Стихи́ры Креста́, на 6, глас 4.

Подо́бен: Зва́нный свы́ше:

Днесь ра́дуется ве́рных мно́жество Боже́ственное:/ явля́ется бо Небе́сный Крест конце́м,/ осиява́ет твердь све́том непристу́пным,/ возду́х озаря́ет/ и земли́ лице́ украша́ет./ Пое́т Боже́ственными пе́сньми Це́рковь Христо́ва,/ слу́жит, почита́ющи/ свы́ше ю соблюда́ющий/ Крест Боже́ственный и пречу́дный,/ его́же си́лою укрепля́еми,/ Влады́це присту́пим, зову́ще:/ умири́ мир и просвети́ ду́ши на́ша.

Я́коже честне́йша ле́ствица,/ ви́ден бысть днесь всечестны́й Крест и сла́вный,/ от земли́ к Небе́сным преводя́й/ ве́рою несумне́нною сего́ почита́ющия./ Ра́дуются вси язы́цы,/ те́пле притека́ющии ко Креще́нию,/ и Це́рковь, я́ко неве́ста, украша́ется о́бразом Боже́ственным,/ его́же бо сокры́ти тща́хуся иуде́и,/ свы́ше возду́х озаря́ет/ и спаса́ет ве́рою к нему́ притека́ющия.

Жезл Боже́ственныя си́лы с высоты́ яви́ся,/ в Сио́не нам по́слан Крест,/ преоблиста́я благода́тию,/ све́том безме́рным./ На кра́ниеве ме́сте сла́внем/ возсия́ небе́сный Крест в конце́х/ распе́ншагося Бо́га на́шего,/ пропове́дая всем е́же стра́сти ра́ди ми́рови спасе́ние./ Ему́же покланя́ющеся, воспое́м немо́лчно/ и ве́рою про́сим/ умири́ти мир и спасти́ ду́ши на́ша.

Сла́ва, глас 8:

Возвести́ша Небеса́ сла́ву Твою́, Го́споди,/ стра́шное Креста́ Твоего́ зна́мение,/ и земля́ вся со стра́хом поклони́ся./ Мы же, славосло́вяще, благода́рно Тебе́ вопие́м:/ Бог Сый безстра́стен,/ пло́тию пострада́ти за ны во́лею прия́л еси́,/ спаси́ лю́ди, я́же стяжа́л еси́ Твое́ю кро́вию.

И ны́не, пра́здника.

Тропа́рь, глас 8:

Креста́ Твоего́ о́браз ны́не па́че со́лнца возсия́,/ его́же от горы́ святы́я да́же до ло́бнаго ме́ста просте́рл еси́/ и в нем Твою́, Спа́се, кре́пость уясни́л еси́,/ сим укрепля́я нас,/ и спаса́й вы́ну в ми́ре/ моли́твами Богоро́дицы, Христе́ Бо́же, и спаси́ нас.

Кано́н Ака́кия, творе́ние Феофа́ново, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Добро́тою беззло́бия, сла́вне, укра́шен,/ до́брых вине́ Исто́чнику со дерзнове́нием предста́л еси́,/ Его́же ны́не нам благопреме́нна твои́ми мольба́ми устро́й.

Моле́бник и́стинный, днесь нас Ака́кий,/ высо́ким пропове́данием вопия́, созыва́ет на трапе́зу,/ со тща́нием у́бо теце́м и весе́лием, мучениколю́бцы.

Вода́м прича́щся оставле́ния Креще́нием,/ сыновство́ прия́т благода́ти Бо́жия/ и второ́му креще́нию муче́ния кро́вию сподо́бился еси́, преблаже́нне.

Не терпя́ беззако́ние, сла́вне, возноси́мо зре́ти,/ Христо́во Божество́ я́сно пред суди́щем пропове́дал еси́ мучи́телей, Ака́кие,/ беззло́бию я́ко тезоимени́т.

Богоро́дичен: В Тебе́, обра́дованная Пречи́стая, ви́дена бы́ша Бо́жия ше́ствия проявле́нно,/ Де́ву сохра́ньшаго и по рождестве́ нетле́нну Тя ро́ждшую соблю́дшаго.

Песнь 3

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́:/ несть бо свят, па́че Тебе́, Человеколю́бче.

Ра́зумом Боже́ственным, и прему́дростюо, и сло́вом укра́шен,/ му́дрых плете́ния неразу́мная разори́л еси́,/ те́мже твою́ сла́вную па́мять почита́ем.

Му́жественным и тве́рдым сия́я смы́слом,/ ты развраще́ния нечести́вых и ополче́ния победи́л еси́/ и пре́лести разори́л еси́ утвержде́ния.

Укрепля́емь си́лою Бо́га Вседержи́теля,/ гнило́е и немощно́е безбо́жия обличи́л еси́,/ те́мже победоно́сца тя, му́чениче, пропове́дуем.

Ка́лнаго пития́ и преле́стнаго и ти́ны избе́гл еси́,/ благоче́стия просвеще́нием и светолу́чными сия́нии/ ум осия́я, му́чениче Ака́кие.

Богоро́дичен: Держа́ву сме́рти и кля́твы дре́вния осужде́ние,/ заче́нши Жизнь, Богороди́тельнице, упраздни́ла еси́,/ те́мже Твое́ пречи́стое чтим рождество́.

Песнь 4

Ирмо́с: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Необори́м, я́коже столп, ве́рою пребы́сть,/ ни муче́ний ту́чами, ни я́звленными приложе́нии,/ ни бие́ний ве́тры коле́блемь, но взыва́ше велегла́сно:/ сла́ва си́ле Твое́й, Го́споди.

Окормля́емь ве́трилы и дыха́нии Ду́ха Свята́го, блаже́нне,/ в приста́нищи ти́се ты почи́л еси́ и стремле́ния волн и ве́тров не ужа́слся еси́,/ му́чениче Христо́в всече́стне.

Моля́ держа́ву Бо́жию непобеди́мую, одолева́л еси́ всю супроти́вную си́лу/ и все ору́жие их отъя́т,/ ра́дуяся, я́ко победи́тель, достосла́вне.

Наставля́емь Боже́ственным явле́нием, тече́ния коне́ц град царе́в сотвори́в,/ его́же граждани́н был еси́, преблаже́нне,/ вся́ко наше́ствие ва́рварское отрева́я.

Богоро́дичен: Умерщвле́на мя, Де́во, и неизбе́жными одержи́ма греха́ связа́нии,/ еди́на Богома́ти, возста́ви,/ Я́же Жизнь заче́ншая ве́чную, избавле́ние всем ве́рным даю́щую.

Песнь 5

Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы сия́ние Божества́,/ от но́щи у́тренююще,/ воспева́ем Тя, Человеколю́бче.

Крест поне́сл еси́ на ра́мех, неукло́нно Христу́ после́дуя,/ к жи́зни нетле́нней веду́щему тя/ и к Све́ту невече́рнему вводя́щу, пребога́те.

Го́рькия те́ла, всеблаже́нне, ра́ны и уде́с отсече́ния/ пи́щу безконе́чную, тебе́ исхода́таиша,/ и му́ченический вене́ц, и А́нгельское ра́дование.

Ю́ноша незло́бив, и целому́др, и кро́ток,/ и кре́пок на стра́сти теле́сныя, и на де́моны же́сток,/ и неве́рным непристу́пен показа́лся еси́, всеприснопа́мятне.

Богоро́дичен: И́стиннаго Бо́га нам ро́ждшую пло́тски, Отцу́ Единоро́днаго,/ Богоро́дицу Всечи́стую Тя имену́ем,/ глас вку́пе соста́вльше Рождеству́ Твоему́.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею кро́вию.

Гла́дом тя, и́же да́ра Боже́ственнаго гла́дствующии, осужда́ют, му́чениче,/ приснопита́емаго Небе́сными дарова́нии/ и пи́щу неконча́емую иму́щего.

Посрами́в мучи́телей безбо́жное шата́ние/ и злонача́льнаго зми́я пучи́ною потопи́л еси́ твои́х крове́й,/ победоно́сец к Небеси́ возлете́л еси́, Ака́кие.

Сме́ртию сме́рти Влады́чне, преблаже́нне, подо́бяся,/ му́чениче, ве́чно с Ним ца́рствуеши,/ зре́ния Его́ и ра́дости насыща́яся.

Богоро́дичен: Разруши́ла еси́ сме́рти, Чи́стая, осужде́ние и зако́на кля́тву,/ Христа́ ро́ждшая, Разори́теля сме́рти,/ и благослове́ние всем источи́вшаго.

Седа́лен, глас 4.

Подо́бен: Ско́ро предвари́:

Ту́чами крове́й твои́х, му́чениче Ака́кие, врага́ потопи́в,/ вся ополче́ния мучи́тельская посрами́л еси́,/ дости́г А́нгельския невеще́ственныя ли́ки,/ прия́л еси́ нетле́ния неувяда́емый вене́ц./ Те́мже мольба́ми твои́ми спаси́ от бед нас.

Песнь 7

Ирмо́с: Спасы́й во огни́ Авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.

Усе́чен во главу́, к мы́сленней впери́лся еси́ Церко́вней Главе́,/ побе́дным венце́м укра́шен и зовы́й, пребога́те:/ препе́тый Го́споди, Бо́же оте́ц на́ших, благослове́н еси́.

С му́ченики Христо́вы, я́ко всеи́стинен му́ченик, сочета́лся еси́ терпели́вно,/ безбо́жныя мучи́тели победи́в, взыва́я, Ака́кие:/ препе́тый Го́споди, Бо́же оте́ц на́ших, благослове́н еси́.

Воскрили́в ум ко блаже́нней наде́жди, соблюда́емей ве́рным,/ в му́ченическое вшел еси́ суди́ще, воспева́я ду́хом:/ Бо́же оте́ц на́ших, благослове́н еси́.

Богоро́дичен: Рече́ния, Де́во, проро́к и дре́внии о́брази/ Твое́ прообразу́ют я́ве, Богома́ти, чи́стое рождество́, е́же пою́ще, взыва́ем:/ оте́ц на́ших Бо́же, благослове́н еси́.

Песнь 8

Ирмо́с: Ру́це распросте́р, Дании́л/ льво́в зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

В Вы́шнюю митропо́лию, прему́дре, ца́рствующую и́стинно, всели́лся еси́,/ ю́же созда́ Госпо́дь и святы́м проугото́ва, наде́ющимся на Него́ и ве́рою зову́щим:/ благослови́те, вся дела́ Госпо́дня, Го́спода.

Претерпе́л еси́ любо́вию мук томле́ние,/ гла́дом же та́я, помина́л еси́, изря́дне, ирисносу́щное наслажде́ние,/ и пи́щу, и ра́дость иребыва́ющую вопию́щим:/ благослови́те, вся дела́ Госпо́дня, Го́спода.

Удо́бь и зело́ ско́ро ра́товал еси́ супротивобо́рцы твоя́,/ непобеди́ма побо́рника, помо́щника же, и засту́пника,/ и состра́ждуща Христа́ име́я, пребога́те, Ему́же вопие́м:/ благослови́те, вся дела́ Госпо́дня, Го́спода.

Ака́кие блаже́нне, пронарече́н быв, житие́ незло́биво име́л еси́ и непоро́чно,/ укра́шено кро́вию страда́ния, прехва́льне,/ и доброде́тельми му́ченическими удобря́емь, и зовы́й:/ благослови́те, вся дела́ Госпо́дня, Го́спода.

Богоро́дичен: Та́инство стра́нно вои́стинну под со́лнцем еди́на показа́ла еси́:/ Бо́га бо родила́ еси́, Чи́стая, Неви́димаго, и Безнача́льнаго,/ и Невмести́маго все́ми, и Непостижи́маго./ Ему́же вопие́м:/ благослови́те, вся дела́ Госпо́дня, Го́спода.

Песнь 9

Ирмо́с: Е́ва у́бо неду́гом преслуша́ния кля́тву всели́ла есть;/ Ты же, Де́во Богоро́дице,/ прозябе́нием чревоноше́ния/ ми́рови благослове́ние процвела́ еси́./ Тем Тя вси велича́ем.

Имы́й, блаже́нне, страда́льческаго противле́ния сия́тельное, е́же от побе́ды,/ престо́лу предста́л еси́ Влады́чню, со А́нгельскими лику́я во́инствы/ и всем спасе́ние прося́, твою́ па́мять блажа́щим.

Светла́ твоя́ на враги́, пребога́те, побе́дная храбо́рства,/ тебе́ же по́чести мно́го бо́льше твой Подвигополо́жник подава́ше/ и Боже́ственнаго светоли́тия исполне́ние./ Те́мже тя вси ублажа́ем.

Близ был еси́ Христа́, вседо́блественне, и́бо страсть и скорбь претерпе́л еси́,/ те́мже тя виде́ния я́сно и Боговиде́ния сподо́би,/ И́мже на земли́ вины́ стяжа́л еси́, издале́ча сия́ облобыза́я.

Богоро́дичен: Красне́йший добро́тою Твой Плод, Всенепоро́чная, па́че всех яви́ся,/ заре́ю тварь украша́я добротвори́тельныя красоты́,/ Его́же приле́жно моля́щи спасти́ Тя непреста́нно велича́ющия.

Стихи́ры свята́го Ака́кия, глас 4.

Подо́бен: Я́ко до́бля:

На еди́наго зми́я я́рость взем/ и Христо́вою непребори́мою и непобеди́мою си́лою препоя́сався,/ Богому́дре Ака́кие,/ злых обрета́теля на зе́млю низве́ргл еси́,/ превознесе́нную низложи́в си́лу,/ и сея́ де́йствующий служи́тели посрами́л еси́.

Злых отчужде́нию,/ до́брых присвое́нию поучи́вся свы́ше,/ де́лом был еси́, и́мже пронаре́клся еси́ пе́рвее,/ Ака́кие прему́дре,/ а́ще и па́че про́зван е́же бе по́слежде:/ про́мысл бо вели́ких веще́й вину́/ неизрече́нно и неви́димо предлага́ет издале́ча.

Ве́лий во граде́х и всем ца́рствующий честны́й твой храм,/ я́ко вене́ц ца́рский и́мать/ и столпа́ предлага́ет стяжа́вшим тя,/ му́дра граждани́на, и храни́теля прия́тна,/ и до́бля ору́жника,/ внеза́пная враго́в и супоста́тов наи́тия отгоня́ща.

Богоро́дичен:

Ублажа́ю Тя, Пречи́стая,/ челове́ки исхити́вшую из глубины́ зол и неча́яния:/ песносло́влю Тя, Богоневе́сто, Присноблаже́нную,/ и сла́влю Твое́, Чи́стая, недоуме́нное рождество́,/ я́ко родила́ еси́ Спа́са ми́ра/ и кля́твы свободи́ла еси́, Де́во,/ пра́дедния челове́чество.

Крестобогоро́дичен:

На Кресте́ Тя я́ко узре́ пригвожде́на, Го́споди,/ А́гница и Ма́ти Твоя́ дивля́шеся/ и, что́ виде́ние сие́, – взыва́ше, – Сы́не вожделе́ние?/ Сия́ Ти неве́рный собо́р воздаде́ беззако́нный,/ и́же мно́гих Твои́х чуде́с наслади́выйся?/ Но сла́ва неизглаго́ланному соше́ствию Твоему́, Влады́ко.

НА У́ТРЕНИ

Канон праздника со ирмосом на 6 и Креста́ на 6, глас 4.

Песнь 1

Ирмо́с: Колесни́цы фарао́новы и си́лу его́/ вве́рже в мо́ре кре́пкий в бра́нех./ Воспое́м песнь но́вую, я́ко просла́вися.

Яви́л еси́ на земли́ зарю́ Креста́,/ и́мже, диа́вола низложи́в, челове́ческий род спасл еси́, Го́споди,/ те́мже поем славу Твою́.

Ра́зума непоко́рство Кресто́м Изба́витель разори́ вражду́ О́тчим благоволе́нием./ Пое́м Ему́ песнь но́ву, сла́вно бо просла́вися.

Я́ко во Еде́ме живо́тное дре́во всади́л еси́, Христе́,/ та́ко ски́петр победотво́рный,/ Крест Твой светови́дно, возсия́л еси́ на го́ру святу́ю.

Богоро́дичен: Ю́же проро́ческий прови́де лик,/ я́коже дверь Небе́сную и неопали́мую купину́,/ Тя, Де́во Ма́ти Чи́стая, Бо́га ро́ждшую, позна́хом.

Песнь 3

Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Я́ко щито́м, защища́еми непобеди́маго Креста́ зна́мением, Влады́ко,/ его́же не терпя́, ме́рзкий исчеза́ет с де́монским мно́жеством.

Вся Крест Твой возвесели́, распя́таго Тя Бо́га испове́дающия,/ и я́ко пресве́тлою и непристу́пною красото́ю осия́.

Богоро́дичен: Ра́дуйся, Ма́ти Неискусобра́чная,/ Бо́га Сло́ва во утро́бе Твое́й вмести́вшая,/ и ро́ждши воплоще́ннаго Бо́га ку́пно и Челове́ка.

Седа́лен, глас 4.

Подо́бен: Вознесы́йся:

Показа́вый Креста́ Боже́ственный о́браз на Небеси́,/ су́щия на земли́ наста́вити к Твоему́ позна́нию, Христе́ Бо́же,/ днесь просия́ невече́рняя све́тлость, и свет лица́ Твоего́ на нас зна́менася./ Того́ у́бо вси и́мамы, ве́рнии, ору́жие ми́ра, непобеди́мую побе́ду.

Сла́ва, и ны́не, пра́здника.

Песнь 4

Ирмо́с: Услы́шах слух Твой, Го́споди,/ я́ко яви́лся еси́ на земли́,/ и просла́вих Твою́ си́лу.

Та́йно у́бо пе́рвее, чу́вственно же днесь,/ просия́л есть, Христе́, Пречи́стаго Креста́ Твоего́ о́браз.

Беззако́нных богоуби́йц де́рзость, Кре́стным о́бразом просвети́в,/ изобличи́л еси́, Спа́се Ще́дре.

Утверди́л еси́ христиа́нскую ве́ру невеще́ственным Твои́м све́том,/ Крест нам, Христе́, начерта́в.

Богоро́дичен: Ма́ти Чи́стая, Благослове́нная Влады́чице,/ Его́же родила́ еси́, Бо́га моли́твами Твои́ми ми́лостива сотвори́ нам.

Песнь 5

Ирмо́с: Возсия́вый свет,/ и просвети́вый утро,/ и показа́вый день,/ сла́ва Тебе́, сла́ва Тебе́,/ Иису́се Сы́не Бо́жий.

Смертоно́сное дре́во во Еде́ме Ада́му, дре́вле преступи́вшему, смерть принесе́;/ Крест же Живоно́сный, ны́не я́влься, ми́ра просвети́ концы́.

Соста́вивый сло́вом первозда́нное сия́ние, я́ко Сы́ну Оте́ц,/ Крест ны́не светоза́рен напису́ет,/ Распе́ншемуся свиде́тельствуя Божество́.

Во све́те незаходи́ме превы́спренний свет,/ во Отце́ у́зрим ве́рою, Христе́, Тя, Сы́на, и Твой Дух,/ душа́м на́шим просия́н.

Богоро́дичен: Боле́зней ма́терних, Отрокови́це, не позна́ла еси́,/ преесте́ственно заче́нши Бо́га и ро́ждши пло́тию,/ те́мже Тя вси досто́йно сла́вим.

Песнь 6

Ирмо́с: Внегда́ скорбе́ти ми,/ возопи́х ко Го́споду,/ и услы́ша мя Бог спасе́ния моего́.

Да покры́ются у́бо о́чи беззако́нных,/ Кре́стныя добро́ты блиста́ющия не могу́ще зре́ти.

Да насладя́тся заре́ю Пречи́стаго Креста́/ Бо́га ве́дящии, на дре́ве распе́ншагося пло́тию.

Богоро́дичен: Я́же Бо́га ро́ждшая, Де́во Неискусобра́чная,/ о нас не преста́й Сы́на Твоего́ моля́щи.

Конда́к, глас 4.

Подо́бен: Вознесыйся:

Отве́рзый Небеса́ заключе́нная, на Небеси́ пресве́тлыя лучи́,/ на земли́ возсия́ Пречи́стый Крест:/ те́мже, сия́ние его́ де́йства прие́мше, к незаходи́мому наставля́емся Све́ту/ и во бране́х и́мамы его́ ору́жие ми́ра,/ непобеди́мую побе́ду.

И́кос:

Зна́мение се стра́шное вели́каго Бо́га ви́де вели́кий Константи́н/ и слы́шаше глаго́лющу в нем Иису́су,/ пе́рвее глаго́лавшу царю́ христиа́н ве́рных самодержа́вному:/ да́же у́бо до втора́го прише́ствия/ сий, твоему́ гра́ду достоя́ние сохраня́я, пребу́дет и да́же до сконча́ния,/ и градо́м всем первоседа́ние./ Стена́ же тому́ бу́дет Крест, ору́жие ми́ра, непобеди́мая побе́да.

Песнь 7

Ирмо́с: Спасы́й во огни́ авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше, препе́тый Го́споди,/ Бо́же оте́ц на́ших, благослове́н еси́.

Возне́сшееся на Крест Со́лнце в полу́дне,/ Его́же зря́щи чу́вственное со́лнце, лучи́ своя́ скры:/ препе́тый Го́споди, Бо́же оте́ц на́ших, благослове́н еси́.

Богови́дцу во огни́ дре́вле бесе́дова и мра́це,/ крестоявле́нным же блиста́нием я́ко Бог сла́вим днесь:/ препе́тый Го́споди, Бо́же оте́ц на́ших, благослове́н еси́.

От Све́та и во све́те Свет соприсносу́щный сия́я/ и пречи́стым Твои́м све́том Креста́ Твоего́ побе́ду показа́л еси́:/ препе́тый Го́споди, Бо́же оте́ц на́ших, благослове́н еси́.

Богоро́дичен: Несказа́нно во утро́бе и преесте́ственно прие́мшую Непреме́ннаго Бо́га,/ за милосе́рдие к челове́ком прише́дшаго,/ благоче́стно воспое́м я́ко Ма́терь Бо́га на́шего во ве́ки.

Песнь 8

Ирмо́с: Во о́бразе А́нгела,/ я́вльшагося в пещи́ о́гненней песносло́вцем,/ Христа́ Бо́га по́йте, о́троцы,/ свяще́нницы, благослови́те,/ лю́дие, превозноси́те во вся ве́ки.

На престо́ле сла́вы ви́дена бы́вша и на дре́ве Кре́стнем пригвожде́на существо́м пло́ти,/ по́йте, о́троцы, свяще́нницы, благослови́те,/ лю́дие, превозноси́те во вся ве́ки.

Све́том пречи́стым вообра́жшаго на кра́ниеве Крест, на горе́ святе́й,/ по́йте, о́троцы, свяще́нницы, благослови́те,/ лю́дие, превозноси́те во вся ве́ки.

Славосло́вяще Еди́наго от Тро́ицы, заре́ю Кре́стнаго вселе́нную просвеща́юща,/ по́йте, о́троцы, свяще́нницы, благослови́те,/ лю́дие, превозноси́те во вся ве́ки.

Богоро́дичен: Неизрече́нно и без се́мене заче́ншую/ и ро́ждшую Ра́дость вселе́нныя, Христа́ Бо́га,/ по́йте, о́троцы, свяще́нницы, благослови́те,/ лю́дие, превозноси́те во вся ве́ки.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́,/ тем, веселя́щеся, Тя, Богоро́дице, велича́ем.

Дре́вле во огни́ же и мра́це непокори́вым узако́нивый,/ ны́не же ве́рным Твои́м лю́дем Креста́ Твоего́ о́браз начерта́л еси́, па́че свети́л сия́ющ,/ его́же досто́йно велича́ем.

Пла́кася тьмо́ю тварь распе́нших Тя де́рзости,/ ны́не же благоле́пнейшим све́том Живоно́сный просия́ Крест Твой, Христе́,/ церко́вную показу́я сокрове́нную красоту́.

О Тебе́ упова́ние возвы́сивше, бога́тии лю́дие Твои́/ Тебе́ на мольбу́ Крест и стра́шную кровь Твою́ предлага́ют,/ но благопребы́тно пода́ждь нам, Сло́ве Бо́жий, избавле́ние.

Богоро́дичен: Просвети́ нас, ро́ждшая Свет непристу́пный, Де́во,/ и испо́лни нас весе́лия, и ра́дости, и Боже́ственнаго ра́зума,/ чи́стым се́рдцем Тя благоразу́мно велича́ющия.

Свети́лен.

Подо́бен: Ученико́м:

Крест – храни́тель всея́ вселе́нныя,/ Крест – красота́ Це́ркве,/ Крест – на́ша держа́ва,/ Крест – ве́рных утвержде́ние,/ Крест – А́нгелов сла́ва и де́монов я́зва.

Сла́ва, и ны́не, пра́здника.

НА ЛИТУРГИ́И

Проки́мен, глас 7: Возноси́те Го́спода Бо́га на́шего/ и поклоня́йтеся подно́жию но́гу Его́, я́ко свя́то есть.Стих: Госпо́дь воцари́ся, да гне́ваются лю́дие.Апо́стол к Кори́нфяном, зачало 125. Аллилу́ия,глас 1: Помяни́ сонм Твой:Стих: Бог же Царь наш:Ева́нгелие от Иоа́нна, зача́ло 60. Прича́стен: Зна́менася на нас свет лица́ Твоего́, Го́споди.

НА МА́ЛОЙ ВЕЧЕ́РНИ

На Го́споди, воззва́х:стихи́ры на 4, глас 4,

Подо́бен: Дал еси́ зна́мение:

Ве́село днесь соше́дшеся/ в па́мяти твое́й, Ни́ле Богому́дре, о́тче наш,/ воспе́ти потщи́мся твоя́ по́двиги,/ поще́ния и бде́ния/ и поуче́ние писа́ний,/ и́миже напои́л еси́ твою́ ду́шу, блаже́нне,/ и израсти́л еси́ доброде́телей многопло́дныя кла́сы.

Твои́х исправле́ний высоту́/ и глубину́ смире́ния безме́рную/ кто сказа́ти дово́лен,/ преподо́бне о́тче Ни́ле приснопа́мятне?/ Просия́л бо еси́, я́ко свети́ло, в Русстей земли́,/ осиява́я мона́шествующих собо́ры/ доброде́телей твои́х све́тлостию.

Безмо́лвия вои́стинну был еси́ люби́тель,/ о́тче приснопа́мятне,/ и пусты́ни граждани́н преизря́ден,/ и, я́ко дре́во, насажде́нное при вода́х,/ е́же плод дае́т во вре́мя свое́,/ то́чиши бо исцеле́ния с ве́рою призыва́ющим и́мя твое́/ и чту́щим от любве́ всесвяще́нныя твоя́ по́двиги.

Я́ко скрижа́ли Богопи́санныя,/ оста́вил еси́ ча́дом твои́м, о́тче,/ твои́х слове́с списа́ния,/ я́же на горе́ Богомы́слия/ в се́рдце твое́м пе́рстом Бо́жиим написа́шася,/ те́мже тя почита́ем/ и свято́е твое́ соверша́ем торжество́,/ сла́вяще тя просла́вльшаго/ Иису́са Человеколю́бца/ и Спа́са душ на́ших.

Сла́ва, глас 6:

Преподо́бне о́тче наш Ни́ле,/ вои́стинну сна твои́м очесе́м не дал еси́,/ ниже́ пло́ти твое́й упокое́ния,/ до́ндеже угото́вал еси́ в себе́ ме́сто Го́сподеви/ и селе́ние Бо́гу Иа́ковлю,/ тем и во дворы́ Его́, ра́дуяся, вшел еси́,/ иде́же всех веселя́щихся жили́ще,/ но, о́тче приснопа́мятне, о нас моля́ся не преста́й,/ твою́ па́мять всесвяще́ннейшую/ ве́рою и любо́вию благоче́стно соверша́ющих.

И ны́не, пра́здника или́ Богоро́дичен:

Влады́чице Блага́я,/ христиа́н всех славосло́вие немо́лчное,/ приими́, Богороди́тельнице, хвале́ния раб Твои́х,/ любо́вию Тя велича́ющих.

На стихо́вне стихи́ры глас 2.

Подо́бен: До́ме Евфра́фов:

Ни́ле Богому́дре,/ твоя́ рабы́ приими́/ торжеству́ющия/ любо́вию, о́тче,/ всесвяще́нную па́мять твою́.

Стих: Честна́ пред Го́сподем/ смерть преподо́бных Его́.

Ве́рно ны́не соше́дшеся/ в па́мяти твое́й, о́тче,/ ублажа́ем тя/ любо́вию,/ велича́юще тебе́ Просла́вльшаго.

Стих: Пра́ведник, я́ко фи́никс, процвете́т/ и, я́ко кедр, и́же в Лива́не, умно́жится.

Приими́ ны́не пе́ние/ твои́х чад, преподо́бне,/ ра́достно торжеству́ющих/ в честне́й твое́й па́мяти,/ Ни́ле Богому́дре, о́тче наш.

Сла́ва, и ны́не, глас и подо́бен то́йже:

Приими́, Влады́чице,/ моле́ние Твои́х раб/ и Сы́на Твоего́ умоли́,/ с Ни́лом Богому́дрым,/ пода́ти нам грехо́в проще́ние.

Тропа́рь пи́сан на вели́цей вече́рни. Сла́ва, и ны́не, пра́здника или Богоро́дичен.

НА ВЕЛИ́ЦЕЙ ВЕЧЕ́РНИ

Блаже́н муж:1-й антифо́н. На Го́споди, воззва́х:стихи́ры на 8, глас 6.

Подо́бен: Все отло́жше:

Все отложи́в мирско́е пристра́стие, преподо́бне,/ и крест твой на ра́мо взем,/ чи́стым и немяте́жным умо́м Христу́ после́довал еси́:/ в пусты́ни, я́ко в раи́, живы́й,/ Тому́ угоди́л еси́,/ я́ко безпло́тен, на земли́ жи́тельствуя,/ посто́м, и моли́твою, и всено́щными стоя́нии/ стра́сти умертви́л еси́,/ молча́нием же и богомы́слием Бо́гу соедини́лся еси́,/ Его́же моли́ о душа́х на́ших.

Ти́хое и безмяте́жное житие́ пожи́в,/ в ме́сте безмо́лвием уединя́яся,/ непреста́нною моли́твою Бо́гу бесе́довал еси́/ и поуче́нием Боже́ственных писа́ний,/ я́ко дожде́м благода́ти,/ ни́ву твоего́ се́рдца бога́тно напои́л еси́, Богому́дре,/ тем и Свята́го Ду́ха вмести́лище показа́лся еси́/ и плод стори́чествующ прине́сл еси́,/ преподо́бне о́тче наш Ни́ле приснопа́мятне,/ моли́ся у́бо вы́ну ко Го́споду о душа́х на́ших.

Неукло́нно ше́ствуя, преподо́бне,/ путе́м Христо́вых за́поведей,/ оте́ческих Богому́дрых преда́ний/ опа́сный храни́тель был еси́,/ Ни́ле Богому́дре, о́тче наш приснопа́мятне,/ к сим и законополо́жник и основа́тель в Русстей земли́/ ски́тскаго жи́тельства показа́лся еси́,/ и, я́ко скрижа́ли заве́та,/ твоя́ богому́драя словеса́ и преда́ния/ твоему́ житию́ после́довати жела́ющим/ оста́вил еси́, о́тче./ Тем мо́лим тя, преподо́бне,/ Христу́ приле́жно моли́ся о душа́х на́ших.

Любо́вию ко Христу́ уя́звлен быв, преподо́бне,/ Того́ стра́сти спаси́тельныя/ непреста́нно во уме́ обноси́л еси́/ и сих подража́тель изря́ден показа́лся еси́,/ по́стными по́двиги плоть распина́я со страстьми́ и похотьми́,/ о́строю же власяни́цею и ины́м жестокожи́тием/ плоти неудобопокорли́вое души́ разу́мному покори́л еси́./ Тем мо́лим тя, Боголюбе́зне о́тче наш Ни́ле приснопа́мятне,/ Христу́ приле́жно моли́ся о душа́х на́ших.

Сла́ва, глас 8:

Ски́тскаго жи́тельства наста́вника тя почита́ем,/ о́тче наш Ни́ле,/ твое́ю бо стезе́ю вои́стинну пра́во ходи́ти в безмо́лвии пусты́ни позна́хом:/ пра́вый бо путь сего́ жи́тельства словесы́ и де́лы показу́я,/ я́ко о́браз одушевле́н, самаго́ себе́ нам предста́вил еси́./ И блаже́н еси́ и́стинно, я́ко, сотвори́в, научи́л еси́,/ тем и ве́лий в Ца́рствии Небе́снем, по глаго́лу Госпо́дню, наре́клся еси́./ Тому́ бо трудолю́бно порабо́тав/ и вра́жию всю си́лу, ко́зни и лови́тельства, я́ко паучи́ну, разтерза́в,/ победоно́сец во всех показа́лся еси́/ и ко Христу́ венцено́сец восте́кл еси́, ра́дуяся./ Его́же моли́, преподо́бне,/ о всех, ве́рою соверша́ющих твою́ па́мять всесвяще́ннейшую,/ е́же дарова́тися нам грехо́в проще́нию/ и ве́лией ми́лости.

И ны́не, пра́здника или́ Богоро́дичен: Царь Небе́сный:

Вход. Проки́мен дне и чте́ния.

Проро́чества Иса́иина чтение(глава́ 35):

Ра́дуйся, пусты́ня жа́ждущая,/ да весели́тся пусты́ня и да цвете́т я́ко крин./ И процвете́т, и возвесели́тся пусты́ня Иорда́нова,/ и сла́ва Лива́нова даде́ся ей, и честь Карми́лова,/ и у́зрят лю́дие Мои́ сла́ву Госпо́дню и высоту́ Бо́жию./ Укрепи́теся, ру́це осла́бленныя и коле́на рассла́бленная,/ уте́шитеся, малоду́шнии умо́м, укрепи́теся, не бо́йтеся:/ се Бог наш суд возда́ет и воздаст,/ Той прии́дет и спасе́т нас/ Тогда́ отве́рзутся о́чи слепы́х и у́ши глухи́х услы́шат./ Тогда́ ско́чит хромы́й я́ко еле́нь/ и я́сен бу́дет язы́к гугни́вых,/ я́ко прото́ржеся вода́ в пусты́ни и дебрь в земли́ жа́ждущей;/ и безво́дная бу́дет во езе́ра/ и на жа́ждущей земли́ исто́чник водны́й бу́дет,/ та́мо бу́дет весе́лие пти́цам и сели́тва тро́сти и лу́зи./ И та́мо бу́дет путь чист и путь свят нарече́тся,/ и не пре́йдет та́мо нечи́стый,/ ниже́ бу́дет та́мо путь нечи́ст;/ разсе́яннии же по́йдут по нему́ и не заблу́дят./ И не бу́дет та́мо льва,/ ни от звере́й злых не взы́дет нань,/ ниже́ обря́щется та́мо,/ но по́йдут по нему́ изба́вленнии,/ и со́бранный Го́сподем обратя́тся и прии́дут в Сио́н с ра́достию,/ и ра́дость ве́чная над главо́ю их,/ над главо́ю бо их хвала́ и весе́лие,/ и ра́дость прии́мет я,/ отбеже́ боле́знь, печа́ль и воздыха́ние.

При́тчей чте́ние(главы 10, 3 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да,/ честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим,/ я́ко аз, прему́дрость, устро́их сове́т/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущий же мене́ обря́щут благода́ть./ Разуме́йте у́бо, незло́бивии, кова́рство,/ ненака́занный же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

При́тчей чте́ние(главы́ 10 и 11):

Уста́ пра́веднаго ка́плют прему́дрость,/ язы́к же непра́веднаго поги́бнет./ Устне́ муже́й пра́ведных ка́плют благода́ти,/ уста́ же нечести́вых развраща́ются./ Ме́рила льсти́вая – ме́рзость пред Го́сподем,/ вес же пра́ведный прия́тен Ему́./ Иде́же а́ще вни́дет досажде́ние, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их,/ и поползнове́ние отрица́ющихся упасе́т их./ Не по́льзуют име́ния в день я́рости,/ пра́вда же изба́вит от сме́рти./ У́мер пра́ведный, оста́ви раска́яние,/ нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́,/ в нече́стие же па́дает непра́вда./ Пра́вда муже́й пра́вых изба́вит их,/ безсове́тием же пленя́ются беззако́нный./ Сконча́вшуся му́жу пра́ведну, не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет,/ в него́же ме́сто предае́тся нечести́вый./ Во усте́х нечести́вых сеть гра́жданом,/ чу́вство же пра́ведных благоспе́шное./ Во благи́х пра́ведных испра́вится град,/ и в поги́бели нечести́вых ра́дование./ Во благослове́нии пра́вых возвы́сится град,/ усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.

На лити́и стихи́ра хра́ма и свята́го стихи́ры самогла́сны, глас 1:

Во благознамени́тый день пра́здника на́шего/ воструби́м духо́вною трубо́ю,/ духо́вно ра́дующеся и све́тло торжеству́юще,/ всесвяту́ю и всечестну́ю па́мять отца́ на́шего/ и любе́зно воззове́м ему, глаго́люще:/ ра́дуйся, па́стырю и учи́телю наш/ и свети́ло мона́шествующих пресветле́йшее,/ о́тче наш Ни́ле приснопа́мятне./ Христу́, Ему́же усе́рдно порабо́тал еси́, о́тче,/ о нас приле́жно моли́ся,/ ве́рою и любо́вию чту́щих тя.

Глас 4: Свяще́нными днесь пе́сньми/ свяще́ннейшую па́мять отца́ на́шего,/ я́ко цве́ты, увенча́ем,/ похва́льныя венцы́ плету́ще,/ и любо́вию прославля́юще того́ свяще́ннейший по́двиги,/ и в весе́лии вопию́ще ему́:/ ра́дуйся, цве́те мона́шествующих красне́йший,/ во удо́лиих пусты́нных прозя́бший/ и до́брых де́телей совокупле́ньми страну́ Белоезе́рскую украси́вый./ Ра́дуйся, дре́во благопло́дное,/ при исхо́дищах вод псало́мски насажде́нное/ и плода́ми исправле́ний и богому́дрых писа́ний твои́х/ мно́жества и́ночествующих пита́ющее,/ Ра́дуйся, по́стнических мир алава́стр многоце́нный,/ Христо́ву Це́рковь облагоуха́вший./ Но, о преблаже́нне и приснопа́мятне Ни́ле, о́тче наш,/ не преста́й о нас моля́ся ко Го́споду,/ да изба́вит нас от вся́каго вре́да/ и спасе́т ду́ши на́ша.

Прииди́те, празднолю́бных собо́ры,/ прииди́те, возвесели́теся с на́ми,/ и, лик соста́вльше, торжеству́им:/ се бо наста́ всепра́зднственная и светоно́сная па́мять Богоно́снаго отца́/ и све́тлаго ми́ру свети́льника,/ нам же превожделе́ннейшаго па́стыря и учи́теля,/ и ко спасе́нию наста́вника, и о всех те́плаго предста́теля,/ мо́литбося вы́ну ко Го́споду/ дарова́тися всем ве́лией ми́лости.

Сла́ва, глас 6:

Е́же по о́бразу Христо́ву соблю́л еси́ невре́дно,/ ум влады́ку на стра́сти па́губныя по́стнически поста́вив,/ и на высоту́ доброде́телей,/ я́же по подо́бию Спа́сову,/ я́ко мо́щно, возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Тем и мона́шествующим наста́вник яви́лся еси́,/ жи́тель пусты́нный,/ вои́стинну благотеку́щих обучи́тель/ и доброде́телей изве́стнейшее пра́вило,/ и ны́не на Небесе́х зерца́лом разре́шшимся,/ о́тче наш Ни́ле приснопа́мятне,/ чи́сте зри́ши Святу́ю Тро́ицу,/ моля́ся при́сно о всех, ве́рою и любо́вию чту́щих тя.

И ны́не, пра́здника или́ Богоро́дичен: Богоро́дице, Ты еси́ лоза́ и́стинная:

На стихо́вне стихи́ры глас 6.

Подо́бен: А́нгельския:

А́нгельския преми́рныя си́лы/ твоему́ житию́ удиви́шася, преподо́бне,/ во пло́ти бо сый, безпло́тныя враги́ победи́л еси́/ и, посто́м и моли́твами воскриля́емь,/ вне ми́ра и пло́ти богомы́сленно лета́я,/ кра́я жела́ний дости́гл еси́,/ ра́достно Христу́ взыва́я:/ благослове́н, прише́дый спасти́ нас,/ Спа́се наш, сла́ва Тебе́.

Стих: Се удали́хся, бе́гая,/ и водвори́хся в пусты́ни.

Бе́гая ми́ра,/ удали́лся еси́ в пусты́ню псало́мски,/ и, та́мо водвори́вся,/ Бо́га, спаса́ющаго тя, обре́л еси́, преподо́бне,/ и, обре́т, в себе́ удержа́л еси́:/ прише́д бо, Христо́с со Отце́м и Ду́хом Святы́м/ оби́тель в тебе́ сотвори́./ Те́мже и мы, па́мять твою́ торжеству́юще,/ ра́достно взыва́ем:/ благослове́н еси́, И́же во святы́х прославля́емый,/ Спа́се наш, сла́ва Тебе́.

Стих: Аз к Бо́гу воззва́х,/ и Госпо́дь услы́ша мя.

Непреста́нно моли́твою и ума́ тре́звостию/ Бо́гу взыва́л еси́, преподо́бне,/ и Той услы́ша тя вои́стинну;/ тем и, я́ко безпло́тен, на земли́ пожи́в,/ воздержа́нием стра́сти умертви́л еси́/ и глубо́ким смиренному́дрием твои́м смири́л еси́,/ я́ко я́звлена, го́рдаго диа́вола,/ победи́тельно Христу́ взыва́я:/ благослове́н, снизше́дый и спасы́й нас,/ Спа́се наш, сла́ва Тебе́.

Сла́ва, глас 6. Самогла́сен:

Ра́достно днесь сте́кшеся, бра́тие,/ и духо́вный лик соста́вльше,/ торжеству́им све́тло,/ и Боже́ственными пе́сньми ле́тнюю па́мять почти́м Богоно́снаго отца́,/ па́стыря и учи́теля на́шего,/ я́ко цве́ты, увенча́ем похвала́ми того́ свяще́нную главу́/ и, всечестну́ю его́ ра́ку окружи́вше,/ возопие́м, глаго́люще:/ ра́дуйся, Ни́ле благоглаго́ливый,/ веселя́щий слове́с твои́х тече́ньми собо́ры и́ночествующих./ Ра́дуйся, свети́льниче мона́шествующих светоза́рный./ Ра́дуйся, по́стническая красото́ и утвержде́ние./ Прииди́ и ны́не к нам неви́димо/ и благослови́ ча́да твоя́,/ сподобля́я ны твои́х невеще́ственных даро́в,/ и́хже бога́тно отХриста́ прия́л еси́,/ ве́рно от любве́ тебе́ чту́щия/ и прера́достно соверша́ющия твой всечестны́й и светоно́сный пра́здник;/ изба́ви нас от страсте́й мучи́тельства/ и вся́ких скорбе́й и обстоя́ний/ и оби́тель твою́ соблюди́ невреди́му/ и всем вся поле́зная да́руй/ ко Го́споду твои́ми моли́твами.

И ны́не, пра́здника или́ Богоро́дичен: Творе́ц и Изба́витель:

На благослове́нии хле́бов тропа́рь свята́го, два́жды и Богоро́дице Де́во:еди́ножды.

Тропа́рь, глас 4:

Удали́вся, бе́гая, дави́дски, ми́ра,/ и вся, я́же в нем, я́ко уме́ты, вмени́в,/ и, в ме́сте безмо́лвне всели́вся,/ духо́вныя ра́дости испо́лнился еси́, о́тче наш Ни́ле,/ и, еди́ному Бо́гу изво́лив служи́ти,/ процве́л еси́, я́ко фи́никс,/ и, я́ко лоза́ благопло́дна,/ умно́жил еси́ ча́да пусты́ни./ Тем благода́рственно вопие́м:/ сла́ва Укре́пльшему тя в по́двиге пустынножи́тельства;/ сла́ва Избра́вшему тя в Руси́/ отше́льником уставополо́жника изря́дна;/ сла́ва моли́твами твои́ми и нас Спаса́ющему.

Ин тропа́рь, глас 1:

Мирска́го жития́ отве́ргся/ и мяте́жа жите́йскаго бе́гая,/ преподо́бне и Богоно́сне о́тче наш Ни́ле,/ не облени́лся еси́ собра́ти цве́ты ра́йския от писа́ний оте́ческих/ и, в пусты́ню всели́вся,/ процве́л еси́, я́ко крин се́льный,/ отоню́ду же преше́л еси́ и в Небе́сныя оби́тели;/ научи́ и нас, че́стно почита́ющих тя,/ твои́м ца́рским путе́м ше́ствовати/ и моли́ся о душа́х на́ших.

НА У́ТРЕНИ

На Бог Госпо́дь:тропа́рь свята́го, два́жды. Сла́ва, и ны́не,пра́здника или́ Богоро́дичен.

По 1-м стихосло́вии седа́лен, глас 1:

Усе́рдно днесь сте́кшеся, бра́тие,/ духо́вный лик соста́вим в честне́й па́мяти отца́ на́шего,/ пе́сни и благохвале́ния тому́ плету́ще,/ благогове́йно почти́м духо́вныя его́ по́двиги, побе́ды и боре́ния,/ и́миже победи́ многоко́зненнаго врага́/ и я́ко победоно́сец венча́ся све́тло от Христа́ Бо́га и Спа́са душ на́ших.

Сла́ва, и ны́не, пра́здника или́ Богоро́дичен, глас то́йже:

Хвалу́ принесе́м, ве́рнии, Ма́тери Бо́га на́шего/ и, ра́бски любо́вию взе́мшеся,/ воззове́м согла́сно, а́нгельски вопию́ще к Ней:/ ра́дуйся, Благода́тная Де́во, ро́ждшая Спасе́ние душ на́ших.

По 2-м стихосло́вии седа́лен, глас 3:

Све́тлое торжество́ соверша́юще днесь, бра́тие,/ воспои́м Христа́ Изба́вителя на́шего,/ хвалу́ Тому́ принося́ще и взыва́юще:/ возвели́чил еси́, Христе́, Твоего́ уго́дника,/ показа́в нам того́ чуде́с исто́чник,/ источа́ет бо от свята́го своего́ гро́ба исцеле́ний струи́/ ве́рно притека́ющим и любо́вию чту́щим того́/ и Тебе́, Спа́се, сла́вящим,/ сла́вящия Тя прославля́ющаго.

Сла́ва, и ны́не, пра́здника или́ Богоро́дичен, глас то́йже:

Хода́тайства приими́ преподо́бнаго отца́ на́шего Ни́ла/ и моли́тву сотвори́, Чи́стая, за нас к Бо́гу.

По полиеле́и седа́лен, глас 4.

Подо́бен: Удиви́ся Ио́сиф:

Удиви́л еси́, Влады́ко Христе́,/ показа́в нам во отце́ на́шем такова́го свети́льника:/ той бо, я́ко со́лнце, лучи́ чуде́с испуща́я,/ осиява́ет ве́рных собра́ния и просвеща́ет собо́ры мона́шествующих све́тлостию жи́тельства./ Тем тому́ любе́зно воззове́м:/ Богоно́се и всеблаже́нне о́тче наш Ни́ле,/ моли́ Христа́ Бо́га грехо́в оставле́ние дарова́ти/ пра́зднующим любо́вию всечестну́ю па́мять твою́.

Сла́ва, и ны́не, пра́здника или́ Богоро́дичен, глас то́йже:

Удиви́шася, Чи́стая, вси А́нгелов чи́ни и челове́ческая мно́жества/ та́инству Твоего́ рожде́ния стра́нному:/ ка́ко бо Неискусому́жная Млекопита́тельница еси́/ и держи́ши на руку́ Твое́ю Пита́ющего всю тварь и Содержа́щаго./ Те́мже вопие́м Ти:/ Богоро́дице Присноде́во, моли́ Сы́на Твоего́ грехо́в оставле́ние дарова́ти/ ве́рою покланя́ющимся пресвято́му рождеству́ Твоему́.

Степе́нна, 1-й антифо́н 4-го гла́са. Проки́мен и Ева́нгелие о́бщия преподо́бным.

По 50-м псалме́ стихи́ра, пи́сана на стихо́вне Сла́вник.

Кано́ны пра́здника или́ Пресвяты́я Богоро́дицы, глас 8: Во́ду проше́д:со ирмосо́м на 6, и свята́го на 8, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Грехо́вною тьмо́ю покрыва́емь,/ не могу́ я́сно зре́ти к высоте́ исправле́ний твои́х, о́тче,/ но ты, я́ко сострада́телен и ми́лостив,/ помози́ ми, возсиява́я спаси́тельный в души́ мое́й свет,/ да пою́, ра́дуяся, све́тлая твоя́ исправле́ния и пресла́вная чудеса́.

Мы́сленный рай показа́лся еси́, о́тче,/ произраща́я разли́чных доброде́телей цве́ты,/ плоды́ кра́сны своему́ Влады́це прине́сл еси́,/ украси́вшему тя чудесы́.

Еди́ну преступи́в за́поведь, первозда́нный из ра́я изгна́н бысть;/ ты же, преподо́бне, за́поведей Влады́чних соблюде́нием насле́дник сего́ показа́лся еси́,/ дре́ва живо́тнаго наслажда́яся при́сно/ и, в весе́лии чи́стаго се́рдца твоего́ зря Го́спода,/ Боже́ственнаго све́та Его́ причаща́ешися.

Неукло́нно ше́ствуя по стопа́м за́поведей,/ жезл си́лы, Крест Христо́в в рука́х держа́,/ в приста́нище безстра́стия дости́гл еси́, о́тче,/ тем и благода́ть прия́л еси́ цели́ти неду́ги челове́ков/ и пресла́вная твори́ти чудеса́.

Богоро́дичен: Ны́не вре́мя по́мощи Твоея́, Влады́чице,/ при́зри ми́лостивно на озлобле́ние Твоего́ раба́, Чи́стая,/ подаю́щи утеше́ние мне,/ я́ко да и аз воспою́, ра́дуяся, Боже́ственная Твоя́ чудеса́.

Катава́сия по уста́ву.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Не гордя́ся, дерзну́х песнь приноси́ти твое́й свяще́нной па́мяти, о́тче,/ но любо́вию твое́ю дви́жим, Боголюбе́зне,/ приими́ у́бо сию́ от твоего́ раба́/ и ко Го́споду хода́тайствы твои́ми спасе́ния сподо́би мя.

Любо́вию тя чту́щия, о́тче, спаса́й от бед и обстоя́ний,/ в честне́й твое́й па́мяти лик себе́ совоку́пльшия,/ и коле́блемыя ны страсте́й бу́рею утверди́ твои́ми мольба́ми/ и во приста́нище спасе́ния дости́гнути сподо́би.

Кто изрече́т твоя́ по́двиги, о́тче,/ и смире́ния твоего́ высоту́ кто ска́жет?/ Вои́стинну Христо́в учени́к был еси́, о Боголюбе́зне,/ и снасле́дник Того́ Ца́рствия./ Помина́й у́бо чад твои́х, о́тче, моля́ся Христу́,/ да и нас ча́сти спаса́емых сподо́бит.

Неключи́м аз есмь и вся́чески непотре́бен/ и недоуме́ю по достоя́нию воспе́ти твоя́, я́же к Бо́гу, исправле́ния,/ но, о́тче благосе́рде, любо́вь и ве́ру приими́/ и твои́ми свяще́нными хода́тайствы спасе́ния мя сподо́би.

Богоро́дичен: Недоуме́ет вои́стинну всяк язык челове́ческий/ досто́йно славосло́вити Тя, о Влады́чице, по достоя́нию;/ аз же, неве́жествием и грехи́ мно́гими одержи́м,/ что и́мам принести́ Тебе́, Блага́я?/ оба́че любо́вь и ве́ру Твоего́ раба́ приими́/ и спасе́ния сподо́би мя.

Ин конда́к, глас 3:

Терпя́, потерпе́л еси́ су́етныя обы́чаи/ и мирски́я нра́вы бра́тии твои́х,/ обре́л еси́ пусты́нное безмо́лвие, преподо́бне о́тче,/ иде́же посто́м, бде́нием и непреста́нною моли́твою в труде́х подвиза́вся,/ уче́ньми твои́ми пра́выя стези́ указа́л еси́ нам/ ше́ствовати ко Го́споду./ Те́мже и почита́ем тя, всеблаже́нне Ни́ле.

Седа́лен, глас 8:

От дея́ния на высоту́ Боже́ственнаго восте́кл еси́, о́тче, виде́ния/ и, молча́ние коне́чное облобыза́в,/ безмяте́жным умо́м Бо́гу при́сно бесе́довал еси́,/ сего́ ра́ди разуме́нии Боже́ственными отту́ду обогати́лся еси́, блаже́нне,/ и был еси́ па́стырь и наста́вник после́дующим равноа́нгельному житию́ твоему́./ Тем, Богоно́се о́тче наш Ни́ле,/ моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, пра́здника или́ Богоро́дичен:

В пучи́ну лю́те впав уны́ния/ от мно́жества грехопаде́ний мои́х, Чи́стая,/ приидо́х в недоуме́ние и отча́янием ны́не одержу́ся./ Влады́чице Богоро́дице, Ты мя спаси́, Ты ми помози́,/ гре́шным бо Ты еси́ очище́ние,/ я́ко да и аз, со все́ми, получи́вшими Тобо́ю спасе́ние,/ веселя́ся, воспою́ непости́жное та́инство рождества́ Твоего́ и безме́рную Твою́ ми́лость.

Песнь 4

Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Низве́ргл еси́ вся вра́жия, о́тче, ополче́ния,/ стоя́ бо́дренно на стра́жи внима́ния/ и издале́ча предзря́ сих кова́рныя се́ти,/ моли́твою же и посто́м безбе́дно прелета́я, победи́тельно пел еси́:/ сла́ва, Христе́, си́ле Твое́й.

Всегда́ во уме́ име́я страда́ния Спа́са на́шего и во́льное на Кресте́ распя́тие,/ сраспя́лся еси́ Тому́ умерщвле́нием пло́ти, преподо́бне,/ и, Того́ Боже́ственною любо́вию уязви́в твое́ се́рдце, Боголюбе́зне,/ показа́лся еси́ умиле́ния исто́чник, слезоточа́ при́сно и поя́:/ сла́ва, Христе́, благоутро́бному снизхожде́нию Твоему́.

Христо́вою уя́звлен любо́вию,/ сле́зныя то́ки непреста́нно из оче́с излива́л еси́, Ни́ле, о́тче наш приснопа́мятне,/ и в пусты́ни, я́ко в раи́, водворя́йся,/ непреста́нныя приноси́л еси́ моли́твы, поя́ при́сно:/ сла́ва, Христе́, си́ле Твое́й.

Увы́, коли́ким нечу́вствием содержи́м есмь, окая́нный аз:/ ни сме́рти бою́ся, ни стра́шнаго суди́ща трепе́щу,/ вся́кому злу пови́нен сый./ Но, о душе́ всестра́стная,/ поне́ отны́не воспряни́ в покая́нии, Христу́ зову́щи:/ Твоего́ ра́ди уго́дника Ни́ла, пощади́ мя, Спа́се,/ и испра́ви стопы́ моя́, Влады́ко, всемогу́щею си́лою Твое́ю.

Богоро́дичен: Богоро́дице Де́во, христиа́н всех всенаде́жное упова́ние,/ спаси́ мя, отча́яннаго, о Ма́ти Милосе́рдая,/ оживи́ душе́ю уме́ршаго, Жизнь всех ро́ждшая;/ Живоно́сный Исто́чниче, напо́й мя умиле́ния вода́ми,/ зно́ем страсте́й лю́те опаля́емаго,/ да, покая́ния слеза́ми прохлажда́емь, благода́рно воззову́:/ сла́ва, Владыччице, всемо́щней си́ле Твое́й.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая./

Отце́в дре́вних Святы́я Горы́ житию́ подража́я,/ Богоно́се о́тче наш, Ни́ле приснопа́мятне,/ во оти́шие пусты́ннаго безмо́лвия поте́кл еси́, ра́дуйся,/ и, та́мо во смире́нии плоды́ принося́ ду́ха,/ по премно́гу благоугоди́л еси́ сла́вою чуде́с тя Обогати́вшему.

Госпо́дни за́поведи исполня́я,/ кро́ток и незло́бив, о́тче, был еси́,/ смире́н и прост, и во всех доброде́телех благоиску́сен,/ тем и Свята́го Ду́ха орга́н яви́лся еси́, прему́дре,/ науча́я и вразумля́я ча́да твоя́ досто́йно ходи́ти во след Христу́,/ во смире́нии Тому́ служа́щим, спасе́ние подаю́щаго.

Ны́не, преподо́бне, прие́мля на Небесе́х по́чести трудо́в твои́х,/ не забу́ди нас, твой пра́здник ра́достно пра́зднующих,/ но испроси́ грехо́в разреше́ние, моля́щи Христа́,/ просла́вльших Его́ сла́вящим, спасе́ние подаю́щаго.

Обле́клся еси́ во Христа́, Богому́дре, безстра́стия оде́ждою украси́вся,/ сострада́телен и ми́лостив, о́тче, был еси́ согреша́ющим,/ смиренному́дро поуча́я и возбужда́я к покая́нию и ко Христу́ приводя́,/ всем, во смире́нии прося́щим, спасе́ние подаю́щему.

Богоро́дичен: Оде́ждою студа́ облеко́хся окая́нный аз,/ совлече́н боготка́нныя, ю́же во Креще́нии прия́х, оде́жды, о Де́во Всенепоро́чная!/ Но молю́ Тя, Всеми́лостивая,/ во оде́жду мя спасе́ния па́ки облеки́,/ да досто́ин бу́ду бра́ка А́гнча,/ Ему́же от чи́стых крове́й Твои́х багряни́цу пло́ти истка́ла еси́,/ всем, воспева́ющим Тя, спасе́ние подаю́щему.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

С ли́ки святы́х в Небе́сных ны́не водворя́яся селе́ниих, о Ни́ле Богоно́се,/ и со дерзнове́нием предстоя́ Пресвяте́й Тро́ице,/ нас, твои́х чад, не забу́ди, о́тче,/ но испроси́ грехо́в разреше́ние твой пра́здник ра́достно пра́зднующим,/ да благода́рно тя просла́вльшаго Бо́га сла́вим.

Но́вый благоте́чный в Русстей земли́ исто́чник яви́лся еси́, Богоно́се,/ струи́ исцеле́ний излива́я от свята́го твоего́ гро́ба/ ве́рою несумне́нною притека́ющим к тебе́, Ни́ле, о́тче наш,/ мы же, весе́лия исполня́еми, тя прославля́ющего Бо́га сла́вим.

Усе́рдно от ю́ности твоея́ да́же до честна́го преставле́ния/ со́вестию чи́стою Христу́ послужи́л еси́, преподо́бне,/ Того́ храня́ Боже́ственныя за́поведи,/ нестяжа́нием бо и нището́ю себе́ огради́в,/ на ка́мени терпе́ния твоя́ стопы́, му́дре, утверди́л еси́, Ни́ле, о́тче наш.

Мно́гая твоя́, о, о́тче, исправле́ния и я́же в Бо́зе труды́ и по́двиги твоя́,/ поще́ние и бде́ние, до́лу лега́ния и злострада́ния,/ нищету́ и соверше́нное нестяжа́ние кто изрещи́ возмо́жет?/ Вои́стинну бо и́стинен мона́х показа́лся еси́, Боголюбе́зне,/ тем и мы, любе́зно твою́ па́мять чту́ще, тя укре́пльшаго Бо́га сла́вим.

Богоро́дичен: Утро́ба Твоя́, о Де́во Пренепоро́чная, простра́ннейшая небе́с показа́ся,/ вмести́вшая Невмести́маго Бо́га./ О, пресла́вных веще́й!/ О, непостижи́маго А́нгелом и челове́ком, на Тебе́ соверши́вшагося та́инства!/ Тем Тя, Богоро́дицу, вои́стинну испове́дающе,/ от Тебе́ ро́ждшагося Бо́га сла́вим.

Конда́к, глас 8.

Подо́бен: Взбра́нной Воево́де:

Любве́ ра́ди Христо́вы удали́вся мирски́х смуще́ний,/ ра́достною душе́ю всели́лся еси́ в пусты́ни,/ в не́йже подвиза́вся до́бре,/ я́ко А́нгел на земли́, о́тче Ни́ле, пожи́л еси́:/ бде́нием бо и посто́м те́ло свое́ изнури́л еси́ ве́чныя ра́ди жи́зни./ Ея́же ны́не сподо́бився,/ во све́те неизрече́нныя ра́дости Пресвяте́й Тро́ице со святы́ми предстоя́,/ моли́, мо́лимтися, припа́дающе, ча́да твоя́,/ сохрани́тся нам от вся́каго наве́та и злых обстоя́ний/ ви́димых и неви́димых враг/ и спасти́ся душа́м на́шим.

И́кос:

А́нгельскому поревнова́в житию́ и вели́ким во отце́х подо́бяся,/ всего́ себе́ отреши́л еси́ мирска́го сплете́ния,/ к по́двигам же по́стничества му́жески вооружи́вся,/ опа́сно путе́м Бо́жиих за́поведей ше́ствовал еси́, блаже́нне./ Те́мже и мы, верно чту́щии твою́ свяще́нную па́мять,/ похвала́ми ублажа́ем тя си́ми:/ ра́дуйся, а́нгельскаго жития́ подража́телю;/ ра́дуйся, дре́вних вели́ких оте́ц житию́ прее́мниче./ Ра́дуйся, неви́димых враго́в му́жественный победи́телю;/ ра́дуйся, за́поведей Бо́жиих храни́телю усе́рдный./ Ра́дуйся, оте́ческих Богодухнове́нных преда́ний опа́сный ревни́телю;/ ра́дуйся, мона́шескаго по́стническаго жи́тельства законоположи́телю./ Ра́дуйся, доброде́телей чисте́йшее зерца́ло;/ ра́дуйся, Ду́ха Свята́го сладкогла́сный орга́н./ Ра́дуйся, о́бразе глубо́каго смире́ния;/ ра́дуйся, ре́вностный исполни́телю Боже́ственных де́телей./ Ра́дуйся, я́ко тобо́ю научи́хомся непреле́стным путе́м жития́ ходи́ти;/ ра́дуйся, я́ко твои́м за ны хода́тайством спасе́ние получи́ти наде́емся./ Ра́дуйся, Ни́ле чудотво́рче, о́тче наш.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Песнь препро́сту усе́рдно приношу́ ти, о́тче:/ приими́ у́бо сию́ от недосто́йнаго/ и не возгнуша́йся мене́, па́че всех грешне́йшаго, о преблаже́нне,/ но, ми́лостивно прекло́нься, спасе́ние улучи́ти твои́м предста́тельством сподо́би,/ да, ра́дуяся, пою́:/ препе́тый отце́в Го́споди и Бо́же, благослове́н еси́.

Еди́н с еди́ным Бо́гом непреста́нно бесе́довал еси́, о́тче,/ чи́стыя моли́твы чи́стым и немяте́жным умо́м Тому́ принося́/ и со́вестию чи́стою, о Богому́дре,/ от дея́ния бо к виде́нию восте́к, весь богови́ден соде́ялся еси́, блаже́нне, при́сно поя́:/ препе́тый отце́в Го́споди и Бо́же, благослове́н еси́.

Плодоно́сен сад показа́лся еси́, о́тче, принося́щ плоды́ ду́ха,/ любве́ бо и ра́дости преиспо́лнен был еси́,/ ми́ра, долготерпе́ния, кро́тости и воздержа́ния,/ и, я́ко Христо́в вои́стинну, плоть распина́я со страстьми́ и похотьми́, и при́сно поя́:/ препе́тый отце́в Го́споди и Бо́же, благослове́н еси́.

Не му́дростию, но любо́вию тебе́ пою́щаго приими́, о о́тче,/ и, светосия́нною твое́ю моли́твою забве́ния и неве́дения тьму разгна́в,/ помози́ ми вопи́ти при́сно:/ препе́тый отце́в Го́споди и Бо́же, благослове́н еси́.

Богоро́дичен: Под кров Твой, Влады́чице, прибега́ющего не отри́ни,/ но, я́ко Всеми́лостивая, спаси́ убо́гаго раба́ Твоего́,/ от безме́рных согреше́ний мои́х избавля́ющи мя, да, ра́дуяся, пою́:/ препе́таго отце́в Го́спода и Бо́га Ма́ти, во ве́ки благослове́нна еси́.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

О́тче наш Ни́ле приснопа́мятне,/ красно́ и добро́ вои́стинну житие́ препроводи́л еси́, о Боголюбе́зне:/ мирски́я бо молвы́ избежа́в и в пусты́ню уедини́вся,/ ско́рби по́стныя се́ял еси́ со слеза́ми,/ но ны́не, ра́дуяся, жне́ши присноживо́тия кла́сы.

Еди́ному та́йная ве́дущему Бо́гу вта́йне порабо́тал еси́, о́тче,/ во смире́нии проходя́ доброде́телей по́прище, о блаже́нне,/ по преставле́нии же твое́м явле́н и све́тел еси́ чудесы́, пе́ти воздвиза́я ве́рныя:/ Го́спода по́йте, дела́, и превозноси́те Его́ во вся ве́ки.

Боже́ственною благода́тию, су́щею в тебе́,/ источа́еши исцеле́ния и прогоня́еши ду́хи лука́вствия/ от приходя́щих к тебе́ ве́рно, Ни́ле всеблаже́нне./ Тем и мы любе́зно чтим твою́ всесвяще́нную па́мять, ве́село пою́ще:/ Го́спода по́йте, дела́, и превозноси́те Его́ во вся ве́ки.

Богоро́дичен: Услы́ши, Влады́чице, боле́зненное воздыха́ние Твоего́ раба́,/ разреши́вши вери́ги мои́х согреше́ний,/ печа́ль на ра́дость преложи́ и боле́зни премени́ вско́ре,/ да, ра́дуяся, пою́ Тя, Де́во,/ и превозношу́, Чи́стая, во вся ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Пресве́тел свети́льник оте́честву твоему́ яви́лся еси́, преподо́бне,/ осиява́я све́тлостию твое́ю жи́тельства на́ша и чуде́с сия́ньми,/ и́миже по преставле́нии твое́м просла́вился еси́, о блаже́нне./ Тем, твою́ светоно́сную па́мять чту́ще,/ Христа́ сла́вим, све́тло тя прославля́ющаго.

Егда́ кра́снии твои́ но́зе, до́бре по спасе́ния пути́ те́кшия,/ на одре́ сме́ртном просте́рл еси́, блаже́нне,/ тогда́ ученицы́ твои́, сле́зы точа́ще, глаго́лаху:/ ка́мо отхо́диши, па́стырю наш,/ и кому́ оставля́еши ча́да твоя́, о́тче,/ и́хже духо́вне породи́в, воспита́л еси́ млеко́м твоего́ му́драго наставле́ния?

Пла́чем моея́ ра́дости не растворя́йте, о ча́да, –/ ты рекл еси́ им, о Богоблаже́нне, –/ аз бо, веселя́ся, отхожду́ прия́ти вене́ц пра́вды,/ его́же обеща́ Христо́с Того́ лю́бящим,/ иде́же и вы потщи́теся пости́гнути, соблю́дше Того́, вку́пе и моя́ за́поведи.

Да воспла́чет вку́пе с на́ми пусты́ня сия́, о о́тче,/ а́ще бо и процвете́, я́ко крин,/ красу́ющися богоуго́дным жи́тельством твои́м,/ но не име́я по тебе́ до́браго де́лателя,/ те́рние и волче́ц и́мать возрасти́ти./ Оба́че не оста́ви посеща́ти ста́до твое́, о́тче,/ и сам ты упаси́ тебе́ велича́ющия.

Не забу́ди и ны́не нас, обита́ющих на ме́сте твоего́ трудополо́жнаго жи́тельства,/ о Ни́ле Богоно́се, о́тче наш,/ и песнь усе́рдно тебе́ принося́щим хода́тайствуй спасе́ние:/ тя бо, о всеблаже́нне, моли́твенника и предста́теля ко Го́споду стяжа́вше,/ наде́жды да не оттщети́мся, ве́рно тя чту́щий.

Богоро́дичен: Оде́ждою спасе́ния оде́й мя,/ о всенаде́жное спасе́ния моего́ упова́ние, Ма́ти Бо́жия,/ на Тебе́ наде́юся, Всеми́лостивая:/ сокро́вищница бо еси́ ми́лости и вся спаса́еши, к Тебе́ прибега́ющия./ Спаси́ у́бо и мене́, отча́яннаго, да благода́рно пою́:/ ра́дуйся, Всеблаже́нная Богоро́дице, Чи́стая Присноде́во.

Свети́лен:

По́двиги твои́ми, о Богоблаже́нне, удиви́л еси́ А́нгелы и челове́ки,/ Бо́га же возвесели́л еси́,/ тем тя чтим ве́рно, твою́ торжеству́юще па́мять,/ Ни́ле Богоно́се, о́тче наш.

Сла́ва, и ны́не, пра́здника, или́ Богоро́дичен:

Вели́чия Твоя́, о Де́во и Богоро́дице Чи́стая,/ превосхо́дят вся́кое челове́ков разуме́ние,/ оба́че дерза́ем, бре́ннии, любе́зно Теб0435 вопи́ти:/ ра́дуйся, А́нгелом и челове́ком превожделе́нная Ра́досте.

На хвали́тех стихиры на 4, глас 8.

Подо́бен: О, пресла́внаго чудесе́:

О, пресла́внаго чудесе́!/ В после́дних ро́дех просия́ свети́ло мона́шествующих,/ Нил, прему́дрый оте́ц наш,/ златостру́йныя бо ре́ки уче́ний излия́/ и одушевле́н о́браз себе́ сама́го показа́/ и́стинно мона́шествовати жела́ющим,/ его́же моли́твами, Христе́, спаси́ ду́ши на́ша,/ я́ко еди́н Благоутро́бен.

О, пресла́внаго чудесе́!/ Боже́ственныя благода́ти испо́лнен,/ яви́ся Нил, блаже́ннейший оте́ц наш;/ ум бо к Бо́гу впери́в,/ весь светови́ден показа́ся,/ те́лом же в пусты́ни живы́й,/ ду́хом на Небесе́х обита́ше./ Его́же моли́твами, Христе́, спаси́ ду́ши на́ша,/ я́ко еди́н Благоутро́бен.

О, пресла́внаго чудесе́!/ Исто́чник чудесе́м показа́ся/ Нил, преподо́бный оте́ц наш,/ и́бо и по сме́рти источа́ет исцеле́ния/ ве́рно притека́ющим к нему́./ Его́же моли́твами, Христе́,/ стра́сти душ и теле́с на́ших исцели́/ и спаси́ нас, я́ко еди́н Благоутро́бен.

Преподо́бне о́тче наш Ни́ле,/ вои́стинну ты, бе́гая ми́ра и водворя́яся в пусты́ни,/ я́ко а́гнец незло́бив,/ в ней упа́слся еси́ на зла́це Боже́ственных писа́ний/ и, я́ко пчела́ трудолю́бна и прему́дра,/ духо́вныя цве́ты облета́я,/ па́че ме́да сладча́йшия собра́л еси́ словеса́,/ и́миже пита́еши ча́да твоя́, о́тче./ Те́мже, днесь соше́дшеся,/ ублажа́ем тя любо́вию,/ торжеству́юще свяще́нную твою́ па́мять/ и моля́щеся тобо́ю получи́ти грехо́в оставле́ние/ и ве́лию ми́лость душа́м на́шим.

Сла́ва, глас то́йже. Самогла́сен:

Духо́вный лик днесь совоку́пльше,/ боже́ственне возвесели́мся в свяще́ннейшей па́мяти отца́ на́шего:/ се бо предлага́ет нам трапе́зу та́инственную/ и питие́ сладча́йшее,/ свои́х по́стнических по́двигов высо́кая исправле́ния,/ вся́кий ра́зум удивля́ющия/ и душе́вныя на́ша чу́вства услажда́ющия,/ и́миже духо́вне насыща́еми,/ хвалу́ усты́ недосто́йными тому́ принести́ потщи́мся./ Сей бо, лоза́ Христо́ва виногра́да быв и́стинно,/ стра́хом суда́ и боле́зньми по́стническими/ точи́ло се́рдца своего́ изгнета́я,/ сле́зныя то́ки, я́ко вино́, вои́стинну се́рдце веселя́щее,/ непреста́нно точа́ше./ Тому́ днесь, духо́вне веселя́щеся, хвалу́ принесе́м,/ псало́мски воепева́юще и глаго́люще:/ честна́ пред Го́сподем твоя́ смерть бысть, преподо́бне,/ и прера́достна нам твоя́ па́мять, Боголюбе́зне,/ в не́йже ны́не духо́вне учрежда́еми, моле́бно тебе́ вопие́м:/ моли́ся, Богоно́се о́тче наш Ни́ле, ко Спа́су всех,/ дарова́ти нам единомы́слие,/ мир и ве́лию ми́лость.

И ны́не, пра́здника или́ Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и про́чее по уста́ву.

НА ЛИТУРГИ́И

Блаже́нны, пра́здника и свята́го, песнь 6-я, или́ еди́наго свята́го, пе́сни 3-я и 6-я. Проки́мен, Апо́стол, Аллилу́ия, Ева́нгелие и прича́стен, по уста́ву.

Моли́тва

О преподо́бне и Богоблаже́нне о́тче Ни́ле, Богому́дрый наста́вниче и учи́телю наш! Ты, любве́ ра́ди Бо́жия удаля́яся мирски́х смуще́ний, в непрохо́дней пусты́ни и в де́брех изво́лил еси́ всели́тися, и, я́ко лоза́ благопло́дна, умно́жив ча́да пусты́ни, яви́л еси́ себе́ им сло́вом, писа́нием и житие́м о́браз вся́кия и́ноческия доброде́тели, и, я́ко А́нгел во пло́ти, пожи́в на земли́, ны́не в селе́ниих Небе́сных, иде́же пра́зднующих глас непреста́нный, водворя́ешися, и, с ли́ки святы́х Бо́гу предстоя́, Тому́ хвалы́ и славосло́вия непреста́нно прино́сиши. Мо́лим тя, Богоблаже́нне, наста́ви и нас, жи́тельствующих под кро́вом твои́м, непреткнове́нно ходи́ти по стопа́м твои́м: люби́ти Го́спода Бо́га всем се́рдцем свои́м, Того́ Еди́наго вожделе́ти и о Том Еди́ном помышля́ти, му́жественно же и благоиску́сно пра́тися с до́лу влеку́щими нас по́мыслы и прило́ги вра́жиими и тех всегда́ побежда́ти; возлюби́ти вся́кую тесноту́ мона́шескаго жития́, и возненави́дети кра́сная ми́ра сего́ любве́ ра́ди Христо́вы и насади́ти в сердца́х свои́х вся́кую доброде́тель, в не́йже сам потруди́лся еси́. Моли́ Христа́ Бо́га, да и всем правосла́вным христиа́ном, в ми́ре живу́щим, просвети́т ум и о́чи серде́чная, е́же ко спасе́нию, утверди́т их в ве́ре, и благоче́стии, и в де́лании за́поведей Свои́х, сохрани́т от ле́сти ми́ра сего́ и да́рует им и нам оставле́ние грехо́в и к сим приложи́т, по нело́жному обетова́нию Своему́, и вся потре́бная нам ко вре́менному животу́. Да, в пусты́ни и в ми́ре жи́тельствующе, ти́хое и безмо́лвное житие́ поживе́м во вся́ком благоче́стии и че́стности и Того́ усты́ и се́рдцем просла́вим ку́пно со Безнача́льным Его́ Отце́м и Пресвяты́м и Благи́м и Животворя́щим Его́ Ду́хом всегда́, ны́не, и при́сно, и во ве́ки веко́в. Ами́нь.

НА ВЕЛИ́ЦЕЙ ВЕЧЕ́РНИ

На Го́споди, воззва́х:стихи́ры, глас 5:

Красу́йся, страно́ Русская,/ ра́дуйся и весели́ся, гра́де Лю́бечский,/ се бо вам зало́г спаси́тельный яви́ся,/ свята́я и чудотво́рная Богома́тери ико́на,/ чуде́с заря́ми сия́ющи,/ ду́ши же и сердца́ ве́рных просвеща́ющи/ луча́ми ми́лостиваго заступле́ния Присноде́вы.

Тебе́ припа́дают, Госпоже́,/ и́ноков Русских ли́цы,/ первонача́льником свои́м, преподо́бным Анто́нием Пече́рским, предводи́мыя,/ и́же роди́ся во гра́де Лю́бечи,/ в не́мже ико́ну Твою́ чудотво́рную/ ми́лостивно нам днесь яви́ла еси́/ в зало́г ми́лости и спасе́ния.

О, пресла́внаго вои́стинну чудесе́:/ ка́ко ико́на Твоя́ свята́я, Богоро́дице,/ на дске напи́санная,/ си́лою Боже́ственною де́йствует/ и неду́ги челове́ческия исцеля́ет!/ Сего́ ра́ди све́тло пра́зднуем днесь ея́ свято́е явле́ние/ и ра́бски Тебе́ вопие́м:/ невреди́мы сохраня́й нас, Влады́чице,/ от вся́ких скорбе́й и бед,/ да Тя славосло́вим во ве́ки.

Гряди́, преподо́бне Анто́ние,/ слуго́ изря́дный Пресвяты́я Богоро́дицы,/ неви́димо ста́ни с на́ми и пове́дай нам Тоя́ чудеса́,/ и́хже та́йнозри́тель был еси́:/ се бо зде, на ме́сте рожде́ния твоего́ земна́го,/ ико́ну Свою́ чуде́с мно́жеством прославля́ет/ и всех созыва́ет пе́ти Ей пе́сни хвале́бныя,/ я́ко Вино́внице и Хода́таице на́шего спасе́ния.

Сла́ва, и ны́не, глас 8:

О Ма́ти Бо́жия Всеблага́я!/ Не пре́зри нас, смире́нных и гре́шных,/ Тебе́ моля́щихся пред свято́ю и чудотво́рною ико́ною Твое́ю,/ бу́ди о нас Те́плая Хода́таица к Сы́ну Твоему́, Христу́ Бо́гу,/ изба́ви нас от вся́ких бед и неду́гов,/ да, спаса́еми Тобо́ю, ве́село вопие́м Ти:/ ра́дуйся, Благода́тная,/ мир покрыва́ющая Твои́м заступле́нием.

Вход. Проки́мен дне. И чте́ния 3 Богородичная (зри 3 мая)

На лити́и стихи́ры, глас 8:

Прииди́те, ве́рнии,/ хвале́бныя пе́сни принесе́м Де́ве Мари́и Богоро́дице/ и Тоя́ чудотво́рней ико́не с любо́вию поклони́мся,/ возвеща́юще тоя́ чудеса́,/ се день наста́ све́тлаго ея́ явле́ния/ и в Лю́бечи чуде́снаго прославле́ния,/ е́йже предстоя́ще со стра́хом и благогове́нием,/ возопие́м Пречи́стей:/ ра́дуйся, о́бразом Твои́м святы́м нас просвети́вшая/ и в Правосла́вней ве́ре утверди́вшая,/ я́ко вои́стинну Хода́таица на́шего спасе́ния.

Что Тя нарече́м, Богоро́дице Де́во?/ Свети́льник ли Све́та Боже́ственнаго,/ заре́ю чуде́с от ико́ны Твоея́/ всех нас к Небеси́ путеводя́щий?/ Сте́ну ли охране́ния на́шего,/ от враг ви́димых и неви́димых нас зищища́ющую?/ Вои́стинну мно́ги именова́ния Тебе́ подоба́ют,/ мно́гими щедро́тами Твои́ми нас при́сно посеща́ющей, да зове́м Ти:/ ра́дуйся, изве́стное христиа́н упова́ние.

Пресла́вныя ико́ны Твоея́ во гра́де Лю́бечи явле́нием/ торжество́ Правосла́вия показа́ся:/ сия́ бо страна́ и ме́сто/ прозябе́ние свято́е возрасти́вше,/ вели́каго во отце́х преподо́бнаго Анто́ния Пече́рскаго,/ от дре́вле Правосла́вную ве́ру содержа́ще./ Твое́ю по́мощию, Влады́чице,/ враги́ Правосла́вия чудесы́ ико́ны Твоея́ посрамля́хуся/ и, си́ми крася́щеся,/ непоколеби́мы в Правосла́вии до днесь пребы́ша,/ сла́вяще Твое́ заступле́ние.

Сла́ва, и ны́не, глас 5:

Ра́дуется дре́вний град Лю́беч,/ торжеству́ет же вся страна́ Русская,/ Бо́жия Ма́терь ми́лостивно бо их посети́/ пресве́тлым явле́нием чудотво́рнаго Своего́ о́браза./ Ра́дуется же преподо́бный Анто́ний,/ я́ко да́ра такова́го Бо́жия благода́ти/ град оте́чествия его́ земна́го сподо́бися/ и чудесы́ Твои́ми, Влады́чице, возвели́чися,/ я́ко всем Ты явля́еши неоску́дно/ вели́кия и бога́тыя Твоя́ ми́лости.

На стихо́вне стихи́ры, глас 4:

Сла́вное ико́ны Твоея́ явле́ние, Влады́чице,/ пе́сньми славосла́вим днесь/ и Твое́ нам заступле́ние све́тло торжеству́ем:/ се бо ико́на Твоя́ честна́я,/ зде чудотво́рно я́вльшися,/ град Лю́беч освяща́ет,/ неду́ги душе́вныя и теле́сныя врачу́ет/ и на Тя кре́пкую наде́жду возложи́вшим/ щедро́ты Твоя́ оби́льно источа́ет,/ да вси Тя сла́вим гла́сы немо́лчными,/ я́ко вои́стинну Хода́таицу на́шего спасе́ния.

Стих: Помяну́ и́мя Твое́/ во вся́ком ро́де и ро́де.

Отложи́м, ве́рнии, печа́ль,/ се бо ра́дость ве́чную дарова́ нам Богоро́дица Мари́я/ и явле́нием чудотво́рныя ико́ны Своея́/ днесь ми́лостиво нас просвеща́ет,/ на не́йже Богомладе́нца Го́спода Иису́са,/ дла́ньма Твои́ма, Госпоже́, держи́маго ви́дяще,/ утоле́ние печа́лей грехо́вных прие́млем/ и Тя славосло́вим, Вино́вницу на́шего спасе́ния.

Стих: Слы́ши, Дщи, и виждь,/ и приклони́ у́хо Твое́.

Показу́я нам во стра́нствии земно́м/ Твое́ неви́димое води́тельство,/ Одиги́трие Блага́я,/ я́коже дре́вле в Царьгра́де,/ та́ко и в Лю́бечстем днесь гра́де/ ико́ну Твою́ нам яви́ла еси́, Богоро́дице Де́во,/ и в ней чуде́с свети́льник показа́ла еси́,/ да нас, блужда́ющих, путеводи́ши к ве́чным оби́телем,/ воспева́ющих Тя, Засту́пницу усе́рдную ро́да христиа́нскаго.

Сла́ва, и ны́не, глас 5:

Прииди́те, правосла́вных собо́ри,/ песнь хвале́бную принесе́м Присноде́ве Богоро́дице,/ яви́вшей нам во гра́де Лю́бечи/ похвалу́ Правосла́вия на́шего,/ ико́ну Свою́ чудотво́рную,/ ея́же явле́нием и чудесы́/ е́реси посрами́шася и раско́лы низложи́шася,/ подае́т бо Всеблага́я Влады́чица/ по́мощь Свою́ Боже́ственную/ ревни́телем и́стинныя Правосла́вныя ве́ры/ и от бед спаса́ет богобоя́щияся рабы́ Своя́.

Тропа́рь, глас 4:

Преблагослове́нная Цари́це,/ Пречи́стая Де́во Богоро́дице,/ просла́вльшая град Лю́беч/ уго́дника Твоего́ преподо́бнаго Анто́ния Пече́рскаго рожде́нием/ и чудотво́рныя ико́ны Твоея́ явле́нием,/ мо́лим Тя, Всеблага́я:/ моли́ за ны ро́ждшагося от Тебе́ Царя́,/ Христа́ Бо́га на́шего,/ и Ма́терним Твои́м к Нему́ предста́тельством/ изба́ви нас от вся́каго зла,/ неду́ги на́ша исцели́, печа́ли на́ша утоли́/ и насле́дники яви́ нас Ца́рствия Небе́снаго,/ я́ко Милосе́рдна.

НА У́ТРЕНИ

На Бог Госпо́дь:тропа́рь то́йже.

По 1-м стихосло́вии седа́лен, глас 1:

Пресве́тлаго о́браза Твоего́ явле́ние, Богоро́дице Де́во,/ ра́дость ве́лию прино́сит правосла́вным лю́дем,/ и град Лю́беч весели́тся духо́вно,/ восприя́в дар многоце́нен, чудотво́рную Твою́ ико́ну,/ ея́же прису́тствием ду́си те́мнии прогоня́ются/ и ми́лость Твоя́ всем неоску́дно подае́тся,/ да немо́лчно сла́вим Тя, Влады́чице.

Слава, и ны́не, то́йже.

По 2-м стихосло́вии седа́лен, глас 3:

Весели́тся днесь све́тло гра́да Лю́беча правосла́вная па́ства:/ се бо А́гнца и Па́стыря Ма́ти/ чудотво́рную ико́ну Свою́ та́мо просла́ви пресла́вными чудесы́,/ ея́же явле́ние пра́зднующе,/ благода́рственно вопие́м Преблагослове́нней в жена́х:/ ра́дуйся, Благода́тная, Госпо́дь с Тобо́ю и Тобо́ю с на́ми,/ во спасе́ние душ на́ших.

Сла́ва, и ны́не, то́йже.

Велича́ние:

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ с ве́рою всем притека́ющим.

По полиеле́и cеда́лен, глас 8:

Вели́чие чуде́с Твои́х, Богоро́дице, превосхо́дит разуме́ние челове́ческое:/ слепы́я Ты просвеща́еши и хромы́я пра́во ходи́ти сотворя́еши,/ разсла́бленныя укрепля́еши и ме́ртвыя воскреша́еши,/ я́ко Ма́ти живота́ и сме́рти Влады́ки Христа́./ Его́же ми́лостива нам сотвори́ в День су́дный,/ все упова́ние на́ше на Тя возложи́вшим,/ да не постыди́мся во ве́ки.

Сла́ва, и ны́не, то́йже.

Та́же степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де.Стих: Слы́ши, Дщи, и виждь,/ и приклони́ у́хо Твое́.Ева́нгелие от Луки́, зача́ло 4.

По 50-м псалме стихира, глас 6:

Егда́ прии́де от Лю́беча преподо́бный Анто́ний/ во святу́ю го́ру Афо́нскую,/ тогда́ на Твою́ по́мощь, Богоро́дице, упова́ние свое́ возложи́,/ во жре́бии Твое́м земне́м подвиза́яся,/ егда́ же прии́де па́ки от Афо́на на го́ру Пече́рскую,/ та́мо оби́тель во и́мя Твое́ возгради́/ и сию́ по́двиги свои́ми просла́ви./ Мы же, его́ любве́ к Тебе́ иодража́я,/ Тя немо́лчными пе́нии ублажа́ем/ и, чудотво́рному о́бразу Твоему́ покланя́ющеся, зове́м:/ о Пресвята́я,/ прииди́ и сохрани́ достоя́ние Твое́ от вся́каго зла.

Кано́н, глас 1.

Песнь 1

Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая проти́вныя сотре́,/ изра́ильтяном путь глубины́ новосоде́лавшая.

Очи́стим чу́вствия и у́зрим в непристу́пней све́те Ма́терь Све́та,/ в ико́не Свое́й чудотво́рней чудесы́ пресла́вными сия́ющу/ и ду́ши на́ша озаря́ющу, да ра́дуемся, зову́ще:/ ра́дуйся, Ма́ти Госпо́дня.

Небеса́ у́бо да веселя́тся, земля́ же да ра́дуется,/ зря́щи чудеса́ ве́лия, ико́ною Присноде́вы быва́емая,/ да пра́зднует же град Лю́беч све́тло чудотво́рныя ико́ны Богома́тери день явле́ния,/ сию́ почита́я, я́ко сте́ну огражде́ния.

Умерщвле́ния преде́л сломи́ла еси́, Влады́чице,/ ве́чную Жизнь ро́ждши – Христа́,/ Его́же я́ко Младе́нца на руку́ Твое́ю носи́ла еси́,/ я́коже Тя на ико́не Твое́й святе́й ви́дим, Де́во Всенепоро́чная.

Воскресе́ния ме́ртвых Вино́вника и Жизнода́вца ро́ждшая, Богоблагода́тная,/ е́же ра́дуйся от всех родо́в христиа́нских слы́шиши,/ ико́ною же Твое́ю свято́ю ве́рныя утеша́еши и подвиза́еши вопи́ти Тебе́:/ ра́дуйся, Мари́е Всеблагослове́нная.

Песнь 3

Ирмо́с: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный Хра́ме, неизрече́нныя сла́вы Твоея́, Человеколю́бче.

Ны́не гра́да Лю́беча лю́дие испо́лнишася ра́дости/ явле́нием чудотво́рныя ико́ны Твоея́, Богоро́дице,/ и пра́зднуют све́тло пра́здник Ея́ явле́ния,/ я́ко вои́стинну торжество́ Правосла́вия/ и е́ресей посрамле́ние Твое́ю си́лою, Влады́чице.

Виждь, Чи́стая, правосла́вных собо́ры,/ на поклоне́ние чудотво́рному о́бразу Твоему́ гряду́щия./ Виждь и нас, гре́шных, к многоцеле́бному о́бразу Твоему́ с любо́вию припа́дающих,/ грехо́в разреше́ния и жития́ исправле́ния прося́щих,/ и не лиши́ нас Ма́терняго Твоего́ заступле́ния, Всенепоро́чная.

Тече́т струя́ чуде́с незави́стная/ от ико́ны Твоея́ чи́стыя, Богоро́дице Де́во,/ от нея́же ве́рили исцеле́ние и утеше́ние прие́млют, моля́щеся те́пле,/ зол избавле́ние и ве́лию Твою́ ми́лость, Пречи́стая.

Все́ю душе́ю и мы́слию смире́нною чудеса́ Твоя́ сла́вим, Влады́чице,/ с любо́вию предстоя́ще чудотво́рней Твое́й ико́не,/ в не́йже зало́г благоволе́ния Твоего́ нам дарова́ла еси́, Богоневе́сто./ Те́мже неотсту́пна бу́ди от нас Твое́ю ми́лостию.

Седа́лен, глас 2:

Моле́ния на́ша, со усе́рдием приноси́мыя Тебе́ пред чудотво́рною ико́ною Твое́ю, Богома́ти пречи́стая,/ ми́лостивно услы́ши и бу́ди нам покро́в держа́вен и заступле́ние кре́пкое от враг ви́димых и неви́димых,/ предвари́ и от бед изба́ви нас, Влады́чице Всеблага́я,/ еди́на, вско́ре предста́тельствующая.

Сла́ва, и ны́не, то́йже.

Песнь 4

Ирмо́с: Го́ру Тя, благода́тию Бо́жиею приосене́нную,/ прозорли́выми Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.

Се Пречи́стыя раб, преподо́бный Анто́ний, неви́димо гряде́т к нам от Го́рних высо́т/ сопра́здновати с на́ми день явле́ния чудотво́рныя ико́ны Богома́тери,/ е́юже оте́чествие его земно́е просла́вися чудесы́,/ в не́мже сла́вится и́мя Твое́, Мари́е Богоблагода́тная.

Избра́нник Твой, Госпоже́,/ на горе́ Пече́рстей оби́тель пресла́вну во и́мя Твое́ созда́ и огради́, преподо́бный Анто́ний,/ зде же, во оте́чествии его́ земне́м, просла́вися чудесы́ Твой о́браз святы́й,/ Твои́м благоволе́нием, Влады́чице.

Богооте́ц у́бо Дави́д пред се́нным ковче́гом скака́ше, игра́я,/ мы же, веселя́щеся о Твое́м заступле́нии, Де́во,/ Твою́ чудотво́рную ико́ну ра́достно окружа́ем/ и сию́ любе́зно лобыза́ем, зову́ще:/ Ты еси́ на́ше ра́дование, сла́ва и похвала́, Богоневе́сто.

Ре́ку исцеле́ний и исто́чник чуде́с/ ико́ну Твою́ святу́ю по достоя́нию имену́ем, Богоро́дице,/ е́юже град Лю́беч све́тло красу́ется,/ стяжа́в в себе́ толи́кий дар Твоея́ ми́лости,/ и благода́рно славосло́вит Твое́ ему́ заступле́ние.

Песнь 5

Ирмо́с: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.

Безме́рное милосе́рдие Твое́ познае́м, Влады́чице,/ в чудесе́х пресла́вных, от ико́ны Твоея́ быва́емых./ Сего́ ра́ди че́ствуем ю с любо́вию и благогове́нием,/ и ра́бски пред не́ю Тебе́ вопие́м:/ ра́дуйся, ра́дости на́шея Вино́внице/ и спасе́ния на́шего Хода́таице, Мари́е Благода́тная.

Присту́пим, ве́рнии, с любо́вию к чудотво́рному о́бразу Присноде́вы/ и поклони́мся ему́ со благогове́нием,/ се бо в нем чуде́с си́лу проявля́ет Всеблага́я Влады́чица и вся спаса́ет,/ с ве́рою несомне́нною почита́ющих пречи́стаго ли́ка Ея́ подо́бие.

Неотсту́пна бу́ди, Влады́чице, по́мощию Твое́ю и заступле́нием/ нам, смире́нным рабо́м Твои́м,/ и я́коже избра́ннику Твоему́, преподо́бному Анто́нию, ми́лость Твою́ яви́ла еси́,/ си́це и нам, во оте́чествии его́ Тя пою́щим, покажи́ милосе́рдие Твое́ неисче́тное,/ в житии́ на́шем и при кончи́не нас при́сно заступа́ющи.

Пева́емая чудеса́ Твоя́, во гра́де Лю́бечи бы́вшая, Богоотрокови́це Де́во,/ удивля́ют челове́ков помышле́ния,/ и ве́рныя влеку́т на поклоне́ние чудотво́рному Твоему́ о́бразу,/ в не́мже чуде́с си́лу пресла́вно прояви́ла еси́, Влады́чице,/ на спасе́ние на́ше и утвержде́ние.

Песнь 6

Ирмо́с: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния./ Спаси́ лю́ди Твоя́, Бо́же наш,/ Ты бо кре́пость немотству́ющих и исправле́ние.

При́зри ми́лостивно, Де́во, на лю́ди Твоя́,/ пред ико́ною Твое́ю честно́ю те́пле Тебе́ моля́щияся./ Сохрани́ град Твой от вся́каго зла, потре́бная ему́ подава́ющи,/ снабдя́щи и покрыва́ющи Твоея́ по́мощи и заступле́ния и́щущия.

Спа́са Христа́ о нас умоли́ти потщи́ся, Богоро́дице,/ Ма́тернее дерзнове́ние к Нему́ иму́щи,/ простри́ к Нему́ ру́це Твои́ честни́и на умоле́ние,/ и́миже Его́ я́ко младе́нца носи́ла еси́,/ и спаси́ град и лю́ди, на Тя упова́ющия.

Да изба́вимся от вся́ких злоключе́ний Твои́м предста́тельством, Богома́ти Влады́чице,/ чту́щия ве́рно Твой святы́й пра́здник,/ в не́мже чуде́с Твои́х мно́жество воспева́ем,/ и, Твои́ми ми́лостями крася́щеся,/ Тя еди́ну ско́ро Предста́тельствующую Помо́щницу имену́ем.

Пое́м Тя и покланя́емся Ти, Богома́ти Де́во,/ с ве́рою и любо́вию пропове́дающе мно́гая и пресла́вная Твоя́ чудеса́,/ в Лю́бечи ико́ною Твое́ю чудотво́рною явле́нная./ Ты же, я́ко Ми́лостива су́щи,/ я́коже дре́вле отце́м на́шим, си́це и нам, смире́нным, щедро́ты Твоя́ да́руй,/ заступа́ющи и спаса́ющи нас от вся́ких бед.

Конда́к, глас 8:

Притеце́м, ве́рнии, к многоцеле́бному о́бразу Засту́пницы на́шея, Богоро́дицы Мари́и,/ и, припа́дающе к нему́ с любо́вию, си́це рцем:/ о Всепе́тая Ма́ти, о Цари́це Всеми́лостивая,/ при́зри свы́ше благосе́рдием Твои́м на ны, недосто́йныя,/ и моли́твами уго́дника Твоего́, преподо́бнаго Анто́ния Пече́рскаго,/ яви́ нам Твоя́ ми́лости и щедро́ты:/ в боле́знех исцеле́ние, в ско́рбех утеше́ние,/ в беда́х ско́рую по́мощь нам да́руй,/ и вся ны спаси́, на Тя упова́ющия, да зове́м Ти:/ ра́дуйся, Де́во, христиа́н заступле́ние.

И́кос:

А́нгела земна́го и челове́ка Небе́снаго, преподо́бнаго Анто́ния, умоле́нием/ и Твои́м неисче́тным милосе́рдием преклоня́ема, Влады́чице Преблага́я,/ услы́ши нас, благоутро́бно похва́льныя пе́сни Тебе́ принося́щих/ и во умиле́нии глубо́цем зову́щих Ти:/ ра́дуйся, Бо́га Отца́ Неве́сто Непоро́чная;/ ра́дуйся, Бо́га Сы́на Роди́тельнице Неискусобра́чная./ Ра́дуйся, Бо́га Ду́ха Свята́го селе́ние избра́нное;/ ра́дуйся, Пресвяты́я Тро́ицы Таи́ннице Пречестна́я./ Ра́дуйся, а́нгельских во́инств удивле́ние;/ ра́дуйся, челове́ческаго ро́да возвыше́ние./ Ра́дуйся, Лю́беча похвало́;/ ра́дуйся, Руси́ сла́во./ Ра́дуйся, наде́ждо ненаде́жных;/ ра́дуйся, врачевство́ боля́щих./ Ра́дуйся, Утоли́тельнице печа́лей;/ ра́дуйся, ра́досте скорбя́щих./ Ра́дуйся, Де́во, христиа́н заступле́ние.

Песнь 7

Ирмо́с: Тебе́, у́мную, Богоро́дице, пещь,/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.

О́троки в пещи́ халде́йстей Изба́вльшаго/ пло́тию родила́ еси́, Де́во,/ и на руку́ Твое́ю я́ко Младе́нца Того́ носи́ла еси́,/ с Ни́мже и на ико́не Тя зрим, Всепе́тая,/ хва́льным отце́в Бо́гом и препросла́вленным.

Всех ве́рных собира́еши, Влады́чице, пе́ти Тебе́ немо́лчныя хвалы́/ и чуде́с Твои́х мно́жество пропове́дати велегла́сно;/ Ты же, я́ко Милосе́рдая Ма́ти,/ не пре́зри и нас, днесь славосло́вящих Тя/ и ро́ждшагося от Тебе́ хва́льнаго отце́в Бо́га и препросла́вленнаго.

Я́ко вои́стинну свяще́нный и ра́достный день наста́/ явле́ния свята́го и чудотво́рнаго о́браза Твоего́, Богома́ти Пречи́стая,/ в не́мже град Лю́беч духо́вно весели́тся и воспева́ет Твоя́ чудеса́,/ мы же, покланя́ющеся Тебе́ пред всечестно́ю ико́ною Твое́ю,/ ра́достно созерца́ем на Ней руко́ю Твое́ю держи́маго Предве́чнаго Младе́нца,/ хва́льнаго отце́в Бо́га и препросла́вленнаго.

Мона́хов русских первонача́льника, преподо́бнаго Анто́ния Пече́рскаго,/ оте́чествие земно́е днесь, благоволе́нием Твои́м озаре́нное, Присноде́во Мари́е,/ со стра́хом и ра́достию пра́здник све́тел Тебе́ сотворя́ет, зовя́:/ Ты еси́ моя́ похвала́ и утвержде́ние,/ Ма́ти хва́льнаго отце́в Бо́га и препросла́вленнаго.

Песнь 8

Ирмо́с: В пещи́ о́троцы изра́илевы,/ я́коже в горниле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Сей святы́й и светоно́сный день торжества́ Богома́тери,/ в не́мже явле́ние многоцеле́бнаго Ея́ о́браза све́тло пра́зднуем,/ ве́рныя и боголюби́выя ду́ши созыва́ет/ моле́бныя похвалы́ Засту́пнице на́шей приноси́ти и ра́достно к Ней вопи́ти:/ ра́дуйся, Богоро́дице,/ от всех родо́в христиа́нских превозноси́мая во вся ве́ки.

Прииди́, правосла́вная Лю́бечская па́ство, и виждь/ ве́лие благоутро́бие Влады́чицы на́шея Богоро́дицы,/ в явле́нии ико́ны Ея́ тебе́ даро́ванное,/ от Нея́же чуде́с струи́ истека́ют, и зна́мения благода́тная соверша́ются,/ и всем щедро́ты Ея́ подаю́тся, превознося́щим и́мя Ея свято́е во вся ве́ки.

Воззри́ на нас ми́лостивно, Влады́чице, предстоя́щих Тебе́ с ве́рою и любо́вию/ и моля́щихся Тебе́ пред пречи́стым о́бразом Твои́м,/ его́же в Лю́бечи ди́вно яви́ла еси́/ и чудесы́ мно́гими просла́вила еси́,/ си́ми Правосла́вную ве́ру утвержда́ющи и е́реси низлага́ющи,/ благонра́вныя же рабы́ Твоя́ подвиза́ющи превозноси́ти Тя во вся ве́ки.

Приими́ на́шу сле́зную моли́тву, Всеблага́я,/ и испроси́ нам оставле́ние грехо́в, ми́рное житие́ и благу́ю кончи́ну от Го́спода:/ ве́мы бо, вемы вои́стинну, Де́во,/ я́ко вся возмо́жна Тебе́, а́ще то́кмо восхо́щеши./ Те́мже со упова́нием кре́пким пое́м во сла́ву Твою́/ и превозно́сим Тя во вся ве́ки.

Песнь 9

Ирмо́с: О́браз чи́стаго рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти, мо́лимся, пещь,/ да Тя, Богоро́дице,/ непреста́нно велича́ем.

Свети́ся, ра́дуйся, гра́де Лю́беч,/ се бо в Тебе́ заря́ чуде́с возсия́ – ико́на Пречи́стыя Де́вы;/ лику́йте Лю́бечстии лю́дие,/ обре́тшии зало́г несомне́нный благоволе́ния Богома́тери,/ Свое́ю ико́ною в вас чудоде́йствующей,/ и по до́лгу хвале́бными гла́сы Пречи́стую велича́йте.

О, Боже́ственнаго и вселюбе́знаго ли́ка Твоего́ подо́бие/ и безме́рных чуде́с от него́ излия́ние, Влады́чице,/ град Лю́беч и всю па́ству его́ просвеща́ют духо́вно/ и щедро́тами Твои́ми обогаща́ют и́щущих Твоего́ заступле́ния:/ Ты бо еси́ вои́стинну кре́пкое на́ше упова́ние.

О Ма́ти и Де́во, ро́ждшая святы́х Святе́йшее Сло́во!/ Слове́с на́ших хвале́бных не пре́зри,/ и́миже чудеса́ ико́ны Твоея́ прославля́ти дерза́ем, смире́ннии,/ но моли́тв ра́ди уго́дника Твоего́, преподо́бнаго Анто́ния Пече́рскаго,/ на ми́лость к нам преклони́ся и от вся́ких бед нас изба́ви,/ да Тя непреста́нно велича́ем.

Да сохрани́ши, Влады́чице, град и лю́ди/ пребыва́нием в них чудотво́рныя ико́ны Твоея́ осене́нныя,/ да спасе́ши держа́ву Русскую от вся́каго зла́го нестрое́ния и враг ви́димых и неви́димых./ Мо́лим Тя, Всеблага́я,/ сохрани́ ста́до Твое́ в Правосла́вии це́ло/ и спаси́ нас, Тя благогове́йно велича́ющих.

Свети́лен:

Ико́ну Твою́ всечестну́ю град Лю́беч, я́ко сокро́вище драго́е, стяжа́,/ от лет дре́вних чудесы́ просла́вленную,/ о Сла́дкая Ма́ти Христа́ Бо́га на́шего,/ пред не́юже Тебе́ покланя́ющеся, мо́лимся:/ бу́ди нам покро́в недви́жим и Хода́таица спасе́ния.

На хвали́тех стихи́ры, глас 4:

О, несказа́нныя бла́гости Твоея́, Влады́чице:/ ико́ну Твою́ святу́ю чудесы́ мно́гими прославля́еши/ и Правосла́вную ве́ру е́ю в нас утвержда́еши,/ е́реси же и раско́лы низлага́еши,/ ю́же с благогове́нием честву́ем/ и с любо́вию целу́ем,/ и Тя, Чи́стую Богоотрокови́цу,/ достодо́лжно пе́сньми почита́ем и ублажа́ем.

О, Твоего́ о нас промышле́ния, Богоневе́сто Де́во:/ неду́ги на́ша Ты исцеля́еши/ и печа́ли утоля́еши/ осене́нием пречи́стаго Твоего́ о́браза,/ чудесы́ просла́вленнаго от лет дре́вних,/ Лю́беча сокро́вище духо́вное,/ и шит, и покро́в о́браз Твой яви́ся, Богома́ти Пречи́стая,/ его́же пропове́дающе чудеса́,/ Тя ра́достными пе́сньми почита́ем и ублажа́ем.

О, вели́кия любве́ Твоея́ к ро́ду христиа́нскому, Де́во:/ ико́ну Твою́ честну́ю нам яви́ла еси́ днесь,/ чуде́с си́лу источа́ющую/ и неду́ги челове́ческия прикоснове́нием к ней исцеля́ющую,/ Богоро́дице Всеблага́я,/ ея́же явле́ние све́тло пра́зднуем/ и Твоя́ ми́лости и щедро́ты, е́ю нам даро́ванныя, испове́дающе,/ Тя, Благоде́тельницу на́шу,/ благода́рными песнохвале́нии ублажа́ем.

Сла́ва, и ны́не, глас 6:

Твоему́ глаго́лу после́дующе,/ Госпоже́ Богоро́дице,/ я́коже дре́вле прорекла́ еси́,/ ублажа́ем Тя немо́лчными гла́сы/ и Твою́ святу́ю ико́ну боголе́пно че́ствуем,/ на не́йже Богомладе́нца Иису́са нам явля́еши/ и всем Спаси́теля Того́ показу́еши,/ да Ему́ вопие́м:/ сла́ва Тебе́, Христе́, Царю́ и Бо́же наш,/ Ма́терь Твою́ по пло́ти/ в Ма́терь нам по ду́ху дарова́вшему/ и Ея́ моли́твами всех спаса́ющему.

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 3, песнь Богоро́дицы: Вели́чит душа́ Моя́ Го́спода,/ и возра́довася дух Мой о Бо́зе, Спа́се Мое́м.Стих: Я́ко призре́ на смире́ние рабы́ Своея́, се бо отны́не ублажа́т Мя вси ро́ди.Апо́стол к Филипписи́ем, зача́ло 240. Аллилу́ия,глас 8: Слы́ши, Дщи, и виждь, и приклони́ у́хо Твое́. Стих: Лицу́ Твоему́ помо́лятся бога́тии лю́дстии.Ева́нгелие от Луки́, зача́ло 54. Прича́стен: Ча́шу спасе́ния прииму́:

Моли́тва

О, Пресвята́я и Преблагослове́нная Ма́ти Го́спода и Спа́са на́шего Иису́са Христа́, Пречи́стая Присноде́во, Богоро́дице Мари́е. Припа́даем и покланя́емся Тебе́ пред свято́ю и чудотво́рною ико́ною Твое́ю, ю́же от лет дре́вних зде чудесы́ мно́гими и исцеле́ньми неисче́тными просла́вити благоволи́ла еси́. Смире́нно мо́лимся Тебе́, Благо́й и Милосе́рдной Засту́пнице на́шей, предста́тельством уго́дника Твоего́, преподо́бнаго Анто́ния Пече́рскаго, вонми́ гла́су гре́шных моле́ний на́ших, не пре́зри воздыха́ний от души́, виждь ско́рби и беды́, нас обыше́дшия, и, я́ко любвеоби́льная вои́стинну Ма́ти, потщи́ся на по́мощь нам, безпо́мощным, уны́лым, во мно́гия и тя́жкия грехи́ впа́дшим и приснопрогневля́ющим Го́спода и Созда́теля на́шего. Его́же умоли́, Предста́тельнице на́ша, да не погуби́т нас со беззако́нии на́шими, но яви́т нам человеколю́бную Свою́ ми́лость. Испроси́ нам, Влады́чице, у бла́гости Его́, теле́сное здра́вие и душе́вное спасе́ние, благоче́стное и ми́рное житие́, земли́ плодоно́сие, возду́ха благорастворе́ние, до́жди благовре́менны и благослове́ние свы́ше на вся блага́я дела́ и начина́ния на́ша. Исхода́тайствуй, Госпоже́, у Царя́ царствующи́х и Го́спода госпо́дствующих стране́ на́шей на вся враги́ побе́ду и одоле́ние, всем же правосла́вным христиа́ном ми́лость Бо́жию, благоустрое́ние и во всех благи́х изоби́лие. О, Цари́це Всепе́тая, Ма́ти Бо́жия Всеблага́я, простри́ богоно́снии ру́це Твои́ к возлю́бленному Сы́ну Твоему́ и Бо́гу на́шему, умоли́ Его́ вся ны спасти́ и изба́вити поги́бели ве́чныя. Я́коже дре́вле на ме́сте сем отце́м на́шим ми́лость Твою́ явля́ла еси́, Влады́чице, си́це и нам ны́не яви́, Богоро́дице, Твоя́ щедро́ты: боля́щия исцели́, скорбя́щия уте́ши, бе́дствующим помози́. Споспеши́ всем нам носи́ти и́го Христо́во в терпе́нии и смире́нии и сподо́би нас благоче́стно житие́ сие́ земно́е сконча́ти, христиа́нскую непосты́дную кончи́ну получи́ти и Небе́сное Ца́рствие унасле́дити Ма́терним хода́тайством Твои́м к ро́ждшемуся от Тебе́ Го́споду и Бо́гу на́шему Иису́су Христу́, Ему́же со Безнача́льным Его́ Отце́м и Пресвяты́м Ду́хом подоба́ет вся́кая сла́ва, честь и поклоне́ние, ны́не, и при́сно, и во ве́ки веко́в. Ами́нь.

НА ВЕЛИ́ЦЕЙ ВЕЧЕ́РНИ

Блаже́н муж:1-й антифо́н. На Го́споди, воззва́х:стихи́ры глас 5:

Чудотво́рною Твое́ю ико́ною,/ Влады́чице Де́во Богоро́дице,/ оби́тель Жиро́вицкая хва́лится,/ веселя́щися све́тло о явле́нии Твое́м,/ и, лику́ющи, вопие́т:/ о Ма́ти щедро́т и вся́кия уте́хи,/ испо́лни ра́дости сердца́ ве́рных раб Твои́х/ и да́руй оби́тели во Правосла́вии утвержде́ние,/ мир и ве́лию ми́лость.

Мона́шествующих сосло́вия под се́нию святы́я ико́ны Твоея́,/ о Влады́чице Богоро́дице,/ спасе́ние обрета́юще,/ вопию́т Ти, Пе́рвенствующей Иноки́не Су́щей:/ ра́дуйся, Обра́дованная,/ во успе́нии Твое́м нас не оставля́ющая,/ но да́рующая душа́м на́шим мир и ве́лию ми́лость.

Всенаро́дное мно́жество, Влады́чице,/ в день ле́тния па́мяти явле́ния Твоего́/ стека́ющеся во оби́тель Жиро́вицкую,/ славосло́вят Твое́ неизрече́нное милосе́рдие,/ покая́ние принося́ще о гресе́х свои́х,/ и от ли́ка Твоего́ чудотво́рнаго/ сподобля́ются утеше́ния в печа́лех и озлобле́ниих,/ и, возвраща́ющеся в до́мы своя́,/ исполня́ются ми́ра и ве́лия ми́лости.

Ико́на Твоя́, Влады́чице,/ оби́тели Жиро́вицкия похвало́/ и всея́ Белору́ссии украше́ние,/ наро́да же правосла́внаго отра́да и утеше́ние явля́ется,/ исполня́ющи наде́ждою и весе́лием сердца́ на́ша:/ тоя́ бо явле́нием Правосла́вие в земли́ на́шей утверди́ся и е́ресь низложи́ся,/ всем же ве́рным дарова́ся/ мир и ве́лия ми́лость.

Сла́ва, и ны́не, глас 2:

Явле́нием святы́я Твоея́ и чудотво́рныя ико́ны,/ о Влады́чице Де́во Богоро́дице,/ лю́ди уте́шила еси́,/ и из оби́тели Жиро́вицкия све́том и́стиннаго Богопозна́ния/ и пра́ваго испове́дания/ всю зе́млю на́шу осия́ла еси́,/ и, утверди́вши во благонаде́жна сердца́ на́ша,/ научи́ла еси́ несумне́нно вопи́ти Ти:/ ра́дуйся, Всеблага́я Врата́рнице,/ двери ра́йския нам отверза́ющая;/ ра́дуйся, и́стинная Скоропослу́шнице,/ проше́ния на́ша во бла́го исполня́ющая./ Ра́дуйся, всех скорбя́щих ра́досте,/ умягче́ние злых серде́ц,/ утоля́ющая печа́ли на́ша;/ ра́дуйся, Засту́пнице усе́рдная ро́да христиа́нскаго./ Ра́дуйся, оби́тели Жиро́вицкия похвало́/ и всего́ ми́ра наде́ждо и утеше́ние.

Вход. Проки́мен дне. И чте́ния Богородичны (зри 3 мая)

На лити́и стихи́ры глас 3:

Прииди́те, празднолю́бных собо́ри,/ честно́е явле́ние Богома́терныя ико́ны восхва́лим./ Тоя́ бо двукра́тным на дре́ве цвету́щем и ка́мени явле́нием/ оби́тель Жиро́вицкая процвете́,/ и Правосла́вие в земли́ на́шей утверди́ся на ка́мени,/ ка́мень же бе Христо́с.

Сла́ва Твоя́, Влады́чице,/ и чудотво́рныя Твоея́ ико́ны Жиро́вицкия/ осия́ свои́ми чудесы́ зе́млю Гро́дненскую и Ви́ленскую,/ взы́де да́же и до гра́да Москвы́,/ а́може бра́нем наста́вшим, изнесе́ся ико́на Твоя́./ Пребы́вши же в Моско́вских преде́лех седмь лет, чудотворя́щи,/ возврати́ся па́ки в дом свой –/ во оби́тель Жиро́вицкую.

Сла́ва, и ны́не, глас 5:

Ру́це простира́ем Тебе́/ и скве́рныя уста́ отверза́ем к моле́нию,/ преклоня́юще же коле́на/ и у́мно нога́м Твои́м каса́ющеся, Пречи́стая, вопие́м:/ спаси́ оби́тель сию́/ и лю́ди благочести́выя/ и Правосла́вие в земли́ на́шей утверди́,/ да сла́вим уневе́стившаго Тя Себе́ Отца́,/ и Воплоти́вшагося от Тебе́ Сы́на, и Свята́го, от Отца́ исходя́щего, Ду́ха,/ Тро́ицу Живонача́льную,/ и Твое́ Ма́тернее за ны пред Не́ю предста́тельство/ в безконе́чныя ве́ки веко́в.

На стихо́вне стихи́ры, глас 4:

Явле́нием о́браза Твоего́, Пречи́стая,/ и созда́нием правосла́вныя оби́тели Жиро́вицкия/ произы́де утвержде́ние святе́й на́шей ве́ре,/ ю́же пропове́даша апо́столи,/ святи́тели же на седми́ Собо́рех утверди́ша/ и ю́же святи́и му́ченицы Иоа́нн, Анто́ний и Евста́фий кро́вию запечатле́ша,/ преподо́бный же игу́мен Афана́сий Бре́стский/ за сию́ да́же до сме́рти пострада́,/ и в не́йже святы́й младе́нец Гаврии́л му́ченичеством просия́.

Стих: Я́ко сотвори́ Мне вели́чие Си́льный,/ и свя́то И́мя Его́.

Свет Правосла́вныя ве́ры возсия́, Пречи́стая,/ из оби́тели Твоея́ на всю страну́ на́шу,/ всенаро́дное мно́жество,/ стека́ющеся к Твоему́ чудотво́рному Жиро́вицкому о́бразу,/ велегла́сно испове́дуют сию́, глаго́люще:/ ве́ра Правосла́вная,/ сия́ ве́ра апо́стольская,/ сия́ ве́ра вселе́нную утверди́/ и отцы́ на́ша к позна́нию и́стины приведе́.

Стих: Сотвори́ держа́ву мы́шцею Свое́ю,/ расточи́ го́рдыя мы́слию се́рдца их.

Днесь благове́рнии лю́дие, све́тло пра́зднующе/ явле́ние Твоего́ чудотво́рнаго о́браза, Пречи́стая,/ и преклоня́ющеся пред ним, к Первообра́зней вопию́т:/ о Пресвята́я Де́во и Ма́ти,/ объе́млющи на ико́не Жиро́вицкой/ Сы́на Твоего́ и Бо́га на́шего,/ умоли́ Его́ о лю́дех многосогре́шших/ и о е́же утверди́ти в земли́ на́шей Правосла́вие/ и спасти́ ду́ши на́ша.

Сла́ва, и ны́не, глас 5:

Мысль очи́стивше и ум,/ в покая́нии присту́пим, гре́шнии,/ к Засту́пнице на́шей, Ма́тери Царя́ Христа́,/ Богоотрокови́це и Влады́чице,/ и, велича́юще милосе́рдие Ея́,/ про́сим в ско́рбех утеше́ния,/ в боле́знех исцеле́ния,/ в труде́х благослове́ния,/ земли́ плодоно́сия, ми́ру умире́ния,/ ю́ным блага́го в ве́ре возраста́ния,/ вдови́цам и сиро́там защище́ния,/ всем же нам на стра́сти одоле́ния/ и побе́ды на врага́, человекоуби́йцы искони́,/ вопию́ще ве́рно:/ о Влады́чице Богоро́дице,/ Наде́ждо и Прибе́жище на́ше,/ покры́й нас честны́м Твои́м омофо́ром/ от гряду́щего на ны пра́веднаго гне́ва,/ вся бо возмо́жно Тебе́, Боголюби́вая Цари́це,/ Наде́ждо ненаде́жных/ и всего́ ми́ра Покро́ве и заступле́ние.

По Ны́не отпуща́еши:тропа́рь, глас 5:

Пред свято́ю Твое́ю ико́ною, Влады́чице,/ моля́щиися исцеле́ний сподобля́ются,/ ве́ры и́стинныя позна́ние прие́млют/ и ага́рянская наше́ствия отража́ют./ Те́мже и нам, к Тебе́ припа́дающим,/ грехо́в оставле́ния испроси́,/ по́мыслами благоче́стия сердца́ на́ша просвети́/ и к Сы́ну Твоему́ моли́тву вознеси́/ о спасе́нии душ на́ших.

Ин тропа́рь осо́бый, глас 2:

По́мощи от Тебе́ тре́бующия не пре́зри, Влады́чице,/ и милосе́рдия бе́здну отве́рзи всем,/ притека́ющим к цельбоно́сней ико́не Твое́й./ Печа́ли на́ша жите́йския утоли́, Всеще́драя,/ и от юдо́ли сея́ плаче́вныя/ к ра́дости ве́чней ве́рныя Твоя́ преста́ви:/ Тебе́ бо вси стяжа́хом наде́жду и утвержде́ние,/ ми́лости исто́чник, покро́в и спасе́ние душ на́ших.

НА У́ТРЕНИ

На Бог Госпо́дь:тропари́ по уста́ву.

По 1-м стихосло́вии седа́лен, глас 4:

Днесь све́тло пра́зднует оби́тель Жиро́вицкая/ явле́ние на дре́ве чудотво́рныя ико́ны Бо́жия Ма́тере./ Прииди́те убо, правосла́внии лю́дие, поклони́мся Богома́тери,/ и во умиле́нии душ и серде́ц на́ших припаде́м, взыва́юще:/ ра́дуйся, Премилосе́рдная Влады́чице,/ предста́тельство на́ше и всера́достное заступле́ние.

По 2-м стихосло́вии седа́лен, глас 6:

Соше́дшеся ны́не во оби́тель Жиро́вицкую, сотвори́м моли́тву, празднолю́бцы,/ со слеза́ми пред ди́вно явле́нною ико́ною Богоро́дицы пою́ще:/ приими́, Влады́чице, моле́ния на́ша и принеси́ их Твоему́ Сы́ну и Бо́гу,/ да спасе́т Тобо́ю ду́ши на́ша.

Велича́ние:

Велича́ем Тя,/ Пресвята́я Де́во,/ и почита́ем честну́ю ико́ну Твою́,/ ю́же от лет дре́вних/ во оби́тели Жиро́вицкой просла́вила еси́.

По полиеле́и седа́лен, глас 6:

Воззри́м душе́вныма очи́ма к чудотво́рней ико́не Богома́тери Жиро́вицкой/ и, те́пле моля́щеся, вопие́м:/ о Мари́е, Ма́ти Бо́жия!/ Сохрани́ невреди́му оби́тель Твою́ святу́ю;/ просвети́ на́ша ду́ши, помраче́нныя мно́гими грехи́;/ умири́ лю́дем жизнь на земли́ и сподо́би нас Небе́снаго Ца́рствия.

Степе́нна, 1-й антифо́н 4-го гла́са: Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и виждь, и приклони́ у́хо Твое́. Вся́кое дыха́ние:Ева́нгелие от Луки́, зача́ло 4.

По 50-м псалме́ стихи́ра, глас 6:

Торжеству́ет днесь оби́тель Жиро́вицкая,/ соверша́ющи пра́зднество/ на ме́сте том, иде́же яви́ся чудотво́рная ико́на Бо́жия Ма́тере,/ иде́же и доны́не обита́ет благода́ть Бо́жия/ и чуде́с мно́жество излива́ется всем притека́ющим/ и благоче́стно Богоро́дицу велича́ющим.

Кано́н Бо́жией Ма́тери, ра́ди ико́ны Ея́ Жиро́вицкия, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, То́я чудеса́.

В Тя, одушевле́нный Черто́же, Бог всели́ся/ и, чрез Тебе́ проше́д, яви́ся Спас ми́ра Госпо́дь,/ темже Тя, Богоро́дице, вои́стинну велича́ем.

Ты еси́, Ма́ти Бо́жия, ми́ру Предста́тельница, мо́лим Тя, Де́во:/ простри́ ру́це Свои́ богоно́снии к Сы́ну Твоему́ Боже́ственному, о нас умоля́ющи,/ да поми́лует лю́ди Своя́ погиба́ющия.

Госпоже́ Пречи́стая, Ма́ти Бо́жия, Помо́щнице на́ша всеси́льная,/ Ты бо к Тебе́ прибега́ющим ми́лость чрез ико́ны цельбоно́сныя да́руеши,/ и ны́не Тя мо́лим, Пречи́стая:/ освяти́ нас ико́ною Твое́ю чудотво́рною,/ ю́же в оби́тели Жиро́випкой просла́вила еси́.

Кто Тебе́ не ублажи́т, Пресвята́я Де́во?/ А́нгельский собо́р и челове́ческий род по до́лгу Тя прославля́ет:/ Тебе́ бо ра́ди Христо́с в мир яви́ся,/ Его́же прославля́юще, Тя велича́ем.

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́/ в Боже́ственней Твое́й сла́ве/ венце́в сла́вы сподо́би.

Ты еси́ Одиги́трия, Деви́це, Путеводи́тельница на́ша,/ не оста́ви лю́ди, Тя возлюби́вшия,/ но при́сно руководи́,/ чрез мо́ре жите́йское препровожда́ющи в Ца́рство Преве́чное Сы́на Твоего́.

Ма́ти ро́ду челове́ческому изво́лила еси́ бы́ти, Пречи́стая,/ те́мже мы, я́ко ча́да неуте́шная, к Тебе́, Засту́пнице ро́да христиа́нскаго, усе́рдно прибега́ем:/ не оста́ви нас, си́рых, Влады́чице,/ но ско́ро простри́ ру́ку Свою́ благоде́ющую,/ изыма́ющую ны от ти́ны грехо́вныя,/ утвержда́ющи на пути́ покая́ния.

Звездо́ пресве́тлая, Богоро́дице,/ ико́нами чудотво́рными мир озари́вшая,/ просвети́ наш ра́зум, грехми́ помраче́нный,/ и да́руй нам сла́вити Тя во ве́ки.

Днесь, ве́рнии, любо́вию совокупи́вшиися, Ма́терь Бо́жию просла́вим,/ пропове́дующе чудеса́ Ея́, от ико́ны Жиро́вицкия явле́нныя, и Спа́су вопие́м:/ приими́ моли́твы ро́ждшия Тя Богоро́дицы/ и спаси́ ду́ши на́ша.

Седа́лен, глас 8:

Днесь торжеству́ет све́тло оби́тель Жиро́вицкая,/ прославля́ющи Ма́терь Бо́жию, ме́сто сие́ освяти́вшею/ и о́браз Свой, я́ко дар многоце́нный, лю́дем оста́вившую./ Тем у́бо припа́даем, ве́рнии, к честне́й ико́не Влады́чицы,/ да́рует бо ве́рным освяще́ние/ и укрепля́ет сердца́ малоду́шная,/ в жизнь ве́чную приводя́щи.

Песнь 4

Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Ны́не сла́вит правосла́вных люде́й мно́жество чудеса́ Твоя́, Богоро́дице,/ зе́млю бо Ру́сскую нам озари́вшая/ и свет Правосла́вия утверди́вшая.

Купино́ неопали́мая,/ о́браз Свой во огни́ неврежде́нно сохра́ншая,/ попали́ скве́рну душ на́ших,/ к святе́й ико́не Твое́й с ве́рою прибега́ющих.

Ты, Влады́чице, ико́ну Свою́ па́ки дарова́ла еси́/ на ка́мени вели́цем во оби́тели Жиро́вицкой,/ назна́менуя нам путь спасе́ния на ка́мени ве́ры – Христе́.

Днесь А́нгели и челове́цы песнь Го́сподеви воспева́ют,/ сла́вяще Пречи́стую Де́ву Богоро́дицу.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Прииди́те, ве́рнии, ко кла́дезю ми́лостей Бо́жия Ма́тере,/ всех нас покро́вом Свои́м покрыва́ющей/ и о спасе́нии на́шем Христа́ умоля́ющей.

Кто испове́сть чудеса́ Твоя́, Богороди́тельнине?/ Да́руеши бо ве́рным ми́лости бога́тыя/ и исцеля́еши неду́ги душе́вныя и теле́сныя.

В си, притека́ющий с ве́рою к цельбоно́сному о́бразу Твоему́, Де́во,/ прие́млют освяще́ние и по́мощь в напа́стех, на ны находя́щих.

Ра́дуйся, оби́тель Жиро́вицкая, сокро́вище вели́кое зде храня́щая,/ покро́в неви́димый, свет неме́ркнущий –/ о́браз Чи́стыя Богоро́дицы.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Лику́йте, и́ноцы,/ днесь бо Небе́сная Игу́мения оби́тели Жиро́вицкия прославля́ется,/ днесь бо бога́тно ми́лости излива́ются от ико́ны Пресла́вныя Богоро́дицы.

Ты еси́ Наста́вница целому́дрия,/ Ты еси́ учи́лище благоче́стия,/ Ты еси́ любве́ неистощи́мый Исто́чник,/ святы́й о́браз нам яви́вшая.

Облагодати́ наш ум,/ ни́зу прекло́ншийся, Де́во Пречи́стая Богоро́дице,/ Тя ны́не ра́достно сла́вящих.

Воспо́йте, ве́рнии, песнь Боже́ственную,/ сла́вяще Ма́терь Бо́жию,/ Христа́ всему ми́ру роди́вшую.

Конда́к, глас 4:

Вели́чия Твоя́ кто испове́сть,/ Пресвята́я Де́во,/ Творца́ всех Христа́ Бо́га ро́ждшая?/ Еди́на бо еси́ Ма́ти и Де́ва/ Преблагослове́нная и Препросла́вленная,/ упова́ние на́ше, исто́чник благосты́ни,/ ве́рным прибе́жище и ми́ру спасе́ние.

И́кос:

От лет дре́вних ико́ною чудотво́рною оби́тель Жиро́вицкая сла́вится,/ зде бо неду́гом исцеле́ние, телесе́м здра́вие и душа́м спасе́ние соверша́ется./ Те́мже припа́дающе, ве́рнии, к святе́й ико́не Влады́чицы, вопие́м:/ Де́во Пречи́стая,/ испроси́ у Христа́ Бо́га ве́лию ми́лость/ всем, с ве́рою к Тебе́ притека́ющим,/ Ты бо ве́рным прибе́жище и ми́ру спасе́ние.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Осуши́ сле́зы ско́рбных, Ра́досте на́ша Богоро́дице,/ к Тебе́ с ве́рою приходя́щих,/ и да́руй нам по́мощь вели́кую.

Не оста́ви, Пречи́стая, ту́не рабо́в Твои́х,/ к честне́й ико́не Твое́й со стра́хом припа́дающих,/ и умоли́ о нас Всеси́льнаго Бо́га на́шаго,/ да да́рует ми́лость в День су́дный.

О́браз Твой святы́й прославля́юще, ра́дуемся, Влады́чице,/ по́моще на́ша и стено́ неруши́мая/ всех, с ве́рою к Тебе́ прибега́ющих.

О Тебе́ ра́дуемся и Тя прославля́ем, Де́во Пречи́стая,/ я́ко Невмести́маго вмести́ла еси́,/ Его́же при́сно моли́ о спасе́нии на́шем.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Ки́ими пе́сньми просла́вим Богоро́дицу,/ да́ры нам вели́кия подаю́щую,/ чудоде́йственным бо о́бразом Свои́м подвиза́ет нас к пе́нию:/ Го́спода по́йте, дела́,/ и превозноси́те во вся ве́ки.

О, безчи́сленное чуде́с мно́жество ро́ду христиа́нскому яви́вшая/ и ми́лости Своя́ неоску́дно источа́ющая,/ тем Тя пое́м во вся ве́ки.

Я́коже о́троцы неопали́мии в пещи́ яви́шася,/ та́ко де́вство в рождестве́ сохрани́ла еси́, Пречи́стая Де́во Богоро́дице,/ тем Тя пое́м во вся ве́ки.

Христа́ славосло́вим, ми́ра Спаси́теля,/ и Де́ву Пречи́стую сла́вим,/ я́ко вои́стинну Богоро́дицу.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Премилосе́рдная Влады́чице,/ приими́ моли́твы всех, Тя ны́не сла́вящих и о́браз Твой честву́ющих,/ да́руй всем оставле́ние прегреше́ний мно́гих.

Приими́ нас, пою́щих Тебе́, Де́во,/ и к о́бразу Твоему́, я́ко к зна́мению ми́лости Твоея́, притека́ющих,/ и да́руй рабо́м Твои́м ми́лости превели́кия.

Облагоуха́й нас, многогре́шных, Влады́чице, смра́ду грехо́вному прича́стных,/ изми́ нас из про́пасти поги́бельныя,/ утверди́вши во благоче́стии.

Спа́се ми́ра и Го́споди,/ приими́ песнь ра́достную,/ дал бо еси́ лю́дем Засту́пницу,/ Ю́же велича́юще, Тя при́сно сла́вим.

Свети́лен:

Спаси́ от бед рабы́ Твоя́, Премилосе́рдная Влады́чице,/ я́ко мы усе́рдно к Тебе́ во оби́тели Жиро́вицкой прибега́ем,/ я́ко к неруши́мой стене́ и предста́тельству,/ ско́рой Помо́щнице и Хода́таице жи́зни ве́чныя.

На хвали́тех стихи́ры глас 4:

Прииди́те, ве́рнии,/ в пресве́тлый пра́здник явле́ния Жиро́вицкия ико́ны Пресвяты́я Богоро́дицы,/ со Арха́нгелом Гаврии́лом песнь воспое́м, глаго́люще:/ ра́дуйся, Пресла́вная Де́во,/ ми́ру Христа́ роди́вшая;/ ра́дуйся, Премилосе́рдная Влады́чице,/ всю вселе́нную ико́нами Свои́ми освети́вшая./ Ра́дуйся, Пречи́стая Цари́це,/ яви́вшая нам, я́ко Небе́сный дар, чудотво́рную ико́ну Твою́,/ испроси́ душа́м на́шим спасе́ние ве́чное.

Вели́кою бла́гостию/ и неисче́тным милосе́рдием Твои́м, Влады́чице,/ удивля́еши нас и пресла́вными чудесы́,/ и́хже источа́ет ико́на Твоя́ свята́я во оби́тели Жиро́вицкой/ си́лою Твое́ю Боже́ственною,/ тем с весе́лием прославля́ем Тя и ублажа́ем,/ Чи́стую Богоотрокови́цу/ и Засту́пницу ро́да христиа́нскаго.

Богоневе́стная Ма́ти Де́во, Влады́чице,/ утеше́ние в ско́рбех да́руеши стра́ждущим лю́дем Твои́м,/ и́же с несумне́нною ве́рою притека́ют к чудотво́рней ико́не Твое́й,/ ю́же во оби́тели Жиро́вицкой просла́вила еси́ чудесы́./ Приими́ моли́твы и воздыха́ния на́ша,/ да́руй благоустрое́ние жи́тельству христиа́нскому,/ Це́рковь Правосла́вную наве́ки непоколеби́му сохрани́,/ оби́тель Твою́ святу́ю огради́ от всех наве́т вра́жиих,/ вся лю́ди Твоя́ в ми́ре утверди́,/ Ты бо еси́ вои́стинну непосты́дное упова́ние на́ше.

Ко Твое́й ико́не припа́даем,/ те́пле моля́щеся, Влады́чице:/ озари́ благода́тным сия́нием/ омраче́нныя грехми́ ду́ши на́ша,/ наста́ви нас на стези́ за́поведей Бо́жиих,/ облегчи́ тяготы́ жи́зни на́шея/ и исцели́ от многоразли́чных боле́зней стра́ждущия лю́ди,/ да про́чее вре́мя живота́ на́шего/ после́дуем в любви́ и и́стине,/ благода́рно воспева́я чудеса́ Твоя́,/ явле́нная нам во оби́тели Жиро́вицкой,/ и прославля́я Тя, я́ко ми́ра Благу́ю Предста́тельницу.

Сла́ва, и ны́не, глас 2:

Непроходи́мая врата́, та́йно запеча́тствованная,/ Благослове́нная Богоро́дице Де́во,/ приими́ моле́ния на́ша/ и принеси́ Твоему́ Сы́ну и Бо́гу,/ да спасе́т Тобо́ю ду́ши на́ша.

Славосло́вие вели́кое. Ектении́. Отпу́ст и час 1-й.

На Литургии́ слу́жба Богоро́дицы и Трио́ди.

По оконча́нии Литурги́и в Жиро́вицкой оби́тели соверша́ется кре́стный ход с изнесе́нием чудотво́рныя ико́ны Бо́жия Ма́тере к Явле́нскому хра́му, иде́же соверша́ется моле́бен с ака́фистом. По́сле моле́бна – моли́тва пред чудотво́рною ико́ною Жиро́вицкой Бо́жией Ма́тери.

Моли́тва

О Премилосе́рдная Госпоже́, Де́во Богоро́дице! Ки́има устна́ма прикосну́ся ко святы́ни Твое́й или́ ки́ими словесы́ испове́м щедро́ты Твоя́, лю́дем явля́емыя: никто́же бо, притека́яй к Тебе́, отхо́дит тощ и не услы́шан. От ю́ности моея́ взыска́х по́мощи и заступле́ния Твоего́ и николи́же лише́н бых милосе́рдия Твоего́. Зри́ши, Госпоже́, ско́рби се́рдца моего́ и я́звы души́ моея́ ве́си. И ны́не, коленопреклоне́нно предстоя́ пред пречи́стым Твои́м о́бразом, моле́ния моя́ приношу́ Ти: не лиши́ мя всеси́льнаго хода́тайства Твоего́ в день ско́рби моея́ и в день печа́ли моея́ заступи́ мя. То́ка слез мои́х не отврати́ся, Влады́чице, и ра́дости мое́ се́рдце испо́лни. Прибе́жище и предста́тельство бу́ди мне, Ми́лостивая, и све́та Твоего́ заря́ми ум мой просвети́. И не то́кмо молю́ Тя о себе́, но и о лю́дех, притека́ющих к заступле́нию Твоему́. Це́рковь Сы́на Твоего́ во бла́гости соблюди́ и огради́ ю от злоко́зненных наве́тов враг, возстаю́щих на ню. Архипа́стырем на́шим посли́ по́мощь Твою́ во апо́стольстве и сохрани́ их здра́вы, долгоде́нствующи, пра́во пра́вящи сло́во и́стины Госпо́дни. Па́стырем испроси́ у Бо́га, Сы́на Твоего́, ре́вность и бде́ние о ду́шах вруче́ннаго им ста́да слове́снаго и дух ра́зума и благоче́стия, чисто́ты и пра́вды Боже́ственныя им ниспосли́. Испроси́ та́кожде, Влады́чице, у Го́спода власте́м предержа́щим и градоправи́телем му́дрость и си́лу, судия́м пра́вду и нелицеприя́тие, всем же, притека́ющим к Тебе́, дух целому́дрия, смиреному́дрия, терпе́ния и любве́. Еще́ же молю́ Тя, Премилосе́рдная, осени́ страну́ на́шу кро́вом Твоея́ благосты́ни и изба́ви ю от бе́дствий стихи́йных, наше́ствия иноплеме́нников и междоусо́бных нестрое́ний, да вси, живу́щии в ней, в любви́ и ми́ре пребыва́юще, ти́хое и безмяте́жное житие́ поживу́т и, благ ве́чных моли́твами Твои́ми унасле́дивше, возмо́гут ку́пно с Тобо́ю восхваля́ти Бо́га на Небеси́ во ве́ки. Ами́нь.

И́на моли́тва

О, Всепе́тая и Преблагослове́нная Де́во, Ма́ти Христа́ Бо́га на́шего, приими́ моле́ния на́ша Тебе́ прославля́ющих, Тебе́ благодаре́ния принося́щих и почита́ющих честну́ю ико́ну сию́, ю́же от лет дре́вних в оби́тели Жиро́вицкой явле́нную. Не таи́м благодея́ния Твоя́, Богоро́дице, и па́ки испове́дуем, я́ко сия́ и́кона Твое́й благода́тной си́лой всем, с ве́рой приходя́щим к ней, источа́ет неоску́дныя ми́лости: просвеща́ет сердца́ благоче́стием, укрепля́ет си́лы осла́бленныя и исцеля́ет не́мощи духо́вныя и теле́сныя.

О, Всепе́тая Цари́ца Небе́сная, приими́ благода́рственное пе́ние и никогда́ не лиши́ нас Твоего́ Небе́снаго покро́ва и заступле́ния – вся бо мо́жет моли́тва Ма́тери к Милосе́рдному Боже́ственному Сы́ну, о сем бо вели́ком заступле́нии возвеща́ет нам сия́ ма́лая ико́на, я́ко бесце́нное сокро́вище, на сем ме́сте обрете́нное.

Благода́тная Ма́ти Бо́жия, Ты, и в огни́ о́браз сей сохра́ншая, па́ки да́руеши его́ в зало́г Твое́й бли́зости к нам и всегда́шняго благода́тнаго заступле́ния.

О, Пречи́стая Влады́чице, умягчи́ сердца́ на́ша, окамене́нныя грехо́м, да согре́тыя благода́тными Твои́ми моли́твами испо́лним Боже́ственныя за́поведи Сы́на Твоего́ Го́спода на́шего Иису́са Христа́, и та́ко дости́гнем несконча́емаго дне Ца́рствия Бо́жия, в онь же мы при́званы со все́ми святы́ми. Ами́нь.

Тропа́рь, глас 1:

Мона́шествовав богоуго́дно в Горе́ Афо́нстей,/ в моли́твах и посте́х Бо́га взыска́л еси́/ и стал еси́ прия́телище чи́стое Ду́ха,/ облистава́я ве́рным доброде́телей лучи́,/ и́миже осиява́еши, Ни́ле, вопию́щих тебе́:/ сла́ва просла́вльшему тя Бо́гу,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Конда́к, глас 3:

Е́же от земли́ явле́ние/ свяще́нных моще́й твои́х, Ни́ле,/ совозсия́ сия́нию Креста́,/ того́ бо вожделе́л еси́ те́пле от младе́нства,/ ко́сти твоя́, сораспя́вшияся Христо́ви,/ воскре́сшему я́ко преве́чному Бо́гу,/ Того́ прия́ша благода́ть.