ВЕ́ЧЕР

Обы́чная кафи́зма. На Господи, воззва́х: стихи́ры на 6, глас 4.

Подо́бен: Дал еси́ зна́мение:

Дал еси́, Человеколю́бче, Твою́ Ма́терь,/ по́мощь рабо́м Твои́м,/ я́ко Благоутро́бен,/ Е́юже неизрече́нное и стра́шное соде́лал еси́ смотре́ние Твое́/ и первозда́нное на́ше испра́вил еси́ Боже́ственное досто́инство./ Те́мже, всечестно́е Тоя́ чту́ще торжество́,/ воспева́ем держа́ву Твою́,/ Иису́се Всеси́льне, Спа́се душ на́ших.

Град, почита́ющий Тя и по до́лгу сла́вящий,/ огражда́еши, Всепе́тая,/ ри́зою Твое́ю честно́ю/ от безбо́жных, Чи́стая, иноплеме́нник,/ от гла́да же, и тру́са,/ и междоусо́бныя бра́ни всегда́,/ Де́во Неискусобра́чная,/ и сего́ ра́ди сла́вит Тя, Пресвята́я Богоневе́сто,/ челове́ков Помо́щнице.

Ри́зу честну́ю Твою́, Богоблагода́тная Влады́чице,/ дарова́ла еси́ гра́ду Твоему́,/ бога́тство неотъе́млемо;/ покро́в же, и сла́ву,/ и необори́му сте́ну,/ и исцеле́ний сокро́вище,/ и чуде́с исто́чник приснотеку́щий,/ приста́нище же спаси́тельное обурева́емым всегда́./ Сего́ ра́ди пое́м Тя, Препе́тая Чи́стая.

Почерпи́те, челове́цы, здра́вие души́ и те́ла:/ ра́ка бо всем предлежи́т,/ в не́йже положи́ся честна́я ри́за Присноде́вы,/ источа́ющая нам чуде́с струи́,/ и омыва́ющая серде́ц омраче́ния/ и страсте́й оскверне́ния,/ и ду́ши освяща́ющая ве́рных/ Боже́ственною благода́тию.

Сла́ва, и ны́не, глас 2:

Смысл очи́стивше и ум,/ со А́нгелы и мы торжеству́ем,/ све́тло начина́юще дави́дскую песнь Отрокови́це,/ Неве́сте всех Царя́, Христа́ Бо́га на́шего,/ воскресни́, Го́споди, глаго́люще, в поко́й Твой,/ Ты и киво́т святы́ни Твоея́,/ я́ко бо пала́ту красну́, Сию́ украси́в,/ и причте́ Ю гра́ду Твоему́, Влады́ко,/ стро́ити и покрыва́ти от супоста́тных пога́н/ держа́вною си́лою Твое́ю, моли́твами Ея́.

На стихо́вне стихи́ры, глас 1.

Подо́бен: Всехва́льнии му́ченицы:

Пала́та одушевле́нная Бо́жия/ еди́на была́ еси́/ и честну́ю ри́зу Твою́,/ в дому́ святе́м Твое́м сокрове́ну,/ ве́рным освяще́ние/ и сте́ну дарова́ла еси́ необори́му,/ ея́же ра́ди град Твой,/ Богома́ти, спаса́ется,/ воспева́я Боже́ственную держа́ву Твою́.

Стих: Воскресни́, Го́споди, в поко́й Твой,/ Ты и киво́т святы́ни Твоея́.

Ри́зу честну́ю Твою́,/ Твое́ честно́е и свято́е те́ло, Чи́стая, покры́вшую,/ оде́жду сла́вы дарова́ла еси́ всем/ и исто́чник, источа́ющ благода́ти присноживо́тныя во́ды./ Ея́же пра́зднуем положе́ние,/ почита́юще Тя, Богоро́дице, всех Честне́йшую.

Стих: Лицу́ Твоему́ помо́лятся/ бога́тии лю́дстии.

Храм Твой, Влады́чице,/ Твою́ свяще́нную ри́зу,/ я́ко сокро́вище свяще́ния нося́,/ всегда́ освяща́ет вся, ве́рою притека́ющия/ и Тя по до́лгу блажа́щия в сем вы́ну,/ упова́ние душ на́ших,/ и тве́рдый покро́в, и держа́ву.

Сла́ва, и ны́не, глас 2:

Я́ко венце́м пресве́тлым, Всечи́стая Богоро́дице,/ ри́зою Твое́ю честно́ю Це́рковь Бо́жия приоде́яся,/ и све́тится, ра́дующися днесь,/ и та́йно ликовству́ет, Влады́чице, вопию́щи Тебе́:/ ра́дуйся, диади́ма честна́я/ и ве́нче Боже́ственныя сла́вы./ Ра́дуйся, еди́на сла́вы соверше́ние/ и ве́чное весе́лие./ Ра́дуйся, к Тебе́ притека́ющим приста́нище, и избавле́ние,/ и спасе́ние на́ше.

Тропа́рь, глас 8:

Богоро́дице Присноде́во, челове́ков покро́ве,/ ри́зу и по́яс пречи́стаго Твоего́ телесе́,/ держа́вное гра́ду Твоему́ обложе́ние дарова́ла еси́,/ безсе́менным рождество́м Твои́м нетле́нна пребыва́ющи,/ о Тебе́ бо и естество́ обновля́ется и вре́мя./ Те́мже мо́лим Тя мир гра́ду Твоему́ дарова́ти/ и душа́м на́шим ве́лию ми́лость.

НА У́ТРЕНИ

На Бог Госпо́дь: тропа́рь Богоро́дицы, три́жды. По 1-м стихосло́вии седа́лен, глас 3.

Подо́бен: Красоте́ де́вства:

Красото́ю де́вства Твоего́ прекра́сное Сло́во ро́ждши,/ и Сего́ ри́зою Твое́ю, Чи́стая, ́яко Младе́нца обвила́ еси́./ Сию́ у́бо дарова́ла еси́ рабо́м Твои́м, Влады́чице,/ покро́в, по́мощь и исто́чник свяще́ния;/ ея́же честно́е положе́ние, Пресвята́я Де́во, вси ве́рно пра́зднуем.

Сла́ва, и ны́не, то́йже.

По 2-м стихосло́вии седа́лен, глас 3.

Подо́бен: Красоте́ де́вства:

Рождество́ нетле́нно и де́вство еди́на име́ла еси́, Благослове́нная,/ одея́ние же челове́ком спаси́тельно, Твою́ святу́ю ри́зу дарова́ла еси́,/ да́же до ны́не нетле́нно пребыва́ющую, Богоневе́сто./ Ея́же ра́ди от Бо́га прие́млем, раби́ Твой, Чи́стая, ве́лию ми́лость.

Сла́ва, и ны́не, то́йже.

Аще пра́зднуем, велича́ние сие́:

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим святы́я ри́зы Твоея/ честно́е положе́ние.

Кано́на два: пе́рвый со ирмосо́м на 8, его́же краегране́сие: Ри́зу почита́ю Пречи́стыя Де́вы. Творе́ние Ио́сифово, глас 4.

Песнь 1

Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Ри́зу Твою́ честну́ю, Богоро́дице Де́во,/ чту́щим Тя лю́дем дарова́ла еси́ при́сно, свяще́нное огражде́ние,/ вся́кое сопроти́вных обстоя́ние всегда́ побежда́ющи си́лою духо́вною.

Пло́тию нас ра́ди от чи́стых Твои́х крове́й я́вльшагося на земли́/ ри́зу свяще́нную осяза́нием освяти́ла еси́ и телесе́ Твоего́ прикоснове́нием,/ ея́же ра́ди вся рабы́ Твоя́ освяща́еши, Де́во, пою́щия Тя.

Сокро́вище честно́е ве́рно Тя чту́щим дарова́ла еси́, Блага́я Де́во,/ вои́стинну честну́ю ри́зу Твою́,/ вся обогаща́ющи да́ры Боже́ственнаго Ду́ха и чуде́с мно́гими дея́нии.

Нескве́рная А́гнице, А́гнца ро́ждшая Бо́жия па́че естества́,/ дарова́ла еси́ нам честну́ю ри́зу Твою́,/ скве́рны и́стинно и вра́ски очища́ющую всегда́ покланя́ющихся ей, Всенепоро́чная.

Други́й кано́н на 4. Творе́ние того́же, глас то́йже.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́внии́ пешеше́ствовав, Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Свеща́ светоявле́нная и незаходи́мая,/ Пречи́стыя храм, я́коже не́бо све́тлое, обре́т честну́ю ри́зу Ея́,/ вселе́нную днесь благода́тей просвеща́ет заря́ми.

Кре́пость и утвержде́ния сою́з, Твою́, Пречи́стая, ри́зу Боже́ственную/ вои́стинну стяжа́в, град Твой держа́ву непобеди́мую и́мать,/ тем и хва́лится о Тебе́.

Дре́вняго я́ко вои́стинну киво́та честне́йшая Твоя́ ра́ка, Богороди́тельнице, яви́ся на земли́,/ его́же зна́мения нося́щи, но и ве́рных во и́стине позна́ния сохраня́ющи.

Катава́сия: Отве́рзу уста́ моя́:

Песнь 3

Ирмо́с: Я́ко непло́ды роди́ от язы́к Це́рковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:/ Свят еси́, Го́споди.

Кра́сное освяще́ние, Небе́сную дверь, Бо́жию Ма́терь воспое́м/ и Тоя́ ри́зу, Боже́ственная точа́щу дарова́ния, ю́же любо́вию целу́ем.

Нетле́ния оде́ждею тле́нием обна́жшияся,/ Твои́м нетле́нным рождество́м всех оде́яла еси́, Чи́стая,/ и́мже честну́ю ри́зу Твою́ дарова́ла еси́, бога́тство неотъе́млемо.

И́же о́блаки, Чи́стая, одева́ющаго все не́бо/ ри́зою Твое́ю обвила́ еси́, Пречи́стая,/ е́йже покланя́ющеся, ве́рно Тя сла́вим, покро́ве душ на́ших.

Врачева́ние безме́здно боля́щим есть Боже́ственный сей храм:/ ри́зу бо Твою́, Чи́стая, исто́чник, непреста́нно точа́щий исцеле́ния, стяжа́, Пренепоро́чная.

Ин

Ирмо́с: Весели́тся о Тебе́ Це́рковь Твоя́, Христе́, зову́щи:/ Тя моя́ кре́пость, Го́споди,/ и прибе́жище, и утвержде́ние.

Почита́ем, ве́рнии, я́ко совокупле́ния к Бо́гу сою́з,/ Чи́стыя днесь ри́зы, ве́рно гове́юще.

Исцеле́ния ве́рным многочестна́я нам днесь/ прече́стно Чи́стыя ри́за источа́ет благода́тию.

Я́ко роса́ у́тренняя, ра́дость Твоя́ приснотеку́щая/ пещь страсте́й Тя воспева́ющих уставля́ет при́сно.

Седа́лен, глас 4.

Подо́бен: Вознесы́йся:

Чуде́с ре́ки, Богоро́дице, от всечестны́я Твоея́ ра́ки происходя́щия,/ я́ко из Еде́ма, напая́ют лице́ земли́,/ благода́ти пролива́ющия ве́рно Тя чту́щим,/ те́мже Тя воспева́ем, и ве́рно восхваля́ем, и благода́рно всегда́ взыва́ем:/ ра́дуйся, еди́на Наде́жде пою́щих Тя.

Сла́ва, и ны́не, то́йже.

Песнь 4

Ирмо́с: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.

Возвели́чим еди́ну Благослове́нную/ и Тоя́ ри́зе прико́снемся ве́рою,/ я́ко да почерпе́м благода́ть духо́вную.

Я́ко многоце́нное сокро́вище, стяжа́в Тебе́ чту́щий град/ ри́зу Твою́, Отрокови́це,/ ве́рою облобыза́ет и благода́ть прие́млет.

Ри́зу Твою́, я́ко точа́щую нетле́ние,/ оде́жду же сла́вы бы́вшую, всем песносло́вящим Тя,/ почита́ем, Всенепоро́чная.

Всенепоро́чная и еди́на благослове́нная,/ Херуви́м святе́й я́вльшися,/ ду́ши нас спаси́ от вся́каго обстоя́ния, ве́рою чту́щих Тя.

Ин

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Я́ко пречестну́ю твердь, Богоро́дице, Творе́ц и Зижди́тель Тя водрузи́вый,/ я́коже звезда́ми, украси́ Тя Боже́ственными сия́нии,/ и́миже украша́еши концы́.

От земли́ нас возвлачи́т к Небеси́, Богороди́тельнице,/ Боже́ственная Твоя́ ри́за, Чи́стая, любо́вию сея́ распале́нных те́пле,/ те́мже Тя сла́вим, я́ко лу́чшаго вину́.

Се благода́ть неисчерпа́емая, прииди́те вси сокруше́нным се́рдцем,/ почерпи́те Боже́ственныя то́ки, источа́ющия незави́стно, о празднолю́бцы,/ от честны́я ра́ки Твоея́, Всепе́тая.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Ты, Влады́чице Чи́стая,/ нам, Твои́м рабо́м, дарова́ла еси́ утвержде́ние ри́зу,/ и честны́й Твой по́яс, и Боже́ственное огражде́ние.

Рай красе́н, благово́ние Ду́ха, Пречи́стая, испуща́яй,/ храм, держа́щий Твою́ ри́зу, показа́ся.

Освяти́ на́ша ду́ши и телеса́,/ ве́рою святу́ю Твою́, Пресвята́я, ри́зу почита́ющих, я́ко прече́стну.

Хра́мы ны Бо́жия в Тя Все́льшагося покажи́, Богоро́дице,/ в Боже́ственнем хра́ме Твое́м ве́рно Тя блажа́щия.

Ин, ирмо́с то́йже

Ты, Го́споди, Твою́ Ма́терь возвели́чил еси́,/ Ты возне́сл еси́ над вся вла́сти мы́сленныя без сравне́ния сла́ву Ея́.

Благода́ть Бо́жию незави́стно точа́щая Ты еси́, Пречи́стая Богоро́дице,/ от честны́я ра́ки Твоея́ любо́вию покланя́ющимся.

Твое́ю си́лою ве́рнии лю́дие опоясу́ются,/ Тя сою́з, Богоро́дице, Твой име́яй град/ ри́зою Твое́ю почита́ется.

Песнь 6

Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.

Показа́ла еси́ все́ми Ца́рствующему гра́ду, ро́ждшая Царя́ всех и Го́спода,/ я́ко неруши́мую сте́ну, честну́ю и святу́ю ри́зу Твою́.

Ра́дующеся, Де́вы благода́ть просла́вим, и Сея́ пресвяту́ю ри́зу почти́м:/ из нея́же вся́ко здра́вие немощны́м непреста́нно происхо́дит.

Вод Тя животеку́щий исто́чник ве́мы, Богоро́дице,/ и почита́ем Боже́ственную ри́зу Твою́,/ от нея́же исцеле́ние всегда́, ве́рнии, почерпа́ем.

Госпо́дь, с Тобо́ю, Богоро́дице, бы́вый,/ челове́ческое Себе́ присво́ил существо́/ и всяк вред чужда́го от него́ изгна́л есть.

Ин

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Всю Тя па́че естества́ просла́ви Госпо́дь, всю украси́в, Отрокови́це,/ всю Тя почте́ па́че сло́ва, Богоро́дице,/ с по́ясом, ри́зою и Боже́ственною ра́кою.

Кре́пость Тя ве́рнии стяжа́вше и похвалу́,/ одева́ются сла́вою, честно́ю Твое́ю ри́зою, Богороди́тельнице,/ я́коже пресве́тлое украше́ние и честно́е Тя стяжа́вше.

Ви́дети Твою́, Богоро́дице, сла́ву неизрече́нную/ дре́вле боле́зноваху боже́ственне проро́цы вси,/ но в после́дняя дни нам яви́ся и́же лет Превы́шший.

Конда́к, глас 4.

Подо́бен: Вознесы́йся:

Одея́ние всем ве́рным нетле́ния, Богоблагода́тная Чи́стая, дарова́ла еси́,/ свяще́нную ри́зу Твою́,/ е́юже свяще́нное те́ло Твое́ покрыва́ла еси́,/ покро́ве всех челове́ков,/ ея́же положе́ние пра́зднуем любо́вию/ и вопие́м со стра́хом Ти, Чи́стая:/ ра́дуйся, Де́во, христиа́н похвало́.

И́кос:

Чи́стое одея́ние и ски́нию Бо́жия Сло́ва,/ одушевле́нный о́блак и ста́мну ма́нны, Богоро́дицу Мари́ю/ вси, спа́сшиися Рождество́м Ея́, ве́рою ублажи́м/ и честне́й ри́зе прико́снемся,/ е́юже Влады́ку объе́мши, я́ко Отроча́ носи́ла есть, в плоть обо́лкшагося,/ Его́же ра́ди челове́ческое естество́ взя́тся к превысоча́йшей жи́зни и Ца́рствию./ Те́мже с ра́достию вопие́м велегла́сно:/ ра́дуйся, Де́во, христиа́н похвало́.

Песнь 7

Ирмо́с: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.

Высо́ким ра́зумом и смире́нным се́рдцем Царе́в превысо́кий престо́л просла́вим,/ Всесвяту́ю Отрокови́цу обра́дованную.

Черто́г Бо́жий избра́нный,/ в честне́м Твое́м сем черто́зе лежа́щую ри́зу Твою́ ве́рою почита́ем,/ я́ко киво́т свят и благочести́вых покро́в.

Обновля́ется всяк, приступа́яй ве́рою и святы́й облобыза́яй ковче́г,/ держа́щий Твою́, Чи́стая Де́во, светови́дную ри́зу.

Богороди́тельнице Чи́стая,/ чту́щий Тя град от гла́да, тру́са же и озлобле́ния вся́каго спаса́й,/ и язы́ческаго нахожде́ния, и сопроти́внаго вре́да.

Ин

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Ты, я́коже со́нце пра́вды еди́н сый, Бла́же,/ Боже́ственно украси́л еси́ храм Чи́стыя разли́чными Твои́ми дарова́нии,/ в не́мже возсия́вшия лучи́ испуща́ет от Своея́ ри́зы.

Излива́ют чудеса́, Пречи́стая, Боже́ственныя ча́ши Твоя́ благода́ть вои́стинну ве́рным,/ и незави́стно чту́щим Тя от Твоея́ ра́ки пролива́ются,/ я́ко из друга́го Еде́ма, мы́сленныя ре́ки.

От скве́рны вся́кия душе́вныя,/ чисти́тельна есть Твоя́, Всенепоро́чная Де́во, ра́ка,/ покрыва́ющая честно́е Твое́ те́ло покры́вшую ри́зу.

Ны́не приступи́те с весе́лием вси, и́же на земли́,/ прииди́те, ра́ка призыва́ет та́йне,/ объя́ти Госпожи́ пресла́вную во мне сокро́виществованную ри́зу Ея́.

Песнь 8

Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Благода́рными гла́сы воспева́ем Тя, всех до́брых нам Хода́таицу,/ и честну́ю ри́зу Твою́ облобыза́юще, Отрокови́це, взыва́ем:/ благослови́те, вся дела́ Госпо́дня, Го́спода.

Я́ко мы́сленную свещу́ иму́ще, на све́щнице трапе́зы предлежа́щую,/ свяще́нную оде́жду Пречи́стыя Де́вы, серде́чныя просвеща́ем зе́ницы всегда́.

Ника́коже безча́стны оста́вила еси́/ свяще́ннаго Твоего́, Де́во, прикоснове́ния недосто́йныя рабы́ Твоя́:/ вме́сто бо те́ла Твоего́ живоно́снаго ри́зу Твою́ всем дарова́ла еси́.

Пе́сньми Боже́ственными почти́м Бо́жие селе́ние простра́нное,/ в ма́терех Пречи́стую, Небе́сную дверь,/ е́юже заключи́ся к сме́рти дверь веду́щая.

Ин

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

А́нгели, Пречи́стая, ны́не сликовству́ют в честне́м хра́ме Твое́м, Чи́стая,/ и окружа́ют, Влады́чице, честну́ю и святу́ю Твою́ ри́зу любо́вию и ра́достию,/ мы же весе́лием мно́гим покланя́емся,/ воспева́юще Тя, сла́ву ро́да на́шего.

Жезл, я́же цвет жи́зни прозя́бшая,/ Ты еси́ всех ра́дость многочестна́я, Пречи́стая,/ мирополо́жница Ду́ха, сокро́вище благи́х, арома́т исто́чник,/ из него́же ми́ра исцеле́ний источа́ет Боже́ственная ра́ка.

Воспева́ют, Пречи́стая, вели́чия Твоя́, Чи́стая, мы́сленная во́инства,/ пропове́дают вси патриа́рси и проро́цы я́сно,/ и апо́столи сия́, и му́чеников лик, и преподо́бных все исполне́ние,/ с ни́миже покланя́ем Ти ся.

Песнь 9

Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.

Се Тя, одр Соломо́нов, почита́ем ра́достными пе́сньми,/ и честну́ю Твою́ ри́зу, я́ко други́й киво́т свяще́ния, окружи́вше,/ исцеле́ния прие́млем спаси́тельная, Присноде́во.

Яви́ся ны́не Боже́ственная Твоя́ ра́ка, содержа́щая ри́зу Твою́ честну́ю,/ я́коже исто́чник све́та, Де́во,/ лучи́ исцеле́ний испуща́ющи и тьму неду́гов отгоня́щи,/ ю́же с любо́вию целу́ем.

Днесь сра́дуются нам, Всенепоро́чная, покланя́нием ри́зы Твоея́ вся Небе́сныя си́лы,/ апо́столи, проро́цы и му́ченицы, преподо́бнии и пра́веднии вси,/ Влады́чице еди́на Присноде́во.

Освяти́ся вся земля́, всесвято́е Влады́чне поко́ище, положе́нием ри́зы Твоея́,/ и Дави́д ра́дуется дре́вле положе́нием киво́та, прообразу́ющаго Тя, Присноде́во.

Све́тло одея́ние Твою́ ри́зу дарова́ла еси́ и огражде́ние/ Тя чту́щему Ца́рствующему гра́ду всех градо́в,/ я́ко Цари́ца всех тва́рей су́щи, Богороди́тельнице Ма́ти Де́во.

Ин

Ирмо́с: Ка́мень нерукосе́чный/ от несеко́мыя горы, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Черто́г пречестны́й сей, Богороди́тельнице, яви́ся ра́ка Твоя́,/ честну́ю Твою́ ри́зу, де́вственное же одея́ние и неве́стническое я́ко иму́щи/ и я́ко жи́зни сокро́вище соблюда́ющи.

Храм, изобража́ющий вся́ко Небе́сное благоукраше́ние Де́вы, днесь, ве́рнии, дости́гше,/ чуде́с заря́ми, я́коже звезда́ми, сия́ем, и озаря́емся благода́тию.

И́мать святы́й Твой по́яс/ и честну́ю Твою́ ри́зу, Богороди́тельнице, Твой град, я́ко сте́ну,/ и уче́ний Боже́ственных соедине́ние, и правосла́вных похвалу́,/ и во́инству победи́тельная.

Пое́м неизрече́нную сла́ву и безчи́сленную Твою́ благода́ть/ Ты бо еси́ исто́чник прему́дрости, из него́же Сло́во всем происхо́дит,/ чту́щим Тя, Пречи́стая, и велича́ющим рождество́ Твое́.

Свети́лен.

Подо́бен: Све́те неизме́нне:

Окрили́вшую Христа́/ ри́зу Богоотрокови́цы и Богоро́дицы Мари́и,/ днесь прииди́те, земноро́днии, почти́м пе́сньми,/ я́ко да благода́тию Сея́ при́сно ублажа́емся.

Сла́ва, и ны́не:

Еди́на и естество́ и вре́мя обнови́ла еси́, Богома́ти:/ нетле́нно бо Твое́ рождество́, нетле́нная и ри́за,/ е́юже град Твой покрыва́еши/ и е́юже ски́петры благоче́стия содержи́ши.

На хвали́тех стихи́ры на 4, глас 4.

Подо́бен: Я́ко до́бля:

Ра́ка, содержа́щая ри́зу Твою́, Пречи́стая,/ киво́т освяще́ния рабо́м Твои́м,/ и свяще́нное огражде́ние, и сла́ва, и похвала́,/ и исцеле́ний исто́чник на всяк день познава́ется./ Иде́же днесь свяще́нно собра́вшеся,/ воспева́ем мно́гая Твоя́ вели́чия/ и чуде́с пучи́ну.

Се ме́сто пресла́вно,/ се дом присносве́тел,/ в не́мже сокро́вище положи́ся –/ честна́я ри́за Богоотрокови́цы – благода́тию,/ приступи́те, челове́цы,/ просвеще́ние и очище́ние из нея́ проявле́нне почерпи́те/ и возопийте благода́рным се́рдцем:/ Пресвята́я Де́во, благослови́м Тя,/ спаса́еми рождество́м Твои́м.

Свято́е положе́ние ри́зы Твоея́, Влады́чице,/ пра́здник стяжа́хом, веселя́щеся,/ я́ко гра́ду Твоему́ днесь да́тися сподо́била еси́/ свяще́нное одея́ние,/ храни́лище некра́домо,/ дар че́стен, неотъе́млемо бога́тство,/ исцеле́ний река́, испо́лнена дарова́ний духо́вных.

Сла́ва, и ны́не, глас 2:

Смысл очи́стивше и ум,/ со А́нгелы и мы торжеству́ем,/ све́тло начина́юще дави́дскую песнь Отрокови́це,/ Неве́сте всех Царя́, Христа́ Бо́га на́шего,/ воскресни́, Го́споди, глаго́люще, в поко́й Твой,/ Ты и киво́т святы́ни Твоея́,/ я́ко бо пала́ту кра́сну, Сию́ украси́в,/ и причте́ Ю гра́ду Твоему́, Влады́ко,/ стро́ити и покрыва́ти от супоста́тных пога́н/ держа́вною си́лою Твое́ю, моли́твами Ея́.

Славосло́вие вели́кое. И отпу́ст.

НА ЛИТУРГИ́И

Блаже́нны, пе́сни 3-я и 6-я. Проки́мен, глас 3, песнь Богоро́дицы: Вели́чит душа́ моя́ Господа: Стих: Я́ко призре́ на смире́ние Рабы́ Своея́: Апо́стол ко Евре́ем, зача́ло 320. Аллилу́ия, глас 8: Воскресни, Го́споди, в поко́й Твой: Ева́нгелие от Луки́, зача́ло 54. Прича́стен: Ча́шу спасе́ния прииму́: