В то́йже день па́мять святы́х му́ченик Ки́рика и Иули́тты, и святы́х благове́рных кня́зя Влади́мира и княги́ни Агриппи́ны, Рже́вских. Слу́жбы их зри 14 ию́ля.

НА МАЛОЙ ВЕЧЕ́РНИ

На Го́споди, воззва́х: поста́вим стихо́в 4 и пое́м стахи́ры, глас 1.

Подо́бен: Небе́сных чино́в:

Десни́цею Всевы́шняго укрепле́н,/ вели́кий кня́же Влади́мире,/ и́дольскую пре́лесть отри́нул еси́, сла́вне,/ и, святы́м Креще́нием просвети́вся,/ све́том позна́ния Христо́ва/ зе́млю Ру́сскую озари́л еси́.

Нача́льника на́шего во благоче́стии христиа́нстем,/ прииди́те, восхва́лим, лю́дие ру́сстии,/ присносла́внаго вели́каго кня́зя Влади́мира,/ и́долы попра́вшаго/ и святы́м Креще́нием/ зе́млю Ру́сскую просвети́вшаго.

Светоно́сная твоя́ па́мять,/ равноапо́столе,/ днесь возсия́ нам всера́достно,/ веселя́щи ду́ши и сердца́/ твоего́ Богоразу́мия добро́тою,/ вели́кий кня́же Влади́мире.

Сла́ва, глас 6. Самогла́сен:

Днесь страна́ ру́сская,/ я́ко но́ваго царя́ Константи́на, тя стяжа́вши,/ све́тло ликовству́ет,/ вели́кий кня́же Влади́мире,/ ра́достно па́мять твою́ торжеству́ющи,/ мы же, ча́да твоя́, моле́бно вопие́м ти:/ моли́ся, равноапо́столе, ко Го́споду/ спасти́ и просвети́ти ду́ши на́ша.

И ны́не, Богоро́дичен, глас то́йже:

Никто́же, притека́яй к Тебе́,/ посра́млен от Тебе́ исхо́дит,/ Пречи́стая Богоро́дице Де́во,/ но про́сит благода́ти/ и прие́млет дарова́ние к поле́зному проше́нию.

На стихо́вне стихи́ры, глас 2.

Подо́бен: До́ме Евфра́фов:

От земны́х к Небе́сным прише́л еси́, ра́дуяся,/ вели́кий кня́же Влади́мире,/ и, по́честь восприе́м от Христа́ Бо́га,/ Тому́ моли́ся/ спасти́ся душа́м на́шим.

Стих: Вознесо́х избра́ннаго/ от люде́й Мои́х.

Луча́ми Богоразу́мия просвети́вся,/ и́долы попра́л еси́,/ равноапо́столе,/ Христо́ву же ве́ру/ во оте́чествии твое́м насади́л еси́.

Стих: Еле́ем святы́м Мои́м/ пома́зах его́.

Ста́до твое́ соблюди́,/ его́же ко Христо́ву позна́нию приве́л еси́,/ вели́кий кня́же Влади́мире,/ и держа́ву ру́сскую/ в ми́ре сохраня́й при́сно.

Сла́ва, и ны́не, глас 8. Самогла́сен:

Прииди́те, возра́дуемся,/ Засту́пницу ро́да на́шего воспева́юще днесь,/ Пречи́стую Де́ву Богоро́дицу,/ Е́йже вели́кий князь Влади́мир/ храм прече́стен созда́/ и десяти́ну тому́ от име́ний свои́х дая́ше,/ ему́же подража́юще,/ вме́сто десяти́ны пе́сни хвале́бныя Ей принесе́м,/ зову́ще и глаго́люще:/ Пала́то Сло́ва/ и све́тлый Черто́же всех Царя́,/ сподо́би нас, смире́нных, покро́ва Твоего́/ и бу́ди нам Помо́щница/ во спасе́ние душ на́ших.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1 -й антифо́н. На Го́споди, воззва́х: стихи́ры на 8, глас 4.

Подо́бен: Я́ко до́бля:

Вторы́й ты был еси́ Константи́н/ сло́вом и де́лом:/ он во христиа́нское вре́мя роди́ся/ и мно́га ле́та во е́ллинстве сотвори́л есть./ Ты же от варя́г роди́вся,/ но возлюби́л еси́ возлюби́вшаго тя Христа́,/ к Нему́же возше́л еси́, ра́дуяся./ Его́же моля́ не преста́й о чту́щих па́мять твою́.

Весели́тся ве́чно, све́тло сия́ющи, гора́ Сина́йская,/ Моисе́йским освяти́вшися зако́ном,/ Неви́димаго ви́девши,/ све́тло же сия́я, весели́тся и ра́дуется/ вели́кий град твой, Васи́лие,/ не я́ко во мра́це,/ но я́ко в Ду́се, Сы́на со Отце́м ви́дя в себе́ сла́вима./ Его́же моли́/ спасти́ и просвети́ти ду́ши на́ша.

Я́коже оте́ц духо́вно, царь же чу́вственно/ ру́сским лю́дем был еси́, Васи́лие:/ и́стинный же пропове́датель, я́ко апо́стол Христо́в,/ провозвести́л еси́ спаси́тельное Креще́ние/ и, тем све́тло просвети́в, освяти́л еси́ лю́ди твоя́/ во всех страна́х ца́рствия твоего́, блаже́нне.

Ко́рень правове́рия ты был еси́, Васи́лие,/ напое́н же Ду́хом Пресвяты́м,/ возрасти́вый нам ве́тви богосажде́нныя,/ цвет благоуха́ния источа́ющия,/ Бори́са чу́днаго и Гле́ба, ревни́теля благоче́стию,/ кипя́щия всем ве́рным оби́льно чудесы́./ С ни́миже предстоя́ Христу́,/ моли́ся спасти́ и просвети́ти ду́ши на́ша.

Сла́ва, глас 8:

Прииди́те, стеце́мся вси/ в честне́й па́мяти отца́ ру́сскаго/ и наста́вника на́шего Влади́мира:/ сей бо от варя́г роди́ся,/ и возлюби́ возлюби́вшаго его́ Христа́,/ к Нему́же взы́де, ра́дуяся,/ с прама́терию свое́ю Еле́ною./ Вся бо лю́ди своя́ научи́ ве́ровати/ и покланя́тися в Тро́ице еди́ному Бо́гу,/ и́долы же разруши́в, попра́/ и израсти́ нам своя́ честны́я ле́торасли,/ Рома́на и Дави́да./ Те́мже и мы, све́тло ны́не пе́сньми па́мять их ве́рно чту́ще,/ любо́вию пра́зднуем:/ да мо́лятся о нас ко Го́споду,/ во́инству на́шему пода́ти побе́ды на пога́ныя враги́,/ и умири́ти весь мир, и спасти́ ду́ши на́ша.

И ны́не, Богоро́дичен: Царь Небе́сный:

Вход. Проки́мен дне. И чте́ния.

Ца́рств тре́тиих чте́ние (глава́ 8):

Ста Соломо́н пред лице́м жертвенника Госпо́дня/ пред всем собо́ром Изра́илевым,/ и возде́в ру́це свои́ на не́бо, и рече́:/ Го́споди Бо́же Изра́илев,/ несть Бог, я́коже Ты, на небеси́ горе́ и на земли́ до́ле./ А́ще бо не́бо и не́бо небесе́ не довле́ют Тебе́,/ ка́ко дом сей, его́же созда́х и́мени Твоему́?/ Оба́че да при́зриши на моли́тву мою́, Го́споди Бо́же Изра́илев,/ услы́шати моле́ния и моли́тву, е́юже раб Твой мо́лится пред Тобо́ю к Тебе́ днесь./ Да бу́дут о́чи Твои́ отве́рсты на дом сей день и нощь,/ на ме́сто сие́, о не́мже глаго́лал еси́:/ бу́дет И́мя Мое́ та́мо, е́же услы́шати моли́тву,/ е́юже мо́лится раб Твой на ме́сте сем во дни и но́щи./ И послу́шати мольбы́ раба́ Твоего́ и люде́й Твои́х Изра́иля./ И ели́ка а́ще помо́лятся к Тебе́ на ме́сте сем,/ и Ты услы́шиши на ме́сте жили́ща Твоего́ на Небеси́,/ и сотвори́ши, и ми́лостив бу́деши им.

Проро́чества Иса́иина чте́ние (главы́ 61 и 62):

Да возра́дуется душа́ моя́ о Го́споде,/ облече́ бо мя в ри́зу спасе́ния и оде́ждею весе́лия оде́я мя,/ я́ко жениху́, возложи́ мне вене́ц,/ я́ко неве́сту, украси́ мя красото́ю./ И я́ко земля́, растя́щая цвет свой,/ и я́ко вертогра́д се́мена своя́ прозяба́ет,/ та́ко возсия́ет Госпо́дь пра́вду и ра́дость пред все́ми язы́ки./ Сио́на ра́ди не умо́лкну, и Иерусали́ма ра́ди не попущу́,/ до́ндеже у́бо изы́дет, я́ко свет, пра́вда моя́,/ спасе́ние же мое́, я́ко свеща́, разжже́тся./ И у́зрят язы́цы пра́вду твою́ и вси ца́рие зе́мстии сла́ву твою́,/ и нареку́тся и́менем твои́м но́вым, е́же Госпо́дь имену́ет е./ И бу́деши вене́ц добро́ты в руце́ Госпо́дни/ и диади́ма ца́рствия в руце́ Бо́га твоего́./ И ктому́ не нарече́шися оста́влен,/ и земля́ твоя́ ктому́ не нарече́тся пуста́,/ тебе́ бо нарече́тся во́ля моя́, и земля́ твоя́ вселе́нная,/ я́ко благоволи́т Госпо́дь в тебе́, и земля́ твоя́ насели́тся./ И я́ко живы́й ю́ноша с де́вою,/ та́ко поживу́т сы́нове твои́ с тобо́ю./ И бу́дет, и́мже о́бразом возвесели́тся жени́х о неве́сте,/ та́ко возвесели́тся Госпо́дь о тебе́.

Проро́чества Иса́иина чте́ние (глава́ 60):

Свети́ся, свети́ся, Иерусали́ме,/ прии́де бо твой свет/ и сла́ва Госпо́дня на тебе́ возсия́./ Я́ко се тьма покры́ет зе́млю, и мрак на язы́ки,/ на тебе́ же яви́тся Госпо́дь, и сла́ва Его́ на тебе́ у́зрится./ И по́йдут ца́рие све́том твои́м/ и язы́цы све́тлостию восто́ка твоего́./ Возведи́ о́крест о́чи твои́ и виждь со́бранная ча́да твоя́:/ прии́дут вси сы́нове твои́ издале́ча, и дще́ри твои́ на ра́менех во́змутся./ Тогда́ у́зриши, и возра́дуешися, и убои́шися,/ и ужа́снешися се́рдцем, егда́ преложи́т на тя бога́тство мо́ря, и язы́к, и люде́й. I И прии́дут ти стада́ велблу́д,/ и покры́ют тя велблу́ды Мадиа́мстии и Гефа́рстии,/ вси от Савы́ прии́дут, нося́ще тебе́ зла́то и лива́н,/ принесу́т тебе́ и ка́мень че́стен, и спасе́ние от Го́спода благовозвестя́т./ И вся о́вцы Кида́рския соберу́тся тебе́, и овни́ Навео́фстии прии́дут тебе́,/ и вознесу́тся прия́тная на же́ртвенник Мой,/ и дом моли́твы Моея́ просла́вится./ Ки́и суть, и́же я́ко о́блацы летя́т и я́ко го́лубие со птенцы́ свои́ми?/ Со Мно́ю есть Сио́н, Мене́ о́строви ожида́ша/ и корабли́ фарси́йстии в пе́рвых,/ е́же привести́ ча́да твоя́ издале́ча,/ и сребро́ и зла́то их с ни́ми, за И́мя Госпо́дне Свято́е/ и за е́же Свято́му Изра́илеву сла́вну бы́ти./ И сози́ждут сы́нове иноро́днии сте́ны твоя́, и ца́рие их предста́нут тебе́,/ за гнев бо Мой порази́х тя и за ми́лость Мою́ возлюби́х тя./ И отве́рзутся врата́ твоя́, Иерусали́ме, вы́ну день и нощь, и не затворя́тся,/ е́же ввести́ к тебе́ си́лу язы́ков и ца́ри их ведо́мыя./ Язы́цы бо и ца́рие, и́же тебе́ не порабо́тают, поги́бнут,/ и язы́цы запусте́нием запусте́ют./ И сла́ва Лива́нова к тебе́ прии́дет в кипари́се,/ и пе́вке, и ке́дре вку́пе,/ просла́вити ме́сто свято́е Мое́,/ и ме́сто ног Мои́х просла́влю./ И по́йдут к тебе́, боя́щеся, сы́нове смири́вших тя и прогне́вавших тя,/ и покло́нятся следа́м ног твои́х вси прогне́вавшии тя,/ и нарече́шися град Госпо́день, Сио́н Свята́го Изра́илева./ За е́же бы́ти тебе́ оста́влену и возненави́дену, и не бе помога́яй тебе́,/ и положу́ тя в ра́дость ве́чную, весе́лие родо́м родо́в./ И изссе́ши млеко́ язы́ков, и бога́тство царе́й сне́си,/ и разуме́еши, я́ко Аз Госпо́дь, спаса́яй тя/ и избавля́яй тя, Бог Изра́илев.

На лити́и стихи́ра хра́ма, та́же свята́го, глас 2:

Днесь возсия́ благочести́ваго кня́зя Влади́мира па́мять,/ я́ко ми́ро излия́нное:/ Христа́ бо возлюби́в, и́долы преоби́дев,/ це́ркви Распе́ншемуся нас ра́ди на земли́ воздви́же/ и на Небесе́х прия́т Ца́рство и вене́ц.

Вторы́й ты бысть Константи́н сло́вом и де́лом:/ научи́лся еси́ правове́рию/ и просвети́л еси́ зе́млю Ру́сскую святы́м Креще́нием/ повеле́нием возлюби́вшаго тя Бо́га./ К Нему́же взы́де, ра́дуяся,/ Его́же и моли́, Христа́, Влади́мире, непреста́нно/ о чту́щих любо́вию па́мять твою́.

Сла́ва, глас 6:

Прииди́те, стеце́мся вси ве́рно/ в честне́й па́мяти отца́ ру́сскаго,/ наста́вника на́шего Васи́лия:/ сей бо, отне́леже рожде́н бысть,/ возлюби́ возлю́бльшаго и́ Христа́,/ к Нему́же и взы́де, ра́дуяся, с прама́терию Еле́ною./ Тем и мы любе́зно пра́зднуем,/ моля́щеся моли́тися о нас ко Го́споду,/ умири́ти мир и спасти́ ду́ши на́ша.

И ны́не, Богоро́дичен: Творе́ц и Изба́витель:

На стихо́вне стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ Велича́вый ра́зум погубля́ется днесь/ и рыда́ют вся лука́вая во́инства,/ ви́дяще ветвь су́щу вседи́чну,/ си́лою Бо́жиею богонасажде́нну, и прославля́ему,/ и све́тло венчава́ему от Бо́га,/ вели́каго Васи́лия,/ на́шего ве́рнаго нача́льника.

Стих: Вознесо́х избра́ннаго/ от люде́й Мои́х.

Ди́вная чуде́с пучи́на,/ жестосе́рдия бо ра́зумом/ и́же вотще́ шата́хуся,/ от лица́ днесь Васи́лиева/ веселя́тся в честне́й Це́ркви,/ и ца́рствует Христо́с Бог,/ обре́т его́, я́ко Па́вла пре́жде,/ и поста́ви кня́зя ве́рна на земли́ Свое́й,/ просвети́вшаго лю́ди своя́ честны́м Креще́нием.

Стих: Еле́ем святы́м Мои́м/ пома́зах его́.

Ра́дуйся, ру́сская похвало́./ Ра́дуйся, ве́рным прави́телю./ Ра́дуйся, Боже́ственный Влади́мире, нача́льниче наш./ Ра́дуйся, ве́ры забра́ло./ Ра́дуйся, чу́до чудесе́м пресла́вное/ и притека́ющим приста́нище ти́хое./ Ра́дуйся, всесвяты́й ка́меню ве́ры / и моле́бниче о пою́щих тя/ и велича́ющих ве́рно.

Сла́ва, глас то́йже:

Нача́льника благоче́стия,/ и пропове́дника ве́ры,/ и князе́й ру́сских верхо́внаго,/ днесь, ру́сстии собо́ри, соше́дшеся,/ восхва́лим вели́каго Влади́мира,/ апо́столом ра́внаго,/ хвала́ми и пе́сньми духо́вными венча́ем его́, глаго́люще:/ ра́дуйся, Христо́в во́ине прехра́брый,/ я́ко томи́теля врага́ до конца́ погуби́в/ и нас от ле́сти его́ изба́вив,/ приве́л еси́ Царю́ Христу́ Бо́гу./ Но, о преблаже́нне и всехва́льне,/ мир моли́ пода́ти оте́честву на́шему/ и на пога́ныя побе́ды,/ Це́ркви благостоя́ние/ и душа́м на́шим ве́лию ми́лость.

И ны́не, Богоро́дичен: Влады́чице, приими́ моли́твы раб Твои́х:

Тропа́рь, глас 4:

Уподо́бился еси́ купцу́, и́щущему до́браго би́сера,/ славнодержа́вный Влади́мире,/ на высоте́ стола́ седя́ ма́тере градо́в, богоспаса́емаго Ки́ева:/ испыту́я же и посыла́я к Ца́рскому гра́ду уве́дети правосла́вную ве́ру,/ обре́л еси́ безце́нный би́сер – Христа́,/ избра́вшаго тя, я́ко втора́го Па́вла,/ и оттря́сшаго слепоту́ во святе́й купе́ли,/ душе́вную, вку́пе и теле́сную./ Те́мже пра́зднуем твое́ успе́ние,/ лю́дие твои́ су́ще,/ моли́ спасти́ся держа́вы твоея́ ру́сския нача́льником и мно́жеству владо́мых.

Ин тропа́рь, глас 1:

Я́ко нача́льнику Креще́ния/ и ко́реню ве́ры Боже́ственныя,/ и́долов разруши́телю,/ блаже́нне кня́же Васи́лие равноапо́стольне, вопие́м ти:/ сла́ва вразу́мльшему тя Христу́ Бо́гу,/ сла́ва освяти́вшему тя Креще́нием Свои́м,/ сла́ва просвети́вшему тобо́ю всю страну́ Ру́сскую.

Ин тропа́рь, глас 8:

Правове́рия наста́вниче/ и всея́ Руси́ просвети́телю,/ благочести́вый вели́кий кня́же Влади́мире,/ святы́м Креще́нием всех просвети́л еси́/ и це́ркви мно́ги сла́вны укра́сил еси́,/ о прему́дре Васи́лие,/ Христа́ Бо́га моли́ спасти́ся душа́м на́шим.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-й стихоло́гии седа́лен, глас 1:

Я́ко нача́льнику и ко́реню ве́ры и и́долов разруши́телю,/ блаже́нне кня́же, равноапо́стольне Влади́мире, вопие́м ти:/ моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Наста́ви нас на путь покая́ния, укло́ньшияся при́сно к безпу́тием зол/ и Преблага́го прогне́вавшия Го́спода,/ Неискусобра́чная благослове́нная Мари́е, прибе́жище отча́янных челове́ков,/ Бо́жие жили́ще.

По 2-й стихоло́гии седа́лен, глас 8:

Научи́вся неизрече́нною от Бо́га вы́шнею му́дростию,/ бога́тно к ра́зуму ве́ры Его́ дости́гл еси́ и к добро́те Его́ ско́ро прите́кл еси́./ Те́мже изъясни́л еси́ у́мныя твоя́ о́чи/ и к ра́зуму возве́л еси́ благоче́стия ве́ры./ Того́ ра́ди пра́зднующе, глаго́лем:/ благослове́н Бог, просвети́вый све́том разу́мным се́рдце твое́,/ свети́льниче све́тлый Васи́лие,/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Грехо́вный мрак покрыва́ет мя, и сту́дная моя́ дела́ без воздержа́ния вы́ну,/ и со́вестное томле́ние непреста́нно му́чит мя./ Увы́ мне, где у́бо ны́не скры́юся?/ К кому́ ли прите́к, па́ки обря́щу по́мощь?/ То́кмо к Тебе́, Богома́тери, припа́даю и молю́ся Ти:/ моли́ вы́ну спасти́ся душа́м на́шим.

Полиеле́й, та́же велича́ние:

Велича́ем тя,/ святы́й равноапо́стольный кня́же Влади́мире,/ и чтим святу́ю па́мять твою́,/ и́долы попра́вшаго/ и всю ру́сскую зе́млю святы́м Креще́нием просвети́вшаго.

По полиеле́и седа́лен, глас 4:

Ско́рое и тве́рдое стяжа́л еси́ тща́ние ко и́стинней ве́ре Христо́ве,/ и, обре́т купе́ль Богомы́сленную и духо́вную, ско́ро прите́кл еси́ любо́вию,/ скве́рну прегреше́ний очи́стив, лю́ди твоя́ освяти́л еси́./ Моли́ся Христу́ Бо́гу спасти́ся душа́м на́шим.

Сла́ва:

Ско́ро предвари́, кня́же, ве́рных наста́вниче:/ врази́ бо ху́лят и претя́т нам, Христо́в уго́дниче./ Погуби́ ве́рою твое́ю борю́щияся с на́ми,/ да навы́кнут и ти́и сла́вити твою́ па́мять,/ нас же, пою́щих тя, спаса́й от вся́каго гне́ва.

И ны́не, Богоро́дичен:

Сло́во О́тчее, Христа́ Бо́га на́шего,/ от Тебе́ воплоти́вшагося позна́хом, Богоро́дице Де́во,/ еди́на Чи́стая, еди́на Благослове́нная,/ тем, непреста́нно Тя воспева́юще, велича́ем.

Та́же степе́нна, 1-й антифо́н 4-го гла́са. Проки́мен, глас 4: Вознесо́х избра́ннаго/ от люде́й Мои́х. Стих: И́бо рука́ Моя́ засту́пит его́ и мы́шца Моя́ укрепи́т его́. Вся́кое дыха́ние: Ева́нгелие от Иоа́нна, зача́ло 36.

По 50-м псалме́ стихи́ра, глас 8:

Апо́столом ревни́теля Влади́мира,/ преблаже́ннаго отца́ и учи́теля, соше́дшеся, восхва́лим,/ и́мже Христа́ Бо́га позна́хом/ и, от тьмы к све́ту приближа́ющеся,/ о́чи и сердца́ просвеща́ем,/ в па́мять его́ ликовству́юще, ку́пно весели́мся,/ обре́тше его́ вожда́ правове́рна в Ца́рствие Небе́сное.

Кано́н Богоро́дицы со ирмосо́м на 6: Мно́гими содержи́мь напа́стьми: пи́сан сего́ ме́сяца в 5-й день. И свята́го два кано́на на 8. Кано́н, глас 8.

Песнь 1

Ирмо́с: Посе́ченый несеко́маго пресече́,/ и ви́де со́лнце зе́млю, ю́же не ви́де;/ лю́таго врага́ вода́ потопи́,/ и непроходи́мое про́йде Изра́иль./ Песнь же воспева́шеся:/ Го́сподеви пои́м, сла́вно бо просла́вися.

Собезнача́льное Сло́во Бо́жие, И́же дре́вле четы́рем стихи́ям Творе́ц/ и те́ми весь мир сотвори́вый, свя́занную страстьми́ ду́шу мою́ разреши́,/ я́ко да воспою́, лику́я, сла́внаго кня́зя Васи́лия.

От выспрь соше́д, Влады́ко, невеще́ственно на духо́вную го́ру,/ свы́шше прося́щим от Тебе́ оби́льну све́тлость душа́м посли́/ достодо́лжно похваля́ти чу́днаго кня́зя Васи́лия.

Богоро́дичен: Ма́терем и де́вам похвала́ Ты, Влады́чице,/ ро́ждшая Жизнь, Творца́ ми́рови, ма́терских же боле́зней не ощути́ла еси́,/ но Ма́ти у́бо и Де́ва пребыла́ еси́./ Те́мже, хва́ляще Тя, ра́дуйся, вопие́м Ти.

Други́й кано́н, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

Прииди́те, ве́рнии, песнь духо́вную возопие́м и просла́вим Христа́,/ И́же све́тло просла́вил есть честна́го Влади́мира, вели́каго кня́зя.

И́же се́мя се́ющему да́руя,/ Ты и мне да́руй сло́во, Да́телю благи́х,/ разреша́я ми соу́з язы́ка, и обновя́, Спа́се, к славословле́нию ве́рно.

И́же во́лею, а не нуждею к Тебе́ всех призыва́еши,/ я́коже дре́вле Моисе́я и Иса́ию,/ та́кожде и ны́не в се́рдце возгласи́л еси́ ве́рнаго и достохва́льнаго кня́зя.

Богоро́дичен: Укра́шена добро́тою доброде́телей, Богома́ти Чи́стая,/ Бо́га и́стинннаго зачала́ еси́,/ нас Боже́ственнымн доброде́тельми просвети́вшаго.

Катава́сия: Отве́рзу уста́ моя́:

Песнь 3

Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разширя́шася на враги́ моя́ уста́ моя́,/ возвеселя́хся о спасе́нии Твое́м.

Я́ко труба́ богогла́сная, возгласи́ язы́к твой, блаже́нне, духо́вный,/ провозглаша́яй всем конце́м земли́ ру́сския Христо́во правове́рное Креще́ние,/ и́мже просвеще́н быв, мир весь просвети́л еси́.

Сия́ет днесь, Васи́лие, пресла́вная па́мять твоя́,/ ю́же пра́зднуют христоимени́тии лю́дие,/ тебе́ похваля́юще, своего́ пра́отца,/ и́хже к све́ту разу́мному приве́л еси́.

Богоро́дичен: Сень зако́на пре́йде рождество́м Твои́м, Богоро́дице, благода́ти прише́дши,/ О́тчу Сло́ву, Христу́ Бо́гу на́шему,/ Его́же позна́в, сла́вный князь Це́рковь Твою́ све́тло украси́л есть.

Ин

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

И́же Па́вла просвети́вый и избра́нна сотвори́вый,/ та́ко и Васи́лия ны́не, о́тца ру́сскаго, очны́й неду́г отто́ргнул еси́, Ми́лостиве,/ Твои́м Креще́нием.

Константи́на ве́рнаго подо́бник яви́лся еси́, Христа́ в се́рдцы твое́м прии́м,/ и Его́ за́поведем, я́коже апо́стол, всю зе́млю ру́сскую научи́л еси́.

Боже́ственною си́лою ты возмога́я безбо́жнаго Перу́на, ку́чу бесо́вскую сокруши́л еси́/ и, ко о́паши ко́нстей того́ привяза́в,/ повеле́л еси́ во́ином разби́ти и́дола.

Богоро́дичен: Сень святу́ю обре́т, Мари́ю Де́ву,/ Бо́жий сосу́д, Влади́мир, князь вели́кий, апо́стола Па́вла ревни́тель,/ сей це́рковь Боже́ственную в Тоя́ и́мя воздви́гл есть.

Ин конда́к, глас 8:

Изря́дному воево́де и правове́рному,/ благода́рственная воспису́ет ти вся Русь, Васи́лие, иму́щи тя нача́льника и засту́пника,/ я́ко изба́вил еси́ нас от вся́кия скве́рны и ле́сти, те́мже ти вопие́м:/ ра́дуйся, вели́кий кня́же Влади́мире преблаже́нне.

Ин конда́к, глас 4:

Оте́ческу пре́лесть, и́долы, я́ко су́етни, отве́рг,/ Христа́, всех и́стиннаго Бо́га, Царя́ и Благода́теля, позна́л еси́./ Те́мже и лю́ди, изря́дны Тому́, святы́м Креще́нием просвети́л еси́,/ пресла́вне Влади́мире./ Сего́ ра́ди почита́ем тя,/ я́ко Тро́ице служи́теля,/ Христа́ моли́ дарова́ти нам ве́лию ми́лость.

Ин и́кос:

И́же от тьмы нече́стия уклони́лся еси́/ и невече́рняго Сия́ния, Христа́, дости́гл еси́,/ отню́дуже и омраче́нныя безбо́жием Боже́ственною любве́ ба́нею освяти́л еси́,/ Тро́ицу сла́вити во Еди́нем Божестве́ пресве́тло научи́л еси́, всеблаже́нне Влади́мире./ Но, я́ко име́я дерзнове́ние к Бо́гу,/ многообра́зных зол изба́витися нам Христа́ моли́/ и дарова́ти нам ве́лию ми́лость.

Седа́лен, глас 2:

В моли́твах бдяй при́сно ра́достною душе́ю, Васи́лие,/ того́ ра́ди поче́рпл еси́ Ду́ха прему́дрости от исто́чника, сходя́щаго свы́ше./ Тем ве́рою просия́в, я́ко со́лнце, моля́ся Христу́ непреста́нно,/ ускори́, Ще́дрый, и потщи́ся спасти́ от прегреше́ний мир.

Сла́ва, и ны́не, Богоро́дичен:

Богоро́дице Безневе́стная Чи́стая, я́же без се́мене ро́ждшая всех Влады́ку,/ Того́ со А́нгелы моли́ изба́витися нам от вся́каго недоуме́ния/ и да́ти умиле́ние и свет душа́м на́шим/ и согреше́ний очище́ние, я́же еди́на вско́ре заступа́ющи.

Песнь 4

Ирмо́с: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Твое́й, сла́ва снизхожде́нию Твоему́.

Све́тло бысть и сла́дко по о́блаце, и́мже покрыва́шеся Небе́сное со́лнце;/ весела́ же и ра́достна весна́ по зи́мней ско́рби;/ ты же по о́блаце и́дольскаго мра́ка/ Креще́нием, я́ко со́лнце све́тлое, возсия́л еси́ нам, Васи́лие.

Па́вел фарисе́й, к Дама́ску грядый,/ ма́лым блеща́нием вели́каго Све́та ослепле́н, Креще́нием же просвети́ся,/ ему́же ты подо́бник был еси́, сла́вне,/ Корсу́ня доше́д, очны́й мрак отгна́л еси́.

Богоро́дичен: Ты яви́лася еси́, Де́во, ко́рень ненапое́н, прозяба́я отпуще́ние,/ плод светоно́сный ро́ждши, Христа́ Бо́га на́шего;/ дря́хлующую страстьми́ ду́шу мою́ просвети́/ и испроси́ грехо́в оставле́ние.

Ин

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Чу́до стра́шное, и пресла́вное, и неизглаго́ланное соверша́ет Влады́ка Христо́с:/ обновля́ет бо Боже́ственным Креще́нием всю ру́сскую зе́млю/ и просвеща́ет кня́зя Васи́лия.

Све́тло прииди́те и достоле́пно возгласи́те,/ сы́нове ру́сстии, ко отцу́ на́шему Влади́миру,/ и па́мять его́ ве́рно вси да пра́зднуем све́тло.

О́тчее нече́стие отгна́л еси́,/ всечестны́я же твоея́ прамя́тере правове́рную ве́ру возлюби́л еси́,/ ра́вне апо́столом Христо́вым, кня́же вели́кий Влади́мире.

Богоро́дичен: Я́ко дверь, приводя́щую к Боже́ственному вхо́ду рая́ све́тлаго,/ я́ко мы́сленное ме́сто свяще́ния,/ я́ко добро́ту Иа́ковлю, Де́ву ублажа́ем.

Песнь 5

Ирмо́с: Го́споди Бо́же наш, мир даждь нам,/ Го́споди Бо́же наш, стяжи́  ны,/ Го́споди, ра́зве Тебе́, ино́го не ве́мы,/ и́мя Твое́ имену́ем.

Ра́дуйся и красу́йся ду́хом, ру́сский царю́ Васи́лие,/ изря́дныя бо ве́тви богоса́дныя ко Христу́ прине́сл еси́,/ богоизря́дный твой плод, Бори́са сла́внаго и Гле́ба благочести́ваго,/ с ни́миже предстоя́ Христу́, о нас моли́ся.

Ди́вный прорече́ Иса́ия на Иерусали́м:/ бу́дет я́ве гора́ Госпо́дня и дом на верх гор./ Пра́ведне же на тебе́ разуме́хом благода́ть Ду́ха:/ дом бо Влады́це созда́л еси́ на версе́х гор.

Богоро́дичен: Пропове́дует о Тебе́ чу́дный Иса́ия Ду́хом,/ Де́вою хотя́щу роди́ти Христа́ без се́мене,/ Дави́д же, Твой пра́дед, ди́вно провозвести́ Твоя́ вели́чествия:/ спасе́ бо нас, я́ко Ми́лостив.

Ин

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Днесь А́нгели Бо́жии ра́дуются све́тло на Небесе́х в па́мять твою́ святу́ю:/ спасл бо еси́ нас от вся́каго лука́вства/ и жертв бесо́вских лю́ди мно́ги изба́вил еси́ и всю зе́млю ру́сскую.

Рыда́ет бесо́вское мно́жество и те́мное собо́рище,/ ви́дяще на земли́ попира́емы и́долы, и́же на поги́бель воздви́женныя челове́ком,/ и́хже Бо́жиим повеле́нием, Васи́лие, сокруши́л еси́.

Ра́дуйся и весели́ся, ра́бе Христо́в,/ кня́же вели́кий и му́дрый, моле́бниче о душа́х на́ших:/ тобо́ю бо мы вси изба́влени есмы́ бесо́вския ле́сти./ Те́мже – ра́дуйся – вопие́м ти.

Богоро́дичен: Чистото́ю сия́ющи издале́ча,/ Боже́ственное угото́вание Влады́чне, Всепе́тая, бы́вши:/ Ты бо еди́на показа́лася еси́ Ма́ти су́щи Бо́гу/ и рука́ми я́ко Младе́нца Того́ носи́вши.

Песнь 6

Ирмо́с: Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на, та́ко вопию́ Ти:/ возведя́ от тли живо́т мой, Благоутро́бне Го́споди.

Благоче́стия ревни́тель сла́внаго царя́ Константи́на ты был еси́, Васи́лие,/ просвети́вшаго Креще́нием е́ллинский род,/ ты же духо́вною ба́нею лю́ди твоя́ пресве́тло обнови́л еси́.

Ослади́в любо́вию Христо́вою ду́шу и разу́мныя прие́м криле́,/ прелете́л еси́ и́дольский мрак и разгна́л еси́ тьму злове́рия, блаже́нне,/ всели́вся в черто́г Спа́са всех Бо́га.

Богоро́дичен: Благоду́шствует Це́рковь ру́сская днесь и правове́рных собо́ри/ в па́мять пресве́тлую Васи́лия, ублажа́юще Твое́ безсе́менное рождество́, Де́во,/ и, приле́жно Сы́ну Твоему́ моля́щеся, зову́т:/ Тя велича́ем.

Ин

Ирмо́с: Жите́йское мо́ре,/ воздвиза́емое зря напа́ стей бу́рею,/ к ти́хому приста́нищу Твоему́ прите́к, вопию́ Ти:/ возведя́ от тли живо́т мой,/ Многоми́лостиве.

Си́лою Бо́жиею попра́н есть сатана́ душегу́бец и ле́стныя его́ же́ртвы:/ побе́дника бо яви́л нам есть Христо́с, Васи́лия, ве́рнаго кня́зя,/ сокруши́ти и поврещи́ того́ под но́ги на́ша.

Спасе́ пре́жде Госпо́дь руко́ю Моисе́овою Изра́иля от рабо́ты,/ То́йже и ны́не руко́ю Васи́лия, ве́рнаго кня́зя,/ всех нас от ле́сти и́дольския спасл есть.

Досто́йно ти взыва́ем и вопие́м вси:/ ра́дуйся, всече́стне преблаже́нне, тя бо изба́вителя с Бого́м, Васи́лие, и́мамы./ Не пре́зри рабо́в твои́х, но при́сно сохраня́й нас.

Богоро́дичен: Обрето́хом, Пречи́стая, Тобо́ю спасе́ние, Де́во Препе́тая:/ Его́же жела́ют А́нгели на Небесе́х ви́дети,/ Сей ны́не ви́дится в не́дрех Твои́х Младе́нец, Бог наш.

Конда́к, глас 8:

Подо́бствовав вели́кому апо́столу Па́влу, в седи́нах, всесла́вне Влади́мире,/ вся, я́ко младе́нческая, мудрова́ния, я́же о и́долех тща́ния, оста́вль,/ я́ко муж соверше́нный, украси́лся еси́ Боже́ственнаго Креще́ния багряни́цею,/ и ны́не, Спа́су Христу́ в весе́лии предстоя́,/ моли́ спасти́ся держа́вы ру́сския нача́льником и мно́жеству владо́мых.

И́кос:

Просвети́вый дре́вле Изра́иля Моисе́йским зако́ном,/ просвети́л же еси́ мир явле́нием Твоего́ прише́ствия, Христе́ Бо́же,/ богогла́сныя Твоя́ ученики́ посла́л еси́ пропове́дати по страна́м/ е́же от Де́вы безсе́менное рождество́ Твое́/ и тем повеле́л еси́ крести́ти во И́мя Отца́, и Сы́на, и Свята́го Ду́ха./ Обветша́вшу же ви́дя страну́ ру́сскую грехо́м,/ Дух Твой посла́л еси́ в крепкоразу́мнаго ду́шу сла́внаго Влади́мира,/ позна́ти Тебе́, Еди́наго от Тро́ицы Христа́ Бо́га,/ и Твои́м Креще́нием просвети́ти избра́нныя Твоя́/ и от Тебе́ поруче́нныя ему́ лю́ди, и привести́ к Тебе́ ве́рою вопию́щия:/ изба́ви Твое́ достоя́ние от сопроти́вных пога́н,/ру́сския нача́льники и мно́жество владо́мых.

Песнь 7

Ирмо́с: Халде́йския пе́щи/ всепа́губную си́лу угаси́вше/ о́бразом А́нгела снизше́дшаго,/ Зижди́телю ю́ноши взыва́ху:/ благослове́н еси́ и хва́льный, Бо́же оте́ц на́ших.

Пра́отчи богоистка́нныя мя ри́зы враг душегу́бец обнажи́л есть,/ Иису́с же Безнача́льный, явле́йся пло́тию, очи́стив водо́ю Ду́ха, па́ки мне подаде́ ю,/ Его́же позна́в, сла́вне Влади́мире, весели́шися, вопия́:/ благослове́н Бог оте́ц на́ших.

Моисе́йский сохрани́в зако́н, Дании́л Боговиде́ния сподо́бися;/ пра́отеческия же ты попра́в и́долы,/ не я́ко во мра́це, но в бо́льшей сла́ве, разу́мно узре́л еси́ Христа́ со Отце́м и Ду́хом,/ Креще́нием же просвеще́н, весели́шися, вопия́:/ благослове́н Бог оте́ц на́ших.

Богоро́дичен: Боже́ственныя обнажи́ оде́жды враг, прельсти́в первозда́ннаго пра́деда Твоего́, Де́во,/ из боку же Твое́ю чи́стою и неискусобра́чною прише́д Спас, сла́дкий мой Иису́с,/ на Него́же поте́к, а́ки на Ада́ма, но о Бо́га образи́ся и сокруши́ся лю́те./ Мы же Сы́ну Твоему́ зове́м:/ благослове́н Бог оте́ц на́ших.

Ин

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Еле́ны ты но́выя любо́вию извести́лся еси́, внук быв преблаже́нныя О́льги,/ Константи́н же Вели́кий но́вый яви́лся еси́, Христу́, Васи́лие, вопия́:/ благослове́н еси́, Бо́же оте́ц на́ших.

Лю́тый льстец двиза́шеся на христиа́ны воева́ти,/ Превели́кий же Госпо́дь в Корсу́не тя просвеща́ет,/ и Креще́нию Боже́ственному сподобля́ет,/ и Ца́рствие Небе́сное тебе́ дарова́л есть.

Обветша́вшую лесть бесо́вскую прогна́л еси́, я́ко вели́кий Христо́в учени́к,/ обнови́в, просвети́л еси́ всех нас вопи́ти Го́сподеви немо́лчно:/ благослове́н Бог оте́ц на́ших.

Богоро́дичен: От родо́в Тя всех избра́л есть Бог Преве́чный пре́жде век/ и, в после́дния дни плоть прие́м от Тебе́,/ соверше́н вку́пе яви́ся Бог и Челове́к, Присноде́во.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

Род пра́ведных благослови́тся, Боже́ственная веща́ша уста́, е́же на тебе́ сбы́стся, блаже́нне:/ се́мя бо святоле́пное и богоизбра́нное прине́сл еси́ Христу́,/ непобеди́мыя му́ченики, и́ми же просвети́л еси́ зе́млю ру́сскую,/ и́хже похваля́юще с тобо́ю, превозно́сим Христа́ во ве́ки.

Ма́ти всех градо́в вои́стинну ца́рства твоего́ град яви́ся Ки́ев,/ в не́мже Христо́с пре́жде со Отце́м и Ду́хом просла́вися/ твое́ю прама́терию и тобо́ю, блаже́нне,/ иде́же му́жественное твое́ те́ло лежи́т све́тло в це́ркви Влады́чицы,/ мы же, лю́дие твои́, хва́ляще, пое́м Христа́ во ве́ки.

Богоро́дичен: Безнача́льное сия́ние и Сло́во О́тчее пропове́даша нело́жно проро́честии гла́си,/ из Тебе́ хотя́щаго без тли роди́тися Емману́ила,/ Бо́га же и Челове́ка, кре́пкое язы́ков ча́яние,/ Ему́же я́ко Ма́ти моли́ся спасти́ся нам.

Ин

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

От безбо́жных и́долов всех нас изба́вил еси́,/ ко Христу́ же Бо́гу приве́л еси́, о́тче, ве́рных князе́й,/ наказа́теля стад твои́х, Христа́ пою́щих во ве́ки.

Константи́н но́вый ты извести́лся еси́ во всей ру́сстей земли́, блаже́нне Васи́лие:/ ты бо и́мя Христо́во изъясни́л еси́,/ Его́же превозно́сим во ве́ки.

Царю́ ве́чному ны́не ты предстои́ши и десни́цею Его́ венча́н еси́,/ моли́ся Ему́ за недосто́йныя рабы́ твоя́,/ я́ко да пое́м Его́ и превозно́сим во ве́ки.

Богоро́дичен: О́блак Сло́ва Ты еси́, Препе́тая, и свеща́ со́лнечная,/ колесни́ца многоце́нная, деви́ческое возвыше́ние, гора́ ту́чная и усыре́нная,/ пребыва́еши Пречи́стая Де́ва Господоимени́тая.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Богяви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Дави́д обре́теся пре́жде Изра́илю держа́вный царь и лю́ди спасе́,/ бо́ги иноязы́чныя низложи́в, Ду́хом Бо́жия Сы́на пропове́да;/ ты же в Тро́ице позна́л еси́ Бо́га, блаже́нне Васи́лие, Его́же велича́ем.

Да торжеству́ют днесь ве́село па́мять твою́/ святоле́пно в це́ркви Бо́жия Ма́тере богоизбра́ннии лю́дие, ю́же любе́зно украси́л еси́,/ в па́мять ве́чную твоего́ преставле́ния, не́бо земно́е,/ в не́мже почива́я, ожида́еши всестра́стныя трубы́ Арха́нгеловы, блаже́нне./ Тем тя при́сно велича́ем.

Богоро́дичен: Ду́хом Боже́ственным распала́еми, вси ро́ди, любо́вию блажи́м Тя, Богоро́дице:/ Ты бо кля́тву прама́тере разруши́ла еси́./ Приле́жно же пое́м Бо́жия Сло́ва,/ Того́ бо, неопа́льно во чре́ве Твое́м прие́мши, родила́ еси́ пло́тию./ К Нему́же моли́ся,/ изба́витися ве́рному Твоему́ ста́ду от вся́кия ну́жды и печа́ли.

Ин

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Сла́док, я́коже фи́никс высо́к израща́емь,/ и, цвет творя́ ма́сличный, ве́тви многопло́дныя,/ ты быва́еши ви́нное израще́ние, ки́сти две созре́лы – му́ченики принося́,/ Рома́на и Дави́да честны́я.

Ли́цы князе́й ны́не благоро́дных предстоя́т,/ от Тебе́ благоче́стие нося́ще, с людьми́ ве́рными хва́ляще тя:/ наста́вниче и ско́рый засту́пниче, помина́й всех нас,/ я́ко да в ми́ре тобо́ю живо́т обря́щем.

Лю́дие ру́сстии, прииди́те, сни́дитеся в честне́й це́ркви Влади́мира свята́го,/ нарече́ннаго Васи́лия, преблаже́ннаго вели́каго кня́зя, уго́дника Христо́ва пресла́внаго,/ и приими́те живо́т и спасе́ние, благода́ть и ве́лию ми́лость.

Богоро́дичен: Бо́га, Де́во, Ты родила́ еси́ на земли́,/ во пло́ти соедине́ние бысть Безпло́тное,/ во еди́ней Ипоста́си и во двою́ естеству́,/ да спасе́т всех нас, кла́няющихся ве́рно, я́ко Богоро́дице Пречи́стей.

Свети́лен.

Подо́бен: Жены́, услы́шите:

Свети́льницы, просвети́вше вселе́нную всю благоче́стием и ве́рою,/ вы яви́стеся вои́стинну, боговенча́нне Влади́мире с прама́терию Еле́ною сла́вною./ Вас возлюби́вшаго Христа́ и мы славосло́вим, ди́внаго во святы́х.

Сла́ва: В Руси́ днесь учи́тель яви́ся, Христо́ву Правосла́вную ве́ру возлюби́в,/ изъя́т лю́ди своя́ от тьмы неве́дения и приведе́ ко све́ту Богоразу́мия./ Сего́ ра́ди показа́ся наста́вник и нача́льник Бо́жия благода́ти.

И ны́не, Богоро́дичен:

Во двою́ во́лю и естеству́, Пренепоро́чная,/ во еди́ной же Ипоста́си ражда́еши Бо́га неизрече́нно,/ нас ра́ди обнища́вшаго до распя́тия хоте́нием/ и дарова́вшаго нам бога́тство Боже́ственное, Богома́ти Де́во.

На хвали́тех стихи́ры на 4, глас 4.

Подо́бен: Дал еси́ зна́мение:

Ору́жие кре́пкое/ кня́зю на́шему дал еси́, Го́споди,/ Крест Твой честны́й,/ и́мже поживе́ на земли́ пра́ведно,/ просия́в благоче́стием,/ и Ца́рству Небе́сному сподо́бися милосе́рдием Твои́м./ Те́мже Твое́ человеколю́бное смотре́ние сла́вим,/ Иису́се Всеси́льне,/ Спа́се душ на́ших.

Дал еси́, Человеколю́бче,/ благочести́вому Твоему́ уго́днику/ Соломо́нову му́дрость, Дави́дову кро́тость/ и апо́стольское правосла́вие,/ я́ко царе́й Царь и госпо́дствующих всех Госпо́дь./ Те́мже Твое́ человеколю́бное смотре́ние сла́вим,/ Иису́се Всеси́льне,/ Спа́се душ на́ших.

Пе́рвый повину́л еси́ багряни́цу,/ приснопо́мнимый кня́же, во́лею Христу́,/ Того́ позна́в Бо́га/ и я́ко Царя́ всех Благоде́теля,/ побе́ды творя́ вся́кому нача́лу/ и вла́сти належа́щим./ Отсю́ду тебе́, христолю́бче, ца́рство испра́вил есть/ Иису́с Человеколю́бец,/ Спас душ на́ших.

Сла́ва, глас 2:

Не от челове́к зва́ние прия́л еси́,/ но я́ко чу́дный Па́вел,/ прия́л же па́че, сла́вне, сие́ свы́ше,/ Влади́мире апо́столе, от Христа́ Бо́га./ И́бо зна́мением Креста́ огради́вся/ и тем уловле́н быв,/ я́ко предо́брая лови́тва,/ сим победи́тель на ви́димыя и неви́димыя враги́ яви́лся еси́ непобеди́м./ Те́мже мо́лим тя,/ я́ко моли́твенника те́пла, земноро́днии,/ по достоя́нию па́мять твою́ почита́юще,/ со дерзнове́нием проси́ти нам просвеще́ние, и очище́ние,/ и ве́лию ми́лость.

И ны́не, Богоро́дичен. Славосло́вие вели́кое. И отпу́ст.

НА ЛИТУРГИ́И

Блаже́нны от обою́ кано́нов: 1-го Песнь 3-я и 2-го Песнь 6-я. Проки́мен, глас 3: По́йте Бо́гу на́шему, по́йте,/ по́йте Царе́ви на́шему, по́йте. Стих: Вси язы́цы, восплещи́те рука́ми, воскли́кните Бо́гу гла́сом ра́дования. Апо́стол к Гала́том, зача́ло 200. Аллилуия, глас 6: Вознесо́х избра́ннаго от люде́й Мои́х. Стих: И́бо рука́ Моя́ засту́пит его́ и мы́шца Моя́ укрепи́т его́. Ева́нгелие от Иоа́нна, зача́ло 35, от полу́. Прича́стен: В па́мять ве́чную бу́дет пра́ведник:

Моли́тва

О вели́кий и пресла́вный уго́дниче Бо́жий, богоизбра́нный и богопросла́вленный, равноапо́стольный кня́же Влади́мире, свято́е и великоде́йственное ору́дие всеблага́го Про́мысла о спасе́нии наро́да ру́сскаго! Ты отри́нул еси́ злове́рие и нече́стие язы́ческое, уве́ровал еси́ во Еди́наго И́стиннаго Триипоста́снаго Бо́га и, восприя́в свято́е Креще́ние, просвети́л еси́ све́том Боже́ственныя ве́ры и благоче́стия страну́ ру́сскую. Сла́вяще у́бо и благодаря́ще Премилосе́рдаго Творца́ и Спаси́теля на́шего, сла́вим и благодари́м и тя, вели́кий па́стырю и о́тче наш, я́ко тобо́ю позна́хом спаси́тельную ве́ру Христо́ву и крести́хомся во Имя Пресвяты́я и Пребоже́ственныя Тро́ицы, то́юже ве́рою изба́вихомся от пра́веднаго осужде́ния Бо́жия, ве́чнаго ра́бства диа́воля и а́дова мучи́тельства, то́ю ве́рою восприя́хом благода́ть всыновле́ния Бо́гу и наде́жду насле́дования Небе́снаго блаже́нства. Ты еси́ перве́йший наш вождь к Нача́льнику и Соверши́телю на́шего ве́чнаго спасе́ния, Го́споду Иису́су Христу́, ты еси́ ближа́йший предстоя́тель пред Престо́лом Царя́ ца́рствующих и те́плый моли́твенник и хода́тай о стране́ на́шей и о всех лю́дех, ты еси́ перве́йший вино́вник благослове́ний и ми́лостей Бо́жиих, почива́ющих на нас. И что еще́ рече́м? Не мо́жет язы́к наш изобрази́ти вели́чие и высоту́ благодея́ний твои́х, излия́нных на нас, недосто́йных. Но, о неразу́мия и ослепле́ния на́шего! Прие́мше толи́кая благодея́ния, ни во что же вмени́хом я́ и отщети́хомся спаси́тельных плодо́в их. Омы́вшеся бо от греха́ в купе́ли Креще́ния и обле́кшеся в оде́жду чистоты́ и неви́нности, оскверни́хом сию́ богода́нную оде́жду сту́дными дея́нии и помышле́нии на́шими. Отре́кшеся сатаны́ и а́нгелов его́, па́ки порабоща́емся ему́, служа́ще и́долом страсте́й на́ших, ми́ру, пло́ти и злым обы́чаем ве́ка. Сочета́вшеся Христу́, вы́ну оскорбля́ем Его́ беззако́нии на́шими, многообра́зными я́звами го́рдости, за́висти, зло́бы, злосло́вия, невоздержа́ния и презо́рства ко Святе́й Це́ркви. Прилепи́хомся всеце́ло к су́етным бла́гом, а́ки мня́ще во ве́ки пребыва́ти на земли́, не помышля́ем о Не́бе, о души́, о сме́рти, о Суде́, о несконча́емей ве́чности. Сего́ ра́ди воздвиза́ем на ся пра́ведный гнев и осужде́ние Бо́жие, ку́пно же оскорбля́ем и преогорчева́ем твою́ о́тчую любо́вь и попече́ние о нас, ты бо просвети́л еси́ нас святы́м Креще́нием, во е́же спосо́бствовати нам к получе́нию Небе́снаго блаже́нства и земна́го благоде́нствия, мы же, неразу́мнии, злым произволе́нием на́шим са́ми себе́ подверга́ем а́довым му́кам и вре́менным бе́дствиим! Но, о всеблаги́й о́тче и просвети́телю наш, ми́лостив бу́ди к на́шим не́мощем, долготерпели́в ко грехо́м и непра́вдам на́шим, умоли́ Премилосе́рдаго Царя́ Небе́снаго, да не прогне́вается на ны зело́ и не погуби́т нас со беззако́ньми на́шими, но да поми́лует и спасе́т нас, и́миже весть судьба́ми. Да всади́т в сердца́ на́ша спаси́тельный страх Свой, да просвети́т Свое́ю благода́тию ум наш, во е́же узре́ти нам бе́здну поги́бели, в ню́же стреми́мся, оста́вити стези́ нече́стия и заблужде́ний, обрати́тися же на путь спасе́ния и и́стины, неукло́нно исполня́ти за́поведи Бо́жии и уста́вы Святы́я Це́ркве. Моли́, благосе́рде, Человеколю́бца Бо́га, да яви́т нам вели́кую ми́лость Свою́, да изба́вит нас от наше́ствия иноплеме́нников, от вну́тренних нестрое́ний, мяте́жей и раздо́ров, от гла́да, смертоно́сных боле́зней и от вся́каго зла, да пода́ст нам благорастворе́ние возду́ха и плодоно́сие земли́, да сохрани́т в су́дящих и нача́льствующих пра́вду и ми́лость, да даст духо́вным па́стырем непоро́чность жития́ и ре́вность о спасе́нии пасо́мых, всем же лю́дем усе́рдие в исполне́нии свои́х обя́занностей, взаи́мную любо́вь и единомы́слие, стремле́ние ко бла́гу оте́чества и Святы́я Це́ркве. Да распространи́т свет спаси́тельныя ве́ры в стране́ на́шей, во всех конце́х ея́, да обрати́т к правове́рию неве́рующих, да упраздни́т вся е́реси и раско́лы, да, та́ко пожи́вше в ми́ре на земли́, сподо́бимся с тобо́ю ве́чнаго блаже́нства, хва́ляще и превознося́ще Бо́га во ве́ки веко́в. Ами́нь.

И́на мо́литва

Ка́ко похва́лим тебе́, в земны́х влады́ках прему́жественный, Влади́мире? Ка́ко ти благодаре́ние воздади́м, я́ко тобо́ю позна́хом Го́спода и ле́сти и́дольския избы́хом, я́ко твои́м повеле́нием по всей земли́ Христо́с сла́вится? Ка́ко ве́ровал еси́? Ка́ко взыска́л еси́ Христа́? Пове́ждь нам, рабо́м твои́м, отку́ду ти припахну́ воня́ Свята́го Ду́ха? Не ви́дел еси́ Христа́, ни ходи́л еси́ по Нем, ка́ко учени́к Его́ обре́теся? Не ви́дел еси́ апо́стола, прише́дша в зе́млю твою́, не ви́дел бе́сы изгоня́юща И́менем Христо́вым, боля́щих исцеля́юща, ме́ртвых воскреша́юща. Ди́вное чу́до! И́нии ца́рие и власти́телие, ви́дяще вся сия́, быва́юща от святы́х муж, не ве́роваша, но па́че на стра́сти и му́ки преда́ша их, ты же, о блаже́нне, не ви́дя и не слы́ша всех сих, прите́кл еси́ ко Христу́, разуме́в, я́ко Еди́н есть Творе́ц неви́димым и ви́димым, Небе́сным и земны́м, и я́ко посла́ в мир, на́шего ра́ди спасе́ния, Возлю́бленнаго Своего́ Сы́на. И сия́ помы́слив, вшел еси́ во святу́ю купе́ль.

И ны́не, проте́кшим ты́сящи ле́том от Креще́ния Руси́, при́зри на зе́млю твою́ ви́ждь ча́да твоя́. Виждь лю́ди твоя́, ка́ко живу́т, ка́ко храни́ми суть Го́сподем, ка́ко благове́рие храня́т по преда́нию твоему́, ка́ко сла́вят Христа́, ка́ко покланя́ются Имени Его́. Виждь и гра́ды, вели́чеством сия́ющия, виждь це́ркви цвету́щия, виждь христиа́нство расту́щее, виждь и град твой Ки́ев, толи́кими уго́дники Бо́жиими, во нетле́нии почива́ющими, блиста́ющийся, и фимиа́мом облагоуха́ем, и хвала́ми и боже́ственными пе́нии святы́ми оглаша́ем. И сия́ вся ви́дев, возра́дуйся и возвесели́ся и похвали́ Блага́го Бо́га, всем сим Строи́теля.

Ви́дя, я́ко твое́ ве́рное се́яние твои́м хода́тайством и заступле́нием не изсуше́но бысть зно́ем неве́рия, но дожде́м Бо́жия поспеше́ния расположено́ бысть многопло́дне, ра́дуйся ду́хом, во влады́ках апо́столе, не ме́ртва́я телеса́ воскреси́вый, но душе́ю ны, ме́ртвыя, воскреси́в! Ра́дуйся, уте́шителю наш и наста́вниче благове́рия! Ты бе, о честна́я главо́, наги́м одея́ние, а́лчным корми́тель, жа́ждущим утро́б охлажде́ние, вдови́цам помо́щник, стра́нным поко́ище, оби́димым засту́пник, убо́гим обогаще́ние.

Сим благи́м дело́м на Небесе́х возме́здие прие́мля и зре́ния сла́дкаго лица́ Бо́жия насыща́яся, не преста́й моля́ся о земли́ твое́й и о ча́дех, в них же благове́рно влады́чествова, да сла́вится в земли́ на́шей вы́ну правове́рие и да не оста́вит нас Госпо́дь, а́ще и еще́ блужда́ем, толи́ким веко́м проте́кшим, а́ще и еще́ согреша́ем Го́споду и Влады́ке на́шему, а́ки новоку́пленнии раби́, во всем неугодя́ще господи́ну своему́. К тебе́ ру́ки на́ша воздева́ем и мо́лим тя: помоли́ся Влады́це всех, да продли́т, доне́леже стои́т мир, ми́лость Свою́ на оте́чествии на́шем и лю́дех Свои́х, ра́тныя прогоня́я, мир утвержда́я, глад угобза́я, гра́ды разселя́я, Це́рковь Свою́ возраща́я, достоя́ние Свое́ соблюда́я, му́жи, и жены́, и младе́нцы спаса́я, да ми́лостию Его́ носи́ми, в едине́нии ве́ры вку́пе ве́село и ра́достно сла́вим Го́спода на́шего Иису́са Христа́, со Отце́м и со Пресвяты́м Ду́хом, Тро́ицу Неразде́льну Единобоже́ственну, ца́рствующу на Небесе́х и на земли́, ны́не, и при́сно, и во ве́ки веко́в. Ами́нь.