НА ВЕ́ЛИЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 2.
Подо́бен: Егда́ от Дре́ва:
Егда́ тле́нному царю́ во́инствуя на земли́,/ ве́рен Бо́гу, Иоа́нне, во́ин был еси́,/ тогда́ Небе́снаго Царя́ Христа́ по́мощь прии́м,/ му́чеником Христо́вым помога́я,/ побежда́л еси́ враги́ ви́димыя и неви́димыя,/ и ны́не со а́нгельскими си́лами и во́инствы в Вы́шних лику́еши./ Те́мже, блаже́нне страстоно́сче,/ Спаси́телю всех за ны моли́ся/ спасти́ ду́ши на́ша.
Земно́е во́инство оста́вити восхоте́в,/ Небе́сному Царю́ Христу́ потща́лся еси́ угоди́ти,/ ве́рою бо в Него́ вооружи́вся,/ си́лою честна́го Креста́ Его́/ во́ин кре́пок, Иоа́нне, обре́лся еси́,/ от мучи́телей злочести́вых му́ченики Христо́вы сохраня́я/ моли́твами твои́ми к Бо́гу, блаже́нне.
Егда́ ве́рою во Христа́ Бо́га и моли́твою/ преподо́бных жре́бий получи́ти возжела́л еси́,/ тогда́ ве́ры ра́ди Христо́вы му́чащимся спосо́бствовал еси́./ Сего́ ра́ди дарова́нии чуде́с обогати́ тя Христо́с Госпо́дь,/ в разли́чных бо ско́рбех призыва́ющим тя/ помо́щник скор обрета́ешися./ Те́мже моли́ся Бо́гу о нас,/ творя́щих всечестну́ю па́мять твою́.
И́ны стихи́ры, глас то́йже.
Подо́бен: Ки́ими похва́льными:
Прииди́те, святолю́бцы,/ вси духо́вно возвесели́мся и торжеству́им,/ сла́вяще Христа́ и Бо́га на́шего,/ я́ко пребога́тую трапе́зу днесь нам предложи́,/ па́мять сла́внаго му́ченика и до́бляго во́ина Иоа́нна,/ помо́щника всем в ско́рбех,/ и злых дел обличи́теля,/ и погубле́ний та́йных яви́теля,/ прося́щим его́ по́мощи.
Богодарова́нную благода́ть, Иоа́нна,/ восхва́лим песнопе́нии,/ благоче́стия побо́рника,/ хра́браго во́ина, изя́щнаго чудотво́рца,/ помо́щника оби́димым,/ благове́рным предста́теля/ и врача́ безме́зднаго,/ в во́инстве ратобо́рца,/ и от напра́сных сме́ртей храни́теля,/ и путе́й благи́х изве́стника,/ мо́лится бо Бо́гу вся лю́ди благоде́йствовати.
Преблаже́нне добропобе́дный Иоа́нне,/ во́ине кре́пкий Всетворца́ на́шего Бо́га,/ ты душе́вное твое́ благоро́дие богоизбра́нне соблю́л еси́,/ презре́в суету́ и пре́лести ми́ра,/ человеколю́бне су́щим в муче́ниих спострада́л еси́./ И ны́не в Небесе́х со Христо́м сла́дце водворя́ешися,/ отню́дуже назира́й и сохраня́й в ратобо́рстве и во вся́ких злоключе́ниих/ вся, призыва́ющия тя.
Что тебе́ принесе́м, Тво́рче Бо́же?/ Ко́е воздади́м благодаре́ние?/ Я́ко дарова́л еси́ лю́дем твои́м/ и́стинную благода́ть, свята́го Иоа́нна,/ во́ина благочести́ва, ми́лости твори́теля,/ на бра́нех во́ином спосо́бника,/ вся́ких печа́лей уте́шителя/ и моли́твенника тебе́ во спасе́ние на́ше те́плаго./ Те́мже ра́ди ми́лости твоея́/ спаси́ ны, Влады́ко Человеколю́бче.
Сла́ва, глас 6:
За Христа́ усе́рдно, Иоа́нне,/ подвиза́вся с му́ченики Христо́выми,/ в ве́ре благочести́вей христиа́ном помоществу́я,/ я́ко во́ин изря́ден твоему́ Влады́це был еси́./ Тре́бующим подава́я пита́ние/ и ми́лостыню изоби́льно ни́щим уготовля́я,/ небре́гл еси́ повеле́ния Иулиа́на, законопресту́пнаго царя́,/ разруша́я же мучи́тельныя его́ сосу́ды,/ изя́щен добропобе́дник в Правосла́вии яви́лся еси́./ Те́мже преше́л еси́ в Небе́сныя кро́вы/ и та́мо Христа́ Иису́са всера́достно зри́ши,/ Иже нетле́нным увязе́ тя венце́м./ Его́же, всеблаже́нне, непреста́нно моли́/ ве́чнаго блаже́нства сподо́битися досто́йно честву́ющим тя.
И ны́не, Богоро́дичен: Кто Тебе́ не ублажи́т:
Вход. Проки́мен дне. И чте́ния 3 му́ченическая (зри день 24-й).
На лити́и стихи́ры, глас 8:
Му́чениче Христо́в, прехва́льне Иоа́нне,/ гони́теля, беззако́ннаго царя́, стремле́ния/ и ну́ждную смерть ни во что́же вмени́л еси́,/ благоде́рзостно и мужему́дренно ополчи́вся к боре́нием./ Те́мже победоно́сною сла́вою венча́вся,/ приче́лся еси́ всем пра́ведным,/ с ни́миже тя, хва́ляще, ублажа́ем.
Му́чениче Христо́в, преблаже́нне Иоа́нне,/ ви́дя Христо́вы му́ченики, на закла́ние ведо́мы,/ друголю́бно о́нем помога́л еси́./ Страда́ти бо до кро́ве и сме́рти ты́я поуча́я, глаго́лал еси́:/ ничто́же есть зде на́ше страда́ние/ проти́ву бу́дущаго в Небесе́х воздая́ния./ Та́же и сам спострада́ти тем/ любве́ ра́ди Творца́ твоего́ подви́глся еси́,/ сего́ ра́ди, от Христа́ Бо́га чуде́с дарова́ние прие́м,/ в разли́чных напа́стех стра́ждущим помога́еши/ и изыма́еши от лю́тых бед сла́вящия Го́спода/ и честву́ющия любо́вию свяще́нная твоя́ страда́ния.
Му́чениче Госпо́день, непобеди́мый Иоа́нне,/ благода́ти нося́ и́мя,/ благода́ть и ми́лость подава́еши ве́рно моли́твами тя призыва́ющим/ и приво́диши в ра́дость лю́ди богому́дрыя,/ ве́рно в по́мощь напа́стей свои́х зову́щия тя/ и честву́ющия священнора́достную па́мять твою́,/ те́мже моли́ся Христу́ Иису́су,/ да спасе́т ны от всех бед, я́ко Всеси́лен.
Сла́ва, глас 4:
Кто не удиви́тся, или́ кто не просла́вит,/ или́ не воспое́т верному́драго и сла́внаго Христо́ва во́ина Иоа́нна чудеса́?/ я́ко и по честне́м свое́м преставле́нии/ всем подае́т, притека́ющим усе́рдно к нему́, премно́гая врачевства́:/ и́бо честны́я и святы́я его́ мо́щи/ источа́ют благода́ть изоби́льну в поле́зная проше́ния./ Те́мже благоче́стно вопие́м ему́:/ моли́ непреста́нно Го́спода,/ да спасе́т вся правосла́вныя лю́ди,/ ве́рою во святы́й твой храм притека́ющия/ и прося́щия те́плаго к Бо́гу заступле́ния,/ тебе́ бо усе́рдна хода́тая к Нему́ и́мамы/ и моли́твенника о душа́х на́ших.
И ны́не, Богоро́дичен: При́зри на моле́ния:
На стихо́вне стихи́ры, глас 4.
Подо́бен: Я́ко до́бля:
Многообра́зными муче́нии/ лю́тый мучи́тель/ казни́ти предаде́ свято́е те́ло твое́./ Ты же, Богомы́сленне Иоа́нне,/ не отве́рглся еси́ Христа́,/ ни куми́ром поже́рл еси́,/ но претерпе́л еси́ до́блественне,/ ожида́я бу́дущаго воздая́ния,/ неконча́емаго в Бо́зе наслажде́ния.
Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
Доброде́тельным твои́м житие́м/ мир презре́л еси́, Иоа́нне чудотво́рче,/ и, ве́лие милосе́рдие христиа́ном/ в чинонача́льстве твоего́ во́инства сотворя́я,/ в свобо́ду о́нех пуща́л еси́./ Отню́дуже и сам за Христа́ Бо́га/ в ве́ре Правосла́вней пострада́в,/ прия́л еси́ насле́дие ве́чнаго блаже́нства.
Стих: Насажде́ни в дому́ Госпо́дни,/ во дво́рех Бо́га на́шего процвету́т.
Исцеле́ний дарова́ние источа́ют/ твоя́, сла́вне, мо́щи/ честву́ющим тя усе́рдно,/ потопля́юща стра́сти/ и врачу́юща неду́ги, Иоа́нне,/ и разоря́ют лука́вых де́монов толпы́,/ напоя́ют же ве́рных сердца́,/ и́же прозяба́ют доброде́телей плоды́ Боже́ственныя/ и благоче́стия разуме́ние.
Сла́ва, глас 8:
Прииди́те, христолюби́вии лю́дие,/ до́брый по́двиг и благоду́шное му́жество/ во благове́рии сотворе́нное разу́мне созерца́им./ Но́вый бо вене́чник Иоа́нн,/ вели́кий моли́твенник и му́ченик,/ си́це вопие́т царю́ богоме́рзкому, законопресту́пному Иулиа́ну:/ злоко́зненными твои́ми словесы́/ в сладостра́стие су́етнаго сего́ ми́ра не мо́жеши мя прельсти́ти,/ ниже́ отлучи́ши любве́ Всетворца́ моего́ Бо́га,/ аз бо на Него́ упова́ю/ и к Нему́ все мое́ жела́ние простира́ю,/ да Его́ Небе́снаго Ца́рствия бу́ду насле́дник./ Те́мже, сла́вяще Христа́ Царя́, му́ченика хва́лим/ и усе́рдно днесь в па́мяти его́ про́сим:/ свя́те Иоа́нне,/ моли́ся вы́ну мир ми́ру дарова́ти/ и душа́м на́шим ве́лию ми́лость.
И ны́не, Богоро́дичен: Влады́чице, приими́:
Тропа́рь, глас 4:
Всеблага́го Бо́га и Царя́/ благове́рный раб и во́ин яви́лся еси́, Иоа́нне чудоде́телю,/ пострада́в бо ра́ди ве́ры му́жески,/ блаже́нно же сконча́в тече́ние,/ зри́ши Всетворца́ Го́спода в Небесе́х светле́йше./ От Него́же прие́м дарова́ние чуде́с,/ стра́ждущим челове́ком во вся́ких напа́стех помога́еши,/ укрепля́еши во́ины в ра́тех,/ от враго́в плене́ния, ран же и внеза́пных смерте́й и от бед лю́тых изыма́еши./ Те́мже моли́ Влады́ку Христа́, приснопа́мятне,/ да во вся́ком обстоя́нии сотвори́т нам ми́лость/ и не введе́т нас во искуше́ния,/ но спасе́т ду́ши на́ша, я́ко Человеколю́бец.
Ин тропа́рь, глас 8:
Блаже́нство ева́нгельское возлюби́в, Богому́дре Иоа́нне,/ чистоту́ се́рдца де́вством почти́л еси́./ Те́мже суету́ ми́ра сего́ пренебре́г,/ устреми́лся еси́ зре́ти Бо́га,/ И́же тя просла́ви чудесы́ во врачева́нии разли́чне стра́ждущих./ Сего́ ра́ди мо́лим тя:/ проси́ нам у Христа́ Го́спода вся́ких скорбе́й избавле́ния/ и получе́ния Ца́рства Небе́снаго.
Сла́ва, и ны́не, Богоро́дичен.
НА У́ТРЕНИ
На Бог Госпо́дь: тропа́рь свята́го, дважды. Сла́ва, и ны́не, Богоро́дичен во глас тропаря.
По 1-й стихоло́гии седа́лен, глас 1.
Подо́бен: Гроб Твой, Спа́се:
Стра́сти честны́х ви́дев му́чеников и тех целова́в у́зы,/ на высоту́ восте́кл еси́ свиде́тельства, пречу́дне,/ и жела́ние все ко Христу́ возложи́в, стра́ждущим помога́я и а́лчущия пита́я,/ всем ми́лостивый засту́пник был еси́,/ до́ндеже в ру́це Госпо́дни ду́шу твою́ пре́дал еси́, Иоа́нне многострада́льне.
Сла́ва, и ны́не, Богоро́дичен:
Наде́ждо христиа́н, Пресвята́я Де́во,/ Его́же родила́ еси́, Бо́га, па́че ума́ и сло́ва,/ непреста́нно моли́ с Вы́шними си́лами и со страстоте́рпцем Иоа́нном/ да́ти оставле́ние грехо́в нам всем и исправле́ние жития́,/ ве́рою и любо́вию при́сно Тя прославля́ющим.
По 2-й стихоло́гии седа́лен, глас 8.
Подо́бен: Прему́дрости:
Царю́ веко́в Безсме́ртному угожда́я, истука́нным не поже́рл еси́,/ царя́ же беззако́ннаго вся́кия сове́ты злоко́зненныя отрази́л еси́, сла́вне,/ Того́ ра́ди же́ртву тебе́ сама́го прине́сл еси́ Поже́ршемуся Сло́ву./ Тем и чуде́с источа́еши струи́,/ в напа́стех стра́ждущим ми́лостивый предста́телю и моли́твенниче ко Христу́ Бо́гу,/ Иоа́нне вели́кий, во́ине Цара́ Христа́ Бо́га на́шего,/ Его́же моли́ грехо́в оставле́ние дарова́ти/ честву́ющим любо́вию святу́ю па́мять твою́.
Сла́ва, и ны́не, Богоро́дичен:
Со́лнца о́блаче разу́мнаго,/ Боже́ственнаго све́та свети́льниче златокова́нный,/ Нескве́рная, Небла́зная, Всенепоро́чная Влады́чице,/ омраче́нную ду́шу мою́ ослепле́нием страсте́й безстра́стия заре́ю просвети́, молю́ся,/ и оскверне́нное мое́ се́рдце очи́сти пото́ки умиле́ния,/ покая́ния же слеза́ми омы́й нечистоту́ дел мои́х, да любо́вию зову́ Ти:/ Богоро́дице Присноде́во, моли́ Христа́ Бо́га прегреше́ний оставле́ние пода́ти ми,/ Тебе́ бо и́мам наде́жду, раб Твой.
Велича́ние:
Велича́ем тя,/ страстоте́рпче святы́й Иоа́нне,/ и чтим честна́я страда́ния твоя́,/ я́же за Христа́/ претерпе́л еси́.
Псало́м избра́нный: Бог нам прибе́жище и си́ла:
По полиеле́и седа́лен, глас 4.
Подо́бен: Удиви́ся Ио́сиф:
Я́ко до́блему страда́льцу и во́ину кре́пкому Всецарю́ющаго Христа́,/ взыва́ем ти, Иоа́нне:/ ра́дуйся, му́чеником украше́нне и ле́пото;/ ра́дуйся, све́тлая Це́ркве звездо́ и стено́ и приста́нище/ притека́ющим к тебе́, великому́чениче сла́вне, Иоа́нне во́ине./ Тя пою́щия спаса́й твои́ми моли́твами от вся́каго вре́да чужда́го/ и от лю́тых озлобле́ний изба́ви.
Сла́ва, и ны́не, Богоро́дичен:
Я́ко к Цари́це, Небе́сныя си́лы превосходя́щей,/ су́щей Ма́тери Христа́ Бо́га на́шего, Держа́вней Помо́щнице ро́да на́шего,/ припа́дающе, мы, гре́шнии раби́ Твои́, умиле́нно вопие́м Тебе́:/ Влады́чице Де́во Мари́е Богоро́дице,/ во все вре́мя жи́зни на́шея при́сно управля́й ны в во́лю Го́спода Царя́ Небе́снаго/ и сохраня́й от вся́ких напа́стей и неду́гов душе́вных и теле́сных,/ не вверя́ющи челове́ков по́мощи, и поми́луй ны, Всепе́тая.
Та́же степе́нна, 1-й антифо́н 4-го гла́са. Проки́мен, глас 4: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится. Стих: Насажде́ни в дому́ Госпо́дни, во дво́рех Бо́га на́шего процвету́т. Вся́кое дыха́ние: Ева́нгелие от Иоа́нна, зача́ло 51.
По 50-м псалме́ стихи́ра, глас 6:
Днесь созыва́ет нас страстоте́рпца всеми́рное торжество́:/ прииди́те, боголю́бцы,/ све́тло пра́зднуим па́мять его́, глаго́люще:/ ра́дуйся, великому́чениче Иоа́нне,/ Царя́ Небе́снаго во́ине непребори́мый,/ и́бо ты повеле́ние безу́мное/ законопресту́пнаго царя́ Иулиа́на, идолочти́теля, преоби́дел еси́ му́жески;/ ра́дуйся, блаже́нне, страстоте́рпцем Христо́вым помо́щниче,/ я́ко ты́я в гоне́нии от злочести́вых в ве́ре Правосла́вней утвержда́л еси́/ и им любе́зно сострада́л еси́./ Сего́ ра́ди Христо́с дарова́нии чуде́с обогати́л тя есть,/ моли́ у́бо Всеблага́го Бо́га/ спасти́ ду́ши на́ша.
Кано́н Богоро́дицы на 6 и свята́го на 8 два кано́на. Кано́н свята́го, глас 2.
Песнь 1
Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.
Све́тлое пра́зднество твое́, свя́те Иоа́нне, ра́достно на духо́вную трапе́зу нас созыва́ет,/ в не́йже учрежда́еши ны вся, к тебе́ притека́ющия, дарова́нии,/ в по́льзу проше́ния нам исполня́я.
По́двигом до́брым подвиза́вся на земли́, преблаже́нне Иоа́нне,/ и от зла́го мучи́теля му́ченики Христо́вы сохраня́я,/ прия́л еси́ от Христа́ Бо́га Небе́сную жизнь,/ отню́дуже в ско́рбех нам пода́ждь по́мощь.
Во́инством и́стинным, Богому́дре, злочести́ваго царя́ небре́г мучи́тельства/ и бога́тство ни́щим Христа́ ра́ди расточи́в,/ прия́л еси́ дар чуде́с от Бо́га,/ лука́выя челове́ки облича́я, благочести́вым спосо́бствуеши.
Во́инство земно́е небре́гл еси́,/ иногда́ Христа́ ра́ди те́ло свое́ удруча́я посто́м и моли́твою,/ и враги́ посрами́л еси́./ Сего́ ра́ди и чудесы́ от Бо́га обогати́лся еси́.
Богоро́дичен: Воплоти́ся из Тебе́ боголе́пно Сло́во Безпло́тное/ премно́жеством человеколю́бия, Пречи́стая Де́во;/ Его́же, Влады́чице, моли́ ве́чное блаже́нство дарова́ти нам.
Други́й кано́н, глас 1.
Песнь 1
Ирмо́с: Вознесу́ Тя, Бо́же, Спа́се мой,/ я́ко воскре́сл еси́ от ме́ртвых,/ попра́в смерть.
Иису́се, Спа́се наш,/ пода́ждь нам усе́рдие благодари́ти Тя о всем/ и восхвали́ти уго́дника Твоего́, Иоа́нна.
Страстоте́рпче сла́вне Иоа́нне,/ богому́дрым смы́слом вво́инился еси́ Всетворцу́ Бо́гу,/ победи́ у́бо вся враги́ на́ша.
Зре́ти удосто́ивыйся Бо́га воплоще́на,/ всехва́льне во́ине, мо́лим тя:/ твои́ми мольба́ми изба́ви ны от всех бед.
Богоро́дичен: Богора́дованная, Сло́ва Предве́чнаго Пала́то, Мари́е Де́во,/ милосе́рдием Твои́м сердца́ на́ша в ско́рбех увеселя́й о Бо́зе при́сно.
Песнь 3
Ирмо́с: На ка́мене мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.
С му́ченики несумне́нну ве́ру стяжа́в, благоду́шне,/ и Христу́ Иису́су быв во́ин, доброде́тельми обогати́лся еси́;/ те́мже соверша́ющим па́мять твою́ честну́ю благо́е просвеще́ние всегда́ да́руй.
Лука́внующим зле неви́димый гони́тель, му́чениче Христо́в, явля́ешися/ и крадьбы́, в та́йне су́щия, открыва́еши,/ прия́л бо еси́ власть от Бо́га поле́зная ко спасе́нию всем содева́ти.
Я́коже столп непоколе́блем, се́рдце твое́, всече́стне Иоа́нне, име́я,/ любо́вь му́чеником Христо́вым сотвори́л еси́, не боя́ся царе́ва суровства́,/ те́мже в любви́ Госпо́дни утвержда́тися нам помози́.
Я́ко дерзнове́ние име́я к Бо́гу, Иоа́нне,/ во́ин ны́не Небе́сному Царю́ сый,/ проси́ нам грехо́в оставле́ния, пра́зднующим па́мять твою́.
Богоро́дичен: Богоро́дице, Ма́ти Го́спода Иису́са,/ со все́ми святы́ми Того́ моли́ изба́вити ны от всех бед и скорбе́й,/ я́ко да посра́мятся вси, явля́ющии рабо́м Твои́м зла́я,/ хвали́ти же с Сы́ном Тя при́сно нас сподо́би.
Ин
Ирмос: Утвержде́й сло́вом Твои́м вселе́нную,/ я́же не подви́жится,/ утверди́ и на́шу мысль в страх Твой, Влады́ко Го́споди.
Тебе́, Творцу́ на́шему Бо́гу, во вся́ком обстоя́нии, припа́дающе, мо́лимся:/ му́ченика Твоего́ мольба́ми в во́ли и любви́ Твое́й утверди́ нас.
Тве́рдым умо́м стал еси́ на правоте́ богозна́ния, Богоблаже́нне Иоа́нне,/ те́мже утвержда́й ду́ши на́ша во Го́споде наде́жду во всем полага́ти.
По́хоть пло́ти, по́хоть оче́с и го́рдость жития́ презре́в,/ утверди́лся еси́ в любви́ Иису́сове, му́чениче,/ нам в тойжде помо́щник бу́ди.
Богоро́дичен: Всеблаже́нная Влады́чице,/ утвержда́ющаго вся Христа́ Го́спода поро́ждши,/ в про́мысле Его́ пребыва́ти укрепи́ ны всегда́.
Ин конда́к, глас 3:
Вели́кая ско́рбным лю́дем ра́дость в беда́х обрета́ешися, чудотво́рче Иоа́нне,/ вся́кия бо стра́сти моля́щим тя врачу́еши,/ исполня́я их проше́ния./ Те́мже и ны́не моли́ Го́спода,/ да спасе́т ны в ми́лости Свое́й.
Седа́лен, глас 8.
Подо́бен: Прему́дрости:
Царю́ Небе́сному и Творцу́ веко́в угожда́я при́сно,/ законопресту́пнаго Иулиа́на мучи́теля вся злокова́рныя и богоме́рзкия сове́ты отрази́л еси́, сла́вне,/ и́долом безду́шным же́ртвы возбрани́в твори́ти,/ и та́ко в по́двизе ду́шу твою́ в ру́це Го́споду Бо́гу пре́дал еси́./ Его́же моли́, свя́те Иоа́нне, прегреше́ний оставле́ние нам дарова́ти,/ честву́ющим святу́ю па́мять твою́.
Сла́ва: Му́жеством души́ ве́рою вооружи́вся,/ глаго́л Бо́жий, я́ко копие́, взем, врага́ уязви́л еси́,/ му́чеником похвала́ и удобре́ние, вели́кий Иоа́нне.
И ны́не, Богоро́дичен:
О Тебе́ ра́дуется, Благода́тная, вся́кая тварь,/ а́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́,/ из Нея́же Бог воплоти́ся, и Младе́нец бысть, пре́жде век Сый Бог наш:/ ложесна́ бо Твоя́ престо́л сотвори́/ и чре́во Твое́ простра́ннее небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.
Песнь 4
Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.
Уподо́бился еси́ распе́ншемуся во́лею на Дре́ве Христу́ Бо́гу на́шему, всече́стне,/ сраспе́нся Ему́ вся́ким воздержа́нием,/ моли́твою же, и ми́лостынею, и мно́гими добродея́ньми.
Се да́же до сме́рти, Иоа́нне му́чениче, смири́лся еси́:/ святы́я бо твоя́ мо́щи на ме́сте в погребе́нии стра́нных бы́ша сокрове́ны,/ сего́ ра́ди Госпо́дь по всей вселе́нней тебе́ просла́ви.
Цари́ престу́пника Иулиа́на во́инство тле́нное во вла́сти содержа́в,/ от того́ по́слан был еси́ убива́ти Христо́вы му́ченики./ Но ты, блаже́нне, ты́я храня́, в ве́ре утвержда́л еси́, во е́же пе́ти:/ сла́ва си́ле Твое́й, Го́споди.
Небе́снаго ра́ди ра́дования и бу́дущаго пра́ведным весе́лия/ земна́я вся оста́вил еси́ мудрова́ния,/ и, вся́чески доброде́тельми Бо́гу угожда́я,/ за ны моли́ся, Иоа́нне всече́стне.
Богоро́дичен: Недоуме́ние во спасе́ние предлежи́т ми, от обыше́дших мя зол, Пречи́стая./ Те́мже изба́ви мя от них ско́ро, благоразу́мие подаю́щи,/ к Тебе́ бо еди́ней прибего́х, Богома́ти.
Ин
Ирмо́с: Разуме́х, Всеси́льне,/ Твое́ смотре́ние/ и со стра́хом просла́вих Тя, Спа́се.
Ве́лие Твое́, Го́споди, смотре́ние во всем ми́ре,/ ему́же усе́рдно предае́мся,/ Тебе́ со святы́ми моля́щеся.
По́двиг добр, му́чениче, во страда́нии соверши́в,/ благоразу́мием во стра́се Го́спода прославля́ти помози́ нам.
Братолю́бне в гоне́нии лю́дем Бо́жиим помога́л еси́,/ страх отве́ргий мучи́телей, Иоа́нне:/ страх напа́стей отве́ржи от нас.
Богоро́дичен: Всеси́льнаго Цари́ Цари́ца и Ма́ти сподо́билася еси́ бы́ти;/ сподо́би ны сла́вити Его́ к нам в ми́лости смотре́ние.
Песнь 5
Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.
Та́ин Боже́ственных вкуси́в в ра́зуме, Иоа́нне,/ про́поведь Бо́жия рожде́ния испове́дал еси́, глаго́ля пред все́ми:/ ино́го бо́га, ра́зве Всетворца́, не зна́ю.
Возлюби́вшаго Го́спода люби́те, – возглаго́лал еси́, страстоте́рпче, стра́ждущим му́чеником,/ в Его́же лю́бви утверди́вся, обогати́лся еси́ чудесы́,/ врачу́я боле́зни мно́гия.
Сла́ву ми́ра сего́ ни во что́же, Богому́дре во́ине, вмени́л еси́,/ сла́вы ра́ди Христо́вы,/ те́мже, страда́льчество соверши́в и сла́вы Боже́ственныя сподо́бився,/ нам получи́ти о́ную моли́ся.
Не убоя́вся законопресту́пнаго цари́ повеле́ния,/ вме́сто мук христиа́ны заступа́ше,/ и сокрыва́хуся твои́м повеле́нием,/ и сего́ ра́ди во́ин бысть ю́ си́лам.
Богоро́дичен: Тя, Влады́чице, мо́лим, сла́вяще Твое́ о нас милосе́рдие:/ вся́ких ны скорбе́й, Мари́е, свободи́/ и помози́ у́треневати нам к Бо́гу и ве́чнаго блаже́нства сподо́битися.
Ин
Ирмо́с: От но́щи неве́дения просвеще́й концы́,/ просвети́ мя у́тром/ человеколю́бия Твоего́, Го́споди.
Человеколю́бче Влады́ко, просвеща́й ны в па́мяти моле́бней страда́льца Твоего́/ у́треневати к Тебе́ благогове́инством.
Просвети́лся еси́, му́чениче Иоа́нне, богодарова́нными чудесы́,/ тем от злых челове́к, тщеты́ и боле́зни сла́вящия тя премени́.
Светоно́сным у́тром, побежда́я вся душетли́тельныя враги́ до́блественне,/ от ско́рбных тьмы страсте́й во свет ра́дости привлецы́ ны.
Богоро́дичен: Я́же Бо́га во пло́ти на́шей родила́ еси́, Де́во Пречи́стая,/ све́том Небе́сным осия́тися нам Ему́ моли́ся,/ ми́лость ко всем простира́ющи.
Песнь 6
Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
Си́лою Бо́жиею укрепи́вся, му́чеников сла́во, Иоа́нне,/ преще́ний нечести́вых небре́гл еси́;/ ны́не же зря ра́достне Бо́га,/ от злых нас изба́ви.
Моли́твами и посто́м и в целому́дрии/ вся́ким воздержа́нием Бо́гу угоди́л еси́, всече́стне;/ свы́ше назира́я, свобожда́й ны от ско́рби.
Проси́мая честву́ющим тя ве́рно, блаже́нне, подае́ши,/ злы́я челове́ки облича́я, о ка́ющихся же Бо́гу моля́ся.
Му́ченическое дерзнове́ние восприи́м,/ потща́лся еси́ по ве́ре Христо́ве побора́ти, я́коже до́брый во́ин,/ вооружи́ себе́ си́лою Креста́ Госпо́дня,/ от Него́же да́ром чуде́с обогати́ся.
Богоро́дичен: Уврачу́й, Богоро́дице, стра́сти душ и теле́с на́ших,/ Врача́ Христа́ нам поро́ждши,/ и вра́жие злокова́рство посрами́ милосе́рдием Твои́м.
Ин
Ирмо́с: Со Ио́ною вопие́м Ти, Го́споди,/ со гла́сом хвале́ния моля́щеся:/ возведи́ от тли живо́т наш.
Не преста́нем моли́ти Тя, Всеще́драго Го́спода,/ подви́жуще с на́ми ве́рнаго во́ина,/ изыма́я от грех, всели́ ны в Небе́сную жизнь.
Хва́лиши, свя́те Иоа́нне, в Вы́шних Бо́га, ве́рно зде служи́в Ему́,/ отню́дуже прибли́жися и нам, тя хва́лящим, во спасе́ние.
Стра́сти Христа́ ра́ди терпе́в, всехва́льне,/ всера́достное блаже́нство получи́л еси́,/ те́мже и на́ша мольбы́ приими́ и введи́ ны в ра́дость.
Ве́лию ве́ру стяжа́л еси́ ко Христу́ Бо́гу,/ вели́ки же и да́ры чуде́с Боже́ственных прия́л еси́ от Него́,/ и от де́йствия их прояви́лся еси́./ И ны́не творя́щих твое́ пра́зднество и па́мять/ моли́ся Го́сподеви изба́вити от вся́кия ну́жды и печа́ли.
Богоро́дичен: Пречи́стая Де́во, от тле́ния пагубоно́снаго мир спа́сшая,/ от вся́каго зла́го обстоя́ния нас изба́ви.
Конда́к, глас 6:
Благочести́ваго во́ина Христо́ва,/ победи́вшаго враги́ душе́вныя и теле́сныя богому́дренно,/ Иоа́нна му́ченика достодо́лжно пе́сньми восхва́лим,/ чудоде́йствуя бо, подае́т оби́льная исцеле́ния стра́ждущим лю́дем/ и мо́лится Го́споду Бо́гу/ от вся́ких бед спасти́ правове́рныя.
И́кос:
Кто по́двиги твоя́ и страда́ния ра́ди ве́ры в Го́спода Иису́са/ изрещи́ возмо́жет, прехва́льне Иоа́нне?/ Или́ ки́ими тя увенча́ем похвала́ми,/ ра́ди му́жественнаго твоего́ в зако́не Госпо́дни и во и́стиннем благоче́стии стоя́ния?/ Попра́л бо еси́ вся ко́зни душетли́теля врага́,/ целому́дрием и вся́кими добротворе́нии вооружи́вся;/ бога́тство и сла́ву и по́хоть вре́дную возненави́дев,/ нищету́ и поноше́ние Христо́во возлюби́л еси́,/ стра́ждущим в ско́рбех помога́я./ Те́мже, всели́вся в Небе́сныя кро́вы, дарова́нии пресла́вных чуде́с обогати́лся еси́./ Отту́ду у́бо, блаже́нне, вся, притека́ющия к тебе́, назира́й, по́мощи творя́,/ во е́же от вся́ких бед спасти́ правове́рныя.
Песнь 7
Ирмо́с: Образу злато́му, на по́ли Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огни́ вве́ржени, ороша́еми, поя́ху:/ благослове́н еси́, Бо́же оте́ц на́ших.
Безбо́жное мучи́теля законопресту́пнаго веле́ние, страстоте́рпче Иоа́нне, преоби́дев,/ богочести́в Всемогу́щаго Царя́ во́ин показа́лся еси́,/ благода́тне же ороша́емь, с людьми́ Бо́жиими пел еси́:/ благослове́н еси́, Бо́же оте́ц на́ших.
Сла́дкое и вели́кое и ра́достное торжество́ ны́не лю́ди Госпо́дни облиста́,/ е́же му́чеников до́блейший целому́дрый Иоа́нн вообрази́./ То́чит бо цельбы́ моля́щимся ве́рно Го́споду, и́же взыва́ют:/ благослове́н еси́, Бо́же оте́ц на́ших.
Дерзнове́ние име́я ко Влады́це всех, свя́те Иоа́нне, я́ко бли́жний уго́дник Его́,/ во обстоя́нии напа́стей на́ших предста́тельствуй Ему́ о нас/ и помога́й изба́витися нам от грехо́в, да богому́дренно пое́м:/ благослове́н еси́, Бо́же оте́ц на́ших.
Дерзнове́ние име́я к своему́ Влады́це,/ о нас моли́тву сотвори́, Иоа́нне,/ и проше́ния на́ша испо́лни,/ и грехо́в проще́ния испроси́ нам моли́твами твои́ми, вопию́щим:/ благослове́н еси́, Бо́же оте́ц на́ших.
Богоро́дичен: Пресла́вное соверши́ся та́инство в Тебе́, Богома́ти,/ безсе́менно бо зачала́ еси́ Сы́на бре́мя грех на́ших упраздни́вшаго./ Те́мже, упова́ние на Тя иму́ще и Твою́ по́мощь зря́ще, усе́рдно вопие́м:/ благослове́на еси́, Де́во Влады́чице.
Ин
Ирмо́с: Вся дела́ Твоя́ и́стинна/ и пра́ви путие́ Твои́,/ Бо́же оте́ц на́ших.
Безме́здный врачу́ Иоа́нне,/ исцели́ моли́твами твои́ми неду́ги и стра́сти душ и теле́с Го́сподеви вопию́щих:/ благослове́н еси́, Бо́же оте́ц на́ших.
Де́ло вся́кия доброде́тели испра́вил еси́/ и же́ртву тя Всетворцу́ возложи́л еси́, вопия́:/ благослове́н еси́, Бо́же оте́ц на́ших.
Всеблаго́му Бо́гу в чистоте́ моли́твою и посто́м угожда́я, му́чениче,/ даждь нам богоуго́дне зва́ти:/ благослове́н еси́, Бо́же оте́ц на́ших.
Богоро́дичен: Всенепоро́чная Де́во, Путь и И́стину, Христа́, ро́ждши,/ руководи́ нас в Го́рнюю жизнь, к Бо́гу оте́ц на́ших.
Песнь 8
Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.
Вы́шних ища́й, на земли́ пре́лести возненави́дел еси́, Богоблаже́нне./ Те́мже, с му́ченики Христо́выми в любви́ духо́вней соедини́вся,/ дерзнове́нно Богочелове́ка Иису́са пропове́дал еси́, о Не́мже зове́ши:/ благослови́те, вся дела́ Госпо́дня, Го́спода.
Неоску́дно тре́бования подава́я,/ ни́щим был еси́ гото́вый пита́тель, во́ине благочестивому́дренне Иоа́нне./ И ны́не, притека́ющия к тебе́ назира́я, испо́лни тех проше́ния, да ра́достно зове́м:/ благослови́те, вся дела́ Госпо́дня, Го́спода.
Всезри́тель Бог, усе́рдие твое́, Иоа́нне, и соверше́нную ве́ру ви́дев,/ просла́ви тя сла́вою ве́чною./ Его́же моли́ в по́льзе уще́дрити ны, богому́дренно пою́щия:/ благослови́те, вся дела́ Госпо́дня, Го́спода.
Моле́ния на́ша приими́, ны́не приноси́мая тебе́, пра́ведному страстоте́рпцу./ Тебе́ бо даде́ Госпо́дь чудесе́м дарова́ние/ подая́ти прося́щим ве́рно проше́ния и превознося́щим Христа́ во ве́ки и пою́щим:/ благослови́те, вся дела́ Госпо́дня, Го́спода.
Богоро́дичен: Мари́е Богоневе́сто, к Тебе́ прибега́ем и Тебе́, припа́дающе, мо́лимся:/ виждь, Влады́чице, скорбь на́шу и озлобле́ние от враг на́ших/ и умири́ жизнь всех нас, Миротво́рца поро́ждши Го́спода,/ Его́же благослови́м во ве́ки.
Ин
Ирмо́с: Царя́ сла́вы и Победи́теля сме́рти,/ Иису́са Назоре́я,/ Того́ превозноси́те во вся ве́ки.
Царю́ Небе́сный, побе́ду на си́лу вра́жию свято́му Твоему́ му́ченику дарова́вый,/ да́руй и нам во избавле́ние от нужд сла́вити Тя во вся ве́ки.
Царя́ Го́спода ра́достно, блаже́нне, в Вы́шних узре́л еси́,/ моли́ся, да мы чи́стым се́рдцем Его́ превозно́сим во вся ве́ки.
Царю́яй во Христе́ во́ине,/ вся ва́рвары победи́ и злоко́зненныя разори́ на нас сове́ты,/ да превозно́сим Го́спода во вся ве́ки.
Царю́ ца́рствующим и Го́споду госпо́дствующим во́ин изря́ден показа́ся/ и с пра́ведными венце́м венча́ся нетле́нным от руки́ Вседержи́теля Го́спода.
Богоро́дичен: Цари́це Всемо́щная,/ Царя́ и Бо́га ма́терски моли́,/ да везде́ Его́ превозно́сим и Тя, Госпожу́, пое́м во вся ве́ки.
Песнь 9
Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.
Добр яви́лся еси́ посо́бник, пресла́вне, лю́дем Бо́жиим, гони́мыя сокрыва́я,/ и ны́не чуде́сне помоществу́еши ве́рным,/ сего́ ра́ди в па́мяти благодея́ний твои́х Христа́ Бо́га велича́ем.
Твоя́ чудеса́, преблаже́нне Иоа́нне, во всем ми́ре пропове́даются;/ те́мже и днесь, собра́вшеся, сла́ву возсыла́ем Христу́, тебе́ просла́вльшему.
Нас, восхваля́ющих тя, му́чениче Христо́в,/ и твоея́ по́мощи прося́щих, днесь услы́ши,/ и к поле́зным управля́ти не преста́й,/ моли́твенник тепле́йший и хода́тай к Бо́гу на́шему явля́яся.
Изря́ден врач серде́ц челове́ческих чудодея́нии яви́лся еси́, Иоа́нне,/ помоществу́я всем богочести́вым;/ тем, воспева́юще тя, Христа́ велича́ем.
Богоро́дичен: Пе́ти, Де́во, Тя не престае́м,/ Помо́щницу, покро́в, ско́рое заступле́ние и Предста́тельницу на́шу непосты́дную;/ соблюди́ Твоя́ рабы́ от вся́каго озлобле́ния/ и от ко́зней лука́ваго свобожда́й при́сно.
Ин
Ирмо́с: Служи́тель безпло́тный предста́, глаго́ля Благода́тней:/ Госпо́дь с Тобо́ю!/ Юже велича́ем.
Го́споди сил, бу́ди с на́ми,/ укрепля́я иера́рхи, иере́и же и вся лю́ди Твоя́, моли́твами свята́го спаса́я,/ да благоче́стно Тя и Богоро́дицу непреста́нно вси велича́ем.
Моли́ся, свя́те Иоа́нн, Бо́гу в Тро́ице,/ да удосто́ит ве́рующия во Имя Его́/ богому́дренно, я́ко Всетворца́, при́сно велича́ти.
Твою́ па́мять соверша́ющия, Госпо́день уго́дниче,/ предста́в, от печа́лей свободи́ и напо́й ра́дости,/ во е́же с Богома́терию Го́спода велича́ти.
А́ще и на земли́ во́инство оста́вив, но Небе́сному Царю́ во́ин нарече́ся Христо́в,/ лука́вых нахо́ды вспять возвраща́я и ве́рным прося́ грехо́в проще́ния./ Те́мже, Иоа́нне блаже́нне, тя воспева́юще, Христа́ велича́ем.
Богоро́дичен: Облагода́тствованная Мари́е,/ при́зри на вся лю́ди Твоя́ ми́лостию,/ да Тя безконе́чно в ра́дости велича́ем.
Свети́лен.
Подо́бен: Со ученики́:
Венцено́сче святе, предстоя́й со А́нгелы Христо́ву Престо́лу/ и све́та отту́ду исполня́яйся, страстоте́рпче,/ мир ми́ру моли́твами твои́ми исхода́тайствуй/ и нам спасе́ние, благоче́стно па́мять твою́ соверша́ющим/ и в ско́рбех притека́ющим к тебе́, Иоа́нне всебога́те.
Сла́ва Отцу́, и Сы́ну, и Свято́му Ду́ху.
Подо́бен: Не́бо звезда́ми:
Позна́нием себе́ сама́го позна́л еси́ Всетворя́щую Вину́, Бо́га,/ в Него́же и уве́ровал еси́/ и, Того́ испове́дав, просвеща́еши мир чудесы́, Иоа́нне Богоблаже́нне.
И ны́не, Богоро́дичен:
Во чре́ве Твое́м Госпо́дь, погиба́ющий мир от тле́ния призва́ти восхоте́в,/ я́коже ве́дяше, всели́ся, Богоро́дице./ Спасе́ние у́бо вси обре́тше, вопие́м Тебе́:/ ра́дуйся, Всепе́тая Де́во, поро́ждши ра́дость всей вселе́нней,/ обра́дуй и нас, от враго́в злоде́йства храня́щи всегда́.
На хвали́тех стихи́ры на 4, глас 6.
Подо́бен: Всю отложи́вше:
Страда́ния ви́дев/ добропобе́дных му́чеников,/ дерзнове́ния Боже́ственнаго испо́лнився,/ не убоя́лся еси́ мучи́теля, злочести́ваго царя́,/ но, со усе́рдием к ним прише́д,/ на по́двиг укрепля́л еси́ их./ С ни́миже моли́ся Го́споду,/ страда́льче Иоа́нне,/ спасти́ся душа́м на́шим.
Пло́ть с кро́вию па́дающу/ ви́дя мно́гих святы́х,/ от беззако́ннаго царя́ Иулиа́на стра́ждущих/ за Христа́, Бо́га на́шего,/ сим, блаже́нне, во у́зах и злострада́ниих помога́л еси́,/ благо́ю бесе́дою утеша́я,/ да наде́жды благи́я не отпа́дают,/ но да ожида́ют бу́дущаго воздая́ния/ и венце́в Небе́сных ра́дования.
Терпе́нием твои́м, Иоа́нне всехва́льне,/ мзду стяжа́л еси́,/ ду́шу твою́ всех Влады́це в ру́це преда́в,/ и от Него́ дарова́нии чуде́с обогати́лся еси́./ Моли́ у́бо Христа́ Бо́га/ о чту́щих любо́вию святу́ю па́мять твою́.
Зре́ти тя сподо́бися/ жена́ благочести́вая,/ е́йже ты, страда́льче, яви́вся,/ повеле́л еси́ честны́я твоя́ мо́щи просла́вити,/ та́я же с ра́достию сия́ прие́мши,/ с ми́рными благоуха́нии це́ркви предложи́./ Моли́ся, страда́льче, Христу́ Бо́гу,/ и певце́м твои́м пода́ти ве́лию ми́лость.
Сла́ва, глас 5.
Подо́бен: Востру́бим:
Стеце́мся ве́рою,/ и любо́вию возопии́м пра́зднственная,/ и лику́им, ра́дующеся,/ в настоя́щее торжество́ Христо́ва во́ина,/ Иоа́нна прехва́льнаго;/ правосла́внии лю́дие да стеку́тся/ и ли́цы архиере́йстии да воспою́т пе́сньми/ страда́льческое пра́зднество,/ во́инства а́нгельская да веселя́тся зря́ще./ Того́ бо ве́мы в беда́х предста́теля/ и уныва́ющим и́стинное ра́дование,/ ни́щих обогати́теля,/ и во всех находя́щих лю́тых уте́шителя,/ и вся везде́ те́пле предваря́юща./ Ему́же ны́не си́це рцем:/ во́ине Христо́в Иоа́нне,/ спаси́ ве́рою притека́ющия ко свяще́нному хра́му твоему́/ моли́твами твои́ми.
И ны́не, Богоро́дичен, глас то́йже:
Востру́бим трубо́ю пе́сней:/ прекло́ньши бо ся свы́ше, Всецари́ца Ма́ти Де́ва/ благослове́нии венча́ет воспева́ющия Ю́./ Лю́дие да стеку́тся/ и Цари́це да воспле́щут в пе́снех,/ Царя́ ро́ждшей,/ И́же сме́ртию пе́рвее держи́мыя разреши́ти человеколю́бно благоволи́./ Па́стырие и учи́телие,/ До́браго Па́стыря Пречи́стую Ма́терь, соше́дшеся, восхва́лим:/ све́щник златоза́рный, светоно́сный о́блак,/ небе́с простра́ннейшую,/ одушевле́нный киво́т, огнезра́чный Влады́чень престо́л,/ манноприе́мную злату́ю ста́мну,/ затворе́нную Сло́ва дверь,/ всех христиа́н прибе́жище,/ пе́сньми благоглаго́ливыми похваля́юще, си́це рцем:/ Пала́то Сло́ва,/ сподо́би смире́нныя ны Небе́снаго Ца́рствия,/ ничто́же бо невозмо́жно хода́тайству Твоему́.
Славосло́вие вели́кое. И отпу́ст.
НА ЛИТУРГИ́И
Блаже́нны от кано́на 1-го песнь 3-я, на 4 и 2-го кано́на песнь 6-я, на 4. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́ти ми ся к Тебе́. Апо́стол к Ри́мляном, зача́ло 116, Аллилу́ия, глас 4: Мно́ги ско́рби пра́ведным, и от всех их избавит я́ Госпо́дь. Ева́нгелие от Матфе́я, зача́ло 69. Прича́стен: В па́мять ве́чную бу́дет пра́ведник:
Моли́тва
О му́чениче Христо́в, Иоа́нне во́ине! Хра́брый еси́ во бра́нех, и враго́м прогони́тель, и оби́димым засту́пник, всем правосла́вным христиа́ном. О вели́кий засту́пниче и уго́дниче Христо́в, Иоа́нне вои́нственниче! Поми́луй нас, гре́шных и недосто́йных, и заступи́ в беда́х и в ско́рбех, и в печа́лех и во вся́кой злой напа́сти, и от вся́каго зла́го и оби́дящаго челове́ка, тебе́ бо дана́ бысть такова́я благода́ть от Бо́га, е́же моли́тися за ны, гре́шныя, в беда́х и напа́стех зле стра́ждущия. Изба́ви у́бо нас от оби́дящих и ненави́дящих, бу́ди нам побо́рник кре́пок на вся ви́димыя и неви́димыя враги́ на́ша. О вели́кий побо́рниче, Иоа́нне во́ине! Не забу́ди нас, всегда́ моля́щихся тебе́, прося́щих по́мощи и неоску́дныя ми́лости твоея́, и сподо́би нас, гре́шных и недосто́йных, получи́ти от Бо́га неизрече́нная блага́я, я́же угото́ва лю́бящим Его́. Я́ко подоба́ет Ему́ вся́кая сла́ва, честь и поклоне́ние, Отцу́ и Сы́ну и Свято́му Ду́ху, ны́не, и при́сно, и во ве́ки веко́в. Ами́нь.