НА МАЛОЙ ВЕЧЕРНИ́

На Го́споди, воззва́х: стихи́ры на 4, глас 1.

Подо́бен: Небе́сных чино́в:

Небе́сныя оби́тели всели́вся,/ Фили́ппе святи́телю,/ и со А́нгелы предстоя́ престо́лу Христо́ву,/ я́ко и́стинен архиере́й и страда́лец,/ моли́ прегреше́ний нам разреше́ние дарова́ти/ и душа́м на́шим мир и ве́лию ми́лость.

Кро́тко царя́ умоля́я и дерзнове́нно поуча́я,/ е́же неразде́льну бы́ти е́го ца́рству,/ Фили́ппе святи́телю,/ душе́вную бразду́ от грех очища́я/ и, я́ко се́мена, Бо́жие Сло́во влага́я,/ я́же и нам возраща́еши ко спасе́нию душ на́ших.

Дом духо́вных доброде́телей был еси́,/ святи́тель и испове́дник и́стинен показа́вся,/ в тебе́ бо жили́ще, я́ко в честне́м хра́ме,/ Христо́с Себе́ сотвори́./ Моли́ся, о́тче, пода́ти всем нам ве́чное спасе́ние/ и душа́м на́шим ве́лию ми́лость.

Сла́ва, глас 6:

Святи́телем удобре́ние и отце́в красоту́,/ о земли́ Русстей моле́бника вели́ка,/ соше́дшеся днесь, о празднолю́бцы,/ пе́сненными похвала́ми воспое́м, глаго́люще:/ ра́дуйся, святи́телю Фили́ппе,/ тве́рдый у́ме, благода́тию и и́стиною освяще́нный,/ отню́дуже и прия́телище был еси́ Пресвята́го Ду́ха./ И ны́не с первосвяти́тели предстоя́ престо́лу Христо́ву,/ моли́ся о душа́х на́ших.

И ны́не:Богоро́дице, Ты еси́ лоза́ и́стинная:

На стихо́вне стихи́ры, глас 2.

Подо́бен: До́ме Евфра́фов:

Дом Ду́ха Свята́го/ яви́лся еси́, святи́телю,/ внутрь име́я сло́во прему́дрости,/ Фили́ппе блаже́нне,/ о нас моли́ся Христу́ Бо́гу.

Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.

Звезду́ Русскую/ пе́сньми восхва́лим,/ я́ко заря́ми, вся просвеща́ющу/ в нощи́ неве́дения,/ к све́ту Богоразу́мия осиява́ющу.

Стих: Уста́ пра́веднаго поуча́тся прему́дрости,/ и язы́к его́ возглаго́лет суд.

Дом Ду́ха Свята́го был еси́,/ благода́тию испо́лнен/ Боже́ственных уче́ний,/ и́миже напоя́еши мир,/ прему́дре Фили́ппе.

Сла́ва, и ны́не, Богоро́дичен, глас то́йже:

Ра́дуйся, Мари́е Богоро́дице,/ Це́ркви необори́мая,/ па́че же свя́та,/ я́коже вопие́т проро́к Дави́д:/ свят храм Твой, ди́вен в пра́вду.

Тропа́рь пи́сан на вели́цей вече́рни

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 5.

Подо́бен: Ра́дуйся, живоно́сный Кре́сте:

Ра́дуйся, свяще́нная главо́,/ чи́стый сосу́де Свята́го Ду́ха,/ святи́телю Фили́ппе,/ Богодохнове́нный орга́не,/ благоче́стия пучи́но неисчерпа́емая,/ церко́вное украше́ние,/ ца́рствующаго гра́да Москвы́ вели́кое удобре́ние,/ Русское утвержде́ние,/ оби́димых засту́пниче,/ апо́столов ревни́телю,/ нра́вы подо́бниче Златоу́стому,/ му́жественно положи́л еси́ ду́шу твою́ за па́ству твою́,/ Христа́, и́стиннаго Архипа́стыря, подража́я,/ Его́же, моли́ дарова́ти душа́м на́шим/ мир и ве́лию ми́лость.

Ра́дуйся, златоза́рная уста́,/ Богопе́снивая ла́стовице, преподо́бне,/ сто́лпе правосла́вия непоколеби́мый/ и гра́да на́шего стена́ необори́мая,/ прибе́жище скорбя́щих,/ обурева́емых приста́нище ти́хое,/ всех притека́ющих к тебе́ защи́тниче от бед и скорбе́й/ и подуща́телю к ре́вности пе́ний боголе́пных,/ му́чеником и испове́дником подо́бниче,/ равностоя́телю святы́х А́нгел,/ апо́столов единонра́вне,/ Христа́ непреста́нно моли́,/ дарова́ти душа́м на́шим/ мир и ве́лию ми́лость.

Ра́дуйся, свяще́нная главо́,/ святи́телю Фили́ппе,/ я́ко многосве́тлое со́лнце, озаря́еши всю́ду уче́нии твои́ми/ и упа́сл еси́ ста́до твое́ на па́житех духо́вных,/ незы́блен, я́ко на ка́мени основа́н тве́рдем./ Те́мже и му́жеством твои́м царя́ удиви́л еси́,/ я́рость его́ на кро́тость преложи́ти моля́,/ ку́пно и претя́,/ за е́же непра́ведно престо́ла и па́ствы тя лиши́в, он/ посла́ Твери́ гра́да в монасты́рь, нарица́емый О́трочь,/ иде́же непра́ведно смерть прия́л еси́,/ моля́ся о убива́ющих тя и глаго́ля:/ Го́споди, не поста́ви им в грех сего́./ Те́мже от Христа́ Бо́га вене́ц тебе́ дарова́ся, блаже́нне,/ Его́же моли́ дарова́ти душа́м на́шим/ мир и ве́лию ми́лость.

Ра́дуйся, по́стнических подвиго́в носи́вый ле́гкий яре́м,/ Тро́ицы чи́стый до́ме,/ благово́нный сосу́де,/ церко́вное утвержде́ние,/ апо́столов сопресто́льниче,/ святи́телей удобре́ние,/ сла́ва му́чеников/ и преподо́бных украше́ние,/ пра́вило доброде́телей изве́стное,/ смире́ния све́тлая высото́,/ оби́димых засту́пниче,/ ни́щих пита́телю./ Христа́, блаже́нне, моли́/ дарова́ти душа́м на́шим мир и ве́лию ми́лость.

Сла́ва, глас 8:

Ра́дуйся и весели́ся, сла́внейший гра́де Москва́,/ све́тло торжеству́й, Христо́ва Це́ркви,/ совоку́пльшися, лику́й, богосо́бранная па́ство:/ днесь созыва́ет нас архипа́стыря всеми́рное торжество́./ Прииди́те, у́бо све́тло пра́зднуим в па́мять его́, глаго́люще:/ ра́дуйся, святи́телю Богому́дре,/ и́же, я́ко броне́ю, му́жеством духо́вным вооружи́л еси́ себе́/ и непослу́шающия тя обличи́л еси́ необинове́нно/ да́нною тебе́ от еди́наго Бо́га вла́стию./ Ра́дуйся, скорбя́щим душе́ю Боже́ственное утеше́ние,/ и оби́димым защи́тниче, и всем ве́рным благоути́шное приста́нище./ Те́мже, обстоя́ще всечестну́ю твою́ ра́ку,/ любе́зно облобыза́ем, святи́телю Фили́ппе:/ тобо́ю про́сим получи́ти Боже́ственнаго человеколю́бия/ и твои́ми моли́твами ми́ру мир дарова́ти/ и душа́м на́шим ве́лию ми́лость.

И ны́не, Богоро́дичен.

Вход. Проки́мен дне. И чте́ния три.

При́тчей чте́ние (главы́ 10 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва,/ от уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да, честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мой, исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим:/ я́ко аз, прему́дрость, устро́их сове́т,/ и ра́зум, и смысл аз призва́х./ Мой сове́т и утвержде́ние, мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство, ненака́заннии же, прилага́йте сердца́./ Послу́шайте мене́ и па́ки, честна́я бо реку́/ и отве́рзу от усте́н пра́вая, я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х,/ ничто́же в них стро́потно, ниже́ развраще́нно./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́новы чте́ние (главы́ 4 и 5):

Пра́ведник а́ще пости́гнет сконча́тися, в поко́и бу́дет./ Осу́дит же пра́ведник умира́яй живу́щия нечести́выя./ У́зрят бо кончи́ну пра́веднаго и не разуме́ют, что́ совеща́ша о нем,/ я́ко пове́ржет Госпо́дь нечести́выя безгла́сны ниц/ и поколе́блет их от основа́ний,/ и до после́дняго исче́знут в боле́зни, и па́мять их поги́бнет./ Прии́дут бо в помышле́ние согреше́ний свои́х ужа́сни,/ и обличи́т их сопроти́в беззако́ния их./ Тогда́ ста́нет в дерзнове́нии мно́зе пра́ведник пред лице́м оскорби́вших его́/ и отмета́ющих труды́ его́./ Ви́девше же его́, смяту́тся стра́хом мно́гим/ и ужа́снутся о пресла́вном спасе́нии его́./ Реку́т бо в себе́, ка́ющеся,/ и в тесноте́ ду́ха воздо́хнут, и реку́т:/ сей бе, его́же име́хом не́когда в посме́х/ и в при́тчу поноше́ния, безу́мнии./ Житие́ его́ вмени́хом неи́стово и кончи́ну его́ безче́стну./ Ка́ко вмени́ся в сыне́х Бо́жиих и во святы́х жре́бий его́ есть?/ У́бо заблуди́хом от пути́ и́стиннаго,/ и пра́вды свет не облиста́ нам, и со́лнце не возсия́ нам./ Беззако́нных испо́лнихомся стезь и поги́бели,/ и ходи́хом стези́ непрохо́дны,/ пути́ же Госпо́дня не разуме́хом.

Прему́дрости Соломо́новы чте́ние (главы́ 10, 6, 8 и 9):

Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́, и от Госпо́да обря́щут благода́ть и сла́ву./ Язы́к му́дрых до́брая свесть, и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю, пре́жде да́же, разуме́ти ю,/ и удо́бь у́зрится от любящих ю./ У́треневавый к ней, не утруди́тся,/ и бдяй ея́ ра́ди вско́ре без печа́ли бу́дет/ . Я́ко досто́йных ея́ сама́ обхо́дит, и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности моея́./ И взыска́х неве́сту привести́ себе́, я́ко всех Влады́ка возлюби́ ю./ Таи́бница бо есть Бо́жия хи́трости и обрета́тельница дел Его́./ Труды́ ея́ суть доброде́тели,/ целому́дрию же и ра́зуму та учи́т,/ пра́вде и му́жеству, и́хже потре́бнее ничто́же есть в житии́ челове́ком./ Аще же и мно́га иску́сства жела́ет кто,/ весть дре́вняя и бы́ти хотя́щая разсмо́трит./ Свесть изви́тия слове́с и разреше́ния гада́ний,/ зна́мения и чудеса́ проразуме́ет и сбытия́ време́н и лет,/ и всем сове́тник есть благ, я́ко безсме́ртие есть в ней/ и благосла́вие во обще́нии слове́с ея́./ Сего́ ра́ди бесе́довах ко Го́споду, и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся сло́вом Твои́м и му́дростию Твое́ю устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде./ Даждь ми Твои́х престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́ и от престо́ла сла́вы Твоея́,/ да, су́щи со мно́ю, научи́т мя, что́ благоуго́дно есть пред Тобо́ю,/ и наста́вит мя в ра́зум, и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.

На лити́и стихи́ры, глас 4:

Ле́потно оте́чества твоего́ не оста́вил еси́,/ о́тче Фили́ппе,/ но возврати́лся еси́ в ца́рствующий град Москву́,/ в не́мже, Ду́хом Святы́й освяти́вся, был еси́ архиере́й/ и пасл еси́ па́ству твою́ многотру́дно,/ за ю́же мно́гая озлобле́ния, и безче́ствования,/ и изгна́ние претерпе́л еси́ и пострада́л еси́ ея́ ра́ди да́же до сме́рти,/ и ко Христу́ пресели́лся еси́, ра́дуяся./ Ны́не же па́ки Це́рковь ви́девши тя в себе́,/ возвесели́ся в возвраще́нии твое́м,/ я́ко бо дар многоце́нен, прие́мши мо́щи твоя́,/ зове́т Влады́це:/ моли́твами, Христе́, архиере́я Твоего́/ да́руй лю́дем Твои́м прегреше́ний проще́ние и ве́лию ми́лость.

Глас 2: А́нгел земны́й, Небе́сный челове́к,/ рачи́тель Боже́ственныя сла́вы,/ земны́х же презира́тель яви́лся еси́,/ стра́сти покори́в и плоть порабо́тив ду́ху,/ апо́столов сострада́льче,/ страстоте́рпцев единонра́вне,/ благоре́вностно, Фили́ппе, Христо́в зако́н исполня́я,/ ду́шу твою́ за лю́ди положи́л еси́./ И ны́не предстоя́ Христо́ву престо́лу,/ моли́ся о нас, ча́дех твои́х.

Столп непоколеби́м Христо́вы Це́ркве,/ о́тче, был еси́:/ Боже́ственною бо ре́вностию разже́гся,/ дерзнове́нно непра́ведное начина́ние пра́ведно разоря́еши,/ царя́ же и лю́ди науча́еши/ апо́стольским и оте́ческим преда́нием после́довати,/ и от разделе́ния ца́рства и зла́го начина́ния преста́ти повелева́еши,/ и преще́ньми по вла́сти, от Бо́га да́нней тебе́, му́жественне запреща́еши,/ непокоря́ющия же ся твоему́ пра́вому уче́нию/ суду́ Бо́жию предае́ши./ Того́ ра́ди я́ко и́стинный па́стырь/ положи́л еси́ ду́шу твою́ за па́ству твою́,/ подража́телю и́стиннаго Па́стыря Христа́,/ и ны́не, архиере́е Фили́ппе,/ моли́ спасти́ся всем,/ любо́вию чту́щим свяще́нную па́мять твою́.

Сла́ва, глас 4:

Подоба́ет ца́рствующему гра́ду Москве́/ Фили́ппа везде́ име́ти архиере́я,/ я́ко не́кую у́тварь ца́рскую/ и сокро́вище некра́домо,/ всем подаю́ща бога́тство спаси́тельное испове́дания/ и вся собира́юща к соедине́нию пе́сней боголе́пных./ К нему́же возопии́м:/ святи́телю и испове́дниче,/ моли́ Христа́ Бо́га о душа́х на́ших.

И ны́не, Богоро́дичен: При́зри на моле́ния:

На стихо́вне стихи́ры, глас 8.

Подо́бен: О, пресла́внаго чудесе́:

Свети́льниче Фили́ппе,/ удобре́нием боголе́пных доброде́телей/ обита́лище пречи́сто Всесвята́го Ду́ха/ и нетле́нно сокро́вище был еси́,/ всем подаю́щ бога́тство неистощи́мое,/ све́тлыми дыха́нии слове́с твои́х,/ я́ко у́тварию злато́ю, украша́яся,/ проро́чески бо изы́де веща́ние/ твои́х исправле́ний, о́тче святи́телю.

Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.

Свети́льниче слове́сный,/ язы́че благонаказа́тельный,/ богозна́менный глас веща́ния/ уче́ний твои́х, святи́телю,/ весьма́ подвиза́яся к ре́вности боголе́пней,/ апо́столов был еси́ подража́тель, Богому́дре./ Те́мже, ре́вностию царя́ удиви́в,/ Христо́ва Ца́рствия насле́дник яви́лся еси́,/ Его́же моли́ спасти́ся душа́м на́шим.

Стих: Уста́ пра́веднаго поуча́тся прему́дрости,/ и язы́к его́ возглаго́лет суд.

Прииди́те, Русстии собо́ри,/ днесь честно́е святи́теля торжество́/ благоче́стно пе́сньми почти́м:/ той бо вои́стинну Свята́го Ду́ха осия́ние/ от ю́ности сподо́бися прия́ти,/ воздержа́нием те́ло свое́ удручи́в,/ и душе́вною чистото́ю све́та трисо́лнечнаго заря́ яви́ся,/ и ны́не мо́лится о чту́щих его́.

Сла́ва, глас 6:

Я́ко светоза́рная звезда́, во гра́де на́шем Москве́/ возсия́л еси́ уче́ньми слове́с твои́х,/ всеблаже́нне Фили́ппе приснопа́мятне:/ ты бо прему́дрый пропове́датель показа́лся еси́/ и прее́мник благоче́стия яви́лся еси́,/ царя́ и лю́ди твоя́, пасо́мыя тобо́ю,/ утвержда́я и́стинным уче́нием Христо́вым,/ е́же в любви́ и соедине́нии неразде́льнем пребыва́ти./ По преставле́нии же твое́м чи́стое и нетле́нное те́ло твое́/ честне́й и многослову́щей оби́тели,/ в не́йже духо́вно породи́лся еси́,/ я́ко у́тварь многоце́нну, пре́дал еси́./ Отту́ду же по мно́гих ле́тех/ в ца́рствующий град возврати́вшася,/ ублажа́ем тя со псалмы́ и пе́сньми/ и святу́ю и всечестну́ю пра́зднуем па́мять твою́.

И ны́не, Богоро́дичен.

Тропа́рь, глас 8:

Первопресто́льников прее́мниче,/ сто́лпе правосла́вия, и́стины побо́рниче,/ но́вый испове́дниче, святи́телю Фили́ппе,/ положи́вый ду́шу за па́ству твою́,/ те́мже, я́ко име́я дерзнове́ние ко Христу́,/ моли́ за оте́чество на́ше, за град же и лю́ди,/ чту́щия досто́йно святу́ю па́мять твою́.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-й стихоло́гии седа́лен, глас 1:

Кровь твоя́, му́дре, вопие́т от земли́, я́ко А́велева,/ но́вый испове́дниче, святи́телю Фили́ппе,/ я́рости бо царе́вы не убоя́лся еси́,/ му́дре того́ поуча́я и суему́дренная свире́пства облича́я./ Сего́ ра́ди всели́лся еси́ в Небе́сный черто́г Христа́ Бо́га на́шего.

Сла́ва, и ны́не, Богоро́дичен:

Всех Творца́, Бо́га и Соде́теля, Всенепоро́чная Чи́стая,/ Ду́хом Боже́ственным в ложесна́х заче́нши, нетле́нно родила́ еси́,/ Его́же сла́вяще, Тя воспева́ем, Де́во, я́ко пала́ту Всецаря́ и ми́ра спасе́ние.

По 2-й стихоло́гии седа́лен, глас 5:

Преподо́бне и треблаже́нне, священноиспове́дниче Фили́ппе,/ па́стырю до́брый, Началопа́стыря Христа́ уго́дниче,/ положи́вый ду́шу твою́ за лю́ди моско́вскаго наро́да, па́ствуемаго тобо́ю,/ те́мже и ны́не, о́тче наш, святи́телю Фили́ппе блаже́нне,/ испроси́ у Го́спода, е́же дарова́ти нам ве́лию ми́лость.

Сла́ва, и ны́не, Богоро́дичен:

Ди́вно чу́до зача́тия и неизрече́нен о́браз рождества́ Твоего́ в Тебе́ позна́ся, Де́во Чи́стая,/ удивля́ет мой ум и ужаса́ет по́мысл,/ сла́ва Твоя́, Богоро́дице, по всем простре́ся, ко спасе́нию душ на́ших.

По полиеле́и седа́лен, глас 8.

Подо́бен: Прему́дрости:

Пропове́дует, о́тче, тебе́ ны́не Русская митропо́лия,/ ю́же от боле́зней и скорбе́й избавля́еши, Богоблаже́нне Фили́ппе,/ А́нгелов собесе́дник яви́вся./ Те́мже, со апо́столы и му́ченики лику́я, помо́щник быва́еши в ско́рбех, всеизря́дне,/ пла́чущих утеше́ние,/ па́стырь и наста́вник заблу́ждших, Фили́ппе блаже́нне./ И нас твои́ми моли́твами изба́ви от бед/ и моли́ся Христу́ Бо́гу,/ да оставле́ние пода́ст ве́рою и любо́вию чту́щим святу́ю па́мять твою́.

Сла́ва, и ны́не, Богоро́дичен:

Небе́сную дверь и киво́т, пресвяту́ю го́ру, све́тлый о́блак воспои́м,/ неопали́мую купину́, слове́сный рай, Е́вы воззва́ние,/ вселе́нныя всея́ вели́кое сокро́вище,/ я́ко спасе́ние в Ней соде́лася ми́ру и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся всесвято́му рождеству́ Твоему́.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех,/ я́же воздаде́ ми? Вся́кое дыха́ние: Ева́нгелие от Луки́, зача́ло 24.

По 50-м псалме́ стихи́ра, глас 8:

Апо́столов ревни́теля, Фили́ппа,/ преблаже́ннаго отца́ и учи́теля,/ соше́дшеся, восхва́лим, глаго́люще:/ ра́дуйся, святи́телю, тве́рдый умо́м,/ благода́тию и и́стиною, освяще́нне,/ отню́дуже и прия́телище был еси́ Ду́ха Всесвята́го./ И ны́не со архиере́и предстоя́ престо́лу Христо́ву,/ моли́ся при́сно о рабе́х твои́х.

Кано́н Богоро́дицы со ирмосо́м на 6 и святи́теля на 8, глас 8.

Песнь 1

Ирмо́с: Посе́ченный несеко́маго пресече́,/ и ви́де со́лнце зе́млю, ю́же не ви́де;/ лю́гаго врага́ вода́ потопи́,/ и непроходи́мое про́йде Изра́иль./ Песнь же воспева́шеся:/ Го́сподеви пои́м, сла́вно бо просла́вися.

А́гнче Бо́жий и Сло́ве, светозаре́нием Свята́го Твоего́ Ду́ха/ мра́чному уму́ моему́ светоно́сную лучу́ низпосли́/ и сло́во ми вдохни́ восхвали́ти, его́же Сам избра́л и прия́л еси́,/ верх страда́льца свяще́ннаго Фили́ппа.

Благода́ть, свя́те, Боже́ственную рабу́ твоему́ у Бо́га испроси́/ и разуме́ния мою́ испо́лни ду́шу восхвали́ти житие́ твое́, Фили́ппе святи́телю,/ и́мже вся удиви́л еси́, подвиза́вся, Го́споду поя́:/ сла́вно бо просла́вися.

Вели́ких доброде́телей светозаре́нием сия́ют твоя́ де́тели, преподо́бне:/ удиви́шася бо ца́рие кре́пкому твоему́ му́жеству,/ я́ко в наказа́нии к ним язы́к твой не ослабе́, и Го́споду поя́ше:/ сля́вно бо просла́вися.

Богоро́дичен: Глаго́лы Богоглаго́ливых пропове́дников, о Тебе́, Богома́ти, испо́лнишася:/ се бо родиля́ еси́, Де́во, мла́до Отрочя́,/ Ада́ма дре́вняго старе́йшо и сопресто́льна Роди́телю,/ ми́ра всего́ на спасе́ние и тле́ния измене́ние.

Катава́сия: Отве́рзу уста́ моя́:

Песнь 3

Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.

Доброде́телей на го́ру восте́кл еси́ и во мрак виде́ния вшел еси́, святи́телю Фили́ппе,/ и позна́л еси́, ели́ко вме́стно, Непостижи́маго естество́м,/ просвеще́ния же испо́лнен быв, о́тче, прия́л еси́ Боже́ственную благодя́ть.

Еди́наго Бо́га добро́тою ища́ и еди́ную Его́ получи́ти сла́ву жела́я, блаже́нне,/ сла́ву и честь земна́го пребыва́ния я́ко преходя́щую оста́вил еси́/ и я́ко уго́дник просия́л еси́ всех Влады́ки Христа́.

Жела́нием Ду́ха пло́ти жела́ние увяди́л еси́/ и себе́, блаже́нне, обручи́л еси́ сожи́тельницу чистоту́,/ от нея́же ча́да тебе́ роди́шася – вся доброде́тели, присносла́вне,/ ча́до тя содева́ющия невеще́ственнаго Све́та.

Богоро́дичен: Зми́я мы́сленнаго умертви́ла еси́,/ умертви́вшаго Ада́ма в раи́ и Е́ве прама́тери соде́лавшаго печа́ль,/ Жизнь прозя́бши, Де́во Чи́стая, от тле́ния нас свободи́вшую:/ Бог бо бе из Твои́х ложе́сн проше́д неизрече́нно.

Седа́лен, глас 8.

Подо́бен: Прему́дрости:

Я́ко апо́стола избра́ннаго тезоимени́т, о́тче, и подража́тель,/ беды́ претерпе́л еси́ и гоне́ния,/ ре́вность вообража́я проро́ка Илии́ и Крести́теля, му́жеси обличи́л еси́ беззако́ннующия/ и престо́л, вве́ренный тебе́, до́бре упра́вил еси́,/ ра́вное о́ных тече́ние сконча́в./ Я́ко ми́лоть, те́ло твое́ на земли́ оста́вил еси́,/ испуща́еши, я́ко ми́ро, благоуха́ния арома́т/ и, я́ко дождь, излива́еши благода́ть духо́вну,/ напоя́я та́йно бразды́ серде́ц на́ших./ Фили́ппе святи́телю, моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ огнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Песнь 4

Ирмо́с: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Твое́й, сла́ва снизхожде́нию Твоему́.

Зло́бою дви́жимии на тя, незло́биваго а́гнца, я́ко ди́вии зве́рие, воста́ша:/ словесы́ твои́ми, я́ко остно́м, сре́чеми, не терпя́ще,/ я́ростию поощря́хуся, святи́телю Богому́дре.

Имать тя засту́пника мир весь и помо́щника в напа́стех,/ я́ко бо побо́рник ве́рен и ско́рый предста́тель к твое́й па́стве прири́щущия/ напа́стей и бед изыма́еши, свяще́нными твои́ми моли́твами.

И́спо́лнив до́брыя по́двиги, тезоимени́те, жела́ннаго, Богому́дре, сподо́бился еси́ безсме́ртия,/ иде́же, ра́дуяся, вене́ц побе́ды взял еси́ и вопие́ши:/ сла́ва си́ле Твое́й, сла́ва, Христе́, прише́ствию Твоему́.

Богоро́дичен: Кре́пость всех враго́в низложи́, Ма́ти Бо́жия,/ оскорбля́ющих воспева́ющия Тя, я́ко ро́ждшая Го́спода сла́вы,/ невреди́мо Твое́ ста́до спаса́й от злых прираже́ний,/ я́ко да по до́лгу Тя ублажа́ем.

Песнь 5

Ирмо́с: Мрак души́ моея́ разжени́, Светода́вче Христе́ Бо́же,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,/ да, у́тренюя, сла́влю Тя.

Я́ко луча́ пра́вды Со́лнца, яви́ся ми́ру/ светлостьми́ доброде́телей, предста́тельство твое́, святи́телю Фили́ппе,/ разоря́ющее о́блак наше́дших бед;/ тя и ны́не пою́щия в ми́ре сохрани́,/ и просла́ви я красото́ю, и просвети́.

Меч обоюдоо́стр язы́к твой показа́ся, в Христо́в страх вооружи́вся, блаже́нне,/ разу́мно изобличи́в нача́льствующия, во свиде́тельство Христа́ Всецаря́,/ вино́вна на среду́ приводя́, и Боже́ственныя Его́ ученики́.

Нов яви́лся еси́ ре́вностию, я́коже вторы́й Моисе́й,/ не зна́мении стра́шными удивля́я,/ но Боже́ственных слове́с уче́нии наставля́я к ти́хому приста́нищу но́ваго Изра́иля,/ от страсте́й Еги́пта изводя́.

Богоро́дичен: О́блак разу́мный Тя имену́ем,/ из Тебе́ бо Христо́с возсия́, Всенепоро́чная, и простра́ннейшу Тя небе́с показа́,/ Того́ бо неискусому́жно родила́ еси́, Чи́стая,/ воплоще́нна за милосе́рдие неисповеди́мое.

Песнь 6

Ирмо́с: Ио́ну в ки́те, Го́споди,/ еди́наго всели́л еси́,/ мене́ же, свя́заннаго мре́жами вра́жиими,/ я́ко от тли о́наго спаси́.

Промышле́ние о́бщее творя́ о пасо́мых тобо́ю,/ е́же бы́ти им душе́ю и се́рдцем единосло́вне, во Христо́ве еди́ней ве́ре пребыва́ющим,/ язы́ческия же отрева́л еси́ обы́чаи/ и разделе́ния бежа́ти, му́дре, научи́л еси́.

Ре́вностию Христо́вою поостри́вся, я́рость самодержа́внаго на кро́тость преложи́ти тща́лся еси́,/ и к преще́нием царе́вым непрекло́нен отню́д был еси́,/ я́ко Христо́вых за́поведей де́латель,/ и показа́лся еси́ я́ко кре́пок хра́брник,/ за па́ству твою́ пострада́в да́же до сме́рти, ра́дуяся.

Светоно́сную лучу́, сия́ющу во мра́це жития́ су́щим,/ святи́телю Фили́ппе, ви́дим тя,/ и я́ко свещу́ неугаси́мую, невеще́ственному приобщи́вшагося Све́ту/ и вся освеща́юща концы, тьму неразу́мия отъе́млюща.

Богоро́дичен: Тя иногда́ написа́ скрижа́ль богообра́зне во проро́цех Моисе́й,/ све́щник же Све́та, и сень, и жезл процве́тший, Всенепоро́чная,/ и ста́мну, ма́нну нося́щую, и ле́ствицу,/ е́юже возведо́хомся от земли́ к высоте́.

Конда́к, глас 3.

Подо́бен: Де́ва днесь:

Правосла́вия наста́вника и и́стины провозве́стника,/ Златоу́стаго ревни́теля, Русскаго свети́льника,/ Фили́ппа прему́драго восхва́лим,/ пи́щею слове́с свои́х разу́мно ча́да своя́ пита́юща:/ той бо язы́ком хвале́ния поя́ше,/ устна́ма же пе́ние веща́ше,/ я́ко таи́нник Бо́жия благода́ти.

И́кос:

Прииди́те, любострада́льцы, пе́нием и пе́сньми духо́вными/ па́мять священному́ченика соверша́юще, Боже́ственне возвесели́мся:/ вре́мя на́шего весе́лия и натрижне́ния наста́,/ в не́же прие́млем страсте́й разреше́ния дар./ Я́ко бо столп, огне́м яви́ся попаля́ющ беззако́ннующих главы́,/ ве́рных же просвеща́ющ ду́ши уче́ньми Богоразу́мия/ и в Боже́ственный град Го́рний Иерусали́м, я́ко друга́го Изра́иля, вводя́щ,/ я́ко учени́к Бо́жия благода́ти.

Песнь 7

Ирмо́с: На по́ле Деи́ре/ иногда́ мучи́тель пещь поста́ви на муче́ние Богоно́сных,/ в не́йже три о́троки песносло́вяху Еди́наго Бо́га,/ тро́ично воспева́ху, глаго́люще:/ отце́в Бо́же, благослове́н еси́.

Укра́шен благоле́пно Го́споду предста́л еси́ доброде́тельными по́двиги,/ вене́ц же нося́ страда́ния, испещре́н кро́вными ка́плями, святи́телю Фили́ппе./ Те́мже соверша́ющия светоно́сную па́мять твою́ при́сно помина́й и пою́щия:/ оте́ц на́ших Бо́же, благослове́н еси́.

Фараони́т мы́сленных враго́в ополче́ния, блаже́нне, избе́г,/ легко́ преше́л еси́ к Го́рним,/ та́мо водворя́яся, иде́же по́честь сла́вы получи́в терпе́нием,/ во све́те пра́ведных, в ра́довании святых, воспева́я:/ оте́ц на́ших Бо́же, благослове́н еси́.

Хва́лят тя, блажа́ще любо́вию, прити́чущии к ра́це твое́й, блаже́нне,/ в ней бо, мо́щи твоя́ целу́юще, оби́льно благода́ть прие́млют:/ прикоснове́нием бо вред оче́с исцели́л еси́/ и боле́знь зубо́в облегчи́л еси́ пою́щих:/ оте́ц на́ших Бо́же, благослове́н еси́.

Богоро́дичен: От любве́ душе́вныя вопию́ Ти, Влады́чице:/ пресве́тлаго Со́лнца о́блаче, спаси́тельная две́ре, Небе́сная врата́,/ ле́ствице мы́сленная, всех христиа́н мольбу́ приими́, Тя блажа́щих,/ наде́жду душ на́ших, и Сы́ну Твоему́ зову́щих:/ оте́ц на́ших Бо́же, благослове́н еси́.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

Цели́ши незави́стно ве́рно призыва́ющия тя:/ я́ко предста́в, а́бие разсла́блена возста́вил еси́/ и стра́ждущему ятро́ прикоснове́нием ручны́м уврачи́л еси́,/ уны́нием скорбя́ща явле́нием твои́м в ра́дость претвори́л еси́,/ при́сно де́йствуя вся, блаже́нне, всем во ве́ки.

Честь многоце́нную твоему́ верху́, страда́ния вене́ц,/ я́ко победоно́сцу, живоно́сною десни́цею Зижди́тель возложи́, всеблаже́нне,/ те́ло же твое́ соблюде́ невреди́мо от боко́в землены́х, испуща́ющее благоуха́ния арома́т./ Си́це тя просла́ви Подвигополо́жник во вся ве́ки.

Шата́ния и бра́ни междоусо́бныя укроти́,/ и свере́пеющия во́лки на ста́до твое́, блаже́нне,/ я́ко И́стинный па́стырь, моли́тв твои́х па́лицею дале́че отжени́,/ и оте́чество на́ше держа́вно устро́й, и воста́ния язы́ков покори́,/ да я́ко предста́теля тя воспева́ем во ве́ки.

Богоро́дичен: Щито́м ве́ры храм Твой святы́й, Богоро́дице Де́во, сохрани́,/ и в нем славосло́вящия Тя ку́пно сла́вы Твоея́ сподо́би,/ и нахожде́ния ва́рварскаго и томле́ния их изба́ви ны,/ ума́ на́шего во́лны свере́пыя укроти́ моли́твою Твое́ю, Всепе́тая.

Песнь 9

Ирмо́с: Благослове́н Госпо́дь, Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́,/ в ни́хже посети́ нас Восто́к с высоты́/ и напра́вил ны есть на путь ми́ра.

Еди́но естество́ Тро́ицы богосло́вил еси́,/ су́етным же поуча́ющияся сме́ло, всему́дре, обличи́в/ и Боже́ственными наказа́нии твои́ми ве́рныя увеща́в, му́дре, укрепи́л еси́,/ А́нгелов сожи́телю, святи́телю Фили́ппе,/ па́мять твою́ пра́зднующия в ми́ре соблюди́.

Ю́ношам немова́ние сро́дно присвое́ние быва́ет, но отце́м любе́зно вои́стинну;/ ты же, о́тче, приими́ на́ше сие́ благодаре́ние,/ не я́ко досто́йно и́стинно твоея́ хвалы́,/ но я́ко от усе́рдия тебе́ приноси́мо,/ не бо мо́жем ле́потно хвали́ти тя и велича́ти.

Я́ко апо́столов сопресто́лен и му́чеников слико́вен, святи́телем равноче́стен,/ страстоте́рпче Фили́ппе, предста́тельством твои́м пою́щия тя в ми́ре сохрани́/ и оте́чества на́шего рог возвы́си, ва́рварская же свере́пства низложи́,/ да, ра́дующеся, пое́м тя, велича́юще.

Богоро́дичен: О Све́та прия́телище, Богора́дованная Влады́чице,/ святи́телем вои́стинну утвержде́ние и преподо́бным всем похвало́!/ Спаси́ ны от бед и обстоя́ний и язы́ков наше́ствия,/ воспева́ющия, Тя, Многопе́тую.

Свети́лен.

Подо́бен: Посети́л ны:

Ревни́телю целому́дрия, от ю́наго воспита́ния, святи́телю Фили́ппе,/ потща́лся еси́, за и́стину укоря́емь и изгна́н бы́ти/ и тоя́ ра́ди смерть го́рькую подъя́л еси́;/ и ны́не, на Небесе́х предстоя́ престо́лу Святы́я Тро́ицы,/ при́сно о нас моли́ся, ве́рою и любо́вию соверша́ющих па́мять твою́.

Сла́ва, и ны́не, Богоро́дичен:

Щедро́ты Твоя́, Бо́же, на лю́ди Твоя́ низпосли́/ моли́твами Пречи́стыя Твоея́ Ма́тере и всех святы́х/ и ра́ди святи́теля Твоего́ Фили́ппа да́руй нам ве́лию ми́лость.

На хвали́тех стихи́ры, глас 4.

Подо́бен: я́ко до́бля:

Тече́ние соверши́л еси́/ и ве́ру соблю́л еси́,/ святи́телю блаже́нне Фили́ппе,/ сего́ ра́ди Христо́с тя венча́ све́тлым венце́м пра́вды/ и украси́ твое́ испове́дание, досточу́дне./ Тем, Небе́сное насле́дие прие́м,/ Спа́су моли́ся/ о воспева́ющих па́мять твою́.

Фили́ппе блаже́нне,/ испове́дников подража́телю,/ те́пле хва́лящим тя предста́тель бу́ди,/ и от вся́кия беды́, греха́ же и бу́ри/ и страсте́й мучи́тельства, о́тче, изба́ви ны,/ я́ко му́ченик неосла́блен/ и святи́тель богоприя́тен./ Дерзнове́ние име́я ко Христу́ Бо́гу,/ моли́ся о воспева́ющих па́мять твою́.

Фили́ппе святи́телю,/ разу́мнаго све́та заря́,/ церко́вное свети́ло,/ архиере́йская красото́,/ мона́шескаго по́стническаго жи́тельства и́стинное пра́вило,/ наш же засту́пник те́плый показа́лся еси́,/ свобожда́я от губи́тельства лука́вых,/ моля́ся, о́тче, о пою́щих па́мять твою́.

Сла́ва, глас 6:

Ты еси́ па́стырь до́брый/ и учи́тель изря́дный,/ святи́телю Фили́ппе,/ тя всегда́ восхваля́юще, вопие́м:/ тобо́ю Бог украси́ це́рковь Ма́тере Своея́,/ и те́ло твое́, за па́ству твою́ во изгна́нии пострада́вшее,/ многоле́тно же в земли́ сокрове́нное,/ престо́лу твоему́ возврати́, и лю́ди твоя́ возвесели́;/ те́мже моля́ся не преста́й о хва́лящих и чту́щих па́мять твою́,/ прося́ оставле́ния грехо́в и спасе́ния душа́м на́шим.

И ны́не, Богоро́дичен.

Славосло́вие вели́кое. Отпу́ст. И час 1-й.

НА ЛИТУРГИ́И

Блаже́нны от кано́на пе́сни 3-я и 6-я. Проки́мен, глас 1: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы,/ внуши́те вси, живу́щии по вселе́нней. Апо́стол ко Евре́ем, зача́ло 335. Аллилу́ия, глас 2: Уста́ пра́веднаго поуча́тся прему́дрости/ и язы́к его́ возглаго́лет суд. Стих: Зако́н Бо́га его́ в се́рдце его́,/ и не за́пнутся стопы́ его́. Ева́нгелие от Иоа́нна, зача́ло 36. Прича́стен: В па́мять ве́чную:

Моли́тва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Фили́ппе! Предстоя́ у Престо́ла всех Царя́, и наслажда́яся Све́та Единосу́щныя Тро́ицы, и херуви́мски со А́нгелы возглаша́я песнь Трисвяту́ю, вели́кое и неизсле́дованное дерзнове́ние име́я ко Всеми́лостивому Влады́це, моли́ся па́ствы Христо́вы спасти́ люде́й, благостоя́ние Святы́х Церкве́й утверди́, архиере́и благоле́пием святи́тельства укра́си, мона́шествующих к по́двигом до́браго тече́ния укрепи́, град Москву́ и вся гра́ды и страны́ до́бре сохрани́ и ве́ру святу́ю непоро́чну соблюсти́ умоли́. Мир весь умири́, от гла́да и па́губы изба́ви ны и от нападе́ния иноплеме́нных сохрани́, ста́рыя уте́ши, ю́ныя накажи́, безу́мныя умудри́, вдови́цы поми́луй, сироты́ заступи́, младе́нцы возрасти́, плене́нныя возврати́, немощству́ющия исцели́ и везде́ те́пле призыва́ющих тя и с ве́рою притека́ющих к тебе́ и усе́рдно припа́дающих и моля́щихся от вся́ких напа́стей и бед хода́тайством твои́м свободи́. Моли́ о нас Всеще́драго и Человеколюби́ваго Христа́ Бо́га на́шего, да и в день стра́шнаго прише́ствия Его́ шу́ияго стоя́ния изба́вит нас и ра́дости святы́х прича́стники сотвори́т со все́ми святы́ми во ве́ки. Ами́нь.