Сего́ же дне пое́тся слу́жба Ки́рика и Иули́тты, вку́пе со апо́столом.

ВЕ́ЧЕР

На Го́споди, воззва́х: стихи́ры апо́стола на 3, глас 1.

Подо́бен: Небе́сных чино́в:

Па́вел вели́кий, Богому́дре,/ ми́ра со́лнце, я́коже све́тлую лучу́, во вселе́нную/ тебе́, блаже́нне, пусти́,/ све́тлыми твои́х слове́с сия́нии просвети́ти/ дре́вле в нощи́ неве́дения бе́дствующия.

Чи́стое твое́ се́рдце,/ Боже́ственнаго Ду́ха све́тлыми заря́ми/ озари́вшеся бога́тно, Аки́ло Богогла́се,/ светови́дно вои́стинну яви́ся/ и е́ллинов тьму лю́тую/ Боже́ственною благода́тию разори́.

И́же хра́му твоему́ Боже́ственному притека́ющии,/ и в нем тя ве́рою моля́ще, Аки́ло,/ избавля́ются неду́гов вся́ческих, и бед, и скорбе́й/ свяще́нными твои́ми мольба́ми/ и к Бо́гу хода́тайствы, свяще́нне.

И́ны стихи́ры му́чеников 3, глас 4.

Подо́бен: Я́ко до́бля:

Младоу́мнаго мучи́теля соверше́нным умо́м,/ несоверше́нным же те́лом,/ му́чениче Ки́риче,/ мужему́дренно посрами́л еси́./ Те́мже, на суди́щи тя тя́жко истязу́я,/ налага́ет смерть тебе́,/ помина́ющу жизнь нестаре́емую,/ в ню́же вшел еси́,/ неусе́ченою на ле́та ороша́емь кро́вию.

Я́ко плодови́т виногра́д, напое́нии духо́вными,/ Иули́тта сла́вная,/ от боку́ твое́ю прозя́бша Ки́рика/ приво́диши закала́ема/ и точи́лы му́ченическими вои́стинну изгнете́на,/ с ни́мже источи́вше умиле́ния вино́,/ сердца́ веселите́/ ве́рою творя́щих па́мять ва́шу.

Ра́нам прибли́жившися,/ и строга́ние телесе́ вои́стинну претерпе́ла еси́, досточу́дная,/ очи́ма же зря́щи сыно́вне сконча́ние,/ муче́ние сугу́бо, Иули́тто, прошла́ еси́,/ те́мже дае́т ти и сугу́бы венцы́ Подвигополо́жник,/ побе́ду стра́ждущим всеси́льно да́руя.

Сла́ва, глас 6:

Прииди́те и у́зрите вси стра́нное виде́ние и пресла́вное:/ кто́ ви́де младе́нца, триле́тна су́ща,/ мучи́теля посрами́вша?/ О, чудесе́! Ма́терь сса́ше/ и млекопита́тельнице вопия́ше:/ не бо́йся, ма́ти моя́, мук лю́таго мироде́ржца,/ Христо́с бо есть кре́пость ве́рующим в Него́.

И ны́не, Богоро́дичен или́ Крестобогоро́дичен.

Подо́бен: Тридне́вен:

Лю́ди беззако́ннейшия,/ без пра́вды пригвожда́ющия Тя на Дре́ве,/ Де́ва и Чи́стая Ма́ти Твоя́ зря́щи,/ я́коже Симео́н прорече́,/ утро́бою, Спа́се, уязвля́шеся.

На стихо́вне Окто́иха.

Сла́ва, глас 8:

Триле́тен Тро́ицу пропове́даше/ и млеко́ ссый ма́терь утвержда́ше:/ преста́ни, о ма́ти моя́,/ от слез пла́чущи,/ свы́ше Зижди́тель зрит/ и спасе́т ду́ши на́ша.

И ны́не, Богоро́дичен или́ Крестобогоро́дичен.

Подо́бен: Что́ вас нарече́м:

Не терплю́, Ча́до, ви́дящи Тя, на Дре́ве усну́вша,/ бо́дрость всем подаю́щаго,/ я́ко да и́же дре́вле преступле́ния плодо́м/ сном поги́бельным усну́вшим/ Боже́ственную и спаси́тельную бо́дрость пода́си, –/ Де́ва глаго́лаше, пла́чущися,/ Ю́же велича́ем.

Тропа́рь апо́столу, глас 3:

Апо́столе святы́й Аки́ло,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Тропа́рь му́чеником, глас 8:

Я́ко лоза́ благопло́дная, Иули́тто честна́я,/ грозд зрел принесла́ еси́ Царе́ви, всех Бо́гу,/ сы́на твоего́ Ки́рика сла́внаго,/ муче́нием того́ бога́тно украси́вши/ и твое́ю кро́вию наверши́вши,/ тем и дарова́ тебе́ Вы́шний возме́здие в Вы́шних,/ иде́же лику́юще, помяни́те нас, му́ченицы терпеливоду́шнии.

Ин тропа́рь му́чеником, глас 4:

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

НА У́ТРЕНИ

Кано́н Окто́иха еди́н и апо́стола на 4, его́же краегране́сие: Сла́внаго воспое́м Аки́лу любо́вию. Творе́ние Ио́сифово, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Свяще́ннаго свяще́нными воспои́м Аки́лу пе́сньми и возопие́м:/ того́ моли́твами, Ще́дре, вся спаси́, я́ко Пребла́г.

Весь себе́, блаже́нне, прия́телище Ду́ха светови́дно сотвори́л еси́,/ осия́емь Того́ све́тлыми заря́ми,/ тем су́щия во тьме просвети́л еси́.

Зако́ном Христо́вым огради́в ум твой,/ беззако́нных шата́ние все низложи́л еси́/ и и́дольския хра́мы вся разори́л еси́, пострада́в, Богоблаже́нне.

Богоро́дичен: Сло́вом, Чи́стая, Сло́во во утро́бе зачала́ еси́, сло́вом вся соде́лавшаго./ Сего́ ра́ди Тя словесы́ Боже́ственными воспева́ем, Богора́дованная.

Ин кано́н му́чеников на 4, его́же краегране́сие: Ки́рика пою́ с ро́ждшею му́дренно. Творе́ние Ио́сифово, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Пропове́давше Сло́ва, от Отца́ я́ве рожде́на,/ воплоще́на же от Ма́тере,/ свиде́тели Сего́ страсте́й страстьми́ и сме́ртию бы́сте.

Сла́вная му́ченица, я́ко светоза́рная луна́, совоку́пльшися с со́лнцем,/ из нея́ рожде́нным Ки́риком,/ всю тварь чуде́сными заря́ми просвеща́ют.

Теку́щими измени́ла еси́, я́же ника́коже дви́жима, му́ченице,/ и, на рука́х твоего́ сы́на нося́щи,/ с сим беззако́нных и диа́волю лесть омрачи́ла еси́.

Су́щи от ро́да сла́вна,/ муче́нием же и страда́нии многови́дными, му́ченице Иули́тто,/ Царя́ безсме́ртнаго дщи была́ еси́.

Богоро́дичен: Упраздни́ся смерть Тебе́ ра́ди,/ и а́дово жа́ло потреби́ся, Ма́ти Чи́стая:/ Ты бо безсме́ртнаго Влады́ку, умерщвле́на пло́тию, родила́ еси́.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Возжела́л еси́ Бо́га, я́ко преподо́бен, сла́вне, еди́наго Влады́ку и Царя́,/ и Того́ Боже́ственное хоте́ние несумне́нным се́рдцем испо́лнил еси́.

Кре́постию Честна́го и Боже́ственнаго Ду́ха, Аки́ло прехва́льне,/ лука́ваго кре́пость всю низложи́л еси́,/ пострада́в до́блественне, свяще́ннейше.

Умо́м твои́м чи́стым созерца́я сла́ву Госпо́дню,/ тоя́ причасти́лся еси́ соверше́нно, блаже́нне,/ отше́д от вре́менных к пребыва́ющим.

Богоро́дичен: Еди́н Чи́стый, еди́н Госпо́дь Тя еди́ну я́ко позна́,/ чисте́йшую всея́ тва́ри, Пренепоро́чная,/ от чи́стых Твои́х крове́й воплоти́ся.

Ин

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Небе́сных черто́гов и светоза́рнаго поко́я,/ ве́чнующия же сла́вы сподо́бистеся, му́ченицы сла́внии,/ диа́воля жа́ла боле́зньми страда́ния потре́бльше.

Птене́ц я́ко красе́н, голуби́це целому́дренней сей подо́бился еси́,/ льсти́вому проти́вяся, сла́вне Ки́риче, льсти́вно присту́пльшу/ и укра́сти тща́щуся тя непобеди́маго.

Го́рдаго зми́я, на не́бо положи́вша уста́ и зе́млю потреби́ти хва́лящагося,/ младе́нец незло́бив кре́стным всеору́жием/ до конца́ низложи́ и потреби́.

Богоро́дичен: Не истощи́в недр Оте́ческих, Пречи́стая, Сло́во, вся осуществова́вшее,/ во Твою́, Пренепоро́чная, утро́бу всели́ся, и плоть непреме́нна бысть,/ и челове́ки обожи́ Пресу́щественный.

Конда́к апо́стола, глас 4:

Я́ко ве́лие со́лнце, Це́рковь тя стяжа́вши, сла́вне Аки́ло,/ светлостьми́ уче́ния твоего́ просвеща́ет ве́рно чту́щия тя,/ Госпо́день апо́столе.

Ин конда́к му́чеников, глас 2.

Подо́бен: Тве́рдыя:

Же́ртва прия́тна, Бо́гови приноси́ма,/ и свиде́тель ве́рен Христо́в явля́емь,/ с ма́терию пострада́л еси́ Иули́ттою, Ки́риче сла́вне,/ с не́юже Христа́ Бо́га моли́ти не преста́й о всех нас.

Та́же седа́лен, глас 4.

Подо́бен: Ско́ро предвари́:

Па́вла глаго́лы озари́в твою́ ду́шу,/ я́ко со́лнце, просия́л еси́ Богоразу́мия све́том, Аки́ло блаже́нне,/ вене́ц же муче́ния испле́л еси́ зако́нно./ Те́мже источа́еши ре́ки исцеле́ний ве́рою пра́зднующим, блаже́нне, па́мять твою́.

Сла́ва, му́чеников, глас то́йже.

Подо́бен: Удиви́ся Ио́сиф:

Тезоиме́нно, страда́льче, пропове́дник яви́лся еси́ и́стинен,/ пострада́в с ма́терию, Ки́риче сла́вне Христо́в, благоче́стия тече́ние сконча́в,/ и был еси́ нам му́жество ве́ры, попра́в вра́жию всю си́лу,/ и с Небесе́ прия́л еси́ вене́ц с ма́терию твое́ю, сла́вне./ Христа́ моли́те спасти́ся всем, творя́щим па́мять ва́шу.

И ны́не, Богоро́дичен:

Треволне́нии страстны́ми безсо́вестный аз обурева́емь, Чи́стая, призыва́ю Тя те́пле:/ да не пре́зриши мене́, окая́ннаго, поги́бнути, бе́здну милосе́рдия ро́ждши,/ ра́зве бо Тебе́, наде́жды не и́мам./ Да не враго́м у́бо обра́дование и смех, наде́явся на Тя явлю́ся,/ и́бо мо́жеши, ели́ко хо́щеши, я́ко Ма́ти су́щи всех Бо́га.

Крестобогоро́дичен:

Де́ва и А́гница, ви́девши на Кресте́/ без се́мене из Нея́ А́гнца ро́ждшагося и копие́м прободе́на,/ печа́ли уя́звена стрела́ми, вопия́ше боле́зненно, восклица́ющи:/ что́ но́вое та́инство?/ Ка́ко умира́еши, И́же живота́ еди́н Госпо́дь?/ Те́мже воскресни́, па́дшаго воздвиза́я пра́отца.

Песнь 4

Ирмо́с: Услы́шах, Го́споди,/ слух Твоего́ смотре́ния,/ и просла́вих Тя,/ Еди́не Человеколю́бче.

Дрема́нием спя́щия лука́ваго, Аки́ло, злоче́стия/ ко благоче́стия све́ту воздви́гл еси́.

Го́рдое свире́пство врага́ низложи́л еси́, Аки́ло,/ смире́нием Боже́ственным вооружи́вся.

Блаже́нно пострада́л еси́ за Христа́, кровь твою́ излия́в,/ свяще́нник и свиде́тель страда́ний Его́.

Богоро́дичен: Мы́сленну Тя пала́ту и высо́кий престо́л Царя́,/ Богоро́дице Влады́чице, имену́ем.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Младе́нствуя те́лом, и соверше́нным, му́чениче, умо́м/ злонача́льнаго низложи́л еси́, лука́вство злосотво́ршаго.

Я́ко плодови́та лоза́, му́ченице Иули́тто, грозд израсти́ла еси́,/ до́бляго вои́стинну Ки́рика, муче́ния сла́дость иска́пающа.

Ми́лостивно взира́ющи, я́коже а́гница на а́гнца му́ченика,/ Иули́тта досточу́дная, закала́ема усе́рдно.

Богоро́дичен: Зако́ны естества́, Пречи́стая, па́че естества́ в рождестве́ Твое́м изменя́ются:/ Соде́теля бо па́че ума́ и сло́ва породила́ еси́.

Песнь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Сла́дко сло́во при́сно источа́я благоче́стия, прему́дре,/ го́рькою пре́лестию одебеле́вшия услади́л еси́ ду́ши,/ я́ко священнотаи́нник, Аки́ло прехва́льне.

Твоя́ похвалы́ Лука́ Богогла́сный вои́стинну написа́,/ свяще́ннаго бо Па́вла учени́к и Боже́ствен странново́дец быв,/ Боже́ственным я́ве наказу́я.

Я́коже звезду́ я́сну, све́тлы лучи́ испуща́ющу,/ честно́е пропове́дание, свяще́ннаго обре́т Па́вла,/ от того́ зари́ прия́л еси́ словеса́ и свет был еси́.

Богоро́дичен: Ма́ти и раба́ Христа́, вопло́щшагося нас ра́ди, была́ еси́,/ Его́же приле́жно всегда́ моли́, е́же спасти́ нас,/ Богоро́дицу Тя Чи́стую имену́ющих.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Терза́ему, Богому́драя, ра́нами те́лу твоему́, и раздробля́ему,/ тле́ния дебельство́ совлекла́ еси́,/ во оде́жду же облекла́ся еси́, ю́же от Де́вы Единоро́дный, плоть поне́с,/ челове́ки обожи́в, облече́.

Обнажи́лася еси́ те́лом, му́ченице всесла́вная, преоби́девши плотски́й студ,/ и врага́, Е́ву обнажи́вшаго, Иули́тто, дре́вле,/ терпели́вно вмужи́вшися, в ве́чный студ оде́яла еси́.

Во главу́ усе́чена бы́вши, главу́ зми́я, му́ченице, сокруши́ла еси́,/ лише́на бы́вши бога́тства, Небе́сное бога́тство насле́довала еси́,/ недви́жимое прии́мши Ца́рство со все́ми му́ченики, прехва́льная.

Богоро́дичен: Бо́жие Бог Сло́во плоть прия́т,/ мы́сленну и одушевле́ну, от Тебе́, Пречи́стая,/ и за милосе́рдие бысть Челове́к,/ и обожи́ мя, преступле́нием отринове́на,/ Его́же моли́ спасти́ вся́ческая.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призывя́ю бе́здну:/ от тли, Бо́же, мя возведи́.

Излия́ся благода́ть во устну́ твое́ю, блаже́нне свяще́нне,/ те́мже благослови́ тя всех Госпо́дь во ве́ки, Аки́ло Богодохнове́нне.

Неду́гом разли́чным измене́ние и согреша́ющим душа́м очисти́лище/ твоя́ моли́тва бысть, Богоно́се Аки́ло блаже́нне.

Ше́ствия твоя́, боже́ственно сотворя́ема и к путе́м Бо́жиим направля́ема,/ блудя́щим яви́шася наставле́ние и стезя́ спаси́тельная.

Богоро́дичен: Господоиме́нная Де́во Всенепоро́чная,/ Я́же благи́х Пода́теля Бо́га ро́ждшая,/ Тя пою́щия всегда́ от напа́стей многообра́зных спаси́.

Ин

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Преплы́вше безме́рных мук, прехва́льни, непостоя́нную во́ду кре́стным окормле́нием/ и ко приста́нищу ти́хому я́ве доидо́ша,/ погрузи́вше фарао́на неви́димаго кро́вными струя́ми.

Игра́ет Икони́йский град, тебе́ воспита́вый,/ и краси́тся па́мятию твое́ю честно́ю Тарс, Иули́тто:/ муче́ние бо в том сконча́ла еси́ с сы́ном твои́м/ и венце́в побе́ды сподо́билася еси́.

Презре́ла еси́ многоплете́нныя му́ки, и го́рлица прекра́сная яви́лася еси́,/ со птенце́м возлете́вши и над все́ми возвы́сившися сетьми́ зми́я, всехва́льная,/ и во оби́телех Небе́сных прему́дро почи́ла еси́.

Богоро́дичен: Кореносека́тельным серпо́м Твоея́ моли́твы посецы́, Отрокови́це,/ лука́вая помышле́ния души́ моея́ и плодоно́сну покажи́, молю́ся,/ всех бо Соде́теля, Бо́га и Спа́са, родила́ еси́.

Конда́к му́чеников, глас 4.

Подо́бен: Яви́лся еси́:

Во объя́тиих нося́щи христому́ченица Иули́тта Ки́рика,/ на по́двизе му́жески веселя́щися, взыва́ше:/ Христо́с есть му́чеников похвала́.

И́кос:

Ум мой просвети́, Христе́, све́том за́поведей Твои́х,/ я́ко да возмогу́ воспе́ти святы́я и по́двиги изрещи́./ Кий же язы́к изглаго́лати возмо́жет страда́ния, я́же претерпе́ша?/ Тем припа́даю Тебе́, Человеколю́бче:/ оставле́ние пода́ждь души́ мое́й окая́нней,/ да́руй ми вре́мя покая́ния,/ на се бо во́лею восприя́л еси́ плоть, да вся на живо́т возведе́ши,/ его́же страда́льцы получи́вше, непреста́нно пою́т:/ Христо́с есть му́чеников похвала́.

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огни́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Истка́в себе́ нетле́ния оде́жду Боже́ственным Ду́хом,/ весь красе́н был еси́ и врага́ обнажи́л еси́,/ и́же от него́, Аки́ло, обнаже́нныя оде́ял еси́ во оде́жду светови́дну/ и свет спаси́тельный.

Гла́дом мы́сленным одержи́мыя лю́ди и бе́дствующия/ хле́бом слове́с, досточу́дне Богому́дре напита́л еси́/ и Небе́сныя трапе́зы прича́стники сотвори́л еси́,/ священнотаи́нник быв Богови́ден.

Свято́му хра́му твоему́ притека́ющии здра́вие прие́млют,/ и страсте́й разреша́ются, и от неду́г очища́ются,/ воспева́юще тя любо́вию и вопию́ще, прехва́льне:/ благослове́н еси́, Бо́же оте́ц на́ших.

Богоро́дичен: Умертви́ся пе́рвее Ада́м тлетво́рною сне́дию, Всенепоро́чная,/ Ты же, ро́ждши Живо́т наш, сего́, Де́во, оживи́ла еси́./ Тем я́ко до́брых Тя вино́вну воспева́юще, вопие́м:/ благослове́нна еси́, Я́же Бо́га пло́тию ро́ждши.

Ин

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Па́лицами сокруша́ет твое́ те́ло беззако́нный, Богому́драя Иули́тто,/ по́мысла кре́пость ника́коже подви́же:/ жезл бо си́лы – Крест Христо́в держа́ла еси́.

Ту́чами кро́вных наводне́ний/ погаси́ша огнь безбо́жия Христо́вы страда́льцы, зову́ще усе́рдно:/ благослове́н еси́, Го́споди Бо́же, во ве́ки.

Нося́щи на руку́, му́ченице, его́же родила́ еси́,/ предста́ла суди́щу и сугу́б до́брый сконча́ла еси́ по́двиг, вопию́щи:/ благослове́н еси́, Го́споди Бо́же, во ве́ки.

Богоро́дичен: Глаго́лом Твои́м после́дующе,/ блажи́м Тя, ро́ди вси, Отрокови́це,/ Блаже́ннаго Бо́га Ма́терь я́вльшуюся,/ в Него́ ве́рующия блаже́нны соде́лавшаго.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки.

Ра́достно на Небесе́х с Боже́ственными ученики́, и слуги́, и самови́дцы Сло́ва,/ я́ко учени́к живы́й, Аки́ло, и боже́ственне обожа́емь,/ помина́й ве́рою и любо́вию тя пою́щия.

По́тов твои́х то́ки, ре́ки всем нам Боже́ственных чуде́с источа́ют, блаже́нне,/ и то́ки страсте́й безме́стных изсуша́ют всегда́,/ и ополче́ния погружа́ют льсти́ваго.

Приступле́нием обожа́емь при́сно, я́ко приближа́яся Бо́гу умо́м невеще́ственным,/ весь свет еси́, отреши́вся от пло́ти,/ и ви́диши, я́же ви́дят А́нгели,/ сла́вне Аки́ло, Христо́в священному́чениче.

Богоро́дичен: Я́ко всех вино́внаго Бо́га,/ вы́шше вся́кия вои́стинну, Чи́стая, вины́ во утро́бе заче́нши,/ и нас ра́ди по нам я́вльшася, ро́ждшая, Пренепоро́чная,/ Сего́ моли́ о пою́щих Тя.

Ин

Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

Све́тлыя зве́зды, я́же на тве́рди церко́вней неле́стно водрузи́вшеся/ и зе́млю чудесы́ просве́щше, благоче́стно чту́тся от всех днесь,/ песносло́вящих Христа́ во ве́ки.

Я́коже нова́ ветвь ко́рене Богонасажде́нна су́щи, Богому́драя,/ честна́го твоего́ сы́на нося́щи, увяди́ла еси́ нече́стия сады́,/ вопию́щи с ним и глаго́лющи:/ Тя превозно́сим, Христе́, во ве́ки.

Я́коже тельца́ ю́на, ю́ница су́щи прекра́сна, Иули́тто,/ но́сищи Ки́рика сла́внаго, же́ртву жи́ву/ от Де́вы А́гнцу возсия́вшему и заколе́ному за кра́йнее милосе́рдие.

Богоро́дичен: Вопло́щся Сло́во от пречи́стых Твои́х крове́й, Отрокови́це,/ прини́кшия к безслове́сным плотски́м страсте́м позна́нием Боже́ственным обожи́, Чи́стая,/ Его́же превозно́сим во вся ве́ки.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Свяще́нными тя пе́сньми свяще́нна бы́вша сосу́да Сло́ва/ и че́стна, Сего́ и прему́дра пропове́дника, и ми́ра свети́льника,/ и утвержде́ние ве́ры на́шея, соше́дшеся, Аки́ло, согла́сно ублажа́ем.

Я́ко потреби́тель ле́сти, и язы́ков наста́вник,/ и Боже́ственный Спа́са страда́лец, и сограждани́н,/ и ссе́льник святы́х А́нгелов, Аки́ло Богогла́се,/ с ни́ми Влады́ку умоли́ спасти́ ду́ши на́ша.

Тя, ученика́ у́бо Па́влу, уве́девше, Аки́ло, ми́рови же свети́льника неле́стна/ и свяще́ннаго му́ченика, потреби́теля и́долов и ра́зума Бо́жия вводи́теля,/ благоче́стною мы́слию, Богому́дре, ублажа́ем.

Всесвята́я твоя́ па́мять возсия́вши ми́ру,/ я́ко со́лнце, просвеща́ет ду́ши благоче́стно пою́щих тя,/ в не́йже моли́ся, блаже́нне, да́ти очище́ние грехо́в,/ и мир глубо́к, и ве́лию всем ми́лость.

Богоро́дичен: Све́тел Тя све́щник прозря́ше проро́к,/ Све́та, возсия́вшаго от Све́та, Де́во Ма́ти, нося́щу,/ просвеща́ющаго бога́тно пе́рвее омраче́нныя/ заря́ми несказа́ннаго Своего́, Пренепоро́чная, Божества́.

Ин

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Исцеле́ние приноша́ет ра́ка сла́вных страда́лец,/ благода́тию Боже́ственнаго Ду́ха напая́емая:/ прииди́те, почерпи́те, и освяти́те ду́ши,/ и от неду́г очи́ститеся, мучениколю́бцы, Да́теля до́брых велича́юще.

Я́коже ши́пок, му́ченическими прозябо́сте удо́лии, всеблаже́ннии,/ я́коже крин благово́нен, я́ко рая́ Боже́ственное прозябе́ние,/ ми́рно я́ко вои́стинну иска́пающе украше́ние,/ и ве́рных ду́ши благово́нием та́йным веселите́.

Ра́нами му́ченическцми украси́стеся, добропобе́днии му́ченицы,/ и А́нгелом я́ве уподо́бльшеся, Бо́гу предстоите́, побе́дным венце́м све́тло обложе́ни/ и чту́щим вас очище́ние грехо́в прося́ще.

Му́ченица, я́коже а́гница, я́ко а́гнца сы́на своего́ нося́щи,/ посреде́ волко́в невре́дно про́йде и в Небе́сную огра́ду всели́ся;/ при́сно сих моли́твами, Го́споди, спаси́ ны, тех свяще́нную па́мять чту́щия.

Богоро́дичен: Просвети́, две́ре Све́та, ослепле́нную ду́шу мою́ страстьми́,/ и злы́ми по́мыслы омраче́нную, и бе́дствующую,/ и изми́ мя от напа́стей, и бед, и скорбе́й,/ да сла́влю Тя, упова́ние ве́рных и утвержде́ние.

Свети́лен Окто́иха. Сла́ва, му́чеников.

Подо́бен: Жены́, услы́шите:

Ра́дуйся, красу́йся и лику́й, све́тло торжеству́я, Икони́йский гра́де,/ я́ко из тебе́ возсия́ша два свети́льника прему́дра,/ Иули́тта сла́вная и Богому́дрый Ки́рик,/ зако́нно бо пострада́вше, вене́ц прия́ша сла́вы.

И ны́не, Богоро́дичен:

Ма́терь и Де́ву Тя пое́м, Всенепоро́чная:/ Ты бо Бо́га всех во чре́ве носи́ла еси́,/ Его́же совокупле́ние пропове́дающе, непрело́жно по ипоста́си,/ Тя, Богоро́дицу Влады́чицу, испове́даем вои́стинну, и́же Тебе́ ра́ди спаса́емии.

На хвали́тех стихи́ры на 4, глас 1. Самогла́сны. Ге́рманово:

До́бляго страда́льца и пропове́дника ве́ры/ с ма́терию Богому́дрою досто́йно восхва́лим:/ си́и бо, терпели́вно пострада́вше,/ злонача́льнаго врага́ си́лою Креста́ му́жески низложи́ша,/ те́мже венцы́ прия́ша от Подвигополо́жника Бо́га/ и мо́лят Его́ со дерзнове́нием непреста́нно/ спасти́ ве́рою творя́щих свяще́нное их страда́ние.

Глас 2: И́же от пеле́н испо́лнен благода́ти,/ име́яй сед ра́зум,/ в побе́де подвиго́в твои́х, му́чениче Ки́риче,/ моли́ся с ма́терию твое́ю Христу́ Бо́гу/ дарова́ти мир ми́ру,/ я́ко Тро́ицы ве́лий испове́дник.

Младе́нец яви́лся еси́ в му́ченицех,/ соверше́н же показа́лся еси́ ра́зумом,/ отне́леже Безнача́льное Сло́во прия́т, всехва́льне,/ огня́ не устраши́лся еси́ беззако́нных./ С ма́терию твое́ю Зижди́теля моли́,/ да спасе́т я́ко Спас ду́ши на́ша.

Сла́ва, глас то́йже. Византи́ево:

Прииди́те, ве́рнии, хвала́ми, соше́дшеся,/ венча́ем дво́ицу всесвяту́ю,/ Тро́ице честь держа́щую:/ и́дольскую бо пре́лесть/ и мучи́телей умышле́ние свои́ми нога́ми попра́ша./ Сих восхваля́юще,/ ве́рнии, взыва́ем, глаго́люще:/ ра́дуйся, Иули́тто всечестна́я,/ я́же же́нскую не́мощь отве́ргши и му́жески подви́гшися;/ ра́дуйся, Ки́риче всеблаже́нне,/ и́же триле́тен те́лом/ и многоко́зненнаго врага́ низло́ж./ Ра́дуйтеся, на́ша похвала́ и сла́ва,/ ве́рою пра́зднующих свяще́нное ва́ше страда́ние./ Е́юже мо́лим моли́ти при́сно всех Го́спода/ ми́ру дарова́ти мир/ и душа́м на́шим ве́лию ми́лость.

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

Дре́ву Кре́стному Тя, Иису́се, пригвожде́на зря́щи Неискусобра́чная,/ пла́чущи, глаго́лаше:/ Ча́до сла́дкое,/ почто́ оста́вил еси́ Мене́, ро́ждшую Тя, еди́ну,/ Све́те непристу́пный Пребезнача́льнаго Отца́?/ Потщи́ся, и просла́вися,/ я́ко да сла́ву получа́т Боже́ственную/ и́же Боже́ственныя стра́сти Твоя́ сла́вящии.

На стихо́вне Окто́иха.

Сла́ва, глас 4. Анато́лиево:

Ра́дуйся, красу́йся и весели́ся, Икони́йский гра́де,/ я́ко из тебе́ прозябе́ плод сла́вен,/ Иули́тта, прекра́сная и добропобе́дная му́ченица,/ и из нея́ честны́й о́трок, Ки́рик тезоимени́тый:/ все бо кова́рство мучи́теля врага́ му́жески попра́вше,/ венцы́ побе́ды досто́йно прия́ша,/ пропове́давше лю́дем чести́ и покланя́тися Пресвяте́й Тро́ице./ Те́мже и мы со дерзнове́нием возопие́м/ сих просла́вльшему Христу́ Бо́гу на́шему,/ умири́ти мир и спасти́ ду́ши на́ша.

И ны́не, Богоро́дичен или́ Крестобогоро́дичен.

Подо́бен: Я́ко до́бля:

А́гнца и Па́стыря Тя/ на Дре́ве я́ко ви́де,/ А́гница ро́ждшая рыда́ше/ и ма́терски Ти веща́ше:/ Сы́не возжеле́нне,/ ка́ко на Дре́ве Кре́стнем пове́шен еси́, Долготерпели́ве?/ Ка́ко ру́це и но́зе Твои́, Сло́ве,/ пригвозди́шася от беззако́нных/ и кровь Твою́ излия́л еси́, Влады́ко?

НА ЛИТУРГИ́И

Блаже́нны Окто́иха и му́чеников, Песнь 3-я на 4. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Кори́нфяном, зача́ло 154, от полу́. Аллилу́ия, глас 7: Из уст младе́нец и ссу́щих соверши́л еси́ хвалу́. Ева́нгелие от Луки́, зача́ло 51, от полу́. Прича́стен: Ра́дуйтеся, пра́веднии, о Го́споде:

Моли́тва

О дво́ице свята́я, страстоте́рпцы Христо́вы, преблаже́нне Ки́риче, в триле́тнем во́зрасте пострада́вый, с богому́дрою ма́терию Иули́ттою! Кровьми́ ва́шими, я́ко багряни́цею, украси́вшиися и Небе́сных черто́гов и ве́чнующия сла́вы сподо́бившиися, не забу́дите и нас, на земли́ су́щих, но те́плым хода́тайством ва́шим пред Бо́гом изба́вите всех нас от вся́кия ско́рби и боле́зни. Се бо, к честне́й ико́не ва́шей благогове́йно припа́дающе и лобыза́юще ю́, мы, недосто́йнии и многогре́шнии, к вам, я́ко к ско́рым помо́щником и те́плым моли́твенником на́шим, прибега́ем и с сокруше́нным и смире́нным ду́хом вопие́м: не пре́зрите моле́ния нас, гре́шных, немощны́х, во мно́гия беззако́ния впа́дших, но, я́ко благода́тию Бо́жиею венча́ннии, очи́стите нас от неду́г на́ших и испроси́те нам у Христа́ Бо́га на́шего здра́вие душе́вное и теле́сное. Вы бо неоску́дную благода́ть исцеле́ний от Спа́са на́шего Иису́са Христа́ за ве́ру ва́шу, муче́нии запечатле́нную, прия́ли есте́. Тем же у́бо помози́те всем, в лю́тых не́мощех лежа́щим и в челове́честей по́мощи отча́явшимся, к вам же те́пле с ве́рою прибега́ющим, и исцеле́ние тем подава́йте неоску́дно, всем же ве́рным грехо́в оставле́ние испроси́те, да сла́вят ди́внаго во святы́х свои́х Го́спода Бо́га и Спа́са на́шего Иису́са Христа́, и Пречи́стую Ма́терь Его́, и ва́ше те́плое заступле́ние, все́гда, ны́не, и при́сно, и во ве́ки веко́в. Ами́нь.