Ве́чер, обы́чная кафи́зма. На Го́споди, воззва́х: Трио́ди самогла́сен дне, два́жды, и му́ченичен, и подо́бны три, и предпра́зднства на 4, глас 4.

Подо́бен: Я́ко до́бля:

Сокрове́нное та́инство,/ и А́нгелом неве́домое,/ Гаврии́л уверя́ет Арха́нгел/ и к Тебе́ ны́не прии́де, еди́ней нетле́нней/ и до́брей голуби́це,/ ро́да на́шего воззва́нию,/ и вопие́т Тебе́, Пресвята́я, е́же ра́дуйся:/ угото́вися сло́вом, Бо́га Сло́ва/ Твои́ми ложесна́ми прия́ти. Два́жды.

Светоно́сная пала́та/ угото́вася Тебе́, Влады́ко,/ утро́ба Чи́стая Богоотрокови́цы,/ гряди́ к Сей и сни́ди,/ уще́дри созда́ние Твое́,/ зави́стно бра́нь прие́мшее,/ и рабо́тою удержа́нное льсти́ваго,/ и добро́ту пе́рвую погуби́вшее,/ и Твоего́ спаси́тельнаго ча́ющее соше́ствия.

Гаврии́л Арха́нгел/ к Тебе́, Всенепоро́чная, явле́нно прии́дет/ и возопие́т Тебе́:/ ра́дуйся, кля́твы разреше́ние,/ па́дших воста́ние;/ ра́дуйся, еди́на избра́нная Бо́гу бы́вшая;/ ра́дуйся, колесни́це Со́лнца сла́вы:/ приими́ Безпло́тнаго,/ во утро́бе Твое́й всели́тися хотя́щаго.

Сла́ва, и ны́не, глас 2. Самогла́сен:

Благовеству́ет Гаврии́л Благода́тней дне́сь:/ ра́дуйся, неневе́стная Ма́ти и неискусобра́чная./ Не удивля́йся стра́нному моему́ зра́ку,/ ни ужаса́йся, Арха́нгел бо е́смь./ Змий прельсти́ Е́ву иногда́,/ ны́не же благовеству́ю Тебе́ ра́дость,/ и пребу́деши нетле́нна,/ и роди́ши Го́спода, Пречи́стая.

Вход. Проки́мен. И чте́ния дне, и про́чее преждесвяще́нных. А иде́же не́сть преждесвяще́нных, и пое́м подо́бны Трио́ди, 3, и предпра́зднства, 3. Сла́ва, и ны́не: Благовеству́ет Гаврии́л:

На стихо́вне самогла́сен Трио́ди и му́ченичен.

Сла́ва, и ны́не, предпра́зднства, глас 2:

Е́же от ве́ка та́инство открыва́ется дне́сь,/ и Сын Бо́жий Сын челове́чь быва́ет,/ да, ху́ждшее восприе́м, пода́ст ми лу́чшее./ Солга́ся дре́вле Ада́м,/ и бог, возжеле́в бы́ти, не бы́сть./ Челове́к быва́ет Бог,/ да бо́га Ада́ма соде́лает./ Да весели́тся тва́рь,/ да ликовству́ет естество́,/ я́ко Арха́нгел Де́ве со стра́хом предстои́т,/ и – е́же ра́дуйся – прино́сит,/ печа́ли сопроти́вное./ За милосе́рдие ми́лости вочелове́чивыйся Бо́же наш,/ сла́ва Тебе́.

НА У́ТРЕНИ

Аллилу́ия и тро́ичны гла́са. А́ще ли случи́тся в суббо́ту или́ неде́лю, на Бог Госпо́дь: тропа́рь, глас 4:

Дне́сь всеми́рныя ра́дости нача́тки/ предпра́зднственное воспе́ти повелева́ют:/ се бо Гаврии́л прихо́дит,/ Де́ве нося́ благове́стие,/ и к Ней вопие́т:/ ра́дуйся, Благода́тная,/ Госпо́дь с Тобо́ю.

И обы́чныя кафизмы, и про́чее, по обы́чаю.

Кано́н предпра́зднства со ирмосо́м на 6. И Трио́ди, по чи́ну их. Творе́ние Феофа́ново. Глас 4.

Пе́снь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть.

Мир обра́дованно весели́тся, я́ко ощути́в Госпо́дне соше́ствие на Тя:/ за милосе́рдие бо ми́лости с Небе́с схо́дит во утро́бу Де́вы всели́тися.

Се Тебе́, Цари́це, посыла́ется Боже́ственный Арха́нгел/ Царя́ всех и Бо́га провозвести́ти прише́ствие и возгласи́ти Тебе́:/ ра́дуйся, воззва́ние пра́отца.

Ста́мна светоза́рная и всезлата́я, угото́вися на прия́тие, ма́нны живо́тныя:/ на Тя бо прии́дет гла́сом А́нгеловым,/ в Тя па́че естества́ вселя́яся.

Во утро́бу Твою́ чи́стую всели́тися хо́щет Госпо́дь, живы́й при́сно на Небеси́,/ онебеси́ти бо гряде́т земноро́дных смеше́ние, в сие́ му́дре обо́лкся.

Пе́снь 3

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́:/ не́сть бо свят, па́че Тебе́, Человеколю́бче.

Земля́, я́же те́рние страсте́й печа́льне израсти́вшая, взыгра́я, лику́й:/ се бо Земледе́латель Безсме́ртный, кля́твы изыма́я тя, ны́не прихо́дит.

Боже́ственное руно́, гото́вися, Де́во нескве́рная:/ на Тя бо Бог, я́ко до́ждь, сни́дет/ изсуши́ти пото́ки преступле́ния.

Сви́тче Боже́ственный, благоукраси́ся:/ пе́рстом бо О́тчим напи́шется в Тебе́ Боже́ственное Сло́во, вопло́щся,/ безслове́сия моего́ разреша́я преступле́ние.

Златы́й свети́льниче, подыми́ О́гнь Божества́,/ возсия́ющий Тобо́ю, и свет ми́рови да́руя,/ и́мже зол на́ших тьма́ разори́тся.

Седа́лен, глас 4.

Подо́бен: Яви́лся еси́:

Наше́ствием Ду́ха Всесвята́го,/ Отцу́ Сопресто́льнаго и Единосу́щнаго,/ гла́сом Арха́нгеловым зачала́ еси́, Богороди́тельнице,/ Ада́мово воззва́ние.

Сла́ва, и ны́не, други́й, глас 3.

Подо́бен: Красоте́:

Дне́сь вся тва́рь ра́дуется,/ я́ко – е́же ра́дуйся, – Тебе́ вопие́т А́нгел,/ благослове́нная Мариа́м и Пречи́стая Ма́ти Христа́ Бо́га./ Дне́сь змии́но омрача́ется шата́ние,/ кля́твы бо пра́отчи разреши́ся соу́з./ Те́мже и по всему́ вопие́м Ти:/ ра́дуйся, Обра́дованная.

Пе́снь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Та́инство, дре́вле пре́жде век предопределе́нное,/ явле́ние начина́ет приима́ти./ Земля́ и Небе́сная, согла́сно возвесели́теся и ра́достно воскли́кните.

Пала́та вели́каго Царя́, слу́хов отве́рзи Боже́ственныя вхо́ды,/ уже́ бо прихо́дит Христо́с и́стина/ и всели́тся посреди́ Тебе́.

Прама́тернее поползнове́ние исправля́яй, Изба́витель яви́тся,/ в неискусобра́чную утро́бу вселя́яся, Тому́ воспои́м:/ сла́ва си́ле Твое́й, Го́споди.

Авваку́м Тя пронарече́ го́ру дре́вле, доброде́тельми присе́нну,/ из нея́же яви́тися хо́щет Бог наш, Де́во Всенепоро́чная,/ еди́на челове́ком исправле́ние.

Пе́снь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения,/ ве́рою воспева́ющия Тя.

О нескве́рная А́гнице!/ А́гнец бо Бо́га на́шего во утро́бу Твою́ вни́ти тщи́тся,/ взе́мляй на́ша согреше́ния.

Жезл та́йный пома́ле процвете́т, я́коже пи́шет,/ Боже́ственный цвет от ко́рене Иессе́ева нам явля́ющися.

А́нгеловым гла́сом утучни́вшися, я́ко виногра́д,/ к прозябе́нию гото́вися зре́лаго, Де́во, и нетле́ннаго Гро́зда.

Велича́йший проро́ков Иса́ия, возвесели́ся:/ Де́ва бо, о Не́йже проре́кл еси́,/ во чре́ве зачина́ет Сове́та Вели́каго А́нгела.

Пе́снь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Ра́дуйся, – Тебе́ Гаврии́л Арха́нгел веща́ет, – ра́дость бо во чре́ве Твое́м прии́меши несказа́нно,/ ю́же Е́ва преступле́нием, Де́во, погуби́.

Не опали́т, не ужаса́йся отню́д, утро́бы Твоея́ О́гнь Божества́, Отрокови́це:/ купина́ бо дре́вле Тя вообража́ше, горя́щи,/ ника́коже опаля́ема, Всечи́стая.

Гора́, ю́же Дании́л прови́де Ду́хом, ра́дуйся, Де́во,/ из Тебе́ бо мы́сленный Ка́мень усече́тся/ и сокруши́т де́монов безду́шная тре́бища.

Ми́ра Ца́рь к Тебе́ прии́дет/ и Тобо́ю примири́т поборе́нныя и прельще́нныя, Богома́ти,/ лука́вым сове́том змии́ным.

Конда́к, глас 8.

Подо́бен: Взбра́нной:

Всем земны́м нача́ло спасе́ния на́шего Ты еси́, Богоро́дице Де́во,/ Бо́жий бо служи́тель с Небе́с по́слан предста́ти Тебе́,/ вели́кий чинонача́льник Гаврии́л,/ ра́дость обра́дованную Ти принесе́./ Тем вси зове́м Ти:/ ра́дуйся, Неве́сто Неневе́стная.

Пе́снь 7

Ирмо́с: Спасы́й во огни́ авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.

Киво́т слове́сный, его́же и́стинный Законополо́жник возлюби́в,/ в Тебе́ хо́щет селе́ние сотвори́ти, благово́ния испо́лнися,/ Тобо́ю бо истле́вшияся обнови́т.

Проро́ческий Боже́ственный лик, я́коже ощути́в, Отрокови́це,/ е́же на Тя Изба́вителя ми́рное прише́ствие, зове́т Тебе́:/ ра́дуйся, всех избавле́ние,/ ра́дуйся, Еди́на челове́ков спасе́ние.

Не ужаса́йся гла́са, не диви́ся глаго́лющему:/ Бо́жий слуга́ е́сть./ Яви́ти Тебе́ прии́де та́инство, А́нгелы неизрече́нное,/ неискусобра́чная Де́во благослове́нная.

Зри́ши тва́рь всю, враго́м порабоще́ну, Де́во,/ поми́ловати же ю за милосе́рдие ми́лости хотя́ Тобо́ю благоволи́вый,/ да не у́бо словесе́м А́нгела не ве́руеши.

Пе́снь 8

Ирмо́с: Ру́це распросте́р, Дании́л/ льво́в зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́ющее/ благослови́те, вся дела́ Госпо́дня, Го́спода.

Ле́гкий о́блаче Све́та, Неискусобра́чная, угото́вися:/ се Со́лнце свы́ше превозсия́ет Тебе́ незаходи́мое,/ вма́ле у́бо в Тебе́ кры́емо, ми́ру же явля́емо/ и реша́що зло́бы омраче́ние.

А́нгелов пе́рвый служи́тель возопи́ Тебе́ глас ра́достен,/ возвеща́я Тебе́, Чи́стая, Вели́каго Сове́та А́нгела,/ воплоща́ема из Тебе́ за бла́гость, Ему́же вопие́м:/ благослови́те, вся дела́ Госпо́дня, Го́спода.

Отца́ одесну́ю седя́й,/ в Тебе́ селе́ние хо́щет сотвори́ти Пресу́щественный, Чи́стая,/ я́ко да поста́вит одесну́ю Себе́ Тя, бли́жнюю и до́брую я́ко Цари́цу,/ десни́цу же всем простре́т па́дшим и спасе́т ны.

Я́ко ши́пок удо́лий чист,/ я́ко крин благово́нен, позна́в Тя, Зижди́тель наш Госпо́дь/ ны́не возжела́ Твоея́ добро́ты, Чи́стая,/ и воплоти́тися из Твои́х крове́й хо́щет,/ я́ко да прожене́т злосмра́дие пре́лести бла́гостию.

Пе́снь 9

Ирмо́с: Е́ва у́бо неду́гом преслуша́ния/ кля́тву всели́ла е́сть,/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́/ Тем Тя вси велича́ем.

Е́ва у́бо объя́т плод, сме́рть де́лающ всегуби́тельную,/ посреди́ же Тебе́ возрасте́т Плод, беземе́ртия хода́тайствен,/ Христо́с – сла́дость на́ша, Влады́чице,/ Его́же воспева́юще, Тя сла́вим.

Преклони́в Небеса́ Твоя́, к нам сни́ди,/ престо́л уже́ угото́вася Тебе́, Сло́ве, утро́ба Деви́ча:/ на не́мже я́ко Ца́рь крепча́йший сед,/ воздви́гнеши от паде́ния десни́цы Твоея́ созда́ние.

Ни́ва несе́янная, Чи́стая, подыми́ сло́вом Небе́сное Сло́во,/ я́ко пшени́цу плодоно́сну, прозяба́ющу из Тебе́,/ и концы́ пита́ющаго хле́бом ра́зума,/ Ему́же покланя́ющеся, Тя сла́вим.

Возжела́ добро́ты Твоея́ Христо́с, Всенепоро́чная, и во утро́бу Твою́ всели́ся,/ я́ко да от страсте́й безобра́зия род челове́ческий изба́вит/ и добро́ту дре́внюю да́рует,/ Ему́же покланя́ющеся, Тя сла́вим.

А́ще случи́тся суббо́та, свети́лен.

Подо́бен: Ученико́м:

Гаврии́л, с высоты́ слете́в,/ вопия́ше – е́же ра́дуйся, Богоро́дице, я́ко прама́тернюю кля́тву потреби́в всю,/ су́щих из Ада́ма благослови́ из Нея́ прозябы́й.

Сла́ва, и ны́не, то́йже.

На стихо́вне Трио́ди самогла́сен дне, два́жды, и му́ченичен. Сла́ва, и ны́не, глас 4:

Язы́ка, его́же не ве́дяше, услы́ша Богоро́дица,/ глаго́лаше бо к Ней Арха́нгел благове́щения глаго́лы,/ отню́дуже ве́рно, прии́мши целова́ние,/ зача́т Тя, Преве́чнаго Бо́га./ Те́мже и мы, ра́дующеся, вопие́м Ти:/ из Нея́ воплоти́выйся непрело́жно Бо́же,/ мир ми́рови да́руй/ и душа́м на́шим ве́лию ми́лость.

И час 1-й, с кафизмою и с покло́ны, по обы́чаю.

Подоба́ет ве́дати, а́ще случи́тся предпра́зднство Благове́щения Пресвяты́я Богоро́дицы в суббо́ту 3-я или́ 4-я неде́ли посто́в.

В пято́к ве́чера и у́тро трезво́н в двои́ ма́лыя ко́локола, кафи́ зма рядова́я. На Го́споди, воззва́х: поста́вим стихо́в 10 и пое́м Трио́ди самогла́сен дне, два́жды, и му́ченичны 4, гла́са, и предпра́зднства на 4. Сла́ва, предпра́зднства, глас 2: Благовеству́ет Гаврии́л: И ны́не, догма́тик настоя́щаго гла́са. Вход. Све́те Ти́хий: Проки́мен, и чте́ния дне, и Да испра́вится моли́тва моя́: И про́чее преждесвяще́нных, по обы́чаю.

А́ще ли не́сть преждесвяще́нныя. На Го́споди, воззва́х: стихи́ры предпра́зднства на 6. Сла́ва, предпра́зднства. И ны́не, Богоро́дичен 1-й, гла́са. Та́же, Све́те Ти́хий: без вхо́да. Проки́мен и чте́ние дне. Посе́м Сподо́би, Го́споди: и ектения́: Испо́лним вече́рнюю: На стихо́вне самогла́сен Трио́ди, два́жды, пи́сан на Го́споди, воззва́х: и му́ченичен по гла́су его́ от Окто́иха, припе́вы же глаго́лем обы́чныя: К Тебе́ возведо́х: Сла́ва, и ны́не, предпра́зднства. По Ны́не отпуща́еши: и по О́тче наш: тропа́рь предпра́зднства. Та́же ектени́й: Поми́луй нас, Бо́же: и три покло́ны вели́кий. Посе́м Всесвята́я Тро́ице: Бу́ди И́мя Госпо́дне: три́жды. Та́же Досто́йно е́сть: и отпу́ст. Повече́рие вели́кое без покло́нов. По 1-м трисвято́м вме́сто Просвети́ о́чи мои́: глаго́лем тропа́рь предпра́зднства: Дне́сь всеми́рныя: По 2-м трисвято́м тропари́ обы́чныя: Поми́луй нас, Го́споди: Кано́н Окто́иха ме́ртвен. По Досто́йно: конда́к предпра́зднства.

На у́ трени на Бог Госпо́дь: тропа́рь предпра́зднства, глас 4: Дне́сь всеми́рный: три́жды. И обы́чныя кафизмы, и седа́льны Окто́иха, Непоро́чных за упоко́й не пое́м. Пе́сни же 7-ю и 8-ю глаго́лем пре́жде в пято́к. Кано́н предпра́зднства со ирмосо́м на 6, ирмо́с два́жды. По 3-й пе́сни седа́лен предпра́зднства. Сла́ва, и ны́не, други́й. Егда́ же приспе́ет четверопе́ сно, и пое́м кано́н предпра́зднства, я́коже предписа́ся, и Трио́ди на 8. По 6-й пе́сни конда́к предпра́зднства. По 9-й пе́сни свети́лен предпра́зднства. На стихо́вне Окто́иха, и́же на хвали́тех, настоя́щаго гла́са му́ченичны. После́дний стих оста́вим, припе́вы же глаго́лем обы́чныя: Испо́лнихомся зау́тра ми́лости Твоея́: И бу́ди све́тлость: Сла́ва, и ны́не, глас 4, предпра́зднства: Язы́ка, его́же не ве́дяше: и про́чая. На часе́х тропа́рь и конда́к предпра́зднства. На Литурги́и: Бла́женны предпра́ зднества, пе́сни 3-я и 6-я. По вхо́де тропа́рь хра́ма Христо́ва, а́ще е́сть, та́же тропа́рь предпра́зднства. Сла́ва, конда́к хра́ма. И ны́не, предпра́зднства.

* * *

А́ще предпра́зднство Благове́щения случи́тся в Неде́лю Крестопокло́нную.

В суббо́ту на вели́цей вече́рни на Го́споди, воззва́х: стихи́ры воскре́сны 3, Креста́ 4, и предпра́зднства 3. Сла́ва, Креста́. И ны́не, Богоро́дичен 1-й гла́са. На лити́и стихи́ра хра́ма. Сла́ва, Креста́. И ны́не, предпра́зднства, пи́сана на Го́споди, воззва́х: На стихо́вне стихи́ры Окто́иха. Сла́ва, Креста́. И ны́не , предпра́зднства, пи́сана на у предпра́зднства, у́трени на стихо́вне, глас 4: Язы́ка, его́же не ве́дяше: На благослове́нии хле́бов тропа́рь Богоро́дице Де́во, ра́дуйся: два́жды, и Креста́, еди́ножды. Посе́м Бу́ди И́мя Госпо́дне: три́жды.

На у́трени на Бог Госпо́дь: тропа́рь воскре́сен, два́жды. Сла́ва, Креста́. И ны́не, предпра́зднства, и про́чее обы́чно. Кано́н воскре́сен, со ирмосо́м на 4, и Креста́ на 6, и предпра́зднства на 4. Катава́сия: Боже́ственнейший преобрази́: По 3-й пе́сни конда́к предпра́зднства и седа́льны Креста́. Сла́ва, и ны́не, предпра́зднства. По 6-й пе́сни конда́к и и́кос Креста́. По 9-й пе́сни свети́лен воскре́сен. Сла́ва, Креста́. И ны́не, предпра́зднства. Про́чее же на хвали́тех и на Литурги́и все, я́коже пи́сано в неде́лю 3-ю поста́, на ряду́ в 40-це, то́чию на часе́х тропа́рь воскре́сен глаго́лем непреме́нно. Сла́ва, Креста́ и предпра́зднства глаго́лем, пременя́юще. По О́тче наш: кондаки́ на всех часе́х Креста́ и предпра́зднства, пременя́юще, глаго́лем.

* * *

А́ще случи́тся предпра́зднство Благове́щения в понеде́льник 4-я, или́ 5-я, или́ 6-я неде́ли поста́.

В неде́лю ве́чера стихи́ры на 10: Окто́иха покая́нны 4, и Трио́ди 3, и предпра́зднства 3. Сла́ва, и ны́не, предпра́зднства. Вход. Проки́мен вели́кий. Та́же Сподо́би, Го́споди: И покло́ны 3. Посе́м ектения́: Испо́лним вече́рнюю: Та́же пое́м стихо́вну в Трио́ди с припе́вы обы́чными. Сла́ва, и ны́не, предпра́зднства, и́же пи́сан на у́трени на стихо́вне, глас 4: Язы́ка, его́же не ве́дяше: Посе́м Ны́не отпуща́еши: и трисвято́е с покло́ны. И тропари́ Богоро́дице Де́во, ра́дуйся: с покло́ны и Го́споди, поми́луй, 40, и Небе́сный Царю́: По Честне́йшую: 3 покло́ны, и отпу́ст.

На у́трени пое́м Аллилу́ия и тро́ичны гла́са. И обы́чныя кафи́змы. И про́чее пое́м на у́трени и на часе́х, я́коже указа́ся пре́жде в ряду́ в 24-й де́нь.

* * *

А́ще случи́тся предпра́зднство Благове́щения в сре́ду 4-ю поста́, е́же е́сть Крестопокло́нную.

Ве́чер пое́м и зау́тра все с покло́ны, во вто́рник ве́чера кафи́зма рядова́я. На Го́споди, воззва́х: стихи́ры Трио́ди 3 и предпра́зднства 3. Сла́ва, Креста́. И ны́не, предпра́зднства, проки́мен, и чте́ния дне. На стихо́вне стихи́ры Трио́ди. Сла́ва, Креста́. И ны́не, предпра́зднства. На у́трени в сре́ду кано́н Трио́ди, со ирмосо́м на 6, и предпра́зднства на 4. А иде́же трипе́снец, пое́м кано́н Креста́ со ирмосо́м на 4 и предпра́зднства на 2, по два тропаря́ за еди́н. И трипе́снца на 8, последи́ ирмо́с трипе́снца. По 3-й пе́сни конда́к предпра́зднства и седа́лен дне. Сла́ва, и ны́не, предпра́зднства. По 6-й пе́сни конда́к и и́кос Креста́. По 9-й пе́сни свети́лен тро́ичен гла́са. На хвали́тех стихи́ры Креста́, пи́саны на Го́споди, воззва́х: оста́вшия. На стихо́вне Трио́ди. Сла́ва, Креста́. И ны́не, предпра́зднства. На 1-м часе́ быва́ет поклоне́ние Креста́, по обы́чаю.

Си́це пое́м слу́жбу предпра́зднства и Креста́ и в пято́к, а́ще случи́тся, тоя́жде седми́цы.

* * *

А́ще случи́тся предпра́зднство Благове́щения в четверто́к 4-я неде́ли посто́в.

В сре́ду ве́чера, на Го́споди, воззва́х: стихи́ры на 10: Трио́ди на 6 и предпра́зднства на 4. Сла́ва, Креста́, глас 8: Дне́сь неприкоснове́нный: И ны́не, предпра́зднства. Та́же вход, и про́чая преждесвяще́нных. На у́трени же пое́м все, я́коже указа́ся на ряду́ в 24-й де́нь.

Подоба́ет ве́дати, а́ще случи́тся Благове́щение Пресвяты́я Богоро́дицы в сре́ду 5-я неде́ли посто́в.

И предпра́зднства Благове́щения пое́м слу́жбу, стихи́ры и кано́н, в понеде́льник на ряду́, Мине́и же свята́го пое́м на повече́рии.

* * *

А́ще ли же случи́тся предпра́зднство Благове́щения Пресвяты́я Богоро́дицы в четверто́к 5-я неде́ли посто́в.

И пое́м слу́жбу предпра́зднства, стихи́ры и кано́н, напреди́ в сре́ду на ряду́ вели́каго ра́ди кано́на. Рядова́го же свята́го слу́жбу та́кожде пое́м на повече́рии.

* * *

А́ще случи́тся предпра́зднство Благове́щения Пресвяты́я Богоро́дицы в неде́лю 4-ю или́ 5-ю посто́в.

На вели́цей вече́рни стихи́ры воскре́сны 3, и восто́чны 3, Анато́лиевы, и предпра́зднства 4. Сла́ва, предпра́зднства. И ны́не, Богоро́дичен 1-й гла́са. И про́чее по обы́чаю.

На у́трени тропа́рь воскре́сен, два́жды. Сла́ва, и ны́не, предпра́зднства. И про́чее воскре́сно. Кано́н воскре́сен со ирмосо́м на 4, и Богоро́дицы на 2, и Трио́ди на 4, и предпра́зднства на 4. Катава́сия: Отве́рзу уста́ моя́: По 3-й пе́сни конда́к предпра́зднства и седа́лен Трио́ди. Сла́ва, и ны́не, предпра́зднства. По 6-й пе́сни конда́к воскре́сен и и́кос. По 9-й пе́сни свети́лен воскре́сен. Сла́ва, и ны́не, предпра́зднства. И про́чее, по обы́чаю, воскре́сно и Трио́ди. На 1-м часе́ тропа́рь воскре́сен. Сла́ва, предпра́зднства. И ны́не, Богоро́дичен часо́в. Святы́х же слу́жбы – Иоа́нна Ле́ствичника и Мари́и Еги́птяныни – в сия́ неде́ли оставля́ются и пою́тся, егда́ екклисиа́рх разсу́дит.

* * *

А́ще случи́тся предпра́зднство Благове́щения в суббо́ту 5-ю ака́фиста.

В пято́к ве́чера, на Го́споди, воззва́х: пое́м стихи́ры Трио́ди, самогла́сен дне, два́жды, и му́ченичен, и ака́фиста на 4, и предпра́зднства 3. Сла́ва, предпра́зднства. И ны́не, ака́фиста. Вход. Проки́мен, и чте́ние дне. Да испра́вится моли́тва моя́: и про́чее преждесвяще́нных.

Четверопе́снец же Трио́ди пое́м на повече́рии. На у́трени на Бог Госпо́дь: тропа́рь ака́фиста, два́жды. Сла́ва, и ны́не, предпра́зднства, и обы́чныя кафи́змы. Кондаки́ и и́косы ака́фиста по чи́ну их. Кано́н предпра́зднства со ирмосо́м на 6 и ака́фиста на 8. Катава́сия: Отве́рзу уста́ моя́: По 3-й и по 6-й пе́сни кондаки́ и и́косы по обы́чаю. По 9-й пе́сни свети́лен ака́фиста, два́жды. Сла́ва, и ны́не, предпра́зднства. На хвали́тех стихи́ры ака́фиста на 4, глас 4. Подо́бен: Я́ко до́бля: Сла́ва, и ны́не, глас 4: Язы́ка, его́же не ве́дяше: Славосло́вие вели́кое, и отпу́ст.

А́ще предпра́зднство Благове́щения случи́тся в суббо́ту Ла́зареву.

Пое́тся предпра́зднства слу́жба, пре́жде в четверто́к тоя́же седми́цы, я́коже указа́ся сего́ ме́сяца в 24-й де́нь.

Преподо́бнаго Заха́рии По́стника, в Да́льних пеще́рах почива́ющаго