НА ВЕЧЕ́РНИ

На Го́споди, воззва́х: стихи́ры Креста́, глас 1.

Подо́бен: Небе́сных чино́в:

Вся́кое естество́ челове́ческое, ны́не предпра́зднуя,/ ра́достно да игра́ет:/ Кре́стное бо Дре́во хо́щет предположи́тися,/ всем ве́рным врачевство́ неиждива́емое,/ и неду́гов реши́тельно, и страсте́й,/ и вся́каго озлобле́ния.

Прииди́те, ви́дим, ве́рнии, стра́нное чу́до,/ ка́ко Кре́стное Дре́во/ уставля́ет опале́ние вся́каго неду́га/ и страсте́й зной угаша́ет/ предпра́зднующих ве́рою/ и того́ почита́ющих торжество́.

Живу́щии вку́пе и уме́ршии, предпра́зднуйте:/ жи́зни бо дре́во, е́же а́да умори́вшее,/ храни́тель челове́ков,/ ме́ртвых воскресе́ние гряде́т,/ всем незави́стную благода́ть ны́не пода́ти,/ челове́ком исцеле́ния.

И́ны стихи́ры свята́го, глас 8.

Подо́бен: О, пресла́внаго чудесе́:

Блаже́нне Богому́дре Евдоки́ме,/ чи́стая твоя́ душа́,/ правове́рным смы́слом сия́ющи,/ облиста́ет доброде́телей све́тлостию/ и озаря́ет ве́рных исполне́ние,/ бесо́в тьму отгоня́ющи./ Те́мже я́ко прича́стника невече́рния благода́ти/ тя благоче́стно вси почита́ем, досточу́дне.

Име́я ду́шу ми́лостиву,/ и чист по́мысл, и се́рдце бо́дрое,/ ве́ру небла́зненную/ и любо́вь вои́стинну нелицеме́рную,/ от земли́ преста́вился еси́ к Небе́сным/ и с ли́ки пра́ведных водворя́ешися./ Те́мже чтим тя свяще́нными пе́сньми/ и благочести́вно вси ублажа́ем,/ блаже́нне Евдоки́ме.

Боже́ственными уче́нии укрепля́яся,/ стра́сти плотски́я от души́ отгна́л еси́/ и Святы́я Тро́ицы селе́ние чи́сто был еси́./ Те́мже к Боже́ственному наслажде́нию отше́л еси́,/ Бо́гу, соблюда́ющу ны́не неруши́мо/ твое́, блаже́нне, те́ло,/ Боже́ственными судьба́ми, и́миже Сам весть,/ прославля́яй тя а́ве, Евдоки́ме.

Сла́ва, глас 1:

Ка́ко не диви́мся благоу́мию твоему́/ или́ не похва́лим, преподо́бне Евдоки́ме, житие́ твое́ равноа́нгельное,/ по́мысла целому́дрию, кро́тости твое́й,/ и смире́нию, и безмо́лвию, и ми́лостыни непреста́нней?/ Все́ми бо доброде́тельми украси́лся еси́, блаже́нне,/ те́мже ждет тебе́ неизглаго́ланная ра́дость/ и Небе́сное Ца́рствие.

И ны́не, глас то́йже:

Днесь я́ко вои́стинну/ святовеща́нный глаго́л Дави́дов коне́ц прия́т,/ се бо а́ве пречи́стых ног Твои́х покланя́емся подно́жию/ и, на сень крилу́ Твое́ю наде́ющеся,/ Всеще́дрый, вопие́м Ти:/ да зна́менается на нас свет лица́ Твоего́,/ правосла́вных люде́й Твои́х рог вознеси́/ Честна́го Креста́ Твоего́ воздви́жением,/ Христе́ Многоми́лостиве.

На стихо́вне Окто́иха.

Сла́ва, и ны́не, глас 2, самогла́сен:

Ты ми покро́в держа́вен еси́,/ трича́стный Кре́сте Христо́в,/ освяти́ мя си́лою твое́ю,/ я́ко да ве́рою и любо́вию покланя́юся и сла́влю тя.

Тропа́рь свята́го, глас 4:

От земли́ воззва́вый тя к Небе́сным селе́нием/ соблюда́ет и по сме́рти невреди́мо те́ло твое́, свя́те Евдоки́ме:/ ты бо в целому́дрии и чи́стом жи́тельстве, блаже́нне,/ жи́тельствовал еси́, не оскверни́в пло́ти./ Те́мже со дерзнове́нием моли́ Христа́ Бо́га спасти́ся нам.

Сла́ва, и ны́не, тропа́рь Креста́, глас 1:

Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя/ и Твое́ сохраня́я Кресто́м Твои́м жи́тельство.

На У́трени

На Бог Госпо́дь: тропа́рь Креста́, два́жды. Сла́ва, свята́го. И ны́не, Креста́. Кано́н Окто́иха еди́н, и Креста́ на 4, и свята́го на 4.

Кано́н Креста́, глас 1.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Крест предгряды́й Боже́ственный испуща́ет зарю́ благода́ти/ и просвеща́ет вся, покланя́ющияся ему́/ и воспева́ющия благоче́стно распе́ншагося Христа́.

Креста́ поклоня́ние возвыша́ет любо́вию и ве́рою сла́вящия/ я́ко Бо́га и Го́спода, пострада́вшаго пло́тию/ и назда́вшаго нас Боже́ственными страда́нии.

Креста́ поклоня́ние источа́ет благово́ние дарова́ний,/ и вся, я́же Христа́ сла́вящия, объюха́ет при́сно,/ и смрад душ отъе́млет весь.

Богоро́дичен: Позна́вше Го́спода, вопло́щшагося из Тебе́, Богоневе́сто,/ и Крест и смерть прие́мша,/ пое́м Его́, Изба́вителя, Тя ублажа́юще.

Кано́н свята́го, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

Высоко́ житие́ име́я и восхожде́нни Боже́ственными весь све́тел быв,/ просвеще́ние ми испроси́, восхваля́ющему честны́я твоя́ по́двиги,/ и́миже до́бре пожи́в, получи́л еси́, Евдоки́ме, и́хже наде́ялся еси́.

Мирово́нная любя́ уче́ния и во чте́нии Свяще́нных Писа́ний упражня́яся,/ сласте́й уклони́лся еси́, всеблаже́нне, смра́дных и безче́стных/ и облагово́нился еси́, Боже́ственными дарова́нии украша́емь.

Дрема́ние о́чию от души́, блаже́нне, отгна́л еси́, бдя и Бо́гу приединя́яся,/ всено́щными стоя́нии, непрекло́нен ну́ждами естества́,/ те́мже ко дню невече́рнему дости́гл еси́.

Богоро́дичен: я́ко черто́г одушевле́н Бо́жий и кади́льницу мы́сленнаго и светоно́снаго у́гля,/ при́сно благода́тную ублажа́ем Богоро́дицу, зову́ще:/ ра́дуйся, Хода́таице спаси́тельнаго воскресе́ния.

Песнь 3

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е/ и основа́вый на вода́х зе́млю, Всеси́льне.

И́же во о́бразех проначерта́емый, соверша́я пресла́вная чудеса́,/ ны́не покланя́емый Крест де́йствует чу́днейшая,/ освяща́я и просвеща́я Зижди́теля сла́вящия.

И́же во бране́х Боже́ственная побе́да, Крест Христо́в покланя́емь,/ ополче́ния враго́в побежда́яй,/ подава́ет лю́дем правосла́вным кре́пкия побе́ды.

Жезл Госпо́день предположе́нный,/ Крест во хра́мех и жили́щах основа́ния незы́блема сих соблюда́ет/ и всяк прило́г и кова́рство сопроти́вных побежда́ет.

И́же Госпо́день покланя́емый Крест благоче́стно/ Боже́ственныя благода́ти и каже́ния мы́сленна исполня́ет покланя́ющияся ему́/ и о́блаки напа́стей отъе́млет и скорбе́й.

Богоро́дичен: От глубины́ ле́стныя извлече́ челове́чество/ из Тебе́ Рожде́йся Дре́вом Кре́стным, Богоро́дице,/ и возвы́си к разуме́нию Своему́ благоче́стно Тя сла́вящия.

Ин

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́ Го́споди.

Глаго́лом живото́чным внима́я, испи́л еси́ во́ду спасе́ния,/ возгнуша́вся го́рькаго греха́, и, поя́, глаго́лал еси́ Бо́гу, Евдоки́ме:/ я́ко несть свят, па́че Тебе́, Го́споди.

Ми́лование стяжа́л еси́ христоподража́тельное, разда́л еси́ бога́тство тре́бующим,/ Небе́сное же бога́тство, хода́тайствующее тебе́, получи́л еси́, вопия́, Евдоки́ме:/ я́ко несть свят, па́че Тебе́, Го́споди.

Присво́ився Зижди́телю любо́вию Боже́ственною,/ прия́л еси́ Небе́сное насле́дие, и дре́ва живо́тнаго прича́стник еси́,/ обще́нием обожа́емь, и, поя́, сла́вне, глаго́лал еси́:/ я́ко несть свят, па́че Тебе́, Го́споди.

Богоро́дичен: Су́щи А́нгел честне́йши,/ Зижди́теля А́нгелов во утро́бе носи́ла еси́ и родила́ еси́ неизрече́нно./ Ему́же вси пое́м:/ Ты еси́ Бог наш, и несть свят, па́че Тебе́, Го́споди.

Седа́лен свята́го, глас 4:

Благоволи́в благи́ми дея́нии, искуси́лся еси́, я́ко зла́то в пещи́, напа́стьми, Евдоки́ме сла́вне,/ те́мже и по сме́рти источа́еши бога́тно чудеса́, я́ко во́ды,/ и неду́ги уставля́еши, о нас при́сно моли́ся,/ я́ко да согреше́ний проще́ние прии́мем.

Сла́ва, и ны́не, Креста́, глас 4.

Подо́бен: Вознесы́йся:

Све́тло не́бо показу́ется па́че со́лнца све́том Кре́стным,/ просвеща́ет вся́ческая заре́ю свое́ю./ Те́мже Ты, Человеколю́бче, Спа́се вся́ческих,/ просвети́ ум наш его́ ра́ди и чу́вства:/ мы бо и́мамы того́ ору́жие ми́ру, непобеди́мую побе́ду.

Песнь 4

Ирмо́с: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том– позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди.

Вообража́емь, Боже́ственный и Честны́й Крест тьмы нача́льника отгоня́ет тве́рдо от возду́ха,/ и благода́ти лучи́ вообража́ющим простира́ет,/ и озаря́ет сих, пою́щия Христа́ Бо́га.

Вообража́емь, Боже́ственный и пречестны́й Крест в сердца́х/ мо́ре утиша́ет страсте́й, и уставля́ет бед треволне́ния,/ и в тишину́ прево́дит пра́вости вся, любо́вию вообража́ющия того́.

Я́коже у́глие, испуща́я, Честны́й Крест де́йствия вся попаля́ет вра́жия,/ и отго́нит си́лу, и облегча́ет мно́гия в ве́ре,/ хва́лящия и пою́щия любо́вию на нем пригво́ждшагося Христа́.

Всечестны́й и Боже́ственный Крест, ве́рою покланя́емь,/ источа́ет струи́ мы́сленныя дарова́ний и во́ды исцеле́ний/ и напая́ет непреста́нно сему́ покланя́ющияся и чту́щия.

Богоро́дичен: Я́ко всех Цари́цу и Влады́чицу на́шу Тя любо́вию сла́вим, Пресвята́я Чи́стая,/ просве́щшиися страстьми́ Сы́на Твоего́ и позна́вшии Сего́ всем Благоде́теля:/ сла́ва благода́ти Его́.

Ин

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Тн: сла́ва си́ле Твое́й, Го́споди.

Уче́ния оте́ческая храня́ невреди́мо,/ правосла́вным мудрова́нием, ты от младе́нства име́л еси́ житие́ нескве́рное/ и ми́лостивен нрав, досточу́дне.

Ни молва́ мирска́я, ни вла́сти держа́ние, ни сла́ва вре́менная/ твоего́ к Бо́гу жела́ния преврати́, Евдоки́ме,/ но благоволи́л еси́ вои́стинну Боже́ственным дея́нием.

Возвыша́емь Боже́ственными поуче́нии всегда́, врага́ смири́л еси́,/ исцеле́ний де́йство прия́л еси́, Евдоки́ме,/ судо́м пра́ведным вся Управля́ющаго.

Иска́пающи сла́дость ра́ка моще́й твои́х бога́тых исцеле́ний,/ стра́сти отгоня́ет, Евдоки́ме, ве́рою чту́щих тя/ и попаля́ет бесо́в вся полки́.

Богоро́дичен: Всепе́тая, во́инствы Го́рними пева́емаго Бо́га родила́ еси́,/ Челове́ка вои́стинну бы́вша,/ Его́же о рабе́х Твои́х моля́щи не преста́й, Присноде́во.

Песнь 5

Ирмо́с: Све́тлый нам возсия́й Свет Присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Христе́, Бо́же наш.

Держа́вному на́шему и недви́жимому ору́жию предлежа́щу,/ ны́не покланя́ющеся пресвято́му Кресту́ ве́рою,/ си́лу непобеди́му на враги́ прие́млем.

Вообража́емаго и несеко́маго ка́мене сотво́рша во́ду источи́ти/ ны́не держа́ще и покланя́ющеся Честно́му Кресту́,/ исто́чник дарова́ний прие́млем.

Златосия́нен нам Крест Христо́в явля́яся,/ дарова́ния душа́м подава́ет благода́тию,/ покланя́ющимся ему́ и Го́спода и Бо́га пою́щим при́сно.

Богоро́дичен: Жезл си́лы, Богоневе́сто, ве́рою держа́ще,/ Сы́на Твоего́ и Бо́га на́шего Крест,/ пое́м Тя, Цари́цу всех, ублажа́юще.

Ин

Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Заре́ю чи́сто Святы́я Тро́ицы просвеще́н, зако́ном же Сея́ огражде́н,/ нощь жития́ непреткнове́нно премину́л еси́,/ виде́нии Боже́ственными окриля́емь, блаже́нне,/ и в Боже́ственную жизнь всели́лся еси́.

Ны́не на тебе́ чу́до ве́лие зри́тся и у́жаса испо́лнено:/ ка́ко по погребе́нии вои́стинну мно́го лет соблюде́ся неруши́мо, блаже́нне, твое́ те́ло, во гро́бе лежа́щее,/ судьба́ми, и́миже весть Сам, прославля́яй тя.

Бла́гоже твоему́ к Бо́гу дерзнове́нию, бла́гоже жела́нию, е́же в се́рдцы к Нему́ име́л еси́:/ бла́го пожи́в тезоиме́нно, просия́л еси́ пресла́вно Боже́ственными светлостьми́/ и уясни́л еси́ ве́рных совокупле́ния.

Богоро́дичен: О нас из Тебе́ воплоще́ннаго, Де́во Ма́ти, всегда́ моли́,/ благоче́стно Тя блажа́щих, изба́витися бед, и душетле́нных страсте́й и печа́лей,/ и ве́чнующаго пла́мене муче́ния.

Песнь 6

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Пречестны́й Крест, покланя́емый ны́не,/ воскресе́ния ра́дость провозвеща́ет Христо́ва,/ и смерть злонача́льника благовеству́ется.

Водрузи́л еси́ на земли́ Честны́й Крест,/ ле́ствица быва́ет ве́рным мы́сленна к Небеси́/ и возше́ствие покланя́ющимся ему́ и чту́щим.

И́же посреде́ земли́ насади́выйся, Честны́й Крест/ и ны́не ве́тви простира́ет дарова́ний в себе́/ и вся осеня́ет, покланя́ющияся ему́.

Пресеки́й Чермно́е, пропису́емь, Крест, покланя́емь ны́не,/ бед и страсте́й мо́ре пресека́ет,/ и спаса́ет покланя́ющияся ему́.

Богоро́дичен: От земли́ привлече́ нас Сын Твой и Бог к Небе́сней жи́зни, возше́д на Крест,/ любо́вию Тя, Ма́терь Сего́, вои́стинну чту́щих.

Ин

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Тече́ния сла́дкая иска́паху, блаже́нне, по́тове твои́ и ра́дования,/ исцеле́ний сия́ние во хвалу́ Христа́ Бо́га на́шего.

Во дво́рех Бо́жиих процве́л еси́, виногра́д многопло́ден прозябы́й,/ и доброде́телей гро́здие де́лателю душа́м оби́льно пода́в.

Ца́рства Бо́жия возжеле́л еси́ и, над страстьми́ ца́рствовав, Евдоки́ме, по благоволе́нию лу́чшему ра́дость пра́ведных получи́л еси́.

Богоро́дичен: Избра́нна Бо́гу бы́вши, я́ко кра́сное село́ и простра́нное,/ Сему́, Де́во, была́ еси́ и черто́г, и све́щник, и трапе́за.

Конда́к, глас 2:

Вы́шних жела́я, с вы́шними совокупля́яся,/ и колесни́цу о́гненную, Боже́ственными восхожде́ньми доброде́телей, соверши́л еси́ ду́шу,/ преблаже́нне Евдоки́ме,/ на земли́ пожи́в, я́ко Безпло́тен,/ Зижди́телю всех благоугоди́л еси́.

И́кос:

Житие́ сугу́бо показа́л еси́ пра́вою, блаже́нне, ве́рою,/ во обое́м Бо́гу благоугоди́в, Евдоки́ме./ Те́мже обре́л еси́ Небе́снаго Ца́рствия насле́дие/ и, со святы́ми ны́не живы́й, Влады́це всех предстои́ша;/ твое́ же те́ло скве́рны соблю́л еси́ кроме́/ и неруши́мое любо́вию чту́щим тя оста́вил еси́:/ чи́сто бо пожи́в, сла́вне, Зижди́телю всех благоугоди́л еси́.

Песнь 7

Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́, огнь./ Тогда́ трие́, я́коо еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.

И́же честно́ю кро́вию Христо́вою Крест Его́ напои́вся,/ источа́ет ре́ки сия́нии мы́сленных дарова́ний/ и напая́ет вся, покланя́ющияся и воспева́ющия его́ ве́рно.

И́же смерть и враги́ низло́ж Крест Христо́в и вереи́ сокруши́ мы́сленныя,/ и ны́не тому́ чи́стою ве́рою и любо́вию покланя́ющимся/ всем две́ри отверза́ет жи́зни и нетле́нныя пи́щи.

И́же покланя́ющеся любо́вию Кресту́, огражда́ются си́лою сего́,/ и враги́ мы́сленныя и ви́димыя отго́нят,/ и невреди́мы соблюда́ются песносло́вящии Христа́.

Богоро́дичен: Кре́пость нам и держа́ва на враги́ даровася –/ Крест Христа́, Сы́на Твоего́, прия́тным и ма́терним Твои́м дерзнове́нием,/ и́мже, Богоневе́сто, прило́ги вра́жия побежда́ем.

Ин

Ирмо́с: Богопроти́вное веле́ние/ беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Кре́постию вжили́вся Живода́вца, пло́ти удержа́л еси́ жела́ния, пребога́те,/ и ум впери́л еси́ к Небе́сным, поя́ кре́пко:/ сый благослове́н Бог и препросла́влен.

Сам ся неблагоро́дна сотво́рь, благоро́дны нра́вы стяжа́в ума́ це́лостию,/ поуче́нием же упражня́яся богодохнове́нных писа́ний,/ все твое́ жела́ние на Бо́га Всеви́дца, блаже́нне, возложи́л еси́.

Вы́шняго Ца́рства, Вы́шняго же гра́да, Бо́жия рая́,/ пра́ведных наслажде́ния пи́щи нетле́нныя и бога́тства некра́домаго,/ Све́та невече́рняго сподо́бился еси́, блаже́нне Евдоки́ме.

Богоро́дичен: Его́же родила́ еси́, Влады́чице, при́сно моли́/ от рабо́ты изба́вити мя страсте́й и осужде́ния, и стужа́ющаго ми лю́таго отча́яния,/ и от оскорбля́ющих мя, Чи́стая, одержа́ния, Богора́дованная.

Песнь 8

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

Его́же водрузи́ смерть, поста́вленный Крест, ны́не покланя́ема зря́ще,/ мы́сленная вра́жия ополче́ния скрыва́ются под земле́ю,/ и покланя́ющиися ему́ обновля́ются.

Его́же, дре́вле прообразу́ема, на высоте́ Небе́сней Христо́с показа́, пресве́тлаго Креста́,/ тому́ ны́не покланя́ющеся, благоче́стно ве́рнии возвыша́ются/ и сего́ уясня́ются заре́ю.

Его́же дре́вле пропове́даша проро́цы нело́жно, е́же Христо́ву подно́жию яви́тися Креста́,/ ему́же ны́не мы и́стинно покланя́ющеся ве́рно,/ того́ бога́тых даро́в наслажда́емся.

Богоро́дичен: И́же стра́стию безстра́стие источи́в земны́м, Сын Твой и Госпо́дь, Де́во,/ Тобо́ю нас, Тя любо́вию пою́щия, при́сно обновля́ет,/ я́ко Благоде́тель.

Ин

Ирмо́с: В пещи́ о́трочестей прообрази́л еси́ иногда́ Твою́ Ма́терь, Го́споди,/ о́браз же Сия́ из огня́ изыма́ше неопа́льно входя́щия./ Ю́же пое́м я́вльшуюся Тобо́ю конце́м днесь,/ и превозно́сим во вся ве́ки.

Огнь помышля́я стра́шный, пред престо́лом Христо́вым хотя́щ изы́ти,/ умиле́ннем се́рдца те́плы излива́еши ка́пли слез,/ погаша́ющия тебе́ страсте́й пещь, Евдоки́ме Богому́дре.

Все приложи́л еси́ к Бо́гу, му́дре, душе́вное о́ко/ и Тому́ прилепи́лся еси́, вопия́ псало́мски:/ Христе́ мой, ка́ла мя изба́ви и смертоно́сных страсте́й во ве́ки.

Терпе́нием пожда́тель и се́рдцем смире́н ты был еси́,/ ми́лостив тре́бующим и, обы́чай принося́ благ и нра́вы доброде́тельны, всече́стне,/ в ни́хже до́бре пожи́в, чуде́с то́чиши благода́ть.

Ра́зум име́я Боже́ствен, испо́лнитель Влады́чних яви́лся еси́ слове́с,/ десны́я любя́ стези́, ле́вых я́ве уклоня́яся, я́ко благоу́мен и мудр./ Те́мже тя почита́ем, Богому́дре, во ве́ки.

Богоро́дичен: Ада́мов Соде́тель от крове́й Твои́х чи́стых зи́ждется/ и млеко́м пита́ется, Пита́яй вся́кое дыха́ние, Де́во Богоро́дице,/ те́мже я́ко Бо́жию Тя сла́вим Ма́терь.

Песнь 9

Ирмо́с: Светоно́сный о́блак,/ в о́ньже всех Влады́ка,/ я́ко дождь с Небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси я́ко Ма́терь Бо́га на́шего Чи́стую.

Безсме́ртия то́чит и нетле́ния незави́стны ка́пли Честны́й Крест кла́няющимся ему́,/ оживля́ет, очища́ет, и обновля́ет, и сла́вы лу́чшия и благодати сподобля́ет/ воспева́ющия на том пригво́здшагося Иису́са.

Де́йства испуща́я, я́коже пресве́тлы зари́, всечестны́й Крест/ тому́ покланя́ющияся любо́вию и ве́рою чи́стою/ к све́ту непристу́пному и невеще́ственному, озаря́я, направля́ет,/ воспева́ющия всех Творца́.

Освяти́вый Дре́во пресвята́го Креста́ Твоего́ честно́ю кро́вию Твое́ю, Преблаги́й Сло́ве,/ де́йством его́ нас просвети́ и освяти́, тому́ кла́няющияся/ и воспева́ющия Влады́ку вся́ческих.

Богоро́дичен: Па́че со́лнца всем просия́вшая благода́ть о́блаки бед и страсте́й отго́нит, Де́во,/ и Богоразу́мия све́том просвеща́ет любо́вию Тя сла́вящия/ и пою́щия непреста́нно Сы́на Твоего́, я́ко Влады́ку всех.

Ин

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Ви́дети жела́я сла́ву Бо́га на́шего, доброде́тельми Богоразу́мия тебе́ удобри́л еси́/ и свещено́сец во све́тлый черто́г вшел еси́,/ со А́нгелы живы́й, и ясне́е наслажда́ешися Боговиде́ния.

Я́ко у́тро, я́ко со́лнце, возсия́ па́мять твоя́, су́щая во мра́це сердца́ просвеща́ющи:/ ты бо и све́та и дне вои́стинну сын яви́лся еси́, Богому́дре Евдоки́ме./ Сего́ ра́ди тя почита́ем.

Му́дростию украша́емь и ра́зумом просвеще́н, смире́нием се́рдца удобре́н,/ высото́ю жития́ сия́я, к мы́сленным преше́л еси́ дворо́м,/ иде́же нас помяни́, почита́ющих тя, Евдоки́ме.

День пра́зднственный и по́льзы хода́тайственный честны́й твой соверша́ем, от земли́ преставле́ния:/ ты бо Госпо́день уго́дник и Того́ за́поведей де́латель яви́лся еси́ непосты́ден,/ досточу́дне Евдоки́ме.

Богоро́дичен: Све́та прия́телище утро́ба Твоя́ бысть, просве́щшаго мир, Богора́дованная,/ те́мже молю́ тя, окая́нный:/ све́тлы зари́ ми пода́ждь мольба́ми, Богоневе́сто, Евдоки́ма Богому́драго.

Свети́лен Окто́иха. Сла́ва, свята́го:

Я́коже со́лнце, блиста́я, зари́ испуща́еши чуде́с,/ просвеща́я всех сердца́, твою́ сла́вную па́мять творя́щих ве́рно, треблаже́нне,/ и спаса́еши, Евдоки́ме.

И ны́не, Креста́:

Подо́бен: Жены́, услы́шите:

Крест предпра́зднуется, и мир освяща́ется,/ чи́ни А́нгельстии пою́т нас ра́ди распе́ншагося,/ и торжеству́ют с на́ми, и сра́дуются, дави́дски зову́ще:/ соде́ла спасе́ние посреде́ земли́, Влады́ко.

На стихо́вне Окто́иха. Сла́ва, глас 1:

Ка́ко не диви́мся благоу́мию твоему́/ или́ не похва́лим, преподо́бне Евдоки́ме, житие́ твое́ равноа́нгельное,/ по́мысла целому́дрию, кро́тости твое́й,/ и смире́нию, и безмо́лвию, и ми́лостыни непреста́нней?/ Все́ми бо доброде́тельми украси́лся еси́, блаже́нне,/ те́мже ждет тебе́ неизглаго́ланная ра́дость/ и Небе́сное Ца́рствие.

И ны́не, Креста́, глас 6:

Проро́честии гла́си Дре́во свято́е провозвести́ша,/ и́мже дре́вния кля́твы сме́ртныя свободи́ся Ада́м,/ тварь же, днесь возноси́му, тому́ совозвыша́ет глас,/ я́же от Бо́га прося́щи бога́тыя ми́лости./ Но, еди́ный во благоутро́бии безме́рный Влады́ко,/ очище́ние бу́ди нам/ и спаси́ ду́ши на́ша.

НА ЛИТУРГИ́И

Проки́мен, глас 7: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода: Стих: Си́льно на земли́ бу́дет се́мя его́. Ева́нгелие от Матфе́я, зача́ло 43. Прича́стен: В па́мять ве́чную бу́дет пра́ведник: