А́ще е́сть 40-ца, пое́м Аллилу́ия. А́ще же ни, тропа́рь.

На Го́споди, воззва́х: стихи́ры, глас 4.

Подо́бен: Дал еси́ зна́мение:

Пе́рвее пости́вшися/ и пло́ти игра́ния/ воздержа́нием увяди́вши,/ страда́нием второ́е врага́ низложи́ла еси́ кова́рствия/ и побе́ду взяла́ еси́ на него́,/ о Евдоки́е Богоблаже́нная./ Тем тя венча́ за сугу́быя по́двиги/ Иису́с Человеколю́бец/ и Спас душ на́ших.

Серде́чными бразда́ми/ се́мя Боже́ственное прия́ла еси́,/ я́ко земля́ тучна́, Богодухнове́нная,/ и стори́цею воздаю́щая муче́ния клас/ прозябла́ еси́ вои́стинну/ и в жи́тницы мы́сленныя собрала́ся еси́/ си́лою Ду́ха, тя претвори́вшаго/ и измене́нием лу́чшим измени́вшаго благода́тию,/ Евдоки́е всехва́льная.

Ме́ртвыя воскреси́ла еси́/ животво́рным твои́м провеща́нием,/ Евдоки́е сла́вная,/ умертви́вши пе́рвее/ воздержа́ния боле́зньми теле́сныя стра́сти./ И ны́не живе́ши на Небесе́х с му́ченики,/ до́бре сконча́вши тече́ние страда́ния/ по́мощию Ду́ха,/ о всех, ве́рою тя воспева́ющих, моля́щи.

Сла́ва, и ны́не, Богоро́дичен, глас и подо́бен то́йже:

Ра́дуйся, солнцезра́чная луче́,/ Со́лнца незаходи́маго престо́ле,/ я́же Со́лнце возсия́вши недоуме́нное./ Ра́дуйся, у́ме, облиста́яй Боже́ственными сия́ньми,/ заре́ мо́лнийная, освети́вшая земли́ концы́,/ и́стинное зла́та блиста́ние,/ Вседо́брая и Всенепоро́чная,/ Свет Невече́рний ве́рным облиста́вши.

Крестобогоро́дичен. Подо́бен то́йже:

Распина́ема Христа́ Человеколю́бца/ ви́дящи Пречи́стая/ и ре́бра ископава́ема копие́м,/ пла́чущи, вопия́ше:/ что́ сие́, Сы́не Мой?/ что́ Ти безблагода́тнии лю́дие возда́ша,/ за я́же сотвори́л еси́ до́брая им,/ и тщи́шися безча́дствовати Мя, Вселюбе́знейший?/ Удивля́юся, Благоутро́бне,/ Твоему́ во́льному распя́тию.

Тропа́рь, глас 8:

Пра́востию у́мною ду́шу твою́ привяза́вши в любо́вь Христо́ву,/ тле́нных, и кра́сных, и вре́менных забы́тием претекла́ еси́,/ я́ко Сло́ва учени́ца:/ поще́нием стра́сти пе́рвее умертви́вши,/ страда́льчески второ́е врага́ посрами́ла еси́./ Тем Христо́с сугу́бых венца́ сподо́би тя,/ сла́вная Евдоки́е, преподо́бная страстоте́рпице,/ моли́ Христа́ Бо́га спасти́ся душа́м на́шим.

Кано́н, глас 2.

Пе́снь 1

Ирмо́с: Гряди́те, лю́дие,/ пои́м пе́снь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Душе́вное озлобле́ние услади́ти ми, Благи́й, благоизво́ли/ страстоно́сицы Твое́я Евдоки́и мольба́ми/ и сию́ воспе́ти, Сло́ве, пода́ждь ми.

Кто Твою́, Христе́, благосе́рдия пучи́ну я́ве испове́сть?/ я́ко спасе́ния соде́ла приста́нище,/ дре́вле прегреше́ний глубину́ су́щую.

Я́коже земля́ блага́я, твоя́ душа́, пресла́вная,/ до́ждь прия́т уче́ния Ге́рмана преподо́бнаго,/ и клас благоче́стия плод принесе́.

Мы́сленный у́гль в се́рдцы – Христа́ – прие́мши, всечестна́я,/ креще́нием, я́коже хвра́стие , ле́сть и плотски́я стра́сти вои́стинну попали́ла еси́.

Богоро́дичен: Богоподо́бное селе́ние вои́стинну Ты яви́лася еси́,/ Небе́с простра́ннейши и честне́йши, Богоро́дице Де́во,/ и ны́не о Тебе́ ра́дуется А́нгельский лик.

Пе́снь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Утвержде́ние, Христе́, и сте́ну необори́му/ в пе́рсех преподо́бная Твоя́ стяжа́вши,/ прило́ги не поколеба́ся врага́,/ но сего́ до конца́ потреби́.

Возжела́вши Христо́вы красоты́ и Сего́ любо́вию снеда́ема,/ страда́нием сочта́лася еси́ Ему́,/ Евдоки́е Богому́драя и всесла́вная.

Креще́нием Христо́вым, и слеза́ми твои́ми,/ и по сем кровьми́ муче́ния очи́стившися,/ храм была́ еси́ Тро́ице и ме́сто свяще́ния.

Богоро́дичен: От А́нны ра́дость ро́ду процвела́ еси́/ и ражда́еши, Де́во, Царя́,/ и сра́дуются рождеству́ Твоему́ жены́,/ разре́шшеся Тобо́ю от кля́твы.

Седа́лен, глас 8.

Подо́бен: Прему́дрости:

Просве́щшися заре́ю Боже́ственною,/ преле́стную оста́вила еси́ тьму́/ и житие́ восприя́ла еси́ с пло́тию невеще́ственное,/ благода́тьми Боже́ственными испо́лнившися Ду́ха,/ ма́лым провеща́нием ме́ртвыя воскреси́ла еси́./ Тем при кончи́не муче́ния венце́м Боже́ственне украси́лася еси́/ и льсти́ваго посрами́ла еси́, Евдоки́е равноа́нгельная,/ моли́ Христа́ Бо́га прегреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ о́гнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мляй Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди,/ ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственный стра́сти Твоя́.

Пе́снь 4

Ирмо́с: Услы́шал, Го́споди,/ слух Твоего́ смотре́ния/ и просла́вих Тя,/ Еди́не Человеколю́бче.

Безбо́жия пучи́ну реко́ю Боже́ственных твои́х крове́й,/ Евдоки́е сла́вная, изсуши́ла еси́.

Я́же пе́рвее уловля́ющая блу́дными безу́мныя мре́жами,/ ны́не к Ца́рству Бо́жию уловля́ет ве́рныя.

Е́же без пра́вды со́бранное тебе́ бога́тство тле́нное расточи́вши пра́ведно,/ нетле́ния бога́тство насле́довала еси́.

Богоро́дичен: Свет возсия́л еси́, Го́споди,/ и́же в нощи́ и тьме́ прегреше́ния,/ от Чи́стыя Де́вы воплоща́емь.

Пе́снь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Свет Невече́рний, озари́в вои́стинну сла́вную,/ от страстны́я изъя́т мглы/ и, к безстра́стия пути́ наве́д, всесве́тлу показа́.

Царя́ Бо́га, я́коже вневе́стившися Сы́ну,/ возста́вила еси́ честны́м Его́ призыва́нием/ уме́ршаго лю́те царе́ва сы́на, пресла́вная.

Му́жеским по́мыслом на суди́щи Христа́, сла́вная, испове́дуеши, Бо́га воплоще́нна,/ и, мече́м во главу́ усе́чена,/ лику́еши с му́ченики.

Богоро́дичен: Я́коже наде́жду Твое́ предста́тельство ве́рнии иму́ще/ и беда́ми го́рьких боле́зней окруже́ни,/ к Тебе́ усе́рдно, Де́во, прибега́ем, Влады́чице.

Пе́снь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Я́ко те́пла ре́вность ве́ры твоея́, му́ченице Евдоки́е,/ е́юже попра́ла еси́ неве́рных настоя́ние/ и побе́ду пожа́ла еси́ страда́ния.

Сле́зныя то́ки совоку́пльши муче́ния ка́плям кро́ве твое́я,/ еди́ну от обою́ ча́шу спасе́ния соверши́ла еси́.

Я́же пре́жде смра́да испо́лнена, мно́жеством нечистоты́ су́щи,/ ны́не благово́ния испо́лнися/ и с деви́ческими ли́ки весели́тся.

Богоро́дичен: Я́же ми́ра ра́дость,/ Богоро́дице Чи́стая, ра́дуйся,/ Тебе́ зову́щих со А́нгелом ве́рно/ Твоея́ ра́дости сподо́би и печа́ль на́шу разори́.

Конда́к, Глас 4:

Во страда́нии твое́м до́бре подвиза́вшися,/ и по сме́рти нас освяща́вши чуде́с излия́нии, всехва́льная,/ ве́рою прибега́ющий в Боже́ственную це́рковь твою́,/ и, торжеству́юще, мо́лим тя, преподо́бная му́ченице Евдоки́е:/ да изба́вимся неду́г душе́вных и чуде́с благода́ть почерпе́м.

И́кос:

Страстоте́рпческая це́рковь поро́да яви́ся ²,/ среде́ стяжа́вши сад безсме́ртия,/ те́ло сея́ честно́е,/ и́же сего́ объе́млющий плоды́ ве́твьми кре́пко освяща́ются,/ зря́ще же, удивля́ются,/ ка́ко вои́стинну ме́ртво те́ло источа́ет исцеле́ния, вразумля́я вся?/ Тем со тща́нием прииди́те, ны́не вси со мно́ю, смире́нным,/ и, очи́щше скве́рну, чуде́с благода́ть почерпе́м.

Пе́снь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́ема, поя́ху:/ благослове́н еси́, Бо́же оте́ц на́ших.

И́же дре́вле уловля́яй,/ одожде́нии зло́бными всю объе́мь тя,/ враг льсте́ц, попира́емь твои́ми нога́ми, вельми́ зва́ше:/ увы́ мне, победи́хся, – глаго́ля, – Евдоки́е прехва́льная,/ твои́м непрело́жным к Бо́гу присвое́нием, чи́стая.

Воздержа́нием мно́гим мудрова́ния твоея́ пло́ти умертви́вши,/ ме́ртвым подава́еши воскресе́ние к Бо́гу дерзнове́нием твои́м/ и к Нему́ несомне́нною, Евдоки́е, мольбо́ю твое́ю:/ и́бо во́лю твори́т боя́щихся Его́.

Стра́сти Христо́вы, я́коже украше́ние боголе́пно,/ на вы́и твое́я души́ нося́щи,/ сего́ привлекла́ еси́ нетле́ния жела́нием,/ отону́дуже тя обручи́ неве́сту, непоро́чно зову́щую:/ благослове́н Бог оте́ц на́ших.

Богоро́дичен: Пе́рвее Гедео́н, провозвеща́я Твое́, Чи́стая, Боже́ственное Рождество́ я́ве,/ окри́н  но́сит, полн воды́,/ ю́же от руна́ оцеди́:/ все бо в Тя Божество́ всели́ся, Пречи́стая,/ благослове́н Плод чре́ва Твоего́.

Пе́снь 8

Ирмо́с: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки.

Я́коже прише́дши умо́м ко и́стинному Рачи́телю, удо́бь терпи́ши плотски́я я́звы/ и огня́ го́рькую боле́знь, му́ченице всесла́вная,/ благословя́ши Христа́ во вся ве́ки.

Треволне́ния бед сокруши́ла еси́ кре́стным я́дрилом/ и душе́вное корми́ло в Ца́рствия Бо́жия приста́нища спасла́ еси́, сла́вная,/ благословя́щи Христа́ во ве́ки.

Безобра́зия страсте́й совлекла́ся еси́/ и ду́шу обложи́ла еси́ кра́сною оде́ждею безстра́стия,/ те́мже Христо́с, тя неве́сту обручи́в,/ в Небе́сныя всели́ хра́мы.

Богоро́дичен: Свобожда́ется Тобо́ю пра́баба, Богоро́дице, осужде́ния,/ и се ны́не жены́ стра́ждут за Христа́,/ и ра́дуется естество́ же́нское,/ я́коже первому́ченица вопие́т, де́ва Фе́кла.

Пе́снь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Лица́ твоего́ зре́ние духо́вною заре́ю,/ я́коже со́лнце, возсия́вши, чи́стая,/ стра́нно показа́шеся виде́ние зря́щим неве́рным,/ и́бо, я́коже возлюби́вши Христа́,/ от Него́ просла́вилася еси́ досто́йно, всечестна́я.

Души́ твое́я свещу́ вже́гши, му́ченице, еле́ем крове́й твои́х све́тло,/ ра́дующися, ны́не вошла́ еси́ в Боже́ственный неве́стник Христо́в с му́дрыми де́вами,/ с ни́миже помина́й всех, ве́рою хва́лящих тя.

От терно́выя пре́лести, я́ко ши́пок, Богому́драя, сладкоуха́нен, израсла́ еси́ красно́/ и ве́рных облагово́нила еси́ души́, Евдоки́е,/ неве́рных же отрази́ла еси́ тве́рдо смрад преле́стный,/ те́мже тя блажи́м.

Соверша́ющих любо́вию моле́бную па́мять твою́,/ к Бо́гу и Изба́вителю, му́ченице чи́стая, моли́твами от вся́ких бед спаси́/ и мою́ душе́вную скве́рну, и́же ху́до тя воспе́вшаго, отмы́й.

Богоро́дичен: О нас моля́щи Сы́на Твоего́ не преста́й, Де́во, Человеколю́бца Бо́га,/ Тя бо наде́жду стяжа́хом/ и Твои́м предста́тельством избавля́емся бед, и страсте́й,/ и прегреше́ний, и боле́зней, ве́рою Тя сла́вящии.

Преподо́бнаго Мартирия Зеленецкаго