Стихи́ры, глас 4.

Подо́бен: Дал еси́ зна́мение:

Боже́ственнаго позна́ния/ прие́м осия́ние,/ просвети́л еси́ о́чи, прему́дре, се́рдца твоего́,/ и пре́лести мрак отгна́л еси́ смы́сленно,/ и испове́дал еси́ Христа́,/ пло́ть прие́мша всех Го́спода./ Отону́дуже укрепля́емь/ си́лою Ду́ха, Хриса́нфе,/ мук вы́шше яви́лся еси́, всехва́льне.

Вра́жия пре́лести/ и сла́сти разжже́ния,/ я́ко паучи́ну, вмени́л еси́,/ во мра́чне же затво́ре став,/ Боже́ственным сия́нием озари́лся еси́,/ и благово́ния разу́мнаго испо́лнился еси́,/ посреди́ стоя́ смра́да,/ и приве́л еси́, я́ко невестокраси́тель всеизря́днейший,/ Христу́ неве́сту непоро́чну,/ оскверни́ти тя тща́щуюся.

Уязви́вшися раче́нием/ сладча́йшим Зижди́теля,/ пре́лести безбо́жия до конца́ уклони́лася еси́/ и черто́га Боже́ственнаго вмести́лася еси́ вну́трь,/ вневести́вшися Христу́ муче́нии мно́гими телесе́,/ Да́рия великоимени́тая,/ Боже́ственное прия́телище Ду́ха,/ страда́льцев удобре́ние/ и дев украше́ние.

Сла́ва, и ны́не, Богоро́дичен:

Не́мощь и разслабле́ние,/ Де́во Ма́ти Всенепоро́чная,/ души́ моея́ преложи́ в кре́пость и си́лу/ стра́хом и любо́вию твори́ти же/ и де́яти оправда́ния Христо́ва,/ я́ко да избе́гну огня́ нестерпи́маго/ и насле́дие Небе́сное/ и жи́знь непреходи́мую/ Тобо́ю восприиму́, веселя́ся всегда́.

Крестобогоро́дичен:

Распина́ема Христа́ Человеколю́бца/ ви́дящи, Пречи́стая,/ и ре́бра ископова́ема копие́м,/ пла́чущи, вопия́ше:/ что сие́, Сы́не Мой?/ Что Ти безблагода́тнии лю́дие возда́ша,/ за я́же сотвори́л еси́ до́брая им,/ и тщи́шися безча́дствовати Мя, вселюбе́знейший?/ Удивля́юся, Благоутро́бне,/ Твоему́ во́льному распя́тию.

Кано́н, его́же краегране́сие: Тя, златоза́рный му́чеников цвет, почита́ю . Кир Ио́сифа. Глас 4.

Пе́снь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть.

Венце́м, па́че зла́та сия́ющим, му́чениче, украша́емь/ и муче́ния сия́я добро́тами, Влады́це предстои́ши,/ о нас моля́ся, тя чту́щих, досточу́дне.

Уязви́лся еси́ сла́дким жела́нием, му́чениче, Зижди́теля твоего́/ и, кра́сная ми́ра презре́в, си́лу всю по́дал еси́ твоего́ се́рдца, Хриса́нфе,/ к Жела́емому ти усе́рдно.

Ве́рою воору́жся, низложи́л еси́ многоко́зненнаго,/ тебе́ прило́жшаго, му́чениче, же́нскою сла́стию прельсти́ти,/ и чистоты́ че́стен сосу́д, Хриса́нфе, был еси́.

Богоро́дичен: Естество́м Боже́ственным непристу́пный,/ присту́пен мне яви́ся, от Тебе́, Де́во, пло́ть прие́мь,/ Его́же Да́рия жела́ющи, терпели́вно пострада́/ и неве́стнически Тому́ приведе́ся.

Пе́снь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Зла́то, искуше́но муче́ний огне́м, был еси́,/ ца́рских, Хриса́нфе, нося́й страда́ний изображе́ние.

Ри́торов оста́вль глумле́ние,/ плени́цами улови́лся еси́ ученико́в, Хриса́нфе,/ прея́сне тебе́ умудри́вшаго.

Повину́лася еси́ рачи́телю, невестоводя́щему тя Христу́, всему́драя,/ честны́я ра́ди ве́ры рачи́теля плотска́го оста́вльши.

Богоро́дичен: Пло́тию ро́ждься из утро́бы Твоея́, Де́во, Иису́с, Чи́стая,/ неве́сту чи́сту, му́ченицу Себе́ Да́рию обруча́ет.

Седа́лен, глас 3.

Подо́бен: Красото́ де́вства:

Красне́йшую добро́ту возжеле́л еси́, и ви́димыя добро́ты прете́кл еси́,/ и приве́л еси́ Христу́ златы́ми вои́стинну словесы́ твои́ми,/ Хриса́нфе блаже́нне, Да́рию сла́вную,/ страда́ния претерпе́вшую и томи́теля посра́мльшую./ С не́юже вся ны помина́й, ве́рою соверша́ющия па́мять ва́шу.

Сла́ва, и ны́не, Богоро́дичен:

Недомы́сленно и непостижи́мо е́сть, Влады́чице Богора́дованная,/ е́же соде́ланное о Тебе́ стра́шное Бо́жие та́инство:/ и́бо Необыме́ннаго, заче́нши, родила́ еси́,/ пло́тию обложе́на от пречи́стых крове́й Твои́х,/ Его́же всегда́, Чи́стая, я́ко Сы́на Твоего́, моли́/ спасти́ся душа́м на́шим.

Крестобогоро́дичен:

Поно́сную, Ще́дре, сме́рть в распя́тии во́лею претерпе́л еси́,/ Тебе́ же ро́ждшая, Христе́, зря́щи, уязвля́шеся./ Ея́же мольба́ми за милосе́рдие ми́лости Твоея́,/ еди́не Преблаги́й Человеколю́бче Го́споди, уще́дри/ и спаси́ мир, взе́мляй ми́ра грехи́.

Пе́снь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Ду́ха облиста́ющия зари́ чи́стое се́рдце твое́/ всего́ светоза́рна тя, му́чениче, соде́лаша, усе́рдно зову́ща:/ сла́ва си́ле Твое́й, Го́споди.

Истка́нную тя Боже́ственныя благода́ти свы́ше, Творе́ц облече́ нетле́нною ри́зою,/ непоро́чно соблю́дша те́ло, блаже́нне,/ и я́ко победи́теля венча́.

До́блестию се́рдца оттря́сл еси́ сла́сти теле́сныя,/ добро́тою несравни́тельною Боже́ственною наслажда́емь,/ и, ра́дуяся, соверши́л еси́ муче́ния твоего́ по́двиг.

Обожи́лася еси́ по прича́стию, страстоно́сице, Боготво́рнаго соедине́ния/ и в Небе́сныя всели́лася еси́ черто́ги, ра́дующися,/ я́ко непоро́чная неве́ста Влады́ки тва́ри.

Богоро́дичен: Соблю́д Тя Де́ву, я́ко пре́жде рождества́,/ по рождестве́, Пречи́стая, из Тебе́ воплоти́ся недомы́сленный,/ Да́рию му́ченицу неве́сту Себе́ приводя́.

Пе́снь 5

Ирмо́с: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Восхище́н ум от ве́щных творя́,/ вя́жемь, зло́бу вра́жию, страстоно́сче, разори́л еси́, блаже́нне.

Чистоты́ рачи́тель быв свяще́ннейший,/ претвори́л еси́ де́вы огнепа́льную любо́вь ко Го́споду, прехва́льне.

Пове́ржена зря и нога́ми спопира́ема мучи́теля,/ ра́дованною мы́слию Влады́ку, преблаже́нне, велича́л еси́.

Богоро́дичен: Кто мо́жет Твое́ сказа́ти та́инство, о Всечи́стая!/ Бо́га Сло́ва, па́че ума́ бо и сло́ва, сугу́ба естество́м, родила́ еси́.

Пе́снь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Пою́ща Влады́ку всех, приснопа́мятне,/ свет с Небесе́, всю́ду тя окружи́в, просвети́,/ заключе́на в те́мнейшей хра́мине, Хриса́нфе.

Рим тя, муче́нием честны́м сла́вимаго, златови́дну я́коже звезду́, стяжа́в, му́чениче,/ украша́ется по́двиги и Боже́ственными твои́ми, Хриса́нфе, чудесы́.

Красна́, преудо́брена же и пресла́вна, му́ченице Да́рия де́ва,/ показа́вшися Сло́ву красне́йшему,/ уневе́стилася еси́ боле́зньми вся́кими теле́сными.

Богоро́дичен: Мла́да Тя я́ко Де́тища Де́ва ро́ди, Преве́чнаго Сло́ва,/ Его́же жела́юще, отрокови́цы/ Се́ю в след Тебе́, всех Царю́, неве́стнически приведо́шася.

Пе́снь 7

Ирмо́с: В пещи́ авраа́мстии о́троцы перси́дстей/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Цвет му́чеников златови́ден ты был еси́,/ собо́р же страда́льцев приве́л еси́ Христу́/ Боже́ственными словесы́ твои́ми и чудесы́, му́чениче Богоприя́тне,/ с ни́миже ве́рно тя ны́не ублажа́ем.

В хлеви́не скве́рней затворе́на, на́га тя, блаже́нне,/ Боже́ственными благово́нии, сла́вою светови́дною Иису́с просвеща́ет,/ Его́же чи́стою мы́слию, всему́дре, возлюби́л еси́.

Зве́ря храни́теля тебе́ де́вства Христо́с посла́,/ па́губу нечести́вых отгоня́ща я́ве, песнопою́щей тебе́, всехва́льная:/ благослове́н еси́ в хра́ме сла́вы Твоея́, Го́споди.

Богоро́дичен: По существу́ Боже́ственному Сый неопи́сан,/ в не́дрех Твои́х, Де́во, бы́сть по нам пло́тию опису́емь./ Благослове́на Ты в жена́х еси́, Пренепоро́чная Влады́чице.

Пе́снь 8

Ирмо́с: Ру́це распросте́р, Дании́л/ льво́в зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Тве́рдым, блаже́нне, по́мыслом проти́вяся суему́дренному,/ строга́ния претерпе́л еси́ теле́сная/ и, свеща́ми опаля́емь, неопали́мь пребы́л еси́, со о́троки воспева́я, Хриса́нфе:/ благослови́те, вся дела́ Госпо́дня, Го́спода.

Прему́дростию укра́шен Христо́вою, обуи́л еси́ нему́дрых шата́ние,/ и ум льсти́ваго посрами́л еси́, Е́ву прельсти́вшаго,/ плени́в благоче́стно сего́ ору́жие, му́дре,/ и приве́л еси́ неве́сту Бо́гу, избра́нну ве́ры ра́ди.

Едине́нием души́ плотска́го избежа́сте совокупле́ния,/ чи́стыя сосу́ды Вседержи́теля яви́стеся/ и в храм принесо́стеся Небе́сный, страда́льцы, вопию́ще Христу́:/ благослови́те, вся дела́ Госпо́дня, Го́спода.

Во́лею Бо́жиею плотски́я стра́сти удержа́вше,/ о́гнь испепели́ша мук Хриса́нф и Да́рия росо́ю Ду́ха/ и венце́в жи́зни улучи́ша, пою́ще:/ благослови́те, вся дела́ Госпо́дня, Го́спода.

Богоро́дичен: Я́ко ши́пок посреди́ те́рния жите́йскаго, Пречи́стая,/ Бог обре́т Тя, нескве́рную,/ всели́ся во утро́бу Твою́ чи́стую/ и благово́ния та́инственнаго мир испо́лни, взыва́ющий:/ благослови́те, вся дела́ Госпо́дня, Го́спода.

Пе́снь 9

Ирмо́с: Ка́мень нерукосе́чный/ от несеко́мыя го́ры Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́,/ тем, веселя́щеся, Тя, Богоро́дице, велича́ем.

Священносло́вящу Боже́ственная,/ Боже́ственное во́инство тебе́ приложи́ся, ле́сти скве́рныя изба́влься,/ и мече́м непоро́чныя же́ртвы нас ра́ди, я́ко овча́ти,/ му́ченицы Поже́ршемуся принесо́шася.

Яви́стеся посреди́ звере́й, я́коже а́гнцы, страстоте́рпцы,/ воплоще́ние пропове́дающе Боже́ственное Излия́вшагося да́же и до пло́ти,/ и боле́зньми неболе́зненную кончи́ну Боже́ственне насле́довасте.

Дне́сь све́тло пра́здновати всяк град же и страну́ Рим созыва́ет град/ Боже́ственныя стра́сти и боре́ния,/ я́ко всечрежде́ние невеще́ственное, предлага́ющий вас, святи́и.

Взя́ти бы́сте к безме́рней сла́ве, Хриса́нфе му́чениче и Да́рие,/ и вседержи́тельному Сло́ву, венцено́сцы, вку́пе предстоите́, о нас моля́щеся,/ блажа́щих вас всегда́.

Богоро́дичен: Трепе́щет по́мысл и се́рдце, помышля́юще Твое́ рождество́ недомы́слимое, Отрокови́це:/ Бо́га бо Сло́ва чревоноси́ла еси́,/ избавля́ющего Тобо́ю вся́кия ну́жды чту́щия Тя.

Пра́зднование Пресвяте́й Влады́чице на́шей Богоро́дице ра́ди ико́ны Ея́ Смоле́нския, имену́емыя «Умиле́ние»