Аллилу́ия.

Стихи́ры му́чеников, глас 6.

Подо́бен: Всю отложи́вше:

Сло́вом окормля́еми,/ страсте́й треволне́ние удо́бно преплы́ша,/ священному́ченицы блаже́ннии,/ и те́плыми вода́ми челове́ком стра́сти цели́ти уве́ришася./ И́хже мо́щи, священноле́пно погребе́нныя,/ исцеле́ния излива́ют бога́тно тре́бующим,/ сих по достоя́нию почти́м непреста́нно, ве́рнии,/ со дерзнове́нием моля́щихся о душа́х на́ших.

Нося́ще от кро́ве му́ченическия багряни́цу,/ ски́петр же держа́ще Крест честны́й,/ ца́рствуют со Христо́м, ра́дующеся,/ за Него́же пострада́ти во́лею восхоте́ша,/ Боже́ственнии му́ченицы:/ священноявле́нный Полие́н, Ака́кий же и Мена́ндр/ с Патрики́ем Богому́дрым./ И ны́не, ра́дующеся, предстоя́т престо́лу Христо́ву,/ со дерзнове́нием моля́щеся о душа́х на́ших.

Жела́юще, му́ченицы, Христо́ва Ца́рствия,/ вре́менную смерть, я́ко пи́щу, вмени́ша, блаже́ннии,/ и глад претерпе́ша и я́звения боле́зней му́жески, до́блии./ Те́мже бы́ша всем ве́рным засту́пницы,/ душа́м же и телесе́м здра́вие устроя́юще незави́стно,/ я́же ны́не по до́лгу воспое́м, ве́рнии, ра́достно,/ я́ко Го́сподеви моля́щияся о душа́х на́ших.

А́ще пост, и пое́тся Аллилу́ия, тогда́ стихи́ры пре́жде Богоро́дицы, та́же святы́х.

Стихи́ры Богоро́дицы, глас и подо́бен то́йже:

Ра́дуйся, зако́на исполне́ние,/ ра́дуйся, хра́ме Святы́я Трои́цы,/ Неве́сто Нетле́нная,/ ра́дуйся, Боже́ственное носи́ло всех Царя́,/ ра́дуйся, огню́ невеще́ственный,/ я́ко клеще́ю нося́щи на руку́ Твое́ю У́гля,/ но́вый раю́ вертогра́да затворе́ннаго,/ трапе́за Боже́ственная и пресве́тлая,/ голуби́це нескве́рная,/ престо́ле Вы́шняго,/ одр Бо́жий мы́сленный,/ ю́же Дух Святы́й Отрокови́цу Тя осени́.

Уя́звена мя разбо́йническими бесо́вскими нахо́ды,/ и лежа́ща всего́ неде́йственна, Пренепоро́чная,/ на пути́ всегда́ непостоя́ннаго жития́,/ и ми́лости прося́ща,/ вско́ре посети́,/ вино́ излива́ющи и еле́й на неисце́льныя ра́ны,/ и ко здра́вию возведи́, я́ко да Тя сла́влю/ и любо́вию по до́лгу воспою́/ вели́чия Твоя́, Чи́стая, Ма́ти Присноде́во.

Нра́вом злым поползо́хся/ и порабоще́н ле́стию лука́вною, Богоневе́стная,/ к пречу́дному Твоему́ милосе́рдию и те́плому заступле́нию,/ Пресвята́я Отрокови́це, прибега́ю, окая́нный:/ сою́з мя изба́ви напа́стей и печа́лей,/ и спаси́ мя, Пренепоро́чная, бесо́вских прило́г,/ да прославля́ю Тя, и любо́вию пою́ и покланя́юся,/ и велича́ю Тя, Влады́чице, Присноблаже́нную.

Сла́ва, и ны́не, Богоро́дичен:

Ки́това чре́ва мя, лука́ваго греха́ изведи́, Влады́чице,/ во утро́бе вмести́вшая Невмести́маго,/ лю́тыя волны́ искуше́ний изба́ви,/ бу́ри паде́ний, Отрокови́це, исхити́,/ беззако́ний мои́х изсуша́ющи пучи́ну/ и уставля́ющи де́монскаго ополче́ния настоя́ния,/ Боже́ственным Твои́м посо́бием, Чи́стая,/ я́ко да непреста́нно сла́влю Тя, Присноблаже́нную.

Крестобогоро́дичен:

А́гнца Своего́ А́гница нескве́рная дре́вле и непоро́чная Влады́чица/ на дре́ве Кре́стнем я́ко узре́,/ ма́терски восклица́ше и, дивя́щися, вопия́ше:/ Ча́до сладча́йшее,/ что́ зре́ние сие́ но́вое и пресла́вное?/ Ка́ко сонм безблагода́тный суди́щу Пила́тову предаде́ Тя/ и осужда́ет на сме́рть Живота́ вся́ческих?/ Но воспева́ю Твое́ неизрече́нное, Сло́ве, снизхожде́ние.

Кано́н, творе́ние Феофа́ново, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Вся́ческими укра́шени благода́тьми, свяще́нства оде́ждею/ и обагре́нием а́бие муче́ния кро́вию украси́вшеся, сла́внии,/ и до́бре укра́шшеся, благоче́стия яви́стеся побо́рницы, тве́рди ве́рою.

Подвигополо́жник Христо́с, седя́й одесну́ю Отца́,/ страда́льцем всем подвиго́в три́знище отве́рзый,/ собра́ возра́стно сочета́нных, лик му́ченик четверочи́сленный,/ пе́сньми Того́ велича́ющия.

Це́ркве предста́тель, Патрики́е, я́коже па́стырь благ,/ по ней, блаже́нне, ду́шу твою́ положи́л еси́,/ со Ака́кием, Мена́ндром и Полие́ном Боже́ственным,/ прему́дрыми засту́пники обога́щся, пе́ние Бо́гу возсыла́я при́сно.

Богоро́дичен: Глаго́лом Боже́ственных проро́к после́дующе,/ испове́даша Бо́жие Сло́во,/ плоть прие́мшаго, Бргоглаго́ливии му́ченицы, от Пречи́стыя Де́вы,/ Ю́же, Богоро́дицу, сла́вяще, пе́сньми при́сно блажи́м.

Песнь 3

Ирмо́с: Утвержде́й в нача́ле небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, еди́не Человеколю́бче.

Ше́ствовавшия му́жески стезю́ муче́ния и сконча́вшия до́брое тече́ние/ ублажи́м, ве́рнии, я́ко победоно́сныя му́ченики,/ и вене́чники Боже́ственныя, и святи́тели Богому́дрыя.

Богогла́сный, разже́гся ре́вностию благоче́стия, увяди́ пла́мень пре́лести,/ вити́йствуя тве́рдо богослове́сная веле́ния/ и вразумля́я всех к Боже́ственному вои́стинну позна́нию.

Умерщвле́на ви́дев пия́нством нече́стия Патрики́й лю́таго иге́мона,/ вскочи́, вопия́ Богоразу́мия глаго́лы/ разсева́я всем Боже́ственное сло́во ве́ры.

Богоро́дичен: Неискусобра́чно Сло́во Бо́жие, о Богоро́дице, породила́ еси́, из Тебе́ воплоще́нна,/ Его́же му́ченицы, Бо́га, му́жески испове́даша,/ я́ко во́ини Сего́ и вене́чницы бы́вше.

Седа́лен, глас 8

Подо́бен: Прему́дрости:

С Мена́ндром Ака́кия му́драго,/ и Полие́на, ве́рою свяще́ннаго, почти́м пе́сньми, и вели́каго Патрики́я:/ свяще́нницы бо си́и Бо́га Вседержи́теля бы́вше, ве́рою Тому́ благоугоди́ша,/ те́мже муче́ния при кончи́не жития́ све́тло сподо́бишася и А́нгелом сочета́шася./ И́мже любо́вию вопие́м:/ моли́те Христа́ Бо́га согреше́ний оставле́ние дарова́ти/ чту́щим любо́вию святу́ю па́мять ва́шу.

Сла́ва, и ны́не, пра́здника или́ Богоро́дичен:

Небе́сную дверь и киво́т, пресвяту́ю го́ру,/ све́тлый о́блак воспои́м, неопали́мую купину́, слове́сный ра́й,/ Е́вы воззва́ние, вселе́нныя всея́ вели́кое сокро́вище,/ я́ко спасе́ние в Ней соде́лася ми́ру/ и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся всесвято́му рождеству́ Твоему́.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Си́лою Христо́вою оде́явся, Патрики́е,/ свяще́нник бо Сего́ был еси́ и, Того́ стопа́м я́ве после́довав,/ муче́нии прине́слся еси́ еди́ному Благоде́телю, благоче́стно взыва́я:/ си́ле Твое́й сла́ва, Человеколю́бче.

Священноде́йственник Боже́ствен показа́лся еси́, Ака́кие,/ Боже́ственныя зари́, о́тче, насыща́яся,/ и, Христо́в му́ченик и́стинен я́влься,/ и́дольскую ле́сть оплева́л еси́./ Те́мже и ра́достною со́вестию зове́ши:/ си́ле Твое́й сла́ва, Человеколю́бче.

С со́нмом, Христе́, Твои́х му́ченик Мена́ндр лику́я и ра́дуяся,/ луча́ми ны́не сия́ет Твои́ми, и светоли́тии ле́по украшае́мь,/ и та́мо Тебе́, Влады́це, ра́дуяся, взыва́ет:/ си́ле Твое́й сла́ва, Человеколю́бче.

Богоро́дичен: Ору́жие, Христе́, Тя ро́ждшую Всенепоро́чную стяжа́вше,/ ле́сти победи́ша кова́рства му́ченицы му́дрии/ и томи́телей ласка́ния я́ве отри́нуша./ И ны́не, венцено́сцы я́вльшеся, вопию́т:/ си́ле Твое́й сла́ва, Человеколю́бче.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма́, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Умертви́вшеся ми́ру, му́ченицы Богому́дрии, боле́зньми воздержа́ния,/ Христу́ усе́рдно принесо́стеся заколе́ния соверше́ная, себе́ поже́рше, я́коже а́гнцы,/ Влады́чним предповину́стеся Боже́ственным повеле́нием.

Пострада́вше зако́нно, му́ченицы всехва́льнии, венча́стеся:/ претерпе́вше бо го́рькия боле́зни и ра́ны от беззако́нных,/ на Небесе́х наслажда́тися нетле́нныя жи́зни сподо́бистеся.

У́мно со А́нгелы ны́не живы́й, Патрики́е блаже́нне,/ соверша́ющих честну́ю па́мять твою́ помяни́,/ ко Влады́це твои́ми моли́твами приле́жно моля́ся/ от бед изба́вити, всехва́льне.

Богоро́дичен: И́стинную Богоро́дицу вси Тя позна́вше, му́ченицы сла́внии,/ из Тебе́ рожде́ннаго Бо́га Сло́ва, ве́дяще,/ пропове́даша, проти́ву греху́ ю́ношески/ и до сме́рти сопроти́вльшеся, Отрокови́це Всепе́тая.

Песнь 6

Ирмо́с: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя, отча́яния,/ но Твою́ кре́пкую ру́ку мне́ простри́, яко Петро́ви,/ о Упра́вителю, и спаси́.

Лик страда́льческий, от четы́рех соста́влен му́ченик и святи́тель,/ досто́йно благоле́пно уясня́емый,/ лю́дие благочести́вии, ны́не соста́вльше лик, ра́достно восхва́лим.

Разреша́ют теле́сныя боле́зни, страда́льцы, неду́жным/ те́плых вод от гробо́в ва́ших излия́ния,/ и стра́сти душе́вныя ва́шими Боже́ственными моли́твами ве́рою приходя́щим изменя́ются.

У́тро ми у́мное, во тьме прегреше́ний лежа́щу/ и в скве́рней жи́зни пребыва́ющу, моли́твами, блаже́нне, твои́ми ны́не возста́ви,/ моля́ Изба́вителя Христа́, Патрики́е.

Богоро́дичен: Просвети́ мою́ ду́шу, ро́ждшая сия́ние сла́вы О́тчи,/ Де́во Богоро́дице Всепе́тая:/ Твою́ бо страда́льцы благода́ть иму́ще, мучи́телей языкобо́лия отри́нуша.

Конда́к, глас 4.

Подо́бен: Яви́лся еси́:

Я́ко светосия́нен добро́тою свяще́нства/ и муче́ния кро́вию преукра́шен,/ с пострада́вшими с тобо́ю, Патрики́е, Христу́ предстоя́,/ о нас помина́й,/ я́ко страда́лец честны́й.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Сла́внии му́ченицы, свяще́нства укра́шени оде́ждею,/ свое́ю кро́вию сию́ свяще́ннейшу соде́лавше,/ в Боговиде́нии лику́юще, поя́ху:/ благослове́н еси́, Бо́же оте́ц на́ших.

Вити́йскую лю́тость, све́том Боже́ственным озаря́емь, изобличи́л еси́, блаже́нне,/ я́ко в пещи́ тепли́цах, в ни́хже не опали́лся еси́, взыва́я:/ благослове́н еси́, Бо́же оте́ц на́ших.

Не терпя́ще, сла́вне, му́дрых твои́х слове́с иге́мон го́рдый,/ и́миже обличи́л еси́ прескверна́выя и лжеимени́тыя бо́ги,/ и́хже поплева́в, пел еси́, ра́дуяся:/ благослове́н еси́, Бо́же оте́ц на́ших.

Богоро́дичен: Се ны́не соверши́ся Дави́да Боже́ственнаго Боже́ственное прорече́ние,/ мо́лится бо любо́вию четвери́ца му́ченик Твоему́ лицу́, Чи́стая,/ воплоще́нному из Тебе́ взыва́ющи:/ благослове́н еси́, Бо́же оте́ц на́ших.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Венцено́сныя му́ченики, святи́тели Богому́дрыя,/ прииди́те, ра́дующеся, ве́рнии, почти́м, Христа́ велича́юще,/ дарова́вшаго сим кре́пость злочести́вых не ужаса́тися мук, пою́щим:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Свяще́ния пома́занием, муче́ния же кро́вию добропобе́дных четвери́ца украси́ся/ и сия́ет чудесы́ разли́чно па́че све́та,/ Соде́телю и Изба́вителю вопию́щи:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Победи́вше, сла́внии, де́монския полки́ и мучи́телей преще́ния не убоя́вшеся,/ венцы́ прия́сте от Христа́, всехва́льнии,/ и, я́ко победоно́снии страда́льцы, поете́:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Богоро́дичен: Да ра́дуется Мена́ндр, да весели́тся Ака́кий/ и с Полие́ном све́тлый Патрики́й, лик соста́вльше,/ воплоще́нное Сло́во О́тчее от деви́ческих неискусобра́чных ложе́сн/ да пою́т непреста́нно, свяще́нницы я́вльшеся,/ Того́ превознося́ще во вся ве́ки.

Песнь 9

Ирмбс: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Удиви́шася, зря́ще страда́льцев главы́ посека́еми, мучи́тели,/ и ду́ши любо́вию предаю́щи терпели́вно./ Христо́с же прия́т сих, упоко́ив я у Себе́,/ и́миже и исцеле́ния источа́ют, я́ко от окри́на,/ непреста́нно притека́ющим.

Ви́дети тща́щеся жела́емых исто́чника,/ святи́тели и му́ченики, на Небесе́х,/ вся́ко достоя́ние, е́же на земли́, оста́вльше,/ взя́стеся к высо́кому вели́честву Боже́ственнаго Ца́рствия,/ пи́щи сподо́бльшеся, е́же па́че ума́ блаже́нства.

Проидо́сте во́ду искуше́ний, и огнь муче́ний премину́сте,/ и ны́не я́сно, ве́чнующий страда́льцы, поко́й прия́сте в Небе́сных ски́ниих,/ в ни́хже, венцено́сцы, лику́юще непреста́нно, от бед нас изба́вите.

Богоро́дичен: Яко со́лнце, па́мять страда́льцев ве́рныя осиява́ет чудесы́,/ и́бо из Тебе́, Чи́стая Де́ва, рожде́йся Бог,/ Его́же благоче́стно пропове́даша святи́и,/ сия́ преосия́ све́тло,/ прославля́яй ве́рою Того́ прише́ствие поче́тшия, я́ко обеща́.

НА МА́ЛОЙ ВЕЧЕ́РНИ

Стихи́ры, глас 8.

Подо́бен: О, пресла́внаго чудесе́:

Преподо́бне о́тче Корни́лие,/ ты, и́го Христо́во на ра́мо взем,/ до́блественне наше́ствие ва́рвар попра́л еси́/ и пусты́ню град показа́л еси́./ Сего́ ра́ди тя вси,/ ве́рою почита́юще, про́сим:/ о преблаже́нне, мона́шествующих похвало́,/ Христа́ непреста́нно моли́/ спасти́ся душа́м на́шим.

Ве́рою соше́дшеся вси,/ я́ко по́стника Христо́ва тя почита́ем, Корни́лие:/ ра́дуяся бо, ше́ствовав в пусты́ни непроходи́мей, му́дре,/ наста́вник еси́ был че́стен./ Те́мже тебе́ мы ве́рою взыва́ем:/ о всеблаже́нне,/ по́стников похвало́,/ о нас моли́ся ко Го́споду/ поми́ловатися душа́м на́шим.

Преподо́бне о́тче Корни́лие,/ бу́дущия ра́ди жи́зни/ в верте́п разбо́йнич всели́лся еси́,/ ника́коже боя́ся неви́димых враг,/ а́ще и мно́ги ско́рби творя́ху, приходя́ще к тебе́,/ ты же моли́твами твои́ми/ сих без ве́сти твори́л еси́,/ о терпели́вый душе́ю/ пусты́нный жи́телю!/ Те́мже тя ве́рою вси почита́ем и ублажа́ем.

Сла́ва, глас 8:

Спасе́ния ища́ отвсю́ду, блаже́нне Корни́лие,/ во́льное стра́нство Го́спода ра́ди прия́л еси́,/ труды́ мно́гия, и жа́жду, и глад,/ сту́день же и зной Христа́ ра́ди претерпе́л еси́./ Те́мже и слы́шиши:/ благи́й ра́бе ве́рный,/ вни́ди в ра́дость Го́спода твоего́!/ Сего́ же гла́са и нам услы́шати мо́лимся,/ да всегда́ па́мять твою́ любо́вию ублажа́ем.

И ны́не, Богоро́дичен.

На стихо́вне стихи́ры, глас 2.

Подо́бен: До́ме Евфра́фов:

Ле́сти лука́вых бесо́в/ изобличи́в кре́стною си́лою,/ уясни́л еси́/ сла́ву Христо́ву,/ о́тче Корни́лие.

Стих: Честна́ пред Го́сподем/ смерть преподо́бных Его́.

Взя́тся, я́коже Илия́,/ на колесни́це о́гненней,/ смеси́лся еси́, блаже́нне,/ нехода́тайственне Тро́ице,/ Корни́лие прекра́сне.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Нося́ на руку́ твое́ю, о́тче,/ Крест Госпо́день,/ бесо́вская мечта́ния/ до конца́, Корни́лие,/ потреби́л еси́.

Сла́ва, и ны́не, Богоро́дичен:

Вы́шнии Тя ли́цы,/ Богоро́дице Де́во,/ пою́т с ни́жними,/ сла́вяще непреста́нно/ рождество́ Твое́ пречи́стое.

Тропа́рь пи́сан на вели́цей вече́рчи

НА ВЕЛИ́ЦЕЙ ВЕЧЕ́РНИ

Блаже́н муж:На Го́споди, воззва́х:поста́вим стихо́в 8, пра́здика 4 и преподо́бнаго на 4. Стихи́ры преподо́бнаго Корни́лия, глас 8.

Подо́бен: О, пресла́внаго чудесе́:

О́тче Корни́лие преподо́бне,/ впери́в ум к Бо́гу ве́рою,/ мирска́го смеше́ния/ возгнуша́вся неуста́внаго/ и крест твой восприе́м,/ Всеви́дцу после́довал еси́,/ те́ло, непокори́вое по́двиги воздержа́ния,/ по́мысла си́лою порабо́тив Боже́ственному Ду́ху.

О́тче преподо́бне Корни́лие,/ сле́зными исто́чники ду́шу твою́ очища́я/ и всено́щными стоя́нии Бо́га моля́,/ впери́лся еси́ к любви́ Сего́ блаже́нныя красоты́,/ ея́же досто́йно ны́не наслажда́ешися,/ непреста́нно и ра́достно/ с пострада́вшими с тобо́ю,/ Богому́дре и преподо́бне.

Преподо́бне о́тче прему́дре Корни́лие,/ боля́щим ты яви́лся еси́ исцеле́ние,/ и хромы́м хожде́ние ми́лостивно сотворя́еши,/ и всем, притека́ющим с ве́рою/ к цельбоно́сному твоему́ гро́бу,/ прося́щим по́мощи и заступле́ния,/ моли́твами твои́ми исцеле́ние неду́гов/ неоску́дно подае́ши.

Сла́ва, глас 6:

Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ во е́же по подо́бию, я́ко мо́щно, возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ верх,/ жи́тель пусты́нный, благотеку́щих обучи́тель,/ пра́вило доброде́тели изве́стнейшее./ И ны́не на Небесе́х зерца́лом разре́шшимся,/ о́тче наш Корни́лие,/ чи́сте зри́ши Святу́ю Тро́ицу,/ моля́ся несре́дственне/ о и́же ве́рою и любо́вию чту́щихтя.

И ны́не, пра́здника.

Вход. Проки́мен дне. Чте́ния три преподо́бническая (зри 21 мая).

На лити́и стихи́ры, глас 2, самогла́сны:

Преподо́бне о́тче,/ из мла́да в доброде́тели приле́жно обучи́вся,/ орга́н был еси́ Свята́го Ду́ха/ и, от Него́ прие́м чуде́с де́йство,/ научи́л еси́ челове́ки преоби́дети сла́дкая;/ ны́не же Боже́ственным све́том чисте́йше осиява́емь,/ просвети́ и на́ша мы́сли, Корни́лие, о́тче наш.

На земли́ А́нгела и на Небесе́х челове́ка Бо́жия,/ ми́рови благоукраше́ние,/ наслажде́ние благи́х доброде́телей,/ по́стников похвалу́, Корни́лия почти́м:/ насажде́н бо в дому́ Бо́жии, я́ко крин,/ и процвете́ пра́ведно, я́ко кедр, в пусты́ни,/ умно́жи ста́до Христо́во слове́сных ове́ц/ преподо́бием и пра́вдою.

Сла́ва, глас 2:

Пусты́ня, я́же пре́жде разбо́йническая жили́ща имя́ше,/ ны́не, Корни́лие, учени́к твои́х мно́жеством испо́лнена, украша́ется:/ храм бо прече́стен Бо́жия Ма́тере воздви́гл еси́,/ разли́чными добро́тами укра́шен./ Те́мже в нем днесь соше́дшеся/ и честны́й гроб твой обстоя́ще любе́зно,/ покланя́ющеся и глаго́люще, мо́лимся:/ Це́рквам единомышле́ние да́руй,/ правосла́вному наро́ду на́шему на враги́ спосо́бствуй моли́твами твои́ми,/ и нам испроси́ мир,/ и душа́м на́шим ве́лию ми́лость.

И ны́не, пра́здника.

На стихо́вне стихи́ры, глас 4.

Подо́бен: Зва́нный свы́ше:

Егда́ Боже́ственное тя жела́ние распали́, преподо́бне,/ тогда́ все плотско́е мудрова́ние ду́ху повину́л еси́,/ поще́ния страда́ньми утверди́вся/ и, я́ко зла́то, в горни́ле искуше́но сие́, яви́вся,/ прия́телище был еси́ Пресвята́го Ду́ха,/ собра́в мона́шествующих мно́жества,/ уче́ньми твои́ми тех, я́ко не́коею восхо́дною ле́ствицею,/ на высоту́ доброде́телей возводи́л еси́,/ те́мже Христа́ моли́/ спасти́ и просвети́ти ду́ши на́ша.

Стих: Честна́ пред Го́сподем/ смерть преподо́бных Его́.

Возсия́ днесь пресве́тлая и всепра́зднственная па́мять твоя́,/ пресла́вне Корни́лие,/ созыва́ющи многочи́сленное по́стник сосло́вие/ и преподо́бных ликостоя́ние,/ А́нгелы же с челове́ки я́ко вои́стинну к похвале́нию/ в Тро́ице пева́емаго Христа́ Бо́га на́шего,/ Его́же моли́ спасти́ и просвети́ти ду́ши на́ша.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Богоно́се и преблаже́нне о́тче Корни́лие,/ ты, проро́чески слеза́ми зе́млю омака́в,/ не дал еси́ сна твои́ма очи́ма,/ ни ве́ждома дрема́ния,/ серде́чное жела́ние ко Христу́ явля́я,/ Его́же измла́да возлюби́л еси́,/ вся́кия доброде́тели вид испра́вль./ Те́мже тя ублажа́ем,/ Христа́ велича́юще, тебе́ просла́вльшаго,/ Его́же моли́ спасти́ и просвети́ти Души́ на́ша.

Сла́ва, глас 8:

Мона́хов мно́жества/ наста́вника тя почита́ем, о́тче наш Корни́лие:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ны́не, пра́здника.

Тропа́рь, глас 4:

От ю́ности горя́щим жела́нием Боже́ственныя любве́ разжига́емь,/ жите́йския молвы́ оста́вил еси́, преподо́бне,/ ревни́тель Анто́нию Вели́кому быв,/ безмо́лвием и жесто́ким пребыва́нием после́дуя Христу́,/ бде́нием, и моли́твами, и посто́м о́браз был еси́ твои́м ученико́м./ Те́мже моли́ся Го́сподеви, Корни́лие блаже́нне,/ спасти́ся душа́м на́шим.

Ин тропа́рь, глас 8:

По́стническими труды́ нетру́дную жизнь стяжа́, преподо́бне,/ слеза́ми же мы́сленнаго фарао́на потопи́л еси́/ и вме́сто ско́рби ра́дость обре́л еси́,/ предстоя́ Христо́ви в ли́це святы́х,/ помина́й моля́щихся чад твои́х, Корни́лие, о́тче наш.

НА У́ТРЕНИ

По 1-й и по 2-й кафи́змах седа́льны пра́здника. По полиеле́и седа́лен преподо́бнаго, глас 8.

Подо́бен: Прему́дрости:

В пусты́ню, блаже́нне, всели́вся,/ и в ней пречи́стый храм Бо́жии Ма́тери воздви́г,/ мно́жество мона́шествующих та́мо собра́л еси́,/ Бо́гу с тобо́ю рабо́тающих,/ и́хже сохраня́й от вся́каго вре́да лука́ваго,/ да всегда́ благода́рственно вопие́м ти:/ преблаже́нне Корни́лие,/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ О́гнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род,/ досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Степе́нна, 1-й антифо́н 4-го гласа. Проки́мен:Честна́ пред Го́подем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние:Ева́нгелие от Матфея́, зача́ло 43.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ без поро́ка поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

Кано́н пра́здника на 6, и свята́го на 8, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Сло́во ми даждь, Сло́ве Бо́жий, Светода́вче Христе́,/ воспе́ти све́тлое и светоно́сное житие́ Твоего́ уго́дника, преподо́бнаго Корни́лия./ Моли́твами его́ разори́ мрак сердца́ моего́/ и Твои́м све́том души́ озари́тися, молю́ся.

Влады́чнему любостра́нству, преподо́бне, подо́бяся,/ сам стра́нствовати изво́лил еси́./ Те́мже и Всеви́дящее О́ко, ви́дев твое́ благо́е изволе́ние,/ да́ром чуде́с обогати́ тя, Корни́лие, я́ко пресла́вно.

Трисо́лнечным сия́нием, Богому́дре, озаря́ем,/ зло́е, блаже́нне, бесо́в шата́ние и вра́жия преще́ния/ ра́нами боле́зней, я́коже паучи́ну, разори́л еси́,/ Бо́жиим Ду́хом разжига́емь, Корни́лие блаже́нне.

Богоро́дичен: Я́ко Бо́жия Ма́ти, дерзнове́ние иму́щи/ к ро́ждшемуся из Тебе́ Единоро́дному Сло́ву,/ и Отцу́ Собезнача́льному, и Соесте́ственному Ду́ху Свято́му,/ моля́щися не преста́й от бед спасти́, Всенепоро́чная,/ Тя, Богоро́дицу, сла́вящия.

Катава́сия пра́здника.

Песнь 3

Ирмо́с: Утвержде́й в нача́ле небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, еди́не Человеколю́бче.

Кто изрещи́ мо́жет зе́млен твоя́ боле́зни, о́тче, и по́двиги,/ и́хже ра́ди досто́йну мзду стяжа́л еси́ от Бо́га?/ и был еси́ прия́телище Боже́ственнаго Ду́ха,/ преподо́бен и и́стинен, пра́веден и непоро́чен.

Укре́пль ум ра́зумом Боже́ственным, о́тче Корни́лие,/ и прему́дростию духо́вною и сло́вом укра́шен,/ тем привле́кл еси́ мно́гих ду́ши во спасе́ние,/ яви́в мона́хом изве́стно жития́ прописа́ние.

Зло́бы нача́льник враг, хотя́ тебе́ па́кость сотвори́ти, преподо́бне Корни́лие,/ лука́вых челове́к на тя вооружа́ет:/ тебе́ прирази́вся, постыде́ся, Христу́ бо тя соблюда́ющу.

Богоро́дичен: Херуви́м и Серафи́м превы́шши яви́лася еси́, Богоро́дице:/ Ты бо прия́ла еси́ невмести́маго Бо́га во Твое́м чре́ве, Нескве́рная./ Те́мже Тя, вси ве́рнии, пе́сньми, Чи́стая, ублажа́ем.

Седа́лен, глас 8

Подо́бен: Прему́дрости:

Христо́вою любо́вию связа́в твою́ ду́шу/ и поще́ния страда́ньми утверди́вся,/ зла́та светле́йши, благоче́стием облиста́л еси́/ и, чи́стое прия́телище быв Ду́ху, лука́вых духо́в тьму разгна́л еси́;/ тем собра́в и́ночествующих мно́жества,/ па́стырь им был еси́ и свети́льник све́тел, Корни́лие преподо́бне./ Моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, пра́здника или́ Богоро́дичен:

Я́ко Всенепоро́чная Неве́сто Творцу́,/ я́ко Неискусому́жная Ма́ти Изба́вителю,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище и бесо́м игра́лище, в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная Нетле́нная,/ отжени́ о́блак страсте́й и Вы́шняго прича́стия сподо́би/ и Све́та невече́рняго моли́твами Твои́ми.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не остя́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Све́тлое твое́ житие́ я́ко пра́вило изве́стно вся́кия, о́тче, доброде́тели показа́ся/ в моли́твах и поще́ниих, бде́ниих же и мольба́х,/ я́же ко Христу́ Человеколю́бцу.

Сна твои́ма очи́ма не дал еси́, блаже́нне Корни́лие,/ ни ве́ждома дрема́ния, до́ндеже сподо́бился еси́ пра́ведных селе́ния,/ е́же угото́ва Бог, преподо́бне, лю́бящим Его́.

Стеня́, и пла́ча, и се́туя, умиле́нием и слеза́ми кропя́ зе́млю,/ при́сно, о́тче Богому́дре, моли́тву соверша́л еси́,/ до́ндеже обре́л еси́ Боже́ственное утеше́ние во гра́де Бо́жии/ и со все́ми святы́ми, преподо́бне, всели́лся еси́.

Богоро́дичен: Бога, из Тебе́ воплоще́ннаго непрело́жно, единосу́щна Отцу́,/ и Тебе́, ро́ждшей, ра́вна по челове́честву, моли́/ проще́ние согреше́ний и душа́м спасе́ние/ пою́щим Тя ве́рою дарова́ти.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чуждя́я тьма, окая́ннаго?/ Но обрати́ мя и к све́ту зя́поведей Твои́х/ пути́ моя́ напря́ви, молю́ся.

Погаси́в стра́сти росо́ю подвиго́в твои́х, о́тче блаже́нне,/ бога́тно возже́гл еси́ огне́м любве́ и ве́ры воздержа́ния свети́льник,/ и просвеще́ние безстра́стия, и дне сын яви́лся еси́.

Исцеле́ний тебе́ благода́ть Христо́с в неду́зех разли́чных дарова́/ и на ду́хи нечи́стыя власть, му́дре:/ естество́ бо, о́тче, победи́в, па́че естества́/ дарова́ний сподо́бился еси́ Ду́ха.

Ра́йския добро́ты жела́я, преподо́бне Корни́лие,/ в слеза́х, и воздыха́ниих, и бде́ниих и моли́твах твою́ жизнь препроводи́л еси́/ и сего́ ра́ди по сме́рти от Христа́ чудесы́ просла́вился еси́.

Богоро́дичен: Тя сте́ну иму́щии и заступле́нием Твои́м соблюда́емии,/ Твое́ю Боже́ственною сла́вою хва́лящеся, Тя ублажа́ем:/ Ты бо, Пречи́стая, душа́м на́шим источа́еши весе́лие и ра́дование.

Песнь 6

Ирмо́с: О́чи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Главы́ враго́в мы́сленных сокруши́ти мо́лимся/ и ви́димыя под но́зе на́ша покори́ти, моли́ся, преподо́бне,/ чту́щим любо́вию святу́ю па́мять твою́.

Жития́ твоего́ исправле́ния и веща́ния, о́тче,/ всю обтеко́ша отню́д вселе́нную,/ и́бо в пресла́вную дости́гл еси́ высоту́:/ Бог бо тя просла́ви и сла́вна всем сотвори́.

Ни́щих строи́тель, вдов предста́тель, промы́сленник си́рых,/ печа́льных утеше́ние, па́дших исправле́ние,/ оби́димых засту́пник скор был еси́,/ твоему́, о́тче, подо́бяся учи́телю.

Богоро́дичен: Вознесла́ еси́ вои́стинну па́дшее челове́ческое существо́,/ о́браз Боже́ственный и Отцу́ ра́венство иму́ща,/ ви́димаго Сы́на неизме́нна, Богома́ти, без се́мене во чре́ве поноси́вши.

Конда́к, глас 8:

Го́сподеви, от Святы́я Де́вы возсия́вшу ми́рови,/ и Тому́ измла́да, я́ко А́нгел, послужи́л еси́, блаже́нне,/ и си́лою Его́ пусты́ню, я́ко град, сотвори́л еси́,/ мно́жество же учени́к в ней собра́л еси́,/ и́хже Богодохнове́нными уче́ньми просвети́л еси́./ Тем вопие́м ти:/ ра́дуйся, о́тче наш Корни́лие, и́ноком Боже́ственное удобре́ние.

И́кос:

Зва́нию Го́спода твоего́ после́довал еси́ приле́жно, блаже́нне,/ вся, я́же в ми́ре кра́сная, Его́ ра́ди преоби́дев./ Те́мже вопие́м ти:/ ра́дуйся, я́ко, измла́да Христа́ возлюби́в,/ си́лою Его́ претерпе́л еси́ пусты́нное озлобле́ние усе́рдно;/ ра́дуйся, я́ко Вы́шняго по́мощию бесо́вскую пре́лесть попра́л еси́./ Ра́дуйся, я́ко прече́стен храм Бо́жия Ма́тере воздви́гл еси́;/ ра́дуйся, я́ко в нем тобо́ю Бог прославля́ется./ Ра́дуйся, я́ко собра́л еси́ учени́к мно́жество;/ ра́дуйся, я́ко с те́ми приле́жно Го́сподеви рабо́тал еси́./ Ра́дуйся, я́ко удиви́л еси́ А́нгелы житие́м твои́м;/ ра́дуйся, я́ко тобо́ю челове́цы по́льзовашася./ Ра́дуйся, правосла́вному наро́ду похвала́;/ ра́дуйся, христолюби́вому во́инству утвержде́ние./ Ра́дуйся, я́ко моли́твами твои́ми сопроти́внии побежда́ются;/ ра́дуйся, о́тче наш Корни́лие, и́ноком Боже́ственное удобре́ние.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Истощи́в тул стрел, враг вселука́вый устраши́ти тя не возмо́же,/ си́лою бо Вы́шняго укрепля́емь и Того́ по́мощию вооружа́емь, преподо́бне, пел еси́:/ благослове́н еси́, Бо́же оте́ц на́ших.

Бу́дущия жи́зни взыска́в, сла́ву маловре́менную небре́гл еси́/ и, в пусты́ню всели́вся, блаже́нне, со зверьми́ жи́ти изво́лил еси́, поя́:/ благослове́н еси́, Бо́же оте́ц на́ших.

Враг, прирази́вся тебе́, преподо́бне, разбо́йники на тя посыла́ет,/ постыде́в же ся, душе́внаго твоего́ хра́ма не поколеба́,/ утвержде́н бо бе на ка́мени.

Богородичен: Го́ру Тя проро́к Дании́л Боже́ственным Ду́хом нарече́, Де́во,/ из нея́же ка́мень без рук отсече́ся/ и сокруше́ние соде́я истука́нней пре́лести.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́и́те,/ лю́дие, превозноси́те во вся ве́ки.

Царю́ всех и Бо́гу со святы́ми предстоя́,/ с ни́миже, Корни́лие, моли́ся вои́нству на́шему побе́ды на ва́рвары дарова́ти/ и грехо́в оставле́ние твою́ па́мять почита́ющим и пою́щим вы́ну:/ свяще́нницы, воспо́йте, лю́дие, превозноси́те во вся ве́ки.

Госпо́дних за́поведей изве́стен храни́тель был еси́,/ раздробля́я а́лчущим хлеб тво́й, преподо́бне,/ та́ющую гла́дом доброде́телей ду́шу мою́ насы́ти, блаже́нне, пою́ща любо́вию:/ свяще́нницы, воспо́йте, лю́дие, превозноси́те во вся ве́ки.

Ва́рвар иногда́ наше́ствие, и ко оби́тели твое́й устреми́вшихся, Боже́ственною си́лою устраши́л еси́./ И ны́не на нас мы́сленных враг устремле́ние моли́твами твои́ми разори́, пою́щих:/ свяще́нницы, воспо́йте, лю́дие, превозноси́те во вся ве́ки.

Богоро́дичен: К Богоро́дице все твое́ упова́ние име́л еси́, Корни́лие,/ и Тоя́ призыва́нием вра́жия се́ти вся расто́ргл еси́ и лю́тых воста́ние,/ с Не́юже, преподо́бне, моли́ся о и́же любо́вию честну́ю твою́ па́мять чту́щих и вопию́щих:/ свяще́нницы, воспо́йте, лю́дие, превозноси́те во вся ве́ки.

Песнь 9

Ирмо́с: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́инейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Бе́гая сла́вы от челове́к, в пусты́ню всели́лся еси́,/ вся уме́ты вмени́в, да Христа́ еди́наго приобря́щеши,/ Его́же ра́ди пусты́нная озлобле́ния претерпе́л еси́,/ да тле́нными нетле́нная измени́ши, Корни́лие.

От ме́ста отгони́ти тя враг покуша́вся,/ мона́хи на убие́ние твое́ поощря́ше, Корни́лие преподо́бне,/ я́же до́бре уче́нием твои́м наказа́л еси́/ и, я́коже твоя́ ча́да, при́сно тех возлюби́л еси́.

Не забу́ди, посеща́я чад твои́х, Корни́лие преподо́бне,/ к ра́це моще́й твои́х притека́ющих и любо́вию па́мять твою́ торжеству́ющих,/ от вся́ких искуше́ний вра́жиих изба́витися,/ всех Влады́це моли́ся, блаже́нне.

Богоро́дичен: Зачала́ еси́, Де́во, без се́мене, вся́ческая созда́вшаго Сло́во Бо́жие,/ кроме́ хоте́ния пло́ти,/ и без истле́ния родила́ еси́, без боле́зней ма́терских./ Тем Тя, Богоро́дице, язы́ком и се́рдцем испове́дающе, велича́ем.

Свети́лен:

Страстна́го омраче́ния ду́шу очи́стив, преподо́бне,/ честны́м поще́нием и моли́твами непреста́нными,/ зерца́ло был еси́ Боже́ственных сия́ний,/ свети́льниче мона́хов, Корни́лие Богому́дре.

Сла́ва, и ны́не, пра́здника.

На хвали́тех стихи́ры на 4, глас 8.

Подо́бен: О, пресла́внаго чудесе́:

О, пресла́внаго чудесе́!/ В после́дних роде́х,/ просия́ в доброде́телех/ посты́ и моли́твами,/ и труды́ теле́сными,/ и ины́ми мно́гими страда́нии,/ по всему́ вре́мени твоего́ жития́,/ ум вперя́я к Бо́гу,/ подвиза́лся еси́ неосла́бно,/ о́тче Корни́лие.

О, пресла́внаго чудесе́!/ Нигде́же яви́лся еси́,/ по́честь уловля́я/ и ласка́ньми услажда́яся,/ па́че же смире́ние Христо́во нося́/ в согбе́нне мудрова́нии,/ е́же вообража́л еси́ твои́м ученико́м,/ и́хже собра́л еси́ мно́гими по́двиги и труды́,/ о́тче Корни́лие.

О, пресла́внаго чудесе́!/ Пусты́ню град сотвори́,/ ю́же ви́девше, ра́тнии/ убоя́шася наступи́ти на ню:/ мня́ху бо и ви́дяху/ мно́жество вооруже́нных во́инов;/ се же́ де́ло моли́тв ра́ди свята́го бы́сть,/ и́же твори́т всегда́,/ помога́я нам, свои́м ученико́м.

Сла́ва, глас 7:

Мно́жив доброде́тель, просвети́л еси́ мир;/ ужаси́в де́моны, возвесели́л еси́ А́нгелы;/ собра́в ста́до мона́хов,/ научи́л еси́ их ходи́ти в за́поведех Госпо́дних/ и, прие́м благода́ть исцеле́ния,/ с ве́рою приходя́щим да́руеши безме́здно./ Преподо́бне о́тче наш, моли́ся о душа́х на́ших.

И ны́не, пра́здника.

На Литурги́и слу́жба вся преподо́бническая.

Моли́тва

О свяще́нная главо́, земны́й А́нгеле, Небе́сный челове́че, вели́кий чудотво́рче, преподо́бне о́тче Корни́лие! К тебе́ с ве́рою и любо́вию усе́рдно прибега́юще, умиле́нно про́сим тя, Небе́снаго предста́теля на́шего: яви́ нам, смире́нным и гре́шным, любо́вь твою́ оте́ческую и многомо́щное твое́ заступле́ние, се бо грех ра́ди на́ших не дерза́ем, с свобо́дою чад Бо́жиих, проси́ти Го́спода и Влады́ку на́шего о ну́жных нам на потре́бу, но тебе́, моли́твенника к Нему́ благоприя́тнаго, предлага́ем, ве́рующе несомне́нно, я́ко вся блага́я мо́жеши нам испроси́ти у бла́гости Его́, а́ще то́кмо восхо́щеши. Испроси́ у́бо нам, уго́дниче Бо́жий, у Всеще́драго и Человеколю́бца Бо́га, ве́ру пра́ву, благоче́стие непоколеби́мое, покая́ние соверше́нное, жития́ исправле́ние реши́тельное, да про́чее не прогневля́ем Го́спода наруше́нием святы́х Его́ за́поведей и сподо́бимся проще́ние грехо́в на́ших от Него́ получи́ти. Умоли́, чудотво́рче святы́й, Царя́ ца́рствующих и Го́спода госпо́дствующих дарова́ти мир и благострое́ние стране́ на́шей, я́ко да позна́ют вси противля́ющиися ей, я́ко с на́ми Бог и святи́и уго́дницы Его́. Сохрани́, свя́тче Бо́жий, моли́твами твои́ми Це́рковь Христо́ву от ересе́й и раско́лов, суеве́рия и неве́рия челове́ческаго, да цвете́т в ней свято́е Правосла́вие во всей си́ле и прино́сит плоды́ спаси́тельныя душа́м. Соблюди́ от вся́каго зла и оби́тель, тобо́ю со́зданную, и вся живу́щия и подвиза́ющияся в ней по твои́м уста́вом, да це́лы и невреди́мы пребу́дут от искуше́ний врага́ спасе́ния челове́ческаго. При́зри ми́лостивно и на предстоя́щия тебе́ и моля́щияся лю́ди, и́же в оби́тель твою́ прихо́дят на поклоне́ние, и вся проше́ния их во бла́го испо́лни: боля́щим исцеле́ние, скорбя́щим утеше́ние, бе́дствующим вспоможе́ние ско́ро пода́ждь. Всем же нам здра́вие душе́вное и теле́сное, земли́ плодоно́сие, ти́хое и богоуго́дное житие́, благу́ю христиа́нскую кончи́ну и до́брый отве́т на Стра́шнем Суде́ Христо́вом у Всеми́лостиваго Бо́га исхода́тайствуй, я́ко вои́стинну име́яй ве́лие к Нему́ дерзнове́ние. Ей, о́тче! ве́мы, я́ко мно́го мо́жет моли́тва твоя́ пред лице́м Вседержи́теля Го́спода, сего́ ра́ди кре́пко на тя упова́ем и на твоя́ святы́я моли́твы зело́ наде́емся, я́ко ты приведе́ши нас предста́тельством твои́м в небу́рное приста́нище спасе́ния и насле́дники пока́жеши нас всесве́тлаго Ца́рствия Христо́ва. Не посрами́ же, свя́тче о́тче наш, упова́ния на́шего и сподо́би нас вку́пе с тобо́ю блаже́нства ра́йскаго наслажда́тися, да сла́вим, хва́лим и велича́ем вели́кую ми́лость к нам Человеколю́бца Бо́га, Отца́, и Сы́на, и Свята́го Ду́ха, и твое́ благо́е оте́ческое заступле́ние, во ве́ки веко́в. Ами́нь.

НА МА́ЛОЙ ВЕЧЕ́РНИ

На Го́споди, воззва́х:стихи́ры, глас 1.

Подо́бен: Я́ко Безпло́тным:

Я́ко Безпло́тным единовсе́льника/ и преподо́бным всем соо́бщника,/ Трисо́лнечным Све́том Божества́/ в ра́йском селе́нии осиява́емаго,/ всесве́тлаго свети́льника на́шего Корни́лия,/ пусты́ннаго граждани́на,/ в земно́м селе́нии его́/ наста́ день све́тлаго торжества́.

Прииди́те, ве́рных мно́жество,/ и сра́дуйтеся в светоно́сный день па́мяти/ преподо́бнаго отца́ на́шего,/ в пусты́ни сей на Не́бо вознося́щагося,/ криле́ ева́нгельских до́блестей восприя́вшаго/ и Небе́сных благ рачи́теля бы́вшаго,/ его́же, я́ко Бо́жия уго́дника, ублажа́юще,/ грехо́в оставле́ние моли́твами его́ прие́млем.

Воздержа́нием мирски́я сла́дости попра́в,/ сле́зными то́ками пла́мень страсте́й погаси́л еси́,/ Богоно́сне о́тче Корни́лие,/ а́лчбою и жа́ждею плоть изнуря́я,/ ду́шу свою́ очи́стил еси́,/ тем и в благода́тный рай возше́л еси́,/ плоды́ безсме́ртия вкуша́я/ и сла́дость ве́чныя жи́зни.

Мы́сленных враго́в истреби́в,/ я́ко безпло́тен, на земли́ пожи́л еси́,/ Корни́лие чу́дне,/ и во оби́тели сей, я́ко звезда́ пресве́тлая,/ доброде́тельми возсия́л еси́/ и чуде́с све́тлостию./ Те́мже па́мять твою́ днесь ублажа́юще,/ во умиле́нии вопие́м ти:/ преподо́бне о́тче,/ моли́ Христа́ Бо́га грехо́в оставле́ние дарова́ти/ любо́вию чту́щим тя.

Сла́ва, глас 2:

Ева́нгелия Христо́ва и́стинный послу́шник яви́лся еси́, преподо́бне,/ мир и вся, я́же в нем, я́ко не су́щая,/ оста́вил еси́ любве́ ра́ди Христо́вы,/ пост возлюби́л еси́, доброде́тельми украси́вся изря́дно,/ и храм Пресвяте́й Богоро́дице,/ в похвалу́ Рождества́ Ея́, воздви́гл еси́./ Те́мже, безмо́лвия и благоче́стия рачи́телю,/ в торжестве́ преми́рном богозре́нием наслажда́ющемуся, возопие́м:/ о преподо́бне о́тче Корни́лие,/ я́ко име́я дерзнове́ние ко Христу́ Бо́гу,/ моли́, е́же спасти́ всех нас,/ благоче́стно чту́щих всечестну́ю па́мять твою́.

И ны́не, Богоро́дичен, глас то́йже:

Безсе́менно заче́ншая/ и безстра́стно роди́вшая Бо́га Сло́ва,/ христиа́н Предста́тельнице, Богоро́дице Влады́чице!/ К Тебе́ припа́даем, Тя пое́м и славосло́вим/ и Тебе́ вси мо́лимся со слеза́ми:/ воззри́ на нас милосе́рдым о́ком,/ от и́га страсте́й изба́ви нас/ и безстра́стие да́руй душа́м на́шим.

На стихо́вне стихи́ры, глас 2.

Подо́бен: До́ме Евфра́фов:

Дом доброде́телей ты показа́лся еси́,/ и прия́телище дарова́ний,/ Богоно́се о́тче Корни́лие.

Стих: Честна́ пред Го́сподем/ смерть преподо́бных Его́.

Душегуби́тельныя стра́сти победи́л еси́/ по́стнических трудо́в по́тами,/ преподо́бне Корни́лие.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Чуде́с исто́чника, Богому́драго Корни́лия,/ чистото́ю моли́твы Бо́гови прибли́жившагося,/ дарова́ сей оби́тели ди́вный во святы́х Госпо́дь,/ нечи́стыя отгоня́ти ду́хи,/ в наслажде́ние ве́рно почита́ющим святу́ю па́мять его́.

Сла́ва, глас то́йже:

Отверже́нием ми́ра Христу́ после́довал еси́/ и у́мным о́ком зрел еси́ пред собо́ю Го́спода, блаже́нне,/ равноа́нгельское житие́ пожи́в,/ благода́тный бо свет Божества́/ на трудолю́бный по́стничества путь наста́ви тя/ и, сквозе́ страсте́й свире́пое мо́ре преве́д,/ возведе́ на го́ру безстра́стия,/ духо́вныя ма́нны прича́стника сотвори́/ и в Небе́сный Сио́н введе́,/ иде́же со А́нгелы ликовству́я,/ Всеблага́го Творца́ моли́,/ е́же спасти́ ду́ши на́ша.

И ны́не, Богоро́дичен:

Го́рнии Тя ли́цы, Богоро́дице Де́во,/ пою́т с до́льними,/ сла́вяще непреста́нно рождество́ Твое́ пречи́стое.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж:1-й антифо́н. На Господи, воззва́х:стихи́ры, глас 6.

Подо́бен: Все упова́ние мое́:

Любо́вь Соде́теля всех/ превлече́ тя к себе́, преподо́бне,/ ея́же ра́ди оста́вил еси́ вся ми́ра сего́ пристра́стия/ и оте́чество свое́, я́ко вредя́щее путь спасе́ния,/ род же и дру́ги избра́ себе́ бы́ти святы́я А́нгелы/ и в Небе́сных дво́рех водвори́тися возжеле́л еси́,/ в ни́хже предстоя́ ны́не Престо́лу Пресвяты́я Тро́ицы,/ моли́ся о душа́х на́ших.

У́мным о́ком смотря́я бу́дущая без конца́ пребыва́ния,/ созерца́я блаже́нство рая́,/ от шу́их же зря му́ки,/ и того́ ра́ди в пеще́ру ма́лу и те́мну/ затвори́л еси́ себе́, преподо́бне,/ да сего́ ве́ка тесното́ю/ мо́жеши насле́довати ра́йскую несказа́нную сла́дость и Ца́рствие Небе́сное,/ в не́мже сый ны́не,/ моли́ся о душа́х на́ших.

Пе́рвее у́бо стра́хом бу́дущих мук/ отри́нул еси́ вся мирска́я пристра́стия,/ пото́м же мздо́ю ра́йскаго воздая́ния/ обогати́тися возжеле́л еси́,/ та́же, любо́вию Госпо́днею уязви́вся,/ проше́л еси́ вся степе́ни соверше́нства,/ быв возлю́блен Го́сподеви./ Те́мже моли́ся, преподо́бне, о душа́х на́ших.

Ины стихи́ры, глас 4.

Подо́бен: Зва́нный:

Егда́ любо́вь Бо́жия мы́сли твое́й предста́,/ тогда́, о́тче Корни́лие, всю ми́ра суету́,/ я́ко ничто́же су́щую,/ и град свой оста́вль,/ во страну́ чу́жду пресели́лся еси́/ и, во́ли Боже́ственней во всем повину́яся,/ жесто́кий путь преше́л еси́,/ веду́щий тя в простра́нство Небе́снаго Ца́рствия,/ его́же сподо́битися и нам моли́, преподо́бне.

Егда́, во́лею Бо́жиею наставля́емь,/ прии́де во страну́ вели́каго е́зера Оне́га,/ на не́мже обре́те ме́сто,/ имену́емое Палеостро́в,/ в о́ньже всели́вся,/ взыска́ себе́ пеще́ру в разсе́линах ка́менных,/ в не́йже неусы́пными труды́ те́ло свое́ изнуря́я,/ в посте́ и моли́тве пребыва́л еси́,/ простра́нство Небе́снаго Ца́рствия взыску́я,/ его́же сподо́битися и нам моли́, преподо́бне.

Егда́ по́двиги твоя́ яви́ Бог лю́дем,/ лю́бящим спасе́ние,/ тогда́ собра́шася к тебе́ лю́дие боголюби́вии,/ и́хже ра́ди спасе́ния в безмо́лвии ото́ка/ кинови́ю возгради́л еси́/ и це́рковь Богома́тери,/ в сла́ву Рождества́ Ея́, воздви́гл еси́,/ да приноси́мыми в ней моли́твами/ с ча́ды твои́ми получи́ши Ца́рствие Небе́сное,/ его́же сподо́битися и нам моли́, преподо́бне.

Сла́ва, глас 6:

О, ди́внаго твоего́ му́жества, преподо́бне!/ На плоть свою́, я́ко на врага́, возста́л еси́,/ распина́я ю, со страстьми́ и по́хотьми,/ и посто́м, бде́нием же и всено́щным стоя́нием/ ду́ху му́дре покоря́я;/ те́мже и всели́лся еси́ в пеще́ру те́мну и те́сну,/ в ней живы́й, слеза́ми и безстра́стием/ проти́ву неви́димых враго́в ко́знем подвиза́лся еси́./ Сего́ ра́ди от Вседержи́тельныя Десни́цы/ досто́йный вене́ц прия́л еси́,/ руково́дствуя живу́щая с тобо́ю ча́да твоя́,/ прине́сл еси́ их, я́ко плод доброде́телей стори́чный, Бо́гови,/ Ему́же ны́не предстоя́,/ моли́ся о нас, свя́те Корни́лие.

И ны́не, Богоро́дичен: Кто Тебе́ не ублажи́т: Вход. Проки́мен дне. Чте́ния три преподо́бническая (зри 21 мая).

На лити́и стихи́ры, глас 1:

Пра́зднуя па́мять твою́, о́тче Корни́лие,/ собра́вшиися ча́да твоя́,/ любе́зно облобыза́ем твою́ ра́ку/ и, твоя́ моли́твы на по́мощь призыва́юще,/ про́сим твоего́ заступле́ния:/ предста́ни, о нас, преподо́бне, моля́ся к Ще́дрому Влады́ке/ и Того́ ро́ждшей Богома́тери,/ улучи́ти нам ми́лость в День су́дный/ и десна́го стоя́ния причасти́тися.

Глас 2: Обоне́жстии лю́дие,/ Небе́снаго жи́теля стяжа́вше,/ к нему́же ны́не притека́юще, возопии́м:/ спаси́ ны от бед моли́твами твои́ми,/ свя́те Корни́лие.

Глас 3: Вели́кий гра́де Пско́ве, весели́ся,/ в не́мже роди́ся муж жела́ний духо́вных;/ Оло́нецтии преде́лы, лику́йте,/ в вас бо по́двиги и труды́ оте́ц показа́;/ ра́дуйся и ты, е́зеро Оне́го,/ име́я кра́сный Палео́ток,/ в не́мже оте́ц кинови́ю возгради́,/ я́же бысть и́ноком спаси́тельное прибе́жище;/ ра́дуйся и ты, богонасажде́нный ото́че,/ иде́же процвете́, я́ко ке́др, доброде́тели прекра́сный:/ ра́дуйся, и сосе́дствующая того́ оби́тели ве́се Толву́йская,/ возвеща́ющи ку́пно по́двиги уго́дника Бо́жия,/ его́же ра́ку целу́юще,/ усе́рдно вси возопии́м к нему́:/ не преста́й моли́ти о нас Влады́ку Христа́,/ о́тче преподо́бне Корни́лие.

Сла́ва, глас 4:

Адама́нтово терпе́ние преподо́бнаго ви́девше,/ о дру́зи, возвесели́мся:/ де́лаше бо вы́ну тому́ враг беды́,/ изощря́я нань лю́тыя страсте́й стре́лы,/ и разли́чными по́мыслы томя́ше его́ ду́шу,/ но того́ кре́пость зря посрамля́шеся,/ во́ина его́ ви́дя изря́дна./ У́бо и мы, я́ко кре́пкому победи́телю лю́тых страсте́й/ и преди́вному отцу́ на́шему, возопии́м:/ отжени́ от нас стра́сти на́ша,/ засту́пниче наш Корни́лие.

И ны́не, Богоро́дичен: При́зри на моле́ния:

На стихо́вне стихи́ры, глас 5.

Подо́бен: Ра́дуйся:

Ра́дуйся, о́тче Корни́лие,/ гра́ду Пско́ву похвала́ вели́кая,/ Обоне́жстей стране́ красота́ неувяда́емая,/ Палео́строву украше́ние ди́вное,/ верте́пу твоему́ сла́ва безсме́ртная;/ ра́дуйся, Боже́ственный хра́ме,/ в не́мже благоизво́ли Всеблаги́й Госпо́дь/ те́лу твоему́ свято́му почи́ти/ и ра́ку твою́ чуде́с исто́чником соде́лати./ Ра́дуйся, оби́тель свята́я,/ в ню́же соше́дшеся любо́вию в па́мять твою́,/ све́тло торжеству́тоще,/ восхва́лим безмо́лвия рачи́теля,/ и́стиннаго по́стника,/ всеизря́днаго де́лателя зако́на Бо́жия,/ свети́льника благода́тнаго,/ Небе́снаго Сио́на жи́теля,/ зако́н бо пло́ти ума́ твоего́ не возмо́же поколеба́ти,/ но зако́ну ума́, о Бо́зе влады́чествующему,/ зако́н во удесе́х побежде́н быва́ет,/ е́жо принося́ тебе́ ны́не, свя́те Корни́лие,/ Христа́ приле́жно моли́,/ дарова́ти нам ве́лию ми́лость.

Стих: Честна́ пред Го́сподем/ смерть преподо́бных Его́.

Ра́дуйся, о́тче Корни́лие,/ я́ко ото́к твой яви́ся обурева́емым приста́нище ти́хое,/ в не́м же благопло́дный сад насади́л еси́;/ ра́дуйся, я́ко и по сме́рти безсме́ртною сла́вою сия́я,/ блиста́еши с ве́рою приходя́щим чудесы́ твои́ми./ Ра́дуйся, я́ко раб ве́рен Влады́це,/ вшел еси́ в несконча́емую ра́дость Го́спода своего́,/ Его́же приле́жно моли́/ дарова́ти нам ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, о́тче Корни́лие,/ созда́телю до́му Богома́тере усе́рдный,/ пра́вило и́ноком изя́щное,/ па́стырю слове́сных ове́ц ди́вный,/ па́губных страсте́й обличи́телю,/ после́дователю Христо́в усе́рднейший,/ милосе́рдия пучи́но вели́кая,/ напа́ствуемых предста́телю тепле́йший,/ скорбя́щим уте́шителю сладча́йший,/ боля́щим врачу́ безме́здный,/ в мо́ри пла́вающим окорми́телю предо́брый,/ Христа́ приле́жно моли́/ дарова́ти нам ве́лию ми́лость.

Сла́ва, глас то́йже. Самогла́сен:

О преподо́бне, от Христо́вых слове́с научи́вся/ вну́тренняго челове́ка от страсте́й грехо́вных очища́ти:/ от се́рдца бо исхо́дят помышле́ния зла́я:/ тем в безмо́лвии доброде́телей де́ланием/ и благода́ти де́йством серде́чную чистоту́ стяжа́в,/ сосу́д чист Свято́му Ду́ху яви́ся./ Обоне́жская страна́, хва́лящися, торжеству́ет,/ стяжа́вши себе́ во пло́ти А́нгела,/ и ото́к с пеще́рою украша́ются,/ возрасти́вши в себе́ плод еде́мский,/ ди́внаго отца́ Корни́лия,/ к нему́же и мы возопии́м:/ моли́ся о нас, преподо́бне.

И ны́не, Богоро́дичен: Храм и дверь еси́:

Тропа́рь, глас 5:

От ю́ности, прему́дре, приле́жно подвиза́вся,/ от Бо́га наставля́емь,/ оте́чество свое́ оста́вль – град Псков,/ и всели́ся в пусты́ню,/ во ото́це вели́каго е́зера Оне́га,/ и́ноки собра́ му́дре/ и извеще́нием Свята́го Ду́ха оби́тель согради́/ и храм созда́ Пресвяте́й Богоро́дице/ в похвалу́ Рождества́ Ея́,/ струя́ми же слез твои́х/ безпло́тныя враги́ погрузи́л еси́/ и жития́ твоего́ целому́дрием со а́нгельскими ли́ки совокупи́ся,/ преподо́бне о́тче Корни́лие,/ с ни́миже Христа́ Бо́га моли́/ спасти́ся душа́м на́шим.

Сла́ва, и ны́не, Богоро́дичен:

Ра́дуйся, две́ре Госпо́дня непроходи́мая:

НА У́ТРЕНИ

На Бог Госпо́дь:тропа́рь свята́го два́жды. Сла́ва, и ны́не,Богоро́дичен.

По 1-м стихосло́вии седа́лен, глас 2:

Жела́я бу́дущих благ, презре́л еси́ настоя́щая/ и, в пусты́ню всели́вся, посто́м и труды́ те́ло свое́ изну́рил еси́/ и, ду́шу доброде́тельми очи́стив, к Бо́гу возше́л еси́,/ Ему́же предстоя́, моли́ о нас, преподо́бне.

Сла́ва, и ны́не, Богоро́дичен:

Во́лны напа́стей воста́ша на ны, Де́во,/ в ни́хже лю́те обурева́еми, бе́дствуем,/ Ты же, о Богома́ти, простри́ держа́вную Твою́ десни́цу,/ из глубины́ зол в приста́нище ми́лости Твоея́ введи́, Влады́чице.

По 2-м стихосло́вии седа́лен, глас 3:

Ото́ка оти́шие посреде́ вели́каго е́зера Оне́га узре́в,/ всели́лся еси́ в онь, преподо́бне,/ и, в пеще́ру те́мну и те́сну вшед,/ моли́твами и посто́м Бо́гови угоди́л еси́,/ Ему́же ны́не предстоя́, моли́ся о нас,/ я́ко оте́ц о де́тех, ко Влады́це.

Сла́ва, и ны́не, Богоро́дичен:

Кто, к Тебе́ прише́д, отхо́дит печа́лен,/ о всего́ ми́ра сладча́йшая Ра́досте!/ Ты бо еси́ безнаде́жным кре́пкая наде́жда/ и ни́щим неотъе́млемое бога́тство,/ гре́шным же те́плая Засту́пнице и ско́рая ко спасе́нию по́мощь.

По полиеле́и седа́лен, глас 8:

Кре́пкаго твоего́ по Бо́зе жела́ния не отвлеко́ша, о́тче Корни́лие,/ ни оте́чества приве́ты, ни друго́в любле́ния,/ и пусты́нный глад, ну́жда, труды́ и бде́ние не мого́ша твоего́ те́ла разсла́бити,/ и пеще́ра, ма́ла и те́мна, не приведе́ тя во у́жас и уны́ние,/ но, я́ко адама́нт, и посреде́ пе́щи страсте́й стоя́,/ невреди́м пребы́л еси́,/ и нам одоле́ти сия́ помози́ и моли́ся о нас, преподо́бне.

Сла́ва, и ны́не, Богоро́дичен:

К кому́ прибе́гнем, бе́днии гре́шницы, всем страсте́м пови́ннии лю́дие,/ ра́зве Тебе́, Всеми́лостивая Влады́чице?/ Твои́х бо щедро́т не оскудева́ет мо́ре,/ Твоего́ заступле́ния не безмо́лвствует сло́во,/ те́мже всех нас поми́луй, Цари́це,/ вся ны спаси́, Богома́ти:/ Ты бо еси́ избра́на от всех родо́в в заступле́ние и спасе́ние на́ше.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми?Ева́нгелие от Матфе́я, зача́ло 43.

По 50-м псалме́ стихи́ра, глас 2:

Доброде́тели твоя́, о́тче,/ яви́ша тя нам, лю́дем твои́м:/ оста́вил бо еси́ оте́чество,/ да живо́т ве́чный получи́ши,/ в пусты́ню всели́вся,/ в пеще́ру те́мну затвори́лся еси́,/ да во све́тлость Вы́шняго Иерусали́ма вни́деши;/ чистото́ю и доброде́тельми/ сподо́бился еси́ зре́ти несказа́нную добро́ту Влады́чню,/ ея́же и нам насы́титися моли́,/ преподо́бне Корни́лие.

Кано́н преподо́бному, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Человеколю́бче Христе́,/ даждь ми сло́во воспе́ти Твоего́ уго́дника,/ напосле́док дний я́вльшагося/ и всю на́шу страну́ житие́м удиви́вшаго.

Ю́ности моея́ неве́жествие пощади́,/ и коле́блемыя по́мыслы стра́хом Госпо́дним укрепи́, о́тче,/ и не возгнуша́йся мене́, пе́ти тя начина́ющаго.

Ди́вное твое́ житие́ челове́ки удиви́ло есть,/ и А́нгели, ви́девше, возра́довашася,/ я́ко, пло́тян сый, к Безпло́тным лико́м прише́л еси́.

Богоро́дичен: Небе́сный Царь, ви́дя челове́ка, преступле́нием ги́бнуща,/ благоизво́ли от Тебе́ воплоти́тися, Пресвята́я Де́во,/ и Тебе́ показа́ челове́ческому ро́ду покро́в и заступле́ние.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя, дух мои́.

А́нгельское житие́ во пло́ти пожи́л еси́, о́тче Корни́лие,/ сего́ ра́ди прославля́ешися ве́чно в Небе́сных оби́телех.

Госпо́день Крест от ю́ности взем на ра́мо свое́, о́тче,/ умертви́л еси́ стра́сти плотски́я воздержа́нием и моли́твами.

От ю́ности твоея́ терпе́ния мече́м вооружи́вся,/ порази́л еси́, преподо́бне, главу́ велиа́рову/ и ко́зни его́ попра́л еси́.

Богоро́дичен: Кто ин в ро́дех родо́в просла́влен бысть, я́коже Ты, Влады́чице?/ Бо́га бо Небе́снаго Ма́ти и всея́ тва́ри Госпожа́ показа́ся.

Седа́лен, глас 3:

Ше́ствуя путе́м за́поведей Госпо́дних,/ обре́л еси́ кора́бль безстра́стия,/ на него́же всед, преше́л еси́ жите́йскую пучи́ну, му́дре,/ и ны́не, веселя́ся, лику́еши со А́нгелы во дво́рех Небе́сных,/ и мо́лишися за ду́ши на́ша, хода́таю наш ди́вный, о́тче Корни́лие.

Сла́ва, и ны́не, Богоро́дичен:

Непреста́нно погружа́ема мя зря волна́ми страсте́й мои́х, Влады́чице Всепе́тая,/ простри́ держа́вную Твою́ десни́цу/ и изба́ви мя от тиме́ния глубины́:/ мо́лится бо Тебе́ за мя хода́тай наш, ди́вный Корни́лий.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Ото́к среде́ вели́каго е́зера Оне́га обре́л еси́/ и, в онь всели́вся еди́н,/ Христо́ви еди́ному живы́й, просла́вился еси́.

Подо́бяся пра́отцу Авраа́му,/ из гра́да Пско́ва, я́коже он иногда́ из оте́чества, отше́д,/ всели́лся еси́ в пусты́ню, Бо́гови живы́й.

Ни теснота́ пеще́ры, ни пусты́н ото́ка,/ ни бра́шна ску́дость к малоду́шию тя привести́ возмого́ша:/ вся бо сия́ терпе́нием победи́л еси́.

Богоро́дичен: И́мамы Тя наде́жду/ и те́плую о нас Предста́тельницу к Сы́ну и Бо́гу Твоему́,/ Его́же моли́ти не преста́й, Влады́чице, при́сно.

Песнь 5

Ирмо́с: У́тренююще, воние́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Лю́таго врага́ диа́вола терпе́ния стрела́ми устрели́в,/ главу́ его́ смире́ния мече́м порази́л еси́, Го́сподеви вопия́:/ ра́зве Тебе́, ино́го не зна́ю.

Неду́г разслабле́ния иногда́ явле́нием свои́м от стра́ждущаго му́жа отгна́в,/ во и́ночество приве́л его́, вопию́ща Христо́ви:/ ра́зве Тебе́, ино́го не зна́ю.

Язы́к на славосло́вие,/ о́чи на бде́ние, мысль на моли́тву,/ главу́ с коле́нами на поклоне́ние вдал еси́, Го́сподеви взыва́я:/ ра́зве Тебе́, ино́го не зна́ю.

Богоро́дичен: Храм Твой, Богома́ти, его́же Ти созда́ Корни́лий,/ прия́ла еси́, я́ко А́велеву же́ртву Госпо́дь,/ приими́ и нас, вопию́щих:/ ины́я, ра́зве Тебе́, Засту́пницы не зна́ем.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Весь в багряни́цу чистоты́, о́тче, оде́ялся еси́/ и, в Небе́сныя черто́ги всели́вся, Спа́су пое́ши:/ сла́влю Тя, Христе́ Бо́же наш.

А́ще земля́ и сокры́ тя,/ но чудеса́, от ра́ки твоея́ излива́емая,/ убежда́ют нас пе́ти Влады́це:/ сла́вим Тя, Христе́ Го́споди, Бо́же наш.

Любо́вию твое́ю прилепи́вся Влады́це,/ не преста́й моли́ти за ны, рабы́ твоя́,/ да и мы с тобо́ю вопие́м:/ спаси́ ны, Христе́ Бо́же наш.

Богоро́дичен: Ю́ноши и де́вы, обурева́емии страсте́й волна́ми,/ прибега́ют в ти́хое приста́нище Твоего́ милосе́рдия и вопию́т:/ спаси́ ны, Многоми́лостивая Влады́чице.

Конда́к, глас 3.

Подо́бен: Де́ва днесь:

Я́ко А́нгел во пло́ти, на земли́ показа́ся,/ поще́нием насажде́н быв, преподо́бне о́тче Корни́лие,/ наста́вник и́ноком мно́гим был еси́,/ сего́ ра́ди вопие́м ти:/ моли́ Христа́ Бо́га спасти́ся душа́м на́шим.

Ада́м за преступле́ние дре́вле из Еде́ма изгна́н бысть,/ и те́рние и волче́ц пожа́,/ и, нетле́нен сый, в тле́ние впаде́;/ ты же пусты́й ото́к насели́, и пеще́ру Не́бо соде́ла,/ и, тле́нен сый, нетле́нную жизнь насле́дова./ Те́мже, притека́юще к ра́це твое́й, благочести́вии лю́дие вопию́т:/ о́тче Корни́лие, моли́ Христа́ Бо́га/ спасти́ся душа́м на́шим.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

О тебе́, о́тче Корни́лие, хва́лящеся, Обоне́жстии лю́дие/ притека́ют во храм Пречи́стыя Богома́тере и вопию́т Рожде́нному от Нея́:/ благослове́н еси́, Го́споди Бо́же, во ве́ки.

Отрокови́ца, немощно́е о́ко иму́щи,/ притече́ к ра́це твое́й, с ве́рою моля́щися,/ и, получи́вши сла́дкий свет, вопия́ше:/ благослове́н еси́, Го́споди Бо́же, во ве́ки.

Богоро́дичен: Пресвята́я Де́ва роди́ Сы́на, вся́ку печа́ль потре́бльшаго,/ к Нему́же вопие́м:/ благослове́н еси́, Го́споди Бо́же, во ве́ки.

Песнь 8

Ирмо́с: Богоглаго́ливии о́троцы, в пещи́/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.

Пла́ванием твои́м Оне́го е́зеро освяти́ся, свя́те,/ живу́щии же при нем лю́дие вопию́т:/ благослови́те, дела́ Госпо́дня, Го́спода.

Живу́щу ти в разсе́лине ка́менней,/ освяти́ся ото́к твои́ми моли́твами,/ и кинови́я, ра́дующися, с весе́лием вопие́т:/ благослови́те, дела́ Госпо́дня, Го́спода.

Стремле́ния плотска́я, тя́жкими вери́гами/ и по́ясом желе́зным те́ло свое́ неми́лостивно связа́в,/ увяди́л еси́, поя́:/ благослови́те, дела́ Госпо́дня, Го́спода.

Богоро́дичен: Кто за ны мо́лится Вы́шнему та́ко усе́рдно, я́коже Ты, о Богома́ти!/ Те́мже вопие́м:/ да благослови́т предста́тельство Твое́, Госпоже́, Го́спода.

Песнь 9

Ирмо́с: Воспита́нная во свята́я святы́х/ и ро́ждшая Свет вселе́нныя,/ Благода́тная, ра́дуйся,/ пе́сньми Рождество́ Твое́ велича́ем.

Уста́ твоя́, о́тче, не преста́ша благослови́ти Бо́га,/ ру́це же в рукоде́лии и коле́на в поклоне́нии не ослабе́ша никогда́же:/ те́мже и мы Укрепи́вшаго тя велича́ем.

Ю́же получи́ша сла́ву святи́и,/ возжеле́л еси́ и ты причасти́тися тоя́,/ в не́йже сый ны́не,/ помяни́ и нас, почита́ющих святу́ю твою́ па́мять.

Земля́, име́ющи тя, на себе́ живу́ща, ра́довашеся,/ и Не́бо, прие́мшее тя в себе́, до́браго раба́ Влады́чня, весели́тся,/ мы же непреста́нно Бо́га велича́ем.

Ра́ка – о́браз подо́бия твоего́,/ град Псков – рожде́ние,/ пеще́ра – по́двиги,/ кинови́я – па́стырство,/ свя́тость чудеса́ сказа́вше,/ всем тя пропове́даша.

Богоро́дичен: Ю́ности моея́ не возгнуша́йся, Влады́чице,/ до конца́ бо о́ная оскверне́на есть,/ но покая́ния сле́зы ми даждь,/ и ве́ру мою́ к Тебе́ приими́, и спаси́ мя.

Свети́лен:

Насажде́н Бо́гом посреде́ ото́ка, я́ко фи́никс, о́тче,/ и пеще́ра израсти́ тя нам, я́ко кри́на благоуха́нна,/ ра́ка же и о́браз твой цельбы́ то́чат всегда́ с ве́рою приходя́щим.

Сла́ва, и ны́не, Богоро́дичен:

В похвалу́ Рождества́ Твоего́ воздви́же храм Корни́лий, Твой уго́дник,/ его́же Ты спа́сши, просла́вила еси́ во страна́х ру́сских;/ помози́ и нам, Богома́ти, бе́дствующим лю́те,/ и всех нас поми́луй.

На хвали́тех стихи́ры, глас 8.

Подо́бен: О, пресла́внаго чудесе́:

О, пресла́вное чу́до!/ Коль прему́др купе́ц бысть Корни́лий/ и какову́ бога́ту сотвори́ ку́плю,/ ча́щею ле́са стяжа́ еде́мский рай/ и ка́менным верте́пом Небе́сное Ца́рство насле́дова./ О, каковы́й нам ди́вен оте́ц дарова́ся!/ Его́же ра́ди, Христе́,/ спаси́ ду́ши на́ша, я́ко Милосе́рд.

Принеси́те ве́ру, боля́щии,/ гряди́те, цельбу́ получи́ти и́щущии:/ се бо преподо́бный Корни́лий,/ я́ко со́лнце, сла́дкий свет дарова́/ и разсла́бленному те́лом ско́рое здра́вие соде́ла./ О, каково́ свети́ло Обоне́жстей стране́ дарова́ся!/ Его́же ра́ди, Христе́,/ спаси́ ду́ши на́ша, я́ко Милосе́рд.

От шу́ма жите́йских волн удали́лся еси́/ во о́стров Па́лей,/ иде́же ни глубина́ страсте́й,/ ни бу́ря духо́в проти́вных/ тве́рдости ума́ твоего́, о́тче Корни́лие, не возмо́же поколеба́ти,/ но, по́двигом до́брым в безмо́лвии подвиза́вся,/ благоуго́ден Христу́ яви́ся./ В ра́дости су́ща пра́ведных, всеблаже́нне,/ мо́лим тя вся́ку печа́ль и го́ресть от душ на́ших отгна́ти,/ благоче́стно пра́зднующих светоно́снуто твою́ па́мять.

В Небе́сных сый оби́телех,/ преподо́бне о́тче Корни́лие,/ Влады́ку всех моли́/ оби́тель сию́ и вся гра́ды и страны́ христиа́нския/ в ми́ре сохрани́ти,/ Обоне́жския же страны́ и всех нас све́том Богоразу́мия просвети́ти,/ да, благоче́стно чту́ще па́мять твою́,/ после́дуем святы́м стопа́м твои́м.

Сла́ва, глас 8, самогла́сен:

От пу́стыни ди́вен гра́жданин/ и от пеще́ры сла́вный чудотво́рец яви́лся еси́, о́тче Корни́лие:/ живы́й бо в них, подвиза́ся терпели́вно/ и блаже́нство ра́йское насле́довал еси́,/ в не́мже ны́не сый, лику́я,/ помина́й нас, чту́щих твою́ па́мять,/ и моли́ся о нас, преподо́бне.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми?Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́.Ева́нгелие от Луки́, зача́ло 24. Прича́стен: В па́мять ве́чную:

Моли́тва

О преподо́бне о́тче наш Корни́лие, вели́кий уго́дниче Бо́жий и ско́рый в беда́х предста́телю! Не забу́ди, я́коже обеща́лся еси́, посеща́ти нас, чад свои́х; а́ще бо те́лом от нас и отше́л еси́, но ду́хом с на́ми пребыва́еши. Мо́лимся у́бо тебе́, о преподо́бне о́тче Корни́лие, бу́ди предста́тель за ны, гре́шныя рабы́ своя́, ко Го́споду Иису́су Христу́ и Пречи́стей Его́ Богома́тери, Влады́чице на́шей Богоро́дице, да изба́вимся от гла́да, губи́тельства, тру́са, пото́па, огня́ и меча́, от наше́ствия иноплеме́нных и междоусо́бныя бра́ни, от напра́сныя сме́рти и от всех враго́в ви́димых и неви́димых. О преподо́бне о́тче Корни́лие! Услы́ши нас, гре́шных рабо́в свои́х, моля́щихся тебе́, изря́днее же в час сей со слеза́ми припа́дающих к тебе́: не отри́ни нас от своего́ заступле́ния: а́ще бо и гре́шнии есмы́, но с ве́рою притека́ем к честно́му твоему́ гро́бу и с любо́вию облобыза́юще честну́ю твою́ ико́ну, уми́льно зове́м: приими́ от нас, недосто́йных, моли́тву сию́, я́ко кади́ло благово́нное, я́ко же́ртву благоприя́тну, и умерщвле́нныя наша ду́ши злыми де́лы и по́мыслы оживи́, преподо́бне, и просвети́ на́ша о́чи серде́чныя, я́коже и деви́це Ага́фии исцели́л еси́ десно́е о́ко, и зре́ти сотвори́л, и Бори́су стра́ждущему во сне яви́лся еси́, и, от разслабле́ния здра́ва соде́лавши, во и́ноческий о́браз приве́л еси́ его́, та́кожде и нас, содержи́мых у́зами вра́жиими, и́миже связа́ нас зло́е на́ше произволе́ние, исто́ргни из глубины́ прегреше́ний на́ших и к пути́ покая́ния наста́ви, и от се́ти диа́воли разреши́ ми́лостивным свои́м предста́тельством. Ами́нь.

НА ВЕЛИ́ЦЕЙ ВЕЧЕ́РНИ

Блаже́н муж:1-й антифо́н. На Го́споди, воззва́х:стихи́ры, глас 8:

Ны́не приспе́ день свята́го твоего́ успе́ния,/ я́ко со́лнце, возсия́ светоза́рная твоя́ па́мять,/ лучи́ испуща́я твои́х доброде́тельных дея́ний,/ преподо́бне треблаже́нне Игна́тие,/ све́том чуде́с твои́х ра́достно весели́т/ ду́ши приходя́щих тебе́ с ве́рою,/ исцеле́ния подава́я душа́м и телесе́м на́шим./ Тем и мы у́бо, гре́шнии,/ ра́достно моли́твы де́юще,/ насыща́еми твои́ми присеще́нии,/ ве́рно ублажа́ем тя, уго́дниче Христа́ Бо́га на́шего,/ Его́же моли́ от тли и бед спасти́ся рабо́м твои́м.

Ра́зум твой, блаже́нне Игна́тие,/ све́том Боже́ственным сия́я,/ не оскверни́ся плотски́ми во́лями,/ но вы́ше всех ми́ра быв,/ сего́ ра́ди и чи́стая твоя́ душа́/ правове́рием блиста́ющи яви́ся,/ озаря́ет ве́рных исполне́ние,/ бесо́вское же омраче́ние отгоня́ющи/ от приходя́щих тебе́ с ве́рою./ Тем я́ко прича́стника благода́ти/ вои́стинну тя ублажа́ем, досточу́дне,/ Христа́ Бо́га моли́/ от тли и бед спасти́ рабы́ твоя́.

Глаго́лом Боже́ственным после́дуя/ и сим вы́ну поуча́яся,/ неосла́бно претерпе́л еси́ и темни́цы боле́зненный затво́р./ Те́мже ны́не преждепросла́вленным отце́м бы́ти ра́вен сподо́бися от Бо́га,/ Ду́ху Свято́му вообрази́вшу тя светообра́зна,/ в чудесе́х показа́ тя,/ и сего́ ра́ди неоску́дно пролива́еши/ исто́чник приснотеку́щих исцеле́ний/ от святы́я твоея́ ра́ки/ со благове́рием прише́дшим ти, Игна́тие прему́дре,/ моли́ Христа́ Бо́га/ от тли и бед спасти́ся рабо́м твои́м.

Сла́ва, глас 6:

Ка́ко тя, преподо́бне Игна́тие, по достоя́нию воспое́м/ или́ ки́ими пе́сненными добро́тами венча́ем?/ Кто бо, слы́ша безме́рное твое́ смире́ние/ и терпе́ние, е́же в ско́рбех, не удиви́тся,/ и е́же ко всем кро́тостное и беззло́бное,/ и по святе́м твое́м преставле́нии/ к неду́гующим душе́ю ми́лование, исправле́ние,/ и к су́щим в беда́х и боле́знех ско́рое поможе́ние,/ и всех, благоле́пне, в ну́ждных посещение?/ И ны́не, соше́дшеся в па́мяти твое́й,/ честну́то твою́ и многоцеле́бную ра́ку облобыза́ем, глаго́люще:/ ра́дуйся, страстоте́рпче Христо́в,/ темни́чным озлобле́нием непобеди́мый,/ но при́сно победи́вый диа́вола свои́м кре́пким терпе́нием./ Ра́дуйся, блаже́нне,/ венце́м венча́ся от Вседержи́теля Бо́га,/ Его́же моли́ спасти́ся душа́м на́шим.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чте́ния три преподо́бническая (зри 21 мая).

На лити́и стихи́ры, глас 3:

Боже́ственным ра́зумом утверди́вся,/ от млады́х ногте́й, преподо́бне,/ Христу́ во след идти́ вожделе́л еси́,/ и сего́ ра́ди, я́ко и на Ио́сифа,/ враг искуше́ние наведе́ на тя,/ затво́ру темни́чному подклони́ тебе́ озлобле́ньми мно́гими,/ хотя́ от Бо́га преклони́ти ду́шу твою́./ Ты же, преподо́бне, укрепля́емь свы́ше благода́тию,/ непобеди́м обре́теся все́ми того́ приложе́нии,/ но, я́ко кре́пкий адама́нт, победи́ сего́ тве́рдым терпе́нием./ Тем и, возлю́бленне,/ по мно́зех доброде́телех, я́ко фи́никс, процве́л еси́,/ не даде́ себе́ поко́я, ни ослабле́ния,/ но при́сно удруча́ше плоть свою́ посто́м и моли́твами,/ день и нощь прилежа́ше Бо́гови,/ и на коне́ц жития́ украше́ние а́нгельское,/ вели́кий о́браз восприя́л еси́,/ оты́де ко Го́споду, ра́дуяся./ Ему́же о нас с ли́ки святы́х моли́ся,/ соверша́ющих при́сно па́мять твою́.

Ду́шу ми́лостиву име́я и чи́сто помышле́ние,/ се́рдце сокруше́нно и смире́нно, бо́дростию укра́шено,/ и к Бо́гу ве́ру непосты́дну со благоразсу́дным благодаре́нием/ во у́зных утесне́ниих и в ско́рбных нахожде́ниих,/ сего́ ра́ди скорбя́ща бра́та своего́ утеша́ше, глаго́ля:/ бра́те, не скорби́, но претерпи́м маловре́менное сего́ утесне́ния,/ да полу́чим от Бо́га ми́лость в день осужде́ния.

Ни ми́ра возмуще́ние, ни вла́сти удержа́ние,/ ни сла́ва вре́менная, ниже́ тле́емое бога́тство,/ твоея́ к Бо́гу любве́ не возмого́ша соврати́ти,/ но вся, я́же в ми́ре, оплева́в, отри́ну/ и темни́чный затво́р на мно́га ле́та,/ я́ко наслажде́ние све́та, ра́достно подъя́л еси́,/ те́мже ны́не Христо́ви предстои́ши со А́нгельскими ли́ки,/ моли́ непреста́нно град твой сохрани́ти/ и святу́ю твою́ оби́тель от злых прихожде́ний,/ и христоимени́тое мно́жество в ве́ре утверди́ти,/ и спасти́ ду́ши на́ша.

Сла́ва, глас 2:

Свяще́нное твое́ житие́/ све́том невеще́ственным трисо́лнечнаго Божества́ озари́вся,/ преподо́бне Игна́тие,/ нощь непостоя́ннаго жития́ сего́ пре́йде непоткнове́нно,/ чистото́ю сия́я, моли́твою и посто́м укра́шен яви́ся,/ я́ко со́лнце, сердца́ ве́рных озаря́я./ Свята́я твоя́ ра́ка чуде́с лучи́ испуща́ет/ приходя́щим ве́рою пра́вою и те́плым жела́нием,/ те́мже, припа́дающе, мо́лимся:/ испроси́ у Христа́ Бо́га стране́ на́шей/ безмяте́жное пребыва́ние от наве́т вра́жиих,/ побе́ды на враги́ дарова́ние,/ и умире́ние ми́рови,/ и спасе́ние душа́м на́шим.

И ны́не, пра́здника.

На стихо́вне стихи́ры, глас 2.

Подо́бен: До́ме Евфра́фов:

Дом Свята́го Ду́ха –/ се́рдце свое́ к Бо́гу возложи́,/ воздыха́нии тя́жкими сие́ сломи́л еси́,/ преподо́бне Игна́тие,/ плоть соедини́в ду́хови.

Стих: Честна́ пред Го́сподем/ смерть преподо́бных Его́.

Дом ве́ры и терпе́ния,/ честна́я твоя́ ра́ка весели́т всех,/ приходя́щих с ве́рою/ во святу́ю твою́ оби́тель,/ чудеса́ оби́льно излива́ющи.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Дом и жили́ще Христо́во,/ Богому́дре Игна́тие, был еси́,/ те́мже и нас/ Тому́ до́мы соде́лай,/ и́же святу́ю твою́ па́мять почита́ющих.

Сла́ва, глас 6:

Свята́го ко́рене ру́сскаго/ равноапо́стольнаго вели́каго кня́зя Влади́мира/ плод прекра́сен процвете́,/ преподо́бне Игна́тие,/ тем и в па́мяти твое́й пе́сньми и пе́нии восхва́лим/ и, ублажа́юще тя, глаго́лем:/ ра́дуйся, я́ко свята́я твоя́ чи́стая душа́ на Небеса́ востече́, веселя́ся,/ пра́ведных же ли́цы срето́ша ю, ра́достне вопию́ще:/ сла́ва Бо́гу, укре́пльшему тя,/ е́же одоле́ти врагу́, хотя́щему препя́ти во след Бо́га стопы́ твоя́,/ и сего́ ра́ди селе́ния Небе́сная прия́ша тя/ я́ко сожи́теля своего́,/ и и́стиннаго граждани́на Го́рняго Иерусали́ма,/ и предстоя́теля со святы́ми А́нгелы пресвяты́я сла́вы,/ ея́же велеле́пие насыща́яся,/ помина́й нас, чту́щих святу́ю па́мять твою́.

Тропа́рь, глас 2:

В житии́ свое́м мно́ги ско́рби претерпе́л еси́, блаже́нне,/ и терпе́ния ра́ди вене́ц от Бо́га прия́л еси́,/ и по сме́рти свое́й чудотво́рец показа́лся еси́,/ того́ ра́ди па́мять твою́ пе́сньми почита́ем,/ преподо́бне о́тче наш Игна́тие,/ моли́ся, предстоя́ Святе́й Тро́ице,/ держа́ве сро́дник твои́х богоуго́дней бы́ти/ и сыново́м Русским спасти́ся.

Сла́ва, и ны́не, Богоро́дичен.

НА УТРЕНИ

На Бог Госпо́дь:тропа́рь пра́здника, два́жды. Сла́ва, святаго. И ны́не,пра́здника.

По 1-м стихосло́вии седа́лен, глас 8.

Подо́бен: Прему́дрости:

Просвети́вся от ю́ности Христо́вою благода́тию, преподо́бне,/ целому́дрием и мно́гим терпе́нием житие́ сконча́л еси́ до́бре/ и того́ ра́ди по Боже́ственнем твое́м преставле́нии да́ром чуде́с обогати́ся./ Честна́я твоя́ ра́ка от Всеси́льнаго Бо́га исцеле́ние подава́ет с ве́рою приходя́щим и вопию́щим ти:/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю твою́ па́мять.

Сла́ва, и ны́не, Богоро́дичен:

В кал грехо́вный впадо́х, и несть ми постоя́ния,/ лю́те погрузи́ мя бу́ря согреше́ний мои́х,/ но, я́ко ро́ждшая Сло́во, Еди́наго Человеколю́бца, на мя, раба́ Своего́, при́зри/ и изба́ви мя грехо́вных скверн, и страсте́й душе́вных, и вся́каго озлобле́ния,/ Богоро́дице Неискусому́жная, моли́ Христа́ Бо́га грехо́в оставле́ние дарова́ти,/ Тя бо и́мамы наде́жду, раби́ Твои́.

По 2-м стихосло́вии седа́лен, глас 1.

Подо́бен: Ка́мени занеча́тану:

От ю́ности своея́, я́ко све́тел свети́льник, чистоты́ ра́ди просвети́вся, блаже́нне,/ удали́вся бу́их ю́нош сожи́тельства и всего́, сла́бящаго по́мысл,/ и зе́льным воздержа́нием умертви́в плотско́е свире́пство,/ те́мже и на высоту́ безстра́стия взы́де,/ я́ко А́нгел, пожи́л еси́, посрами́в бесо́вское шата́ние./ И мы у́бо ревну́ем, ели́ко по си́ле, преподо́бне Игна́тие, и зове́м:/ сла́ва Да́вшему ти кре́пость,/ сла́ва Венча́вшему тя,/ сла́ва Подава́ющему тобо́ю всем исцеле́ние.

Сла́ва, и ны́не, Богоро́дичен:

Гаврии́лу веща́вшу Тебе́, Де́во, ра́дуйся,/ со гла́сом воплоща́шеся всех Влады́ка/ в Тебе́, святе́м киво́те,/ я́коже рече́ пра́ведный Давид,/ яви́лася еси́ ши́ршая Небе́с,/ поноси́вши Зижди́теля Твоего́:/ сла́ва Все́льшемуся в Тя;/ сла́ва Проше́дшему из Тебе́;/ сла́ва Свободи́вшему нас рождество́м Твои́м.

По полиеле́и седа́лен, глас 8:

Укрепи́ тя Госпо́дь претерпе́ти в ми́ре сем ско́рбная,/ и сего́ ра́ди в доброде́телех, я́ко фи́никс, процве́л еси́,/ и Той тя преста́ви на ве́чныя оби́тели, с ли́ки преподо́бных весели́тися./ И честну́ю твою́ ра́ку на земли́ чудесы́ просла́ви Христо́с Бог наш,/ Его́же моли́, преподо́бне Игна́тие, согреше́нием оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ О́гнь бо всели́ся в Тя Божества́/ и я́ко Младе́нца дои́ши Зижди́теля и Го́спода./ Те́мже, А́нгельский собо́р и челове́ческий род, досто́йно сла́вим пресвято́е рождество́ Твое́ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ воспева́ющим пресвято́е рождество́ Твое́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние:Ева́нгелие от Матфе́я, зача́ло 43.

По 50-м псалме́ стихи́ра, глас 8:

Ра́дуйся и весели́ся, преимени́тый гра́де Во́логда,/ красу́йся и лику́й, христоимени́тое ста́до богоизбра́нное,/ преподо́бнаго чудотво́рца Игна́тия зря́ще внутрь себе́,/ но́вое сокро́вище, Бо́гом дарова́нное,/ цельбоно́сный гроб чудотво́рный,/ в не́мже положе́н бысть ца́рскаго се́мене клас богодарова́нный,/ драго́е те́ло преподо́бнаго Игна́тия,/ весь мир озаря́ющее чуде́сными сия́нии,/ подаю́щее исцеле́ние ско́рое приходя́щим к нему́ с ве́рою,/ те́мже непреста́нно вопие́м:/ о всеблаже́нне Игна́тие,/ моли́ Христа́ Бо́га пода́ти нам на враги́ посо́бие,/ и ми́ру умире́ние, и спасе́ние душа́м на́шим.

Кано́н, глас 8

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.

Го́споди, Бо́же спасе́ния моего́,/ упра́ви ум мой и просвети́ о́чи се́рдца моего́,/ да воспою́ све́тло Твоего́ рачи́теля торжество́,/ в па́мяти его́ зове́м, веселя́щеся, сла́вно бо просла́вися.

Услы́шав, преподо́бне, Ева́нгельская словеса́ и сия́ насади́ в души́ свое́й,/ крест Хри́стов на ра́мо взем, после́дова Ему́ невозвра́тным по́мыслом, поя́:/ сла́вно бо просла́вися.

Сподо́бися от Бо́га возлю́блен бы́ши чистоты́ ра́ди се́рдца твоего́ и нра́ва пра́ваго,/ в ско́рбех и беда́х неосла́бнаго терпе́ния,/ и сих ра́ди венча́ тя Небе́сными венцы́, пою́щу ти:/ сла́вно бо просла́вися.

Богоро́дичен: Я́ко ло́жницу Боже́ственную и ле́ствицу Небе́сную,/ кади́льницу же невеще́ственную, во светоно́сных ложесна́х Свои́х поне́сшую Христа́,/ Богоизбра́нную Отрокови́цу Мари́ю вси ублажи́м.

Песнь 3

Ирмо́с: Утверди́ся се́рдце мое во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.

Подо́бен бысть А́нгелом, преподо́бне, жития́ чистото́ю укра́шен,/ поревнова́л еси́ пра́отцем: И́ову – во страсте́х, Ио́сифу – во искуше́ниих,/ терпе́ния ве́лий столп показа́ся, те́мже вопие́ши:/ утверди́ся се́рдце мое́ о Го́споде.

Укорени́ся в души́ твое́й, преподо́бне Игна́тие,/ моли́тва непреста́нна, разсужде́ние доброразсу́дное, па́мять сме́ртная,/ и сих ра́ди житие́ сие́ пре́йде без преткнове́ния от вра́жиих наве́т, вопия́:/ утверди́ся се́рдце мое́ о Го́споде.

Ле́вственно те́ло стяжа́в от младе́нства, преподо́бне Игна́тие,/ не умокри́вся вода́ми страсте́й,/ не возбуя́ся се́рдце твое́ ласкосе́рдыми сластолю́бии,/ весь возложи́ себе́ Бо́гови, вопия́:/ утверди́ся се́рдце мое́ о Го́споде.

Богоро́дичен: Святы́х А́нгел су́щи святе́йши,/ сих Соде́теля во Свое́й утро́бе поне́сшая, родила́ еси́,/ Богоотрокови́це Чи́стая, Изба́вителя челове́ком,/ те́мже Ти согла́сно вопие́м:/ утверди́ся се́рдце мое́ о Го́споде.

Ин конда́к, глас 8:

Чи́сто житие́ на земли́ ножи́л еси́,/ ду́шу и те́ло без скве́рны соблю́л еси́/ и терпе́ния ра́ди своего́ мзду восприя́л еси́./ И ны́не на Небесе́х со А́нгелы веселя́ся, преподо́бне о́тче Игна́тие,/ моли́ся непреста́нно Христу́ Бо́гу о всех нас, почита́ющих па́мять твою́/ и притека́ющих к ра́це моще́й твои́х.

Седа́лен, глас 4:

Приспе́ честна́го твоего́ успе́ния светоно́сная па́мять, блаже́нне Игна́тие,/ просвеща́я ду́ши на́ша, пра́зднующих све́тло,/ и, в па́мяти твое́й веселя́щеся, Христа́ непреста́нно сла́вим.

Сла́ва, и ны́не, Богоро́дичен:

И́же на Престо́ле херуви́мстем седя́й, в не́дрех Оте́ческих пребыва́яй,/ я́ко на престо́ле святе́м Свое́м седи́т, Влады́чице, на ло́ну Твое́ю пло́тию,/ Бог бо вои́стинну воцари́ся над все́ми язы́ки, и разу́мно пое́м Ему́,/ Его́же моли́ спасти́ся рабо́м Твои́м.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

И́же на земли́ Христа́ ра́ди смири́вся от млады́х ногте́й, преподо́бне Игна́тие,/ высоту́ благоро́дия оста́вль, те́сным путе́м и ско́рбным ше́ствуя в житии́ сем,/ сего́ ра́ди Небе́сных венце́в сподо́бися от Бо́га, зову́щу ти:/ си́ле Твое́й сла́ва, Человеколю́бче.

Бу́дущих благ жела́я наслади́тися, преподо́бне,/ плоть свою́ поработи́в ду́хови,/ и тем вы́ше всех мудрова́ний ми́ра сего́ бысть,/ освяще́нно Бо́жие жили́ще показа́ся,/ но и по святе́м твое́м преставле́нии с ли́ки безпло́тных вопие́ши Христо́ви:/ си́ле Твое́й сла́ва, Человеколю́бче.

Украси́ся, блаже́нне, де́йством Свята́го Ду́ха,/ взыска́л еси́ пре́жнее оте́чество, погубле́нное родонача́льники дре́вле,/ и дарова́ния терпе́ния ра́ди прия́т от Христа́ Бо́га – чуде́с де́йство,/ сего́ ра́ди пое́м непреста́нно:/ си́ле Твое́й сла́ва, Человеколю́бче.

Богоро́дичен: Преукраше́нна Боже́ственною сла́вою/ И́же вся́ческая от не су́щих соста́вльшаго сло́вом,/ Бо́га сло́во родила́ еси́, Челове́ка вои́стинну бы́вша,/ Его́же о нас моли́ти не преста́й, Богоро́дице, Ма́ти Присноде́во, ве́рою Ти зову́щих:/ си́ле Твое́й сла́ва, Человеколю́бче.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Жела́нием, блаже́нне, Христу́ после́довав и Того́ любо́вию па́че огня́ распали́вся,/ в целому́дрии и незло́бии пре́йде жития́ сего́ пучи́ну,/ ко приста́нищу приста́л еси́ а́нгельскаго пребыва́ния, сего́ ра́ди и мы вопие́м:/ пути́ на́ша напра́ви, мо́лимся.

Естество́м, преподо́бне Игна́тие, кро́ток и ми́лостив,/ не оста́ви нас, чад свои́х, предстоя́щих святе́й твое́й ра́це и моля́щихся тебе́,/ покры́й нас от наве́т вра́жиих святы́ми твои́ми моли́твами и пути́ на́ша напра́ви.

Поуча́яся, блаже́нне, во псалме́х, и пе́ниих, и в пе́снех духо́вных день и нощь,/ тем и без поро́ка му́ченически жизнь свою́ препроводи́л еси́ в затво́ре темни́чнем./ Сего́ ра́ди и по сме́рти свята́я твоя́ ра́ка исцеле́ние подае́т с ве́рою зову́щим:/ пути́ на́ша напра́ви, мо́лимся.

Богоро́дичен: Моли́ И́же из Тебе́ ро́ждшагося Го́спода, Де́во Отрокови́це Чи́стая,/ сохрани́ рабы́ Твоя́ от сопроти́вных обстоя́ний и бесо́вскаго озлобле́ния,/ и́же Тя и́стинную Ма́терь Бо́жию испове́дающих, Влады́чице,/ и пути́ на́ша напра́ви, мо́лимся.

Песнь 6

Ирмо́с: Очи́сти мя, Спа́се, / мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Основа́ние непоколеби́мое в души́ свое́й страх Бо́жий положи́в, преподо́бне,/ посто́м, и бде́нием, и моли́твами простира́яся,/ вся ско́рбная Его́ ра́ди в жи́зни сей претерпе́л еси́,/ тем и святу́ю ду́шу свою́ в ру́це Его́ чи́сте преда́, вопия́ше:/ к Тебе́, Го́споди, воззва́х, и услы́ша мя.

Мно́гими труды́ и по́ты, преподо́бне, зе́млю се́рдца своего́ обнови́в/ и сию́ насе́яв се́менем благоче́стия, прекра́сная Сло́ву пшени́ца яви́ся,/ плод принесе́ Ему́ себе́ стори́чный, вопия́:/ к Тебе́ воззва́х, и услы́ша мя.

Богоро́дичен: Избра́ Тебе́ Госпо́дь во всех ро́дех,/ Благослове́нная в жена́х, Непоро́чная Де́во Богоро́дице,/ я́ко прекра́сное Бо́гу селе́ние, простра́нную Боже́ственную ло́жницу,/ и киво́т святы́ни, и све́щник, и трапе́зу, Чи́стая, и сего́ ра́ди аз вопию́:/ услы́ши мя, Влады́чице, спасе́ние мое́.

Конда́к, глас 8:

Изря́дная о́трасле благочести́ваго ко́рене,/ ди́вный благоро́дный цве́те,/ избра́нный от пеле́н благода́тию Христо́вою,/ возлю́бленный от ю́ности Ду́хом Святы́м,/ де́вственное процвете́ние, Игна́тие блаже́нне,/ днесь, соше́дшеся, ве́рнии, в па́мять твою́,/ похва́льными венцы́ честну́ю твою́ главу́ венча́юще, зове́м:/ ра́дуйся, преподо́бне, сосу́де Свята́го Ду́ха, всея́ Русской земли́ удобре́ние.

И́кос:

Си́лою укрепи́вся Всеси́льнаго Бо́га, блаже́нне,/ на стра́сти па́губныя, я́ко безпло́тен, подвиза́вся,/ и ра́вно А́нгелом житие́ пожи́л еси́, благоро́дия высоту́ оста́вль,/ и вся, я́же в ми́ре сла́дкая и кра́сная, возненави́де, чи́стым се́рдцем после́дова Христу́,/ те́мже от всех слы́шиши:/ ра́дуйся, преподо́бне Игна́тие, о́трасле от ко́рене свята́го царя́ Васи́лия,/ просвети́вшаго святы́м Креще́нием Ру́сскую зе́млю;/ ра́дуйся, отца́ благове́рна плод и ма́тере благочести́выя прозябе́ние;/ ра́дуйся, Христа́ ра́ди претерпе́вый темни́чный затво́р до́блественне;/ ра́дуйся, я́ко твоему́ терпе́нию А́нгели удиви́шася и челове́цы по́льзовашася твои́м незло́бием;/ ра́дуйся, Небе́сный челове́че и земны́й А́нгеле, Свята́го Ду́ха жили́ще;/ ра́дуйся, Го́рняго Иерусали́ма граждани́не и соприча́стниче преподо́бным;/ ра́дуйся, я́ко Тро́ице предстоя́, о нас мо́лишися непреста́нно;/ ра́дуйся, оте́честву на́шему похвало́ и утвержде́ние,/ его́же соблюди́ моли́твами твои́ми от враг ненаве́тно, да вси вопие́м ти:/ ра́дуйся, Игна́тие Богому́дре, всея́ Русския земли́ удобре́ние.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Иму́ще тя к Бо́гу христоимени́тии лю́дие кре́пка моли́твенника, блаже́нне,/ и в печа́лех засту́пника, побо́рника же нера́тна к проти́вных ополче́нию,/ от всех бед спаса́еми моли́твами твои́ми, сви́те, непреста́нно вопие́м:/ благослове́н Бог оте́ц на́ших.

Любо́вию Христо́вою, Богому́дре Игна́тие, просвети́вся,/ доброде́телей ве́лий храм Бо́жий показа́ся, не оскверни́в души́ своея́ добро́ты,/ тем и по честне́м твое́м преставле́нии, Святе́й Тро́ице со А́нгелы предстоя́, вопие́ши:/ благослове́н Бог оте́ц на́ших.

Услы́ши моле́ние раб твои́х, преподо́бне Игна́тие,/ хода́тайствуй Святе́й Тро́ице моли́твами твои́ми,/ да́руй правосла́вным лю́дем побе́ду и одоле́ние на вся враги́/ и вознеси́ рог ве́рных, вра́жия возноше́ния уничижи́ и возвесели́ пою́щия:/ благослове́н Бог оте́ц на́ших.

Богоро́дичен: Его́же родила́ еси́, Го́спода, Влады́чице Чи́стая,/ не преста́й моля́щи изъя́ти мя при́сно от враг, оскорбля́ющих ду́шу мою́,/ и тя́жкое бре́мя грехо́в мои́х расточи́, Богоневе́стная,/ я́ко да, ра́дуяся, вопию́:/ благослове́н Плод чре́ва Твоего́.

Песнь 8

Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

И́же весь Бо́гови от ю́ности освяти́вся, преподо́бне Игна́тие, и к Нему доброде́тельми прибли́жився,/ тле́нная бо вся, я́ко ме́рзость вмени́ и Небе́сное бога́тство насле́дова, вопия́:/ благослове́н Бог оте́ц на́ших.

Любо́вию приими́, блаже́нне, хвалу́ недосто́йных усте́н и скве́рнаго моего́ язы́ка,/ вем бо, о́тче, я́ко Святу́ю Тро́ицу чи́сте зри́ши, а́нгельская прие́мля хвале́ния,/ не пре́зри дете́й немова́ние, я́ко оте́ц чадолюби́в, вопия́:/ благослови́те, вся дела́ Госпо́дня, Го́спода.

Исцеле́ний благода́ть Христо́с тебе́ дарова́:/ больны́я исцеля́ти, слепы́м прозре́ние дарова́ти,/ хромы́м хожде́ние, сухи́м исправле́ние,/ и вся́ческая от Го́спода прия́т, я́ко че́стен до́бльственник, и венце́м от Него́ венча́ся, вопия́:/ благослови́те, вся дела́ Госпо́дня Го́спода.

Богоро́дичен: И́же Ада́ма Соде́тель в ложесна́х Твои́х зи́ждится, Чи́стая,/ и млеко́м пита́ется Пита́яй вся́кое дыха́ние, Де́во Богоро́дице,/ те́мже Тя, я́ко Ма́терь Бо́жию, ве́рнии, прославля́ем и превозно́сим Чи́стую во ве́ки.

Песнь 9

Ирмо́с: Чи́стую сла́вно почти́м, лю́дие, Богоро́дицу,/ огнь Божества́ прии́мшую во чре́ве неопа́льно,/ пе́сньми велича́ем.

И́же не в гада́нии, ни в се́ни, но чи́сто зри́ши Святу́ю Тро́ицу, преподо́бне Игна́тие,/ моли́, мо́лим ти ся, с Богома́терию, чи́сто ро́ждшею Христа́ Бо́га,/ дарова́ти правосла́вным лю́дем побе́ду на враги́ и грехо́в отпуще́ние.

Жития́ сего́ многому́тное мо́ре безпреткнове́нно преше́л еси́, преподо́бне,/ корми́тельницу Ма́терь Бо́жию име́я себе́, наставля́ющу тя,/ те́мже ны́не с ли́ки святы́х веселя́ся, моли́ Христа́ Бо́га,/ да пода́ст це́рквам благоле́пие, и ми́ру умире́ние, и душа́м на́шим ослабле́ние.

Потщи́ся на моли́тву ко Христу́, блаже́нне, с преподо́бным Дими́трием,/ смоле́бники прии́м А́нгельския ли́ки,/ да оте́чество твое́ це́ло и невреди́мо сохрани́т, от враг ви́димых ненаве́тно,/ да тя вы́ну ублажа́ем.

Богоро́дичен: Све́та Боже́ственнаго прия́телище, и́же луча́ми Божества́ мир озари́вшаго,/ на руку́ поноси́вши, Богоблагода́тная,/ мост же и ле́ствица, на высоту́ возводя́щи земны́я, Де́во./ Те́мже, ве́рнии, ублажа́юще, Тя велича́ем.

Свети́лен:

Я́ко заря́ у́тренняя и я́ко пресве́тлое со́лнце, возсия́ па́мять твоя́, преподо́бне,/ я́же в ми́ре су́щим сердца́ озаря́ющи Боже́ственною све́тлостию,/ ты бо терпе́ния ра́ди све́та и дне сын вои́стинну показа́ся./ Те́мже, в па́мяти твое́й соше́дшеся, тебе́ велича́ем.

Сла́ва, и ны́не, Богоро́дичен:

Му́дрость соста́вную и Сло́во Пресу́щное,/ Врача́ всем – Христа́ ро́ждши, Де́во,/ стру́пы и я́звы души́ моея́ исцели́, лю́тыя и мно́го небрего́мыя,/ и се́рдца моего́ мно́гая стра́стная уста́ви помышле́ния.

На хвали́тех стихи́ры, глас 4.

Подо́бен: Дал еси́ зна́мение:

Дал еси́, Го́споди Бо́же,/ терпе́ния му́жество уго́днику Своему́,/ его́же Дух Святы́й измла́да возлюби́,/ и, Сим наставля́емь, претерпе́ темни́чное озлобле́ние,/ доброде́телию и де́лы сия́я,/ целому́дрием украша́емь и кро́тостию,/ тем Твое́ человеколю́бное смотре́ние сла́вим,/ Иису́се Всеси́льне,/ Спа́се душ на́ших.

Дал еси́, Христе́, блаже́нному Игна́тию/ вся претерпе́ти ско́рбная, я́коже Ио́сифу,/ сего́ бо в темни́це сла́вна пред фарао́ном показа́/ и всему́ Изра́илю пита́теля,/ та́ко и преподо́бнаго сего́ просла́ви,/ обогати́в того́ чуде́с де́йством,/ дарова́ти неду́жным оби́льно исцеле́ния./ Тем Твое́ человеколю́бное смотре́ние сла́вим,/ Иису́се Всеси́льне,/ Спа́се душ на́ших.

Дал еси́, Влады́ко, уго́днику Своему́/ добро́ты разу́мныя увязе́ние,/ и ца́рствия благоле́пие,/ и вене́ц пра́вды терпе́ния ра́ди,/ и с ли́ки преподо́бных чи́сте зре́ти/ Божества́ Твоего́ сла́ву же и красоту́,/ и со А́нгелы весели́тися, вопия́:/ Твое́ человеколю́бное смотре́ние сла́вим,/ Иису́се Всеси́льне,/ Спа́се душ на́ших.

Сла́ва, глас 8:

Доброде́телей твои́х исправле́ния, Богому́дре Игна́тие,/ умасти́ша ве́рных сердца́,/ целому́дрием бо и благове́рием,/ я́ко багряни́цею многоце́нною, оде́явся непоро́чне,/ пра́вдою же и кротостию, яко Боже́ственным пресве́тлым венце́м, увязе́ся/ и темни́чным озлобле́нием, я́ко непобеди́м, просла́вися./ Те́мже и со стра́ждущими Христа́ ра́ди/ Ца́рство Небе́сное у Христа́ восприя́л еси́,/ Ему́же с ни́ми предстоя́,/ о нас моли́ся, свя́те,/ спасти́ся душа́м на́шим.

И ны́не, Богоро́дичен:

Влады́чице, приими́ моли́твы раб Твои́х,/ и изба́ви нас/ от вся́кия ну́жды и печа́ли.

Славосло́вие вели́кое и отпу́ст.

На Литурги́и слу́жба преподо́бническая.

НА ВЕЛИ́ЦЕЙ ВЕЧЕ́РНИ

На Го́споди, воззва́х:стихи́ры свята́го, глас 2.

Подо́бен: Егда́ от Дре́ва:

Му́чениче страда́льче Парфе́ние,/ мече́м во главу́ усе́чен,/ тече́нием кро́ве/ фарао́на льсти́ваго и́стинно потопи́л еси́,/ и ны́не то́чиши всем исцеле́ния,/ ве́рою к моще́м твои́м притека́ющим,/ и честну́ю па́мять твою́, блаже́нне, торжеству́ющим.

Прикланя́еши вы́ю Бо́гу,/ Ему́же вся прикланя́ются коле́на, му́чениче чу́дне,/ во главу́ посека́емь,/ и разлуча́емь от до́бляго твоего́ телесе́,/ Христу́ же, всех Главе́, соединя́емь чисте́йним умо́м,/ Его́же ны́не све́ту приближа́яся,/ испроси́ нам, Парфе́ние,/ всем просве́щение, хва́лящим тя.

Струя́ми крове́й твои́х, му́дре,/ за Христа́ излия́нными,/ зе́млю освяти́л еси́,/ ду́хом же ду́хи возвесели́л еси́ безпло́тных сил/ и му́чеников стада́ просвети́л еси́,/ с ни́ми соединя́яся, блаже́нне,/ я́ко добль ору́жник,/ я́ко непобеди́м му́ченик,/ и о нас Бо́гу моля́ся.

Му́чениче страстоно́сче Христо́в,/ су́щия в напа́стех ну́ждных/ спаси́ мольба́ми твои́ми,/ от вся́каго обстоя́ния избавля́я,/ и отгоня́ душегу́бную лю́тую печа́ль,/ благода́ти же и ми́лости нам испроси́,/ я́ко да моли́твами твои́ми спа́сшеся,/ ра́дующеся почита́ем вси,/ честны́я по́двиги твоя́, Парфе́ние.

Сла́ва, свято́му, глас 6:

За Христа́ зако́нно пострада́в, Парфе́ние,/ досто́йно прия́л еси́ от Страстополо́жника Спа́са вене́ц,/ и ны́не со а́нгельскими ра́дуешися чи́ны,/ Вы́шняго светоли́тия наслажда́яся я́сно,/ и Триипоста́сному и пе́рвому Све́ту причаща́яся оби́льно./ Те́мже и мы, благове́рнии лю́дие и любому́ченицы, пе́сньми вопие́м ти:/ ра́дуйся, адама́нте непобеди́мый душе́ю/ и кре́пкий ору́жниче Христо́в,/ ра́дуйся, ле́сти и́дольския потреби́телю/ и и́стины побо́рниче све́тлый,/ но моли́ся Го́сподеви/ и нам житие́м боголюби́вым с тобо́ю получи́ти стоя́ние/ при Престо́ле вели́чествия Его́.

И ны́не, Богоро́дичен.

Вход. Проки́мен дне. Чте́ния му́ченическая (зри 15 мая).

На лити́и стихи́ры, глас 1:

По́двигом до́брым подвиза́лся еси́/ и тече́ние сконча́л еси́ страда́ния твоего́, му́чениче Парфе́ние,/ те́мже в Вы́шних со А́нгелы лику́еши досто́йно,/ боле́знем твои́м прие́м вы́шнее Ца́рство,/ но моли́, му́чениче всеблаже́нне,/ дарова́ти нам ве́лию ми́лость.

Отсече́нием вы́и ве́ры ра́ди/ небе́сным венце́м венча́л еси́ главу́ твою́, Парфе́ние преблаже́нне,/ те́мже нас, соверша́ющих па́мять твою́,/ не преста́й моли́твами твои́ми ко Христу́,/ помина́ти, му́чениче сла́вне.

Глас 4: Побе́ды тезоимени́т показа́лся еси́,/ му́чениче Парфе́ние,/ в по́двизе пропове́дав Христа́ Бога на́шего,/ и пред ца́ри и мучи́тели Того́ испове́дал еси́./ Тем не преста́й моля́ся Еди́ному Человеколю́бцу/ о ми́ре ми́ра, и о христолюби́вых лю́дех,/ и всех, па́мять твою́ соверша́ющих ве́рно,/ изба́вити вся́каго гне́ва.

Сла́ва, глас 5:

Днесь возсия́ па́че денни́цы/ честна́я па́мять страстоте́рпца Христо́ва,/ ве́рных неви́димо сердца́ просвеща́ющи/ и о́блак страсте́й от душ отгоня́ющи/ де́йствием Свята́го Ду́ха,/ к нему́же, мучениколю́бцы, воззове́м:/ ра́дуйся, му́чениче,/ ве́рным, к тебе́ притека́ющим, Парфе́ние блаже́нне,/ яви́лся еси́ богода́нная благода́ть/ и, чуде́с мно́жество простира́я,/ Христа́ непреста́нно моли́ти не оскуде́й/ ве́чных благ получи́ти/ и́же ве́рою соверша́ющим всечестну́ю па́мять твою́.

И ны́не, Богоро́дичен.

На стихо́вне стихи́ры лити́йныя со стихи́:

1. Пра́ведник, я́ки фи́никс, процвете́т,/ я́ко кедр, и́же в Лива́не умно́жится.

2. Насажде́ни в дому́ Госпо́дни,/ во дво́рех Бо́га на́шего процвету́т.

Сла́ва, глас 8:

Име́ет у́бо Боже́ственнейшая твоя́ душа́,/ приснона́мятне Парфе́ние,/ Небе́сный Иерусали́м жили́ще,/ его́же сте́ны пречи́стыма рука́ма Неви́димаго Бо́га живописа́шася:/ и́мать же и всечестно́е и многострада́льнейшее твое́ те́ло,/ преизря́дный сей храм на земли́,/ сокро́вище некра́домое чуде́с и неду́гов врачевство́,/ иде́же притека́юще цельбы́ почерпа́ем./ Соблюди́, всеблаже́нне,/ тя велича́ющий град от проти́вных прираже́ний,/ я́ко име́я дерзнове́ние ко Христу́,/ тя просла́вльшему.

И ны́не, Богоро́дичен.

Тропа́рь, глас 4:

Му́ченик Твой, Го́споди, Парфе́ний,/ во страда́нии свое́м вене́ц прия́т нетле́нный от Тебе́, Бо́га на́шего,/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости,/ того́ моли́твами/ спаси́ ду́ши на́ша.

НА У́ТРЕНИ

На Бог Госпо́дь:тропа́рь пра́здника, дважды. Сла́ва,свята́го. И ны́не,пра́здника.

По 1-м стихосло́вии седа́лен, глас 4:

Я́ко испове́дник и я́ко страда́лец/ на олта́рь Боже́ственный прине́слся еси́, досточу́дне Парфе́ние./ Тве́рдым стоя́нием за ве́ру Правосла́вную/ и безстра́стным испове́данием Ева́нгелия Христо́ва/ А́нгелом безпло́тным уподо́бился еси́,/ те́мже моли́ Христа́ Бо́га спасти́ся душа́м на́шим.

Сла́ва, и ны́не, глас то́йже:

Я́ко Еди́ну в жена́х Благослове́нную/ и Святы́я Це́ркве похвалу́ и украше́ние,/ в бра́нех непреобори́мую по́мощь и ско́рое посеще́ние в печа́ли су́щим/ и́мамы Тя, Богоневе́стная Ма́ти./ Сего́ ра́ди к Тебе́, Благосе́рдная, припа́даем и мольбы́ на́ша прино́сим:/ спаси́ и сохрани́ Святу́ю Це́рковь и нас от вся́ких лю́тых.

По 2-м стихосло́вии седа́лен, глас 8:

Взира́я наде́ждам бу́дущим, Крест Христо́в на ра́мена своя́ взе́мше,/ достохва́льнии му́ченицы Калоге́рие и Парфе́ние,/ и, страда́ньми победи́в врага́, Це́рковь Христо́ву ве́рою сла́вно облиста́сте,/ во упова́нии соверше́нном страсте́м Христо́вым после́довасте,/ Его́же моли́те дарова́ти ми́ру ве́лию ми́лость.

Сла́ва, и ны́не, глас то́йже:

Све́та немерца́ющаго вмести́лище яви́лася еси́, Пречи́стая Де́во Мари́е,/ носи́вши Христа́ Бо́га на́шего,/ И́же есть Свет Присносу́щный, просвеща́яй вся́каго челове́ка гряду́щаго в мир./ Те́мже Тя всехва́льно пое́м и велича́ем.

По полиеле́и седа́лен, глас 4.

Подо́бен: Яви́лся еси́:

Парфе́ния днесь страстоте́рпца/ пра́здник соверша́ем благочестивому́дренно,/ я́ко Христу́ непреста́нно моля́щася,/ всем да́ти ве́лию ми́лость.

Сла́ва, глас 8:

Царю́ веко́в угожда́я,/ царя́ беззако́ннаго вся́кий сове́т отрази́л еси́, сла́вне,/ и истука́нным не поже́рл еси́/ того́ ра́ди же́ртву тебе́ сама́го прине́сл еси́ пожре́нному Сло́ву, пострада́в кре́пко./ Тем и чуде́с источа́еши струи́,/ стра́сти исцеля́я ве́рно приходя́щих к тебе́, страстоте́рпче Парфе́ние,/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

И ны́не, Богоро́дичен

Сте́на непобеди́мая нам, христиа́ном, еси́, Богоро́дице Де́во,/ к Тебе́ бо прибега́юще, и́мамы Тя Моли́твенницу./ Тем, благодаря́ще, вопие́м Ти:/ ра́дуйся, Благода́тная, Госпо́дь с Тобо́ю.

Та́же степе́нна, 1-й антифо́н 4-го гла́са. Проки́мен, глас 4: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.Стих: Насажде́ни в дому́ Госпо́дни, во дво́рех Бо́га на́шего процвету́т. Ева́нгелие от Матфе́я, зача́ло 36.

По 50-м псалме́ стихи́ра, глас 6: Дне́сь вселенная:зри сла́вник на хвали́тех.

Кано́н свято́му му́ченику Парфе́нию, его́же краегране́сие: Парфе́нию пречу́дному вене́ц на́шей любви́. Глас 4.

Песнь 1

Ирмо́с: Колесни́цы фарао́новы и си́лу его́/ вве́рже в мо́ре Кре́пкий в бра́нех,/ воспое́м песнь но́вую, я́ко просла́вися.

Просвеща́емь заре́ю Боже́ственнаго Ду́ха и распала́емь Христо́вою любо́вию,/ злоче́стие язы́ческое вся́чески посрами́л еси́,/ испове́дник преизря́дный Пресвяты́я Тро́ицы яви́лся еси́,/ страстоте́рпче Христо́в Парфе́ние.

А́ще дерзну́ восхвали́ти по достоя́нию страда́ния твоя́,/ Парфе́ние пречу́дный, ка́ко возмогу́?/ Удивля́юся умо́м и ужаса́юся душе́ю,/ ви́дяще тя желе́за раскаля́емаго и пла́мене о́гненнаго в любви́ ко Христу́ тверде́йша.

Ра́зум твой богомы́слием утверди́в,/ Христа́ в душе́ твое́й име́ти всем се́рдцем возжеле́л еси́, богохва́льне Парфе́ние,/ и Сего́ Возлю́бленнаго, я́ко во́ин неустраши́мый, сла́вно испове́дал еси́.

Богоро́дичен: Фимиа́м благово́ннейший, святы́я моли́твы Твоя́,/ вознеси́ за ны ко Пресвяте́й Тро́ице, Ма́ти Бо́жия,/ и проще́ния прегреше́ний на́ших испроси́:/ Тя бо еди́ну, ве́рнии, Всеблагу́ю Предста́тельницу и́мамы.

Песнь 3

Ирмо́с: Утвержда́яй гром и созида́яй дух,/ утверди́ мене́, Го́споди,/ да Тя пою́ и́стинно/ и творю́ во́лю Твою́/ я́ко несть свят, я́ко Ты, Бо́же наш.

Еди́неми усты́ и еди́нем се́рдцем,/ а́ки два Херуви́мы, с бра́том твои́м Калоге́рием,/ Христа́ возлюби́сте, Парфе́ние боголюби́ве,/ и Его́ ева́нгельской И́стине усе́рдно после́довасте,/ Его́же моли́те за ны, хода́таи на́ши те́плейшии.

Ны́не Це́рковь Христо́ва благохва́льно воспева́ет страстоте́рпца Христо́ва Парфе́ния,/ оде́жды истка́нными от крове́й свои́х/ у престо́ла Царя́ Сла́вы предстоя́ща,/ те́пле за ны Бо́гу моля́щагося.

И́стинный подража́тель Христу́ житие́м благонра́вным/ яви́лся еси́, му́чениче Парфе́ние,/ поне́же вся, я́же в до́ме твое́м име́л еси́,/ с ни́щею бра́тиею авраа́мски разделя́я, ра́довался еси́ весе́лием их./ С ни́миже и нас помяни́, чту́щих па́мять твою́ ве́рно.

Богоро́дичен: Ю́же Си́лы Небе́сныя, я́ко Богоневе́стную Ма́терь хва́лят,/ и святи́и вси, поклоня́ющеся, воспева́ют на Небеси́,/ воспое́м, ве́рнии, я́ко Богоизбра́нней Отрокови́це на земли́./ Сия́ бо спасе́ния на́шего наде́жда/ и в ско́рбех нело́жное утеше́ние.

Седа́лен свята́го, глас 4:

Па́мять твоя́, сла́вне му́чениче Парфе́ние,/ уясни́ днесь Це́рковь Христо́ву/ и вся собра́ пе́сньми досто́йно восхвали́ти тя, Богому́дре,/ я́ко и́стинна во́ина и враго́в потреби́теля,/ те́мже мольба́ми твои́ми изба́ви ны от искуше́ний.

Сла́ва: Доброде́тельными виде́нии облиста́емь и муче́ния све́тлостию украша́емь,/ па́че со́лнца, му́дре, сия́еши тве́рдо,/ и просвеща́еши вои́стинну соверша́ющих ве́рно твою́ светоно́снуюпа́мять,/ пресла́вный му́чениче Парфе́ние,/ и покланя́ющихся моще́м твои́м.

И ны́не, Богоро́дичен:

Ужа́сно чу́до зача́тия и несказа́нен о́браз рождества́/ в Тебе́ позна́ся, Чи́стая Присноде́во,/ ужаса́ет мой ум и удивля́ет по́мысл./ Сла́ва Твоя́, Богоро́дице, всем простре́ся во спасе́ние душ на́ших.

Песнь 4

Ирмо́с: Услы́шах, Бо́же, слух Твой и убоя́хся,/ разуме́х дела́ Твоя́ и ужасо́хся, Го́споди,/ я́ко Твоего́ хвале́ния испо́лнь земля́.

Пове́шен, и желе́зом раскаля́емым стро́ган, и огне́м опаля́емь,/ в ве́ре непрекло́нен пребы́л еси́, му́чениче Христо́в Парфе́ние,/ да ви́дяще тя си́це Христу́ сраспина́ющася,/ непоколе́блемся в ве́ре во ве́ки,/ я́ко непосты́днии де́лателие пред лице́м Бо́жиим.

Ра́дуются правосла́вных собо́ри,/ ви́дяще тя среде́ со́нмов му́ченик Христо́вых,/ я́ко звезду́ Богосия́нную, на тве́рди Це́ркве Небе́сныя ди́вно сия́юща,/ озаря́юща нас све́том любве́ Христо́вы, Парфе́ние, ра́досте на́ша.

Еди́но естество́ Божества́, еди́ну власть и госпо́дство,/ со ине́ми страстоте́рпцы пропове́дасте,/ многобо́жнюю лесть сла́вно препобеди́сте, Парфе́ние Христо́в,/ и та́ко от тьмы неве́дения к Све́ту Невече́рнему вся концы́ земли́ приведо́сте.

Богоро́дичен: Что Ти принесе́м, Засту́пнице ро́да христиа́нскаго,/ Еди́на обнови́вшая зако́ны естества́,/ ро́ждши Бо́га Безсме́ртнаго, в плоть ме́ртвенную оде́явшася,/ в Не́мже очище́ние и обновле́ние на́шего естества́,/ А́нгелом чу́до и де́монов я́зва.

Песнь 5

Ирмо́с: Утро све́тлое/ нам посли́, я́ко Благ,/ и наста́ви ны в страх Твой, Влады́ко.

Умо́м Богодухнове́нным соде́лал еси́ се́рдце Твое́/ жили́ще Ду́ха Свята́го, пресла́вный Парфе́ние,/ из него́же источа́шеся бла́гость любве́ Христо́вы на всех, к тебе́ притека́ющих./ Теплото́ю сия́ согре́й и укрепи́ в житии́ благонра́внем/ всех, в благоче́стии ве́ры изнемога́ющих.

Дом чистоты́ и целому́дрия,/ дом Христо́ва благодея́ния яви́лся еси́, досточу́дне Парфе́ние,/ и, я́ко сокро́вище некра́домое, спасе́ния пропове́дание всем возвеща́я,/ в же́ртву непоро́чную Христу́ закла́тися прине́слся еси́, богому́дренне.

Ни бога́тство, ни сла́ва, ни сла́дость жите́йская, ни красота́ теле́сная,/ не возмогли́ суть разлучи́ти тя от любве́ Бо́жия, му́чениче Парфе́ние,/ безбоя́зненно поте́кл бо еси́ в пла́мя о́гненное,/ нося́ непобеди́мое Креста́ Боже́ственное ору́жие,/ и́мже ко́зни вра́жия победи́л еси́.

Богоро́дичен: От вели́ких скорбе́й, и напа́стей, и прегреше́ний лю́тых/ всегда́ спасае́ши нас, Ма́ти Бо́жия,/ те́мже Тя я́ко Ро́ждшуто Искупи́теля ми́ра мо́лим/ и к Тебе́, Непобеди́мей по́мощи скорбя́щим, прибега́ем, зову́ще:/ спаси́ мир от тя́жких бед моли́твами Твои́ми.

Песнь 6

Ирмо́с: Бу́ря мя помышле́ний, пости́гши,/ во глубину́ низвлачи́т мя безме́рных грехо́в,/ но Ты, Упра́вителю Благи́й,/ предвари́в, упра́ви,/ я́ко проро́ка, и спаси́ мя.

Многообра́зными преще́ньми устраша́ше тя мучи́тель злочести́вый,/ му́чениче Парфе́ние блаже́нне,/ да улови́т ду́шу твою́ в се́ти сме́ртныя;/ ты же, ко́зни сего́ му́жественно претерпе́л еси́, да обря́щеши Христа́ всех Бо́га,/ и́стинную красоту́ и некра́домое бога́тство.

Украси́ся всечестна́я глава́ твоя́/ венце́м сла́вы неувяда́емыя, му́чениче Парфе́ние,/ егда́ Либа́ний злочести́вый бревно́м горя́щим раздроби́ ю,/ си́це бо, я́ко преукра́шен победи́тель, на Не́бо восте́кл еси́,/ проси́ти ми́ра ми́рови и спасе́ния душа́м на́шим.

Во́лею нас ра́ди обнища́вшему Христу́ после́довал еси́,/ венцено́сче Христо́в Парфе́ние,/ Его́же нището́ю обогати́лся еси́, прему́дре,/ сла́ву су́етную ми́ра сего́ презре́в, в мир Небе́сный, ра́дуяся, преше́л еси́,/ иде́же помина́й всех с любо́вию чту́щих па́мять твою́.

Богоро́дичен: Еди́на боля́щих посеще́ние,/ Еди́на па́дших исправле́ние, Влады́чице,/ Еди́на к Бо́гу Руководи́тельница и вход,/ Еди́на Хода́таица ве́чных благ;/ егда́ Сын Твой и Бог наш прии́дет суди́ти конце́м земли́,/ благоволи́, Пречи́стая, изы́ти и поклони́тися Того́ прише́ствию.

Конда́к, глас 2:

Благочести́ваго и венцено́снаго му́ченика,/ на враги́ побе́ды взе́мшаго одоле́ние,/ соше́дшеся, досто́йно пе́сньми восхва́лим,/ Парфе́ния превели́каго в му́ченицех,/ чуде́с жа́теля пребога́таго,/ мо́лится бо Го́споду о всех нас.

И́кос:

Кто по́двиги твоя́ довле́ет изглаго́лати, страстоте́рпче,/ или́ боле́зни твоя́, я́же му́жески претерпе́л еси́ за ве́ру Христо́ву,/ и дарова́ния, и́хже сподо́бился еси́?/ Не довле́ют уста́ челове́ческая пове́дати,/ му́дростию бо укра́шен и му́жеством,/ бога́тство возненави́дев и досто́инство привре́менное,/ во́ин яви́лся еси́ и́скреннейший, моля́ся у́бо о всех нас.

Песнь 7

Ирмо́с: Глаго́лавый на горе́ с Моисе́ом/ и о́браз де́вства явле́й в купине́,/ благослове́н еси́, Бо́же оте́ц на́ших.

Неугаси́мый свети́льник ве́ры нося́,/ нощь неве́жества прете́кл еси́, му́чениче Парфе́ние,/ струя́ми кро́вными пре́лести ого́нь погаси́л еси́, Све́ту прибли́жився Невече́рнему,/ иде́же за ны моля́ся, пое́ши:/ благослове́н еси́, Го́споди, Бо́же оте́ц на́ших.

Единому́дренно пожи́вше,/ и единосу́щно главы́ ва́ша за Христа́ раздроби́ти прине́сшии,/ боговенча́ннии бра́тие Калоге́рие и Парфе́ние,/ ку́пно же предстоя́ще пред лице́м Сла́вы Бо́жия,/ моли́теся за нас, да непосты́дными усты́ вопие́м Бо́гу:/ благослове́н еси́, Го́споди, Бо́же оте́ц на́ших.

Це́ркве Зижди́теля вои́стинну сострои́тель ве́рный яви́лся еси́, Парфе́ние Христо́в,/ и сию́ кро́вию свое́ю украша́я,/ я́ко ка́мень драгоце́нный многострада́льное те́ло твое́/ ве́рным на утеше́ние духо́вное в ней оста́вил еси́,/ да ку́пно с тобо́ю вопие́м непреста́нно:/ благослове́н еси́, Го́споди, Бо́же оте́ц на́ших.

Богоро́дичен: Наде́жда ненаде́жных Ты еси́, Богоро́дице,/ и утеше́ние всем, упова́ние на Тя возлага́ющим./ Помина́й нас, Твое́ еди́но предста́тельство в по́мощь призыва́ющих,/ да, спаса́еми Тобо́ю, вопие́м богохва́льно:/ благослове́н еси́, Го́споди, Бо́же оте́ц на́ших.

Песнь 8

Ирмо́с: Земля́, и вся, я́же на ней,/ мо́ре и вси исто́чницы,/ Небеса́ небе́с, свет и тьма, мраз и зной,/ сы́нове челове́честии,/ свяще́нницы, благослови́те Го́спода/ и превозноси́те Его́ во ве́ки.

А́нгелом сожи́тель яви́лся еси́, му́чениче Парфе́ние,/ ве́трилом Креста́ мук преплы́в пучи́ну,/ ны́не же у раки многоцеле́бных моще́й твои́х неду́ги прогоня́еши/ и от бед избавля́еши си́лою Христо́вою, сле́зно тебе́ моля́щихся.

Ше́ствуя стезя́ми любве́ Христо́вой,/ путь ди́вный преше́л еси́, Парфе́ние многочу́дный;/ в земли́ Вирме́нстей, а́ки крин Еде́ма, красото́ю ве́ры процве́л еси́,/ в Ри́ме венце́м му́ченическим сла́вно увенча́лся еси́./ Ны́не же мощми́ твои́ми в земли́ Слове́нстей ми́ро источа́еши приснотеку́щее.

Е́же ко Го́споду восхожде́ние сверша́я и Сему́ любо́вию прилепля́яся,/ земны́х сих не оставля́еши, достохва́льне Парфе́ние,/ сего́ ра́ди, град наш и лю́ди слове́нстии, и́мже предста́тель те́плый явля́ешися,/ в тебе́ наде́жду стяжа́вши, ра́дуются.

Богоро́дичен: Изсуши́ ре́ки лука́вых дея́ний на́ших, Преблага́я Ма́ти Де́во,/ и от скве́рных страсте́й ду́ши на́ша свободи́,/ и даждь нам, Пречи́стая, безстра́стия ми́ро и сле́зы покая́ния,/ да не постыди́мся в день Су́дный.

Песнь 9

Ирмо́с: Я́ко сотвори́ Мне вели́чия Си́льный,/ и свя́то И́мя Его́,/ и ми́лость Его́/ в род и род боя́щимся Его́.

Лику́я со А́нгелы пред лице́м Иису́совым и Того́ сла́ву созерца́я,/ не забу́ди лю́ди, упова́ющия на тя,/ живу́щия в треволне́ниих ми́ра сего́ многомяте́жнаго,/ да моли́твами твои́ми не отпаде́м ве́чныя сла́вы.

Юдо́ль греха́ и сме́рти сла́вно преше́л еси́, Парфе́ние богому́дре,/ и Све́том Трисо́лнечнаго Божества́ озаря́емь, просвети́ наш ум и со́весть,/ благово́нным же ми́ром моще́й твои́х облагоуха́й ду́ши на́ша,/ Ду́ху Свято́му во обита́лище нескве́рное.

Бо́жие благоволе́ние облагода́тствова зе́млю на́шу/ честны́ми мощми́ многострада́льнаго те́ла твоего́, свя́те Парфе́ние,/ да и́мамы сия́, я́ко зерца́ло пресве́тлое подви́жников ди́вных,/ неувяда́емое цвете́ние Це́ркве Христо́вы,/ во утвержде́ние любве́ на́шея ко Го́споду.

Возлю́бленный уго́дниче Бо́жий, Парфе́ние пречу́дный,/ ми́лостивый бу́ди хода́тай о спасе́нии на́шем,/ да тебе́ ра́ди, обре́тше благода́ть пред Бо́гом,/ не оста́влени бу́дем ве́чныя сла́вы и любве́ Бо́жия к нам, гре́шным.

Богоро́дичен: Я́же Херуви́мы сла́вимая и Серфи́мы возвели́ченная,/ моли́ся, Пречи́стая Ма́ти, за Це́рковь Святу́ю и наро́ды на́ша,/ да не лише́ни бу́дем ми́ра земна́го и сла́вы Небе́сныя,/ но да улучи́м ми́лость в день Су́дный.

Свети́лен:

Жесто́кую ше́ствовал еси́ в путе́х боже́ственную стезю́,/ к широте́ взы́де Ца́рствия Небе́снаго, Парфе́ние, му́чеников сла́во,/ све́том сия́я Пресвяты́я Тро́ицы,/ те́мже и сла́ве непрестаю́щей причасти́лся еси́,/ помяни́ чту́щих тя, блаже́нне.

Сла́ва, и ны́не, Богоро́дичен:

Держа́вным Твои́м покро́вом, Чи́стая,/ нас, рабо́в Твои́х, от наве́та вра́жия сохраня́й всегда́ невре́дны./ Тя бо еди́ну стяжа́хом прибе́жище в беда́х.

На хвали́тех стихи́ры, глас 4.

Подо́бен: Я́ко до́бля:

Обагре́нною в кро́ви пло́ти твоея́/ оде́ялся еси́ багряни́цею, сла́вне,/ Боже́ственною благода́тию,/ и верх твой венце́м оде́ян нетле́ния и жи́зни,/ Креста́ же побе́ду, му́чениче всему́дре,/ десни́цею обнося́, я́коже скиптр,/ со Христо́м ца́рствуеши, всегда́ веселя́ся.

Во́ин непобеди́м позна́н бысть, сла́вне,/ кре́стным бо ору́жием огражда́емь,/ к боре́нием изше́л еси́ врага́ борца́/ и низложи́л еси́ того́, воева́в светле́йше,/ и вене́ц прие́м побе́ды/ от Еди́наго Страстополо́жника и Влады́ки/ и при́сно ца́рствующаго.

За Спа́са Христа́ пострада́л еси́/ и, сме́ртию сме́рти Его́ во́льне, сла́вне, подо́бяся,/ ца́рствуеши с Ним све́тло,/ порфи́рою от кро́ве оде́ян све́тлою,/ и ски́птром страда́ний твои́х укра́шен,/ и, венце́м побе́ды лепотству́я,/ в непроходи́мыя ве́ки вшел еси́, му́чениче Парфе́ние.

Я́ко звезду́ многосве́тлую,/ я́коже со́лнце сия́ющее,/ на тве́рди Небе́сней тя ве́мы,/ и я́ко би́сер многоце́нный,/ я́ко ка́мень блиста́ющий,/ я́ко сы́на тя дне, я́ко до́блественнаго в му́ченицех,/ я́ко побо́рника ве́рных, в беда́х прославля́ем,/ соверша́юще твою́ па́мять, страстоте́рпче Парфе́ние.

Сла́ва, глас 6:

Днесь вселе́нная вся страстоте́рпца просвеща́ется заря́ми/ и Христо́ва Це́рковь, цве́ты украша́ ема,/ вопие́т ти, уго́дниче Христо́в/ и засту́пниче те́плейший, Парфе́ние:/ не преста́й моля́ся о нас ко Го́споду.

И ны́не, Богоро́дичен.

Славосло́вие вели́кое.

НА ЛИТУРГИ́И

Блаже́нны от кано́на свята́го, пе́сни 3-я и 6-я. Проки́мен, глас 7: Возвесели́тся пра́ведник о Го́споде/ и упова́ет на Него́.Стих: Услы́ши, Бо́же, глас мой, внегда́ моли́тимися к Тебе́. Апо́стол к Тимофе́ю, зачало 292. Аллилу́ия, глас 4: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.Стих: Насажде́ни в дому́ Госпо́дни/ во дво́рех Бо́га на́шего процвету́т.Ева́нгелие от Иоа́нна, зачало 52. Прича́стен: В па́мять ве́чную:

Память святаго мученика Парфения совершается также в Неделю по Воздвижении Честнаго Животворящаго Креста Господня.

Моли́тва

О пресла́вный и Бо́гом возлю́бленный му́чениче Христо́в Парфе́ние! Тебе́, облиста́вшему вели́чие Це́ркве Христо́вой му́ченическою кро́вию свое́ю и основа́ние ея́ утверди́вшему сме́ртию свое́ю, ди́вно спле́тшему по́двиг своего́ испове́дничества со тьмы му́ченик Христо́вых, сораспя́вшихся Искупи́телю ми́ра в воздви́жении Его́ Святы́я Це́ркве к возвеще́нию ева́нгельския И́стины во всей вселе́нней, припа́дающе, мо́лимся. Я́ко покрови́тель и хода́тай о наро́де на́шем пред Бо́гом, Парфе́ние пречу́дный, вознеси́ моли́твы твоя́ ко Го́споду о всех, с ве́рою и любо́вию к честны́м моще́м твои́м припа́дающих и по́мощи твоея́ Небе́сныя прося́щих. Сотвори́ у́бо, да услы́шана бу́дет пред Бо́гом моли́тва матере́й, скорбя́щих о ча́дех свои́х, и чад благосе́рдых о роди́телех их. Да не изнемо́жет пред Го́сподем плач и стена́ние вдов и сиро́т, ниже́ хода́тайство супру́гов ве́рных в ну́ждах их; да уте́шится у ног твои́х всяк, в неду́зех душе́вных и теле́сных стра́ждущий, и от клеветы́ челове́ческия напа́ствуемый, и не оты́дет тощ всяк, в отча́янии изнемога́яй, в ско́рбех и ну́ждах жите́йских к тебе́ прибега́ющий. Изле́й благода́ть твою́, боголюби́ве Парфе́ние, и укрепи́ не́мощи на́ша проти́ву сете́й ду́ха зло́бы поднебе́сныя. Да отлучи́тся от мы́слей на́ших дух не́нависти и злопомне́ния, за́висти и ле́сти, дух боя́зни и уны́ния, дух ра́спрей и раско́лов, дух го́рдости и вся́кия ины́я зло́бы, да не поги́бнем в суете́ жите́йстей, я́коже стра́ха Бо́жия неиму́щии. Еще́ испроси́, уго́дниче Бо́жий, ми́ра Бо́жия всей вселе́нней, благостоя́ния в бра́тском единомы́слии святы́х Бо́жиих Церкве́й и спасе́ния всего́ ро́да христиа́нскаго. Па́стырей Це́ркве Бо́жия и честно́е и́ночество в моли́твах согре́й и поддержи́, и воздыха́ния их о спасе́нии ми́ра благоприя́тны пред лице́м Бо́жиим сотвори́, наро́д же наш в ве́ре Правосла́вней укрепи́. Наипа́че же, умоли́ Го́спода сил, да не отврати́т ми́лость Свою́ от нас, грех ра́ди на́ших, но, я́ко Оте́ц чадолюби́вый, изолье́т ми́лость Свою́ на достоя́ние Свое́, да не постыди́мся во ве́ки. Ему́же честь и поклоне́ние подоба́ет, Отцу́, и Сы́ну, и Свято́му Ду́ху, во ве́ки веко́в. Ами́нь.

Тропа́рь, глас 8:

Бде́нными моли́твами и пото́ки сле́зными пусты́ню напои́л еси́/ и из глубины́ воздыха́ньми ю расплоди́л еси́/ и бысть по́стнически ра́вно А́нгелом житие́ твое́;/ страда́льчески боре́ньми, я́же от бесо́в и от ненака́занных челове́к, претерпе́л еси́/ и А́нгелом собесе́дник яви́ся,/ Боже́ственнаго виногра́да насе́ятель быв;/ и, оста́вив вре́менное житие́, пресели́лся еси́ в жили́ще Небе́сное./ Те́мже тя почита́ем, преподо́бне о́тче наш Се́ргие,/ моли́ Христа́ Бо́га спасти́ся душа́м на́шим.

НА МА́ЛЕЙ ВЕЧЕ́РНИ

На Го́споди, воззва́х:стихи́ры, глас 1:

Благове́рне кня́же Дими́трие,/ ты во дни жития́ святи́теля Алекси́я возраста́я/ и моли́твами того́ окормляем,/ в му́жа соверше́нна дости́гл еси́.

Моли́твами преподо́бнаго отца́ на́шего Се́ргия возращаем,/ свя́те Дими́трие всече́стне,/ еще́ млад сый во́зрастом, умо́м же соверше́н,/ кня́зь люде́й твои́х поста́влен был еси́.

О́трок еще́ сый во́зрастом, свя́те Дими́трие,/ житию́ благонра́вному ревнова́в/ и в по́двизех ве́ры правосла́вный укрепля́яся, / в му́жа соверше́нна возраста́л еси́.

Сла́ва, глас 8:

Ве́дая и слы́ша о си́ле ага́рянстей,/ оте́чество твое́ покори́вшей,/ ты, свя́те Дими́трие, моли́твы Христу́ в се́рдце свое́м слага́л еси́,/ о е́же свободи́ти правосла́вный от враго́в, томя́щих я.

И ны́не, пра́здника или́ Богоро́дичен, глас то́йже:

Засту́пнице на́ша и прибе́жище,/ Де́во Чи́стая,/ во вся дни живота́ на́шего,/ моли́твы о лю́дех вознеси́ Сы́ну и Бо́гу Твоему́.

На стихо́вне стихи́ры, глас 2.

Подо́бен: До́ме Евфра́фов:

Жили́ще Бо́жие яви́лся еси́,/ свя́те Дими́трие,/ кня́же всече́стне,/ не забу́ди люде́й Твои́х/ и оте́чество твое́ Русское не оста́ви во ве́ки.

Стих: Честна́ пред Го́сподем/ сме́рть преподо́бных Его́.

Дом доброде́телей духо́вных яви́лся еси́,/ возлю́бленне кня́же,/ свя́те Дими́трие,/ те́мже пресла́вно почита́ема е́сть па́мять твоя́,/ предста́телю наш тепле́йший.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Измла́да и до преставле́ния твоего́/ свети́льник све́тлый ду́шу твою́ соде́лал еси́,/ богому́дре кня́же Дими́трие,/ сего́ ра́ди от Исто́чника све́та/ испроси́ осия́ния душа́м на́шим.

Сла́ва, глас и подо́бен то́йже:

Богому́дре кня́же Дими́трие,/ нас, гре́шных средник твои́х,/ предста́тельством твои́м не забу́ди/ и в селе́ния Отца́ све́тов/ моли́твами твои́ми напра́ви.

И ны́не, пра́здника или́ Богоро́дичен:

Ублажа́ем Тя,/ Чи́стая Де́во Ма́ти,/ притека́ющии к Тебе́ лю́дие Твои́,/ святы́м Покро́вом Твои́м/ нас осеня́ющую.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

На Го́споди, воззва́х:стихи́ры пра́здника 3 и свята́го 5. А́ще кроме́ пра́здника, стихи́ры свята́го на 8, глас 4:

Прииди́те, собо́ри люде́й Русских,/ восхва́лим Бо́гом возлю́бленнаго,/ доблестнаго кня́зя Дими́трия,/ и́же побе́ду пресла́вну над враги́ одержа́/ и зе́млю Русскую пле́на лю́таго свободи́.

Поклони́мся благода́рне, сы́нове Русстии,/ пресла́вному кня́зю Дими́трию,/ вла́сти ага́рянския нас свободи́вшему,/ я́ко вознесе́ Госпо́дь десни́цу его́/ на побе́ду иноплеме́нник.

Припаде́м любо́вию и почуди́мся по́двигом/ преди́внаго Дими́трия,/ и́же собра́ полки́ ве́лия люде́й Русских/ и, по́мощию Бо́жиею покрыва́ем,/ зе́млю на́шу от нече́стия изба́ви.

Спаси́ ны, Сы́не Бо́жий,/ моли́твами благове́рнаго кня́зя Русскаго Дими́трия,/ враги́ на́ша побори́,/ оте́чество на́ше сохраня́я/ от ополче́ний сих неврежде́нно.

Сла́ва, глас 5:

Благослове́н еси́, Христе́ Бо́же наш,/ пресла́внаго кня́зя Дими́трия,/ Донски́м имену́ема, нам яви́вый,/ и́же благода́тную по́мощь сро́дника своего́,/ вели́каго кня́зя Алекса́ндра Не́вскаго, име́я,/ ра́ти ага́рянския порази́в,/ побе́ду ве́лию и сла́ву оте́честву на́шему стяжа́.

И ны́не, пра́здника или́ Богоро́дичен, глас 5.

Вход. Проки́мен дне. И чте́ния.

Прему́дрости Соломо́новы чте́ние(глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же су́ть в ми́ре./ И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле искуси́ их и я́ко всепло́дие же́ртвенное прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцари́тся Госпо́дь в них во ве́ки./ Наде́ющиися На́нь разуме́ют и́стину, и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́, и посеще́ние во избра́нных Его́.

Прему́дрости Соломо́новы чте́ние(главы́ 5 и 6):

Пра́ведницы во ве́ки живу́т, и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́ и вооружи́т тва́рь в ме́сть враго́м./ Облече́тся в броня́ пра́вды и возложи́т шлем, суд нелицеме́рен./ Прии́мет щит непобеди́мый, преподо́бие./ Поостри́т же напра́сный гнев во ору́жие;/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка о́блаков, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я, ре́ки же потопя́т я на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние, и злоде́йство преврати́т престо́лы си́льных./ Слы́шите у́бо, ца́рие, и разуме́йте, навы́кните, судии́ конце́в земли́./ Внуши́те, держа́щии мно́жества и гордя́щиися о наро́дех язы́ков,/ я́ко дана́ е́сть от Го́спода держа́ва вам и си́ла от Вы́шняго.

Прему́дрости Соломо́новы чте́ние(глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же е́сть му́дрость челове́ком, и во́зраст ста́рости житие́ нескве́рное./ Благоуго́ден Бо́гу быв, возлю́блен бы́сть, и живы́й посреде́ гре́шников преста́влен бы́сть./ Восхище́н бы́сть, да не зло́ба измени́т ра́зума его́, или́ ле́сть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́споду душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ положи́вше в помышле́нии таково́е./ Я́ко благода́ть и ми́лость в преподо́бных Его́, и посеще́ние во избра́нных Его́.

На лити́и стихи́ры, глас 2:

Егда́ гла́су Бо́жию, ко спасе́нию оте́чества зову́щему, внял еси́,/ свя́те кня́же Дими́трие,/ тогда́, сове́том святы́х утвержда́ем,/ не убоя́лся еси́ си́лы вра́жия/ и на по́двиг ратный ве́лий/ с бра́тиею твое́ю устреми́лся еси́.

Егда́ Дух Бо́жий подкрепля́ше тя,/ свя́те кня́же Дими́трие,/ дви́гнути полки́ Русския на ра́ти ага́рянския,/ тогда́, Бо́гу соде́йствующу тебе́,/ побе́ду пресла́вную над враго́м одержа́л еси́.

Егда́, по́мощию Бо́жиею окормля́ем,/ за зе́млю Русскую стал еси́,/ тогда́, свя́те Дими́трие,/ во́инство твое́ на по́ле Кулико́ве/ прему́дре уста́вил еси́,/ та́же и враги́ пресла́вне одоле́л еси́.

Сла́ва, глас 6;

Возвесели́теся, вси чи́нове Русстии,/ о по́двизех кня́зя Дими́трия,/ и́же моли́твенник те́плый ко Христу́ яви́ся,/ за лю́ди своя́ и зе́млю Русскую предста́тельствуя.

И ны́не, пра́здника или́ Богоро́дичен, глас то́йже:

Не отри́ни, Пренепоро́чная,/ моли́твы и воздыха́ния люде́й Твои́х,/ в ско́рбех, боле́знех и ну́ждах/ к Тебе́ при́сно притека́ющих.

На стихо́вне стихи́ры, глас 5:

А́ще и маловре́менно бы́сть житие́ твое́,/ благове́рне кня́же Дими́трие,/ оба́че селе́ний Госпо́дних дости́гл еси́,/ па́мять же ве́чную у Бо́га обре́л еси́.

Стих: Честна́ пред Го́сподем/ сме́рть преподо́бных Его́.

Кре́пок и му́жествен,/ взо́ром ди́вен зело́ и нра́вом боголюби́в был еси́,/ свя́те Дими́трие всече́стне,/ зе́млю Русскую по́мощию Бо́жиею от враг изба́вил еси́,/ те́мже и любо́вь ве́лию люде́й твои́х стяжа́л еси́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Моли́ся о лю́дех твои́х,/ уго́дниче изря́дне, свя́те Дими́трие,/ сый в селе́ниих све́тлых Го́спода твоего́,/ Его́же в житии́ твое́м те́пле возлюби́л еси́,/ сего́ ра́ди да́же до кро́ве за дру́ги твоя́ подвиза́лся еси́.

Сла́ва, глас то́йже:

Ра́дуйся и весели́ся, сла́внейший гра́де Москво́,/ такова́го засту́пника себе́ стяжа́вый,/ сла́вна и му́жественна и ду́хом кре́пка кня́зя Дими́трия,/ еще́ же и предста́теля ско́раго о лю́дех пред Го́сподем.

И ны́не, пра́здника или́ Богоро́дичен.

Тропа́рь, глас 3:

Вели́ка обре́те в беда́х тя побо́рника земля́ Ру́сская,/ язы́ки побежда́юща./ Я́коже на Дону́ Мама́еву низложи́л еси́ горды́ню,/ на по́двиг сей прия́в благослове́ние преподо́бнаго Се́ргия,/ та́ко, кня́же Дими́трие,/ Христу́ Бо́гу моли́ся,/ дарова́ти нам ве́лию ми́лость.

Сла́ва, и ны́не, пра́здника или́ Богоро́дичен.

НА У́ТРЕНИ

На Бог Госпо́дь:тропа́рь пра́здника, два́жды. Сла́ва,свята́го. И ны́не,пра́здника. А́ще кроме́ пра́здника, тропа́рь свята́го, два́жды. Сла́ва, и ны́не,Богоро́дичен.

По 1-м стихосло́вии седа́лен, глас 3:

От во́зраста о́троческаго кня́зь люде́й твои́х яви́лся еси́,/ богому́дре Дими́трие,/ та́же в сове́тех святы́х возраста́я,/ держа́ву твою́ до́бре упра́вил еси́.

Сла́ва, и ны́не, пра́здника или́ Богоро́дичен.

По 2-м стихосло́вии седа́лен, глас 4:

Я́ко во дни ми́ра, та́кожде и во дни бра́ни милосе́рдием богате́я,/ за лю́ди твоя́ и оте́чество подвиза́лся еси́ Го́спода ра́ди,/ возлю́бленне кня́же, богому́дре Дими́трие,/ те́мже и о чту́щих тя моли́ся.

Сла́ва, и ны́не, пра́здника или́ Богоро́дичен.

Велича́ние:

Велича́ем тя,/ святы́й благове́рный вели́кий кня́же Дими́трие,/ и чтим святу́ю па́мять твою́,/ ты бо мо́лиши о нас/ Христа́ Бо́га на́шего.

По полиеле́и седа́лен, глас 5:

Воспое́м, лю́дие, побе́ду пресла́вную,/ ю́же благове́рный кня́зь Дими́трий за ве́ру правосла́вную и оте́чество одержа́,/ той бо и́мя Святы́я Тро́ицы и по́мощь Пресвяты́я Богоро́дицы призва́.

Сла́ва, и ны́не, пра́здника или́ Богоро́дичен:

Пресвята́я Де́во, Богоро́дице Мари́е,/ в ра́тных пбдвизех, за ве́ру и оте́чество оверша́емых, лю́ди Твоя́ заступа́еши,/ та́же и па́мять ве́чную и спасе́ние тем подава́еши.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние:Ева́нгелие от Матфе́я, зача́ло 43.

По 50-м псалме́ стихи́ра, глас 6: Егда́ вре́мя отше́ствия твоего́ прии́де,/ кня́же Дими́трие всече́стне,/ тогда́ ко Го́споду в моли́тве простира́яся,/ о Бо́зе Спа́се твое́м почи́л еси́,/ мир бли́жним и да́льним оста́вив.

Кано́н пра́здника или́ Богоро́дицы на 6 и свята́го на 8.

Кано́н свята́го, глас 4.

Пе́снь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть.

Припе́в: Святы́й благове́рный вели́кий кня́же Дими́трие, моли́ Бо́га о нас.

Заря́ пресве́тлая в рождестве́ твое́м яви́лся еси́,/ свя́те Дими́трие, Христу́ возлю́бленне,/ сро́дники же твоя́ рожде́нием твои́м возвесели́л еси́.

Заря́ у́тренняя был еси́, свя́те Дими́трие,/ во́зраста о́троческа достига́я,/ Христу́ моли́твы усе́рдныя возноси́ти поуча́лся еси́.

Заря́ кра́сная яви́лся еси́ оте́честву твоему́, свя́те Дими́трие,/ княже́ние прии́м и в Бо́га богате́я,/ в моли́тве и испове́дании ве́ры правосла́вныя укреплялся еси́.

Богоро́дичен: Отрокови́це Пречи́стая,/ ю́ныя о́троки сохраня́й и в во́зраст прише́дшия наставля́й,/ святы́я на земли́ возраща́й.

Пе́снь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Утеше́ние бога́тое и о́браз богому́дрый име́л еси́, кня́же Дими́трие,/ во отце́ твое́м духо́внем, святи́теле Алекси́и прему́дрем,/ ка́ко упра́вити оте́чество твое́.

Утеше́ние оби́льное прия́л еси́ в се́рдце твое́м, свя́те Дими́трие,/ послу́шав словеса́ богому́драго святи́теля,/ к му́жеству укрепля́вшаго тя.

Утеше́ние ве́лие име́л еси́, богому́дре кня́же Дими́трие,/ ви́дя мно́гия дру́ги твоя́/ во бране́х о Бо́зе гото́выя ве́рно сподвизатися ти.

Богоро́дичен: Пресвята́я Де́во, Богороди́тельнице,/ Ты му́дре лю́ди Твоя́ ко спасе́нию устроя́еши,/ соблюди́ и нас в по́двизех благи́х.

Конда́к и и́кос пра́здника.

Седа́лен, глас 4:

Я́ко свети́льник све́тел в житии́ свое́м лю́дем твои́м яви́лся еси́,/ богому́дре Дими́трие, кня́же приснопа́мятне и боголюбе́зне./ Не оста́ви нас, ме́ньших бра́тии свои́х,/ о оте́честве на́шем моли́тв твои́х те́плых прося́щих.

Сла́ва, и ны́не, пра́здника или́ Богоро́дичен:

При́зри на моли́твы на́ша, Де́во Пресвята́я,/ по́мощь и спасе́ние лю́дем оте́чества на́шего подаю́щи.

Пе́снь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Терпе́ние ве́лие показа́л еси́, Дими́трие прему́дре, в княже́нии твое́м,/ преде́лы земли́ твоея́ укрепля́я и защища́я.

Терпе́ние и му́дрость яви́л еси́, свя́те,/ в похо́дех твои́х на ага́ряны,/ с по́мощию Бо́жиею побежда́я сих.

Терпе́ние мно́гое име́л еси́, богому́дре Дими́трие,/ кня́зи Русския с полки́ их объединя́я/ во еди́но во́инство христолюби́вое.

Богоро́дичен: Пресвята́я Богоро́дице, Ма́ти Пречи́стая,/ Сы́на Твоего́ при́сно моли́/ о е́же возраста́ти и в си́лу Бо́жию приити́ избра́нным Твои́м.

Пе́снь 5

Ирмо́с: Ты, Го́споди, мой свет,/ в мир прише́л еси́,/ свет Святы́й, обраща́яй из мра́чна неве́дения/ ве́рою воспева́ющия Тя.

Доброде́тельми богому́дрыми богате́я, Дими́трие всече́стне,/ строи́тель сла́вный гра́да Москвы́ яви́лся еси́,/ те́мже и лю́ди твоя́ возвесели́л еси́.

Доброде́тельми христиа́нскими в житии́ твое́м укрепля́яся, свя́те кня́же Дими́трие,/ мно́ги хра́мы Бо́жий пречу́дныя по градо́м княже́ния твоего́ воздви́гл еси́.

В доброде́телех возраста́я, Дими́трие прему́дре,/ дом и кня́жество твое́ до́бре упра́вил еси́,/ во Христе́ Спа́се обогаща́яся.

Богоро́дичен: Де́во Пренепоро́чная, Ма́ти Христа́ Бо́га,/ лю́ди и кня́зи Твоя́ в ми́ре соблюди́/ и в доброде́телех многоимени́тых возрасти́.

Пе́снь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х/ исте́кшею Кро́вию.

Смиренному́дрие удоборазсуди́тельное и любо́вь изря́дную к ве́рным лю́дем твои́м показа́л еси́,/ пресла́вне кня́же Дими́трие,/ егда́ ко бра́ни ве́лии на Мама́я ополчи́лся еси́/ со сро́дники и дру́ги свои́ми.

Смиренному́дрие ве́лие яви́л еси́, свя́те Дими́трие,/ егда́ к стопа́м Се́ргия преподо́бнаго припа́л еси́,/ того́ благослове́ния на по́двиг ратный испроша́я.

Смиренному́дрие и послуша́ние яви́л еси́ отцу́ твоему́, Се́ргию вели́кому,/ егда́ благослове́нием того́ два и́нока боголюби́ва, Алекса́ндра и Андре́я,/ в во́инство твое́ прия́л еси́.

Богоро́дичен: Де́во Пренепоро́чная, Наде́ждо на́ша непосты́дная,/ во дни испыта́ний и скорбе́й ве́лиих не оста́ви моля́щихся Тебе́.

Конда́к, глас 2:

По́двиги твои́ми, свя́те Дими́трие,/ страну́ на́шу Бог сохрани́,/ да́вый тебе́ си́лу непобеди́мую./ И ны́не, предста́телю кре́пкий,/ соблюда́й моли́твами святы́ми/ град твой Москву́ невреди́м/ от всех наве́т вра́жиих.

И́кос:

Измла́да за́поведем Госпо́дним поуча́яся/ и любо́вь Христо́ву в се́рдце свое́м стяжава́я, свя́те Дими́трие, кня́же всече́стне,/ словесе́м Госпо́дним и наставле́нию святы́х оте́ц, Алекси́я и Се́ргия, внима́я,/ в му́жа соверше́нна дости́гл еси́,/ та́же побе́ду пресла́вну одержа́л еси́./ И ны́не, предста́телю кре́пкий, соблюда́й моли́твами святы́ми/ град твой Москву́ невреди́м от всех наве́т вра́жиих.

Пе́снь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че/ не́жели пла́менем опаля́еми, взыва́ху:/ благослове́н еси́ в хра́ме сла́вы Твоея́, Го́споди.

На избавле́ние Бо́жие упова́я, блаже́нне кня́же Дими́трие,/ пред нача́лом бра́ни благослове́ние отца́ твоего́ Се́ргия прия́т/ и, по́двигом и́нока Алекса́ндра вдохновля́ем,/ в би́тву со враги́ твои́ми вступи́л еси́.

Избавле́ния от враг лю́тых не ча́ющи,/ стеня́ше земля́ от кро́ве во́ев твои́х пролива́емыя,/ сам же ты, кня́же Дими́трие, в оде́жди во́ина препро́стаго с враго́м му́жественне сражался еси́.

Избавле́ния не жда́ху мно́зи пресла́внии кня́зие и во́и твои́,/ ду́ши полага́юще за дру́ги своя́ на по́ле Кулико́ве,/ воево́да же Бренко́ Михаи́л под зна́менем Спа́совым за тя поги́бе.

Богоро́дичен: Изба́вительнице кре́пкая, Богороди́тельнице Пречи́стая,/ честно́ю ико́ною Твое́ю, я́же Донска́я нарече́ся,/ укрепи́ла еси́ лю́ди Твоя́ в сме́ртней бра́ни вели́цей,/ зе́млю Русскую спаса́ющи.

Пе́снь 8

Ирмо́с: Ру́це распросте́р Дании́л,/ льво́в зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Чу́до пресла́вное бы́сть побе́да во́инства Русскаго,/ тобо́ю, кня́же Дими́трие, собра́ннаго,/ егда́ полцы́ князе́й Влади́мира и Дими́трия Волынскаго на орду́ ага́рянскую внеза́пу изыдо́ша/ и в бе́гство ту́ю обрати́ша.

Чу́до непости́жно бы́сть,/ егда́ земля́ Русская поколеба́ся от шу́ма бе́гства ага́рянскаго./ Ты же, сла́вне Дими́трие, мно́ги ра́ны прие́м, на земли́ сей, я́ко мертв, лежа́л еси́.

Чу́до стра́шное бы́сть, ве́черу доспе́вшу и би́тве ути́хшей, мно́гое бо мно́жество во́инства Русскаго острие́м меча́ падо́ша,/ и́хже имена́ вели́кий а́вва Се́ргий, открове́нием ди́вным, во оби́тели свое́й на моли́тве возноша́ше.

Богоро́дичен: Чу́дное зна́мение попече́ния Твоего́, Пречи́стая Де́во Мари́е,/ о ро́де Русстем яви́вши в де́нь пра́зднования Рождества́ Твоего́,/ пресла́вную побе́ду тому́ дарова́ла еси́.

Пе́снь 9.

Ирмо́с: Ка́мень нерукосе́чный/ от несеко́мыя го́ры, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

О, ка́ко пострада́ земля́ Русская в би́тве вели́цей,/ я́ко мно́жество люде́й за оте́чество души́ своя́ положи́ша,/ ты же, свя́те Дими́трие, с моли́твою и любо́вию/ во днех мно́зех телеса́ их земли́ предава́л еси́.

О, ка́ко просла́вися и́мя Бо́жие в по́двизе твое́м, князке Дими́трие пречу́дне, в сла́вней побе́де сей,/ е́юже лю́ди Русския и́га стра́шнаго свободи́л еси́,/ и, нарече́ние Донска́го прия́в, моли́твенник при́сный о нас явля́ешися.

О, ка́ко вели́к бы́сть по́двиг сей в лю́дех твои́х, пречу́дне кня́же наш Дими́трие,/ я́ко и на гряду́щая времена́ простре́ся сла́ва побе́ды/ христолюби́ваго во́инства Русскаго на по́ле Кулико́ве.

Богоро́дичен: О пречу́дная Влады́чице Богороди́тельнице,/ на пути́ люде́й Твои́х и вожде́й их призира́ющи/ и тем побе́ду на супоста́ты да́рующи,/ приими́ моли́твы недосто́йных раб Твои́х,/ к Тебе́ прибега́ющих.

Свети́лен:

Побе́ду ве́лию во и́мя в Тро́ице сла́вимаго Бо́га,/ по сло́ву пресла́внаго Се́ргия,/ с во́и твои́ми одержа́л еси́, богому́дре кня́же Дими́трие./ Тем тя, я́ко предста́теля пред Бо́гом, вси почита́ем.

Сла́ва, и ны́не, пра́здника или́ Богоро́дичен:

Еди́наго от Тро́ицы Бо́га в ложесна́х Твои́х носи́ла еси́, Богома́ти Пречи́стая./ Сего́ Бо́га Сло́ва и Сы́на Твоего́ о лю́дех умоля́ющи,/ покры́й нас предста́тельством Твои́м, Всепе́тая.

На хвали́тех стихи́ры пра́здника 3 и свята́го 3. А́ще кроме́ пра́здника, стихи́ры свята́го на 4.

Стихи́ры свята́го, глас 8.

Подо́бен: О, пресла́внаго чудесе́:

О, ве́лия ми́лости Бо́жия!/ А́ще и пострада́ град Москва́ по́слежде/ от набе́гов вра́жиих,/ оба́че ти́и не возмого́ша поколеба́ти ми́ра,/ во оте́честве твое́м, свя́те Дими́трие,/ тобо́ю утвержде́ннаго.

О, досто́йное благодаре́ние!/ Мно́ги хра́мы и оби́тели прекра́сны воздви́гл еси́,/ блаже́нне Дими́трие,/ по одоле́нии наше́ствия ага́рянскаго,/ оби́тель же Се́ргия преподо́бнаго/ да́ры мно́гими украси́л еси́.

О, неистощи́мая си́ла любве́!/ Послуша́ние преподо́бнаго Се́ргия исполня́я,/ свя́те Дими́трие,/ моле́ние по во́ином убие́нным соверша́л еси́,/ та́кожде и мы да́же до ны́не твори́м,/ Дими́триеву суббо́ту соблюда́юще.

Сла́ва, глас то́йже:

Да помя́нуты бу́дут ку́пно со святы́м Дими́трием князе́м/ вси лю́дие Русстии,/ ду́ши своя́ о спасе́нии бли́жних положи́вшии./ Та́ко воспомя́нем досто́йно преподо́бнаго первобо́рца би́твы Кулико́вския/ схимона́ха Алекса́ндра Пересве́та/ и пострада́вшия во бра́ни кня́зя Михаи́ла Бренка́/ и схимона́ха Андре́я Осля́бю./ Да почту́тся любо́вию ку́пно сподви́жницы Дими́триевы,/ кня́зь Влади́мир Хра́брый и воево́да наро́чит Дими́трий Волы́нский,/ еще́ же и Андре́й кня́зь,/ с ни́миже и про́чий во́и,/ за зе́млю Ру́сскую не пощади́вшии живота́ своего́.

И ны́не, пра́здника или́ Богоро́дичен.

На Литурги́и слу́жба преподо́бническая.

Моли́тва

О святы́й благове́рный вели́кий кня́же Дими́трие! А́ще и не мно́зи бы́ша дни́е земна́го жития́ твоего́, оба́че вели́к жре́бий прия́л еси́ от Соде́теля всех Го́спода, е́же просла́витися в земли́ Русстей и блаже́нство ве́чное на Небесе́х получи́ти.

Услы́ши нас, моли́твенниче те́плый, предста́телю наш пред Го́сподем неусы́пный! Во дни ми́ра и в годи́ну нестрое́ний не оста́ви нас попече́нием твои́м, научи́ ны поко́рны бы́ти Боже́ственному Промышле́нию, вся в житии́ на́шем ко бла́гу направля́ющему, оте́чество на́ше моли́твами твои́ми от наше́ствий вра́жиих, раздо́ров и нестрое́ний защити́ и укрепи́ те́плым твои́м предста́тельством.

О свя́тче Бо́жий! Моли́, ку́пно со свято́ю супру́жницею и сподви́жницею Твое́ю благове́рною княги́нею Евдоки́ею, да зна́менается на нас свет лица́ Бо́жия и, тем наставля́еми, дости́гнем Ца́рства Пра́вды Христо́вы, неконча́емаго и ве́чнаго. Ами́нь.