НА МА́ЛОЙ ВЕЧЕ́РНИ

На Го́споди, воззва́х:cтихи́ры глас 2.

Подо́бен: Егда от Древа:

Прииди́те, прему́дрости глубину́/ и правосла́вных догма́т списа́теля,/ ве́рнии, пе́сньми Боже́ственными днесь венча́ем,/ Иоа́нна сла́внаго и возлю́бленнаго./ Сей бо возгреме́, е́же: в нача́ле бе Сло́во./ Отону́дуже громогла́сен показа́ся,/ я́ко благове́стник ми́рови,/ просия́в многому́дренне, всехва́льный.

Вои́стинну ты яви́лся еси́ и́стинен друг/ и напе́рсник вели́к Учи́телю Христу́:/ на пе́рси бо возле́г,/ от ни́хже поче́рпл еси́ прему́дрости догма́ты,/ и́миже обогаща́еши о́крест всю зе́млю,/ я́ко Богоглаго́льник Бо́жий./ Те́мже и содержа́щи сия́ кра́сная Христо́ва Це́рковь,/ ны́не ра́дующися, весели́тся.

Ра́дуйся, Богосло́ве вои́стинну,/ ра́дуйся, Ма́тере Госпо́дни сы́не всевозлю́бленный:/ ты бо, предстоя́ при Кресте́ Христо́ве,/ Боже́ственный слы́шал еси́ глас Влады́чень:/ се ны́не Ма́ти твоя́, – к тебе возопи́вш./ Отону́дуже досто́йно тя вси,/ я́ко апо́стола Христо́ва вели́ка/ и возлю́бленнаго, ублажа́ем.

Сла́ва, глас 2. Самогла́сен:

Апо́столов верхо́внаго, Богосло́вия трубу́,/ духо́внаго во́ина, вселе́нную Бо́гу покори́вшаго,/ прииди́те, ве́рнии, ублажи́м Иоа́нна приснопа́мятнаго,/ от земли́ востаю́щаго и земли́ не отступа́юща/ но жи́ва су́ща и жду́ща стра́шнаго Влады́чня втора́го прише́ствия./ Е́же неосужде́нно сре́сти нам испроси́,/ дру́же та́йны, Христо́в напе́рсниче,/ любо́вию соверша́ющим па́мять твою́.

И ны́не, пра́здника.

На стихо́вне пра́здника. Сла́ва,апо́стола, глас 1: Учениче́ Спа́сов:пи́сан на лити́и.

Тропа́рь пи́сан на вели́цей вече́рни

Сла́ва, и ны́не, пра́здника.

Ектения́. И отпу́ст.

НА ВЕЛИ́ЦЕЙ ВЕЧЕ́РНИ

Пое́м Блаже́н муж:пе́рвый антифо́н. На Го́споди, воззва́х:стихи́ры пра́здника 3, и апо́стола 4, и преподо́бнаго 3. Стихи́ры апо́стола, глас 1.

Подо́бен: Небе́сных чино́в:

Зри́тель неизрече́нных открове́ний/ и сказа́тель вы́шних Бо́жиих та́ин,/ сын Зеведе́ов,/ написа́в нам Христо́во Ева́нгелие,/ богосло́вити же Отца́, и Сы́на,/ и Ду́ха Свята́го научи́.

Богодви́жимая гусль небе́сных пе́ний,/ тайнопи́сец сый, Богосказа́нная уста́,/ пе́ние пе́сненное пое́т красно́:/ устне́ бо движа́, я́ко стру́ны,/ я́коже бряца́ло, язы́к движа́,/ мо́лится спасти́ся нам.

Громогла́сным твои́м язы́ком/ извеща́я Бо́жия прему́дрости сокрове́нное сло́во,/ Бо́гу возлю́бленне,/ зове́ши при́сно, движа́ устна́ми ча́сто,/ е́же: в нача́ле бе Сло́во,/ и науча́еши вся́каго челове́ка ра́зуму Бо́жию.

И́ны стихи́ры преподо́бнаго, глас 8.

Подо́бен: О, пресла́внаго чудесе́:

О́тче Богому́дре Арсе́ние,/ сле́зными исто́чники просвети́в мысль,/ к Бо́гу бесе́довал еси́,/ непреста́нными очище́нии/ и сия́нии столп всесве́тел благоче́стия,/ огнесия́нен яви́лся еси́, блаже́нне,/ мона́хов похвало́./ И ны́не нас всех сохрани́ моли́твами твои́ми.

О́тче Богому́дре Арсе́ние,/ воздержа́нием ум опоя́сан всю́ду,/ к пе́рвому вино́внику востещи́ сотвори́л еси́/ и, оста́вль мирски́й мяте́ж/ и молвы́ оттря́с,/ ума́ чистото́ю смеси́лся еси́, прему́дре,/ жела́нием вои́стинну кра́йним, блаже́нне.

Преподо́бне о́тче Арсе́ние,/ ты, Бо́га взыску́я/ и Сего́ просвети́тися светолу́чными сия́нии/ благоче́стно жела́я,/ вели́чия всю све́тлость/ и ца́рския дворы́ оста́вив,/ безсме́ртное насле́дие прия́л еси́,/ со Христо́м ны́не водворя́яся, Богоблаже́нне.

Слава, глас 2. Самогла́сен:

Сы́на гро́мова,/ основа́ние Боже́ственных слове́с,/ нача́льника Богосло́вия/ и пропове́дника пе́рвейшаго и́стинных догма́т Бо́жия прему́дрости,/ возлю́бленнаго Иоа́нна и де́вственника,/ челове́ческий род, по до́лгу до́бре похва́лим:/ сей бо, непреста́нно в себе́ имы́й Боже́ственное,/ е́же, в нача́ле бе, – рече́, – Сло́во./ А́бие же ко Отцу́ неразлу́чное/ и ра́вное по сих Оте́ческаго Существа́,/ явля́я нам собо́ю правосла́вие Святы́я Тро́ицы:/ Соде́теля же, су́ща со Отце́м/ и Живо́т нося́ща и Свет и́стинный,/ Того́жде показа́ нам./ О, чудесе́ ужа́снаго/ и ве́щи премудри́тельныя!/ Я́ко испо́лнь сый любве́,/ испо́лнь бысть и Богосло́вия:/ сла́вою, и че́стию, и ве́рою/ основа́тель сый чи́стыя на́шея ве́ры,/ ея́же ра́ди получи́м ве́чных благ в День су́дный.

И ны́не, пра́здника.

Вход. Проки́мен дне. И чте́ния три.

Собо́рнаго посла́ния Иоа́ннова чте́ние(главы́ 3,4):

Возлю́бленнии,/ а́ще се́рдце на́ше не за́зрит нам, дерзнове́ние и́мамы к Бо́гу./ И Его́же а́ще про́сим, прие́млем от Него́,/ я́ко за́поведи Его́ соблюда́ем/ и уго́дная пред Ним твори́м./ И сия́ есть за́поведь Его́:/ да ве́руем во И́мя Сы́на Его́ Иису́са Христа́/ и лю́бим друг дру́га, я́коже дал есть за́поведь нам./ И соблюда́яй за́поведи Его́, в Нем пребыва́ет, и Той в нем,/ и о сем разуме́ем, я́ко пребыва́ет в нас, от Ду́ха, Его́же дал есть нам./ Возлю́бленнии, не вся́кому ду́ху ве́руйте,/ но искуша́йте ду́хи, а́ще от Бо́га суть,/ я́ко мно́зи лжепроро́цы изыдо́ша в мир./ О сем познава́йте Ду́ха Бо́жия и ду́ха ле́стча:/ всяк дух, и́же испове́дует Иису́са Христа́, во пло́ти прише́дша, от Бо́га есть./ И всяк дух, и́же не испове́дует Иису́са Христа́, во пло́ти прише́дша, от Бо́га несть,/ и сей есть анти́христов,/ его́же слы́шасте, я́ко гряде́т, и ны́не в ми́ре есть уже́./ Вы от Бо́га есте́, ча́дца, и победи́сте тех,/ я́ко бо́лий есть, и́же в вас, не́жели и́же в ми́ре./ Они́ от ми́ра суть,/ сего́ ра́ди от ми́ра глаго́лют, и мир тех послу́шает./ Мы от Бо́га есмы́:/ и́же зна́ет Бо́га, послу́шает нас,/ и и́же несть от Бо́га, не послу́шает нас.

Собо́рнаго посла́ния Иоа́ннова чте́ние(глава́ 4):

Возлю́бленнии,/ а́ще си́це возлюби́л есть нас Бог,/ и мы до́лжны есмы́ друг дру́га люби́ти./ Бо́га никто́же нигде́же ви́де./ Аще друг дру́га лю́бим, Бог в нас пребыва́ет,/ и любы́ Его́ соверше́нна есть в нас./ О сем разуме́ем, я́ко в Нем пребыва́ем и Той в нас,/ я́ко от Ду́ха Своего́ дал есть нам./ И мы ви́дехом и свиде́тельствуем, я́ко Оте́ц посла́ Сы́на Спаси́теля ми́ру./ И́же а́ще испове́сть, я́ко Иису́с есть Сын Бо́жий,/ Бог в нем пребыва́ет, и той в Бо́зе./ И мы позна́хом и ве́ровахом любо́вь, ю́же и́мать Бог в нас/ Бог любы́ есть,/ и пребыва́яй в любви́ в Бо́зе пребыва́ет,/ и Бог в нем пребыва́ет.

Собо́рнаго посла́ния Иоа́ннова чте́ние(главы́ 4,5):

Возлю́бленнии,/ а́ще кто рече́т, я́ко люблю́ Бо́га, а бра́та своего́ ненави́дит,/ ложь есть:/ и́бо не любя́й бра́та своего́, его́же ви́де,/ Бо́га, Его́же не ви́де, ка́ко мо́жет люби́ти?/ И сию́ за́поведь и́мамы от Него́,/ да любя́й Бо́га лю́бит и бра́та своего́./ Всяк, ве́руяй, я́ко Иису́с есть Христо́с, от Бо́га рожде́н есть,/ и всяк, любя́й Ро́ждшаго, лю́бит и Рожде́ннаго от Него́./ О сем ве́мы, я́ко лю́бим ча́да Бо́жия,/ егда́ Бо́га лю́бим и за́поведи Его́ соблюда́ем./ Сия́ бо есть любы́ Бо́жия, да за́поведи Его́ соблюда́ем,/ и за́поведи Его́ тя́жки не суть./ Я́ко всяк, рожде́нный от Бо́га, побежда́ет мир,/ и сия́ есть побе́да, побе́ждшая мир, ве́ра на́ша./ Кто есть побежда́яй мир, то́кмо ве́руяй,/ я́ко Иису́с, есть Сын Бо́жий?

На лити́и стихи́ра хра́ма, или́ пра́здника и апо́стола, глас 1. Ге́рманово:

Ре́ки Богосло́вия от честны́х твои́х усте́н истеко́ша, апо́столе,/ от ни́хже Це́рковь Бо́жия, бога́тно напая́ема,/ покланя́ется правосла́вно Тро́ице Единосу́щней,/ Ю́же и ны́не моли́, Иоа́нне Богосло́ве,/ утверди́ти и спасти́ ду́ши на́ша.

Андре́я Пи́рра: Сад чистоты́, ми́ро благово́ния/ па́ки возсия́ нам в прише́дший пра́здник/ возопи́ти к нему́:/ возлеги́й на пе́рси Влады́чни/ и одожди́в сло́во ми́ру, Иоа́нне апо́столе,/ и́же Де́ву сохрани́в, я́ко зе́ницу о́ка,/ испроси́ нам от Христа́ ве́лию ми́лость.

Учениче́ Спа́сов, де́вственниче и Богосло́ве,/ тебе́, я́ко де́вственнику,/ Де́ву и Богоро́дицу Христо́с Бог распина́емь предаде́,/ и Сию́ сохрани́л еси́, я́ко зе́ницу о́ка./ Тем моли́ спасти́ся душа́м на́шим.

Я́ко неизрече́нных та́ин самови́дец,/ воззва́л еси́, вопия́,/ преве́чное Сло́во в нача́ле бы́ти к Бо́гу/ и Того́ бы́ти Бо́га,/ Иоа́нне апо́столе,/ напе́рсниче Христо́в, и дру́же при́сный,/ и Тро́ицы наслажде́ние,/ Ефе́су и Па́тму утвержде́ние непоколеби́мо,/ нам же по́мощь./ Моли́ся, Богосло́ве преблаже́нне,/ от злочести́вых враг чу́вственных и мы́сленных/ изба́витися лю́дем,/ па́мять твою́ при́сно соверша́ющим ве́рно.

И преподо́бнаго стихи́ра, глас 5:

Преподо́бне о́тче,/ глас Ева́нгелия Госпо́дня услы́шав,/ мир оста́вил еси́,/ бога́тство и сла́ву нивочто́же вмени́в./ Тем всем возопи́л еси́:/ возлюби́те Бо́га и обря́щете благода́ть ве́чную,/ ничто́же предпочти́те, па́че любве́ Его́,/ да егда́ прии́дет в сла́ве Свое́й,/ обря́щете поко́й со все́ми святы́ми./ Его́же моли́твами, Христе́, сохрани́ и спаси́ ду́ши на́ша.

Сла́ва, глас 4:

Возле́г на пе́рси Учи́теля Христа́/ на ве́чери Госпо́дни, возлю́бленне учениче́,/ отту́ду разуме́л еси́ неизрече́нная,/ и небе́сный всем возгреме́л еси́ глас:/ в нача́ле бе Сло́во, и Сло́во бе к Бо́гу,/ и Бог бе Сло́во,/ Свет и́стинный, просвеща́яй вся́каго челове́ка, в мир гряду́щаго,/ Христо́с Бог и Спас душ на́ших.

И ны́не, пра́здника.

На стихо́вне стихи́ры, глас 4.

Подо́бен: Зва́нный свы́ше:

Сы́на Вы́шняго богосло́вив,/ Отцу́ Соприсносу́щна и Единосу́щественна,/ Свет от Све́та непреме́нен,/ и начерта́ние Ипоста́си Роди́телевы,/ безле́тно возсия́вша и безстра́стно от Него́,/ Соде́теля же и Го́спода всех веко́в,/ возлю́бленне, ты пропове́дал еси́ Сего́ ми́рови,/ я́ко изве́дша свет от тьмы,/ Христа́ Бо́га на́шего./ Его́же моли́ спасти́ и просвети́ти ду́ши на́ша.

Стих: Во всю зе́млю изы́де веща́ние их/ и в концы́ вселе́нныя глаго́лы их.

Уте́шителев свет восприе́м,/ И́мже и просвеща́емь,/ богосло́вил еси́ от Отца́ происходя́ща,/ Сы́ном же челове́честву явля́ема,/ Единоче́стна, Сопресто́льна и Единосу́щна,/ су́ща Отцу́ Безнача́льну же/ и Бо́жию Сло́ву,/ возлю́бленне, всем пропове́дал еси́./ Те́мже в пе́снех тя почита́ем,/ я́ко ве́ры Боже́ственное основа́ние,/ ю́же непоколеби́му соблюда́й/ ко Го́споду моли́твами твои́ми.

Стих: Небеса́ пове́дают сла́ву Бо́жию,/ творе́ние же руку́ Его́ возвеща́ет твердь.

На высоту́ возше́д Богосло́вия,/ научи́лся еси́ неизрече́нных Бо́жиих та́ин/ о единосу́щии Божества́, сла́ве же еди́ной,/ и ца́рстве, и госпо́дьстве,/ Тре́ми Ипоста́сьми разделя́емем при́сно,/ су́щественне же, неразделя́емем и совокупля́емем/ в неслия́нном Боже́ственном еди́нстве,/ си́це сла́вля, пропове́дал еси́, Богосло́ве,/ Тро́ицу неразде́льну,/ Ю́же моли́ спасти́ и просвети́ти ду́ши на́ша.

Сла́ва, глас 6, Иоа́нна мона́ха:

Апо́столе Христо́в, Евангели́сте Богосло́ве,/ неизрече́нных таи́нник быв,/ прему́дрости неизглаго́ланная нам возгреме́л еси́ уче́ния,/ е́же в нача́ле бе, уясни́в ве́рным,/ и е́же не бе, отложи́в,/ ерети́чествующих отрева́я словеса́,/ напе́рсник я́влься и друг возлю́блен,/ я́коже Иса́ия велегла́сный/ и Моисе́й Богови́дец,/ дерзнове́ние име́я к Бо́гу,/ приле́жно моли́ся о душа́х на́ших.

И ны́не, пра́здника.

Тропа́рь, глас 2, два́жды. И Богоро́дице Де́во:еди́ножды, и благослове́ние хле́бов, по обы́чаю, и чте́ние.

Тропа́рь апо́столу, глас 2:

Апо́столе, Христу́ Бо́гу возлю́бленне,/ ускори́ изба́вити лю́ди безотве́тны,/ прие́млет тя, припа́дающа,/ И́же па́дша на пе́рси прие́мый./ Его́же моли́, Богосло́ве,/ и належа́щий о́блак язы́ков разгна́ти,/ прося́ нам ми́ра и ве́лия ми́лости.

НА У́ТРЕНИ

На Бог Госпо́дь: тропа́рь пра́здника, еди́ножды, и апо́стола, еди́ножды.

Слава, преподобнаго, глас 8:

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Арсе́ние о́тче наш,/ моли́ Христа́ Бо́га спасти́ся душа́м на́шим.

И ны́не, пра́здника.

По 1-й стихоло́гии седа́лен, глас 1.

Подо́бен: Гроб Твой:

Христа́ учени́к быв, вся́ческих Влады́ки,/ научи́л еси́ лю́ди и просвети́л еси́ мир,/ к позна́нию Сего́ наста́вль, апо́столе./ Те́мже пропове́дника тя и́стины вси имену́ем и Богосло́ва,/ дру́га Христо́ва и напе́рсника.

Сла́ва, и ны́не, пра́здника.

По 2-й стихоло́гии седа́лен, глас 5.

Подо́бен: Собезнача́льное Сло́во:

Апо́стола вси и ученика́ Христо́ва, пропове́давшаго всем Боже́ственное,/ е́же от Отца́, рождество́ Изба́вителя и Царя́ Христа́,/ воспое́м пе́сньми и похвала́ми свяще́нными всечестна́го Иоа́нна,/ непреста́нно бо мо́лится поми́ловатися душа́м на́шим.

Сла́ва, и ны́не, пра́здника.

По полиеле́и седа́лен, глас 8.

Подо́бен: Прему́дрости:

Возле́г на пе́рси Иису́совы,/ дерзнове́ние получи́л еси́, я́ко учени́к, вопроша́я:/ кто есть предая́й Тя, Го́споди?/ Возлю́блен зело́ сый, прехва́льне, хле́бом сего́ я́ве тебе́ показа́./ Те́мже, я́ко таи́нник неизрече́нных быв,/ Сло́ва воплоще́ния науча́еши концы́, Богосло́ве апо́столе,/ моли́ Христа́ Бо́га согреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, пра́здника или́ Богоро́дичен:

Небе́сную дверь и ковче́г, всесвяту́ю го́ру, све́тлый о́блак воспои́м,/ неопали́мую купину́, слове́сный рай, Е́вино свобожде́ние,/ вселе́нныя всея́ вели́кий сосу́д,/ я́ко спасе́ние в нем соде́лася ми́рови и оставле́ние дре́вних согреше́ний./ Те́мже и вопие́м Ей:/ моли́ Христа́ Бо́га прегреше́ний оставле́ние дарова́ти/ благоче́стно покланя́ющимся пресвято́му рождеству́ Твоему́.

Степе́нна, 1-й антифо́н 4-го гла́са. Проки́мен, глас 4: Во всю зе́млю изы́де веща́ние их/ и в концы́ вселе́нныя глаго́лы их.Стих: Небеса́ пове́дают сла́ву Бо́жию: Вся́кое дыха́ние: Ева́нгелие от Иоа́нна, зача́ло 67.

По 50-м псалме́ стихи́ра, глас 2:

Богосло́ве де́вственниче,/ учениче́ возлю́бленне Спа́сов,/ моли́твами твои́ми нас спаса́й, мо́лимся, от вся́каго вре́да,/ я́ко твое́ есмы́ ста́до.

Кано́н пра́здника со ирмосо́м, на 4, и апо́стола, на 6, и преподо́бнаго, на 4. Кано́н Иоа́нна Богосло́ва, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Яко чист и возлю́блен был еси́ нетле́нному Све́ту,/ и на пе́рсех Сего́ возле́г, упоко́ився,/ дерзнове́нною душе́ю, из бе́здны прему́дрости Свет ра́зума извле́кл еси́,/ блаже́нне Иоа́нне апо́столе.

Преесте́ственне богосло́вя, возгреме́л еси́, возлю́бленне, Христу́:/ в нача́ле бе Сло́во, жи́во и воипоста́сно ко Своему́ Роди́телю,/ и Бог бе Сло́во, и плоть Сло́во бысть,/ и Бог пребы́сть непрело́жен.

Богоро́дичен: Под Кров Твой, Чи́стая, прибега́юще,/ огреба́емся напа́стей вся́ких находя́щих, Пречи́стая,/ тем и ны́не мо́лим: па́дшия из глубины́ прегреше́ний возведи́/ Боже́ственными Твои́ми, Чи́стая, мольба́ми.

Ин кано́н преподо́бнаго, глас и ирмо́с то́йже

Влады́чнему повину́яся, Арсе́ние, Боже́ственному повеле́нию,/ ца́рскаго бога́тства сла́ву оста́вил еси́, я́коже Моисе́й законода́вец,/ и, бе́гая от челове́к, А́нгелом сожи́тель был еси́, вку́пе с ни́ми веселя́ся.

Ты, мяте́жей убега́я, Арсе́ние, я́коже грехо́вных исто́чников,/ безмо́лвием язы́к обузда́л еси́./ Те́мже немяте́жен ум в молча́нии соблю́л еси́,/ Боже́ственнаго Ду́ха быв достоле́пнейший дом поко́ища.

Богоро́дичен: Пресла́вная, возглаго́лашася о Тебе́ в ро́дех родо́в,/ Бо́га Сло́ва во чре́ве вме́щшая, Чи́ста же пребы́вши, Богоро́дице Мари́е./ Те́мже Тя вси почита́ем, су́щее по Бо́зе заступле́ние на́ше.

Катава́сия пра́здника

Песнь 3

Ирмо́с: Утвержде́й в нача́ле небеса́ ра́зумом/ и зе́млю на вода́х основа́вши,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

От ры́барей лове́ц челове́ков и Богосло́в был еси́, му́дре Иоа́нне,/ пренебре́г оте́ческую и мирску́ю любо́вь/ и Влады́це Сло́ву жела́нием Боже́ственным после́дуя.

Очище́н душе́вным о́ком, о Богосло́ве,/ узре́л еси́ неизрече́нную сла́ву, от Отца́ единоро́днаго Сло́ва и Сы́на Бо́жия,/ И́мже му́дре вся Боже́ственным бы́ша Ду́хом.

Богоро́дичен: Под Твое́ спаси́тельное прибе́жище притека́ем, Богоро́дице Де́во,/ и спаса́емся наве́та вра́жия моли́твами Твои́ми/ и бу́дущаго, Чи́стая, избавля́емся муче́ния.

Ин, ирмо́с то́йже

О́тче Арсе́ние, твоея́ христоподража́тельныя нищеты́/ о́строе и зело́ ху́ждшее ру́бище пресла́вное пе́рвыя ри́зы покры́ло есть,/ неизрече́нныя сла́вы одея́ние тебе́ снабдева́ющее.

Претыка́ния вра́жия и велехва́льных духо́в,/ от Бо́га сокруше́нием се́рдца прие́мый по́мощь, Арсе́ние, низве́ргл еси́,/ победоно́сец, о́тче, смире́нием быв.

Богоро́дичен: Херуви́мов и Серафи́мов превы́шши яви́лася еси́, Богоро́дице:/ Ты бо еди́на прия́ла еси́ Невмести́маго Бо́га в Твое́м чре́ве, Нескве́рная./ Те́мже Тя, ве́рнии вси, пе́сньми, Чи́стая, ублажа́ем.

Конда́к преподо́бнаго, глас 3.

Подо́бен: Де́ва днесь:

От Ри́ма возсия́л еси́, я́коже со́лнце вели́кое,/ и к Ца́рскому гра́ду дости́гл еси́, преблаже́нне,/ словесы́ твои́ми просвеща́я сего́ и де́лы,/ вся́ку неразу́мия мглу отгоня́./ Сего́ ра́ди тя почита́ем,/ отце́в сла́во, Арсе́ние преподо́бне.

И́кос:

Услы́шав глас Госпо́день, преподо́бне,/ мирски́я красоты́ оста́вль, мона́шествовал еси́,/ а́нгельскому житию́ поревнова́в, Богому́дре./ Те́мже и яви́лся еси́, весь преложе́н, в телеси́ А́нгел,/ Христу́ принося́ поще́ние и сле́зы, непоро́чну моли́тву и стоя́ние всено́щное./ Те́мже был еси́ храм Тро́ицы,/ о́браз же мона́хов, и наста́вник доброде́тели,/ и чту́щих тя всегда́ моли́твенник тепл./ Сего́ ра́ди тя чтим, отце́в сла́во, Арсе́ние преподо́бне.

Та́же седа́лен апо́стола, глас 8.

Подо́бен: Прему́дрости:

Прему́дрости на пе́рси возле́г и ра́зума су́щих навы́к,/ боже́ственно возгреме́л еси́:/ в нача́ле бе Сло́во./ До́бре написа́в пе́рвее безнача́льное рождество́, пропове́дал еси́ всем Сло́ва воплоще́ние./ Те́мже и язы́ком, я́ко мре́жею, улови́в язы́ки,/ по благода́ти Ду́ха изуча́еши концы́, и просвеща́еши чудесы́, Богосло́ве апо́столе,/ моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.

Сла́ва, седа́лен преподо́бнаго, глас и подо́бен то́йже:

Молв жите́йских убежа́в и безмо́лвие житие́ соверша́я,/ стра́сти умертви́л еси́, и ум впери́л еси́ к Бо́гу,/ и столп о́гненный показа́лся еси́, и свети́льник всех ве́рных, чту́щих тя,/ ту́чами же слез напая́емь, яви́лся еси́, я́ко дре́во плодови́то, Богоно́се Арсе́ние./ Моли́ся Христу́ Бо́гу согреше́ний оставле́ние пода́ти/ чту́щим любо́вию святу́ю па́мять твою́.

И ны́не, пра́здника.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Тя Гро́мова сы́на Госпо́дь нарече́, тя греме́ти Ду́хом сподо́би/ Своего́ от Отца́ Боже́ственнаго и непостижи́маго рожде́ния неизрече́нное./ Тем твою́, Богосло́ве, всепра́зднственную па́мять пе́сньми досто́йно сла́вим.

Ты доброде́тельми возше́л еси́, апо́столе, на высоту́,/ ты узре́л еси́ сла́вою блиста́ющее единоро́дное Сло́во во пло́ти,/ во Оте́ческих безнача́льно не́дрех седя́щее,/ гла́са же услы́шати Оте́ческаго сподо́бился еси́, свиде́тельствующа Того́ Сыновство́.

Богоро́дичен: Под Твое́ ны́не прибега́я заступле́ние,/ непотре́бный раб Твой, Всенепоро́чная, да не постыжу́ся:/ Тя бо к Бо́гу и́мам Предста́тельницу и сте́ну нера́тну,/ о Тебе́ и бу́дущия да наслажду́ся тишины́ и Боже́ственныя жи́зни, молю́ся.

Ин, ирмо́с то́йже

Ты нуди́тель естества́ яви́лся еси́, Арсе́ние,/ ты стра́сти, о́тче, покори́л еси́ у́мному влады́честву, я́коже рабу́, сну повелева́я./ Те́мже и во всено́щных бде́ниих вопия́л еси́:/ си́ле Твое́й сла́ва, Человеколю́бче.

Ты Бо́га, преподо́бне, жела́тельне взыска́л еси́,/ ты я́вльшагося мно́жае возжела́л еси́/ и, чистото́ю Богови́ден весь быв, к жела́емому бесе́довал еси́,/ разуме́в соедине́нием вы́шшаго вся́каго постиже́ния, о́тче Арсе́ние.

Богоро́дичен: Ты ве́рных похвала́ еси́, Безневе́стная, Ты Предста́тельница,/ Ты и прибе́жище христиа́н, стена́ и приста́нище:/ к Сы́ну бо Твоему́ мольбы́ но́сиши, Всенепоро́чная, и спаса́еши от бед/ ве́рою и любо́вию Богоро́дицу Чи́стую Тебе́ зна́ющия.

Песнь 5

Ирмо́с: Вскую мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Во тьме ми́ра просия́вший, ви́дев Свет Пречи́ст, раствори́лся еси́ любо́вию/ и, свети́льник благоче́стия быв, многосе́мейных ро́ды язы́к/ Богосло́вия, Иоа́нне, све́том осия́л еси́.

Уве́дев, я́ко зако́н Моисе́ом се́нный дан бысть,/ Боже́ственная же благода́ть Христо́м Бо́гом на́шим бысть,/ богосло́вным язы́ком, сы́не гро́мов возлю́бленне, благовести́л еси́ Его́ Божество́.

Богоро́дичен: Ты ми покро́в и держа́ва, Пречи́стая,/ и утвержде́ние, и стена́ неруши́ма, и Тя призыва́ю:/ в нощи́ и во дни мя соблюда́й от вся́каго вре́да велиа́ра находя́щаго,/ да ве́рою и любо́вию сла́влю Тя.

Ин, ирмо́с то́йже

Хода́тая пе́рвому, о́тче, преступле́нию первозда́ннаго Ада́ма благоче́стно отри́нул еси́,/ вра́жия до́бре ви́дя кова́рствия,/ те́мже, в непоро́чнем ликовству́я пи́щном приста́нищи, Влады́ку Христа́ моли́.

Себе́ сама́го отве́ргся, вся́каго сладостра́стия отве́рглся еси́/ и, на ра́му крест твой нося́, Арсе́ние, и Христа́ жела́я,/ на Небесе́х снасле́дник досто́йне Сего́ показа́лся еси́.

Богоро́дичен: Ма́тернее дерзнове́ние к Сы́ну Твоему́ иму́щи, Всечи́стая,/ сро́днаго промышле́ния о нас не пре́зри, мо́лимся,/ я́ко Тебе́ и еди́ну, христиа́не, ко Влады́це очище́ние ми́лостивно предлага́ем.

Песнь 6

Ирмо́с: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о Упра́вителю, и спаси́.

Угль Боже́ственнаго огня́ прови́де обра́зно Иса́ия,/ очи́стив устне́, проро́чества сподо́бися;/ воплоти́вшагося же Бо́га Сло́ва, блаже́нне Иоа́нне, ты яви́лся еси́ напе́рсник.

Сло́во Сый единоро́дное, Еже в не́дрех Оте́ческих седя́щее,/ воплоще́нно узре́ся, Иоа́нне блаже́нне,/ и я́ко таи́ннику возлю́бленну тебе́ сказа́,/ безпло́тне Бо́га никому́же ви́дети когда́.

Богоро́дичен: Просвети́ мою́ ду́шу, ро́ждшая озаре́ние сла́вы О́тчи,/ Де́во Богоро́дице Всепе́тая,/ Твою́ бо и́стинную благода́ть иму́ще, бесе́ды языковре́дия возбраня́емся.

Ин, ирмо́с то́йже

Му́дрость плотску́ю благоче́стно безстра́стием умертви́л еси́,/ не возлюби́в насле́дия земна́го, преподо́бне,/ от Христа́ жела́я, отче Арсе́ние, в Вы́шних насле́дие восприя́ти.

Со́лнце я́вльшееся всено́щное твое́ разреши́ стоя́ние,/ мы́сленнаго со́лнца несравне́нное сия́ние, по е́же в нощи́ жития́ трудо́в твои́х,/ просвеща́я осия́ти тебе́, Арсе́ние.

Богоро́дичен: Иму́щи сострада́тельное, я́ко ро́ждши человеколю́бное Сло́во,/ спаси́ нас го́рькия и лю́тыя напа́сти,/ Тя бо еди́ну, ве́рнии, Пречи́стая Влады́чице, заступле́ние необори́мое стяжа́хом.

Конда́к, глас 2:

Вели́чия твоя́, де́вственниче, кто пове́сть?/ То́чиши бо чудеса́, и излива́еши исцеле́ния,/ и мо́лишися о душа́х на́ших,/ я́ко Богосло́в и друг Христо́в.

И́кос:

Высоты́ Небе́сныя уве́дети и мо́ря глубины́ испыта́ти де́рзостно есть и непостижи́мо./ Я́коже бо зве́зды исчести́ и морски́й песо́к невозмо́жно отню́д,/ си́це и Богосло́ва исправле́ния изрещи́ недово́льно есть./ Толи́цеми того́ венцы́ Христо́с, Его́же возлюби́, венча́,/ Ему́же и на пе́рси возле́г,/ и на та́йней ве́чери с Ним яде́,/ я́ко Богосло́в и друг Христо́в.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Усе́рдно изше́л еси́ уз ве́щи, о всеблаже́нне, я́ко Бо́жий предста́тель,/ и, Богодухнове́ннаго быв ве́стник Богосло́вия, вопи́ти научи́л еси́:/ благослове́н еси́, Бо́же оте́ц на́ших.

Я́ко траву́ вмени́л еси́ зла́то и бога́тство, о всеблаже́нне,/ и се́но, я́ко зла́то, тебе́ де́йством Боже́ственным бысть,/ богосло́вящу Соде́теля и Го́спода:/ благослове́н еси́, Бо́же оте́ц на́ших.

Дух Святы́й, от Отца́ Безнача́льнаго исходя́щ/ и от Тебе́ неразде́льне прие́млемь, Сло́ве Единоро́дне Бо́жий,/ апо́столом зва́ти возвести́л еси́:/ благослове́н еси́, Бо́же оте́ц на́ших.

Богоро́дичен: Храм и пала́та Царя́ Христа́ была́ еси́ и одр еди́на Соломо́нов,/ Его́же, я́коже рече́ Писа́ние, окружа́ют си́льнии шестьдеся́т,/ с Тобо́ю ны́не, Де́во, зову́т и пою́т:/ благослове́н еси́, Бо́же оте́ц на́ших.

Ин, ирмо́с то́йже

Па́губу возмни́в дре́вних ми́ров, о́тче Арсе́ние, злово́ние терпя́,/ и, благово́ние Христо́во быв прича́стием благода́ти, глаго́лал еси́:/ благослове́н еси́, Бо́же о́тец на́ших.

В Боже́ственный в телеси́ мрак вшед, о́тче Арсе́ние,/ во Христе́ же поучи́вся позна́ти Отца́ Безнача́льна и Ду́ха,/ Ю́же в Тро́ице Еди́ницу воспе́л еси́:/ благослове́н еси́, Бо́же оте́ц на́ших.

Тро́ичен: Всех у́бо Го́спода, Еди́наго же еди́ному Единоро́дному Сы́ну,/ правосла́вно Отца́ богосло́вяще, Тя возвеща́ем,/ и еди́наго ве́дяще Твоего́ исходя́ща Ду́ха пра́ваго,/ Соесте́ственна и Соприсносу́щна.

Богоро́дичен: В ле́то Безле́тнаго неискусобра́чно, Чи́стая, родила́ еси́,/ пре́жде Безпло́тное Сло́во/ пло́ти прия́тием, Де́во, породила́ еси́, Ему́же пое́м, согла́сно зову́ще:/ благослове́н еси́, Бо́же оте́ц на́ших.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Я́ко благоле́пна и благознамени́та пресла́вная па́мять твоя́,/ благове́стниче Иису́сова Божества́,/ Боже́ственная, благоуха́ющи, Це́ркви возсия́./ Тем, ра́дующеся, ве́рнии, пое́м:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Богосло́ва иму́ще ли́ку чинонача́льника, Тя от него́, Христе́, богосло́вима,/ Бо́га возвеща́ем со Отце́м и Ду́хом и, единонача́льственне песносло́вяще, вопие́м:/ о́троцы, благосло́вите, свяще́нницы, воспо́йте,/ лю́дие, превозноси́те во вся ве́ки.

Богоро́дичен: Воплоще́ннаго родила́ еси́ Бо́га Сло́ва, Всенепоро́чная,/ Сего́ умоли́ огня́ мя изба́вити:/ се бо житие́ мое́ все отягчи́ся, все порабо́тися лю́тыми греха́ми./ Тем к Тебе́, Де́во, прибега́ю и Тя призыва́ю, Обра́дованную.

Ин, ирмо́с то́йже

По́хотей, Арсе́ние, душегу́бных разжже́ния, мучи́тельныя же гее́нны распале́ние/ благоразу́мно сле́зными исто́чники погаси́л еси́,/ но и нас от обою́ исхи́тити непреста́й моля́ Спа́са ми́ра Христа́,/ Его́же благослови́м во вся ве́ки.

Седмь седми́цею, преподо́бне, умиле́ния пещь вавило́нскую себе́ разже́гл еси́,/ в не́йже ороша́емь просвеще́нием благода́ти, Соде́телю и Спа́су вопия́л еси́:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Тро́ичен: Трисве́тлое Божество́, еди́ну сия́ющее зарю́,/ от еди́наго Триипоста́снаго естества́, Роди́теля Безнача́льна,/ единоесте́ственно же Сло́во Отцу́ и сца́рствующаго Единосу́щнаго Ду́ха,/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Кресту́ Влады́чню предстоя́й, Де́ве же и Богоро́дице Чи́стей,/ учени́к возлю́бленный, чи́стый Богосло́вия орга́н,/ я́коже де́вственник вруче́ние прия́т и, храни́тель Непоро́чныя быв Богоро́дицы,/ ны́не досто́йно ублажа́ется.

Досто́йно возлю́бль Пречи́стый честно́е и непоро́чное житие́ твое́,/ а́нгельски пожи́вша на земли́, тя в бра́та ме́сто прия́т, блаже́нне Иоа́нне,/ Свое́й сы́на тя возвести́ Ма́тери Богоро́дице,/ с Не́юже тя вси ублажа́ем.

Богоро́дичен: Спаси́тельный бу́ди ми столп, Чи́стая,/ де́монов безде́льны сотвори́ полки́, искуше́ний молву́ и бед отрева́ющи,/ и страсте́й нахо́ды дале́че отгоня́ющи, и чи́стое даю́щи свобожде́ние,/ и Боже́ственная дарова́ния незави́стне мне преподаю́щи.

Ин, ирмо́с то́йже

Моисе́й удиви́ся, сподо́блься ви́дети Де́выя рождество́ обра́зне,/ купину́, образова́нную огнезра́чно;/ ты же, Боже́ственному Ду́ху весь изступле́нием соедини́вся,/ огнезра́чен ви́ден был еси́./ Те́мже и досто́йно ублажа́ем тя, Арсе́ние.

Возсия́ тебе́ Христо́с, Свет незаходи́мый,/ ра́дость же тя подъя́т на Небе́сная,/ па́мятию бо о сме́рти всегда́шнею прине́сл еси́ житие́ нескве́рное приле́жно./ Те́мже и досто́йно восприя́л еси́ плоды́ трудо́в, всеблаже́нне.

Богоро́дичен: Яви́лася еси́, о Де́во, Ма́ти Бо́жия, па́че естества́,/ ро́ждши пло́тию Бо́га Сло́ва,/ Его́же Оте́ц отры́гну от се́рдца Своего́ пре́жде всех век, я́ко Благ,/ Его́же ны́не и теле́с превы́шша разуме́ем, а́ще и в те́ло облече́ся.

Свети́лен.

Подо́бен: Жены́, услы́шите:

Гро́мов сын быв, к челове́ком богосло́вил еси́,/ е́же: в нача́ле бе Сло́во, – апо́столе Иоа́нне,/ возлеги́й бо на пе́рси ве́рно Влады́ки твоего́/ и отту́ду поче́рп Богосло́вия струи́, тварь всю напоя́еши.

Сла́ва, преподо́бнаго:

Мирска́го пристра́стия, я́ко от скве́рны, уклони́лся еси́,/ и, неяде́нием плоть увяди́в, обнови́л еси́ души́ кре́пость, преподо́бне,/ и сла́вою обогати́лся еси́ Небе́сною, Арсе́ние,/ те́мже моли́тися не преста́й о нас Го́сподеви.

И ны́не, пра́здника.

На хвали́тех стихи́ры пра́здника 3 и апо́стола 3, глас 8.

Подо́бен: О, пресла́внаго чудесе́:

Блаже́нне Иоа́нне прему́дре,/ мно́жеством те́плости/ ко Христо́ве любви́/ мно́жае всех был еси́,/ учени́к возлю́блен Всеви́дцу Сло́ву/ и судя́щему пра́выми ме́рами всей вселе́нней,/ чистото́ю и де́вства добро́тами озари́вся,/ те́лом и помышле́нии, Богоблаже́нне.

Де́вства процвете́ние,/ честны́х доброде́телей прия́тное жили́ще,/ прему́дрости орга́н, духо́вный храм,/ светоно́сная уста́ благода́ти,/ Це́ркви пресве́тлое о́ко,/ всечестна́го Иоа́нна/ пе́сньми духо́вными ны́не восхва́лим,/ я́ко служи́теля Христо́ва.

Богосло́вия во́ды,/ на пе́рси возле́г,/ прему́дрости поче́рпл еси́/ и мир напои́л еси́,/ Иоа́нне всеизря́дне,/ Тро́йческим ра́зумом мо́ре изсуши́л еси́ безбо́жия,/ столп быв и о́блак одушевле́н,/ наставля́еши нас к Небе́сному насле́дию.

Сла́ва, глас 8. Самогла́сен:

Благове́стниче Иоа́нне,/ равноа́нгельне, де́вственниче, Богосло́ве, Бо́гом науче́нне,/ правосла́вно ми́рови пречи́стое ребро́,/ кровь и во́ду источи́вшее, пропове́дал еси́,/ и́мже ве́чный живо́т прие́млем душа́м на́шим.

И ны́не, пра́здника.

Славосло́вие вели́кое. По трисвято́м тропа́рь апо́стола. Сла́ва,преподо́бнаго. И ны́не,пра́здника, ектении́, и отпу́ст, и час 1-й. На 1-м часе́ тропа́рь пра́здника. Сла́ва,апо́стола. И ны́не,Богоро́дичен часо́в. По трисвято́м конда́к пра́здника, и про́чее, и соверше́нный отпу́ст. На часе́х конда́к пра́здника и апо́стола глаго́лем, пременя́юще. На Литурги́и Блаже́нны пра́здника, песнь рядова́я, и апо́стола, 6-я. Проки́мен, глас 8: Во всю зе́млю изы́де веща́ние их/ и в концы́ вселе́нныя глаго́лы их.Стих: Небеса́ пове́дают сла́ву Бо́жию:Апо́стол Собо́рнаго посла́ния Иоа́ннова, зача́ло 68. Аллилу́ия,глас 1: Испове́дят Небеса́ чудеса́ Твоя́, Го́споди.Ева́нгелие от Иоа́нна, зача́ло 61. Прича́стен: Во всю зе́млю:

Моли́тва ко свято́му апо́столу и Евангели́сту Иоа́нну Богосло́ву

О вели́кий апо́столе, евангели́сте громогла́сный, Богосло́ве изя́щнейший, тайнови́дче неизрече́нных открове́ний, де́вственниче и возлю́бленный напе́рсниче Христо́в Иоанне! Приими́ нас, гре́шных, прибега́ющих под твое́ си́льное заступле́ние и покрови́тельство. Испроси́ у Всеще́драго Человеколю́бца, Христа́ Бо́га на́шего, И́же пред очесы́ твои́ми кровь Свою́ дража́йшую излия́ за нас, непотре́бных рабо́в Свои́х, да не помяне́т беззако́ний на́ших, но да поми́лует нас и сотвори́т с на́ми по ми́лости Свое́й: да да́рует нам здра́вие душе́вное и теле́сное, вся́кое благоде́нствие и изоби́лие, наставля́я нас обраща́ти о́ныя во сла́ву Его́, Творца́, Спаси́теля и Бо́га на́шего. По кончи́не же вре́менныя жи́зни на́шея да избе́гнем мы, святы́й апо́столе, немилосе́рдых истяза́телей, на возду́шных мыта́рствах нас ожида́ющих, но да дости́гнем, тобо́ю води́мии и покрыва́емии, Го́рняго о́наго Иерусали́ма, его́же сла́ву ты в открове́нии узре́л еси́, а ны́не наслажда́ешися о́ныя ра́дости, обе́щанныя избра́нным Бо́жиим. О вели́кий Иоа́нне! сохрани́ вся гра́ды и страны́ христиа́нския и всех, призыва́ющих и́мя твое́, от гла́да, губи́тельства, тру́са и пото́па, огня́, меча́, и наше́ствия иноплеме́нных, и междоусо́бныя бра́ни; изба́ви нас от вся́кия беды́ и напа́сти и моли́твами твои́ми отврати́ от нас пра́ведный гнев Бо́жий и испроси́ нам Его́ милосе́рдие. О вели́кий и непостижи́мый Бо́же! се на умоле́ние Тебе́ предлага́ем свята́го Иоа́нна, его́же Ты сподо́бил еси́ неизрече́нных открове́ний, приими́ о нас хода́тайство, да́руй нам исполне́ние проше́ний на́ших во сла́ву Твою́, па́че же соверши́ нас духо́вным соверше́нством к наслажде́нию жи́зни несконча́емыя в Небе́сных Твои́х оби́телех. О Небе́сный О́тче, созда́вый вся Влады́ко, Всеси́льный Царю́! Косни́ся благода́тию серде́ц на́ших, да, раста́явше, я́ко воск, пролию́тся пред Тобо́ю и бре́нная тварь духо́вна сотвори́тся в честь и сла́ву Твою́, и Сы́на Твоего́, и Свята́го Ду́ха. Ами́нь.

Моли́тва ко преподо́бному Арсе́нию Вели́кому

О свяще́нная главо́, земны́й А́нгеле, Небе́сный челове́че, безмо́лвия рачи́телю, молча́ния люби́телю, преподо́бне и Богоно́сне о́тче наш Арсе́ние. Припа́даем ти и мо́лимся: помоли́ся ко Го́споду, Бо́гу и Спа́су на́шему Иису́су Христу́, да да́рует нам, гре́шным и недосто́йным рабо́м Свои́м, вся ко спасе́нию душе́вному благопотре́бныя да́ры Своя́:ве́ру пра́ву, наде́жду бла́гу, любо́вь нелицеме́рну, благоче́стие непоколеби́мое, любому́дрие христопосле́довательное и вся доброде́тели, во святе́м Ева́нгелии Им запове́данныя, да бу́дем подража́тели твоего́ богоуго́днаго жития́ и вку́пе с тобо́ю сподо́бимся спасе́ние ве́чное получи́ти и Ца́рствие Небе́сное унасле́довати. Ей, уго́дниче Бо́жий, не пре́зри нас, но помози́ нам небе́сным предста́тельством твои́м благоче́стно житие́ вре́менное сконча́ти, кончи́ну благу́ю, ми́рную и непосты́дную стяжа́ти и блаже́нства ра́йскаго удосто́итися, да прославля́ем человеколю́бие и щедро́ты в Тро́ице сла́вимаго и покланя́емаго Бо́га, Отца́, и Сы́на, и Свята́го Ду́ха, и твое́ свято́е заступле́ние, во ве́ки веко́в. Ами́нь.

Ука́з о пра́зднице свята́го и всехва́льнаго апо́стола и Евангели́ста Иоа́нна Богосло́ва.

Начина́ется от суббо́ты 2-я неде́ли по Па́сце и восхо́дит до 7-я неде́ли святы́х оте́ц.

Подоба́ет ве́дати, я́ко а́ще случи́тся свята́го Иоа́нна Богосло́ва в неде́лю мироно́сиц, или́ о разсла́бленном, или́ самаряны́ни, или́ о слепо́м:

В суббо́ту, на ма́лой вече́рни на Го́споди, воззва́х:стихи́ры воскре́сны 4. Сла́ва,апо́стола. И ны́не,Богоро́дичен. На стихо́вне стихи́ра воскре́сна и апо́стола стихо́вна вели́кия вече́рни, с припе́вы его́. Сла́ва,апо́стола. И ны́не,Богоро́дичен. Тропа́рь воскре́сный. Сла́ва,апо́стола. И ны́не,Богоро́дичен. Ектения́ ма́лая и отпу́ст.

На вели́цей вече́рни, по обы́чной кафи́зме, на Го́споди, воззва́х:стихи́ры воскре́сны, гла́са 3, и пра́здника 3, и апо́стола 4. Сла́ва,пра́здника, самогла́сен Трио́ди. И ны́не,Богоро́дичен 1-й гла́са. Вход, проки́мен дне и чте́ния апо́стола 3. На лити́и стихи́ра хра́ма и апо́стола самогла́сны. Сла́ва,апо́стола. И ны́не,пра́здника. На стихо́вне стихи́ра воскре́сна и Па́схи. Сла́ва,апо́стола. И ны́не,Трио́ди. На благослове́нии хле́бов, тропа́рь: Богоро́дице Де́во:два́жды, и апо́стола, еди́ножды, и чте́ние в Дея́ниих апо́стольских. А́ще есть неде́ля мироно́сиц: На Бог Госпо́дь:тропа́рь воскре́сный: Егда́ снизше́л еси́ к сме́рти:еди́ножды. Благообра́зный Ио́сиф: еди́ножды. Сла́ва,апо́стола. И ны́не,миро́носицам. А́ще ли во и́ны неде́ли, тропа́рь воскре́сный, два́жды. Сла́ва,апо́стола. И ны́не,Богоро́дичен 1-й, в то́йже глас. По кафи́змах седа́льны воскре́сны и Богоро́дичны их, и чте́ние во Ева́нгелии толково́м. Полиеле́й и седа́льны о́ба апо́стола. Сла́ва,седа́лен по полиеле́и. И ны́не,Богоро́дичен и чте́ние апо́стола. Степе́нна и проки́мен гла́са. Вся́кое дыха́ние: Ева́нгелие воскре́сно. Воскресе́ние Христо́во:три́жды. Псало́м 50. Стихи́ра воскре́сна. Кано́н Па́схи со ирмосо́м и с Богоро́дичны их на 6, и апостола на 4, и Трио́ди на 4. Пое́м же cи́це: на ко́ейждо пе́сни тропа́рь воскре́сный еди́н, и пра́здника еди́н, и Тро́ичен, и Богоро́дичен. Катава́сия: Воскресе́ния день:По 3-й пе́сни конда́к апо́стола, и и́кос, и седа́лен его́, два́жды. Сла́ва, и ны́не,пра́здника и чте́ние апо́стола. По 6-й пе́сни конда́к пра́здника и и́кос. На 9-й пе́сни Честне́йшую:не пое́м. Свети́лен Па́схи. Сла́ва,апо́стола. И ны́не,пра́здника. На хвали́тех, стихи́ры воскре́сны 4, и апо́стола 4, со Сла́вою,и с припе́вы его́. Сла́ва,пра́здника. И ны́не: Преблагослове́нна еси́:Славосло́вие вели́кое. По трисвято́м тропа́рь воскре́сный, ектении́, и оглаше́ние, и отпу́ст, и обы́чное исхожде́ние в притво́р. Сла́ва и ны́не, стихи́ра ева́нгельская и час пе́рвый. На часе́х тропа́рь воскре́сный. Сла́ва, апо́стола. И ны́не,Богоро́дичен часо́в. По О́тче наш:кондаки́, пременя́юще, глаго́лем. На Литурги́и: Блаже́нны гла́са на 4, и Трио́ди песнь 3-я на 4, и апо́стола песнь 6-я на 4. По вхо́де тропа́рь воскре́сный, и апо́стола. Сла́ва,конда́к апо́стола. И ны́не,пра́здника. Проки́мен, Апо́стол, аллилу́ия, Ева́нгелие и прича́стен пре́жде дне, и апо́стола. Свята́го же Арсе́ния слу́жба оставля́ется и пое́тся, егда́ хо́щет настоя́тель или́ це́ркве нача́льник.

О то́мже пра́зднице подоба́ет ве́дати, а́ще случи́тся пра́здник свята́го апо́стола Иоа́нна Богосло́ва в сре́ду Преполове́ния:

Во вто́рник на ма́лой вече́рни стихи́ры апо́стола на 4. Сла́ва,апо́стола. И ны́не,пра́здника. На стихо́вне стихи́ры апо́стола вели́кия вече́рни со стихи́ их. Сла́ва,апо́стола. И ны́не,пра́здника. По трисвято́м тропа́рь апо́стола. Сла́ва, и ны́не,пра́здника. Ектения́ ма́лая и отпу́ст. А́ще ли не бу́дет бде́ния, на повече́рии конда́к апо́стола. Сла́ва, и ны́не,пра́здника. На вели́цей вече́рни пое́м Блаже́н муж:антифо́н 1-й. На Го́споди, воззва́х: стихи́ры пра́здника на 4 и апо́стола на 4. Сла́ва,апо́стола. И ны́не,пра́здника. Вход, проки́мен дне, и чте́ния пра́здника, и апо́стола. На лити́и стихи́ра хра́ма и апо́стола самогла́сны. Сла́ва,апо́стола. И ны́не,пра́здника. На стихо́вне стихи́ры пра́здника со стихи́ их. Сла́ва,апо́стола. И ны́не,пра́здника. На благослове́нии хле́бов тропа́рь пра́здника, два́жды, и апо́стола, еди́ножды. И чте́ние апо́стола, во Апокали́псии. На у́трени на Бог Госпо́дь:тропа́рь пра́здника, два́жды. Сла́ва,апо́стола. И ны́не,пра́здника. По кафи́змах седа́льны пра́здника и чте́ние пра́здника. Полиеле́й и седа́льны апо́стола о́ба. Сла́ва,по полиеле́и седа́лен. И ны́не,Богоро́дичен его́ и чте́ние апо́стола. Степе́нна, 1-й антифо́н 4-го гла́са. Проки́мен апо́стола. Вся́кое дыха́ние: Ева́нгелие апо́стола. Воскресе́ние Христо́во:Псало́м 50. Стихи́ра апо́стола. Кано́н пра́здника, глас 4, со ирмосо́м на 4, и апо́стола на 6, и други́й кано́н пра́здника, глас 8, на 4. Катава́сия, ирмо́с пра́здника, 8-го гла́са, о́ба ли́ка вку́пе. По 3-й пе́сни, конда́к апо́стола, и и́кос, и седа́лен апо́стола, два́жды. Сла́ва, и ны́не,пра́здника и чте́ние апо́стола. По 6-й пе́сни, конда́к пра́здника и и́кос. На 9-й пе́сни, Честне́йшую:не пое́м. Свети́лен пра́здника: Сла́ва,апо́стола. И ны́не,пра́здника. На хвали́тех, стихи́ры пра́здника 3 и апо́стола 3. Сла́ва,апо́стола, глас 8: Благове́стниче Иоа́нне: И ны́не,пра́здника. Славосло́вие вели́кое. По трисвято́м тропа́рь апо́стола. Сла́ва, и ны́не,пра́здника. Ектении́, и оглаше́ние, и отпу́ст, и обы́чное исхожде́ние, и час пе́рвый в притво́ре. На часе́х тропа́рь пра́здника. Сла́ва,апо́стола. И ны́не,Богоро́дичен часо́в. По О́тче наш:глаго́лем кондаки́, пременя́юще. На Литурги́и: Блаже́нны пра́здника от кано́на 4-го гла́са песнь 3-я на 4, и апо́стола песнь 6-я на 4. По вхо́де тропа́рь пра́здника и апо́стола. Сла́ва,конда́к апо́стола. И ны́не,пра́здника. Проки́мен, Апо́стол, аллилу́ия, Ева́нгелие, и прича́стен пре́жде пра́здника, та́же апо́стола. Свята́го же Арсе́ния слу́жба пое́тся во ин день.

О то́мже пра́зднице подоба́ет ве́дати, а́ще случи́тся в неде́лю самаряны́ни:

Оставля́ется слу́жба Преполове́ния и пое́тся воскре́сна, и самаряны́ни и Богосло́ва, я́коже указа́ся пре́жде во и́ны неде́ли.

О то́мже пра́зднице, а́ще случи́тся свята́го апо́стола Иоа́нна Богосло́ва в сре́ду пред Вознесе́нием во отда́ние Па́схи:

Во вто́рник ве́чера, на ма́лой вече́рни стихи́ры апо́стола на 4. Сла́ва,апо́стола. И ны́не,дне. На стихо́вне стихи́ры апо́стола вели́кия вече́рни с припе́вы их. Сла́ва,апо́стола. И ны́не,дне. Тропа́рь апо́стола. Сла́ва, и ны́не: Вся па́че:Ектения́ ма́лая, и отпу́ст. А́ще же несть бде́ния, на повече́рии глаго́лем конда́к апо́стола. Сла́ва, и ны́не,Па́схи: А́ще и во гроб:На вели́цей вече́рни, по обы́чном псалме́ пое́м Блаже́н муж:1-й антифо́н. На Го́споди, воззва́х:стихи́ры о слепо́м на 6 и апо́стола на 4. Сла́ва,апо́стола. И ны́не,дне: Кто возглаго́лет:Вход, проки́мен дне и чте́ния апо́стола. На лити́и стихи́ра хра́ма и апо́стола самогла́сны. Сла́ва,апо́стола. И ны́не: Се испо́лнися:На стихо́вне, стихи́ра воскре́сна, глас 5: Тебе́ воплоще́ннаго:та́же стихи́ры Па́схи с припе́вы их. Сла́ва,апо́стола. И ны́не,Па́схи. Воскресе́ния день:И Христо́с воскре́се: еди́ножды. На благослове́нии хле́бов тропа́рь апо́стола, два́жды, и Богоро́дице Де́во:еди́ножды, и чте́ние во Открове́нии апо́стола Иоа́нна. А́ще же несть бде́ния, по Ны́не отпуща́еши:и по трисвято́м тропа́рь воскре́сный гла́са. Сла́ва,апо́стола. И ны́не,Богоро́дичен и отпу́ст. Полу́нощницу же пое́м по обы́чаю. По 1-м трисвято́м вме́сто: Се Жени́х:глаго́лем тропа́рь воскре́сный: Собезнача́льное Сло́во: Сла́ва, и ны́не,Богоро́дичен его́. По 2-м, вместо: Помяни́, Го́споди:конда́к Па́схи: А́ще и во гроб:Посе́м: Го́споди, поми́луй,12, и отпу́ст. Моли́твы же Помяни́, Го́споди:не глаго́лем. На Бог Госпо́дь:тропа́рь воскре́сный, два́жды, глас 5: Собезнача́льное Сло́во: Сла́ва,апо́стола. И ны́не: Вся, па́че смы́сла:По 1-й кафи́зме седа́лен воскре́сный и чте́ние. По 2-й кафи́зме седа́лен о слепо́м и чте́ние. Полиеле́й, и седа́льны апо́стола вси по еди́ножды, и чте́ние. Степе́нна, 1-й антифо́н 4-го гла́са. Проки́мен апо́стола и Вся́кое дыха́ние: Ева́нгелие апо́стола. Воскресе́ние Христо́во:псало́м 50. Стихи́ра апо́стола. Кано́н Па́схи без Богоро́дичное со ирмосо́м на 6, и апо́стола на 4, и о слепо́м на 4. Пое́м же во вся́кой пе́сни тропа́рь о слепо́м по два́жды. Сла́ва,Тро́ичен. И ны́не,Богоро́дичен. Катава́сия, ирмо́с: Спаси́телю Бо́гу:о́ба ли́ка вку́пе. (Предпра́зднства же кано́н зде оставля́ется, и пое́м его́ во вто́рник, напреди́.) По 3-й пе́сни, конда́к апо́стола и и́кос. Та́же ипакои́ Па́сце: Предвари́вшия у́тро: Сла́ва,седа́лен апо́стола. И ны́не, слепа́го и чте́ние апо́стола. По 6-й пе́сни конда́к Па́схи и и́кос. На 9-й пе́сни Честне́йшую:не пое́м. Свети́лен Па́схи. Сла́ва,апо́стола. И ны́не,слепа́го. На хвали́тех стихи́ры апо́стола на 4. Та́же: Да воскре́снет Бог:и стихи́ры Па́схи, с припе́вы их. Сла́ва,апо́стола. И ны́не,Па́схи, глас 5: Воскресе́ния день: Христо́с воскре́се:еди́ножды. Славосло́вие вели́кое. Тропа́рь воскре́сный. Сла́ва,апо́стола. И ны́не:Вся, па́че смы́сла: ектени́и, и оглаше́ние, и отпу́ст, и исхожде́ние, и час 1-й в притво́ре. На часе́х тропа́рь воскре́сный. Сла́ва, апо́стола. И ны́не,Богоро́дичен часо́в. По О́тче наш:кондаки́ Па́схи и апо́стола пременя́ем. На Литурги́и: Блаже́нны от кано́на Па́схи, песнь 3-я, на 4, и апо́стола песнь 6-я, на 4. По вхо́де тропа́рь воскре́сный и апо́стола. Сла́ва, конда́к апо́стола. И ны́не,Па́схи. Проки́мен, и аллилу́ия Па́схи, и апо́стола. Апо́стол, и Ева́нгелие дне, и апо́стола. Прича́стен: Те́ло Христо́во: Други́й: Во всю зе́млю:

О то́мже пра́зднице подоба́ет ве́дати, а́ще случи́тся свята́го апо́стола Иоа́нна Богосло́ва в четверто́к Вознесе́ния:

На ма́лой вече́рни стихи́ры пра́здника 3 на 4. Сла́ва,апо́стола. И ны́не,пра́здника. На стихо́вне стихи́ры апо́стола с припе́вы их, вели́кия вече́рни. Сла́ва,апо́стола. И ны́не, пра́здника. Тропа́рь апо́стола. Сла́ва, и ны́не,пра́здника. Ектения́ ма́лая и отпу́ст. А́ще ли несть бде́ния: на повече́рии конда́к апо́стола, Сла́ва, и ны́не,пра́здника. На вели́цей вече́рни пое́м: Блаже́н муж:1-й антифо́н. На Го́споди, воззва́х:стихи́ры пра́здника на 6 и а́постола на 4. Сла́ва,апо́стола. И ны́не,пра́здника. Вход, проки́мен дне, и чте́ния пра́здника, и апо́стола. На лити́и стихи́ры пра́здника и апо́стола. Сла́ва,апо́стола. И ны́не,пра́здника. На стихо́вне стихи́ры пра́здника, с припе́вы их. Сла́ва,апо́стола. И ны́не,пра́здника. На благослове́нии хле́бов тропа́рь пра́здника, два́жды, и апо́стола, еди́ножды, и чте́ние пра́здника. На Бог Госпо́дь:тропа́рь пра́здника, два́жды. Сла́ва,апо́стола. И ны́не, пра́здника. По кафи́змах седа́льны пра́здника и чте́ние. Полиеле́й, и седа́лен пра́здника, и чте́ние (пра́здника). Степе́нна, 1-й антифо́н 4-го гла́са, проки́мен и Ева́нгелие пра́здника. Воскресе́ние Христо́во:Псало́м 50. Стихи́ра пра́здника. Кано́н пра́здника, глас 5, со ирмосо́м на 6 и апо́стола на 4, и други́й, пра́здника на 4. Катава́сия: Боже́ственным покрове́н:о́ба ли́ка вку́пе. По 3-й пе́сни конда́к апо́стола, и и́кос, и седа́лен, два́жды. Сла́ва, и ны́не,пра́здника и чте́ние апо́стола. По 6-й пе́сни конда́к пра́здника и и́кос. На 9-й пе́сни Честне́йшую: не пое́м, но пое́м припе́вы пра́здника, к тропаре́м же апо́стола: Святы́й апо́столе и Евангели́сте Иоа́нне Богосло́ве, моли́ Бо́га о нас.Свети́лен пра́здника. Сла́ва,апо́стола. И ны́не,пра́здника. На хвали́тех стихи́ры на 6, пра́здника 3 и апо́стола 3. Сла́ва,апо́стола. И ны́не,пра́здника. Славосло́вие вели́кое. По трисвято́м тропа́рь апо́стола. Сла́ва, и ны́не,пра́здника. Ектении́, и оглаше́ние, и отпу́ст. Дае́тся же и святы́й еле́й бра́тии от канди́ла свята́го. И обы́чное исхожде́ние, и час 1-й в притворе. На часе́х тропа́рь пра́здника. Сла́ва,апо́стола. И ны́не,Богоро́дичен часо́в. По О́тче наш: кондаки́ пра́здника и апо́стола пременя́ем. На Литурги́и: изобрази́тельный и от кано́на пра́здника гла́са 5-го песнь 3-я на 4, и апо́стола песнь 6-я на 4. Вхо́дное пра́здника, тропа́рь пра́здника и апо́стола. Сла́ва,конда́к апо́стола. И ны́не,пра́здника. Проки́мен, Апо́стол, аллилу́ия, Ева́нгелие, и прича́стен пре́жде пра́здника, и апо́стола. Свята́го же Арсе́ния слу́жба оставля́ется и пое́тся, егда́ разсу́дит екклисиа́рх.

О то́мже подоба́ет ве́дати, а́ще случи́тся свята́го апо́стола ла Иоа́нна Богосло́ва в неде́лю 7-ю по Па́сце, святы́х оте́ц 318.

Оставля́ется слу́жба Вознесе́ния, и пое́тся вокре́сна, и Богосло́ва, и святы́х отце́в. В суббо́ту на ма́лой вече́рни стихи́ры вокре́сны на 4. Сла́ва,апо́стола, глас 2: Сы́на гро́мова:И ны́не,Богоро́дичен ма́лыя вече́рни. На стихо́вне стихи́ра воскре́сна еди́на, та́же апо́стола стихо́вна вели́кия вече́рни с припе́вы свои́ми. Сла́ва,апо́стола. И ны́не,Богоро́дичен, по гла́су. По трисвято́м тропа́рь воскре́сный и отце́в. Сла́ва,апо́стола. И ны́не,пра́здника. Ектения́ ма́лая и отпу́ст.

На вели́цей вече́рни. По обы́чном псалме́, и по кафи́зме, на Го́споди, воззва́х: стихи́ры воскре́сны 3, и отцев 4, и апо́стола 3. Сла́ва,отце́в. И ны́не,Богоро́дичен 1-й гла́са. Вход, проки́мен дне, и чте́ния отце́в, и апо́стола. На лити́и стихи́ра отце́в, глас 3, и апо́стола самогла́сны. Сла́ва,апо́стола. И ны́не,пра́здника. На стихо́вне стихи́ры воскре́сны. Сла́ва,отце́в. И ны́не,пра́здника. На благослове́нии хле́бов тропа́рь: Богоро́дице Де́во:два́жды, и апо́стола, еди́ножды, и чте́ние. На Бог Госпо́дь:тропа́рь воскре́сный и отце́в. Сла́ва,апо́стола. И ны́не,Богоро́дичен. По кафи́змах седа́льны воскре́сны с Богоро́дичны их и чте́ние во Ева́нгелии толково́м. Полиеле́й, и седа́льны свята́го вси, и чте́ние апо́стола. Степе́нна и проки́мен гла́са: Вся́кое дыха́ние:Ева́нгелие воскре́сное. Воскресе́ние Христо́во:Псало́м 50. Стихи́ра воскре́сна и про́чее. Кано́н воскре́сный со ирмосо́м на 4, и апо́стола на 4, и отце́в на 6. Катава́сия: Боже́ственным покрове́н:По 3-й пе́сни конда́к апо́стола, и и́кос, и седа́лен отце́в. Сла́ва,апо́стола. И ны́не,Богоро́дичен. И чте́ние апо́стола. По 6-й пе́сни конда́к отце́в, и и́кос, и про́лог. Свети́лен воскре́сный и отце́в. Сла́ва,апо́стола. И ны́не,Богоро́дичен. На хвали́тех стихи́ры воскре́сны 3, и отце́в 2, и апо́стола со Сла́вником 3. Сла́ва,отце́в. И ны́не, Преблагослове́нна еси́:Славосло́вие вели́кое, тропа́рь воскре́сный. Ектении́, и оглаше́ние, и отпуст. И обы́чное исхожде́ние. Сла́ва, и ны́не,стихи́ра Ева́нгельская. И час 1-й в притво́ре. На часе́х тропа́рь воскре́сный. Сла́ва,отце́в. И ны́не,Богоро́дичен часо́в. По О́тче наш:конда́к воскре́сный. На 3-м часе́ тропа́рь воскре́сный. Сла́ва,апо́стола. По О́тче наш:кондаки́ апо́стола и отце́в глаго́лем, пременя́юще.

На Литурги́и: Блаже́нны гла́са на 4 и отце́в, песнь 3-я на 4 и апо́стола песнь 6-я на 4. По вхо́де тропа́рь воскре́сный, и отце́в, и апо́стола, та́же, конда́к отце́в. Сла́ва,апо́стола. И ны́не,пра́здника. Проки́мен, Апо́стол, аллилу́ия, и Ева́нгелие отце́в, и апо́стола. Прича́стен: Хвали́те Го́спода:Други́й: Во всю зе́млю:

(Службу зри 12 июля)

Тропа́рь, глас 1:

Боже́ственною любо́вию разгоре́вся,/ вся мирска́я пристра́стия отри́нул еси́,/ крест же Христо́в на ра́мо взем,/ во след Его́ изво́лил еси́ ходи́ти,/ оте́чество твое́ оста́вив,/ Вели́каго Нова́гра́да дости́гл еси́/ и, рабо́тая Бо́гови невозвра́тным по́мыслом,/ дарова́ния чудотворе́ний сподо́бился еси́./ Те́мже, чту́ще тя, преподо́бне Арсе́ние, вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Конда́к, глас 4:

Тяжелоно́сныя во́лны тиме́ния отгна́,/ и вся плотска́я двиза́ния/ и, по́хоти паля́щия нивочто́же вмени́в,/ взем крест и по́йде вслед Христа́,/ И́мже наставля́емь, лука́выя се́ти до конца́ раздра́/ и под нога́ми предложи́,/ мо́лимтися, преподо́бне о́тче Арсе́ние,/ изба́ви нас от належа́щих на ны собла́зн,/ ты бо еси́ Вели́кому Новугра́ду похвала́ и утвержде́ние и су́щим в печа́лех ра́дость.

Тропа́рь, глас 8:

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Арсе́ние о́тче наш,/ моли́ Христа́ Бо́га спасти́ся душа́м на́шим.

Конда́к, глас то́йже:

Я́же на земли́ оста́вль, Христо́вым стопа́м после́довал еси́ те́пле/ и, Того́, сла́вне, на ра́мо взем честны́й крест,/ умертви́л еси́ труды́ по́стническими теле́сныя жела́ния, требла́женне./ Те́мже зове́м ти: ра́дуйся, о́тче Арсе́ние.

Тропа́рь, глас 8:

В тебе́, о́тче Кассиа́не, изве́стно спасе́ся е́же по о́бразу,/ восприе́м бо крест и после́довав Христо́ви,/ твори́л еси́ за́поведи Его́ тща́тельне./ Те́мже ны́не со А́нгелы ра́дуется, преподо́бне, дух твой.

Конда́к, глас 2:

Пред все́ми смиря́яся/ и во всем послуша́ние припряже́нное посту́, блаже́нне Кассиа́не, име́я,/ покорил еси́ го́рдых бесо́в испове́дати,/ коль вельми́ боя́тся преподо́бных Пече́рских,/ и́хже и до конца́ посрами́в,/ всели́ся в ли́це преподо́бных,/ с ни́миже моли́ся о всех нас.