НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: О, ди́вное чу́до:

О, ди́вное чу́до:/ Пречи́стый лик Богома́тере самопису́ется,/ и у́жаса исполня́ются Ея́ повеле́нием/ муси́ю кладу́щии гре́честии иконопи́сцы/ в небеси́ подо́бней це́ркви Пече́рстей/ и тре́петно взыва́ют к Первообра́зней:/ Чи́стая, ра́дуйся, нас не оставля́ющая,/ Госпо́дь с Тобо́ю.

Непости́жно явле́ние ико́ны Богоро́дицы/ на стене́ Пече́рския це́ркве/ и ди́вно сия́ние, со́лнца светле́йшее, исходя́щее от нея́,/ превосхо́дит же ум земноро́дный/ и ужаса́ет явле́ние Ду́ха Всепречи́стаго/ из о́браза чуде́снаго, я́ко го́лубя,/ подаю́щаго нам собо́ю ве́лию ми́лость.

Пресла́вное ны́не чу́до,/ ди́вно явле́ние све́тлаго о́браза Пречи́стыя Богоро́дицы/ с Предве́чным Младе́нцем ви́дяще,/ иконопи́сцы гре́честии вку́пе с преподо́бным Али́пием/ от души́ сла́вляху Ю,/ с ни́ми же и мы недосто́йными усты́/ от се́рдца вопие́м Обра́дованней:/ ра́дуйся, Цари́це, нас не оставля́ющая.

Сла́ва, глас 5:

Кто не удиви́тся и не просла́вит/ Засту́пницу ро́да на́шего,/ чуде́сно явля́ющую е́же о нас промышле́ние/ в сия́ющем ли́ке Свое́м,/ незри́мо изображе́нном/ в благода́ти испо́лненной це́ркви Пече́рстей,/ е́же ви́дяще и благогове́йно воспомина́юще,/ благода́рно вси воззове́м Обра́дованней:/ ра́дуйся, на́ша и́стинная Ма́ти,/ Пече́рская похвало́.

И ны́не, пра́здника.

Вход. Проки́мен дне. И чте́ния.

Бытия́ чте́ние (глава 28):

Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий,/ и сия́ врата́ Небе́сная.

Проро́чества Иезекии́лева чте́ние (главы 43 и 44):

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х,/ су́щих к се́веру, пря́мо хра́му, и ви́дех,/ и се испо́лнь сла́вы храм Госпо́день.

При́тчей чте́ние (глава 9):

Прему́дрость созда́ Себе́ дом/ и утверди́ столпо́в седмь./ Закла́ своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне,/ и тре́бующим ума́ рече́:/ прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживе́те,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному, и приложи́т приима́ти./ Нача́ло прему́дрости – страх Госпо́день,/ и сове́т святы́х – ра́зум:/ разуме́ти бо зако́н, по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.

На лити́и стихи́ры, глас 3:

Прииди́те, любопра́зднственнии собо́ри,/ воспои́м неусыпа́ющую в моли́твах Богоро́дицу/ и, с серде́чною ве́рою Ея́ о́бразу кла́няющеся,/ потщи́мся подража́ти Ей в милосе́рдии и кро́тости,/ да обря́щем Ея́ заступле́нием/ ми́лость у Христа́ Бо́га на́шего.

Прииди́те, богокра́сный ли́че Пече́рских отце́в/ и убо́зии подража́тели их,/ воспо́йте Ма́терь Бо́га на́шего/ и всемо́щную Храни́тельницу оби́тели сея́,/ из глубины́ души́ прося́ще пред чуде́сным Ея́ о́бразом/ ми́ра и спасе́ния душа́м на́шим.

Прииди́те, вси, ве́дущии Бо́га,/ к Небе́сней Цари́це и Ма́тери всех,/ прославля́юще Ея́ снизхожде́ние к ро́ду на́шему,/ и в избра́нном уде́ле Пече́рстем источи́те сле́зы души́ своея́/ пред незри́мо Су́щей зде,/ умиле́нием и любо́вию зову́ще к Ней:/ ра́дуйся, Обра́дованная,/ ве́рных Свои́х рабо́в не оставля́ющая.

Сла́ва, и ны́не, пра́здника.

На стихо́вне стихи́ры, глас 2.

Подо́бен: До́ме Евфра́фов:

Пречи́стый дом/ и пресла́вный жре́бий/ Бо́жия Ма́тере/ све́тло торжеству́ет/ явле́ние в нем Богоро́дицы.

Стих: Слы́ши, Дщи, и виждь,/ и приклони́ ухо Твое́.

Ра́дуется лик/ преподо́бных Пече́рских/ и со А́нгелы сла́вит/ безме́рную ми́лость/ Присноде́вы.

Стих: Кля́тся Госпо́дь Дави́ду и́стиною/ и не отве́ржется ея́.

С ве́рою и любо́вию/ взира́юще на Пече́рский о́браз/ Бо́жия Ма́тере,/ ра́достно да воспои́м/ Первообра́зную.

Сла́ва, глас 6:

Я́ко ве́рнии сы́ны Небе́сныя Ма́тере,/ усе́рдно ны́не теце́м к Ея́ благода́тному о́бразу/ и, уми́льно взыва́юще благода́рственная,/ обря́щем Небе́сную благода́ть душа́м на́шим.

И ны́не, пра́здника.

Тропа́рь, глас 4:

Днесь све́тло торжеству́ет Пече́рская оби́тель/ и ра́дуется явле́нием о́браза Богома́тере/ безме́рный лик Пече́рских отце́в,/ с ни́миже и мы непреста́нно вопие́м:/ ра́дуйся, Благода́тная, Пече́рская похвало́.

НА У́ТРЕНИ

По 1-м стихосло́вии седа́лен, глас 4.

Подо́бен: Воззре́вши на гро́бе:

Воззре́вше на пресла́вный лик Богома́тери,/ чуде́сно явле́нный в це́ркви Пече́рстей,/ богоизбра́ннии иконопи́сцы удиви́шася снизхожде́нию Присноде́вы/ и, зря́ще Ду́ха Свята́го, я́ко го́лубя, исходя́ща от о́браза,/ сла́вляху Го́спода и Творца́ вся́ческих,/ кла́няющеся Обра́дованней Де́ве и Ма́тери на́шей.

По 2-м стихосло́вии седа́лен, глас 4.

Подо́бен: Удиви́ся Ио́сиф:

Удиви́ся Али́пий преподо́бный, наста́вник наш,/ ви́дя незри́мо изображе́нную ико́ну Пречи́стыя и Вседи́вныя Ма́тере Спа́совой/ на стене́ це́ркве Пече́рския,/ и в себе́ помышля́ше недоуме́нно:/ что сие́ стра́нное та́инство,/ я́ко Присносу́щная в хра́ме Вседе́ва посеща́ет его́ ви́димо, благода́тию сия́ющи?

По полиеле́и седа́лен, глас 8.

Подо́бен: Повеле́нное та́йно:

Да ликовству́ет Пече́рская Ла́вра,/ прославля́ющи пресла́вное чу́до явле́ния Пречи́стаго ли́ка Богоро́дицы/ в небеси́ подо́бней и благода́тней Ея́ це́ркви,/ да игра́ет лик а́нгельский, зря неизрече́нную ми́лость к нам Присноде́вы,/ Е́йже благода́рно пое́м:/ ра́дуйся, чу́до Пече́рское.

По 50-м псалме́ стихи́ра, глас 6:

Прииди́те, ве́рнии,/ любо́вию облобыза́ем чуде́сный о́браз Богома́тере,/ я́вно явля́ющий пред все́ми держа́вный покро́в Ея́ над на́ми,/ в него́же прибега́юще, преклоня́ем коле́на се́рдца на́шего и ве́рно зове́м:/ сохрани́ и спаси́, Богоро́дице, всех притека́ющих к Тебе́/ и чу́дному о́бразу Твоему́ кла́няющихся.

Кано́н Богоро́дице ра́ди ико́ны Ея́, имену́емыя Пече́рская-Нерукотворе́нная. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Сло́во ми даждь, Пречи́стая,/ да ве́рою и любо́вию воспою́/ е́же к нам Твое́ безме́рное снизхожде́ние.

Покро́в Твой, Богороди́тельнице, ви́дяще над на́ми/ в явле́нии чу́днаго о́браза Твоего́,/ благода́рственная от души́ воспева́ем.

А́нгельстии ли́цы удиви́шася,/ зря́ще Твое́ промышле́ние, е́же о нас,/ и с тре́петом окружи́ша Твой Пречи́стый лик.

Си́лою Бо́жиею украша́ющий Твой храм, Богоро́дице,/ иконопи́сцы вку́пе с Али́пием преподо́бным/ со мно́гою хвало́ю воспе́ша Тя, чу́дно им я́вльшуюся.

Из уст Твои́х, Пречи́стая,/ явля́я благода́тное освяще́ние це́ркви Пече́рской, излете́ го́лубь,/ я́ко о́браз Ду́ха Свята́го, все́льшагося зде.

Ин кано́н Богоро́дице ра́ди ико́ны Ея́, имену́емыя Све́нская-Пече́рская. Глас 8.

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Помо́щница и Покрови́тельница еси́ оби́тели Пече́рския, Де́во Чи́стая,/ помози́ нам вы́ну просла́вити Тя/ и разреше́ние прегреше́ний пода́ждь, мо́лимся, Всенепоро́чная.

Владе́тель земли́ Черни́говския Рома́н зре́ния лиши́ся/ и, уве́дев о чудесе́х, от ико́ны Твоея́ Пече́рския бы́вших,/ приле́жно моля́шеся Тебе́.

Архимандри́т Пече́рский, вне́мля проше́нию боголюби́ваго Рома́на,/ совеща́шеся с бра́тиею/ и отпусти́ святу́ю Твою́ ико́ну со иере́ем в ладии́ по Десне́ реце́.

А́нгельское пе́ние подоба́ше приноси́ти Тебе́, Ма́тери Бо́жией,/ Тво́рца бо всех родила́ еси́ стра́нно,/ но и от нас приими́, Влады́чице, смире́нныя сия́ похвалы́.

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Просвети́ся весь о́браз Твой, Богоро́дице,/ и, све́том Небе́сным осиява́еми,/ иконопи́сцы падо́ша ниц, ужаса́ющеся.

Ра́достию одержи́м бе/ явле́нием Ду́ха Свята́го в виде́нии голуби́не преподо́бный Али́пий,/ с ве́рою и любо́вию зря́ще Тя, Богома́ти.

Егда́ узре́ша го́лубя, восходя́ща из уст Богома́тере ко о́бразу Спа́сову,/ ви́девший его́ хотя́ху поима́ти, но не можа́ху.

Чист и бел, а́ки снег, го́лубь,/ бя́ше во о́браз Всесвята́го и Пречи́стаго Ду́ха Бо́жия,/ лета́ше по це́ркви, на ли́ки святы́х возседа́я.

Излета́ше многокра́тно сей го́лубь из уст Богома́тере к лико́м Спа́сову и святы́х,/ облета́я всю це́рковь,/ показу́я многосугу́бую благода́ть Ду́ха Свята́го,/ в хра́ме Пече́рском пребыва́ющую.

Ин

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

Утверди́ сердца́ на́ша во упова́нии на Тя, Пречи́стая Госпоже́,/ я́ко утверди́ша ве́ру Рома́на, раба́ Твоего́, да вопие́м:/ несть свят, я́ко Госпо́дь, и несть пра́веден, я́ко Бог наш.

У́тру бы́вшу, ико́ны Твое́й не обре́теся в ладии́,/ и, обре́тше ю на дре́ве, вверху́ бре́га, ра́довашеся.

О сем ди́вном Твое́м смотре́нии возвести́ша боголюби́вому Рома́ну,/ и сей, ра́дости и умиле́ния испо́лненный,/ от глубины́ серде́чныя со слеза́ми моля́шеся Тебе́,/ те́мже и на́ша во умиле́нии приноси́мыя похвалы́ и проше́ния не пре́зри.

О Пречу́дная Влады́чице Богоро́дице, Ма́ти Христа́ Бо́га на́шего, –/ рече́ слепы́й владе́тель, –/ да́руй ми прозре́ти,/ да ви́жу свет и лицезре́ю чу́дный о́браз Твой.

Седа́лен, глас 4:

Егда́ яви́ся о́браз Твой, Пречи́стая, в це́ркви Пече́рстей,/ тогда́ воспе́ша Ти вси, ви́девшии чу́до сие́,/ с ни́ми же и мы, ве́дуще в явле́нии сем сугу́бую благода́ть в оби́тели на́шей,/ ра́достно взыва́ем Ти и любо́вию чтим лик Пречи́стый Твой, Богообра́дованная,/ при́сно нас снабдева́ющая любо́вию Свое́ю.

Сла́ва, и ны́не:

Све́тлое днесь Госпожи́ на́шея Пресвяты́я наста́ торжество́,/ весели́ся, пречу́дный Али́пие со и́ноки Пече́рстими,/ да ликовству́ют вси боголюби́вии собо́ри:/ созыва́ет бо нас Пресвята́я Богоро́дица просла́вити чу́дную Свою́ ико́ну,/ луча́ми ми́лости не то́кмо оби́тель Пече́рскую,/ но и зе́млю Бря́нскую просвеща́ющую,/ те́мже, ра́дующеся, вси вопие́м:/ спаси́ ны, Де́во Чи́стая.

Песнь 4

Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Сия́ние о́браза Твоего́, Богома́ти,/ просвети́ всю це́рковь/ и ослепи́ у́жасом испо́лненный иконописа́телей лик.

То́нко и непостижи́мо бысть сие́ сия́ние,/ я́ко снизше́ствие Ду́ха Преве́чнаго,/ небеса́м отве́рстым в небеси́ подо́бную це́рковь.

Али́пий бо преподо́бный та́ко и разуме́ сие́ явле́ние,/ а́ки о́браз благода́ти Ду́ха Свята́го в це́ркви Пече́рстей.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Боголюби́вый Рома́н, я́коже иногда́ Закхе́й,/ ра́дости испо́лнь, вопия́ше Тебе́, Пречи́стая;/ ели́ка и до́ле узрю́ с ме́ста сего́ на все четы́ре страны́,/ толи́ко прида́м к до́му Твоему́ и сози́жду храм и оби́тель,/ иде́же Ты возлюби́ла ме́сто сие́.

Егда́ прибли́жися к дре́ву, иде́же бе ико́на Твоя́,/ па́ки сей раб Твой вопия́ше Тебе́:/ Пресвята́я Влады́чице, услы́ши глас моли́твы моея́/ и да́руй свет оча́м мои́м.

Услы́шавши сие́ приле́жное моле́ние раба́ Твоего́, Пречи́стая Влады́чице,/ а́бие испо́лнила еси́ проше́ние его́;/ та́ко внемли́ мольба́м и нас, смире́нных и недосто́йных.

Зря́ше сие́ ди́вное зна́мение ми́лости Твоея́,/ архиере́й земли́ тоя́, и́ноцы и вси лю́дие ра́дости испо́лнишася/ и восхвали́ша Тя.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Я́ве узре́ша в сем чу́де непостижи́мую ми́лость Богома́тере,/ вси, су́щии в це́ркви, просла́виша Го́спода,/ такову́ю благода́ть нам дарова́вшего.

Удивля́ет наш ум и разжига́ет се́рдце/ воспе́ти сие́ пресла́вное чу́до –/ явле́ние ли́ка Богома́тери в це́ркви Пече́рстей.

Безу́мный то́кмо не разуме́ет в сем безме́рную ми́лость Присноде́вы/ и благода́ть Бо́жию к уде́лу Пече́рскому Пречи́стыя.

Отсю́ду разуме́вше незри́мый покро́в Влады́чицы над сим благода́тным уде́лом,/ устна́ми и се́рдцем принесе́м хвалу́ Пречи́стей.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Виждь, Преблагослове́нная, от но́щи у́тренюющих чад па́ствы Твоея́,/ ны́не окружа́ющих честну́ю и достохва́льную ико́ну Твою́,/ велича́ющих безме́рную Твою́ ми́лость/ и прося́щих разреше́ние грехо́в и жития́ исправле́ние,/ не отри́ни нас от светоно́снаго ли́ка Твоего́.

Архиере́й земли́ Бря́нския,/ прие́м в ру́це свои́ от дре́ва чу́дную ико́ну Твою́,/ благогове́йно облобыза́ ю и моле́бныя пе́ния воспе́ Тебе́.

Сия́ честна́я ико́на Твоя́, от Пече́рския оби́тели принесе́нная/ и от руки́ преподо́бнаго Али́пия начерта́нная,/ благослове́ние святы́я Ла́вры – до́ма Твоего́, на зе́млю Бря́нскую излия́ша,/ и мы, сему́ ра́дующеся, благода́рственными словесы́ воспева́ем Тя.

Боголюби́вый князь Рома́н, благодаре́ния Тебе́, Всечи́стая, испо́лнь,/ храм во имя́ Успе́ния Твоего́ сооруди́/ и оби́тель и́ноческую учреди́,/ да непреста́нно славосло́вится вели́чие Твое́.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Горе́ вознесе́м сердца́/ и ве́рою и любо́вию притеце́м под всемо́щный покро́в Богоро́дицы,/ дела́ подража́ния Ей принося́ще.

А́нгельски воспева́я Обра́дованную,/ потщи́мся яви́ти хвалу́ Ей ве́рою, кро́тостию и милосе́рдием.

Госпо́дни ве́дуще за́поведи,/ просла́вим Пречи́стую Ма́терь Спа́сову,/ исполня́юще зако́н Христо́в.

Омыва́я грехи́ и беззако́ния жи́зни своея́ слеза́ми покая́ния,/ потщи́мся чи́стою душе́ю облобыза́ть Пече́рский о́браз Богома́тере.

Ин

Ирмо́с: Очисти́ мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Сла́ва ико́ны Твоея́, от оби́тели Пече́рския принесе́нная,/ озаря́ше не то́кмо зе́млю Бря́нскую,/ но и до гра́да Москвы́ достиго́ше,/ сего́ ра́ди вопие́м Ти:/ ра́дуйся, всея́ зе́мли на́шея похвало́.

Три ле́та ико́на Твоя́, Влады́чице, пребыва́ше во гра́де Москве́/ и а́бие со сла́вою принесе́на бысть во оби́тель Све́нскую,/ мы же ны́не прославля́ем Тя,/ сего́ ра́ди невреди́мы нас сотвори́.

Честна́я Твоя́ ико́на яви́ся вои́стинну покро́в держа́вный лю́дем Твои́м,/ я́ко не то́кмо и́ноцы Пече́рстии,/ но и лю́дие да́льнии обрето́ша Твою́ по́мощь и заступле́ние.

В лю́тое ле́то наше́ствия двана́десяте язы́к/ лю́дие гра́да Бря́нска изнесо́ша честну́ю ико́ну Твою́ Пече́рскую/ и со слеза́ми мно́гими моля́хуся,/ Твоего́ заступле́ния и́щуще.

Конда́к, глас 3:

Де́ва днесь неви́димо предстои́т в це́ркви/ и с ли́ки Пече́рских отце́в мо́лится о нас,/ благогове́йно велича́ющих Ея́ безме́рную ми́лость к ро́ду на́шему,/ я́вльшуюся в чу́дном о́бразе Ея́,/ оби́тель Пече́рскую украша́ющем.

И́кос:

Огради́ моя́ помышле́ния, Пречи́стая,/ и Небе́сным Твои́м благослове́нием/ подви́гни мя досто́йно воспе́ти сла́ву Твою́ на ме́сте святе́м сем,/ да, наде́яся на ми́лость Твою́, дерзну́ убо́гим язы́ком воззва́ти к Тебе́:/ ра́дуйся, Пече́рская сла́во, от лет дре́вних нас освяща́ющая;/ ра́дуйся, Небе́сная Игу́мения оби́тели на́шей,/ при́сно зде пребыва́ющая любо́вию и милосе́рдием;/ ра́дуйся, упова́ние и кре́пость рабо́в Твои́х, на ме́сте сем служа́щих Ти;/ ра́дуйся, незри́мо нас благода́тию осеня́ющая в о́бразе Твое́м,/ оби́тель Пече́рскую украша́ющем.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Мно́жество соде́янных лю́тых помышля́я, окая́нный,/ трепе́щу и с ве́рою взыва́ю Ти, Богороди́тельнице,/ я́ко Ма́ти милосе́рдия, проще́ния ища́.

Освети́тся и наша́ душа́ све́том благода́ти Христо́вой,/ егда́ в покая́нии и моли́тве притеце́м/ к неусыпа́ющей о нас в заступле́нии Богоро́дице.

Наде́яся на ми́лость Обра́дованной,/ с ве́рою воззове́м Сы́ну Ея́:/ поми́луй нас, Бо́же, по моли́тве Ма́тери Свое́й.

А́ще и немощни́ ду́хом и те́лом,/ но да посети́т нас благода́ть Бо́жия,/ в не́мощех соверша́ющаяся.

Хотя́ще восприя́ти Ду́ха Всесвята́го,/ принесе́м в сей храм Богома́тери чи́стую ду́шу и ве́ру в любви́.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Лю́дие, обре́тше ди́вное заступле́ние от Твоея́ пречи́стыя ико́ны, Пече́рскою имену́емыя,/ хвале́бными гла́сы воспева́ху:/ оте́ц на́ших Бо́же, благослове́н еси́.

В пещи́ искуше́ний и бед опаля́емых ороси́, Богома́ти, струя́ми Твои́х щедро́т,/ я́коже дре́вле яви́ла еси́ по́мощь рабо́м Твои́м,/ внегда́ врази́ ослепле́ни бы́ша/ и вся сокро́вища во оби́тель возврати́ша, да зове́м велегла́сно:/ оте́ц на́ших Бо́же, благослове́н еси́.

Я́коже изба́вила еси́ не́когда игу́мена Мартиниа́на с бра́тиею от сме́рти внеза́пныя,/ та́ко и нас, гре́шных, в покая́нии зову́щих, услы́ши/ и уми́лостиви Сы́на Твоего́, да зове́м Ему́:/ оте́ц на́ших Бо́же, благослове́н еси́.

Ты – весе́лие в оби́телех Твои́х живу́щих/ и градо́в дре́вних утеше́ние и похвала́, Де́во Мари́е,/ Препе́тая и Превозноси́мая во ве́ки.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Анто́ния и Феодо́сия преподо́бных с со́нмом Пече́рских отце́в дви́жа на моли́тву о нас,/ просла́вим Пречи́стую усе́рдием к оби́тели Ея́.

Анто́ний преподо́бный вку́пе с Феодо́сием единонра́вным/ предстоя́т у ли́ка Богома́тере и мо́лятся Ей/ о покрове́нии ме́ста сего́ и ве́рою чту́щих его́.

Ны́не взира́я на милосе́рдный лик Присноде́вы,/ испро́сим у Нея́ и Предве́чнаго Сы́на Ея́, в объя́тиях держи́маго Е́ю,/ ми́лость к нам, гре́шным.

Твои́м матери́нским покро́вом, Пречи́стая,/ да защища́еши и ны́не сей уде́л Твой/ и ве́рою служа́щих Ти в нем.

Ин

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

По́йте, и́ноцы Пече́рстии вку́пе с бра́тиею Све́нскою,/ прославля́й, земле́ Ки́евская и Бря́нская, Благу́ю Влады́чицу,/ ико́ною Свое́ю источа́ющую струи́ чуде́с и благодея́ний,/ мы же хва́лим, благослови́м, покланя́емся Ти, Богоро́дице,/ пою́ще и превознося́ще во вся ве́ки.

Ди́вныя зна́мения ми́лости от ико́ны Твоея́ Пече́рския источи́ла еси́, Влады́чице:/ духо́в злых отгна́ла еси́,/ отрокови́це Екатери́не, я́коже Рома́ну, зре́ние дарова́ла еси́,/ сего́ ра́ди превозно́сим Тя во вся ве́ки.

Явле́ние ико́ны Твоея́/ сердца́ и́ноков, в посте́ и моли́тве подвиза́ющихся, возвесели́ло есть,/ и тем го́ршее устремле́ние к Небе́сному Ца́рствию им внуши́ло есть,/ та́ко и нас, немощны́х, ускори́ на по́двиги,/ да превозно́сим Тя во вся ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Одержи́ми ра́достию в сей све́тлый день пра́здника Богома́тере,/ все упова́ние на Ню возложи́м в ско́рбех и печа́лех жи́зни на́шея.

Не усыпа́ет о нас в моли́твах Пречи́стая Ма́терь Спа́сова/ и явля́ет чу́дное Свое́ милосе́рдие ко всем,/ ве́рою чту́щим Ея́ о́браз святы́й.

Иису́са Христа́ светле́йшее и́мя призыва́юще,/ ве́рою просла́вим безсме́ртную Ма́терь Его́,/ спаса́ющеся в жи́зни сей.

Я́ко Ма́ти всех нас милосе́рдно приими́, Преблагослове́нная,/ сие́ убо́гое сло́во Твоего́ после́дняго раба́/ и сохрани́ его́ и всех нас в уде́ле Твое́м во ве́ки веко́в.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Прииди́те вси, благода́рственными пе́сньми возвели́чим Ма́терь Бо́жию/ и к ди́вному Ея́ о́бразу благогове́йно припаде́м,/ положи́вшую с на́ми заве́т ми́лости,/ просла́вим Обра́дованную воскресе́нием Сы́на Своего́.

Богоро́дице Де́во, упова́ние христиа́ном,/ проба́ви и на́шему ро́ду ми́лости Твоя́,/ бы́вшия отце́м на́шим во оби́тели сей,/ разори́ сове́т нечести́вых, возстаю́щих на ны,/ и сей дом Твой пресла́вно соблюди́.

Пресвята́я Госпоже́ на́ша, помина́я неисче́тная Твоя́ благодея́ния,/ и́миже удиви́ла еси́ оби́тель сию́ от лет дре́вних,/ Тя, Ма́терь Бо́жию, велича́ем.

Свята́я оби́тель Пече́рская ку́пно с дще́рию свое́ю по ду́ху оби́телию Све́нскою,/ днесь сою́зом любве́ совоку́плени,/ я́ко всея́ тва́ри честне́йшую и земны́х всех сла́внейшую Тя, Богоотрокови́це,/ зря́ще на ико́не Твое́й Пече́рстей, ублажа́ем.

Свети́лен:

Све́том озари́вшая це́рковь Пече́рскую от пречу́днаго ли́ка Твоего́, Богоро́дице,/ возсия́й ми свет спасе́ния огне́м покая́ния,/ да ве́рою и любо́вию сла́влю Тя, Приснопрославля́емую.

На хвали́тех стихи́ры, глас 5.

Подо́бен: Ра́дуйся:

Ра́дуйся, горо́ Пече́рская,/ усыре́нная моли́твами сыно́в твои́х/ и украше́нная ны́не явле́нием чу́днаго о́браза Богома́тери,/ вои́стинну Небе́сной Игу́мении оби́тели на́шея,/ при́сно охраня́ющей,/ от язв душе́вных и теле́сных врачу́ющей/ и незри́мо чудоде́йствующей ко всем,/ ве́рою чту́щим Ю/ и о́бразу Ея́ кла́няющимся.

Ра́дуйся, все мно́жество Пече́рских отце́в,/ ви́дяще явле́ние Богома́тери/ на ме́сте по́двигов ва́ших/ и всемо́щную благода́ть Всесвята́го Ду́ха,/ обита́ющую на ме́сте святе́м сем,/ Ея́же снизше́ствие благогове́йно воспомина́юще/ и благове́рно чту́ще,/ воспои́м от се́рдца Засту́пницу ро́да на́шего,/ при́сно моля́щую о нас Христа́ Бо́га на́шего.

Ра́дуйся, свята́я оби́тель Пече́рская,/ в благознамени́тый день явле́ния в тебе́/ безме́рной ми́лости Богоро́дицы,/ и, ра́достно воспева́юще благода́рственная устна́ми сыно́в твои́х и любо́вию,/ да просла́виши о́браз Игу́мении свое́й,/ при́сно храни́ти тя обеща́вшей,/ а́ще ве́ра и любо́вь не оскуде́ют на ме́сте сем.

Сла́ва, глас 6:

Прииди́те, вси празднолю́бцы,/ к Пренепоро́чней Засту́пнице на́шей/ и, упова́ние возло́жше на Ню,/ воспои́м ра́достно,/ устна́ми и се́рдцем взыва́я:/ ра́дуйся, Обра́дованная,/ Пече́рская похвало́.

И ны́не, пра́здника.

На Литурги́и слу́жба Богоро́дице.

Моли́тва

О, Пресвята́я и Пренепоро́чная Де́во Богоро́дице, на́ша Пече́рская похвало́ и украше́ние, держа́вный покро́ве свята́го ме́ста сего́, и́стинная Влады́чице избра́ннаго уде́ла Своего́. Приими́ нас, недосто́йных рабо́в Твои́х, убо́гое моле́ние, с ве́рою и любо́вию принося́щих пред чу́дным о́бразом Твои́м, да посети́ши ми́лостивно грехо́вное житие́ на́ше, просвеща́ющи его́ све́том покая́ния, осени́ нас, обремене́нных скорбьми́ мно́гими, Твое́ю Небе́сною ра́достию, сподо́би нас при́сно сла́вити Тя в ми́ре и благоче́стии на ме́сте святе́м сем, да, без поро́ка преше́дше путь жития́ на́шего, по́мощию Твое́ю дости́гнем ве́чнаго весе́лия во све́тлости святы́х и Богоно́сных оте́ц на́ших Анто́ния и Феодо́сия и всех преподо́бных Пече́рских и еди́ными усты́ и се́рдцы воспои́м Тя с Предве́чным Сы́ном Твои́м и Безнача́льным Его́ Отце́м и Пресвяты́м, Животворя́щим, Всеблаги́м и Единосу́щным Его́ Ду́хом во ве́ки веко́в. Ами́нь.