ВЕ́ЧЕР

На Го́споди, воззва́х: стихи́ры на 6, глас 8.

Подо́бен: О, преславнаго чудесе́:

О, пресла́внаго чудесе́!/ Превознесе́нную горды́ню/ зе́млю и мо́ре потреби́ти ре́кшаго/ к земли́ смири́ла есть/ млада́ отрокови́ца и всенепоро́чная,/ кова́рствия его́ победи́вши./ О, си́лы Креста́ и благода́ти!/ я́же нам всю утверди́ я́ве не́мощь.

Му́ченице Мари́но прехва́льная,/ ни муче́ния тя огнь, ни пи́щи наслажде́ние,/ ни мирски́я ра́дости, ни красота́ ю́ности/ я́же ко Христу́ любве́ отлучи́,/ жела́ющую красоты́, ю́же па́че ума́,/ честна́го Жениха́ твоего́ получи́ти,/ ея́же сподо́билася еси́, Богоблаже́нная.

Му́ченице Мари́но всесла́вная,/ в Небе́сных оби́телех всели́вшися досто́йно/ с деви́ческими чи́нми/ и му́ченик во́инствы,/ творя́щих ве́рою па́мять твою́/ и приступа́ющих ве́рно покро́ву твоему́/ спаса́й моли́твами твои́ми/ и согреше́ний оставле́ние у Бо́га испроси́, и избавле́ние,/ и ве́лию ми́лость.

Сла́ва, глас 2:

Во гра́де Бо́га на́шего, в горе́ святе́й Его́,/ ту всели́ся свята́я,/ свещу́ неугаси́му соблю́дши,/ услы́шим де́выя похвалу́./ О де́вство, Це́ркви Бо́жия!/ О де́вство, му́чеником сла́ва!/ О де́вство, А́нгелом соприча́стниче!

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

Дре́ву Кре́стному Тя, Иису́се,/ пригвожде́на зря́щи Неискусобра́чная,/ пла́чущи, глаго́лаше:/ Ча́до сла́дкое,/ почто́ оста́вил еси́ Мене́, ро́ждшую Тя еди́ну?/ Све́те Непристу́пный Пребезнача́льнаго Отца́,/ потщи́ся и просла́вися,/ я́ко да сла́ву получа́т Боже́ственную/ и́же Боже́ственныя стра́сти Твоя́ сла́вящии.

На стихо́вне Окто́иха. Сла́ва, глас 2:

Во гла́се ра́дования и во псалме́х восклица́ния/ воспои́м Мари́ну му́ченицу,/ я́ко низложи́ на зе́млю и́дольскую пре́лесть/ и сопроти́внаго врага́ му́жески под но́зе свои́ подложи́./ Те́мже и, сконча́вшися, на Небеса́ возлете́,/ на главе́ вене́ц нося́щи и взыва́ющи:/ Тебе́, Женише́ мой, жела́ю/ и, жела́ния любо́вь иму́щи ,/ за Тя плоть мою́ огню́ преда́х,/ да вселю́ся у́бо в ве́чныя Твоя́ оби́тели,/ иде́же есть веселя́щихся жили́ще.

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

Егда́ Нескве́рная А́гница ви́де Своего́ А́гнца,/ на заколе́ние я́ко Челове́ка во́лею влеко́ма,/ пла́чущи, глаго́лаше:/ безча́дствовати Мя ны́не тщи́шися, Христе́, ро́ждшую Тя,/ что́ сие́ сотвори́л еси́, Изба́вителю вся́ческих?/ Оба́че воспева́ю и сла́влю Твою́,/ ю́же па́че ума́ и сло́ва,/ кра́йнюю бла́гость, Человеколю́бче.

Тропа́рь, глас 4:

А́гница Твоя́, Иису́се, Мари́на/ зове́т ве́лиим гла́сом:/ Тебе́, Женише́ мой, люблю́,/ и, Тебе́ и́щущи, страда́льчествую,/ и сраспина́юся, и спогреба́юся креще́нию Твоему́,/ и стражду́ Тебе́ ра́ди,/ я́ко да ца́рствую в Тебе́,/ и умира́ю за Тя́, да и живу́ с Тобо́ю,/ но я́ко же́ртву непоро́чную приими́ мя, с любо́вию поже́ршуюся Тебе́./ Тоя́ моли́твами,/ я́ко Ми́лостив, спаси́ ду́ши на́ша.

НА У́ТРЕНИ

Кано́на о́ба Окто́иха без му́ченичнов и святы́я на 6, его́же краегране́сие: Христо́ву де́ву му́ченицу неве́сту пе́сньми пою́. Глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Лику́ющи, му́ченице, о Бо́зе и луча́ми исполня́ема от Него́,/ зарю́ мне пода́ждь светоно́сну твои́ми моли́твами, до́брая де́во.

Теку́щих и нестоя́тельное и тле́нное,/ му́дрым умо́м обложе́на, му́ченице Христо́ва, презре́ла еси́ разу́мно/ и пра́ведных сподо́билася еси́ вышния све́тлости.

Ра́бски прихожду́ к тебе́, честна́я,/ твои́ми мольба́ми жите́йских мя бед спаси́, му́ченице страстоно́сице,/ и страсте́й мои́х утиши́ смуще́ние.

Му́дростию и благода́тию просве́щся ум твой, Мари́но,/ мучи́телей преще́ния не устраши́лася еси́, му́ченице Спа́сова,/ Боже́ственною си́лою укрепля́ема.

Богоро́дичен: Стезю́ показа́ла еси́ жи́зни, Жизнь су́щую заче́нши/ и пло́тски ро́ждши Сию́, Богома́ти,/ и у́зы сме́ртныя расто́ргла еси́.

Песнь 3

Ирмо́с: Несть свят я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди.

Ни огнь, ниже́ ра́ны, ни ме́чное сече́ние,/ ни мучи́телей суровство́, ни смерть же, ни звере́й свире́пство/ Боже́ственныя отлучи́ тя любве́, прехва́льная.

Была́ еси́ непоколеби́м и непреклони́м во вре́мя обстоя́ния столп, всесла́вная,/ благоче́стия основа́ние положе́но ве́ры на ка́мени, преблаже́нная.

Де́ва в му́ченицах была́ еси́,/ в де́вах непобеди́ма му́ченица была́ еси́ ты, Христу́ уневе́стившися,/ сугу́б тебе́ подаю́щу вене́ц, всенепоро́чная.

Святы́х крове́й твои́х, до́брая де́во, то́ки излива́емы всю угаси́ша и́дольскую лесть,/ и собо́р привела́ еси́ му́ченик Жениху́ твоему́.

Богоро́дичен: Укре́пльшеся благода́тию, Богоро́дицу Тя единому́дренно сла́вим,/ плоть бы́вшаго, е́же бы́ти всем Даю́щаго, родила́ еси́/ и мир обнови́ла еси́.

Ин конда́к, глас 3.

Подо́бен: Де́ва днесь:

Мари́на днесь вра́жию главу́ сокруша́ет,/ побе́ды вене́ц с Небесе́ прие́мши./ Его́же бо проро́цы удержа́ти не возмого́ша,/ того́ она́, связа́вши, уязви́./ Сего́ ра́ди показа́ся му́чеником украше́ние, вку́пе же и похвала́.

Седа́лен, глас 4.

Подо́бен: Ско́ро предвари́:

Наста́, празднолю́бцы, све́тло торжество́, па́мять сла́вныя страстоно́сицы Христо́вы,/ веселя́щи вся́ческая, сия́ющи заря́ми чуде́с в ми́ре,/ нося́щи челове́ком непреста́нную благода́ть,/ тоя́ моли́твами, Христе́, спаси́ ду́ши на́ша.

Сла́ва, и ны́не, Богоро́дичен:

Де́во Всенепоро́чная, Я́же Пресу́щнаго Бо́га ро́ждшая,/ со Безпло́тными Того́ непреста́нно моли́/ оставле́ние прегреше́ний и исправле́ние жития́ дати нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая.

Крестобогоро́дичен:

На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий,/ ма́терски рыда́ющи, веща́ше:/ что́ но́вое и стра́нное сие́ чу́до,/ Сы́не Мой?/ Ка́ко, Жизнь всех, вкуша́еши сме́рти, оживи́ти ме́ртвыя хотя́, я́ко Милосе́рд?

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты моя́ Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твоея́ сла́ва, Человеколю́бче.

Боголе́пно бысть вои́стинну житие́ твое́, А́нгелом яви́ся любе́зно,/ де́монскому же во́инству и слуга́м их свире́пству непристу́пно показа́ся./ Христу́ бо вопия́ла еси́:/ си́ле Твое́й сла́ва, Человеколю́бче.

На земли́ подвиза́вшися, всебога́тая, и вре́менныя боле́зни претерпе́вши,/ на Небесе́х ны́не воздая́ния от Влады́ки прие́млеши, му́ченице непобеди́мая,/ во ве́ки безконе́чныя, со А́нгелы вопию́щи:/ си́ле Твое́й сла́ва, Человеколю́бче.

Ны́не о тебе́ ра́дуется деви́ческий лик, ны́не му́ченик собо́р весели́тся,/ ны́не и мно́жество благочести́вых, собра́вшеся, лику́ют, ра́дующеся,/ Влады́це вопию́ще гла́сы немо́лчными:/ си́ле Твое́й сла́ва, Человеколю́бче.

Вся добра́ еси́, де́во, и нескве́рная,/ яви́лася еси́ неве́ста всенепоро́чная, душа́м добро́ты рачи́тельна,/ мучи́тельными разжже́нии, всеблаже́нная, яви́лася еси́ светле́йши, Христу́ пою́щи:/ си́ле Твое́й сла́ва, Человеколю́бче.

Богоро́дичен: Еди́на чиста́ и по рождестве́ пребыла́ еси́:/ Ты бо еди́на Сло́во, Ипоста́сное Отцу́, Сопресто́льна Сы́на, из Тебе́ воплоще́нна, родила́ еси́, Богоневе́сто,/ и но́сиши на руку́ Невмести́маго все́ми и вся концы́ Содержа́щаго.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

На суди́щи страда́лец тече́ние кре́пко, отрокови́це, прешла́ еси́./ Боже́ственное бо жела́ние же́нскую не́мощь укрепи́,/ проявле́нно показу́я, промышле́нием страда́ния самодержа́вна му́ченица су́щи.

Ка́пли твои́х крове́й, му́ченице, иска́пающе, багряни́цу многоце́нну/ и нетле́ннаго весе́лия ри́зу истка́ша,/ е́юже ны́не, Богому́драя, на Небесе́х оде́яна, у́мно Жениху́ предстои́ши.

У́зами моли́тв твои́х, отрокови́це, всехва́льнаго зми́я связа́вши,/ горды́ню пе́рвее превознесе́нную к земли́ смири́ла еси́:/ испо́лнити бо весть, я́ко Благ Всеве́дец, Того́ боя́щихся во́лю.

Превозноси́мыя тя сла́вы Боже́ственными венцы́ вои́стинну украси́ Жени́х, Сло́во,/ Его́ ра́ди страда́вшую обожа́я и огня́ пла́мень/ и бие́ния ран терпели́вно претерпе́вшую, сла́вная.

Богоро́дичен: Очища́емо зря́ще де́вства Твоего́ рождество́м, Всенепоро́чная,/ земны́х естество́ от пе́рвыя кля́твы, сла́вим из Тебе́ Рожде́ннаго, единоча́даго за милосе́рдие,/ Его́же моли́, Де́во, спасти́ нас.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Возложе́на Христу́, яви́лася еси́ добра́ и нескве́рна, и я́ко исто́чник чист,/ и вертогра́д многопло́ден, Мари́но всесла́вная,/ и бли́жняя неве́сто, и рай неокра́дом.

Отрокови́ца всеблаголе́пна вслед Тебе́ после́дова,/ теку́щи ко благово́нию ми́ра Твоего́, Влады́ко,/ пречи́стей стра́сти Твое́й терпе́нием подо́бящися и пречестне́й.

Претерпе́ла еси́ му́жески по́двиги, му́ченице многострада́льная,/ и пе́рвее умовре́дно вельми́ хва́лящагося с шу́мом погуби́ла еси́ кре́стною си́лою,/ о Мари́но господоимени́тая!

Богоро́дичен: Мари́е, чи́стый и пречи́стый сосу́де всех Соде́теля,/ души́ очисти́лище, пода́ждь ми сле́зы/ и услы́ши мольбу́ мою́, Всенепоро́чная.

Конда́к, глас 3.

Подо́бен: Де́ва днесь:

Де́вства добро́тами преиспещре́нна, де́во,/ нетле́нными венцы́ венча́лася еси́, Мари́но,/ кровьми́ же му́ченичества обагре́на,/ чудесы́ просвети́вшися исцеле́ний,/ благоче́стно, му́ченице, прия́ла еси́ по́честь побе́ды твоего́ страда́ния.

И́кос:

Жениху́ Христу́ раче́нием се́рдца твоего́ от младе́нства, честна́я, разже́гшися,/ потекла́ еси́, я́ко еле́нь, жа́ждущи исто́чником приснотеку́щим, девому́ченица,/ страда́нием же тебе́ саму́ю соблю́дша,/ в нетле́нном су́щно Зижди́теля твоего́, неве́сто благосла́вная, черто́зе дости́гла еси́,/ укра́шена и упещре́нна, венцено́сица победи́тельная, свещено́сица благоцвету́щая,/ нетле́ннаго неве́стника получи́вши и прие́мши, я́ко зла́то,/ по́честь побе́ды твоего́ страда́ния.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Свет непристу́пный, Мари́но, просвети́ досто́йно ду́шу твою́ / и свеща́ми све́тлыми озари́ пою́щия:/ благослове́н еси́, Го́споди Бо́же, во ве́ки.

Взя́тся к Боже́ственней вои́стинну высоте́, высо́к бо ты стяжа́ла еси́ ра́зум/ и в черто́г све́тел всели́лася еси́, вопию́щи:/ благослове́н еси́, Го́споди Бо́же, во ве́ки.

Неве́ста бли́жняя Влады́це показа́лася еси́, Мари́но Богоно́сная,/ и я́ко му́ченица непобеди́ма Тому́ зове́ши:/ благослове́н еси́, Го́споди Бо́же, во ве́ки.

Богоро́дичен: Князь не ктому́ от Иу́ды оскуде́,/ из Тебе́ бо Влады́ка, язы́ков наде́жда, возсия́ несказа́нно:/ благослове́н, Пречи́стая, Плод Твоего́ чре́ва.

Песнь 8

Ирмо́с: Мусики́йским орга́ном согласу́ющим/ и лю́дем безчи́сленным, покланя́ющимся о́бразу в Деи́ре,/ три о́троцы не повину́вшеся,/ Го́спода воспева́ху/ и славосло́вяху во вся ве́ки.

Тверд нрав стяжа́вши, тве́рдо страда́ния терпи́ше,/ и венцы́ побе́дными венча́ся, пою́щи:/ Го́спода по́йте и превозноси́те Его́ во ве́ки.

Та́йный, Мари́но, тебе́ черто́г душ Жени́х, Бог сло́во, угото́ва на Небесе́х,/ Его́же ви́дящи, зове́ши:/ Го́спода по́йте и превозноси́те Его́ во ве́ки.

Доброде́тельми разли́чными укра́шена, даро́в мно́жайших сподо́бися,/ кра́йнее жела́ний зря́щи и вопию́щи:/ Го́спода по́йте и превозноси́те Его́ во ве́ки.

Спасе́ния яви́лася еси́, страстоте́рпице, мно́гим вина́/ и му́ченик собо́ры Христу́ привела́ еси́, согла́сно вопию́щи:/ Го́спода по́йте и превозноси́те Его́ во ве́ки.

Богоро́дичен: Очище́ние нам, Богороди́тельнице, Тобо́ю даде́ся:/ Ты бо еди́на отдала́ еси долг, всех заче́нши Го́спода, Де́во,/ Его́же превозно́сим во ве́ки.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Мари́но, му́ченице Христо́ва,/ жизнь ве́чную и неги́бнущую в ра́йстей пи́щи приле́жно вои́стинну объя́ла еси́,/ обраща́ющееся бо без вре́да ору́жие премину́ла еси́,/ му́ченическими кровьми́ сия́ющи издале́ча, до́брая де́во.

Попали́ всеве́щную и любомирску́ю, де́во, мысль жела́ние Боже́ственное/ и тверде́йшу показа́ му́ченицу,/ де́вственными сия́ньми пе́рвее сия́ющую, Мари́но всему́драя./ Те́мже вси тя, ве́рнии, ублажа́ем.

Разреши́ ми, неве́сто избра́нная, согреше́ний плени́цы моли́твами твои́ми,/ и рукописа́ние грехо́вное расто́ргни, му́ченице,/ предстоя́щи благоле́пно Христу́, Жениху́ твоему́ Всеще́дрому,/ и страсте́й мои́х мглу разори́.

Преста́ шата́ние лю́тое льсти́ваго:/ се бо отрокови́ца, забыва́ющи же́нское естество́, пострада́,/ и на него́ све́тло побе́ду взе́мши, и ны́не прама́тернее назда́ я́ве паде́ние.

Богоро́дичен: Зре́лу пожина́ю жизнь, невреди́м дре́вом ра́зума:/ Ты бо, Пресвята́я, жи́зни дре́во, Христа́ прозябла́ еси́, вхо́ды жи́зни всем показа́вшаго./ Те́мже Тя, Всечи́стая, благоче́стно Богоро́дицу пропове́даем.

Свети́лен.

Подо́бен: Жены́, услы́шите:

Укре́пльшися, до́брая де́во, Кресто́м Го́спода твоего́,/ мучи́телей погуби́ла еси́ горды́ню, пострада́вши, му́ченице, му́жески,/ и от Христа́ прия́ла еси́ по́чести побе́ды, всему́драя Мари́но господоимени́тая,/ о нас моля́щи, тя почита́ющих любо́вию.

Богоро́дичен:

Стоя́ще о́крест Тебе́ де́вы Богому́дрыя, Богороди́тельнице Мари́е,/ я́ко Цари́це ро́да, Твоему́ Сы́ну приведо́шася,/ женихоле́пно, Пречи́стая, я́ко Царю́ вся́ческих,/ Его́же, Ма́ти Де́во Отрокови́це, о нас умоли́.

На стихо́вне, Окто́иха. Сла́ва, глас 1:

Я́ко на ка́мени тве́рде испове́дания Бо́жия утве́рждшися,/ Мари́но прехва́льная,/ уби́йцу врага́ в про́пасть потопи́ла еси́/ и вене́ц побе́дный досто́йно прия́ла еси́.

И ны́не, Богоро́дичен или́ Крестобогоро́дичен.

Подо́бен: Всехва́льнии му́ченицы:

Своего́ А́гнца/ А́гница и Непоро́чная Влады́чица/ на Кресте́ я́ко ви́де, зра́ка не иму́ща, ниже́ добро́ты,/ увы́ Мне, – рыда́ющи, глаго́лаше, –/ где добро́та Твоя́ за́йде, Сладча́йший?/ Где благоле́пие?/ Где благода́ть блиста́ющая о́браза Твоего́,/ Сы́не Мой любе́знейший?

НА ЛИТУРГИ́И

Блаже́нны Окто́иха, на 4. И святы́я песнь 3-я, на 4. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Кори́нфяном, зача́ло 181. Аллилу́ия, глас 1: Терпя́, потерпе́х Го́спода, и внят ми. Ева́нгелие от Луки́, зача́ло 33. Прича́стен: В па́мять ве́чную бу́дет пра́ведник: