ВЕ́ЧЕР

На Го́споди, воззва́х: стихи́ры, глас 4.

Подо́бен: Дал еси́ зна́мение:

Све́тло возсия́, я́коже со́лнце, преподо́бне,/ всепра́зднственная па́мять твоя́,/ заря́ми облиста́ющи твои́х доброде́тельных дея́ний, всеблаже́нне,/ и озаря́ющи ве́рных мы́сли сия́нием чуде́с твои́х./ Сию́ у́бо пра́зднующе, ра́достно тя чтем/ и ве́рно ублажа́ем, мона́хов похвала́.

А́нгел земны́й, я́коже други́й, пожи́л еси́,/ воздержа́нием те́ло твое́ увяди́л еси́, пребога́те,/ и бде́ньми, и па́мятию сме́ртною,/ всегда́ поуча́яся боже́ственно, о́тче,/ и возраста́я вели́кими восхожде́нии к жела́нию кра́йнему./ Те́мже вои́стинну прибли́жился еси́/ в са́мое то соверше́ние.

Чу́до па́че ума́, во успе́нии твое́м бысть,/ преподобному́дре чуде́сне,/ внегда́ лик святы́х, о́тче, предста́ внеза́пу:/ я́коже бо со́лнце, му́дре, лице́ твое́ облиста́,/ явля́я блиста́ющий зрак,/ твоея́ души́ чистоту́,/ и уверя́юще всех,/ какову́ кончи́ну получи́л еси́.

Сла́ва, глас 8:

Мона́хов мно́жества,/ наста́вника тя почита́ем, о́тче наш Сисо́е:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен или́ Крестобогоро́дичен:

Ю́ница Нескве́рная,/ Юнца́ ви́дящи, на Дре́ве пригвожда́ема во́лею,/ рыда́ющи жа́лостне,/ увы́ Мне, – вопия́ше, – люби́мейшее Ча́до!/ Что́ Ти сонм воздаде́ безблагода́тный евре́йский,/ хотя́ Мя обезча́дствовати от Тебе́, Вселюбе́зне?

Тропа́рь, глас 2:

Плотски́я стра́сти умертви́в воздержа́нием,/ ми́ру распя́лся еси́/ и, в пусты́ни живы́й, всех по́хотей отсече́нием/ А́нгел земны́й и Небе́сный челове́к показа́лся еси́,/ сего́ ра́ди тя, я́ко наста́вника и́ноком, пое́м, Сисо́е о́тче наш, и про́сим:/ моли́ Христа́ Бо́га, да спасе́т ду́ши на́ша.

Ин тропа́рь, глас 1:

Пусты́нный жи́тель, и в телеси́ А́нгел,/ и чудотво́рец яви́лся еси́, Богоно́се о́тче наш Сисо́е,/ посто́м, бде́нием, моли́твою Небе́сная дарова́ния прии́м,/ исцеля́еши неду́жныя и ду́ши ве́рою притека́ющих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кано́н, глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сля́вно просля́вися.

Страстьми́ умерщвле́на, оживи́ мя, о́тче, моли́твами твои́ми,/ Жи́зни ны́не живу́щих со дерзнове́нием мно́гим предстоя́.

Жела́нием, о́тче, Боже́ственным раче́ние пло́ти отри́нув,/ после́довал еси́ любо́вию Зову́щему, Сисо́е блаже́нне.

Зарю́ невеще́ственну, о́тче, внутрь в се́рдцы прие́м, просвети́лся еси́/ и всестра́стную мглу потреби́л еси́.

Богоро́дичен: Спаси́ мя, в бу́ри всех сласте́й обурева́емаго,/ Спа́са ро́ждшая, всех тишину́, Пренепоро́чная.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Плоть покори́л еси́ по́мыслу кре́пко, преподо́бне,/ ду́шу же показа́л еси́ рабо́ты страстны́я свобо́дну.

Боле́зньми твои́ми бразду́ душе́вную, му́дре преподо́бне, до́бре де́лая,/ клас безстра́стия и чуде́с израсти́л еси́.

В ме́ртвость оде́ялся еси́, Животво́рца Христа́, преподо́бне, стопа́м после́дуя,/ тем возставля́ти тебе́ и ме́ртвыя благода́ть дае́т.

Богоро́дичен: Ме́сто свяще́ния, и мы́сленну, Чи́стая, трапе́зу,/ хлеб, Христа́, жизнь всех прие́мшую, пое́м Тя.

Ин конда́к, глас 8:

Я́ко безпло́тным единожи́тель/ и всем преподо́бным соприча́стник,/ по́стническими труды́ и бде́нии моли́твенными непреста́нно себе́ вооружа́я, му́дре,/ тем и дар прия́л еси́ от Бо́га/ исцеля́ти неду́ги и прогоня́ти бе́сы./ Того́ ра́ди вопие́м ти:/ ра́дуйся, о́тче наш Сисо́е преподо́бне.

Седа́лен, глас 4:

Воздержа́нием житие́ украси́л еси́,/ и, у́ды умертви́в, победи́л еси́ страстна́я прирева́ния, Сисо́е блаже́нне,/ и преста́вился еси́ к Бо́гу в ве́чный живо́т, я́ко досто́ин насле́дник./ Тем не преста́й моля́ся спасти́ ду́ши на́ша.

Сла́ва, и ны́не, Богоро́дичен:

Те́плая Предста́тельнице и непобеди́мая,/ упова́ние изве́стное и непосты́дное,/ стено́, и покро́ве, и приста́нище прибега́ющим к Тебе́,/ Присноде́во Чи́стая, Сы́на Твоего́ и Бо́га моли́ со А́нгелы/ умире́ние да́ти ми́рови, и спасе́ние, и ве́лию ми́лость.

Крестобогоро́дичен:

Кресто́м Сы́на Твоего́, Богоблагода́тная, и́дольская пре́лесть вся упраздни́ся/ и де́монская кре́пость попра́ся./ Сего́ ра́ди, ве́рнии, по до́лгу Тя при́сно пое́м, и благослови́м,/ и, Богоро́дицу вои́стинну испове́дающе, Тя велича́ем.

Песнь 4

Ирмо́с: Услышах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Одожде́нием благода́ти, о́тче, ре́ки чуде́с источи́л еси́,/ от скве́рны очища́я ве́рою, блаже́нне, к тебе́ притека́ющия.

Всено́щными мольба́ми и вседне́вными, преподо́бне, стоя́нии, ду́шу предочи́стив,/ Тро́ице дом сию́ показа́л еси́.

В пусты́нях удали́лся еси́, о́тче, бе́гая/ и ожида́я тя Спаса́ющаго, блаже́нне, от малоду́шия и озлобле́ния.

Богоро́дичен: Несеко́мую го́ру Тя дре́вле Авваку́м прови́де, Всенепоро́чная,/ из нея́же Бог яви́ся и нас, истле́вшия, обнови́л есть.

Песнь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Храм трисо́лнечнаго Божества́ быв,/ страсте́й куми́ры твоея́ души́ потреби́л еси́.

Умертви́в пло́ти твоея́ мудрова́ние, Богоно́се,/ ме́ртвыя воскреси́л еси́ де́йством Ду́ха.

Духо́в нечи́стых отгони́тель яви́лся еси́, о́тче,/ Свята́го бо Ду́ха чи́стое жили́ще был еси́ ты.

Богоро́дичен: Со́лнца ро́ждши незаходи́маго, Богоро́дице,/ всего́ просвети́ омраче́на мя страстьми́.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Ки́та мы́сленнаго всегуби́тельства избежа́л еси́,/ воздержа́ние, моли́тву, любо́вь нему́тну, держа́вное смире́ние/ и любле́ние тве́рдо, ко Христу́, о́тче, стяжа́в.

Бог твоя́ я́же к Нему́ напра́ви стопы́,/ Си́льный си́льна я́ве соде́ла,/ попира́юща змие́в и скорпи́й главы́, Богоно́се всеблаже́нне.

Манове́нием, е́же к Бо́гу, бог я́ве был еси́,/ ко Све́ту все́ю любо́вию свет быв,/ А́нгел земны́й, Богоно́се о́тче, Небе́сный же челове́к.

Богоро́дичен: Мари́е, чи́стый де́вства сосу́де,/ очи́сти мой ум от стра́стнаго омраче́ния/ и испо́лни благода́ти и пра́вды се́рдце мое́, Всенепоро́чная.

Конда́к, глас 4.

Подо́бен: Яви́лся еси́:

Подвиза́вся, А́нгел на земли́ ви́ден был еси́,/ озаря́яй, преподо́бне, помышле́ния ве́рных Богозна́меньми всегда́./ Те́мже тя ве́рою, Сисо́е, почита́ем.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Всю Ду́ха зарю́ прия́л еси́ умо́м чи́стым/ и свети́льник ве́рно вопию́щих был еси́:/ благослове́н еси́, Го́споди Бо́же, во ве́ки.

Боже́ственным огне́м воздержа́ния попали́л еси́ те́рние грехо́вное/ и к Свету мы́сленному преше́л еси́, взыва́я:/ благослове́н еси́, Го́споди Бо́же, во ве́ки.

Богоро́дичен: Спаси́ мя, Ма́ти Спа́са, содержи́ма глубино́ю согреше́ний,/ и вся́кия вра́жия исхи́ти зло́бы,/ да Твое́, спаса́емь, велича́ю заступле́ние.

Песнь 8

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Непреста́нными прилежа́ молитвами и мольба́ми,/ мрак от души́ страсте́й отгна́л еси́ и ума́ твоего́ зри́тельное очи́стил еси́./ Те́мже прозре́ти проро́чески сподо́бился еси́ бу́дущая, Сисо́е, благоче́стно воспева́я:/ лю́дие, превозноси́те Го́спода во ве́ки.

А́нгельски пожи́л еси́ с те́лом, преподо́бне, и проти́вныя победи́л еси́ полки́./ Те́мже в невеще́ственней жи́зни, иде́же а́нгельския чи́ны, с весе́лием, о́тче, всели́лся еси́,/ с ни́миже взыва́еши:/ свяще́ннии, воспо́йте Го́спода, лю́дие, превозноси́те во вся ве́ки.

Оляде́вшую страстьми́ ду́шу мою́ очи́сти твои́ми к Бо́гу свяще́нными моли́твами/ и содержа́щаго мя плене́ния изба́ви, о́тче Богоно́се, да пою́ чи́сто:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Богоро́дичен: Освяти́вшися Ду́хом, прия́ла еси во утро́бе Твое́й/ Соде́теля челове́ческаго естества́/ и Сего́ несказа́нно родила́ еси́, Отрокови́це Чи́стая./ Его́же непреста́нно воспева́юще, пое́м:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Яви́ся чу́до стра́шное в са́мое вре́мя успе́ния твоего́,/ па́че со́лнца твоему́ лицу́, о́тче, облиста́вшу,/ егда́ приидо́ша ли́цы а́нгельстии, дух твой прие́млющии/ и Све́ту трисо́лнечному принося́щии.

Боже́ственными, блаже́нне, добро́тами наслажда́яся,/ и прича́стием обожа́емь, и просвеща́емь све́тлыми отту́ду сия́нии,/ светоно́сную твою́ ве́рно па́мять чту́щия твои́ми мольба́ми, му́дре,/ мра́чныя страсте́й па́губы изба́ви.

Пра́веден, непоро́чен, вся́каго огреба́яся зла, о́тче, был еси́,/ преподо́бен, незло́бив, Бо́гу послужи́в в преподо́бии,/ те́мже почи́ла есть Тро́ица в се́рдце твое́м,/ Ея́же ны́не ясне́е наслажда́ешися све́тло, досточу́дне.

Богоро́дичен: От дел отню́д во мне спасе́ния несть, Всенепорочная:/ проти́вною бо ше́ствуя стезе́ю, тьмы испо́лнихся./ Но Свет от Све́та нам возсия́вшая, просвети́ и спаси́ мя,/ не пре́зри мене́, лю́те погиба́юща.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 8.

Подо́бен: О, пресла́внаго чудесе́:

Ны́не возсия́ многосве́тлая па́мять/ святы́х Ра́донежских чудотво́рцев,/ венцы́ сла́вы Небе́сныя/ укра́шенных от Подвигополо́жника Христа́ Бо́га./ Те́мже, благове́рнии лю́дие,/ восхва́лим богоуго́дное их житие́/ и вси согла́сно возопии́м:/ моли́теся ко Го́споду, святи́и отцы́,/ о спасе́нии душ на́ших.

Преподо́бнии и Богоно́снии отцы́ на́ши/ Се́ргие, Ни́коне и Михе́е/ и вси Ра́донежстии святи́и,/ ны́не Це́рковь досто́йно восхваля́ет вас,/ вы бо, доброде́тельное житие́ на земли́ сконча́вше,/ на Небесе́х ны́не пребыва́ете,/ зря́ще сла́ву Триипоста́снаго Бо́га,/ не оста́вите нас, в пути́ земне́м су́щих,/ с ве́рою ча́ющих жи́зни бу́дущаго ве́ка.

Я́ко многопло́дный вертогра́д/ яви́ся на земли́ Ра́донежстей/ оби́тель Тро́ицы Живонача́льныя,/ от нея́же произы́де мона́хов пречестны́х мно́жество,/ и ти́и, я́ко о́трасли благоуха́нныя,/ насади́шася да́же до кра́я Руси́,/ тех у́бо ны́не пра́зднующе па́мять,/ притеце́м, ве́рнии челове́цы, и воспое́м:/ ра́дуйтеся, пресла́внии чудотво́рцы земли́ Ра́донежския.

Весели́теся и торжеству́йте,/ христоимени́тии лю́дие,/ прише́дшии поклони́тися до́му Животворя́щия Тро́ицы,/ се бо лик Ра́донежских уго́дников Бо́жиих,/ я́ко луча́ми светоза́рными блиста́я,/ просвеща́ет страну́ Ру́сскую/ и, име́я дерзнове́ние ко Го́поду,/ на Небесе́х мо́лится приле́жно/ о спасе́нии душ ве́рных христиа́н.

Сла́ва, глас 6:

Богоблаже́ннии отцы́ на́ши/ Се́ргие, Ни́коне, Михе́е/ и вси Ра́донежстии чудотво́рцы,/ суету́ и пре́лесть жите́йскую/ му́жественне отложи́вше/ и вся концы́ земли́ на́шея/ по́двиги благоче́стия просвети́вше,/ ца́рство ве́чныя сла́вы/ вои́стинну насле́довали есте́,/ приими́те моле́ние ве́рных чад свои́х,/ да изба́вимся от сете́й вра́жиих,/ злых напа́стей и лю́тых неду́гов,/ вас бо те́плых пред Бо́гом хода́таев стяжа́хом.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чте́ния преподе́бническая (зри день 5-й).

На лити́и стихи́ры, глас 8:

Се внеза́пу глас бысть:/ Се́ргие, Се́ргие!/ Ме́лишися о свои́х ча́дех,/ и Бог моле́ние твое́ испо́лни,/ смотри́ же я́сно и́нок мно́жества,/ на твое́ и́мя соше́дшихся./ Святы́й же, воззре́в, ви́дит мно́жества птиц красных./ И па́ки глас Боже́ственный бысть:/ и́мже о́бразом ви́дел еси́ пти́цы крыла́тыя,/ мно́жество их безчи́сленное,/ та́ко умно́жится ста́до и́нок твои́х,/ и по тебе́ не оскуде́ют,/ а́ще восхотя́т стопа́м твои́м после́довати.

Глас 6:Прииди́те, возра́дуемся, мона́хов сосло́вие,/ воздади́м хвалу́ и честь ве́лию/ ди́вному собо́ру Ра́донежских святы́х,/ Се́ргию, Ни́кону, Михе́ю/ и всем отце́м пра́ведным,/ в ве́ре и любви́ Христо́вей подвиза́вшимся,/ посто́м, бде́нием и моли́твою/ стра́сти умертви́вшим,/ де́монския полки́ победи́вшим/ и спаси́тельную благода́ть Бо́жию обре́тшим.

Сла́ва, и ны́не, глас 6:

Воспои́м, бра́тие, песнь хвале́бную/ Де́ве Богоро́дице,/ Та бо Свои́м всемо́щным покро́вом,/ по сло́ву нело́жнаго обетова́ния,/ защища́ет от мно́жества искуше́ний и зол/ благослове́нную оби́тель, ю́же всеблаже́нный Се́ргий основа́/ и устро́и, я́ко град Бо́га Жива́го.

И́на стихи́ра на Сла́ва, и ны́не, глас то́йже:

Пречи́стая Ма́ти Христа́ моего́,/ Хода́таице, и Засту́пнице,/ и кре́пкая Помо́щнице ро́ду челове́ческому,/ бу́ди и нам Хода́таица и Моли́твенница/ к Сы́ну Своему́ и Бо́гу на́шему,/ я́ко да при́зрит на свято́е ме́сто сие́,/ е́же и возложе́но есть/ в похвалу́ и честь/ Трисвята́го Его́ Имене./ Тебе́ же, Ма́ти сла́дкаго моего́ Христа́,/ Хода́таицу предлага́ем, раби́ Твои́./ Ты бо еси́ всем спаси́тельное упокое́ние, и очисти́лище,/ и благоути́шное приста́нище обурева́емым во гресе́х.

На стихо́вне стихи́ры, глас 2:

Вни́дем, бра́тие, днесь в ра́дость/ ве́лия духо́внаго торжества́,/ се бо Це́рковь Ру́сская прославля́ет/ всехва́льный собо́р Ра́донежских чудотво́рцев,/ поуча́ющи нас благоче́стно ева́нгельскому их житию́.

Стих: Честна́ пред Го́сподем/ смерть преподо́бных Его́.

Во умиле́нии се́рдца воспои́м, ве́рнии лю́дие,/ по́двиги преподо́бных отце́в:/ Богоно́снаго а́ввы Се́ргия/ и его́ единоревни́теля Ни́кона,/ пе́рвенца прише́льца Васи́лия Суха́го,/ послушли́ваго Иа́кова,/ дво́ицу диа́конов: сы́на и отца́, Елиссе́я и Они́сима,/ Си́мона, архимандри́та Смоле́нскаго,/ Исаа́ка Молча́льника и Мака́рия,/ зри́телей чу́да сослуже́ния а́нгельскаго,/ и друга́го Си́мона, и́же ви́де огнь, в поти́р вше́дший,/ Се́ргию причаща́ющуся.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Еди́неми усты́ восхва́лим до́бре, бра́тие,/ светоно́сный лик Ра́донежских святы́х:/ игу́мена Митрофа́на, духо́внаго отца́ Се́ргиева,/ и самови́дца явле́ния Богоро́дицы Михе́я,/ преподо́бных Се́ргия и Па́вла Обно́рских,/ Са́ввы Стороже́вскаго и Андрони́ка Моско́вскаго,/ Варфоломе́я и Нау́ма, ста́рцев до́блестных,/ Афана́сия Серпуховска́го и Рома́на Киржа́чскаго/ и всех с ни́ми приле́жно подвиза́вшихся,/ и́хже житие́м просла́вися великоле́пое И́мя Жизнода́вца Христа́.

Сла́ва, глас 3:

Богоно́сных отце́в Ра́донежских/ всечестну́ю па́мять ны́не пра́зднующе,/ научи́мся, бра́тие, их ве́ре и житию́,/ и́стинному поклоне́нию/ и служе́нию Пресвяте́й Тро́ице,/ и́хже дерзнове́нным предстоя́нием да сподо́бимся/ восприя́ти бога́тыя Ея́ ми́лости и щедро́ты.

И ны́не, глас то́йже:

Яви́лася еси́, Де́во Богоро́дице,/ со двема́ апо́столома – Петро́м и Иоа́нном,/ преподо́бному отцу́ Се́ргию,/ ему́же соприча́стник в зре́нии чу́да бысть/ достоблаже́нный учени́к Михе́й,/ и изрекла́ еси́ обетова́ние:/ не оста́влю оби́тель сию́, избра́нниче Мой,/ Свои́м покро́вом и любо́вию./ Мы же, ра́дующеся, зове́м Ти:/ при́сно спаса́й нас, Влады́чице,/ от мглы грехо́в, злых обстоя́ний и бед.

И́на стихи́ра на Слава, и ны́не, глас 2:

О, сла́дкаго Твоего́ гла́са,/ Ма́ти Христа́ Моего́!/ О, чу́дныя любве́ и Твоего́ посеще́ния, Влады́чице!/ О, неизрече́ннаго Твоего́ обеща́ния,/ е́же с на́ми пребыва́ния.

Тропа́рь, глас 4:

Днесь све́тло пра́зднуем, ве́рнии лю́дие,/ пресла́вныя Тро́ицкия оби́тели торжество́:/ се бо ве́лий собо́р святы́х чудотво́рцев Ра́донежских,/ я́ко ди́вныя пти́цы небе́сныя,/ явля́ет нам Це́рковь Ру́сская,/ стезя́ми честна́го их жития́ ше́ствовати всех призыва́ющи,/ к ни́мже, с ве́рою и любо́вию притека́юще, воззове́м:/ моли́теся о нас ко Пресвяте́й Тро́ице,/ преподо́бнии отцы́ на́ши с Богоно́сным а́ввою Се́ргием,/ мир ми́рови дарова́ти/ и душа́м на́шим ве́лия ми́лости.

Ин тропа́рь, глас 2:

Плоды́ доброде́телей на земли́ прине́сше,/ преподо́бнии отцы́,/ в Небе́сных черто́зех ны́не благоуха́ете, я́ко ра́йстии цве́ти,/ и лице́м к лицу́ зри́те Пресвяту́ю Тро́ицу,/ Ю́же дерзнове́нно моли́те,/ спасти́ся душа́м на́шим.

НА У́ТРЕНИ

На Бог Госпо́дь: тропа́рь преподо́бнаго Се́ргия, глас 8: От ю́ности восприя́л еси́ Христа́ в души́ твое́й, преподо́бне: (зридень 5-й) еди́ножды и Днесь све́тло пра́зднуем: еди́ножды. Сла́ва: Плоды́ доброде́телей: И ны́не, Богоро́дичен.

По 1-м стихосло́вии седа́лен, глас 5:

Я́ко све́щницы на престо́ле, возсия́ли есте́, святи́и чудотво́рцы земли́ Ра́донежския,/ и, я́ко многоцве́тие благово́нное, израсли́ есте́,/ те́мже неоску́дно пото́цы люде́й правосла́вных притека́ют к ра́це ва́ших святы́х моще́й,/ прося́ще ми́рови вы́шний мир и ве́лия ми́лости.

Сла́ва, и ны́не, Богоро́дичен:

Богоро́дице, Де́во Чи́стая, моли́ся Го́сподеви,/ я́ко да Твои́м предста́тельством пода́ст душа́м на́шим грехо́в оставле́ние,/ мир и ра́дость в наде́жди спасе́ния ве́чнаго.

По 2-м стихосло́вии седа́лен, глас 4:

Приими́те на́шу песнь церко́вную, святи́и чудотво́рцы Ра́донежстии,/ вы бо до́блественне подвиза́лися есте́ на земли́,/ со стра́хом и тре́петом спасе́ние свое́ соде́лавше,/ и ны́не торжеству́ете в Ве́чнем Ца́рстве Небе́снаго Влады́ки.

Сла́ва, и ны́не, Богоро́дичен:

Де́во Богоро́дице, с ве́рою и любо́вию под кров Твой прибега́ем,/ ве́мы, я́ко недосто́йнии раби́ Твой есмы́,/ но, моля́щеся, обря́щем Тобо́ю спасе́ние.

Велича́ние:

Велича́ем вас,/ вси святи́и земли́ Ра́донежския,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Псало́м избра́нный: Терпя́, потерпе́х Го́спода:

По полиеле́и седа́лен, глас 8:

Богому́дрии отцы́ на́ши Се́ргие, Ни́коне и вси Ра́донежстии преподо́бнии,/ вку́пе и во уедине́нии подвиза́вшиися душеспаси́тельным доброде́ланием,/ не забу́дите в моли́твах ва́ших на Небесе́х о ве́рных ча́дех свои́х,/ ча́ющих мно́гия ми́лости.

Сла́ва, и ны́не, Богоро́дичен:

Де́во Всенепоро́чная, Всеще́драго Бо́га ро́ждшая,/ непреста́нно То́го моли́ о спасе́нии душ на́ших,/ Тя бо тве́рдую Предста́тельницу и́мамы.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 10.

Сла́ва: Моли́твами преподо́бных и Богоно́сных отце́в Ра́донежских,/ Ми́лостиве, очи́сти/ мно́жество согреше́ний на́ших.

И ны́не: Моли́твами Богоро́дицы:

По 50-м псалме́ стихи́ра, глас 6:

Взе́мше на ра́мена благо́е и́го Христо́во,/ подвиза́стеся идти́ те́сным путе́м/ в Ца́рство ве́чныя жи́зни,/ я́коже рече́ Госпо́дь наш./ И ны́не во Све́те невече́рнем/ лику́ете со а́нгельскими си́лами,/ зря́ще неизрече́нную сла́ву Триипоста́снаго Божества́,/ не оста́вите нас любо́вию свое́ю,/ святи́и отцы́, Ра́донежстии чудотво́рцы,/ подаю́ще нам вели́кия и бога́тыя ми́лости.

Кано́н Богоро́дицы и преподо́бным, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Припе́в: Вси святи́и земли́ Ра́донежския, моли́те Бо́га о нас.

Ка́ко восхва́лим вас, преподо́бнии Се́ргие, Ни́коне/ и вси чудотво́рцы, во оби́тели Тро́ицы Пресвяты́я подвиза́вшиися/ и мир весь житие́м свои́м равноа́нгельным удиви́вшии?

Сам сый до́брая о́трасль от блага́го ко́рене роди́телей твои́х, блаже́нных Кири́лла и Мари́и,/ во святе́й схи́ме сконча́вшися, Богому́дре Се́ргие,/ восприя́л еси́ на ра́мо многоско́рбный Крест мона́шескаго жития́,/ не обину́яся после́дова Христу́.

Пусты́нное житие́ избра́в,/ насади́л еси́ духо́вный вертогра́д, Богоно́се о́тче Се́ргие,/ и воспита́л еси́ мно́жество и́ноков добронра́вных,/ и́миже просла́вися вели́кое Имя Святы́я Тро́ицы.

Процвете́, я́ко фи́никс, оби́тель Живонача́льныя Тро́ицы/ мно́гими труды́ твои́ми, преблаже́нне о́тче Се́ргие,/ да спаса́ются зде ре́вностно ученицы́ твои́.

Богоро́дичен: Ма́ти Бо́га Истиннаго,/ приими́ мольбы́ рабо́в Твои́х, и́щущих Твоего́ заступле́ния,/ Ты бо еси́ приста́нище необурева́емое правосла́вных христиа́н.

Песнь 3

Ирмо́с: Утвержде́й в нача́ле Небеса́ ра́зумом/ и зе́млю на вода́х оспова́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

В час нощны́я моли́твы твоея́, Богохва́льне о́тче наш Се́ргие,/ бысть чу́дное явле́ние с Небесе́,/ зна́менующе бу́дущая о мно́жестве учени́к твои́х.

Ди́вныя пти́цы ра́йския, излете́вшия в луча́х све́та Небе́снаго,/ ви́дел еси́ в той час, преподо́бне о́тче Се́ргие,/ и слы́шал еси́ глас, свы́ше глаго́лющ тебе́ гряду́щая о ученице́х твои́х.

Я́ко кедр, и́же в Лива́не, умно́жишася сподви́жницы и ученицы́ твои́/ и просла́вишася в доброде́телех, Се́ргие Богоблаже́нне,/ подража́юще твоему́ житию́.

Восприи́м ре́вность духо́вную, мно́ги по́двиги соверши́л еси́/ и те́ми Пресвяту́ю Тро́ицу просла́вил еси́,/ те́мже ны́не наслажда́ешися на Небеси́,/ зря Той добро́ту неизрече́нную, Се́ргие вели́кий.

Богоро́дичен: Бо́га, воплоща́ема из Тебе́, зри́ще, Де́во,/ ужаса́хуся стра́хом и тре́петом Го́рния си́лы/ и я́ко су́щую Богоро́дицу Тя непреста́нно велича́ют.

Седа́лен, глас 4:

Приидо́сте в дом Животвори́щия Тро́ицы, преподо́бнии отцы́,/ и обрето́сте безце́нный би́сер, Христа́,/ в пе́ниих, бде́ниих и поще́ниих мона́шескаго жития́ стяжа́вше благода́ть Его́,/ непреста́нно моли́те Всеми́лостиваго Спа́са о душа́х на́ших.

Сла́ва, и ны́не, Богоро́дичен:

Тебе́, Ма́ти Бо́жия, ро́ди родо́в пою́т, сла́вят и поклоня́ются,/ изба́ви нас от вся́ких злых преткнове́ний вра́жиих,/ Твои́ бо есмы́ раби́, да не постыди́мся.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Оста́вивше суету́ мирску́ю, возлюби́ли есте́ житие́ мона́шеское/ и до конца́ пре́дали есте́ себе́, я́ко о́вцы, послуша́нию и смире́нию,/ во о́браз Сладча́йшаго Христа́, Ни́коне и Михе́е Богоно́снии.

Ми́ра красоту́ презре́ли есте́/ и всели́лися есте́ во оби́тель Ра́донежскую,/ процве́тшую, я́ко сад ди́вный, многообра́зными ва́шими доброде́тельми,/ Васи́лие и Иа́кове, отцы́ всеблаже́ннии.

Воздержа́нием, коленопреклоне́нием и слеза́ми/ угаси́ли есте́ душепа́губныя стра́сти в себе́, отцы́ пресла́внии Они́симе и Елиссе́е,/ и просла́вили есте́ Христа́ в душа́х и телесе́х ва́ших.

Земны́я пре́лести отве́ргше,/ благода́тию Бо́жиею стори́цею преумно́женный плод духо́вный обрели́ есте́,/ научи́те у́бо и нас пра́вилам ве́ры и о́бразу и́стиннаго жития́,/ преподо́бнии Си́моне архимандри́те и игу́мене Митрофа́не.

Богоро́дичен: Еди́н от Святы́я Тро́ицы воплоти́ся от Тебе́, Пречи́стая,/ да спасе́т весь род челове́ческий от рабо́ты вра́жия и ве́чнаго осужде́ния.

Песнь 5

Ирмо́с: Вску́ю мя отри́нул еси́/ от лица́ Твоего́, Свете Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведеи́ Твои́х/ пути́ моя́ напра́ви, молю́ся.

Мно́гими боле́зньми, непреста́нными моли́твами/ и духо́вным трезве́нием тьму бесо́вскую отгна́вше,/ собесе́дники А́нгелов яви́лися есте́,/ Исаа́кие и Мака́рие, отцы́ прехва́льнии.

Вои́стинну христоподража́тельне пожи́ли есте́, преподо́бнии отцы́ Си́моне и Илие́,/ плоть свою́ со страстьми́ и похотьми́ распя́вше,/ те́мже помози́те нам, немощны́м, преодоле́ти сопроти́вныя си́лы лука́вых духо́в.

Возде́вше ру́ки горе́,/ сотвори́те усе́рдное моле́ние и хода́тайство пред Всеми́лостивым Спа́сом/ о всех чту́щих ва́шу всечестну́ю па́мять,/ преподо́бнии Сильве́стре, Се́ргие и Па́вле,/ на реце́ Обно́ре подвиза́вшиися.

Те́плое предста́тельство ко Святе́й Тро́ице иму́ще,/ не забу́дите убо́гих рабо́в, с ве́рою призыва́ющих вас в час лю́тыя напа́сти,/ святи́и Фео́доре и Па́вле Росто́встии/ и сро́дниче по пло́ти Се́ргиев, святи́телю о́тче Фео́доре.

Богоро́дичен: Все на́ше упова́ние на Тя возложи́хом, Де́во Мари́е,/ при́зри на ны, лю́ди согреши́вшия,/ с ве́рою ча́ющия от Тебе́ заступле́ния и спасе́ния.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Прии́мше Госпо́дне благослове́ние и благода́тию Ду́ха Всесвята́го укрепля́емии,/ преподо́бнии отцы́ Иа́кове Железнобо́ровский и Григо́рие Голу́твинский,/ насади́ли есте́ оби́тели, я́ко духо́вныя исто́чники, на земли́ Ру́сстей.

Просла́влени бы́ша ва́шими по́двиги, отцы́ досточу́днии,/ Авраа́мие Га́лицкий и Мефо́дие Пе́шношский, пусты́ни непроходи́мыя,/ процве́тшия, я́ко кри́ни се́льнии, и источи́вшия ре́ки чуде́с.

Слеза́ми, посто́м и моли́твою созда́вше оби́тели святы́я на земли́,/ ны́не ве́чно ра́дуетеся во оби́телех Отца́ Небе́снаго,/ святи́и Са́вво Стромы́нский и Лео́нтие Ду́бенский, му́жие добропобе́днии.

Обогати́ли есте́ духо́вным сокро́вищем селе́ния своя́,/ и просла́вишася ва́шими доброде́тельми зе́мли Росто́вская и Обно́рская,/ Киржа́чская и Стромы́нская, Стороже́вская и Коло́менская/ и ины́я от преде́л мно́гих.

Богоро́дичен: Влады́чице Богоро́дице, отве́рзи нам две́ри милосе́рдия Твоего́,/ Ты бо еси́ спасе́ние ро́да христиа́нскаго.

Конда́к, глас 8:

Прииди́те, вси концы́ оте́чества на́шего,/ просла́вим святы́й лик уго́дников Ра́донежских,/ я́ко зве́зды, украси́вших не́бо церко́вное по́двиги земна́го жи́тельства,/ тех бо предста́тельством те́плым ко Го́споду/ мно́гия нам ми́лости Его́ низпосыла́ются,/ бе́дствия отгоня́ются и злы́я стра́сти укроща́ются./ И́хже всесвяту́ю па́мять ны́не пра́зднующе, та́ко возопии́м:/ ра́дуйтеся, Се́ргие и Ни́коне и вси Ра́донежстии чудотво́рцы,/ усе́рднии служи́телие Живонача́льныя Тро́ицы.

И́кос:

Мирску́ю честь и сла́ву презре́вше,/ еди́ному Христу́ вожделе́ли есте́ порабо́тати,/ преподо́бнии отцы́ на́ши Се́ргие, Ни́коне и вси святи́и,/ в земли́ Ра́донежстей и о́крест ея́ просия́вшии,/ зде досто́йно и пра́ведно Живонача́льней Тро́ице послужи́ли есте́./ Те́мже и всели́ся в вас Дух Пресвяты́й и умудри́ позна́нием пачеесте́ственным,/ наста́вите у́бо нас и́стинней ве́ре и житию́,/ да сподо́бимся неосужде́нно призыва́ти Тро́ицу Единосу́щную и Неразде́льную./ Те́мже, ублажа́юще ны́не ва́шу честну́ю па́мять, непреста́нно зове́м:/ ра́дуйтеся, отцы́ пресла́внии,/ учи́телие на́ши и служи́телие неотсту́пнии Святы́я Тро́ицы.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тннце, лику́юще, поя́ху:/ благослове́н еси́, Бо́же оте́ц на́ших.

Дости́гше Го́рних черто́гов,/ та́мо со А́нгелы славосло́вите Го́спода Вседержи́теля, пою́ще:/ отце́в Бо́же, благослове́н еси́.

Моли́теся непреста́нно за ны,/ де́ти ва́ша духо́вная, с ве́рою пою́щая:/ отце́в Бо́же, благослове́н еси́.

Зря́ще с Небесе́ на призыва́ющия вас в ско́рбех христиа́ны,/ возниспосли́те по́мощь пою́щим:/ отце́в Бо́же, благослове́н еси́.

Со Христо́м ца́рствуете несконча́емо,/ те́мже умоли́те Го́спода сил спасти́ ны, пою́щия:/ отце́в Бо́же, благослове́н еси́.

Богоро́дичен: Простри́ ру́це Твои́, Преблагослове́нная Де́во, к Сы́ну Твоему́, Христу́ Бо́гу на́шему, моля́щи усе́рдно,/ да поми́лует нас, гре́шных, по вели́цей Свое́й ми́лости.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Досто́йно и пра́ведно на земли́ житие́ сконча́вше,/ Ца́рству нетле́нных благ приобщи́лися есте́, пою́ще:/ да благослови́т тварь вся Го́спода/ и превозно́сит во вся ве́ки.

Вельми́ прославля́ет ны́не ва́ше равноа́нгельное житие́/ Це́рковь Христо́ва, воспева́ющи:/ да благослови́т тварь вся Го́спода/ и превозно́сит во вся ве́ки.

До́брии и ве́рнии предста́ли есте́ на Небесе́х раби́ Христо́ви,/ я́ко умно́жили есте́ вруче́нныя вам тала́нты духо́вныя,/ те́мже благода́рне воспева́ете:/ да благослови́т тварь вся Го́спода/ и превозно́сит во вся ве́ки.

Насле́довавше блаже́нство неопи́санное,/ научи́те нас досто́йно жи́ти во вся́ком благоче́стии и чистоте́, пою́щих:/ да благослови́т тварь вся Го́спода/ и превозно́сит во вся ве́ки.

Богоро́дичен: Неусыпа́емую в моли́твах Засту́пницу/ обре́те Тя, Непоро́чная Де́во, челове́ческий род./ Те́мже, ра́дующеся, пое́м:/ да благослови́т тварь вся Го́спода/ и превозно́сит во вся ве́ки.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Я́ко иму́щии дерзнове́ние ко Святе́й Тро́ице, Богоно́снии отцы́,/ ско́ро предвари́те ми́лостию свое́ю всех чту́щих всечестну́ю па́мять ва́шу.

Услы́шите покая́нный глас моле́ния на́шего,/ да изба́вимся ва́шим кре́пким заступле́нием от мно́жества зол и прегреше́ний.

Исцели́те на́ша неду́ги и я́звы грехо́вныя, отцы́ Богохва́льнии,/ вам бо свы́ше даде́ся благода́ть врачева́ти боле́зни душе́вныя и теле́сныя.

Земля́Ру́сская ны́не ликовству́ет,/ ублажа́ющи ва́шу пречестну́ю па́мять, отцы́ всесла́внии,/ те́мже приими́те на́шу песнь хвале́бную.

Богоро́дичен: Родила́ еси́ Безле́тнаго Сы́на, Пречи́стая, плоть на́шу прие́мшаго,/ кро́вию Свое́ю на Кресте́ омы́вшаго от грехо́в па́дшаго Ада́ма,/ умоли́ у́бо Спа́са на́шего изба́вити нас от ве́чныя сме́рти.

Свети́лен:

Никто́же мо́жет из земноро́дных изрещи́ подвиго́в ва́ших тяготу́/ и уразуме́ти си́лу да́нныя вам от Бо́га благода́ти,/ те́мже при́зрите с высоты́ Небе́сныя, преподо́бнии отцы́, на нас,/ и́щущих ва́шея благосе́рдныя по́мощи.

Сла́ва, и ны́не, Богоро́дичен:

Немо́лчно воспева́ем Тя, Мари́е Богоневе́стная,/ а́нгельскими глаго́лы велича́юще:/ ра́дуйся, Благода́тная, Госпо́дь с Тобо́ю.

На хвали́тех стихи́ры на 4, глас 4:

Восхва́лим, ве́рнии лю́дие,/ благоле́пный лик Ра́донежских чудотво́рцев,/ до́бре и му́жественне подвиза́вшихся на земли́,/ и просия́вших, я́ко со́лнце,/ в Ца́рстве Отца́ Небе́снаго,/ и восприя́вших благода́ть при́сно моли́тися за нас.

Приими́те проше́ние на́ше,/ Богоблаже́ннии отцы́,/ умири́те вражду́ вся́ку в лю́дех,/ в озлобле́нии су́щих,/ огради́те нас от злых ко́зней диа́вольских,/ насади́те благу́ю любо́вь и страх Бо́жий/ в ду́ши правосла́вных христиа́н.

Святи́и отцы́ Богосла́внии,/ насажде́ни в дому́ Госпо́дни,/ во дво́рех Бо́га на́шего процвели́ есте́,/ и еще́ умно́жися в ста́рости масти́те/ доброде́телей ва́ших многотеку́щая река́./ Те́мже пе́сньми свяще́нными/ вас непреста́нно ублажа́ем.

Воспо́йте, лю́дие, Го́сподеви песнь но́ву,/ воспо́йте Го́сподеви, вся земля́,/ я́ко боголе́пно Жизнода́вец Христо́с/ просла́вися в душа́х пра́ведных отце́в,/ взе́мших на себе́ благо́е бре́мя Его́/ и прия́вших венцы́ нетле́нныя ве́чнаго блаже́нства.

Сла́ва, глас 8:

О Богоно́снии отцы́ и чудотво́рцы,/ Ра́донежския земли́ ди́вное сия́ние!/ Све́том любве́ ва́шея озари́те/ ду́ши правосла́вных христиа́н,/ благоче́стно пра́зднующих ва́шу па́мять,/ предста́тельствуйте со тща́нием ко Святе́й Тро́ице/ о ми́ре всего́ ми́ра/ и спасе́нии душ на́ших.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Кори́нфяном, зача́ло 176. Аллилуия, глас 6: Блаже́н муж, боя́йся Го́спода,/ в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 43. Прича́стен: Ра́дуйтеся, пра́веднии, о Го́споде:

Моли́тва

О преподо́бнии и Богоно́снии отцы́ на́ши Се́ргие, Ни́коне и вси Ра́донежстии святи́и, во оби́тели Животворя́щия Тро́ицы благоле́пно процве́тшии и в земли́ Ру́сстей пресла́вно возсия́вшии! Я́ко лучи́ многосве́тлыя Со́лнца пра́вды, Христа́ Жизнода́вца, во оте́честве на́шем вы у́бо яви́стеся, све́том благода́ти Боже́ственныя чуде́сне ду́ши правосла́вных озари́вше, наста́вите у́бо и вразуми́те нас, в ле́ности су́щих, на путь пра́вды жи́зни ве́чныя. Внемли́те гла́су моле́ния на́шего, да испо́лним, я́ко раби́ благоразу́мнии, вся повеле́нная нам Го́сподем на́шим Иису́сом Христо́м. И ны́не, в день всесвяты́я па́мяти ва́шея и прославле́ния во оби́тели сей, мо́лим вас приле́жно, святи́и уго́дницы Бо́жии, на́ши те́плии предста́телие пред Престо́лом Святы́я Тро́ицы и хода́таи усе́рднии, да испросите нам, гре́шным и недосто́йным рабо́м, вели́кия и бога́тыя ми́лости Бо́жия, да прии́ем вси в позна́ние и́стины, принося́ще плоды́ досто́йныя покая́ния, и́мже обря́щем благода́ть Всесвята́го Ду́ха.

О до́брии наста́вницы на́ши и моли́твенницы ко Го́споду! Неусы́пно предста́тельствуйте о Це́ркви на́шей, да пребыва́ет при́сно в чистоте́ Правосла́вия и да свиде́тельствует непрело́жно в ми́ре сем о ве́чней и Боже́ственней Христо́вей и́стине, ю́же апо́столи святи́и утверди́ша и отцы́ Це́ркве невреди́му соблюдо́ша. Я́ко иму́ще дерзнове́ние ко Святе́й Тро́ице, неосла́бно бди́те в Небе́сных моли́твах ва́ших о правосла́внем оте́честве на́шем, о тишине́ и благостоя́нии всего́ ми́ра, да вси, преуспева́юще в ве́ре, благоче́стно поживе́м и сподо́бимся неосужде́нно ста́ти одесну́ю Всеще́драго Бо́га, иде́же вы ра́дуетеся и весели́теся со все́ми, от ве́ка Ему́ угоди́вшими. Ами́нь.

Моли́тва преподо́бным схимона́хом Кири́ллу и Мари́и, роди́телем преподо́бнаго Се́ргия

О раби́ Бо́жии, схимона́ше Кири́лле, схимона́хине Мари́е! Аще и сконча́ли есте́ вре́менную жизнь свою́ те́лом, но ду́хом не отступа́ете от нас, руково́дствуете же ны ко Христу́ Бо́гу, наставля́ете ше́ствовати по за́поведем Госпо́дним и носи́ти крест свой и после́довати Влады́це на́шему. Вы, преподо́бнии, вку́пе с преподо́бным и Богоно́сным отце́м на́шим Се́ргием, ва́шим возлю́бленным сы́ном, име́ете дерзнове́ние ко Христу́ Бо́гу на́шему и ко Святе́й Его́ Богома́тери. Бу́дите моли́твенницы и хода́таи о нас, недосто́йных, жи́тельствующих во святе́й оби́тели ва́шей, ей же вы и нача́льницы. Бу́дите помо́щницы и засту́пницы Бо́гом со́бранней дружи́не сей, да жи́тельствующии на ме́сте сем и приходя́щии с ве́рою, ва́шими моли́твами сохраня́еми, невреди́ми от бесо́в и от челове́к злых пребу́дем, сла́вяще Святу́ю Тро́ицу, Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.

После 5 июля и 25 сентября

НА МАЛОЙ ВЕЧЕ́РНИ

На Го́споди, воззва́х: стихи́ры на 4, глас 8.

Подо́бен: О, пресла́внаго чудесе́:

Преподо́бнии отцы́ Богому́дрии, Се́ргие и Ни́коне,/ слепы́м дае́те свет,/ боля́щим исцеле́ние и хромы́м здра́вие,/ ми́лостивно приклоня́ющеся к приходя́щим ве́рою ко хра́му ва́шему/ и прося́щим по́мощи ва́шея,/ засту́пники бо и предста́тели, ве́рнии вси, обрето́хом,/ восхваля́юще вас, преподо́бнии Се́ргие и Ни́коне.

Преподо́бне о́тче,/ ду́шу твою́ с те́лом очи́стив,/ Свята́го Ду́ха прекра́сная оби́тель яви́лся еси́,/ И́же сла́вна тя конце́м, преблаже́нне Се́ргие, соде́я;/ в чудесе́х же вели́каго свети́льника,/ просвети́вшаго во мра́це су́щия,/ и наста́вника мона́хов,/ соше́дшеся, велему́дренно ублажа́ем.

О́тче преблаже́нне Ни́коне,/ кто по́двиги и страда́ния твоя пове́сть,/ я́же подъя́л еси́, Христу́ после́дуя?/ Не дал бо еси́ сна твои́м очесе́м,/ ни ве́ждом дрема́ния,/ и́миже ду́шу твою́ от страсте́й свободи́л еси́,/ слеза́ми непреста́нными очища́я,/ и ны́не моли́ся/ дарова́ти душа́м на́шим мир и ве́лию ми́лость.

Сла́ва, глас 6:

Прииди́те, мона́хов мно́жество, днесь,/ духо́вно возвесели́мся в наро́читом пра́зднице,/ в не́мже, соше́дшеся, согла́сно воспое́м, глаго́люще:/ ра́дуйтеся, отцы́ Богому́дрии, Се́ргие и Ни́коне,/ Небе́снии челове́цы и земни́и а́нгели;/ ра́дуйтеся, Ду́ха Свята́го оби́тели;/ ра́дуйтеся, я́ко Тро́ице предстои́те Святе́й;/ ра́дуйтеся, всея́ Ру́сския земли́ пресве́тлии свети́льницы и моли́твенницы;/ ра́дуйтеся, дерзнове́ние иму́ще ко Го́споду,/ от Него́же испроси́те душа́м на́шим мир и ве́лию ми́лость.

И ны́не, Богоро́дичен, глас то́йже:

Богоро́дице, Ты еси лоза́ и́стинная,/ возрасти́вшая нам Плод живота́,/ Тебе́ мо́лимся,/ моли́ся, Влады́чице, со святы́ми апо́столы/ поми́ловати ду́ши на́ша.

На стихо́вне стихи́ры, глас 6.

Подо́бен: А́нгельския предыди́те си́лы:

От ма́терних пеле́н, му́дре,/ Бо́гу возложе́н, Се́ргие преподо́бне,/ и пусты́ню я́ко град соде́лав,/ в ней мно́жества мона́хов собра́л еси́/ сла́вити Многопе́тую Тро́ицу,/ Ю́же моли́ спасти́ся душа́м на́шим.

Стих: Честна́ пред Го́сподем/ смерть преподо́бных Его́.

Дом Свята́го Ду́ха был еси́, преподо́бне Ни́коне,/ зе́льным поще́нием, я́ко благово́нными арома́ты,/ напая́я ду́шу твою́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Я́ко в высо́ких черто́зех доброде́тели/ предугото́вал еси́ дом себе́, Се́ргие, о́тче наш,/ и я́ко вои́стинну Боже́ственную све́тлость зре́ти сподо́бился еси́,/ в ню́же всели́вся, зри́ши Святу́ю Тро́ицу,/ Е́йже моли́ся дарова́ти ми́ру ве́лию ми́лость.

Сла́ва, глас 8:

Преподо́бнии отцы́ Се́ргие и Ни́коне,/ ми́ра красоту́ и сла́дость вре́менную/ отню́д возненави́дели есте́,/ мона́шеское житие́ па́че возлюби́сте,/ А́нгелов собесе́дницы бы́ти сподо́билися есте́/ и свети́льницы многосве́тлии Ру́сския земли́,/ чудесы́, я́коже второ́е со́лнце, сия́ете./ Но всех нас помина́йте,/ соверша́ющих свяще́нную па́мять ва́шу в хра́ме ва́шем,/ мы бо ча́да ва́ша и о́вцы слове́сных уче́ний ва́ших/ и вас на по́мощь призыва́ем,/ прося́ще ва́ми прия́ти мир и ве́лию ми́лость.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Тропа́рь, глас 8: Я́ко трисве́тлаго со́лнца: пи́сан на вели́цей вече́рни. Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕРНИ

Блаже́н муж: 1-й антифо́н. На Го́споди, воззва́х: стихи́ры на 8, глас 6.

Подо́бен: Все отло́жше:

Ми́ра мяте́ж, преподо́бне, оста́вив/ и взем крест твой,/ после́довал еси́ Христу́ невозвра́тным по́мыслом,/ и в пусты́ню всели́лся еси́, преподо́бне,/ душе́вныя стра́сти из ко́рене исторга́я/ и теле́сная чу́вства огорчева́я,/ и ча́стыми бде́нии и моли́твами/ благода́ть восприя́л еси́, преподо́бне,/ цели́ти разли́чныя неду́ги,/ А́нгелов собесе́дниче и преподо́бных сожи́телю;/ моли́ся Го́споду, Се́ргие преподо́бне,/ поми́ловатися душа́м на́шим.

Весь от ю́ности Го́споду возложи́лся еси́,/ Ни́коне преподо́бне,/ земну́ю красоту́ и сла́ву в ничто́же вмени́в,/ Христа́ еди́наго возлюби́л еси́/ и, Того́ крест на ра́мена взем,/ боже́ственне вооружи́вся,/ Ла́вры вели́каго Се́ргия дости́гл еси́,/ и от него́ посыла́емь быва́еши/ к духо́вному настоя́телю Афана́сию,/ и та́мо жела́емых тобо́ю от него́ сподобля́ешися./ И ны́не на Небесе́х со А́нгелы Тро́ице предстоя́,/ Ни́коне о́тче наш,/ моли́ спасти́ся душа́м на́шим.

Преподо́бне о́тче,/ кто испове́сть труды́ твоя́ и боле́зни?/ Или́ кий язы́к изрече́т жесто́кое твое́ житие́,/ бде́ние же и сухояде́ние/ и е́же на земли́ лега́ние,/ чистоту́ душе́внуто и теле́сную,/ устна́ми и умо́м соверше́нное безмо́лвие,/ смире́ние же нелицеме́рное,/ моли́твы непреста́нныя и разсужде́ние доброразсу́дное,/ ху́дость ри́зную и па́мять сме́ртную?/ Се́ргие, о́тче наш,/ моли́ спасти́ся душа́м на́шим.

Стра́шное Христо́во прише́ствие/ в се́рдцы твое́м прии́м, Ни́коне преподо́бне,/ разу́мно мимотеку́щих жития́ уступи́л еси́/ и, сла́ву маловре́менную презре́в,/ молча́ние восприя́л еси́:/ на земли́ бо му́жески подвиза́лся еси́/ и плоть потща́лся еси́ покори́ти ду́ху,/ ду́шу же и ум от страсте́й очи́стив,/ ревнова́л еси́ житию́ вели́каго Се́ргия./ С ни́мже ны́не на небесе́х Престо́лу Влады́ки всех предстои́ши,/ со дерзнове́нием моля́ся о душа́х на́ших.

Преподо́бне о́тче Се́ргие,/ ты врач душ и теле́с яви́лся еси́,/ источа́я неду́жным исцеле́ния струи́,/ да́ром же проро́чествия укра́шен,/ прорица́я, я́ко настоя́щая, бу́дущая,/ моли́твою бо кня́зя вооружи́в ва́рвары победи́ти,/ хва́лящияся оте́чество его́ разори́ти,/ но саме́х богопораже́нною я́звою тру́пия досто́йно падо́ша,/ псало́мски, при а́де, преподо́бне.

Преподо́бне о́тче Ни́коне,/ измла́да возлюби́в добро́ту Влады́чню/ и к Тому́ жела́ние невозвра́тно име́я,/ оте́чество и род оста́вил еси́;/ бога́тство и сла́ву возненави́дев,/ Христу́ еди́ному после́довал еси́;/ равноа́нгельно во оби́тели Пресвяты́я Тро́ицы пожи́в,/ огра́ду мона́шествующим созда́л еси́./ И ны́не на Небесе́х со Ангелы Тро́ице предстои́ши,/ Ни́коне преподо́бне,/ со дерзнове́нием моля́ся о душа́х на́ших.

Богому́дре Се́ргие,/ сла́ву маловре́менную оста́вль,/ и в пусты́нях и гора́х ты живы́й яви́лся еси́,/ и Тро́ицы чи́стый дом, блаже́нне, был еси́,/ Ея́же си́лою пресвяты́я хра́мы воздви́г,/ и огра́ды мона́шествующим во спасе́ние созда́л еси́,/ живя́ше же в тебе́ Христо́с Бог наш,/ Его́же от ю́ности возжеле́л еси́./ Того́ моли́, Се́ргие преподо́бне,/ спасти́ся душа́м на́шим.

Егда́ Боже́ственное раче́ние на́йде на тя, блаже́нне Ни́коне,/ тогда́, мирска́я мудрова́ния дале́че отри́нув,/ к Боже́ственному Се́ргию прите́кл еси́,/ и, от него́ наставля́емь,/ посыла́ешися в монасты́рь, Высо́кое нарица́емо,/ к того́ ученику́ Афана́сию,/ и та́мо о́браза мона́шескаго и свяще́нства сподобля́ешися,/ мно́гим доброде́тели о́браз быв./ Те́мже мо́лим тя:/ моли́, преподо́бне, спасти́ и просвети́ти ду́ши на́ша.

Сла́ва, глас 6:

Е́же по о́бразу соблю́дше невреди́мо,/ ум влады́ку над страстьми́ па́губными по́стнически поста́вльше,/ во е́же по подо́бию, я́ко мо́щно, возшли́ есте́,/ му́жески бо естество́ пону́дивше,/ потща́стеся ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́стеся верх,/ жи́телие пусты́ннии, благотеку́щих обучи́телие,/ пра́вила доброде́тели изве́стнейшая,/ и ны́не на Небесе́х, зерца́лом разре́шшимся,/ отцы́ на́ши Се́ргие и Ни́коне,/ чи́сте зри́те Святу́ю Тро́ицу,/ моля́щеся несре́дственне/ о и́же ве́рою и любо́вию чту́щих вас.

И ны́не, Богоро́дичен: Кто Тебе́ не ублажи́т, Пресвята́я Де́во:

Вход. Проки́мен дне. И чте́ния три преподо́бническая (зри день 5-й).

На лити́и стихи́ры, глас 6:

Прииди́те, празднолю́бцы и по́стников сосло́вие,/ ве́рно соше́дшеся, и́стинныя по́стники почти́м днесь, Се́ргия и Ни́кона,/ с весе́лием ше́ствовавшия по стопа́м Влады́ки своего́/ у́зкий путь и безстра́стную жизнь,/ и ве́рою возопие́м:/ о всеблаже́ннии, преподо́бных сожи́телие и по́стников похвало́,/ о нас моли́теся ко Го́споду,/ поми́ловатися душа́м на́шим.

Преподо́бне и Богоно́се Се́ргие,/ любве́ ра́ди Христо́вы вся оста́вил еси́/ и, в пусты́ню вшед,/ ника́коже убоя́лся еси́ неви́димых враго́в кова́рствия,/ а́ще бо и мно́гажды приидо́ша на тя,/ скрежета́нием зу́бным я́рость показу́юще,/ ты же моли́твами твои́ми,/ я́ко дым, без ве́сти сих сотвори́л еси́./ О, непоро́чныя твоея́ души́ и кре́пкаго терпе́ния твоего́!/ Христа́ непреста́нно моли́ спасти́ся душа́м на́шим.

Днесь ликовству́ет ра́достно Боже́ственная и вели́кая Ла́вра/ и хва́лится твои́ми богоуго́дными дея́нии,/ име́ющи твоя́ святы́я мо́щи, блаже́нне Ни́коне,/ от ни́хже святы́ню почерпа́ем оби́льно:/ подаю́т бо здра́вие/ с ве́рою притека́ющим к честне́й твое́й ра́це./ Те́мже, просве́щшеся тобо́ю, глаго́лем:/ сподо́би и нас сла́вы Небе́сныя Христо́вы, блаже́нне,/ и твое́ ста́до сохраня́й/ и спаси́ ду́ши на́ша.

Сла́ва, глас 8:

Преподо́бнии отцы́, Се́ргие и Ни́коне,/ ми́ра красоту́ и сла́дость вре́менную отню́д возненави́дели есте́,/ мона́шеское житие́ па́че возлюби́сте,/ А́нгелов собесе́дницы бы́ти сподо́билися есте́/ и свети́льницы многосве́тлии Ру́сския земли́,/ чудесы́, я́коже второ́е со́лнце, сия́ете./ Но всех нас помина́йте,/ соверша́ющих свяще́нную па́мять ва́шу в хра́ме ва́шем,/ мы бо ча́да ва́ша и о́вцы слове́сных уче́ний ва́ших/ и вас на по́мощь призыва́ем,/ прося́ще ва́ми прия́ти мир и ве́лию ми́лость.

И ны́не, Богоро́дичен: Безневе́стная Де́во:

На стихо́вне стихи́ры, глас 4.

Подо́бен: Я́ко до́бля:

Во Христа́ обле́кшеся,/ тле́емаго челове́ка богому́дренно совле́кшеся,/ тем, духо́вною благода́тию при́сно просвеща́еми,/ я́ко зве́зды све́тлыя,/ ми́рови просия́ли есте́, Се́ргие и Ни́коне,/ моли́теся от тли и бед изба́витися/ ве́рою соверша́ющим при́сно честну́ю па́мять ва́шу.

Стих: Честна́ пред Го́сподем/ смерть преподо́бных Его́.

Чу́вственныя стра́сти теле́сныя победи́л еси́/ воздержа́ния брозда́ми, чудоде́йственне Се́ргие,/ и ре́вность к безпло́тным на земли́ показа́л еси́,/ все же плотско́е жела́ние ду́ху повину́л еси́./ Тем и ны́не, в Небе́сных дво́рех водворя́яся,/ моли́ о душа́х на́ших.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Послуша́ния от се́рдца же́лая, му́дре Ни́коне,/ ми́ра и су́щих в нем жите́йских отре́клся еси́./ И сего́ ра́ди в Вы́шних со А́нгелы Христу́ предстои́ши,/ о всех моля́ся.

Сла́ва, глас 8:

Мона́хов мно́жества/ наста́вники ны́не чтим вас, отцы́ преподо́бнии Се́ргие и Ни́коне,/ ва́ми бо стезе́ю вои́стинну пра́вою ходи́ти позна́хом,/ блаже́ни есте́, Христу́ рабо́тавшии/ и вра́жию низложи́вшии си́лу,/ А́нгелов собесе́дницы, пра́ведных сожи́телие и святы́х,/ с ни́миже моли́теся Го́сподеви/ поми́ловатися душа́м на́шим.

И ны́не, Богоро́дичен:

Ра́дуйся, чистоты́ сокро́вище;/ ра́дуйся, Невеще́ственнаго Све́та чи́стое жили́ще;/ ра́дуйся, глави́зно спасе́ния на́шего;/ ра́дуйся, апо́столов пропове́дание;/ ра́дуйся, му́чеников похвало́;/ ра́дуйся, проро́ков исполне́ние, Всенепоро́чная./ Ра́дуйся, подви́жников и мона́хов украше́ние/ и спасе́ние ве́рных.

На благослове́нии хле́бов, а́ще не пое́ши ма́лую вече́рню, тропа́рь преподо́бным отце́м о́бщий, глас 8: Я́ко трисве́тлаго со́лнца: два́жды и Богоро́дице, Де́во: еди́ножды. Аще пое́ши ма́лую вече́рню, тропари́: преподо́бнаго Се́ргия, глас 8: От ю́ности восприя́л еси́: и преподо́бнаго Ни́кона, глас 1: Послуша́ния до́брый рачи́тель быв: и Богоро́дице, Де́во:

Тропа́рь о́бщий преподо́бным Се́ргию и Ни́кону, глас 8:

Я́ко трисве́тлаго со́лнца светоза́рныя зве́зды,/ Тро́йческим све́том озаря́ете сердца́ ве́рных,/ сосу́ди Све́та Пресвяты́я Тро́ицы я́вльшеся,/ и преди́вным ва́шим житие́м и́ноком бы́сте тве́рдии законоположи́телие/ и це́рквам благоле́пие, и благове́рным, и святи́телем, и всем лю́дем,/ вся бо де́монския скве́рны отгна́вше отсю́ду/ ва́шими чи́стыми уче́нии и де́лы,/ до́бре упасо́сте ста́до, со́бранное ва́ми,/ но и ны́не мо́лим вас:/ посеща́йте чад свои́х, я́ко иму́щии дерзнове́ние ко Святе́й Тро́ице,/ Богому́дре Се́ргие с чу́дным ученико́м свои́м Ни́коном,/ и моли́те Христа́ Бо́га, да спасе́т ду́ши на́ша.

Тропа́рь преподо́бнаго Се́ргия, глас то́йже:

От ю́ности восприя́л еси́ Христа́ в души́ твое́й, преподо́бне,/ и па́че всего́ вожделе́л еси́ мирска́го мяте́жа уклони́тися,/ му́жески в пусты́ню всели́лся еси́/ и ча́да послуша́ния в ней, плоды́ смире́ния, возрасти́л еси́./ Тем быв Тро́ице вселе́ние,/ чудесы́ твои́ми всех просвети́л еси́, приходя́щих к тебе́ ве́рою,/ и исцеле́ния всем подая́ оби́льно./ О́тче наш Се́ргие, моли́ Христа́ Бо́га, да спасе́т ду́ши на́ша.

Тропа́рь преподо́бнаго Ни́кона, глас 1:

Послуша́ния до́брый рачи́тель быв,/ преподо́бне Ни́коне приснопа́мятне,/ Це́рковь бо прекра́сну Святы́я Тро́ицы/ в похвалу́ отцу́ твоему́ воздви́гл еси́./ Те́мже и мы, ча́да твоя́, любо́вию вопие́м ти:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

НА У́ТРЕНИ

На Бог Госпо́дь: тропа́рь преподо́бных о́бщий, глас 8: Я́ко трисве́тлаго со́лнца: та́же преподо́бнаго Се́ргия, глас то́йже: От ю́ности восприя́л еси́: Сла́ва, преподо́бнаго Ни́кона, глас 1: Послуша́ния до́брый рачи́тель быв: И ны́не, Богоро́дичен.

По 1-м стихосло́вии седа́лен, глас 8.

Подо́бен: Повеле́нное та́йно:

Оте́ческими мо́лниями озари́вшеся,/ я́ко в рай кра́сный ны́не входя́ще, сла́дости пото́ка наслади́мся/ и, сих до́блести ужа́сно сматря́юще, поревну́им доброде́телем преподо́бных оте́ц наших Се́ргия и Ни́кона, Спа́су взыва́юще:/ моли́твами их, Бо́же, Ца́рствия Твоего́ прича́стники ны сотвори́.

Сла́ва Отцу́ и Сы́ну и Свято́му Ду́ху:

Нача́льника мона́шествующих Се́ргия согла́сно с Ни́коном му́дрым вси воспои́м и сих умо́лим,/ я́ко да Христу́ непреста́нно мо́лятся о нас, Боже́ственную и всесве́тлую соверша́ющих па́мять их,/ в пе́снех сла́вяще Спа́са и Го́спода.

И ны́не, Богоро́дичен:

Благодари́м Тя, Присноде́во, и велича́ем, Чи́стая,/ и покланя́емся Ти, воспева́юще рождество́ Твое́, Благода́тная, зову́ще непреста́нно:/ спаси́ нас, Де́во Всеми́лостивая, я́ко Блага́я,/ и де́монскаго исхити́ словопре́ния стра́шнаго в час испыта́ния,/ да не посрами́мся, раби́ Твой.

И чте́ние свята́го Ефре́ма. Сло́во о блаже́нстве отце́в сконча́вшихся и в посте́ просия́вших (зри выше).

По 2-м стихосло́вии седа́лен, глас 3.

Подо́бен: Красоте́ де́вства:

Е́же к Бо́гу мудрова́ние горе́ име́я, о́тче Се́ргие,/ и я́же на земли́ оста́вил еси́, и, мно́гими боле́зньми све́тло твое́ житие́ изъясни́в,/ вся́кия же Боже́ственныя доброде́тели оби́тель показа́вся,/ в моли́твах, и мольба́х, и поще́ниих Го́споду прибли́жился еси́./ Моли́ Христа́ Бо́га спасти́ся душа́м на́шим.

Сла́ва Отцу́ и Сы́ну и Свято́му Ду́ху:

Мона́шеское житие́ от се́рдца, преподо́бне, возлюби́в/ и сего́ ра́ди мир и я́же в ми́ре возненави́дев, блаже́нне Ни́коне,/ духо́вному твоему́ отцу́ послуша́нием и́скренним вда́лся еси́./ С ни́мже Го́споду моли́ся спасти́ся всем нам.

И ны́не, Богоро́дичен:

Я́ко невозде́лана, Де́во, лоза́, прекра́сный Грозд, Христа́, возрасти́ла еси́,/ источа́юща нам вино́ спаси́тельное, всех веселя́щее ду́ши и телеса́./ Те́мже, я́ко вино́вну Тя до́брых ублажа́юще,/ при́сно со А́нгелом вопие́м Ти:/ ра́дуйся, Обра́дованная.

И чте́ние того́же преподо́бнаго Ефре́ма.

По полиеле́и седа́лен, глас 8.

Подо́бен: Прему́дрости:

Егда́, блаже́нне, Боже́ственному жела́нию ум твой впери́в,/ тогда́ оста́вил еси́ вся до́лу влеку́щая мудрова́ния,/ и, в пусты́ню всели́вся, я́ко крин процве́л еси́ доброде́тели прекра́сный,/ и, страсте́й искорени́в те́рние, в нем насади́л еси́ плоды́ трудо́в твои́х./ Те́мже и пожа́л еси́ рукоя́ти, неотъе́млемо бога́тство на Небесе́х./ Се́ргие преподо́бне, моли́ Христа́ Бо́га согреше́ний оставле́ние дарова́ти/ чту́щим любо́вию святу́ю пя́мять твою́.

Сла́ва Отцу́ и Сы́ну и Свято́му Ду́ху:

Му́дрости измла́да подо́бию навы́к/ и сего́ ра́ди вся, я́же в ми́ре, возненави́дев, преподо́бне,/ Христа́ еди́наго возлюби́л еси́./ Отону́дуже духо́вному твоему́ отцу́ всеконе́чно послуша́нию вда́лся еси́,/ от него́же тоя́же оби́тели па́стырь пресла́вно устроя́ешися,/ и мно́гим в доброде́тели о́браз бью:/ с ни́мже моли́ся Го́споду, Ни́коне преподо́бне,/ грехо́в оставле́ние дарова́ти чту́щим любо́вию святу́ю па́мять твою́.

И ны́не, Богоро́дичен:

О Тебе́ ра́дуется, Благода́тная, вся́кая тварь,/ а́нгельский собо́р и челове́ческий род,/ освяще́нный хра́ме и раю́ слове́сный, де́вственная похвало́,/ из Нея́же Бог воплоти́ся и Младе́нец бысть, пре́жде век сый Бог наш./ Ложесна́ бо Твоя́ престо́л сотвори́ и чре́во Твое́ простра́ннее небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

И́же на земли́ а́нгелов/ и на Небеси́ челове́ков Бо́жиих,/ ми́ра благо́е украше́ние,/ пи́щу благи́х доброде́тельных,/ по́стников похвалу́,/ Се́ргия Вели́каго и Ни́кона почти́м,/ насажде́ни бо в дому́ Госпо́дни/ и процвели́ есте́ пра́ведно,/ я́ко ке́дри в пусты́ни,/ умно́живше ста́до Христо́вых слове́сных ове́ц/ в преподо́бстве и пра́вде.

Кано́н Успе́нию Пресвяты́я Богоро́дицы со ирмосо́м на 6 и преподо́бным и Богоно́сным отце́м на́шим игу́мену Се́ргию и ученику́ его́ Ни́кону на 8, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Безсме́ртия жизнь прии́мше,/ ве́чныя я́ве и трисия́нныя зари́, отцы́, насыща́етеся просвеще́нием благода́ти,/ омраче́нную ду́шу мою́ озари́ти помоли́теся,/ я́ко да досто́йно пое́м вас.

И́же во чре́ве ма́терни трикра́ты проглаше́нием Тро́ице служи́тель показа́лся еси́/ и, Трисо́лнечным све́том озаря́емь,/ бесо́вская ополче́ния, я́ко паучи́ну, разори́л еси́, преблаже́нне Се́ргие.

Все твое́ жела́ние к Бо́гу му́жески впери́в,/ в Вы́шних селе́ние сотвори́л еси́ пресла́вно./ Те́мже тя пе́сньми, блаже́нне Ни́коне, почита́ем.

Трисо́лнечным жела́нием озаря́еми, прему́дрии,/ зло́е, блаже́ннии, бесо́в шата́ние и звере́й зия́ния/ ра́нами боле́зней, я́коже паучи́ну, разори́ли есте́,/ Боже́ственным разжига́еми жела́нием.

Богоро́дичен: Я́ко Бо́жия Ма́ти, дерзнове́ние иму́щи к Ро́ждшемуся из Тебе́/ Единоро́дному Сло́ву и Отцу́ Собезнача́льному и Сра́сленному Ду́ху,/ моля́щи не преста́й от бед спаса́ти, Всенепоро́чная,/ и́же Тя, Богоро́дицу, сла́вящия.

Песнь 3

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́новедей Твои́х утверди́,/ я́ко несть свят, па́че Тебе́, Еди́не Человеколю́бче.

Утвержде́нным по́мыслом и кре́пким терпе́нием страсте́й пла́мень увяди́сте/ и в безстра́стия све́тлую оде́жду, отцы́ блаже́ннии, облеко́стеся.

Я́ко добропло́дная ма́слина в дому́ Бо́жии, блаже́ннии, процвето́сте,/ ма́слом ду́ши просвеща́юще любо́вию вас пою́щих:/ несть свят, па́че Тебе́, Го́споди.

А́ще и дале́че, о́тче Ни́коне, житие́м пребыва́вый,/ но близ ве́рою и любо́вию духо́внаго твоего́ настоя́теля,/ и, с ним вку́пе же и Бо́гови предстоя́ще, о нас моли́теся.

Стра́сти душетле́нную успи́сте бо́дренным бде́нием, блаже́ннии,/ и сего́ ра́ди в черто́г Небе́сный всели́стеся/ и прия́сте благода́ть исцеле́ний.

Богоро́дичен: Умерщвле́нный мой ум живо́тным Де́йством, е́же из Тебе́ я́вльшимся ми́рови,/ воздви́гни, Чи́стая, и к жи́зни наста́ви,/ Я́же сме́рти две́ри разо́ршая еди́на рождество́м Твои́м.

Седа́лен, глас 8.

Подо́бен: Прему́дрости:

Па́влово насажде́ние и Аполло́сово восприе́мый напое́ние/ и ва́ше ве́рою насажде́ние и уче́нием напое́ние, И́же возраща́яй, Бог/ прия́л есть и́ноких благоче́стия ве́рою,/ моли́твами ва́шими возрасти́в, и умно́жил есть,/ и от Того́, я́ко ве́рнии раби́ и де́латели разу́мнии, и трудо́м возме́здия досто́йно прия́ли есте́,/ Се́ргие Богому́дре и Ни́коне свяще́нне,/ Богоно́снии отцы, па́стырие и учи́телие,/ Христа́ моли́те стране́ победи́тельная на ва́рвары дарова́ти/ и ста́до ва́ше в ми́ре сохрани́ти и спасти́ ду́ши на́ша.

Сла́ва, и ны́не, Богоро́дичен:

Боже́ственная ски́ния была́ еси́ Сло́ва, еди́на Пречи́стая Ма́ти Де́во,/ чистото́ю А́нгелы превозше́дшая,/ па́че всех мене́, персть бы́вша,/ оскверне́на плотски́ми прегреше́ньми,/ очи́сти молитв Твои́х Боже́ственными вода́ми,/ подаю́щи, Чи́стая, ве́лию ми́лость.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Весь Бо́гови освяти́ся, Се́ргие сла́вне,/ и еди́н Еди́ному совокупля́яся, прему́дре,/ доброде́телию приближа́яся и боговиде́нием./ Та́ко и ты, я́ко чист, сподобля́емь, земли́ бо и земны́х отсту́пль, Ни́коне, досто́йно./ Те́мже и Небе́сное обрето́сте наслажде́ние.

Ду́ха Пресвята́го храм, о́тче, был еси́/ и жи́зненных вод река́ исполня́ема,/ основа́ние непоколеби́мо Це́ркве,/ мона́шествующих утвержде́ние, Се́ргие досточу́дне.

Страстьми́ разли́чными коле́блемыя/ и ве́рою притека́ющия к твоему́ гро́бу, блаже́нне Ни́коне,/ святы́м твои́м хода́тайством вся посети́ ми́лостивно к Человеколю́бцу.

И́же к Бо́гу ва́шим проше́нием помяни́те нас, отцы́ Богоблаже́ннии Се́ргие и Ни́коне,/ от вся́каго изба́витися искуше́ния, мо́лимся,/ и́же ве́рою вас восхваля́ющих.

Богоро́дичен: Бо́га, И́же из Тебе́ воплоще́нна, е́же бе, пребы́вша,/ И́же естество́м ра́вна Отцу́ и Тебе́, Ро́ждшей, бы́вша единосу́щна,/ моли́ непрело́жно проще́ние согреше́нием и душа́м спасе́ние пою́щим ве́рою дарова́ти.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окаянна́го,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Зако́ном Боже́ственным после́дующе,/ законополо́жницы я́вльшеся и́ноком, Богоприя́тнии,/ пра́вила изве́стнейшая, наста́вницы заблу́ждшим, свети́льницы всесве́тлии,/ оте́чество свое́ просвеща́ете, Се́ргие и Ни́коне, Богому́дрии.

Остр ум име́я к Бо́гу,/ стра́сти душетле́нныя успи́л еси́, о́тче,/ и снопы́ благопло́дия пожа́л еси́,/ пита́я благоче́стно восхваля́ющия тя, преподо́бне Се́ргие.

У́зкий и приско́рбный путь ше́ствовал еси́, преподо́бне Ни́коне,/ восхожде́ньми Боже́ственными се́рдца твоего́,/ а́може отца́ твоего́ наста́виша тя моли́твы.

На Небесе́х присносу́щную сла́ву ны́не зря́ще,/ неизглаго́ланныя и Боже́ственныя зари́ пресве́тлых наслажда́ющеся селе́ний,/ покры́йте нас предста́тельством свои́м, преподо́бнии уго́дницы Христо́вы, всечестни́и.

Богоро́дичен: Тя сте́ну иму́ще и заступле́нием Твои́м соблюда́еми,/ Твое́ю Боже́ственною сла́вою хва́лящеся, Тя ублажа́ем,/ Ты бо, Пречи́стая, душа́м на́шим источа́еши весе́лие и ра́дование.

Песнь 6

Ирмо́с: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о Упра́вителю! и спаси́.

Я́ко свет, я́ко два ве́лия со́лнца разу́мную твердь украша́ете, преподо́бнии,/ и зна́мении заре́й просвеща́ете всех ве́рных сердца́,/ тем зове́м вам, моля́щеся:/ разреши́те тьму страсте́й на́ших.

Нас свы́ше, ста́до свое́, озаря́еши ми́лостивно, о́тче,/ во́инству побе́ду правосла́вному подая́ моли́твами твои́ми,/ возвыша́я рог правосла́вных,/ от нас же приими́, а́ще и ма́лое, приноси́мое тебе́ моле́ние.

Я́ко весь Христу́ приближа́яся ясне́йши,/ помяни́ всех, помина́ющих тя, Ни́коне всече́стне,/ грехо́в проще́ния у Христа́ прося́ и Небе́снаго Ца́рствия восприя́тия.

Тро́ичен: Пренача́льное Естество́ и Трисоста́вное Еди́нство,/ О́тче и Сы́не и Ду́ше Пресвяты́й, Све́те и Животе́ Богонача́льный,/ приими́ моли́твенники о нас, Твоя́ уго́дники,/ спаса́й Це́рковь Твою́ и Тя ве́рою призыва́ющия/ и сподо́би нас в ми́ре сла́вити Твою́ держа́ву.

Богоро́дичен: Ви́дети жела́юще Твоего́ Сы́на и Бо́га Небе́снаго сла́ву Ца́рствия, Богоро́дице,/ Се́ргий и Ни́кон преподо́бнии ми́ра с жела́нием его́ оста́виша/ и, Сего́ крест на ра́мо взе́мше, после́доваша живоно́сным Его́ и Боже́ственным стопа́м.

Конда́к, глас 8.

Подо́бен: Взбра́нной:

В по́стницех приобщи́вшеся Вели́кому Анто́нию/ и Евфи́мию Иерусали́мскому поревнова́вше в по́двизех,/ я́ко А́нгели, на земли́ яви́стеся,/ просвеща́юще, преподо́бнии, ве́рных сердца́/ Боже́ственными зна́мении и чудесы́ повсегда́,/ сего́ ра́ди ра́достно вас почита́ем и любо́вию вопие́м вам:/ ра́дуйтеся, преподо́бнии отцы́ Се́ргие и Ни́коне,/ по́стником удобре́ние и всея́ Ру́сския земли́ вели́кое утвержде́ние.

И́кос:

Свяще́нная и Богому́драя дво́ица оте́ц пречу́дная,/ на земли́ до́бре подви́гшеся, целому́дренно и пра́ведно пожи́вше,/ по́стнически испыта́вшеся любо́вию и наде́ждею вооружи́вшеся,/ разори́ша хи́тростне вра́жия кова́рства/ и, с ли́ки святы́х всех Пресвяты́я Тро́ицы престо́лу предстоя́ще,/ Ея́же све́том просвеща́еми, побе́дными венцы́ венча́шася;/ и, во всем ми́ре чуде́с заря́ми блиста́юще,/ поле́зная нам проси́те от Бо́га моли́твами ва́шими богоприя́тными,/ я́ко да ра́достно вас чтим и любо́вию вопие́м вам:/ ра́дуйтеся, преподо́бнии отцы́ Се́ргие и Ни́коне,/ по́стником удобре́ние и всея́ Ру́сския земли́ вели́кое утвержде́ние.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Прекра́снии сосу́ди честни́и, Пресвята́го Ду́ха в себе́ нося́ще, отцы́ преподо́бнии,/ крест свой на ра́мо взе́мше, после́довасте Христу́ невозвра́тным по́мыслом, Се́ргие Богому́дре и Ни́коне блаже́нне,/ и плотска́я мудрова́ния ду́хови повину́сте.

Мир преоби́девше, сла́внии Се́ргие и Ни́коне,/ на земли́ бо, я́ко безпло́тни, пожи́сте,/ а́нгельским ликостоя́нием подо́бящеся./ Те́мже почита́ем вас ве́рно, досточу́днии.

Певце́в, и́же ве́рою пою́щих вас и честну́ю па́мять во хра́ме ва́шем торжеству́ющих,/ хра́мы соде́лайте Ду́ху Пресвято́му моли́твами ва́шими/ и от враг ви́димых и неви́димых изба́витися моли́теся, преподо́бнии.

В се́ла Вы́шняя все́льшеся, преподо́бнии,/ посреде́ нас бы́сте неви́димо, милосе́рдуете,/ и́же посреде́ Боже́ственнаго хра́ма ва́шего пе́сни возсыла́ющих Вседержи́телю/ и блажа́щих приле́жно вас, всехва́льнии.

Богоро́дичен: Мари́ю Пречи́стую и Всесвяту́ю восхва́лим,/ Тоя́ бо ра́ди благода́ть нам источа́ет Иже па́че ума́ даро́в,/ я́ко от пото́ка Боже́ственныя благода́ти,/ Ю́же благочести́вым по́мыслом ублажа́ем.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Прекра́сное ло́зие виногра́да Христо́ва яви́стеся, отцы́ преблаже́ннии,/ источа́юще нам вино исцеле́ний незави́стных,/ с ве́рою притека́ющим ко свято́му хра́му ва́шему и Христу́ вопию́щим:/ о́троцы, благослови́те, свяще́нницы, воспо́йте,/ лю́дие, превозноси́те Его́ во вся ве́ки.

Приле́жно пою́ще, мо́лим вас:/ моли́теся, преподо́бнии, побе́ды дарова́ти на враги́ стране́ на́шей,/ и це́рквам благоле́пие, и мир ми́рови, да ве́село пое́м Христу́:/ о́троцы, благослови́те, свяще́нницы, воспо́йте,/ лю́дие, превозноси́те Его́ во вся ве́ки.

Му́жествовав, победи́л еси́ страстна́я взыгра́ния вся,/ ум просвеще́н име́я, возмо́гл еси́,/ я́же ви́де отца́ творя́ща, сия́ де́тели испо́лнити:/ те́мже тя вси ублажа́ем, Ни́коне всеблаже́нне.

Храм ваш чудесы́ ва́шими всебоголе́пно, я́ко звезда́ми све́тлыми, украша́ется./ Те́мже и мы, согла́сно веселя́щеся, всегда́ блажи́м вас и честну́ю ва́шу па́мять пра́зднуем благоче́стно./ Се́ргие и Ни́коне, отцы́ Богому́дрии, искуше́ний бу́рю утоли́те/ и уны́ния о́блаки разжени́те.

О́тче преподо́бне и Богоно́сне Се́ргие и чу́дный Ни́коне,/ вои́стинну не да́ли есте́ му́жем кро́ве и льсти в расхище́ние своея́ оби́тели,/ в не́йже поны́не мо́лим вас:/ ненави́дящих и оклевета́ющих нас умири́те/ и грехо́вныя ско́рби и печа́ли отжени́те, да пое́м Христу́:/ о́троцы, благослови́те, свяще́нницы, воспо́йте,/ лю́дие, превозноси́те Его́ во вся ве́ки.

Богоро́дичен: Неве́сто Бо́жия, Пренепоро́чная,/ к Тебе́ прибега́ющия плене́ния страсте́й исхити́/ и самовла́стную свобо́ду, Влады́чице, Правосла́вным Це́рквам пода́ждь, ве́рою пою́щим:/ свяще́нницы, по́йте, лю́дие, превозноси́те Го́спода во вся ве́ки.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют.

Се, отве́рзеся вам, отцы́, Ца́рство Небе́сное,/ сконча́вше до́бре тече́ние, ви́десте я́же ви́дят А́нгели,/ и воздая́ние трудо́м подае́т вам по́чести Бог, почита́я вас./ Тем, отцы́ святи́и, ублажа́ем вас.

Взя́тся к высоте́ Небе́сней доброде́тельми, о́тче Богому́дре Се́ргие,/ и в весе́лии се́рдца предстои́ши Престо́лу Святы́я Тро́ицы,/ не забу́ди чад твои́х,/ соверше́нно здра́вие и ди́вну побе́ду на враги́ да́руй,/ да вси тя пе́сньми непреста́нно велича́ем.

Уста́вите свяще́нными свои́ми моли́твами воздвиза́емое смуще́ние и челове́к всех озлобле́ние,/ я́ко иму́ще дерзнове́ние ко Влады́це и Бо́гу на́шему,/ Се́ргие и Ни́коне досточу́днии.

Земля́ с Вы́шними весели́тся во све́тлый Боже́ственный пра́здник ваш, всеблаже́ннии,/ нас же изба́вите тьмы, и боле́зней, и вся́кия тесноты́,/ и е́же во а́де лю́таго, му́дрии, муче́ния.

Руко́ю мое́ю недосто́йною и любо́вию серде́чною приноси́мое к вам ма́лое сие́ моле́ние/ приими́те, Богому́дре Се́ргие и всеблаже́нне Ни́коне,/ душа́м на́шим спасе́ние и телесе́м здра́вие моли́твами ва́шими испроси́те/ и мир ми́рови дарова́ти,/ я́ко да мно́жае вас в пе́снех велича́ем.

Богоро́дичен: Спасе́ния бу́ди ми столп, Чи́стая,/ бесо́вским возбраня́ющи полко́м,/ и напа́стей молву́ и бед отгоня́й, и страсте́й наше́ствие дале́че прогоня́й,/ и чи́сту пода́ждь свобо́ду, и Боже́ственным дарова́нием незави́стне да́руй.

Свети́лен:

Процве́л еси́, я́ко фи́никс, дави́дски, о́тче,/ и оби́тель яви́лся еси́ Ду́ха Всесвята́го,/ Иже сла́вна тя вселе́нней показа́,/ о нас непреста́нно Христа́ моли́,/ почита́ющих ве́рою пречестну́ю па́мять твою́,/ преподо́бне Се́ргие.

Сла́ва Отцу́ и Сы́ну и Свято́му Ду́ху:

Святы́ни храм был еси́, преподо́бне,/ по Боже́ственному прича́стию ра́йский граждани́н,/ в не́мже наслажда́ешися невозбра́нно дре́ва зна́ния и нетле́нныя сла́вы,/ па́мять твори́, Ни́коне преподо́бне,/ о и́же ве́рою хва́лящих тя, о́тче Богому́дре.

И ны́не, Богоро́дичен:

Ра́дуйся, ве́рных похвало́;/ ра́дуйся, преподо́бных утвержде́ние;/ ра́дуйся, правосла́вных сла́во;/ ра́дуйся, све́те су́щих во тьме;/ ра́дуйся, хра́ме пресвяты́й;/ ра́дуйся, Бо́жий раю́;/ ра́дуйся, кля́твы разреше́ние, Благослове́нная Мари́е.

На хвали́тех стихи́ры на 4, глас 4:

Егда́ Боже́ственное зва́ние на́йде на тя, пребога́те,/ тогда́ все плотско́е мудрова́ние ду́ху повину́л еси́,/ поще́ния страда́ньми утверди́вся,/ и, я́ко зла́то, в горни́ле искуше́но, сия́я, яви́лся еси́./ Прия́телище был еси́ Ду́ха Пресвята́го,/ собра́в мона́шествующих мно́жества/ и уче́нии твои́ми, я́ко не́коею небовосхо́дною ле́ствицею,/ на высоту́ доброде́телей возводя́./ Помина́й нас, Се́ргие, чту́щих па́мять твою́,/ спасти́ и просвети́ти ду́ши на́ша.

Богоно́се и преблаже́нне о́тче Се́ргие,/ ты проро́чески посте́лю слеза́ми измыва́л еси́:/ не дал еси́ сна твои́м очесе́м,/ ни ве́ждом дрема́ния,/ серде́чное жела́ние, е́же ко Христу́, явля́я,/ Его́же измла́да возлюби́в,/ вся́кия доброде́тели вид испра́вил еси́./ Те́мже тя ублажа́ем,/ Христа́ велича́юще, тя просла́вльшаго.

Вели́кая исправле́ния по́стнических по́двиг/ вели́каго отца́, вои́стинну чу́днаго Се́ргия,/ Ни́коне блаже́нне,/ привлеко́ша тя жела́нне по́стническому сосло́вию,/ и ди́вно доброде́телем его́ вообра́жся тому́ сожи́тием,/ и сострада́лец по́двигом до́блествен,/ я́ко учени́к того́ и́стинен,/ учи́тель же худо́жен того́ ча́дом./ И ны́не моли́ся, преподо́бне,/ поми́ловатися душа́м на́шим.

Дре́во доброве́твенно,/ се́нно и благопло́дно,/ на вода́х прекра́сно жи́зненных вои́стинну насажде́нное,/ пита́ющее приходя́щия и осеня́ющее опаля́емыя,/ ты еси́, о́тче преподо́бне,/ напая́емь уче́нии Се́ргия,/ и́миже пита́л еси́ твоя́ ученики́./ Те́мже мо́лим тя:/ осени́ лю́ди, заступа́я от язы́ческих наше́ствий,/ низлага́я их пре́жде воста́ния./ Нас же в ми́ре соблюди́,/ Ни́коне, твои́ми моли́твами.

Сла́ва, глас 2:

Преподо́бне о́тче,/ измла́да воздержа́нию прилежа́в, пости́вся,/ орга́н был еси́ Свята́го Ду́ха./ Тем и чуде́с дарова́ния прие́м,/ челове́ки научи́л еси́ преоби́дети маловре́менная./ Ны́не же неизрече́нным све́том све́тле сия́еши,/ просвети́ на́ша мы́сли хода́тайством твои́м,/ му́дре Се́ргие.

И ны́не, Богоро́дичен:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на святы́х, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник:

Моли́тва ко Преподо́бному отцу́ на́шему Се́ргию, игу́мену Ра́донежскому и всея́ Руси́ чудотво́рцу 

О вели́кий засту́пниче ро́да христиа́нскаго, те́плый хода́таю ко Всеще́дрому Бо́гу о всех правосла́вных, неусы́пный сохра́нниче ро́да Ру́сскаго, ско́рый в беда́х всем к тебе́ с ве́рою и любо́вию притека́ющим помо́щниче, о́тче святы́й, от Отца́ Небе́снаго ча́дом твои́м да́нный, Богому́дрый наста́вниче и́ночествующих, прекра́сный о́бразе по́стников, све́тлое зерца́ло доброде́телей, сто́лпе целому́дрия непозы́блемый, свяще́нная главо́, Преподо́бне Се́ргие!

Се аз, многогре́шный, к тебе́, ско́рому помо́щнику, во умиле́нии се́рдца моего́ прибега́ю и во глубо́це души́ моея́ смире́нии ми́л ся тебе́ де́ю. Моли́ Всеми́лостиваго и Всеще́драго Человеколю́бца Бо́га о мне, гре́шнем, я́ко да по мно́гим Свои́м щедро́там очи́стит беззако́ния моя́ и от грех мои́х омы́ет мя, да не тех ра́ди скве́рны отве́ржен бу́ду пречи́стаго гра́да Небе́снаго. При́зри на ве́ру мою́, я́же к тебе́, и наста́ви мя на стезю́ за́поведей Бо́жиих, да поне́ отны́не ше́ствую путе́м жи́зни ве́чныя. Бу́ди мне, заблу́ждшему, вождь в Ца́рствие Небе́сное, бу́ди упра́витель корабля́ жи́зни моея́ ко ти́хому приста́нищу.

Ты, Богому́дре, о́тче, пре́жде не́же свет чу́вственный узре́л еси́, Истинный Свет – Бо́га, во Тро́ице Святе́й сла́вимаго, – просла́вил еси́, егда́ во чре́ве ма́тернем три́жды возгласи́.

Сотвори́ у́бо, да и аз, помраче́нный грехо́в тьмо́ю, Свет Невеще́ственный Трисия́тельнаго Еди́наго Божества́ вы́ну прославля́ю тро́ицею души́ моея́, треми́ ея́ си́лами: па́мятию, ра́зумом и во́лею. Ра́зум утверди́, е́же за́поведи Бо́жия разуме́ти. Па́мять укрепи́, е́же вся Его́ благодея́ния, нас де́ля сотворе́нная, по вся дни живота́ на́шего, ве́чер и у́тро, воспомина́ти благоче́стно и благода́рствие приноси́ти. Во́лю наста́ви, е́же Бо́жию во́лю всегда́ соверша́ти и та вы́ну хоте́ти, я́же Его́ свято́му уго́дна суть хоте́нию.

Еще́, о наста́вниче мой предо́брый, усе́рдными молю́ твою́ благосты́ню слеза́ми, наста́ви ко славосло́вию Пребоже́ственныя Тро́ицы гре́шныя и окая́нныя жи́зни моея́ тро́йчество: помышле́ние, сло́во и де́ло. Умоли́ Бо́га, Отца́ Небе́снаго, я́ко да мене́, де́ло руку́ Свое́ю, обрати́т на де́лание повеле́ний Свои́х Боже́ственных. Упроси́ Единоро́днаго Сы́на Его́, Бо́га Сло́ва, да устне́ мои отве́рзет, е́же вы́ну сло́во сла́вы Его́ глаго́лати и николи́же гни́ла сло́ва от уст мои́х испуща́ти. Уми́лостиви в ви́де о́гненных язы́к я́вльшагося Всесвята́го и Животворя́щаго Ду́ха, я́ко да огне́м благода́ти Своея́ помышле́ния в се́рдцы мое́м, я́ко зла́то в горни́ле, очи́стит и сотвори́т мя досто́йно жили́ще пребыва́ния Своего́.

Увы́ мне! я́ко раб греха́ бех аз, досе́ле сластьми́ искуша́емь и де́моном прельща́емь, но отны́не ка́юся от всея́ души́ моея́ и пла́чуся дел мои́х го́рько, отвраща́юся от беззако́ний мои́х мно́жества, обраща́юся же всем се́рдцем мои́м ко Еди́ному Бо́гу моему́ и Творцу́, име́я предприя́тие во уме́ и́стинное Ему́ еди́ному вы́ну служи́ти. То́чию ты, ско́рый помо́щниче, о святы́й о́тче наш Се́ргие, помози́ мне, окая́нному, святы́м ти посо́бием и бу́ди спору́чник у Всеще́драго Бо́га о мое́м исправле́нии. Ей, о́тче святы́й, невозвра́тну и́мам во́лю и наме́рение, е́же нектому́ греху́ рабо́тати, и усе́рдно хощу́ Бо́жиих за́поведей неле́ностный де́латель бы́ти, но враг лука́вый бо́рет мя страстьми́ безпреста́нно, теле́сными и жите́йскими услажде́нии прельща́ет.

Ты, у́бо, кре́пкий де́монов си́лы победи́телю, в год борьбы́ моея́ помози́ ми, да не рече́т враг мой: укрепи́хся нань. Изнемога́юща мя укрепля́й, па́дающа поддержи́, па́дша воздви́гни и утверди́ но́зе мои́, е́же пра́во ходи́ти в пути́ во́ли Бо́жия, и во́ждствуй мя сам, я́ко до́брый па́стырь свое́ овча́, до после́дняго моего́ издыха́ния, пасы́й неоску́дно па́житьми благода́тей Бо́жиих. По разлуче́нии же души́ моея́ гре́шныя от скве́рнаго сего́ телесе́ исхода́тайствуй ми у Царя́ всех Бо́га в селе́ниих пра́ведных водворе́ние, да и аз, гре́шный, тобо́ю сподо́блен бу́ду пе́ти и воспева́ти со все́ми святы́ми Бо́га, в Тро́ице Святе́й сла́вимаго, Отца́ и Сы́на и Свята́го Ду́ха, в безконе́чныя ве́ки веко́в. Ами́нь.

Моли́тва ко Пресвяте́й Тро́ице от Преподо́бнаго отца́ на́шего Се́ргия, игу́мена Ра́донежскаго и всея́ Руси́ чудотво́рца 

Безнача́льный, Присносу́щий и Всемогу́щий Го́споди, Бо́же Отче Вседержи́телю, Бо́же Сы́не, Искупи́телю ми́ра, Бо́же Ду́ше Святы́й, Уте́шителю и Просвети́телю ро́да челове́ча! Еди́ный по Существу́, в Тро́ице же Святы́х Ипоста́сей пребыва́яй, И́стинный Бо́же, созда́вый челове́ка по о́бразу и по подо́бию Своему́ прича́стия ра́ди бла́гости Твоея́ Боже́ственныя и в населе́ние ме́ста на Небесе́х, из него́же изринове́ни бы́ша сопроти́вльшиися го́рдостию ду́хове; сла́вою Небе́сных дарова́ний украси́вый и че́стию облада́ния ми́ра почты́й его́ и па́дшаго не отри́нувый до конца́, но по Твои́м есте́ственным щедро́там бла́гости и милосе́рдию взыска́вый и на пе́рвое досто́инство возведы́й.

Сам, Влады́ко Человеколю́бче, и ны́не яви́ Твое́ человеколю́бие непрело́жное, покажи́ благоутро́бие неизме́нное, никогда́ же оскудева́емое. Удиви́ ми́лость Твою́ непобеди́мую на избра́ннем Твое́м ста́де, утверди́ милосе́рдие Твое́ неизрече́нное на рабе́х Твои́х, ве́рою Тебе́ служа́щих. Сохрани́ Святу́ю Твою́, Собо́рную и Апо́стольскую Це́рковь во ве́ки непозы́блему, я́ко да и врата́ а́дова не одоле́ют ей. Спаси́ лю́ди Твоя́ Ру́сския и благослови́ достоя́ние Твое́. Соблюди́ страну́ на́шу на мно́га ле́та в благоде́нствии, утверди́ ю во век ве́ка до всеми́рнаго премене́ния. Спаси́, Царю́ Небе́сный, и́мже вручи́л еси́ па́ству слове́снаго ста́да Твоего́, Вели́каго Господи́на и Отца́ на́шего Святе́йшаго Патриа́рха (и́мя рек), Преосвяще́нныя митрополи́ты, архиепи́скопы и епи́скопы, преподо́бныя архимандри́ты и игу́мены, и весь чин свяще́ннический, диа́конский и и́ноческий, и весь приче́т церко́вный.

Снабдева́й, Всеми́лостивый Тво́рче, святу́ю оби́тель сию́ до кончи́ны веко́в, я́ко виногра́д Свой [ему́ же мно́ю, рабо́м Твои́м, изво́лил еси́ насажде́ну бы́ти].

Пода́ждь, Всеще́дре Го́споди, власте́м единомы́слие, благосове́тие, во́ем кре́пость непобеди́мую, всем же общеправосла́вным христиа́ном здра́вие, мир и благоле́пие, вся ну́ждная в изоби́лии, изря́днее же оставле́ние согреше́ний и вся, я́же суть на по́льзу спасе́ния. На зе́млю же достоя́ния Твоего́ низпосыла́й ро́су доброуго́дную, дождь благовре́менный, ве́тры здра́выя, оби́лие земли́ обетова́нныя, да та́ко лю́дие Твои́, иму́ще благоче́стие со дово́льством, благодаре́ние Тебе́, вся́ких благ Пода́телю, вы́ну возсыла́ют, сла́вят же и воспева́ют всехва́льное И́мя Твое́ зде непреста́нно, а пресе́льшеся во страну́ Небе́сную, на места́ оби́телей, Тобо́ю угото́ванных им, хва́лят Тебе́, Бо́га, в Тро́ице Еди́наго, и сла́вят с Небе́сными Си́лами и со всеми от ве́ка Тебе́ угоди́вшими в безконе́чныя ве́ки веко́в. Ами́нь.

ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры, глас 4.

Подо́бен: Я́ко до́бля:

Де́вства чистото́ю укра́шена,/ непоро́чно и пра́ведно тече́ние земно́е соверши́ла еси́,/ Иулиани́е достохва́льная,/ и Жениху́ Безсме́ртному сочета́лася еси́ кончи́ною блаже́нною,/ И́же и по сме́рти нетле́нием и чудесы́ све́тло тя просла́ви,/ неве́сту Свою́ возлю́бленную,/ и дарова́ нам в тебе́ моли́твенницу неусы́пну о душа́х на́ших.

Колесни́цею доброде́телей востекла́ еси́ в Го́рняя селе́ния,/ прекра́сная де́во Иулиани́е,/ нам же честны́я мо́щи твоя́,/ нетле́нием процве́тшия и чудеса́ точа́щия,/ я́ко насле́дие бога́тое, оста́вила еси́./ Те́мже, обре́тение их све́тло пра́зднующе, мо́лим тя:/ неве́сто Христова,/ моли́ся вы́ну ко Го́споду о душа́х на́ших.

Жениха́ Нетле́ннаго красо́тою уязви́вши се́рдце твое́,/ Того́ вседу́шно возлюби́ла еси́, де́во Иулиани́е,/ и, Тому́ непоре́чно де́вство твое́ сохра́нши,/ сподо́билася еси́ вни́ти в черто́г Его бра́чный,/ иде́же со святы́ми наслажда́ющися блаже́нства неконча́емаго,/ помяни́ в моли́твах твои́х ко Го́споду/ почита́ющих любо́вию святу́ю па́мять твою́/ и моли́ся о душа́х на́ших.

Сла́ва, глас 6:

Одесну́ю Спа́са Христа́ в ли́це святы́х дев предстоя́щи,/ де́во княжно́ Иулиани́е,/ наслажда́ешися созерца́нием пресве́тлаго Его́ лица́,/ отону́дуже и сама́, све́тлость немерца́ющую прие́мши,/ све́тиши благода́тно во мра́це страсте́й и скорбе́й су́щим/ и цельбы́ подае́ши неду́жным,/ с ве́рою притека́ющим к ра́це святы́х твои́х моще́й./ Те́мже моли́твами твои́ми/ сохраня́й нас от неду́гов душе́вных и теле́сных/ и исхода́тайствуй нам насле́дие Ца́рствия Небе́снаго.

И ны́не, Богоро́дичен: Кто Тебе́ не ублажи́т:

Вход. Проки́мен дне. Чте́ния 3 преподо́бническая (зри день 5-й).

На стихо́вне стихи́ры, глас 4.

Подо́бен: Дал еси́ зна́мение:

Стра́сти вре́менныя обузда́ла еси́/ и плотоуго́дие отве́ргла еси́, Иулиани́е блаже́нная,/ в де́встве непоро́чнем пребы́вши от ю́ности твоея́,/ да благоуго́дна бу́деши Пресла́дкому Иису́су,/ И́же возлюби́ душе́вную твою́ красоту́/ и обручи́ тя в неве́сту Себе́ нетле́нную,/ к Нему́ же дерзнове́ние стяжа́вши,/ сохраня́й моли́твами твои́ми град и оби́тель,/ храня́щия честны́я твоя́ мо́щи,/ и моли́ся вы́ну о чту́щих святу́ю па́мять твою́.

Стих: Ди́вен Бог во святы́х Свои́х,/ Бог Изра́илев.

Добро́та теле́сная и красота́ Боже́ственная души́ твоея́/ сопряго́шася чу́дно,/ прекра́сная де́во Иулиани́е,/ и соде́лаша, тя вои́стинну досто́йну Жениха́ Безсме́ртнаго,/ И́же избра́ тя, и возлюби́,/ и да́ры духо́вными зело́ обогати́,/ и́миже, я́ко ря́сны, укра́шена,/ вошла́ еси́ в неве́стник Его́ ра́йский/ и та́мо вене́ц Ца́рствия Небе́снаго получи́ла еси́ от руки́ Вседержи́теля,/ Ему́же предстоя́щи во сла́ве невече́рней,/ моли́ся вы́ну о чту́щих святу́ю па́мять твою́.

Стих: В це́рквах благослови́те Бо́га,/ Го́спода от исто́чник Изра́илевых.

О́крест стоя́щи честны́я твоея́ ра́ки, де́ва блага́я, Иулиани́е присносла́вная,/ пе́сни хвале́бныя прино́сим ти по достоя́нию,/ я́ко моли́твеннице за нас у Престо́ла Го́спода сла́вы,/ да́ры целе́бныя неоску́дно подаю́щей с ве́рою к тебе́ притека́ющим,/ и́хже не лиши́ и нас, тре́бующих твоего́ заступле́ния,/ и моли́ся ко Го́споду о чту́щих святу́ю па́мять твою́.

Слава, глас 6:

Княже́ния высота́ и мирски́я уте́хи/ не отторго́ша се́рдца твоего́ от любве́ Христо́вы,/ Иулиани́е пра́ведная,/ те́мже с кня́жескою диади́мою/ вене́ц нетле́нен обруче́ния со Христо́м соедини́ла еси́/ и Красне́йшему па́че сыно́в челове́ческих/ уневе́стилася еси́ преподо́бием и чистото́ю,/ с Ни́мже соедини́вшися любо́вию кре́пкою,/ ны́не лику́еши све́тло в оби́телех ра́йских,/ я́ко де́ва и неве́ста Христо́ва прекра́сная.

И ны́не, Богородичен: Творе́ц и Изба́витель мой, Пречи́стая:

Тропарь, глас 8:

Я́ко непоро́чная неве́ста Нетле́ннаго Жениха́ Христа́,/ пра́ведная де́во Иулиани́е,/ с све́тлою свеще́ю до́брых дел вошла́ еси́ в черто́г Его́ Небе́сный/ и та́мо со святы́ми блаже́нства ве́чнаго наслажда́ешися./ Те́мже моли́, Его́же возлюби́ла еси́/ и Ему́же де́вство твое́ обручи́ла еси́,/ спасти́ ду́ши на́ша.

Ин тропа́рь, глас 2:

Де́вства добро́тами преочище́на/ и целому́дрия цветы́ венча́вшися,/ Богоблаже́нная де́во Иулиани́е,/ яви́лася еси́ ми́ру в нетле́ннем телеси́ твое́м,/ исто́чник исцеле́ний и даро́в духо́вных подаю́щи всем к тебе́ притека́ющим,/ и ны́не, я́ко свеща́ те́плая, благода́ти еле́ем возжже́нная,/ предстоя́щи Престо́лу Го́спода и Жениха́ твоего́ Небе́снаго,/ Того́ моли́, де́во чи́стая,/ изба́вити нас от вся́каго зла,/ чту́щих па́мять твою́ ве́рою и любо́вию.

НА У́ТРЕНИ

На Бог Госпо́дь: тропа́рь святы́я два́жды. Сла́ва, и ны́не, Богоро́дичен.

По 1-м стихосло́вии седа́лен, глас 5.

Подо́бен: Собезнача́льное Сло́во:

Благоче́стно жизнь вре́менную сконча́вши,/ к безсме́ртней жи́зни кончи́ною блаже́нною прешла́ еси́, Иулиани́е всечестна́я,/ и, я́ко луна́ по́лная, сия́еши луча́ми Све́та невече́рняго,/ озаря́ющи нощь страсте́й и скорбе́й на́ших сия́нием мно́гих чуде́с,/ и́миже обогати́лася еси́ от Го́спода, тя венча́вшаго венце́м сла́вы нетле́нныя,/ Ему́же моли́ся о нас, соверша́ющих па́мять твою́.

Сла́ва, и ны́не, Богоро́дичен:

Те́плая Предста́тельнице и непобеди́мое упова́ние изве́стное и непосты́дное,/ стено́, и покро́ве, и приста́нище прибега́ющих к Тебе́, Присноде́во Чи́стая,/ Сы́на Твоего́ и Бо́га моли́ со А́нгелы и блаже́нною де́вою Иулиани́ею/ умире́ние да́ти ми́ру, и спасе́ние, и ве́лию ми́лость.

По 2-м стихосло́вии седа́лен, глас 1.

Подо́бен: Гроб Твой:

Гроб твой исто́чник исцеле́ний показа́ся, Иулиани́е достохва́льная,/ его́же не потаи́ земля́, но издаде́ из недр свои́х во обогаще́ние на́ше,/ в не́мже зря́ще нетле́нием процве́тшия твоя́ мо́щи,/ ра́дуемся и благодари́м Го́спода, такова́го да́ра нас сподо́бльшаго,/ Его́же моли́ при́сно о спасе́нии душ на́ших.

Сла́ва, и ны́не, Богоро́дичен:

Моли́твы Твои́х раб приими́, Богоро́дице,/ и изба́ви нас от вся́кия беды́,/ я́ко ро́ждшая Христа́ Спа́са, Изба́вителя душ на́ших.

Велича́ние:

Велича́ем тя,/ свята́я пра́ведная де́во Иулиани́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

По полиеле́и седа́лен, глас 8.

Подо́бен: Прему́дрости:

Уневе́стивишся Го́сподеви боголе́пно,/ Тому́ Еди́ному де́вство твое́ непоро́чно сохрани́ла еси́, де́во Иулиани́е,/ и черто́г Его́ Боже́ственный в насле́дие ве́чное восприя́ла еси́,/ светоли́тия Небе́снаго све́тлою заре́ю просвеща́ема,/ отню́дуже све́тлость немерца́ющую прие́мши,/ озари́ и на́ша мра́чныя ду́ши луче́м Бо́жия благода́ти/ и моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Безпло́тных Твои́х, Христе́, и Предте́чи Твоего́,/ апо́стол, и проро́к, и му́ченик, и всех святы́х,/ и Богоро́дицы моли́твами, Неискусому́жныя и Благи́я Ма́тере Твоей, умоле́н быв,/ даждь нам во све́те Твое́м ходи́ти/ и сподо́би нас улучи́ти Ца́рствие Твое́ за милосе́рдие ми́лости Твоей.

Степе́нна, 1-й антифо́н 4-го гла́са. Проки́мен, глас 4: Диве́н Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние: Ева́нгелие от Матфе́я, зача́ло 104.

По 50-м псалме́ стихи́ра, глас 6:

Жития́, до́лу влеку́щаго, сла́дость/ и княже́ния сла́ву презре́ла еси́ любве́ ра́ди Христо́вы,/ Иулиани́е блаже́нная,/ и в ю́ностнем во́зрасте му́дрость духо́вную прояви́ла еси́,/ е́юже вся стре́лы искуше́ний вра́жиих неде́йственны соде́лала еси́,/ и я́ко победоно́сица вене́ц Небе́сныя сла́вы/ от десни́цы Всевы́шняго прии́ла еси́,/ Его́же моли́ сподо́бити и нас блаже́нства ве́чнаго.

Кано́н Богоро́дицы и святы́я, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Иису́се, Царю́ сил, Сло́ве Бо́жий Безсме́ртный,/ да́руй ми сло́во и смысл воспе́ти непоро́чную Твою́ неве́сту, пра́ведную де́ву Иулиани́ю,/ ю́же нетле́нием и чудесы́ све́тло просла́вил еси́.

Уязви́вшися жела́нием безсме́ртныя жи́зни/ и красото́ю Красне́йшаго па́че сыно́в челове́ческих плени́вши твое́ се́рдце,/ во сле́д Его́ потекла́ еси́ ве́рно, Иулиани́е Богому́драя.

Ря́сны чистоты́ боголе́пно украси́лася еси́/ и во оде́жду непоро́чнаго де́вства облекла́ся еси́, прекра́сная де́во./ Те́мже и возлюби́ Христо́с твою́ душе́вную добро́ту.

Богоро́дичен: Укрепи́вшеся благода́тию Возсия́вшаго из ложе́сн Твои́х, Пренепоро́чная,/ дев ли́цы вослед Тебе́ к Нему́ приведо́шася, ра́дующеся и зову́ще:/ Ты еси́ де́вственных похвала́.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Си́лою Бо́жиею укрепля́ема, Иулиани́е,/ во ю́ностнем во́зрасте страсте́й возста́ния побежда́ла еси́,/ еди́но тща́ние име́ющи, е́же еди́ному Христу́ ве́рно благоугожда́ти/ и Тому́ непоро́чно служи́ти преподо́бием и чистото́ю.

Яви́ся на тебе́ чу́до ве́лие Бо́жия бла́гости, де́во свята́я:/ ка́ко ты, млада́ отрокови́ца, дре́вняго велиа́ра ухищре́ния победи́ла еси́,/ в не́мощи бо твое́й си́ла Бо́жия сла́вно просла́вися.

Му́дрость неземну́ю от мла́дости возлюби́ла еси́, а́гнице непоро́чная, Иулиани́е,/ и, то́ю наставля́ема, княже́ния сла́ву, и бога́тство, и красоту́ нивочто́же вмени́ла еси́,/ да Христу́ уго́дна бу́деши.

Богоро́дичен: Разуме́вше благове́рно, пропове́дуем Тебе́ и́стинную Бо́жию Ма́терь Всенепоро́чную:/ Тобо́ю бо с на́ми Зижди́тель совокупи́тися изво́ли.

Ин конда́к, глас 8:

Приво́дим Ти, о Всеще́дре, Иулиани́ю,/ присносветя́щую свещу́, еле́ем благода́ти обдержи́мую,/ немощны́м цельбу́./ Ея́же моли́твами от вся́каго зла свободи́ нас и спаси́ всех,/ и́же Тя с поклоне́нием велича́ют.

Седа́лен, глас 4:

Красото́ю де́вственною преукра́шена, неве́сто непоро́чная, свята́я де́во Иулиани́е,/ в черто́г Христо́в вошла́ еси́, ра́дующися,/ иде́же ли́цы А́нгельстии и святы́х собо́ри любо́вно тя срето́ша/ и Сам Царь сла́вы, возлю́бленный твой Жени́х,/ призре́ на тя ми́лостиво и увенча́ тя венце́м безсме́ртия./ Его́же моли́, всеблаже́нная,/ не лиши́ти и нас, земны́х и пе́рстных, насле́дия Небе́снаго.

Сла́ва, и ны́не, Богоро́дичен:

Чи́стая, Всенепоро́чная и Неискусобра́чная,/ еди́на безле́тнаго Сы́на и Сло́во Бо́жие в ле́те ро́ждшая,/ Того́ со святы́ми и честны́ми апо́столы, му́ченики, и проро́ки, и преподо́бными моли́/ дарова́ти нам очище́ние и ве́лию ми́лость.

Песнь 4

Ирмо́с: Седя́й в Сла́ве на Престо́ле Божества́/ во о́блаце ле́кце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Во гла́сех пе́ний а́нгельских вошла́ еси́ на брак А́гнчий, Иулиани́е, неве́сто Христо́ва,/ и зало́г обруче́ния со Христо́м, чуде́с благода́ть, восприя́ла еси́,/ е́юже врачу́еши неду́ги челове́ческия.

Чудесы́ Боже́ственными и нетле́нием де́вственнаго твоего́ телесе́ уверя́еши нас, уго́днице Бо́жия,/ я́ко благоуго́дно бысть Бо́гови житие́ твое́/ и я́ко мзду Небе́сную восприя́ла еси́ со святы́ми.

Да́ры Христу́ принесла́ еси́:/ де́вство непоро́чное, молчали́вая уста́ и кро́ткое се́рдце, Иулиани́е блаже́нная,/ и труды́ воздержа́ния Небе́сное Ца́рствие обрела́ еси́,/ в нем же ве́чнаго блаже́нства наслажда́ешися.

Богоро́дичен: Сни́де во чре́во Твое́, Пренепоро́чная, Госпо́дь, я́ко дождь на руно́,/ я́коже ви́де проро́к Гедео́н дре́вле,/ Его́же во двою́ существу́ родила́ еси́ на спасе́ние нас, зову́щих:/ сла́ва, Христе́, си́ле Твое́й.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Я́ко сокро́вище многоце́нное, нетле́нием процве́тшия мо́щи твоя́/ в земли́ обрето́шася Про́мыслом Бо́жиим ди́вным, Иулиани́е, де́во свята́я:/ с све́тлым бо лице́м и у́тварьми деви́ческими/ прекра́сно во гро́бе почива́ла еси́, тле́нием невреди́ма.

Уме́рши те́лом, ду́хом жива́ еси́, княжно́ богоуго́дная,/ те́мже в виде́нии первосвяти́телю Це́ркве Ки́евския Петру́ яви́лася еси́,/ повелева́ющи, да моще́м твои́м по́честь подоба́ющая воздана́ бу́дет.

Проразуме́в твою́ сва́тость,/ Петр святи́тель в но́выя благоле́пныя ри́зы святы́я мо́щи твоя́ облече́, Иулиани́е пра́ведная,/ и в це́ркви вели́цей с че́стию их поста́ви,/ при́сно же па́мять пра́здновати тебе́ установи́,/ я́ко и́стинней уго́днице Бо́жией.

Богоро́дичен: Воздви́гни мя, па́дшаго в ро́ве страсте́й,/ и упра́ви мя в приста́нище спасе́ния,/ Я́же Бо́га и Упра́вителя ро́ждшая, еди́на Всенепоро́чная,/ совокупи́вшаго благода́тию Го́рняя с до́льними, разстоя́щияся пе́рвее.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Безу́мнаго святота́тца, пе́рстень с руки́ твоея́ похи́тившаго,/ гро́зно наказа́ла еси́, уго́днице Бо́жия:/ и́же а́бие на пра́зе церко́внем го́рько ду́шу свою́ изве́рже/ и бысть та диа́волу в коры́сть.

Уве́рити хотя́щи благогове́йнаго игу́мена Феодо́сия,/ я́ко вои́стинну со святы́ми почива́еши в оби́телех ра́йских,/ в виде́нии предста́ла еси́ ему́ в ли́це святы́х дев, Иулиани́е блаже́нная,/ и того́ обличи́ла еси́, я́ко то́ю пренебрега́ше,/ я́же причте́на Бо́гом ко святы́м, Ему́ благоугоди́вшим де́вам.

Исцеле́ния неду́жным источа́ют святы́я твоя́ мо́щи, княжно́ Иулиани́е, и сих де́мони трепе́щут,/ и́бо ве́лия си́ла дана́ ти есть от Бо́га на ду́хи нечи́стыя,/ и́хже наси́лия свободи́ и нас твои́ми богоприя́тными моли́твами.

Богоро́дичен: Глаго́л Твои́х сбытие́ зря́ще,/ велича́ем Тя, Богома́ти, возвели́чившую род наш,/ и́бо, ро́ждши Еди́наго от Тро́ицы, соде́лалася еси́ одушевле́нное носи́ло Божества́,/ те́мже ро́ди вси Тебе́ вои́стинну ны́не ублажа́ют.

Конда́к, глас 8:

Храм Бо́жий одушевле́нный,/ де́вственною чистото́ю благоукра́шенный,/ ве́мы тя, свята́я и пра́ведная де́во, княжно́ Иулиани́е,/ те́мже, с любо́вию пра́зднующе/ святы́х твои́х моще́й обре́тение, мо́лим тя,/ изве́стная жела́ний на́ших хода́таице:/ принеси́ за нас моли́твы твоя́ ко Го́споду/ и от вся́ких бед свобожда́й нас/ предста́тельством твои́м у Престо́ла Всевы́шняго, да зове́м ти:/ ра́дуйся, де́во свята́я Иулиани́е, неве́сто Христо́ва прекра́сная.

И́кос:

А́нгелов любе́зную возлюби́вши чистоту́, свята́я и пра́ведная де́во,/ непоро́чно соверши́ла еси́ житие́ твое́ земно́е, во пло́ти а́нгельския нра́вы стяжа́вши,/ те́мже ны́не со безпло́тными и все́ми святы́ми во оби́телех ра́йских водворя́ешися,/ от нас же, чту́щих тя, слы́шиши сия́ пе́сненныя хвалы́:/ ра́дуйся, роди́телей благове́рных дщи боголюбе́зная;/ ра́дуйся, диади́му кня́жескую с венце́м безсме́ртия чу́дно совокупи́вшая./ Ра́дуйся, обру́чника земна́го па́че Небе́снаго зна́ти не восхоте́вшая;/ ра́дуйся, де́вство твое́ Еди́ному Христу́ непоро́чно сохра́ншая./ Ра́дуйся, от ю́ности твоея́ Сладча́йшаго Иису́са от всея́ души́ возлюби́вшая;/ ра́дуйся, ве́рность Ему́ до конца́ жи́зни твоея́ соблю́дшая./ Ра́дуйся, нетле́нием и чудесы́ от Бо́га просла́вленная;/ ра́дуйся, исцеле́ния благода́тная оби́льно источа́ющая./ Ра́дуйся, свеще́, присносия́ющая и освеща́ющая Святу́ю Це́рковь./ Ра́дуйся, Ла́вры Пече́рския Бо́гом дарова́нное многоцеле́бное сокро́вище./ Ра́дуйся, теле́с на́ших немздоприи́мная целе́бнице;/ ра́дуйся, о душа́х на́ших усе́рдная к Бо́гу моли́твеннице./ Ра́дуйся, де́во свята́я Иулиани́е, неве́сто Христо́ва прекра́сная.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Горпо́дь и Бог, благослове́н еси́.

А́ще и косну́ся тебе́ смерть естество́м зако́на, Иулиани́е Богому́драя,/ оба́че безсме́ртия зарю́ от гро́ба твоего́ испуща́еши,/ и́бо, в живоно́сную ме́ртвость о Христе́ обле́кшися,/ нетле́нием чудотво́рным прекра́сно процвела́ еси́.

Па́че ума́ и смы́сла естества́ зако́ны в тебе́ премени́шася, чу́дная де́во,/ и́бо, мно́га ле́та в не́дрех земли́ во гро́бе лежа́щи,/ нетле́нна и благоцвету́ща лице́м показа́лася еси́,/ я́ко усну́вшая о Го́споде сном пра́ведных.

Ви́дети жела́ющи добро́ту пресве́тлаго зра́ка Христо́ва,/ ты, чи́стая де́во, обру́чника земна́го отрекла́ся еси́,/ да Христу́ уневе́стишися во ве́ки,/ Ему́же, я́ко ве́но драго́е, чистоту́ непоро́чную принесла́ еси́,/ те́мже и возлюби́ Той твою́ душе́вную красоту́.

Богоро́дичен: Пощади́ мя, Христе́, егда́ хо́щеши ми́ру суди́ти со сла́вою,/ разори́ мглу страсте́й мои́х моли́твами ро́ждшия Тя Непоро́чныя Де́вы,/ с Не́ю же и Иулиани́ю пра́ведную приими́ моля́щуюся, я́ко Благ и Многоми́лостив.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Светоно́сная твоя́ па́мять, Иулиани́е блаже́нная, ра́достна ве́рным быва́ет,/ и́бо торжество́ Правосла́вия в ней прояви́ся:/ в не́дрех бо еди́ныя Правосла́вныя Це́ркве нетле́ние благода́тное процвета́ет,/ и́мже ты боголе́пно облекла́ся еси́, по́честь досто́йную восприи́мши.

Бога́тство неистощи́мое исцеле́ний подаде́ тебе́, отрокови́це, Христо́с/ и вме́сто княже́ния земна́го насле́дием Ца́рства Небе́снаго тя обогати́,/ я́ко возлю́бльшую Его́ от и́скренния души́;/ те́мже моли́ Его́ бла́гость, не лиши́ти и нас, омраче́нных, просвеще́ния свы́ше/ и ча́сти благи́я святы́х.

Иска́пают целе́бныя струи́ твоя́ святы́я мо́щи, княжно́ Богоуго́дная,/ и́миже ороша́еши ду́ши на́ша благода́тно/ и врачу́еши телеса́ на́ша от неду́гов многоразли́чных,/ я́ко прии́мшая от Го́спода бога́тыя да́ры исцеле́ний.

Богоро́дичен: Прему́дрость Ипоста́сную, и Сло́во пресу́щественное, и Врача́ душ и теле́с ро́ждшая,/ гное́ния и ра́ны души́ моея́ исцели́, лю́тыя и многовре́менныя,/ и се́рдца моего́ уста́ви боле́знь, Де́во.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Лику́ет свята́я Ла́вра Пече́рская,/ иму́щи драго́е сокро́вище – твоя́ чудотворя́щия мо́щи, Иулиани́е,/ от ни́хже, я́ко от неистощи́маго исто́чника, ве́рным то́чиши исцеле́ния,/ те́мже тя пе́сньми хвале́бными любо́вию ублажа́ем.

Яви́лася еси́ я́ко звезда́ светоза́рная,/ мы́сленное не́бо Ла́вры Пече́рския благода́тно озаря́ющая, пра́ведная де́во,/ и све́тиши всем, в преподо́бии жи́ти хотя́щим, жития́ твоего́ чистото́ю,/ е́же все посвяще́но бысть тобо́ю в любо́вь Христу́ Бо́гу.

Голуби́це непоро́чная,/ под кров Небе́снаго Орла́ прелете́ла еси́/ и до́брый поко́й у Него́ обрела́ еси́, Иулиани́е достохва́льная,/ к Нему́же и на́ша по́мыслы вознеси́ и научи́ нас подража́ти жития́ твоего́ чистоте́/ и те́плей любви́ твое́й ко Христу́ Бо́гу.

Богоро́дичен: Благослове́н Плод благослове́ннаго чре́ва Твоего́, Чи́стая,/ Его́же благословя́т Небе́сныя си́лы и челове́честии собо́ри,/ изба́вльшаго нас от пе́рвыя кля́твы, Благослове́нная Де́во.

Свети́лен:

В черто́зе Небе́снем Христа́ Бо́га ви́дим тя, свята́я де́во,/ и, тоя́жде добро́ты наслади́тися жела́юще, мо́лим тя со умиле́нием мно́гим:/ возжзи́ уга́сший свети́льник наш от еле́я благи́х дел твои́х/ и помози́ нам с му́дрыми де́вами сре́сти Го́спода/ и улучи́ти благу́ю часть одесну́ю Его́ стоя́щих и сла́вящих Его́ во ве́ки.

Сла́ва, и ны́не, Богоро́дичен:

Черто́же Бо́жий одушевле́нный, Богороди́тельнице Пречи́стая,/ несмь досто́ин черто́га Сы́на Твоего́ и Бо́га,/ но к Тебе́ припа́даю, Всеблага́я,/ сотвори́ мя вни́ти в онь Твои́ми всеси́льными и благоприя́тными к Нему́ мольба́ми.

На хвали́тех стихи́ры, глас 4.

Подо́бен: Я́ко до́бля:

Сокрове́нно бысть в Бо́зе житие́ твое́, Иулиани́е,/ и доброде́тели твоя́ утаи́шася от ве́дения челове́ча,/ оба́че Подвигополо́жник Христо́с,/ Ему́же во смире́нии, и молча́нии, и кро́тости се́рдца ве́рно служи́ла еси́,/ пред все́ми по сме́рти тя просла́ви нетле́нием ди́вным и мно́гими чудесы́:/ весть бо Госпо́дь прославля́ти я́вно та́йныя Своя́ рабы́,/ рабо́тающия Ему́ непоро́чно,/ Его́же моли́, уго́днице Бо́жия,/ дарова́ти душа́м на́шим/ оставле́ние грехо́в и ве́лию ми́лость.

Све́тлым лице́м нетле́ннаго твоего те́ла,/ егда́ то́е обре́тено бысть в не́дрех земли́,/ я́вственно показа́ла еси́, Иулиани́е,/ све́тлость немерца́ющую души́ твоея́:/ не дерзну́ бо тле́ние косну́тися тоя́,/ я́же соедини́ся со Христо́м сою́зом неразлу́чным во ве́ки./ Его́же моли́, пра́ведная де́во,/ дарова́ти душа́м на́шим/ оставле́ние грехо́в и ве́лию ми́лость.

Житие́ твое́ земно́е/ пра́ведно и непоро́чно соверши́ла еси́, княжно́ преподо́бная,/ в ми́ре преми́рно пожи́вши/ и в ю́ных ле́тех к соверше́нству духо́вному дости́гши,/ во е́же бы́ти тебе́ равноа́нгельней нра́вы./ Те́мже ны́не свята́я твоя́ душа́ со А́нгелы водворя́ется,/ де́вственное же твое́ те́ло нетле́нием почте́ся/ и чудесы́ от Го́спода просла́влено бысть,/ Его́же моли́, Иулиани́е блаже́нная,/ дарова́ти душа́м на́шим/ оставле́ние грехо́в и ве́лию ми́лость.

Сла́ва, глас 2:

Прииди́те, ве́рных собо́ри,/ прииди́те, де́вственных ликостоя́ния,/ де́ву пра́ведную пе́сньми хвале́бными почти́м, Иулиани́ю княжну́,/ я́же Христу́ в ю́ности благоугоди́/ и, я́ко еле́нь млады́й, на го́ру Небе́сную ско́ро востече́,/ де́вственных по́двигов прия́ти мздовоздая́ние/ от Пра́веднаго Мздовоздая́теля, всем воздаю́щаго по дело́м./ Те́мже, бра́тие, поревну́ем ея́ чистоте́/ и стя́жим любо́вь ея́ ко Христу́ Бо́гу,/ да ми́лостива обря́щем Его́ в День су́дный.

И ны́не, Богоро́дичен:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

Славосло́вие вели́кое. Ектении́ и отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Гала́том, зача́ло 208. Аллилу́ия, глас 1: Терпя́, потерпе́х Го́спода, и внят ми, и услы́ша моли́тву мою́. Ева́нгелие от Матфе́я, зача́ло 104. Прича́стен: В па́мять ве́чную:

Тропа́рь, глас 2:

В по́стничестве от ю́ности до́бре подвиза́вся, Богому́дре,/ ум на враги́ му́жески вооружи́в,/ ору́жием кре́стным сих победи́л еси́,/ твердому́дростная повлача́, в ду́шу вложи́ свою́./ Те́мже похваля́ем тя, кня́же наш Гле́бе,/ я́ко по́стником ты еси́ удобре́ние,/ Ки́еву – сла́ва/ и всей Ру́сстей земли́ – утвержде́ние.

Конда́к, глас 1:

Госпо́днею благода́тию вооружи́ся/ и непреста́нными моли́твами, воздержа́нием, поще́нием и труды́/ духо́внаго дарова́ния от Бо́жия Ду́ха испо́лнися,/ сего́ ра́ди чудотво́рец показа́ся,/ исцеля́я неду́ги и бе́сы прогоня́я,/ кня́же наш Гле́бе,/ моли́ Христа́ Бо́га/ непреста́нно о всех нас.

 

Тропа́рь, глас 1:

Пусты́нный жи́тель, и в телеси́ А́нгел,/ и чудотво́рец яви́лся еси́, Богоно́се о́тче наш Сисо́е,/ посто́м, бде́нием, моли́твою Небе́сная дарова́ния прии́м,/ исцеля́еши неду́жныя и ду́ши ве́рою притека́ющих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Конда́к, глас то́йже:

Сисо́е чу́дне,/ на стра́сти вельми́ подвиза́выйся/ и посто́м и нощны́ми моли́твами сия́ успи́вый,/ благода́ть от Христа́ прия́л еси́/ в страсте́х бе́дствующим посо́бствовати./ Тем и на́ша стра́сти пло́ти и ду́ха исцели́, мо́лимся.