Стихи́ры проро́ка, глас 8.

Подо́бен: Го́споди, а́ще и на суди́щи:

Го́споди, Ты, пре́жде созда́тися,/ проразуме́л еси́ Иереми́ю сла́внаго/ и, пре́жде рожде́ния из ложе́сн, проро́ка освяти́л еси́,/ я́ко прове́дый вои́стинну ра́зума свобо́дное,/ его́же моли́твами, я́ко Ми́лостив,/ спаси́ ду́ши на́ша.

Го́споди, а́ще и в кал вве́ржен бысть Иереми́я святы́й,/ но кра́сное благово́ние у́мно восприима́ше,/ в ра́йских се́лех я́коже водворя́яся,/ его́же моли́твами, я́ко Благоде́тель,/ всех нас сохрани́.

Го́споди, Твои́ми пресве́тлыми заря́ми проро́к сия́я/ и супроти́вными зря́щеся блаже́н и че́стен,/ доброде́телей бо я́ве стыди́тся и супоста́т,/ и бу́дущая, я́ко настоя́щая, восхожде́ния предуве́де.

Сла́ва, и ны́не, пра́здника илиБогоро́дичен, глас и подо́бен то́йже.

Виждь моего́ сокруше́ннаго се́рдца воздыха́ние, Богоневе́сто,/ приими́, Де́во Мари́е Чи́стая,/ рук мои́х воздея́ние, я́ко Человеколюби́ва,/ и не отри́ни, Всенепоро́чная,/ да пою́ и велича́ю Тя, возвели́чившую род наш.

Крестобогоро́дичен, подо́бен то́йже:

Безнача́льное Сло́во О́тчее,/ и Сы́не Мой,/ и Ду́ху сопресто́льное,/ ка́ко Твоя́ пречи́стыя дла́ни на Дре́ве просте́рл еси́?/ Что́ толи́кая Твоя́ ныне́ нищета́, Преблаги́й? –/ предстоя́щи Твоему́ Кресту́, вопия́ше Пренепоро́чная.

Тропа́рь, глас 2:

Проро́ка Твоего́ Иереми́и па́мять, Го́споди, пра́зднующе,/ тем Тя мо́лим:/ спаси́ ду́ши на́ша.

Кано́н, глас 8.

Песнь 1

Ирмо́с: Во́ду проше́д я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Пре́жде твоего́ созда́ния проуве́денно из ма́терия чре́ва освяти́лся еси́/ и язы́ком проро́к пома́зался еси́, взыва́я:/ Изба́вителю и Бо́гу на́шему пои́м.

Всех ра́зум пре́жде прие́мый,/ твоея́ мы́сли движе́ния прозря́, о Иереми́е Богоявле́нне,/ наста́вника тя лю́дем поставля́ет.

Твоея́ мы́сли зри́тельное, му́дре, очи́стив от скверн плотски́х,/ и́стины свиде́тель показа́лся еси́,/ Творцу́ твоему́ превозлю́блен.

Богоро́дичен: Всели́вшееся в Тя Сло́во О́тчее, на земли́, Де́во Богоро́дице,/ па́че естества́ пло́тию ро́ждши,/ яви́лася еси́ тва́рей всех Влады́чица.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Ты, освяти́в проро́ка Твоего́, Влады́ко, пе́рвее рождества́,/ и блудя́щим наста́вника посла́л еси́.

Благода́ть Ду́ха, все́льшаяся во устне́ твои́,/ я́коже пресве́тло свети́ло, су́щим во тьме возсия́.

Ми́ра благово́ния твоего́ не терпя́,/ собо́р тя Изра́илев скве́рный в ро́ве затвори́.

Богоро́дичен: Тобо́ю, Пречи́стая, Пресу́щественный Безнача́льный Сын Бо́жий/ спожи́ти челове́ком благоизво́ли.

Седа́лен, глас 8.

Подо́бен: Воскре́се от гро́ба:

Приложи́ тебе́ у́хо Бог услы́шавати словеса́ Его́, Богогла́сный проро́че./ Те́мже, я́ко настоя́щая не су́щая, всем уясни́л еси́,/ рыда́ньми же о лю́дех твои́х, уда́льшихся от Го́спода, пла́кал еси́./ И ны́не сый на Небесе́х, мо́лишися спасти́ся нам.

Сла́ва, и ны́не, пра́здника илиБогоро́дичен:

В пучи́ну лю́таго впадо́х уны́ния,/ от мно́жества лука́вых и нечи́стых мои́х дел приидо́х в недоуме́ние/ и отча́янием ны́не одержи́м есмь./ Влады́чице Богоро́дице, Сама́ мя спаси́ благоутро́бием Твои́м:/ гре́шных бо Ты еси́ по́мощь и очище́ние спаси́тельное.

Крестобогоро́дичен:

Нескве́рная А́гница, А́гнца и Па́стыря, ви́сяща на Кресте́, зря́щи, вопия́ше:/ Ча́до Мое́, что стра́нное у́бо и ненаде́жное сие́ зре́ние?/ Ка́ко Жизнь всех сме́ртию осужда́ется, земны́м подо́бне?/ Но воскресни́ тридне́вно из ме́ртвых, Сло́ве, я́коже рекл еси́,/ да, ра́дующися, сла́влю Тя.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Пресве́тлое сия́ние Пресвята́го и Боже́ственнаго Ду́ха, се́рдце твое́ облиста́вшее,/ су́щим во тьме просвеще́ние соде́ла.

Проро́ков спострада́тельнее всех быв, всеблаже́нне Богоприя́тне,/ ми́лости мя сподо́би, отча́яннаго мно́гими прегреше́ньми.

Яко хода́тай быв явле́нным и Боже́ственным сия́нием,/ хода́тайством твои́м умири́ многомяте́жнаго моего́ жития́ бу́рю.

Богоро́дичен: Бо́га, Его́же родила́ еси́, Пречи́стая Де́во,/ Сего́ моли́ моли́твами Твои́ми дарова́ти согреше́ний проще́ние.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Я́коже мо́лнию, проро́ка Твоего́ посла́л еси́, Иереми́ю освяще́ннаго,/ су́щим во тьме све́та Тя, Христе́, возвеща́юща.

Стрелу́ избра́нну, в ту́ле тя сокрове́нну, Иереми́е,/ проразуме́нием Своим твой Влады́ка,/ в ни́хже подоба́ше вре́менех, показа́.

У́ши чи́сте у́мныя име́я, сла́вне,/ бесе́дующу тебе́ Ду́ху сподо́бился еси́, проро́че, послу́шати.

Богоро́дичен: Ве́лие и стра́шное Де́вы та́инство:/ и́бо я́вльшагося на земли́ Е́ю Бо́га челове́ком милосе́рдия ра́ди/ ма́терски воспита́.

Песнь 6

Ирмо́с: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, яко Петро́ви,/ о Упра́вителю, и спаси́.

Привле́кл еси́ просвеще́ние и благода́ть бога́тно, Богоно́се,/ духо́вно уста́ душе́вная разшири́в,/ и, испо́лнься, о́бщно всем по́дал еси́, о проро́че, хотя́щим сия́ние.

Мо́ре мирско́е, возвыша́емое напа́стей треволне́нием, узре́в,/ после́дняя дворы́ возжела́л еси́,/ и исто́чник, реко́ю точа́щ сле́зы, люде́й твои́х злобы́тства го́рце рыда́ти.

Смерть Изба́вителя предска́зовал еси́ та́йно, Богогла́се:/ я́коже бо А́гня, на Дре́во Христа́ воздвиго́ша, живота́ Нача́льника,/ собо́р беззако́нный иуде́йский, Благоде́теля всея́ тва́ри.

Богоро́дичен: Сло́во, е́же от Отца́ пре́жде век ро́ждшееся безпло́тно,/ из Тебе́, Чи́стая, в ле́то пло́тски ражда́ется,/ и в се́ни Того́ вси поживе́м, я́коже дре́вле Иереми́я прорече́.

Конда́к, глас 3.

Подо́бен: Де́ва днесь:

Очи́стив ду́хом, вели́кий проро́че и му́чениче,/ твое́ светоза́рное се́рдце,/ сла́вне Иереми́е,/ проро́чествия дар свы́ше прия́л еси́/ и возопи́л еси́ велегла́сно во страна́х:/ се Бог наш, и не приложи́тся ин к Нему́,/ И́же, вопло́щся, на земли́ яви́лся есть.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Ты ны́не не ктому́ в наде́ждах, но ве́щию, проро́че,/ прорече́нная, исполня́ема твоя́ зря, взыва́еши:/ благослове́н еси́, Го́споди Бо́же, во ве́ки.

Орга́н Боже́ственный яви́ся, ударя́емь руко́ю Уте́шителевою,/ Небе́сныя гла́сы веща́я и поя́:/ благослове́н еси́, Го́споди Бо́же, во ве́ки.

Рыда́ния спису́я, о проро́че, не помрачи́ Боже́ственнаго весе́лия,/ его́же от младе́нства я́сно наслади́лся еси́, зовы́й:/ благослове́н еси́, Го́споди Бо́же, во ве́ки.

Богоро́дичен: Во чре́во Де́вы вни́ти я́коже благоволи́л еси́, челове́ки хотя́ спасти́,/ проро́ки я́ве научи́вый чудеси́,/ благослове́н еси́, Го́споди Бо́же, во ве́ки.

Песнь 8

Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведей Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

На Небеса́ возше́л еси́, веселя́ся, Богодухнове́нне Иереми́е,/ и со Безпло́тными престо́лу всех Царя́ предстои́ши,/ благослови́те, – поя́, – дела́, Го́спода и превозноси́те Его́ во ве́ки.

Благоче́стия пропове́дник быв, прехва́льне, освяще́н,/ и нече́стия обличи́л еси́ не́мощь, Иереми́е,/ благослови́те, – поя́, – дела́, Го́спода и превозноси́те Его́ во ве́ки.

Боже́ственныя зари́ све́том сия́я,/ облиста́ния лю́бящим посыла́вши, зерца́ло многосве́тло я́ко прии́м,/ благослови́те, – вопия́, – вся дела́, Го́спода и превозноси́те Его́ во ве́ки.

Богоро́дичен: Мое́ существо́ из Тебе́ восприя́т Животода́вец/ и пре́ждних скверн сие́ очи́сти, о Богома́ти!/ Его́же пое́м:/ благослови́те, вся дела́, Го́спода и превозноси́те Его́ во ве́ки.

Песнь 9

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Све́ту сраствори́вся пречи́стому, Божества́ зари́, блаже́нне сла́вне,/ его́же на земли́ явле́ния я́сно стяжа́л еси́.

Исто́чника нетле́ннаго доше́д,/ озаре́нии же сего́, Богодухнове́нне,/ жела́емый тебе́ коне́ц я́ве получи́л еси́.

Заре́ю светоно́сною, ея́же ны́не наслажда́ешися,/ воспева́ющих твою́ па́мять просвеща́ти, Иереми́е блаже́нне, всех сподо́би.

Богоро́дичен: Приста́нище спасе́ния, ве́рующий, Пречи́стому Твоему́ Рождеству́ све́дуще,/ от бед изба́витися Тя мо́лим.

НА ЛИТУРГИ́И

Проки́мен, глас 4: Ты иере́й во век,/ по чи́ну Мелхиседе́кову. Стих: Рече́ Го́сподь Го́сподеви моему́: седи ́одесну́ю Мене́, до́ндеже положу́ враги́ Твоя́ подно́жие ног Твои́х. Апо́стол к Кори́нфяном, зача́ло 156. Аллилу́ия,глас 5: Моисе́й и Ааро́н во иере́ех Его́/ и Саму́ил в призыва́ющих и́мя Его́. Ева́нгелие от Луки́, зача́ло 14. Прича́стен: В па́мять ве́чную бу́дет пра́ведник:

ВЕ́ЧЕР

Блаже́н муж: На Го́споди, воззва́х: стихи́ры, глас 2.

Подо́бен: Егда́ от Дре́ва:

Преподо́бне о́тче блаже́нне Пафну́тие,/ пресла́вное житие́ твое́ мона́хов украше́ние,/ преподо́бных сожи́тельниче,/ апо́стольскаго уче́ния быв испо́лнен/ и Боже́ственнаго Ду́ха жили́ще,/ столп яви́лся еси́ благоче́стия,/ Те́мже твою́ свяще́нную па́мять ра́достно пра́зднующим/ моли́ от бед и скорбе́й изба́вится,/ любо́вию чту́щим тя, преблаже́нне.

Преподо́бне о́тче блаже́нне Пафну́тие,/ ты от ю́ности доброде́тели приле́жно возлюби́л еси́,/ сме́ртное попече́ние в се́рдцы стяжа́в,/ я́ко кро́ток, и ми́лостив, и чист был еси́,/ ум твой безстра́стием просвети́в/ и Боже́ственным смире́нием украси́в./ Ве́рою и любо́вию твою́, пресла́вне, па́мять чту́щим/ моли́ спасти́ся к Бо́гу твои́ми моли́твами.

Преподо́бне о́тче Пафну́тие всехва́льне,/ любо́вь име́л еси́, соверше́ние доброде́телей,/ оби́тели твоея́ врата́ отве́рзл еси́,/ ни́щим быв покро́в и прибе́жище/ и всем всяк был еси́,/ оби́димым помога́л еси́,/ печа́льный утеша́я, я́ко оте́ц чадолюби́в./ Сего́ ра́ди почита́ем тя/ и светоно́сную па́мять твою́ пра́зднуем, Богоблаже́нне.

И́ны стихи́ры, глас 8.

Подо́бен: О, пресла́внаго чудесе́:

Преподо́бне о́тче прему́дре Пафну́тие,/ слепы́м подае́ши свет,/ боля́щим исцеле́ние,/ хромы́м здра́вие./ Ми́лостивно прекланя́ешися/ к приходя́щим ве́рою к ра́це моще́й твои́х/ и прося́щим по́мощи твоея́:/ тебе́ бо засту́пника, и предста́теля,/ и храни́теля, ве́рнии вси, обрето́хом, восхваля́юще тя.

Преподо́бне о́тче всече́стне Пафну́тие,/ до́брыми доброде́тельми возше́д на колесни́цу,/ к Бо́гу восте́кл еси́, побе́дныя по́чести прие́мля:/ я́ко ми́лоть, нам те́ло твое́, положе́но во гро́бе, о́тче,/ оста́вил еси́ источа́ти исцеле́ние,/ прогони́ти ду́хи лука́выя./ Тем блажи́м тя, прехва́льне.

Лико́м по́стническим сочета́лся еси́,/ по́стническим житие́м украси́вся, блаже́нне Пафну́тие,/ и ны́не на Небесе́х живе́ши, веселя́ся,/ иде́же лику́ют А́нгели./ И све́том вои́стинну Боже́ственным обожа́емь,/ помина́й вы́ну блажа́щих тя на земли́/ и пресвято́е твое́ пра́зднующих успе́ние.

Сла́ва, глас 6:

Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ во е́же по подо́бию я́ко мо́щно возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ верх,/ жи́тель пусты́нный, благотеку́щих обучи́тель,/ пра́вило доброде́тели изве́стнейшее./ И ны́не на Небесе́х зерца́лом разре́шшимся,/ о́тче наш Пафну́тие,/ чи́сте зри́ши Святу́ю Тро́ицу,/ моля́ся несре́дственне о и́же ве́рою и любо́вию чту́щих тя.

И ны́не, пра́здника.

Вход, проки́мен дне. Чте́ния три.

На лити́и стихи́ры, глас 8:

Вре́менная презря́ и до́льняя, Богому́дре,/ высо́кая и пребыва́ющая возлюби́л еси́ Боже́ственным раче́нием:/ крест бо твой поне́с на ра́ме,/ ева́нгельски Бо́га возлюби́л еси́./ Поще́нием му́жески победи́в бесо́вския полки́,/ с Небе́сными весели́шися ли́ки, я́ко непобеди́м./ Го́рних хра́ма жела́я,/ безконе́чныя жи́зни сподо́бился еси́./ Но моли́ся, Богоно́се Пафну́тие, Спа́су всех/ умири́ти мир и спасти́ ду́ши на́ша.

Прииди́те, стецы́теся, и́ноческая чета́ боголюби́вая,/ к боже́ственней па́мяти отца́ на́шего Пафну́тия:/ сей бо от ю́ны ве́рсты взят и́го Христо́во на ся./ Тем и от Него́ прия́т дар чудоде́йствия/ и христолюби́вым князе́м учи́тель быв пра́выя ве́ры,/ вельмо́жам тве́рдое защище́ние,/ си́рым, я́ко оте́ц милосе́рд,/ вдова́м те́плое заступле́ние,/ скорбя́щим утеше́ние,/ ни́щим сокро́вище неоску́дное./ И, оби́тели твоея́ врата́ отве́рсты ни́щим всегда́ име́я,/ в гла́дное ле́то вся препита́л еси́, приходя́щия в дом Пречи́стыя./ И во гряду́щее ле́то моли́твою твое́ю/ плодо́в умноже́ние от Христа́ испроси́л еси́ а́лчущим лю́дем./ И кня́зя, вражду́ иму́ща на тя,/ моли́твою твое́ю от ага́рянских рук изба́вив,/ согреше́ний проще́ние ему́ пода́л еси́,/ он же ве́лию ве́ру к тебе́ стяжа́./ И ага́рянину новокреще́ну,/ хотя́щу зажещи́ твое́ жили́ще,/ запреще́нием твои́м слепоту́ наве́д,/ пока́явшуся же ему́, моли́твою свет очи́ма его́ дарова́л еси́./ Тем и мы мо́лим тя:/ изба́ви нас от враг ви́димых и неви́димых/ и моли́ся Христу́ Бо́гу/ умири́ти мир и спасти́ ду́ши на́ша.

Преподо́бне и Богоблаже́нне Пафну́тие,/ поучи́вся во дни и в нощи́ в за́поведех Госпо́дних,/ сподо́бился еси́ обрести́ ле́ствицу Небе́сную,/ по не́йже возше́д, дости́гл еси́ го́рняго Иерусали́ма,/ и, от боле́зней и трудо́в досто́йну по́честь прие́мля,/ со А́нгельскими ли́ки ны́не ра́дуешися,/ и Боже́ственнаго зре́ния наслажда́ешися Единосу́щныя Тро́ицы./ Те́мже и нас помина́й,/ предстоя́ у Престо́ла всех Царя́ Христа́ и Бога́ на́шего./ А́ще бо и теле́сне язы́к твой умолче́,/ но чудеса́ свиде́тельствуют,/ Русская же земля́ вельми́ тобо́ю хва́лится:/ име́ю бо, рече́, в себе́ сокро́вище неистоща́емое,/ са́ми бо, зря́ще честну́ю ра́ку моще́й твои́х/ и чудеса́ быва́емая,/ прославля́ют просла́вльшаго тя Го́спода./ Те́мже, дерзнове́ние име́я к Нему́,/ и нам испроси́ оставле́ние грехо́в и ве́лию ми́лость.

Сла́ва, глас 6:

О́тче преблаже́нне Пафну́тие,/ пусты́нный быв жи́тель,/ и́же мир оста́ви,/ и был еси́, удруча́я те́ло твое́ посто́м,/ и бде́нием, и труды́,/ зи́му терпя́, и в наготе́ пребыва́я,/ в моли́твах же ум твой возводя́ к Небе́сному Ца́рствию./ И ны́не со А́нгелы водворя́ешися/ во све́те Присносу́щныя Тро́ицы./ Тем и о нас моли́ся Человеколю́бцу Бо́гу,/ сохрани́тися нам от се́тей лука́ваго/ и сподо́битися десна́го стоя́ния в день стра́шнаго суди́ща Христо́ва,/ твои́ми, свя́те, моли́твами./ И си́це хва́ляще тя, рцем:/ ра́дуйся, свети́льниче многосве́тлый,/ возводя́ ко Христу́ мона́хов мно́жество./ Ра́дуйся, стране́ Русстей похвала́ и утвержде́ние,/ и всем ве́рным благоути́шное приста́нище,/ и очище́ние боля́щим во гресе́х,/ и на Боже́ственное тех возвыша́я раче́ние./ Тем, пречестну́ю твою́, и святу́ю, и А́нгелом гове́йную обстоя́ще ра́ку,/ любе́зно облобыза́ем/ и Боже́ственнаго человеколю́бия про́сим получи́ти/ твои́ми к Бо́гу моли́твами,/ и ми́ру мир дарова́ти/ и душа́м на́шим ве́лию ми́лость.

И ны́не, пра́здника, На стихо́вне стихи́ры, глас 1.

Подо́бен: Всехва́льнии му́ченицы:

О́тче преподо́бне Пафну́тие,/ твоя́ кра́сная па́мять по́стников собра́ние весели́т до́бре,/ твое́ же житие́ и чуде́с благода́ть,/ и е́же дарова́ний светлостьми́./ Христа́ моли́ дарова́ти душа́м на́шим/ мир и ве́лию ми́лость.

Стих: Честна́ пред Го́сподем/ смерть преподо́бных Его́.

О́тче преподо́бне Пафну́тие,/ твоего́ уста́ва по́стнаго проти́внии убоя́шася/ и про́кляти бы́ша твои́ми моли́твами непреста́нными, всехва́льне:/ Христа́ бо соде́тельствующа стяжа́л еси́,/ Его́же моли́ дарова́ти душа́м на́шим/ мир и ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

О́тче преподо́бне Пафну́тие,/ Христа́ возлюби́в, вся́ко Того́ Боже́ственным стопа́м после́довал еси́,/ Крест взем, плоть умертви́л еси́,/ и живе́ши, Богоно́се, ду́хом./ И ны́не моли́ дарова́ти душа́м на́шим/ мир и ве́лию ми́лость.

Сла́ва, глас 8:

Мона́хов мно́жества/ наста́вника тя почита́ем, о́тче наш Пафну́тие:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ны́не, пра́здника.

Тропа́рь, глас 4:

Жития́ све́тлостию просвети́в твое́ оте́чество,/ в моли́твах и посте́х дарова́ний Боже́ственнаго Ду́ха испо́лнился еси́,/ и, во вре́менней сей жи́зни до́бре подвиза́вся,/ ми́лость благоутро́бия всем скорбя́щим отве́рзл еси́,/ и ни́щим был еси́ засту́пник./ Тем мо́лим тя, о́тче Пафну́тие,/ моли́ Христа́ Бо́га, да спасе́т ду́ши на́ша.

НА У́ТРЕНИ

На Бог Госпо́дь: тропа́рь пра́здника, два́жды. Сла́ва,свята́го. И ны́не,пра́здника.

По 1-й кафи́зме, седа́лен пра́здника.

По 2-й седа́лен свята́го, глас 4.

Подо́бен: Ско́ро предвари́:

Го́рняго жела́я преми́рнаго живота́,/ ми́ра красоту́ и я́же в нем тле́нная оста́вив, преподо́бне,/ те́мже, в пусты́нях и в верте́пах всели́вся,/ гра́да Небе́снаго показа́лся еси́ граждани́н,/ в не́мже помяни́ соверша́ющих твою́ па́мять.

Сла́ва, и ны́не, Богоро́дичен:

Нечи́стых помысло́в мои́х мно́жество и безме́стных мы́слей обурева́ния/ кто́ изрещи́ мо́жет Всенепоро́чная?/ Настоя́ния же безпло́тных враг мои́х кто́ испове́сть и сих зло́бы?/ Но Твое́ю мольбо́ю, Блага́я, сих мне всех избавле́ние да́руй.

По полиеле́и седа́лен, преподо́бнаго, глас 8.

Подо́бен: Прему́дрости:

Воздержа́ния по́том по́стным погаси́л еси́ пла́мень страстны́й,/ плоть бо умертви́л еси́, преподо́бных житию́ досто́йно поревнова́в,/ Бо́жий показа́лся еси́ уго́дник, блаже́нне,/ те́мже к ре́вности Боже́ственнаго жития́ твоего́/ ли́ки совокупи́л еси́ мона́шествующих, сла́вне./ Те́мже, соше́дшеся по до́лгу, почита́ем всечестну́ю па́мять твою́ моле́бне:/ преподо́бне Богоно́се Пафну́тие,/ моли́ Христа́ Бо́га согреше́ний оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Ми́лостиваго Сло́ва и милосе́рдаго я́ко ро́ждшая, Влады́чице,/ всех поми́луй, к Тебе́ прибега́ющих,/ напа́стей, и боле́зней, и вся́каго озлобле́ния, и ве́чнующаго пла́мене свободи́,/ я́ко да благода́рственно мно́гих щедро́т Твои́х бога́тство просла́вим/ и безме́рную ми́лость и вопие́м Ти всегда́:/ моли́ Христа́ Бо́га грехо́в оставле́ние пода́ти/ поклоня́ющимся ве́рою Рождеству́ Твоему́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43. Воскресе́ние Христо́во: Псало́м 50.

Стихи́ра самогла́сна, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ без поро́ка поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

Кано́н пра́здника со ирмосо́м на 6 и свята́го два кано́на на 8. Кано́н преподо́бному, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Сла́ву мимотеку́щую на нетле́нную премину́л еси́, преподо́бне,/ с Вы́шними ли́ки ны́не причте́ся,/ предстои́ши Престо́лу всех Царя́,/ просвеще́ние ми испроси́, восхваля́ющу честны́я твоя́ по́двиги.

А́ще и от непра́ведна ро́да влеча́шеся,/ но пра́веден плод Бо́гови принесе́ся/ и Тро́ицы жили́ще показа́ся,/ Юже моли́ о пою́щих тя.

Не довле́ тебе́, преподо́бне, в ми́ре,/ посто́м и воздержа́нием в по́лк свяще́нных себе́ вчиня́еши и́ноческаго пребыва́ния/ и с си́ми до́блественне Христа́ моли́л еси́.

Богоро́дичен: Мари́е Богора́дованная, злата́я кади́льнице, Ма́ти Безневе́стная,/ ро́ждшая нам Пресла́дкаго Иису́са,/ Его́же любо́вию распаля́емь, при́сный уго́дник Твой преподо́бный Пафну́тий/ прече́стен храм Тебе́, Богоро́дице, воздви́же.

Ин кано́н преподо́бнаго Пафну́тия, творе́ние ученика́ его́ Инноке́нтия, и́нока тоя́же оби́тели, глас 1.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Но́во тебе́ пе́ние принести́ моле́бно/ во отверзе́ние уст моих, Пафну́тие Богому́дре,/ пода́ждь ми твои́ми моли́твами благода́ть, да воспою́ тя.

Страсте́й омраче́нием порабоще́на, о́тче,/ све́тлыми твои́ми моли́твами, преподо́бне Пафну́тие, ны́не свободи́,/ да я́ко Христо́ва тя раба́ Боже́ственными воспою́ пе́сньми, яќо просла́вися.

Христу́ прилепля́яся от ю́ности, блаже́нне, умо́м очище́нным,/ чистото́ю и целому́дрием теле́сным ду́шу просвети́л еси́,/ я́ко безпло́тен, на земли́ пожи́в./ И ны́не в Вы́шних Бо́гови предстоя́, нас, чту́щих тя, помина́й.

Богоро́дичен: Яви́лася еси́ вы́шши А́нгел, Бо́га вопло́щши ро́ждшагося,/ и погребе́на, и ме́ртвым нетле́ние, Де́во Чи́стая, пода́вшаго,/ Его́же моли́ спасти́ нас, ве́рно чту́щих Тя.

Катава́сия праздника.

Песнь 3

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

В по́двизе учене́н быв послуша́ния,/ седмори́чное обхожде́ние време́н сверши́л еси́,/ смотря́я навы́кнути всяк доброде́тели о́браз.

Два́десят в по́двизе лет сверши́л еси́,/ па́стырь оби́тели поставля́ешися/ и до́блественне о ста́де пече́шеся,/ жела́я всех привести́ ко спасе́нию.

Всеви́дяй Царь Госпо́дь, ви́дев твоя́ страда́ния с опасе́нием,/ не то́чию рассужде́ния да́ром тебе́ почте́,/ но и е́же от о́браза не́киих познава́ти стра́сти душе́вныя.

Богоро́дичен: Ме́сто свяще́ния и мы́сленную, Чи́стая, трапе́зу,/ Хлеб – Христа́, Жизнь всех, прие́мшую, пое́м Тя.

Ин

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е/ и основа́вый на вода́х зе́млю, Всеси́льне.

Боже́ственным светоли́тием, Богому́дре, просвеща́емь, о́тче преблаже́нне,/ све́тлое, и светоно́сное твое́, и честно́е успе́ние/ любо́вию чту́щия, преподо́бне, твои́ми моли́твами просвети́.

Ума́ твоего́ о́ко, препо́добне о́тче, от стасте́й мглы очис́тив,/ Пресвято́му Ду́ху прия́тно чи́стым блиста́нием соде́лал еси́, Богоблаже́нне.

Тве́рдостию ра́зума укрепля́емь, всеблаже́нне,/ разли́чная мечта́ния враго́в обличи́л еси́, му́дре,/ и горды́ню тех возвы́шенную низложи́л еси́, преподо́бне.

Богоро́дичен: И́же пре́жде век рожде́йся от Отца́,/ и напосле́док неизрече́нно из утро́бы Твоея́ про́йде,/ и обожи́ на́ше естество́, Ма́ти Де́во,/ преподо́бных ли́ки я́ве изводя́й.

По 3-й пе́сни конда́к и и́кос пра́здника.

Та́же седа́лен, глас 8:

От ю́ности, блаже́нне, вся оста́вль жите́йская, кра́сная же и ле́потная,/ усе́рдно после́довал еси́ Христу́, зва́вшему тя, преподо́бне,/ посто́м, о́тче, те́ло изнури́л еси́, в моли́твах непреста́нно бдя./ Те́мже тя Всеве́дый Госпо́дь до́бре устроя́ет/ па́стыря Свои́м овца́м слове́сным, Пафну́тие Богоно́се,/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен

Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию, вси ублажа́ем, ро́ди челове́честии:/ Огнь бо всели́ся в Тя Божества́, и я́ко Младе́нца млеко́м пита́еши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла, Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем проро́ком Авваку́мом зову́ Ти:/ си́ле Твое́й Человеколю́бче.

Со́нным виде́нием объя́влено бысть тебе́ бра́тне прегреше́ние/ прекра́снаго дре́ва исторже́нием,/ твои́м же, преподо́бне, насажде́нием сподо́бися и́стиннаго покая́ния.

Дре́внюю оби́тель оставля́еши, и но́вое населя́еши,/ и храм, Пафну́тие, Бо́жия Ма́тере воздвиза́еши и благоле́пием украша́еши,/ в не́мже мно́жество учени́к благоче́стию научи́л еси́.

Превысо́кая и близ ми́ра оста́вль,/ в гора́х пусты́нных жи́ти возлюби́л еси́/ и в них, Пафну́тие, па́че Бо́гови угоди́л еси́.

Богоро́дичен: Несеко́мую го́ру Тя дре́вле Авваку́м прови́де Всенепоро́чная,/ из нея́же Бог яви́ся и нас, истле́вшия, обнови́л есть.

Ин

Ирмо́с: Д́ухом прови́дя, проро́че Авваку́ме, Словесе́ воплоще́ние,/ препове́дал еси́, вопия́:/ внегда́ прибли́житися ле́том, позна́ешися, внегда́ приити́ вре́мени, пока́жешися./ Сла́ва си́ле Твое́й, Го́споди.

Зако́н Бо́жий сохраня́я невреди́мо, преподо́бне,/ чистоту́ и смиреному́дрие ты от младе́нства име́л еси́,/ и житие́ нескве́рно, и нрав ми́лостивей, досточу́дне.

Возвы́сил еси́ к Бо́гу серде́чное жела́ние, и смири́л еси́ па́губныя стра́сти,/ и лука́вствия бесо́в низложи́л еси́, преподо́бне,/ мона́шествующих недви́жимое основа́ние.

В нищете́ пожи́в, блаже́нне, доброде́тельми обогати́лся еси́,/ и, жития́ све́тлостию быв испо́лнен,/ преста́вился еси́ к Вы́шнему гра́ду, о́тче Пафну́тие,/ и мо́лишися изба́витися от бед ста́ду твоему́.

Богоро́дичен: Святы́х Свята́го па́че смы́сла и естества́ породила́ еси́, Богоро́дице,/ освяще́ние, и избавле́ние, и оставле́ние грехо́в/ ве́рным хода́тайством Твои́м подаю́щи,/ Его́ сла́вящим воскресе́ние.

Песнь 5

Ирмо́с: Вску́ю мя отрин́ул еси/́ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Князь, я́ростию распали́вся,/ оби́тель твою́ огне́м запали́ти повелева́ет,/ но в день я́рости гне́ва Бо́жия/ честна́го твоего́ и́мени призыва́нием от ва́рвар изба́влься,/ те́плую ве́ру последи́ показа́.

В день пра́здника Па́схи ры́бы моли́твою умно́жил еси́,/ ча́да своя́ возвесели́л еси́/ и на мно́ги дни преизоби́ловати, преподо́бне Пафну́тие, сотвори́л еси́.

Иконопи́сцу, но́зе больны́ иму́щу/ и сих ра́ди твои́х повеле́ний отрица́ющу,/ ты же, преподо́бне, на де́ло дерза́ти повелева́еши/ и сему́ моли́твами свои́ми вско́ре исцеле́ние подава́еши.

Богоро́дичен: Богоро́дице Пречи́стая,/ Твоего́ Сы́на и Бо́га ви́дети жела́я, Пафну́тий, уго́дник Твой,/ Сего́ живоно́сным и Боже́ственным стопа́м невозвра́тно после́дова.

Ин

Ирмо́с: Твой мир даждь нам, Сы́не Бо́жий:/ ино́го бо, ра́зве Тебе́, бо́га не зна́ем,/ Имя Твое́ имену́ем,/ я́ко Бог живы́х и ме́ртвых еси́.

Оте́ц си́рым был еси́ и пита́тель вдови́цам,/ скорбя́щим утеше́ние, оби́димым помо́щник,/ па́стырь и наста́вник ста́ду твоему́, преподо́бне Пафну́тие,/ и ны́не приле́жно моли́ся Владь́ще о нас.

Инок и́стинен был еси́, простра́ннаго пути́ удаля́яся, те́сный предпочита́я,/ дости́гл еси́ широты́ ра́йския и дре́ва жи́зни причаща́ешися,/ но и нас, ве́рою чту́щих тя, помина́й.

Се́рдце твое́ скрижа́ль чи́сту наше́дши,/ благода́ть Свята́го Ду́ха, о́тче Пафну́тие, обре́те,/ дарова́ тебе́ соверше́нно безстра́стие,/ ве́ру тве́рду и любо́вь нелицеме́рну.

Богоро́дичен: Свяще́ния сень явля́ешися, Мари́е,/ скверне́нную сластьми́ окая́нную мою́ ду́шу освяти́/ и Боже́ственныя сла́вы прича́стника мя сотвори́.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Дерзну́вшаго уби́ти еди́наго от птиц,/ и́хже любе́зно пита́л еси́,/ глава́ зре́нием наза́д обрати́ся,/ и сему́, уми́льно моля́щу, вско́ре исцеле́ние подава́еши.

И́ноку ропта́вшу, в виде́нии зря́щу,/ я́ко тобо́ю, преподо́бне, измета́ему, и от му́рин восхища́ему,/ и от сих го́рце стра́ждущу,/ сего́ ми́лостивно наказу́еши и в чу́вство приво́диши.

Жене́ боля́щей и от де́мон зело́ стра́ждущей,/ честное́ твое́ и́мя призыва́ющей,/ ты ми́лостивно, блаже́нне, явля́ешися,/ и, я́ко во́лки, от сия де́моны отгоня́еши, и здра́вие подава́еши.

Богоро́дичен: Коренесека́тельным серпо́м Твоея́ моли́твы/ посецы́, Отрокови́це, лука́вая помышле́ния души́ моея́/ и плодоно́сну покажи́, молю́ся,/ всех бо Вседе́теля, Бо́га и Спа́са породила́ еси́.

Ин

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спа́си мя, Спа́се ми́ра, зову́ща: сла́ва Тебе́.

Стра́хом Христо́вым утверди́вся, преподо́бне,/ те́ло, и ду́шу, и ум очи́стил еси́ от вся́кия скве́рны,/ и́миже зарю́ прия́т трисо́лнечную, Богому́дре о́тче Пафну́тие всеблаженне.

Весь распя́лся еси́ ми́рови, о́тче Пафну́тие, Крест Христо́в на ра́мо взем, блаже́нне,/ и Того́ страсте́м подо́бяся, прича́стник был еси́ воскресе́ния и сла́вы лу́чшия,/ в не́йже нас помина́й.

Храм тя, вси ве́рнии, Свята́го Ду́ха ве́мы,/ храм бо благоле́пен воздви́гл еси́ Бо́гу, и Того́ Ро́ждшей именова́л еси́,/ и огра́ду ве́лию устро́ил еси́, и мона́хов мно́жество совокупи́л еси́./ И ны́не моли́твами твои́ми всяк неду́г отгоня́ется.

Богоро́дичен: Ви́девши, Его́же родила́ еси́, Бо́га, от ме́ртвых воста́вша,/ ра́дости испо́лнилася еси́, Де́во Ма́ти Мари́е./ Того́ у́бо моли́ вся́ку печа́ль, Чи́стая, на́шего се́рдца до конца́ потреби́ти.

Конда́к, глас 8.

Подо́бен: Взбра́нной:

Бо́жиим светоли́тием просвеще́н, о́тче,/ по́стническое стяжа́л еси́ жи́тельство, преподо́бне,/ и́ноком предо́брый наста́вниче и по́стником благо́е украше́ние./ Сего́ ра́ди Госпо́дь, труды́, твоя́ ви́дев,/ чуде́с да́ром обогати́ тя,/ источа́еши бо исцеле́ния./ Мы же, ра́дующеся, вопие́м ти:/ ра́дуйся, о́тче Пафну́тие.

И́кос:

Песнь от усте́н скве́рных к похвале́нию по́двиг твои́х, о́тче, прино́сится:/ не и́мам бо се́рдца моего́ чи́стаго,/ я́ко сие́ сра́мными дея́ньми оскверни́х/ и ду́шу лука́выми по́мыслы осмради́х./ Но ты пода́ждь ми сло́во, преподо́бне, чи́стое твое́ воспе́ти житие́,/ взыва́ющу тебе́ такова́я, преблаже́нне:/ ра́дуйся, преподо́бных всех похвало́;/ ра́дуйся, по́стников подража́телю и пусты́ни насади́телю;/ ра́дуйся, я́ко в ней прече́стен храм Богоро́дице воздви́гл еси́;/ ра́дуйся, я́ко в нем тобо́ю Бог сла́вится;/ ра́дуйся, до́бре пасы́й ста́до твое́ от наве́т вра́жиих;/ ра́дуйся, я́ко смири́л еси́ злонача́льнаго врага́;/ ра́дуйся, я́ко посрами́л еси́ бесо́в полки́;/ ра́дуйся, мона́шествующих свети́льниче пресве́тлый и столп терпе́ния;/ ра́дуйся, я́ко собра́л еси́ мона́хов мно́жество во спасе́ние;/ ра́дуйся, о не́мже хва́лимся вси;/ ра́дуйся, его́же ра́ди избавля́емся от бе́д;/ ра́дуйся, о́тче Пафну́тие.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Челове́ка боля́ща, в оби́тель твою́ на одре́ принесе́нна,/ сего́, блаже́нне, ви́дев, оте́чески о сем умили́ся,/ здра́ва моли́твою сотвори́л еси́ и пе́ти научи́л еси́:/ оте́ц на́ших Бо́же, благослове́н еси́.

Прока́зою одержи́ма, и лю́те гно́ем растлева́ема, и к сме́рти приближа́ющася/ свяще́нною водо́ю помазу́еши/ и, я́ко, изря́ден врач, преподо́бне, ми́лостивно сего́ исцеля́еши и пе́ти науча́еши:/ оте́ц на́ших Бо́же, благослове́н еси́.

Лю́те беся́щагося, и у́зы сокруша́юща, и зело́ реву́ща/ честны́м кресто́м огради́л еси́,/ и того́ уцелому́дрил еси́, и пе́ти научи́л еси́:/ оте́ц на́ших Бо́же, благослове́н еси́.

Богоро́дичен: И́же пре́жде Безпло́тный воплоща́ется, Пречи́стая,/ за милосе́рдие безчи́сленное из ложе́сн Твои́х святы́х,/ Ему́же в си пое́м:/ Бо́же, благослове́н еси́.

Ин

Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь,/ тогда́ трие́ я́ко еди́неми усты́ поя́ху/ и благословля́ху, глаго́люще:/ благослове́н Бог оте́ц на́ших.

Смотря́я бу́дущую жизнь, блаже́нне,/ ми́рови умертви́лся еси́ вои́стинну, я́ко со́лнце, возсия́в./ Страх Бо́жий восприи́м в се́рдцы твое́м, вселе́нную всю возвесели́л еси́ уче́ньми, вопия́:/ благослове́н Бог оте́ц на́ших.

Смотря́я бу́дущую жизнь, блаже́нне,/ ми́рови умертви́лся еси́ вои́стинну, я́ко со́лнце, возсия́в./ Страх Бо́жий восприи́м в се́рдцы твое́м, вселе́нную всю возвесели́л еси́ уче́ньми, вопия́:/ благослове́н Бог оте́ц на́ших.

Зря муче́ния та́мошняя мы́сленныма очи́ма и се́рдцем боле́знуя вы́ну,/ чи́сто житие́ пожи́л еси́, Богоблаже́нне, и к нестаре́ющейся преста́вился еси ́пи́щи,/ в не́йже нас, чту́щих тя, помина́й.

Украси́в доброде́тельми твое́ житие́, свя́то сконча́в твою́ жизнь,/ усну́л еси́, преподо́бне, сон ми́рен./ Те́мже спаса́й ста́до твое́ всегда́, твою́ па́мять пра́зднующия и вопию́щия:/ благослове́н Бог оте́ц на́ших.

Богоро́дичен: Прему́дрость Ипоста́сную и Сло́во присносу́щное,/ Врача́ душа́м и те́лом поро́ждшая, я́звы и гное́ния души́ моея́ уврачу́й,/ лю́тыя и ле́тния се́рдца моего́ исцели́ боле́зни, Де́во.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Ми́лование стяжа́л еси́ христоподража́тельно,/ вся неду́ги и стра́сти исцеля́еши и вся́ку скве́рну очища́еши,/ очи́сти, преподо́бне, и моя́ душе́вныя стру́пы,/ да моли́твами твои́ми изба́влюся ве́чнаго осужде́ния.

Ра́ка моще́й твои́х, преподо́бне, источа́ет бога́тно чуде́с дарова́ния:/ Госпо́день бо уго́дник показа́лся еси́ и Того́ за́поведем де́латель яви́ся непосты́ден,/ Его́же превозно́сим во вся ве́ки.

День ве́рно пра́зднуем/ честна́го твоего́ от земли́ преставле́ния, Пафну́тие блаже́нне,/ в онь же испроси́ ста́ду твоему́ грехо́в разреше́ние и от лю́тых премене́ние,/ да тя прославля́ем, Христа́ воспева́юще во ве́ки.

Богоро́дичен: Его́же родила́ еси́, Сло́во, па́че сло́ва, Богороди́тельнице Чи́стая,/ Того́ о нас моли́, ве́рно чту́щих Тя во ве́ки.

Ин

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

Подвиза́вся на земли́ зако́нно,/ ны́не ра́дуешися, преподо́бне, со святы́ми, Небе́сный обре́т поко́й,/ и соприча́стник был еси́ весе́лия тех и ра́дости, взыва́я:/ лю́дие, превозноси́те Го́спода во ве́ки.

Посто́м ум очища́я, кро́ток и незло́бив я́влься,/ на земли́ кро́тких живе́ши, Богому́дре, со все́ми пра́ведными и избра́нными поя́:/ лю́дие, превозноси́те Го́спода во ве́ки.

Олядене́вшую страстьми́ ду́шу мою́ очи́сти твои́ми к Бо́гу свяще́нными моли́твами/ и содержа́щего мя грехо́внаго плене́ния изба́ви, о́тче Пафну́тие Богоно́се, да, ра́дуяся, пою́:/ лю́дие, превозноси́те Го́спода во ве́ки.

Богоро́дичен: Пощади́ нас, пою́щих Твое́, Го́споди, е́же от Де́вы, неизрече́нное рождество́,/ и изба́ви от стра́стных бед и скорбе́й рабы́ Твоя́/ мольба́ми Пречи́стыя Твоея́ Ма́тере, я́ко Милосе́рд и еди́н Человеколю́бец.

Песнь 9

Ирмос: Ужасе́ся о сем Не́бо,/и земли́ удиви́шася концы́,/ яко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют.

Усе́рдно после́довал еси́ Зва́вшему тя, преподо́бне,/ те́мже и па́стыря тя Свои́м овца́м устроя́ет,/ и законополо́жник и́ноком был еси́, и пра́вило изве́стно,/ и вождь ко спасе́нию.

Свяще́нно и кра́сно жили́ще созда́л еси́,/ и́нок мно́гих наставля́я к послуша́нию и смире́нию/ сла́достию, Пафну́тие, слове́с твои́х,/ те́мже тя вси ублажа́ем.

Весели́тся оте́чество твое́ и град тебе́ воспита́вый,/ и красу́ется пусты́ня, в не́йже по́двиги своя́ и труды́ сконча́л еси́/ и побе́ды венцы́ восприя́л еси́.

Богоро́дичен: Но́сиши на руку́ Бо́га, нося́щаго вся́ческая,/ пита́еши Пита́теля, Чи́стая Богоро́дице,/ Его́же моли́ с блаже́нным Пафну́тием дарова́ти ста́ду Твоему́ бога́тно ве́лию ми́лость.

Ин

Ирмо́с: Живоприе́мный исто́чник приснотеку́щий,/ светоно́сный свети́льник благода́ти,/ храм одушевле́нный, сень пречи́стую,/ небесе́ и земли́ простра́ннейшую,/ Богоро́дицу, ве́рнии, велича́ем.

Я́ко у́тро, я́ко со́лнце, возсия́вши, па́мять твоя́, преподо́бне, ве́рных сердца́ просвеща́ет/ и тьму отгоня́ет душетле́нных страсте́й,/ ю́же соверша́юще, благоче́стно восхваля́ем тя ра́достными пе́сньми.

Я́ко в раи́, о́тче, воздержа́ния процве́л еси́ и, я́ко ма́слина, псало́мски яви́лся еси́,/ ли́ца и сердца́ на́ша помазу́я еле́ем трудо́в твои́х, о́тче Пафну́тие,/ благоче́стно чту́щих свяще́нную па́мять твою́.

Днесь нам возсия́ честна́я па́мять твоя́, преблаже́нне,/ просвеща́ющи ду́ши и телеса́ и страсте́й мглу отгоня́щи, преподо́бне,/ пода́ждь моли́твы твоя́, Пафну́тие о́тче, и наста́ви на стезю́ жи́зни./ Те́мже, досто́йно чту́ще тя, велича́ем.

Богоро́дичен: Прие́мли, Пречи́стая Отрокови́це, Боже́ственную песнь,/ воздаю́щи благода́ть на Тя наде́ющимся, и мир испроси́ Це́рквам при́сно пода́ти,/ да всяк язы́к христиа́нский Тя велича́ет.

Свети́лен:

Пусты́ню град сотвори́л еси́ прему́дрыми о́бразы,/ отце́м украше́ние, Пафну́тие богому́дре,/ и сию́ соверши́л еси́ я́ко мы́сленный рай,/ принося́щ цве́ты Боже́ственный, единообра́зных мно́жества,/ досто́йно творя́щих па́мять твою́.

Сла́ва, и ны́не, пра́здника, или Богоро́дичен:

Я́ко иму́щи милосе́рдие и ми́лость ве́лию,/ при́зри, Препе́тая Богоро́дице Де́во, на мое́ смире́ние/ и страсте́й мглу, и собла́зны жития́ разори́, Отрокови́це,/ и огня́ гее́нскаго изба́ви моли́твами Твои́ми.

На хвали́тех стихи́ры на 4, глас 1.

Подо́бен: Небе́сных чинов:

Презира́тель до́льних и пресе́льник,/ рачи́тель вы́шних/ и пусты́нный граждани́н Пафну́тий Богому́дрый/ всем нам пра́здновати предповелева́ет/ к Бо́гу отше́ствия его́ день спаси́тельный.

Вне пло́ти и ми́ра доброде́тельми быв,/ тем просла́ви на земли́ житие́м Го́спода славы,/ о́тче Богому́дре,/ и, по достоя́нию от Него́ прославився,/ исце́лений яви́лся еси́ Боже́ственный исто́чник,/ Пафну́тие Богоприя́тне.

Смире́н, незлоби́в, кро́ток, прост/ и молчали́в был еси́, о́тче,/ па́че челове́ка вои́стинну/ и, невеще́ствен быв в ве́щи,/ храм Бо́жий яви́лся еси́ по достоя́нию,/ я́же от Него́ прибы́вшая тебе́ дарова́ния/ ми́лостивно подава́я нам.

Сла́ва, глас 4:

Преподо́бне о́тче прехвал́ьне,/ житие́ благоче́стно на земли́ соверши́в,/ любве́ луча́ми просвеща́емь,/ мона́хов свети́льниче пресве́тлый,/ пра́вило доброде́тели изря́дно,/ смире́ние, бде́ние, моли́тву/ и любо́вь нелицеме́рну стяжа́л еси́./ Те́мже к ре́вности Боже́ственнаго жития́ твоего́/ лик совокупи́л еси́ мона́шествующих./ О́тче преподо́бне,/ Христа́ Бо́га моли́/ согреше́ний оставле́ние пода́ти/ пра́зднующим любо́вию па́мять твою́.

И ны́не пра́здника.

НА ЛИТУРГИ́И

Блаже́нны, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздад́е ми? Апо́стол к Гала́том, зача́ло 213. Аллилу́ия,глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 10. Прича́стен: В па́мять ве́чную бу́дет пра́ведник:

Моли́тва

О свяще́нная главо́, земны́й А́нгеле, Небе́сный челове́че, вели́кий чудотво́рче, преподо́бне о́тче наш Пафну́тие. К тебе́ с ве́рою и любо́вию усе́рдно прибега́ем и умиле́нно про́сим: яви́ нам, смире́нным и гре́шным, свято́е и многомо́щное твое́ заступле́ние. Не дерза́ем, грех ра́ди на́ших, с свобо́дою чад Бо́жиих проси́ти Го́спода и Влады́ку на́шего о поми́ловании и проще́нии. Но тебе́, моли́твенника к Нему́ благоприя́тна, предлага́ем и мо́лим: испроси́ нам у бла́гости Его́ да́ры благопотре́бныя и спаси́тельныя душа́м на́шим: ве́ру пра́ву, благоче́стия кре́пкое покая́ние, и́стинное проще́ние грехо́в, жития́ соверше́нное исправле́ние, да, обрати́вшеся от злых дел к богоугожде́нию, про́чее не прогневля́ем Го́спода наруше́нием святы́х Его́ за́поведей. Умоли́, свя́тче Бо́жий, Всевы́шняго Творца́ дарова́ти мир и благоче́стие стране́ на́шей правосла́вней. Сохрани́, уго́дниче Христо́в, святу́ю оби́тель твою́, созда́нную тобо́ю, и вся живу́щия и подвиза́ющияся в ней от вся́каго зла ненаве́тны. При́зри ми́лостивно на лю́ди, к тебе́ прибега́ющия, и вся проше́ния их во благо́е испо́лни. Всем же нам здра́вие душе́вное и теле́сное, земли́ плодоно́сив, ти́хое и благоуго́дное житие́, благу́ю, христиа́нскую кончи́ну и до́брый отве́т на Стра́шном Суде́ у Всеми́лостиваго Бо́га исхода́тайствуй, я́ко вои́стинну име́яй ве́лие к Нему́ дерзнове́ние. Ей, о́тче, ве́мы, я́ко мно́го мо́жет моли́тва твоя́ пред лице́м Вседержи́теля Го́спода и ничто́же невозмо́жно есть хода́тайству твоему́, а́ще то́кмо восхо́щеши; сего́ ра́ди кре́пко на тя упова́ем и на твоя́ святы́я моли́твы вельми́ наде́емся, я́ко ты приведе́ши нас предста́тельством твои́м в ти́хое приста́нище спасе́ния и насле́дники яви́ши ны све́тлаго Ца́рствия Христо́ва. Не посрами́ же упова́ния на́шего, чудотво́рче святы́й. И сподо́би нас вку́пе с тобо́ю блаже́нства ра́йскаго наслажда́тися, да сла́вим, хва́лим и велича́ем вели́кую ми́лость к нам Человеколю́бца Бо́га, Отца́, и Сы́на, и Свята́го Ду́ха, и твое́ благо́е, оте́ческое заступле́ние во ве́ки веко́в. Ами́нь.

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 1.

Подо́бен: Всехва́льне му́ченицы:

Всехва́льнии му́ченицы,/ вы, на позо́рищи днесь глас возвы́сивше,/ пропове́дуете Христа́ Богочелове́ка,/ и, неве́рных пре́лесть и сих зна́мения нога́ми ва́шими попира́юще,/ сокруша́ете главу́ де́монскую,/ и ра́дость ве́рным подае́те,/ Спа́са ве́рно велича́юще.

Ужасе́ся де́монов мно́жество,/ и сатана́ льсти́вый зря низве́ржеся./ В позо́рищи бо Крест Госпо́день вознося́ще, сла́внии,/ Христа́ Боже́ственною любо́вию разпала́еми,/ све́тли к сме́рти потща́стеся, твердоду́шнии,/ и му́чеников собо́ром сочета́стеся.

Евфи́мие, му́чениче Христо́в,/ с собо́ю прии́м Игна́тия,/ дру́га вои́стинну и сострада́льца,/ и Ака́кия со Ону́фрием,/ подража́телей страда́ния твоего́,/ ко Го́споду те́пле моли́теся,/ я́ко да убежи́м вредоно́сных ко́зней/ лю́таго ратобо́рца.

Тричи́сленнии му́ченицы,/ вы, тве́рдо противобо́рствовавше жесточа́йше судя́щим/ и претерпе́вше муче́ний ви́ды ужа́снейшия,/ Го́рнее Ца́рствие улучи́сте,/ те́мже моли́теся дарова́тися душа́м на́шим/ ми́ру и ве́лией ми́лости.

Сла́ва, глас то́йже:

Блаже́ни есте́ вы, Тро́ицы равночи́сленнии/ новому́ченицы сла́внии,/ благи́х ра́ди наслажде́ния:/ вма́ле бо соверши́вше тече́ние муче́ния ва́шего,/ восприя́сте весе́лие ве́чное,/ с преподо́бными сора́дующеся/ и с му́ченики соводворя́ющеся./ Наслажда́ющеся у́бо Боже́ственною добро́тою непреста́нно,/ не забу́дите о нас моли́тися ко Го́споду,/ улучи́ти нам того́жде весе́лия, всеблаже́ннии.

И ны́не, пра́здника. На стихо́вне стихи́ры, глас 2.

Подо́бен: До́ме Евфра́фов:

Прииди́те, все мно́жество/ христоимени́тых,/ пе́сньми почти́м преподо́бными/ но́вых му́чеников,/ и́хже Христо́с просла́ви.

Стих: Ди́вен Бог во святы́х Свои́х,/ Бог Изра́илев.

Подви́жников похвало́,/ удобре́ние му́чеников/ показа́лся еси́, Евфи́мие,/ с Боже́ственным Ака́кием/ и моли́твенник наш неусы́пный.

Стих: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них.

Удавле́ние нечести́вых,/ Игна́тие, был еси́,/ сконча́ся удавле́нием,/ Христо́в же му́ченик но́вый,/ Ему́ о всех моли́ся.

Сла́ва, глас и подо́бен то́йже:

Све́те Трисия́тельный,/ О́тче и Сы́не и Ду́ше,/ Твои́х новому́чеников/ благоприя́тными моли́твами/ поми́луй мир Твой.

И ны́не, Богоро́дичен:

Ма́ти Иису́сова,/ Богоневе́стная Мари́е,/ с новострада́льцами/ о нас Созда́теля/ моли́те, мо́лимся.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж:1-й антифо́н. На Го́споди, воззва́х:поста́вим стихо́в 8 и пое́м стихи́ры, глас 4.

Подо́бен: Я́ко до́бля:

Но́вый и ра́достный пра́здник, Христе́,/ днесь новому́чеников Твои́х пра́зднующе,/ во вре́мя весе́ннее, Человеколю́бче,/ я́ко цве́ты всеблагово́нныя/ и я́ко ла́стовицы доброгла́сныя,/ воспева́ющия благода́тно Твое́ Божество́/ и исполня́ющия ра́дости правосла́вных сердца́,/ Тебе́ ве́рно по́двиги их прино́сим.

Чу́вственная весна́ днесь/ чу́вственную тварь возвесели́,/ у́мная возсия́ воскресе́ние Христо́во/ и, естество́ челове́ков духо́вно/ возсозида́ющи, возвеселя́ет у́мно;/ ны́не же весна́ трегу́бая:/ торжество́ трех страстоте́рпцев трегу́бо услажда́ет/ чу́вства души́ и елесе́ на́шего.

Коль прекра́снии и вседо́блии ю́ноши,/ предстои́те Христу́, блаже́ннии новому́ченицы,/ украше́ние нося́ще ца́рское – ви́ды муче́ний/ и я́ко ка́мения – чи́стыя пло́ти ва́шея я́звы,/ крове́й же тече́ние – я́ко багряни́цу,/ крест же – я́ко Боже́ственный ски́петр со сла́вою,/ и со А́нгели ра́дуетеся.

Тро́ицы равночи́сленнии новому́ченицы сла́внии,/ страда́льцы непобеди́мии и тверде́йшии,/ Боже́ственный вои́стинну Евфи́мий,/ с ни́мже Игна́тий и Ака́кий тве́рдый,/ и́же но́вое ны́не соста́вивше пра́зднество,/ Влады́це всех не преста́йте приноси́ти моле́ния/ за нас, досточу́днии.

Сла́ва, глас 8:

Днесь возсия́ша на тве́рди ве́ры/ три со́лнца све́тлая и красне́йшая:/ пресве́тлая тро́ица му́дрых новому́чеников Христо́вых,/ и́хже, ве́рнии, соше́дшеся в честне́м их хра́ме,/ весе́нними пе́сньми увязе́м, глаго́люще:/ ра́дуйтеся, трие́ страда́льцы всесла́внии,/ Правосла́вныя ве́ры новосозда́нныя кре́пости/ и основа́ния изве́стнейшая./ Ра́дуйся, Евфи́мие вели́кий,/ и́же пред неве́рными уясни́вый Божество́ Христо́во/ и де́монскую пре́лесть ага́рян му́дро низложи́вый,/ и́же, я́ко победоно́сный страда́лец,/ с ва́иями и ве́твьми страсть Госпо́дню предвари́в,/ собо́ю живописа́л еси́/ и по́прище му́ченичества светле́йшее трем сострада́льцем,/ по тебе́ преше́дшим, отве́рзл еси́./ Ра́дуйся, Игна́тие сла́вне,/ подража́тель бы́вый страда́ний Христо́вых и́стиннейший/ и ви́сельницею твое́ю удави́вый ди́авола./ Ра́дуйся, Ака́кие всече́стне,/ и́же тече́нием крове́й твои́х/ обагри́вый себе́ багряни́цу ца́рскую,/ в не́йже Престо́лу Божества́ предстои́ши./ Но, о тро́ичныя, Несло́жным Тро́ицы неле́стная обита́лища,/ не преста́йте моли́тися о нас ко Го́споду.

И ны́не, пра́здника.

Вход. Проки́мен дне. И чте́ния 3 преподо́бническая.

На лити́и стихи́ры самогла́сны, глас 1:

Преподо́бия похвала́ и сла́ва му́ченичества/ показа́стеся, чу́днии:/ Крест бо Христо́в подви́жнически восприя́вше,/ по́прище муче́ния проидо́сте всесла́вное/ и, со сла́вою очище́ние сами́х себе́/ му́ченически соверши́вше,/ я́ко чи́стии Чи́стому предстоите́ Христу́,/ венцено́сцы всесла́внии,/ три новому́ченицы,/ Евфи́мие вели́кий, Игна́тие твердому́дренный и Ака́кие светле́йший,/ с му́ченики и преподо́бными веселя́щеся/ и моля́щеся о нас ко Го́споду.

Глас 2: Яко весна́ весе́лая,/ возсия́ днесь треза́рное новому́чеников торжество́./ Прииди́те у́бо, празднолю́бцы, све́тло пра́зднуем,/ наслажда́ющеся духо́вно по́двиги и боре́нии их за Христа́,/ я́ко, естество́ пону́дивше,/ превзыдо́ша всех свя́тостию,/ и, раче́нием Госпо́дним пали́ми,/ во́лею потеко́ша к муче́нию,/ и, сла́вную ча́шу сме́рти испи́вше с ра́достию,/ прия́ша вене́ц побе́ды,/ я́ко победи́телие и победоно́сцы всесла́внии,/ Евфи́мий, Игна́тий и Ака́кий,/ и ны́не со А́нгелы на Небесе́х лику́юще/ непрестаю́щим ликова́нием,/ про́сят вселе́нней ми́ра/ и душа́м на́шим ве́лией ми́лости.

Сла́ва, глас 5:

Воспо́йте Го́сподеви песнь но́ву,/ по́йте Ему́, вся земля́,/ днесь бо трие́ Его́ новому́ченицы,/ Евфи́мий, Игна́тий и Ака́кий,/ но́вый пра́здник соста́вивши,/ любому́дренно прие́млют соше́дшихся свои́х рачи́телей,/ невеще́ственную трапе́зу представля́юще,/ за Христа́ свои́ по́двиги,/ я́ко бра́шна разли́чная, предлага́ют./ Прииди́те у́бо, у́мно вкуси́вше,/ возвесели́мся ду́хом/ и Влады́це Христу́ от се́рдца рцем:/ бу́ди благослове́н во ве́ки, Го́споди,/ И́же и сих рачи́телей Твои́х/ победи́тели греха́ показа́вый/ и венце́м сла́вы их украси́вый./ Сподо́би у́бо и нас подража́тели бы́ти доброде́телей их/ и ра́вную сла́ву улучи́ти,/ Многоми́лостиве Го́споди, сла́ва Тебе́.

И ны́не, пра́здника.

На стихо́вне стихи́ры, глас 5.

Подо́бен: Ра́дуйся:

Ра́дуйся, новому́чеников тро́ице,/ Тро́ицы Несозда́нныя побо́рницы,/ и́же всю зе́млю луча́ми муче́ния ва́шего,/ я́ко свети́ла Боже́ственная, облиста́вшии,/ и ны́не, прие́млюще от нас похва́льная пе́ния,/ и моле́ния ко Влады́це принося́ще,/ и исцеле́ния моля́щимся да́рующе,/ же́ртвы приснопочита́емыя,/ сокро́вища честна́я,/ цве́ти прекра́снии/ и но́выя от собо́ра ве́рных,/ Христа́ моли́те/ душа́м на́шим да́ти ве́лию ми́лость.

Стих: Ди́вен Бог во святы́х Свои́х,/ Бог Изра́илев.

Ра́дуйся, новому́чеников тро́ице,/ и́же де́монов ополче́ния победи́вшии,/ и все а́нгельское естество́ я́ве удиви́вшии,/ и прия́вшии награ́д мно́жество:/ му́дро анти́христа обличи́вый, Евфи́мие,/ и благоду́шие ве́рным обручи́вый;/ кня́зя же тьмы удави́вый/ и страсте́м подража́вый Христа́ моего́, Игна́тие;/ весь прекра́сен, украша́яся незло́бием, Ака́кие,/ Христа́ моли́те/ душа́м на́шим да́ти ве́лию ми́лость.

Стих: Святы́м, и́же суть на земли́ Его́/ удиви́ Госпо́дь вся хоте́ния Своя́ в них.

Ра́дуйся, новому́чеников тро́ице,/ и́же страстоте́рпцев дре́вних/ терпе́нию, и тве́рдости, и до́блести подража́вший я́ве/ и венцы́ ра́вныя восприя́вшии,/ Христо́вым Боже́ственным раче́нием возжига́еми, приснопа́мятнии,/ себе́ саме́х на смерть во́лею вда́сте,/ и я́ко святи́и от нас ны́не прославля́етеся,/ зако́нно по́прище страда́ния соверши́вше,/ зако́нныя и Боже́ственныя венцы́ от Христа́ восприя́сте,/ Того́ моли́те/ душа́м на́шим да́ти ве́лию ми́лость.

Сла́ва, глас 8:

Ра́дуйтеся о Го́споде, Трои́цы равночи́сленнии,/ новому́ченицы сла́внии,/ ра́дуйтеся о Христе́ Бо́зе и па́ки ра́дуйтеся,/ Евфи́мие, Игна́тие и Ака́кие,/ трисве́тлое тридне́вное собра́ние,/ новоизбра́нный ли́че и трисплете́нный,/ до́блестное ополче́ние Всецаря́ Бо́га;/ ра́дуйтеся, и́же труда́ми по́двигов убеле́ннии кри́ны еде́мстии/ и кровьми́ му́ченическими очервле́ннии/ шипки́ благода́ти, све́тлое согла́сие Божества́ Иису́сова/ и любве́ Его́ сою́зе,/ неразры́вное соедине́ние ве́ры,/ тристе́нная кре́посте гра́да Бо́жия,/ трипокро́вный до́ме Пресвяты́я Тро́ицы,/ чи́стая обита́лища Отца́, Сы́на и Свята́го Ду́ха;/ ра́дуйтеся, о́троцы Христо́вы прекра́снейший,/ му́ченицы святи́и, новопоже́ртвенныя о́вцы,/ приводи́мии тельцы́ к та́йней трапе́зе Христа́ и Бо́га,/ и́хже кро́ви вопию́т за ны ко Го́споду.

И ны́не, пра́здника.

Тропа́рь, глас 1:

Равночи́слении Тро́ицы Несозда́нныя су́ще,/ с ли́ки А́нгелов и чи́ны му́чеников/ предстоите́ вы, ра́дующеся, Престо́лу Божества́, му́дрии./ Сего́ ра́ди прича́стием сия́ние отону́ду прие́млюще,/ исто́чник исцеле́ний ве́рным подае́те/ и Боже́ственное просвеще́ние,/ му́чениче Христо́в Евфи́мие со Игна́тием му́дрым и с Боже́ственным Ака́кием,/ о нас при́сно моли́теся.

НА У́ТРЕНИ

По 1-м стихосло́вии седа́лен, глас 1:

Све́тлая време́н цари́ца возсиява́ет днесь,/ пресве́тлии же ны́не сооблиста́ют сей Христо́вы новому́ченицы,/ му́дрый Евфи́мий и Игна́тий со сла́вным Ака́кием,/ пропове́давший на позо́рище до́блественне Божество́ Христо́во.

Слава, и ныне, праздника.

По 2-м стихословии седален, глас 3:

Но́вый, возсия́л еси́ Христо́вою ве́рою, му́чениче сла́вне,/ све́тлую тро́ицу страстоте́рпцев исполня́я/ и образу́я число́ Богонача́льныя Тро́ицы./ Но да заградя́тся уста́ ху́льная, не прие́млющая новому́чеников страда́ние,/ испове́дающих Божество́ Христо́во.

Сла́ва, и ны́не, пра́здника.

По полиеле́и седа́лен, глас 8:

Све́тлых по́двигов твои́х пра́здник вселе́нную украша́ет,/ сла́вне преподобному́чениче Евфи́мие,/ сохраня́й, треблаже́нне, любо́вию чту́щих тя.

Сла́ва: Яви́ся днесь Це́ркви торжество́ трие́х страстоте́рпцев,/ я́ко свети́ло, озаря́ющее правосла́вных люде́й собра́ния.

И ны́не, пра́здника.

Степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х Свои́х,/ Бог Изра́илев. Стих: Что возда́м Го́сподеви о всех, я́же воздаде́ ми? Вся́кое дыха́ние:Ева́нгелие от Луки́, зача́ло 63.

По 50-м псалме́ стихи́ра, глас 2:

Зело́ мне че́стни бы́ша дру́зи Твои́, Бо́же,/ зело́ мне утверди́шася влады́чествия их,/ наипа́че же мне возлю́бленни бы́ша му́ченицы Твои́, Го́споди,/ я́ко, са́мою кро́вию свое́ю пропове́давше Твое́ Божество́,/ утвержда́ют в спаси́тельнем испове́дании/ Трисвята́го Твоего́ И́мени./ Моли́твами у́бо но́вых сих Твои́х му́чеников,/ Евфи́мия, Игна́тия и Ака́кия,/ утверди́ Правосла́вием Це́рковь Твою́, Христе́,/ и бога́тый ми́рови мир ниспосли́/ и душа́м на́шим ве́лию ми́лость.

Кано́н пра́здника со ирмосо́м на 6 и святы́х на 8.

Глас 1.

Песнь 1

Ирмо́с: Воскресе́ния день,/ пресвети́мся, лю́дие,/ Па́сха, Госпо́дня Па́сха:/ от сме́рти бо к Жи́зни/ и от земли́ к Небеси́/ Христо́с Бог нас/ преведе́, побе́дную пою́щия.

Воскресе́ния день Го́спода Христа́,/ прииди́те согла́сно вси, трие́х му́чеников пра́здник соста́вим, ве́рнии,/ Тро́ица Бог сих бо просла́ви, побе́дную пою́щих.

Воскресе́ния день Царя́ Христа́, вся но́ва ви́дяще,/ прииди́те согла́сно, и мы соста́вим, ве́рнии, но́вый пра́здник,/ трие́х новому́чеников с любо́вию воспева́юще.

Очи́стим чу́вствия и у́зрим воскре́сша Христа́ и трех новому́чеников Его́,/ блиста́ющихся со́лнца светле́йше/ и всех озаря́ющих ве́рных благода́тию.

Очи́стим чу́вствия и у́зрим трех подобосо́лнечных свети́л,/ ны́не совосходя́щих Христу́, Со́лнцу, от гро́ба возсия́вшу,/ честны́х новому́чеников, и ве́рных озаря́ющих.

Небеса́ у́бо досто́йно да веселя́тся, земля́ же да ра́дуется,/ да пра́зднует же любо́вию И́верская оби́тель,/ обогати́вшаяся му́ченических моще́й сокро́вищем неотъе́млемым.

Богоро́дичен: Воскре́сшаго ви́девши Сы́на Твоего́ и Бо́га,/ ра́дуйся со апо́столы, Богоблагода́тная Чи́стая,/ и е́же, ра́дуйся, пе́рвее,/ я́ко всех ра́дости Вина́,/ восприя́ла еси́, Богома́ти Всенепоро́чная.

Катава́сия: Воскресе́ния день:

Песнь 3

Ирмо́с: Прииди́те, пи́во пие́м но́вое,/ не от ка́мене непло́дна чудоде́емое,/ но нетле́ния исто́чник,/ из гро́ба одожди́вша Христа́,/ в Не́мже утвержда́емся.

Прииди́те, весну́ вси у́мную во вре́мя есте́ственныя весны́ у́зрим, новому́чеников,/ я́ко цве́ты, подаю́щих нам чудеса́ пресла́вная.

Ны́не вся испо́лнишася све́та,/ воста́нием Созда́теля сооблистава́емая,/ да пра́зднует све́тло и па́мять трие́х страстоте́рпцев ве́рных собра́ние.

Ва́ия, Евфи́мие, рука́ма, я́ко зна́мение побе́ды держа́,/ неустраши́мо к закла́нию с ра́достию поте́кл еси́,/ раче́нием Христо́вым, му́дре, распала́емый.

Ору́жием Креста́ огради́вся, я́коже лев,/ ко удавле́нию прете́кл еси́, свя́те,/ и, спле́тшися со враго́м, побе́ду воздви́гл еси́ све́тлую, Игна́тие сла́вне.

Вчера́ Ты мертв был еси́, Христе́, – Ака́кий взыва́ет, усека́емый,/ ны́не же и аз Тебе́ ра́ди,/ Сам мя просла́ви, Спа́се, во Ца́рствии Твое́м.

Богоро́дичен: Бо́га, Его́же родила́ еси́ пло́тию,/ из ме́ртвых, я́коже рече́, воста́вша/ ви́девши, Чи́стая, лику́й/ и Сего́ я́ко Бо́га, Пречи́стая, возвелича́й.

Конда́к и и́кос пра́здника. Седа́лен, глас 1:

Я́ко со́лнце, ва́ша честна́я па́мять возсия́ нам,/ Боже́ственнии новому́ченицы, Тро́ицы равночи́сленнии, ве́рных озаря́ющая,/ ю́же днесь соверша́юще, вопие́м:/ моли́те за ны, страстоте́рпцы, Еди́наго Человеколю́бца.

Сла́ва: Муче́ний ви́ды лю́тыя, преподобному́ченицы Боже́ственнии, тве́рдо вы протерпе́сте,/ твердому́дренный Евфи́мие и Игна́тие Боже́ственне, треблаже́нне Ака́кие,/ подо́бными о́бразы све́тло просла́вистеся,/ исцеля́ти боле́зни по кончи́не благода́ть свы́ше прия́сте/ с ве́рою притека́ющим к ра́це моще́й ва́ших,/ моли́теся Христу́ Бо́гу прегреше́ний оставле́ние дарова́ти/ пра́зднующим любо́вию святу́ю па́мять ва́шу.

И ны́не, пра́здника.

Песнь 4

Ирмо́с: На Боже́ственней стра́жи/ Богоглаго́ливый Авваку́м/ да ста́нет с на́ми и пока́жет/ светоно́сна А́нгела,/ я́сно глаго́люща:/ днесь спасе́ние ми́ру,/ я́ко воскре́се Христо́с,/ я́ко всеси́лен.

На Боже́ственней стра́жи ста́вше, му́ченицы Христо́вы,/ иму́ще Его́ в се́рдце, с любо́вию взыва́ху Ему́, всеблаже́ннии:/ днесь нам спасе́ние, Спа́се,/ а́ще и у́мрем Тебе́ ра́ди, Всеси́льне.

Единоле́тный А́гнец, от Де́вы проше́дый, вене́ц нам ны́не пода́й,/ Тебе́ ра́ди к сме́рти днесь тща́щимся, –/ новому́ченицы взыва́ху Кра́сному из гро́ба Христу́, Со́лнцу возсия́вшу.

Богооте́ц у́бо Дави́д пред се́нным ковче́гом скака́ше, игра́я,/ мы же Тебе́ я́ко приноше́ние кро́вию, ра́дующеся, прихо́дим,/ ви́дяще Тя, из гро́ба Кра́сна воскре́сша Христа́, –/ вопию́т му́ченицы.

Источа́ют безсме́ртия пото́ки новому́чеников ра́цы Христо́м/ и чуде́с бе́здну боля́щим:/ ко́снемся косте́м их ве́рою и у́зрим чу́до,/ благоуха́ние сих вои́стинну Небе́сное.

Богоро́дичен: Его́же родила́ еси́, Христа́,/ прекра́сно из ме́ртвых возсия́вша, Чи́стая, зря́щи,/ До́брая и Непоро́чная в жена́х и Кра́сная,/ днесь во спасе́ние всех, со апо́столы ра́дующися, Того́ прославля́й.

Песнь 5

Ирмо́с: У́тренюем у́тренюю глубоку́,/ и вме́сто ми́ра песнь принесе́м Влады́це,/ и Христа́ у́зрим,/ Пра́вды Со́лнце,/ всем жизнь возсия́юща.

У́тренюем во хра́ме ва́шем, Христа́ воспева́юще,/ из гро́ба возсия́вшаго Жизнода́вца,/ вас удиви́вшаго и сла́вою венча́вшаго, новому́ченицы сла́внии.

Безме́рное ва́ше дерзнове́ние,/ новому́чеников Тро́ицы, зря мучи́тель, сме́рти предаде́,/ к Не́йже влеко́ми, весе́лыми нога́ми, Па́сху хва́ляще, потеко́сте.

Присту́пим муче́ниями/ и вме́сто ми́ра кровь принесе́м Влады́це,/ в страда́ниих глаго́лаху му́дрии новому́ченицы,/ Па́сху хва́ляще, закала́еми.

Богоро́дичен: Не разве́рзл еси́ врата́ де́вства в воплоще́нии,/ гро́ба не разруши́л еси́ печа́тей, Царю́ созда́ния,/ отону́дуже воскре́сшаго Тя зря́щи, Ма́ти ра́довашеся.

Песнь 6

Ирмо́с: Снизше́л еси́ в преиспо́дняя земли́/ и сокруши́л еси́ вереи́ ве́чныя,/ содержа́щия свя́занныя, Христе́,/ и тридне́вен, я́ко от ки́та Ио́на,/ воскре́сл еси́ от Гро́ба.

По́двигами снидо́сте, му́чеников тро́ице, и, сокруши́вше се́ти вра́жия,/ взыдо́сте на Небеса́ в ра́дости,/ и Госпо́дь диади́мою све́тлою побе́ды увенча́ вас.

Небе́сный круг обходя́ще вы/ и Престо́лу Христо́ву предстоя́ще, порфи́рою оде́яннии све́тлою,/ му́чеников лико́м и преподо́бных собо́ром совесели́теся.

Жела́юще му́ченицы дости́гнути Христа́, изше́дше по́двигами,/ да́же до сме́рти вои́стинну подвиза́шася/ и разтерза́ша се́ти вра́жия, я́ко паути́ну.

Соверши́вше путь страда́ния све́тло,/ возведо́стеся вои́стинну во оби́тели Небе́сная, о новому́ченицы,/ и получи́сте диади́му све́тлую от руки́ Влады́чни.

Фи́никовыя ве́тви в рука́х, я́ко награ́ды,/ и Крест, я́ко скиптр, и тече́ние крове́й, я́ко порфи́ру, нося́ще, предстои́те,/ соца́рствующе Христу́, новому́ченицы Боже́ственнии.

Сохра́ньшим ве́ру Христо́ву, и све́тло сконча́вшим тече́ние,/ и по́двигом до́брым подвиза́вшимся, новому́ченицы,/ отверзо́шася вам ра́йския две́ри.

Богоро́дичен: Сни́де в преиспо́дняя земли́ в ложесна́ Твоя́, Чи́стая, сше́дый/ и всели́выйся и воплоти́выйся па́че ума́,/ и воздви́же с Собо́ю Ада́ма, воскре́с от гро́ба.

Конда́к, глас 4:

Яви́ся днесь Це́ркви но́вое торжество́/ трие́х страстоте́рпцев,/ я́ко свети́ла, озаря́ющее/ правосла́вных, Христе́,/ исполне́ния.

Ико́с:

И́же во Афо́не подвиза́ющийся,/ прииди́те вси, стеце́мся/ и, в Предте́чевом свяще́нней ски́те соше́дшеся,/ у́зрим чудеса́ стра́нная, Боже́ственною си́лою чудоде́емая./ Обря́щем та́мо трие́х но́вых преподобному́чеников, Евфи́мия, Игна́тия и Ака́кия,/ и́же а́ще и вре́менно наси́лию уступи́вше,/ отверго́шася, – увы! – всех Спа́са Христа́,/ но после́жди подви́жническим себе́ саме́х преда́вше трудо́м,/ Константи́нова гра́да с ва́иями и ве́твьми дости́гше венцено́снии,/ я́ко дре́внии авраа́мстии три о́троцы, проти́ву пре́лести до́бльствоваша./ Лжепроро́ка бо ага́рянския ле́сти, я́ко анти́христа, посрами́вше,/ Правосла́вную ве́ру са́мою кро́вию свое́ю утверди́ша и уве́риша,/ Спа́са Христа́, Бо́га и Челове́ка, я́сно пропове́давше,/ отону́дуже и да́льния мо́ря преше́дше нетле́нно,/ сей свяще́нный храм насле́доваша ра́ками моще́й свои́х./ И ны́не, исцеле́ния подаю́ще ве́рою притека́ющим,/ озаря́ют правосла́вных собра́ния.

Песнь 7

Ирмо́с: О́троки от пе́щи изба́вивши,/ быв Челове́к,/ стра́ждет, я́ко сме́ртен,/ и стра́стию сме́ртное/ в нетле́ния облачи́т благоле́пие,/ еди́н благослове́н/ отце́в Бог и препросла́влен.

До́бльственно до́брый проше́дше по́двиг, новому́ченицы,/ те́ла вы кончи́ну ни во что́же вмени́вше,/ ны́не предстоите́, ра́дующеся, Живо́му Христу́,/ Па́сху та́йную на Небесе́х при́сно вкуша́юще.

Сме́рти пра́зднуем умерщвле́ние,/ Христо́во во́скресение, страда́ние же честно́е новому́чеников му́дрых,/ и, игра́юще, пое́м Вино́внаго,/ Еди́наго Благослове́ннаго отце́в Бо́га и Препросла́вленнаго.

Я́ко вои́стинну свяще́нная и многосве́тлая есть/ сия́ пресве́тлая и Боже́ственная па́мять трие́х новому́чеников Твои́х, Христе́,/ всех веселя́щая ве́рных,/ пою́щих Тя ны́не, отце́в Бо́га и Препросла́вленнаго.

Пе́сней свяще́нных восприи́мем трубу́, Богому́дрии,/ и свяще́нную новому́чеников торжеству́юще па́мять, рцем:/ ра́дуйтеся, ны́не зерца́ла Тро́ицы та́йная/ и нас, ве́рных, наслажде́ния.

Богоро́дичен: Всем ца́рствуяй созда́нием, быв Челове́к,/ всели́ся в Твою́, Богоблагода́тная, утро́бу/ и, распя́тие претерпе́в и смерть,/ воскре́се боголе́пно, совозста́вив нас, я́ко Всеси́лен.

Песнь 8

Ирмо́с: Сей нарече́нный и Святы́й День –/ еди́н суббо́т царь и госпо́дь,/ пра́здников пра́здник/ и торжество́ есть торже́ств,/ в о́ньже благослови́м Христа во ве́ки.

Сей нарече́нный и святы́й день,/ в не́мже пра́зднуем муче́ния ва́шего страда́ния,/ пра́здник обновля́юще ваш, новому́ченицы,/ воспева́ем Христа́, я́ко Бо́га во ве́ки.

Прииди́те, но́вое му́чеников торжество́/ но́выми песносло́вии торжеству́ем днесь, празднолю́бцы,/ обновля́юще Христо́во воскресе́ние, воспева́ем Его́, я́ко Бо́га во ве́ки.

Нося́ в рука́х крест и ва́ия, Евфи́мие,/ мечу́ главу́ твою́ неустраши́мо подклони́в, му́дре,/ ца́рствия Христо́ва приобщи́лся еси́, взыва́я Ему́:/ оса́нна во ве́ки.

Возведи́те о́крест о́чи ва́ша, новому́чеников трои́це,/ и ви́дите собра́вшихся, от души́ вас лю́бящих,/ и нас, я́ко дру́ги, и бра́тия, и моли́твенники, сохраня́йте,/ песносло́вящих ва́шу Боже́ственную па́мять.

Богоро́дичен: Всю низложи́в сме́рти держа́ву, Сын Твой, Де́во, Свои́м воскресе́нием/ я́ко Бог Кре́пкий совознесе́ нас и обожи́,/ те́мже воспева́ем Его́ во ве́ки.

Песнь 9

Ирмо́с: Свети́ся, свети́ся,/ Но́вый Иерусали́ме,/ сла́ва бо Госпо́дня/ на тебе́ возсия́,/ лику́й ны́не/ и весели́ся, Сио́не./ Ты же, Чи́стая, красу́йся, Богоро́дице,/ о воста́нии Рождества́ Твоего́.

Припе́в: Днесь воста́нием Христа́ Жизнода́вца,/ я́ко со́лнце, сия́ет па́мять му́чеников.

Весели́ся, ски́те Крести́теля Спа́сова,/ чад бо твои́х сла́ва на тебя́ возсия́./ Лику́й ны́не и воспева́й:/ ра́ками бо новому́чеников, я́ко исто́чником чуде́с, обогати́лся еси́.

Припе́в: Велича́й, душе́ моя,/ трие́х страстоте́рпцев Христа́ Жизнода́вца.

О, Боже́ственнаго! о, любе́знаго! о, сладча́йшаго сконча́ния,/ его́же претерпе́сте вои́стинну Христо́вы блаже́ннии новому́ченицы сла́внии,/ и́хже, ве́рнии, иму́ще предста́тели, не постыди́мся.

Припе́в: Велича́й, душе́ моя,/ Евфи́мия вели́каго, вку́пе со Игна́тием и Боже́ственным Ака́кием.

О, Боже́ственнаго! о, любе́знаго обеща́ния кра́снаго!/ С на́ми бо еще́ жи́ви су́ще бы́ти обеща́стеся,/ храни́телие Боже́ственнии жи́зни на́шея,/ и́хже, ве́рнии, моли́твенники ко Го́споду предлага́юще, ра́дуемся.

Припев: Днесь воста́нием Христа́ Жизнода́вца/ па́мять совозсиява́ет трие́х новому́чеников.

О му́ченицы Боже́ственнии, о во́ини Христо́вы,/ о кра́сная и прекра́сная Тро́ицы заколе́ния,/ любо́вию вам ны́не посвяща́я песнь,/ всем се́рдцем прошу́ е́же с ва́ми совселе́ния.

Припе́в: Ра́дуйся, Де́во, ра́дуйся, Благослове́нная,/ ра́дуйся, Препросла́вленная:/ Твой бо Сын воскре́се тридне́вен от гроба.

Весели́ся и ра́дуйся, Боже́ственная две́ре Све́та:/ заше́дый бо Иису́с во гроб, возсия́, просия́в со́лнца светле́е/ и ве́рныя вся озари́в, Богора́дованная Влады́чице.

Ексапостила́рий:

Весели́ся, свята́я горо́ Афо́нская днесь,/ Крести́телев бо скит пра́зднует торжество́ Боже́ственное,/ му́ченики но́выя име́я преподо́бных твои́х,/ да даст у́бо тебе́, всечи́стая, таковы́я плоды́ приноси́ти Пресвяте́й Тро́ице.

Сла́ва, и ны́не, пра́здника. На хвали ́тех стихиры на 6, глас 1.

Подо́бен: Небе́сных чино́в:

Правосла́вных мно́жества,/ прииди́те, стецы́теся:/ се бо ны́не наста́ светле́йший пра́здник трие́х новому́чеников,/ и́же Христа́, воскре́сшаго от гро́ба, воспропове́давше,/ пре́лесть нечести́вых в коне́ц посрами́ша.

Но́вое сие́ составля́ющий торжество́,/ Евфи́мий Боже́ственный есть/ и Игна́тий ку́пно со Ака́кием,/ и́же я́ко тро́ица,/ Тро́ице предстоя́т с му́ченики и преподо́бными,/ а́нгельски трисвяту́ю песнь воспева́юще.

Пали́мии вои́стинну ва́шим раче́нием,/ тро́ице новому́чеников,/ Евфи́мие Боже́ственный, Игна́тие твердому́дренный/ и сла́вне Христа́ моего́ Ака́кие,/ се собра́хомся вси па́мять ва́шу соверши́ти ве́рою.

И́ны стихи́ры, глас 2.

Подо́бен: Егда́ от Древа́:

Хвалу́ Бо́гу ра́достно,/ вси мона́шествующих ли́цы,/ днесь воспои́м,/ в па́мяти страстоте́рпцев Христо́вых,/ Евфи́мия блаже́ннаго,/ му́драго Игна́тия ку́пно со Ака́кием,/ подвиза́вшихся тве́рдо,/ те́мже венцы́ и награ́ды/ прия́ша досто́йно побе́ды/ и за ны при́сно мо́лятся.

Преподо́бнии и му́ченицы Христо́вы,/ чудесы́ озаря́ете мир/ от неистощи́маго исто́чника/ ра́ки честны́х моще́й ва́ших, сла́внии./ Те́мже днесь вси,/ в Боже́ственнем хра́ме любо́вию собира́еми,/ торжеству́ем па́мять ва́шу,/ моля́щеся па́мять к Бо́гу твори́ти/ о чту́щих вас, всечестни́и.

Стоя́сте пред суди́лищем тве́рдо/ на суде́ беззако́нных, преподобному́ченицы,/ Христа́ пропове́дающе,/ Бо́га и Челове́ка,/ и пре́лесть облича́юще,/ Евфи́мие блаже́нне, Боже́ственне Игна́тие,/ тве́рдый Ака́кие,/ те́мже, нестерпи́мыя муче́ния терпя́ще,/ венцы́ от Христа́ досто́йно восприя́сте.

Сла́ва, глас 5:

Се что добро́ или́ что красно́, пое́т Дави́д,/ но е́же жи́ти бра́тии вку́пе./ Се бо, от ра́зных стран устремившийся,/ и на сем ме́сте подви́жническия соверши́вший подви́ги,/ и Константи́нов град излия́нием честны́я своея́ кро́ве освяти́вший,/ и Боже́ственными мощми́ да́льния моря́ нетле́нно преше́дшии,/ Тро́ицы равночи́сленнии новому́ченицы,/ Евфи́мий, Игна́тий и Ака́кий,/ сей прекра́сный храм насле́довавше,/ вку́пе обита́ют, я́ко бра́тия ду́хом,/ до́брии и кра́снии су́ще,/ и, ра́кою свяще́нных моще́й/ и пе́рстию от гро́ба их нас освяща́юще,/ мо́лятся непреста́нно за ны ко Го́споду.

И ны́не, пра́здника.

Славосло́вие вели́кое. И отпу́ст.

На Литурги́и слу́жба преподобному́ченическая.

(Слу́жбу зри 9 декабря́)

Тропа́рь, глас 4:

Днесь, ве́рнии лю́дие, духо́вно торжеству́ем,/ прославля́юще Засту́пницу усе́рдную ро́да христиа́нскаго,/ и, притека́юще к пречи́стому Ея́ о́бразу, взыва́ем си́це:/ о Преми́лостивая Влады́чице Богоро́дице,/ пода́ждь нам неча́янную ра́дость,/ обремене́нным грехи́ и скорбьми́ мно́гими,/ и изба́ви нас от вся́каго зла,/ моля́щи Сы́на Твоего́, Христа́ Бо́га на́шего,/ спасти́ ду́ши на́ша.

Конда́к, глас 6:

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице./ Ты нам помози́,/ на Тебе́ наде́емся/ и Тобо́ю хва́лимся,/ Твои́ бо есмы́ раби́,/ да не постыди́мся.

Тропа́рь, глас 8:

Боже́ственныя Безкро́вныя соверша́я Же́ртвы,/ кровь твою́, от безбо́жных ага́рян излия́нную,/ в же́ртву непоро́чную прине́сл еси́ Влады́це твоему́, Пастыренача́льнику Христу́./ Его́же моли́, мо́лим тя,/ проли́ти гнев на язы́ки, хотя́щия бра́ней;/ христолюби́вое во́инство на́ше на враги́ укрепи́/ и ста́до твое́ от вся́ких бед неврежде́нно соблюди́,/ тебе́ бо кре́пкаго засту́пника почита́ем,/ но́вый священному́чениче русский,/ святи́телю блаже́нный Мака́рие.

Конда́к, глас тойже:

Весели́тся град Ки́ев,/ вели́кое сокро́вище стяжа́в,/ твое́ тле́нию неприча́стное те́ло,/ святи́телю блаже́нный Мака́рие,/ твой бо престо́л да́же до кро́ве от лю́тых враго́в наше́ствия храни́л еси́./ И ны́не Небе́сному предстои́ши Престо́лу,/ иде́же моли́твенно пред Творце́м помина́й нас, о́тче наш,/ да во всех беда́х име́ем тя прибе́жище и тобо́ю хва́лимся, зову́ще:/ ра́дуйся, Мака́рие, архиере́ом честно́е украше́ние.

Молитва

О вели́кий уго́дниче Христо́в, святи́телю о́тче Мака́рие, в житии́ твое́м чад твои́х любо́вию, сме́рти крепча́йшею, возлюби́вый и за них ду́шу твою́ преда́вый, при́зри от Го́рних оби́телей на нас, вонми́ воздыха́нием на́шим серде́чным и помози́ нам, недосто́йным и смире́нным. Моли́ся, святи́телю ми́лостивый, да рече́т Он мир на лю́ди Своя́, и на преподо́бныя Своя́, и на обраща́ющия сердца́ к Нему́. Да́руй нам, о́тче наш, любве́ твоея́ ко Святе́й Ма́тери на́шей Це́ркви Христо́вой, укрепи́ ны, разсла́бленныя ду́хом, оте́ческия преда́ния храни́ти, и о мимоше́дших напа́стех па́мять спаси́тельную име́ти, и всегда́ благода́рственная Благоде́телю Бо́гу воспева́ти научи́. Предста́тельством твои́м у Престо́ла Го́спода сил испроси́ Це́ркви Христо́вой от е́ресей и раско́лов огражде́ние, к честны́м моще́м твои́м притека́ющим и чту́щим святу́ю па́мять твою́ исполне́ние благи́х их проше́ний да́ти и всем христиа́ном вся ко вре́менней и ве́чной жи́зни потре́бная дарова́ти, да прославля́ется о тебе́ Пречестно́е И́мя Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.

Тропа́рь, глас 8:

Вы́шния красоты́ жела́я,/ ни́жния сла́сти теле́сныя дале́че от себе́ отгна́ла еси́/ и, в черто́зе ца́рском пребыва́ющи,/ а́нгельское житие́ препровожда́ла еси́,/ цари́це Тама́ро блаже́нная,/ моли́ Христа́ Бо́га спасти́ся душа́м наши́м.

Ин тропарь, глас 4:

Во святы́х ди́вная,/ Иве́рии свети́ло,/ благове́рная цари́це Тама́ро,/ на гора́х высо́ких хра́мы воздви́гшая,/ да в них моле́ния возсыла́ют ко Го́споду,/ мольба́ми твои́ми кре́пость дарова́вшая во́ем христолюби́вых люде́й страны́ И́верския,/ десни́цею же свое́ю по́лчища ага́рянская низпрове́ргшая,/ моли́ Христа́ Бо́га/ спасти́ся душа́м наши́м.