Стихи́ры, глас 4.

Подо́бен: Зва́нный свы́ше:

Свяще́нства оде́ждею укра́шен,/ Бо́гу служи́л еси́, я́коже А́нгел,/ ве́щною нас ра́ди пло́тию я́вльшемуся,/ жряй, Васи́лие великоимени́те./ Отню́дуже, я́ко овча́ соверше́нное, закла́лся еси́,/ и чи́стая же́ртва был еси́,/ и прине́слся еси́ ны́не в Го́рний же́ртвенник./ Те́мже тя ра́достными гла́сы/ при́сно ублажа́ем, вопию́ще ти:/ моли́ непреста́нно/ спасти́ся душа́м на́шим.

Отъя́тей бы́вши ко́жи/ судо́м непра́ведным,/ боле́зни претерпе́л еси́,/ взира́я к кончи́не неболе́зненней, сла́вне,/ и к по́честем, страда́вшим угото́ванным,/ огне́м же обостря́емь, я́ко желе́зо,/ небокова́нен был еси́, всеблаже́нне, меч,/ вся посека́я вра́жия полки́./ Те́мже тя почита́ет дне́сь/ всяк благочести́вых язы́к, ра́дующся,/ страда́льче доблему́дренне,/ достосла́вне Васи́лие.

Укра́шен ра́нами Боже́ственными,/ от гра́да во град, свя́зан, текл еси́,/ связу́яй мучи́теля,/ и твои́х стоп ше́ствие исправля́я,/ и а́бие в Кесари́йский град вшед,/ в том коне́ц блаже́нный прия́л еси́,/ и ко гра́ду Небе́сному венцено́сен возше́л еси́,/ и Бо́гу Царю́ ны́не предстои́ши,/ Его́же моли́/ спасти́ и просвети́ти души́ на́ша.

Сла́ва, и ны́не, Богоро́дичен, глас и подо́бен тойже:

Я́ко во глубины́ мно́гих паде́ний/ окая́нно снидо́х/ уны́нием мои́м и ле́ностию, окая́нный,/ и недоуме́нием и отча́янием ны́не одержи́м е́смь,/ бу́ди ми по́мощь, и очище́ние,/ и спасе́ние, Пречи́стая,/ утеше́ние благосе́рднейше подаю́щи ми./ Тя молю́, и Тебе́ мил де́юся,/ и припа́даю, и ве́рою зову́ Ти:/ да не бу́ду до конца́ льсти́вому ра́дость.

Крестобогоро́дичен.

Подо́бен то́йже:

Не рыда́й Мене́, Ма́ти,/ зря́щи на Дре́ве пове́шена Твоего́ Сы́на и Бо́га,/ на вода́х пове́сившаго зе́млю неодержи́мо/ и всю тва́рь созда́вшаго,/ и́бо воскресну́, и просла́влюся,/ и а́дова ца́рствия сокрушу́ кре́постию,/ и погублю́ того́ си́лу,/ и ю́зники изба́влю от злоде́йства его́,/ я́ко Благоутро́бен,/ и Отцу́ Моему́ приведу́,/ я́ко Человеколю́бец.

Кано́н, его́же краегране́сие: Твоя́, великому́чениче, восхвалю́ боле́зни. Ио́сиф. Глас 6.

Пе́снь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь пои́м, вопия́ше.

Твоего́ ца́рствия сла́ву, Всецарю́, сла́вный Васи́лий возлюби́в,/ кре́пко на земли́ пострада́,/ и́мже Ца́рства Небе́снаго нас сподо́би.

Достохва́льное житие́ и чи́стое жи́тельство, сла́вне, подвиго́в стезя́/ насле́дника показа́ша Бо́гу и граждани́на Небе́сна тя соде́лаша.

Повину́вся Го́споду, благи́м житие́м, прему́дре, повину́л еси́ врага́/ и нога́ми попра́л еси́ сего́,/ све́тло воева́в на него́, му́чениче Васи́лие.

Крове́й тече́ньми, мы́сленнаго фарао́на погрузи́л еси́ всево́инство я́ко вои́стинну/ и к земли́ восте́кл еси́, му́дре,/ иде́же о́блак страда́льцев при́сно весели́тся.

Богоро́дичен: Отцу́ Сый Единоро́ден,/ восхоте́в, всели́ся во Твою́ пречи́стую утро́бу/ и Челове́к бы́сть, Чи́стая, за бла́гость спасти́ хотя́ челове́ки.

Пе́снь 3

Ирмо́с: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Возвы́сився, я́коже а́гня, на дре́ве, всеблаже́нне,/ строга́ния терпя́ мы́слию тве́рдою/ и низлага́я врага́ возноше́ния си́лою Боже́ственнаго Ду́ха.

Язв, му́чениче, добро́тами красне́йший яви́лся еси́ душе́ю и те́лом,/ мы́слию чи́стою благода́рственныя гла́сы воспуща́я/ Подвигополо́жнику твоему́.

Вели́ко зва́ние ища́ велему́дренным нра́вом,/ вели́кия по́двиги претерпе́л еси́, му́дре,/ и вельми́ при́сно взима́ющегося, му́чениче, смири́л еси́.

Боже́ственных храни́тель быв повеле́ний, Богому́дре,/ в темни́це затворя́емь, ве́рным отверза́я уче́ния пу́ть,/ в широту́ ра́зума вводя́щий.

Богоро́дичен: Разуме́в издале́че Твое́ зача́тие Иса́ия Ду́хом, Отрокови́це,/ уясни́ сие́, вопия́:/ се во утро́бе Де́ва Бо́га зачне́т.

Седа́лен, глас 3.

Подо́бен: Боже́ственный ве́ры:

Красота́ был еси́ Це́ркве,/ и держа́ва благоче́стия, и потреби́тель нече́стия, Васи́лие,/ и, претерпе́в му́ки, я́ко безпло́тен,/ со безпло́тными совокупи́лся еси́, ра́дуяся, му́чениче сла́вне,/ Христа́ Бо́га моли́ дарова́ти душа́м на́шим ве́лию ми́лость.

Сла́ва, и ны́не, Богоро́дичен:

Боже́ственнаго естества́ не отлу́чься,/ пло́ть быв во чре́ве Твое́м,/ но Бог вочелове́чься и пребы́сть,/ И́же по рождестве́ Ма́терь Тя Де́ву/ я́ко пре́жде рождестве́ сохрани́в Всенепоро́чну, еди́н Госпо́дь,/ Того́ приле́жно моли́ дарова́ти нам ве́лию ми́лость.

Крестобогоро́дичен:

Нескве́рная А́гница, Сло́ва нетле́нная Де́ва Ма́ти,/ на Кресте́ зря́щи пове́шена из Нея́ без боле́зни прозя́бшаго,/ ма́терски подо́бно рыда́ющи, вопия́ше:/ увы́ Мне, Ча́до Мое́, ка́ко стра́ждеши во́лею,/ хотя́ изба́вити от страсте́й безче́стия челове́ка?

Пе́снь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Ви́дев облиста́емо твое́ Боже́ственное лице́ заре́ю духо́вною,/ злочести́вый, му́чениче, дивля́шеся/ и я́ко тьмы́ служи́тель нечу́вственно объюродева́ше.

Прему́дростию лу́чшею удобря́емь,/ мудрецы́ е́ллинския Богонача́льною си́лою обуи́л еси́/ и, пострада́в терпели́вно, побе́ды вене́ц восприя́л еси́.

Просте́рта и всю́ду изчленя́ема,/ укрепля́ше тя Сло́во, И́же на Кресте́ простре́ся, Васи́лие,/ и стра́стию ве́рным дарова́в безстра́стие.

Не жру де́моном, ни устраша́юся сме́рти, ни мук ви́да, – свяще́нный взыва́ше Васи́лий, –/ Еди́наго Бо́га испове́дую, в Тро́ице познава́емаго.

Богоро́дичен: Пою́ Тя, Влады́чице, многопе́тую, благословлю́ Тя, Де́во,/ Ея́же ра́ди челове́цы вси благослови́хомся/ и кля́твы дре́вния вои́стинну изба́вихомся.

Пе́снь 5

Ирмо́с: Бо́жиим све́том Твои́м, Бла́же,/ у́тренюющих Ти души́ любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Желе́за тя́жестию сли́чен быв, я́коже легча́йшее и́го Госпо́дне носи́ти изво́лив,/ на Творца́ вы́ю свере́петвовавшаго,/ врага́ го́рдаго, му́чениче, смири́л еси́.

С весе́лием желе́зными, му́чениче, обложе́н у́зами,/ ме́ста от мест прете́кл еси́,/ си́ми, я́коже мони́сты, красу́йся, Васи́лие,/ и веселя́ Подвигополо́жника твоего́.

Кро́вными тече́нии сам себе́, му́чениче,/ обагри́л еси́ вои́стинну ца́рскую оде́жду, сла́вне,/ побе́ды же венце́м обложе́н, Христу́ сца́рствуеши, ра́дуйся, Васи́лие.

Утве́рждься благода́тию креста́,/ претерпе́л еси́ дале́кий и лю́тый пу́ть, бе́дно го́ним, поя́:/ на стези́ свиде́тельств твои́х, красу́яся и ра́дуяся, Сло́ве, пойду́.

Богоро́дичен: Превы́шшую Херуви́м, высоча́йшую Небе́с,/ лу́чшую тва́ри, му́дрых му́чеников огражде́ние,/ еди́ну Богоро́дицу пе́сньми почти́м.

Пе́снь 6

Ирмо́с: Жите́йское мо́ре/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостива.

Возвы́сився страстьми́ твои́ми и низве́рг еси́ врага́, великому́чениче сла́вне,/ и к Бо́гу преста́вился еси́, победи́тельным венча́вся венце́м/ при конце́ страда́ний, достохва́льне.

На Кресте́ Просте́ршему дла́ни тебе́ ра́ди, му́чениче му́дре, подо́бяся,/ воздви́жен быв на дре́во, терпели́вно строга́ния претерпе́л еси́,/ уязвля́я льсти́ваго твои́ми я́звами.

Связа́л еси́ безпло́тныя враги́, вя́жемь за Христа́, Васи́лие,/ отреши́вся же, сла́вне, от пло́ти,/ до конца́ разруши́л еси́ тех злоде́йства Боже́ственною благода́тию.

Богоро́дичен: Пою́ Тя, Всепе́тая, Ю́же пою́т во́инства Небе́сных чино́в, и молю́ Тя:/ стра́сти души́ моея́ исцели́, Чи́стая,/ и огня́ ве́чнаго свободи́.

Конда́к, глас 8.

Подо́бен: Взбра́нной:

Зако́нно тече́ние соверши́в/ и ве́ру соблю́л еси́, священному́чениче Васи́лие,/ сего́ ра́ди муче́ния венце́в сподо́бился еси́/ и Це́ркве столп непоколеби́м яви́лся еси́,/ Сы́на, Отцу́ Собезнача́льна и Ду́ху испове́дав,/ Тро́ицу Неразде́льную,/ Ю́же моли́ изба́витися от бед чту́щим Тя,/ да зове́м ти:/ ра́дуйся, Васи́лие Богому́дре.

Пе́снь 7

Ирмо́с: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Просвеще́нием Боже́ственныя благода́ти сия́я, тьму́ мук проше́л еси́,/ дне прича́стник быв, му́дре, невече́рняго и вопия́:/ благослове́н еси́, Бо́же оте́ц на́ших.

Водруже́но на ка́мени Боже́ственнаго ра́зума, му́дре, се́рдце твое́,/ не поколеба́ся напа́стей ве́трами, страда́льче, вопию́щее всех Изба́вителю:/ благослове́н еси́, Бо́же оте́ц на́ших.

Бу́йствуя, мучи́тель повелева́ет на реме́ние ре́зати тя, сла́вне,/ и, я́ко безпло́тна, терпя́ща тя зря, ника́коже ра́зуме вопи́ти:/ благослове́н еси́, Бо́же оте́ц на́ших.

Я́ко зла́то, в пещи́ мук просия́л еси́, жего́м,/ и, изображе́ние страсте́й Боже́ственных быв, вопия́л еси́, Васи́лие му́дре:/ благослове́н еси́, Бо́же оте́ц на́ших.

Богоро́дичен: Де́вство, по рождестве́ нетле́нно, Де́во, пребы́вшее, познава́ющи,/ из Тебе́ ро́ждшемуся па́че ума́ вопия́ла еси́ Спа́су и Бо́гу:/ благослове́н еси́, Бо́же оте́ц на́ших.

Пе́снь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Весьма́ к Бо́гу простира́емь, теле́сныя боле́зни сон вмени́л еси́,/ отню́дуже к жи́зни блаже́нней и неболе́зненней, му́чениче страстоте́рпче, ра́дуяся, преше́л еси́.

Вжили́вся любо́вию Вседержи́теля, растерза́ния пло́ти претерпе́л еси́ кре́пко/ и си́льнаго в зло́бе удавля́еши врага́ струя́ми крове́й твои́х, Васи́лие треблаже́нне.

Ца́рское украше́ние Це́ркве Христо́вы,/ страсте́й Спа́совых изображе́ние му́ченик тве́рдый,/ ве́рных утвержде́ние, пе́сньми да восхва́лится Васи́лий вели́кий.

Преми́рную сла́ву и Свет невече́рний,/ Небе́сное Ца́рство, вене́ц неувяда́емый, безпеча́льную жи́знь/ и ра́дость неизглаго́ланную, му́чениче, по кончи́не обрести́ сподо́бился еси́.

Богоро́дичен: Спасе́ния челове́ческий род сподо́бися Тобо́ю, Пречи́стая Богора́дованная:/ еди́на бо нам Спа́са родила́ еси́/ Его́же превозно́сим во вся ве́ки.

Пе́снь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тоя́ ублажа́ем.

Ви́дети святы́х кра́сныя све́тлости,/ разреши́вся от пло́ти, сподо́бился еси́, пребога́те,/ и со А́нгельскими совокупи́лся еси́ во́инствы, поя́ при́сно с ни́ми:/ Свят, Свят, Свят, Тро́ице вседе́тельная и всеси́льная.

Я́ко свет, всеблаже́нне, я́ко вели́кое со́лнце на Небеси́, Христо́вы Це́ркве ви́дим,/ страда́льческими светлолу́чными сия́нии и чудотворе́ний Боже́ственными светлостьми́/ всех озаря́еши души́, восхваля́ющих тя.

Сам ся страда́ний красота́ми всеблагосла́вно,/ Богому́дре страстоте́рпче, украси́л еси́,/ и Христу́ кра́сному предстои́ши, венце́м пра́вды ны́не обложе́н,/ те́мже тя чтим, ве́рнии, ра́дующеся.

Земля́ Боже́ственным погребе́нием освяти́ся/ свяще́ннаго и Боже́ственнаго твоего́, Васи́лие, телесе́,/ пра́ведных взыгра́шася ду́си, посреди́ себе́ дух твой, блаже́нне, иму́ще,/ с ни́миже вся ны помяни́, помина́ющия тя.

Богоро́дичен: Стра́шен о́браз рождества́ Твоего́,/ Бог бо бе, Де́во, вопло́щся, ражда́емый,/ Его́же моли́ стра́шныя му́ки вся ны изба́вити,/ ве́рою несомне́нною чту́щия Тя, Ма́ти чи́стая и неискусобра́чная.

Свята́го пра́веднаго Васи́лия, му́ченика и страстоте́рпца, Мангазейскаго чудотво́рца