На Го́споди, воззва́х: стихи́ры, глас 4.

Подо́бен: Я́ко до́бля:

Сла́сти теле́сныя/ и пло́ти непоко́рное/ браздо́ю повину́л еси́, блаже́нне,/ воздержа́ния, благода́тию/ победи́в, я́ко храбр, всеору́жие врага́/ си́лою Ду́ха./ Отону́дуже во́ждь был еси́ мона́шествующих,/ после́дующих всему́дрому твоему́/ и Боже́ственному, Ни́коне,/ пропове́данию всегда́.

Возсия́в, я́ко со́лнце/ от восто́ка, всесла́вне,/ вселе́нную всю просвети́л еси́/ чуде́с све́тлостию,/ лик приводя́, я́ко звезд све́тлых, ученико́в твои́х./ С ни́миже пострада́л еси́ кре́пко,/ мечи́ посе́чени бы́вше,/ и в ру́це Всецаря́ Влады́ки/ ва́ша ду́ши положи́вше.

Ни глад, ниже́ беда́,/ ни нагота́, ни ра́ны,/ ни ну́жнейшая вои́стинну сме́рть,/ вас от любве́ Бо́жия отлучи́ти возмо́же, досточу́днии,/ но я́ко а́гнцы на заколе́ние,/ па́стырю после́дующе,/ от за́пада к невече́рнему поко́ю Небе́снаго Ца́рствия,/ страстоте́рпцы венцено́сцы, достиго́сте.

Сла́ва, и ны́не, Богоро́дичен, глас и подо́бен то́йже:

Осужде́ния изба́ви, Пресвята́я Богоневе́сто,/ и лю́тых прегреше́ний/ смире́нную мою́ ду́шу,/ и сме́рти измени́ моли́твами Твои́ми,/ и да́руй оправда́ние получи́ти/ в де́нь испыта́ния,/ е́же получи́ша святы́х собо́ри,/ покая́нием очище́на мя пре́жде конца́ покажи́/ и сле́зными излия́нии.

Крестобогоро́дичен. Подо́бен то́йже:

На Кресте́ Тя я́ко узре́/ пригвожде́на, Го́споди,/ А́гница и Ма́ти Твоя́ дивля́шеся,/ и – что виде́ние сие́, – взыва́ше,–/ Сы́не вожделе́ние?/ Сия́ Тебе́ неве́рный собо́р воздаде́ беззако́нный,/ и́же мно́гих Твои́х чуде́с наслади́выйся./ Но сла́ва неизглаго́ланному/ соше́ствию Твоему́, Влады́ко.

Кано́н, его́же краегране́сие: Побе́ды тя пою́ тезоимени́таго, блаже́нне. Ио́сиф. Глас 4.

Пе́снь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть.

Победи́в по́стническими боре́нии злоко́зненнаго,/ страда́льческими венча́лся еси́ добро́тами/ и Бо́гу ны́не предстои́ши, о нас моля́ся, преподо́бне Ни́коне, чту́щих тя.

Кре́постию на́ша не́мощи укрепи́вшаго возмо́г,/ хра́бровал еси́ пре́жде во бране́х, блаже́нне,/ и, победи́тель быв, ко Христо́ву притека́еши креще́нию.

Украша́ется муче́нием полк блаже́ннейший учени́к твои́х,/ пе́рвее му́дре просве́щся поще́ньми,/ и сугу́быми боре́нии сугу́бы венцы́ исплете́.

Богоро́дичен: Две́рь, я́же к нам Твоего́, Го́споди, сни́тая, восто́ка,/ и со́лнце, и свет, та́инственно Тя нарица́емаго,/ преесте́ственно роди́ сугу́ба естество́м Невме́стнаго.

Пе́снь 3

Ирмо́с: Весели́тся о Тебе́ Це́рковь Твоя́, Христе́, зову́щи,/ Ты моя́ кре́пость, Го́споди,/ и прибе́жище, и утвержде́ние.

Во́инством духо́вным препоя́сан,/ во́инство Боже́ственное, му́чениче Христо́в,/ вооружи́л еси́ ко страда́ния подвиго́м.

Распя́в по́стнически пло́ть, всесла́вне, пе́рвее,/ потща́лся еси́ страда́льческими ра́нами полки́ де́монския победи́ти.

От восто́ка я́коже звезда́, Ни́коне, прише́д,/ к за́падом дости́гл еси́./ Те́мже, у́мер, заше́л еси́ и ко Христу́ возсия́л еси́.

Богоро́дичен: Му́ченический собо́р Твое́ изобрази́ заколе́ние, Влады́ко,/ позна́в Тя, из Отрокови́цы Неискусобра́чныя прозя́бша.

Седа́лен, глас 4.

Подо́бен: Ско́ро предвари́:

Преподо́бно пожи́в, Ни́коне, пе́рвее,/ и лик собра́л еси́ богопокори́вых,/ благоче́стно при́сно после́дующих тебе́,/ от восто́ка к за́паду возсия́в, я́коже со́лнце светоно́сно, заря́ми страда́ний,/ гно́ем крове́й ва́ших пре́лесть ума́ливше.

Сла́ва, и ны́не, Богоро́дичен:

Де́во Всенепоро́чная, Я́же пресу́щнаго Бо́га ро́ждшая,/ со безпло́тными Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́внию пою́щим Тя по до́лгу, еди́на Всепе́тая.

Крестобогоро́дичен:

На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий,/ ма́терски рыда́ющи, веща́ше:/ что но́вое и стра́нное сие́ чу́до, Сы́не Мой?/ Ка́ко, Жи́знь всех, вкуша́еши сме́рти,/ оживи́ти ме́ртвыя хотя́, я́ко Милосе́рд?

Пе́снь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Наслажда́яся Боже́ственными светоли́тии,/ мук тече́ния неуя́звлен преше́л еси́, Ни́коне досточу́дне,/ и побе́ды вене́ц, му́чениче, досто́йно прия́л еси́.

Светлостьми́ преле́потствуя до́блестей, я́ко по́стник подвиза́лся еси́,/ стра́сти умертви́в пе́рвее теле́сныя страда́нием,/ второ́е де́монския победи́в полки́.

Ополчи́стеся ору́жием благоче́стия на врага́, Богому́дрии,/ и сме́ртию сла́вною безсме́ртие прия́сте, пою́ще:/ сла́ва си́ле Твое́й, Го́споди.

Богоро́дичен: Я́ко су́щу тва́ри вы́шшу Творе́ц возлюби́в,/ о Де́во Ма́ти, показа́ Тя Ма́терь Себе́,/ Ю́же ны́не мо́лят собо́ри страда́лец благоле́пнейше.

Пе́снь 5

Ирмо́с: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Боже́ственным твоея́ ма́тере благоповину́яся наказа́нием,/ си́лу, Ни́коне, име́л еси́ кре́стную во бране́х, науча́яся лу́чшим.

Житие́ твое́, све́том доброде́телей просвеща́емо,/ страда́ние, я́коже у́тварь благоле́пнейшу, и́мать,/ Богому́дре и всече́стне.

Зако́ном Богонача́льным повину́ющеся, му́ченицы хра́бровавше/ и беззако́нныя Бо́жиим посо́бием му́жески победи́ша.

Богоро́дичен: Свет безле́тный нам, О́тчее сия́ние, родила́ еси́,/ подле́тна бога́тством бла́гости бы́вша, Всенепоро́чная.

Пе́снь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х/ исте́кшею Кро́вию.

От восто́ка, я́ко многосве́тлое устреми́лся еси́ со́лнце,/ я́коже зве́зды, Богому́дре, ученико́в лик приводя́,/ и за́пад заря́ми ва́шими просвети́сте.

Ка́плями крове́й твои́х, му́чениче, потопи́л еси́ многобо́жия мо́ре/ и глубино́ю по́двигов удави́л еси́ зло́бы лю́таго обрета́теля и вселука́ваго.

Я́ко крин, во страда́нии зла́чнем процвето́сте,/ и, я́ко сладкодыха́тельный шипо́к, на́ша сердца́ благоуха́ете муче́ния добро́тами,/ страстоте́рпцы Богодухнове́ннии.

Богоро́дичен: Храм Тя Бо́жий и пала́ту одушевле́нну/ страстоте́рпческий лик позна́в, Влады́чице,/ мо́лит Тя, еди́ну жен отъе́мшую поноше́ние.

Пе́снь 7

Ирмо́с: В пещи́ авраа́мстии о́троцы перси́дстей/ любо́вию благоче́стия па́че,/ не́жели пла́менем, опаля́еми, взыва́ху,/ благослове́н еси́ в хра́ме сла́вы Твоея́, Го́споди.

Па́че зла́та искуси́вся, Богому́дре, ра́нами,/ столп доброде́телей яви́лся еси́, напа́дания де́монская отгоня́:/ благослове́н еси́, Бо́же мой, – зовы́й, – и Го́споди оте́ц на́ших.

По кончи́не пове́ржено твое́ те́ло, му́чениче, та́йно,/ Боже́ственныя врачева́ний испуща́я све́тлости, отго́нит вред де́монский,/ тя явле́ннаго Боже́ственною сотво́ршаго си́лою.

Ве́сь Боже́ственными наслади́вся, всеблаже́нне, манове́ньми,/ те́ло ра́нам пре́дал еси́ терпели́вно,/ венцено́сец же предстои́ши Вседержи́телю на Небесе́х,/ я́ко возжела́л еси́, преподо́бне.

Па́стырь ове́ц сый слове́сных, му́дре,/ от волко́в мы́сленных соблю́л еси́ невре́дны/ и, с си́ми в Небе́сней огра́де всели́вся,/ жела́ний кра́йнейшему предстои́ши.

Богоро́дичен: Не растли́в де́вства Твоего́, Отрокови́це, отню́д,/ Сло́во О́тчее в Тя всели́ся,/ и му́чеников лобыза́ лик сла́вный,/ Богоро́дицу Тя чи́стую пропове́дающ.

Пе́снь 8

Ирмо́с: Ру́це распросте́р, Дании́л/ льво́в зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Недрема́нно нося́ сия́ние се́рдца твоего́,/ напое́но слез пото́ки, преподо́бне, и страда́ния кровьми́,/ в нерукотворе́ннем, вопия́, черто́зе ны́не живе́ши:/ благослови́те, вся дела́ Госпо́дня, Го́спода.

Красота́ по́стников и страда́льцев показа́лся еси́, преподо́бне,/ во обои́х бо благоизво́лил еси́ побе́ды,/ удивля́юща мы́сль, на еди́наго врага́, Ни́коне, стяжа́в, зовы́й:/ благослови́те, вся дела́ Госпо́дня, Го́спода.

Кровьми́ напои́в души́,/ на ре́вность Боже́ственную воздви́гл еси́, преподо́бне,/ я́звами муче́ний уязви́л еси́ де́монское ополче́ние,/ и́стинствующее в тебе́ зва́ние показа́в, вопия́:/ благослови́те, вся дела́ Госпо́дня, Го́спода.

Богоро́дичен: Расто́ргни вери́ги тя́жкия мои́х паде́ний,/ испра́вльши Ада́мово испаде́ние, Чи́стая, рождество́м Твои́м, Всепе́тая,/ и светово́ждствуй вопи́ти чи́стым по́мыслом:/ благослови́те, вся дела́ Госпо́дня, Го́спода.

Пе́снь 9

Ирмо́с: Ка́мень нерукосе́чный/ от несеко́мыя го́ры – Тебе́, Де́во,/ краеуго́льный отсече́ся,/ Христо́с, совокупи́вши разстоя́щаяся естества́./ Тем, веселя́щеся, Тя, Богоро́дице, велича́ем.

Ви́де тя, ран добро́тою процве́тша/ и багряни́цею от му́ченических твои́х крове́й Венцеда́тель облече́на,/ с собо́ю всели́, Ни́коне, Боже́ственно ра́дующася.

Я́ко предо́бра твоя́ любо́вь, ю́же к Бо́гу стяжа́л еси́, Ни́коне,/ и те́пла твоя́ ре́вность, огне́м Боже́ственным распала́ема,/ и чу́дно страда́ние, с Небе́сными тя совоку́пльшее.

Тя на церко́вней высоте́ со́лнце посреди́ иму́ще лик страстоте́рпец,/ я́ко зве́зды, све́том Боже́ственным облиста́ни,/ лучеда́тными сия́нии вселе́нную всю озаря́ют.

Взя́лся еси́ ко оби́телем нетле́нным,/ лик сугубосо́тный, му́чениче, страда́льцев предста́вив Венцеда́вцу,/ с ни́миже помина́й соверша́ющих дне́сь свяще́нную ва́шу па́мять.

Богоро́дичен: Све́та жили́ще яви́лася еси́ нас ра́ди из Тебе́ я́вльшагося,/ Его́же непреста́нно моли́ просвети́ти мы́сли на́ша,/ благоче́стно пою́щих Тя, Де́во Ма́ти Всенепоро́чная.

Преподо́бнаго Ни́кона, игу́мена Пече́рскаго в Бли́жних пеще́рах почива́ющаго