НА У́ТРЕНИ

Обы́чныя стихоло́гии и седа́льны Трио́ди. Та́же псало́м 50. И кано́н Богоро́дицы на 4 и Арха́нгела на 6. Кано́н Богоро́дицы, его́же краегране́сие по алфави́ту, глас 6.

Пе́снь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь пои́м, вопия́ше.

А́нгел возопи́:

Нача́льник Вы́шних чино́в светови́ден,/ к Де́ве по́слан бы́сть дне́сь Гаврии́л,/ ра́дуйся, Неве́сто непоро́чная, – вопия́, –/ с Тобо́ю Зижди́тель всех и Госпо́дь.

Богоро́дице рече́:

Хощу́ уве́дети стра́нное твое́ лобза́ние, –/ Де́ва рече́, –/ челове́честву бо е́сть необы́чна рече́ния,/ ра́дость, ку́ю рекл еси́, рцы я́сно, науча́я Мя.

А́нгел возопи́:

Явле́ннейше Тебе́ реку́, всеблагогове́йно предстоя́, Пречи́стая,/ Ты же приклони́ у́хо Твое́, Вы́шняго си́ла на Тя на́йдет/ и вседе́тельным всели́тся Ду́хом.

Ин кано́н Арха́нгела. Творе́ние Ио́сифово. Глас 4.

Пе́снь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Я́ко Све́та су́ща к Све́ту кра́йнейшему невеще́ственными причаще́нии,/ Боже́ственнаго и невеще́ственнаго, молю́ тя, Арха́нгеле Госпо́день:/ ум мой просвети́ моли́твами твои́ми, я́ко да воспева́ю тя.

Соста́вим дне́сь лик Боже́ственный, веселя́щеся,/ пе́рваго почита́юще безпло́тных умо́в,/ неизрече́нную ра́дость возвести́вшаго, в мир прише́дшую за бла́гость.

Предста́теля тя велича́йша, и к Бо́гу засту́пника,/ и сте́ну, и утвержде́ние, Гаврии́ле, иму́ще,/ лю́бящий тя, избавля́емся от бед и вре́да змии́на, восхваляю́щии тя.

Богоро́дичен: Чи́сту Тя, Всенепоро́чную, Гаврии́л я́ко узре́,/ – ра́дуйся! Тебе́, Влады́чице, све́тло возопи́,/ браконеиску́сная, челове́ков спасе́ние, а́нгелов похвала́ и честносло́вие.

Пе́снь 3

Ирмо́с: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Богоро́дица рече́:

Че́стно веща́ти тя ны́не, А́нгеле, смотря́ю,/ ве́щно бо существо́, и тле́нно, и зе́млено/ Невеще́ственнаго ка́ко вмести́т,/ нетле́ния Све́том одева́емаго?

А́нгел возопи́:

Смы́сленно обличи́ла еси́, Чи́стая, но благоволи́ си́це,/ и да уве́рит Тя купина́, воспа́льшися, ника́коже сожже́на огне́м,/ и прообража́ющи Твое́ рождество́ несказа́нное.

Богоро́дице рече́:

Жи́зни Мне глаго́лы вопие́ши,/ но уверя́ет Мя гора́, дымя́щаяся дре́вле, прие́мшая Бо́га,/ не мо́щи ве́щному естеству́ отню́д Невеще́ственнаго прия́ти.

Ин

Ирмо́с: Твоя́ песносло́вцы, Богоро́дице,/ живы́й и ненави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Прича́стием Све́та невеще́ственнейшаго, я́ко невеще́ствен вои́стинну, Гаврии́ле,/ невеще́ственно просвеща́емь,/ Свет ви́ден был еси́ вторы́й,/ веще́ственныя всегда́ челове́ки просвеща́я, пою́щия тя.

Велича́йшаго благосла́вия сподо́бился, еси́,/ вели́кое та́инство нам откры́в, велича́йше А́нгелов,/ и́мже взя́ти бы́хом от земли́ к велича́йшей высоте́ вельми́ чту́щии тя.

Яви́ся всем с Небесе́, любо́вию и́щущим тя при́сно,/ и уста́ви бу́рю на ны дви́жимую напа́стей же и скорбе́й,/ о Гаврии́ле Архистрати́же!

Богоро́дичен: Сказу́я е́же дре́вле сокрове́нное та́инство, Отрокови́це,/ Тебе́ иногда́ Гаврии́л взыва́ше:/ ра́дуйся, Бо́жия пала́то,/ в ню́же всели́вся, вся челове́ки обожи́, я́ко Благоутро́бен.

Седа́лен, глас 4.

Подо́бен: Вознесы́йся:

Безпло́тных служи́телей ты пе́рвствуяй,/ пре́жде век определе́нное стра́шное та́инство,/ тебе́ еди́ному, Гаврии́ле сла́вне, вве́рися,/ рождество́ неизрече́нное Святы́я Де́вы,/ ра́дуйся, провозглаша́я Ей, Обра́дованная./ Те́мже тя до́лжно, ве́рнии, с весе́лием при́сно ублажа́ем.

Сла́ва, и ны́не, то́йже.

Пе́снь 4

Ирмо́с: Христо́с моя́ си́ла,/ Бог и Госпо́дь, честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

А́нгел возопи́:

Со́лнца носи́ло Твое́ бы́сть, Пречи́стая, чре́во,/ и челове́ком роди́ши Свет Невече́рний, –/ Гаврии́л прера́достно Де́ве провещава́ше.

Богоро́дице рече́:

Двере́й Мои́х отступи́,/ не веща́й глаго́лов, и́хже сбытия́ ника́коже мо́жеши показа́ти, Архистрати́же,/ что Мой ум и ду́шу смуща́еши, сия́ глаго́ля Ми?

А́нгел возопи́:

Ве́дети издале́че сподо́бишася/ та́инства глубину́ проро́ческия трубы́, Всенепоро́чная,/ Его́же слуга́ е́смь, пред дверьми́ Твои́ми предстою́.

Ин

Ирмо́с: Неизсле́дный Бо́жий сове́т,/ е́же от Де́вы воплоще́ния Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.

Стоя́л еси́, прича́стиями Богонача́льными дре́вле,/ Гаврии́ле досточу́дне, просвеща́я проро́ка Дании́ла/ и изложи́в явле́ние недове́домых ду́хом.

Усты́ бре́нными тя ра́достно, о́гненна естество́м су́ща, восхваля́ем:/ изми́ ны огня́ всегда́ паля́щаго,/ Боже́ственными, Гаврии́ле, хода́тайствы твои́ми.

Па́че со́лнца в Боже́ственную оде́жду,/ сла́вою непристу́пною блиста́ющуся, одева́емь,/ Архистрати́же служи́телей, Царю́ предстои́ши Небе́сному, веселя́ся.

Богоро́дичен: Всю Тя, ду́хом Гаврии́л преочище́ну, Всенепоро́чная, разуме́в,/ вопие́т Тебе́ я́вственно:/ ра́дуйся, кля́твы избавле́ние и пра́отцев воззва́ние.

Пе́снь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Богоро́дице рече́:

Облиста́ема тя зрю, А́нгеле, а́нгельскими светлостьми́, – Пренепоро́чная рече́, –/ оба́че стыжду́ся ско́ро ве́ровати,/ не пе́рвее уве́девши вся́кую изве́стность.

А́нгел возопи́:

Истле́вшее Зижди́тель естество́ челове́ческое зря,/ в Тя всели́тися благоизво́лил е́сть,/ сокрове́нное от веко́в, Чи́стая, стра́шне ны́не открыва́я та́инство.

Богоро́дице рече́:

Обручена́ Ио́сифу бых Аз,/ да́же до ны́не не совокуплена́, Арха́нгеле,/ иску́са убо не позна́вши му́жеска, ка́ко рожду́?/ Естества́ сопроти́вныя глаго́леши Мне глаго́лы.

Ин

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ безле́тнаго Сы́на,/ всем воспева́ющим Тя/ мир подава́ющая.

Ума́ прича́стием пе́рваго просвеща́емь,/ вторы́й ви́ден был еси́ Свет, зовы́й со безчи́сленными А́нгел чи́нми:/ Свят Оте́ц Вседе́тель, Сын Собезнача́лен и Дух Сопресто́лен.

Вид твой о́гнен, добро́та пречу́дна, вся́ку мы́сль ужаса́я,/ ве́лия сла́ва, Гаврии́ле велича́йше,/ Боже́ственных безпло́тных нача́льниче, всех удобре́ние,/ ве́рно воспева́ющих тя.

Боже́ственный я́ко ви́де тя,/ во вре́мя кажде́ния дре́вле стоя́ща, Заха́рия, быва́ет нем:/ не ве́рова бо твоему́ возвеще́нию стра́шному,/ его́же изгласи́л еси́, Гаврии́ле Архистрати́же.

Богоро́дичен: Храм свяще́ния су́щи, Всенепоро́чная, гла́сом Гаврии́ла Арха́нгела,/ во святы́х почива́ющаго родила́ еси́ Всесвята́го Бо́га,/ вся освяща́ющаго и лю́тых изыма́ющаго.

Пе́снь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

А́нгел возопи́:

Зако́ном, Отрокови́це, естества́ не рабо́тает Иису́с, Соде́тель естества́,/ и Тя да уве́рит жезл Ааро́нов, невла́жно прора́стший,/ Тя роди́ти неискусому́жно образова́вший.

Богоро́дице рече́:

Дивлю́ся, твоя́ сия́ стра́шныя и честны́я поразумева́ющи глаго́лы,/ и, ве́ровати хотя́щи, помышля́ю высоты́ вели́чество,/ и стыжу́ся вся, Архистрати́же.

А́нгел возопи́:

Не повину́ешися ли словесе́м мои́м?/ Тя прови́де Дании́л го́ру,/ от нея́же усече́ся без руки́ челове́ческия ка́мень, Чи́стая,/ хра́мы и тре́бища и́дольская истня́я крепча́йше.

Ин

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Земни́и язы́цы почести́ тя, ума́ светоза́рнаго и Небе́снаго, не возмо́гут,/ пресве́тло просвеща́ема па́че ума́/ неизрече́нно Боже́ственными светлостьми́.

Заря́ со́лнца многосве́тлая, о́гненных слуг Архистрати́же,/ светоно́сными твои́ми ко Влады́це мольба́ми/ пою́щия тя тьмы́ страсте́й исхи́ти.

Сове́ты язы́ков разори́, ве́ру правосла́вную утверди́,/ уста́ви раздо́ры церко́вныя, Арха́нгеле,/ ко всех Творцу́ твои́ми моли́твами.

Богоро́дичен: Глаго́лов Боже́ственных послушли́ва, Чи́стая, Гаврии́ловых была́ еси́/ и Пребезнача́льнаго Сло́ва пло́тию родила́ еси́,/ безслове́сия мир изба́вльшаго.

Конда́к, глас 8:

Пресве́тлыя, и Честны́я, и Вседе́тельныя,/ пренеисче́тныя и стра́шныя Тро́ицы/ Ты еси́, Архистрати́же, сла́вный служи́телю и моли́твенниче,/ ны́не непреста́нно моли́/ изба́вится нам от вся́ких бед и мук, да зове́м ти:/ ра́дуйся, покро́ве рабо́м твои́м.

Пе́снь 7

Ирмо́с: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Богоро́дица рече́:

Пресла́вно я́ко прии́дет с те́лом в мир Безпло́тный, сказа́л еси́, Гаврии́ле,/ рцы же све́тло, ка́ко Сего́ вмести́т Мое́ чре́во,/ Его́же вели́чества Небеса́ вмести́ти не мо́гут?

А́нгел возопи́:

Пове́даю Тебе́, и разуме́й, о Всенепоро́чная!/ ка́ко ски́ния иногда́ Авраа́мова прия́т и Бо́га вмести́, Пречи́стая,/ те́мже не сумни́ся ны́не,/ но любе́зно целова́ние приими́, челове́ком ра́дость.

Богоро́дице рече́:

Смуща́ет Мя ве́щи вели́чество,/ но у́бо поне́же благоволи́ Всеблаги́й в Мя всели́тися па́че ума́,/ се и душе́ю, и пло́тию храм е́смь чист, соблюде́н Ему́.

Ин

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Иоа́нново рождество́, сла́вне,/ возвести́л еси́ Заха́рии иногда́, вну́трь Боже́ственнаго хра́ма/ предстоя́щу и пою́щу Изба́вителю и Бо́гу:/ препе́тый отце́в Госпо́дь и Бог, благослове́н еси́.

Пресла́вное хра́ма твоего́ благоле́пие пресве́тло, Гаврии́ле, освяща́ет души́ ве́рных/ и повелева́ет велегла́сно вопи́ти:/ препе́тый отце́в Госпо́дь и Бог, благослове́н еси́.

Просвеща́емь прича́стием, Архистрати́же, пе́рваго Све́та та́йно,/ вторы́й Свет вои́стинну ви́ден был еси́, пою́щия просвеща́я всегда́:/ препе́тый отце́в Госпо́дь и Бог, благослове́н еси́.

Богоро́дичен: По́слан бы́сть Гаврии́л Архистрати́г,/ ра́дость возвеща́я Тебе́, Девома́ти Чи́стая,/ Ея́же ра́ди печа́ль преста́, и кля́тва вои́стинну онепло́дствися,/ и благослове́ние процвете́ ве́рным во ве́ки.

Пе́снь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти,/ Тя превозно́сим во вся ве́ки.

Гла́сом А́нгеловым Свет зачала́ еси́./ Сего́ ра́ди Тебе́ – ра́дуйся! – вси взыва́ем,/ две́ре Све́та, неудобозри́мое виде́ние,/ престо́ле Вы́шняго, Де́во Богоро́дице.

Высо́каго та́инства, ра́дуйся, соверше́ние;/ недоуме́нных веще́й, ра́дуйся, явле́ние;/ ра́дуйся, к Бо́гу челове́ков присвое́ние;/ ра́дуйся, Де́во, па́дших воззва́ние.

Светода́теля Влады́ки, ра́дуйся, Роди́тельнице;/ приста́нище су́щим в бу́ри, ра́дуйся, Всенепоро́чная;/ и́стинная и плодови́тая лозо́, ра́дуйся, возрасти́вшая безсме́ртия Грозд.

Ин

Ирмо́с: О́троки благочести́выя в пещи́/ рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Священносло́вии свяще́нными тя лю́дие свяще́ннии пою́т, веселя́щеся,/ ты бо всевино́вное Сло́во воплоща́емо, е́же по нам, Арха́нгеле,/ су́щей от нас приглаша́еши Де́ве па́че ума́ же и сло́ва./ Те́мже тя почита́ем во вся ве́ки.

Уму́ вели́кому же и пе́рвому невеще́ственно, Арха́нгеле, соединя́яся/ усты́ о́гненными твои́ми пое́ши песнопе́ние стра́шное,/ е́же пою́т вси А́нгельстии ли́цы:/ Го́спода по́йте, дела́, и превозноси́те Его́ во вся ве́ки.

Благосла́виями я́ве испещре́н Боже́ственными,/ прехо́диши Небе́сная, та́же и земна́я,/ соверша́я свяще́нная хоте́ния Христа́, всех Бо́га,/ А́нгелов нача́льнике Гаврии́ле, красота́ ве́рою при́сно тя хва́лящих.

Пло́тию по ипоста́си Сло́во челове́ком примеси́тися хотя́,/ имя́ше тя, предтеку́ща и предугото́вающа свяще́нную пала́ту, о свяще́нный Гаврии́ле,/ Го́спода по́йте, вопию́ща, и превозноси́те Его́ во вся ве́ки.

Богоро́дичен: Я́ко престо́л красе́н Царе́в,/ я́ко всех тва́рей преиму́щую,/ я́ко Пресу́щнаго еди́ну существова́вшую,/ челове́ки обожи́вшаго соедине́нием лу́чшим рождества́ неизрече́ннаго и стра́ннаго,/ благослове́нную воспои́м Де́ву.

Пе́снь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и/ Тя ублажа́ем.

Ра́дости вина́ всеблагослове́нная, ра́дуйся,/ честна́я добропло́дная и благора́сленная браздо́, Пита́теля всего́ нося́щи;/ ра́дуйся, исто́чниче живы́я во́ды, Пречи́стая, ста́мно и раю́ Бо́жий,/ ра́дуйся, Всенепоро́чная.

Душа́м же и те́лом очище́ние, ра́дуйся,/ Е́юже истека́ют челове́ком лу́чшая, вина́ всех обоже́ния;/ ра́дуйся, о́блаче ле́гкий, Со́лнца нося́щий,/ мир светолу́чными сия́ньми озаря́юща.

Пе́снь вопие́м Ти ра́достную:/ ра́дуйся, Чи́стая, му́чеников, апо́столов похвало́,/ проро́ков пресла́вное рече́ние, архиере́ев и преподо́бных;/ ра́дуйся, удобре́ние, Ея́же ра́ди Небе́сная со земны́ми ра́дуются.

Ин

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная, Богоро́дице,/ Чи́стая Присноде́во.

Предстои́ши, стра́шно престо́лу благода́ти служа́,/ и облиста́емь светоли́тии су́щими па́че ума́,/ и свяще́нно обожа́емь, и Свет зрим,/ и просвеща́я ве́рою честву́ющия тя, свяще́нне Гаврии́ле Архистрати́же.

Я́коже Не́бо, зри́шися, звезда́ми укра́шено, Боже́ственными светлостьми́,/ и, я́коже воево́да, рука́ми держи́ши скиптр пресве́тлый/ и претека́еши всю зе́млю,/ во́лю Влады́чню всегда́ творя́ и лю́тых ве́рныя изыма́я.

Утиши́ лю́тую ва́рварскую бу́рю, воздви́жемую всегда́ на рабы́ твоя́,/ церко́вныя уста́вы раздо́ры,/ пою́щим тя пода́ждь прегреше́ний избавле́ние,/ ве́рным же да́руй победи́тельная, Гаврии́ле, те́плым предста́тельством твои́м.

Предо́брая дво́ице и пресла́вная, Михаи́ле и Гаврии́ле,/ престо́лу предстоя́ще Боже́ственныя сла́вы,/ всем проси́те грехо́в проще́ния и злых премене́ния,/ я́ко предста́телие и я́ко бла́гости Влады́чни во всем подо́бящеся.

Богоро́дичен: Свет блиста́ния рождество́м Твои́м возсия́, и просвети́ всю подсо́лнечную,/ и предста́теля тьмы́ погуби́, Богороди́тельнице Всечи́стая,/ А́нгелов хвало́ и челове́ков всех спасе́ние, непреста́нными гла́сы восхваля́ющих Тя.

На хвали́тех стихи́ры на 4, глас 4.

Подо́бен: Дал еси́ зна́мение:

Ум предве́чный,/ Свет соста́вивый вторы́й,/ Гаврии́ла Тебе́ прича́стиями Боже́ственными,/ просвеща́ющего всю вселе́нную/ и ю́же от ве́ка открыва́ющего нам/ Боже́ственную и вели́кую вои́стинну та́йну,/ во утро́бе воплоща́емаго Деви́честей/ су́ща Безтеле́снаго и бы́вша Челове́ка,/ во е́же спасти́ челове́ка.

Престо́лу предстоя́ Трисо́лнечнаго Божества́/ и бога́тно просиява́я Боже́ственными светлостьми́,/ испуща́емыми непреста́нно отту́ду,/ су́щия на земли́, ра́достно лику́ющия/ и восхваля́ющия тя,/ страсте́й мглы изба́ви/ и просвеще́нием уясни́,/ Гаврии́ле Архистрати́же,/ моли́твенниче о душа́х на́ших.

Низложи́ шата́ния ага́рянская,/ на ста́до твое́ ча́сте находя́щая,/ уста́ви раздо́ры Це́ркве,/ укроти́ бу́рю безме́рных искуше́ний,/ изба́ви бед и обстоя́ний/ любо́вию чту́щия тя/ и под кров твой прибега́ющия,/ Гаврии́ле Архистрати́же,/ моли́твенниче о душа́х на́ших.

Сла́ва, и ны́не, глас 2:

Благовеству́ет Гаврии́л Благода́тней дне́сь:/ ра́дуйся, неневе́стная Ма́ти и неискусобра́чная,/ не удивля́йся стра́нному моему́ зра́ку,/ ни ужаса́йся, Арха́нгел бо е́смь./ Змий прельсти́ Е́ву иногда́,/ ны́не же благовеству́ю Тебе́ ра́дость,/ и пребу́деши нетле́нна,/ и роди́ши Го́спода, Пречи́стая.

На стихо́вне самогла́сен Трио́ди, два́жды, и му́ченичен. Сла́ва, и ны́не, Богоро́дичен.