На Го́споди, воззва́х: стихи́ры, глас 1.

Подо́бен: Всехва́льнии му́ченицы:

О́тче Феофила́кте,/ Бо́жиими стра́жами соблюда́ем,/ сохране́н был еси́ невреди́м/ и столп непоколеби́м Це́ркве яви́лся еси́,/ искуше́ньми непрекло́нен ерети́ческих ко́зней./ И ны́не моли́ся/ дарова́ти душа́м на́шим/ мир и ве́лию ми́лость.

О́тче Феофила́кте,/ Бо́га зря, блаже́нне,/ я́ко пости́жно и ви́димо,/ соедине́нием лу́чшим наслажда́яся Сего́/ и прича́стием обожа́емь,/ Еди́наго жела́ннаго и блаже́ннаго,/ ра́дуяся, прия́л еси́, иера́рше всече́стне,/ со А́нгелы ны́не водворя́яся.

О́тче Феофила́кте,/ от земли́ преста́вився, восте́кл еси́ к Небеси́,/ и в Небе́сных жи́ти селе́ниих/ сподо́бился еси́, блаже́нне,/ изгна́ния ра́ди, е́же за Христа́ претерпе́л еси́,/ Его́же ны́не моли́/ дарова́ти душа́м на́шим/ мир и ве́лию ми́лость.

Сла́ва, и ны́не, Богоро́дичен:

Неду́говавшую, Пресвята́я, лю́те/ ду́шу мою́ страстьми́ лука́выми исцели́,/ я́же Цели́теля и Спа́са/ всех Христа́ ро́ждшая,/ вся́ку я́зю исцели́вшаго/ уя́звленнаго диа́вольским зломы́слием/ и сме́рти нас изме́ншаго.

Крестобогоро́дичен:

Своего́ А́гнца/ А́гница и непоро́чная Влады́чица/ на Кресте́ я́ко ви́де, зра́ка не иму́ща ниже́ добро́ты,/ увы́ Мне, – рыда́ющи, глаго́лаше, –/ где добро́та Твоя́ за́йде, Сладча́йший?/ где благоле́пие?/ где благода́ть блиста́ющая/ о́браза Твоего́,/ Сы́не Мой любе́знейший?

Тропа́рь, глас 6:

Тая́ся, пожи́л еси́, прехва́льне,/ но Христо́с тя показа́,/ я́ко свети́ло на све́щнице мы́сленнем,/ и скрижа́ли ти вручи́ уче́ний духо́вных,/ и́миже, святи́телю Феофила́кте,/ и нас озари́.

Кано́н, его́же краегране́сие: Боже́ственнаго Феофила́кта в пе́снех восхвалю́. Кир Феофа́на. Глас 8.

Пе́снь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко еди́н сла́вно просла́вися.

Престо́лу Влады́чню, о́тче Богоно́се Феофила́кте, предстоя́,/ ве́рою соверша́ющия па́мять твою́ сохрани́.

Пома́за тя досто́йно благода́ть Ду́ха, всеблаже́нне,/ и́стины ра́ди и нра́вов твои́х ра́ди бла́гости.

Да Небе́сная, блаже́нне, получи́ши,/ земна́я попра́л еси́ вся и Христу́ Бо́гу после́довал еси́.

Богоро́дичен: Ве́сь жела́ние, И́же из чре́ва Твоего́, Богоневе́стная, благоизво́лив роди́тися,/ сла́дость е́сть и Свет незаходи́мый.

Пе́снь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Зако́ном ты повину́яся Влады́ки твоего́, сла́вне архиере́е,/ о зако́нех царе́й пребеззако́нных небре́гл еси́.

Боже́ственное изображе́ние Христо́во и Пречи́стое почита́л еси́ че́стне,/ нече́ствующих нече́стия отмета́яся.

Претерпе́л еси́ муче́ние со́вести пе́рвее по́стнически/ и ны́не му́ченическим увя́злся еси́ венце́м.

Богоро́дичен: Да стезю́, Влады́ко, к святы́ни веду́щую, пока́жеши нам,/ во утро́бу Пречи́стую всесвя́то всели́лся еси́.

Седа́лен, глас 8.

Подо́бен: Прему́дрости:

Пости́вся, преподо́бне о́тче му́дре, иера́рх пома́зался еси́,/ священноде́йствовати Боже́ственная та́инства, душа́м в снабде́ние./ Христо́ву же ико́ну почествова́в, претерпе́л еси́ изгна́ния,/ ско́рби и многовре́менное заключе́ние./ Те́мже, по кончи́не источа́я исцеле́ния,/ цели́ши стра́ждущия и просвеща́еши пою́щия,/ святи́телю Феофила́кте,/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

В напа́сти многоплете́нныя впад от враг ви́димых и неви́димых,/ бу́рею одержи́м безчи́сленных согреше́ний мои́х,/ и я́ко к те́плому заступле́нию и покро́ву моему́, Чи́стая,/ ко приста́нищу притека́ю Твоея́ бла́гости./ Те́мже, Пречи́стая, из Тебе́ воплоще́нному безсе́менно/ моли́ся приле́жно о всех рабе́х Твои́х,/ непреста́нно моля́щих Ти ся, Богоро́дице Пречи́стая,/ моля́щи Его́ при́сно/ согреше́ний оставле́ние дарова́ти/ воспева́ющим досто́йно сла́ву Твою́.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственный стра́сти Твоя́.

Пе́снь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Не устраши́лся еси́ огня́ искуше́ний, всеблаже́нне Богодохнове́нне,/ не разсла́би си́лу твою́ пи́щная сла́дость, Феофила́кте.

Храни́ло твои́м усто́м положи́ Бог, и устна́ма, преподо́бне,/ те́мже пребы́л еси́ непоколеби́м нечести́вым, ста́вшим проти́ву тебе́.

Терпя́, претерпе́л еси́ и́же на ка́мени но́зе твои́ поста́вльшаго,/ и внят тебе́ Вы́шний, Того́ о́бразу покло́ншуся.

Богоро́дичен: Изба́вльшеся Рождество́м Твои́м грехо́внаго до́лга, Пренепоро́чная,/ ра́достно воспева́ние возсыла́ем Ти, Богоневе́стная.

Пе́снь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Ру́це твои́, преподо́бне Богодохнове́нне,/ к Зижди́телю, о́тче, возде́емы, злочести́выя победи́ша.

Держа́в ру́ку твою́, Вы́шний, Богоно́се о́тче,/ наста́ви тя к Небе́сному наслажде́нию.

Стезю́ те́сную, Феофила́кте, ше́ствовав,/ к широте́ дости́гл еси́ рая́, чу́дне.

Богоро́дичен: Тя, Богоро́дицу, неве́дущии, Богома́ти,/ Све́та не и́мут ви́дети, ро́ждшагося из Тебе́, Пречи́стая.

Пе́снь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ многоми́лостиве Христе́ Бо́же наш.

Умертви́в чу́вствия воздержа́нно, над страстьми́ ца́рствовал еси́/ и ны́не, Феофила́кте, безстра́стия наслажда́ешися светлостьми́.

О́бразу Спа́сову покланя́тися вся научи́л еси́,/ де́лы и уче́нии просия́в я́ве, Феофила́кте.

О́блак тя, ту́чу жи́зни источа́ющ, Христо́с показа́, о́тче,/ святи́телю Бо́жий Феофила́кте.

Богоро́дичен: Красе́н па́че всех челове́к Сын Твой, Пречи́стая, добро́тою Божества́,/ а́ще и пло́ть нас ра́ди бы́сть.

Конда́к, глас 2.

Подо́бен: Вы́шних ища́:

Свети́льник све́тел показа́лся еси́ в конце́х,/ святи́телю Феофила́кте,/ единосу́щна Отцу́ и Ду́ху Сло́ва ты пропове́дав,/ Боже́ственных оте́ц Собо́р уясни́л еси́,/ Тро́ице уго́дник яви́лся еси́./ Е́йже предстоя́, моли́ непреста́нно о всех нас.

Пе́снь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:/ благослове́н еси́, Го́споди Бо́же, во ве́ки.

Тече́ние Боже́ственное соверши́в и ве́ру твою́ соблю́д до конца́,/ твои́х боле́зней, му́дре, прия́л еси́ вене́ц, зовы́й:/ благослове́н еси́, Го́споди Бо́же, во ве́ки.

На колесни́це Боже́ственных доброде́телей е́здяй,/ к высоте́ возне́слся еси́,/ Бо́гу нее ны́не предстои́ши, зовы́й:/ благослове́н еси́, Го́споди Бо́же, во ве́ки.

Ве́сть Созда́вый наедине́ се́рдца челове́ков, Богоно́се,/ се́рдца твоего́ Боже́ственное/ и на престо́лех уче́ния посади́, Феофила́кте треблаже́нне.

Богоро́дичен: К Тебе́ ны́не прибега́ю, Богоро́дице,/ и покро́ву Твоему́, и Боже́ственному предста́тельству,/ изба́витися от лю́тых молю́ся прегреше́ний,/ Благослове́нная Всечи́стая, Бо́га пло́тию ро́ждшая.

Пе́снь 8

Ирмо́с: Седмери́цею пе́щь/ халде́йский мучи́тель,/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Иде́же веселя́щихся жили́ще, ны́не всели́лся еси́, испове́дниче и и́стины побо́рниче,/ и свет тебе́ возсия́, я́коже пра́веднику, всему́дре,/ и му́ченическия пострада́вшу по́двиги, с ни́миже и взыва́еши:/ свяще́нницы, благослови́те, лю́дие, превозноси́те во вся ве́ки.

Терпе́ния вене́ц прия́л еси́, Богоприя́тне,/ во изгна́ния бо го́рькая всели́лся еси́,/ мзды ожида́я восприя́ти страда́ний твои́х,/ и благи́я не погреши́л еси́ наде́жды, Христу́ ны́не взыва́я:/ свяще́нницы, благослови́те, лю́дие, превозноси́те во вся ве́ки.

Светоявле́нне па́мять твоя́, Богоно́се, соверша́ется ны́не,/ испове́дания све́том светя́щися,/ святы́й бо о́браз Христо́в поче́л еси́, и Богоро́дицы, и святы́х всех,/ с ни́миже ны́не воспева́еши:/ свяще́нницы, благослови́те, лю́дие, превозноси́те во вся ве́ки.

Богоро́дичен: Богома́ти Пречи́стая, души́ моея́ я́звы и грехо́вныя стру́пы истреби́,/ Бо́га ро́ждшая, су́щаго над все́ми, Отрокови́це Чи́стая,/ от деви́ческих, Неискусобра́чная, ложе́сн,/ Его́же о́троцы благосло́вят, свяще́нницы воспева́ют,/ лю́дие превозно́сят во вся ве́ки.

Пе́снь 9

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с безпло́тными ли́ки Тя велича́юще.

Вели́ких дарова́ний, о́тче, сподо́бился еси́,/ за Христа́ бе́дствовав умо́м терпели́вым, Богоно́се Богоблаже́нне.

Нас, пою́щих тя, блаже́нне, назира́й, от напа́стей и бед избавля́я,/ ерети́ческая сокруша́я кова́рства.

Целому́дренно и пра́ведно, я́ко свяще́нник явле́н пожи́в, му́чениче, был еси́ све́тел,/ багряни́цу себе́ истка́в от крове́й твои́х.

Богоро́дичен: Я́ко у́тро, су́щим во тьме́/ и заблу́ждшим, Пра́вды Со́лнце иму́щи,/ на объя́тиих нося́щи, Де́во, Христа́, возсия́ла еси́.