НА ВЕЧЕ́РНИ

Стихи́ры на 6, глас 1.

Подо́бен: Небе́сных чино́в:

Чуде́сными заря́ми/ боле́зней на́ших отжени́те всяк неду́г,/ безсре́бренно благода́ть простира́юще,/ дарова́ньми Учи́теля обога́щшеся,/ на земли́ боле́зни земноро́дных/ взе́мшаго на ра́мех Свои́х.

Враче́бне, у́бо пе́рвее,/ наказа́вшеся до́бре,/ боле́зни всем очища́ете ве́рою,/ второ́е же, па́ки духо́вно себе́ вооружи́вше,/ отгоня́ете Боже́ственне/ и душе́вных неду́г врежде́ния.

Я́ко безсре́бренно благода́ть от Христа́ Бо́га прие́мше,/ всем безсре́бренно исцеля́ете,/ безсре́бреницы, неду́ги,/ не то́кнмо на́ша боле́зни очища́ете,/ но и ското́м даю́ще слове́сно исправле́ние,/ я́ко ми́лостиви.

И́ны стихи́ры, глас 4.

Подо́бен: Дал еси́ зна́менне:

Вода́ми духо́вными, я́ко ре́ки, наводня́еми,/ и, я́ве напо́лншеся, тварь напоя́ете/ Богозна́меньми и пресла́вными исцеле́ний дарова́нии,/ и душетле́нныя стра́сти изсуша́ете,/ и неду́ги исцеля́ете,/ и отгоня́ете ду́хи,/ Богоно́снии безсре́бреницы,/ моли́твенницы о душа́х на́ших.

Стра́сти безслове́сныя поко́рше, святи́и,/ душе́вными си́лами,/ челове́ком и ското́м благодея́ние подава́ете,/ от Христа́ дарова́нием исцеле́ний обога́щшеся./ Те́мже свяще́нное ва́ше/ и светоно́сное торжество́ соверша́юще,/ про́сим очище́ния душа́м на́шим.

Боже́ственный храм ваш/ я́ко не́бо показа́ся, светоза́рно и спасе́нно,/ я́ко зве́зды, чудеса́ спаси́тельна ны́не притяжа́в/ и, я́коже со́лнце све́тло,/ исцеле́ний Боже́ственное де́йство,/ Космо́ преблаже́нне, Дамиа́не пресла́вне,/ Госпо́дни служи́тели,/ моли́твенницы о душа́х на́ших.

Сла́ва, глас 6:

Безконе́чна есть святы́х благода́ть,/ ю́же от Христа́ прия́ша,/ те́мже и мо́щи их от Боже́ственныя си́лы/ непреста́нно де́йствуют чудеса́,/ и́хже и имена́, ве́рою призыва́ема,/ неисце́льныя боле́зни исцеля́ют;/ и́миже, Го́споди, и нас душе́вных и теле́сных страсте́й свободи́,/ я́ко Человеколю́бец.

И ны́не, Богоро́дичен или́ Крестобогоро́дичен.

Подо́бен: Всю отложи́вше:

А́гнца Своего́ А́гница нескве́рная дре́вле/ и Непоро́чная Влады́чица/ на дре́ве Кре́стнем я́ко узре́,/ ма́терски восклица́ше и, дивя́щися, вопия́ше:/ Ча́до сладча́йшее,/ что́ зре́ние сие́ но́вое и пресла́вное?/ Ка́ко сонм безблагода́тный суди́щу Пила́тову предаде́ Тя/ и осужда́ет на смерть Живота́ вся́ческих?/ Но воспева́ю Твое́ неизрече́нное, Сло́ве, снизхожде́ние.

На стихо́вне стихи́ры Окто́иха. Сла́ва, глас 6:

Всегда́ иму́ще Христа́,/ де́йствующа в вас,/ святи́и безсре́бреницы,/ чудоде́йствуете в ми́ре, боля́щия исцеля́ете,/ и́бо врачевство́ ва́ше исто́чник есть неисчерпа́емый:/ че́рплемый же, па́че изоби́льно истека́ет,/ и излива́емь, изоби́лует;/ на ки́йждо день истощева́емь, и умножа́емь,/ всем подая́, и неоскудева́емь пребыва́я;/ и че́рплющии насыща́ются исцеле́ния,/ той же пребыва́ет неиждиву́щ./ Что́ у́бо вас нарече́м?/ Цели́тельных ли враче́в душ же и теле́с?/ Цели́телей страсте́й неисце́льных,/ ту́не исцеля́ющих всех,/ прие́мших дарова́ние от Спа́са Христа́,/ подаю́щаго нам ве́лию ми́лость.

И ны́не, Богоро́дичен или́ Крестобогоро́дичен.

Подо́бен: Тридне́вен:

Ви́дящи Тя распина́ема, Христе́,/ Тебе́ Ро́ждшая вопия́ше:/ что́ стра́нное е́же ви́жу та́инство, Сы́не Мой?/ Ка́ко на Дре́ве умира́еши, пло́тию пове́шен,/ жи́зни Пода́телю?

Тропа́рь, глас 8:

Святи́и безсре́бреницы и чудотво́рцы Космо́ и Дамиа́не,/ посети́те не́мощи на́ша:/ ту́не прия́сте, ту́не дади́те нам.

НА У́ТРЕНИ

На Бог Госпо́дь: тропа́рь, два́жды. Сла́ва, и ны́не, Богоро́дичен или́ Крестобогоро́дичен.

Кано́ны о́ба Окто́иха и святы́х на 6, глас 4.

Песнь 1

Ирмо́с:Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Дво́ице светови́дная му́дрых безсре́бреник,/ Тро́ице Честне́й со все́ми избра́нными предстоя́щи, моли́ся,/ па́мять твою́ светоно́сную творя́щим/ просвети́тися Ду́ха Боже́ственными светлостьми́.

Превысо́цы умо́м в су́щих ве́щех я́вльшеся,/ невеще́ственна блиста́ния Ду́ха, му́дрии, прия́сте, святи́и./ Те́мже тьму неду́гов разреша́ете всегда́/ посеще́нии Боже́ственными, безсре́бреницы.

Недрема́нно душе́вное стяжа́вше о́ко/ ко исполне́нию Бо́жию Боже́ственных за́поведей,/ спя́щия в неду́зех, сла́внии, к до́брому здра́вию возбужда́ете благода́тию,/ ми́лостивии Богоно́снии безсре́бреницы.

Богоро́дичен: Спа́са и Бо́га от чи́стых Твои́х крове́й воплоти́ла еси́, Чи́стая,/ показа́вшаго нам врачи́ душа́м на́шим, Пречи́стая,/ спаси́тельны и теплы́ засту́пники, честны́я безсре́бреники, Ду́хом.

Песнь 3

Ирмо́с:Не му́дростию, и си́лою, и бога́тством хва́лимся,/ но Тобою, Отчею Ипоста́сною Му́дростию, Христе́,/ несть бо свят, па́че Тебе́, Человеколю́бче.

Ми́ро благово́нно исцеле́ний/ Боже́ственный храм ваш источа́ет свяще́нно, ту́чи духо́вныя,/ стра́сти злосмра́дныя отмыва́я всегда́.

В Небе́сных се́лех водворя́ющеся всегда́,/ сень ва́шу при́сно исто́чник исцеле́ний, прему́дрии, показу́ете/ благода́тию Вседержи́теля.

Плотски́я стра́сти воздержа́ния броздо́ю обузда́вше,/ духо́вныя зари́ пребога́тно прия́сте,/ те́мже исцеле́ньми мир обогаща́ете.

Богоро́дичен: Красне́йшу в жена́х Тя Бог избра́/ и из Тебе́ пло́тски, Чи́стая, роди́тися благоизво́ли,/ почива́яй во святы́х Свои́х.

Седа́лен, глас 8.

Подо́бен: Прему́дрости:

Исцеле́ний да́тели, и чудотво́рцы,/ и чуде́с свети́льники светоприе́мнии всем яви́стеся духо́вною благода́тию,/ страстны́й бо пла́мень ве́рою прохлажда́ете/ и ве́рным в ней смысл согрева́ете./ Тем врачевство́ душе́вное стяжа́вше, Боже́ственную це́рковь ва́шу,/ к не́йже прибега́юще, вопие́м:/ Богоно́сцы безсре́бреницы, моли́те Христа́ Бо́га согреше́ний оставле́ние дарова́ти/ пра́зднующим любо́вию святу́ю па́мять ва́шу.

Сла́ва, глас и подо́бен то́йже:

Исцеле́ний зари́ су́щим на земли́ возсия́юще, Боже́ственнии чудотво́рцы,/ я́ве отгоня́ете челове́ков неду́ги,/ вои́стинну незаходи́маго Со́лнца в себе́ стяжа́вше, Христа́ Бо́га на́шего./ Те́мже, досто́йно соше́дшеся,/ почита́ем сла́вную, святи́и, и честну́ю ва́шу па́мять, Богоно́снии безсре́бреницы./ Моли́те Христа́ Бо́га грехо́в оставле́ние пода́ти/ чту́щим любо́вию святу́ю па́мять ва́шу.

И ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́,/ и, я́ко Младе́нца, млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с:Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Живоно́сными де́йствы, вся́ческими дея́нии, смертоно́сныя стра́сти челове́ков исцеля́ете,/ светови́днии столпи́, забра́ла недви́жима,/ виногра́да и́стиннаго Боже́ственныя ло́зы.

Сосцы́ церко́внии, и́же млеко́ пролива́юще исцеле́ний,/ просвеще́ний, безсре́бреницы, пита́юще всех Боже́ственными бра́шны,/ да восхва́лятся ра́достными пе́сньми.

Врачевство́ показа́ся храм ваш, святи́и,/ обурева́емым небу́рно приста́нище и спаси́тельно,/ во́ньже притека́юще, вси прие́млем тишину́ и лю́тых избавле́ние.

Богоро́дичен: Ми́лости мя, Де́во, я́же в Тебе́, сподо́би,/ ро́ждшая Сло́во, еди́на вои́стинну Ми́лостивное,/ еди́но ми́лостивны святы́я показа́вшее,/ цели́тели и чудотво́рцы в конце́х.

Песнь 5

Ирмо́с:Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Боже́ственными светлостьми́ я́ве облиста́еми, весь обхо́дите мир,/ вся челове́ки просвеща́ете, тьму отъе́млюще страсте́й,/ де́моны прогоня́юще, Богоно́снии безсре́бреницы.

Я́ко два просвеща́ете свети́льника поднебе́сную,/ духодви́жно, Богоно́сцы, всю тварь обходя́ще,/ и и́же на одре́ боле́зней посеща́юще, и от бед изыма́юще.

Неду́гующим исцеле́ние, страсте́й избавле́ние подаю́ще безсре́бренно,/ всем предста́тели вели́цы яви́стеся, всем помо́щницы с Бо́гом,/ всем засту́пницы, Богоно́снии безсре́бреницы.

Богоро́дичен: Му́дрость породила́ еси́ Бо́жию Ипоста́сную, Пречи́стая Де́во Богоро́дице,/ святы́я прему́дры показа́вшую,/ и́миже зломудреца́ паде́ся шата́ние и лю́тая ухищре́ния.

Песнь 6

Ирмо́с:Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Не хи́тростию челове́ческою, но Боже́ственною благода́тию/ очища́ете неду́ги челове́ков, сла́внии,/ сего́ ра́ди соше́дшеся, по до́лгу вас ублажа́ем.

Любо́вию ко Христу́, Богоно́снии, связа́еми,/ всю зло́бу де́монов разруша́ете Боже́ственною благода́тию,/ сего́ ра́ди ва́ше соверша́ем торжество́.

Я́ко су́ще виногра́да Боже́ственнаго прозябе́ния,/ вино́ нам исцеле́ний, су́щим в се́товании неду́гов, точа́ще,/ весе́лия исполня́ете, безсре́бреницы.

Богоро́дичен: Храм Тя чист соде́ла, Влады́чице, Пречи́стое Сло́во,/ Е́же Боже́ственный храм безсре́бреник/ велича́я в чудесе́х и зна́мениих всегда́.

Конда́к, глас 2:

Благода́ть прии́мше исцеле́ний,/ простира́ете здра́вие су́щим в ну́ждах, вра́чеве,/ чудотво́рцы пресла́внии,/ но ва́шим посеще́нием ра́тников де́рзости низложи́те,/ мир исцеля́юще чудесы́.

И́кос:

Вся́каго ра́зума и му́дрости прехо́дит сло́во му́дрых враче́в,/ и всем ра́зум подаю́т:/ Вы́шняго бо благода́ть прие́мше, неви́димо здра́вие да́руют всем./ Отону́дуже и мне по́вести благода́ть дарова́ся пе́ти,/ я́ко Богоно́сныя уго́дники Христо́вы и служи́тели,/ исцеле́ний мно́жество подаю́щия,/ боле́зни бо всех избавля́ют,/ мир исцеля́юще чудесы́.

Песнь 7

Ирмо́с:В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Отверза́юще исто́чник Богода́нный, святи́и,/ всем ре́ки источа́ете чи́стых исцеле́ний,/ отмыва́юще страсте́й скверне́ния и де́монов зло́бу всегуби́тельную.

Укрепля́ема Вседержи́теля Ду́ха благода́тию,/ здра́вие боля́щим всегда́ подае́т дво́ица безсре́бреник Твои́х досточу́дная,/ Сло́ве Бо́жий, Му́дросте и Си́ло.

Свят еди́н еси́, прославля́я святы́я Твоя́,/ мир бо тех ра́ди избавля́еши от бед и просвеща́еши зову́щия:/ благослове́н еси́ в хра́ме сла́вы Твоея́, Го́споди.

Богоро́дичен: Жезл из ко́рене Иессе́ева Ты прозябла́ еси́,/ цве́та Христа́ израсти́вши, Мари́е,/ я́ко цветцы́, чудесы́ украси́вшаго Своя́ безсре́бреники уго́дныя.

Песнь 8

Ирмо́с:Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

На́зи вся́кия яви́стеся вра́жия зло́бы, святи́и, Боже́ственным Ду́хом,/ нам бы́вше оде́жда спасе́ния, и оставле́ния вина́, и лю́тых премене́ние, вопию́щим:/ вся дела́, благослови́те, Госпо́дня, Господа.

Сы́нове по прича́стию Бо́жии, Дамиа́не и Космо́, бы́вше,/ ве́рою оте́ческий жре́бий ны́не обрето́сте, Небе́сное наслажде́ние/ и чуде́с све́тлое вои́стинну де́йство, и вопие́те:/ вся дела́, благослови́те, Госпо́дня, Го́спода.

Кропле́ньми ва́шими боголе́пными скве́рну омы́йте душе́вную на́шу,/ и боле́зненныя, святи́и, прожени́те стра́сти, и де́монская стремле́ния отыми́те,/ я́ко предста́телие и я́ко цели́телие на́ши ми́лостивии.

Я́ко крин, я́ко цвет мы́сленный, я́ко шипцы́, Ду́хом укра́шени, нам яви́стеся, святи́и,/ благово́ние воспуща́юще и злосмра́дие страсте́й отгоня́юще, вопию́щим:/ вся дела́, благослови́те, Госпо́дня, Го́спода.

Богоро́дичен: Умерщвля́ется смерть Тобо́ю,/ Жизнь бо родила́ еси́ Ипоста́сную, Христа́ Бо́га, Пречи́стая,/ и предста́тели жи́зни на́шея показа́вшаго, безсре́бреники врачи́, вопию́щим:/ благослове́н, Пречи́стая, Плод Твоего́ чре́ва.

Песнь 9

Ирмо́с:Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́./ Тем Тя вси велича́ем.

Се ны́не что́ добро́, или́ что красно́, я́коже пи́шет,/ но то́кмо, е́же жи́ти ны́не бра́тии в единомышле́нии,/ в ме́сте светоза́рне, в се́лех Небе́сных, во сла́ве неувяда́ющей,/ я́же по достоя́нию ублажа́ем.

Я́ко вели́к сий храм, чудесы́ всегда́ украша́емь,/ во́ньже при́сно приходя́ще, Космо́ и Дамиа́не досточу́днии,/ здра́вие тре́бующим подава́ете,/ те́мже досто́йно блажи́ми есте́.

Днесь/ сра́дуются нам, блаже́ннии, в па́мяти ва́шей,/ А́нгели и Боже́ственнии апо́столи, проро́цы и преподо́бнии и вси пра́ведницы,/ с ни́миже ра́достно водворя́ющеся, за весь мир моли́теся.

Боже́ственная дво́ице и светоза́рная,/ безсре́бреннии, и Богоно́снии, и всечестни́и,/ оставле́ние согреше́ний, и исправле́ние жития́ испроси́те,/ и всех лю́тых избавле́ние восхваля́ющим вас всегда́.

Богоро́дичен: Све́та жили́ще, Чи́стая, была́ еси́,/ вся озари́вшаго и светоно́сны и свя́ты показа́вшаго,/ ны́не тьму отъе́млюща страсте́й душетле́нных Ду́хом,/ Пречи́стая еди́на Присноде́во.

Свети́лен.

Подо́бен: Не́бо звезда́ми:

Ко́е дово́льно бу́дет сло́во безсре́бреник изрещи́ благода́ть исцеле́ний?/ И́бо суть по Бо́зе всей вселе́нней вра́чеве и спаси́телие.

Богоро́дичен:

Держа́вным Твои́м кро́вом от враг наве́та нас, Чи́стая, Твоя́ рабы́, сохрани́ вся невре́дны,/ Тя бо стяжа́хом еди́ну прибе́жище в ско́рбех.

На хвали́тех стихи́ры на 6, глас 1, самогла́сны:

Благода́ть исцеле́ний от Бо́га прие́ше,/ безсре́бренно стра́сти душ и теле́с на́ших те́пле исцеля́ете,/ всекра́снии безсре́бреницы,/ те́мже ва́ми Христо́с ве́рным да́нное здра́вие да́руя,/ свети́ла неле́стная вас показу́ет вселе́нней./ Того́ умоли́те, спасти́ся душа́м на́шим.

От вы́шняго про́мысла бе́здну исцеле́ний поче́рпше,/ всем источа́ете ве́рным исцеле́ния, безсре́бреницы,/ преесте́ственне бо неду́гующих стра́сти/ рукоде́йствии та́инственными,/ от сокро́вищ Ду́ха лечбы́ предлага́юще спаси́тельныя,/ стра́ждущих исцеля́ете./ Те́мже храм че́стен бы́сте Живонача́льныя Тро́ицы,/ в вас бо я́ве оби́тель сотвори́,/ Е́йже моли́теся/ спасти́ся душа́м на́шим.

Глас 2. Феофа́ново:

Любо́вию Боже́ственною и жела́нием бу́дущих,/ де́тельне пожи́вше,/ спаси́тельныя пути́ испра́висте./ Те́мже, чистоту́ душе́вную нескве́рно соблю́дше,/ ве́щным до конца́ проти́ву ста́сте,/ Ду́хом же Боже́ственным позла́щшеся,/ беззла́тно исцеле́ние неду́гующим подае́те,/ дво́ице свяще́нная,/ светоза́рное собра́ние,/ просвеще́нный Боже́ственный сопру́же, безсре́бреницы,/ в ско́рбех и боле́знех посеща́юще нас/ и душ на́ших неду́ги безме́здно исцеля́юще.

Ге́рманово: Вели́ким сподо́бльшеся даро́м, прехва́льнии,/ в смире́нном житии́ на земли́ пожи́сте/ и, проходя́ще всю́ду, ту́не боля́щих стра́сти исцеля́юще,/ яви́стеся А́нгелом собесе́дницы,/ Космо́ с Дамиа́ном му́дрым,/ бра́тия прекра́снии,/ и на́ша стра́сти моли́твами ва́шими исцели́те.

Стих: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них.

Исто́чник исцеле́ний еди́наго то́кмо в ле́те исцелева́ше,/ храм же безсре́бреников все мно́жество исцеля́ет неду́гующих:/ неоску́дно бо есть и неиждива́емое бога́тство святы́х./ Тех моли́твами, Христе́, поми́луй нас.

Стих: Се что́ добро́, или́ что́ красно́,/ но е́же жи́ти бра́тии вку́пе.

Ге́рманово: Ра́дуется лик святы́х во ве́ки,/ Ца́рство бо Небе́сное насле́доваша;/ земля́, мо́щи их прие́мши, благово́ние распусти́,/ раби́ Христо́вы бы́ша,/ все́льшеся в жизнь ве́чную.

Сла́ва, глас 4. Феофа́ново:

Исто́чник исцеле́ний иму́ще, святи́и безсре́бреницы,/ исцеле́ние подае́те всем тре́бующим,/ я́ко вели́ким даро́м сподо́бльшеся от приснотеку́щаго исто́чника – Спа́са Христа́./ Рече́ бо к вам Госпо́дь, я́ко единоревни́телем апо́столов:/ се дах вам власть над ду́хи нечи́стыми,/ я́коже тех изгони́ти/ и исцели́ти всяк неду́г и вся́кую я́зю./ Те́мже, в повеле́ниих Его́ до́бре пожи́вше,/ ту́не прия́сте, ту́не подае́те,/ исцеля́юще стра́сти душ и теле́с на́ших.

И ны́не, Богоро́дичен.

Аще ли случи́тся среда́ или́ пято́к, глаго́ли Крестобогоро́дичен, глас 4.

Подо́бен: Я́ко до́бля:

Распина́ема Христа́ Человеколю́бца ви́дящи Пречи́стая/ и ре́бра ископава́ема копие́м,/ пла́чущи, вопия́ше:/ что́ сие́, Сы́не Мой?/ Что́ Ти безблагода́тнии лю́дие возда́ша,/ за я́же сотвори́л еси́ до́брая им,/ и тщи́шися безча́дствовати Мя, Вселюбе́знейший?/ Удивля́юся, Благоутро́бне, Твоему́ во́льному распя́тию.

На стихо́вне Окто́иха.

Сла́ва, глас 8:

Кто не удиви́тся,/ кто не просла́вит,/ кто не воспое́т ве́рно/ му́дрых и пресла́вных безсре́бреник чудеса́?/ Я́ко да и по свято́м их преставле́нии/ всем подаю́т, притека́ющим ве́рою, бога́тно исцеле́ния,/ и честны́я и святы́я мо́щи тех источа́ют благода́ть исцеле́ний./ О дво́ице свята́я!/ О честны́я главы́!/ О прему́дросте и сла́во,/ я́же от Бо́га да́нныя вам благода́ти!/ Те́мже пе́сньми зове́м Благоде́телю Бо́гу,/ показа́вшему тех на врачева́ние душ и теле́с на́ших.

И ны́не, Богоро́дичен или́ Крестобогоро́дичен.

Подо́бен: О, пресла́внаго чудесе́:

Ю́ница Нескве́рная,/ Юнца́ ви́дящи, на Дре́ве/ пригвожда́ема во́лею,/ рыда́ющи жа́лостне:/ увы́ Мне, – вопия́ше, –/ люби́мейшее Ча́до,/ что́ Ти сонм воздаде́ безблагода́тный евре́йский,/ хотя́ Мя обезча́дствовати/ от Тебе́, Вселюбе́зне?

НА ЛИТУРГИ́И

Блаже́нны Окто́иха, на 4, и от кано́на святы́х, Песнь 3-я, на 4. Проки́мен, глас 4: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся. Апо́стол к Кори́нфяном, зачало 153. Аллилу́йя, глас 4: Се что́ добро́, или́ что красно́, но е́же жи́ти бра́тии вку́пе. Ева́нгелие от Матфе́я, зача́ло 34, от полу́. Прича́стен: Ра́дуйтеся, пра́веднии, о Го́споде:

Моли́тва

К вам, святи́и безсре́бреницы и чудотво́рцы Космо́ и Дамиа́не, я́ко к ско́рым помо́щником и те́плым моли́твенником о спасе́нии на́шем, мы, недосто́йнии, прекло́ньше коле́на, прибега́ем и, припа́дающе, усе́рдно вопие́м: не пре́зрите моле́ния нас, гре́шных, немощны́х, во мно́гия беззако́ния впа́дших и по вся дни и часы́ согреша́ющих. Умоли́те Го́спода, да проба́вит нам, недосто́йным рабо́м Свои́м, вели́кия и бога́тыя Своя́ ми́лости; изба́вите нас от вся́кия ско́рби и боле́зни, вы бо прия́ли есте́ от Го́спода и Спа́са на́шего Иису́са Христа́ неоску́дную благода́ть исцеле́ний, ра́ди тве́рдыя ве́ры, безме́зднаго врачева́ния и му́ченическия кончи́ны ва́шея. Услы́шите нас, моля́щихся, и благоприя́тным хода́тайством ва́шим испроси́те у Христа́ Бо́га правосла́вным лю́дем на враги́ побе́ду и одоле́ние. Па́ки, припа́дающе, приле́жно мо́лим: испроси́те нам от Го́спода вся благополе́зная, я́же в животе́ на́шем вре́меннем, наипа́че же ко спасе́нию ве́чному служа́щая, да сподо́бимся моли́твами ва́шими улучи́ти кончи́ну христиа́нскую, безболе́зненну, непосты́дну, ми́рну, и да изба́вимся от ко́зней диа́вольских и ве́чныя му́ки, безконе́чнаго же и блаже́ннаго Ца́рствия Небе́снаго насле́дницы бу́дем. Ей, уго́дницы Бо́жии, не преста́йте моля́щеся за ны, с ве́рою к вам притека́ющия. А́ще бо по мно́жеству грехо́в на́ших и не́смы досто́йни милосе́рдия ва́шего, оба́че вы, ве́рнии подража́телие человеколю́бия Бо́жия су́ще, сотвори́те, да принесе́м плоды́ досто́йны покая́ния и в ве́чный поко́й дости́гнем, хва́ляще и благословя́ще ди́внаго во святы́х Свои́х Го́спода и Бо́га и Спа́са на́шего Иису́са Христа́, и Пречи́стую Ма́терь Его́, и ва́ше те́плое заступле́ние, всегда́, ны́не, и при́сно, и во ве́ки веко́в. Ами́нь.