НА ВЕЧЕ́РНИ

На Го́споди, воззва́х: стихи́ры преподо́бных, глас 4.

Подо́бен: Дал еси́ зна́мение:

В пусты́ню все́льшеся единомы́слием, блаже́ннии,/ плотска́я двиза́ния посто́м, и моли́твами,/ и виде́нии све́тлыми увяди́сте я́ве,/ сердца́ же уясни́сте,/ прия́тно соде́лавше духо́вным преда́нием,/ Симео́не и Иоа́нне,/ мона́шествующих утвержде́ние.

Бу́ими притворе́нии/ мудреца́ зло́бы обезу́мил еси́, блаже́нне,/ соверша́я пресла́вная,/ де́йствуя зна́мения, де́моны отгона́,/ просвеща́я су́щия в нощи́ грехо́вней, о́тче./ И ум несмуще́н посреде́ пли́щей соблю́л еси́, Симео́не,/ безстра́стие от Бо́га прие́м.

Смире́н мудрова́нием,/ и ми́лостив, и Боголюби́в, и любве́ испо́лнен/ яви́лся еси́, Богодохнове́нне,/ умиле́н и кро́ток,/ я́коже А́нгел, по земли́ обходя́/ и житие́ име́я Небе́сное,/ те́мже почи́ на тебе́, я́коже на чистоте́, блаже́нне Симео́не,/ Оте́ц, и Сын, и Дух Святы́й.

И́ны стихи́ры проро́ка, глас 8.

Подо́бен: О, пресла́внаго чудесе́:

Иезеки́иле чу́дне,/ ю́же па́че ума́ мо́лнию/ и сла́ву неизрече́нную Госпо́дню, прему́дре,/ Херуви́мы Боже́ственными носи́му и восходя́щу/ и пева́ему тьма́ми уст,/ ума́ чистото́ю у́мно ви́дел еси́,/ предочи́стив ду́шу и те́ло, Богоблаже́нне.

Иезеки́иле Богоприя́тне,/ я́ко Христо́в подо́бник,/ чужда́го до́лга томи́тельство претерпе́л еси́,/ лю́те истяза́емь,/ преднапису́я хотя́щее честна́го ра́ди Креста́/ бы́ти ми́ру спасе́ние, Богоявле́нне, и избавле́ние./ Его́же причасти́тися всем ны́не умоли́,/ воспева́ющим тя.

Иезеки́иле Богодохнове́нне,/ сви́ток прие́м из руки́ Вседержи́теля,/ я́ве ме́да сладча́йши усто́м,/ священноявле́нен, Богови́ден/ и Богосло́в Богозрителев ты был еси́,/ прогне́вающему собо́ру/ от Бо́га, сла́вне, ра́зум пода́в.

Сла́ва, и ны́не, Богоро́дичен:

Ра́дуйся, душа́м просвеще́ние,/ согреша́ющим проще́ние,/ неради́вым исправле́ние./ Ра́дуйся, утеше́ние и ра́дость,/ скорбя́щих Помо́щнице./ Ра́дуйся, Блага́я, немощны́х душ исцеле́ние./ Ра́дуйся, примире́ние к Бо́гу и Хода́таице,/ Серафи́м всех я́ко су́щи святе́йши, Чи́стая.

Крестобогоро́дичен:

Что́ зри́мое виде́ние,/ е́же Мои́ма очи́ма ви́дится, о Влады́ко?/ Содержа́й всю тварь, на Дре́во воздви́жен быв,/ и умира́еши, всем Дая́й жизнь, –/ Богоро́дица, пла́чущися, глаго́лаше,/ егда́ узре́ на Кресте́ возноси́ма/ из Нея́ неизрече́нно возсия́вшаго Бо́га и Челове́ка.

Тропа́рь, глас 4:

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их/ в ми́ре упра́ви живо́т наш.

Тропа́рь проро́ка, глас 2:

Проро́че Бо́жий Иезеки́иле,/ предзре́вый затворе́нная Ду́хом врата́/ и Плотоно́сца, во исхо́де сих, Еди́наго сказа́вый Бо́га,/ Того́ моли́, мо́лимся,/ да отве́рзет дверь ми́лости Своея́/ и спасе́т ду́ши благоче́стно пою́щих па́мять твою́.

Ин тропа́рь проро́ка, глас то́йже:

Проро́ка Твоего́ Иезеки́иля па́мять, Го́споди, пра́зднующе,/ тем Тя мо́лим:/ спаси́ ду́ши на́ша.

НА У́ТРЕНИ

Кано́н преподо́бных, глас 4. Творе́ние Феофа́ново.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Прича́стием, е́же к Бо́гу, преподо́бне, свет был еси́,/ и к Нему́ отлучи́лся еси́, Симео́не, жела́нием кра́йним,/ благи́м наде́ждам твои́м, о́тче, исполне́ние прия́л еси́.

Жела́нием, е́же к Бо́гу, распала́емь, мир оста́вил еси́,/ спу́тника, о́тче, обре́т, Иоа́нна сла́внаго,/ с ни́мже стезю́ проше́л еси́ спаси́тельную, ра́дуяся.

Обогати́тися ника́коже истоща́емыми вожделе́вше,/ бога́тство и сла́ву вре́менную, му́дрии, и пи́щу мимотеку́щую,/ и мирско́е достоя́ние доблему́дренне отри́нусте.

Богоро́дичен: Красну́, и избра́нну, и всече́стну разуме́в Тя,/ Бо́жий, Пренепоро́чная, Сын, Твой Сын бысть,/ сы́ны сотвори́ благода́тию, Богоро́дицу Тя чту́щия.

Ин кано́н проро́ка, глас 8.

Песнь 1

Ирмо́с: Пои́м Го́сподеви,/ прове́дшему лю́ди Свои́ сквозе́ Чермно́е мо́ре,/ я́ко Еди́н сла́вно просла́вися.

Хотя́щу восхвали́ти Иезеки́иля, проро́ка Твоего́,/ дарова́ние ми пода́ждь, Благоде́телю, и благода́ть духо́вную.

Име́я восхожде́ния, Иезеки́иль свяще́нный,/ неизглаго́ланных самови́дец, Госпо́днею сла́вою озаря́ется.

Упра́вив твое́ житие́ и по́мыслу взыгра́ния плотска́я повину́в,/ проро́к яви́лся еси́ Богоприя́тный.

Богоро́дичен: Весь просвеще́н, к восто́ком многопе́тую обраще́нную дверь,/ проро́чествуеши Де́ву, Богодохнове́нне.

Песнь 3

Ирмо́с: Весели́тся о Тебе́ Це́рковь Твоя́, Христе́, зовущи:/ Ты моя́ кре́пость, Го́споди,/ и прибе́жище, и утвержде́ние.

Усе́рдно к мы́сленным совле́клся еси́ де́ланием, Симео́не,/ побежда́я вра́жия полки́ Боже́ственным посо́бием Ду́ха.

Ра́нами моли́твенными и воздержа́ния бие́нии, преподо́бне,/ страсте́й Еги́пет, о́тче Иоа́нне, уязви́л еси́.

Умори́ша врага́ по́стницы Твои́, Иису́се,/ умерщвле́ние ра́достно, Влады́ко, Твое́ живоно́сное возжела́вше.

Богоро́дичен: Избавля́ющаго челове́ки преслуша́ния лю́таго паде́ния,/ всему́ Вино́внаго, Чи́стая Всенепоро́чная, родила́ еси́.

Ин

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Умерщвле́ние стяжа́в страстно́е,/ зри́ши, сла́вне, ме́ртвых пронапи́санное, я́ко проро́к, воста́ние.

Ми́лостив быва́я Своему́ Бог созда́нию,/ Боже́ствен ра́зум тя заблужде́нным, Богоявле́нне, показа́.

Уясни́ тя, сла́вне, Божества́ сия́ние,/ И́же на Херуви́мех седя́щее, Богоглаго́ливе, тебе́ я́вльшееся.

Богоро́дичен: Ни́ву проро́к Твой прозорли́выма чи́стую зрит очи́ма,/ де́вства соблюде́нный, Благоде́телю, Тебе́ вход.

Конда́к проро́ка, глас 4.

Подо́бен: Яви́лся еси́ днесь:

Бо́жий яви́лся еси́ проро́к, Иезеки́иле чу́дне,/ воплоще́ние Госпо́дне всем провозвести́л еси́,/ Сего́ А́гнца и Зижди́теля, Сы́на Бо́жия, я́вльшася во ве́ки.

Ин конда́к преподо́бных, глас 8.

Подо́бен: Взбра́нной:

Христо́вою любо́вию распала́еми, сла́внии,/ вся, я́же в житии́, преподо́бнии, оста́висте/ и, яре́м Его́ прие́мше и свой крест на ра́мо взе́мше,/ подража́тели Того́ житию́ бы́сте/ и Боже́ственныя Его́ сла́вы прича́стницы,/ Иоа́нне Богому́дре с Симео́ном чу́дным,/ непреста́нно моли́теся о всех нас.

Седа́лен преподо́бных, глас 5.

Подо́бен: Собезнача́льное Сло́во:

Согла́сием Боже́ственным озаря́еми,/ в пути́, веду́щия к Боже́ственным сия́нием, ходи́сте ве́рно, отцы́ преподо́бнии,/ и, враго́в отбе́гше прило́гов, сы́нове све́та и дне яви́стеся,/ Иоа́нне и Симео́не Богоблаже́ннии.

Сла́ва, проро́ка, глас 3.

Подо́бен: Красоте́ де́вства:

Сло́ва воплоще́ние предуясни́л еси́, Боже́ственным Ду́хом озаря́емь,/ вели́кий в Боже́ственных проро́цех, Иезеки́иле Богодохнове́нне./ Те́мже я́ко проро́ка тя свяще́нно ублажа́ем/ и торжеству́ем па́мять твою́ днесь, согла́сно вопию́ще ти, му́дре:/ моли́ся Христу́ спасти́ ду́ши на́ша.

И ны́не, Богоро́дичен:

Недомы́сленно и непостижи́мо есть, Влады́чице Богора́дованная,/ е́же соде́ланное о Тебе́ стра́шное Бо́жие та́инство:/ и́бо Необыме́ннаго заче́нши, родила́ еси́, пло́тию обложе́на от пречи́стых крове́й Твои́х,/ Его́же всегда́, Чи́стая, я́ко Сы́на Твоего́, моли́ спасти́ся душа́м на́шим.

Крестобогоро́дичен:

Неискусобра́чная Чи́стая и Ма́ти Твоя́, Христе́,/ ви́дящи Тя, ме́ртва ви́сяща на Кресте́, ма́терски пла́чущи, глаго́лаше:/ что́ Тебе́ воздаде́ евре́йский беззако́нный собо́р и неблагода́рный,/ и́же мно́гих и вели́ких Твои́х, Сы́не Мой, даро́в наслади́выйся?/ Пою́ Твое́ Боже́ственное снизхожде́ние.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Соедини́вшеся к стезе́ пра́вды,/ Богоно́снаго Ни́кона в Боже́ственныя огра́ды внидо́сте, преподо́бнии,/ спаси́тельным сия́нием сего́ наказа́нии обогати́стеся.

Единообра́зных и преподо́бно смы́слящих Богоно́сный и преподо́бный ви́дев ва́ю,/ Боже́ственными повестьми́ и Боже́ственною оде́ждою мона́шескою украси́.

Се́рдце твое́ скрижа́ль очище́нну Свята́го Ду́ха благода́ть обре́тши, о́тче,/ написа́ соверше́нно безстра́стие, ве́ру и любо́вь нелицеме́рну.

Богоро́дичен: Седя́й на престо́ле превознесе́нне Херуви́мстем, я́ко престо́л Тя име́,/ на объя́тиях Твои́х почи́в, Мари́е Богоневе́сто,/ Препросла́вленный Бог наш.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

На тебе́ рука́ бысть твоего́ Влады́ки и Вседержи́теля,/ неизглаго́ланная уча́щи и просвеща́ющи Тя Боже́ственными веле́ньми.

Ви́дети я́ко сподо́бился еси́ ужа́сно Боже́ственная виде́ния,/ на лицы́ пал еси́ и глас услы́шал еси́ Боже́ственнаго Ду́ха.

Да́нный твои́м усто́м из руки́ Госпо́дни сви́ток, изря́дне,/ се́рдце твое́ услади́ и проро́ка Боже́ственна соверши́.

Богоро́дичен: Сия́ющу ви́де Иезеки́иль дверь Боже́ственну,/ е́юже про́йде Госпо́дь, затворе́ну Сию́ сохрани́.

Песнь 5

Ирмо́с: Ты, Го́споди, мой Свет,/ в мир пришел еси́,/ Свет святы́й, обраща́яй из мра́чна неве́дения/ ве́рою воспева́ющия Тя.

Пресве́тлу зарю́, Иоа́нне, прии́м, я́ко со́лнце, яви́лся еси́,/ де́монскую тьму отгна́в, достосла́вне.

Твои́м жела́нием, Христе́, окрили́вшеся, преподо́бнии/ жела́ния теле́сная, я́коже пе́ну морску́ю, му́дренно оттрясо́ша.

Си́лою Боже́ственною ду́ши укрепи́вше, в пусты́ню всели́стеся,/ опустева́юще стра́сти, отцы́ Богому́дрии.

Богоро́дичен: Тече́ние преста́ тле́нное,/ Де́ва бо нетле́нно породи́ Бо́га Сло́ва,/ вы́ше естества́ и сло́ва, Де́вою пребы́вши.

Ин

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Иезеки́иле блаже́нне Богоприя́тне,/ обраща́тися всех согреща́ющих наста́вил еси́ словесы́ твои́ми.

Во всем подо́бяшеся Го́сподеви проро́к:/ о чужди́х бо согреше́ниих моля́шеся.

Вити́йстии тя язы́цы не мо́гут восхвали́ти:/ пренебе́сною бо украси́лся еси́ све́тлостию.

Богоро́дичен: Боже́ственный зря́ше Тя дверь Иезеки́иль,/ е́юже нам возсия́ Светода́вец и Госпо́дь.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Ум твой весь к Бо́гу простира́я,/ непреста́нными поуче́нии плотски́я любве́ не пощаде́л еси́,/ благи́х тебе́ хода́тайствуя, Симео́не, присвое́ние.

Ни скве́рны, ни вра́ски прия́л еси́, блаже́нне, посреде́ ми́ра живы́й,/ чи́стыми же па́че моли́твами очища́еши душе́вныя скве́рны притека́ющим ти.

Сый плотски́х мудрова́ний вы́шши,/ по́мыслом не уязви́лся еси́, посреде́ жен обнажа́яся:/ безстра́стия бо оде́ждею, Симео́не, обле́клся еси́.

Богоро́дичен: Усты́, и по́мыслом, и се́рдцем, Пречи́стая, Тя, Богоро́дицу, пропове́дуем:/ Тобо́ю бо Бо́гу примири́хомся, отринове́ннии преступле́нием пе́рвее пра́отца.

Ин

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Ви́дети сподо́бился еси́ Бо́га, проро́че чу́дный,/ вся́каго явле́ния веще́ственна очи́щся, преблаже́нне.

Пло́ти превы́ше быв, взя́тся превысо́кою си́лою Ду́ха/ и све́та чи́стаго яви́лся еси́ испо́лнен.

Прече́стно житие́ имы́й,/ ликова́ние Небе́сное, пе́ния испуща́юще,/ зри́ши Херуви́мскаго Вседержи́теля.

Богоро́дичен: Ма́терь и Де́ву вои́стинну во о́бразе ви́дел еси́,/ дверь многосве́тлую, Богу и челове́ком Хода́таицу.

Конда́к преподо́бных, глас 2.

Подо́бен: Тве́рдыя:

Во пло́ти я́вльшася безпло́тнаго и доброде́тельми преми́рно просия́вшаго,/ Симео́на равноа́нгельнаго и Богоно́снаго восхва́лим,/ с ни́мже Иоа́нна приснопа́мятнаго, ве́рою и любо́вию,/ я́ко моля́щияся Го́споду непреста́нно о всех нас.

Песнь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Одержи́м христоподо́бною, о́тче, Боже́ственною любо́вию други́х спасти́,/ ра́достно весь сам, вопия́, изда́лся еси:/ благослове́н еси́ в хра́ме сла́вы Твоея́, Го́споди.

От Небесе́ тебе́ по́данную, о́тче, прие́млеши пи́щу,/ се́ю препитава́еши вся, благопоко́рно прие́млющия твоя́ повеле́ния/ и до́лу влеку́щий грех оставля́ющия, блаже́нне.

После́довав оте́ческим преда́нием, о́тче му́дре,/ па́губы Ориге́новы бе́гати злочести́выя запове́дал еси́ зову́щим:/ благослове́н еси́ в хра́ме сла́вы Твоея́, Го́споди.

Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́нна Ты в жена́х еси́, Всенепоро́чная Влады́чице.

Ин

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Храм одушевле́н яви́лся еси́ Бо́жий, Богоно́се, о всеблаже́нне,/ и церко́вным ме́рилом мы́сленно научи́лся еси́, воспева́я Ду́хом:/ оте́ц на́ших Бо́же, благослове́н еси́.

Весь сый во у́жасе, преложе́н во град святы́й иногда́,/ и Боже́ственных та́ин научи́ся явле́нием, пе́ти поуча́яся:/ оте́ц на́ших Бо́же, благослове́н еси́.

Свяще́нник я́влься Бо́га Вы́шняго, досточу́дне,/ же́ртвы и мольбы́ прино́сиши Влады́це лю́дем предстоя́щим и пою́щим:/ оте́ц на́ших Бо́же, благослове́н еси́.

Богоро́дичен: Спасти́ восхоте́ челове́ческое существо Сло́во Пребоже́ственное,/ де́вственную дверь проше́д, пло́тию из Нея́ оде́явыйся:/ оте́ц на́ших Бо́же, благослове́н еси́.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Всесве́тлая ты был еси́ звезда́, су́щия в ти́не страсте́й приводя́ к животу́,/ твори́ши бо жены́ нечи́стыя целому́дренно жи́ти и отго́ниши лю́тыя неду́ги, вопия́:/ благослови́те, вся дела́ Госпо́дня, Го́спода.

Сый цел умо́м, в скро́ве му́дрых чуде́с, преподо́бне,/ мно́гия улови́л еси́ юро́дствовати Го́спода ра́ди,/ ве́дый наруга́ным бы́ти, вопия́ чисте́йшею душе́ю:/ благослови́те, вся дела́ Госпо́дня, Го́спода.

Соверше́нно еди́ный, и́же Свои́х Си по достоя́нию сла́вя Госпо́дь,/ износи́ма, преподо́бне, и гро́бу посыла́ема, а́нгельскими светлословле́нии почита́ет, вопию́ща:/ благослови́те, вся дела́ Госпо́дня, Го́спода.

Богоро́дичен: Избавля́яй нас, возсия́ из Тебе́ Госпо́дь, Де́во Чи́стая,/ Его́же моли́, Влады́чице, просвети́ти пою́щия Тя и обстоя́ния нас изба́вити, вопию́щих:/ благослови́те, вся дела́ Госпо́дня, Го́спода.

Ин

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Свяще́нством проро́ческим проро́чествия свяще́нно украша́емь, сия́еши, проро́че,/ Христа́ Жизнода́вца поя́ во вся ве́ки.

На коле́ну преклоня́ющася, я́ко Благ, о ми́ре,/ зри́теля приими́ Твоея́ сла́вы, Иезеки́иля,/ я́ко да Тя пое́м во вся ве́ки.

Жела́нием Боже́ственным разже́гся,/ научи́лся еси́ па́че ума́ та́йнам, Иезеки́иле, вопия́:/ Тя, Христе́, превозно́сим во ве́ки.

Богоро́дичен: Струю́ оставле́ния, из но́щи у́тренюя, де́вства зря, Иезеки́иль Го́сподеви вопия́ше:/ Тя превозно́сим во ве́ки.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Всем се́рдцем Тро́ице усе́рдно возложи́вшеся/ и и́же от Нея́ лучи́ благоде́тельно прие́мше,/ светови́дни бы́сте и со А́нгелы лику́ете.

Жела́нием Боже́ственным приедини́вшеся и воздержа́нием просве́щшеся,/ ча́емых благ в прича́стии уже́ бы́сте/ и блаже́нное обрето́сте, Богоблаже́ннии, наслажде́ние.

Ва́ша прия́т боле́зни и по́ты весе́лие, конца́ ника́коже иму́щее,/ в не́мже пита́ющеся, Симео́не преподо́бне и Иоа́нне сла́вне,/ нас непреста́нно помина́йте.

Богоро́дичен: Спаси́ мя, всех ро́ждшая Изба́вителя и Благоде́теля,/ разори́ души́ моея́ о́блаки, Све́та о́блаче, Свята́я Влады́чице,/ и си́льна соде́лай на стра́сти, борю́щия мя.

Ин

Ирмо́с: Проявле́нное на горе́ законополо́жнику во огни́ и купине́/ Рождество́ Присноде́вы/ в на́ше, ве́рных, спасе́ние/ пе́сньми немо́лчными велича́ем.

Заре́ю сия́я, проро́че, благоче́стия, во огни́ и купине́ дре́вле Моисе́ю Я́вльшася,/ и сам ви́дети сподо́бился еси́ Тя, та́йно науча́юща неизглаго́ланным.

Свяще́нник показа́лся еси́, и таи́нник, и законоположи́тель,/ и проро́к прему́др, и подо́бник Влады́це и, страсте́й Его́ прича́стник быв,/ ны́не снасле́дник яви́лся еси́.

О, неизглаго́ланнаго и Боже́ственнаго светоявле́ния,/ Его́же ны́не наслажда́ешися, блаже́нне,/ издале́ча зря во Отце́ Сы́на и Ду́ха, три Ипоста́си Божества́.

Богоро́дичен: Ты еси́, Богоро́дице, ору́жие на́ше и стена́,/ Ты еси́ заступле́ние на Тя наде́ющимся,/ Тебе́ и ны́не на моли́тву подвиза́ем, да изба́вимся от враг на́ших.