохраня́я рабы́ твоя́ моли́твами твои́ми.

Свети́ла возсия́ша в Руси́ два светле́йшая,/ Анто́ний и Феодо́сий./ Ов бо Боже́ственным сло́вом небе́сную ро́су испусти́ на зе́млю,/ и огнь с небесе́ сведе́,/ и бу́дущая я́сно пропове́да,/ Тро́йческую благода́ть прие́м./ Ов же с небесе́ дождь испусти́,/ и кня́зя обличи́ о братоненави́дении и властолю́бии непра́ведне./ И Го́спода самоли́чно ви́де,/ и на возду́се, я́ко Илия́,/ во све́те пла́менне, над монастыре́м ви́ден бысть,/ ру́це воздева́я и моли́твы творя́й к Бо́гу./ И ны́не, со А́нгелы ликовству́юще, о нас мо́лят,/ с ни́ми сподо́битися све́та и́стиннаго/ и спасти́ ду́ши на́ша.

Сла́ва, глас 6:

Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ во е́же по подо́бию, я́ко мо́щно возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ верх,/ жи́тель пусты́нный,/ благотеку́щих обучи́тель,/ пра́вило доброде́тели изве́стнейшее./ И ны́не на Небесе́х зерца́лом разре́шшимся,/ о́тче наш Феодо́сие,/ чи́сте зри́ши Святу́ю Тро́ицу,/ моля́ся несре́дственне о и́же ве́рою и любо́вию чту́щих тя.

И ны́не, пра́здника.

На стихо́вне стихи́ры, глас 8.

Подо́бен: О, пресла́внаго чудесе́:

О́тче Богому́дре Феодо́сие,/ ты, от утро́бы/ Бо́гу прибли́жив твой смысл,/ весьма́ прилежа́л еси́ Царю́ Вседержи́телю,/ плоды́ досто́йны принося́ Ему́/ от твои́х по́двиг, преподо́бне,/ соукраша́емь доброде́тельными венцы́,/ тем благи́х обре́л еси́ восприя́тие, досточу́дне.

Стих: Честна́ пред Го́сподем/ смерть преподо́бных Его́.

Ты мона́шествующих наказа́тель/ и Русския земли́ звезда́ пресве́тлая,/ осия́ющи чудесы́ всю страну́ сию́,/ тя бо Бог пре́жде избра́ от ю́ности, о́тче,/ па́стыря овца́м слове́сным./ Те́мже преподо́бных лик тя восприя́т,/ с ни́миже моли́, мо́лимся,/ ста́ду твоему́ грехо́в оставле́ние дарова́ти.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, Де́во Препе́тая,/ я́же столпо́м о́гненным па́жить показа́вши,/ иде́же па́ствитися хотя́ше Боже́ственное ста́до,/ и це́рковь ту а́бие воздви́же Феодо́сий,/ преукра́шену Тебе́ и всечу́дну,/ в не́йже вси пра́зднуем успе́ние Твое́,/ Богоро́дице Пречи́стая,/ ве́рнии, о́крест ра́ки стоя́ще Твоего́ уго́дника.

Сла́ва, глас 8:

Мона́хов мно́жества/ наста́вника тя почита́ем, о́тче наш Феодо́сие:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных./ С ни́миже моли́ся Го́сподеви/ поми́ловатися душа́м на́шим.

И ны́не, пра́здника.

Тропа́рь свята́го, два́жды. Богоро́дице Де́во: еди́ножды.

Тропа́рь свята́го, глас 8:

Возвы́сився на доброде́тель,/ измла́да возлюби́в мона́шеское житие́,/ к жела́нию до́блественне дости́г, всели́лся еси́ в пеще́ру/ и, украси́в житие́ твое́ поще́нием и све́тлостию,/ в моли́твах, я́ко безпло́тен, пребыва́л еси́,/ в Русстей земли́, я́ко све́тлое свети́ло, просия́в, о́тче Феодо́сие,/ моли́ Христа́ Бога́ спасти́ся душа́м на́шим.

НА У́ТРЕНИ

На Бог Госпо́дь: тропа́рь пра́здника, два́жды.

Сла́ва, тропа́рь свята́го. И ны́не, пра́здника.

По 1-й стихоло́гии седа́лен, глас 4.

Подо́бен: Ско́ро предвари́:

Зва́нию Го́спода твоего́ после́довал еси́,/ мир оста́вль и вся ми́ра кра́сная, преблаже́нне Феодо́сие,/ претерпе́л еси́ теле́сное озлобле́ние,/ в пеще́ре, в ме́сте ско́рбне и те́сне, укре́плься усе́рдно,/ и полки́ бесо́в прогна́л еси́ му́жески./ Те́мже твою́ па́мять при́сно пе́сньми похва́лим ве́рно.

Сла́ва, и ны́не, пра́здника.

По 2 – й стихоло́гии седа́лен, глас 8.

Подо́бен: Прему́дрости:

Сле́зными тече́ньми твою́ ду́шу напои́л еси́ бога́тно, о́тче му́дре,/ многопло́ден доброде́телей твои́х пожа́л еси́ клас/ и, па́стырь овца́м, преподо́бне, быв,/ в зла́це сих воздержа́ния воспита́л еси́./ Те́мже, разре́шся от жития́ сла́вно,/ оте́ческим лико́м сочта́лся еси́, Феодо́сие./ Сего́ ра́ди вопие́м ти:/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, пра́здника.

По полиеле́и седа́лен, глас 8.

Подо́бен: Прему́дрости:

От утро́бы освяще́н быв я́ко вои́стинну, Феодо́сие блаже́нне,/ на земли́, я́ко А́нгел, пожи́л еси́:/ плоть бо умертви́в,/ Анто́ния, и́же в пеще́ре, житию́ досто́йно поревнова́в,/ Тро́ицы уго́дник показа́лся еси́, блаже́нне./ Те́мже и к ре́вности Боже́ственнаго твоего́ жития́/ ли́ки совокупи́л еси́ мона́шествующих, сла́вне./ Богоно́се о́тче наш, мо́ли Христа́ Бо́га согреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, пра́здника.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Луки́, зача́ло 24.

По 50-м псалме́ стихи́ра, глас 8:

На не́бо теку́щее возше́д,/ седе́ние боже́ственно доброде́тельми,/ доше́л еси́ ко кра́йнему гра́ду поще́нием,/ от земли́ исходя́й на го́рняя Иерусали́ма прекра́сная,/ и от боле́зней и по́двигов досто́йно честь прие́мля,/ и с Небе́сными ра́дуешися чинонача́лии, преблаже́нне,/ ве́чных благ насле́дник и Ца́рствию жи́тель быв./ Но моли́ся, Богоно́се Феодо́сие, Спа́су всех/ умири́ти мир и спасти́ ду́ши на́ша.

Кано́н пра́здника, со ирмосо́м на 6, и свята́го два кано́на на 8, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Богоуго́дный по́двиг стяжа́в, о́тче Феодо́сие, Богови́дец яви́лся еси́./ Те́мже моли́ся Бо́гу, Ему́же угоди́л еси́,/ отгна́ти мрак неве́дения моего́,/ сло́во же блаже́нное вдохну́ти, воспе́ти тя.

От ма́терня чре́ва прилепи́лся еси́ Бо́гу, преподо́бне,/ я́ко прему́дрый Па́вел и проро́к же дре́вле Иереми́я./ Те́мже тя Боже́ственная благода́ть устна́ми, Феодо́сие, Бо́жия слугу́ нарече́.

Спаси́теля за́поведи послу́шав от ю́ности, му́дре, жизнь сию́ нивочто́же положи́в,/ крест жела́я носи́ти на ра́менах твои́х, вся земна́я возненави́дел еси́,/ на Небе́сная взира́я, Феодо́сие.

Богоро́дичен: Вопло́щся от пречи́стых Твои́х ложе́сн, Де́во Пресвята́я,/ Бо́жие Сло́во всем просвети́ Богоразу́мия любо́вь/ и челове́ков торжество́ ли́ку А́нгельскому сподо́би, на Небе́сная возведе́.

Други́й кано́н, глас 6.

Песнь 1

Ирмо́с: Я́ко по су́ху пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь/ пои́м вопия́ше.

Пресве́тлыми Бо́жиими луча́ми просвеще́н, о́тче Феодо́сие,/ просвети́ ум мой твои́ми моли́твами/ воспе́ти све́тло твою́ Боже́ственную па́мять.

Еди́ному принесе́ся Бо́гу от ю́ности,/ от Него́же прия́т бога́тую благода́ть чуде́с,/ те́мже был еси́ сокро́вище ста́ду своему́ нетле́нно.

Но́вый нам яви́ся Авраа́м, же́ртву принося́ Бо́гу,/ А́гнца, взе́млющаго грехи́ всего́ ми́ра вои́стинну,/ хле́бы сотворя́я свои́ми рука́ми чи́стыми.

Богоро́дичен: И́же пре́жде денни́цы Сый,/ Сло́во Бо́жие Челове́к нам яви́ся,/ вопло́щся нас ра́ди от Пречи́стыя Де́вы,/ и, от Тоя́ изше́д, невреди́му сохрани́.

Катава́сия пра́здника.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ еди́не Человеколю́бче.

Нетле́нными да́ры и духо́вными, свя́те,/ Боже́ственная твоя́ и блаже́нная обогаще́на душа́,/ ви́дети возжеле́л еси́ гроб Госпо́день,/ но свы́ше был еси́ возбране́н Бо́жиим смотре́нием.

Же́ртва соверше́нна, и́стинна и непоро́чна/ восхоте́в бы́ти А́гнца, взе́млющаго, блаже́нне, пречи́стою кро́вию грехи́ всего́ ми́ра,/ безкро́вную же́ртву приноси́л еси́ Ему́.

Уста́вов ты стяжа́тель от версты́ ю́ностныя, о́тче, быв и самоде́ржец ума́,/ мирски́я пучи́ны избежа́в,/ наставле́ние прия́л еси́ от Боже́ственнаго Ду́ха.

Богоро́дичен: Ра́дуйся, ро́ждшая Еди́на всех Го́спода;/ ра́дуйся, челове́ком ра́дость провозвести́вши;/ ра́дуйся, ски́ние и несеко́мая горо́,/ ве́рных утвержде́ние, Еди́на Препе́тая.

Ин

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Ева́нгельскаго послу́ша гла́са Феодо́сий, в це́рковь прири́ща,/ возжеле́в взя́ти крест Госпо́день на ра́мо свое́,/ ми́ра всего́ оста́вль пристра́стия, Тому́ после́дова.

Испыта́вши тебе́, ро́ждшая тя ма́ти повелева́ет ри́зу твою́ совлещи́/ и ви́де ужа́сное виде́ние:/ чре́сла твоя́, источа́ющая кровь желе́зным препоя́санием.

Зело́ гроб Госпо́день вожделе́в ви́дети, Феодо́сие блаже́нне,/ но, удержа́н быв смотре́нием Влады́чним,/ Анто́нию был еси́ собесе́дник преподо́бному.

Богоро́дичен: Па́че ума́ Ты зачала́ еси́, Препе́тая Де́ва,/ еди́на бо от ве́ка всех Творца́, и Бо́га, и Соде́теля,/ Бо́жие Сло́во ро́ждшая.

Конда́к и и́кос пра́здника.

Та́же седа́лен свята́го, глас 4:

Па́че ума́ челове́ча яви́лся еси́, преподо́бне, на земли́,/ Бо́жий сад свяще́нный, посреде́ до́му Госпо́дня стоя́,/ подае́ши плод боле́зней твои́х ученико́м твои́м:/ от уст бо твои́х благода́ть Ду́ха возрасти́л еси́,/ о́браз быв подвиго́в и уста́в лю́бящих Го́спода./ Его́же ны́не моли́ти не преста́й спасти́ся пою́щим тя.

Сла́ва Отцу́ и Сы́ну и Свято́му Ду́ху:

Возгреме́в Христо́во Боже́ственное воплоще́ние,/ безпло́тныя враги́ до конца́ обличи́л еси́, чу́дне Феодо́сие,/ сего́ ра́ди вси, ве́рнии, благоче́стно вопие́м ти:/ моли́ непреста́нно о всех нас.

И ны́не, пра́здника.

Песнь 4

Ирмо́с: Ты моя кре́пость, Го́споди,/ Ты мо́я и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Благода́ть Ду́ха возрасте́ в тебе́, о́тче,/ егда́ ро́ждшую тя ви́дел еси́, пла́чущуся и рыда́ющу кре́пце,/ ты, предстоя́в струя́ми сле́зы точа́щей,/ непоколеби́м столп и неподви́жим пребы́л еси́.

Лю́тыми челове́ки враг вселука́вый тща́шеся отто́ргнути тебе́, Феодо́сие,/ от гнезда́ преукраше́нна, жела́ема тобо́ю,/ но ты сего́ нивочто́же вмени́л еси́,/ полки́ сего́ отгоня́ моли́твами твои́ми и поя́:/ си́ле Твое́й сла́ва, Человеколю́бче.

Окропля́я себе́ дожде́м духо́вным,/ и живо́тным исто́чником напоя́яся, и язы́ком наста́вника Анто́ния,/ клас Боже́ственный прозя́бл еси́ и пита́вши мно́жества,/ неистощи́мая вои́стинну Ио́сифова жи́тница быв.

Богоро́дичен: Кто изрещи́ досто́йно возмо́жет чуде́с Твои́х, Чи́стая, глубину́?/ Тобо́ю бо весь мир, хвалу́ Ти принося́, поми́лован бу́дет/ и избавля́ется от бед лю́тых и разли́чных зол, враг же и напа́стей.

Ин

Ирмо́с: Христо́с моя́ си́ла,/ Бог и Госпо́дь, Честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Уве́давши ма́ти твоя́, му́дре, живу́ща тя со Анто́нием блаже́нным в пеще́ре,/ ю́же, прише́дшу и пла́чущуся, уте́шив,/ мирски́я зло́бы увеща́л еси́ ю убежа́ти.

Ты иере́й Бо́жий беззло́бный был еси́,/ я́ко вои́стинну, о́тче, безкро́вныя же́ртвы принося́, свяще́нне,/ и воспева́я се́рдцем чи́стым ко Го́споду, пра́зднуя при́сно.

Грехо́в нам избавле́ние испроси́, Бо́жий слуго́ и предста́телю,/ ста́до твое́, вопие́м ти,/ и от собла́зн вра́жиих пою́щия тя сохрани́.

Богоро́дичен: Твою́ пречи́стую утро́бу освяти́ от Отца́ просия́вшее Бо́жие Сло́во/ и мно́гия ра́ди бла́гости изба́ви челове́ческий род от дре́вния кля́твы.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те незахо́димый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Доброде́тельными по́двиги возсия́ исправле́ние твое́, о́тче:/ жили́ще бо, бы́вшее дре́вле ху́до, простра́нно сотвори́л еси́,/ мно́ги приве́д покло́нники Бо́гу, подаю́щему сим всяк дово́л твои́ми моли́твами.

Све́тлыми заря́ми подвиго́в твои́х/ отгони́мо быва́ше мно́жество бесо́в от твоего́ жили́ща,/ сше́ствоваше бо ти всех Творца́ благода́ть Ду́ха/ и сла́вна тя яви́, Феодо́сие.

Спа́са Ще́драго посреде́ це́ркве воспе́л еси́,/ те́мже щедро́ты Своя́ бога́тыя посла́ тебе́, оскуде́ния разреша́я печа́ль,/ приснотеку́щия же да́ры источа́я ста́ду твоему́.

Богоро́дичен: Превы́шши бысть Вы́шних сил, Богоблагода́тная,/ заче́ншая Сло́во, вся́ческая сло́вом сотво́ршее,/ и ро́ждшая от Отца́ пре́жде век неизрече́нно ро́ждшееся.

Ин

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Чи́стый сосу́д, цве́ты доброде́тельными украша́емь, о́тче Феодо́сие,/ из него́же источа́еши исто́чник ста́ду поуче́ния, па́че ме́да и со́та сладча́йша.

Естество́ плотско́е умертви́л еси́ доброде́тельными по́двиги, о́тче му́дре Феодо́сие,/ те́мже тя па́стыря Христо́с показа́,/ иде́же па́жить пре́жде избра́ Чи́стей Де́ве.

И́же мона́хом был еси́ наста́вник/ и па́стырь овца́м, пасо́мым на па́жити Бо́жия Ма́тере,/ сего́ ра́ди Бог сугу́бу ра́дость подае́т ти, Феодо́сие,/ моли́твами Чи́стыя Богома́тере.

Богоро́дичен: Обре́т Тя свяще́нный дом, Живы́й на Небесе́х во́лею в Твою́ утро́бу всели́ся./ Тем благода́рными гла́сы пое́м пречи́стое Твое́ рождество́ при́сно,/ в дому́ Твое́м стоя́ще.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Моли́твами, и бде́нием, и псало́мскими пе́нии непреста́нно/ твою́ ду́шу рай Боже́ственный сотвори́л еси́,/ живоно́сное возрасти́в дре́во честно́е я́ве, Спа́са и Го́спода.

Изволи́л еси́ та́йное смире́ние, Влады́чне нищете́ подо́бяся, блаже́нне:/ во́лею твое́ю путь ше́ствуя,/ повеле́нием лени́ваго раба́ везти́ воз к Боже́ственному ме́сту прия́л еси́,/ иде́же покланя́емь от срета́ющих позна́лся еси́.

Подо́бяся но́ги Умы́вшему Свои́м ученико́м, Богому́дре,/ во́ду че́рпати и на ра́му носи́ти изво́лил еси́/ и древа́ свои́ма рука́ми принося́ и сеча́/ нача́льника трудо́в себе́ мона́хом показа́л еси́.

Богоро́дичен: Умерщвле́н бысть, Богоро́дице, Тобо́ю многоко́зненный враг,/ всю тварь пре́жде тле́ю погуби́вый,/ ме́ртвии же Тобо́ю к жи́зни взыдо́хом,/ и́бо родила́ еси́ вои́стинну жизнь всех, Го́спода.

Ин

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

И́стинную воздви́г це́рковь Бо́жия Ма́тере,/ в не́йже мно́жества мона́шествующих собра́л еси́ лик,/ любо́вию пою́щих честну́ю твою́ па́мять.

Прибега́ющим к кро́ву твоему́ с ве́рою,/ исто́чник исцеле́ний источа́еши всем,/ и святы́ню излива́еши, преподо́бне, и просвеща́еши сердца́,/ бесо́вския ле́сти прогоня́я.

Ко Христу́ Бо́гу воздви́гни твои́ ру́це, преподо́бне,/ и твое́ ста́до соблюди́, о́тче, е́же собра́л еси́ Ду́хом све́тло,/ моли́твами твои́ми пою́щих твою́ па́мять.

Богоро́дичен: Ра́дуйся, Препе́тая, препе́таго Бо́га всех поро́ждшая,/ пою́щия Тя прича́стники яви́ све́ту, Чи́стая,/ и огня́ ве́чнаго изба́ви.

Конда́к, глас 3.

Подо́бен: Де́ва днесь:

Звезду́ Русскую днесь почти́м,/ от восто́ка возсия́вшую и на за́пад прише́дшую,/ всю бо страну́ сию́ чудесы́ и добро́тою обогати́вшу и вся ны/ соде́янием и благода́тию мона́шескаго уста́ва,/ блаже́ннаго Феодо́сия.

И́кос:

Кто́ изрещи́ возмо́жет по́двиги твоя́, о́тче?/ Или́ кто́ изочте́т мно́жества трудо́в твои́х и чуде́с ди́вных?/ Еще́ бо в пло́ти сый, Безпло́тнаго ви́дел еси́,/ в пло́тяне о́бразе бесе́дующа к тебе́/ и дар принося́ща тебе́, Бо́гом по́сланное зла́то./ Па́че челове́ка ты яви́лся еси́ смире́нием и кро́тким нра́вом/ и духо́вныя му́дрости испо́лнен./ Тем, Ду́ха в себе́ прие́м, во све́те ви́ден был еси́, я́ко со́лнце, сия́я./ И мене́, тебе́ пою́ща, просвети́ сия́нием твои́м, преподо́бне,/ мона́шескаго уста́ва, Боже́ственный Феодо́сие.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

К моли́твам твои́м, блаже́нне, всяк прибега́я ве́рою, никогда́ постыди́тся:/ прие́м благода́ть проше́ния, о́тче, и возврати́вся, лику́ет, поя́:/ благослове́н Бог оте́ц на́ших.

Ты оте́ц яви́вся и засту́пник си́рым, и вдови́цам наде́жда,/ и боля́щим, о́тче, воста́ние всем был еси́./ Те́мже пое́м:/ благослове́н Бог оте́ц на́ших.

Удобре́ние мона́хом и путь спасе́ния челове́ком ты был еси́:/ обога́щ бо вся твои́ми глаго́лы Боже́ственных та́ин, учи́л еси́ глаго́лати:/ благослове́н Бог оте́ц на́ших.

Богоро́дичен: Из деви́ческия утро́бы вопло́щся, Христе́,/ яви́лся еси́ на спасе́ние на́ше./ Тем, Твою́ Ма́терь ве́дуще Богоро́дицу, благода́рственно пое́м:/ благослове́н Бог оте́ц на́ших.

Ин

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее веле́ние Бо́жие/ мучи́теля увеща́ вопи́ти:/ благослове́н еси́, Бо́же оте́ц на́ших.

Я́же ду́хом осени́вшая тя Бо́жия благода́ть возрасте́ в тебе́,/ просвеща́ющи, о́тче, твое́ се́рдце, е́юже учи́л еси́ воспева́ти:/ благослове́н Бог оте́ц на́ших.

Извеще́ния глаго́л твои́х изыдо́ша во вся страны́ смотре́ния та́ин при́сно пою́щим:/ благослове́н Бог оте́ц на́ших.

Многоразли́чна благода́ть Ду́ха на тебе́, о́тче, почи́/ и пресла́вная чудеса́ показа́ пою́щим:/ благослове́н Бог оте́ц на́ших.

Богоро́дичен: Под кров Твой, Влады́чице, прибега́юще, избавля́емся от лют,/ наде́жду бо иму́ще, ве́рнии вси, мо́лим:/ Твоя́ рабы́ не пре́зри, Богоро́дице Де́во.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Я́коже проро́к Боже́ственный, прови́дя, Феодо́сие, явля́ешися, преблаже́нне,/ и́бо повелева́еши ду́хом прине́сшему к тебе́ Ева́нгельское писа́ние изнести́,/ и вопия́ше ти, испове́дал чи́стым смы́слом же́ртву Пречи́стой Богоро́дице.

К твоему́ жили́щу прири́ща, я́ко еле́нь ко исто́чнику,/ приснотеку́щия нетле́нныя пи́щи получи́ти благочести́вый князь,/ и́же зе́млю сию́ содержа́л./ Хотя́ у́бо свечеря́ти ему́, блаже́нне, но скуде́нием строи́телю вопию́щу,/ повеле́нием же твои́м напо́лнися ме́да весь сосу́д твой.

Твоя́ по́двиги воспе́ша А́нгельския си́лы, Феодо́сие и твое́ житие́ лик преподо́бных похвали́, све́тлое и украше́нное мона́хов ра́дование./ Тем и ны́не, сра́дуяся Ему́, весели́шися, поя́ согла́сно:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Богоро́дичен: Тя, Пречи́стая Богоро́дице, жи́зни мое́й предлага́ю Храни́тельницу и Засту́пницу непобеди́му,/ Помо́щница ми бу́ди от бед и скорбе́й,/ избавля́ющи Твоего́ недосто́йнаго раба́, любо́вию пою́ща:/ о́троцы, благослови́те,/ свяще́нницы, воспо́йте,/ лю́дие, превозноси́те Чи́стую во ве́ки.

Ин

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Христа́ воспева́ет лик твои́х учени́к,/ с наста́вником о́крест стоя́ ра́ки твоея́,/ прие́мший твоя́ труды́, досто́йныя Бо́гу,/ Его́же превозно́сим во ве́ки.

Ра́дуяся, после́довал еси́ распя́тому Христу́ Бо́гу,/ мно́гими труды́ и боле́зньми те́ло умертви́в,/ ве́ру и́стинную и любо́вь стяжа́л еси́,/ ми́ра отве́ргся и Христа́ еди́наго возлюби́в.

Источа́ет здра́вие Боже́ственною си́лою ра́ка моще́й твои́х, о́тче Феодо́сие,/ и стра́сти душе́вныя и плотски́я исцеля́ет,/ тем воспева́ем досто́йно па́мять твою́.

Богоро́дичен: Гаврии́лов Ти глас ны́не восклица́ем: ра́дуйся, Преблагослове́нная Влады́чице Богоблагода́тная,/ Ея́же ра́ди кля́твы дре́вния избы́хом,/ Ты бо Хода́таица всех спасе́ния.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Па́мять твоя́ днесь нам, я́ко со́лнце, возсия́, преподо́бне:/ ра́дуемся, целу́юще ра́ку твою́, и, о́крест обстоя́ще, я́ко Боже́ственный киво́т,/ ве́рно пое́м твое́ успе́ние с Вы́шними чи́нми, Феодо́сие.

Ра́дуйся, земле́ Ро́сская, прие́мши сокро́вище некра́домо от Го́спода,/ помо́щника вели́ка Богоблаже́ннаго и засту́пника те́пла Феодо́сия,/ и с ли́ком по́стническим весели́ся и ты, нача́ло гра́де Ро́сский.

Собра́ся торжество́ ны́не в па́мяти твое́й воспева́ти Го́спода,/ тебе́ пода́вша до́брыя по́двиги, я́же ты претерпе́л еси́./ Те́мже моли́ся Ему́, свя́те, изба́витися ста́ду твоему́ от собла́зн вра́жиих,/ е́же ты стяжа́л еси́, му́дре, моли́твами твои́ми.

Спаси́ мя, еди́не Изба́вителю,/ блудни́цы и блу́днаго прие́мый те́плое покая́ние и мытаре́во, Спа́се, воздыха́ние,/ и бу́ди ми́лостив, Христе́, мне, блу́дному,/ моли́твами Твоего́ уго́дника, отгоня́я грехо́в мои́х мно́жество.

Богоро́дичен: Пощади́ мя, Спа́се рожде́йся, сохрани́в ро́ждшую Тя без тли по рождестве́,/ егда́ ся́деши суди́ти дела́ моя́, грехи́ моя́ презре́в и беззако́ния,/ Безгре́шен сый и Ми́лостив, я́ко Человеколю́бец.

Ин

Ирмо́с: Бо́га челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и/ Тя ублажа́ем.

О́тче, ве́рою ча́да, я́же совокупи́л еси́,/ доброде́тельми сия́ просвети́ти сподо́би, па́стырем досто́ин па́стырь;/ оставле́ние же грехо́в и жития́ исправле́ние,/ преподо́бне, дарова́ти нам моли́ся.

Ра́вно пожи́в со святы́ми отцы́, Пречи́стыя Де́вы слуга́ был еси́, блаже́нне,/ и па́стырь мона́хов изря́ден, я́ко вои́стинну столп правове́рия,/ ве́рных наде́жда и упова́ние пою́щих в дому́ Бо́жия Ма́тере.

Освяща́емь си́лою Вседержи́телевою, ко́зни вра́жия победи́л еси́/ и сих полки́ прогна́л еси́, боля́щим здра́вие по́дал еси́,/ тем, веселя́щеся, при́сно чтим твою́ па́мять.

Богоро́дичен: Возсия́вшаго от Отца́ без ма́тере,/ неизрече́нно заче́нши, родила́ еси́, Богома́ти препе́тая, Де́во Чи́стая./ Моли́, Пресвята́я, за рабы́ Твоя́ Сы́на Твоего́ и Бо́га на́шего.

Свети́лен.

Подо́бен: Жены́, услы́шите:

Свет Единосу́щныя Тро́ицы восприи́м в се́рдце твое́м, Феодо́сие,/ отце́м о́тче, благочести́выя просвети́л еси́,/ в пеще́ре укре́плься с вели́ким Анто́нием, А́нгелом единокро́вне./ С ни́миже помина́й тебе́ ве́рою воспева́ющих.

Сла́ва, и ны́не, пра́здника.

На хвали́тех стихи́ры, на 4, глас 2.

Подо́бен: Егда́ от Дре́ва:

Ве́рою и любо́вию Христо́вою весь уязви́вся, блаже́нне,/ Ему́же после́дуя, ми́ра отве́рглся еси́,/ оте́чества же и ро́да,/ ко Анто́нию прите́к преподо́бному,/ у него́же научи́лся еси́ неизрече́нным,/ е́же у́хо не слы́ша,/ в твое́ же се́рдце вни́де./ С ни́мже тя свяще́нно воспева́ем, чту́ще, Феодо́сие.

Жизнь безскве́рную вожделе́в,/ терпе́ние же, и любо́вь, и смире́ние,/ стоя́ние всено́щное и воздержа́ние,/ и́миже умертви́л еси́ плотски́я по́хоти./ Тем, получе́ние боже́ственно восприе́м,/ сра́дуешися лико́м преподо́бных./ Не забыва́й, блаже́нне, прося́ грехо́в оставле́ния/ тя досто́йно воспева́ющим.

Егда́ злонача́льный враг/ разбо́йники наведе́ на ста́до твое́, преподо́бне,/ погуби́ти хотя́ су́щия в нем,/ но, ви́девше це́рковь, выспрь ви́сящу, отхожда́ху,/ боя́щеся да́нныя тебе́ благода́ти от Бо́га, преподо́бне,/ слы́шаша бо глас в це́ркви пе́ния А́нгельскаго неизрече́ннаго./ С ни́ми же и ны́не веселя́ся, помина́й нас,/ ве́рою пою́щих твою́ светоно́сную и честну́ю па́мять.

Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ без поро́ка поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

И ны́не, пра́здника. Славосло́вие вели́кое. И отпу́ст.

НА ЛИТУРГИ́И

Блаже́нны свята́го, пе́сни 3-я и 6-я, от обою́ кано́нов. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол ко Евре́ем, зача́ло 334. Аллилу́ия, глас 2: Свяще́нницы Твоя́ облеку́тся в пра́вду,/ и преподо́бнии Твоя́ возра́дуются. Ева́нгелие от Ма́тфея, зача́ло 43. Прича́стен: В па́мять ве́чную бу́дет пра́ведник:

Моли́тва

О свяще́нная главо́, А́нгеле земны́й и челове́че Небе́сный, преподо́бне и Богоно́сне о́тче наш Феодо́сие, изря́дный слуго́ Пресвяты́я Богоро́дицы, во имя́ Ея́ свято́е оби́тель пречу́дну на гора́х Пече́рских сооруди́вши и в ней чуде́с мно́жеством просия́вый! Мо́лим тя со усе́рдием мно́гим: моли́ся за нас ко Го́споду Бо́гу и испроси́ нам от Него́ вели́кия и бога́тыя ми́лости: ве́ру пра́ву, наде́жду спасе́ния несомне́нну, любо́вь ко всем нелицеме́рну, благоче́стие непоколеби́мое, душ и теле́с здра́вие, жите́йских потре́б дово́льство, и да не во зло обрати́м блага́я, да́руемая нам от щедрода́тельныя Его́ десни́цы, но в сла́ву И́мене Его́ свята́го и во спасе́ние на́ше. Сохрани́, уго́дниче Бо́жий, предста́тельством твои́м святы́м страну́ на́шу, Це́рковь Православнорусскую, град твой и Ла́вру твою́ невреди́мыми от вся́каго зла, и вся лю́ди, притека́ющия на поклоне́ние к честно́му твоему́ гро́бу и пребыва́ющия во святе́й оби́тели твое́й, осени́ Небе́сным твои́м благослове́нием и от вся́ких зол и бед ми́лостивно изба́ви. Наипа́че же в час кончи́ны на́шея покажи́ нам многомо́щное твое́ покрови́тельство: да изба́вимся моли́твами твои́ми ко Го́споду вла́сти лю́таго мироде́ржца и сподо́бимся насле́дити Ца́рство Небе́сное. Яви́ нам, о́тче, благосе́рдие твое́ и не оста́ви нас, си́рых и безпомо́щных, да вы́ну славосло́вим ди́внаго во святы́х Свои́х Бо́га, Отца́, и Сы́на, и Свята́го Ду́ха, и твое́ свято́е заступле́ние, во ве́ки веко́в. Ами́нь.

Стихи́ры святы́х му́чеников, глас 4.

Подо́бен: Я́ко до́бля.

До́блия в му́ченицех,/ кре́пко пострада́вшия,/ и борца́ умори́вшия,/ и Христа́ возлюби́вшия,/ и мир возненави́девшия,/ Сио́на мы́сленнаго досто́йныя жи́тели,/ Ма́вру днесь и Тимофе́я,/ ве́рою соше́дшеся, восхва́лим согла́сно,/ мучениколю́бцы вси.

Вяза́ния теле́сная, оче́с же избоде́ние,/ проверте́ние уше́с, коле́сное озлобле́ние,/ ка́мене тя́жкаго обе́шение подъя́л еси́, Тимофе́е,/ низло́ж врага́ и к Боже́ственней сла́ве возноси́м, сла́вне./ Сего́ ра́ди тя, ве́рою соше́дшеся, моле́бно восхваля́ем,/ сла́ва му́чеников и похвала́.

Светолу́чными сия́ньми врага́ омрачи́ла еси́,/ чи́сто пострада́вши, Ма́вро сла́вная:/ коно́бная бо вре́ния, пе́рстов отъя́тие,/ све́щное жже́ние, вре́менное пропя́тие претерпе́ла еси́/ и прешла́ еси́ к Боже́ственному поко́ю,/ иде́же лик му́ченик всегда́ весели́тся.

Сла́ва, и ны́не, пра́здника.

Тропа́рь, глас 4:

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего,/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

Кано́н, его́же краегране́сие: Тимофе́я и Ма́вры боле́зни честву́ю. Творе́ние Ио́сифово, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь/ пои́м, вопия́ше.

Свяще́нных страда́лец свяще́нное и честно́е торжество́,/ лю́дие свяще́ннии, свяще́нно почти́м,/ я́ко да тех мольба́ми от бед изба́вимся.

Священнопобе́дныя венцы́ от Христа́ прия́ти/ тща́щеся умре́ти па́че, не́же жи́ти, до́блии му́ченицы, я́ве изво́ливше,/ тем сла́ву получи́ша.

Не убоя́вшеся боле́зней плотски́х, ни мук устраши́вшеся,/ ни огня́ гони́телей, страстоте́рпцы му́ченицы/ Христа́ на суди́щи му́жески пропове́даете.

Богоро́дичен: Пресу́щное Сло́во, существо́ прие́м от чи́стых крове́й Твои́х,/ богосоде́ла нас и тле́ния изба́ви, Чи́стая,/ сего́ ра́ди, ве́рнии, Тя всегда́ сла́вим.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Бо́жия кни́ги лю́дем свяще́нно отверза́я/ и просвеща́я сердца́, во́ине Христо́в Тимофе́е,/ в честно́е муче́ние, ра́дуяся, вшел еси́.

Боже́ственным жела́нием ду́шу распали́в, му́чениче,/ ко огню́ мук приступи́л еси́ терпели́вно,/ те́мже тя Христо́ва Боже́ственная роса́, блаже́нне, прохлади́.

Ум твой, воззре́нием к Бо́гу просвеща́емь, му́чениче,/ не чу́яше отню́д желе́з лю́тых прикоснове́ния, разжже́нных быва́ющих,/ сла́вне Тимофе́е.

Богоро́дичен: Сый естество́м безстра́стен/ Сын Твой, Де́во, прия́т плоть от крове́й Твои́х чи́стых/ и стра́стию кре́стною от страсте́й мя, Чи́стая, изба́ви.

Конда́к, глас 4.

Подо́бен: Вознесы́йся:

Многообра́зныя я́звы претерпе́вше/ и венцы́ от Бо́га прие́мше,/ о нас моли́теся ко Го́споду,/ па́мять всесвяще́нную ва́шу соверша́ющих,/ превели́кий Тимофе́е и пресла́вная Ма́вро,/ е́же умири́ти град и лю́ди,/ Той бо есть ве́рных утвержде́ние.

Седа́лен, глас 1.

Подо́бен: Гроб Твой:

Поче́тше Бо́га, омрачи́ша пре́лесть Тимофе́й му́дрый и сла́вная Ма́вра/ и, вся́ко претерпе́вше, прехва́льнии, му́чение,/ просвети́шася па́че луч со́лнечных/ и бы́ша сослужи́тели А́нгелом,/ и́хже ве́рою сла́вим.

Сла́ва, и ны́не, пра́здника.

Песнь 4

Ирмо́с: Христо́с моя́ си́ла,/ Бог и Госпо́дь,/ Честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Вели́каго благосла́вия возжеле́вше, сподо́бистеся сего́,/ ча́да Све́та Боже́ственнаго бы́вше,/ великому́ченицы Христо́вы, А́нгелом равностоя́тели.

Святы́х чино́м сочета́вся и благопослушли́ве у́ши к Боже́ственным зако́ном име́я, сла́вне,/ проверте́ния кре́пко претерпе́л еси́, Тимофе́е.

Воздви́гше тя на дре́во, суему́дреннии/ отягчава́ют ка́мением главу́, сла́вне Тимофе́е,/ но укрепля́ше тя Христо́с, Боже́ственною стра́стию украша́ема.

Теку́щих непостоя́ннаго, блаже́ннии, возгнуша́стеся вои́стинну тече́ния/ и са́ми себе́ боле́знем отда́сте,/ сего́ ра́ди я́же от ве́ка блага́я восприя́сте.

Богоро́дичен: Чистоты́ селе́ние, жили́ще Влады́ки всех/ и проро́ков всех сбытие́, Богора́дованная Чи́стая,/ пою́щия Тя уще́дри.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Супру́жника своего́, Ма́вро, светови́дных слове́с послу́ша любе́зно/ и, омраче́ние зло́е отве́ргши, свет была́ еси́ муче́нием, Богоблаже́нная.

Боже́ственным Ду́хом себе́, Ма́вро, вооружи́вши, честна́я,/ к боре́нию льсти́ваго, ра́дуяся, изошла́ еси́/ и, сего́ побе́ждши, побе́дныя венцы́, му́ченице, прия́ла еси́.

Еди́наго Тя, Го́спода Иису́са, испове́давши честна́я,/ руко́ю челове́ка созда́вшаго,/ посека́ется перст ручны́х,/ непра́ведное томле́ние му́жески терпя́щи.

Богоро́дичен: Бу́рю помышле́ний, воста́ния страсте́й,/ напа́стей волне́ние утиши́, Де́во Богора́дованная,/ и спаси́ мя, пою́ща вели́чия Твоя́.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Святи́и му́ченицы, я́дрилом Креста́ духо́вно окриля́еми,/ напа́стей пучи́ну без вре́да ве́рою претеко́сте/ и в Боже́ственных приста́нищах почи́ша.

Разже́гше коно́б, в той тя, Христа́ испове́дающу, вверго́ша злочести́вии,/ но пребыла́ еси́ неврежде́на,/ росо́ю Ду́ха обре́тше тя, Ма́вро, прохлажде́ну.

Связа́еми му́ченицы вся вяза́ния вра́жия му́жески разреши́сте/ и любо́вию до конца́ Христу́ ду́ши привяза́сте/ пло́ти отложе́нием всеприснопа́мятнии.

Богоро́дичен: Всеблага́я Влады́чице, Я́же Преблага́го Бо́га пло́тию ро́ждши,/ озло́бленное страстьми́ мое́ се́рдце ублажи́,/ да ве́рою и любо́вию велича́ю Тя.

Конда́к и и́кос пра́здника.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее веле́ние Бо́жие/ мучи́теля увеща́ вопи́ти:/ благослове́н еси́, Бо́же оте́ц на́ших.

Не чу́яше, свеща́ми, пресла́вная, опаля́ема всю́ду,/ огнь в се́рдцы любве́ нося́щи Христо́в/ и Сему́ вопию́щи приле́жно:/ благослове́н еси́, Бо́же оте́ц на́ших.

Дрема́ние от о́чию отри́нул зло́бное, о Тимофе́е,/ претерпе́л еси́ о́чию ослепле́ние, Христа́ серде́чныма очи́ма зря и поя́:/ благослове́н еси́, Бо́же оте́ц на́ших.

До́льняя презре́вше, Боже́ственнии му́ченицы, Вы́шнее же жили́ще насле́доваша,/ свяще́нными да почту́тся пе́сньми, пою́ще непреста́нно с ни́ми:/ благослове́н еси́, Бо́же оте́ц на́ших.

Богоро́дичен: Препе́тая Де́во, препе́таго Бо́га поро́ждшая,/ пою́щия Тя прича́стники покажи́ све́та/ и избави́ гее́нны, и огня́,/ и вся́каго вре́да вра́жия моли́твами Твои́ми.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Соблюда́юще зако́ны Вседержи́теля, беззако́ннующих держа́ве не приклони́стеся,/ че́сти лука́вым де́моном не принесо́сте, му́ченицы до́блии,/ Госпо́дни насле́дницы.

Сопряже́нием изря́дным я́ве совокупля́еми,/ и́го Госпо́дне ле́гкое взя́сте ку́пно на вы́ю му́ченицы/ и му́ченическим сопричто́стеся стадо́м.

На дре́ве пострада́вше кре́стнем, прехва́льнии на мно́ги дни,/ изобрази́сте страсть честну́ю нас ра́ди пострада́вшаго во́лею,/ Его́же превозно́сим во вся ве́ки.

Ну́жднейшую вои́стинну смерть, святи́и, просте́ртием боле́зни претерпе́сте,/ те́мже к неболе́зненней жи́зни преста́вистеся,/ воспева́юще Христа́ во вся ве́ки.

Богоро́дичен: Украси́лася еси́, Де́во, поро́ждши прекра́снаго добро́тою Христа́ Го́спода,/ Боже́ственными ве́рныя заря́ми просвеща́ющаго,/ Его́же превозно́сим во вся ве́ки.

Песнь 9

Ирмо́с: Бо́га челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и/ Тя ублажа́ем.

Ви́дети сла́ву сподо́бистеся Себе́ излия́вшаго за милосе́рдие, прехва́льнии,/ Того́ бо зако́ны сохрани́сте и о́бщницы Сего́ страсте́й бы́сте./ Те́мже, соше́дшеся, благоче́стно вас почита́ем.

Часо́м равночи́сленну ме́ру сотвори́сте, му́дрии,/ но́щи и дни пригвожде́ни е́же за милосе́рдие ко Кресту́ прибли́жшагося,/ Его́же испове́дающе, все́ми влады́чествующаго, в ру́це Сего́ ва́ша ду́хи преда́сте.

Во́инство А́нгел, лик блаже́нный проро́к,/ апо́стол, му́ченик и преподо́бных во исхо́д ваш собра́шася,/ всех же Влады́ка венцы́ увязе́, му́ченицы, вас побе́дными, я́ко Преблаги́й.

Нам, любо́вию вас почита́ющим и честно́е ва́ше соверша́ющим торжество́,/ страда́льцы Христо́вы до́блии,/ разреше́ние грехо́в, жития́ исправле́ние/ и всех лю́тых премене́ние, му́дрии, испроси́те.

Богоро́дичен: Све́том Твои́м мя, Богора́дованная, в жена́х Де́во, просвети́, молю́ся,/ и огня́ ве́чнаго мя изба́ви,/ я́ко да велича́ю Тя, я́ко да сла́влю Тя,/ я́ко да по до́лгу воспою́ вели́чия Твоя́.