Стихи́ры, глас 4.

Подо́бен: Я́ко до́бля:

Ца́рство недви́жимое, ца́рствовав, прия́л еси́,/ Васили́ске сла́вне,/ и предстои́ши Царю́ сил,/ со все́ми ра́дуяся А́нгельскими во́инствы./ С ни́миже пое́ши, блаже́нне,/ непреста́нно Боже́ственную пе́снь,/ блиста́нии и причаще́нии Боже́ственными све́тло озаря́емь.

Твои но́зе связа́вше,/ гвоздьми́ пригвозди́ша,/ егда́ ше́ствовал еси́ стезе́ю, ра́дуяся, муче́ния, прехва́льне,/ си́ми же попра́л еси́ главу́ вра́жию,/ и до конца́ сокруши́л еси́,/ и ше́ствовал еси́ кре́пко ше́ствия Небе́сная,/ Влады́це победоно́сец я́влься, сла́вне.

Моли́тва твоя́ израсти́ дре́во,/ непрозя́бшее пе́рвее,/ и исто́чник источи́ жи́вы во́ды;/ тече́нием же твоея́ кро́ве земля́ освяти́ся,/ возду́х же душе́вным возше́ствием, пребога́те./ Те́мже ве́рою твой святы́й соверша́ем,/ Васили́ске, всепра́зднственный де́нь,/ во́ньже зако́нно подвиза́лся еси́.

А́ще у́бо прилучи́тся в пост, ищи́ стихи́ры Богоро́дицы сего́ ме́сяца в 20-й де́нь.

НА У́ТРЕНИ

Кано́н, его́же краегране́сие: Превели́каго Васили́ска хвалю́.Ио́сиф. Глас 8.

Пе́снь 1

Ирмо́с: Пе́снь возсле́м, лю́дие, чу́дному Бо́гу на́шему,/ свободи́вшему Изра́иля от рабо́ты,/ пе́снь побе́дную пою́ще и вопию́ще:/ пои́м Тебе́, еди́ному Влады́це.

Сей све́тлый твой пра́здник благоче́стно хва́лящия,/ му́чениче многострада́льне, Царя́ Христа́ моли́ спасти́/ и Небе́снаго Ца́рствия прича́стники бы́ти.

Ве́сь любо́вию Христо́вою укре́плься, пребога́те,/ пло́ть преоби́дел еси́, я́ко растле́тися хотя́щу,/ и претерпе́л еси́ му́ки, нра́вом му́жественным обличи́в и́дольскую пре́лесть.

Но́щь неразу́мия, просвеще́нием Пресвята́го Ду́ха осия́емь, преше́л еси́, Васили́ске,/ и страда́ний све́тлостию яви́лся еси́, я́ко со́лнце,/ всю тва́рь све́тло озаря́я.

Богоро́дичен: Руно́ предзря́ше Гедео́н, пречи́стую утро́бу Твою́,/ Ро́су Небе́сную, Де́во, прие́мшую,/ мо́ре изсуша́ющую, Отрокови́це, безбо́жия/ и иста́явшия напои́вшую ра́зумы.

Пе́снь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Кро́вию страда́ния и́дольское разгоре́ние погаси́л еси́/ и пи́щи, му́чениче, пото́ка наслажда́ешися, ра́дуяся.

Му́ченика Тро́ицы тя избра́нна,/ дво́ица, сла́вне, страда́лец оста́вльши,/ ко Христу́ оты́де.

Пожида́еши стра́ждущия с тобо́ю, изреши́вся телесе́,/ Христа́ Го́спода испове́дуя, всех Царя́,/ Васили́ске многострада́льне.

Богоро́дичен: Да обря́щу Тя, Пречи́стая, руководя́щу мя всегда́ к доброде́телем/ и к покая́ния пути́ вводя́щу.

Седа́лен, глас 1

Подо́бен: Гроб Твой:

Еди́ному Царю́ ны́не предстои́ши, ра́дуяся, диади́мою све́тлою/ и оде́ждею, от твои́х обагре́ною крове́й,/ свяще́нно обложе́н и обоже́н чи́стым прича́стием,/ те́мже, дне́сь всесвяту́ю па́мять твою́ соверша́юще, пое́м тя.

Сла́ва, и ны́не, пра́здника или́ Богоро́дичен:

Упова́ние христиа́н, Пресвята́я Де́во,/ Его́же родила́ еси́, Бо́га, па́че ума́ же и сло́ва,/ непреста́нно моли́ с Вы́шними си́лами/ пода́ти оставле́ние грехо́в на́ших всех и исправле́ние жития́/ ве́рою и любо́вию при́сно Тя сла́вящим.

Крестобогоро́дичен:

Нескве́рная А́гница, А́гнца и Па́стыря, пове́шена на Дре́ве, ме́ртва зря́щи,/ пла́чущи, веща́ше, ма́терски восклица́ющи:/ ка́ко претерплю́ Твое́, е́же па́че сло́ва, Сы́не Мой, сни́тие/ и во́льныя стра́сти, Бо́же Преблаги́й?

Пе́снь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Зе́млю де́лав ра́лом, му́чениче, души́ твоея́,/ стори́ческий клас прине́сл еси́ страда́ния,/ в жи́тницах Боже́ственных соблюда́емь.

Свяще́нен услы́шал еси́ свы́ше, преблаже́нне, глас,/ кончи́ну тебе́ известву́ющ страда́ния/ и лико́м му́ченик сочта́вший тя.

Тве́рдо показу́я, сла́вне, сопротивле́ние,/ претерпе́л еси́, вери́гами свя́зан,/ и пре́лести реша́ вся́ку сою́зу.

Сатану́ удави́л еси́ Боже́ственными, страстоте́рпче, жи́лами боле́зней твои́х,/ те́мже побе́ды украси́лся еси́, Васили́ске му́чениче, венце́м.

Богоро́дичен: Отцу́ Единосу́щный яви́ся по всему́ челове́ком подо́бен,/ вопло́щся, я́коже изво́ли, от Твои́х крове́й, Всенепоро́чная.

Пе́снь 5

Ирмо́с: У́тренююще вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Зако́нно пострада́ти ведо́м,/ беззако́ннующих си́лою Ду́ха, му́чениче Богому́дре, посрами́л еси́.

Ше́ствовав де́рзностне стезю́ муче́ния,/ жа́ла сокруши́л еси́ борца́, сла́вне.

Вонзе́ния твои́х гвозде́й, Богому́дре, водруже́ная,/ врага́ борца́ главу́ до конца́ сокруши́ша.

Богоро́дичен: В подо́бии пло́ти родила́ еси́, Богоро́дице,/ Недомы́слимаго и Непостижи́маго Бо́га.

Пе́снь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

На дре́во возне́сшагося пропове́дуя, на су́се свя́зан был еси́ дре́ве,/ и сие́ твои́х моли́тв одожде́ньми показу́еши сы́ро/ и ли́ствием соверше́нным укра́шено,/ на утвержде́ние благочести́вых, Васили́ске, и сла́ву боле́зней твои́х.

Разреше́на тя плотски́х пристра́стий, беззако́ннии непра́ведно связу́ют,/ и желе́зными пригвожда́ют гвоздьми́, и до́лгим путе́м во́дят,/ кро́вию всю зе́млю освяща́юща, му́чениче многострада́льне.

Стоя́ свя́зан рука́ма, впери́л еси́ серде́чное о́ко к Бо́гу/ и исто́чник потещи́ во́ды живы́я Того́ умоли́л еси́,/ в па́мять твою́ всесла́вную и душа́м исцеле́ние, блаже́нне.

Богоро́дичен: Сокруше́ния окая́нныя души́ моея́ и ле́тныя исцели́ стра́сти,/ врача́ бо душ и теле́с несказа́нно, Де́во, ро́ждши,/ и спаси́ мя, на Тя наде́жду мою́, Всенепоро́чная, возложшаго.

Конда́к, глас 8.

Подо́бен: Взбра́нной:

Во страда́нии кре́пок и му́жествен яви́лся еси́ и в чудесе́х преди́вен,/ явле́нно Христо́во и́мя преднося́, мучи́теля посрами́л еси́./ Тем тя почита́ем, Васили́ске, при́сно зову́ще, всече́стне:/ ра́дуйся, му́чеников све́тлая добро́то.

Пе́снь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:/ благослове́н еси́, Го́споди Бо́же, во ве́ки.

Украше́ние му́чеников показа́лся еси́,/ в прекра́сных жили́щах, преблаже́нне, живы́й,/ и от нас, любо́вию тя чту́щих,/ мирску́ю бу́рю отжени́ твои́ми моли́твами.

Дом Тро́ицы показа́лся еси́,/ истука́нныя же и хра́мы и́дольския низлага́я, му́дре, и поя́ Влады́це:/ благослове́н еси́, Го́споди Бо́же, во ве́ки.

Подава́ет тебе́ по́честь Влады́ка, пострада́вшу кре́пко,/ и низло́жшу хи́трости вра́жия, и пою́щу согла́сно:/ благослове́н еси́, Го́споди Бо́же, во ве́ки.

Друга́я тве́рдь показа́лся еси́, я́ко со́лнце, страда́ния стяжа́в,/ и я́ко зве́зды, твои́х чуде́с, Васили́ске,/ свяще́нную све́тлость и по́лность во ве́ки.

Богоро́дичен: Се, Ю́же рече́, Де́ву, Боже́ственным Ду́хом вели́кий Иса́ия,/ во утро́бе Бо́га зача́т и ро́ди./ Ему́же пое́м:/ Го́споди Бо́же, благослове́н еси́.

Пе́снь 8

Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведей Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

Победи́тель мучи́телей и духо́в, сла́вне, лука́вствия показа́лся еси́,/ поя́ тя укре́пльшаго непреста́нно:/ благослови́те, вся дела́, Го́спода и превозноси́те Его́ во ве́ки.

Умертви́лся еси́ ми́ру, ме́ртвым вдыха́ющему Влады́це,/ Васили́ске сла́вне му́чениче, неукло́нно после́дуя, пое́ши:/ благослови́те, вся дела́, Го́спода и превозноси́те Его́ во ве́ки.

Те́лом му́ки терпя́, тве́рдостию души́, Богому́дре,/ со безпло́тными Боже́ственными лику́еши А́нгелы, хвалу́ Бо́гу принося́ и вопия́:/ по́йте, вся дела́, Го́спода и превозноси́те Его́ во ве́ки.

Богоро́дичен: Яви́лася еси́ ши́рши Небе́с, вмести́вши Бо́га в ложесна́х,/ тесноты́ лука́ваго избавля́ющаго вся пою́щия, Пресвята́я Отрокови́це:/ благослови́те, вся дела́, Го́спода и превозноси́те Его́ во ве́ки.

Пе́снь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к,/ Те́мже Пречи́стую Богоро́дицу, ве́рнии, велича́ем.

Ве́трилом, блаже́нне, кре́стным муче́ния, преше́д бу́рю,/ ти́хое Ца́рствия приста́нище дости́гл еси́/ и, я́коже купе́ц добр, бре́мя спасл еси́ благоче́стия/ Христу́, всех Царю́ и Бо́гу на́шему.

Я́коже дре́вле о́гнь с небесе́ Фесви́тянин Илия́ сведе́,/ си́це, блаже́нне, твое́ю моли́твою пла́мень свел еси́,/ и́мже попали́ся храм и́дольский, и ка́пища де́монская пожго́шася,/ и Бог Творе́ц велича́ется.

Телесе́ разреша́ешися, му́дре, ме́чным усече́нием,/ прие́мшим твой му́дрым си́лам Боже́ственный дух,/ побе́ждщий благода́тию лука́вствия лю́тыя, пребога́те, ду́хи,/ и ны́не в Вы́шних живе́ши, венцено́сец, Васили́ске, Ца́рствия.

Земля́ у́бо, му́чениче, погребе́нием, не́бо же душе́ю освяти́ся твое́ю, Богодухнове́нне:/ я́коже бо багряни́цею све́тлою от кро́ве твоея́ оде́ян,/ Христу́ Бо́гу на́шему сца́рствуеши всегда́,/ помина́я ве́рно помина́ющих тя.

Богоро́дичен: Естество́м у́бо Бог сый, но претерпе́л еси́ оде́ятися в челове́ка,/ в ложесна́ Непоро́чныя во́лею все́лься, Человеколю́бче./ Те́мже сугубоесте́ственна ве́дяще хоте́ния Твоя́, Тя велича́ем,/ Ма́терь Твою́ ве́рно ублажа́юще.

НА МА́ЛОЙ ВЕЧЕ́РНИ

На Го́споди, воззва́х:стихи́ры, глас 1,

Подо́бен: Всехва́льнии му́ченицы:

Облиста́ дне́сь нам богоза́рное торжество́/ чу́днаго в му́ченицех и до́бляго страда́льца,/ знаменоно́снаго Иоа́нна кня́зя,/ его́же чудоде́йствия воспои́м,/ от ра́ки его́ здра́вие почерпа́юще/ и вся́ких неду́г и бед избавле́ние.

Звезда́ всесве́тлая показа́лся еси́, присносия́ющая,/ и чудоде́йствитель преди́вный всем облиста́л еси́,/ благочести́вых свяще́нное собра́ние/ уясня́я и соблюда́я, Влади́мире, моли́твами, блаже́нне,/ сего́ ра́ди тя почита́ем,/ хва́ляще све́тлыя по́двиги твоя́.

Я́ко А́нгел яви́лся еси́ в пло́ти,/ возде́ржник преподо́бен,/ Крести́теля я́ко тезоиме́нный,/ те́мже сподо́бился еси́ в ви́де орла́ ви́дети Боже́ственнаго А́нгела:/ показу́юща ти Крест, благода́ти тезоиме́нне,/ Его́же ра́ди пострада́л еси́,/ от беззако́нных во главу́ усе́чен,/ за ре́вность ве́ры Правосла́вныя.

Сла́ва, глас 5:

Стеце́мся, бра́тие,/ и с любо́вию прии́дем во всечестны́й храм,/ знаменоно́снаго кня́зя и великому́ченика, му́драго Влади́мира,/ и чу́дную мирополо́жницу его́ телесе́ почита́юще,/ ве́село торжеству́юще,/ и похва́льными сего́ пе́сньми воспои́м:/ ра́дуйся, князе́м сла́во и му́чеником удобре́ние,/ славя́ном похвало́, Илли́рику и Ми́ссии предста́телю,/ храни́телю Алба́нии,/ засту́пниче и чудотво́рче Иоа́нне всесла́вне,/ и́же по Христе́ во главу́ усе́чен был еси́, от свои́х сый,/ и сию́ у́бо чу́дне свои́ма рука́ма/ прине́сл еси́ Царю́ веко́в, же́ртву непоро́чну,/ я́ко всепло́дие свяще́нное и дар многоце́нен;/ те́мже, всеблаже́нне, мироточи́ве и всечу́дне,/ я́ко дерзнове́ние име́я, моли́ о нас,/ и́же любо́вию соверша́ющих свяще́нную и всепра́зднственную па́мять твою́.

И ны́не, пра́здника.

На стихо́вне стихи́ры, глас 2.

Подо́бен: До́ме Евфра́фов:

Нося́ в рука́х/ главу́ твою́, всеблаже́нне,/ отсе́чену от беззако́нных,/ му́ченичества вене́ц/ прия́л еси́, о Влади́мире.

Стих: Пра́ведник, я́ко фи́никс процвете́т,/ я́ко кедр, и́же в Лива́не, умно́жится.

Ору́жием креста́/ злосе́рдных ополче́ния/ расточи́л еси́ до́блественне/ и победи́тель показа́лся еси́,/ пострада́в, приснопа́мятне.

Стих: Возвесели́тся пра́ведник о Го́споде,/ и упова́ет на Него́.

Ра́ка честна́го/ и мироточи́ваго дре́вле/ се благоуха́ет,/ ле́тнюю благода́ть/ приходя́щим подава́ет.

Сла́ва, глас и подо́бен то́йже:

Тро́ицу Честну́ю/ и Богонача́льную/ вси, Отца́ же и Сы́на/ и Ду́ха Всесвята́го,/ правосла́вно восхва́лим.

И ны́не, Богоро́дичен

Свы́ше ли́ки а́нгельстии,/ Богоро́дице Де́во,/ пою́т с до́льними/ и со страстоте́рпцем/ Рождество́ Твое́, Пречи́стая.

Тропа́рь пи́сан на вели́цей вече́рни.

Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

На Го́споди, воззва́х:стихи́ры, глас 4.

Подо́бен: Я́ко до́бля:

Я́ко дре́во всеплодное,/ разу́мно возра́сл еси́/ во вертогра́де страда́ний, всече́стне,/ испуща́я Боже́ственная дарова́ния/ и исто́чники исцеле́ния от всечестны́я ра́ки твоея́,/ из нея́же вси почерпа́ют здра́вие телесе́м,/ страда́льцев красото́, Иоа́нне,/ сего́ ра́ди тя почита́ем,/ я́ко моли́твенника душа́м на́шим.

Возлюби́вшаго тя Го́спода/ па́че естества́ возлюби́л еси́,/ и пло́ти возненави́дел еси́ сладостра́стие,/ и Христу́ после́довал еси́,/ Крест на ра́мо взем, му́чениче,/ ра́дуяся, и к ну́ждной сме́рти шел еси́;/ сего́ ра́ди, всеблаже́нне,/ восхваля́ем в псалме́х и пе́снех/ светоно́сное твое́ страда́ние.

Я́ко до́бре во́инствовал еси́ Царю́ си́лам,/ себе́ сама́го пре́дал еси́, Влади́мире,/ под меч во́лею, вы́ю подложи́в,/ совокупля́яся му́ченическим лико́м, всеблаже́нне,/ и сподо́бился еси́ вене́ц побе́ды прия́ти,/ с ни́миже ны́не моли́ся о нас, чудотво́рче.

От славя́н возра́сл еси́, Иоа́нне блаже́нне,/ я́ко ши́пок благоуха́нен и мироды́шущ,/ Бо́гу угоди́л еси́ посто́м же, и моле́ньми, и бде́нным стоя́нием,/ моли́твы возсыла́я Го́сподеви от чи́ста се́рдца;/ сего́ ра́ди похваля́ем до́блести твоя́.

Щито́м благоче́стия защити́ тя Госпо́дь,/ си́льна соде́ла тя,/ ко противле́нию злоко́зненным изше́дша, Иоа́нне сла́вне,/ и мече́м терпе́ния твоего́ погуби́л еси́, Влади́мире, сих ко́зни,/ и венце́м побе́ды увя́злся еси́,/ знаменоно́сне всечу́дне.

Ца́рствия украси́л еси́ оде́жду вои́стинну/ крове́й му́ченических, сла́вне,/ и, уясни́в о́ную, ересе́й мглу разгна́л еси́/ и лю́ди просвети́л еси́,/ изъясня́я догма́ты Боже́ственныя благода́ти,/ правосла́вно в Тро́ицу ве́ровати,/ Еди́но Естество́, неразде́льно Треми́ Ли́цы су́щую.

Сла́ва, глас то́йже:

Возсия́л еси́, сла́вне,/ я́ко звезда́ у́тренняя, в земли́ за́падней,/ Иоа́нне блаже́нне,/ добро́ бо и пра́ведно владе́вый,/ и, Крест Го́спода твоего́ на ра́мо взем,/ Христу́ после́довал еси́, я́ко друг при́сный;/ те́мже мо́лимся ти, свя́те:/ моли́ о душа́х на́ших.

И ны́не, Богоро́дичен: И́же Тебе́ ра́ди:

Вход. Проки́мен дне и чте́ния му́ченическая (зри 15 мая)

На лити́и стихи́ры, глас 1:

Учени́к и после́дователь быв/ Единосу́щныя Тро́ицы пропове́дателем и испове́дником/ и с ни́ми по благоче́стии гони́м,/ ме́чную сме́рть, Иоа́нне блаже́нне, подъя́л еси́,/ ерети́ческая языкобо́лия победи́л еси́,/ я́ко и му́ченическим венце́м украси́лся еси́ от Христа́ Бо́га,/ и дерзнове́ние и́маши моли́ти,/ изба́вится от бед соверша́ющим па́мять твою́.

Глас 2: Прииди́те, ве́рнии,/ почти́м страстоте́рпца Христо́ва Иоа́нна сла́внаго,/ я́ко до́бляго во́ина, до́бре подвиза́вшагося по благоче́стии,/ царе́м и мучи́телем кре́пость низложи́вшаго,/ те́мже дерзнове́ние име́я к Бо́гу,/ непреста́нно мо́лит спасти́ся душа́м на́шим.

Благода́ти тезоиме́нному зва́нию твоему́,/ дея́нию подо́бно я́ко вои́стинну,/ показа́л еси́ де́вственную чистоту́./ Усво́ился еси́ Христу́ благоволе́нием Отца́/ и соде́йствием Свята́го Ду́ха;/ муче́ния же боре́ньми/ со́лнечных луч светле́йше облиста́л еси́./ Те́мже, я́ко же́ртва чиста́ и непоро́чна на Небе́сней трапе́зе,/ прине́слся еси́ со де́вственными и му́ченики,/ во век свеселя́ся,/ с ни́ми проси́, Иоа́нне всехва́льне, Христа́/ дарова́ти нам мир и ве́лию ми́лость.

Благочести́ваго Иоа́нна па́мять и мирото́чца дне́сь яви́ся:/ Христа́ бо возлюби́в, и и́долов пре́лесть уничто́жив,/ и храм воздви́же на земли́/ Распе́ншемуся нас ра́ди,/ на Небеси́ восприя́л еси́ наде́жды вене́ц.

Сла́ва, глас 6:

Прииди́те, вси ве́рнии, соше́дшеся дне́сь,/ восхва́лим Иоа́нна чудоно́снаго:/ сей бо, земно́е ца́рство оста́вив,/ и настоя́щая ни во что́же вмени́в,/ ору́жием Креста́ обо́лкся,/ Христу́ после́довав,/ и неконча́емое Ца́рство Небе́сное прия́ти сподо́бися,/ я́ко ве́рный раб Бо́га Вседержи́теля./ Те́мже мо́лим тя, свя́те:/ предвари́ и изми́ нас от вся́кия ну́жды, и напа́стей,/ и бу́дущаго Суда́ преще́ния/ моли́твами твои́ми ко Го́споду.

И ны́не, Богоро́дичен или́ пра́здника.

На стихо́вне стихи́ры, глас 6.

Подо́бен: Все отло́жше:

Наро́ды дивля́хуся, чу́до ужа́сное зря́ще:/ ме́ртва тя седя́ща, сла́вне Влади́мире, на ме́сте,/ в рука́х нося́ща отсече́нную главу́ твою́ честну́ю,/ ю́же прине́сл еси́ во храм Госпо́день,/ моля́ся, ду́шу твою́ блаже́нную пре́дал еси́ Всецарю́,/ ю́же прие́мь, совокупи́ а́нгельским лико́м и святы́м всем:/ наслажда́тися при́сно све́та незаходи́маго Трисо́лнечнаго Сия́ния.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Друго́е яви́лся еси́ со́лнце во князе́х,/ кня́же и страда́льче Влади́мире,/ на тве́рди ве́ры Боже́ственный,/ подая́ свет благода́ти приходя́щим вседу́шно в покро́в твой,/ тя бо в чудесе́х жи́ва и уме́рша просла́ви/ и исцели́теля показа́ призыва́ющим и́мя твое́/ всех Слы́шатель и Пода́тель,/ кому́ждо проше́ние, Боже́ственными моли́твами твои́ми подава́я.

Стих: Возвесели́тся пра́ведник о Го́споде/ и упова́ет на Него́.

Прииди́те, поклони́мся, лю́дие, в дому́ Госпо́днем,/ иде́же честно́е те́ло положи́ся преблаже́ннаго;/ со све́тлыми свеща́ми, в пе́снех да воспои́м, моля́щеся:/ свя́те, предвари́, и су́щия в ну́ждах заступи́,/ и волне́ние утиши́ и бу́рю скорбе́й,/ да святу́ю и честну́ю твою́ ра́ку почита́ем,/ о Иоа́нне блаже́нне, моли́твенниче о душа́х на́ших.

Сла́ва, глас то́йже:

Непобеди́м душе́ю страда́лец,/ кия́же благочести́вый,/ славя́ном сла́во и всему́ Илли́рику и Ми́ссии удобре́ние,/ Алба́нии щит и забра́ло,/ твои́ми чудесы́ укроща́еши неи́стовство сих свире́пейших ва́рвар:/ а́ще не бы ты защища́л,/ кто бы постоя́л толи́кому свире́пству,/ грех ра́ди на́ших наноси́мому?/ Те́мже, я́ко предста́тель тепле́йший,/ предвари́ моли́твами твои́ми, блаже́нне Иоа́нне,/ и изми́ нас от настоя́щих бед,/ я́ко име́я дерзнове́ние ко Христу́ Бо́гу,/ тя просла́вльшему.

И ны́не, Богоро́дичен или́ пра́здника.

Тропа́рь, глас 4:

Крест, я́вльшийся тебе́ с Небесе́, све́тел пропове́дал еси́,/ просвети́в язы́ки я́сно, Влади́мире сла́вне,/ обагре́ньми крове́й твои́х украси́вся,/ сподо́бился еси́ по́честей нетле́нных,/ предстоя́й Тро́ице,/ тем со дерзнове́нием/ моли́ спасти́ся нам.

Ин тропа́рь, глас то́йже:

Крест, я́вльшийся тебе́ с Небе́с в блиста́нии, всем пропове́дал еси́,/ просвети́в язы́ки ве́рно, Влади́мире сла́вне./ Искупле́нием же, кровьми́ твои́ми возблиста́в,/ сподо́бился еси́ мзды неле́стныя, предстоя́ Тро́ице./ Те́мже дерзнове́нно моли́ Христа́ спасти́ся нам.

НА У́ТРЕНИ

По 1-м стихосло́вии седа́лен, глас 1.

Подо́бен: Гроб Твой, Спа́се:

От ро́да се́рбскаго, чу́дне, изра́стл еси́,/ Ду́ха Свята́го яви́ся сосу́де чисте́йший,/ му́чеников похвало́, венцено́сче святы́й,/ испроси́ у Влады́ки твоего́/ просвети́ти ду́ши пою́щих тя, всеблаже́нне Иоа́нне.

Сла́ва, то́йже. И ны́не, пра́здника

По 2-м стихосло́вии седа́лен, глас 8.

Подо́бен: Прему́дрости сло́во:

Крест Го́спода твоего́ я́коже возлюби́л еси́ вта́йне,/ му́ченическим венце́м украси́вся, царю́ приснопа́мятне, Небе́снаго Царя́ уго́дниче,/ к Нему́же дерзнове́ние стяжа́в,/ моли́ непреста́нно, Иоа́нне всече́стне, Христа́ Бо́га прегреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, то́йже. И ны́не, пра́здника.

По полиеле́и седа́лен, глас 8.

Подо́бен: Прему́дрости сло́во:

Земна́я вся оста́вив, Ца́рство возлюби́л еси́ Небе́сное,/ Христу́ после́довал еси́, му́чеников соприча́стне,/ плотски́я бо стра́сти умертви́л еси́/ и, крест на ра́мо взем, страда́льче блаже́нне,/ неду́ги врачу́еши неизце́льныя боля́щим Креста́ си́лою и благода́тию./ Те́мже моли́ Христа́ Бо́га, Иоа́нне всече́стне,/ согреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Стена́ непобеди́мая нам, христиа́ном, еси́, Богоро́дице Де́во,/ к Тебе́ бо прибега́юще, невреди́ми пребыва́ем/ и, па́ки согреша́юще, и́мамы Тя Моли́твенницу./ Тем, благодаря́ще, вопие́м Ти:/ ра́дуйся, Благода́тная, Госпо́дь с Тобо́ю.

Степе́нна, 1-й антифо́н 4-го гла́са. Проки́мен, глас 4: Пра́ведник, я́ко фи́никс, процвете́т,/ я́ко кедр, и́же в Лаване, умно́жится.Стих: Насажде́ни в до́му Госпо́дни, во дво́рех Бо́га на́шего процвету́т. Ева́нгелие от Луки́, зача́ло 63.

По 50-м псалме́ стихи́ра, глас 2:

Блаже́нне Иоа́нне,/ му́чеником сла́во и царе́м похвало́,/ подража́тель Крести́телю быв, сла́вне,/ за́вистию главу́ твою́ отсеко́ша/ безсту́днии сро́дницы супру́жницы твоея́,/ и, сию́ прие́м свои́ма рука́ма,/ вшел еси́ в ме́сто,/ иде́же сокро́вище вта́йне обре́л еси́ Небе́снаго Ца́рствия,/ и ны́не моли́ о любо́вию чту́щих тя.

Кано́н пра́здника или́ Богоро́дичен: Мно́гими содержи́м напа́стьми:И кано́н свята́го, глас 4, его́же краестро́чие: Пра́веднаго пою́ Иоа́нна влады́ку.

Пе́снь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть.

Боже́ственнаго страда́льца дне́сь пе́сньми почти́м,/ Иоа́нна, соше́дшеся вку́пе,/ Христо́ви порабо́тав чи́сте,/ я́ко друг при́сный.

И́же вся доброде́тели твоя́ прови́дяй Бог,/ вта́йне твори́мая тобо́ю, Богому́дре страда́льче,/ лико́м пра́ведных сочета́я тя, сла́вне.

Черто́га земна́го, блаже́нне, ошаява́яся,/ му́ченическую претерпе́л еси́ я́зву, свя́те Влади́мире,/ те́мже, раби́ твои́, хва́лим тя, всеизря́дне.

Богоро́дичен: Моле́ния и моли́твы, Пречи́стая, ны́не Тебе́ прино́сим,/ да́ждь нам свы́ше, Блага́я, ми́лости Твоя́,/ ра́бски мо́лим Тя, Богоблаже́нная.

Ин кано́н, глас 6.

Пе́снь 1

Ирмо́с: Я́ко по су́ху пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь пои́м, вопия́ше.

Кто изрече́т чудеса́ даро́в, я́же Христо́с подаде́ тебе́,/ страда́льче Христо́в Иоа́нне сла́вне?/ Те́мже облиста́еши, я́ко свети́льник досточу́дный.

Всю твою́ име́я наде́жду к Бо́гу и мы́сль, блаже́нне,/ о вре́менных и тле́нных отню́д небре́гл еси́,/ сего́ ра́ди и вене́ц от руки́ Госпо́дни прия́л еси́.

Ны́не в Вы́шния до́мы твою́ ду́шу Христо́с прия́т,/ мужему́дренне страда́льче,/ в Небе́сная сокро́вища положи́ на ве́чное пребыва́ние.

Богоро́дичен: Неве́сто Бо́жия Пресвята́я, христиа́н стено́ необори́мая,/ воспева́ющия Тя при́сно/ от всех зол изба́ви и прегреше́ний лю́тых, Богороди́тельнице Чи́стая.

Катава́сия по уста́ву.

Пе́снь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Исцели́ ве́рно ко хра́му твоему́ тща́щихся/ бед, и скорбе́й, и вся́ких неду́г, му́дре.

До́бре и богоче́стне ты ца́рствовал еси́ на земли́,/ испо́лнь Боже́ственнаго Све́та,/ иде́же ны́не наслажда́ешися, веселя́ся.

Святы́м на Небесе́х соводворя́яся,/ Христо́ви моли́ся да́ти нам оставле́ние грехо́в/ и искуше́ний избавле́ние.

Богоро́дичен: Ви́девше лю́дие чуде́с Твои́х бога́тыя да́ры,/ Ма́ти Бо́жия Богоневе́сто,/ те́мже Тя сла́вим.

Ин

Ирмо́с: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

На недви́жимем ка́мени Христо́вых за́поведей утверди́ся,/ ника́коже поколеба́ся умо́м,/ те́мже му́ченическим лико́м счи́слился еси́, досточу́дне.

Все жела́ние Христо́во име́я в се́рдце твое́м,/ я́же от ме́ста на ме́сто гони́м,/ о страда́льче Иоа́нне, претерпе́л еси́ тве́рдо,/ те́мже и просла́вился еси́.

Ны́не весели́тся ве́рно град Дира́хиа,/ иде́же лежи́т те́ло твое́ свяще́нное, блаже́нне,/ неду́ги всем исцеля́ет, ту су́щим.

Богоро́дичен: Ты еси́ мост, Чи́стая Богоро́дице Де́во,/ к стези́ Небе́сней наставля́ющая ве́рныя,/ при́сно Рождество́ Твое́ хва́лящия, Пречи́стая.

Седа́лен, глас 1

Подо́бен: Гроб Твой, Спа́се:

Облиста́ нам па́мять пра́веднаго,/ я́ко со́лнце на земли́, лучи́ простира́я конце́м,/ и вся правосла́вныя воздви́же во умиле́нии зва́ти ему́:/ царю́, царе́й сла́во, ве́рно тя ублажа́ем.

Сла́ва, и ны́не, Богоро́дичен:

Всех Творца́, Сы́на Твоего́ и Зижди́теля, Пренепоро́чная Чи́стая,/ Боже́ственная Ду́хом во чре́ве зачала́ еси́ и без нетле́ния родила́ еси́./ Его́же сла́вяще, Тя хва́лим, Де́во,/ я́ко пала́та Царя́ сла́вы и ми́рови прибе́жище.

Пе́снь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Вся твоя́ прови́дяй Бог, всеблаже́нне,/ я́же вта́йне моли́лся еси́, Иоа́нне Богому́дре:/ Христо́с тя просла́ви/ и со все́ми святы́ми счисля́я тя, я́ко Человеколю́бец.

Ны́не тя сла́вим, Богому́дре Иоа́нне сла́вне:/ Христо́ви бо порабо́тав, род, вели́чество и сла́ву вре́менную,/ му́чениче, нивочто́же вмени́л еси́.

Пе́сньми вси согла́сно тя хва́лим,/ я́ко приста́нища Небе́сная дости́гша,/ ве́трилы воскриля́емь Креста́ благода́тию,/ му́чениче, ра́дости тезоиме́нне.

Богоро́дичен: Ма́ти Пречи́стая, Де́во Богороди́тельнице,/ Тя хва́лим, вси ро́ди челове́честии,/ Тобо́ю спаса́емии, и Тя мо́лим:/ изба́ви нас от бед моли́твами Твои́ми.

Ин

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста, о Го́споде пра́зднующи.

Благоуха́ет, прему́дре, ра́ка твоя́ Боже́ственная,/ иде́же лежи́т свяще́нное те́ло твое́, блаже́нне,/ да́ры исцеле́ний источа́ет почита́ющим тя.

Храм твой утверди́л еси́, всесла́вне страстоте́рпче,/ иде́же ны́не источа́ет исцеле́ния/ всесвята́я ра́ка твоя́, Иоа́нне всече́стне.

Богоро́дичен: Жи́знь прозябла́ еси́, Зижди́теля всех, Пренепоро́чная,/ содержа́щаго вся руко́ю Свое́ю/ и му́дростию и ра́зумом небеса́ утверди́вшаго.

Пе́снь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Побе́ду тебе́ Христо́с свы́ше подаде́ и кре́пость на сопроти́вныя,/ Богому́дре Иоа́нне всеблаже́нне.

О блаже́нне, страда́льцев единонра́вне,/ сла́во пра́ведник,/ и нам, хва́лящим тя, предста́тель непребори́мый.

Ви́девше ве́рнии чуде́с дарова́ния, Влади́мире че́стне,/ от свяще́ннаго ковче́га твоего́ точа́щаяся исцеле́ния.

Богоро́дичен: О Влады́чице Богома́ти Чи́стая,/ при́зри на нас ны́не, недосто́йныя,/ ве́рою и любо́вию воспева́ющия Тя.

Ин

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Жела́нием Боже́ственным объя́т к ве́чнующим воздая́нием,/ му́ки претерпе́л еси́/ и от ме́ста на ме́сто прогоня́емь, в посте́ и бде́нии претерпева́я.

Си́лою Боже́ственною возмога́я,/ вся вра́жия кова́рства нивочто́же во уме́ вмени́л еси́, блаже́нне Иоа́нне.

Крест Христо́в в руки́ твоя́ взем,/ взя́лся еси́ к Боже́ственным селе́нием.

Соверша́ющим святу́ю и честну́ю па́мять твою́, страда́льче,/ помога́еши всегда́, вре́да душетле́ннаго сих избавля́я/ и к Бо́гу приводя́ хода́тайствы твои́ми.

Богоро́дичен: О нас, гре́шных, призыва́ющих Тя, Влады́чице, ми́ру Блага́я Помо́щнице,/ Сы́ну Твоему́ и Бо́гу моли́ся,/ да изба́вит нас от бед и обстоя́ний.

Пе́снь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Свы́ше Христо́с тебе́ вене́ц да́рует, о Иоа́нне всеблаже́нне,/ ра́ди в бде́ниих моли́тв твои́х,/ я́же вта́йне Бо́гу соверша́л еси́, благода́тне.

Побе́ду тебе́ всех Бог да́рует, Иоа́нне Богому́дре,/ и мы почерпа́ем исцеле́ния от святы́х твои́х моще́й.

Черто́га вре́меннаго избе́гл еси́, сла́вне,/ и греха́ сего́, и бесе́ды же́нския,/ жела́нием Креста́ в главу́ усече́ся.

Богоро́дичен: Еди́на сло́вом Сло́во породила́ еси́,/ И́же безслове́сия вся́каго челове́ка изба́вльшаго/ Го́рняго Своего́ Ца́рствия прича́стники показа́вшаго.

Ин

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Мече́м тща́шеся ца́рства земна́го лиши́ти тя, сла́вне,/ и в багряни́цу свы́ше обо́лкся.

Непребори́м быв искуше́нии вра́жиими,/ вжига́ем Ду́хом, прия́л еси́ ороше́ние от Него́,/ исто́чник чуде́с показа́лся еси́ ми́ру, всесла́вне.

Егда́ к по́двигу доше́л еси́, сла́вне,/ рука́ми прера́достно держа́ Крест, взыва́л еси́:/ Ты ми бу́ди Предста́тель и Побо́рник.

Богоро́дичен: Еди́на, поро́ждшая всех Творца́,/ всегда́ о всех моли́ся,/ любо́вию чту́щих ве́рно Рождество́ Твое́.

Конда́к, глас 8

Подо́бен: Взбра́нной:

Я́ко сокро́вище многоце́нное/ и исто́чник, точа́щ земны́м то́ки,/ неду́ги очища́ющия,/ нам подаде́ся те́ло твое́ свяще́нное,/ боле́знем разли́чным подаю́ще исцеле́ние/ и благода́ть Боже́ственную притека́ющим к нему́, да зове́м ти:/ ра́дуйся, кня́же Влади́мире.

И́кос:

Свы́ше подаде́ся тебе́ ца́рствия держа́ва, всечу́дне Иоа́нне, и Безпло́тных гла́сы,/ Или́рии ве́ру пропове́дал еси́ и вся просвети́л еси́./ Тем зове́м с любо́вию тебе́ такова́я:/ ра́дуйся, ве́рных князе́й сла́во;/ ра́дуйся, страда́льцев украше́ние;/ ра́дуйся, сете́й вра́жиих разруше́ние;/ ра́дуйся, догма́тов Христо́вы ве́ры утвержде́ние;/ ра́дуйся, возвыше́ние князе́й благочести́вых;/ ра́дуйся, глубине́ смире́ния вод Небе́сных;/ ра́дуйся, стяжа́вый ре́вность Предте́чеву;/ ра́дуйся, я́ко в рука́х твои́х жре́бий держи́ши;/ ра́дуйся, звездо́, светя́щая конце́м;/ ра́дуйся, исто́чниче Боже́стваннаго оставле́ния;/ ра́дуйся, и́мже пре́лесть угаси́ся;/ ра́дуйся, и́мже ве́ра утверди́ся;/ ра́дуйся, кня́же Влади́мире.

Пе́снь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми взыва́ху:/ благослове́н еси́ в хра́ме сла́вы Твоея́, Го́споди.

Ны́не в Вы́шнее Ца́рство всели́ тя Христо́с,/ благоче́стно послужи́вша Тому́, блаже́нне, и ве́рно зову́ща:/ благослове́н еси́, Бо́же оте́ц на́ших.

Облада́еши все́ю Илли́рическою земле́ю, сла́вне,/ владе́я в ней и взыва́я:/ благослове́н еси́, Бо́же оте́ц на́ших.

От Вы́шних тя Госпо́дь просла́ви, Влади́мире,/ и мы любо́вию пра́зднуем па́мять твою́, с тобо́ю взыва́юще:/ благослове́н еси́, Бо́же оте́ц на́ших.

Богоро́дичен: Воспева́ем Тя, Влады́чице,/ всех Зижди́теля на объя́тиях носи́ла еси́;/ благослове́нна Ты в жена́х, Пренепоро́чная Присноде́во.

Ин

Ирмо́с: Росода́тельну у́бо пе́щь/ со дела́ А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Алба́нии показа́лся еси́ звезда́ присносия́ющая,/ в не́йже лежи́т честно́е те́ло твое́, творя́щее чудеса́ пресла́вная, блаже́нне,/ на просвеще́ние благоче́стно блажа́щих тя.

Просвети́вся твои́ми страстьми́, блаже́нне, осия́я тве́рдь блиста́ющую,/ изводя́ благода́ть зову́щим ти согла́сно и Христа́ воспева́ющим:/ благослове́н Бог оте́ц на́ших.

Весе́лия и ра́дости испо́лненый,/ пра́зднственнуто па́мять твою́, Влади́мире, святу́ю соверша́юще, вопие́м Христу́:/ благослове́н еси́, Бо́же оте́ц на́ших.

Богоро́дичен: Его́же родила́ еси́, Де́во Пречи́стая, Го́спода,/ изба́вит от кля́твы ве́сь род челове́ческий/ моли́, Всенепоро́чная Влады́чице.

Пе́снь 8

Ирмо́с: Ру́це распросте́р, Дании́л/ льво́в зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Возжела́л еси́ Крест Христо́в, сла́вне,/ и благода́ть прия́л еси́ цели́ти притека́ющия ти те́плою ве́рою и вопию́щия:/ вся дела́, по́йте Го́спода.

Вся прови́дяй Бог дея́ния твоя́/ ны́не тебе́ дарова́ чуде́с пресла́вная, Ему́же пое́м:/ вся дела́, по́йте Го́спода.

Па́мять твою́, Богому́дре, вси ве́рнии, пе́сньми сла́вим,/ и свято́е успе́ние твое́ воспева́ем,/ и Рожде́нному от Де́вы вопие́м:/ вся дела́, по́йте Го́спода.

Нас, хва́лящих тя, Богому́дре,/ и притека́ющих ко хра́му твоему́, не пре́зри, но научи́ вопи́ти:/ Го́спода по́йте, дела́, и превозноси́те во ве́ки.

Богоро́дичен: Неве́сто Неневе́стная, Госпоже́ Пречи́стая, Ма́ти безму́жная,/ славосло́вим Тя, Всесвята́я, вопию́ще:/ вся дела́, по́йте Го́спода.

Ин

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Ны́не ра́дуется град Дира́хиа све́тло,/ тя предста́теля иму́щи и изба́вителя, всему́дре,/ но́вое бо со́лнце возсия́л еси́, озаря́я пою́щия тя.

Отягче́ни вельми́ от нестерпи́мых зол лю́дие твои́ ве́рнии, чту́щии тя,/ и́хже твои́ми к Бо́гу моли́твами избавля́еши при́сно,/ воспева́ющих Христа́ во ве́ки.

От вся́кия ну́жды изба́ви рабы́ твоя́,/ и́же па́мять твою́ творя́щия, му́чениче Христо́в,/ и ве́рно хва́лящия Христа́ во ве́ки.

Богоро́дичен: О Пресвята́я Де́во Богоро́дице!/ Тебе́ вси сла́вим, ро́ждшую Зижди́теля всех,/ е́же изба́вится нам от искуше́ний и бед.

Пе́снь 9

Ирмо́с: Ка́мень нерукосе́чный/ от несеко́мыя го́ры, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Приими́ моли́твы, всеблаже́нне, от пою́щих тя с любо́вию/ и да́ждь твою́ благода́ть рабо́м твои́м.

Царю́ Иоа́нне Богому́дре,/ нам, ве́рою приходя́щим ти,/ разреше́ние грехо́в испроси́ у Христа́ Бо́га.

Побе́ду тебе́ всех Влады́ка подае́т свы́ше, страстоте́рпче свя́те,/ ты же не преста́й о нас моля́ся.

Ви́дел еси́, я́ко други́й Константи́н, блаже́нне, Крест Госпо́день,/ его́же вожде́нием возше́л еси́ на ме́сто,/ иде́же ны́не притека́ющии прие́млют исцеле́ния.

Пострада́л еси́ зако́нно любо́вию всех Царя́,/ и возсия́л еси́ в ми́ре заря́ми исцеле́ний,/ и тьму́ пре́лести отгна́л еси́, Правосла́вием удобря́емь.

Богоро́дичен: Изба́ви нас от бед находя́щих/ и Го́рняго блаже́нства досто́йны покажи́, Богороди́тельнице,/ Тя велича́ющих.

Ин

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгелстни взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Приста́нище до́брое иму́щий Дира́хиев град, Иоа́нне блаже́нне,/ ны́не к Бо́гу предлага́ет тя хода́тая,/ моля́щася о нем и о всех нас.

Земля́ кро́вь твою́, страда́льче,/ я́коже А́велеву дре́вле, прие́мь, взыва́ше,/ уби́йце ища́ отмще́ния.

Беся́ся, окая́нный твой сро́дник/ главу́ твою́ честну́ю отсече́, злокова́рный,/ ты же, сию́ прие́мь, прите́кл еси́ на ме́сто упокое́ния,/ он же разсе́деся, я́ко Иу́да и льсте́ц.

Богоро́дичен: Му́дре челове́ка пре́жде созда́ Сын Твой, Де́во,/ и истле́вша, Тобо́ю обнови́, Всепе́тая,/ и Боже́ственнаго све́та испо́лни всех, Тя, Богоро́дицу, сла́вящих.

Свети́лен

Подо́бен: Жены́, услы́шите:

Христо́с возвели́чив тя в чудесе́х,/ я́коже Своего́ слугу́, Влади́мире-Иоа́нне,/ Сего́ моли́ да́ти грехо́в оставле́ние/ в пе́снех всечестну́ю па́мять твою́ соверша́ющим.

Сла́ва, и ны́не, Богоро́дичен:

Мари́е Чисте́йшая, злата́я кади́льнице,/ невмести́маго Божества́ прия́телище бы́вшее,/ в не́мже Оте́ц благоволи́, Сын же всели́ся,/ и Дух Святы́й, осени́в Тя, Отрокови́це, показа́ Богоро́дицу.

На хвали́тех стихи́ры, глас 8

Подо́бен: О, пресла́внаго чудесе́:

Прииди́те, собери́теся вси/ во святе́м хра́ме треблаже́ннаго Иоа́нна,/ и просла́вим Го́спода,/ пода́вшаго тому́ благода́ть,/ исцеле́ний даро́в точи́ти./ О, всеблаже́нне, А́нгелом соприча́стне,/ моли́ Христа́ Бо́га,/ да спасе́т души́ на́ша.

Му́чениче Иоа́нне сла́вне,/ Крест Христо́в вседу́шно на ра́мена взем,/ к Нему́ прите́кл еси́ терпе́нием твои́м/ и сим, блаже́нне,/ изсуши́л еси́ пото́к страсте́й;/ ра́дуяся, те́ло твое́ к заколе́нию пре́дал еси́,/ те́мже твою́ главу́/ венча́ Великодарови́тый.

Стра́стию стра́сти живоно́сней Христа́ подража́я,/ от Него́же де́йствие чуде́с прия́л еси́,/ Влади́мире страстоте́рпче,/ и спаса́еши притека́ющия к тебе́/ от бед и искуше́ний,/ Ему́же предстоя́ со дерзнове́нием/ во сла́ве неконча́емей.

Мече́м во главу́ усе́чен,/ от жи́зни сея́ к Жи́зни присносу́щей, от сме́рти к безсме́ртию,/ от тле́ния к нетле́нию преше́л еси́,/ не ожида́я естества́ ме́ртвость,/ но самово́льно умре́ти изволя́я./ О, по́двига твоего́,/ му́чениче всесла́вне,/ и́мже счи́слялся еси́ лико́м страда́льцев, веселя́ся.

Сла́ва, глас 3:

Оста́вив мир и житие́ привре́менное/ и возжела́в Крест Пречестны́й,/ возше́л еси́ в Го́рняя Ца́рствия,/ я́ко оре́л высокопа́рный, Иоа́нне всехва́льне;/ сего́ ра́ди и мы от твои́х моще́й дарова́ния прие́млем,/ ми́ром истоща́емым помазу́емии,/ страстоте́рпче Христо́в всечу́дне,/ от неду́г исцеля́емии./ Ты же на Небесе́х со А́нгелы лику́еши,/ испроси́ нам оставле́ние грехо́в у Христа́ Бо́га/ и ве́лию ми́лость.

И ны́не, пра́здника или́ Богоро́дичен

Богоро́дице, Предста́тельнице всех, моля́щихся Тебе́,/ Тобо́ю дерза́ем и Тобо́ю хва́лимся,/ ив Тебе́ все упова́ние на́ше е́сть,/ моли́ Ро́ждшагося из Тебе́/ за непотре́бныя рабы́ Твоя́.

Славосло́вие вели́кое и отпу́ст.

НА ЛИТУРГИ́И

Блаже́нны от обои́х кано́нов. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Пра́ведник, я́ко фи́никс процвете́т,/ я́ко кедр, и́же в Лива́не, умно́жится. Апо́стол в Дея́ниих, зача́ло 24. Аллилу́ия,глас 7: Честна́ пред Го́сподем сме́рть преподо́бных Его́.Стих: Что возда́м Го́сподеви о всех, я́же воздаде́ ми?Ева́нгелие от Иоа́нна, зача́ло 52. Прича́стен: В па́мять ве́чную:

(Слу́жбу зри 23 октября́)

Тропа́рь, глас 1:

Боже́ственною благода́тию просвети́вся,/ и по сме́рти да́руеши исцеле́ние/ притека́ющим к тебе́, прему́дре Иа́кове:/ те́мже и мы ны́не чтим честны́х моще́й пренесе́ние,/ веселя́ще вку́пе ду́ши и телеса́./ Тем вси вопие́м:/ сла́ва Да́вшему ти кре́пость!/ Сла́ва Венча́вшему тя!/ Сла́ва Де́йствующему тобо́ю всем исцеле́ния!

Конда́к, глас 8

Подо́бен: Взбра́нной:

Ве́рою и любо́вию/ твое́ честно́е пренесе́ние пра́зднующих, блаже́нне,/ сохрани́ и соблюди́ от вся́кий зло́бы и собла́зна змии́на,/ и́маши бо дерзнове́ние ко Влады́це всех, Христу́ Бо́гу./ Его́же моли́ спасти́ правосла́вныя лю́ди,/ моля́щия тя, да вси вопие́м ти:/ ра́дуйся, о́тче Иа́кове,/ всея́ Русский земли́ удобре́ние.

Ин конда́к, глас то́йже:

Я́ко звезда́ многосве́тлая, о́тче, на восто́це возсия́,/ к за́паду прише́л еси́, блаже́нне, во твое́ принесе́ние,/ я́ко со́лнечная луча́, испуща́еши исцеле́ния притека́ющим к ра́це моще́й твои́х,/ моли́ся Христу́ Бо́гу спасти́ правосла́вныя лю́ди, моля́щияся ти,/ да вси вопие́м ти:/ ра́дуйся, Богому́дре Иа́кове.