НА ВЕЧЕ́РНИ

Пое́м: Блаже́н муж:1-й антифо́н. На Го́споди, воззва́х:стихи́ры пра́здника 3 и свята́го 5, глас 8.

Подо́бен: На Не́бо теку́щее:

На не́бо доброде́телей возше́д превысо́ких,/ чудотво́рец яви́лся еси́ в Ми́рех, сла́вне:/ те́лом в Ба́ре почива́я,/ ду́хом везде́ ве́рныя посеща́еши/ и вся от бед изыма́еши,/ досто́йно честь прие́мля,/ во святи́телех прославля́ешися,/ Христо́в уго́дниче блаже́нне./ Тя ны́не моле́бно призыва́юще,/ уми́льно глаго́лем:/ помоли́ся, святи́телю Нико́лае, Спа́су всех/ умири́ти мир и спасти́ ду́ши на́ша.

Моле́бными пе́сньми, соше́дшеся, празднолю́бцы,/ на́шего засту́пника честно́е пренесе́ние ра́достно восхва́лим,/ и́же вся страны́ просвеща́ет чудесы́/ и скорбя́щия боже́ственне утеша́ет,/ оби́димыя избавля́ет,/ и́же ми́лостынею Бо́га одолжи́/ и того́ ра́ди прия́т стокра́тное воздая́ние./ К нему́же вси мы взыва́ем:/ помоли́ся, святи́телю Нико́лае, Спа́су всех/ умири́ти мир и спасти́ ду́ши на́ша.

А́нгельская жили́ща дости́г доброде́тельми,/ предстои́ши Влады́це твоему́ Христу́,/ Ему́же раб благопокори́в был еси́,/ и от ра́ки ми́ро то́чиши,/ ве́рным посо́бствуя чудесы́ твои́ми/ и к Бо́гу приводя́ благочести́выя./ Не от Ба́ра ны́не призыва́ем тя,/ но от го́рнего Иерусали́ма,/ иде́же ра́достно лику́еши со апо́столы, и проро́ки, и святи́тели:/ помоли́ся, Богоно́се Нико́лае, Спа́су всех/ умири́ти мир и спасти́ ду́ши на́ша.

Сла́ва, глас 6:

Святи́телей удобре́ние/ и отце́в сла́ву,/ исто́чника чуде́с и ве́рных засту́пника вели́каго,/ соше́дшеся, о празднолю́бцы,/ пе́сненными похвала́ми воспое́м, глаго́люще:/ ра́дуйся, ми́рянов храни́телю,/ и первоседа́телю честны́й, и сто́лпе неподви́жимый./ Ра́дуйся, свети́льниче всесве́тлый,/ и́же мирски́я концы́ просвеща́я чудесы́./ Ра́дуйся, скорбя́щих Боже́ственная ра́досте/ и оби́димых те́плый предста́телю./ И ны́не, всеблаже́нне Нико́лае,/ не преста́й моля́ся Христу́ Бо́гу/ о ве́рою и любо́вию чту́щих приснора́достную/ и всепра́зднственную па́мять твою́.

И ны́не, пра́здника.

Вход. Проки́мен дне и чте́ния.

При́тчей чте́ние(главы́ 10 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва,/ от уст ея́ исхо́дит пра́вда,/ зако́н же и ми́лость на язы́це но́сит./Послу́шайте у́бо мене́, о ча́да!/ честна́я бо реку́,/ и блаже́н челове́к, и́же пути́ моя́ сохрани́т, исхо́ди бо мои́ исхо́ди живота́/ и уготовля́ется хоте́ние от Го́спода./ Сего́ ра́ди молю́ вас/ и предлагаю́ мой глас сыново́м челове́ческим,/ я́ко аз, прему́дрость, устро́их сове́т,/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте убо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки,/ честна́я бо реку́, и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х,/ ничто́же в них стро́потно, ниже́ развраще́нно./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

При́тчей чте́ние(главы́ 10 и 11):

Уста́ пра́веднаго ка́плют прему́дрость,/ язы́к же непра́веднаго поги́бнет./ Устне́ муже́й пра́ведных ка́плют благода́ти,/ уста́ же нечести́вых развраща́ются./ Ме́рила льсти́вая ме́рзость пред Го́сподем,/ вес же пра́веден прия́тен Ему́./ Иде́же а́ще вни́дет досажде́ние, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их,/ и поползнове́ние отрица́ющихся упасе́т их./ Не по́льзуют име́ния в день я́рости,/ пра́вда же изба́вит от сме́рти./ У́мер пра́ведный, оста́ви раска́яние,/ нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́,/ в нече́стие же па́дает непра́вда./ Пра́вда муже́й пра́вых изба́вит их,/ безсове́тием же пленя́ются беззако́ннии./ Сконча́вшуся му́жу пра́ведну,/ не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет,/ в него́же ме́сто предае́тся нечести́вый./ Во усте́х нечести́вых сеть гра́жданом,/ чу́вство же пра́ведных благоспе́шное./ Во благи́х пра́ведных испра́вится град,/ и в поги́бели нечести́вых ра́дование./ Во благослове́нии пра́вых возвы́сится град,/ усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.

Прему́дрости Соломо́ни чте́ние(глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гов и быв, возлю́блен бысть/ и живы́й посреде́ гре́шник преста́влен бысть,/ восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́,/ и посеще́ние во избра́нных Его́.

На лити́и стихи́ры самогла́сны, глас 2:

О́тче Нико́лае,/ а́ще и Ми́рская страна́ молчи́т,/ но мир весь, и́же тобо́ю просвеще́нный,/ ми́ра же благоуха́нии и чуде́с мно́жеством/ взыва́ет благохва́льными пе́сньми,/ и спа́сшиися тобо́ю осужде́ннии/ с су́щими в Ми́рех, и мы, пою́ще, вопие́м:/ моли́ спасти́ся душа́м на́шим.

Глас 4: О́тче Нико́лае,/ Пресвята́го Ду́ха мирополо́жница сый,/ я́ко в Ми́рех благоуха́еши Боже́ственными арома́ты,/ Христо́вым бо апо́столом подо́бник быв,/ вселе́нную обхо́диши словесы́ чуде́с твои́х./ Те́мже и да́льным, я́ко близ, во сне явля́яся,/ от сме́рти избавля́еши,/ и́же непра́ведным судо́м умре́ти иму́щия,/ спаса́я пресла́вно от бед мно́гих призыва́ющия тя./ Те́мже и нас от находя́щих лю́тых/ свободи́ твои́ми моли́твами,/ при́сно восхваля́ющих тя.

Глас 8: До́блестей твои́х, преподо́бне о́тче, плод/ просвети́л есть ве́рных сердца́:/ кто бо слы́ша безме́рное твое́ смире́ние/ и терпе́нию не удиви́ся,/ я́же к ни́щим ти́хости,/ к скорбя́щим утеше́нию?/ Вся боголе́пно научи́л еси́,/ святи́телю Нико́лае,/ и ны́не неувяда́емым венце́м увя́злся еси́,/ моли́ся о душа́х на́ших.

На хвалу́ поте́кл еси́ Госпо́дню, Нико́лае,/ во вре́менней жи́зни,/ и Той тя просла́ви на Небе́сней и и́стинней жи́зни./ Те́мже, дерзнове́ние стяжа́в к Нему́,/ моли́ спасти́ ду́ши на́ша.

Сла́ва, глас 6:

Благи́й ра́бе ве́рный,/ де́лателю виногра́да Христо́ва,/ ты и тяготу́ дневну́ю поне́сл еси́,/ ты и да́нный ти тала́нт возрасти́л еси́/ и по тебе́ прише́дшим не зави́дел еси́./ Те́мже врата́ Небе́сная отверзо́шася тебе́,/ вни́ди в ра́дость Го́спода твоего́/ и моли́ о нас, свя́те Нико́лае.

И ны́не, пра́здника.

На стихо́вне стихи́ры глас 4.

Подо́бен: Я́ко до́бля:

Звезду́ незаходи́мую всесве́тлаго со́лнца,/ не́бо духо́вное,/ пове́дающее сла́ву Бо́жию спаси́тельную,/ Боже́ственнаго пропове́дника, просве́щника язы́ком,/ реку́, излива́ющую во́ды ра́зума/ и напая́ющую ве́рных сердца́,/ да ублажи́м Никола́я, пресла́внаго святи́теля.

Стих: Честна́ пред Го́сподем/ смерть преподо́бных Его́.

Мо́рем, святи́телю, бы́ша ше́ствия твоя́/ из Мир Лики́йских в Бар град:/ взя́тся бо от гро́ба ковче́г твой/ и к за́падом до́йде от восто́ка,/ благоче́стно после́довавшим мона́хом,/ и́же при гро́бе твое́м честь ти твори́вшим,/ манове́нием Влады́ки всех,/ Нико́лае пресла́вне.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Кораблепла́ванием ти, во́ду блаже́нну соде́я,/ и, ко гра́ду Ба́ру прише́д,/ ми́ро источи́л еси́, сла́вне,/ и, стра́сти неисце́льныя исцеля́я,/ ту су́щим был еси́ прибе́жище,/ и засту́пник, и изба́витель,/ ко всех Царю́ и Спа́су моля́ся,/ Нико́лае святи́телю.

Сла́ва, глас 6. Самогла́сен:

Челове́че Бо́жий/ и ве́рный ра́бе,/ слуго́ Госпо́день,/ му́жу жела́ний,/ сосу́де избра́нный,/ сто́лпе и утвержде́ние Це́ркве,/ Ца́рствия насле́дниче,/ не премолчи́, вопия́ за ны ко Го́споду.

И ны́не, пра́здника.

Тропа́рь, глас 4:

Приспе́ день све́тлаго торжества́,/ град Ба́рский ра́дуется,/ и с ним вселе́нная вся ликовству́ет/ пе́сньми и пе́ньми духо́вными:/ днесь бо свяще́нное торжество́/ в пренесе́ние честны́х и многоцеле́бных моще́й/ святи́теля и чудотво́рца Никола́я,/ я́коже со́лнце незаходи́мое, возсия́ светоза́рными луча́ми,/ разгоня́я тьму искуше́ний же и бед/ от вопию́щих ве́рно:/ спаса́й нас, я́ко предста́тель наш вели́кий, Нико́лае.

Ин тропа́рь, глас то́йже:

Оте́чество свое́, Ми́ры Лики́йския, не оста́вль ду́хом,/ во преми́рный град Ба́рский пресла́вно те́лом пренесе́ся, архиере́ю Нико́лае./ И отту́ду мно́жество челове́ческое свои́м прише́ствием возвесели́л еси́/ и боля́щия исцели́л еси́./ Те́мже тя мо́лим, святи́телю Нико́лае,/ моли́ Христа́ Бо́га,/ да спасе́т ду́ши на́ша.

Сла́ва, и ны́не, пра́здника.

НА У́ТРЕНИ

На Бог Госпо́дь:тропа́рь пра́здника и свята́го. По 1-й стихоло́гии седа́лен пра́здника, два́жды.

По 2-й стихоло́гии седа́лен святи́теля, глас 4.

Подо́бен: Удиви́ся:

Удиви́л еси́, Влады́ко, святи́теля Твоего́ во страна́х,/ пода́в ему́ чуде́с благода́ть неду́ги разли́чныя от челове́к отгоня́ти/ и су́щия во у́зах избавля́ти,/ оби́димыя же от лю́тых изыма́ти./ Ему́же моле́бно вопие́м:/ святы́й Нико́лае, изба́ви нас от враг на́ших.

Сла́ва, и ны́не, пра́здника или́ Богоро́дичен:

Нечи́стых помышле́ний мои́х мно́жества/ и безме́стных мы́слей обурева́ния кто изрещи́ мо́жет, Пренепоро́чная?/ Настоя́ния же безпло́тных враг мои́х и сих зло́бу кто испове́сть?/ Но Твое́ю мольбо́ю, Блага́я, сих ми всех избавле́ние да́руй.

По полиеле́и седа́лен, глас 1.

Подо́бен: Гроб Твой:

Освя́щ себе́ житие́м соверше́нным, яви́лся еси́ святи́тель Бо́га Вы́шнего,/ от Него́же укрепля́емь, ерети́чествующих уста́ загради́л еси́./ Тем твое́ пренесе́ние све́тло пра́зднуем, Христа́ Бо́га велича́юще.

Сла́ва, и ны́не, пра́здника или Богоро́дичен:

Безневе́стная Чи́стая Богоро́дице Де́во, еди́на ве́рных предста́тельство и покро́ве,/ бед, и скорбе́й, и лю́тых обстоя́ний всех изба́ви,/ на Тя упова́ние, Отрокови́це, иму́щих,/ и ду́ши на́ша спаси́ Боже́ственными мольба́ми Твои́ми.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́.Стих: Что́ возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Иоа́нна, зача́ло 35, от полу́.

По 50-м псалме́ стихи́ра, глас 6:

Насле́дниче Бо́жий, соприча́стниче Христо́в,/ служи́телю Госпо́день, свя́те Нико́лае,/ по и́мени твоему́ та́ко и житие́ твое́:/ спросия́ бо седи́не ра́зум,/ свиде́тельствоваше све́тлость лица́ твоего́ душе́вное незло́бие,/ изве́ствоваше кро́тость Сло́ва молчали́вое./ Жизнь твоя́ сла́вна,/ и успе́ние со святы́ми,/ моли́ о душа́х на́ших.

Кано́н пра́здника со ирмосо́м на 6. И свята́го на 8. Кано́н свята́го, глас 8.

Песнь 1

Ирмо́с: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:/ пои́м Тебе́, еди́ному Влады́це.

Песнь усте́н мои́х приими́, Благода́телю Христе́,/ и уясни́ ми язы́к, не помина́я мно́гих мои́х грехо́в,/ да воспою́ честно́е житие́ Твоего́ святи́теля/ в па́мять пренесе́ния моще́й его́.

Чудотво́рный дар прие́м и терпе́ния венцы́, святи́тельством украша́яся,/ Бо́гу помоли́ся, о́тче, прегреше́ний проще́ние дарова́ти нам,/ сла́вящим твое́ пренесе́ние.

Па́стырь Христо́ва ста́да, о́тче, ины́м овца́м посыла́ешися, к лати́нскому язы́ку,/ да вся удиви́ши чудесы́ твои́ми и ко Христу́ приведе́ши, блаже́нне,/ Ему́же и о нас моли́ся непреста́нно.

Богоро́дичен: Дале́че бы́вше иногда́,/ язы́честии наро́ди Рождество́м Твои́м, Богоро́дице, к Бо́гу прибли́жихомся:/ Ты бо мене Обожи́вшаго породила́ еси́ и дре́вния кля́твы Свобо́ждшаго Свое́ю кро́вию.

Ин кано́н Никола́я, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Просвети́ ду́шу и се́рдце, молю́ Ти ся, Светода́вче, тва́ри Соде́телю,/ дар пода́ждь ми воспева́нием пе́ти Твоего́ уго́дника пречестна́го,/ и́мже мир от ско́рби изба́ви.

Небе́сную ты обре́т прему́дрость,/ я́ко тала́нта вруче́ннаго, благоупотреби́л еси́:/ то́ю бо, разори́в противобо́жную лесть,/ умудри́л еси́ лю́ди Боже́ственным уче́нием.

Богоро́дичен: Зачина́ется Преве́чный, и соверше́нный обновля́ется,/ из Отрокови́цы Де́тищ ражда́ется,/ Его́же пропове́дал еси́ во двою́ существу́,/ во еди́ной же Ипоста́си, Богоблаже́нне.

Катава́сия пра́здника.

Песнь 3

Ирмо́с: Небе́снаго кру́га Верхотво́рче, ́Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ еди́не Человеколюбче.

Незло́бивый нра́вом и кро́ткий о́бразом,/ житие́ име́я а́нгельское, Богоблаже́нне Нико́лае,/ не преста́й о нас моля́ся еди́ному Человеколю́бцу.

Кий град, блаже́нне, не име́ет тебе́ помо́щника?/ Ка́я ли душа́ не призыва́ет твоего́ и́мене?/ Или́ ко́его ме́ста не присеща́еши ду́хом, твои́ми чудесы́ удивля́я вся, Нико́лае?

Ба́рский у́бо град прия́т те́ло твое́, но дух твой в Вы́шнем Иерусали́ме,/ иде́же лику́еши со проро́ки, и апо́столы, и святи́тели ку́пно,/ моля́ся о нас еди́ному Человеколю́бцу.

Богоро́дичен: Просвеще́ние ми испроси́, Пречи́стая Влады́чице,/ омраче́нному грехи́ мно́гими, поро́ждшая Свет всему́ ми́ру,/ и страстну́ю мглу дале́че отжени́, еди́на Богоблаже́нная.

Ин

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Печа́льнии тя обрето́хом кре́пкое утеше́ние,/ помраче́нии – свет, и злых измене́ние и́же скорбьми́ одержи́мии,/ свяще́ннейший о́тче.

Святи́телю Нико́лае, Бо́жия уста́ быв,/ из уст во́лка неприя́зненна лю́ди изба́вил еси́, сла́вне,/ и приве́л еси́ Творцу́ дар, дая́й исцеле́ние всем.

Богоро́дичен: Еди́н роди́тися изво́ли пло́тию из Тебе́,/ вы́ше сло́ва сый Сло́во, Богома́ти Пречи́стая,/ избра́вый слугу́ Себе́ и учи́теля наро́дом иера́рха Никола́я.

Конда́к пра́здника, и и́кос.

И седа́лен святи́теля, глас 1.

Подо́бен: Гроб Твой:

Пренесе́ние твои́х честны́х моще́й положе́ние нам бысть пра́зднества све́тла,/ святи́телю Госпо́день прехва́льный,/ е́же хва́лим благоче́стно, и ра́достно чту́ще тя све́та незаходи́маго Со́лнца,/ ве́рным добро́то, Нико́лае.

Сла́ва, и ны́не, пра́здника.

Песнь 4

Ирмо́с: Всел еси́ на ко́ни, апо́столы Твоя́, Го́споди,/ и прия́л еси́ рука́ма Твои́ма узды́ их,/ и спасе́ние бысть ежде́ние Твое́ ве́рно пою́щим:/ сла́ва си́ле Твое́й, Го́споди.

Све́том Вы́шнего озаря́емь, святи́телю,/ мое́ се́рдце просвети́ и тьму грехо́вную отжени́,/ да, ра́дуяся, пою́ твое́ свято́е пренесе́ние.

Возсту́пль на ле́ствицу доброде́телей, блаже́нне,/ чудотво́рец яви́лся еси́ по всей земли́, Нико́лае,/ и сего́ ра́ди от Мир ба́рстии лю́дие прие́млют святы́я мо́щи твоя́.

Иере́и ве́рнии о тебе́ хва́лятся,/ и лю́дие христолюби́вии призыва́ют тя, во бране́х помо́щника,/ и мы, недосто́йнии, подвиза́ем тя к Бо́гу за ны моли́тися, Нико́лае.

Богоро́дичен: Чи́ны а́нгельския удивля́ет, Богоро́дице, та́йны Твоея́ глубина́,/ бе́сы же смуща́ет Твоя́ ико́на./ Е́йже мы кла́няемся, чту́ще Тя, Бо́жию Ма́терь.

Ирмо́с: Неизсле́дный Бо́жий сове́т,/ е́же от Де́вы воплоще́ния Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.

Нача́льна, Богогла́се, Све́та Бо́жия прича́стием вторы́й яви́лся еси́,/ сия́нием просвеща́ющ мра́чный,/ я́ко рачи́тель добродете́ли, преизя́щен сла́вою.

Изба́ви ста́до твое́ от грехо́вныя бу́ри, бед же и волн проти́вных,/ вводя́ ны при́сно к приста́нищем безво́лненным,/ спаси́тельными твои́ми моли́твами.

Богоро́дичен: Естество́м несказа́нно Вы́шнего Све́та,/ милосе́рдием пребога́таго ро́ждшая неизрече́нно,/ обнища́вшия ны, Пречи́стая, Бо́жиими да́ры обогати́.

Песнь 5

Ирмо́с: Мрак души́ моея́ разжени́, Светода́вче Христе́ Бо́же,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,/ да, у́тренюя, сла́влю Тя.

В Ми́рех престо́л име́л еси́, в Бар те́ло пресели́л еси́,/ и ду́хом на Небеси́ пребыва́еши, святи́телю Нико́лае, со апо́столы, я́ко прее́мник,/ с ни́миже о нас моли́, пою́щих твое́ пренесе́ние.

Всех христиа́н наде́ждо, и оби́димых ве́лий засту́пниче, и боля́щих цели́телю,/ печа́льных уте́шителю и к Бо́гу от челове́к хода́таю,/ оте́честву на́шему мир испроси́ и спаса́й ны от пога́ных нахожде́ния.

Погруже́нную ду́шу мою́ мно́гими страстьми́, Нико́лае, умерщвле́нную грехопаде́нием,/ оживи́ твои́ми моли́твами и напра́ви на покая́ние,/ да с ве́рными все́ми твое́ сла́влю пренесе́ние.

Богоро́дичен: Его́же тьмы а́нгельския и серафи́мская мно́жества ужаса́ются/ и разу́мная тварь трепе́щет,/ Того́ я́ко Младе́нца, Де́во, пита́еши,/ Его́же обра́зно на руку́ Твое́ю ви́дяще, всегда́ покланя́емся.

Ин

Ирмо́с: Ужасо́шася вся́ческая/ о Боже́ственней сла́ве Твое́й;/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Мно́гим чудотворе́нием кра́сне но́зе стяжа́в,/ всем блага́я благовести́л еси́,/ от вражды́ ве́тхия свобо́дны творя́ Боже́ственным уче́нием,/ спаси́ ны, священнонача́льниче.

Бо́га благоволе́нием на хребе́т морски́й всед/ и со благогове́йными му́жи мно́гу пучи́ну преше́д,/ ко гра́ду Ба́рску прише́л еси́, блаже́нне Нико́лае.

Богоро́дичен: Щит ве́рным, Бо́жия Ма́ти Де́во, Тя вои́стинну сла́вим, а́нгельски зову́ще Ти:/ ра́дуйся, Благослове́нная и Благода́тная, слы́шание и глаго́лание стра́шно/ и ди́вно поко́ище Влады́це тва́ри вся́кия.

Песнь 6

Ирмо́с: Я́коже проро́ка изба́вил еси́/ из глубины́ преиспо́дния, Христе́ Боже́,/ и мене́ от грехо́в мои́х изба́ви, я́ко Человеколю́бец,/ и упра́ви живо́т мой, молю́ся.

Я́ко от окри́на, от Боже́ственныя твоея́ це́ркве неску́дно прие́млем здра́вие телесе́м/ и душа́м очище́ние, святи́телю Нико́лае,/ чудеса́ бо то́чиши благода́тию несомне́нною ве́рою упова́ющим на тя.

От напа́стей разли́чных, и бед лю́тых, и скорбе́й, одержа́щих ны,/ и от разли́чных злых, о́тче, я́ко Христо́в уго́дник пресла́вный, изба́ви рабы́ твоя́,/ достодо́лжно чту́щия твое́ свято́е пренесе́ние.

Грехо́вным мра́зом исте́рп и жите́йским ве́тром порева́емь,/ я́ко друго́е со́лнце, о́тче, подо́бие твоего́ о́браза ви́дев,/ твои́ми моли́твами да согре́юся, служи́телю Христо́в Нико́лае.

Богоро́дичен: Земны́х ум Небе́сныя та́йны не уве́сть, ни тварь Творца́ ра́зума домы́слится:/ прехо́дит бо ум челове́ч от Де́вы рождество́ Госпо́дне./ Е́йже моля́щеся ве́рою, грехо́в проще́ние прии́мем.

Ин

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Лю́ди Бо́жия ко спасе́нию устро́ивый во пло́ти Я́вльшагося мно́гия ра́ди бла́гости,/ пропове́дниче Нико́лае и язы́к учи́телю,/ спаси́ ны наставле́нием твои́м.

Име́вый путь мо́ре и стези́ во́ды,/ умоли́ у Го́спода, е́же нам мо́ре жите́йское преплы́ти без вре́да/ и стезе́ю вод сле́зных дости́гнути Ца́рствие Небе́сное.

Богоро́дичен: Ты дверь Царя́ Небе́с и храм сла́вы Его́, Де́во Всепе́тая,/ отве́рзи нам две́ри милосе́рдия/ и введи́ ны моли́твами Твои́ми в жили́ща Небе́сныя сла́вы.

Конда́к, глас 3.

Подо́бен: Де́ва днесь:

Взы́де, я́ко звезда́, от восто́ка до за́пада/ твоя́ мо́щи, святи́телю Нико́лае,/ мо́ре же освяти́ся ше́ствием твои́м,/ и град Ба́рский прие́млет тобо́ю благода́ть:/ нас бо де́ля яви́лся еси́ чудотво́рец изя́щный,/ преди́вный и ми́лостивый.

И́кос:

Воспои́м ны́не святи́теля пе́сньми, Ми́рским лю́дем па́стыря и учи́теля,/ да моли́твами его́ просвети́мся:/ сей бо яви́ся чист весь, нетле́нен ду́хом,/ Христу́ принося́ же́ртву непоро́чну, чи́сту, Бо́гу благоприя́тну,/ я́ко святи́тель, очище́н и душе́ю и те́лом./ Те́мже сый и́стинно Це́ркви предста́тель и побо́рник сея́/ и чудотво́рец изя́щен, преди́вен и ми́лостив.

Песнь 7

Ирмо́с: На по́ле Деи́ре/ иногда́ мучи́тель пещь поста́ви на муче́ние Богоно́сных,/ в не́йже три о́троки песносло́вяху Еди́наго Бо́га,/ тро́ично воспева́ху, глаго́люще:/ отце́в Бо́же, благослове́н еси́.

Днесь ра́дуются А́нгели Бо́жии, рыда́ет же де́монское мно́жество:/ спасл бо еси́ лю́ди от напа́сти и отгна́л еси́ ду́хи те́мныя./ Тем досто́йно одоле́вый нарица́ешися./ Сего́ ра́ди вопие́м Го́сподеви:/ оте́ц на́ших Бо́же, благослове́н еси́.

Одержи́мии печа́лию не́мощи, разли́чными неду́ги утружде́ни,/ с ве́рою к ра́це твое́й влеку́тся/ и, получи́вше твою́ ми́лость, быстрообра́зно отхо́дят, ра́достно Го́сподеви пою́ще:/ оте́ц на́ших Бо́же, благослове́н еси́.

Предстоя́т ти, блаже́нне, собо́ри правове́рных люде́й,/ и хва́лятся о тебе́ церко́внии учи́тели,/ прославля́ют же тя цари́, я́ко засту́пника./ Мы же ти мо́лимся, спаси́ ны, Нико́лае, пою́щия Го́сподеви:/ оте́ц на́ших Бо́же, благослове́н еси́.

Богоро́дичен: О, ка́ко, Спа́са моего́ воспою́, Его́же тре́петно хва́лят А́нгели?/ Но Ты, Ма́ти, наста́ви мя и милосе́рдие Сыно́внее благоутро́бием Твои́м пону́ди/ поми́ловати ны, на Тя упова́ющия,/ я́ко Ты, за ны моля́щи Его́, от му́ки изба́виши.

Ин

Ирмо́с: Не послужи́ша тва́ри Богому́дрии,/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Веще́й су́етством всему́ уму́ челове́ческому обуя́вшу,/ я́ко со́лию, даждь цельбу́ сло́вом твои́м и пе́ти Го́сподеви научи́:/ препе́тый отце́в Госпо́дь и Бог, благослове́н еси́.

О, пресла́вная твоя́ чудеса́, я́же сотвори́л еси!/ Неду́ги бо исцеля́еши и бед избавля́еши, всем вопи́ти повелева́я Го́сподеви:/ препе́тый оте́ц на́ших Бо́же, благослове́н еси́.

Богоро́дичен: На́шему смире́нию Засту́пница и стена́, Богороди́тельнице Чи́стая, Ты еси́./ И́же раби́ Твои́ су́ще, всегда́ вопие́м Го́сподеви:/ препе́тый оте́ц на́ших Бо́же, благослове́н еси́.

Песнь 8

Ирмо́с: А́нгели и Небеса́,/ на престо́ле сла́вы седя́щаго и я́ко Бо́га непреста́нно сла́вимаго/ благослови́те, по́йте/ и превозноси́те Его́ во ве́ки.

А́нгели Небе́с я́ко служи́теля тя восприе́млют,/ проро́цы и апо́столи я́ко клевре́та срета́ют,/ Сам Госпо́дь тебе́ восприе́млет,/ мы же, гре́шнии, ми́лости про́сим.

Вели́ка власть от Бо́га вдана́ ти есть, Нико́лае:/ мо́ре повину́ется, возду́х слу́шает, и язы́цы покаря́ются,/ ви́дяще пресла́вная твоя́ чудеса́.

Но́вому Изра́илю, христиа́нскому наро́ду, Спа́се,/ славне́йши Моисе́я показа́л еси́ Твоего́ святи́теля Никола́я,/ от всех зол нас избавля́юща.

Богоро́дичен: Очище́ние грехо́в я́ко Ма́ти Бо́жия испроси́/ и ру́ку ми простри́, Госпоже́, погруже́нному во глубине́ неча́яния,/ да, наде́ждею воста́в, превозноша́ю Тя во ве́ки вся.

Ин

Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Возра́сл еси́, я́ко цвет благоуха́нен, ми́рския земли́, сла́вне,/ всем принося́ благоуха́нныя вони́, целе́бныя да́ры хва́лящим тя и пою́щим:/ Го́спода воспева́йте, дела́, и превозноси́те Его́ во вся ве́ки.

Иска́павый Бо́жия благода́ти сла́дость, я́ко гора́ ма́сличная еле́й,/ мо́ре име́л еси́ путь, безбе́дствен благода́тию Го́спода, Ему́же сла́дце зове́м:/ Го́спода воспева́йте, дела́, и превозноси́те Его́ во вся ве́ки.

Богоро́дичен: Лико́в преми́рных со удивле́нием ражда́еши и пребыва́еши при́сно Де́ва:/ Сло́во бо родила́ еси́, Челове́ка бы́вша непрело́жна Божество́м,/ Ему́же вси пое́м:/ Го́спода воспева́йте, дела́, и превозноси́те Его́ во вся ве́ки.

Песнь 9

Ирмо́с: Благослове́н Госпо́дь Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́,/ в ни́хже посети́ нас Восто́к с высоты́/ и напра́вил ны есть на путь ми́ра.

Благослове́н Госпо́дь Бог наш, я́ко просла́ви святи́теля во страна́х,/ чуде́с струи́ испуща́юща, в Ми́рех и в лати́нех вся исцеля́юща/ и в Руси́ ми́лостивно посеща́юща.

Честны́м сном усну́л еси́ и те́ло в Бар по́льзы ра́ди пусти́л еси́,/ неусы́пный быв засту́пник всем, ве́рою призыва́ющим тя,/ моли́твами твои́ми, Нико́лае.

Благослове́н Небесе́ и земли́ Творе́ц,/ Бог Вседержи́тель, Оте́ц Безнача́льный и Всеси́льный,/ и Сын пре́жде век, от недр отрыгнове́нное Сло́во,/ И́мже вся бы́ша, я́же о нас,/ и Дух исходя́й Святы́й, Тро́ице Свята́я, сла́ва Тебе́.

Богоро́дичен: Изви́тием слове́с по достоя́нию Тя похвали́ти не достиза́ю,/ Небе́сных сил пребо́льшу и тва́ри всея́ Честне́йшу, Бо́га и Творца́ поро́ждшую пло́тию./ Его́же моли́, Богоро́дице, да поми́лует ны в День су́дный.

Ин

Ирмо́с: Всяк земноро́дный/ да взыгра́ется, ду́хом просвеща́ешь,/ да торжеству́ет же Безпло́тных умо́в естество,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Па́мять твоя днесь прино́сит пра́зднество,/ апо́стольский лик и му́ченический собо́р ра́дуется и пра́веднии ду́си,/ ве́рнии же тя пе́сньми сла́вим, вопию́ще:/ от всех скорбе́й, святи́телю Христо́в, изба́ви ны.

Пресла́вная па́мять твоя́ нам возсия́,/ све́тло просвеща́ющи ве́рныя, святи́телю Христо́в Нико́лае му́дре./ Те́мже мо́лим тя: помяни́ всех нас/ и от проти́вныя напа́сти вся́кия моли́твами твои́ми изба́ви.

Богоро́дичен: Умертви́ на́ша плотски́я стра́сти и по́хоти, Богороди́тельнице Чи́стая,/ уста́ви и страсте́й на́ших бу́рю, утоли́ волне́ние помысло́в,/ укрепи́, Благослове́нная Пречи́стая, сердца́ ве́рно чту́щих Тя, Засту́пницу.

Свети́лен.

Подо́бен: Жены́, услы́шите:

Вели́ка чудеса́ твоя́, пресвяты́й Нико́лае,/ я́ко яви́лся еси́ во сне богому́дрому Константи́ну/ и три во́ины спасл еси́, без вины́ на смерть осужде́нныя./ Та́ко и нас спаси́ от напра́сныя и ве́чныя сме́рти,/ пресвяты́й Нико́лае, святи́телю Госпо́день.

Сла́ва, и ны́не, пра́здника.

На хвали́тех стихи́ры на 4, глас 1. Самогла́сны:

Воззре́в неукло́нно на высоту́ ра́зума/ и узре́в неявле́нныя прему́дрости глубину́,/ уче́нии мир обогати́л еси́, о́тче./ О нас при́сно моли́ся Христу́,/ святи́телю Нико́лае.

Челове́че Бо́жий, и ве́рный уго́дниче,/ и строи́телю Того́ та́ин,/ и му́жу жела́ний духо́вных,/ сто́лпе одушевле́нный и вдохнове́нный о́браз,/ я́ко Боже́ственное бо сокро́вище,/ тя Ми́рская Це́рковь, чудя́щися, прия́ла есть/ и моли́твенника о душа́х на́ших.

Глас 2: Пра́вило ве́ры и о́браз кро́тости/ яви́ тебе́ ста́ду твоему́ Христо́с Бог,/ святи́телю Нико́лае,/ в Ми́рех у́бо благоуха́ющу ти/ всю́ду сия́ют све́тло Боже́ственная твоя́ исправле́ния,/ си́рых и вдови́ц предста́телю./ Те́мже моли́ся непреста́нно/ спасти́ ду́ши на́ша.

О́тче Нико́лае,/ мирополо́жница моще́й твои́х Ми́ры обогаща́ет,/ в ни́хже и свя́занныя непра́ведно осужде́нныя,/ во сне царю́ я́влься,/ и твои́м явле́нием свободи́л еси́ от смерти, и уз, и темни́цы,/ но и ны́не, я́коже тогда́,/ и при́сно явле́нием твои́м яви́ся,/ моля́й о душа́х на́ших.

Сла́ва, глас 5:

Воструби́м трубо́ю пе́сней,/ взыгра́ем пра́зднственная и ликовству́ем, ра́дующеся,/ в моле́бное торжество́ Богоно́снаго отца́,/ цари́ и кня́зи да стеку́тся,/ и́же со́нным стра́шным явле́нием царя́ препира́юща/ непови́нно держи́мыя три отпусти́ти воево́ды да воспою́т;/ па́стыри и учи́тели,/ До́брому Па́стырю подобноревни́тельна па́стыря,/ соше́дшеся, восхва́лим;/ и́же в неду́зех – врача́, в беда́х – изба́вителя,/ гре́шнии – засту́пника, ни́щии – сокро́вище/ и и́же в ско́рбех – уте́шителя,/ спу́тника – путеше́ствующии,/ на мо́ри су́щии – прави́теля/ и вси везде́ те́пле предваря́юща./ Вели́каго святи́теля/ восхваля́юще, си́це рцем:/ пресвяты́й Нико́лае, предвари́, и изба́ви нас от настоя́щия беды́,/ и спаси́ ста́до твое́ моли́твами твои́ми.

И ны́не, пра́здника.

По трисвято́м тропа́рь свята́го. Сла́ва, и ны́не,пра́здника. Славосло́вие вели́кое. Ектении́ и отпу́ст. Зна́менуются же бра́тия святы́м еле́ем от канди́ла свята́го. И час 1-й, и коне́чный отпу́ст.

НА ЛИТУРГИ́И

Блаже́нны: от кано́на пра́здника, песнь рядова́я и свята́го песнь 3-я, на 4. Проки́мен, глас 7: Восхва́лятся преподо́бнии во сла́ве/ и возра́дуются на ло́жах сво́их. Стих: Воспо́йте Го́сподеви песнь но́ву, я́ко ди́вна сотвори́ Госпо́дь. Апо́стол ко Евре́ем, зача́ло 335, Аллилу́ия,глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Ева́нгелие от Луки́ зача́ло 24. Прича́стен: В па́мять ве́чную:

Моли́тва

О всехва́льный и всечестны́й архиере́ю, вели́кий чудотво́рче, святи́телю Христо́в, о́тче Нико́лае, челове́че Бо́жий и ве́рный ра́бе, му́жу жела́ний, сосу́де избра́нный, кре́пкий сто́лпе церко́вный, свети́льниче пресве́тлый, звездо́ осиява́ющая и освеща́ющая всю вселе́нную. Ты еси́ пра́ведник, я́ко фи́никс процве́тший, насажде́нный во дво́рех Го́спода своего́, живы́й в Ми́рех, ми́ром облагоуха́л еси́ и ми́ро приснотеку́щее благода́ти Бо́жия источа́яй. Твои́м ше́ствием, пресвяты́й о́тче, мо́ре освяти́ся, егда́ многочуде́сныя твоя́ мо́щи ше́ствоваху во град Ба́рский, от восто́ка до за́пада хвали́ти и́мя Госпо́дне. О преизя́щный и преди́вный чудотво́рче, ско́рый помо́щниче, те́плый засту́пниче, па́стырю предо́брый, спаса́ющий слове́сное ста́до от вся́ких бед! Тебе́ прославля́ем и тебе́ велича́ем, я́ко наде́жду всех христиа́н, исто́чника чуде́с, защи́тителя ве́рных прему́драго учи́теля, а́лчущих корми́теля, пла́чущих весе́лие, наги́х одея́ние, боля́щих врача́, по мо́рю пла́вающих управи́теля, пле́нников свободи́теля, вдов и сиро́т пита́теля и засту́пника, целому́дрия храни́теля, младе́нцев кро́ткаго наказа́теля, ста́рых укрепле́ние, по́стников наста́вника, тружда́ющихся упокое́ние, ни́щих и убо́гих изоби́льное бога́тство. Усль́ппи нас, моля́щихся тебе́ и прибега́ющих под кров твой, яви́ предста́тельство твое́ о нас к Вы́шнему и исхода́тайствуй твои́ми богоприя́тными моли́твами вся поле́зная ко спасе́нию душ и теле́с на́ших: сохрани́ святу́ю оби́тель сию́ (или́ храм сей), вся́кий град и весь, и вся́кую страну́ христиа́нскую, и лю́ди живу́щия от вся́каго озлобле́ния по́мощию твое́ю, ве́мы бо, ве́мы, я́ко мно́го мо́жет моли́тва пра́веднаго, поспешеству́ющая во благо́е; тебе́ же пра́веднаго, по Преблагослове́нней Де́ве Мари́и, предста́теля ко Всеми́лостивому Бо́гу и́мамы, и к твоему́, преблаги́й о́тче, те́плому хода́тайству и заступле́нию смире́нно притека́ем: ты нас соблюди́, я́ко бо́дрый и до́брый па́стырь, от вся́ких враго́в, губи́тельства, тру́са, гра́да, гла́да, пото́па, огня́, меча́, наше́ствия иноплеме́нников, и во вся́ких беда́х и ско́рбех на́ших подава́й нам ру́ку по́мощи, и отве́рзи две́ри милосе́рдия Бо́жия: поне́же недосто́йни есмы́ зре́ти высоту́ небе́сную, от мно́жества непра́вд на́ших, свя́зани у́замигрехо́вными, и николи́же во́ли Созда́теля на́шего сотвори́хом, ни сохрани́хом повеле́ний Его́. Те́мже преклоня́ем коле́на сокруше́нна и смире́нна се́рдца на́шего к Зижди́телю своему́, и твоего́ оте́ческаго заступле́ния к Нему́ про́сим: помози́ нам, уго́дниче Бо́жий, да не поги́бнем со беззако́нии на́шими, изба́ви нас от вся́каго зла и от вся́кия ве́щи сопроти́вныя, упра́ви ум наш и укрепи́ се́рдце на́ше в пра́вой ве́ре, в не́йже твои́м предста́тельством и хода́тайством, ни ра́нами, ни преще́нием, ни мо́ром, ни ко́им гне́вом от Созда́теля своего́ ума́лени бу́дем, но ми́рное зде поживе́м житие́ и да сподо́бимся ви́дети блага́я на земли́ живы́х, сла́вяще Отца́ и Сы́на и Свята́го Ду́ха, Еди́наго в Тро́ице сла́вимаго Бо́га и покланя́емаго, ны́не, и при́сно, и во ве́ки веко́в. Ами́нь.

И́на моли́тва

О всесвяты́й Нико́лае, уго́дниче преизря́дный Госпо́день, теплый наш засту́пниче и везде́ в скорбех ско́рый помо́щниче. Помози́ мне, гре́шному и уны́лому, в настоя́щем житии́, умоли́ Го́спода Бо́га дарова́ти ми оставле́ние всех мои́х грехо́в, ели́ко согреши́х от ю́ности моея́, во всем житии́ мое́м, де́лом, сло́вом, помышле́нием и все́ми мои́ми чу́вствы, и во исхо́де души́ моея́ помози́ ми, окая́нному, умоли́ Го́спода Бо́га, всея́ тва́ри Соде́теля, изба́вити мя возду́шных мыта́рств и ве́чнаго муче́ния, да всегда́ прославля́ю Отца́, и Сы́на, и Свята́го Ду́ха и твое́ ми́лостивное предста́тельство, ны́не, и при́сно, и во ве́ки веко́в. Ами́нь.

И́на моли́тва

О всеблаги́й о́тче Нико́лае, па́стырю и учи́телю всех, ве́рою притека́ющих ко твоему́ заступле́нию и те́плою моли́твою тебе́ призыва́ющих, ско́ро потщи́ся и изба́ви Христо́во ста́до от волко́в, губя́щих е, и вся́ку страну́ христиа́нскую огради́ и сохрани́ святы́ми твои́ми моли́твами от мирска́го мяте́жа, тру́са, наше́ствия иноплеме́нников и междоусо́бныя бра́ни, от гла́да, пото́па, огня́, меча́ и напра́сныя сме́рти. И я́коже поми́ловал еси́ трие́х муже́й, в темни́це седя́щих, и изба́вил еси́ их царе́ва гне́ва и посече́ния ме́чного, та́ко поми́луй и мене́, умо́м, сло́вом и де́лом во тьме грехо́в су́ща, и изба́ви мя гне́ва Бо́жия и ве́чныя ка́зни, я́ко да твои́м хода́тайством и по́мощию, Свои́м же милосе́рдием и благода́тию Христо́с Бог ти́хое и безгре́шное житие́ даст ми пожи́ти в ве́це сем и изба́вит мя шу́ияго стоя́ния, сподо́бит же десна́го со все́ми святы́ми. Ами́нь.

Тропа́рь, глас 4:

Пресве́тлый хра́ме Свята́го Ду́ха,/ Богому́дре о́тче Нико́лае,/ благода́тию Небе́с освяти́ ду́ши на́ша,/ заступи́ и покры́й всечестны́м твои́м омофо́ром,/ его́ же прия́л еси́ от рук Пречи́стыя Де́вы,/ и просвети́ нас све́том за́поведей Христа́,/ от Него́ бо прия́л еси́ глаго́лы жи́зни./ Моли́ бла́гость Отца́ Небе́снаго,/ во е́же спасти́ся/ правосла́вно чту́щим тя,/ да́руя нам ве́лию ми́лость.

Конда́к, глас 6:

Ди́внаго в чудесе́х чудотво́рца/ воспое́м, вси лю́дие,/ пра́зднующе но́ваго исто́чника щедро́т явле́ние,/ издале́че к нам прите́кшаго,/ вели́каго святи́теля хоте́нием:/ припа́дающе к нему́ ве́рою,/ напоя́ем жа́ждущия ду́ши своя́,/ любо́вию зову́ще:/ о пресла́вный Николае,/ па́стырю наш до́брый,/ помози́ нам, немощны́м и убо́гим,/ в житии́ сем многотру́дном/ и ве́чныя жи́зни насле́дники нас сотвори́.

Стихи́ры проро́ка, глас 4.

Подо́бен: Дал еси́ зна́мение:

У́глем Божества́ воплоще́нному очище́н,/ проро́честву уве́рися вели́кий и сла́вный Иса́ия,/ и, Боже́ственную сла́ву ви́дети сподо́блься,/ мно́гим доброде́тели бога́тством и чистото́ю/ пропове́дник предполага́ется/ и провозвеща́ет бу́дущее спасе́ние язы́ком/ и Боже́ственное явле́ние.

Ум же и мысль очи́щ, досточу́дне Иса́ие,/ Ду́ха благоуго́ден орга́н,/ де́йствы сего́ и дохнове́ньми ударя́емь при́сно,/ и богому́дренно сложе́н был еси́, пресла́вне,/ на престо́ле Седя́щаго превознесе́нне зря/ и Боже́ственным науча́яся.

Еди́но Госпо́дство Триипоста́снаго Божества́,/ Трисвяты́м ра́зумом,/ непреста́нно сла́вящия Серафи́мы Боже́ственныя,/ блаже́нне, ви́дев и научи́вся,/ проро́честей уве́рился еси́ благода́ти, чу́дне./ Те́мже, твою́ всесвяще́нную соверша́юще па́мять,/ Христу́ тя приво́дим, моли́твенника си́льнейшаго.

И́ны стихи́ры му́ченика, глас то́йже.

Подо́бен: Я́ко до́бля:

Христофо́ре пресла́вне,/ христоимени́тый сто́лпе,/ честно́е украше́ние благода́ти,/ ты, си́льных держа́ву низве́рг,/ мучи́телей посрами́л еси́/ и Христа́ я́ко и́стинна Царя́ и Зиждителя твоего́ пропове́дал еси́./ Его́же Боже́ственною си́лою/ с Небесе́ вене́ц Боже́ственный прия́л еси́/ и пребыва́ющую сла́ву.

Непристу́пным Божество́м, неизрече́нною бла́гостию/ и тве́рдою све́тлостию, просвеща́емь,/ мрак и́дольский разори́в,/ беззако́нных шата́ния низложи́л еси́ све́тло/ и, огне́м и ра́нами одержи́мь,/ супроти́внаго стрельца́ на суди́щи низло́жь,/ победоно́сец и победи́тель яви́лся еси́.

Си́лы Вы́шних во́инств тебе́ удиви́шася,/ и му́ченичестии чи́ни еовозвесели́шася,/ пра́ведных собо́ри согла́сно возопи́ша,/ и руко́ю Богонача́льною Бог свы́ше венча́./ Темже зове́м:/ Христофо́ра моли́твами, я́ко Щедр/ спаси́ вся, творя́щия сего́ Боже́ственное торжество́.

Сла́ва, и ны́не, пра́здника.

Тропа́рь, глас 2:

Проро́ка Твоего́ Иса́ии па́мять, Го́споди, пра́зднующе,/ тем Тя мо́лим:/ спаси́ ду́ши на́ша.

Други́й тропа́рь му́ченика, глас 4:

Оде́ждами от крове́й украша́яся,/ Го́сподеви предстои́ши, Царю́ сил, Христофо́ре приснопа́мятне,/ отону́дуже со Безпло́тными и му́ченики пое́ши/ трисвяты́м и стра́шным сладкопе́нием./ Те́мже моли́твами твои́ми спаса́й ста́до твое́.

Кано́н святы́х, проро́ка и му́ченика. Творе́ние Феофа́ново, глас 4.

Песнь 1

Ирмо́с: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу.

Просвети́ мя, Го́споди Бо́же мой,/ и наста́ви све́тло Боже́ственнаго проро́ка Твоего́/ сла́вное и честно́е восхвали́ти торжество́.

Боговеща́нная труба́ Иса́иина, огласи́вшая зе́млю,/ церко́вныя пита́тели созва́ пра́здновати па́мять его́.

Стра́сти теле́сныя, Богоно́се, помысло́м душе́вным тве́рдо покори́в,/ сла́ву сподо́бился еси́ ви́дети Вседержи́теля.

Мученика: Прииди́те вси днесь, христоно́сцы,/ Христофо́ра па́мять, и́стины свиде́теля Богому́драго,/ благоче́стно воспои́м.

Му́жески подвиза́вся на лесть,/ мучи́телей преще́ния, му́чениче страстоно́сче,/ кре́постию Христо́вою утвержда́емь, попра́л еси́.

Богоро́дичен: Жезл прозря́ Тя, Богоро́дице,/ цвет же па́ки из Тебе́ воплоще́нное Сло́во,/ провозвести́ сла́вный Иса́ия, Пречи́стая.

Песнь 3

Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Всю зарю́ духо́вную восприе́м,/ провозгласи́л еси́, сла́вне, Сло́ва смотре́ния неизрече́нное та́инство.

Взя́лся еси́ к высоте́ Небе́сней, и благоче́стия све́тлость показа́л еси́,/ и́дольскаго су́етия ты изобличи́в не́мощь.

Ка́меня в Сио́не пречестна́го, краеуго́льнаго,/ вселе́нную содержа́щего Влады́ку Христа́/ Иса́ия проро́чествует, полага́ема.

Мученика: Ору́жием Креста́ огражда́емь, му́чениче Христофо́ре, ра́ны претерпе́л еси́,/ присножела́емаго наслажда́ешися, ра́дуяся.

Плоть у́бо ра́нами ссеца́шеся,/ боголюби́вая же твоя́ душа́ любо́вию пита́шеся,/ поуча́ющися Ца́рствия, Христофо́ре, наслажде́нию.

Богоро́дичен: Рече́ние вои́стинну испо́лнися Иса́иино:/ Де́ва бо роди́ воплоще́нна Жизнода́вца и Спа́са душ на́ших.

Конда́к му́ченика, глас 2:

Свы́ше, прему́дре, зва́ние прия́л еси́,/ Христу́ тезоимени́т быв, Христофо́ре сла́вне,/ му́чеником Боже́ственная добро́то./ С ни́ми же всегда́ моли́/ согреше́ний разреше́ние дарова́ти нам.

Седа́лен, глас 4.

Подо́бен: Ско́ро предвари́:

От страсте́й теле́сных преочи́стив ду́шу,/ сла́ву ви́дел еси́ над все́ми су́щаго Бо́га, проро́че пребога́те./ Просия́в проро́чества светоно́сными заря́ми,/ Мла́до, – рекл еси́, – Отроча́ роди́тся, Зижди́тель,/ спаса́ющий нас от тли моли́твами твои́ми.

Сла́ва, седа́лен му́ченика, глас то́йже.

Подо́бен: Яви́лся еси́ днесь:

По́двиг, сла́вне, муче́ния сконча́в,/ прия́л еси́ вене́ц побе́ды от Бо́га, Христофо́ре блаже́нне,/ Его́же умоли́ от бед изба́вити нас.

И ны́не, пра́здника.

Песнь 4

Ирмо́с: Твоего́ на земли́ явле́ния, Христе́ Бо́же,/ пропове́дуя проро́к прише́ствие, с весе́лием вопия́ше:/ сла́ва си́ле Твое́й, Го́споди.

На доброде́тельный возше́д верх,/ чи́сто жела́емому бесе́довал еси́ и ра́достно пел еси́:/ сла́ва си́ле Твое́й, Го́споди.

Проро́честей Иса́ия благода́ти вве́рен бысть, и Бо́жие жили́ще показа́ся,/ и Небе́сных сел сла́вы нетле́нныя сподо́бися.

Обнови́тися острово́м рекл еси́ при́точно, язы́ческим це́рквам,/ Боже́ственнаго Ду́ха испо́лнен, сла́вне,/ таи́нник неизрече́нных был еси́.

Мученика: Небе́сное насле́дие, му́чениче, восприя́л еси́,/ на земли́ по Христе́ подвиза́вся,/ и́дольскую же погаси́л еси́ пре́лесть му́жески лю́таго де́мона.

Же́нское тебе́ искуше́ние, му́чениче, приноша́ше,/ я́коже Ада́му пра́отцу змий пре́жде,/ но, побежде́н быв, стыдя́шеся, удавле́ния на тя простира́я.

Богоро́дичен: Отроча́ нам даде́ся от проро́чицы,/ рожде́нное без боле́зни Богома́тере,/ Его́же нача́льство на ра́ме Боже́ственный Иса́ия пропове́да.

Песнь 5

Ирмо́с: Просвеще́ние Твое́, Го́споди, низпосли́ нам/ и от мглы прегреше́ний разреши́ ны, Бла́же,/ Твой мир да́руяй.

Сокрове́нное свы́ше та́инство зря и дре́вний сове́т Вы́шнего,/ е́же о нас смотре́ние, Богоглаго́ливе, возвести́л еси́.

Страсте́й Твои́х, Го́споди, приснотеку́щий исто́чник страсте́й нас отмыва́ет,/ прише́л бо еси́, Спа́се, я́коже Иса́ия проро́к научи́.

Богочести́вый Иса́ия, от Бо́га изше́д,/ Отца́, Сло́ва и Свята́го Ду́ха в Естестве́ Еди́ном,/ Тро́ицу Еди́ну неве́дущим пропове́да.

Мученика: Просвеще́нием благода́ти улови́л еси́ лю́ди/ и неи́стовство безбо́жных мучи́телей разори́л еси́ я́ве,/ на земли́, му́дре, оде́ян свы́ше де́йством.

Небе́сное изво́лив наслажде́ние я́ве па́че земна́го, му́дре Христофо́ре,/ претерпе́л еси́ кре́пко муче́ния боле́зни, Кресто́м укрепля́емь.

Богоро́дичен: На о́блаце, Го́споди, седя́щаго чи́сте Всепе́тыя Ма́тере/ Иса́ия ви́де Тя я́сно, еги́петския низлага́юща и́долы.

Песнь 6

Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.

Ду́хом воображе́н, Иса́ия узре́ на престо́ле госпо́дьства сла́ву блеща́щуся,/ песносло́вимую трисвяты́м гла́сом, тричи́сленную.

Ко усто́м боя́щимся твои́м прино́сит угль, Иса́ие, Серафи́м, клеща́ми взем,/ и Бо́гу проро́ка соверша́ет, та́йно освяще́на.

Событие́ издале́ча зря прорече́ний,/ Иса́ия у́мно со А́нгелы ра́дуется/ и, игра́я, сла́вит испо́лнившаго его́ пропове́дания.

Му́ченика: Не к кро́ви, ни к пло́ти брань взем до́блий,/ но нача́ла побежда́ше и де́моны,/ неви́димою си́лою Сы́на Бо́жия укрепля́емь.

Возлюби́в благоле́пно жела́ний край, страетоте́рпче, не чул еси́ боле́зней струже́мь,/ мысль твою́ возвыша́я всегда́ ко Влады́це твоему́.

Богоро́дичен: Де́ву, во утро́бе заче́ншу зря и ро́ждшую,/ Иса́ия, проро́к сла́вный, воплоще́нна Сло́ва, Сы́на Бо́жия, ны́не ра́дуется.

Конда́к, глас 2.

Подо́бен: В моли́твах:

Проро́чества дарова́ние прие́м, пророкому́чениче, Иса́ие Богопропове́дниче,/ всем изъясни́л еси́ вочелове́чение Го́сподне,/ возгласи́в велегла́сно конце́м:/ се Де́ва во чре́ве прии́мет.

Икос:

Вси сни́демся, и́же во страна́х, воспе́ти досто́йно Иса́ию, ве́рнии, во проро́цех ди́внаго:/ той бо, коне́ц проро́чества восприи́м, мир просвеща́ет,/ всем вку́пе та́йну Боже́ственнаго соедине́ния провозвести́в,/ с те́ми все́ми возопи́в:/ с на́ми Бог неви́димый, се Де́ва во чре́ве прии́мет.

Песнь 7

Ирмо́с: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.

Спаси́тельное нам приходя́щее зря Иса́ия избавле́ние, прии́дет, возопи́:/ оте́ц на́ших Бо́же, благослове́н еси́.

Проро́чества благода́тию и муче́ния венце́м Иса́ия увязе́ся,/ кре́пость моя́ и пе́ние мое́:/ оте́ц на́ших Бо́же, благослове́н еси́.

Благоче́стия преде́лы и жития́ зако́ны богоно́сным язы́ком положи́л еси́, проро́че Богодухнове́нне:/ оте́ц на́ших Бо́же, благослове́н еси́.

Му́ченика: Муче́ния путь терпе́нием теки́й,/ Христофо́р в Небе́сных живе́т се́лех, поя́:/ оте́ц на́ших Бо́же, благослове́н еси́.

Нече́стия пла́мень благоче́стия росо́ю Христофо́р увяди́, в пе́снех зовы́й:/ оте́ц на́ших Бо́же, благослове́н еси́.

Богоро́дичен: Де́вства ви́дев пачеесте́ственное рождество́/ и чистоты́ све́тлость, Иса́ия возопи́:/ оте́ц на́ших Бо́же, благослове́н еси́.

Песнь 8

Ирмо́с: В Вавило́не о́троцы,/ Боже́ственною распала́еми ре́вностию,/ мучи́теля и пла́мене преще́ние му́жески попра́ша/ и, посреде́ огня́ вве́ржени, ороша́еми, поя́ху:/ благослови́те, вся дела́ Госпо́дня, Го́спода.

Весе́лия ри́зою женихо́вою обложе́н обра́зно,/ ра́дуется ны́не ве́село Иса́ия сла́вный/ и, Боже́ственныя пи́щи наслажда́яся, со А́нгелы веща́ет:/ благослови́те, вся дела́ Госпо́дня, Го́спода.

Бо́га пе́рвее отлучи́вшиися, де́монскими прельще́ннии словесы́,/ пра́ведно отступи́ша земли́ чи́стыя, окая́ннии,/ проро́ка гласово́м после́дованно, и пе́ти не мо́гут:/ благослови́те, вся дела́ Госпо́дня, Го́спода.

Пре́лесть оста́вивше, к Боже́ственному притеко́ша сия́нию мно́жества язы́к/ и Христо́ве Це́ркви обручи́шася, я́коже дре́вле рече́ Иса́ия,/ и пе́сньми ны́не пою́т:/ благослови́те, вся дела́ Госпо́дня, Го́спода.

Мученика: Идолонеи́стовства на́гло приража́ема волна́,/ му́ченическими отсека́шеся тве́рдыми супротивообра́зными противле́нии/ за Христа́ прие́млющих бе́ды и вопию́щих:/ благослови́те, вся дела́ Госпо́дня, Го́спода.

В ца́рскую багряни́цу обагре́нную от крове́й твои́х, му́чениче,/ красно́ оде́ян ны́не, Христофо́ре непобеди́ме,/ со А́нгельскими ли́ки лику́еши и пое́ши Соде́телю твоему́:/ благослови́те, вся дела́ Госпо́дня, Го́спода.

Богоро́дичен: Де́ва Богома́ти Отрокови́ца/ я́ко Младе́нца держи́т Сло́ва, всем даю́щаго жизнь/ и вся сотво́ршаго, я́коже рече́ пре́жде Иса́ия, и, ра́дуяся, взыва́ше:/ благослови́те, вся дела́ Госпо́дня, Го́спода.

Песнь 9

Ирмо́с: Е́ва у́бо неду́гом преслуша́ния кля́тву всели́ла есть;/ Ты же, Де́во Богоро́дице,/ прозябе́нием чревоноше́ния/ ми́рови благослове́ние процвела́ еси́./ Тем Тя вси велича́ем.

Престо́лу предста́л еси́ све́тло, Богоприя́тне, Влады́ки сил,/ сла́вы же Того́ наслади́вся, твоего́ благоче́стия собирая́ плоды́, всеблаже́нне сла́вне./ Тем тя вси велича́ем.

Прииди́те ны́не, све́та проро́ческаго дарова́ния жела́ющии,/ прия́ти кни́гу усе́рдно Иса́ии, богоразу́мия испо́лнену:/ тве́рдым жела́нием внима́ем, да Боже́ственныя зари́ испо́лнимся.

Ду́хом све́тлости я́ве осия́емь, Иса́ие Богоно́се,/ вся, ве́рою творя́щия честну́ю твою́ и светоно́сную па́мять,/ моли́ спасе́ние получи́ти, да тя вси велича́ем.

Му́ченика: Вене́ц све́тел я́ко победи́тель прие́м, Христофо́ре всесла́вне,/ сца́рствуеши Влады́це, тя в му́ках укре́пльшему/ и ру́ку живоно́сну пода́вшему одоле́ти злонача́льника.

Кро́вию му́ченическою све́тло омы́вся, озари́лся еси́, пречу́дне,/ ны́не же в де́вственнем черто́зе, с Женихо́м ра́дуяся, вшел еси́,/ ми́ра же ми́ру прося́, не преста́й, му́чениче сла́вне.

Богоро́дичен: У́гля мы́сленнаго, Чи́стая Богоневе́сто,/ Иса́ия Его́же ви́де но́сиши на руку́, Богома́ти,/ зра́ку на́шему соединя́ема и ми́ру спасе́ние све́тло подаю́ща,/ тем Тя вси велича́ем.

Сию́ слу́жбу твори́м и в четверто́к сыропу́стныя седми́цы.

ВЕ́ЧЕР

На Го́споди, воззва́х:стихи́ры, глас 5:

Ра́дуйся, житие́ отце́в и со́лнце многосве́тлое мона́хов,/ цве́те пусты́нный, ве́нче подви́жников,/ Ши́о блаже́нный./ Антиохи́я тобо́ю хва́лится,/ и Картли́ ра́дуется зело́,/ мы же, ве́рнии, свя́то храни́м честны́й гроб твой,/ я́ко сокро́вище многоце́нное,/ ра́ди изгна́ния лука́ваго,/ исцеле́ния боле́зней и избавле́ния от враг,/ защи́тника бо и́мамы тя проти́ву враг ви́димых и неви́димых./ И ны́не предстоя́ Христу́ и ра́дуяся на Небесе́х,/ помяни́ ча́да твоя́, сладча́йший о́тче,/ па́мять твою́ торжеству́ющия.

Пусты́ню безпло́дную и камени́стую до́бре возде́лал еси́,/ прозорли́вый му́дростию, о́тче Ши́о,/ и напо́лнил еси́ ю насажде́нии,/ бога́тно исто́чники слез твои́х ороша́емыми,/ и, я́ко Еде́м, украси́л еси́ слове́сными цве́ты,/ и я́ко же́ртву благоприя́тну прине́сл еси́/ во сла́ву Влады́це Христу́ со А́нгелы./ Не забу́ди святу́ю па́ству твою́, о́тче отце́в Ши́о.

Храм очище́нный и оби́тель Свою́/ обре́те тя Всесвята́я Богоро́дица, о́тче,/ и вни́де в дом души́ твоея́,/ и украси́ тя целому́дрием,/ одари́ тя хле́бом Небе́сным руко́ю Влады́ки А́нгелов,/ зри́вшаго твое́ доброде́лание,/ и возвели́чи тя исполне́нием ди́вных чудотворе́ний,/ в зало́г бу́дущих чуде́с,/ и́хже ны́не, назирая́ нас свы́ше, твори́ши./ Достоблаже́нне Ши́о, не преста́й моли́тися о нас.

Сла́ва, глас 8:

Мона́хов мно́жества/ наста́вника тя почита́ем, о́тче наш Ши́о,/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче и преподо́бных соприча́стниче и пра́ведных./ С ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен.

Тропа́рь, глас 8:

В тебе́, о́тче, изве́стно спасе́ся е́же по о́бразу,/ прии́м бо крест, после́довал еси́ Христу́,/ и, де́я, учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со А́нгелы сра́дуется, преподо́бне Ши́о, дух твой.

Кано́н, глас 8.

Песнь 1

Ирмо́с: Внеза́пу дре́вле мо́ре Изра́иль,/ я́ко в пусты́ни, ного́ю пра́шною проше́д, вопия́ше:/ Го́сподеви Бо́гу на́шему, кре́пкому в бране́х, пои́м песнь но́вую.

Осени́ твое́ю благода́тию от сокро́вищ Госпо́дних,/ и́хже прия́л еси́ бога́тно,/ во е́же плод усте́н мои́х жела́нием ду́ха принести́ ти, Ши́о.

Десни́ца Госпо́дня пома́за тя,/ Его́же Дух даде́ ти жизнь/ и наста́ви тя позна́ти испыта́ния та́инств Его́ и храни́ти за́поведи Его́,/ и́хже в свя́тости соблю́л еси́, Ши́о.

Я́коже А́вель, пе́рвыя плоды́ прине́сл еси́ Го́споду,/ дух и ра́зум со все́ю пра́вдою,/ да яви́шися побо́рник с пе́рвыми, треблаже́нный о́тче Ши́о.

Ны́не, обстоя́ще ра́ку моще́й твои́х, преподо́бне Ши́о,/ про́сим тя умоли́ти Бо́га,/ воздежи́ святы́я ру́це твои́ и вознеси́ Ему́ на́ша моле́ния.

Богоро́дичен: Сло́ва О́тчаго селе́ние, Мари́е,/ Тобо́ю бо Челове́ком Бог среди́ челове́ки яви́ся,/ Всесвята́я Богоро́дице, бу́ди ми́лостива к нам, Тебе́ покланя́ющимся.

Песнь 3

Ирмо́с: Утвержде́й, Сло́ве, Небеса́ сло́вом,/ утверди́ наш ум и се́рдце,/ во е́же сла́вити Тя, Спа́са душ на́ших.

Ено́ха Бог просла́ви, и сей преста́вися во сла́ве еди́ножды;/ ты же, ди́вне, ки́йждый день преставля́лся еси́, сме́ртный час во уме́ помышля́я,/ и сло́вом Бо́жиим спаса́лся еси́.

Я́коже Но́я, пра́ведна тя обре́те Бог/ и яви́ отца́ тя втора́го ми́ра, блаже́нне,/ И́же спасе́ лю́ди ковче́гом,/ и тогда́ уте́рянных подвиго́в Новозда́тель благовести́ тя ми́ру голуби́цею.

Си́мово благослове́ние и благу́ю часть прия́л еси́, о Ши́о досто́йне,/ оте́ческим разделе́нием разда́л еси́ нам, сыно́м твои́м,/ при́сно лику́ющим изоби́лием уче́ний твои́х, о́тче.

Упова́я на тя, тве́рдаго моли́твенника и защи́тника, да не постыди́мся,/ дерзнове́ние бо и́маши пред Бо́гом, о сла́вный о́тче,/ приими́ я́ко же́ртву на́ша моли́твы и испроси́ у Христа́ Бо́га нам ве́лию ми́лость.

Богоро́дичен: Сла́внейшая всех Ма́ти Бо́жия, Ра́досте ми́ра,/ принося́щия ве́рно же́ртву Бо́гу и испове́дующия Тя Богоро́дицу/ осени́ Твое́ю благода́тию и моли́твы на́ша испра́ви ко Го́споду.

Песнь 4

Ирмо́с: Услы́шах, Го́споди, слух Твой и убоя́хся,/ разуме́х неизрече́нное Твое́ смотре́ние/ и просла́вих, Сло́ве, снизхожде́ние Твое́.

Я́коже Авраа́м, услади́лся еси́ хва́льным отше́льничеством,/ и Бог посети́ тя, Ши́о,/ и обетова́ния Его́ удосто́ился еси́,/ и препо́дал еси́ Его́ благослове́ние умноже́нию пото́мства.

Я́коже Исаа́к, ди́вною си́лою свя́зан бысть ра́ди же́ртвы всесожже́ния Бо́гу,/ возве́л еси́ горе́ ра́зум твой,/ отоню́дуже и получи́л еси́ му́дрость.

О́тче, предста́телю и моли́твенниче, непоколеби́мый Ши́о,/ вознеси́ моле́ния чад твои́х Ми́лостивому Бо́гу/ и испроси́ нам ве́лию ми́лость.

Богоро́дичен: Вы́шшая небе́с Ты еси́, Всесвятая Влады́чице, Ма́ти Бо́жия,/ ка́ко хвали́ти Тя земны́м язы́ком?/ То́кмо жела́нием хва́лим Тебе́, Де́во.

Песнь 5

Ирмо́с: У́тренююще к Тебе́, Человеколю́бцу,/ воспева́ем Тя, Христе́ Бо́же,/ да́руй нам ми́лости Твоя́.

Целому́дрие и свя́тость Ио́сифову услади́л еси́/ и разшири́л еси́ попра́нием еги́петских су́етных страсте́й/ и раздели́л еси́ хлеб пра́вды, Ши́о.

Уподо́бися Моисе́ю любо́вию к бра́тии и ученико́м,/ егда́ умертви́л еси́ еги́петскую не́нависть/ и па́стве твое́й дал еси́ пи́ти от исто́чника жи́зни, Богоподо́бне.

Бо́га узре́л еси́ в же́стости жи́зни, я́ко в купине́,/ и запеча́тал еси́ в се́рдцы свое́м/ Бо́гом пи́санную скрижа́ль, Богому́дре о́тче.

Богоро́дичен: От Тебе́ рожде́ннаго Христа́ Бо́га моли́ о нас, Богома́ти,/ сохрани́ти лю́ди Твоя́,/ испове́дающия Тя и покланя́ющияся о́бразу Твоему́.

Песнь 6

Ирмо́с: Я́ко Ио́ну проро́ка от ки́та возве́л еси́, Го́споди,/ изба́ви мя от лови́твы чужда́го/ и спаси́ мя, Ще́дре, я́ко Многоми́лостив.

Ааро́н Бо́жественным огне́м небе́сным священножря́ше,/ ты же сугу́бо приноси́л еси́ Бо́гу/ пла́мень стра́ха Бо́жия, тобо́ю одушевле́нный, жела́нный Ши́о.

Финее́су уподо́бися, ре́вностию ко Христу́ испо́лненный,/ и порази́л еси́ копие́м жела́ния велиа́ра возста́вшая,/ велича́емый о́тче Ши́о.

По стопа́м Илии́ ше́ствуя и ре́вность того́ восприя́в,/ возлюби́л еси́ пусты́ню, я́ко той, порази́в служи́телей Ваа́ла,/ и пра́вде Госпо́дней сле́довал еси́.

Богоро́дичен: Упова́ние тве́рдое и непоколеби́мое Ты еси́ ве́рным, о Ма́ти Бо́жия,/ к Тебе́ прибега́ющия спаси́ от бед ны́нешних и гряду́щих.

Конда́к, глас 4:

Житие́ твое́ служе́нием Госпо́дним испра́вил еси́/ и, взем крест, оста́вил еси́ вся жите́йская,/ красото́ пусты́ни, преподо́бне Ши́о./ Кого́ убо па́че тя, и по сме́рти жи́ва су́ща/ страна́ И́верская почита́ет/ и мощми́ твои́ми, от гро́ба явле́нными услажда́ется,/ те́мже не преста́й моля́ся о нас ко Го́споду.

Песнь 7

Ирмо́с: От Иуде́и доше́дше, о́троцы,/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Я́коже на Елиссе́я,/ сугу́бо на́йде на тя дух проро́чества и чудотворе́ния,/ вели́кий Ши́о, слуго́ Госпо́день.

Я́коже Дании́л, от ю́ности испо́лнися Ду́ха Бо́жия,/ И́же соде́ла тя судие́ю зако́на ду́ха ра́ди изнуре́ния пло́ти,/ и, я́ко той, и ты покори́ зве́ри.

Иереми́и и Иса́ии подража́л еси́, о́тче:/ о́вому – низхожде́нием в гроб во́лею и ско́рбию жела́нною,/ о́вому же – досто́йным возвыше́нием.

Богоро́дичен: Вочелове́чся во́лею от Тебе́,/ спасл есть Госпо́дь всю вселе́нную,/ Мари́е, Всесвята́я Мати Бо́жия,/ и дарова́ Тя нам отра́ду, гре́шным, Всепе́тая.

Песнь 8

Ирмо́с: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.

Я́коже Самуи́л, Ду́хом бысть зрим и царе́й пома́заше, о́тче,/ вооружи́выйся свои́м уче́нием и бо́дренными моли́твами,/ чудотво́рче Ши́о, Иве́рии свети́ло.

Дави́ду уподо́бися непоро́чностию и прямоду́шием/ и уби́ Голиа́фа страсте́й мета́нием камне́й смире́ния, Боговенча́нный Ши́о,/ и спасл еси́ от сме́рти твоя́ послу́шники.

Соломо́нову му́дрость обре́те, досто́йне,/ и Бо́гу моли́твенный храм созда́л еси́ в телесе́ свое́м,/ и красото́ю ду́ха твоего́ украси́л еси́,/ во е́же велича́ти Святу́ю Тро́ицу во ве́ки.

Богоро́дичен: Ма́ти Бо́жия, Помо́щнице и Покрови́тельнице моля́щихся Тебе́,/ услы́ши моле́ния на́ша, раб Твои́х, и принеси́ ко Христу́,/ да спасе́т нас от бед, скорбе́й и страда́ний.

Песнь 9

Ирмо́с: Чи́стую сла́вно почти́м, лю́дие, Богоро́дицу,/ Огнь Божества́ прии́мшую во чре́ве неопа́льно,/ пе́сньми велича́ем.

Я́коже Иоа́нн Крести́тель, по стопа́м его́ ше́ствуя,/ яви́лся еси́ в пусты́ни А́нгел, пропове́дник покая́ния,/ омыва́я слеза́ми ду́ши, я́дом поро́ка поврежде́нныя,/ пра́вило доброде́телей, Ши́о.

Узре́ша вселе́нскаго наста́вника тя,/ Христо́вым апо́столом и ученико́м подо́бна,/ безчи́сленное бо мно́жество люде́й призва́л еси́ рабо́тати Го́споду,/ па́дшия возставля́я, стоя́щия утвержда́я,/ и вся вку́пе приве́л еси́ Богу.

Я́коже страстоте́рпец и му́ченик подвиза́лся еси́, о́тче,/ и украси́л еси́ ликостоя́ния преподо́бных, я́ко глава́ их,/ всех осия́л еси́, Бо́жие достоя́ние,/ защи́тник всем бу́ди, о Ши́о.

Богоро́дичен: О благода́тная Мари́е, Мати Бо́жия, упова́ние всех христиа́н,/ укрепи́ му́жеством ве́рныя проти́ву ага́рян/ и лю́ди Твоя́ и град Твой спаси́ от вся́каго зла.