НА МА́ЛОЙ ВЕЧЕ́РНИ

На Го́споди, воззва́х:стихи́ры, глас 8.

Подо́бен: О, пресла́внаго чудесе́:

О́тче Богому́дре Лео́нтие,/ ты от утро́бы к Бо́гу прибли́жив твой смысл,/ вседу́шно прилежа́л еси́ Царю́ Вседержи́телю,/ плоды́ досто́йны принося́ Ему́/ от твои́х по́двигов, преподо́бне,/ преукраша́емь доброде́тельными венцы́./ Тем, преблаже́нне,/ обре́л еси́ восприя́тие, досточу́дне.

О́тче Богоуго́дниче Лео́нтие,/ ты свяще́нников наказа́тель/ и всея́ страны́ Росто́вския звезда́ пресве́тлая,/ осия́ющая чудесы́ вся ве́рныя:/ тя бо Бог пре́жде избра́ от ю́ности, о́тче,/ па́стыря ове́ц слове́сных./ Тем преподо́бных лик тя восприя́т,/ с ни́миже моли́, прося́ ста́ду твоему́ грехо́в оставле́ние.

О́тче Богоприя́тне Лео́нтие,/ ты мона́шеским житие́м/ Бо́гу угоди́л еси́,/ от Ца́рскаго гра́да,/ я́коже со́лнце, гра́ду Росто́ву возсия́л еси́./ Те́мже неве́рныя уче́ньми твои́ми уве́рил еси́/ и, сих просвети́в, научи́л еси́/ богосло́вити Отца́, и Сы́на, и Ду́ха Единосу́щнаго.

О́тче святи́телю Лео́нтие,/ ты немощны́х врач/ сокро́вище неизги́блемо дарова́ний духо́вных,/ исто́чник исцеле́ний,/ спасе́ние ве́рным,/ чудотво́рец преизя́щен и боля́щих цели́тель,/ в напа́стех утеше́ние, нам же засту́пник,/ избавля́я от се́ти вра́жия ду́ши на́ша.

Сла́ва, глас 8:

Весели́ся и ра́дуйся, гра́де сла́вный Росто́ве,/ красу́йся и ра́дуйся, Це́рковь Бо́жия,/ и ди́вна в пра́вду,/ в не́йже лежи́т свята́я ра́ка,/ я́же и́мать в себе́ дар исцеле́ния благода́ти,/ честно́е те́ло твое́, святи́телю вели́кий Лео́нтие:/ ты бо смире́ние стяжа́в и целому́дрие./ Твои́ми моли́твами и посо́бием/ во́инство на́ше держа́вно побежда́ет пога́ныя супоста́ты./ Тебе́ Христо́с свети́ло вели́кое показа́ гра́ду Росто́ву,/ ты же и похвала́ ему́, ты и защище́ние,/ твой гроб безме́здна врачба́ предлежи́т:/ к нему́ бо слепи́и приходя́ще, ве́рою просвеща́ются,/ хроми́и, влеку́щеся, ска́чуще, отхо́дят,/ неду́жнии исцеля́ются, бесну́ющиися бесо́в избыва́ют./ Тем и мы дне́сь вси, почита́юще честно́е твое́ обре́тение,/ мо́лим тя, преподо́бне о́тче:/ мир ми́ру испроси́ и душа́м на́шим ве́лию ми́лость.

И ны́не, Богоро́дичен

Бу́ря прегреше́ний объя́т смире́нную мою́ ду́шу,/ во глубину́ отча́яния лю́то низложи́вши:/ ускори́, Чи́стая, и окорми́тельница бу́ди ми ти́ха/ в приста́нище Бо́жия во́ли,/ да прославля́ю мно́гая Твоя́ чудеса́ ве́село,/ Влады́чице Всенепоро́чная, Ма́ти Христа́ Бо́га.

На стихо́вне стихи́ры, глас 2.

Подо́бен: До́ме Евфра́фов:

Яви́лся еси́,/ от млады́х ногте́й, Богоно́се,/ освяще́н сосу́д, Лео́нтие,/ и жили́ще/ Пресвята́го Ду́ха.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Ра́дуйся, святи́телей похвало́,/ о́тче Лео́нтие,/ свяще́нников сла́ва,/ пра́вило мона́хов,/ Це́ркве утвержде́ние.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Приими́ пе́ние ны́не/ чад твои́х, о́тче,/ и лю́бящим тя/ подава́й/ серде́чная проше́ния.

Сла́ва, и ны́не, Богоро́дичен:

Ра́дуйся,/ Я́же ра́дость ми́ру ро́ждшая,/ Христа́ Жизнода́вца,/ и отъе́мшая печа́ль,/ Де́во, прама́тернюю.

Тропа́рь пи́сан на вели́цей вече́рни.

Сла́ва, и ны́не, пра́здника или́ Богоро́дичен.

НА ВЕЛИ́ЦЕЙ ВЕЧЕ́РНИ

Блаже́н муж:1-й антифо́н. На Го́споди, воззва́х:стихи́ры, глас 5.

Подо́бен: Ра́дуйся, по́стником:

Ра́дуйся, Лео́нтие преблаже́нне,/ святи́тельское честно́е украше́ние,/ зако́нов церко́вных вели́кое утвержде́ние,/ маломо́щных помо́щник,/ скорбя́щих же ра́достное утеше́ние,/ моле́бник те́плый в напа́стех стра́ждущих,/ тьму́ разжени́ неве́дения/ и во приста́нище ти́хое наста́ви,/ иде́же со Безпло́тными наслажда́ешися/ кра́сныя добро́ты Влады́чни,/ ве́рных се́рдца на пе́ние воздвиза́я./ Христу́ помоли́ся дарова́ти душа́м на́шим/ мир и ве́лию ми́лость.

Доброде́тельми све́тло процве́л еси́,/ я́ко ма́слина плодови́та в до́му Бо́жии,/ ту́чами твои́х пречи́стых моли́тв;/ отону́дуже, себе́ свещу́ вжег све́тло,/ вшел еси́ в Небе́сныя оби́тели,/ иде́же воздаде́ся тебе́ вене́ц за труд воздая́ния:/ не дал бо еси́ сна очи́ма твои́ма,/ ни ве́ждома твои́ма дрема́ния,/ до́ндеже усну́л еси́ сном о́бщим,/ преподо́бне святи́телю Лео́нтие./ Христу́ помоли́ся дарова́ти душа́м на́шим/ мир и ве́лию ми́лость.

Красу́йся и весели́ся, Лео́нтие,/ свяще́нниче и Богопропове́дниче благода́тный,/ блаже́нный ра́зум, святопрозя́бший грозд,/ виногра́да живо́тнаго вино́ иска́пал еси́,/ веселя́щее ве́рных се́рдца,/ дря́хлствующая омраче́нием ле́сти,/ упое́ная пия́нством идолонеи́стовства;/ святоблаже́нная главо́,/ честны́й наш учи́телю,/ прииди́ посети́ нас, озло́бленных грехо́вными страстьми́,/ Христу́ помоли́ся дарова́ти душа́м на́шим/ мир и ве́лию ми́лость.

Ра́дуйся, и весели́ся, гра́де сла́вный,/ прие́мый такова́го святи́теля,/ Богоблаже́ннаго Лео́нтия,/ Богопропове́дника благода́ти./ Сей бо, му́дростию Ду́ха Свята́го преукра́шся,/ вся́ку доброде́тель от ю́ности сотвори́,/ сосу́д быв Свята́го Ду́ха,/ теплото́ю моли́тв свяще́нства ма́сть Боже́ственную прии́м,/ лю́ди, омраче́нныя пре́лестию,/ научи́ ве́ровати во Христа́,/ и по святе́м свое́м преставле́нии/ источа́ет исцеле́ния с ве́рою приходя́щим,/ и Христу́ мо́лится дарова́ти душа́м на́шим/ мир и ве́лию ми́лость.

И́ны стихи́ры, глас 2.

Подо́бен: Ки́ими похва́льными:

Ки́ими похва́льными венцы́ увязе́м святи́теля?/ Свяще́нства венца́, благоче́стия управле́ние,/ Це́ркве све́тлое украше́ние,/ исто́чника Боже́ственных исцеле́ний неисчерпа́емаго,/ проли́тие дарова́ний духо́вных,/ реку́ мно́гих чуде́с,/ зе́млю росто́вскую веселя́щу тече́нием,/ Лео́нтия, бо́драго предста́теля на́шего и храни́теля.

Ки́ими смире́нными устна́ми воспое́м святи́теля?/ Ди́внаго в чудесе́х и Безпло́тным сожи́теля,/ освяще́ннаго от пеле́н,/ столпа́ Це́ркве недви́жима,/ весе́лие земли́ на́шея,/ пра́вды прави́теля, сиро́т пита́теля,/ оби́димых засту́пника,/ больны́х врача́ безме́здна.

Прииди́те, ве́рных собо́ри,/ псало́мски восплещи́те рука́ми,/ печа́льных уте́ху, отча́янных засту́пника,/ Боже́ственнаго Лео́нтия воспева́юще,/ похвалу́ земли́ Русския/ и всего́ свяще́нства украше́ние,/ реку́ ми́лости вои́стинну,/ Боже́ственнаго Христо́ва смире́ния ревни́теля,/ подаю́щаго ми́рови ве́лию ми́лость.

Сла́ва, глас 8:

Я́коже проро́к Дави́д, похваля́я, пое́т:/ честна́ пред Го́сподем сме́рть преподо́бных Его́,/ и мы тя ублажа́ем, Христо́ва рачи́теля./ Ты у́бо челове́к сый естество́м,/ я́ко А́нгел, на земли́ яви́лся еси́/ си́лою Ду́ха Свята́го/ и чистото́ю разу́мнаго се́рдца,/ в моли́твах бде́нием,/ при́сно ви́дя лице́ во све́те живу́щаго Бо́га,/ и, Того́ возлюби́в,/ обре́л еси́ жела́емое/ в Небе́сных жили́щах, со Безпло́тными си́лами./ Моли́ся за лю́ди правове́рующия/ и за святи́тели, любо́вию сла́вящия твою́ па́мять;/ вся же лю́ди, све́тлое твое́ торжество́ пра́зднующия,/ моли́ храни́ти от вся́каго гне́ва зло́бна./ О блаже́нная главо́!/ О честны́й наш учи́телю,/ святи́телю Лео́нтие!/ Не преста́й прося́ ми́ра ми́рови/ и спасе́ния душа́м на́шим.

И ны́не, Богоро́дичен:

Ца́рь Небе́сный:

Проки́мен дне, чте́ния 3, святи́тельская

На лити́и стихи́ры, глас 4:

Я́коже бога́тство,/ гроб твой честно́е держи́т те́ло,/ обогаща́я чудесы́ притека́ющих к тебе́ ве́рно,/ блаже́нне святи́телю Лео́нтие;/ я́ко име́я о́бласть разреша́ти и вяза́ти, преподо́бне,/ вся разреши́ согреше́ния/ Боже́ственное твое́ обре́тение све́тло пра́зднующих/ и Ца́рствия Небе́снаго сподо́би моли́твами твои́ми.

Я́ко украше́ние ца́рско,/ Росто́в град обре́те твое́ те́ло, святи́телю Лео́нтие,/ о не́мже украша́ется и, хваля́ся о словесе́х твои́х,/ вселе́нную созыва́ет на весе́лие Боже́ственных дарова́ний/ и неизрече́нных чуде́с твои́х, сотворя́емых вы́ну,/ велегла́сно зовы́й:/ Ты прояви́л еси́, Влады́ко,/ сицева́го святи́теля гра́ду на́шему.

Глас 6: Егда́ обре́тение честна́го твоего́ те́ла, о́тче, бе́яше,/ тогда́ мно́жество ве́рных, обступи́вше гроб,/ с тре́петом зря́ху тебе́,/ о́вии же, зря́ще на те́ло,/ стра́хом одержи́ми бе́яху./ Кня́зь же Андре́й со слеза́ми вопия́ше:/ о Влады́ко, что Ти возда́м проти́ву Твоему́ благодаре́нию,/ е́же нам дарова́л еси́, удивля́яся?/ Но у́бо, святи́телю Лео́нтие,/ моли́ся приле́жно Христу́ Бо́гу на́шему,/ я́ко спасти́ся гра́ду твоему́ невоева́ну.

Сла́ва, глас 6:

Излия́ся благода́ть во устнах твои́х,/ преподо́бне о́тче святи́телю Лео́нтие,/ и был еси́ па́стырь Христо́вы Це́ркве,/ уча́ слове́сныя о́вцы ве́ровати в Тро́ицу Единосу́щную/ во Еди́ном Божестве́.

И ны́не, Богоро́дичен.

На стихо́вне стихи́ры, глас 8:

Святи́телю Лео́нтие,/ разу́мнаго све́та заре́,/ церко́вное свети́ло,/ святи́тельская похвало́,/ красото́ мона́шескаго по́стнаго жития́/ и и́стинное пра́вило,/ нам же засту́пник,/ свобожда́й от губи́теля ду́ши на́ша.

Стих: Уста́ пра́веднаго поуча́тся прему́дрости/ и язы́к его́ возглаго́лет суд.

Святи́телю Лео́нтие,/ вели́ку о́бласть от Бо́га прия́л еси́,/ мно́жество лука́вых бесо́в моли́твою твое́ю отго́ниши,/ от сих озлобле́ния исцеля́я всех,/ ве́рою к тебе́ притека́ющих.

Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.

Святи́теля вели́каго Лео́нтия ка́ко досто́йно воспое́м?/ Чи́стаго ума́, Богоза́рнаго све́та, освеща́ющаго ны/ и Боже́ственный ра́зум подаю́щаго,/ та́ин глуби́нных пове́дателя./ Ему́же согла́сно вси рцем:/ ра́дуйся, о́тче отце́в, Лео́нтие.

Сла́ва, глас 6:

Ты еси́ па́стырь до́брый и учи́тель те́плый,/ святи́телю Лео́нтие,/ тя всегда́ похваля́юще, вопие́м ти:/ тобо́ю украси́ Бог це́рковь Ма́тере Своя́/ и те́ло твое́, многоле́тно покрове́нное в земли́,/ нетле́нно яви́ лю́дем твои́м./ Те́мже моли́ся непреста́нно о хва́лящих тя/ и чту́щих па́мять твою́,/ прося́ оставле́ния грехо́в/ и спасе́ния душа́м на́шим.

И ны́не, Богоро́дичен: Богоро́дице, Ты еси́ лоза́ и́стинная:

На благослове́нии хле́бов тропа́рь свята́го два́жды и Богоро́дице Де́во:еди́ножды.

Тропа́рь свята́го, глас 4:

Апо́столом соприча́стник/ и к Бо́гу моле́бник ве́рен,/ доброде́тельми возше́д на Небе́сная,/ и любо́вь возложи́л еси́ к Лю́бящему тя,/ и неве́рныя лю́ди обрати́л еси́ в ве́ру./ Тем ны́не, со А́нгелы лику́я,/ предстои́ши престо́лу сла́вы всех Царя́ Христа́ Бо́га:/ моли́ся, святи́телю Лео́нтие,/ да спасе́т ду́ши на́ша.

НА У́ТРЕНИ

По 1-й стихоло́гии седа́лен, глас 1.

Подо́бен: Гроб Твой:

Служи́тель быв Христу́, вся́ческих Влады́це,/ научи́л еси́ лю́ди и просвети́л еси́ Боже́ственным креще́нием,/ к разуме́нию сего́ наста́вль, святи́телю./ Те́мже пропове́дника тя и́стины вси имену́ем, святи́теля и уго́дника Христо́ва.

Сла́ва, и ны́не, Богоро́дичен:

Безневе́стная Чи́стая Богоро́дице Де́во, еди́на ве́рных Предста́тельнице и покро́ве,/ бед, и скорбе́й, и лю́тых обстоя́ний всех изба́ви,/ на Тя упова́ние, Отрокови́це, иму́щих,/ и ду́ши на́ша спаси́ Боже́ственными моли́твами Твои́ми.

По 2-й стихоло́гии седа́лен, глас 4.

Подо́бен: Ско́ро предвари́:

От ю́ности взем крест твой, благочести́вно Христу́ после́довал еси́,/ увяди́в плотско́е мудрова́ние воздержа́нием;/ те́мже, на святи́тельстем седа́лищи сед, святи́телю,/ возвели́чил еси́ Влады́ку и Того́ Пречи́стую Ма́терь,/ разли́чными дарова́нии твою́ украси́вша ра́ку, Лео́нтие Богоблаже́нне.

Сла́ва, и ны́не, Богоро́дичен:

Де́во Всенепоро́чная, Я́же Пресу́щнаго Бо́га ро́ждшая,/ со святи́телем Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая.

По полиеле́и седа́лен, глас 8,

Подо́бен: Прему́дрости:

Над страстьми́ ца́рствовав плотски́ми, святи́тель яви́лся еси́ Богоподо́бен,/ па́ству твою́ пресла́вно упа́сл еси́, преподо́бне,/ креще́нием же просвети́л еси́ и наказа́л еси́ сла́вити Еди́наго Бо́га в Трие́х Ипоста́сех,/ те́мже источа́еши исцеле́ния и по кончи́не/ ве́рою приходя́щим ко святе́й Бо́жией це́ркви и к ра́це моще́й твои́х,/ святи́телю Лео́нтие, моли́ Христа́ Бо́га согреше́ний оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Небе́сную две́рь и киво́т, пресвяту́ю го́ру,/ све́тлый о́блак воспои́м, неопали́мую купину́, слове́сный рай,/ Е́вы воззва́ние, вселе́нныя всея́ вели́кое сокро́вище,/ я́ко спасе́ние в Ней соде́лася ми́рови и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся всесвято́му рождеству́ Твоему́.

Степе́нна, 1-й антифо́н 4-го гла́са. Проки́мен: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси, живу́щии по вселе́нней. Ева́нгелие от Иоа́нна, зача́ло 35, от полу́.

По 50-м псалме́ стихи́ра, глас 6:

Святи́телей удобре́ние и отце́в сла́ву,/ исто́чника исцеле́ний/ и ве́рных засту́пника вели́каго,/ соше́дшеся, празднолю́бцы,/ пе́сньми и похвала́ми воспои́м, глаго́люще:/ ра́дуйся, Росто́ву храни́телю, и наста́вниче честны́й,/ и сто́лпе неподви́жимый;/ ра́дуйся, свети́льниче всесве́тлый,/ и́же ми́ра концы́ просвеща́яй чудесы́;/ ра́дуйся, скорбя́щих Боже́ственное утеше́ние/ и оби́димых те́плый побо́рниче./ И ны́не, преблаже́нне Лео́нтие,/ не преста́й моля́ся Христу́ Бо́гу, спасти́ся душа́м на́шим.

Кано́н дне или́ Богоро́дицы, на 6, и святи́теля, на 8. Творе́ние Иоа́нна епи́скопа. Глас 6.

Пе́снь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь/ пои́м, вопия́ше.

Све́том Твоего́ Божества́, Христе́,/ мрак неве́дения души́ моея́ озари́в, просвети́, Ми́лостиве,/ и да́ждь ми сло́во, Сло́ве, да воспою́ све́тло Твоего́ рачи́теля торжество́.

Ма́стию свяще́нною пома́зан быв от руки́ Вседержи́теля Бо́га,/ святи́телю сла́вне Лео́нтие, моли́ о хва́лящих твою́ па́мять,/ получи́ти грехо́в проще́ние и напа́стей избавле́ние.

Души́ самово́льное житие́, и доброро́дство ве́ры стяжа́в,/ богопоруче́нныя тебе́ лю́ди, и че́стно наказа́в, преблаже́нне, свяще́нне Лео́нтие,/ приве́л еси́ я ко Христу́ Бо́гу.

Богоро́дичен: Язы́ком избавле́ние Тобо́ю яви́ся, Пречи́стая Влады́чице,/ пре́жде па́дшим во тлю пра́деда Ада́ма преступле́нием:/ Ты бо Христа́ породила́ еси́, вся́ческих Творца́ и Го́спода.

Пе́снь 3

Ирмо́с: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Свобо́ден сый ум от страсте́й соблю́д,/ сосу́д освяще́н Ду́ха Пресвята́го был еси́,/ всего́ себе́ пригво́ждь к Вы́шнему любо́вию, преблаже́нне.

Твой Богоглаго́ливый язы́к бы́сть,/ прие́м Христа́ вну́трь, в се́рдцы глаго́лющ, Бо́жий вити́я, Лео́нтие,/ Тому́ помоли́ся за ны.

Креста́ Госпо́дня си́лою укрепля́яся, блаже́нне,/ поще́нием бо ве́рныя твоея́ моли́твы стремле́ния бесо́вская низложи́в, пове́ргл еси́.

Богоро́дичен: Вели́ка сла́ва церко́вная, па́че дре́вняго собо́ра Изра́илева:/ Ты бо Це́рковь Бо́жия, Богоро́дице,/ в не́йже Христо́с пожи́в, спасе́ние соде́ла.

Седа́лен, глас 8.

Подо́бен: Прему́дрости:

Тве́рдостию ра́зума украша́яся, плотски́я тя́гости горды́ню попра́л еси́,/ и был еси́ оби́телище избра́нно Ду́ха Пресвята́го,/ неукло́нным ра́зумом простира́яся к Лю́бящему тя,/ тем и ре́вностию Боже́ственною разгара́яся, сла́вне,/ многоко́зненнаго стре́лы притупи́л еси́/ и яви́вся А́нгелом собесе́дник, святи́телю Лео́нтие,/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не пра́здника или́ Богоро́дичен:

Я́ко Всенепоро́чная Неве́сто Творцу́,/ я́ко неискусому́жная Ма́ти Изба́вителя,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище и бесо́м игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́,/ Светоно́сная, Нетле́нная,/ отжени́ о́блак страсте́й и Вышняго прича́стия сподо́би/ и Све́та невече́рняго моли́твами Твои́ми.

Пе́снь 4

Ирмо́с: Христо́с моя́ си́ла,/ Бог и Госпо́дь, честна́я Це́рковь/ боголе́пно пое́т, взыва́ющи,/ от смы́сла чи́ста/ о Го́споде пра́зднующи.

Христа́ да похва́лим, вси ве́рнии, такова́го святи́теля да́вшаго,/ пречестно́е удобре́ние сла́вней це́ркви Своея́ Пречи́стыя Ма́тере.

Ду́ха дарова́нии благода́тию, сла́вне, в ри́зу свы́ше облача́яся,/ а́ки Ааро́н, незло́бием, преподо́бием и пра́вдою/ предста́л еси́ престо́лу Христо́ву.

Духо́вен стяжа́в язы́к же и уста́ ти́хая честны́ми твои́ми словесы́,/ я́ко от пото́ка пи́щна, точа́ща уче́ния медото́чная,/ жи́знь безконе́чную исхода́тайствуй нам.

Богоро́дичен: Христа́ нам, Бо́жию си́лу и му́дрость,/ Ты породи́вши, Пречи́стая Влады́чице, Богора́дованная Де́во,/ спаси́ лю́ди и град, на Тя упова́ющия, Богоро́дице Пренепоро́чная.

Пе́снь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Блаже́н ты яви́лся еси́, и добро́ ти бы́сть,/ я́ко в моли́твах чи́стое и во бде́ниих кре́пкое,/ успе́шно пострада́л еси́, свяще́нный святи́телю, о́тче Лео́нтие:/ та́ко бо благослови́тся всяк, боя́йся Го́спода.

Бо́жиим хране́нием блюдо́мо всечестно́е те́ло твое́, преблаже́нне Лео́нтие,/ мно́гими ле́ты земле́ю покрове́но, яви́ся невреди́мо,/ я́ко цвет неувяда́емь, ве́рных сердца́ веселя́що.

Гроб честна́го твоего́ телесе́ показа́ся, ве́рных люде́й душа́м благослове́ние/ и телесе́м исцеле́ние, оби́льно излива́я, то́чит/ и вся́кия стра́сти тьму́ отгоня́ет.

Богоро́дичен: Бо́жиим укра́шена све́том, Богопрера́дованная Ма́ти:/ Ты бо породила́ еси́ красне́йша па́че всех сыно́в челове́ческих, и́стиннаго Бо́га,/ от ле́сти мир изба́вльшаго.

Пе́снь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Еди́нство Тро́ицы пропове́дал еси́ я́сно, святи́телю Лео́нтие,/ и нему́дрых сердца́ волну́ема укроти́л еси́,/ ра́вно славосло́вит ро́ждшагося Сло́ва, сопресто́льна Отцу́ и Ду́ху Свято́му.

Не терпя́ ви́дети враг ле́стное его́ погиба́ющее се́тование,/ подви́же устремле́ние людско́е на святопома́занную твою́ главу́,/ ты же моли́твами твои́ми разсла́блены и не́мощны пове́ргл еси́ я.

Богоразу́мием све́тло име́юще души́ своея́ у́мное,/ кра́сят ра́ку моще́й твои́х, стека́ющеся к похвале́нию чуде́с твои́х празднолю́бцы,/ свяще́нный наш учи́телю.

Богоро́дичен: Диви́т ум же и слух Твое́ чревоноше́ние, Де́во Господоимени́тая:/ ражда́еши бо Неви́димаго Бо́га,/ се уже́ ви́дима в на́шем существе́ я́ко Челове́ка,/ спаса́ющаго челове́ки.

Конда́к, глас 4

Подо́бен: Яви́лся еси́:

Жития́ ра́ди чистоты́,/ Всеви́дец Госпо́дь свет Свой насади́ в души́ твое́й,/ вразуми́ти лю́ди мно́гия/ твои́ми уче́нии,/ Лео́нтие преподо́бне.

И́кос:

Новоразу́мному язы́ку, великоимени́тей стране́, блаже́нней земли́/ святоразу́мен пропове́дник показа́лся еси́ боголе́пныя ве́ры Христо́вы:/ омраче́нная на́ша се́рдца озари́в, из глубины́ нече́стия исто́ргл еси́;/ пре́жде бо ны неве́жды су́щия, слове́с благода́тию укроти́в,/ наказа́л еси́ сла́вити пра́ведное и вели́кое в Тро́ице Божество́./ Свяще́нный наш учи́телю,/ от кру́га Небе́снаго посеща́й моли́твами твои́ми хва́лящия твою́ па́мять,/ Лео́нтие преподо́бне.

Пе́снь 7

Ирмо́с: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Уче́ньми кре́пкими прему́дрых слове́с твои́х, я́ко чадолюби́вый оте́ц,/ незло́бивых дете́й мно́жество усвоив Це́ркви, увеща́л еси́ вопи́ти:/ благослове́н Бог оте́ц на́ших.

Тобо́ю освяти́ Госпо́дь град вели́кий сла́вный Росто́в, венцено́сче Лео́нтие,/ лю́дие бо его́, вразумле́ни тобо́ю, пою́т Христу́:/ благослове́н Бог оте́ц на́ших.

Гасяща у́бо свещу́ у честны́я твоея́ ра́ки, блаже́нне, устраши́в/ и не глаго́лати сотвори́в,/ твоея́ же святы́ни моли́твою исцеле́ние прия́т./ С ни́мже и мы, веселя́щеся, вопие́м Христу́:/ благослове́н Бог оте́ц на́ших.

Богоро́дичен: Умертви́ся пресмыка́емый змий Твои́м Рождество́м, Пречи́стая Де́во,/ поро́ждши невмести́маго Бо́га небесы́./ Спаси́ от бед хва́лящия Тя, благослове́нная Чи́стая Присноде́во.

Пе́снь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Лику́ют чи́ни а́нгельстии на Небесе́х,/ и ве́рных со́нмища на земли́,/ твою́ па́мять похваля́юще, святи́телю Лео́нтие,/ Христа́ превозно́сят во ве́ки.

Тле́нныя ве́щи оттря́с и в Небе́сныя ду́шу твою́ впери́в,/ я́ко же́ртва благоприя́тна, в воню́ благово́ния прине́слся еси́ Христу́,/ Его́же превозно́сим во ве́ки.

Воспое́м усе́рдно пе́сньми Христа́ Бо́га, преподо́бнаго торжество́ ви́дяще, сла́вим./ Вся бо де́йствует Христо́с, ели́ко хо́щет:/ Его́ бо сла́вящия прославля́ет во ве́ки.

Богоро́дичен: На Тя, Богома́ти Пречи́стая,/ Небе́сный До́ждь сни́де, омыва́ющий скве́рну душ на́ших,/ тем Тя блажи́м, Чи́стую, во ве́ки.

Пе́снь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и/ Тя ублажа́ем.

Я́ко звезда́ светоно́сная, яви́лся еси́, луча́ми духо́вными ве́рных сердца́ просвеща́я,/ све́том ра́зума Боже́ственнаго, Богому́дре Лео́нтие./ Тем, ны́не со А́нгелы водворя́яся, спаса́й хва́лящия твою́ па́мять.

Де́лы духо́вными укра́шен, в пи́щи ра́йстей веселя́ся,/ помяни́ хва́лящия твою́ па́мять,/ заступа́я от бед и скорбе́й, преблаже́нне священносвяти́телю Лео́нтие,/ да непреста́нно тя ублажа́ем.

Име́я Ца́рство непреме́нно, Царю́ сый Вы́шних сил, Христе́,/ десни́цы Твоея́ кре́постию враг нечести́вых вы́ю низверзи/ под но́зе во́инству на́шему.

Богоро́дичен: Егда́ су́диши, Ми́лостиве, я́ростию не обличи́ мене́,/ ни гне́ва же сотвори́ проти́ву беззако́нием./ А́ще ли обличи́ши, то кто постои́т?/ Моли́твами ро́ждшия Тя Чи́стыя Ма́тере огня́ гее́нскаго изба́витися мо́лимся/ и прича́стником бы́ти Ца́рства Небе́снаго.

Свети́лен.

Подо́бен: Посети́л ны:

Сла́вно кра́сится дне́сь светоза́рное твое́ торжество́:/ во све́те сла́вы лица́ Бо́жия предстоя́, святи́телю,/ помяни́ нас, хва́лящих твою́ па́мять.

Богоро́дичен:

По Бо́зе упова́ние иму́ще на Тя, Пречи́стая Богоро́дице, мо́лимся:/ к Ро́ждшемуся из Тебе́ мольба́ми невреди́мых нас да́же до конца́ сохрани́.

На хвали́тех стихи́ры, на 4, глас 8.

Подо́бен: О, пресла́внаго чудесе́:

Преподо́бне о́тче Лео́нтие,/ ты, возше́д на ле́ствицу Боже́ственнаго ра́зума/ и к Бо́гу приближа́яся,/ усыне́ния от Него́ дар прия́л еси́,/ исцеля́ти неду́ги неисце́льныя/ и отгоня́ти ду́хи омраче́нныя./ Тем твое́ успе́ние пра́зднуем,/ ра́достию се́рдца Христа́ велича́юще,/ велича́ющаго Своего́ уго́дника.

Преподо́бне о́тче Богому́дре,/ ты вои́стинну яви́лся еси́ други́й Моисе́й,/ свобожда́я и наставля́я но́ваго Изра́иля/ от пре́лести лю́таго фарао́на/ и преводя́ на зе́млю обетова́ния,/ в Небе́сныя огра́ды,/ иде́же ны́не лику́еши у престо́ла всех Царя́,/ за ны непреста́нно к Нему́, о́тче, моля́ся,/ преблаже́нне Лео́нтие.

Ра́дуйся, всекра́сне Лео́нтие,/ ты измла́да Христа́ возлюби́л еси́,/ куми́р возгнуша́вся/ и ме́рзских идолослуже́ний,/ храм себе́ освяти́л еси́/ и оби́тель был еси́ Пресвята́го Ду́ха:/ Его́же исполня́яся,/ Тро́ицу во Еди́ном Божестве́ пропове́дал еси́./ Е́йже за твоя́ ча́да, о́тче, помоли́ся.

Сла́ва, глас 8:

Святи́телю Лео́нтие,/ высото́ доброде́телей, Бо́жие процвете́ние,/ му́дрости орга́не,/ правове́рных сла́во,/ злове́рия обличи́телю,/ де́вственнаго ли́ка вели́кое спаси́тельное и ди́вное мудрова́ние,/ Христа́ Бо́га моли́/ дарова́ти душа́м на́шим ве́лию ми́лость.

И ны́не, Богоро́дичен.

Славосло́вие вели́кое. И отпу́ст.

НА ЛИТУРГИ́И

Блаже́нны, пе́сни 3-я и 6-я. Проки́мен: Уста́ моя́ возглаго́лют прему́дрость/ и поуче́ние се́рдца моего́ ра́зум.Стих: Услы́шите сия́, вси язы́цы, внуши́те, вси, живу́щии по вселе́нней. Апо́стол ко Евре́ем, зача́ло 318, от полу́. Аллилу́ия: Уста́ пра́веднаго поуча́тся прему́дрости,/ и язы́к его́ возглаго́лет суд. Ева́нгелие от Матфе́я, зача́ло 11. Прича́стен: В па́мять ве́чную:

Моли́тва

О свяще́нная главо́, пресла́вный чудотво́рче, первопа́стырю святы́я Росто́вския Це́ркве, святи́телю о́тче Лео́нтие! К тебе́ припа́даем и мо́лимся мы, смире́ннии и гре́шнии и, я́ко отца́ чадолюби́ваго, про́сим: всели́ в сердца́ на́ша любо́вь твою́, е́юже к Бо́гу и бли́жним твои́м при жи́зни твое́й преиспо́лнен был еси́, я́ко и ду́шу твою́ за па́ству твою́ положи́л еси́, му́ченически пострада́в от идолослужи́телей, научи́ нас, о́тче, тебе́ подража́ти ве́рно, Бо́га и бли́жних на́ших люби́ти и́скренно и за́поведи Госпо́дни соверша́ти непогреши́тельно, да бу́дем и мы ча́да твоя́ не по и́мени то́кмо, но са́мым де́лом и всем житие́м на́шим. Моли́ся, уго́дниче Бо́жий, ко Христу́ Бо́гу о святе́й Правосла́вной Це́ркви и держа́ве Русской: да пребу́дут в ми́ре и благостоя́нии и процвета́ют в благоче́стии христиа́нстем непоколеби́мы. Соблюди́ град твой Росто́в и вся гра́ды и ве́си страны́ Русския невреди́мы от вся́каго зла. При́зри благоутро́бно на вся́ку ду́шу христиа́нскую, ми́лости и по́мощи от Тебе́ и́щущую, бу́ди всем нам в боле́знех цели́тель, в ско́рбех уте́шитель, в печа́лех изба́витель, в беда́х помо́щник, в час сме́ртный покрови́тель; да при по́мощи моли́тв твои́х святы́х сподо́бимся и мы, гре́шнии, спасе́ние ве́чное получи́ти и Ца́рствие Христо́во унасле́довати. Ей, святи́телю Христо́в! не посрами́ упова́ния на́шего, е́же по Бо́зе и Пресвяте́й Богоро́дице на тя кре́пко возлага́ем, но яви́ нам твое́ многомо́щное заступле́ние, да хва́лим, сла́вим и велича́ем вели́кое человеколю́бие ди́внаго во святы́х Свои́х Бо́га Отца́, и Сы́на, и Свята́го Ду́ха, во ве́ки веко́в. Ами́нь.

Краегране́сие слу́жбы си́це: Росто́ву Вели́кому, Ярославлю же сла́вному смире́нно дар Никоди́м прино́сит.

НА ВЕЛИ́ЦЕЙ ВЕЧЕ́РНИ

На Го́споди, воззва́х:стихи́ры на 8, глас 4:

Росто́ва Вели́каго и Яросла́вля па́стырие свяще́ннии,/ храни́телие ста́да Христо́ва и де́лателие виногра́да церко́внаго,/ архиере́и Бо́га Вы́шняго/ и ра́внии А́нгелом в соверше́нстве душ ва́ших, преподо́бнии/ и вси пра́веднии, све́та Небе́снаго свети́льницы,/ ревни́телие Ева́нгелия Ца́рствия Бо́жия,/ просия́вшии во граде́х и ве́сех земли́ на́шея,/ о нас непреста́нно моли́теся Спа́су всех и Изба́вителю/ дарова́ти нам ми́лость, мир и спасе́ние.

О́блак иму́ще, облежа́щ нас, свиде́телей,/ ве́рою послу́шествованных и пожи́вших на земли́ любо́вию,/ благоугоди́вших Бо́гу в земли́ Росто́ва Вели́каго и Яросла́вля,/ святи́телей, и преподо́бных, и пра́ведных,/ терпе́нием да соверша́ем тече́ние по́двига на́шего, подража́я тем,/ подвиза́ющеся вся́кое зло низлага́ти,/ взира́юще на Первосвяще́нника Вели́каго,/ проше́дшаго Небеса́, Иису́са Го́спода,/ да́рующаго нам ми́лость, мир и спасе́ние.

Свяще́нства Христо́ва служи́телие ве́рнии,/ апо́столов Бо́га Сло́ва прее́мницы,/ учи́телие па́ствы богопросвеще́ннии,/ па́стырие до́брии наро́да Бо́жия,/ земли́ Росто́ва Вели́каго и Яросла́вля святи́телие,/ с преподо́бными и пра́ведными и все́ми святы́ми/ предстоя́ще ны́не Престо́лу Святы́я Тро́ицы,/ моли́теся дарова́ти нам ми́лость, мир и спасе́ние.

Твоя́ свяще́нная ни́ва,/ архиере́йский престо́ле Вели́каго Росто́ва и Яросла́вля,/ ны́не плод прино́сит изоби́льный Первосвяще́ннику Иису́су:/ иера́рхи бо богоизбра́нный и де́лателие непосты́днии/ освяти́ша ева́нгельским благове́стием вся концы́ земли́ твоея́/ и Боже́ственною благода́тию соверши́ша во спасе́ние мно́гия лю́ди,/ пожи́вшия в преподо́бии и пра́вде./ Мы же, тем подража́ти хотя́ще,/ мо́лимся Христу́ Го́споду/ дарова́ти нам ми́лость, мир и спасе́ние.

Сла́ва, глас 2:

Освяще́ннии Боже́ственным Ду́хом,/ житие́ на земли́ сконча́ли есте́ благоче́стно,/ Христу́ себе́ преда́вше и послужи́вше лю́дем Бо́жиим,/ святи́телие и преподо́бнии,/ пра́веднии и вси, Бо́гу угоди́вшии,/ Росто́ву сла́ва и утвержде́ние Яросла́влю,/ У́гличу похвала́ и Пересла́влю ра́дование,/ Любимогра́ду и Обно́ре украше́ние/ и Пошехо́нскому кра́ю свет Христо́в облиста́вшии,/ Святе́й Тро́ице предстоя́ще,/ о земли́, иде́же подвиза́стеся, моли́теся,/ и о всех, любо́вию чту́щих па́мять ва́шу.

И ны́не, Богоро́дичен: Пре́йде се́нь зако́нная:

Вход. И чте́ния три преподо́бническая (зри 23 мая)

На лити́и стихи́ры, глас 3:

Веле́ние Спа́са ми́ра,/ е́же жи́ти свя́то и непоро́чно/ и е́же соверше́нным бы́ти во о́браз Небе́снаго Отца́,/ восприя́ли есте́, святи́и Бо́жии челове́цы,/ Небе́сныя на земли́ жа́ждуще пра́вды/ и а́лчуще гла́дом духо́вным,/ Христо́м, Небе́сным Хле́бом, утверди́стеся,/ ны́не предстоя́ Ему́/ и наслажда́яся Того́ ве́чных благ,/ моли́теся непреста́нно о всех нас.

Утвержде́ни благода́тию Небе́сною,/ Христо́в зако́н начерта́ли есте́ на скрижа́лех серде́ц свои́х/ и сотвори́ли есте́ и научи́ли есте́ ины́х та́кожде жи́ти,/ я́коже повеле́ Госпо́дь,/ и с вели́кими Ца́рствия Христо́ва сопричте́ни есте́,/ ны́не о нас моли́теся,/ да укрепи́т ны Спас ми́ра неви́димою свы́ше си́лою,/ е́же побежда́ти грех/ и благоугожда́ти бли́жним на́шим во благо́е к назида́нию.

Сла́ва, и ны́не, глас 5:

Весе́лия духо́внаго и ра́дости неземны́я/ исполня́ются ны́не преде́лы Росто́вския и Яросла́вския/ в благоче́стную па́мять сыно́в и дще́рей свои́х,/ предстоя́щих во сла́ве Небе́сней Христу́ Спа́су,/ и́хже утверди́ Сам си́лою Свое́ю ра́ди бла́гости,/ моли́твами Пречи́стыя Ма́тере,/ моля́щияся непреста́нно о ро́де христиа́нстем/ и нам милосе́рдствующая явле́нием на То́лге Своея́ святы́я ико́ны.

На стихо́вне стихи́ры, глас 2:

Ева́нгельское и́го и архиере́йское досто́инство/ восприя́ли есте́, Богоизбра́ннии святи́телие,/ ве́ры пра́вило и кро́тости духо́вныя о́браз,/ в земли́ на́шей ве́ру ева́нгельскую насади́вшии и возрасти́вшии./ Ты же архиере́йский престо́л утверди́л еси́ кро́вию твое́ю, святи́телю Лео́нтие,/ со Иса́иею, Игна́тием, Иа́ковом,/ Фео́дором и Дими́трием,/ моли́ся ны́не о ча́дех твои́х.

Стих: Го́споди, Госпо́дь наш,/ я́ко чу́дно И́мя Твое́ по всей земли́.

Лик А́нгел земны́х и челове́к соверше́нных,/ от земли́ на́шея возше́дый к Небе́сным оби́телей,/ наслажда́ется све́том незаходи́мым Триипоста́снаго Бо́га,/ в Не́мже ра́дость ве́чная и блаже́нство несконча́емое./ Све́тло у́бо весели́ся, Росто́ве,/ в тебе́ бо роди́ся пречу́дный Се́ргий, земли́ Ру́сския заступле́ние,/ тя освяти́ша моли́твы Авраа́мия и мно́жества святы́х./ Украша́йся, У́гличе, поще́нием и моли́твами Паи́сия с Кассиа́ном,/ Игна́тия же до́блим терпе́нием./ Пересла́влю – столп недви́жимый Ники́ты и Дании́ла предста́тельство./ Сильвестр же, на Обно́ре возсия́вый,/ и Генна́дий Любимогра́дский да ублажа́ются/ с Пошехо́нскими Севастиа́ном, и Адриа́ном,/ и Игна́тием Ло́мским.

Стих: Святы́м, и́же су́ть на земли́ Его́,/ удиви́ Госпо́дь вся хоте́ния Своя́ в них.

И́стиннии Го́рняго Иерусали́ма ны́не гра́ждане,/ в житии́ же ва́шем избра́ннии/ и сла́внии сы́ны оте́чества Русскаго,/ благове́рнии подви́жницы за зе́млю оте́ц свои́х,/ прославля́ем вас от серде́ц на́ших:/ Бори́са целому́дреннаго и братолюби́ваго,/ Василька́ прекра́снаго, кро́вь свою́ проли́вшаго,/ Алекса́ндра, си́льнаго ду́хом, всея́ Руси́ утвержде́ние,/ Васи́лия и Константи́на, Яросла́вля сла́ву,/ Фео́дора со ча́ды возлю́бленными,/ и Рома́на, У́гличскую добро́ту,/ и всех, преда́вших с ва́ми ду́ши за дру́ги своя́,/ и́хже имена́ не явле́ны нам,/ оба́че в кни́зе живы́х запечатлени су́ть.

Сла́ва, глас то́йже:

Крест Христо́в на ра́мо взе́мшии,/ Бо́га Небе́снаго на земли́ служи́телие ве́рнии/ и Богоно́сцы вои́стинну бы́ли есте́,/ пра́ведницы, во ве́ки живу́щии,/ восприя́вшии от Небе́снаго Домовлады́ки ра́йское наслажде́ние:/ Иси́доре блаже́нне и Иоа́нне ми́лостиве,/ Ирина́рше затво́рниче и Пе́тре преподо́бне/ со Андре́ем, оста́вльшим черто́ги сла́дости земли́,/ и Анастаси́е с му́ченицами де́вами,/ дади́те нам от еле́я ва́шего,/ во е́же не себе́ люби́ти,/ но послужи́ти бли́жним на́шим.

И ны́не, Богоро́дичен.

Тропа́рь, глас 4:

О благоче́стный собо́ре,/ о лю́дие избра́ннии,/ святи́телие преподо́бнии и пра́веднии,/ и благове́рнии гра́ждане Русстии,/ я́ко зве́зды, на тве́рди церко́вней/ страны́ Росто́вския и Яросла́вския к Бо́гу предста́телие,/ велича́ем с любо́вию вас, по пло́ти на́ших сро́дников./ Вы же моли́теся дарова́ти мир стране́ и Це́ркви на́шей,/ благослове́ние и ми́лость Бо́жию всем лю́дем,/ всепроще́ние и спасе́ние,/ хода́таи бо есте́ при́снии о нас ко Святе́й Тро́ице.

Тропа́рь святи́телем Росто́вским, глас то́йже:

Святи́телие прему́дрии,/ па́ствы ва́шея учи́телие богопросвеще́ннии,/ ве́ру ева́нгельскую в лю́дех преумно́жившии,/ любве́ Небе́сныя на земли́ достоподража́тельнии о́брази,/ лю́ди страны́ Росто́вския и Яросла́вския приобща́вшии спасе́нию,/ служи́телие вои́стинну Бо́жии/ и соприча́стницы апо́столов досто́йнии яви́лися есте́,/ Лео́нтие священному́чениче, Иса́ие, Игна́тие, Иа́кове, Фео́доре/ и златослове́сниче Русский Дими́трие,/ Христа́ Бо́га моли́те/ о архиере́ех, на престо́ле ва́шем прее́мницех,/ о лю́дех, благоче́стно вас почита́ющих,/ о стране́ на́шей правосла́вней/ и о всей Христо́вей Це́ркви.

НА У́ТРЕНИ

На Бог Госпо́дь:тропа́рь святы́м, два́жды. Сла́ва, и ны́не,Богоро́дичен.

По 1-м стихосло́вии седа́лен, глас 1:

Му́дрость Бо́жию разуме́вше,/ я́ко пра́веден Госпо́дь и пра́вды возлюби́,/ Христо́вы пра́вды бы́ли есте́ служи́телие ве́рнии,/ де́лом сло́ву ева́нгельскому отвещава́я,/ испо́лнили есте́ за́поведи Спа́совы/ и нас научи́ти тем дово́льни есте́,/ и лице́ Вседержи́теля ви́де правоту́ ва́шу,/ Ему́же, во сла́ве Его́ предстоя́ще, моли́теся о всех нас.

Сла́ва, и ны́не, глас то́йже:

Ура́нила еси́ главу́ дре́вняго зми́я, Пречи́стая,/ и сокрушила еси́ того́ держа́ву, Пренепоро́чная,/ ро́ждши ми́ра Спаси́теля, Богочелове́ка Иису́са, Преблагослове́нная,/ и ны́не моли́ся о лю́дех,/ и́хже Сын Твой вручи́ заступле́нию Твоему́, о Ма́ти всех нас.

По 2-м стихосло́вии седа́лен, глас 5:

Яд зми́я дре́вняго, и́же е́сть грех,/ исто́ргли есте́ из серде́ц ва́ших,/ возлюби́вше Еди́наго Благоде́теля Бо́га и Тому́ служи́вше,/ святи́телие, преподо́бнии и вси пра́веднии,/ досто́йно во пло́ти пожи́ли есте́,/ нам к подража́нию о́браз при́сно явля́юще,/ моли́теся неотсту́пно о граде́х и ве́сех земли́ Росто́вския и Яросла́вския,/ иде́же житие́ соверши́сте.

Сла́ва, и ны́не, глас то́йже:

Ра́дуйся, исто́чниче ми́лости Небе́сныя,/ ра́дуйся, Вседержи́теля ро́ждшая, изба́вльшаго нас от вся́каго зла/ и подаю́щаго благода́тную си́лу низлага́ти грех,/ ра́дуйся, предстоя́щая при́сно Престо́лу Влады́чню,/ ра́дуйся, Ма́ти Бо́жия, восприя́вшая всыновле́ние Тебе́ всех христиа́н,/ моли́ся Сы́ну Твоему́ непреста́нно,/ да бу́дем достои́ни Его́ благосты́ни.

По полиеле́и седа́лен, глас 5:

О́гнь Боже́ственныя любве́ в се́рдце име́юще/ и чистоту́ стяжа́вше серде́чную,/ Христо́вы адама́нти ве́ры,/ на земли́ бы́ли есте́ служи́телие Боже́ственныя пра́вды,/ ду́шу и те́ло Христу́ преда́вше,/ оте́чества до́брии гра́ждане,/ лю́дем милосе́рдие явля́ли есте́,/ а́лчущия насыща́я и напоя́я жа́ждущия,/ одева́я наги́я и бе́дныя,/ боля́щия посеща́я и стра́ждущия,/ научи́те и нас подража́ти вам.

Степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х Свои́х,/ Бог Изра́илев.Стих: В це́рквах благослови́те Бо́га, Го́спода от исто́чник Изра́илевых.Ева́нгелие от Матфе́я, зача́ло 11.

По 50-м псалме́ стихи́ра, глас 6:

Сла́вы святы́я служи́телие,/ чистоты́ душе́вныя и теле́сныя храни́телие,/ послужи́вшии лю́дем многообра́зне,/ на земли́ пожи́ли есте́,/ и́стиннии Спа́совы ученицы́,/ Всесвяте́й Тро́ице на Небесе́х предстоя́ще,/ позна́ли есте́ сла́дость Боже́ственнаго прича́стия,/ его́же и нас на земли́ вкуси́ти отча́сти/ моли́те Бо́жию бла́гость,/ ве́чнаго же наслажде́ния сподо́битися по исхо́де от земны́х,/ ны́не же бы́ти нам со Христо́м и лю́дем служи́ти.

Кано́н, глас 4.

Пе́снь 1

Ирмо́с: Пое́м пе́снь побе́дную Еди́ному Бо́гу,/ сотво́ршему пресла́вная:/ дре́вле бо фарао́на/ со всево́инством в мо́ри погрузи́.

Припе́в: Вси святи́и земли́ Росто́вския и Яросла́вския,/ моли́те Бо́га о нас.

Лю́дие христоимени́тии земли́ Ру́сския,/ спра́зднуйте с на́ми торжество́ церко́вное, па́мять подража́телей Спа́су:/ святи́телей, преподо́бных и пра́ведных,/ и́хже просла́ви Бог в Росто́ве и Ярославле и всей о́бласти их,/ ре́вности же по Бо́зе тех подража́ти и мы да потщи́мся вси.

Апо́стольская про́поведь дости́же и стогн твои́х, Вели́кий Росто́ве,/ и озари́ тя све́том Христо́вым,/ и отгна́ оте́ческаго идолослуже́ния безу́мие во всех конце́х земли́ твоея́/ мно́гим по́двигом иера́рхов и ины́х святы́х твои́х,/ и́же, Христу́ предстоя́ще, мо́лятся о Це́ркви, ю́же утверди́ша.

Вели́каго Росто́ва первопастырь,/ от ю́га возсия́л еси́ в стране́ на́шей се́верней,/ я́ко свети́ло небе́сное, Лео́нтие чу́дне, архиере́ю сла́вне,/ запечатле́в кро́вию твое́ю свиде́тельство Сло́ва Бо́жия,/ ны́не, соприча́стниче апо́столов, м о лися о па́стве твое́й/ и о седя́щих на престо́ле Твое́м прее́мницех.

Богоро́дичен: Лику́ют А́нгели Небе́снии,/ ви́дяще, Ма́ти ро́да христиа́нскаго, Пречи́стая Богоро́дице, о́браз Твой,/ сия́ющий на То́лге луча́ми благода́ти,/ его́же святи́тель Росто́ва Три́фон прие́мь, даде́ Яросла́влю/ я́ко утеше́ние в ско́рбех и ну́ждах и благослове́ние Небе́сное всем преде́лом его́.

Пе́снь 3

Ирмо́с: Вы́шний Спа́се сил,/ коле́блемую ду́шу мою́ утверди́ в во́ли Твое́й,/ да и аз сла́влю Твое́/ со Безпло́тными Боже́ственное благоле́пие.

Ю́ныя уцелому́дрил еси́, ста́рыя обнови́л еси́ Креще́ния вода́ми,/ и в земли́ Росто́встей поклоне́ние тва́ри упраздни́ся во дни твоя́, святи́телю Иса́ие,/ моли́ся о чту́щих тя благоче́стно,/ и да ве́рно Христу́ ста́до твое́ пребу́дет.

Житие́м непоро́чен, возсия́л еси́ благоче́стием твои́м, свя́те Игна́тие,/ и уве́девши па́ства твоя́, я́ко тако́в подоба́ше архиере́й, о́браз Христа́ нося́щ,/ внима́ше исходя́щим от уст твои́х глаго́лом жи́зни ве́чныя./ В Небе́сных оби́телех моли́ся о лю́дех твои́х,/ да в любви́ Бо́жией пребу́дут.

Естество́м челове́к, оба́че, я́ко безпло́тен, пожи́л еси́ на земли́, святи́телю Иа́кове,/ сия́я све́том Христо́вым лю́дем Бо́жиим,/ оба́че доса́ду и укори́зну, и клевету́ претерпе́в, победи́л еси́ во искуше́нии,/ Влады́це у́бо на Небеси́ предстоя́ и на́шим ско́рбем спострада́ти моги́й,/ моли́ся о всех нас.

Богоро́дичен: Сия́ющи па́че со́лнца чистото́ю, Де́во Пресвята́я,/ в Не́йже побежда́ются уста́вы естества́,/ Херуви́мов и Серафи́мов превы́ше вознесе́на еси́ от земны́х, Богороди́тельнице,/ предстоя́щи всегда́ Сыновнему Престо́лу,/ моля́щися не преста́й о ча́дех Твои́х, Влады́чице,/ во успе́нии Твое́м нас не оставля́ющая.

Седа́лен, глас 7:

Любо́вь на́шу приими́те и почита́ние достодо́лжное,/ Бо́жий дру́зи, челове́цы Христо́вы,/ просия́вшии в земли́ Росто́встей и Яросла́встей,/ Ева́нгелие пропове́давшии сло́вом и жи́знию,/ святи́телие и преподо́бнии и вси, в Це́ркви просла́вленнии,/ нам, е́же бы́ти подо́бным вам, испроси́те Боже́ственную свы́ше по́мощь,/ ми́лость Спа́сову к согреша́ющим/ и всем лю́дем мир и благослове́ние Вседержи́теля.

Пе́снь 4

Ирмо́с: Небеса́ доброде́тель Твоя́ покры́ла е́сть,/ и земля́ испо́лнися сла́вы Твоея́, Христе́./ Те́мже ве́рно вопие́м:/ сла́ва си́ле Твое́й, Го́споди.

А́гнцу Бо́жию, Христу́ Го́споду, послужи́ти хотя́,/ прия́л еси́, о́трок сущ, о́браз а́нгельский от рук Богому́драго Се́ргия, твоего́ сро́дника,/ и, восходя́ от си́лы в си́лу ду́хом твои́м, святи́телю Фео́доре,/ Вели́кому Росто́ву был еси́ архиепи́скоп и оте́ц,/ наста́ви нас, Го́рняя му́дрствующе, жи́ти на земли́ ева́нгельски.

Всезлата́я уста́ Русския земли́, свя́те Дими́трие,/ Росто́вския митропо́лии похвало́, му́дрый иера́рше и о́тче любвеоби́льне,/ возвеща́я ча́дом церко́вным Христа́, Распя́таго и Воскре́сшаго, Бо́жию Си́лу и Прему́дрость,/ Кро́вию Заве́та Его́ Но́ваго и Пречи́стым Его́ Те́лом приобща́л еси́ их жи́зни ве́чней/ и нам прича́стником ея́ бы́ти испроси́ моли́твами твои́ми.

Наш моли́твенниче неусы́пный, Живонача́льней Тро́ице предстоя́щий,/ наста́вниче и о́тче, Богоблаже́нне Се́ргие, всерусский игу́мене,/ о Росто́ве твое́м, иде́же возгласи́л еси́ трикра́ты во чре́ве мате́рии,/ иде́же навы́кл еси́ от лет млады́х ду́шу и ум твой к Бо́гу возноси́ти,/ моли́ся и о всех нас, любо́вию тя почита́ющих.

Богоро́дичен: О предочи́щенная Ду́хом Святы́м Де́во Пречи́стая,/ Бо́га Сло́ва вмести́лище, голуби́це нескве́рная,/ к Тебе́ воздвиза́ем ру́це на́ша, к Тебе́ возно́сим моли́твы глас,/ услы́ши нас, недосто́йных чад Твои́х, Всеблага́я Ма́ти,/ и всепроще́ние испроси́ и ми́лость любо́вию Тя чту́щим и всем лю́дем.

Пе́снь 5

Ирмо́с: Просвеще́ние Твое́, Го́споди, низпосли́ нам/ и от мглы прегреше́ний разреши́ ны, Бла́же,/ Твой мир да́руяй.

Млеко́м ева́нгельския ве́ры напое́ни бы́сте измла́да,/ житие́м непоро́чно пред Бо́гом ходи́вшии,/ му́жественный Бори́се, чистоты́ и целому́дрия о́браз/ и прекра́сный зра́ком Василько́, ве́рности и кро́тости испо́лненный./ Еди́н, пред бра́том-врагом смири́выйся, не восхоте́ междоусо́бныя бра́ни,/ други́й же, супоста́ту не покори́выйся и за оте́чество ду́шу преда́вый,/ кровьми́ обоя́ украси́стеся,/ предстоя́ще Спа́су, моли́теся о земли́ ва́шей и лю́дех,/ мир пода́ти им и всему́ ми́ру.

Утверди́л еси́ се́рдце твое́ си́лою Вседержи́теля/ и победи́л еси́ ве́тхаго в себе́ челове́ка, Авраа́мие, о́тче наш,/ животворя́щим Кресто́м низложи́вый и́дольскую ле́сть в Росто́ве,/ с Петро́м царе́вичем, с затво́рником Ирина́рхом и с про́чими преподо́бными отцы́ сотвори́ о нас моли́тву,/ да Бо́гови рабо́таем усе́рдно, земне́й суете́ не прилепля́ющеся.

Стра́сти душе́вныя исто́ргнувше, победи́ли есте́ не́мощи пло́ти/ и, си́лою Бо́жиею пожи́вше на земли́, я́ко безпло́тнии, в зра́це юро́дства,/ му́дрости Го́рней научи́ли есте́ челове́ки,/ ми́лостиве Иоа́нне и Иси́доре блаже́нне, моли́теся о нас,/ да до́бру со́весть и́мамы во всем/ и Ду́ха Свята́го дарова́ний достои́ни бу́дем.

Богоро́дичен: Ми́ру Ты Предста́тельница и христиа́н всех Ма́ти!/ Пресвята́я Богоневе́сто, к заступле́нию Твоему́ притека́ют концы́ земли́,/ источа́еши бо всем милосе́рдие, я́ко исто́чник живоно́сный и приснотеку́щий,/ ми́рови мир пода́ждь и всем лю́дем спасе́ние испроси́,/ в Росто́ве Умиле́ния о́браз просла́вльшая.

Пе́снь 6

Ирмо́с: Обурева́ему мне, Ще́дре,/ бу́рею во́ли мои́х,/ молю́ся: воззови́ мя и спаси́, Го́споди,/ я́ко Ио́ну от зве́ря у́мнаго.

Испове́дует Яросла́вская Це́рковь вели́чие Бо́жия да́ра,/ его́же Всевы́шний Влады́ка да́рует на́шему гра́ду да́же до ны́не:/ ве́ра Христо́ва зде утверди́ся,/ и изоби́лие благода́ти подае́т неоску́дно всем ве́рным Боже́ственный Дух,/ Ему́же моли́тву усе́рдно прино́сим:/ прииди́ и всели́ся в ны, Бла́же,/ и спаси́ ду́ши на́ша, я́ко Благ и Всеси́лен.

Ра́дуйтеся, лю́дие яросла́встии, Васи́лия и Константи́на, почита́юще/ и с ни́ми всех во́ев, поги́бших на бра́ни за зе́млю родну́ю,/ не ту́гою серде́чною, но в ве́чней ра́дости Воскре́сшаго Спа́са их ве́дяще, мо́лимся тем:/ благове́рнии Яросла́вля хода́таи,/ ча́да есмы́ с ва́ми наро́да еди́наго,/ предста́тельствуйте о нас и за всю зе́млю Ру́сскую.

Еле́й до́брых дел твои́х бы́сть пред Бо́гом, я́ко лампа́да чи́стая,/ огне́м святы́я ве́ры и Христо́вы любве́ горя́щая, преподо́бне Фео́доре,/ всем лю́дем яви́лся еси́, я́ко чадолюби́вый оте́ц,/ сподо́бился еси́ соприча́стия пра́ведным во Ца́рствии Бо́жии,/ со ча́ды твои́ми Дави́дом и Константи́ном моли́ся о Яросла́вле и о всех нас.

Богоро́дичен: Недосто́йными устна́ми и се́рдцем поро́чным велича́ем Тя,/ Чи́стая Де́во, Всепе́тая Ма́ти,/ и притека́ем ко изображе́нию лица́ Твоего́,/ я́ко дре́вле Изра́иль к киво́ту Заве́та,/ упова́юще на моли́твы Твоя́ к Сы́ну и Бо́гу,/ да пода́ст нам проще́ние и ми́лость,/ да обнови́т си́лою свы́ше и утверди́т в нас ве́рность Ему́,/ Тому́ бо Еди́ному согреша́ем, оба́че ино́го бо́га не ве́мы.

Конда́к, глас 4:

Но́ваго Заве́та Бо́га с челове́ки храни́телие,/ ева́нгельских за́поведей исполни́телие,/ в до́брых де́лех соверше́ннии,/ святи́телие му́дрии, преподо́бнии и пра́ведный Богоно́снии,/ зе́млю Росто́вскую и Ярославскую/ облагоуха́вшии моли́твами,/ имену́емии вси и неимену́емии,/ явле́ннии и сокрове́ннии,/ предстоя́ще Живонача́льней Тро́ице,/ не отступа́йте от нас ду́хом/ и Боже́ственное милосе́рдие преклони́те к нам,/ да с дерзнове́нием сла́ву в Вы́шних Бо́гу вси прино́сим,/ да пребу́дет на земли́ мир неруши́мый,/ любо́вь же и благоволе́ние/ посреде́ всех челове́к.

И́кос:

Отца́ Небе́снаго ча́да досто́йная,/ во́лю Его́ святу́ю сотвори́сте на земли́,/ искуше́ния же вся победи́вше и лука́ваго посрами́вше,/ восприя́ли есте́ оставле́ние согреше́ний,/ жи́зни несконча́емей прича́стницы яви́стеся,/ кро́тости и любве́ су́щим на земли́ учи́телие,/ во сла́ве Просла́вльшаго вас предстоя́ще,/ моли́теся, да с дерзнове́нием сла́ву в Вы́шних Бо́гу вси прино́сим,/ да пребу́дет на земли́ мир неруши́мый,/ любо́вь же и благоволе́ние посреде́ всех челове́к.

Пе́снь 7

Ирмо́с: Не преда́ждь нас до конца́ И́мене Твоего́ ра́ди,/ и не разори́ Заве́та Твоего́,/ и не отста́ви ми́лости Твоея́ от нас,/ Го́споди, Бо́же оте́ц на́ших,/ препе́тый во ве́ки.

Дре́вний У́глич на бре́зе Во́лги красу́ется ве́рою и моли́твами подви́жник свои́х,/ соде́явших пра́вду и обетова́ние прие́мших от Вседержи́тельныя десни́цы Спа́са Христа́,/ сего́ же ли́ка свяще́ннаго я́ко преднача́льника почита́ем царе́вича Дими́трия,/ его́же, кровьми́ обагре́на, Госпо́дь со святы́ми, прия́т,/ вне́млет моли́твам его́ о всех лю́дех.

А́нгельскому житию́ ревну́юще и Безпло́тным подо́бящеся,/ от ю́ности ше́ствовали есте́ те́сным путе́м, Богоно́сне Паи́сие и Кассиа́не подви́жниче,/ от Царегра́да к нам в зе́млю прише́дый, да Го́рний Иерусали́м приобря́щеши,/ и Игна́тие, терпе́ния о́бразе, вку́пе предстоя́ще,/ моли́теся Святе́й Тро́ице проще́ние нам дарова́ти/ и вся поле́зная к житию́ и благоче́стию.

Рома́на благове́рнаго, душе́ю чи́стаго, се́рдцем кро́ткаго, почита́ем во святы́х,/ позна́вшаго му́дрость Го́рнюю житие́м непоро́чным,/ и Анастаси́ю преподо́бную с се́страми, муче́ньми от земли́ восте́кших на Не́бо и предстоя́щих Престо́лу Влады́чню,/ о нас моля́щихся и зде на земли́ соверши́ти до́брая/ и по сме́рти неосужде́нно предста́ти Христу́ Спа́су.

Богоро́дичен: Наде́жды ины́я не ве́мы, Преблагослове́нная и Пренепоро́чная Ма́ти Де́во,/ при Кресте́ Сы́на Твоего́ усынови́вшая род христиа́нский,/ Тебе́ песносло́вят Небе́сныя си́лы и архиере́ев собо́ри,/ Тебе́ прино́сят гла́сы хвалы́ проро́ки со апо́столы,/ мы же Тебе́, я́ко ча́да немощны́я и гре́шныя, то́кмо моли́тву на́шу прино́сим:/ покры́й нас от вся́каго зла честны́м Твои́м омофо́ром.

Пе́снь 8

Ирмо́с: В пла́мень снизше́дшаго/ песносло́вцем Сио́нским, зра́ком а́нгельским,/ о́троцы, превозноси́те Христа́ Бо́га на́шего во ве́ки.

Иису́са, Спа́са всея́ тва́ри, све́том незаходи́мым просвети́вшаго мир,/ сла́вят христиа́не Пересла́вля Зале́сскаго,/ утвержде́нии ве́рою церко́вною,/ и благода́ть Ду́ха Свята́го неоску́дно прие́млют,/ о ни́хже мо́лится преподо́бный Се́ргий, прия́вший освяще́ние во гра́де сем, со ины́ми святы́ми,/ да поживу́т благоче́стно и сподо́бятся ве́чныя сла́вы.

Кре́пкий был еси́ муж и му́дрный, благоче́стием стяжа́вый Ду́ха Свята́го,/ Алекса́ндре чу́дне, Пересла́вля Зале́сскаго порожде́ние,/ просла́влен еси́ во всей земли́ на́шей,/ и почита́ем тя я́ко христиани́на вои́стинну, вои́теля до́бляго и миротво́рца,/ моли́ся об оте́чествии твое́м и наро́де,/ да пребу́дут во све́те Христо́ве и сла́ве пред все́ми язы́ки.

Обраще́ния ко Христу́ и возрожде́ния в покая́нии о́браз ви́дим тя, о́тче Ники́то,/ глуби́ны греха́ отри́нув, был еси́ терпе́ния столп и победи́л еси́ стра́сти./ С Дании́лом преподо́бным, ме́ртва себе́ бы́ти греху́ ми́ра вмени́вшим,/ и Андре́ем, нищету́ стяжа́вшим ко спасе́нию, моли́ся о всех лю́дех,/ да, избе́гнувше греха́, досто́йно поживу́т на земли́.

Богоро́дичен: Де́во Всесвята́я, Пречи́стая Ма́ти,/ Ро́ждшая на земли́ Преве́чнаго Бо́га, я́ко соверше́ннаго Челове́ка,/ ве́лие дерзнове́ние к Нему́ иму́щая,/ о гре́шных лю́дех моли́ся, е́же противоста́ти им греху́, е́же пребы́ти в любви́ и ве́ре,/ е́же бли́жним служи́ти, а не себе́ угожда́ти.

Пе́снь 9

Ирмо́с: Сотвори́ держа́ву мы́шцею Свое́ю,/ низложи́ бо си́льныя со престо́л/ и вознесе́ смире́нныя Бог Изра́илев./ В ни́хже посети́ нас Восто́к с высоты́/ и напра́вил ны е́сть на пу́ть ми́ра.

Исхода́тайствуйте всем, почита́ющим вас, спасе́ние и вся потре́бная к жи́зни вре́менней,/ Генна́дие преблаже́нне, Любимогра́ду предста́телю,/ и Сильве́стре преподо́бне, Обно́рския брега́ освяти́вый подвиго́в твои́х мно́жеством,/ моли́твы бо ва́ша, я́ко фимиа́м кади́льный, восхо́дят к Престо́лу А́гнца Христа́.

Му́ченики безкро́вныя имену́ем преподо́бныя отцы́ на́ша,/ и́же в боре́ниих и по́двизех мно́гих победи́ша не́мощи пло́ти и грех,/ возвы́сившеся же доброде́тельми, бы́ша наста́вницы и учи́телие лю́дем Бо́жиим./ Сего́ ра́ди ублажа́ем вас, Игна́тие Ло́мский и Адриа́не с Севастиа́ном,/ всельшихся в де́брех лесны́х Пошехо́нских,/ дерзнове́ние иму́ще, моли́теся о всех нас.

Па́мять ва́ша свяще́нна е́сть нам, дру́зи Бо́жии,/ Ду́ха Свята́го сосу́ди, подви́жницы ве́ры и благоче́стия,/ ева́нгельский любве́ исполни́телие, святи́телие, преподо́бнии и пра́веднии,/ подвиза́вшиися в Росто́ве и Яросла́вле, и во всей о́бласти их,/ просла́вленнии и непросла́вленнии, ве́домии и неве́домии,/ вси вку́пе, Спа́су предстоя́ще,/ моли́теся о почита́ющих вас любо́вию,/ да подража́телие вам яви́мся.

Богоро́дичен: Русская страна́ до́мом Твои́м имену́ется, Ма́ти Бо́жия,/ Преблагослове́нная Неве́сто Неневе́стная,/ Росто́ва и Яросла́вля зе́мли не оста́вила еси́ заступле́нием,/ мно́жеством бо чу́дных ико́н Твои́х подае́ши ми́лости/ и слы́шиши всех, к Тебе́ прибега́ющих, призыва́ющих Тя в ну́ждах и посеще́ниих Бо́жиих,/ и простира́еши благода́ть утеше́ния гре́шным ко исправле́нию,/ не отступи́ от нас, Пречи́стая Де́во.

Свети́лен, глас 1:

Илия́ и Моисе́й предстоя́ху Тебе́ на Фаво́ре,/ егда́ показа́л еси́ в челове́честей пло́ти Твое́й сия́ние сла́вы Твоего́ Божества́, Спа́се наш,/ ны́не же предстоя́т Тебе́ ли́ки святы́х,/ све́том невече́рним Твои́м озаре́нныя,/ и́же сохрани́ша в житии́ но́вый Твой Заве́т с челове́ки,/ та́мо вку́пе со все́ми святи́и Росто́вския и Яросла́вския земли́ моли́твы творя́т,/ да возсия́ет и нам, гре́шным, денни́ца спасе́ния.

Сла́ва, и ны́не, глас то́йже:

Не оста́ви нас, си́рых,/ таи́нственнаго дне Спа́сова Свята́я Зарни́це,/ Благосе́рдая Засту́пнице всего́ ми́ра,/ Ро́ждшая Бо́га во пло́ти спасе́ния на́шего ра́ди,/ предстоя́щи во све́те Его́ непристу́пней, моли́ся о Це́ркви Его́,/ моли́ся о всех нас, да озари́т нас свы́ше благода́тным сия́нием,/ да возсия́ет в сердца́х челове́ческих денни́ца спасе́ния.

На хвали́тех стихи́ры, глас 4:

Оби́льная жа́тва Госпо́дня/ плодоно́сит ле́та мно́га да́же до дне́сь:/ святи́телие бо от Росто́ва и Яросла́вля насади́ша ве́ру Христо́ву,/ все́яша Боже́ственное се́мя жи́зни ве́чныя повсю́ду,/ и возвеща́ется спасе́ние,/ и утвержда́ется Ца́рствие Бо́жие в сердца́х челове́ческих,/ и пропове́дуется сла́ва Распя́таго и Воскре́сшаго нас ра́ди,/ и науча́ются ве́рнии лю́дие пра́вым путе́м ходи́ти,/ е́же сла́вити Бо́га и лю́дем служи́ти.

Свет, не зри́мый о́ком челове́ческим,/ и́же просвеща́ет се́рдца и ра́зум возлюби́вших Бо́га,/ стяжа́ли есте́, преподо́бнии отцы́ на́ши,/ подвиза́вшиися в пусты́нных ме́стех земли́ Росто́вския и Яросла́вския,/ грех ми́ра отри́нувше,/ да со Христо́м бу́дете во ве́ки,/ и, ны́не Ему́ предстоя́ще,/ испроси́те нам блага́я и поле́зная,/ е́же жи́ти спаси́тельно,/ творя́ще любо́вь, и ми́лость, и пра́вду.

Из глубины́ серде́чныя взыва́ем к вам, святи́и,/ пожи́вшии во граде́х и ве́сех на́ших,/ возсия́вшии доброде́тельми, я́ко свети́ла небе́сная./ Ева́нгелием Христо́вым упра́вили есте́ пути́ жития́ своего́,/ и возлюби́ вас ми́ра Спаси́тель,/ и и́мате к Нему́ дерзнове́ние,/ о нас, любо́вию чтуших вас, моли́теся,/ да пребу́дет с на́ми, призыва́ющими И́мя Его́ свято́е,/ и да поживе́м в ве́ре, любви́ и благоче́стии.

Сла́ва, глас 6:

Твоя́ прославля́ем служи́тели, Го́споди,/ тве́рдыя в ве́ре, в благоче́стии неколеби́мыя,/ горя́щия ду́хом и кро́ткия се́рдцем,/ иера́рхи, возвести́вшия сло́во Жи́зни/ и освяти́вшия лю́ди благода́тию Ду́ха Свята́го,/ преподо́бныя отцы́ равноа́нгельныя,/ победи́вшия естество́ теле́сное воздержа́нием,/ и вся пра́ведныя и блаже́нныя,/ показа́вшия соверше́нство христиа́нскаго жи́тельства,/ сия́ ублажа́ем и почита́ем/ и подража́ти им жела́ем и тщи́мся,/ Ты же моли́твами их/ да́руй нам ми́лость Твою́, мир и спасе́ние.

И ны́не, глас то́йже: Богоро́дице, Ты еси́ лоза́ и́стинная:

Вели́кое славосло́вие. Ектени́й и отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 8: Весели́теся о Го́споде/ и ра́дуйтеся, пра́веднии. Стих: Блаже́ни, и́хже оста́вшиеся беззако́ния и и́хже прикры́шася греси́. Апо́стол к Гала́том, зача́ло 213. Аллилу́ия,глас 4: Воззва́ша пра́веднии, и Госпо́дь услы́ша их/ и от всех ско́рбен их изба́ви их.Стих: Мно́ги ско́рби пра́ведным, и от всех их изба́вит я Госпо́дь.Ева́нгелие от Матфе́я, зача́ло 38. Прича́стен: Ра́дуйтеся, пра́веднии:

Тропа́рь, глас 4:

Апо́стольским преда́нием, и́стинней ве́ре пропове́дницы,/ и от тьмы́ к све́ту Богоразу́мия челове́ком наста́вницы,/ и за ны к Бо́гу моле́бницы,/ на Небе́сная любо́вь возложи́сте к Лю́бящему вы./ И ны́не на Небеси́ со А́нгелы и со все́ми святы́ми ликовству́юще/ у Престо́ла сла́вы всех Царя́, Христа́ Бо́га на́шего,/ святи́и чудотво́рцы Лео́нтие, и Иса́ие, и Игна́тие,/ моли́те дарова́ти стране́ на́шей мир,/ на враги́ одоле́ние,/ Це́ркви единомы́слие/ и душа́м на́шим ве́лию ми́лость.

Кано́н о́бщий трие́м святи́телем, глас 6.

Пе́снь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь пои́м, вопия́ше.

Ми́лостивным Боже́ственным манове́нием/ и трисо́лнечнаго Све́та сия́нием просия́ете/ и свяще́нною ма́стию пома́завшеся от руки́ Вседержи́теля Бо́га, святи́и чудотво́рцы,/ простри́те о нас ко спасе́нию ру́це свои́,/ спасти́ся нам от вся́ких бед и зол, мо́лимся.

А́нгельстии чи́ни удиви́шася на Небесе́х пресла́вному ва́шему чудотворе́нию,/ ка́ко в бре́ннем телеси́ безпло́тнаго врага́ победи́сте,/ и, вку́пе с ни́ми Престо́лу Бо́жию предстоя́ще,/ моли́теся Го́сподеви спасти́ся нам.

Удивля́ют же ся и на земли́ вся́ко чинонача́лие и христолюби́вых мно́жество,/ я́ко обрето́шася честны́й ва́ша телеса́,/ мно́гими ле́ты земле́ю покрове́ны и ничи́м же вреди́мы./ Приходя́щии же с ве́рою прие́млют, исцеле́ние моли́твами ва́шими.

Богоро́дичен: Я́ко заче́нши Преве́чное и Безнача́льна Отца́ Сло́во/ и пло́тию ро́ждши па́че сло́ва, Де́во, Ма́ти Преве́чнаго Бо́га,/ Того́ моли́ поми́ловати нас, гре́шных и недосто́йных раб Свои́х.

Пе́снь 3

Ирмо́с: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Христа́ Бо́га и Спа́са и Изба́вителя ми́ра моли́те,/ да пода́ст Госпо́дь в ве́ре утвержде́ние,/ архиере́ом же, свяще́нником и мона́хом/ по благода́ти, да́нней им от Бо́га же и Царя́, и́стины исправле́ние,/ да Боже́ственными светлостьми́, и ра́зумы, и нетле́нным бога́тством обогатя́тся во ве́ки.

Боже́ственными пресве́тлыми сия́нии и му́дростию украси́стеся, святи́и чудотво́рцы,/ моли́твами свои́ми спаси́те град сей, и лю́ди,/ и вся страны́ благочести́выя, сла́вящия Христа́/ и чту́щия ва́шу пресла́вную па́мять.

Моли́те, святи́и, Ми́лостиваго Бо́га о спасе́нии всего́ ми́ра,/ да посла́л бы Госпо́дь свет повеле́ния Своего́ в сердца́ на́ша,/ и просвети́л о́чи серде́чныя зре́ти Го́спода пред собо́ю всегда́/ и твори́ти повеле́нная Им и Христо́м Бо́гом,/ да свети́льницы благоче́стия не помрача́тся/ и неве́рнии и ерети́цы да посра́мятся.

Богоро́дичен: Пое́м, Де́во, Богома́ти Чи́стая Мари́е,/ па́че естества́ Твое́ рождество́ и чистоту́ нетле́нную,/ и́бо в Тебе́ сочета́ся де́вство и рождество́/ и безсме́ртие нам дарова́ся.

Пе́снь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста, о Го́споде пра́зднующи.

Испроси́те нам от Христа́ Бо́га досто́йная му́дрствовати Небе́снаго зва́ния,/ е́же Сам Госпо́дь запове́да друг дру́га с подоба́ющею че́стию приима́ти,/ и оби́димая избавля́ти, и неиму́щим подава́ти, и вся пра́во твори́ти,/ да вси вку́пе Го́спода возвели́чим.

Све́том благода́ти Бо́жия, до́льная возненави́девше,/ Го́рняя же достиго́сте, святи́и чудотво́рцы,/ и бы́сте гра́ждане Царя́ Небе́снаго, земни́и А́нгели, Небе́снии челове́цы,/ моли́твами свои́ми спаси́те ду́ши пою́щих вас.

Уго́дницы Спа́совы, умоли́те Христа́ Бо́га,/ да пода́ст Госпо́дь утверже́ние во граде́х и во оби́телех святы́х,/ по преда́нию святы́х оте́ц и по обеща́нию твори́ти о Христе́,/ да моли́твами ва́шими спасе́мся и ве́чнаго огня́ гее́нскаго свободи́мся.

Богоро́дичен: Безневе́стная Неве́сто и Браконеиску́сная Чи́стая Де́во Мари́е,/ Ма́ти Христа́ Бо́га,/ Того́ моли́ спасти́ рабы́ Своя́, пою́щия Тя.

Пе́снь 5

Ирмо́с: Бо́жиим све́том Твои́м, Бли́же,/ у́тренюющих Ти души́ любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Лучеза́рными светлостьми́ сия́юще, святи́и чудотво́рцы,/ моли́твами ва́шими отжени́те от нас собла́зны лука́вствия и наси́лие,/ преизоби́ловати же ся в дово́льстве уро́ки свои́ми, да́нными от Бо́га и Царя́,/ да обря́щем ми́лость от Го́спода ны́не и в Де́нь су́дный.

Ми́лостива сотвори́те Влады́ку всех, Христа́ Бо́га на́шего,/ да не отврати́т от нас Свята́го лица́ Своего́,/ и не уклони́тся гне́вом от раб Свои́х,/ и пода́ст при́сно с Небесе́ во вре́мя теплоту́ со́лнечную, ро́су благоути́шную/ и прозябе́ние земли́ на умноже́ние и собра́ние плодо́в земны́х,/ я́ко ми́лостив е́сть Бог наш.

Врачи́ нам показа́ вас Христо́с, святи́и чудотво́рцы,/ те́мже боле́зни на́ша душе́вныя и теле́сныя и грехо́вныя, неисце́льныя я́звы исцели́те,/ к вам прибега́ющим и ве́рою па́мять ва́шу почита́ющим.

Богоро́дичен: Роди́тельнице Безму́жная, Чи́стая Богома́ти, Де́во Мари́е, мо́лим Тя, Госпоже́:/ спаси́ рабы́ Своя́, Всенепоро́чная Влады́чице.

Пе́снь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Священнотаи́нницы де́йством Пресвята́го Ду́ха, Богопропове́дницы,/ бы́сте на земли́ во еди́ной це́ркви Бо́жия Ма́тере./ Ны́не же на Небесе́х вку́пе со А́нгелы и со все́ми святы́ми Святе́й Тро́ице предстоя́ще,/ моли́теся спасти́ся нам, гре́шным.

Смиренному́дрием благоче́стия це́рковь Бо́жия Ма́тере, я́ко Го́рний Иерусали́м, украси́сте,/ град Росто́в це́рквами честны́ми и оби́тельми, я́ко виногра́д Христо́в, насади́сте,/ мо́лим вас: неотсту́пно с на́ми пребыва́йте/ и от вся́ких зол нас спаса́йте моли́твами свои́ми.

Прему́дрый учи́телие Росто́встей и Су́ждальстей о́бласти бы́сте, святи́и,/ Бо́га сла́вяще словесы́ и де́лы./ Тем ва́шу па́мять почита́ем и мо́лим:/ да́руйте нам по́мощь и спасе́ние,/ вы бо есте́ всем нам пода́телие.

Богоро́дичен: Я́ко Цари́цу, Царя́ всех ро́ждшую, ве́рнии,/ со Арха́нгелом Благослове́нную возвели́чим Бо́жию Ма́терь:/ ра́дуйся, Ма́ти Де́во Творца́ тва́ри.

Конда́к, глас 8:

Я́ко во вселе́нней трие́ вели́цыи святи́телие,/ бы́сте вы благоче́стием и доброде́телию наста́вницы Росто́ву/ и, благове́рием прии́мше па́ству, ста́до Христо́во упасо́сте/ и ве́чный поко́й насле́довасте./ Мо́лим вас, святи́и чудотво́рцы,/ пода́ти доброде́телей исправле́ние,/ и боле́знем на́шим исцеле́ние, и собла́зном избавле́ние,/ и душа́м спасе́ние, да зове́м вам:/ ра́дуйтеся, гра́ду на́шему Росто́ву похвала́ и утвержде́ние.

И́кос:

Ка́ко возмогу́ аз, гре́шный и скве́рный вку́пе ду́шею и те́лом,/ равноа́нгельное ва́ше житие́ и пресла́вная чудеса́ просла́вити,/ поне́же, я́ко трисо́лнечная луча́, в ми́ре просия́ете, и во тьме́ неве́рных просвети́сте,/ и на па́житех живоно́сных ста́до Христо́во упасо́сте, и нетле́нныя венцы́ от Го́спода прия́ете,/ со А́нгелы и со все́ми святы́ми лику́юще у Престо́ла всех Царя́, Христа́ Бо́га./ Тем мо́лим вас, святи́и чудотво́рцы Лео́нтие, и Иса́ие, и Игна́тие:/ спаси́те рабы́ своя́ от всех зол, да зове́м вам:/ ра́дуйтеся, гра́ду на́шему Росто́ву похвала́ и утвержде́ние.

Пе́снь 7

Ирмо́с: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н» еси́, Бо́же оте́ц на́ших.

Трие́ вели́цыи святи́телие, на Небесе́х пребыва́юще, ра́дуетеся,/ на земли́ же ва́ша честны́я мо́щи приходя́щим подаю́т исцеле́ния,/ те́мже мо́лим:/ спаси́те ду́ши пою́щих вас,/ я́ко благослове́н Бог и препросла́влен во ве́ки.

Иму́ще дерзнове́ние ко Христу́ Бо́гу, святи́и чудотво́рцы Росто́встии,/ три вели́цыи свети́льницы – Лео́нтие, и Иса́ие, и Игна́тие,/ моли́теся за правосла́вныя лю́ди, е́же спасти́ся непреста́нно ве́рою и любо́вию чту́щим и пою́щим вы:/ благослове́н Бог оте́ц на́ших.

Святи́тели прему́дрыя вси в пе́снех, ве́рнии, восхва́лим, глаго́люще:/ Богоно́снии и святи́и отцы́ и пресла́внии чудотво́рцы/ Лео́нтие, и Иса́ие, и Игна́тие,/ приле́жно моли́те спасти́ся нам, вопию́щим и благословя́щим Бо́га оте́ц на́ших.

Богоро́дичен: И́же нас ра́ди Рожде́йся от Де́вы Чи́стыя Богоро́дицы Мари́и/ да моли́твами Ея́ мир от истле́ния и врага́ изба́вит, взыва́ющих:/ благослове́н Бог оте́ц на́ших.

Пе́снь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Ко́е досто́йное похвале́ние принесе́м вам, святи́и чудотво́рцы,/ я́ко Моисе́ю подо́бящеся, и на го́ру безстра́стия превзыдо́сте,/ во мрак разу́мный и благода́тный,/ прия́сте от Христа́ зако́н и мно́гия лю́ди к Богоразу́мию приведо́сте,/ воспева́ти Христа́ во ве́ки.

Христо́вы лю́ди упа́сше, святи́и отцы́,/ я́ко еги́петския льсти́ и страстна́го Вавило́на нече́стия изба́висте,/ Сио́на же Вы́шняго обре́тше жили́ще себе́ во вся ве́ки.

Свяще́нную ва́шу па́мять, ве́рнии, соверша́ем,/ я́ко наста́вницы и просвети́тели гра́ду на́шему/ и учи́тели пресла́внии, святи́телие Госпо́дни./ Пе́нием и пе́сньми вам пра́зднуем,/ сла́вяще Христа́ во ве́ки.

Богоро́дичен: Роди́выйся от Де́вы, Христе́ Бо́же, мир просвети́/ и мене́, окая́ннаго, от злых мои́х прегреше́ний изба́ви/ и моли́твами Рожде́ния Тя и Небе́сных сил и всех ра́ди святы́х поми́луй и спаси́ нас.

Пе́снь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Возсия́ всечестна́я ва́ша па́мять, святи́и чудотво́рцы,/ я́ко церко́вная свети́ла свята́я, в пе́снех и пе́ниих почита́ем вас/ и, к ра́це моще́й ва́ших притека́юще, немо́лчно вопие́м, досто́йно вас велича́юще.

Святи́и чудотво́рцы Лео́нтие, и Иса́ие, и Игна́тие, мо́лим вас:/ моли́те Ми́лостиваго Бо́га пода́ти наро́ду на́шему здра́вие,/ и пред собо́ю всегда́ зре́ти сы́ны сыно́в свои́х,/ и на враги́ одоле́ние, и ве́ре утвержде́ние,/ и вся́ческих исполне́ние, и грехо́в проще́ние.

Душе́ моя́ окая́нная, душе́ стра́стная, воспряни́ и ви́ждь:/ близ е́сть де́нь Госпо́день,/ гряде́т неисце́льною я́ростию и гне́вом вселе́нную всю пу́сту сотвори́ти,/ гре́шники же погуби́ти, пра́ведным же венцы́ пода́ти./ Подви́гнися, окая́нная,/ го́рдость отложи́, ле́ность отри́ни, к Бо́гу припади́ и усе́рдно со слеза́ми возопи́:/ Го́споди, согреши́х, прости́ мя/ и Богоро́дицы ра́ди и сих уго́дников, Росто́вских святи́телей, моле́нием поми́луй нас.

Богоро́дичен: Прииди́те, вси ве́рнии, во святу́ю це́рковь Бо́жия Ма́тере,/ честна́го и сла́внаго Ея́ Успе́ния,/ и возвели́чим и воспое́м я́ко Цари́цу,/ Царя́ всех Бо́га ро́ждшую на спасе́ние на́ше и обновле́ние.

НА ВЕЛИ́ЦЕЙ ВЕЧЕ́РНИ

На Го́споди, воззва́х:стихи́ры, глас 6:

А́нгелом честну́ю и вселюбе́зную чистоту́ возлюби́вши,/ преподо́бная ма́ти Евфроси́ние,/ Христу́ от ю́ности своея́ себе́ уневе́стила еси́./ Ему́же ны́не со А́нгелы предстоя́щи,/ моли́ о чту́щих благоче́стно па́мять твою́.

А́нгельскому житию́ подража́ющи,/ посто́м и моли́твами Христу́, я́ко безпло́тна, послужи́ла еси́./ Ны́не со а́нгельскими чи́нми водворя́ющися/ в черто́зе Безсме́ртнаго Жениха́ твоего́,/ моли́, Его́же возлюби́ла еси́,/ о чту́щих ра́достно всечестну́ю па́мять твою́.

Ангелоподо́бное житие́ восприе́мши,/ сла́ву вре́менную, и бога́тство,/ и дом о́тчий, и обру́чника земна́го оста́вила еси́/ и сих ра́ди воздая́ние ве́чное на Небеси́ восприя́ла еси́,/ иде́же со А́нгелы ра́дующися,/ моли́ о чтущих любо́вию па́мять твою́.

И́ны стихи́ры, глас то́йже.

Подо́бен: Тридне́вен:

Из ко́рене благоро́дна/ благоро́дством и мно́гими добро́тами плод процвела́ еси́,/ возра́стши лоза́ по всей земли́ Ру́сской/ и в По́лотсте гра́де,/ осеня́ющи и вино́м весе́лия напоя́ющи, Евфроси́ние,/ при́сно моля́щих ти ся.

Я́ко виногра́д Ру́сския земли́,/ По́лотску гра́ду насади́в Бог пре́жде,/ тебе́ ны́не же принесе́ и преложи́в в зе́млю обетова́нную,/ преподо́бная Евфроси́ние, мона́хов удобре́ние.

Умертви́вши те́ло, душе́ю ожила́ еси́,/ из земли́ оте́ческия, По́лотска гра́да, воздви́гшися,/ в Сио́н прии́де,/ и все свое́ бога́тство раздала́ еси́ та́мо,/ и прие́млеши Небе́сная.

Дави́да и Рома́на в му́ченицех/ и в преподо́бных блаже́ннаго Феодо́сия, Евфроси́ние, венча́нных ви́девши,/ себе́ я́ко же́ртву, да́вши Бо́гови,/ от князе́й ру́сских По́лотския земли́/ потща́лася еси́ бра́тии единомы́слити, блаже́нная,/ и княги́нинскаго ли́ка нача́ток самообеща́н прино́сится Бо́гу,/ да с те́ми восприя́ти обеща́нная блага́я,/ его́же ра́ди труди́вшися.

Сла́ва, глас то́йже:

Мона́шескаго чи́на удобре́ние/ и чернори́зиц похвалу́ ра́достно воспои́м дне́сь,/ Царя́ Христа́ Бо́га на́шего восхваля́юще:/ Сей бо, я́ко Освяти́тель святы́х и похвала́ преподо́бных,/ просла́ви нетле́нием мо́щи преподо́бныя Евфроси́нии,/ и́мже благове́рнии лю́дие благогове́йно предстоя́ще/ и с любо́вию лобыза́юще я,/ исцеле́ния в боле́знех прие́млют/ и в ско́рбех утеше́ние/ и ра́достно со умиле́нием глаго́лют:/ ра́дуйся, Евфроси́ние, неве́сто Христо́ва всечестна́я.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чте́ния.

Прему́дрости Соломо́новы чте́ние(глава́ 3):

Пра́ведных ду́ши в ру́це Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие сокруше́ние;/ они́ же су́ть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т:/ су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние(главы́ 5 и 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́/ и вооружи́т тва́рь в ме́сть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бне,/ поостри́т же напра́сный гнев во ору́жие,/ спобо́рет же с ним мир на безу́мныя./ Пои́дут праволу́чныя стре́лы мо́лниины/ и, я́ко от благокру́гла лука́ облако́в, на наме́рение полетя́т./ И, от каменоме́тныя я́рости испо́лнь, паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те держа́щии мно́жества/ и гордя́щиися о наро́дех язы́к,/ я́ко дана́ е́сть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же е́сть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бы́сть/ и живы́й посреде́ гре́шник, преста́влен бы́сть./ Восхище́н бы́сть, да не зло́ба измени́т ра́зума его́,/ или́ ле́сть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 7:

Преподо́бная ма́ти Евфроси́ние,/ житие́ твое́ на земли́ богоуго́дно соверши́ла еси́,/ пра́ведна и во всех оправда́ниих Госпо́дних безпоро́чна./ Прииди́те у́бо, мона́шествующих собо́ри,/ пе́сньми и пе́нии духо́вными све́тло ликовству́им дне́сь,/ си́це зову́ще:/ ра́дуйся, апо́стольских и оте́ческих преда́ний ревни́тельнице;/ ра́дуйся, По́лотскаго гра́да похвало́;/ ра́дуйся, Евфроси́ние всечестна́я,/ ты бо смире́нием и чистото́ю/ Ца́рствие Небе́сное в чи́не а́нгельском насле́довала еси́./ И ны́не Го́споду предстоя́,/ моли́ Его́ дарова́ти нам ве́лию и бога́тую ми́лость.

По до́лгу ублажа́ем тя,/ я́ко на́шу похвалу́ и А́нгела во пло́ти,/ житие́ бо твое́, Евфроси́ние, че́стно/ и успе́ние со святы́ми:/ просия́ла бо еси́ де́лы благи́ми/ и мно́гих ко Христу́ привела́ еси́;/ и Крест честне́й твое́й оби́тели завещала еси́;/ по да́ру благода́ти Бо́жия, обита́вшия в тебе́,/ проро́чески прови́дящи по разруше́нии ея́ па́ки чрез Крест возобновле́ние,/ е́же ны́не и соверши́ся./ Те́мже мы, с ра́достию ублажа́юще тя, припа́даем ти,/ со умиле́нием моля́щеся:/ моли́ся за ны, ма́ти преподо́бная, ко Го́споду,/ да пода́ст душа́м на́шим ве́лию и бога́тую ми́лость.

И́ны стихи́ры, глас 4.

Подо́бен: Я́ко до́бля:

И́же Е́ву прельсти́вшаго зми́евым о́бразом,/ свои́ма нога́ма сего́ попра́ла еси́;/ сла́сть бо преложи́ша же́нскую душе́ю му́жескою,/ соверше́ние му́жества во́зраста испо́лнена Иису́са Христа́,/ и, до́бле укре́пльшися, Евфроси́ние,/ врага́ преоби́дела еси́ в же́нстем телеси́.

Дрема́ния очи́ма свои́ма, Евфроси́ние, не дала́ еси́,/ ни па́ки у́бо поко́я свои́ма бровмя́, приснохва́льная,/ зако́ну своего́ Зижди́теля поуча́ющися/ и псало́мски подвиза́ющися,/ ду́хом восприе́млющи сия́ние,/ неотсту́пно Тро́ическаго прича́стия зря́щи/ и па́че ума́ чистоты́.

От пеле́н возжеле́вши прекра́снаго удобре́ния/ и Жениха́ нетле́нна душе́внаго – Иису́са,/ Сему́ уязви́лася еси́ любо́вию/ и, ра́дующися, притекла́ еси́ в сре́тение Его́,/ возжига́ющи душе́вный свети́льник де́вственнаго еле́я,/ и возшла́ еси́ с Ним в черто́г Небе́сный, пресла́вная.

Сла́ва, глас 7:

Дне́сь све́тло красу́ется дре́вний град По́лотск/ Боже́ственным сокро́вищем Креста́ Госпо́дня,/ его́же усе́рдием твои́м устро́ила еси́,/ преподо́бная Евфроси́ние,/ и оби́тель твоя́ ра́дуется о возвраще́нии ей Честна́го и Животворя́щего Креста́,/ и́же чрез мно́гая ле́та сохране́н бы́сть Про́мыслом Госпо́дним;/ ему́ же покланя́ющеся с ве́рою и любе́зно его́ лобыза́юще,/ исцеле́ния душе́вная и теле́сная прие́млем,/ Христа́ непреста́нно велича́юще.

И ны́не, Богоро́дичен:

Богоро́дице Де́во,/ упова́ние христиа́ном,/ покры́й и соблюди́ ны/ Твои́ми к Сы́ну Твоему́ и Бо́гу моли́твами/ от ве́яния ну́жды и печа́ли.

На стихо́вне стихи́ры, глас 8:

Преподо́бная ма́ти Евфроси́ние,/ ты Христу́ Го́споду во смире́нии и кро́тости послужи́ла еси́,/ и мно́гих ко спасе́нию наста́вила еси́,/ и сего́ ра́ди от Го́спода воздая́ние восприя́ла еси́,/ Его́же моли́ спасти́ся душа́м на́шим.

Стих: Ди́вен Бог во святы́х Свои́х,/ Бог Изра́илев.

Преподо́бная ма́ти Евфроси́ние,/ с любо́вию ублажа́ем тя,/ Ева́нгелия и́стинную испове́дницу,/ Правосла́вия ревни́тельницу,/ воздержа́ния учи́тельницу,/ А́нгелом собесе́дницу,/ ни́щих и сиро́т пита́тельницу,/ ю́же венча́ Христо́с венце́м Небе́сным,/ Его́же моли́ спасти́ся душа́м на́шим.

Стих: Честна́ пред Го́сподем/ сме́рть преподо́бных Его́.

Преподо́бная ма́ти Евфроси́ние,/ ра́достно соверша́юще па́мять твою́,/ прославля́ем по́двиги твоя́:/ во труде́х бо от ю́ности Христу́ послужи́ла еси́,/ а́нгельский чи́ны удиви́вши;/ на земли́, я́ко безпло́тна,/ в посте́х и моли́твах, и всено́щных стоя́ниих,/ и в Богомы́слии пребыва́ла еси́./ Те́мже и Ду́ха Свята́го в ду́шу твою́ прия́ла еси́.

Сла́ва, глас то́йже:

Све́тло украси́вши свети́льник твой еле́ем чистоты́ и ми́лости,/ в Небе́сный Черто́г с му́дрыми де́вами ко Христу́ возшла́ еси́,/ к Жениху́ твоему́ Безсме́ртному./ Ему́же приле́жно моли́ся/ о соверша́ющих любо́вию па́мять твою́.

И ны́не, Богоро́дичен: Безневе́стная Де́во:

Тропа́рь, глас 4:

Подража́ющи дванадесятоле́тна дванадесятоле́тну Христу́,/ учи́вшему во святи́лищи Бо́жию сло́ву,/ после́довала еси́, Евфроси́ние./ Сла́ву вре́менную и земна́го обру́чника оста́вльши/ и вся мирска́я презре́вши,/ красне́йшему па́че всех Христу́ себе́ уневе́стила еси́,/ крест взе́мши, путе́м а́нгельскаго жития́ ше́ствующи/ и мно́гия к Нему́ наставля́ющи,/ во благоуха́нии ми́ра в Небе́сный Черто́г востекла́ еси́,/ иде́же моли́, Его́же возлюби́ла еси́,/ о чту́щих благоче́стно па́мять твою́.

Ин тропа́рь, глас то́йже:

Бога́тство свое́ ни́щим расточи́вши/ и сла́ву кня́жескую ни во что же вмени́вши,/ обру́чника вре́меннаго, кра́сная де́во, возгнуша́лася еси́/ и, уневе́стившися Жениху́ Христу́,/ Тому́, я́коже ве́но, чистоту́ душе́вную и теле́сную принесла́ еси́, Евфроси́ние./ Ему́же ны́не в весе́лии предстоя́,/ помина́й нас, чтущих па́мять твою́.

НА У́ТРЕНИ

На Бог Госпо́дь:тропа́рь, два́жды. Сла́ва, и ны́не:Е́же от ве́ка утае́ное:

По 1-м стихосло́вии седа́лен, глас 1:

За́поведи Госпо́дни возлюби́вши,/ от ю́ности твоея́, преподо́бная ма́ти, мно́гим была́ еси́ наста́вница мона́шескаго жития́,/ мно́гия ко Христу́ привела́ еси́;/ те́мже дне́сь пра́зднующе всечестну́ю па́мять твою́,/ прославля́ем Бо́га, прославля́ющаго святы́я Своя́.

Сла́ва: Внуши́вши Дави́да бряца́юща, –/ приведе́тся Царе́ви де́вы по Тебе́, –/ пречестна́я Евроси́ния притече́, я́ко добра́ и бли́жняя во след Тебе́,/ возже́гши де́вственную свещу́.

И ны́не, Богоро́дичен:

Уста́ми и се́рдцем велича́ем Тя, Ма́терь Бо́жию:/ Ты же, ро́ждшая Бо́га, не отри́ни нас от Твоего́ заступле́ния.

По 2-м стихосло́вии седа́лен, глас 1:

Де́вства чистото́ю украси́вши твою́ ду́шу, преподо́бная Евфроси́ние,/ со свети́льником горя́щим возшла́ еси́ во дворы́ Го́спода твоего́,/ Его́же моли́ непреста́нно, да и мы сподо́бимся причте́ни бы́ти к ли́ку избра́нных.

Сла́ва: Пою́щу Дави́ду – забу́ди лю́ди Твоя́ в до́му Отца́ Твоего́ –/ приклони́ла еси́ у́хо твое́, я́ко дщи Царе́ва во Ду́се,/ возлюби́ бо Всекра́снаго и Всемогу́щаго Царя́, Христа́ Бо́га на́шего.

И ны́не, Богоро́дичен:

Ско́рая в беда́х Засту́пнице, гото́вое обурева́емых приста́нище,/ сохрани́ мя, Ма́ти Бо́жия, от потопле́ния жите́йскаго/ и не да́ждь ми сокруши́тися о ка́мень па́губы душе́вныя.

По полиеле́и седа́лен, глас 8:

Просия́ла еси́ а́нгельским житие́м твои́м, преподо́бная Евфроси́ние,/ украша́ющися красото́ю нра́ва, воздержа́нием и милосе́рдием,/ поуча́ющи духо́вныя се́стры твоя́ словесы́ душеспаси́тельными,/ и, приме́ром сло́во утвержда́юши, мно́гих ко спасе́нию привела́ еси́;/ те́мже, приснопа́мятная Евфроси́ние, предстоя́щи Престо́лу Вседержи́теля,/ моли́ дарова́ти грехо́в оставле́ние чту́щим любо́вию па́мять твою́.

Сла́ва, и ны́не, Богоро́дичен:

Проро́цы Тя предвозвести́ша, апо́столи пропове́даша,/ му́ченицы просла́виша, святи́телие ублажи́ша,/ те́мже и мы с ни́ми Богоро́дицу Тя испове́дующе, благоче́стно велича́ем.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми?Ева́нгелие от Матфе́я, зача́ло 104.

По 50-м псалме́ стихи́ра, глас 7:

Блага́я и ве́рная рабо́ Госпо́дня,/ и́го Христо́во благо́е на себе́ восприе́мши,/ и бре́мя Его́ ле́гкое на себе́ усе́рдно поне́сши,/ и ны́не в Небе́снем Ца́рствии водворя́ющися,/ о нас помоли́ся, да сподо́бимся ве́лия и бога́тыя ми́лости.

И́на стихи́ра, глас 6:

Прииди́те, любому́дреннии,/ пе́сньми богокра́сными воспои́м/ достохва́льную и смире́нную Евфроси́нию всечестну́ю,/ и исто́чники слез омы́емся, рыда́юще и пла́чуще:/ не́гли Госпо́дь и Бог рыда́ние и плач восприи́мет,/ и а́ще те́ло и ду́шу ея́ прия́,/ поне́же Его́ смире́ния сама́ изво́лила еси́,/ нам мо́жет да́ти с ду́хом ея́ совокупи́тися, притека́ющим,/ я́ко достохва́льную и доброкра́сную моли́тву ея́ восприи́мет,/ мно́го бо мо́жет моли́тва пра́веднаго поспешеству́ема./ Молю́ же вы, бра́тие,/ не лени́ви бу́дем, в но́щь и в де́нь моля́щеся к Небе́сному и земно́му Творцу́,/ я́ко Дух Святы́й по́слет в стяжа́ние,/ и моли́твами блаже́нныя Евфроси́нии/ нас изба́вит от се́ти вра́жия/ и спасе́т ду́ши на́ша.

Кано́н, глас 6.

Пе́снь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь пои́м, вопия́ше.

От ю́ности поуча́ющися свяще́нным за́поведей Госпо́дним/ и жела́ющи Ему́ Еди́ному послужи́ти,/ презре́ла еси́ сла́ву и бога́тство ми́ра сего́.

Христа́ возлюби́вши,/ роди́телей и сро́дников твои́х и обру́чника земна́го оста́вила еси́, преподо́бная,/ и мона́шеское житие́ восприя́ла еси́.

Ско́рби испо́лнися се́рдце отца́ и ма́тере твоея́,/ егда́ во и́ночестем о́бразе узре́ша тя, возлю́бленную дще́рь свою́,/ ты же словесы́ благи́ми, вразумля́ющу тя Свято́му Ду́ху, уте́шила еси́ их.

Я́же в ма́сле доброде́телей свешу ума́сленну на сре́тение, ма́ти, Жениха́ твоего́ возжже́,/ просвети́ о́чи се́рдца моего́,/ но́щию жите́йскою омраче́нная,/ да досто́йно тя похвалю́.

Ум ста́рый в младе лет, ма́ти, добы́вши,/ дерза́емо те́ло душе́ покори́ла еси́, от ю́ности впря́гши под и́го Христо́во/ и благода́тное бре́мя ле́гкое прие́мши.

Богоро́дичен: Ско́рбных наведе́ния обурева́ют смире́нную мою́ ду́шу,/ и напа́стей о́блацы мое́ покрыва́ют се́рдце, Богоневе́стная,/ но, Свет ро́ждшая Боже́ственный и Преве́чный,/ возсия́й ми свет ра́достный.

Пе́снь 3

Ирмо́с: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

В безмо́лвии со еди́ным Го́сподем моли́твою жела́ющи соедини́тися,/ при святе́й це́ркви Святы́я Софи́и в те́сней ке́ллии водвори́лася еси́, преподо́бная.

От труда́ рук твои́х, преподо́бная, послужи́ла еси́ Христу́, Спаси́телю на́шему,/ богоуго́дно упражня́ющися в преписа́нии книг святы́х,/ и цено́ю, взе́млемою за них, утеша́ла еси́ ни́щую бра́тию Христо́ву.

В кро́тости и смире́нии, в посте́х и моли́твах,/ в труде́х, и нощны́х бде́ниих, и моли́твенных коленопреклоне́ниих,/ усе́рдно послужи́ла еси́ Го́споду твоему́, всечестна́я.

Сна не дала́ еси́ очи́ма, ни ве́ждома дрема́ния, Евфроси́ние,/ до́ндеже обрела́ еси́ во твое́м се́рдце ме́сто досто́йнаго оби́тельства.

Пустынелю́бица го́рлица бы́вши, Евфроси́ние,/ и уединя́ющася пти́ца на зда́нии,/ гнездо́ духо́вное птенце́м твои́м создала́ еси́/ и пожила́ еси́ от ю́ности житие́м а́нгельским, в телесе́ бу́дучи.

Богоро́дичен: Удиви́ла еси́ вои́стинну ны́не на мне, Влады́чице,/ благодея́ния Твоя́, Богоотрокови́це, и ми́лости Твоя́,/ те́мже сла́влю Тя, и воспева́ю,/ и почита́ю мно́гое и безме́рное е́же о нас смотре́ние Твое́.

Ин конда́к, глас 8:

Чи́стое свое́ де́вство и честно́е/ ми́лостынею, я́ко свети́льник еле́ем, украси́вшую/ и с му́дрыми де́вами в пресве́тлый черто́г Христо́в вше́дшую,/ Евфроси́нию сла́вную ублажи́м/ и, припа́дше к честны́м ея́ моще́м, наслади́мся ея́ благоуха́ния/ и уми́льне к ней возопие́м:/ я́ко име́я дерзнове́ние ко Христу́ Бо́гу/ моли́ изба́вится злово́ния страсте́й и спасти́ся душа́м на́шим.

Ин конда́к, глас 4.

Подо́бен: Вознесы́йся:

Превита́вши от земли́ По́лотския,/ оте́чество свое́, я́ко Авраа́м, насле́довавши, Евфроси́ние,/ зе́млю высоку́ сообра́зну – Го́рний Сио́н,/ те́мже те́ло твое́ душе́вным благому́жествием, страда́нием по́стным/ я́ко же́ртву приноси́ла еси́/ милосе́рдием Свои́м, Да́вшему Себе́ за челове́ки Же́ртву благоприя́тну.

Ин и́кос:

Прему́дрость Соломо́н прии́м от Бо́га,/ хва́лит бо в при́тчах мужелюби́ву жену́,/ я́ко своему́ му́жеви дво́е ри́зы сотворя́ющу,/ аз же ны́не в пе́снех хвалю́ боголю́бицу Евфроси́нию,/ в но́щь и в де́нь подыма́ющу преподо́бнии дла́ни к Бо́гу,/ да огня́ изба́вит негаси́маго, зубна́го же скре́жета и всея́ му́ки/ нас ра́ди, ве́рующих, Да́вшему Себе́ Же́ртву Отцу́ благоприя́тну.

Седа́лен, глас 4:

А́нгельскаго виде́ния сподо́билася еси́, преподо́бная ма́ти Евфроси́ние,/ трикра́тно бо посети́ тя А́нгел, возвеща́я ти во́лю Госпо́дню,/ да и́деши на ме́сто, нарица́емое Сельце́,/ и устро́иши та́мо оби́тель дев, Бо́гу освяще́нных.

Сла́ва, и ны́не, Богоро́дичен:

Еди́на и́стинная христиа́н Покрови́тельнице,/ вся́ких лю́тых обстоя́ний, бед и скорбе́й нас изба́ви/ и моли́твами Твои́ми спаси́ ду́ши на́ша.

Пе́снь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

А́нгел возвести́ бы́вшему во дни твоя́ святи́телю Илии́ о тебе́, преподо́бная,/ да́ти ме́сто, во е́же оби́тель устро́ити.

Я́коже возлежи́т на главе́ ца́рстей вене́ц,/ та́ко почива́ет Дух Святы́й на тебе́, преподо́бная, –/ си́це возвести́ А́нгел святи́телю.

И я́ко ми́ро восхо́дит к Бо́гу, та́ко восхо́дит моли́тва преподо́бныя,/ и я́ко со́лнце сия́ет на тве́рди небе́сней, та́ко просия́ житие́ Евфроси́нии пред А́нгелы Бо́жиими, –/ глаго́ла А́нгел в виде́нии святи́телю.

Оде́жда наги́м и бога́тство ни́щим,/ корми́тельница а́лчущим была́ еси́ и си́рым ма́ти,/ лю́тых избавля́ющи к тебе́ прибега́ющия,/ те́мже твоя́ во ве́ки па́мять пребыва́ет,/ Евфроси́ние, По́лотскому гра́ду похвало́.

Неве́ста Христо́ва, ма́ти, яви́ся,/ ма́сло многоблагоуха́нно совокупи́вши в де́встве/ и обою́ду возвели́чивши его́./ И ны́не ра́дуешися ве́чно, в оби́тель Небе́сную водворя́ющися/ и Боже́ственную све́тлость приима́ющи.

Богоро́дичен: И где про́чее ино́е обря́щу заступле́ние?/ ка́мо прибе́гну? где же и спасу́ся?/ ку́ю те́плую возъи́мам Помо́щницу,/ скорбьми́ жите́йскими и бу́рями, увы́ мне! коле́блему?/ На Тя Еди́ну упова́ю, и дерза́ю, и хвалю́ся,/ и притека́ю к Покро́ву Твоему́: спаси́ мя.

Пе́снь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Ра́дости и удивле́ния о виде́нии а́нгельском испо́лнися архиере́й Госпо́день/ и призва́ше тя, преподо́бная, возвести́ти ти чу́дное явле́ние.

Во́лю Го́спода твоего́ со усе́рдием испо́лнила еси́, преподо́бная,/ и пришла́ еси́ на ме́сто, пока́занное ти А́нгелом,/ и та́мо водвори́лася еси́.

На еди́наго Го́спода возложи́вши тве́рдое упова́ние,/ ничто́же стяжа́ла еси́ от име́ний,/ но в нищете́ ева́нгельстей пребыва́ла еси́.

На разу́мнем ка́мени хра́мину неподви́жиму создала́ еси́, сла́вная,/ и треволне́ния страсте́й отбе́гла еси́,/ благоуте́шным Ду́хом Паракли́товым подъе́млема в Вы́шнюю и Боже́ственную оби́тель.

Небре́гши о́тчия сла́вы и гордения,/ но одино́кое житие́ и неиме́ние, Евфроси́ние, возлюби́ла еси́/ и, крест Христо́в на ра́мо взе́мши, после́довала еси́ Ему́, зову́щему тя.

Богоро́дичен: Кий Тебе́ дар принесу́ благодаре́ния/ за, и́хже наслади́хся, Твои́х дарова́ний и Твоея́ безме́рныя благосты́ни?/ Те́мже сла́влю, пееносло́влю и велича́ю Твою́ неизрече́нную ко мне ми́лость.

Пе́снь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Ви́девше ангелоподо́бное твое́ житие́,/ мно́гия де́вы восхоте́ша обручи́тися Христу́/ и в чи́стом де́встве Ему́ Еди́ному послужи́ти.

Сестра́ твоя́, княжна́ Звенисла́ва, подража́ющи тебе́,/ отве́ржеся сла́вы и наслажде́ний ми́ра сего́/ и к тебе́ притече́, и́го Христо́во благо́е на себе́ восприя́ти.

Ви́дя умножа́ющияся сестры́ твоя́ духо́вныя, Евфроси́ние всечестна́я,/ возжела́ла еси́ соорудите храм Го́споду Вседержи́телю,/ честна́го и сла́внаго Его́ Преображе́ния.

В ча́ши свое́й вино́ все́ю душе́ю черпа́вши/ и столп дово́лен поста́вивши, воспе́ла еси́:/ хлеб мой я́ждьте и вино́ вси пи́йте, жа́ждающии.

Утреневавши к Бо́гу, голуби́це,/ была́ еси́ посре́брена све́тло крило́ма, сла́вная,/ зла́том же блеща́щи междура́мия разли́чным дея́нием.

Богоро́дичен: Утеше́ние в ско́рбех вем, и неду́гов исцеле́ние Тя зна́ю, Богома́ти,/ и всесоверше́нное сокруше́ние сме́рти,/ и реку́ живота́ неисчерпа́емую,/ и всех, су́щих в напа́стех, ско́рое и бы́строе заступле́ние.

Конда́к глас 8:

Избра́нней Бо́гом от самаго́ рожде́ния/ и призва́нней на служе́ние Ему́,/ в чи́не а́нгельстем Го́сподеви послужи́вшей свя́то,/ и преподо́бно пожи́вшей,/ и ны́не с Небе́сными си́лами Го́спода восхваля́ющей,/ о нас же, гре́шных, пред Го́сподем хода́тайствующей,/ с ра́достию и любо́вию воззове́м:/ ра́дуйся, Евфроси́ние, неве́сто Христо́ва всечестна́я.

И́кос:

А́нгельски на земли́ житие́ соверши́ла еси́,/ чистото́ю и смире́нием, кро́тостию и терпе́нием,/ милосе́рдием и воздержа́нием Го́сподеви угоди́ла еси́,/ и ны́не во све́тлостех святы́х почива́ющи последи́ трудо́в свои́х,/ приими́ от нас пе́ние сие́:/ ра́дуйся, де́вственнице душе́ю и те́лом;/ ра́дуйся, наста́внице преди́вная иноки́нем;/ ра́дуйся, еще́ на земли́ сподо́бльшаяся а́нгельскаго виде́ния;/ ра́дуйся, от Го́спода чрез А́нгела устро́ити оби́тель повеле́ние прие́мшая;/ ра́дуйся, со усе́рдием во́лю Госпо́дню испо́лньшая;/ ра́дуйся, вся земна́я наслажде́ния ми́ра сего́ Христа́ ра́ди отве́ргшая;/ ра́дуйся, Небе́сному Жениху́, Иису́су Сладча́йшему, себе́ обручи́вшая;/ ра́дуйся, в чистоте́, посте́х и моли́твах Тому́ послужи́вшая;/ ра́дуйся, безце́нное сокро́вище – пречестны́й Крест оби́тели свое́й во освяще́ние и утвержде́ние стяжа́вшая;/ ра́дуйся, в труде́х дневны́х и нощны́х житие́ свое́ соверши́вшая;/ ра́дуйся, в невече́рнем дни Ца́рствия Бо́жия ны́не пребыва́ющая;/ ра́дуйся, Евфроси́ние, неве́сто Христо́ва всечестна́я.

Пе́снь 7

Ирмо́с: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Не о свое́м то́чию спасе́нии прилежа́ше ти попече́ние, преподо́бная ма́ти,/ по о всех, и́хже ти вве́рил е́сть Госпо́дь,/ и́хже поуча́ла еси́ в зако́не Госпо́дни, твори́ти во́лю Его́.

О́браз была́ еси́ слове́сному твоему́ ста́ду, всечестна́я Евфроси́ние,/ де́лы благи́ми, смире́нием возвыша́яся, и кро́тостию привлека́я,/ и терпе́нием утвержда́я пребыва́ти непрекло́нными в любви́ ко Го́споду.

Егда́ соверша́шеся созида́ние хра́ма Госпо́дня,/ А́нгел возбужда́ше строи́теля, глаго́ля:/ Иоа́нне, иди́ на строе́ние хра́ма Вседержи́телева.

Я́ко пра́ва учени́ца смире́ннаго и ми́рнаго Христа́,/ князе́м сро́дником, друг на дру́га дерза́ющим подъя́ти меч, возбрани́ла еси́,/ я́ко ору́жием обоюдоо́стрым, пресека́ющим, сло́вом Бо́жиим устраша́ющим.

Издале́ча собира́ющи Боже́ственное бога́тство,/ я́ко дале́че ходя́й кора́бль,/ борзопи́счими персты́ до́бре писа́ла еси́, Богодухнове́нная,/ пое́млющи ота́й и даю́щи ни́щим.

Богоро́дичен: Все́ю душе́ю, и мы́слию, и се́рдцем, и устна́ми Тя сла́влю,/ наслади́вся Твои́х вели́ких дарова́ний, и Твоея́ благосты́ни,/ и безме́рных Твои́х чуде́с.

Пе́снь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти,/ Тя превозно́сим во вся ве́ки.

С ве́рою и тве́рдым упова́нием помоли́лася еси́, преподо́бная, ко Го́споду,/ и услы́ша Госпо́дь моле́ние ве́рныя рабы́ Своея́,/ и чу́дне соверши́ся созда́ние хра́ма Его́.

Ра́дости и весе́лия исполни́лася еси́, преподо́бная Евфроси́ние,/ егда́ соверши́ся освяще́ние хра́ма,/ в не́мже о е́же проше́нием на́шим услы́шанным бы́ти от Го́спода/ со слеза́ми моли́лася еси́.

Мо́щна бе пред Господам моли́тва твоя́,/ зане́ храм, воздви́гнутый тобо́ю, чрез мно́гая ле́та цел и невреди́м сохрани́ся.

Избавле́ние обре́тши, Го́споди, го́рькаго осужде́ния,/ е́же вкуше́ния ра́ди дре́ва разу́мнаго Твои́м распя́тием,/ Евфроси́ния постя́щися бы́сть во вся среды́ и пятки́,/ те́ло умерщвля́ющи, а ду́шу оживля́ющи/ потща́нием, божеству́ющим в безвеще́ственнем те́ле.

Плодоле́тными ве́рбами теле́сное дея́ние, я́ко на Вавило́нстей реце́, пове́сивши,/ в бу́ри жите́йстей возопи́ла еси́:/ а́ще забу́ду тя, Иерусали́ме, не предложи́вши в нача́ле весе́лия,/ забве́на бу́ди десни́ца моя́/ и язы́к мой прильпни́ горта́ни моему́ по пра́вде.

Богоро́дичен: Обстоя́ния, и ско́рби, и ну́жды обрето́ша мя, Чи́стая,/ и напа́сти жите́йския, и искуше́ния отвсю́ду мя обыдо́ша,/ но предста́ни ми и покры́й мя святы́м Твои́м Покро́вом.

Пе́снь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Возжела́ла еси́ име́ти во оби́тели твое́й ико́ну Пречи́стыя Богома́тере,/ ю́же и получи́ла еси́,/ и, ра́достно ту́ю прие́мши,/ мно́гая благодаре́ния Го́споду и Пречи́стей Ма́тери Его́ воздала́ еси́.

Крест честны́й устро́ила еси́ усе́рдием твои́м, преподо́бная,/ и ка́плю Боже́ственныя Кро́ве Христа́ Спаси́теля/ и ча́сть Животворя́щаго Дре́ва в нем положи́ла еси́/ на освяще́ние и спасе́ние всем, покланя́ющимся ему́/ и целу́ющим его́ с любо́вию и стра́хом.

Мно́гая ле́та в те́сной ке́ллии, при хра́ме Госпо́днем,/ в моли́твах и коленопреклоне́ниих препроводи́ла еси́, преподо́бная Евфроси́ние,/ я́ко безпло́тна, на земли́ пребыва́ющи.

Текла́ еси́, я́коже цари́ца не Ю́жская,/ но с тре́петом ви́девше рукотво́рную це́рковь и гроб,/ в не́йже тридне́вный Всетворе́ц, Бо́жия Му́дрость всели́ся,/ и та́мо благослови́ Бог прия́ти тя, до́брая де́во.

Лива́н, и сми́рну, и зла́то волсви́ Творцу́ Тебе́ принесо́ша,/ Евфроси́ния же – ду́шу, и те́ло, и житие́ непоро́чно,/ сраспе́ншися Тебе́, Христе́, и совоскре́сши Тебе́ и в безконе́чнем Ца́рствии с Тобо́ю ца́рствующи.

Богоро́дичен: Ра́дость от А́нгела Прие́мшей и мы, по прорече́нию Твоему́, Пресвята́я Де́во,/ ублажа́юще Тя со все́ми ро́ды, ева́нгельски вопие́м:/ ра́дуйся, Благода́тная, Госпо́дь с Тобо́ю.

Свети́лен, глас 8:

Преподо́бная Евфроси́ние, сла́вна па́мять твоя́,/ вои́стинну бо на тебе́ испо́лнися сло́во Ду́ха Свята́го:/ в па́мять ве́чную бу́дет пра́ведник./ Те́мже и нас, соверша́ющих па́мять твою́ с любо́вию,/ спаса́й от вся́кия беды́ и напа́сти.

Сла́ва: И́же дре́вле пропове́даша, ра́дуется ве́чно Евфроси́ния о Го́споде,/ у́зы плотски́я отреши́вши, и Тебе́, Зижди́теля, лице́м к лицу́ ви́дящи, ви́дима Тобо́ю,/ и моля́щи изба́витися от вся́кия лю́тости в пе́снех при́сно ю похваля́ющим.

И ны́не, Богоро́дичен:

Ра́дуйся, престо́ле огнезра́чный Госпо́день;/ ра́дуйся, Боже́ственная и манноприе́мная ру́чко;/ ра́дуйся, златы́й свети́льниче;/ ра́дуйся, свеще́ неугаси́мая;/ ра́дуйся, де́вам сла́во и ма́терем украше́ние и похвало́, Богороди́тельнице.

На хвали́тех стихи́ры, глас 8:

Земны́я пи́щи наслажде́ние,/ бога́тство и сла́ву ми́ра сего́ презре́вши,/ Небе́снаго Жениха́ возлюби́ла еси́,/ Евфроси́ние всечестна́я:/ до́бре по́двиг твой на земли́ во и́ночестем чи́не соверши́ла еси́,/ с му́дрыми де́вами возшла́ еси́ к Жениху́ Христу́,/ Ему́же в ра́дости ны́не предстоя́,/ непреста́нно моли́ся о душа́х на́ших.

Христу́, от Чи́стыя Де́вы вопло́щшемуся,/ после́довала еси́, Евфроси́ние,/ в де́встве Тому́ от ю́ности твоея́ послужи́ла еси́/ и мно́гим ко спасе́нию пу́ть показа́ла еси́./ Сестры́ моя́ возлю́бленныя, – глаго́лала еси́,/ те́сен и приско́рбен пу́ть, вводя́й в живо́т,/ но ве́чно воздая́ние;/ те́мже подвиза́йтеся неле́ностно,/ и́мате бо помога́ющаго, Сама́го Подвигополо́жника Христа́,/ подаю́щаго живо́т нетле́нный.

Бо́гом избра́нная, Евфроси́ние,/ я́ко звезда́ пресве́тлая,/ от ро́да своего́ возсия́вшая,/ страну́ сию́ просвеща́ющая,/ о всех, к тебе́ усе́рдно притека́ющих,/ и моли́тв твои́х ко Го́споду прося́щих,/ и любо́вию целу́ющих честны́й твой о́браз,/ бу́ди моли́твенница и изба́ви нас от вся́кия ско́рби,/ от вся́кия боле́зни, душе́вныя же и теле́сныя,/ ве́рою и любо́вию соверша́ющих/ па́мять честна́го преставле́ния твоего́.

Торжество́ дне́сь преподо́бныя Евфроси́нии пра́зднующе,/ прииди́те, ве́рнии, воспое́м по́двиги и труды́ ея́,/ восхва́лим серафи́мскою любо́вию Иису́са Сладча́йшаго возлюби́вшую/ и Ему́ усе́рдно послужи́вшую,/ и с ве́рою и любо́вию воззове́м к ней:/ ра́дуйся, Евфроси́ние всечестна́я,/ красото́ и похвале́ние мона́шескаго чи́на,/ неве́сто Христо́ва избра́нная,/ со А́нгелы и все́ми святы́ми в невече́рнем дни Ца́рствия Бо́жия водвори́вшаяся;/ моли́ся же спасти́ся гра́ду твоему́,/ земли́ на́шей и всем правосла́вным лю́дем.

Сла́ва, глас то́йже:

Во святы́й град Иерусали́м поклони́тися гро́бу Госпо́дню возжела́вши/ и дости́гши земна́го Иерусали́ма,/ в ра́дости святы́м ме́стом Гро́бу благогове́йное поклоне́ние воздала́ еси́, Евфроси́ние,/ прося́ у Го́спода благода́ти,/ да прии́мет дух твой на ме́сте святе́м;/ и услы́ша Госпо́дь моли́тву твою́,/ и посла́ А́нгела,/ и́же возвести́ ти о преше́ствии твое́м/ от земна́го Иерусали́ма в Го́рний Иерусали́м Небе́сный,/ иде́же ра́достно лику́ющи со де́вственными ли́ками,/ помина́й нас, с любо́вию пра́зднующих святу́ю па́мять твою́.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и отпу́ст.

На Литурги́и слу́жба вся преподо́бней жене́.

Моли́тва

О преподо́бная и приснопа́мятная, всехва́льная ма́ти Евфроси́ние, А́нгеле во пло́ти, Богоизбра́нный сосу́де Святого Ду́ха, Це́ркве Христо́вы похвало́ и украше́ние, мона́шествующих сла́во и утвержде́ние, оте́честву, оби́тели твое́й и всей стране́ по́моще, покро́ве и защи́тнице! Ты еси́, я́ко дре́во, насажде́нное при исхо́дищих вод, плоды́ доброде́телей твои́х и благода́тными дарова́нии Свята́го Ду́ха украше́нная, наста́внице де́лом и сло́вом, избра́нная, непоро́чная и до́брая. Услы́ши ны, моля́щияся тебе́ и призыва́ющия и́мя твое́, и́маши бо дерзнове́ние у Го́спода. Испроси́ нам преспе́яние в жи́зни доброде́тельней, огради́ се́рдца на́ша ве́рою, наде́ждою и любо́вию и стра́хом Бо́жиим. Пода́й нам по́мощь в труде́х и ско́рбех на́ших и, я́коже попече́ние име́ла еси́ в житии́ твое́м о оби́тели твое́й и и́ночествующих, та́ко и ны́не потщи́ся о нас, благопоспеши́ти нам во всем: и оби́тель твою́ огради́ ми́ром и защити́ от враг ви́димых и неви́димых, да преуспева́ет и процвета́ет в доброде́телех. Изми́ ны от вся́кия ну́жды и тесноты́, от лю́тых боле́зней и от неча́янныя сме́рти и приведи́ ны ко и́стинному покая́нию при исхо́де из жи́зни сея́; испроси́ нам у Го́спода Бо́га кончи́ну ми́рну, безболе́зненну, непосты́дну, святы́х Та́ин прича́стну и преведи́ ны чрез мыта́рства возду́шная, да не похи́тят нас истяза́телие гро́знии по грехо́м на́шим, но да твои́м заступле́нием и по́мощию возмо́жем безбе́дно проити́ истяза́ние возду́шное, и ми́лость получи́ти, и предста́ти неосужде́нно стра́шному Престо́лу, и на Стра́шнем Суди́щи сподо́битися одесну́ю ста́ти Пра́веднаго Судии́, и насле́довати пра́ведных ча́сть. Ей, госпоже́, всечестна́я ма́ти, преподо́бная Евфроси́ние, помози́ нам моли́твами твои́ми, огради́ нас и заступи́ от вся́ких ко́зней вра́жиих, да сподо́бимся прейти́ вре́мя жи́зни сея́ непреткнове́нно и спасе́ние получи́ти моли́твами твои́ми у Христа́ Го́спода, Его́же и сподо́бимся пе́ти и славосло́вити со Безнача́льным Отце́м и со Святы́м Ду́хом во ве́ки веко́в. Ами́нь.

Стихи́ры преподо́бнаго Михаи́ла, глас 8.

Подо́бен: О, преславнаго чудесе́:

О́тче Михаи́ле Богодохнове́нне,/ благи́х исто́чниче,/ жела́ний же коне́чных жела́ния исполне́ние/ и и́стинное блаже́нство,/ е́же вся́ко естество́ вои́стинну жела́ет,/ ви́дети, блаже́нне, досто́йно сподо́бился еси́./ О, кра́снаго твоего́ удобре́ния, сла́вне!/ Сим же Христу́, ра́дуяся, ны́не предстои́ши,/ я́ко святи́тель све́тел.

О́тче Михаи́ле Богоприя́тне,/ в свяще́ния оде́жду обле́кся,/ поте́кл еси́ на му́ченическое суди́ще/ и Христу́ приве́лся еси́,/ сугу́быми венцы́, блаже́нне, укра́шен,/ святи́тельския чи́ны зря./ О, несказа́ннаго твоего́ весе́лия, прему́дре!/ Его́же приобщи́тися/ вои́стинну сподо́бился еси́, Богоблаже́нне.

О́тче Михаи́ле Богому́дре,/ искуше́ний тебе́ о́гнь, ороша́емь свы́ше,/ боголе́пно погаси́л еси́/ и премину́л еси́ неискуше́н,/ приложи́лся еси́, ра́дуяся, блаже́нне,/ к пре́жним святи́телем, священному́чениче, све́тло./ О, неизрече́ннаго твоего́ и све́тлаго селе́ния!/ во́ньже тя Христо́с ны́не всели́,/ я́ко святи́теля честна́.

Стихи́ры Богоро́дицы, глас и подо́бен то́йже:

Ра́дуйся, душ просвеще́ние,/ согреша́ющих проще́ние, неради́вых исправле́ние./ Ра́дуйся, утеше́ние и ра́дость, скорбя́щих Помо́щнице./ Ра́дуйся, Блага́я, немощны́х душ исцеле́ние./ Ра́дуйся, примире́ние к Бо́гу и Хода́таице,/ Серафи́м всех я́ко су́ща святе́йши, Чи́стая.

Пло́ть от крове́й Твои́х прие́м, Преве́чный Бог/ Тя Предста́тельницу показа́ челове́ком, Чи́стая./ Те́мже изба́ви рабы́ Твоя́ от вся́кия беды́ и обстоя́ния/ и се́тей лука́ваго врага́/ и сия́ния причасти́тися сподо́би избра́нныя,/ вся сла́вящия и покланя́ющияся Тебе́.

Спаси́ мя, Влады́чице Пречи́стая,/ Я́же Спа́са Христа́ неизрече́нно ро́ждшая:/ Тя бо еди́ну стяжа́х Предста́тельницу,/ и необори́мую сте́ну,/ и покро́в, и ра́дование,/ и души́ моея́ Боже́ственное утеше́ние,/ Ты у́бо мя изба́ви неусыпа́ющаго че́рвия/ и огня́ ве́чнующаго, Ма́ти Христа́ Бо́га.

Сла́ва, и ны́не, пра́здника или́ Богоро́дичен:

Да гла́сы велича́ю Тя ра́достными, Чи́стая,/ и сла́влю пучи́ну человеколю́бия Твоего́,/ от бед спаси́/ и изми́ мя душетле́нных стрел/ неви́димаго и вселука́ваго врага́,/ Тя бо предлага́ю на́нь, Богоневе́сто,/ ору́жие тве́рдо и непобеди́мо,/ Ма́ти Христа́ Бо́га.

Крестобогоро́дичен:

Тя ви́дящи, пригвожда́ема на Кресте́, Иису́се,/ и стра́сти прие́млюща во́лею,/ Де́ва и Ма́ти Твоя́, Влады́ко,/ увы́ Мне, – вопия́ше, – Ча́до сла́дкое!/ ра́ны непра́ведно ка́ко терпи́ши,/ Врачу́, исцели́вый челове́ческое неможе́ние/ и от тли всех изба́вивый милосе́рдием Твои́м?

Кано́н, глас 2.

Пе́снь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло е́сть,/ препросла́вленный Госпо́дь, сла́вно бо просла́вися.

Неизглаго́ланным возсия́ просвеще́нием, о́тче, воздержа́ния,/ святи́тель Бо́жий был еси́, Михаи́ле чу́дне, ца́рское нося́ свяще́ние/ и Христо́ву пасы́й ты Це́рковь, преблаже́нне.

Вити́йствуя усты́ све́тлыми, всем сказа́л еси́/ благоче́стно боговеща́нная уче́ния, Михаи́ле пребога́те,/ ересе́й облича́я хулы́, и благоче́стия побо́рник был еси́, преблаже́нне.

Дарова́ний Боже́ственных быв, блаже́нне, сосу́д,/ всем ве́рным проявле́ние ты пре́дал еси́, Михаи́ле всехва́льне,/ богоподо́бно житие́ стяжа́в и пра́вдою оде́ян, я́ко ри́зою.

Свяще́нному о́бразу Христо́ву и Бо́жия Ма́тере че́стне покланя́яся,/ пребы́л еси́, Михаи́ле всеосвяще́нне,/ и ху́льное языкобо́лие низложи́л еси́ ерети́чествующих,/ словесы́ и страда́нии побежда́я.

Богоро́дичен: Из чре́ва Твоего́, Пресвята́я Чи́стая, возсия́в нам со́лнце,/ богоде́льными блиста́нии уясни́, отгна́в вся́ку де́монскую темнообра́зную молву́,/ препросла́вленный Госпо́дь, сла́вно бо просла́вися.

Пе́снь 3

Ирмо́с: На ка́менимя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ не́сть свят, я́коже Бог наш,/ и не́сть пра́веден, па́че Тебе́, Го́споди.

Теку́щими притяжа́л еси́, Богоглаго́ливе, непреходи́мая и пребыва́ющая во ве́ки,/ разли́чно бо пожи́л еси́, взыва́я:/ не́сть свят, я́коже Бог наш, и не́сть пра́веден, па́че Тебе́, Го́споди.

Излия́ся во устна́х твои́х Боже́ственная благода́ть, разшири́в уста́ твоя́,/ и прия́л еси́ прему́дрости дарова́ния, и вопия́л еси́:/ не́сть свят, я́коже Бог наш, и не́сть пра́веден, па́че Тебе́, Го́споди.

Покори́л еси́ стра́сти воздержа́нием, просвети́л еси́ ум твой виде́нием,/ был еси́ де́телен, взыва́я:/ не́сть свят, я́коже Бог наш, и не́сть пра́веден, па́че Тебе́, Го́споди.

Богоро́дичен: Мари́ю, Пречи́стую Богоро́дицу, воспое́м,/ я́ко Хода́таицу спасе́ния я́вльшуюся, Богому́дрии, и вопие́м:/ не́сть непоро́чны, я́коже Ты, Всенепоро́чная, и не́сть пречи́сты, па́че Тебе́, Влады́чице.

Седа́лен, глас 1.

Подо́бен: Гроб Твой, Спа́се:

Освяти́в себе́ житие́м соверше́нным, яви́лся еси́ свяще́нник Бо́га Вы́шняго,/ от Него́же укрепля́емь, ерети́чествующих уста́ загради́л еси́,/ на Христо́ву ико́ну отверза́емая,/ и, го́ним, о́тче, тече́ние сконча́л еси́.

Сла́ва, и ны́не, пра́здника или́ Богоро́дичен:

Безневе́стная Чи́стая Богоро́дице Де́во,/ еди́на ве́рных Предста́тельнице и покро́ве,/ бед, и скорбе́й, и лю́тых обстоя́ний всех изба́ви,/ на Тя упова́ние, Отрокови́це, иму́щих,/ и ду́ши на́ша спаси́ Боже́ственными моли́твами Твои́ми.

Крестобогоро́дичен:

Зря́щи Тя, Христе́, Всенепоро́чная Ма́ти, ме́ртва на Кресте́ просте́рта, вопия́ше:/ Сы́не Мой, Собезнача́льне Отцу́ и Ду́ху,/ что неизрече́нное Твое́ сие́ смотре́ние,/ и́мже спасл еси́ пречи́стых рук Твои́х, Ще́дре, созда́ние?

Пе́снь 4

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Жела́я венца́ сла́вы,/ оста́вил еси́ пло́ти угожде́ние, священнотаи́нниче преизря́дне,/ все же житие́ твое́, я́ко благово́нну же́ртву, Бо́гу прине́сл еси́.

Охро́мше от пра́выя стези́, впадо́ша в ров е́реси,/ и́же ны́не я́вльшеся отчужде́ни, и́хже обличи́л еси́,/ Христо́в почита́я о́браз, преблаже́нне.

Восприя́л еси́ твои́х страда́ний бога́тно воздая́ния, Михаи́ле всече́стне,/ с Небе́сными си́лами ны́не веселя́ся и лику́я со А́нгелы, досточу́дне.

Язы́к твой показа́ся Ду́ха тро́сть, Михаи́ле пресла́вне,/ смотре́ние плотско́е писа́ти поучи́вся Вседержи́теля Сло́ва, всехва́льне.

Сия́я свяще́нною и честно́ю оде́ждею свяще́ния твоего́,/ испове́данием украси́лся еси́,/ позо́р быв А́нгелов и челове́ков, всече́стне.

Богоро́дичен: Напра́ви, Богоро́дице, жи́знь мою́,/ повеле́нии Боже́ственными управля́ющи вопло́щшагося Сло́ва из Тебе́,/ и к све́ту наста́ви, Де́во Ма́ти, Мари́е Богоневе́сто.

Пе́снь 5

Ирмо́с: Просвеще́ние во тьме́ лежа́щих,/ спасе́ние отча́янных, Христе́ Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м:/ ино́го бо, ра́зве Тебе́, бо́га не зна́ю.

От ю́ности возложи́вся Сло́ву, священноявле́нне,/ Боже́ственно бо возложе́ние я́влься, украси́лся еси́ де́йственным виде́нием/ и, прему́дрости плод собра́в, был еси́ па́стырь, Михаи́ле, достоприя́тен.

Глаго́л Бо́жий, бога́тно всели́выйся в тя, Богому́дре,/ ре́ки источи́ уче́ний,/ и́миже пита́ющеся, весели́мся, блаже́нне,/ тя хода́тая я́ве иму́ще, ми́лостива нам Христа́ содева́юща.

И́же Боже́ственною си́лою вся украси́в, тя ны́не, Богоявле́ние,/ свяще́ния та́йнаго украси́ ми́ром, прове́дый твою́ све́тлость:/ яви́лся бо еси́ свяще́нник Бо́жий велему́др.

Богоро́дичен: Ра́вен нам по всему́ бы́ти сподо́бивыйся, в Тя всели́ся, Богома́ти,/ преве́чно от Отца́ возсия́вый и роди́ся из Тебе́, Всенепоро́чная,/ Челове́к вку́пе и Бог всеси́лен.

Пе́снь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

В спаси́тельную оде́жду, прехва́льне, Боже́ственнаго весе́лия оде́явся,/ испове́дания вене́ц от Бо́га прия́л еси́ досто́йно.

Претерпе́в го́рькая заточе́ния, му́дре,/ в простра́нную широту́ дости́гл еси́ рая́,/ с му́ченики лику́я, Богому́дре пребога́те.

Учени́к быв Христа́ Бо́га,/ Сего́ страсте́м, блаже́нне, поревнова́л еси́,/ беды́ прие́мля до́блественне за Це́рковь Его́, Богодухнове́нне.

Богоро́дичен: У́мно научи́шася несказа́нному вси проро́цы Твоему́, Пречи́стая, Рождеству́,/ духо́вно вообража́юще и предглаго́люще всем бу́дущая.

Конда́к, глас 8.

Подо́бен: Я́ко нача́тки:

Я́ко архиере́й всече́стен и благоче́стия священнострада́лец,/ преще́ния злоимени́таго не убоя́вся,/ ерети́ческое того́ противле́ние победи́л еси́,/ свобо́дным гла́сом велегла́сно вопия́:/ ико́не покланя́юся Христо́ве и Пречи́стыя Того́ Ма́тере./ Сего́ ра́ди тя почита́ем, Михаи́ле.

Пе́снь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ е́сть,/ Христо́с же простре́ Богочести́вым отроко́м ро́су духо́вную,/ Сын благослове́н и препросла́влен.

Не терпя́ше язы́ка твоего́ Боже́ственнаго веща́ния зве́рь злоимени́тый, Михаи́ле свяще́нне,/ но в заточе́ниих тя осужда́ет да́льных:/ оба́че стыдя́шеся, твою́, священнопропове́дниче, зря тве́рдость.

Направля́ется, прему́дре, уче́нии твои́ми Христо́в всесвяще́нный правосла́вный сонм:/ был бо еси́ орга́н, священноде́йственниче Михаи́ле, Ду́хом бряца́я,/ вопия́ вели́чия Вседержи́теля.

Му́дре обличи́л еси́ злоимени́тых пита́телей, Ма́нента ху́льное нече́стие,/ Христо́ву пречи́стую, о́тче, ико́ну я́сно и Богома́тере пропове́дуя и святы́х,/ Михаи́ле преподо́бне.

Богоро́дичен: Воплоще́ния была́ еси́ Бо́жия Сло́ва, и Де́во Всенепоро́чная, красе́н сосу́д:/ из Тебе́ бо воеприя́т, за милосе́рдие мно́гое, всего́ мя, челове́ка./ Сый благослове́н и препросла́влен.

Пе́снь 8

Ирмо́с: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода,/ и превозноси́те во вся ве́ки.

На суди́щи став, Богопропове́дниче Михаи́ле, не устраши́лся еси́ преще́ния беззако́нных,/ но свобо́дным гла́сом вопия́л еси́:/ ико́ну пречи́стую чту Спа́са Христа́ и святы́х всех.

Нра́вом тве́рдым и кре́пким спле́тся, му́дре, с богобо́рцы,/ победи́тель яви́лся еси́,/ де́лом и сло́вом я́вль, я́коже бя́ше ле́по/ ико́ну пречи́стую чти́ти Спа́са Христа́ и святы́х всех.

На первообра́зную ве́дый ико́нную че́сть, священноявле́нне, преходя́щу, о́тче,/ Богодухнове́нным Писа́нием после́дуя, вся учи́л еси́/ чти́ти ико́ну Христо́ву и всех святы́х.

Богоро́дичен: Струю́ исцеле́ний нам непреста́нно ве́рным, Чи́стая, источа́еши:/ ея́же оби́льную благода́ть почерпа́юще, Твое́ пое́м рождество́ пречи́стое/ и превозно́сим во вся ве́ки.

Пе́снь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Безме́рным сия́я ны́не просвеще́нием, пребога́те,/ Све́ту вели́кому я́ко предстоя́,/ жела́нный тебе́ коне́ц получи́ти, о́тче, сподо́бился еси́,/ к нему́же, тща́ся, текл еси́, благоче́стно пожи́в, преблаже́нне.

Ви́дети сподо́бился еси́ па́че ума́ све́тлость,/ ю́же на земли́ проявле́нно, о́тче, стяжа́л еси́,/ но, хода́тайствуя, изба́вити твоя́ ученики́ Христа́ умоли́,/ тя ны́не хва́лящия и чту́щия, досточу́дне.

Укре́плься Боже́ственною благода́тию,/ му́дрости твоея́ сия́нии богобо́рных на́глость, му́дре, погаси́л еси́,/ заря́ми отону́дными, я́ко исто́чник, вну́трь стяжа́в,/ Михаи́ле чу́дне, христопропове́дниче свяще́нне.

Богоро́дичен: Я́коже руно́, Пренепоро́чная, До́ждь Небе́сный во утро́бе прие́мши,/ нам родила́ еси́ безсме́ртие даю́щаго,/ благоче́стно Того́ воспева́ющим и Тя, Всепе́тую Богоро́дицу, пропове́дающим.

НА МАЛОЙ ВЕЧЕРНИ

На Го́споди, воззва́х:стихи́ры, глас 1: 1. Небе́сным чино́м подо́бен был еси́, преподо́бне:2. Небе́сных чино́в ликостоя́ние премину́л еси́, о́тче преподо́бне:3. Небе́снии чи́нове многоочи́тии и шестокрила́тии: зри на хвали́тех.

Сла́ва, глас 5:

Вторы́й Моисе́й яви́лся еси́, преподо́бне,/ он бо дре́вле, ше́ствуя чрез пусты́ню,/ фарао́на потопи́ со всем во́инством его́ в Чермне́м мо́ри;/ ты же – го́рдаго мучи́теля диа́вола,/ со всем во́инством его́ потопи́л еси́/ в мо́ри слез твои́х;/ он победи́ Амали́ка мучи́теля,/ ты же – мы́сленнаго амали́ка низложи́л еси́, я́ко жезло́м желе́зным,/ тве́рдою во Христа́ ве́рою и кре́пким терпе́нием,/ и прия́л еси́ побе́ды своея́ по́чести вене́ц неувяда́емый на Небесе́х,/ и со а́нгельскими чи́нми ликостоя́ние,/ с ни́миже моли́ся Го́сподеви/ спасти́ и просвети́ти ду́ши на́ша.

И ны́не, Богоро́дичен.

На стихо́вне стихи́ры, глас 2:

Дом прекра́сный Влады́це Христу́/ себе́ соде́лал еси́, преподо́бне,/ и ны́не во дво́рех Небе́сных жи́тельствуеши.

Стих: Честна́ пред Го́сподем/ сме́рть преподо́бных Его́.

Звезда́ многосве́тлая яви́лся еси́, Паи́сие,/ просвеща́я нас луча́ми чуде́с твои́х,/ призыва́ющих тя с ве́рою.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́ка моще́й твои́х,/ иде́же лежи́т трудолюбе́зное твое́ те́ло,/ чуде́с дара́ми обогаща́ет нас.

Сла́ва, глас то́йже:

Небе́снаго Царя́ Престо́лу/ со а́нгельскими чи́нми предстоя́, Паи́сие,/ моли́ о чту́щих и прославля́ющих тя, преподо́бне.

И ны́не, Богоро́дичен:

Небе́снаго Царя́ Ма́ти,/ Небе́снаго Иерусали́ма жи́телей бы́ти сподо́би нас/ и сла́дости таковы́я получи́ти,/ ея́же жела́ет ви́дети о́ко а́нгельское.

Тропа́рь зри на вели́цей вече́рни.

НА ВЕЛИ́ЦЕЙ ВЕЧЕРНИ

На Го́споди, воззва́х:стихи́ры, глас 2:

Ки́ими похва́льными венцы́/ венча́ем преподо́бнаго Паи́сия?/ И́же пло́тию на земли́ жи́вша/ и ду́хом гоня́ща Небе́сная,/ чистоту́ зело́ возлю́бльшаго и равноа́нгельно пожи́вшаго,/ и́ноком су́ща предводи́теля и благоче́стию ревни́теля,/ земна́го а́нгела, Небе́снаго челове́ка,/ его́же ра́ди шата́ния враго́в Христо́с низложи́,/ име́яй ве́лию ми́лость.

Ки́ими пе́сненными похвала́ми/ похва́лим отца́ на́шего Паи́сия?/ Преподо́бным лико́м соприча́стника и Безпло́тным сожи́теля,/ це́рковь себе́ Святе́й Тро́ице соде́лавша,/ и Свята́го Ду́ха прии́ти сподо́бльшася,/ и вся́кими благи́ми де́лы ду́шу свою́ украси́вшаго,/ и вся вра́жия наве́ты попра́вшаго,/ его́же ра́ди сих шата́ния Христо́с низложи́,/ име́яй ве́лию ми́лость.

Ки́ими проро́ческими пе́сньми/ похва́лим преподо́бнаго Паи́сия?/ И́же не от Ри́ма, ни от Иерусали́ма к нам прише́дшаго,/ но в честне́й оби́тели Бо́жия Ма́тере,/ близ гра́да Га́лича в после́днем ро́де возсия́вшаго,/ и мно́жество учени́к ко Христу́ приве́дшаго,/ его́же ра́ди моле́ния гра́ду на́шему и всей стране́/ Христо́с подае́т ве́лию ми́лость.

Ки́я похвалы́ и да́ры духо́вныя/ принесе́м отцу́ на́шему Паи́сию?/ Он бо со А́нгелы вку́пе и со святы́ми/ вы́ну за род христиа́нский Го́сподеви Бо́гу и Бо́жии Ма́тери мо́лится,/ дарова́ти всей вселе́нней мир,/ Це́рквам единомы́слие, святи́телем благо́е согла́сие,/ лю́дем на́шим на ва́рвары побе́ду/ и всему́ христиа́нскому во́инству на враги́ одоле́ние,/ земли́ благопло́дие/ и душа́м на́шим ве́лия ми́лости.

Сла́ва, глас 6:

Возсия́ дне́сь пресве́тлая и всепра́зднственная па́мять твоя́,/ пресла́вне Паи́сие,/ созыва́ющи многочи́сленное по́стник сосло́вие,/ и преподо́бных ликостоя́ние,/ ра́ка бо твоя́ честна́я,/ иде́же лежи́т трудолюбезное и свято́е те́ло твое́,/ исцеле́ния неоску́дно подава́ет приходя́щим с ве́рою/ и душетле́нныя стра́сти исцеля́ет,/ бесо́вския полки́ прогоня́ющи,/ ве́рных же чудесы́ удивля́ющи,/ тем, пречестну́ю твою́ и А́нгелом гове́йную обстоя́ще ра́ку,/ ра́достно от души́ вопие́м ти:/ Богоблаже́нне преподо́бе Паи́сие,/ моли́ тебе́ просла́вльшаго Христа́ Бо́га/ спасти́ся душа́м на́шим.

И ны́не, Богоро́дичен: Кто Тебе́ не ублажи́т:

Вход. Проки́мен дне, и чте́ния три преподо́бническая (зри 23 мая)

На лити́и стихи́ры, глас 3:

Преподо́бне о́тче Паи́сие,/ кто досто́йно доброде́телей твои́х испове́сть побе́ды,/ ка́я уста́ изреку́т терпе́ния твоего́ по́двиги,/ и́миже проти́ву неви́димых мучи́телей во́инствовал еси́,/ и хра́брством твои́м мучи́теля врага́ низложи́л еси́,/ и всю си́лу его́ нога́ма свои́ма попра́л еси́,/ и благоугоди́л еси́ Христо́ви,/ от Него́же побе́дным венце́м увя́злся еси́,/ моли́ за правосла́вныя лю́ди,/ почита́ющих досто́йно святу́ю па́мять твою́,/ спасти́ся душа́м на́шим.

Сла́ва, глас 4:

Прииди́те, вси концы́ земли́,/ псалмы́ и пе́сньми и пе́ньми духо́вными,/ свяще́нное и честно́е торжество́,/ преподо́бнаго отца́ на́шего Паи́сия/ дне́сь благоче́стно восхва́лим;/ а́ще бо и последи́ возсия́,/ но дре́вних оте́ц че́сти сподо́бился еси́/ и мо́лится Го́сподеви/ спасти́ся душа́м на́шим.

И ны́не, Богоро́дичен.

На стихо́вне стихи́ры, глас 5:

Ра́дуйся, свяще́нная главо́,/ преподо́бне о́тче наш Паи́сие,/ Тро́ицы честны́й сосу́де,/ Бо́жия Ма́тере служи́телю,/ Безпло́тных сожи́телю,/ Це́ркви Христо́ве честно́е украше́ние,/ свяще́нства пра́вило изве́стное,/ и́ноком наста́вниче,/ во́ине Христо́в всеизря́дне,/ от Него́же и дар чудотворе́ния прия́л еси́/ и подае́ши всем исцеле́ние,/ притека́ющим с ве́рою к ра́це моще́й твои́х.

Стих: Честна́ пред Го́сподем/ сме́рть преподо́бных Его́.

Ра́дуйся, всечестна́я кинови́е,/ иму́щи в себе́ ра́ку преподо́бнаго отца́ на́шего Паи́сия,/ в не́йже не би́серие, ниже́ ка́мни драгоце́нныя блиста́ют,/ но трудолюбе́зныя мо́щи сокрове́нны,/ весели́ся и ра́дуйся и́нок тоя́ оби́тели совокупле́ние,/ такова́ стяжа́вши себе́ засту́пника/ и к Бо́гу моле́бника те́пла,/ су́щим в но́щи грехо́вней свети́льника,/ и́же на ве́рсе чудотворе́ния положи́ся/ от Христа́ Бо́га и Спа́са душ на́ших.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, Русския митропо́лии,/ богоспаса́емый гра́де Галиче,/ иму́ще таково́е бога́тство,/ мо́щи преподо́бнаго отца́ на́шего Паи́сия,/ и́же не изда́вна сокрове́нна,/ но в после́днем ро́де в страна́х твои́х возсия́вша,/ и, благода́ть от Бо́га име́я,/ исцеля́ет стра́сти и неду́ги прогоня́ет/ и подае́т всем исцеле́ние/ с ве́рою прося́щим от Христа́ Бо́га и Спа́са душ на́ших.

Сла́ва, глас 8:

Прииди́те, вси наро́ди от гра́да на́шего и всея́ страны́/ и от всея́ Русския митропо́лии,/ му́жие и жены́ боголюби́выя и до ссу́щих младе́нец,/ духо́вно возвесели́мся в наро́читом пра́зднице/ но́ваго чудотво́рца, преподо́бнаго Паи́сия,/ и многоцеле́бную его́ ра́ку обстоя́ще, любе́зно облобыза́ем,/ и того́, я́ко цве́ты, пе́сньми и хвала́ми увязе́м, реку́ще:/ ра́дуйся, сла́вне Небе́сный челове́че,/ земны́й а́нгеле и Ду́ха Свята́го оби́телище,/ я́ко ева́нгельскому гла́су после́довал еси́,/ и восприя́л еси́ в тле́нных ме́сто нетле́нная,/ и прише́л еси́ от си́лы в си́лу,/ от тле́нныя и вре́менныя сла́вы во сла́ву безконе́чную,/ ра́дуйся, правосла́вным лю́дем похвала́ и утвержде́ние,/ и всей Русстей земли́ пресве́тлый свети́льниче,/ и моли́твенниче о душа́х на́ших.

И ны́не, Богоро́дичен.

Тропа́рь преподо́бнаго, глас 8:

Дне́сь возсия́ нам па́мять твоя́, сла́вне Паи́сие,/ я́ко со́лнце светоза́рное, луча́ми озаря́ющи ве́сь мир,/ та́ко и ты, преподо́бне,/ чудесы́ свои́ми тьму́ но́щи злых духо́в от нас отгоня́я;/ дне́сь Небе́сныя си́лы, и святы́х А́нгел,/ и ду́ши пра́ведных мы́сленно торжеству́ют, ра́дующеся;/ дне́сь и мы, гре́шнии, припа́дающе честно́му твоему́ о́бразу мо́лимся:/ о преподо́бне Паи́сие,/ Христа́ Бо́га моли́ непреста́нно/ спасти́ град и лю́ди, и́же тебе́ почита́ющия.

НА У́ТРЕНИ

На Бог Госпо́дь:тропа́рь преподо́бному два́жды. Сла́ва, и ны́не,Богоро́дичен.

По 1-м стихосло́вии седа́лен пра́здника.

По 2-м стихосло́вии седа́лен свята́го, глас 3:

Зна́емо бы́сть и́мя твое́, блаже́нне, по всей стране́ га́личестей,/ чуде́с ра́ди быва́ющих от Тебе́,/ Христо́с бо тя свети́льника нам дарова́,/ просвеща́юща нас луча́ми чуде́с твои́х,/ Ему́же предстоя́, вы́ну моли́ спасти́ся душа́м на́шим.

Сла́ва, и ны́не, Богоро́дичен:

Красоте́ де́вства Твоего́ и пресве́тлой чистоте́ Твое́й/ Гаврии́л удиви́вся, вопия́ше Ти, Богоро́дице:/ ку́ю Ти похвалу́ принесу́ досто́йную?/ Что же возъимену́ю Тя?/ Недоумева́ю и ужаса́юся./ Те́мже, я́ко повеле́н бых, вопию́ Ти:/ ра́дуйся, Благода́тная.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние:Ева́нгелие от Матфе́я, зача́ло 43.

По 50-м псалме́ стихи́ра, глас 6:

Прииди́те, празднолю́бцы вси́,/ воспое́м отца́ на́шего преподо́бнаго Паи́сия,/ земна́го а́нгела и Небе́снаго челове́ка Бо́жия,/ насажде́н бо бысть в до́му Госпо́дни/ и процвете́ пра́ведно,/ и я́ко кедр умно́жил е́сть ста́до Христо́во слове́сных ове́ц/ в преподо́бии и пра́вде,/ и ны́не, предстоя́ Престо́лу Христо́ву,/ просвеща́ет нас чудесы́ свои́ми/ и мо́лится о нас непреста́нно/ поми́ловатися душа́м на́шим.

Кано́н, глас 4.

Пе́снь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть.

А́гнче Бо́жий, взе́мляй грехи́ всего́ ми́ра,/ возми́ от мене́, недосто́йнаго раба́ Твоего́, бре́мя тя́жкое грехо́вное/ и да́руй ми свет, да возмогу́, све́том Твои́м просве́щся,/ воспе́ти Твоему́ уго́днику, преподо́бному Паи́сию.

Боже́ственный глас во свяще́нном Ева́нгелии егда́ услы́шав, преподо́бне Паи́сие,/ повелева́ющ вся тле́нная ми́ра сего́ оста́вити и Христу́ после́довати,/ тогда́ ре́вностию Боже́ственною разже́гся, вся кра́сная ми́ра нивочто́же вмени́в,/ еди́наго то́чию Христа́ возлюби́л еси́.

Возжеле́л еси́, блаже́нне, вы́ну со Христо́м бесе́довати,/ и сего́ ра́ди уклони́лся еси́ мирски́я суеты́,/ и в ти́хое приста́нище дости́гл еси́ и́ночествующих оби́тели,/ и, ве́тхаго челове́ка отложи́в, в но́ваго обле́клся еси́,/ да пе́рвое оте́чество Небе́сное, из него́же преступле́нии спадо́хом, насле́дствуеши.

Богоро́дичен: Госпоже́, Де́во Богоро́дице, при́зри на мое́ недосто́инство/ и умоли́ Сы́на Своего́ и Бо́га моего́,/ да Твоего́ ра́ди моле́ния, да́руй ми сло́во во отверзе́ние уст мои́х,/ на похвалу́ уго́дника Твоего́ преподо́бнаго Паи́сия.

Други́й кано́н, глас 8.

Пе́снь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спа́се,/ пе́снь Бо́гови воспева́юща.

Тро́ице Свята́я, Единосу́щная и Неразде́льная, бтче, и Сы́не, и Душе́ Святы́й,/ приими́ мою́ гре́шную мольбу́, приноси́мую Тебе́ от скве́рных и недосто́йных уст мои́х,/ и да́руй ми по́мысл благ твори́ти во́лю Твою́/ моли́тв ра́ди уго́дника Твоего́, преподо́бнаго Паи́сия.

Руко́ю мое́ю недосто́йною и любо́вию серде́чною/ приноси́мое тебе́ мое́ ны́не ма́лое моле́ние приими́, блаже́нне о́тче Паи́сие,/ и ру́ку мне да́ждь по́мощи, да не потопи́т мене́ бу́ря грехо́вная,/ и приведи́ мя к ти́хому приста́нищу покая́ния твои́ми моли́твами.

Богоро́дичен: Две́ре Благода́тная, отве́рзшая ве́рным две́ри Небе́сныя,/ покая́ния две́ри светоза́рный отве́рзи ми, Влады́чице,/ и врат сме́ртных свобо́да, да не прииду́ в зе́млю пла́ча,/ да не ви́жду ме́ста тьмы́,/ да не свя́зан бу́ду рука́ма и нога́ма и изве́ржен вне черто́га Христо́ва,/ оде́жду нетле́ния оскверне́ну име́я греха́ми всестра́стный.

Пе́снь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Дом Пресвяты́я Тро́ицы себе́ соде́лал еси́, преподо́бне,/ посто́м и моли́твою, слеза́ми и всено́щным стоя́нием,/ на земли́ лега́нием и вся́кими благи́ми де́лы ду́шу свою́ украси́в, я́ко пала́ту,/ в жили́ще всех Царя́, Христа́ Бо́га.

Еди́ному Влады́це Христу́ на земли́ рабо́тал, еси́, блаже́нне Паи́сие,/ вся дни живота́ твоего́ нело́жно/ и сего́ ра́ди возме́здие от Него́ восприя́л еси́,/ е́же на Небесе́х жи́тельствовати со А́нгелы вку́пе и со святы́ми.

Богоро́дичен: Зол мои́х пучи́ну изсуши́, Богоро́дице Де́во, милосе́рдия ро́ждши пучи́ну и Изба́вителя и Го́спода,/ и плени́цы зол мои́х разруши́ пре́жде кончи́ны,/ да воспою́ пе́снь Сы́ну Твоему́ и Бо́гу:/ не́сть свят па́че Тебе́, Го́споди.

Ин

Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.

Ско́рбных наведе́ния обурева́ют смире́нную мою́ ду́шу/ и напа́стей о́блацы мое́ покрыва́ют се́рдце,/ но ты, преподо́бне о́тче, предстоя́ све́ту Трисо́лнечнаго Божества́,/ моли́ся Небе́сному Влады́це, да возсияет мне свет ра́достный.

Твоему́ о́бразу предстоя́, молю́ся, преподо́бне о́тче,/ и, к ра́це твои́х моще́й припа́дая со слеза́ми от се́рдца призыва́ю тя:/ при́зри на мя ми́лостивым свои́м о́ком,/ и клеветы́ наве́тник, и поноше́ние челове́ческое отъими́ от мене́,/ и, нестерпи́мую мою́ печа́ль преложи́в, ра́дость ско́рую пода́ждь ми.

Богоро́дичен: А́ще и оскверне́н по́мыслы и окаля́н мно́гими паде́ньми аз, окая́нный,/ оба́че, наде́явся на Твое́ благоутро́бие, Ма́ти Бо́жия, молю́ Тя:/ Ты, Еди́на Нескве́рная, уще́дри и спаси́ мя, блу́днаго, хода́тайством Свои́м.

Седа́лен, глас 4.

Подо́бен: Ско́ро предвари́:

Стра́стное покори́л еси́ плотско́е мудрова́ние/ и го́ршая порабо́тив лу́чшему, о́тче Паи́сие пресла́вне,/ сокруши́л еси́ бесо́вския ко́зни посто́м и возсия́л еси́ в ми́ре, я́ко луча́ со́лнечная, сия́нии твои́х доброде́телей,/ сего́ ра́ди тя воспева́ем.

Сла́ва, и ны́не, Богоро́дичен:

Стена́ непобеди́мая нам, христиа́ном, еси́, Богоро́дице Де́во,/ к Тебе́ бо прибега́юще, невреди́ми пребыва́ем/ и, па́ки согреша́юще, и́мамы Тя Моли́твенницу./ Тем, благодаря́ще, вопие́м Ти:/ ра́дуйся, Благода́тная, Госпо́дь с Тобо́ю.

Пе́снь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Име́я во уме́ свое́м сме́ртный час, и неумы́тное суди́ще, и му́ки гре́шников,/ вы́ну от о́чию свое́ю сле́зы излива́я и моли́твы возсыла́я к Бо́гу, преподо́бне,/ да изба́вит ду́ши гре́шных ве́чнаго муче́ния и сподо́бит их Ца́рствия Своего́.

Кто не удиви́тся твоему́, преподо́бне, смире́нию,/ или́ кто не похва́лит свято́е твое́ на земли́ пребыва́ние,/ ужаса́ется ми ум, ка́ко с пло́тию безпло́тным а́нгельским си́лам уподо́бился еси́;/ с ни́ми же ны́не предстоя́ Пресвяте́й Тро́ице, моли́ о нас непреста́нно.

Богоро́дичен: Ми́лости Твое́й сподо́би мя,/ И́же Бо́га ми́лостиваго ро́ждши, Благослове́нная Влады́чице,/ и, в час су́дный предста́вши, изба́ви та́мошняго осужде́ния.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Ны́не наде́яся прибего́х к ра́це твое́й честне́й, о преподо́бне,/ пред не́юже, коле́на своя́ преклоня́я, пла́чу, и стеню́, и боле́зненно зову́ ти:/ да́ждь ми по́мощь, рабу́ твоему́ смире́нному и окая́нному,/ твоего́ заступле́ния и́щущему те́пле.

Ненави́дящии мя всу́е стре́лы, и мечи́, и ров угото́виша,/ и и́щут всеокая́ннаго моего́ те́ла исто́ргнута и низвести́ в зе́млю жела́ют,/ но ты, преподо́бне, моле́бно ру́це свои́ ко Христу́ просте́рше,/ от сих ловле́ния изба́ви и спаси́ мя.

Богоро́дичен: Кре́пким гла́сом испове́даю Тя, Влады́чице, И́стинную Богоро́дицу,/ и не умолчу́ вопи́ти ясне́йши вели́чия Твоя́,/ а́ще бы не Ты всегда́ предстоя́ла, о мне моля́щи Сы́на Твоего́ и Бо́га моего́,/ кто бы от толи́кия бу́ри и лю́тых бед изба́вил мя.

Пе́снь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Небе́снаго Влады́ки Христа́ во́ин изря́ден был еси́, преподо́бне Паи́сие,/ и сего́ ра́ди па́стыря слове́сным овца́м во оби́тели Пречи́стыя Свое́й Богома́тере тебе́ поста́ви,/ ты же, прему́дре, наказу́я их до́бре,/ чи́сты ко Христу́ приве́л еси́.

Ору́жие кре́пко на диа́вола крест Госпо́день стяжа́в,/ му́жественно ополчи́лся еси́ проти́ву всего́ во́инства его́/ и, неусы́пно бдя о ста́де свое́м, с проро́ком Иса́ией вопия́л еси́:/ от но́щи у́тренюет дух мой к Тебе́, Го́споди Бо́же мой.

Богоро́дичен: Ро́су Твоего́ благоутро́бия пода́ждь ми, Пренепоро́чная Чи́стая, грехо́вным зно́ем та́ющему,/ и печа́ль Сама́ устужа́ющи ми,/ и ра́дость Боже́ственную подаю́щи.

Ин

Ирмо́с: Вскую мя отри́нул еси́/ от лица́ Твоего́, Све́те Незаходи́мый,/ и покры́ла мя е́сть чужда́я тьма́, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

А́ще и досто́ин есмь прия́ти му́ки, преступи́в за́поведи Творца́ моего́ и Бо́га,/ но на щедро́ты Его́ наде́яся, прибего́х к тебе́, преподо́бне о́тче,/ ты, у́бо предстоя́ Престо́лу Его́ с ли́ки А́нгел и Арха́нгел и со все́ми святы́ми,/ моли́ о мне, непотре́бнем и сквернем,/ да избу́ду зде́шняго и та́мошнеяо осужде́ния.

Утеше́ние в ско́рбех свои́х вем тя, преподо́бне,/ и неду́гов мои́х врача́ тя зна́ю всесоверше́нна/ и сего́ ра́ди к ра́це моще́й твои́х прибего́х, моля́ся,/ да мя не пре́зриши окая́ннаго, тре́бующаго твоея́ по́мощи.

Богоро́дичен: Где про́чее обря́щу заступле́ние?/ Ка́мо прибе́гну, где же и спасу́ся?/ Ку́ю те́плую возъи́мам Помо́щницу,/ скорбьми́ жите́йскими и бу́рями, увы́ мне, коле́блему?/ На Тя еди́ну упова́ю, и дерза́ю, и хвалю́ся,/ и притека́ю к покро́ву Твоему́, Де́во, спаси́ мя.

Пе́снь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Сле́зныя пото́ки, я́ко многово́дныя ре́ки, от о́чию твое́ю истеко́ша, преподо́бне,/ и́хже ра́ди блаже́нства от Христа́ сподо́бился еси́,/ и, я́ко ре́чными быстрина́ми, во град Царя́ Небе́снаго, в Го́рний Иерусали́м доплы́л еси́.

Твоя́ мо́щи, преподо́бне Паи́сие, а́ще и земли́ по преставле́нии твое́м преда́шася,/ оба́че нетле́нием и чудесы́ Христо́с просла́вил е́сть,/ источа́ют бо чудесы́ и неду́жным подаю́т исцеле́ние, призыва́ющим тя с ве́рою.

Богоро́дичен: Фарисея, вознесе́ннаго умо́м, превзыдо́х,/ возноша́емь при́сно, и про́пастей соедине́н,/ но Ты, Пречи́стая, умоли́ Сы́на Твоего́ и Бо́га,/ уще́дрити мя безме́рными прегреше́ньми смири́вшагося лю́те/ и изба́ви о́гненнаго муче́ния.

Ин

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

А́ще и не́смь дово́лен исчи́слити твоя́ благодея́ния, я́же на мне бы́вшая, о преподо́бне,/ но, наде́явся на твое́ беззло́бие, с любо́вию тя чту, и с ве́рою покланя́юся ра́це моще́й твои́х,/ и всем пропове́дую твое́, е́же ко мне благодея́ние.

Кий дар благодаре́ния принесу́ тебе́,/ или́ ки́има устна́ма воспою́ тя, о́тче преподо́бне?/ Ка́ко ли изреку́т уста́ моя́ твою́ ко мне, убо́гу и стра́нну, ми́лость и благодея́ние,/ и́хже в ско́рби мое́й наслади́хся твои́м посеще́нием?

Богоро́дичен: Ра́дость Тебе́, Чи́стая, яви́, с небесе́ прише́д, Гаврии́л Арха́нгел, егда́ благовести́ рек:/ Бог изы́дет пло́тию из Тебе́, Де́во Пречи́стая,/ и аз ны́не арха́нгельский глас приношу́ Ти, вопия́:/ ра́дуйся, Благода́тная; ра́дуйся, всех ра́досте;/ ра́дуйся, христиа́ном непобеди́мое в беда́х храни́лище и ско́рое от бед избавле́ние,/ ра́дости испо́лни мя, мно́ю жела́нныя.

Конда́к, глас 3:

Возсия́, Го́споди, гра́ду Твоему́ Га́личу,/ я́ко светоза́рное со́лнце, уго́дник Твой Паи́сий,/ ра́достно вселе́нную озаря́я свои́ми чудесы́,/ и приходя́щих с ве́рою ко гро́бу его́ свято́му;/ та́ко моли́твами Пречи́стыя Богоро́дицы от бед всех нас изба́ви,/ и упраздни́ ва́рварская шата́ния,/ я́ко мы, лю́дие Твои́, Го́споди,/ и град наш и страна́ вельми́ Тобо́ю хва́лится,/ и спаса́ется моли́твами преподо́бнаго Паи́сия.

И́кос:

А́нгела во пло́ти су́ща тя зна́ем, о́тче преподо́бне,/ и сего́ ра́ди призыва́ем тя:/ предста́ни нам ско́ро в по́мощь и изба́ви нас от вся́каго зла, да тобо́ю спа́сшеся, всегда́ вопие́м ти:/ ра́дуйся, от утро́бы ма́терния освяще́нный;/ ра́дуйся, све́том богове́дения просвеще́нный./ Ра́дуйся, я́ко ми́ра сего́ красоту́ нивочто́же вмени́вый;/ ра́дуйся, я́ко а́нгельское житие́ возлюби́вый./ Ра́дуйся, я́ко собра́л еси́ и́нок мно́жество;/ ра́дуйся, я́ко научи́л еси́ име́ти кре́пкое му́жество./ Ра́дуйся, я́ко уче́нием твои́м мно́зи получи́ша спасе́ние;/ ра́дуйся, я́ко тобо́ю получи́ша о́бщее Небе́сное селе́ние./ Ра́дуйся, я́ко чи́сте зри́ши Святу́ю Тро́ицу;/ ра́дуйся, я́ко всегда́ о нас мо́лиши Пресвяту́ю Богоро́дицу./ Ра́дуйся, я́ко вся проше́ния на́ша исполня́ются;/ ра́дуйся, Паи́сие преподо́бне.

Пе́снь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Христо́ву Престо́лу предстоя́, преподо́бне,/ не преста́й моли́тися о ста́де свое́м и о всех, с ве́рою притека́ющих к ра́це моще́й твои́х,/ да моли́твами твои́ми получи́м спасе́ние/ и от вся́ких бед и скорбе́й избавле́ние.

О́тче преподо́бне Паи́сие, твои́х ра́ди чуде́с, быва́ющих у ра́ки твоея́ честны́я,/ повсю́ду и́мя твое́ сла́вится/ и не́сть, и́же бы кто, призва́в тя на по́мощь, не услы́шан был./ Сего́ ра́ди проела́вльшему тя Христу́ вопие́м:/ благослове́н Бог оте́ц на́ших.

Богоро́дичен: Чи́стая Де́во Богоро́дице,/ Ты еси́ ко́рень де́вства и неувяда́емый цвет чистоты́,/ моли́ Сы́на Своего́ и Бо́га пода́ти нам грехо́в оставле́ние и житию́ исправле́ние.

Ин

Ирмо́с: Бо́жия снизхожде́ния/ о́гнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, порху:/ благослове́н еси́, Бо́же оте́ц на́ших.

И́щущи ду́шу мою́ погуби́ти,/ а́ки пси безсту́днии, обступи́ша мя и ра́ны соде́яша мне,/ и не́сть в челове́цех помога́ющаго,/ к тебе́ еди́ному прибега́ю и на тя наде́юся, о́тче преподо́бне,/ ты мя от сих ла́яния изба́ви и ско́рую по́мощь пода́ждь, молю́ся ти.

Льва́ люте́йши рыка́ют врази́ мои́,/ и и́щут ду́шу мою́ изъя́та от скве́рнаго моего́ те́ла,/ и растерза́ти мя лю́те в две растерза́нии,/ но ты, преподо́бне, победи́вый льва́ о́наго, началозло́бнаго диа́вола/ и сих сокруши́ востаю́щих на мя, молю́тися.

Богоро́дичен: К кому́ прибе́гну ино́му, Чи́стая, где притеку́, про́чее, и спасу́ся?/ Ка́мо иду́? Ко́еже обря́щу прибе́жище? Ко́е те́плое заступле́ние?/ На Тя Еди́ну упова́ю, и о Тебе́ Еди́ной хвалю́ся, и на Тя дерза́я, прибего́х.

Пе́снь 8

Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Ше́ствовал еси́, преподо́бне, у́зкий и приско́рбный пу́ть, в тле́ннем телеси́ живу́ще,/ и сего́ ра́ди дости́гл еси́ широ́каго и простра́ннаго оте́чества Небе́снаго,/ и со А́нгелы Влады́чню Престо́лу предстоя́,/ помина́й нас, чту́щих любо́вию святу́ю па́мять твою́.

Ще́драго и Человеколюби́ваго Бо́га моли́ о мне вы́ну, преподо́бне Паи́сие,/ и́бо постиго́ша мя ра́ны тя́жкия и неду́ги разли́чныя смуща́ют мя./ Сих мя твои́ми моли́твами ско́ро изба́ви и пе́ти сотвори́:/ вся дела́, Го́спода по́йте и превозноси́те во вся ве́ки.

Богоро́дичен: Ю́же дре́вле провозвести́ проро́ческий собо́р – ру́чку и жезл, и скрижа́ль, и несеко́мую го́ру, –/ Мари́ю Богоотрокови́цу, ве́рно восхва́лим дне́сь, с Гаврии́лом зову́ще:/ ра́дуйся, Обра́дованная.

Ин

Ирмо́с: Седмери́цею пе́щь/ халде́йский мучи́тель/ Богочести́вым неи́стовио разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

О благоутро́бия Твоего́, Христе́,/ о неизрече́ннаго Твоего́ смотре́ния,/ реши́ши бо безме́рныя печа́ли и напа́сти, призыва́ющим Тя в ну́жде и обстоя́нии;/ те́мже и аз, гре́шный, молю́ Тя:/ печа́ль мою́ на ра́дость преложи́/ моли́тв ра́ди уго́дника Твоего́, преподо́бнаго Паи́сия.

Да постыдя́тся врази́ Твои́, ви́девше Твою́ на мне ми́лость,/ и да разуме́ют Твою́, е́же по мне, сопроти́в их борю́щую си́лу,/ моли́тв ра́ди уго́дника Твоего́, преподо́бнаго Паи́сия,/ и да загради́тся всяк язы́к, лука́вым поуча́яйся на мя,/ устны́ же льсти́выя и уста́ непра́ведно глаго́лющая да умолча́т во ве́ки.

Богоро́дичен: Ада́ма от уз а́дских свободи́ла еси́ рождество́м Твои́м, Богоро́дице Де́во,/ и ве́сь род челове́ч изведе́ из тьмы́ и се́ни сме́ртныя,/ те́мже и аз молю́ Тя:/ свобо́да мя от уз, и печа́ли, вы́ну мя одержа́щия,/ и ра́дость ско́рую пода́ждь мне моли́твами Свои́ми.

Пе́снь 9

Ирмо́с: Ка́мень нерукосе́чный/ от несеко́мыя го́ры, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

О коли́ка туга́ одержи́т мя от стреля́ний бесо́вских,/ и я́звы терпе́ти ми не́сть мо́щно,/ пла́стыря приложи́ти не́сть врача́,/ но Ты ми, Бо́же, приложи́ пла́стырь/ и еле́й милосе́рдия Твоего́ изле́й на мя,/ моли́тв ра́ди Твоего́ уго́дника, преподо́бнаго Паи́сия.(Два́жды)

Богоро́дичен: Пси лю́тии нападо́ша на мя, окая́ннаго,/ и, уя́звеннаго греха́ми, е́ле жи́ва оста́виша;/ но Ты, Ми́лостивая, ро́ждшая Врача́ душ и теле́с на́ших,/ стру́пы грехо́в мои́х исцели́, молю́тися.

Ин

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Твою́ ми́лость, на мя излия́нную, ка́ко изрещи́ по досто́инству возмогу́,/ или́ ки́я пе́сни похва́льныя принесу́ ти, недоуме́юся?/ Но то́чию благода́рно вопию́ ти:/ ра́дуйся, Паи́сие преподо́бне, немощству́ющих по́моще и оскорбля́емых ра́досте.

Объя́ша мя иногда́ боле́зни сме́ртныя, беды́ а́довы обыдо́ша мя,/ и, не́мощен на одре́ лежа́в, призва́х тя в по́мощь, преподо́бне,/ ты же ми́лостивно услы́ша моле́ние мое́/ и в не́мощи мое́й дарова́ ми утеше́ние.

Богоро́дичен: Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и но́сиши на Боже́ственную ру́ку Пребога́тое Сло́во, непреме́нно и неизме́нно.

На хвали́тех стихи́ры, глас 1:

Небе́сным чино́м подо́бен был еси́, преподо́бне Паи́сие,/ вся дни живота́ своего́,/ о́ко разу́мныя свое́я души́/ во стране́ при́сно живу́щих упа́сл еси́,/ и ны́не в Небе́сных черто́зех жи́тельствуя,/ моли́ся о нас ко Го́споду.

Небе́сных чино́в ликостоя́ние/ премину́л еси́, о́тче преподо́бне Паи́сие,/ и в ди́вныя селе́ния вни́де невозбра́нно,/ иде́же сия́ет свет Трисия́ннаго Божества́,/ и, та́мо живу́щи,/ моли́ся о нас непреста́нно.

Небе́снии чи́нове многоочи́тии и шестокрила́тии,/ закрыва́ют ли́ца своя́,/ не сме́юще зре́ти сла́вы Небе́снаго Царя́,/ ты же, преподо́бне,/ чи́сте зре́ти Сего́ сподо́бился еси́,/ Его́же моли́ спасти́ся душа́м на́шим.

Сла́ва, глас 6:

Прииди́те, и́нок мно́жество,/ пе́сньми венча́ем страда́льца Христо́ва,/ преподо́бнаго отца́ на́шего Паи́сия,/ той бо к неви́димым мучи́телем му́жественно во́инствова,/ и вме́сто кро́ве мно́ги по́ты излия́,/ и, я́ко ре́ки, сле́зы испусти́,/ и бы́сть, я́ко дре́во насажде́но при исходя́щих вод,/ принося́ Христо́ви стори́чный плод,/ и ны́не, предстоя́ Престо́лу Христо́ву,/ мо́лится о нас непреста́нно,/ дарова́ти душа́м на́шим ве́лию ми́лость.

И ны́не, Богоро́дичен.

Славосло́вие вели́кое.

На Литурги́и слу́жба вся преподо́бному