ВЕ́ЧЕР

На Го́споди, воззва́х: стихи́ры, глас 4.

Подо́бен: Я́ко до́бля:

Еллинская служе́ния,/ я́коже прах, истни́л еси́/ и себе́ возста́вил еси́ столп одушевле́н Богоразу́мия/ благода́тию Христа́ Бо́га на́шего, му́чениче Емилиа́не,/ и храм свяще́ния, и недви́жимо благоче́стия основа́ние/ чту́щим до́блия твоя́ по́двиги,/ богому́дренно, пребога́те.

И огне́м снеда́емь, и ра́нами уязвля́емь,/ и в темни́цах, сла́вне, затворя́емь,/ и многообра́зно оскорбля́емь,/ истука́нным не поже́рл еси́,/ ни отве́рглся еси́ Христа́,/ но непобеди́м пребы́л еси́./ Те́мже подава́ет тебе́ побе́ды вене́ц Влады́ка,/ я́коже добр Подвигополо́жник,/ я́ко Царь неизме́нный.

От крове́й твои́х багряни́цу омочи́л еси́,/ в ню́же оде́явся,/ вшел еси́ в Ца́рствия, сла́вне,/ Вы́шняя, ра́дуяся,/ и Бо́гу, всех Царю́, во ве́ки предстои́ши,/ прося́ чту́щим тя ве́рою ми́ра и здра́вия/ и ско́раго от лют избавле́ния.

Сла́ва, и ны́не, Богоро́дичен, глас и подо́бен то́йже:

Ту́чами Ду́ха Пресвята́го, Пречи́стая,/ мою́ мысль ороси́,/ Я́же ка́плю ро́ждшая, Христа́, неизче́тно,/ безме́рная беззако́ния челове́ков щедро́тами измывшую,/ изсуши́ исто́чник страсте́й мои́х/ и пото́ка мя сподо́би пи́щи живы́я при́сно моли́твами Твои́ми.

Крестобогоро́дичен, подо́бен то́йже:

На Кресте́ Тя я́ко узре́ пригвожде́на, Го́споди,/ А́гница и Ма́ти Твоя́ дивля́шеся/ и, что́ виде́ние сие́, – взыва́ше, –/ Сы́не вожделе́нне?/ Сии́ Ти неве́рный собо́р воздаде́ беззако́нный,/ и́же мно́гих Твои́х чуде́с наслади́выйся./ Но сла́ва неизглаго́ланному соше́ствию Твоему́, Влады́ко.

Тропа́рь, глас 4:

Му́ченик Твой, Го́споди, Емилиа́н/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ ду́ши на́ша.

Кано́н, творе́ние Ио́сифово, его́же краегране́сие: Емилиа́на му́ченика пою́ сла́вно. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Восхва́лим днесь над все́ми Бо́га на́шего/ и сего́ му́ченика да восхва́лим, пострада́вшаго зако́нно/ и побе́ды вене́ц взе́мшаго си́лою духо́вною.

Кре́постию оде́явся в на́шу не́мощь благода́тию, сла́вне му́чениче, Обле́кшагося,/ обнажи́л еси́ и́дольскаго неможе́ния су́етное шата́ние, Богоблаже́нне.

Еди́ницу Тричи́сленную, совокупля́ему в То́мже Естестве́,/ сла́вне, ра́дуяся, пропове́дал еси́ и многобо́жную разори́л еси́ лесть,/ пострада́в тве́рдо, Богоблаже́нне.

Богоро́дичен: Кре́пость моя́, и пе́ние,/ и просвеще́ние се́рдца моего́ есть, Всенепоро́чная, Христо́с Госпо́дь,/ Его́же родила́ еси́, во двою́ существу́,/ во Еди́ной же Ипоста́си разумева́ема.

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Свети́льник нога́м твои́м бысть/ и свет стеза́м твои́м и́стинно зако́н Бо́га на́шего,/ и́мже препа́л еси́ беззако́ннующих стопы́, му́ченически украша́емь.

Напра́вил еси́ ума́ твоего́ ше́ствия/ к Боже́ственней во́ли, му́дре, приста́нищу ти́хому,/ многобо́жия мо́ря волну́ющася духо́в лука́вствия избе́гл еси́.

Емилиа́на Боже́ственным страда́нием,/ и ве́ре да́же до кончи́ны, и му́жеству удиви́шася си́лы Небе́сныя,/ ка́ко, пло́тию безпло́тнаго смири́в, низве́рже.

Богоро́дичен: Зако́нов естества́ утаи́вшися,/ преесте́ственным рождество́м Де́вою по рождестве́, Де́во Ма́ти, пребыла́ еси́:/ Соде́теля бо всея́ тва́ри, Чи́стая, родила́ еси́.

Седа́лен, глас 8.

Подо́бен: Прему́дрости:

Си́лою Боже́ственною укрепи́вся,/ бо́ги безбо́жных безве́стию коне́чному пре́дал еси́, страда́льче до́блественный,/ и, вшед в суди́лище, тве́рдо страда́ние строга́ния и пла́мень му́жески претерпе́л еси́./ Те́мже проше́л еси́ по́двиг Боже́ственный,/ побе́ды, ра́дуяся, вене́ц прия́л еси́, Емилиа́не прехва́льне./ Моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Седя́й в Сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Бо́жие тя Боже́ственное жела́ние пресла́вно распали́,/ те́мже го́рьких ран опале́ние претерпе́л еси́, и бо́ги безбо́жных соже́гл еси́,/ и ду́ши ве́рных, преблаже́нне, ороси́л еси́.

Презре́л еси́ вре́менная пребыва́ющих ра́ди/ и Боже́ственней любви́ всю ду́шу твою́ привяза́л еси́,/ тем нече́стия держа́ву разори́л еси́, страстоте́рпче Емилиа́не досточу́дне.

Еди́но Естество́, Еди́ну сла́ву Трисо́лнечнаго Божества́ благоче́стно прославля́я, Емилиа́не,/ в суди́лище, я́ко во́ин добль, вшел еси́/ и зми́я кре́пкаго на зе́млю низложи́л еси́.

Богоро́дичен: Свяще́ния Тя ме́сто, нас освя́щшаго,/ Пресвята́я Отрокови́це, еди́ну обре́тшуюся сла́вим:/ Ея́же ра́ди, на земли́ живу́щии, обожи́хомся/ и жи́зни и́стинныя сподо́бихомся.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Окропле́ньми погаси́л еси́ свяще́нных крове́й твои́х, Емилиа́не, огнь безбо́жия,/ те́мже и чуде́с исто́чник источи́л еси́, езе́ра изсуша́ющ страсте́й/ и неду́ги потопля́ющ и погружа́ющ де́моны.

Просте́рта тя би́ти злочести́вый повеле́./ Те́мже, растерза́ему те́лу твоему́ и ра́нами уязвля́ему,/ уязви́вшагося на Кресте́ страсть вообрази́л еси́, страда́льче, блаже́нную.

Сый испо́лнен даро́в духо́вных, неду́ги неисце́льныя цели́ши боля́щих,/ уставля́еши опале́ние, ду́хи отгоня́еши лука́выя/ и всем в печа́лех помога́еши, досточу́дне.

Богоро́дичен: Ору́жием уя́звена мя грехо́вным, исцели́ де́йственным Твои́м врачевство́м,/ Спа́са Христа́ ро́ждшая, копие́м уя́звеннаго мене́ ра́ди, Пречи́стая,/ и пробо́дшаго се́рдце змии́но.

Песнь 6

Ирмо́с: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой,/ Многоми́лостиве.

Бога́т и испо́лнен Боже́ственныя сла́вы муче́нием, блаже́нне, был еси́/ и со А́нгелы на Небесе́х живе́ши,/ моли́ спасти́ся душа́м на́шим.

Те́ла ме́ртвеннаго ты не пощаде́л еси́,/ те́мже безсме́ртие пребыва́ющее насле́довал еси́,/ умертви́вся любве́ ра́ди, сла́вне, стра́сти Умертви́вшаго.

Ми́ро исцеле́ний источа́ет моще́й твои́х ра́ка,/ пребога́те до́блий му́чениче,/ и упраждня́ет смердя́щия всегда́ челове́ков неду́ги.

Богоро́дичен: Е́ва у́бо объя́т от дре́ва плод смертоно́сен,/ Ты же, Пречи́стая, Жи́зни Дре́во породила́ еси́,/ его́же вкус вся умира́ющия оживи́л есть.

Конда́к, глас 3.

Подо́бен: Боже́ственныя ве́ры:

Боже́ственною ре́вностию распаля́емь,/ огня́ сослужа́щаго не устраши́лся еси́,/ но возше́д небоя́зненно во́лею,/ возгнеща́ющим огне́м всесожже́гся,/ и Влады́це, я́ко же́ртва, прине́слся еси́,/ му́чениче сла́вне Емилиа́не,/ Христа́ Бо́га моли́/ дарова́ти нам ве́лию ми́лость.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Просвеще́н благода́тию, блаже́нне, Боже́ственнаго Ду́ха,/ пе́щное запале́ние проше́л еси́ и пел еси́, неопали́м:/ препе́тый отце́в Госпо́дь и Бог, благослове́н еси́.

Распала́емь жела́нием, блаже́нне, рачи́теля твоего́ Христа́,/ огня́ не ужа́слся еси́, в не́мже орошае́мь Ду́хом, пел еси́:/ препе́тый отце́в Госпо́дь и Бог, благослове́н еси́.

Красото́ю страда́ний уподо́бился еси́ безпло́тным, му́дре,/ прекра́сному Христу́ с ни́ми предстоя́, пое́ши, ра́дуяся:/ препе́тый отце́в Госпо́дь и Бог, благослове́н еси́.

Богоро́дичен: Господоимени́тая Богоневе́сто, ра́дуйся, ве́рою Тебе́ зове́м,/ и́бо родила́ еси́ ра́дость неизглаго́ланную, Христа́ Го́спода, Ему́же зове́м:/ отце́в Госпо́дь и Бог, благослове́н еси́.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Разори́в служе́ния пре́лести, у́зами вме́сто тебе́ держи́маго, прему́дре, разреши́л еси́/ и к муче́нию самохо́тне изда́лся еси́, вопия́, прехва́льне:/ Го́спода по́йте, дела́, и превозноси́те Его́ во вся ве́ки.

Се обрето́хся не и́щущим, ни вопроша́ющим яви́хся, зове́ши, пресла́вне:/ разуме́йте, беззако́ннии, я́коже бо а́гня незло́биво, закла́тися поспеши́х,/ Го́спода, – вопия́, – благослови́те, и превозноси́те Его́ во вся ве́ки.

Вели́кий Емилиа́н на трапе́зу нас призва́, предложи́в, я́ко сне́ди, своя́ боре́ния,/ духо́вне напита́емся, ве́рнии, и воспое́м:/ Го́спода по́йте, дела́, и превозноси́те Его́ во вся ве́ки.

Богоро́дичен: Ка́пли мне одожди́ ми́лости, Исто́чник ми́лости ро́ждшая,/ и греха́ моего́ изсуши́ наводне́ния, и души́ моея́ укроти́ свире́пыя во́лны,/ Де́во Богоро́дице Мари́е, да Тя сла́влю во вся ве́ки.

Песнь 9

Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.

Ви́дети жела́я Бо́жие неизглаго́ланное весе́лие и све́тлость,/ вся кра́сная, я́же в житии́, усе́рдно преоби́дел еси́, сла́вне,/ и, ра́дуяся, му́чение проше́л еси́./ Те́мже тя ве́рою ублажа́ем.

Я́ко заколе́ние, испече́но огне́м, прехва́льне, заколе́ному я́коже овча́ти,/ к Боже́ственней трапе́зе прине́слся еси́,/ благово́нием Ду́ха соблюда́емь и славы и́стинныя сподобля́емь./ Те́мже тя любо́вию ублажа́ем.

Днесь па́мять твоя́ нам возсия́, страстоте́рпче, па́че со́лнца,/ всех веселя́щи сердца́ ве́рных, мы́сли просвеща́ющи и тьму неду́гов отгоня́щи,/ ю́же моле́бно пра́зднуем.

Пе́рвенец избра́нный лик сограждани́на тя стяжа́,/ му́ченицы вси, с ним тя зря́ще лику́юща, ра́дуются,/ с ни́ми же и нас, помина́ющих тя, помина́й, му́чениче великоимени́те.

Богоро́дичен: Све́том мя просвети́ Твои́м, Препе́тая, во тьме ходя́щаго,/ даждь ми ру́ку по́мощи,/ о́блаки души́ моея́ отжени́,/ страсте́й мои́х бу́рю ути́ши, отча́янных Прибе́жище.