ВЕ́ЧЕР

На Го́споди, воззва́х: стихи́ры Арха́нгела, глас 4.

Подо́бен: Дал еси́ зна́мение:

Ум предве́чный,/ свет соста́вивый вторы́й,/ Гаврии́ла тебе́, прича́стиями Боже́ственными/ просвеща́ющаго всю вселе́нную/ и ю́же от ве́ка открыва́ющаго нам/ Боже́ственную и вели́кую вои́стинну та́йну,/ во утро́бе воплоща́емаго деви́честей/ су́ща Безтеле́снаго и бы́вша Челове́ка,/ во е́же спасти́ челове́ка.

Престо́лу предстоя́ Трисо́лнечнаго Божества́/ и бога́тно просиява́я Боже́ственными светлостьми́,/ испуща́емыми непреста́нно отту́ду,/ су́щия на земли́, ра́достно лику́ющия и восхваля́ющия тя,/ страсте́й мглы изба́ви и просвеще́нием уясни́,/ Гаврии́ле Архистрати́же,/ моли́твенниче о душа́х на́ших.

Низложи́ шата́ния ага́рянская,/ на ста́до твое́ ча́сто находя́щая,/ уста́ви раздо́ры Це́ркве,/ укроти́ бу́рю безме́рных искуше́ний,/ изба́ви бед и обстоя́ний любо́вию чту́щия тя/ и под кров твой прибега́ющия,/ Гаврии́ле Архистрати́же,/ моли́твенниче о душа́х на́ших.

И́ны стихи́ры преподо́бнаго, глас 8.

Подо́бен: О, преславнаго чудесе́:

О́тче Богоно́се Стефа́не,/ Боже́ственною му́дростию ум укре́пль све́тло,/ я́рость у́бо му́жеством,/ целому́дрием же жела́ние,/ пра́вдою же всю си́лу душе́вную/ упра́вил еси́ любому́дренно,/ колесни́цу красну́ доброде́телей соста́вил еси́,/ на ню́же всед, ра́дуяся,/ возше́л еси́ к высоте́, сла́вне.

О́тче Богогла́се Стефа́не,/ богосло́вием ум просвети́л еси́, преподо́бне,/ я́коже копие́, нося́ я́рость,/ просте́рту на ху́льныя, блаже́нне, еретики́,/ жела́нием пи́щи го́рния,/ ея́же сподо́бился еси́ причасти́тися, чу́дне,/ предстоя́ престо́лу всех Царя́ и Вседержи́теля.

О́тче Богоглаго́ливый Стефа́не,/ воздержа́нием ум огради́в всю́ду,/ к Первовино́вному востещи́ сотвори́л еси́,/ и ути́шил еси́ мирски́й мяте́ж/ и, молву́ оттря́с,/ ума́ чистото́ю удержа́н был еси́, прему́дре,/ жела́нием вои́стинну кра́йним,/ Богому́дре преподо́бне.

Сла́ва, глас 6. Византи́ево:

Сра́дуйтеся с на́ми, вся А́нгельская чинонача́лия:/ предста́тель бо ваш и наш засту́пник,/ вели́кий Архистрати́г, в дне́шний день/ в честне́м его́ хра́ме/ пресла́вно явля́яся, освяща́ет./ Те́мже, по до́лгу воспева́юще, тому́ возопии́м:/ покры́й нас кро́вом крилу́ твое́ю,/ вели́кий Гаврии́ле Арха́нгеле.

И ны́не, Богоро́дичен или́ Крестобогоро́дичен.

Подо́бен: Тридне́вен:

Всечи́стая я́ко ви́де Тебе́, на Кресте́ пове́шена,/ пла́чущи, вопия́ше ма́терски:/ Сы́не Мой и Бо́же Мой,/ сладча́йшее Мое́ Ча́до,/ ка́ко терпи́ши страсть поно́сную?

На стихо́вне Окто́иха.

Сла́ва, и ны́не, глас 8. Иоа́нна мона́ха:

Я́ко чинонача́льник, и побо́рник,/ и А́нгелов пе́рвый вождь, Архистрати́же,/ вся́кия ну́жды и ско́рби,/ неду́г и лю́тых согреше́ний свободи́/ ве́рно пою́щих и моля́щих тя, сла́вне,/ я́ве я́ко невеще́ствен Невеще́ственнаго зря/ и непристу́пным све́том Влады́чния сла́вы осиява́емь./ Той бо человеколю́бче плоть нас ра́ди от Де́вы прия́т,/ спасти́ восхоте́в челове́чество.

Тропа́рь, глас 4:

Небе́сных во́инств Архистрати́же,/ мо́лим тя при́сно мы, недосто́йнии,/ да твои́ми моли́твами огради́ши нас/ кро́вом крилу́ невеще́ственныя твоея́ сла́вы,/ сохраня́я нас, припа́дающих приле́жно и вопию́щих:/ от бед изба́ви нас,/ я́ко чинонача́льник Вы́шних сил.

НА У́ТРЕНИ

Еди́н кано́н Окто́иха со ирмосо́м на 4 и Арха́нгела на 6. Творе́ние Ио́сифово, его́же краегране́сие: Я́ко всече́стна Гаврии́ла хвалю́. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Я́ко све́та су́ща, к све́ту кра́йнему невеще́ственными причаще́нии,/ Боже́ственнаго и невеще́ственнаго, молю́ тя, Арха́нгеле Госпо́день:/ ум мой просвети́ моли́твами твои́ми, я́ко да воспева́ю тя.

Соста́вим днесь лик Боже́ственный, веселя́щеся,/ пе́рваго почита́юще Безпло́тных умо́в, неизрече́нную ра́дость возвести́вшаго,/ в мир прише́дшую за бла́гость.

Предста́теля тя вели́ка, и к Бо́гу засту́пника,/ и сте́ну, и утвержде́ние, Гаврии́ле, иму́ще,/ лю́бящии тя, избавля́емся от бед и вре́да змии́на, восхваля́ющии тя.

Богоро́дичен: Чи́сту Тя Всенепоро́чную Гаврии́л я́ко узре́,/ ра́дуйся, – Тебе́, Влады́чице, све́тло возопи́, – Неискусобра́чная,/ челове́ков спасе́ние, А́нгелов похвала́ и честносло́вие.

Ин кано́н преподо́бнаго на 4, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

Тебе́ твоего́, преблаже́нне, уче́ния долг принося́ще,/ воздая́ния простира́ем, вене́ц похва́л плету́ще,/ ты же ми́лостив яви́ся, пребога́те, твои́ми мольба́ми благода́ть ми пода́ждь духо́вную.

Всегуби́тельное стремле́ние страсте́й, о́тче, увяди́л еси́, слове́сным объя́т богому́дрием,/ благопребы́тен бо был еси́, благогла́сен, кро́ток же и смире́н,/ сло́вом же прему́дрости, Стефа́не, и ра́зума венча́емь.

Свяще́нно украси́л еси́ себе́, о́тче, ра́зумом/ и де́тельным де́йством благода́ти, Богоглаго́ливе Стефа́не,/ жела́я венца́ сла́вы Христо́вы,/ и твоея́ наде́жди изря́дно, преблаже́нне, не погреши́л еси́.

Целому́дрие удержа́л еси́ я́ве, кра́йнюю же кро́тость и высо́кое, Богоно́се, смире́ние,/ и́миже возвыша́емь, трудо́в твои́х де́йством и виде́нием, ра́дуяся, прине́слся еси́,/ вене́ц неувяда́емый прие́мь.

Богоро́дичен: Тва́рей яви́лася еси́, Чи́стая, всех ви́димых и неви́димых превы́шши, Всенепоро́чная:/ Зижди́теля бо родила́ еси́, я́коже изво́ли воплоти́тися во утро́бе Твое́й,/ Его́же со дерзнове́нием моли́ спасти́ пою́щия Тя.

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Прича́стием Све́та невеще́ственнаго, я́ко невеще́ствен вои́стинну, Гаврии́ле,/ невеще́ственно просвеща́емь, свет ви́ден был еси́ вторы́й,/ веще́ственныя всегда́ челове́ки просвеща́я, пою́щия тя.

Вели́каго благозва́ния сподо́бился еси́,/ вели́кое та́инство нам откры́в, вели́кий А́нгелов,/ и́мже взя́ти бы́хом от земли́ к велича́йшей высоте́,/ вельми́ чту́щии тя.

Яви́ся всем с Небесе́, любо́вию и́щущим тя при́сно,/ и уста́ви бу́рю, на ны дви́жимую, напа́стей же и скорбе́й,/ о Гаврии́ле Архистрати́же!

Богоро́дичен: Сказу́я е́же дре́вле сокрове́нное та́инство, Отрокови́це,/ Тебе́ иногда́ Гаврии́л взыва́ше:/ ра́дуйся, Бо́жия пала́то, в ню́же всели́вся, вся челове́ки обожи́л есть,/ я́ко Милосе́рд.

Ин

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

Просия́ житие́ твое́, Богоно́се Стефа́не, всесве́тло, я́ко со́лнце, в ми́ре/ и просвети́ к тебе́ ве́рою и любо́вию приходя́щия.

Просвеща́ются концы́ уче́нии твои́ми, преподо́бне:/ я́коже бо свети́льник, просия́л еси́, Богоно́се, Це́ркви Христо́ве,/ в не́йже утверди́ся мое́ се́рдце.

Непорабоще́нну соблю́л еси́ ду́шу твою́ страстьми́/ и сластьми́ теле́сными, Богоно́се Стефа́не че́стне./ Те́мже ны́не по достоя́нию восхваля́ем тя.

Богоро́дичен: Яви́лася еси́ чистото́ю, я́ко крин, Влады́чице,/ посреде́ те́рния просия́вши луча́ми де́вства Твоего́, Богоро́дице Пречи́стая.

Конда́к, глас 2:

На Небесе́х зря Бо́жию сла́ву и на земли́ с высоты́ подая́ благода́ть,/ нача́льниче А́нгелов, му́дре Гаврии́ле, Бо́жия сла́вы служи́телю/ и ми́ра Боже́ственный побо́рниче,/ спаса́й, соблюда́й вопию́щия ти:/ сам бу́ди помо́щник, и никто́же на ны.

Седа́лен, глас 4.

Подо́бен: Вознесы́йся:

Безпло́тных служи́телей ты пе́рвенствуяй,/ первове́чное повеле́нное стра́шное та́инство тебе́ еди́ному, Гаврии́ле сла́вне, вверя́ется,/ Рождество́ неизрече́нное Святы́я Де́вы:/ ра́дуйся, – провозглаша́я Ей, – Обра́дованная./ Те́мже тя должно, ве́рнии, с весе́лием при́сно ублажа́ем.

Сла́ва, преподо́бнаго, глас 3.

Подо́бен: Красоте́ де́вства:

Исправле́ние жития́ твоего́ всех просвеща́ет, стопы́,/ Стефа́не о́тче, вои́стинну, ве́рою подо́бящихся тебе́./ Те́мже любо́вию тя блажа́щия всегда́ спаса́й моли́твами твои́ми от вся́кия тесноты́,/ Христа́ Блага́го моля́, преподо́бне блаже́нне досточу́дне.

И ны́не, Богоро́дичен:

Я́ко невозде́ланная, Де́во, лоза́, краснейший Грозд прозябла́ еси́,/ источа́ющ нам вино́ спасе́ния, всех веселя́щее ду́ши же и телеса́./ Те́мже, я́ко вину́ Тя до́брых блажа́ще при́сно, со А́нгелом вопие́м Ти:/ ра́дуйся, Благода́тная.

Крестобогоро́дичен:

Неискусобра́чная Чи́стая и Ма́ти Твоя́, Христе́,/ ви́дящи Тя, ме́ртва ви́сяща на Кресте́, ма́терски пла́чущи, глаго́лаше:/ что Тебе́ воздаде́ евре́йский беззако́нный собо́р и неблагода́рный,/ и́же мно́гих и вели́ких Твои́х, Сы́не Мой, даро́в наслади́выйся?/ Пою́ Твое́ Боже́ственное снизхожде́ние.

Песнь 4

Ирмо́с: Неизсле́дный Бо́жий Сове́т,/ е́же от Де́вы, воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.

Стоя́л еси́ прича́стием Богонача́льным, дре́вле, Гаврии́ле досточу́дне,/ просвеща́я проро́ка Дании́ла/ и изложи́в явле́ние недове́домых ду́хом.

Усты́ бре́нными тя ра́достно, о́гненное естество́ су́ща, восхваля́ем:/ изми́ нас огня́ всегда́ паля́щаго,/ Боже́ственными, Гаврии́ле, хода́тайствы твои́ми.

Па́че со́лнца в Боже́ственную оде́жду, сла́вою непристу́пною блиста́ющуся, одева́емь,/ Архистрати́же служи́телей,/ Царю́ предстои́ши Небе́сному, веселя́ся.

Богоро́дичен: Всю Тя, Ду́хом Гаврии́л преочище́ну, Всенепоро́чная, разуме́в,/ вопие́т Тебе́ я́вственно:/ ра́дуйся, кля́твы избавле́ние и пра́отцев воззва́ние.

Ин

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Ты, Стефа́не, мона́шествующих был еси́ вене́ц,/ я́ко ка́мением многоце́нным, доброде́тельми обложе́н,/ яви́лся бо еси́, блаже́нне, богора́дованно вои́стинну украше́ние.

Боже́ственную, Богоно́се, прему́дрость поче́л еси́,/ те́мже дарова́ний тя сия́ венцы́ уясни́,/ сла́ву ве́чную тебе́ хода́тайствовавши, о́тче всече́стне.

Све́тлостию нра́вов твои́х и о́бразы бла́гости, преподо́бне Стефа́не,/ подо́бне пожи́л еси́,/ те́мже присту́пен всем был еси́, всеблаже́нне пречу́дне.

Богоро́дичен: Умерщвле́ния плод мне Е́ва принесе́,/ Жизнь же ро́ждшая Ипоста́сную, Пречи́стая, а́бие испра́вила еси́./ Те́мже зову́ Ти: ра́дуйся, Присноде́во.

Песнь 5

Ирмо́с:У жасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Ума́ прича́стием пе́рваго просвеща́емь, вторы́й ви́ден был еси́ свет,/ зовы́й со безчи́сленными А́нгел чи́нми:/ Свят Оте́ц Вседе́тель, Сын Собезнача́лен и Дух Сопресто́лен.

Вид твой о́гнен, добро́та пречу́дна, вся́ку мысль удивля́я,/ ве́лия сла́ва, Гаврии́ле, вели́кий Боже́ственных Безпло́тных нача́льниче,/ всех удобре́ние, ве́рно воспева́ющих тя.

Боже́ственный я́ко ви́де тя, во вре́мя кажде́ния дре́вле стоя́ща, Заха́рия быва́ет нем:/ не ве́рова бо твоему́ возвеще́нию стра́шному,/ его́же возгласи́л еси́, Гаврии́ле Архистрати́же.

Богородичен: Храм свяще́ния су́щи, Пренепоро́чная,/ гла́сом Гаврии́ла Арха́нгела, во святы́х почива́ющаго, родила́ еси́ Пресвята́го Бо́га,/ вся освяща́ющаго и лю́тых изыма́ющаго.

Ин

Ирмо́с: Хода́таи́ Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы.

Стремле́ние страсте́й безстра́стия жела́нием угаси́л еси́, Богоно́се Стефа́не,/ и виде́нии и дея́нии просвети́л еси́, о́тче, душе́вное устрое́ние.

Умо́м чи́стым писа́нии бесе́довал еси́ духо́вными, Богоглаго́ливе Стефа́не,/ и виде́ния и дея́ния собра́л еси́ бога́тство боже́ственно,/ о́тче преподо́бне.

Прему́дрости глубину́ испыта́в, Стефа́не,/ дости́гл еси́ обрести́, ели́ко благопотре́бно,/ и би́сер многоце́нный боле́зньми стяжа́л еси́, преблаже́нне, ра́зума.

Богоро́дичен: Се во чре́ве, Богоро́дице Пречи́стая, Христа́ Бо́га па́че сло́ва име́ла еси́,/ я́коже Иса́ия провозгласи́,/ вы́ше естества́ Сего́, Богороди́тельнице, родила́ еси́.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Земни́и язы́цы почести́ тя, ума́ светоза́рнаго и Небе́снаго, не возмо́гут,/ пресве́тло просвеща́ема па́че ума́ и сло́ва Боже́ственными светлостьми́.

Заря́ со́лнца многосве́тлая, о́гненных слуг нача́льниче,/ светоно́сными твои́ми ко Влады́це мольба́ми/ пою́щия тя тьмы страсте́й исхи́ти.

Сове́ты язы́ков разори́, ве́ру правосла́вную утверди́,/ уста́ви раздира́ния церко́вная, Арха́нгеле,/ ко всех Творцу́ твои́ми моли́твами.

Богоро́дичен: Глаго́лов Боже́ственных послушли́ва, Чи́стая, Гаврии́ловых была́ еси́/ и пребезнача́льнаго Сло́ва пло́тию родила́ еси́,/ безслове́сия мир изба́вльшаго.

Ин

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Вселе́нней свети́ло пресве́тлое, о́тче, яви́лся еси́,/ слове́с све́тлостию просвеща́я, Стефа́не,/ ве́рою и любо́вию к тебе́ притека́ющия.

Блаже́нно житие́ проше́л еси́, успи́в у́бо чу́вства,/ вне быв мирска́го мяте́жа,/ и Бо́гу прибли́жился еси́, Стефа́не.

Я́ко добр, я́ко красе́н вене́ц,/ и́мже ны́не венча́лся еси́, прему́дре Стефа́не, доброде́тельми венча́емь,/ и над страстьми́ ца́рствовал еси́, преизря́дне.

Богоро́дичен: Вы́ше естества́, Де́во, родила́ еси́ и ве́чнуеши Де́вою,/ я́вльши и́стиннаго Божества́, Сы́на и Бо́га Твоего́, о́бразы.

Конда́к, глас 2.

Подо́бен: Тве́рдыя:

Архистрати́же Бо́жий, служи́телю Боже́ственныя сла́вы,/ А́нгелов нача́льниче и челове́ков наста́вниче,/ поле́зное нам проси́ и ве́лию ми́лость,/ я́ко Безпло́тных Архистрати́г.

И́кос:

Рекл еси́, Человеколю́бче, в писа́ниих Твои́х,/ мно́жеству ра́доватися А́нгел на Небеси́ о челове́це еди́ном ка́ющемся, Безсме́ртне./ Те́мже мы, и́же в беззако́нниих, Безгре́шне еди́не Сердцеве́дче,/ Тя моли́ти всегда́ дерза́ем, я́ко Благоутро́бнаго,/ уще́дрити и низпосла́ти недосто́йным умиле́ние, Влады́ко, подая́й нам проще́ние:/ о всех бо нас мо́лится Тебе́ Безпло́тных Архистрати́г.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог благослове́н еси́.

Иоа́нново рождество́, сла́вне, возвести́л еси́ Заха́рии,/ иногда́ внутрь Боже́ственнаго хра́ма предстоя́щу и пою́щу Изба́вителю и Бо́гу:/ препе́тый отце́в Госпо́дь и Бог, благослове́н еси́.

Пресла́вное хра́ма твоего́ благоле́пие пресве́тло, Гаврии́ле, освяща́ет ду́ши ве́рных/ и повелева́ет велегла́сно вопи́ти:/ препе́тый отце́в Госпо́дь и Бог, благослове́н еси́.

Просвеща́емь прича́стием, Архистрати́же, пе́рваго Све́та та́йно,/ вторы́й свет вои́стинну ви́ден был еси́,/ пою́щия просвеща́еши всегда́:/ препе́тый отце́в Госпо́дь и Бог, благослове́н еси́.

Богоро́дичен: По́слан бысть Гаврии́л Архистрати́г,/ ра́дость возвеща́я Тебе́, Де́во Ма́ти Чи́стая,/ Ея́же ра́ди печа́ль преста́, и кля́тва вои́стинну непло́дна бысть,/ и благослове́ние процвете́ ве́рным во ве́ки.

Ин

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ богочести́вым отроко́м ро́су духо́вную,/ Сый благослове́н и препросла́влен.

Благово́нствуют, преподо́бне, твои́х уче́ний словеса́, благода́тию Ду́ха сия́юще:/ Божество́ бо еди́но честву́я в Трех Ли́цах,/ Сло́ва же воплоще́ние поя́, благово́нствуеши нас, пребога́те.

Ума́ чистото́ю и ра́зума, Богому́дре, све́тлостию житие́ преше́л еси́,/ чистото́ю же телесе́ и де́вства сия́нием/ изря́дно возложе́ние я́влься Всеви́дцу и Вседержи́телю.

Сло́во твое́ со́лию растворе́но,/ житие́ твое́, благода́тию, преблаже́нне, сия́я, яви́ся, пречу́дне,/ те́мже в Вы́шния оби́тели всели́лся еси́, ра́дуяся,/ Христу́ со дерзнове́нием ны́не предстоя́.

Богоро́дичен: Управля́ющи, Пречи́стая, мое́ житие́,/ к Твоему́ всети́хому приста́нищу напра́ви,/ Бо́га ро́ждшая, благи́х Исто́чника,/ всем подаю́щаго ве́рным изоби́лие бла́гости.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Священносло́вии свяще́нными тя лю́дие свяще́ннии пою́т, веселя́щеся:/ ты бо всевино́вное Сло́во воплоща́емо,/ е́же по нам, Арха́нгеле, и е́же от нас, провозглаша́еши Де́ве, па́че ума́ же и сло́ва./ Те́мже тя почита́ем во вся ве́ки.

Уму́ вели́кому же и пе́рвому невеще́ственно, Арха́нгеле, соединя́яся,/ усты́ о́гненными твои́ми пое́ши пе́ние стра́шное, е́же пою́т вси а́нгельстии ли́цы:/ Го́спода по́йте, дела́, и превозноси́те Его́ во вся ве́ки.

Благоле́пием я́ве испещре́н Боже́ственным, прохо́диши Небе́сная, та́же и земна́я,/ соверша́я свяще́нная хоте́ния Христа́, всех Бо́га,/ А́нгелов нача́льниче Гаврии́ле, красота́ ве́рою при́сно тя хва́лящих.

Пло́тию по ипоста́си Сло́во челове́ком примеси́тися хотя́,/ име́ тя предтеку́ща и проуготовля́юща свяще́нную пала́ту, о свяще́нный Гаврии́ле!/ Го́спода по́йте, – вопию́ща, – и превозноси́те Его́ во вся ве́ки.

Богоро́дичен: Яко престо́л красе́н Царе́в, я́ко всех тва́рей преиму́щую,/ я́ко Пресу́щнаго еди́ну осуществова́вшую, челове́ки обожи́вшаго/ соедине́нием лу́чшим рождества́ неизрече́ннаго и стра́ннаго,/ благослове́нную воспое́м Де́ву.

Ин

Ирмо́с: Пещь иногда́ о́гненная в Вавило́не де́йства разделя́ше/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Вене́ц благоле́пен Христо́с Жизнода́вец на верх твой положи́, тезоимени́те Стефа́не,/ и́бо дея́ньми просия́л еси́ и виде́нии, яви́лся еси́, зовы́й:/ благослови́те, вся дела́ Госпо́дня, Го́спода.

Все преше́д чу́вство, преблаже́нне, уму́ пе́рвому прибли́жился еси́ души́ чистото́ю,/ жития́ же све́тлостию вене́ц но́сиши, Стефа́не, зовы́й:/ благослови́те, вся дела́ Госпо́дня, Го́спода.

Жела́нием зе́льным, преблаже́нне,/ изсле́дил еси́ Богоно́снаго Са́ввы, Стефа́не, житие́ Боже́ственное,/ жи́зни же све́тлостию поревнова́л еси́, прехва́льне,/ быв у́бо учени́к сего́ вои́стинну изря́ден.

Богоро́дичен: Ум безстра́стный во утро́бе Твое́й соединя́ется челове́ческому уму́, Пречи́стая,/ пло́ти же дебельство́м под ле́том быв, лет Превы́шший./ Тем Тя, Богоро́дице, ве́рою и любо́вию сла́вим.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Предстои́ши стра́шно, Престо́лу благода́ти служа́,/ и облиста́емь светоли́тии, е́же па́че ума́, и свяще́нно обожа́емь,/ и свет зри́мь, и просвеща́яй ве́рою чту́щия тя,/ свяще́нне Гаврии́ле Архистрати́же.

Я́коже не́бо, зри́шися, звезда́ми укра́шено, Боже́ственными светлостьми́,/ и, я́коже воево́да, рука́ми держи́ши скиптр пресве́тлый,/ и прехо́диши всю зе́млю, во́лю Влады́чню всегда́ соверша́я/ и лю́тых ве́рныя изыма́я.

Ути́ши лю́тую ва́рварскую бу́рю, воздви́жемую всегда́ на рабы́ твоя́,/ церко́вныя уста́ви раздо́ры, пою́щим тя пода́ждь прегреше́ний избавле́ние,/ во́инству же да́руй победи́тельная, Гаврии́ле,/ те́плым предста́тельством твои́м.

Предо́брая дво́ице и пресла́вная, Михаи́ле и Гаврии́ле,/ престо́лу предстоя́ще Боже́ственныя сла́вы,/ всем проси́те грехо́в проще́ния и злых премене́ния,/ я́ко предста́телие и я́ко бла́гости Влады́чней во всем подо́бящеся.

Богоро́дичен: Свет благода́ти Рождество́м Твои́м возсия, и просвети́ всю подсо́лнечную,/ и предста́теля тьмы погуби́, Богороди́тельнице Пречи́стая,/ А́нгелов похвало́ и челове́ков всех спасе́ние,/ непреста́нными гла́сы восхваля́ющих Тя.

Ин

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Пречестны́й Стефа́не, ны́не чи́сто услажда́яся/ и пи́щу прие́мля па́че у́мныя, иде́же святы́х собо́ри о Бо́зе лику́ют, блаже́нне,/ тя ны́не чту́щия, хода́тайствуя, к себе́ привлецы́.

Пре́йде, ра́дуяся, к жела́нию кра́йнему, ко еди́ному су́щему я́ве блаже́нству,/ к пребо́льшей добро́те, к жи́зни, вои́стинну нестаре́емей,/ к Све́ту невече́рнему, Богоно́се о́тче Стефа́не.

Я́ко со́лнце, просия́л еси́ в мона́шеских собо́рех, от мя́гких ногте́й освяще́н,/ я́коже зарю́, испуща́я доброде́тели твоего́ жития́,/ пресла́дкий Стефа́не, Богоно́се о́тче преподо́бне.

Богоро́дичен: Разуме́вше издале́ча прозорли́выма очи́ма, пророцы Тя я́ве провозвести́ша,/ хотя́щую Ма́терь бы́ти Вседе́теля и всех Влады́ки,/ те́мже Тя, Всепе́тая, Богоро́дицу испове́дуем.

Свети́лен.

Подо́бен: Посети́л ны:

Архистрати́же Бо́жий, в кро́ве крилу́ твое́ю ополчи́вся,/ огради́ мя, прибега́ющаго к тебе́, и во исхо́де изба́ви мя го́рьких истяза́телей,/ и спаси́ мя мольба́ми твои́ми.

Богоро́дичен:

Бог нам, Чи́стая, прибе́жище, и си́лу, и по́мощь Тя подаде́/ в ско́рбех на́ших и во обстоя́ниих,/ всех у́бо нас изба́ви от бед на́ших.

На стихо́вне Окто́иха. Сла́ва, глас 5:

Иде́же осеня́ет благода́ть твоя́, Арха́нгеле,/ отту́ду диа́воля прого́нится си́ла:/ не терпи́т бо све́та твоего́ ви́дети спады́й денни́ца./ Тем мо́лим тя:/ о́гненныя его́ стре́лы,/ я́же на ны дви́жимыя,/ угаси́ хода́тайством твои́м,/ избавля́я нас от собла́зн его́,/ достохва́льный Гаврии́ле Архистрати́же.

И ны́не, Богоро́дичен или́ Крестобогоро́дичен:

Зря́щи дре́вле А́гнца и Сы́на Своего́/ Де́ва Ма́ти и Всеблаже́нная Отрокови́ца,/ на Крест воздви́жена, вопия́ше, слезя́щи:/ увы́ Мне, Сы́не Мой,/ ка́ко умира́еши,/ Бог естество́м сый Безсме́ртен?

НА ЛИТУРГИ́И

Блаже́нны Окто́иха, на 4. И Арха́нгела Песнь 3-я, на 4. Проки́мен, глас 4: Творя́й А́нгелы Своя́ ду́хи: Стих: Благослови́, душе́ моя́, Го́спода: Апо́стол к Евре́ем, зача́ло 315. Аллилу́ия, глас 5: Хвали́те Го́спода, вси А́нгели Его́. Стих: Я́ко Той рече́, и бы́ша: Ева́нгелие от Луки́, зача́ло 51. Прича́стен: Творя́й А́нгелы Своя́ ду́хи:

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Господи, воззва́х: стихи́ры на 8, глас 4:

Прииди́те, ве́рных сосло́вие,/ прииди́те, лик соста́вим/ и благодаре́ние Бо́гу принесе́м,/ дарова́вшему нам кре́пкия засту́пники и предста́тели,/ о́трасли крестоно́снаго ро́да се́рбскаго,/ воспи́танники же святы́я оби́тели Хиланда́рския,/ и воскли́кнем с любо́вию:/ о отцы́ треблаже́ннии,/ моли́теся непреста́нно о нас Христу́ Бо́гу,/ да спасе́т ду́ши на́ша.

Просия́вше житие́м свои́м, я́ко зве́зды многосве́тлыя,/ духо́вными блиста́ньми просвеща́ете/ всю благочести́вую страну́ Се́рбскую,/ благове́рия догма́ты утвержда́юще,/ е́реси же тьму отгоня́юще,/ моли́теся непреста́нно о всех,/ ве́рою творя́щих всечестну́ю па́мять ва́шу.

Богонача́льными светлостьми́ благода́тию облиста́еми,/ засту́пницы ро́ду се́рбскому яви́стеся,/ душе́вное смуще́ние отстраня́юще/ и печа́ли бу́рю разоря́юще,/ те́мже мо́лим вас:/ моли́твами ва́шими к Бо́гу/ в земли́ на́шей вкорени́те мир и безмяте́жие,/ в нас же саме́х любо́вь и единомы́слие,/ вы бо есте́ на́ше огражде́ние,/ сего́ ра́ди прославля́ем вас.

На зла́це благоче́стия/ Христо́во ста́до слове́сных ове́ц до́бре упасли́ есте́,/ уча́ще их блюсти́ вся, ели́ка запове́дал есть Христо́с Бог,/ житие́м же ва́шим подтвержда́юще вся, ели́ка глаго́лете,/ те́мже показа́стеся и́стинное жили́ще Ду́ха Пресвята́го,/ испо́лненное дарова́ний Бо́жиих,/ и́же тре́бующим раздава́сте ще́дро;/ сего́ ра́ди мо́лим вас:/ моли́теся Христу́ Бо́гу/ дарова́ти грехо́в оставле́ние/ всем, чту́щим любо́вию святу́ю па́мять ва́шу.

И́ны стихи́ры, глас 1:

Достохва́льнии отцы́, и́стиннии предста́телие ро́да се́рбскаго,/ вси почита́ем вас,/ не то́кмо я́ко священносло́вящих свяще́нное Писа́ние,/ но и уста́ми и житие́м ва́шим пропове́дающих сло́во благоче́стия,/ ва́ми бо научи́хомся стра́нным и неизрече́нным./ И ны́не моли́теся, изба́витися нам от вся́ких грехопаде́ний,/ да, прии́мше грехо́в проще́ние,/ насле́дницы бу́дем жи́зни ве́чныя.

Всечестне́йшии отцы́, возвести́телие пути́ спаси́тельнаго,/ орга́ны Ду́ха Свята́го бы́сте,/ восперя́ющии ду́ши наро́да се́рбскаго к Бо́гу,/ я́ко Богому́дрии вожди́,/ научи́сте его́ Небе́сная му́дрствовати,/ сего́ ра́ди возлюби́ вас Христо́с Бог,/ я́ко ве́рныя рачи́тели Своя́,/ и венцы́ нетле́нными увязе́,/ и в Ца́рство Небе́сное всели́.

Приснопа́мятнии отцы́,/ я́ко Спа́сова духодви́жимая ли́ра на земли́ показа́стеся,/ доброгла́сную песнь пою́ще,/ тем бо повину́сте всю страну́ Се́рбскую/ Небе́снаго Царя́ чести́,/ Ему́ покланя́тися и славосло́вити,/ я́ко Бо́га, во ве́ки.

Преблаже́ннии отцы́,/ Со́лнца Пра́вды су́ще служи́телие,/ всесве́тлая свети́ла яви́стеся ро́ду се́рбскому,/ просвеща́юще земны́й мир,/ мрак же пре́лести отгоня́юще,/ те́мже вопие́м:/ благослове́нная и всечестна́я шестьнадеся́тице,/ моли́те Христа́ Бо́га/ спасти́ и просвети́ти ду́ши на́ша.

Сла́ва, глас 8:

Прииди́те, вси празднолю́бцы,/ прииди́те, лик соста́вим/ и псало́мски воскли́кнем, восхваля́юще Богому́дрыя отцы́:/ Симео́на, Са́вву, Арсе́ния и Са́вву втора́го,/ с ни́ми же Иоанни́кия, Евста́фия, Са́вву тре́тияго,/ Никоди́ма, Дании́ла и Ефре́ма,/ и́же вси просия́ша в Се́рбстей стране́,/ к сим и Киприа́на Ки́евскаго,/ Некта́рия Би́тольскаго и Васи́лия Остро́жскаго,/ ку́пно же Дамаски́на Га́бровскаго со Ону́фрием/ и Рафаи́ла Бана́тскаго./ О всечестне́йшии отцы́,/ воспева́ем ваш собо́р и во умиле́нии се́рдца мо́лимся:/ Христа́ Бо́га моли́те/ грехо́в оставле́ние дарова́ти/ всем, любо́вию пра́зднующим достохва́льную па́мять ва́шу.

И ны́не, Богоро́дичен: Царь Небе́сный:

Вход. Проки́мен дне и чте́ния:

1-е: Уста́ пра́веднаго ка́плют прему́дрость: (зри день 19-й).

2-е: Пра́ведницы во ве́ки живу́т: (зри день 19-й).

3-е: Пра́ведных ду́ши в руце́ Бо́жией: (зри день 19-й).

На стихо́вне стихи́ры, глас 3:

Мно́гия печа́ли и беды́ погубля́ют ду́ши на́ша,/ те́мже прибега́ем к вам:/ изба́вите нас/ и от печа́ли на весе́лие преложи́те.

Стих: Честна́ пред Го́сподем/ смерть преподо́бных Его́.

Не пре́зрите тре́бующия ва́шея по́мощи,/ о учи́телие Правосла́вия,/ но всем подава́йте утеше́ние,/ и́же ублажа́ют вас.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Весе́лия живо́т наш испо́лните,/ отцы́ святи́и,/ разруша́юще мглу прегреше́ний на́ших/ и очища́юще ду́ши на́ша/ ва́шими к Бо́гу моли́твами.

Сла́ва, глас 5:

Востру́бим трубо́ю пе́сней,/ воскли́кнем пра́зднственная и воспле́щем рука́ми вси/ в настоя́щее торжество́ Богоблаже́нных оте́ц на́ших,/ воспева́юще моли́твенники на́ша неусы́пныя/ и кре́пкия храни́тели оби́тели Хиланда́рстей./ К сим бо прибега́юще, ми́лость прие́млем,/ бед избавля́емся/ и вси спаса́емся.

И ны́не, Богоро́дичен, глас то́йже:

Бла́жим Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу/ и прибе́жище душ на́ших.

Тропа́рь, глас 4:

Отцы́ на́ши Богоблаже́ннии,/ Афо́нстии подви́жницы,/ Хиланда́рстии свети́льницы,/ непоколеби́мии столпи́ Правосла́вия,/ и́стиннии наста́вницы ева́нгельских преда́ний,/ Влады́ку всех, Христа́, моли́те/ мир вселе́нней дарова́ти/ и душа́м на́шим ве́лию ми́лость.

Сла́ва, и ны́не, Богоро́дичен: Е́же от ве́ка утае́ное:

НА У́ТРЕНИ

На Бог Госпо́дь: тропа́рь отце́в, дважды. Сла́ва, и ны́не, Богоро́дичен.

По 1-м стихосло́вии седа́лен, глас 5:

Та́инственными вода́ми Ду́ха пома́зани,/ процвели́ есте́ в Хиланда́рстей оби́тели в ве́ре благопло́дием доброде́телей./ Те́мже и к Небе́сным оби́телем востекли́ есте́,/ в ни́хже ны́не наслажда́етеся добро́ты неизрече́нныя.

Сла́ва, и ны́не, Богоро́дичен, глас то́йже:

Душе́вныя на́ша не́мощи исцели́, о Пречи́стая,/ и стра́сти теле́сныя погаси́,/ заря́ми Твоего́ све́та мрак неве́дения отгоня́ющи/ и спаса́ющи всех, и́же благове́рно Богоро́дицу Тя испове́дающих.

По 2-м стихосло́вии седа́лен, глас 2:

Собо́р Хиланда́рских святы́х воспое́м, глаго́люще:/ вы до́бре Бо́гу угоди́сте,/ лю́ди же к богоразу́мию наста́висте,/ сего́ ра́ди нетле́нием и чудесы́ от Него́ просла́вистеся,/ я́ко и́стиннии уго́дницы Бо́жии.

Сла́ва, и ны́не, Богоро́дичен, глас то́йже:

Тя велича́ем, Богома́ти Чи́стая,/ на объя́тиих Свои́х носи́вшую Непристу́пнаго Бо́га,/ на Небесе́х сла́вимаго от вся́кия си́лы/ и Тобо́ю да́рующаго нам спасе́ние ве́чное.

Велича́ние:

Велича́ем вас,/ святи́телие Христо́вы,/ и чтим всечестны́й собо́р ваш,/ вы бо мо́лите за нас/ Христа́ Бо́га на́шего.

Псало́м избра́нный святи́телем.

По полиеле́и седа́лен, глас 3:

Боже́ственней сла́ве прича́стницы,/ свети́льницы Це́ркве разу́мнии,/ просвети́те всех све́том Правосла́вия/ и моли́теся непреста́нно ко Го́споду дарова́ти нам ве́лию ми́лость.

Сла́ва, и ны́не, Богоро́дичен, глас то́йже:

После́дующе, Де́во, богодухнове́нным глаго́лом Твои́м,/ блажи́м Тя, вси ро́ди,/ я́ко Роди́тельницу Бо́га блаже́ннаго.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 11.

По 50-м псалме́ стихи́ра, глас 6:

Два или́ три со́бранныя во и́мя Его́/ Христо́с почеству́я,/ прису́тствует посреде́ их,/ оби́тель же Хиланда́рская представля́ет днесь/ не два и три то́кмо,/ но собо́р шестьна́десятих святы́х свои́х,/ со́бранных и просия́вших зде во и́мя Его́.

Кано́н Богоро́дицы, со ирмосо́м на 6, глас 4: Несть Тебе́ подо́бен: (зри день 12-й). И святы́х на 8, его́же краегране́сие: А́нгелы наро́да се́рбскаго пою́. В Богоро́дичнах же и в седа́льнах: Про́та Ми́рко. Глас 1.

Песнь 1

Ирмо́с: Вознесу́ Тя, Бо́же, Спа́се мой,/ я́ко воскре́сл еси́ от ме́ртвых,/ попра́в смерть.

А́нгели земни́и и челове́цы Небе́снии,/ облагода́тельствуйте ум мой,/ во е́же досто́йно пе́ти по́двиги ва́ша.

Ны́не се́рбская страна́ вся ра́дуется,/ прославля́ющи вас вку́пе шестьна́десять засту́пников свои́х/ пред Престо́лом Вы́шняго.

Гро́здие вы есте́ виногра́да Христо́ва,/ иска́пающии нам вино́ жи́зни и спасе́ния.

Богоро́дичен: Пою́т Тя и превозно́сят вся дела́ Госпо́дня,/ и́стинную Ма́терь Бо́га на́шего,/ ра́дуйся, со Гаврии́лом принося́ще Ти, Всенепоро́чная Влады́чице.

Катава́сия: Отве́рзу уста́ моя́:

Песнь 3

Ирмо́с: Утвержде́й сло́вом Твои́м вселе́нную,/ я́же не подви́жится,/ утверди́ и на́шу мысль в страх Твой, Влады́ко Го́споди.

Его́же возлюби́сте па́че всех,/ Его́же ра́ди подвиза́стеся на земли́,/ моли́те, да и нас, ве́рных рабо́в Его́,/ объе́млет любо́вию Свое́ю.

Луча́ми Небе́сными ум свой озари́вше,/ житие́м свои́м Вседержи́телю и Творцу́ всех послужи́ли есте́,/ И́же и всели́ вас в Ца́рство Свое́ Небе́сное.

И́стинно Христу́ после́довасте, избра́ннии Бо́жии,/ Симео́не мироточи́вый и Са́вво первопресто́льне,/ приводя́ще Ему́ весь боголюби́вый род се́рбский,/ я́ко вожди́ Богому́дрии.

Богоро́дичен: Родила́ еси́ Еди́наго от Тро́ицы, Богома́ти́ Чи́стая,/ и млеко́м пита́ла еси́ Пита́ющаго и Укрепля́ющаго вся́ческая.

Седа́лен, глас 2:

Отцы́ всечестни́и и Богому́дрии,/ в терпе́нии и в безстра́стии пожи́сте,/ ева́нгельская повеле́ния житие́м свои́м изъясня́юще,/ яви́стеся я́ко непоколеби́мии столпи́ Це́ркве/ и некра́домое бога́тство благоче́стия,/ те́мже ра́йския сла́дости ны́не наслажда́етеся.

Сла́ва, и ны́не, Богоро́дичен, глас то́йже:

Твоя́ вели́чия А́нгели пою́т, Пресвята́я Де́во Богоро́дице,/ с ни́миже и проро́цы со апо́столы, святи́телие с му́ченик ли́ки/ и преподо́бных все мно́жество,/ те́мже и мы с ни́ми покланя́емся Тебе́.

Песнь 4

Ирмо́с: Разуме́х, Всеси́льне,/ Твое́ смотре́ние/ и со стра́хом просла́вих Тя, Спа́се.

Насле́довав оте́ческую му́дрость и доброде́тель, я́ко сын возлю́бленный, святи́телю о́тче Арсе́ние,/ прее́мник был еси́ Боже́ственнаго престо́ла Са́ввы пе́рваго,/ его́же стопа́м после́довал еси́.

Арсе́нию Богому́дрому на престо́ле насле́дник быв, святи́телю о́тче Са́вво вторы́й,/ Са́вве же пе́рвому во всем подража́л еси́,/ и ны́не вку́пе с ни́ми не преста́й моли́ти за весь правосла́вный род се́рбский.

Ра́дуйся, вели́кая и сла́вная Патриархи́е Се́рбская,/ све́тло торжеству́ющи па́мять пе́рваго Патриа́рха се́рбскаго Иоанни́кия,/ сиро́т и вдов предста́теля, скорбя́щих уте́шителя/ и всем те́пла пред Бо́гом засту́пника.

Богоро́дичен: А́нгельстии чи́ни и земны́х собо́ри совокупля́ются/ воспева́ти Миронача́льника и Спа́са всех Христа́,/ Его́же Ты родила́ еси́.

Песнь 5

Ирмо́с: От но́щи неве́дения просвеще́й концы́,/ просвети́ мя у́тром/ человеколю́бия Твоего́, Го́споди.

О́тче Евста́фие, иера́рше Госпо́день,/ и́же сама́го себе́ я́ко непоро́чну же́ртву прине́сл еси́ Христу́,/ моли́ Его́ дарова́ти душа́м на́шим мир и ве́лию ми́лость.

До́брый па́стырь был еси́, я́ко прее́мник Са́ввы тре́тияго,/ преподо́бне о́тче Никоди́ме,/ Ду́ха Свята́го трео́стрым мече́м вооруже́нный,/ яви́лся еси́ я́ко секи́ра,/ посека́ющая вся еретико́в стремле́ния.

Архиере́ев похвалу́, свяще́нников сла́ву,/ мона́шествующих пра́вило и Це́ркве утвержде́ние, пое́м тя, иера́рше Дании́ле,/ и хва́лим, я́ко те́пла моли́твенника к Бо́гу/ и предста́теля на́шего и храни́теля.

Богоро́дичен: Ма́ти Де́во Всенепоро́чная,/ Ты была́ еси́ святы́х святе́йши,/ я́ко Бо́га несказа́нно родила́ еси́,/ Его́же воспева́юще, непреста́нно Тя велича́ем.

Песнь 6

Ирмо́с: Со Ио́ною вопие́м Ти, Го́споди,/ со гла́сом хвале́ния моля́щеся:/ возведи́ от тли живо́т наш.

Све́том Трисия́ннаго Божества́ озаря́емь, святи́телю о́тче Ефре́ме,/ вслед Христа́ поте́кл еси́/ и, крест Его́ на ра́мо взем,/ Того́ взыска́л еси́,/ Его́же моли́ о всех нас.

Еди́наго Человеколю́бца име́я в себе́ руководи́теля, преблаже́нне о́тче Киприа́не,/ Ему́же и служи́л еси́, моли́ Его́/ спасти́ и просвети́ти весь род наш.

Ра́дуйся, преподо́бне о́тче Некта́рие,/ Би́тольская похвало́, горы́ Афо́нския чи́стое прозябе́ние,/ и́же ю́ность твою́ воздержа́нием увяди́л еси́,/ стра́сти же теле́сныя ду́ху повину́л еси́,/ сего́ ра́ди Христо́с Бог чудесы́ тя венча́ет пресла́вно.

Богоро́дичен: Изба́вльшаго нас дре́вния кля́твы/ и благослове́ние нам дарова́вшаго/ родила́ еси́ неизрече́нно, Богома́ти Всепе́тая,/ Его́же моли́ о спасе́нии душ на́ших.

Конда́к, глас 4:

Благоче́стно на земли́ пожи́сте,/ ева́нгельския и́стины на Афо́не напои́вшеся,/ кре́постию Ду́ха Свята́го просия́сте/ и ны́не на Небесе́х весели́теся,/ те́мже мо́лим вас мы, недосто́йнии:/ моли́твами ва́шими святы́ми/ изба́вите нас от всех бед и печа́ли.

И́кос:

Крест свой на ра́мо взе́мше,/ вседу́шно Христу́ после́довасте,/ любо́вию же Его́ связу́еми,/ а́ще и от мно́гих стран пришли́ есте́,/ я́коже единокро́внии дави́дски вопия́сте:/ се, что добро́, или́ что красно́, но е́же жи́ти бра́тии вку́пе,/ сего́ ра́ди мо́лим вас мы, недосто́йнии:/ моли́твами ва́шими святы́ми изба́вите нас от всех бед и печа́ли.

Песнь 7

Ирмо́с: Вся дела́ Твоя́ и́стинна/ и пра́ви путие́ Твои́,/ Бо́же оте́ц на́ших.

Благово́ние источа́ет гроб твой, о́тче Васи́лие,/ иде́же лежи́т честно́е те́ло твое́,/ Остро́г же явля́ется я́коже рай Бо́жий,/ исцеля́еши неду́ги всех, и́же с ве́рою и упова́нием притека́ют к ра́це моще́й твои́х и ве́рно взыва́ют:/ благослове́н Бог оте́ц на́шнх.

Смотря́я бу́дущую жизнь, о́тче Дамаски́не блаже́нне,/ и́стинно ми́ру умертви́лся еси́,/ те́мже и теле́сныя я́звы за Христа́ претерпе́л еси́, услажда́яся,/ Его́же ра́ди и пострада́л еси́, пове́шен быв,/ но получи́л еси́ живо́т во ве́ки,/ ны́не же, Христу́ предстоя́, вопие́ши:/ благослове́н Бог оте́ц на́ших.

Крест Христо́в на ра́мена взем, преподо́бне о́тче Рафаи́ле,/ земна́я вся оста́вил еси́,/ стра́сти же теле́сныя умертви́в, Христу́ после́довал еси́,/ Его́же моли́, да спасе́т ду́ши всех воспева́ющих:/ благослове́н Бог оте́ц на́ших.

Богоро́дичен: Разуме́ти та́йну стра́шнаго рождества́ Твоего́/ ника́коже мо́жет ум челове́ческий, но ниже́ а́нгельский,/ я́ко Ты Бо́га воплоще́ннаго родила́ еси́ па́че естества́.

Песнь 8

Ирмо́с: Царя́ сла́вы и Победи́теля сме́рти,/ Иису́са Назоре́я,/ Того́ превозноси́те во вся ве́ки.

Афо́нския горы́ о́трасль, мо́лим тя, о́тче Ону́фрие,/ душе́вное смуще́ние разори́ти,/ мир же и единомы́слие утверди́ти в нас, е́же вопи́ти непреста́нно:/ Христа́ превозно́сим во вся ве́ки.

Го́спода сла́вы моли́те, святи́и,/ я́ко предста́телие на́ши и моли́твенницы,/ да от бед и скорбе́й изба́вит пою́щия:/ Христа́ превозно́сим во вся ве́ки.

О Го́споди Ще́дрый и Ми́лостивый,/ не отврати́ от нас лица́ Твоего́,/ но услы́ши ны, вопию́щих:/ Христа́ превозно́сим во вся ве́ки.

Богоро́дичен: Ки́ими Тя пе́сньми досто́йно ублажи́м, Богоро́дице,/ я́ко Херуви́м святе́йшую и Серафи́м сла́внейшую, Христа́ ро́ждшую,/ пребезнача́льно от Отца́ возсия́вшаго?

Песнь 9

Ирмо́с: Тебе́, Небе́с вы́шшую/ и на земли́ Не́бо и Престо́л бы́вшую, Ма́терь Бо́жию,/ вси ро́ди, велича́ем.

Предста́телие ро́да на́шего, и́стиннии уго́дницы Христо́вы,/ сердца́ на́ша ра́дости испо́лните/ ва́шими к Бо́гу моли́твами.

Отцы́ на́ши преблаже́ннии,/ помина́йте всегда́ ублажа́ющих вас на земли́/ и моли́те Бо́га о всех нас.

Ю́же сла́ву улучи́сте на Небеси́, Богоблаже́ннии отцы́ преподо́бнии,/ моли́те Бо́га, о е́же и нам приобрести́ ю́.

Богоро́дичен: Отрокови́це Всенепоро́чная,/ Ты зако́ны естества́ еди́на обнови́ла еси́,/ ро́ждши Безсме́ртнаго Бо́га,/ в ме́ртвенную плоть оде́явшася,/ да ме́ртвыя оживи́т бла́гостию.

Свети́лен:

Светоза́рнии свети́льницы неугаси́мии,/ све́тлостию жития́ ва́шего всю се́рбскую страну́ просвети́ли есте́,/ доброде́тели дея́нию вся науча́юще,/ те́мже ны́не моли́теся Христу́,/ о е́же в ми́ре сохрани́ти оби́тель на́шу и все оте́чество.

Сла́ва, и ны́не, Богоро́дичен:

О Пречи́стая Де́во,/ ве́мы Тя вси Предста́тельницу,/ из Тебе́ нам Христо́с возсия́ и небе́с Тя простра́ннейшу показа́,/ Того́ бо неискусому́жно родила́ еси́,/ воплоще́нна за милосе́рдие неисповеди́мое.

На хвали́тех стихи́ры на 4, глас 1:

Днесь пра́зднует оби́тель Хиланда́рская,/ торжеству́ет же и вся Свята́я Гора́ Афо́нская,/ шестьна́десятих святы́х свои́х па́мять пра́зднующе,/ и́же де́лы и словесы́ на земли́ Бо́га просла́виша,/ прии́дем и мы, бра́тие,/ воспои́м и наслади́мся.

Ра́дуется днесь мно́жество ве́рных,/ воспева́юще па́мять ва́шу,/ вы бо, и́го Христо́во на ра́мена взе́мше,/ вся́кое вра́жие наи́тие до́блественне попра́ли есте́,/ Афо́нския пусты́ни гра́ды показа́ли есте́,/ те́мже вас почита́ем и мо́лим:/ Христа́ непреста́нно моли́те,/ о е́же спасти́ся всем нам.

Веселя́щеся, стезю́ жи́зни соверши́ли есте́,/ зако́ну Бо́жию себе́ покори́вше,/ спасе́ние заблужда́емым яви́ли есте́,/ я́ко со́лнце, от пусты́ни Афо́нския возсия́вше,/ и ны́не на Небесе́х водворя́етеся/ со все́ми святы́ми, ра́дующеся.

Сла́ву удобоувяда́емую, су́щую на земли́, и честь,/ отцы́ святи́и, отри́нули есте́,/ но Христо́с вам возме́здие дарова́,/ неувяда́емую сла́ву, и жизнь присносу́щную,/ и насле́дие нетле́нное,/ и всели́ вас в Небе́сная селе́ния.

Сла́ва, глас 6:

Шестьна́десятице богоизбра́нная,/ свеще́ шестьнадесятосве́тлая,/ Боже́ственными свои́ми сия́нии/ озаря́ете исполне́ние оби́тели Хиланда́рския,/ ли́че святоизбра́нный,/ моли́те Христа́ Бо́га,/ о е́же спасти́ся всем нам.

И ны́не, Богоро́дичен, глас то́йже:

Никто́же, притека́яй к Тебе́,/ посра́млен от Тебе́ исхо́дит, Пречи́стая Богоро́дице Де́во,/ но про́сит благода́ти/ и прие́млет дарова́ние к поле́зному проше́нию.

Славосло́вие вели́кое. Тропа́рь святы́х. Сла́ва, и ны́не, тропа́рь ико́ны Пресвяты́я Влады́чицы на́шея Богоро́дицы, Троеру́чицы: Яко звезда́: (зри день 12-й). Ектении́ и отпу́ст.

НА ЛИТУРГИ́И

Блаже́нны от кано́на святы́х, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 43. Прича́стен: В па́мять ве́чную: