Стихи́ры пра́здника 3 и преподо́бнаго 3, глас 6.

Подо́бен: Всю отложи́вше:

Все твое́ жела́ние к Бо́гу просте́р,/ мирску́ю красоту́ я́ко непребыва́ющую оста́вил еси́,/ и Христу́, всему́дре, себе́ возложи́л еси́,/ всеобра́зне воздержа́нием очища́яся/ и терпели́вое показу́я противле́ние, Пахо́мие,/ ко страстны́м разгоре́нием,/ и со́вести муче́ние, Богому́дре, подъе́мый,/ и я́ко победоно́сец прия́л еси́ вене́ц неувяда́емый.

Тебе́ ны́не прибы́сть от де́ятельнаго виде́ния,/ отложе́нием те́ла, дебе́лаго покрыва́ла,/ и пристра́стие плотско́е отве́ргшу,/ Бо́гу сраствори́тися,/ отону́дными облиста́ем заря́ми и благода́тьми,/ и богоде́тельными сия́нии,/ и манове́нием обожа́емь,/ и и́же к лу́чшему восхожде́нии./ И ны́не, Богоно́се, блаже́н быв,/ Христа́ со дерзнове́нием моли́ о душа́х на́ших.

Все чу́вство превозше́д,/ Влады́це чи́сто бесе́довал еси́,/ пло́ти быв вне, всече́стне,/ по́мыслом лу́чшим стра́сти удержа́в,/ и, де́монская шата́ния разори́в,/ попра́л еси́, Пахо́мие./ И ны́не живы́й в Небе́сных се́лех,/ вся, чту́щия па́мять твою́, помина́й,/ Христу́ со дерзнове́нием моля́ся о душа́х на́ших.

Сла́ва, глас 6:

Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ во е́же по подо́бию, я́ко мо́щно, возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ верх,/ жи́тель пусты́нный,/ благотеку́щих обучи́тель,/ пра́вило доброде́тели изве́стнейшее./ И ны́не на Небесе́х зерца́лом разре́шшимся,/ о́тче наш Пахо́мие,/ чи́сте зри́ши Святу́ю Тро́ицу,/ моля́ся несре́дственне о ве́рою и любо́вию чту́щих тя.

И ны́не, пра́здника.

На стихо́вне пра́здника. Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ без поро́ка поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

И ны́не, пра́здника.

Тропа́рь, глас 8:

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней,/ сия́я чудесы́, Пахо́мие о́тче наш,/ моли́ Христа́ Бо́га спасти́ся душа́м на́шим.

Кано́н пра́здника со ирмосо́м на 6 и свята́го на 6, его́же краегране́сие: Пахо́мию похвалу́ любе́зно плету́.

Глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь, сла́вно бо просла́вися.

Наде́явся бла́гости твои́х нра́вов, усе́рдно тебе́ песнь ра́бски возглаша́ю,/ но мой, Богогла́се, ум светолу́чными сия́ньми/ твои́ми мольба́ми просвети́, Пахо́мие преизря́дне.

Безстра́стия жела́нием те́плым, о́тче, одержи́м,/ ве́щныя увяди́л еси́ страсте́й во́лны, Пахо́мие,/ и дости́гл еси́, любо́вию вперя́емь,/ сего́ теку́щаго сия́ния, преблаже́нне, Божества́.

Ра́дости испо́лнил еси́, му́дре, Небе́сныя чи́ны, Творца́ позна́в всея́ тва́ри:/ во храни́лищи бо навы́кл еси́ иму́щаго неизрече́нную си́лу,/ Сего́, Богоно́се, ве́рно уче́ньми наказу́емь.

Богоро́дичен: Превы́шши была́ еси́, Чи́стая, всея́ неви́димыя и ви́димыя, Присноде́во, тва́ри:/ Зижди́теля бо родила́ еси́,/ я́коже благоизво́ли воплоти́тися во утро́бе Твое́й./ Его́же со дерзнове́нием моли́ спасти́ ду́ши на́ша.

Песнь 3

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь,/ прише́ствием, Твои́м,/ в не́йже утверди́ся мое́ се́рдце.

Я́коже еле́нь прите́кл еси́ к воде́, преподо́бне,/ и, окропле́н быв Креще́нием святы́м, ро́су прия́л еси́,/ е́юже услади́ся се́рдце твое́.

Не терпя́ще тве́рдости зре́ти твоея́, преподо́бне,/ де́монстии полцы́, Богоно́се, воздержа́тельныя/ искуше́ния тебе́ разли́чная простро́ша.

Я́ко свяще́нное стяжа́в житие́,/ был еси́ по́стником, Пахо́мие, законополо́жник и пе́рвый вождь,/ Христу́ сия́ приве́л еси́, сла́вне,/ в Не́мже утверди́ся твое́ се́рдце.

Богоро́дичен: Чи́ни удиви́шася А́нгельстии, Пречи́стая,/ и челове́ческая устраши́шася сердца́ о рождестве́ Твое́м,/ темже Тя, Богоро́дице, ве́рою почита́ем.

Конда́к пра́здника и и́кос.

Таже седа́лен, глас 8.

Подо́бен: Прему́дрости:

Слез ту́чами твою́ ду́шу напои́в бога́тно, о́тче му́дре,/ многопло́дный доброде́телей твои́х пожа́л еси́ клас/ и, па́стырь овца́м преподо́бным быв,/ на зла́це сия́ воздержа́ния воспита́л еси́./ Те́мже разре́шся от жития́ сла́вно,/ оте́ческим, Пахо́мие, лико́м сочета́лся еси́./ Сего́ ра́ди вопие́м ти:/ моли́ Христа́ Бо́га согреше́ний оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, пра́здника или́ Богоро́дичен:

Со́лнца о́блаче разу́мнаго, Боже́ственнаго Све́та свети́льниче златокова́нный,/ Нескве́рная, Небла́зная, Всенепоро́чная Влады́чице,/ омраче́нную ду́шу мою́ ослепле́нием страсте́й безстра́стия заре́ю просвети́, молю́ся,/ и оскверне́нное мое́ се́рдце омы́й пото́ки умиле́ния, покая́ния же слеза́ми/ и от тиме́ния мя очи́сти дел мои́х, да любо́вию зову́ Ти:/ Богоро́дице Присноде́во,/ моли́ Христа́ Бо́га прегреше́ний оставле́ние пода́ти ми,/ Тебе́ бо име́ю наде́жду, раб Твой.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственный стра́сти Твоя́.

Песнь 4

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову Ти́: сла́ва си́ле Твое́й, Го́споди.

Я́ко изря́ден прави́тель был еси́, Пахо́мие, мона́шеских собо́ров:/ виде́нием бо, прему́дре о́тче,/ извести́лся еси́ доброде́тели воздви́гнути попече́ние.

Ду́ха Свята́го зарю́ прие́м,/ звезда́ пресве́тлая, сия́ющая благода́тию, был еси́ всем,/ и́хже наста́вил еси́ ко спасе́ния приста́нищу твои́ми уче́ньми.

Житие́ твое́, Богоно́се, преблаже́нне Пахо́мие, пра́вило изве́стно мона́шествующих бысть,/ и́мже ны́не живу́т твои́м после́дующии, о́тче, Боже́ственным уче́нием.

Уязвля́емь Влады́чнею любо́вию,/ погаси́л еси́ пло́ти пристра́стие воздержа́нием, Пахо́мие,/ все житие́ твое́, я́ко благово́нну же́ртву, освяти́л еси́.

Богоро́дичен: Тя приста́нище спасе́ния и сте́ну недви́жиму,/ Богоро́дице Влады́чице, вси ве́мы, ве́рнии:/ Ты бо моли́твами Твои́ми от бед избавля́еши ду́ши на́ша.

Песнь 5

Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы.

Любо́вию Бо́жиею, уче́нием бесе́довал еси́ Ду́ха,/ из ни́хже просвеща́емь, доброде́тели соверше́ние прия́л еси́,/ от страсте́й измени́в душе́вное устрое́ние.

Моли́твенника Твоего́, по́стника приво́дим Тебе́, Влады́ко,/ того́ ра́ди прося́ще просвеще́нием благода́ти просвети́тися/ и Твои́м всеору́жием всегда́ сохрани́тися.

Укрепи́в ум за́поведей соблюде́ньми, Пахо́мие,/ пло́ти взыгра́ние твои́м воздержа́нием увяди́л еси́/ и па́стырь показа́лся еси́ боголюбе́знаго со́нма.

Богоро́дичен: Моли́ Твоего́ Сы́на и Го́спода, Де́во Чи́стая,/ пле́нным избавле́ние от проти́внаго обстоя́ния/ и на Тя упова́ющим умире́ние дарова́ти.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Всегуби́тельная де́монская попра́л еси́, о́тче, кова́рства,/ Влады́ки твоего́ оде́ян си́лою и кресто́м честны́м огражда́емь.

У́мно па́че вре́менных проразсуди́в ве́чнующая,/ боле́зни воздержа́ния претерпе́л еси́, преподо́бне,/ и душа́м строи́тель был еси́.

Во́льне обнища́в ду́хом, о́тче,/ безсме́ртное и непрее́мное на Небесе́х наслажде́ние/ и несказа́нное бога́тство восприя́л еси́.

Богоро́дичен: Неискусому́жно, Де́во, родила́ еси́ и ве́чнуеши Де́ва,/ явля́ющи и́стиннаго Божества́, Сы́на и Бо́га Твоего́, о́бразы.

Конда́к, глас 2

Подо́бен: Вы́шних ища́:

Свети́льник све́тел показа́лся еси́ в конце́х,/ пусты́ню же гра́ды сотвори́л еси́ мно́жествы мона́шескими,/ сам себе́ распе́н, крест твой на ра́мо взем,/ и воздержа́нием те́ло изнури́л еси́,/ моля́ непреста́нно о всех нас.

И́кос:

Пресве́тлая блаже́ннаго па́мять други́й яви́ся день спасе́ния нам,/ све́тлостию воздержа́ния нощь глубоку́ страсте́й отгоня́щи/ и вседоброде́тельным дея́нием све́тло облиста́ющи,/ в не́йже ясна́ звезда́ и светла́ яви́ся./ Ве́рно пе́сни с весе́лием Пахо́мию Боже́ственному принесе́м:/ с высоты́ бо зря, просвеща́ет нас и дае́т мир неоску́ден,/ моля́ непреста́нно о всех нас.

Песнь 7

Ирмо́с: Богопроти́вное веле́ние/ беззако́ннующаго мучи́теля высо́к пла́мень вознесло́ есть,/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Кре́постию оде́явся Влады́чнею, я́ко прах, сладостра́стия жития́ попра́л еси́,/ любо́вию побежда́емь нетле́нный жи́зни, е́йже ны́не и причасти́лся еси́,/ с ли́ки А́нгел, о́тче, водворя́яся.

Се́рдце стяжа́в чи́сто, ви́дети сподо́бился еси́ все́ми Неви́димаго,/ отсю́ду я́коже блаже́н служи́тель, о́тче, был еси́,/ поя́ Благоде́теля и препросла́вленнаго.

Правосла́вную му́дрость ты стяжа́в, Еди́ницу Тричи́сленную,/ Тро́ицу Единосу́щную, преблаже́нне, пропове́дал еси́/ и Сло́ва стра́шное воплоще́ние, научи́л еси́ пе́ти Благоде́теля,/ я́ко препросла́вленна во ве́ки.

Богоро́дичен: Святы́х Святе́йшую Тя разуме́ем, я́ко еди́ну, ро́ждшую Бо́га непреме́ннаго,/ Де́во Нескве́рная, Ма́ти Безневе́стная,/ всем бо источи́ла еси́ ве́рным нетле́ние Боже́ственным рождество́м Твои́м.

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

По́стных я́ве воображе́ния/ от А́нгела научи́лся еси́, му́дре, от Боже́ственнаго повеле́ния./ Имиже ны́не пита́еми, благоче́стия пито́мцы, пе́сньми зове́м:/ благослови́те, вся дела́ Госпо́дня, Го́спода.

Я́коже мо́лния, вели́кими блиста́нии житие́ сия́ющее всем возсия́/ воздержа́ния твоего́, всему́дре, благоче́стно Зижди́телю зову́щим:/ благослови́те, вся дела́ Госпо́дня, Го́спода.

Тя, па́че ума́ из нерожде́нна Отца́, пре́жде век рожде́нна, Христе́,/ сла́вя, пропове́да Пахо́мий сла́вный и Ду́ха Всесвята́го,/ еди́но Тро́ицы естество́ ве́дый и Божество́.

Богоро́дичен: Дверь Тя Све́та, Де́во Богома́ти, благоче́ствующе, имену́ем,/ О́тчее бо сия́ние, соеди́ншееся пло́ти дебельству́,/ па́че естества́ родила́ еси́, Пречи́стая./ Его́же пое́м, вся дела́ Госпо́дня, Го́спода.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Луча́ми благода́ти озари́вея, Пахо́мие, я́ко ве́рен служи́тель Бо́гу предстои́ши/ и наслади́тися сла́вы сподо́блься неразруши́мыя./ Те́мже честны́й пра́здник твой велича́ем.

Исплете́ся тебе́ вене́ц, я́ко победи́телю, Па́хомие,/ десни́цею живоно́сною и вседержи́тельною,/ и ны́не пою́щия твою́ па́мять сла́вную сподо́би, блаже́нне,/ улучи́ти оставле́ние согреше́ний, всеприснопа́мятне.

Плоды́ ны́не объе́м боле́зней твои́х, Пахо́мие,/ ра́дости наслажда́ешися, я́же па́че ума́,/ но хода́тайствуя изба́вити твоя́ ученики́ Христа́ умоли́,/ тя ны́не сла́вящия и чту́щия, достосла́вне.

Богоро́дичен: Я́ко руно́, Пренепоро́чная, дождь небе́сный во утро́бе прие́мши,/ нам родила́ еси́ пи́щу даю́щаго, благоче́стно Того́ воспева́ющим/ и Тя, Всепе́тую Богоро́дицу, испове́дающим.

Свети́лен

Подо́бен: Не́бо звезда́ми:

А́нгельскаго жития́ жела́я, удали́л еси́ себе́ в пусты́нях/ и стра́сти покори́л еси́ плотски́я,/ равноа́нгелен показа́вся, Пахо́мие Богоно́се.

Сла́ва, и ны́не, пра́здника

На стихо́вне, Сла́ва,глас 8:

Мона́хов мно́жества,/ наста́вника тя почита́ем, о́тче наш Пахо́мие,/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ны́не, пра́здника.

НА ЛИТУРГИ́И

Блаже́нны пра́здника, песнь рядова́я, и свята́го, песнь 3-я. Проки́мен, глас 7: Честна́ пред Го́сподем/ смерть преподо́бных Его́.Стих: Что́ возда́м Го́сподеви о всех, я́же воздаде́ ми?Апо́стол к Кори́нфяном, зача́ло 176. Аллилу́ия,глас 6: Блаже́н муж, боя́йся Го́спода:Стих: Си́льно на земли́ бу́дет се́мя его. Ева́нгелие от Луки́, зача́ло 77. Прича́стен: В па́мять ве́чную:

ВЕ́ЧЕР

Блаже́н муж: 1-й антифо́н. На Го́споди, воззва́х:стихи́ры глас 4.

Подо́бен: Я́ко до́бля:

Я́ко до́бля во святи́телех,/ блаже́ннаго Иса́ию,/ соше́дшеся, похва́лим днесь,/ я́ко бо друго́е со́лнце пресве́тлое возсия́в,/ пречи́стыя це́ркве Бо́жия Ма́тере,/ отгоня́ тьму нече́стия/ и просвеща́я новокреще́нныя лю́ди све́том Богоразу́мия,/ тем и прия́л еси́ вене́ц от Бо́га нетле́нный./ Его́же моли́ от бед и напа́стей изба́витися/ ве́рою пою́щим всечестну́ю па́мять твою́.

Добродете́льными светлостьми́/ просвети́ся житие́ твое́,/ и серде́чною пра́востию,/ и ра́зумом духо́вным, Богому́дре, удобря́емь,/ научи́л еси́ новопросвеще́нныя лю́ди/ неподви́жным бы́ти во Христо́ве ве́ре./ Те́мже па́мять твою́ честну́ю и светоно́сную/ соверша́ем, приснопа́мятне,/ любо́вию тя почита́юще.

Ра́зума духо́внаго испо́лнився,/ посрами́л еси́ врага́, прельсти́вшаго пра́отца,/ и, сего́ ору́жием духо́вным сокруши́в,/ Богонасажде́нный сад церко́вный/ уче́нием твои́м напои́л еси́,/ и ко Христу́ приве́л еси́,/ я́ко и́стинный де́латель виногра́да Влады́ки твоего́./ Его́же моли́ о чту́щих ве́рою па́мять твою́.

Сла́ва, глас 6:

Ты еси́ па́стырь до́брый/ и учи́тель те́плый, святи́телю Иса́ие,/ тебе́ всегда́ похваля́юще, вопие́м ти:/ тобо́ю украси́ Бог це́рковь Ма́тере Своея́/ и те́ло, многоле́тно твое́ сокрове́нное в земли́,/ нетле́нно яви́ лю́дем твои́м./ Те́мже моли́ся непреста́нно о хва́лящих тя/ и чту́щих па́мять твою́,/ прося́ оставле́ния грехо́в/ и спасе́ния душа́м на́шим.

И ны́не пра́здника.

Вход. Проки́мен дне. И чте́ния 3 (зри 20 мая)

На стихо́вне стихи́ры пра́здника.

Сла́ва, святи́теля, глас 6:

Излия́ся благода́ть во устна́х твои́х, преподо́бне о́тче,/ святи́телю Иса́ие,/ и был еси́ па́стырь Христо́вы Це́ркве,/ уча́ слове́сныя о́вцы ве́ровати в Тро́ицу Единосу́щную,/ во Еди́ном Божестве́.

И ны́не, пра́здника.

Тропа́рь, глас 8:

Правосла́вия наста́вниче,/ благоче́стия учи́телю и чистоты́,/ Росто́ву пресве́тлый свети́льниче,/ святи́телем Богодохнове́нное удобре́ние,/ Иса́ие прему́дре,/ уче́нием бо твои́м вся Русския концы́ просвети́л еси́ благода́тию духо́вною,/ святи́телю блаже́нне,/ моли́ Христа́ Бо́га, да спасе́т ду́ши на́ша.

Ин тропа́рь, глас 2:

В и́ноцех святы́я Ла́вры Пече́рския/ благоиску́сен показа́выйся/ и во архиере́йстем са́не добр па́стырь/ своему́ ста́ду, Боголюбе́зне Иса́ие, бы́вый,/ моли́ о нас Пастыренача́льника Христа́ Бо́га/ да поми́лует и спасе́т ду́ши на́ша.

Сла́ва, и ны́не, пра́здника

НА У́ТРЕНИ

По 1-й и по 2-й стихоло́гии, седа́льны пра́здника.

По полиеле́и седа́лен свята́го, глас 4.

Подо́бен: Ско́ро предвари́:

От младе́нства по Христе́ ше́ствовал еси́/ и сосу́д Свята́го Ду́ха, святи́телю Иса́ие, был еси́,/ от Него́же прему́дрость прии́м,/ научи́л еси́ челове́ки многобо́жие и́дольское преоби́дети и Христу́ ве́ровати./ Его́же моли́ спасти́ всех, любо́вию тя почита́ющих.

Сла́ва, и ны́не, Богоро́дичен:

Де́во Всенепоро́чная, пресу́щественнаго Бо́га ро́ждшая,/ со святи́телем Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая.

Степе́нна, 1-й антифо́н 4-го гла́са. Проки́мен: Честна́ пред Го́сподем смерть/ преподо́бных Его́.Стих: Что́ возда́м Го́сподеви о всех, я́же воздаде́ ми? Вся́кое дыха́ние:Ева́нгелие от Иоа́нна, зача́ло 35, от полу́.

По 50-м псалме́ стихи́ра, глас 4:

Я́ко со́лнце пресве́тлое,/ просвеща́еши страну́ всю Русскую:/ тебе́ бо показа́ Бог от ю́ности,/ святи́телю блаже́нне Иса́ие,/ па́стыря слове́сному Своему́ ста́ду,/ новоизбра́нным лю́дем,/ и украси́л еси́ всечу́дно це́рковь Бо́жия Ма́тере,/ в не́йже и доны́не лежа́т честны́я твоя́ мо́щи,/ я́же и́мут в себе́ исцеле́ния дар благода́ти,/ святи́телю пречу́дне./ Тебе́ Христо́с показа́ второ́е свети́ло в Росто́встей Це́ркви,/ ты похвала́ земли́ на́шей и заступле́ние./ Те́мже, днесь пра́зднующе све́тло па́мять твою́/ и честно́е обре́тение пречу́днаго твоего́ телесе́,/ вку́пе же и пресла́вное пренесе́ние пречестны́х моще́й твои́х,/ мо́лим тя, святи́телю:/ мир ми́ру испроси́/ и душа́м на́шим ве́лию ми́лость.

Кано́н пра́здника со ирмосо́м на 6 и свята́го на 8, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Твоего́, Христе́, уго́дника, блаже́ннаго Иса́ию, пе́ти ми жела́ющу, моли́твами его́,/ я́ко Бог, осия́ние Всесвята́го Ду́ха да́руй ми/ и свет прему́дрости Твоея́,/ да достойно воспою́ того́ чудеса́.

Прииди́те, ве́рнии, церко́внаго свети́льника, и столпа́ непоколеби́ма,/ и правосла́вия учи́теля, и благоче́стия пропове́дника,/ блаже́ннаго Иса́ию достохва́льными пе́сньми почти́м.

Я́ко святи́тель ве́рен и па́стырь и́стинный Росто́вския Це́ркве быв/ и слове́снаго ста́да Христо́ва,/ но́вых люде́й неле́стный учи́тель яви́лся еси́, блаже́нне Иса́ие,/ и́хже научи́л еси́ сла́вити Бо́жия вели́чия.

Богоро́дичен: Ма́рию Чи́стую, прииди́те вси, воспое́м,/ еди́ну, украси́вшую челове́чество и ро́ждшую Бо́га воплоще́нна,/ Де́ву же пребы́вшую неврежде́нну.

Катава́сия пра́здника.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик Себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Глаго́лы Боже́ственными, де́лы же и уче́нии пресла́вными/ по всему́ уподо́бися пресла́вным апо́столом/ и обтече́ всю Русскую зе́млю, и́дольскую лесть попаля́я,/ просвеща́я же ве́рных сердца́ благода́тию.

От младе́нства Христа́ вожделе́в,/ кра́сная ми́ра сего́ вся уме́ты вмени́л еси́,/ по апо́столу, о́тче, Вы́шних ища́,/ Христо́вою же благода́тию святи́тельства сподо́бился еси́/ и Росто́ву па́стырь но́вым лю́дем посыла́ешися, и́хже и научи́л еси́/ и на Небесе́х венцы́ сла́вы восприя́л еси́.

Свята́го Ду́ха благода́тию/ и́дольское изоста́вшее нече́стие до конца́ потреби́л еси́ в Русстей земли́,/ побо́рник вои́стинну правосла́вия яви́вся кре́пкий./ Тем просвети́л еси́ твои́ми уче́нии Русския концы́.

Богоро́дичен: Пое́м, Де́во Богома́ти,/ па́че естества́ рождество́ Твое́ и Твою́ нетле́нную чистоту́,/ и́бо в Тебе́ во еди́но сочета́ся де́вство и рождество́.

Ин конда́к, глас 4:

Своего́ епи́скопска са́на тезоиме́нство храня́,/ си́рых, вдови́ц и всех, зле стра́ждущих,/ сам собо́ю посеща́л еси́ любе́зне/ и, ми́лостынею дово́льне тех ущедря́я, я́ко оте́ц,/ сподо́бился еси́ А́нгелы на освяще́ние це́ркве Пече́рския, святи́телю Иса́ие,/ принесе́н бы́ти чу́дне,/ с ни́миже моли́ся Го́сподеви о душа́х на́ших.

Седа́лен, глас 8

Подо́бен: Прему́дрости:

От мирски́я молвы́ избежа́в, и Христо́во и́го восприи́м,/ и за́поведи соверши́в, па́стырь оби́тели быва́еши,/ пото́м же и на святи́тельском седа́лищи сед,/ богоуго́дно пожи́л еси́/ и, лю́ди правосла́вию научи́в, на Небеса́ восте́кл еси́,/ у престо́ла Вседержи́теля со А́нгелы предстоя́, святи́телю блаже́нне,/ моли́ся о рабе́х твои́х.

Сла́ва, и ны́не, пра́здника или́ Богоро́дичен:

О Тебе́ ра́дуется, Благода́тная, вся́кая тварь,/ а́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́, из Нея́же Бог воплоти́ся/ и Младе́нец бысть пре́жде век сый Бог наш,/ ложесна́ бо Твоя́ престо́л сотвори́ и чре́во Твое́ простра́ннее небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

Песнь 4

Ирмо́с: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный,/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Седя́ща во сла́ве Го́спода проро́к Иса́ия дре́вле узре́в/ и от Серафи́ма клеща́ми угль прии́м, очи́стися./ Ты же, святи́телю, всегда́ Го́сподеви предстои́ши со мно́жеством Безпло́тных/ и, Серафи́мом подо́бяся, я́коже клеща́ми, твои́ми рука́ми те́ло Христо́во прие́млеши/ и ве́рным подае́ши, непреста́нно вопия́:/ сла́ва си́ле Твое́й, Го́споди.

Любо́вию Бо́жиею па́че огня́ распала́емь, о́тче,/ обходя́ гра́ды и ве́си в Росто́встей и Су́ждальстей о́бласти,/ и́дольская ка́пища разоря́я, це́ркви же созида́я,/ лю́ди научи́л еси́ пе́ти:/ сла́ва си́ле Твое́й, Го́споди.

Пресла́вный и чу́дный Лео́нтий, я́ко благоцвету́щ сад, насади́ росто́вский лю́ди,/ просвети́в их святы́м Креще́нием./ Ты же, блаженне, до конца́ сих напои́л еси́ твои́м уче́нием/ и ко Христу́, я́ко зрел плод, прине́сл еси́, с весе́лием вопия́:/ сла́ва си́ле Твое́й, Го́споди.

Богоро́дичен: От ма́терних пеле́н чи́сто житие́ име́л еси́, блаже́нне,/ и сего́ ра́ди Пречи́стыя Богоро́дицы изря́дный служи́тель быв,/ Сию́ возвели́чил еси́ в русских страна́х и научи́л еси́ пе́ти:/ сла́ва си́ле Твое́й, Пречи́стая.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Удивля́ется святи́тель, князь же и вси лю́дие/ ско́рому твоему́ прише́ствию ко освяще́нию Пречи́стыя це́ркве:/ А́нгелом бо зван был еси́ и о́блаком носи́м,/ я́коже дре́вле апо́столи, на успе́ние Бо́жия Ма́тере./ Те́мже тя всем воспева́ющим мир подава́еши. Удиви́шася Ангельстии чи́нове преславному твоему житию,/ како в бреннем телеси́ безплотнаго врага победил еси́, блаженне,/ и, воздушными темными князьми́ не удержан быв,/ престола Христова дости́гл еси́ к превышним силам,/ и оттуду мир нам подававши.

Удивля́ются христоимени́тии лю́дие, егда́ обрето́ша пречестно́е твое́ те́ло,/ е́же мно́гими ле́ты земле́ю покрове́но,/ и яви́ся, я́коже златоза́рное со́лнце,/ чуде́с лучи́ испуща́я и просвеща́я ве́рных сердца́,/ и воспева́ющим Го́сподеви мир подава́еши.

Богоро́дичен: Умилосе́рдися, Влады́чице, на непотре́бныя Твоя́ рабы́/ и не преда́ждь нас в ру́це пога́ных грех ра́ди на́ших,/ но моли́тв на́ших не пре́зри, во Твою́ це́рковь притека́ющим/ и вопию́щим Ти, мир подаю́щи.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Боже́ственною благода́тию укрепля́емь, апо́столом ревни́тель быв,/ Русския вся концы́ научи́л еси́ благоче́стию/ и вся нечести́вая уче́ния до конца́ потреби́л еси́./ Те́мже твою́ па́мять све́тло пра́зднуем.

Гроб честна́го твоего́ телесе́ иногда́ в небреже́нии бысть,/ и от святи́теля, твой престо́л держа́щаго и к тебе́ любо́вь показу́юща, отту́ду прено́сится,/ я́вственно ны́не полага́ется, источа́ющий исцеле́ния всем.

И́же всегда́ к ра́це моще́й твои́х приступа́юще,/ любе́зно ту целу́ем и от души́ вопие́м ти:/ святи́телю блаже́нне Иса́ие, моли́ся приле́жно за град и лю́ди,/ и скорбь на́шу в ра́дость претвори́,/ и грехо́в проще́ние испроси́.

Богоро́дичен: Притеце́м, ве́рнии, в це́рковь Бо́жия Ма́тере/ и, ве́рно моля́щеся, возопие́м Ей:/ поми́луй, Влады́чице, Твое́ достоя́ние/ и от враг изба́ви уго́дника Твоего́ Иса́ии моли́твами.

Конда́к, глас 3:

Подо́бен: Де́ва днесь:

Я́ко гром, возгреме́л еси́ Боже́ственными твои́ми уче́нии в Русстей земли́/ и яви́лся еси́ свети́льник пресве́тел,/ осия́я све́том Богоразу́мия, Иса́ие блаже́нне./ Те́мже вопие́м ти́:/ Христа́ Бо́га моли́ непреста́нно о всех нас.

И́кос:

Прииди́те, богоизбра́ннии христоимени́тии собо́ри,/ похва́лим ны́не и пе́сньми почти́м светоно́сную па́мять пречу́днаго отца́, блаже́ннаго Иса́ии,/ апо́столом ра́внаго, благоче́стия пропове́дника,/ наста́вника же и учи́теля русскому язы́ку:/ яви́ бо ся, я́ко свети́льник незаходи́мый, во тьме су́щим неве́дения,/ и всех возводя́ к Боже́ственней высоте́,/ и на па́житех зако́на живоно́снаго тех упасе́,/ и исцеле́ний луча́ми всех просвеща́я./ Те́мже мо́лим тя ны́не:/ облиста́й в сердца́ раб твои́х незаходи́мый свет ра́зума, Христо́в уго́дниче,/ и моли́ непреста́нно о всех нас.

Песнь 7

Ирмо́с: Не послужи́ша тва́ри Богому́дрии,/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Не слу́жат ктому́ русстии сы́нове тьме пре́лести,/ но тобо́ю, о́тче, и́стинный Богоразу́мия свет позна́ша/ и, непреста́нно ра́дующеся, ны́не Христу́ вопию́т:/ благослове́н Бог оте́ц на́ших.

Пра́зднует Це́рковь че́стно твое́ преставле́ние:/ житие́ бо благоче́стно на земли́ соверши́л еси́, чу́дне,/ и плод стори́чествующий Влады́це твоему́ прине́сл еси́,/ и от Него́ прия́л еси́ венцы́ сла́вы неизрече́нныя, непреста́нно вопия́:/ благослове́н Бог оте́ц на́ших.

И́же во искуше́ниих и ско́рбех су́щий,/ к ра́це моще́й твои́х притека́юще, прие́млют честна́я исцеле́ния/ от я́же в тебе́ Боже́ственныя благода́ти/ и непреста́нно Христу́ вопию́т:/ благослове́н Бог оте́ц на́ших.

Богоро́дичен: Укрепи́, Влады́чице, сла́вящия Тя ве́рныя лю́ди на проти́вныя враги́,/ я́ко Дави́да на Голиа́фа, да, веселя́щеея, вопие́м Ти:/ ра́дуйся, покро́ве святы́й и Засту́пнице гра́ду на́шему.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Блаже́нную жизнь пожи́л еси́ в житии́ сый,/ и со святи́тельскими ли́ки у престо́ла Христо́ва, ра́дуяся, предстои́ши,/ Боже́ственное насле́див наслажде́ние, и непреста́нно вопие́ши:/ Го́спода воспева́йте, дела́, и превозноси́те Его́ во вся ве́ки.

Боже́ственнаго Ду́ха благода́ть име́я в души́ твое́й, блаже́нне Иса́ие,/ обте́кл еси́ Русскую зе́млю, я́ко мо́лния,/ разсевая Бо́жие сло́во во всех страна́х, просвеща́я всех и науча́я:/ Го́спода воспева́йте, дела́, и превозноси́те Его́ во вся ве́ки.

Слове́сныя плоды́ Го́сподеви принося́, Иса́ие прему́дре,/ озари́л еси́ твое́й па́стве свет Богоразу́мия,/ и нечести́вая уста́ загради́л еси́ пра́щею Богодохнове́нных слове́с твои́х,/ и я́сно всем пропове́дал еси́:/ Го́спода воспева́йте, дела́, и превозноси́те Его́ во вся ве́ки.

Богоро́дичен: На благодея́ние челове́ком Сло́во воплоти́тися изво́ли,/ де́вства бо врата́ прои́де я́ко Госпо́дь и Богоро́дицу показа́./ Тем зове́м:/ Го́спода воспева́йте, дела́, и превозноси́те Его́ во вся ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Кто мо́жет, блаже́нне, по достоя́нию тя восхвали́ти?/ Исцеле́ния бо неоску́дно подава́еши приходя́щим к тебе́ с ве́рою и непреста́нно вопию́щим:/ изба́ви, святи́телю, от вся́ких искуше́ний/ и до конца́ неврежде́нных нас соблюди́.

Оќрест стоя́ще ра́ки моще́й твои́х,/ с любо́вию ту, припа́дающе, целу́ем и ве́рно ти вопие́м, блаже́нне:/ поми́луй святи́теля, престо́л твой ны́не украша́ющаго,/ и до конца́ его́ сохрани́ невреди́ма,/ христолюби́вым лю́дем на сопроти́вныя побе́ды да́руй и на враги́ одоле́ние.

Приими́ хвалу́ от раб недосто́йных, святи́телю Иса́ие,/ и жития́ сего́ непостоя́нную пучи́ну да́руй нам немяте́жно преийти́,/ и моли́тву о нас к Бо́гу сотвори́, че́стно почита́ющих твою́ па́мять,/ и одержа́щих зол и жду́щих нас изба́ви, да во ве́ки тебе́ велича́ем.

Богоро́дичен: Прииди́те, христоимени́тии лю́дие,/ в честну́ю це́рковь Бо́жия Ма́тере/ и, покло́ншеся пречу́дному Ея́ о́бразу и ру́це возде́вше, от се́рдца возопие́м:/ поми́луй нас, Богоро́дице, недосто́йных раб Твои́х, и град наш,/ в не́мже вели́кое Твое́ и многосла́вное и́мя велича́ется,/ от всех злых свободи́ уго́дника Твоего́ Иса́ии моли́твами,/ да во ве́ки Тебе велича́ем, Чи́стая.

Свети́лен:

Я́коже пресве́тлая заря́ светоно́сна,/ яви́ся днесь па́мять твоя́, святи́телю преблаже́нне Иса́ие,/ предвозвеща́ющи нам пресве́тлаго со́лнца незаходи́мый свет,/ пречу́днаго Лео́нтия светоно́сный пра́здник,/ да моли́твами ва́шими прии́мем оставле́ние грехо́в.

Сла́ва, и ны́не, пра́здника или́ Богоро́дичен:

Пощади́ мя, Го́споди, пощади́ мя, егда́ прии́деши суди́ти,/ и не осуди́ мене́ во огнь, ни я́ростию же обличи́ мене́,/ мо́лит Тя Де́ва Чи́стая, ро́ждшая Тя, Христе́,/ и А́нгел мно́жество со проро́ки, и святи́тели, и му́ченики.

На хвали́тех стихи́ры на 4, глас 8.

Подо́бен: Что́ вас нарече́м:

Что́ тя нарече́м, святи́телю?/ А́нгела, я́ко безпло́тен на земли́ пожи́л еси́,/ апо́стола, я́ко научи́л еси́ благове́рию русския концы́,/ му́ченика же, я́ко Христа́ ра́ди до сме́рти подвиза́лся еси́,/ обраща́я лю́ди от тьмы нече́стия/ и приводя́ их на па́жить Богоразу́мия./ Моли́ спасти́ся душа́м на́шим.

Что́ тя имену́ем, Богоблаже́нне Иса́ие?/ Реку́, духо́вных вод наполня́ему/ и проходя́щу Русския концы́,/ жа́ждущая сердца́ напая́юща твои́м уче́нием;/ ча́шу, Боже́ственнаго Ду́ха наполня́ему;/ свещу́, Це́рковь озаря́ющу;/ свети́льника, я́ко па́ству твою́ просвеща́еши./ Мно́га ти имена́ и бо́льша дарова́ния./ Моли́ спасти́ся душа́м на́шим.

Что́ тя ны́не нареку́, Иса́ие пречу́дне?/ Служи́теля та́ин и де́лателя виногра́да Христо́ва,/ ве́ры утвержде́ние,/ Це́ркве столпа́ непоколеби́ма,/ исто́чника чуде́с,/ оби́димых засту́пника,/ сиро́т корми́теля,/ па́стве твое́й те́пла предста́теля./ Мно́га ти имена́ и множа́йша даро́в прия́тия./ Моли́ спасти́ся душа́м на́шим.

Сла́ва, глас 8:

Святи́телю Христо́в,/ Боже́ственных преда́ний учи́телю,/ церко́вное утвержде́ние,/ тебе́ я́ко и́стиннаго па́стыря Христо́с показа́л есть/ новоизбра́нному твоему́ слове́сному ста́ду, русским лю́дем,/ и́хже и от собла́зн спасл еси́/ и укрепи́л еси́ их бы́ти в правосла́вии./ Те́мже и ны́не мо́лим тя, Иса́ие досточу́дне:/ моли́ся Бо́гу и Спа́су/ о и́же ве́рою пра́зднующих пречестну́ю па́мять твою́.

И ны́не, пра́здника.

Славосло́вие вели́кое. И отпу́ст.

НА ЛИТУРГИ́И

Блаже́нны свята́го, пе́сни 3-я и 6-я. Проки́мен, глас 1: Уста́ моя́ возглаго́лют прему́дрость:Стих: Услы́шите сия́, вси язь́щы:Апо́стол к Евре́ем, зача́ло 335. Аллилу́ия,глас 2: Уста праведнаго поучатся премудрости: Стих: Закон Бога его в сердце его: Ева́нгелие от Луки́, зача́ло 24. Прича́стен: В па́мять ве́чную:

НА ВЕЧЕ́РНИ

На Го́споди, воззва́х:стихи́ры глас 5.

Подо́бен: Ра́дуйся:

Ца́рствовавшаго на земли́ о́трасль быв,/ пострада́л еси́ терпели́вно/ и кро́вию свое́ю обагри́л еси́ зе́млю:/ тле́ннаго ра́ди и мимотеку́щаго ца́рства/ от твои́х раб убие́н быв,/ нетле́нное Ца́рство восприя́л еси́ на Небесе́х,/ в не́мже, ра́дуяся, предстои́ши Христу́,/ вене́ц нося́ от Вседержи́телевы руки́ на версе́ твое́м, всече́стне./ Тем моли́ся дарова́ти душа́м на́шим/ мир и ве́лию ми́лость.

Осмоле́тным ю́ностным цве́том украша́емь,/ муче́ния ра́ною просвеща́емь,/ пресве́тло, прему́дре, сия́еши,/ и, вме́сто тле́нных и мимотеку́щих/ нетле́нная и преве́чная восприе́м,/ Христу́ предстоя́, моли́ся о нас, прему́дре,/ и посеща́й творя́щих ве́рно твою́ светоно́сную па́мять/ дарова́ти нам/ мир и ве́лию ми́лость.

Прииди́те убо, моско́встии наро́ди,/ страстоте́рпца и му́ченика Дими́трия царе́вича/ торжество́ соста́вим/ и, све́тло того́ псалмы́ и пе́сньми ликовству́юще,/ пра́зднуем с похвала́ми:/ созыва́ет бо нас духо́вне день страда́ния его́ торжествова́ти,/ во́ньже восхо́дит от земли́ к Небе́сным,/ и ви́дит, я́же А́нгели ви́дят,/ и хвала́ми от А́нгел венча́ется,/ и предстои́т престо́лу Христо́ву,/ и мо́лит дарова́ти нам/ мир и ве́лию ми́лость.

И́ны стихи́ры, глас 2

Подо́бен: Ки́ими похва́льными:

Ки́ими духо́вными похвала́ми,/ восхва́лим чудотво́рца и му́ченика Дими́трия/ в настоя́щее сие́ торжество́?/ В пречестне́м хра́ме сем ве́рою и любо́вию возопие́м пра́зднственная:/ ра́дуйся, ве́рных люде́й те́плый засту́пниче,/ и земли́ Русский удобре́ние,/ и всея́ вселе́нныя наслажде́ние,/ его́же венцы́ венча́ет Христо́с Бог наш,/ име́яй ве́лию ми́лость.

Ки́ими похва́льными пе́сньми ны́не соста́вим ликова́ние?/ В честне́м пра́зднице твоея́ па́мяти,/ страстоте́рпче Христо́в Дими́трие,/ духо́вно пра́зднующе, мо́лимся:/ моли́ во́инству на́шему победи́тельная на враги́ дарова́ти,/ тебе́ бо те́пла моли́твенника ко Влады́це стяжа́хом,/ подаю́щему ми́рови ве́лию ми́лость.

Ки́ими похва́льными добро́тами/ воспое́м Дими́трия царе́вича страстоте́рпца?/ Безконе́чную бо благода́ть от Христа́ прия́л есть,/ и всем подае́т неоску́дная исцеле́ния,/ и мо́лится за нас, своя́ лю́ди,/ во е́же спасти́ся нам,/ того́ па́мять ве́рою почита́ющим./ Его́же чудесы́ просла́ви Христо́с Бог наш,/ име́яй ве́лию ми́лость.

Сла́ва, глас 8:

Кто от земны́х по достоя́нию возмо́жет/ твоему́ вели́честву хвалу́ принести́?/ Всегда́ бо пита́ешися боговиде́нием Святы́я Тро́ицы,/ Боже́ственными заря́ми просвеща́емь,/ неизрече́нным светоли́тием осия́емь,/ я́сно зри́ши Боже́ственную сла́ву,/ и со дерзнове́нием предстоя́ престо́лу всех Царя́/ и ми́лостива Того́ нам сотворя́я,/ ве́рою соверша́ющим и све́тло пра́зднующим/ день Боже́ственныя твоея́ па́мяти,/ сла́вы же и ра́дости, е́йже ты сподо́бился еси́,/ и ве́чнаго наслажде́ния,/ и нам причасти́тися моли́/ и вселе́нней дарова́ти мир и ве́лию ми́лость.

И ны́не, пра́здника.

Вход. Проки́мен дне и чте́ния.

Проро́чества Иса́иина чтение(глава́ 43):

Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́ в них?/ Или́, я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаго́лет Госпо́дь Бог,/ и о́трок, его́же избра́х,/ да позна́ете, и ве́руете Ми, и разуме́ете,/ я́ко Аз есмь,/ пре́жде Мене́ не бысть ин бог и по Мне не бу́дет./ Аз есмь Бог, и несть, ра́зве Мене́, спаса́яй./ Аз возвести́х и спасо́х,/ уничижи́х и не бе в вас чу́ждий./ Вы Мне свиде́тели, и Аз Госпо́дь Бог./ И еще от нача́ла Аз есмь,/ и несть, от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зами бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние(глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жите в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 8:

Па́че плотска́го благоро́дия/ духо́вное получи́л еси́:/ Христу́ бо от младе́нства душе́ю прилепи́вся,/ вся́ко наслажде́ние мирско́е,/ я́ко не су́щее, оста́вль,/ дости́гл еси́ на Небесе́х перворо́дных мно́жество,/ иде́же с ни́ми предстои́ши Святе́й Тро́ице,/ со А́нгелы веселя́ся,/ я́ко му́ченик непобеди́м,/ нетле́нными венцы́ венча́лся еси́ от Бо́га,/ Его́же моли́ о нас, еди́наго Человеколю́бца.

Но́вый страда́льче, све́тлая му́чеников добро́то,/ царе́виче Дими́трие,/ я́ко ору́жие, крест держа́вно нося́,/ ве́ру, я́ко щит, наде́жду, я́ко броня́,/ вооружи́лся еси́ на пре́лесть,/ и ны́не в ми́ре глубо́це правосла́вных житие́ утверди́,/ и междоусо́бную брань укроти́,/ и вся поле́зная да́руй всегда́ лю́дем твои́м/ моли́твами твои́ми.

Сопресто́льное Сло́во О́тчее,/ даждь утеше́ние лю́дем Твои́м,/ и печа́ль на́шу в ра́дость претвори́,/ и междоусо́бныя бра́ни умири́,/ и вся поле́зная да́руй лю́дем Твои́м./ Твоея́ бо всегда́ тре́буем вси по́мощи,/ да спасе́ши от всех зол рабы́ Твоя́,/ моли́твами страстоте́рпца Твоего́ царе́вича Дими́трия.

Сла́ва, глас то́йже:

Прииди́те, празднолю́бцы, лик соста́вим,/ прииди́те, восхва́лим чудотво́рца и му́ченика./ Стеце́мся ве́рою и любо́вию/ и возопие́м пра́зднственная в настоя́щее торжество́/ преимени́таго сего́ и тве́рдаго побо́рника,/ великому́ченика царе́вича Дими́трия:/ сей бо мо́лит о нас Христа́ Бо́га на́шего,/ и подае́т нам моли́твами свои́ми отпуще́ние грехо́в/ и душа́м спасе́ние.

И ны́не, Богоро́дичен.

На стихо́вне стихи́ры, глас 8.

Подо́бен: Что́ вас нарече́м:

Что тя нарече́м, Дими́трие благоро́дне?/ Вы́шних жела́я, до́льняя презре́л еси́/ и, коне́ц жития́ осмоле́тным во́зрастом му́ченически соверши́в,/ венце́м ца́рским от Бо́га венча́лся еси́,/ я́ко сын царе́в и му́ченик непобеди́м,/ и вме́сто земны́х и тле́нных/ на Небеси́ нетле́нная восприя́л еси́./ Моли́ спасти́ся душа́м на́шим.

Стих: Пра́ведник, я́ко фи́никс, процвете́т/ и, я́ко кедр, и́же в Лива́не, умно́жится.

Что тя нарече́м, прехва́льне,/ му́чениче и чудотво́рче Дими́трие?/ Звезду́? сия́еши бо чудесы́;/ реку́ ли? источа́еши бо неду́гом исцеле́ния,/ всем челове́ком да́руеши здра́вие/ и чуде́с дарова́ние,/ и к Бо́гу о всех хода́тай./ Моли́ спасти́ся душа́м на́шим.

Стих: Насажде́ни в дому́ Госпо́дни,/ во дво́рех Бо́га на́шего процвету́т.

Что тя имену́ем, страстоте́рпче?/ Роди́теля земна́го оста́вил еси́/ и Небе́снаго Бо́га Отца́ получи́л еси́./ Вы́шний Иеруса́лим, ма́терь всех, возлюби́л еси́,/ иде́же со Христо́м ны́не ца́рствуеши./ Вели́ко твое́ страда́ние, и бо́льша дарова́ния./ Моли́ спасти́ся душа́м на́шим.

Сла́ва, глас 6:

Прииди́те, ве́рнии, во святу́ю це́рковь,/ в той бо днесь прино́сится сла́ва на Небеса́ Бо́гу/ и на земли́ пое́тся хвала́ но́вому му́ченику/ и страстоте́рпцу царе́вичу Дими́трию:/ соверша́ющим бо па́мять его́/ проше́ние во всем исполня́ет,/ и от напа́стей и бед избавля́ет,/ и от всех зол покрыва́ет,/ и спаса́ет всех свои́ми моли́твами./ Подае́т бо Христо́с, моли́тв ра́ди его́,/ на враги́ побе́ду,/ и мир вселе́нней,/ и душа́м на́шим отпуще́ние грехо́в,/ и ве́лию ми́лость.

И ны́не, пра́здника.

Тропа́рь, глас 4:

Ца́рскую диади́му обагри́л еси́ кро́вию твое́ю,/ Богому́дре му́чениче,/ за скиптр Крест в руку́ прии́м,/ яви́лся еси́ победоно́сец/ и же́ртву непоро́чну Влады́це прине́сл еси́ себе́:/ я́ко бо а́гнец незло́бив, от раба́ заколе́н еси́./ И ны́не, ра́дуяся, предстои́ши Святе́й Тро́ице,/ моли́ся о держа́ве сро́дников твои́х богоуго́дней бы́ти/ и сыново́м русским спасти́ся.

Ин тропа́рь, глас 2:

Я́ко благочести́ваго ко́рене Боголюби́вый произы́де плод,/ я́ко а́гня незло́биво, непови́нно во младе́нстве за́клан бысть/ от властолю́бца вку́пе и зла́го раба́./ Тем, я́ко златы́ми кры́лы,/ душе́вною чистото́ю и младе́нческим незло́бием/ к Небе́сней высоте́ возлете́л еси́, страстоте́рпче Дими́трие./ И ны́не, кровь твоя́ от земли́ та́йно вопие́т к Бо́гу,/ я́ко А́веля пра́веднаго./ Сего́ ра́ди покланя́емся ве́рою ти,/ сла́вяще просла́вльшаго тя Бо́га,/ Его́же моли́ стране́ на́шей богоуго́дней бы́ти/ и сыново́м ру́сским спасти́ся.

Ин тропа́рь, глас 1:

Всеору́жеством Ду́ха благода́ти вооруже́н быв/ и необори́м столп и утвержде́ние оте́честву своему́ показа́ся,/ я́ко а́гнец незло́бивый, от врага́ непра́ведно за́клан быв/ и в же́ртву непоро́чну Го́сподеви принесе́ся./ И ны́не дар благода́ти от всех Подвигополо́жника прие́м,/ источа́еши всем исцеле́ние, достохва́льне благове́рный царе́вичу кня́же Дими́трие./ Сла́ва Восприи́мшему тя от земны́х в Небе́сная,/ сла́ва Венча́вшему тя венце́м неувяда́емым,/ сла́ва Де́йствующему тобо́ю всем исцеле́ние.

НА У́ТРЕНИ

По 1-й стихоло́гии седа́лен, глас 1:

От чресл ца́рских произше́д, цвет чистоты́ произни́кнул еси́/ и плод благове́рия возра́сл, осмоле́тен во́зрастом,/ жили́ще был еси́ Пресвята́го Ду́ха,/ Боже́ственными чудесы́ сия́я, благоро́дне Дими́трие,/ мир ми́ру испроси́ и душа́м на́шим ве́лию ми́лость.

Сла́ва, и ны́не, Богоро́дичен:

Упова́ние христиа́н, Пресвята́я Де́во,/ Его́же родила́ еси́, Бо́га, па́че ума́ же и сло́ва,/ непреста́нно моли́ с Вы́шними си́лами/ пода́ти оставле́ние грехо́в на́ших всех и исправле́ние жития́/ ве́рою и любо́вию при́сно Тя сла́вящим.

По 2-й стихоло́гии седа́лен, глас 4:

Кровь твою́, я́коже алава́стр ми́ра, Христу́ прине́сл еси́,/ благове́рный царе́виче Дими́трие./ Тем и Преблаги́й вели́кий Дарода́тель Бог просла́ви тя/ и возвы́си чудесы́ Свои́ми благода́тными,/ и сего́ ра́ди па́мять твою́ ра́достно почита́ем, досточу́дне.

Сла́ва, и ны́не, Богоро́дичен:

Де́во Всенепоро́чная, пресу́щнаго Бо́га ро́ждшая,/ со Безпло́тными Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая.

По полиеле́и седа́лен, глас 8:

От младе́нства душе́ю к Бо́гу прилепи́лся еси́/ и Сего́ ра́ди венце́м муче́ния венча́лся еси́, я́ко предо́бр страда́лец всече́стен./ Тем, с му́ченическими ли́ки веселя́ся, небе́сныя да́ры прие́млеши,/ и́миже подае́ши от вся́ких неду́г здра́вие приходя́щим к тебе́ с ве́рою и любо́вию,/ чту́щим святу́ю и многоцеле́бную па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию, вси ублажа́ем, ро́ди челове́честии:/ О́гнь бо всели́ся в Тя Божества́/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Степе́нна, 1-й антифо́н 4-го гла́са. Проки́мен: Возвесели́тся пра́ведник о Го́споде/ и упова́ет на Него́.Стих: Услы́ши, Бо́же, глас мой, внегда́ моли́ти ми ся к Тебе́. Вся́кое дыха́ние: Ева́нгелие от Луки́, зача́ло 106.

По 50-м псалме́ стихи́ра, глас 8:

Из младе́нства изгна́н быв земна́го ца́рства,/ Небе́сному Ца́рству от Бо́га сподо́бился еси́./ Ны́не же, благода́тный дар/ от Подвигополо́жника Христа́ соверше́нно восприи́м,/ неоску́дно источа́еши всем исцеле́ние./ Со А́нгелы ликовству́я,/ Христу́, Дими́трие, моли́ся,/ я́ко да ми́лостив бу́дет нам/ в День стра́шнаго Его́ прише́ствия.

Кано́на два. Пе́рвый кано́н, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь, сла́вно бо просла́вися.

Му́ченика Твоего́, Христе́, Дими́трия, пе́ти мне жела́ющему,/ моли́твами его́, я́ко Благ, осия́ние Пресвята́го Ду́ха да́руй,/ да воспою́ све́тло Твоего́ уго́дника торжество́.

Умертви́вшему кре́пость сме́рти подо́бяся, му́чениче Дими́трие,/ от раба́ заколе́ние претерпе́л еси́/ и, пресла́вно в Небе́сныя оби́тели всели́вся,/ трудо́в воздая́ние прия́л еси́, прехва́льне.

Честна́я твоя́ па́мять, му́чениче, освяща́ющи мир, приспе́./ Ра́дуется же днесь пресла́вный град Москва́,/ твоего́ блага́го получи́в заступле́ния, и, благода́ря, Спа́су вопие́т:/ препросла́вленный Госпо́дь, я́ко просла́вися.

Богоро́дичен: О Тебе́ ны́не проро́чество соверши́ся,/ Богороди́тельнице Влады́чице Чи́стая,/ Его́же бо провозвести́ша высокогла́сно вси проро́цы,/ Того́, Невмести́маго, пресла́вно во чре́ве вмести́ла еси́,/ во двою́ естеству́ соверше́нна Бо́га же и Челове́ка.

Други́й кано́н, его́же краегране́сие сицево́: Хвалю́ сла́ву царе́вича Дими́трия.Про́чая же, кроме́ сего́, да разуме́ются. Глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Христе́ мой Преблаги́й, отжени́ тьму от мра́чнаго ума́ моего́,/ и просвети́ отягче́нную мою́ ду́шу мно́гими грехи́,/ и напра́ви мысль мою́, да досто́йно воспою́/ но́ваго сего́ страда́льца, царе́вича Дими́трия.

В му́ченических ли́цех предстоя́ и неизрече́нный свет зря, страда́льче Дими́трие,/ просвети́ моя́ недоуме́нная помышле́ния,/ я́ко да воспою́ тя, я́коже подоба́ет ми рещи́.

А́ще раб твой и уби́йца земна́го тя ца́рства и лиши́,/ ты же вме́сто того́, страда́льче Дими́трие, Небе́сное восприя́л еси́/ и, та́мо наслажда́яся Боже́ственных красо́т и весе́лия,/ моли́ Христа́ Бо́га дарова́ти нам ве́лию ми́лость.

Богоро́дичен: Ле́ствица еси́ вои́стинну высо́кая Ты, Влады́чице, ю́же Иа́ков ви́де,/ я́ко А́нгели Бо́жии восхожда́ху и низхожда́ху по ней,/ Госпо́дь же утвержда́шеся на Тебе́,/ очи́сти ти́ну грехо́в мои́х/ и спаси́ мя, недосто́йнаго раба́ Твоего́.

Катава́сия пра́здника.

Песнь 3

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

Егда́ оста́вль земна́го ми́ра те́мность,/ страда́льчески же обагре́но кро́вию те́ло твое́ скрыв на У́глече,/ ду́шу в Небе́сныя оби́тели, Дими́трие, всели́л еси́, прехва́льне.

Но́щи и тьмы сы́нове нареко́шася уби́йцы беззако́ннии:/ я́ко а́гнца бо тя непоро́чна, ноже́м сбодо́ша,/ хода́таи твоему́ венцу́ Боже́ственному, Дими́трие, бы́вше.

Исцеле́ния струи́ источа́еши/ ко гро́бу твоему́, му́чениче Дими́трие, ве́рою притека́ющим,/ благода́рно же ра́дование подае́ши пою́щим:/ несть свят, я́коже Бог наш.

Богоро́дичен: Мари́е, злата́я кади́льнице,/ страсте́й мои́х отжени́ смрад и утверди́ мя,/ коле́блема прираже́ньми лука́ваго ратобо́рца.

Ин

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ еди́не Человеколю́бче.

Ю́ношескаго соверше́ннаго цве́та не доспе́в,/ пожа́лся еси́, непови́нный страда́льче Дими́трие,/ и ну́ждную смерть претерпе́л еси́,/ того́ ра́ди ны́не лику́еши с ли́ки му́ченическими,/ предстоя́ у Царя́ и Бо́га всех.

Смерть твоя́ уби́ раба́ твоего́ и уби́йцу, благоро́дне,/ нарица́вшихся же во твое́ благоро́дное и́мя та́кожде до конца́ всех погуби́,/ ты же сме́ртию твое́ю ве́чный живо́т приобре́л еси́.

Лю́тое колеба́ние бысть в Русстей земли́ по сме́рти твое́й, благове́рный Дими́трие,/ от о́нех злых и наве́тных челове́к, лжу́щихся и́менем твои́м;/ Бог же моли́тв ра́ди твои́х до конца́ всех погуби́/ и лю́тое, колеба́ние от них укроти́.

Богоро́дичен: А́ще Бог Тя избра́ Себе́ Небе́сное селе́ние, Де́во Ма́ти Чи́стая,/ и кто не подиви́тся пресла́вному рождеству́ Твоему́,/ и́мже всех искупи́ от кля́твы зако́нныя?/ Тем и аз молю́ Ти ся:/ свободи́ и мене́, недосто́йнаго раба́ Твоего́, от кля́твы грехо́вныя.

Седа́лен, глас 4

Подо́бен: Ско́ро предвари́:

Наста́, празднолю́бцы, све́тлое торжество́,/ па́мять сла́вная страстоно́сца Христо́ва,/ веселя́щи вся́ческая, сия́ющи в ми́ре заря́ми чуде́с/ Те́мже непреста́нную благода́ть твои́ми моли́твами/ у Христа́ испроси́, му́чениче Дими́трие, душа́м на́шим и ве́лию ми́лость.

Сла́ва: Я́ко от младе́нства лише́н еси́ земна́го ца́рства, благоро́дне Дими́трие,/ и в того́ ме́сто в Небе́сное пресели́вся,/ та́мо сподо́бился еси́ Небе́сная блага́я ви́дети,/ и ны́не я́сно зри́ши Святу́ю Тро́ицу/ и мо́лишися о держа́ве твои́х сро́дников и за вся ве́рныя лю́ди,/ во е́же бы им получи́ти вся блага́я и поле́зная.

И ны́не, Богоро́дичен:

Де́во Всенепоро́чная, Я́же пресу́щнаго Бо́га ро́ждшая,/ с му́чеником Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая.

Песнь 4

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Кро́вию страда́ния тле́ннаго смра́да избежа́в, Богому́дре,/ вме́сто земна́го Небе́снаго Ца́рствия насле́дник был еси́, страстоте́рпче,/ тем вси, чту́ще, тя ублажа́ем.

А́нгельскаго селе́ния во дво́рех пребыва́еши/ и в Русстей земли́ благода́ть источа́еши/ к ра́це моще́й твои́х любо́вию припа́дающим, страда́льче, и вопию́щим:/ сла́ва си́ле Твое́й, Го́споди.

Две́ри Небе́сныя све́тло отверзо́шася, прие́мше тя, му́чениче,/ и Це́рковь тя ны́не име́ет, ликовству́ющи со избра́нными, пою́щи Бо́гу:/ си́ле Твое́й сла́ва, Человеколю́бче.

Богоро́дичен: Свяще́ннии провозвести́ша дре́вле гла́си чревоноше́ния Твоего́ глубину́,/ и́хже сбытие́ ви́дяще, Чи́стая, пое́м:/ си́ле Твое́й сла́ва, Влады́чице.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Тих/ си́ле Твое́й сла́ва, Человеколю́бче.

Вме́сто земны́я высоты́, Небе́сную дости́гл еси́, благоро́дне Дими́трие,/ и ны́не с пра́ведными ли́ки водворя́ешися,/ и пое́ши, и сла́виши Бо́га, Ему́же пое́м:/ си́ле Твое́й сла́ва, Человеколю́бче.

Удиви́ Бог всех Свои́х чудотворе́нием,/ я́ко посла́ на раба́ твоего́ уби́йцу не́коего врага́ и отме́тника пра́выя на́шея ве́ры,/ наре́кшагося тезоиме́нством твои́м,/ да све́ржет уби́йцу твоего́ с престо́ла ца́рска, е́же и бысть.

Царь царе́й и Госпо́дь господе́й дарова́ тебе́ вме́сто земна́го ца́рства Небе́сное,/ рабу́ же твоему́ и уби́йце даде́ зде зло́е отмще́ние,/ во о́ном же ве́це по лука́вству сугу́бая муче́ния,/ я́коже Сам, вся ве́дый, весть.

Богоро́дичен: Ада́мова дщи и вну́ка Ты была́ еси́, Влады́чице,/ от него́же весь род челове́ч произы́де,/ Ты же всех Живо́т породила́ еси́, Христа́ Бо́га на́шего,/ Его́же моли́, да спасе́т ду́ши на́ша,/ я́ко Благ и Человеколю́бец.

Песнь 5

Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы.

Му́чениче Дими́трие, я́ко звезда́ пресве́тлая, в Русстей земли́ возсия́л еси́,/ Це́рковь Христо́ву све́том Богоразу́мия озари́в,/ тьму же от нея́ отгна́в неве́дения,/ просвети́л еси́ ту пресла́вных чуде́с явле́нием.

Име́я к Бо́гу дерзнове́ние,/ Боже́ственное твое́ торжество́, му́чениче, творя́щия/ и честно́е твое́ страда́ние ве́рою чи́стою хва́лящия помина́й, преблаже́нне,/ и от бу́ри, и бед, и напа́стей спаса́й.

Ты, я́ко крин благоцвету́щ, тече́нием кро́ве твоея́ показа́лся еси́, блаже́нне,/ и, грозд мы́сленный виногра́да Христо́ва, благово́нием чуде́с мир облагоуха́л еси́,/ ве́рою тя, му́чениче, сла́вящия.

Богоро́дичен: Но́во я́ко Младе́нца нам Преве́чное Сло́во родила́ еси́,/ двема́ во́лема и де́йствы су́ща сугу́ба,/ я́ко Челове́ка ку́пно же и Бо́га, Всенепоро́чная.

Ин

Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Рожде́ние твое́ от ца́рска ко́рене бысть,/ убие́ние же твое́ от ра́бскаго зва́ния случи́ся,/ ты же, страда́льче Дими́трие, сим не повреди́лся еси́,/ но и па́че от земна́го ца́рствия в Небе́сное пресели́лся еси́.

Ей, вои́стинну рече́ся, я́ко пра́ведник и по сме́рти жив бу́дет,/ та́кожде и ты, непови́нный страда́льче Дими́трие, и по сме́рти твое́й жив/ и ца́рствуеши со все́ми святы́ми во Ца́рствии Небе́снем.

Ве́лия ра́дость сотвори́ся по всей Русстей земли́,/ я́ко Бог моли́твами твои́ми погуби́ вся враги́/ и наве́тники челове́ки, смуща́ющия держа́ву сро́дник твои́х,/ о ни́хже ны́не мо́лишися дарова́ти им ве́лию ми́лость.

Богоро́дичен: Из Тебе́ Бог произы́де и спасе́ние дарова́ всему́ ро́ду челове́чу./ Те́мже и аз, недосто́йный раб Твой, молю́ Ти ся, Пречи́стая:/ спасе́ние ми да́руй, я́ко да пою́ Тя и велича́ю, Де́во Всепе́тая.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Разже́гся за́вистию, раб уби́йца победи́ся властолю́бием/ и к за́висти уби́йство припле́те:/ закла́ тя, я́ко а́гнца непоро́чна, муч́ениче,/ отмще́ния же пра́веднаго не убежа́.

И́стинную ча́шу от твои́х крове́й страда́льческих поче́рпл еси́, прехва́льне му́чениче,/ и сию́ всегда́ предлага́еши Це́ркви,/ и пита́еши твои́ми чудесы́, Дими́трие, вопию́щия Христу́:/ от тли, Бо́же, изба́ви нас.

Я́ко пречеетна́ же́ртва, та́йней трапе́зе принесе́н быв заколе́нием, му́чениче,/ в Небе́сных оби́телех пресла́вно водворя́ешися,/ зря сла́ву Бо́жию и прие́мля боле́зней твои́х по́чести и страда́ния.

Богоро́дичен: На Тя соше́дши роса́ Небе́сная/ и олядене́вшую зе́млю, Присноде́во, Богоразу́мия вода́ми напои́вши,/ многопло́дну яви́.

Ин

Ирмо́с: Бе́здна грехо́в и прегре́шений бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о Упра́вителю, и спаси́.

Чу́дно па́ки и ди́вно ви́дети, я́ко раб твой и уби́йца,/ седя́ на престо́ле оте́чествия твоего́ и слы́ша издале́ча благоро́дное твое́ и́мя,/ боя́знию обдержа́ся и сме́ртию сконча́ся,/ ты же при́сно живе́ши в Ца́рствии Небе́снем.

А́ще и во еди́ном часе́, лю́тую сию́ смерть претерпе́л еси́, страда́льче Дими́трие,/ но со многострада́вшими му́ченики ве́чный живо́т приобре́л еси́/ и ны́не с ни́ми наслажда́ешися ра́йския красоты́ и весе́лия.

Ди́вство ве́лие показа́ Бог тобо́ю,/ ка́ко по толи́цех ле́тех вопию́щи непови́нная кровь твоя́,/ а́ки А́велева на Ка́ина, на раба́ твоего́ и уби́йцу,/ и́же и царь бысть, и прише́дши, зле погуби́ его́./ Ты же при́сно ра́дуешися, пребыва́я у Христа́ Царя́ и Бо́га всех.

Богоро́дичен: Из ко́рене Иессе́ева прозябла́ еси́, Влады́чице,/ и ко́рень породила́ еси́, всех Царя́, Христа́ Бо́га на́шего,/ от Него́же вси спасе́ние получа́ем./ Тем непреста́нно моли́ Его́ дарова́ти нам ве́лию ми́лость.

Конда́к, глас 8:

Возсия́ днесь в сла́вней па́мяти твое́й ве́рным весе́лие,/ я́ко бо доброра́сленный грезн, прозя́бл еси́/ и Христу́ красе́н плод прине́сл еси́ себе́;/ те́мже и по убие́нии твое́м соблюде́ те́ло твое нетле́нно,/ страда́льчески обагре́ное кро́вию./ Благоро́дне свя́те Дими́трие,/ соблюда́й оте́чество твое́ и град твой невреди́м,/ тому́ бо еси́ утвержде́ние.

И́кос:

Я́ко а́гнец непоро́чен, кровь твою́ излия́л еси́, Богому́дре Дими́трие,/ и от Благода́теля всех Бо́га чуде́с дар прия́л еси́,/ и вме́сто тле́ннаго обре́л еси́ бога́тство нетле́нное,/ предстои́ши бо престо́лу сла́вы всех Царя́./ Ему́же о нас, му́чениче, моли́ся,/ да твои́ми моли́твами от бед свободи́вшеся, ра́достно возопие́м, глаго́люще:/ ра́дуйся, ве́рных прави́телю./ Ра́дуйся, ве́ры тве́рдое забра́ло./ Ра́дуйся, чу́до чуде́с пресла́вное/ и приста́нище ти́хое притека́ющих к тебе́./ Ра́дуйся, ко́реню ве́ры и моле́бниче о моля́щих ти ся./ Ра́дуйся, оте́честву твоему́ похвала́/ и во́инству на́шему на враги́ побо́рник./ Сохраня́й град твой невреди́м,/ тому́ бо еси́ утвержде́ние.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть,/ Христо́с же простре́ Богочести́вым отроко́м ро́су духо́вную,/ Сын благослове́н и препросла́влен.

Собла́зн лука́ваго раба́ и того́ хи́тростей превы́ше,/ я́ко победи́тель изря́ден, му́чениче, быв, просла́вился еси́, зовы́й:/ Бо́же, благослове́н еси́.

Луча́ми, я́ко звезда́, Собо́рную Це́рковь чудесы́ просвети́л еси́,/ ве́рою же притека́ющим к ра́це моще́й твои́х исцеле́ние неоску́дно подае́ши, преблаже́нне, и зову́щим:/ Бо́же, благослове́н еси́.

А́ки а́гнец непоро́чен и кади́ло благоприя́тно,/ А́гнцу и́стинному и Па́стырю, му́чениче, прине́слся еси́ в приноше́ние всебога́тно/ и прия́тно всесожже́ние, Ему́же пое́м:/ благослове́н Бог оте́ц на́ших.

Богоро́дичен: Невеще́ственнаго Све́та вселе́ние Твое́ чре́во быеть,/ светлостьми́ Боже́ственнаго ра́зума безбо́жие отгна́вшаго,/ Пречи́стая Богоневе́сто Отрокови́це./ Ему́же пое́м, взыва́юще:/ благослове́н Бог оте́ц на́ших.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Боже отец на́ших.

Мно́ги ко́зни умышля́ше на тя раб твой и уби́йца,/ да преда́ст тя непови́нней и лю́тей сме́рти, я́коже и бысть;/ по́слежде же сам живота́ своего́ гонза́ет и ца́рства отбыва́ет,/ ты же, страда́льче, во веки ца́рствуеши.

Из чре́ва ма́терия изы́де, и не во мно́зе вре́мени настоя́щее се житие́ ви́де,/ и лю́тою и непови́нною сме́ртию от о́наго раба́ своего́ и уби́йцы ко Го́споду оты́де,/ и в кро́вы Небе́сныя всели́ся.

Тече́т сла́ва, а́ки река́, в Русстей земли́, пове́дающи и непови́нную смерть твою́:/ ка́ко повеле́нием о́наго раба́ твоего́/ таково́ю сме́ртию ве́чный живо́т себе́ получи́л еси́.

Богоро́дичен: Род земны́х по достоя́нию воспе́ти Тя не мо́жет, Влады́чице,/ аз же, окая́нный и скве́рный, ка́ко могу́ простре́ти недосто́йныя устне́ мои́/ и воспе́ти Тя, Де́во Всепе́тая?

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Вшед, му́ениче, в небе́снаго кру́га тече́ния, на доброде́тельный возду́х,/ страда́ньми препоя́сан, Крест за ски́петр в десну́ю ру́ку име́я,/ сца́рствовати Христу́ сподо́бился еси́, Дими́трие царе́виче./ Моли́ спасти́ся нам, пою́щим:/ благослови́те, вся дела́ Госпо́дня, Го́спода.

Укра́шен ра́зумом, кра́сному Влады́це предстои́ши,/ све́тел при́сно, я́ко победоно́сец Богоприя́тен,/ укроти́ моли́твами твои́ми ва́рварская нахожде́ния/ и низложи́ муча́щее нас искуше́ние,/ согнета́ющее злом во глубину́ поги́бели, страстоте́рпче Дими́трие, пою́щих:/ благослови́те, вся дела́ Госпо́дня, Го́спода.

Пречестна́я твоя́ па́мять, освяща́ющи мир, приспе́, всехва́льне страстоно́сче,/ в ню́же мо́лимся получи́ти тобо́ю заступле́ние, Дими́трие,/ пою́щим сла́ву блага́го уго́дника:/ благослови́те, вся дела́ Госпо́дня, Го́спода.

Богоро́дичен: Свяще́нных проро́к честны́й лик Тя пропису́ет, киво́т и несеко́мую го́ру,/ жезл и дверь, е́юже, я́ко весть, про́йде Вы́шний/ и па́ки затворе́ну оста́ви Тя Де́ву.

Ин

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Из отца́, благочести́ва царя́, благода́ти тезоиме́нна,/ ма́тере же цари́цы, госпожи́ нарече́нныя, произше́л еси́, благоро́дне Дими́трие,/ и самого́, ма́тере градово́м, Го́рняго Иерусали́ма, дости́гл еси́./ Того́ ра́ди мо́лим тя:/ не преста́й моли́ти о душа́х на́ших.

Я́ко а́гнец незло́бив, ничи́мже проти́вися рабу́ твоему́ и уби́йце,/ он же за́вистию диа́волею ят бысть/ и предаде́ тя непови́нней сме́рти,/ того́ ра́ди живота́ своего́ зле гонза́ет,/ ты же при́сно пребыва́еши во Ца́рствии Небе́снем.

Яви́ся пе́рвый враг в Русстей земли́ по сме́рти твое́й,/ и́же пре́жде нося́й на себе́ о́браз и́ноческ,/ последи́ же све́рже его́ с себе́,/ и возложи́ на ся тезоимени́тство твое́, и бысть царь,/ Бог же моли́тв ра́ди твои́х до конца́ сего́ погуби́.

Богоро́дичен: И́стинная еси́ Ма́ти Небе́снаго Царя́ и Бо́га всех, Влады́чице:/ Тобо́ю весь род челове́ч обнови́ся/ и от дре́вния кля́твы свободи́ся./ Те́мже и аз, недосто́йный, молю́ Ти ся:/ свободи́ и мене́, непотре́бнаго раба́ Твоего́, от содержа́щаго греха́ моего́.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная,/ тем Всепе́тую Богоро́дицу велича́ем.

Обре́л еси́ от Христа́ возме́здие, му́дре му́чениче,/ пра́вды вене́ц прии́м и ра́дость неконча́емую,/ и, Небе́снаго селе́ния во дво́рех пребыва́я,/ держа́ву оте́чества твоего́ помина́й, му́чениче Дими́трие.

Егда́ принесе́ни бы́ша честны́я твоя́ мо́щи, страстоте́рпче Дими́трие,/ тогда́ святи́тели, обстоя́ще одр,/ царь же, и кня́зи, и вси русстии наро́ди/ воскли́кнуша ку́пно па́мять ве́чную, Христа́ велича́юще.

Му́ченик днесь сосло́вие, святы́х и пра́ведных ду́ши,/ я́ко победоно́сца тя и слико́вника прия́ша, му́чениче Дими́трие,/ с ни́миже ра́дуяся, пое́ши Бо́га в Тро́ице, спаса́ющаго ду́ши на́ша.

Богоро́дичен: Разуме́вше издале́ча прозорли́выма очи́ма, проро́цы/ Тя я́ве провозвести́ша, хотя́щую Ма́терь бы́ти Вседе́телю и всех Влады́це./ Тем Тя пое́м, Всепе́тая Богоро́дице,/ и испове́дуем, я́ко вои́стинну су́щую Богоро́дицу.

Ин

Ирмо́с: Ужасе́ся о сем не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Тезоимени́т еси́, страда́льче, дре́внему великому́ченику Дими́трию Селу́нскому,/ его́же у́бо моли́твами сла́вный му́ченик Не́стор Ли́я уби́,/ ты же и́менем твои́м раба́ твоего́ и уби́йцу зле погуби́л еси́.

А́ще, а́ки клас незре́л, и пожа́лся еси́ теле́сне, благове́рне царе́виче Дими́трие,/ но благоро́дною твое́ю душе́ю невреди́м пребы́л еси́,/ и ны́не пребыва́еши в Небе́сных селе́ниих, ра́дуяся,/ и весели́шися, поя́ и славосло́вя Го́спода.

Во осмоле́тном во́зрасте ко Го́споду отше́д/ и со многому́чившимися му́ченики в ра́дость и весе́лие вшед,/ ра́дуешися с ни́ми и весели́шися у Христа́ и Бо́га всех,/ Его́же поя́, моли́ся о нас.

А́ще и не во мно́зем вре́мени пострада́л еси́, но во еди́ном часе́,/ сию́ лю́тую и непови́нную смерть претерпе́л еси́, страда́льче Дими́трие,/ сего́ ра́ди Бог введе́ тя в ве́чное весе́лие и неконча́емую ра́дость.

Богоро́дичен: Соприсносу́щное Сло́во Отцу́ и Ду́ху во чре́ве Твое́м заче́нши/ и без се́мене поро́ждши, Ма́ти Де́во Чи́стая,/ от Него́же, ве́рнии, спасе́ние и просвеще́ние прие́млем душа́м и те́лом на́шим,/ Того́ моли́, да спасе́т ду́ши на́ша, я́ко Благ и Человеколю́бец.

Свети́лен:

Я́ко цвет красне́йший, от ца́рска прозя́бл еси́ ко́рене, прекра́сне Дими́трие,/ и обагре́нием страда́ния твоего́, я́ко ца́рскою порфи́рою, обагри́лся еси́ кро́вию./ Тем всечестну́ю твою́ па́мять любо́вию творя́щия от бед спаса́й.

Богоро́дичен:

Стоя́ще о́крест Тебе́ де́вы Богому́дрыя, Богороди́тельнице Мари́е,/ я́коже царе́вы дще́ре, Сы́ну Твоему́ приведо́шася невестоле́пно, Пречи́стая, я́ко Царю́ вся́ческих,/ Его́же, Ма́ти Де́во Отрокови́це, о нас моли́.

На хвали́тех стихи́ры на 4, глас 4.

Подо́бен: Дал еси́ зна́мение:

Дал еси́ зна́мение Це́ркви Твое́й, Го́споди,/ новоявле́ннаго чудотво́рца,/ благове́рнаго царе́вича Дими́трия,/ непови́нно пострада́вшаго/ и кровь свою́, я́ко во́ду, пролия́вшаго:/ Тебе́ бо, все́ми владу́щаго, возлюби́в чи́стым се́рдцем,/ душе́ю сокруше́нною бысть побо́рник ве́ры/ и исто́чник чуде́с,/ потопи́ бесо́вская ополче́ния.

От ко́рене изра́сл еси́ благочести́ваго,/ розга́ благове́рная, Дими́трие,/ из младе́нства Крест, я́ко ору́жие, на ра́мо твое́ взем,/ ве́ру, я́ко щит, наде́жду, я́ко броня́,/ кро́тость и незло́бие, я́ко оско́рд,/ побежда́ющия враги́ и бесо́вская ополче́ния/ и тех прило́ги,/ сего́ ра́ди, лику́я со А́нгелы,/ непреста́нно моли́ о душа́х на́ших.

Я́ко звезда́ пресве́тлая,/ просвеща́ющи ду́ши ве́рных/ чуде́сными сия́нии,/ страстоно́сче Госпо́день, благове́рный Дими́трие,/ мрак страсте́й и боле́зней на́ших отгоня́еши,/ здра́вие же всем да́руеши,/ любе́зно целу́ющим многострада́льный твоя́ мо́щи,/ моли́твенниче о душа́х на́ших.

Сла́ва, глас 8:

Прииди́те днесь, собо́ри Русстии,/ и ви́дите незло́биваго а́гнца,/ закла́ннаго непови́нно,/ победоно́сца Дими́трия./ Те́лом у́бо во гро́бе погребе́н бысть, я́ко мертв,/ душе́ю же на Небесе́х со А́нгелы и с му́ченики ликовству́ет, я́ко жив,/ я́коже свиде́тельствуют и богодарова́нная его́ чудеса́./ Ему́же, пою́ще, возопие́м:/ страстоно́сче Христо́в Дими́трие,/ смоле́бники прии́м А́нгельския ли́ки и му́ченики,/ моли́ся Пресвяте́й Тро́ице/ ве́рно чту́щему тя наро́ду здра́вие дарова́ти, и на враги́ одоле́ние,/ и спасти́ ду́ши на́ша.

И ны́не, пра́здника.

На Литурги́и слу́жба му́ченическая.

Моли́тва

О пресла́вный и ди́вный в чудесе́х, красото́ му́чеников, страстоте́рпче царе́вичу кня́же Дими́трие! Ско́ро предста́ни Небе́сному Царю́ и му́ченическия твои́ ру́це о нас, гре́шных, моле́бне к Нему́ простри́, я́ко име́яй дерзнове́ние вели́ко; сохрани́ же твои́ми моли́твами град сей, и вся гра́ды и ве́си правосла́вныя, и Святе́йшаго Патриа́рха (и́мя рек) и преосвяще́нныя митрополи́ты, архиепи́скопы, епи́скопы и весь свяще́нный чин церко́вный, и в пала́те бра́тию на́шу, и вся правосла́вныя христиа́ны; всех нас приими́ во твое́ заступле́ние, и от всех бед и зол избавля́я, и от наше́ствия ви́димых и неви́димых борю́щих нас враго́в свобожда́я, и тех всяк наве́т и злохи́трство погубля́я и отгоня́я; та́же прегреше́ний на́ших проще́ние испроси́, и в век бу́дущий Небе́снаго Ца́рствия нас сподо́би, и спасе́нных Бо́гу предста́ви, благода́тию и человеколю́бием Го́спода и Спа́са на́шего Иису́са Христа́, Ему́же честь и поклоне́ние подоба́ет, ны́не, и при́сно, и во ве́ки веко́в. Ами́нь.

НА ВЕЧЕ́РНИ

Блаже́н муж: 1-й антифо́н. На Го́споди воззва́х:стихи́ры глас 2.

Подо́бен: Егда́ от Дре́ва:

О́тче Богому́дре Евфроси́не,/ ты от утро́бы ма́терии Христо́ви прибли́жися/ и, всем се́рдцем Тому́ прилежа́/ и от свои́х по́двиг Бо́гу Вседержи́телю/ плоды́ досто́йны принося́, преподо́бне,/ доброде́тельными венцы́ украша́емь,/ тем благи́х наслажде́ние и восприя́тие/ обре́те, досточу́дне.

Преподо́бне о́тче, прему́дре Евфроси́не,/ и́же пе́рвее к тебе́ в пусты́ню прише́дшу Серапио́ну безмо́лвствовати/ и ма́ло ему́ пребы́вшу,/ оты́де без благослове́ния от Тебе́/ и нача́ дре́вие сещи́, и́же, у твоея́ оби́тели,/ и се́чивом внеза́пу косну́ся нозе́ свое́й,/ и те́плою ве́рою па́дает на но́зе твоя́,/ проще́ние прося́ о согреше́нии./ Ты же, о́тче, Учи́телю своему́ Христу́ подо́бяся/ незло́бием и кро́тостию,/ Его́же ра́ди потруди́лся еси́ в жи́зни сей,/ проще́ние и исцеле́ние ему́ да́руеши,/ па́ки же и до исхо́да души́ своея́/ пребы́сть в послуша́нии у тебе́,/ и в воздержа́нии, и труде́х, е́же к Бо́гу./ Те́мже и мы твою́ па́мять любо́вию почита́ем, преподо́бне.

Преподо́бне о́тче, Евфроси́не всехва́льне,/ любо́вь име́л еси́ к соверше́нию доброде́телей./ Оби́тели своея́ врата́ отве́рзл еси́,/ и ни́щим бысть покро́в и прибе́жище,/ и всем всяк был еси́, по апо́столу:/ оби́димым помога́ше, печа́льныя утеша́ше, я́ко оте́ц чадолюби́в./ Сего́ ра́ди почита́ем тя/ и светоно́сную па́мять твою́ пра́зднуем, Богоблаже́нне.

О́тче преподо́бне, Евфроси́не че́стне,/ пло́ти тле́ния возненави́дел еси́,/ а́нгельски пожи́л еси́ на земли́,/ воздержа́нием и ве́рою,/ бде́нием же и моли́твами, и всено́щным стоя́нием/ ски́тским отце́м подо́бяся./ И бра́та, прише́дша в твою́ оби́тель, свяще́нства сан иму́ща,/ мня́щася свя́та и неве́рием одержи́ма/ о твое́м по Бо́зе доброде́тельном житии́,/ ты же неве́рствие его́ смири́л еси́/ и над смире́нными не возноси́тися рек ему́./ Тем и А́нгел земны́й обре́теся, блаже́нне,/ и Небе́сный челове́к./ Христа́ моли́ дарова́ти душа́м на́шим ве́лию ми́лость.

Сла́ва, глас 8:

Прииди́те, и́нок мно́жество, днесь,/ псало́мская пе́ния и цве́ти духо́вныя принесе́м/ я́ко вои́стинну и́ноческому удобре́нию и преподо́бным сожи́телю,/ хва́ляще, си́це рцем:/ ра́дуйся, свети́льниче многосве́тлый,/ возводя́ ко Христу́ и́нок мно́жество./ Ра́дуйся, богохрани́мому гра́ду Пско́ву похвало́ и утвержде́ние,/ и всем ве́рным благоути́шное приста́нище,/ и очище́ние боля́щим во гресе́х,/ на Боже́ственное тех возвыша́я раче́ние./ Тем пречестну́ю твою́, и святу́ю, и А́нгелом гове́йную соверша́юще па́мять,/ преподо́бне о́тче наш Евфроси́не,/ Боже́ственнаго человеколю́бия про́сим получи́ти/ твои́ми к Бо́гу моли́твами/ и ми́ру смире́ние дарова́ти/ и душа́м на́шим ве́лию ми́лость.

И ны́не, Богоро́дичен: Царь Небе́сный:или́ пра́здника.

Вход. Проки́мен дне. И чте́ния 3 преподо́бническая (зри 21 мая)

На лити́и стихи́ры глас 6. Самогла́сны:

О́тче Богому́дре Евфроси́не,/ а́ще и последи́ ле́ты тя новопросвеще́нная Ру́сская страна́ возрасти́,/ но дре́вних че́сти сподо́бися/ и дарова́ния чуде́с досто́йно от Го́спода прие́м,/ и́нок же мно́жества в твое́й оби́тели/ песносло́вием и пра́вою ве́рою Христа́ хва́лят,/ твои́м покаря́ющеся уче́нием,/ моли́ спасти́ся душа́м на́шим.

Преподо́бне о́тче Евфроси́не,/ любве́ ра́ди Христо́вы/ вся, я́же на земли́, преоби́дел еси́,/ и, в пусты́ню всели́вся,/ пло́ти по́хотное мудрова́ние умертви́л еси́,/ и по́стническими труды́ и зе́льным воздержа́нием/ свое́ житие́ уясни́л еси́./ Отоню́дуже и ученики́ собра́в,/ ревну́ющия твоему́ житию́,/ сих Христу́ приве́л еси́,/ Его́же моли́ спасти́ всех, тебе́ пою́щих.

Преподо́бне о́тче,/ теле́сныя стра́сти зе́льным воздержа́нием и чи́стыми моли́твами,/ по́том же поще́ния и смире́нием угаси́,/ и в чудесе́х сла́вна тя показа́ Пско́вская страна́,/ о́тче Евфроси́не./ Тем украси́ тя Небе́сными дарми́/ Иису́с Человеколю́бец и Спас душа́м на́шим.

Сла́ва, глас 8:

Весели́ся, богохрани́мый гра́де Пско́ве,/ прозябы́й такова́го граждани́на,/ и́же во блаже́нных блаже́ннаго Евфроси́на./ Сей у́бо, прему́дростию Свята́го Ду́ха украси́вся,/ вся́ко воздержа́ние доброде́тельным свои́м житие́м премину́,/ и бу́дущия ра́ди жи́зни над То́лвою реко́ю всели́ся,/ и огра́ду ве́лию сотвори́ и́ноком во спасе́ние,/ и ника́коже боя́ся неви́димых враг толче́ния,/ а́ще бо и мно́гажды нань приходя́щих,/ скрежета́нием зубны́м я́рость показу́юще./ Он же моли́твами свои́ми,/ я́ко дым, безве́стны сотвори́ их./ О, непоро́чныя души́ и кре́пкаго терпе́ния его́!/ Того́ и мы хода́тая приводя́ще, мо́лимся:/ умоли́ Христа́ от собла́зн льсти́ваго изба́витися нам/ и спасти́ся душа́м на́шим.

И ны́не, пра́здника.

На стихо́вне стихи́ры, глас 1.

Подо́бен: Небе́сным чино́м:

Преподо́бне о́тче Евфроси́не,/ боля́щим ты яви́ся исцеле́ние и от бесо́в свобожде́ние,/ и всем, притека́ющим к тебе́ с ве́рою, к цельбоно́сному гро́бу твоему́,/ и прося́щим по́мощи и заступле́ния./ Ты же моли́твами свои́ми исцеле́ние неду́гов неоску́дно подае́ши,/ о́тче Богоприя́тне, моли́твенниче о душа́х на́ших.

Стих: Честна́ пред Го́сподем/ смерть преподо́бных Его́.

Вне пло́ти и ми́ра доброде́телию быв/ и тем житие́м просла́вив на земли́/ Го́спода сла́вы, о́тче Богому́дре,/ по достоя́нию от Него́ просла́вися,/ исцеле́ний яви́ся Боже́ственный исто́чник,/ Евфроси́не Богоприя́тне, моли́твенниче о душа́х на́ших.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Смире́н и незло́бив, кро́ток, прост, молчали́в/ был еси́ па́че челове́ка вои́стинну/ и, невеще́ствен быв в ве́щи,/ храм Бо́жий яви́ся по достоя́нию,/ и́же от Него́ прибы́вшая тебе́ дарова́ния ми́лостивно подава́я нам,/ о́тче Евфроси́не преподо́бне, моли́твенниче о душа́х на́ших.

Сла́ва, глас 4:

И́же во пло́ти, безпло́тных житию́ поревнова́л еси́, блаже́нне,/ ми́ра отверже́нием ева́нгельски Христу́ после́довал еси́,/ трудолю́бно пожи́л еси́,/ и́ночествующих стезю́, веду́щу к Небе́сному Ца́рствию, показа́./ Сего́ ра́ди пра́зднуя честну́ю па́мять твою́,/ про́сим у Христа́ Бо́га Небе́снаго Ца́рствия прича́стником бы́ти/ моли́твами твои́ми, Евфроси́не преподо́бне, о́тче наш.

И ны́не, пра́здника.

Тропа́рь, глас 4:

Жите́йскую печа́ль и всяк мяте́ж ми́ра сего́/ любве́ ра́ди Христо́вы со дерзнове́нием отве́ргл еси́, блаже́нне,/ и повеле́нная распя́тым Го́сподем Иису́сом Христо́м/ вся испра́вил еси́,/ и, Того́ яре́м взем, во всем во́ли Его́ повину́лся еси́,/ и, благочести́в де́латель, живо́тным за́поведем Христо́вым/ благотру́дно прилежа́л еси́./ И сего́ ра́ди Бог просла́ви тя/ и по преставле́нии чудеса́ показа́ от честна́го гро́ба твоего́./ Те́мже и неоску́дно угобзи́ся оби́тель твоя́,/ и ни́щим бысть бога́тное приста́нище и покро́в,/ о́тче наш преподо́бне Евфроси́не,/ моли́ Христа́ Бо́га, да спасе́т ду́ши на́ша.

Ин тропа́рь, глас то́йже:

Изволе́нием Боже́ственнаго ра́зума всели́ся в пусты́ню/ и та́мо впери́в свой ум в Небе́сныя оби́тели/ и ра́вно А́нгелом житие́ пожи́в на земли́,/ в моли́твах, и в труде́х, и в поще́ниих о́браз быв свои́м ученико́м./ Те́мже Бог, ви́дев твое́ благо́е изволе́ние,/ умно́жи тебе́ ча́да в пусты́ни,/ слез твои́х ту́чами напая́ема,/ но, я́ко име́я дерзнове́ние к Бо́гу,/ помина́й ста́до свое́, е́же собра́л еси́, му́дре,/ и не забу́ди, я́коже обеща́лся еси́, посеща́я чад свои́х,/ Евфроси́не, преподо́бне о́тче наш.

НА У́ТРЕНИ

На Бог Госпо́дь:тропа́рь пра́здника, дважды. Сла́ва,свята́го. И ны́не:Богоро́дичен по гла́су тропаря́ свята́го или́ пра́здника.

По 1-м стихосло́вии седа́лен, глас 4.

Подо́бен: Удиви́ся:

Ю́ность свою́, преподо́бне, воздержа́нием свои́м увяди́л еси́,/ стра́сти теле́сныя, я́ко пле́нника ху́да связа́в, ду́хови повину́л еси́,/ и сего́ ра́ди, о́тче Евфроси́не, Христо́с чудесы́ пресла́вно тебе́ венча́ет,/ Еди́н прославля́яй святы́х Свои́х.

Сла́ва, и ны́не, Богоро́дичен:

Умертви́ся вся кре́пость моя́ от мно́жества безме́рных зол мои́х/ и мно́гими скорбьми́ одержи́м, уже́ отча́яхся,/ но помози́ ми, Влады́чице, Евфроси́на блаже́ннаго предста́тельством,/ я́ко Ра́дость ро́ждшая, пла́чущим утеше́ние.

По 2-м стихосло́вии седа́лен, глас 4.

Подо́бен: Вознесы́йся:

Пресве́тлая и светоно́сная, о́тче Богому́дре Евфроси́не, приспе́ твоя́ па́мять,/ созыва́ющи и́нок мно́жества просла́вити и пе́ти твое́ честно́е успе́ние,/ прося́щих у Христа́ хода́тайством твои́м ве́лию ми́лость.

Сла́ва, и ны́не, Богоро́дичен:

Яви́лася еси́ вы́шши Вы́шних сил, Влады́ку ро́ждшая, Богоро́дице,/ земны́х естество́ возвы́сила еси́, Богоневе́стная./ Те́мже вои́стинну Тя Богороди́тельницу душе́ю и язы́ком, ве́рнии, сла́вим.

По полиеле́и седа́лен, глас 8.

Подо́бен: Прему́дрости:

В пусты́ню, преблаже́нне, всели́вся,/ и в ней прече́стен храм трем святи́телем воздви́же,/ и мно́жество и́ночествующих та́мо собра́л еси́, Бо́гови с тобо́ю рабо́тающих,/ и́хже сохраня́й от вся́каго лука́ваго,/ да вси благода́рственно вопие́м ти:/ преблаже́нне Евфроси́не, моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́,/ и, я́ко Младе́нца, дои́ши Зижди́теля и Го́спода./ Тем, а́нгельский и челове́ческий род,/ досто́йно сла́вим пресвято́е рождество́ Твое́ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му рождеству́ Твоему́.

Та́же степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́.Стих: Что возда́м Го́сподеви о всех, я́же воздаде́ ми? Вся́кое дыха́ние:Ева́нгелие от Матфе́я, зача́ло 43.

По 50-м псалме́ стихи́ра, глас 6:

Возложи́в себе́ к Бо́гу,/ от ю́ности, преподо́бне, ми́ра тле́нных нивочто́же вмени́в,/ па́че всего́ возлюби́л еси́ Христа́/ и, Тому́ от всея́ души́ любо́вию после́довав,/ я́ко светоза́рное со́лнце, в концы́ земли́ чудесы́ возсия́л еси́./ Ны́не со А́нгелы Престо́лу предстоя́,/ помина́й нас, я́ко обеща́лся еси́, да зове́м ти:/ ра́дуйся, на́ша похвало́, о́тче Евфроси́не.

Кано́н Богоро́дицы или́ пра́зднику, со ирмосо́м на 6, и преподо́бному кано́н на 8, глас 1. Его́же краегране́сие сицево́: Евфроси́на похвали́ти ра́зум, Бо́же мой, да́руй ми.Творе́ние Васи́лиево.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Но́во тебе́ пе́ние приношу́ моле́бно,/ во отверзе́ние уст мои́х, Евфроси́не Богому́дре,/ пода́ждь ми твои́ми моли́твами благода́ть, я́ко да воспою́ тя.

Страсте́й омраче́нием порабоще́на,/ све́тлыми моли́твами твои́ми, преподо́бне Евфроси́не, ны́не свободи́,/ да я́ко Христо́ва раба́ тя Боже́ственными воспою́ пе́сньми.

Авраа́мову страннолю́бному о́бразу ты уподо́бився, преподо́бне,/ всем оби́тели своея́ врата́ отве́рзл еси́,/ и всем всяк был еси́, утеша́я су́щия в печа́лех,/ и оби́тель твоя́, о́тче Евфроси́не, я́коже не́кое и́мя,/ че́стно ноша́шеся и во ины́х оби́телех, блаже́нне.

Христо́ви прилепля́яся от ю́ности, о́тче Евфроси́не,/ чи́стым умо́м и целому́дрием теле́сным ду́шу просвети́л еси́,/ я́ко безпло́тен, на земли́ пожи́в,/ ны́не в Вы́шних Бо́гови предстоя́, нас помина́й.

Богоро́дичен: Яви́ся вы́шши А́нгел, Бо́га вопло́щши ро́ждшагося, и погребе́на,/ и ме́ртвым нетле́ние, Де́во Чи́стая, пода́вшаго,/ Его́же моли́ спасти́ся ве́рно сла́вящим Тя.

Катава́сия пра́здника.

Песнь 3

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е/ и основа́вый на вода́х зе́млю, Всеси́льне.

Боже́ственным светоли́тием, Богому́дре, просвеща́емь/ о́тче преблаже́нне Евфроси́не,/ све́тлое и светоно́сное честно́е успе́ние твое́ любо́вию чту́щих,/ преподо́бне, твои́ми моли́твами просвети́.

Ума́ твоего́ о́ко, преподо́бне о́тче, от страсте́й мглы очи́стив,/ Пресвято́му Ду́ху прия́тно селе́ние яви́ся,/ чи́стым блиста́нием соде́лал еси́, Богоблаже́нне Евфроси́не.

Тве́рдостию ра́зума укрепля́емь, всеблаже́нне Евфроси́не,/ разли́чная мечта́ния враго́в обличи́л еси́, му́дре,/ и горды́ню тех возвы́шенную низложи́л еси́, преподо́бне.

Рачи́тель сый ми́лостиваго Христа́ своего́, о́тче Евфроси́не,/ не́коему и́ноку, в раска́яние впа́дшу о да́ннем сребре́ на сооруже́ние оби́тели твоея́,/ ты же повеле́л еси́ отда́ти,/ и, взем, отъи́де в и́ну оби́тель, и ослепе́, и приводи́м с ве́рою./ Ты же, о́тче, ми́лостивно наказу́я, Бо́жиею благода́тию да́руеши ему́ прозре́ние, я́коже при купе́ли.

Богоро́дичен: И́же пре́жде век рожде́йся от Отца́/ напосле́док неизрече́нно из утро́бы Твоея́ про́йде/ и обожи́ на́ше естество́, Ма́ти Де́во,/ И́же преподо́бных ли́ки я́ве изводя́й.

Седа́лен, глас 8.

Подо́бен: Прему́дрости:

От ю́ности, блаже́нне, вся оста́вль кра́сная же и ле́потная,/ усе́рдно после́довал еси́ Христу́, зва́вшему тя, со све́рстником свои́м./ Посто́м, отцы́ преподо́бнии, те́ло свое изнури́ли есте́,/ в моли́твах безпреста́ни бдя́ще./ Те́мже тя, о́тче, Всеве́дый Госпо́дь до́бре устроя́ет па́стыря Свои́м овца́м слове́сным./ Евфроси́не и Серапио́не, отцы́ Богоно́снии,/ моли́те Христа́ Бо́га грехо́в оставле́ние пода́ти/ чту́щим любо́вию святу́ю па́мять ва́шу.

Сла́ва, и ны́не, Богоро́дичен: Я́ко Де́ву и еди́ну в жена́х:(зри 15 мая)

Песнь 4

Ирмо́с: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени –пока́жешися./ Сла́ва си́ле Твое́й, Го́споди.

Зако́н Бо́жий сохраня́я невре́дно, преподо́бне,/ чистоту́ и смире́ние ты от младе́нства име́л еси́,/ и житие́ нескве́рно, и нрав ми́лостивей, о́тче досточу́дне Евфроси́не.

Возвы́сил еси́ к Бо́гу серде́чное жела́ние, и смири́л еси́ па́губныя стра́сти,/ и лука́вствия бесо́в низложи́л еси́, преподо́бне Евфроси́не,/ и́ночествующим недви́жимое основа́ние.

Звезда́ све́тлая яви́ся в конце́х, пусты́ню же град сотвори́л еси́/ и мно́жество учени́к собра́л еси́,/ Христу́ сраспя́лся еси́, крест свой на ра́мо взем,/ воздержа́нием сам себе́ изнури́л еси́, свя́те Евфроси́не,/ моли́ непреста́нно о всех нас.

В нищете́ пожи́в, преподо́бне, доброде́тельми обогати́лся еси́/ и, жития́ све́тлостию быв испо́лнен, преста́вися к Вы́шнему гра́ду, о́тче Евфроси́не,/ и мо́лишися изба́витися от бед ста́ду твоему́.

Богоро́дичен: Святы́х Свята́го па́че смы́сла и естества́ породила́ еси́, Богоро́дице,/ освяще́ние, и избавле́ние, и оставле́ние грехо́в ве́рным хода́тайством Твои́м подаю́ща/ и́же Его́ сла́вящим воскресе́ние.

Песнь 5

Ирмо́с: Твой мир даждь нам,/ Сы́не Бо́жий:/ ино́го бо, ра́зве Тебе́, бо́га не зна́ем,/ И́мя Твое́ имену́ем,/ я́ко Бог живы́х и ме́ртвых еси́.

Оте́ц си́рым был еси́ и пита́тель вдови́цам,/ скорбя́щим утеше́ние, оби́димым помо́щник,/ па́стырь и наста́вник ста́ду своему́, преподо́бне Евфроси́не,/ и ны́не приле́жно моли́ся Влады́це о нас.

И́нок и́стинен был еси́, простра́ннаго пути́ удаля́яся, те́сный предпочита́я;/ дости́гл еси́ широты́ ра́йския и дре́ву жи́зненному причаща́ешися,/ но и нас, ве́рою чту́щих тя, помина́й.

Се́рдце твое́ скрижа́ль чи́сту наше́д,/ Святы́й Дух, о́тче Евфроси́не, обре́те,/ дарова́ тебе́ сверше́ное безстра́стие, ве́ру тве́рду и любо́вь нелицеме́рну.

Ме́сто, е́же сподо́бися прия́ти честны́я мо́щи твоя́, преподо́бне Евфроси́не, освяти́ся/ и по мно́гим страна́м прославля́емо есть,/ я́ко в себе́ мо́щи твоя́ иму́ще.

Богоро́дичен: Свяще́ния сень я́вльшися, Мари́е,/ оскверне́нную сластьми́ окая́нную мою́ ду́шу освяти́/ и Боже́ственныя сла́вы прича́стника мя сотвори́.

Песнь 6

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Стра́хом Христо́вым утверди́ся, преподо́бне,/ те́ло, и ум, и ду́шу очи́стив от вся́кия скве́рны,/ и́миже зарю́ прия́т, Богому́дре, трисо́лнечную, Евфроси́не, о́тче всеблаже́нне.

Весь распя́лся еси́ ми́рови, о́тче Евфроси́не,/ крест Христо́в на рамо взем, блаже́нне,/ и, Того́ страсте́м подо́бяся, прича́стник бысть воскресе́нию и сла́ве лу́чшей,/ в не́йже нас помина́й.

Стягну́в те́ло твое́ воздержа́нием и чистото́ю,/ в Вы́шняя селе́ния к широте́, о́тче, дости́гл еси́.

Храм тя, вси ве́рнии, Свято́му Ду́ху све́мы,/ храм бо благоле́пен воздви́гл еси́ Бо́гови,/ в том вселе́нских учи́телей именова́л еси́ и и́нок мно́жества совокупи́л еси́./ И ны́не моли́твами твои́ми всяк неду́г отгоня́ется.

Богоро́дичен: Ви́девши, Его́же родила́ еси́, Бо́га, от ме́ртвых воста́вша,/ ра́дости испо́лнена яви́ся, Де́во Ма́ти Мари́е./ Того́ у́бо моли́ вся́ку печа́ль, Чи́стая, на́шего се́рдца до конца́ потреби́ти.

Конда́к, глас 8:

Бо́жиим светоли́тием просвеще́н, о́тче,/ по́стническое стяжа́в жи́тельство, преподо́бне,/ и́ноком предо́брый наста́вниче и по́стником благо́е украше́ние./ Сего́ ра́ди Госпо́дь, труды́ твоя́ ви́дев, да́ром чуде́с обогати́ тя,/ источа́еши бо исцеле́ния./ Мы же, ра́дующеся, вопие́м ти:/ ра́дуйся, о́тче Евфроси́не, и́ноком удобре́ние.

И́кос:

Ева́нгельский глас услы́шав, о́тче,/ вся оста́вил еси́ плотска́я мудрова́ния,/ бога́тство же и сла́ву, я́ко прах, нивочто́же вмени́в,/ и на стра́сти, я́ко безпло́тен, подвиза́ся,/ и безпло́тных ликостоя́ний чистоте́ уподо́бися,/ ра́зума дарова́ние от Го́спода прия́л еси́./ Те́мже и аз, недосто́йный и гре́шный, наде́юся прия́ти моли́твами твои́ми, преподо́бне, ми́лость в День су́дный/ и соде́янных мно́ю зол проще́ние получи́ти,/ но ты пода́ждь ми сло́во свято́е воспе́ти житие́ твое́, преблаже́нне:/ ра́дуйся, Евфроси́не, преподо́бне и Богоно́се,/ Небе́сный челове́че и земны́й А́нгеле./ Ра́дуйся, я́ко кроме́ ми́ра су́етнаго пусты́ню сотвори́л еси́,/ и оби́тель в ней соста́вив, и храм прече́стен трем святи́телем воздви́гл еси́,/ и в нем тобо́ю Бог сла́вится./ Ра́дуйся, я́ко измла́да Бо́гу послужи́л еси́/ и, мно́жество и́нок собра́в, от ни́хже слы́шиши сицева́я тебе́ глаго́лющих:/ ра́дуйся, спасе́нию на́шему хода́таю,/ и́же до́бре пасы́й ста́до свое́ от наве́т вра́жиих;/ ра́дуйся, посрами́вый бесо́в полки́./ Ра́дуйся, и́ночествующим пресве́тлый свети́льниче и сто́лпе терпе́ния;/ ра́дуйся, оте́честву своему́, гра́ду Пско́ву, похвало́ и утвержде́ние./ Ра́дуйся, всем скорбя́щим ми́лость и благоутро́бие отве́рзл еси́/ и ни́щим засту́пниче и корми́телю и уныва́ющим утеше́ние;/ ра́дуйся, приходя́щим с ве́рою к ра́це твое́й от наве́т вра́жиих изба́вителю,/ и помысло́в злых от них отгони́телю, и скорбя́щим сла́дкое утеше́ние./ Ра́дуйся, ра́дости Боже́ственныя пода́телю и чуде́с исто́чниче к тебе́ притека́ющим./ Ра́дуйся, предста́телю наш, о́тче Евфроси́не, и́ночествующим удобре́ние.

Песнь 7

Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́, огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.

Смотря́я бу́дущую жизнь, блаже́нне Евфроси́не,/ ми́рови умертви́ся вои́стинну, я́ко со́лнце, возсия́в,/ страх Бо́жий восприи́м в се́рдцы свое́м,/ вселе́нную всю возвесели́л еси́ уче́ньми, вопия́:/ благослове́н Бог оте́ц на́ших.

Зря́ще муче́ния та́мошняя мы́сленными очи́ма и се́рдцем боле́знуя вы́ну,/ чи́сто житие́ пожи́в, Богоблаже́нне, к нестаре́ющейся пи́щи преста́вися;/ в не́йже чту́щия тя помина́й, о́тче Евфроси́не, вопия́:/ благослове́н Бог оте́ц на́ших.

Украси́в доброде́тельми свое́ житие́ и свя́то сконча́в свою́ жизнь,/ усну́л еси́, преподо́бне, сном ми́рным./ Те́мже спаса́й ста́до свое́ всегда́, твою́ па́мять пра́зднующих, вопию́щих:/ благослове́н Бог оте́ц на́ших.

По Боже́ственнем твое́м преставле́нии, о́тче Евфроси́не,/ чудеса́ сотвори́л еси́ о Христе́ и лю́дем по́мощь по́дал еси́, вопию́щим:/ благослове́н Бог оте́ц на́ших.

Богоро́дичен: Прему́дрость Соста́вную и Сло́во Присносу́щное,/ Вра́ча душа́м и те́лом поро́ждшая,/ я́звы и гное́ния души́ моея́ уврачу́й лю́тыя/ и ле́тныя се́рдца моего́ исцели́ боле́зни, Де́во.

Песнь 8

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

Подвиза́вся зако́нно на земли́,/ ны́не ра́дуешися, преподо́бне Евфроси́не, со святы́ми, Небе́сный обре́те поко́й,/ соприча́стник бысть весе́лию тех и ра́дости, взыва́я:/ благослови́те, лю́дие, Го́спода и превозноси́те Его́ во ве́ки.

Слеза́ми свои́ми, о́тче Евфроси́не, лице́ свое́ умыва́я,/ житие́ проше́л еси́ и те́ми мно́жество бесо́в потопи́л еси́;/ ве́рных же мы́сли возвесели́, пою́щих:/ благослови́те, лю́дие, Го́спода и превозноси́те Его́ во ве́ки.

Богохрани́мый град Псков, и́же тебе́ стяжа́вый,/ ра́достию ра́дуется, преподо́бне Евфроси́не,/ тебе́ бо, я́ко сте́ну име́я тве́рду и столп необори́м,/ Христа́ воспева́ет, И́же тебе́ сему́ дарова́вшаго, поя́:/ благослови́те, лю́дие, Го́спода и превозноси́те Его́ во ве́ки.

Посто́м ум очища́я, кро́ток и незло́бив я́влься,/ на земли́ кро́тких живе́ши, Богому́дре Евфроси́не,/ со все́ми преподо́бными и избра́нными поя́:/ Го́спода благослови́те, лю́дие, и превозноси́те Его́ во ве́ки.

Богоро́дичен: Пощади́ нас, пою́щих Твое́, Го́споди, и́же от Де́вы неизрече́нное рождество́,/ изба́ви от стра́стных бед и скорбе́й рабы́ Своя́ мольба́ми Пречи́стыя Твоея́ Ма́тере,/ я́ко Милосе́рд и Человеколю́бец.

Песнь 9

Ирмо́с: Живоприе́мный исто́чник приснотеку́щий,/ светоно́сный свети́льник благода́ти,/ храм одушевле́нный, сень пречи́стую,/ Небесе́ и земли́ простра́ннейшую,/ Богоро́дицу, ве́рнии, велича́ем.

Я́ко у́тро, я́ко со́лнце, возсия́ па́мять твоя́,/ тьму отгоня́я душетле́нных страсте́й,/ ю́же соверша́юще, благоче́стно восхваля́ем тя ра́достными пе́сньми.

Я́ко в раи́, о́тче, воздержа́ния процве́л еси́,/ я́ко ма́слина, псало́мски яви́ся,/ ли́ца и сердца́ на́ша помазу́я ма́слом трудо́в твои́х, о́тче Евфроси́не,/ благоче́стно чту́щих свяще́нную па́мять твою́.

Днесь нам возсия́ честна́я па́мять твоя́, преблаже́нне,/ просвеща́я ду́ши и телеса́ и страсте́й мглу отгоня́я, преподо́бне./ Пода́ждь по́мощь моли́твами твои́ми, Евфроси́не о́тче,/ и наста́ви на стезю́ жи́зни,/ те́мже, досто́йно чту́ще тя, велича́ем.

Руко́ю мое́ю недосто́йною приноси́мое тебе́ с трудо́м хвале́ние,/ о́тче Евфроси́не, не пре́зри, но приими́/ и моли́ Творца́ своего́, Влады́ку и Го́спода, та́мошняго изба́вити ве́чнаго муче́ния/ тебе́ ве́рою почита́юща.

Певце́в, и́же тебе́, блаже́нне, и́скренно воспева́ющих/ и твою́ па́мять честну́ю, преподо́бне Евфроси́не, ве́рою прославля́ющих,/ освяти́, и просла́ви, и от бед избавля́й и напа́стей/ и и́же та́мо ве́чнаго, о́тче, муче́ния,/ да тебе́ всегда́ воспева́ют.

Богоро́дичен: Приими́, Пречи́стая Отрокови́це, Боже́ственную песнь,/ воздаю́щи благода́ть на Тя наде́ющимся,/ и мир испроси́ Це́рквам при́сно пода́ти/ и ве́рным посла́ти на враги́ одоле́ния и побе́ды,/ да, всяк язы́к христиа́нский, Тя велича́ем.

Свети́лен:

Пусты́ню град сотвори́л еси́ прему́дрыми о́бразы,/ отце́м украше́ние, Евфроси́не Богому́дре,/ и сию́ соверши́л еси́, я́ко мы́сленный рай, принося́щ цве́ты Боже́ственныя,/ единообра́зных мно́жества, досто́йно твою́ творя́щих па́мять успе́ния.

Сла́ва, и ны́не, пра́здника или́ Богоро́дичен:

Я́ко иму́щи милосе́рдие и ми́лость ве́лию,/ при́зри, Препе́тая Богоро́дице Де́во, на мое́ смире́ние,/ и страсте́й мглу и собла́зн жития́ разори́, Отрокови́це,/ и огня́ гее́нскаго изба́ви моли́твами Свои́ми.

На хвали́тех стихиры на 4, глас 2:

Днесь похва́льную песнь в па́мяти твое́й,/ о́тче Евфроси́не,/ тебе́ принося́щия приими́/ и предвари́ к Бо́гу моли́твами свои́ми,/ изба́ви нас и́же ошу́юю стоя́ния/ и избра́нных ча́сти сочета́тися сподо́би нас,/ да тебе́ вси, я́ко те́плаго засту́пника,/ досто́йно ублажа́ем, о́тче преподо́бне.

В пусты́ннем ме́сте, над То́лвою реко́ю,/ я́ко пресве́тлая зве́зда, возсия́л еси́,/ преподо́бне Евфроси́не,/ и мра́чная ли́ца бесо́м посрами́л еси́./ Отоню́дуже вшед к Небесе́м,/ с дерзнове́нием Престо́лу Христо́ву предстоя́,/ помина́й пра́зднующих па́мять твою́, преподо́бне,/ ми́лости обрести́ нам в День су́дный моли́твами твои́ми.

Блаже́но ме́сто, иму́ще в себе́ честны́я мо́щи твоя́, преподо́бне,/ отоню́дуже истека́ют ве́рным исцеле́ния./ Блаже́ни же и ученицы́ твои́,/ и́же тебе́ такова́ учи́теля стяжа́вше/ и такова́ отца́ ча́да нареко́шася,/ Евфроси́не пречу́дне,/ моли́твенниче те́плый о душа́х на́ших.

Ны́не всечестно́е и свяще́нное те́ло твое́,/ преподо́бне Евфроси́не,/ во оби́тели твое́й лежа́ще,/ в не́йже еще́ в жи́зни сей мно́го потруди́ся,/ исцеле́ния оби́льно источа́ет ве́рою приходя́щим./ Те́мже мо́лим тя:/ душе́внаго здра́вия нам при́сно подава́й,/ тебе́ ублажа́ющих.

Сла́ва, глас 6:

Боже́ственною любо́вию распала́емь,/ преподо́бне Евфроси́не,/ мир оста́вил еси́/ и во́льныя стра́сти Го́спода ра́ди прия́л еси́,/ труды́ и по́двиги, жа́жду и глад,/ сту́день же и зной Христа́ ра́ди претерпе́л еси́/ ив посте́ и слеза́х препроводи́л еси́ дни своя́,/ до́ндеже и стра́сти теле́сныя умертви́л еси́./ Те́мже сподо́бился еси́ пра́ведных ра́дования,/ с ни́миже моли́ся спасти́ся душа́м на́шим.

И ны́не, Богоро́дичен или́ пра́здника. Славосло́вие вели́кое. И отпу́ст.

На Литурги́и слу́жба преподо́бническая.

(Службу зри 21 марта)

Тропа́рь, глас 4:

Жите́йских молв, преподо́бне, отве́ргся,/ и, я́ко птищ, обре́те себе́ в пусты́ни безмо́лвие,/ в моли́твах и бде́нии прилежа́ Бо́гови,/ преподо́бне о́тче Пахо́мие,/ и оста́ви дре́внее пребыва́ние,/ и оты́де в пусты́ню, и в ней водвори́ся,/ и соста́ви оби́тель во И́мя Пресвяты́я Тро́ицы,/ и процве́л еси́, а́ки фи́никс,/ и бысть о́браз утеше́ния духо́внаго./ Те́мже, преподо́бне Пахо́мие,/ моли́ Пресвяту́ю Тро́ицу спасти́ся душа́м на́шим.

Конда́к, глас 4:

В пусты́ни безмо́лвствуя,/ еди́нствующу тя, Богоно́се, взыску́ющу ти Го́спода,/ Бо́гу же тебе́ не оста́вльшу еди́ному бы́ти в пусты́ни,/ и Того́ повеле́нием снидо́шася к тебе́ неколи́ко бра́тии,/ с ни́миже ти моля́щуся Го́сподеви,/ Тро́ице прече́стен храм воздви́же,/ в не́мже предстоя́ще, преподо́бне Пахо́мие,/ моли́ся о спасе́нии душ на́ших.