НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 1:

Подо́бен: Небе́сных чино́в:

Ны́не свяще́нных ли́цы,/ благогове́ющии к Бо́жией Ма́тери,/ к весе́лию град Кострому́/ и все ве́рных сосло́вие созыва́ют,/ возвеща́юще Цари́цы/ пречу́днаго о́браза прише́ствие.

И́же чуде́снаго о́браза/ Пресвяты́я Влады́чицы прише́ствие/ благогове́йно прие́мше костромсти́и жи́телие,/ ра́дости вси испо́лнишася,/ призыва́юще всех дне́сь/ на пресла́вное торжество́ Бо́жия Ма́тере.

С чи́нми свяще́нных дне́сь/ вси ро́ди ве́рных,/ духо́вно возвесели́мся,/ пра́зднующе торжество́ Бо́жия Ма́тере,/ яви́вшия нам исто́чник приснотеку́щий,/ незави́стныя да́ры исцеле́ний всем подаю́щий.

Фео́доре, му́чениче Христо́в, ра́дуйся и лику́й,/ при́сный ра́бе Всепе́тыя Богома́тере,/ я́ко сподо́бился еси́ Тоя́ всечестну́ю ико́ну/ рука́ми твои́ми подъя́ти и носи́ти,/ и гра́ду Костроме́ препода́ти,/ я́коже ца́рскую у́тварь, во спасе́ние душ на́ших.

Сла́ва, и ны́не, глас 5:

Собра́вшеся, ве́рнии,/ на свяще́нное торжество́ Де́вы дне́сь,/ предочи́стим себе́ воздержа́нием страсте́й,/ да Чи́стую нескве́рными устна́ми/ и чи́стыми душа́ми воспои́м, глаго́люще:/ ра́дуйся, преизя́щная красото́ и похвало́ гра́ду Твоему́,/ ему́же при́сно благотвори́ши,/ хода́тайствующи поле́зная всем,/ с любо́вию к Тебе́ притека́ющим.

На стихо́вне стихи́ры, глас 2:

Подо́бен: Егда́ от Дре́ва:

Я́коже прише́ствием иногда́ ко Елисаве́ти Твои́м/ подви́гла еси́ со устна́ми утро́бу ея́/ к благохвале́нию Твоего́ вели́чия,/ си́це и ны́не прише́ствие Твоего́ чуде́снаго о́браза пра́зднующим/ моли́твами Твои́ми исхода́тайствуй благода́ть,/ по достоя́нию воспева́ти Тебе́, Благослове́нная в жена́х,/ и благослове́нный Плод чре́ва Твоего́.

Стих: Слы́ши, Дщи, и ви́ждь,/ и приклони́ у́хо Твое́.

Не́сть красна́ пе́снь во усте́х гре́шника,/ я́коже рече́ Писа́ние,/ сего́ ра́ди мы, пови́ннии мно́гим грехо́м,/ не мо́жем досто́йне пе́ти Тя,/ просла́вленную от Сама́го святы́х Святе́йшаго./ Те́мже, припа́дающе, вопие́м Ти:/ Богоблаже́нная Отрокови́це,/ Твои́м предста́тельством соде́лай,/ да чи́стыми душа́ми и нескве́рными устна́ми/ блажи́м Тя, Всепе́тая.

Стих: Лицу́ Твоему́ помо́лятся/ бога́тии лю́дстии.

А́ще к высоте́ вели́чия и чуде́с Твои́х/ не довле́ет немощно́е сло́во и ум наш,/ Ты Сама́, Богороди́тельнице,/ недостаю́щее в нас Твои́ми моли́твами ны́не испо́лни,/ хода́тайствующи нам благода́ть Ду́ха,/ И́мже дви́жима иногда́, Предте́чева Ма́ти/ Тебе́, Ма́терь Го́спода Своего́,/ по достоя́нию велича́ше.

Сла́ва, и ны́не, глас то́йже. Самогла́сен:

Се покровительствуемый Тобо́ю град наш,/ в ра́дости Ду́ха срета́я/ све́тлый пра́здник прише́ствия всечестна́го Твоего́ о́браза,/ уми́льно взыва́ет к Тебе́:/ прииди́ к нам, Богоневе́сто,/ и неви́димо ста́ни с на́ми,/ вложи́ пе́ние во уста́ на́ша/ и о́ным предначни́ торжество́.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 2:

Прииди́те, во гла́се шу́ма пра́зднующаго/ воспои́м Го́сподеви, благоде́явшему нам/ явле́нием чуде́снаго о́браза Пречи́стыя Твое́й Ма́тере,/ прославля́юще бога́тство благода́ти,/ ю́же предста́тельством Ей излива́ет оби́льно на всех,/ под се́нь пречи́стаго лица́ Ей притека́ющих с ве́рою,/ Иису́с Человеколю́бец и Спас душ на́ших.

Благознамени́т бы́сть Изра́илю де́нь о́ный,/ в о́ньже руко́ю Моисе́я от го́рькия рабо́ты/ во блаже́нную свобо́ду лю́дие Бо́жии превожда́хуся,/ си́це и нам ра́достен наро́читый сей пра́здника на́шего де́нь,/ я́ко дне́сь руко́ю вели́каго кня́зя и госуда́ря Михаи́ла Фео́доровича,/ от Костромски́х преде́лов возсия́вшаго,/ вся страны́ оте́чествия на́шего умири́л еси́, Го́споди,/ да в ми́ре глубо́це прославля́ем/ благодея́ния и чудеса́ Твоя́.

Благи́ми преизоби́ловаше дом Аведда́ров,/ бы́вшу иногда́ в нем киво́ту Заве́та,/ си́це и град наш, име́я в селе́нии свое́м о́браз Твой, Влады́ко,/ и Пренепоро́чныя Твое́й Ма́тере,/ наслажда́ется бога́тых даро́в Твои́х,/ прославля́я Тебе́ и с Тобо́ю ро́ждшую Тя,/ Хода́таицу ми́ра и ве́лия ми́лости.

Обраща́ше дре́вний Изра́иль в бе́гство полки́ чужи́х,/ разруша́ше тверды́ни иноплеме́нных градо́в/ и всех бе́дственных нахожде́ний от супоста́тов свобожда́шеся,/ егда́ ковче́г Заве́та имя́ше с собо́ю,/ но сия́ дре́вния ми́лости/ преизоби́льно удиви́л еси́ на гра́де на́шем, Го́споди,/ егда́ нечести́вых, на достоя́ние Твое́ ополчи́вшихся,/ стра́хом смяте́нных бежа́ти вспя́ть сотвори́л еси́,/ пода́в нам зна́мение по́мощи Твое́й/ в чуде́снем о́бразе одушевле́ннаго Твоего́ Киво́та.

Сла́ва, и ны́не, глас 6:

Соше́дшеся, ве́рных совокупле́ния,/ на пресла́вное торжество́ Бо́жия Ма́тере,/ согла́сно воспои́м благодея́ния и чудеса́,/ и́миже Госпо́дь сла́вы,/ в Костромски́х преде́лех пресла́вно просла́ви Ма́терь Свою́:/ се бо чуде́сно яви́ нам всечестны́й о́браз Ея́./ О Всеми́лостивый Го́споди, Спа́се наш,/ творя́й чудеса́ еди́н,/ удиви́ и на нас дре́вния о́ныя Твоя́ ми́лости,/ име́я о сем моля́щую Тя Ма́терь Твою́,/ Покрови́тельницу и Предста́тельницу гра́ду на́шему,/ да и мы, при́сно исполня́ющеся благи́х до́му Твоего́,/ непреста́нно славосло́вим Тя,/ я́ко Ты вчера́, и дне́сь, и во ве́ки То́йже еси́/ Госпо́дь и Промысли́тель наш.

Вход. Проки́мен дне. И чте́ния три.

Бытия́ чте́ние (глава́ 28):

Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо,/ за́йде бо со́лнце./ И взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица, утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней./ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся,/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки./ И возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще по́йдеши./ И возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко е́сть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ не́сть сие́, но дом Бо́жий,/ и сия́ врата́ Небе́сная.

Проро́чества Иезеки́илева чте́ние (главы́ 43 и 44):

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, – глаго́лет Адонаи́ Госпо́дь./ И обрати́ мя на пу́ть врат святы́х вне́шних, зря́щих на восто́ки,/ и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Госпо́день.

При́тчей чте́ние (глава́ 9):

Прему́дрость созда́ Себе́ дом/ и утверди́ столпо́в се́дмь./ Закла́ Своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же е́сть безу́мен, да уклони́тся ко Мне./ И тре́бующим ума́ рече́:/ прииди́те, яди́те Мой хлеб и пи́йте вино́,/ е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Да́ждь прему́дрому вину́, и прему́дрший бу́дет,/ сказу́й пра́ведному, и приложи́т приима́ти./ Нача́ло прему́дрости – страх Госпо́день,/ и сове́т святы́х – ра́зум./ Разуме́ти бо зако́н – по́мысла е́сть блага́го,/ сим бо о́бразом мно́гое поживе́ши вре́мя,/ и приложа́тся тебе́ ле́та живота́.

На лити́и стихи́ры, глас 4:

Воспои́м, ве́рнии,/ е́же о нас Бо́жия благоволе́ния вели́чие,/ я́ко прославля́яй разли́чными чудеса́ми/ вся прочил ца́рствия Своего́ преде́лы Госпо́дь/ призре́ и на смире́ние нас, рабо́в Свои́х,/ дарова́в гра́ду на́шему зна́мение Своего́ всеблага́го о нас про́мысла,/ чудеса́ми зде просла́вленный Ма́тере Свое́я о́браз./ К нему́ же ве́рою притека́юще,/ прие́млем вся блага́я и спаси́тельная нам,/ да та́ко непреста́нно Богома́терь воспева́ем/ и рожде́ннаго из Нея́ Иису́са Человеколю́бца/ и Спа́са душ на́ших.

Глас 6:

Пусты́ня, я́же бя́ше несла́вна и ненаселе́нна иногда́,/ за явле́ние Бо́жие,/ многоча́стне и многообра́зне в ней бы́вшее,/ сотвори́ся напосле́док духо́вный прему́дрости учи́лищем/ изше́дшему из Еги́пта Изра́илю,/ си́це и мра́чное о́ное ме́сто,/ в не́мже Богосве́тлое пречестна́го сего́ явле́ние о́браза/ просия́ благода́тию изображе́ннаго на нем Богомладе́нца Иису́са/ и предста́тельством Пречи́стыя Ма́тере Его́,/ устро́ися ме́сто душе́внаго све́та,/ и́мже духо́внии вожди́ но́ваго Изра́иля наставля́ются/ ко благоуспе́шному вели́каго сего́ служе́ния прохожде́нию./ Сего́ ра́ди мы, бра́тие,/ толи́кую благода́ть пресла́вным явле́нием/ чуде́сныя о́ныя ико́ны прие́мше,/ благодари́м Просвети́теля душ на́ших/ и, благодаря́ще, воззове́м к Нему́:/ Све́те И́стинный,/ просвеща́яй вся́каго челове́ка, в мир гряду́щаго,/ не преста́й при́сно исполня́я/ све́том Твоего́ Богоразу́мия,/ всех му́дростию, я́же свы́ше просвеща́емых,/ во сла́ву И́мене Твоего́/ и во спасе́ние Твоего́ достоя́ния.

Сла́ва, и ны́не, глас 8:

Отку́ду мне сие́,/ да прии́де Ма́ти Го́спода моего́ ко мне? –/ взыва́ше Ти Предте́чева ма́ти,/ егда́ пришла́ еси́ в дом Заха́риин, Богома́ти Пресвята́я,/ си́це покрови́тельствуемый Тобо́ю град Кострома́,/ прие́мля во преде́лы своя́ всечестны́й о́браз Твой/ и с ним бога́тство Небе́сных дарова́ний,/ а́ки Са́мую Тебе́ и с Преве́чным Сыно́м Твои́м прие́млет,/ те́мже от неопи́санныя ра́дости недоумева́ет:/ ко́е сло́во принесе́т Ти?/ Или́ ки́ими благохвале́нии/ в настоя́щий пра́здник явле́ния ико́ны Твое́я возвели́чит Тя?/ То́чию, е́же Дух Святы́й подаде́ иногда́ Елисаве́ти,/ сие́ вси взыва́ем о Тебе́:/ отку́ду нам сие́?/ Я́ко цельбоно́сным о́бразом Свои́м/ прии́де Ма́ти Го́спода на́шего,/ ра́ди Ей подаю́щаго нам мир и ве́лию ми́лость.

На стихо́вне стихи́ры самогла́сны, глас 4:

Принесе́нней бы́вшей ико́не Твое́й,/ Богоневе́сто Влады́чице,/ во избра́нный Тобо́ю град наш,/ испо́лнися премно́гия ра́дости вели́кий кня́зь/ и с ним вси ве́рных собо́ри,/ иму́ще с собо́ю ви́димое зна́мение Твоего́ о себе́ благоволе́ния,/ на не́же и мы, сы́нове их, при́сно взира́юще,/ в весе́лии ду́ха прино́сим Ти дне́сь и Ро́ждшемуся из Тебе́/ пе́снь благодаре́ния.

Стих: Слы́ши, Дщи, и ви́ждь,/ и приклони́ у́хо Твое́.

Во о́блацех дугу́ положи́вый во зна́мение/ ве́чнаго земли́ с Небеса́ми ми́ра,/ дал еси́ зна́мение гра́ду на́шему/ Твоего́ всеблага́го о нем про́мысла, Влады́ко,/ утверди́в во святи́лищи его́ всечестну́ю Ма́тере Твое́я ико́ну,/ на ню́же взира́юще,/ воспомина́ем ве́лия и пресла́вная,/ я́же явля́еши к нам,/ ве́рою Тя сла́вящим/ и к хода́тайству Ма́тере Твое́я с любо́вию прибега́ющим.

Стих: Лицу́ Твоему́ помо́лятся/ бога́тии лю́дстии.

Волсви́, прише́дшии от восто́к,/ узре́вше звезду́,/ е́юже ко Христу́, в Вифлее́ме ро́ждшемуся, руководи́ми бя́ху,/ возра́довахуся ра́достию ве́лиею зело́,/ си́це и мы, ве́рнии, ра́дуемся и весели́мся,/ благодаря́ще Человеколю́бца Иису́са,/ чрез ико́ну сию́ руководя́щаго нас к позна́нию/ вочелове́чения Его́ от Пренепоро́чныя Де́вы.

Сла́ва, и ны́не, глас 8:

Во днех пло́ти Твое́я, Иису́се, Бо́же наш,/ преде́лы еди́наго до́му Изра́илева/ проше́л еси́, благоде́тельствуя/ и всяк неду́г и вся́ку я́зю в лю́дех Его́ исцеля́я,/ но по днех воста́ния Твоего́,/ седя́ со Отце́м на Престо́ле вели́чествия,/ вся концы́ вселе́нныя сла́вою чуде́с/ и мно́жеством щедро́т Твои́х испо́лнил еси́,/ и́хже да не лише́н бу́дет и смире́нный град наш/ со преде́лы свои́ми:/ благоволи́л еси́, дарова́в ему́ пречестну́ю Ма́тере Твое́я ико́ну,/ всем, к Тебе́ ве́рою приходя́щим,/ ощуща́ти Боже́ственную Твою́ си́лу./ Сего́ ра́ди и мы, толи́ких дарова́ний наслажда́ющеся,/ в ра́дости Ду́ха взыва́ем Ти:/ Сла́ва Твоему́ всеблаго́му о нас про́мыслу,/ Еди́не Человеколю́бче и Спа́се душ на́ших.

На благослове́нии хле́бов тропа́рь, глас 4:

Прише́ствием честны́я Твое́й ико́ны, Богоотрокови́це,/ обра́дованный дне́сь Богохрани́мый град Кострома́,/ я́коже дре́вний Изра́иль к киво́ту Заве́та,/ притека́ет ко изображе́нию лица́ Твоего́/ и воплоти́вшагося от Тебе́ Бо́га на́шего,/ да Твои́м Ма́терним к Нему́ предста́тельством/ при́сно хода́тайствуеши всем,/ под се́нь кро́ва Твоего́ прибега́ющим,/ мир и ве́лию ми́лость. Три́жды.

НА У́ТРЕНИ

На Бог Госпо́дь: тропа́рь Богоро́дице, три́жды.

По 1-м стихосло́вии седа́лен, глас 4:

Сте́кшеся на пе́ния чуде́с,/ я́же хода́тайством Ма́тере Свое́й яви́ нам Госпо́дь сил во сла́ву Свою́,/ подража́им, ве́рнии, Богоприя́тней доброде́тели Ея́,/ к сла́ве рожде́ннаго из Нея́ Иису́са Человеколю́бца и Спа́са душ на́ших.

Сла́ва, и ны́не:

Я́коже светоно́сное Тя и сладча́йшее со́лнце,/ о́бразом Твои́м Боже́ственным, Влады́чице, приходя́щую,/ град наш Кострома́ со стра́хом срета́ет,/ освяща́ющую на́ша души́ и телеса́,/ тем мо́лим Тя, Всепречи́стая:/ моли́твами Твои́ми изба́ви ны от вся́кия напа́сти и ско́рби.

По 2-м стихосло́вии седа́лен, глас 3:

Блаже́нно чре́во бы́сть При́сноде́вы, я́ко носи́вшее Христа́ Госпо́дня,/ блаже́ннейше же бы́сть се́рдце Ея́, я́ко прие́мшее и сохра́ншее словеса́ Его́./ Сего́ ра́ди и мы, бра́тие, подража́им любому́дрию Ея́,/ да услы́шим от пра́веднаго Мздовоздая́теля сла́дкий о́ный глас:/ блаже́ни и вы, слы́шавшии сло́во Мое́ и сохра́ншии е.

Сла́ва, и ны́не:

Я́ко иму́щая неизрече́нное дерзнове́ние/ к ро́ждшемуся из Тебе́ Христу́, Бо́гу на́шему,/ Пречи́стая Госпоже́ Богоро́дице,/ умоли́ поми́ловатися всем, пою́щим Боже́ственная вели́чия Твоя́/ и испове́дающим Тя, су́щую Богороди́тельницу.

По полиеле́и седа́лен, глас 6:

Да хода́тайство, е́же о нас, Богоотрокови́цы де́йственно бу́дет ко Спа́су на́шему,/ сотвори́м вся, от Христа́ повеле́нная,/ и та́ко моли́твы Ма́тере Его́ исхода́тайствуют блага́я,/ исполня́ющая лише́ние и нищету́ душ и теле́с на́ших.

Сла́ва, и ны́не:

Боже́ственный приспе́ пра́здник чуде́снаго прише́ствия во град Кострому́/ пречестны́я ико́ны Всенепоро́чныя и еди́ныя Богома́тере,/ ра́дуйтеся у́бо вси, христоимени́тии лю́дие,/ прославля́я вели́чие Бо́га на́шего/ и Того́ ро́ждшия Присноде́вы.

Степе́нна, 1-й антифо́н, 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь, и приклони́ у́хо Твое́.

Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 8: Отку́ду мне сие́ –да прии́де Ма́ти: (зри сла́вник на лити́и).

Кано́н, глас 4.

Пе́снь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Отве́рзый ум разуме́ти Писа́ния ученико́м Твои́м, Го́споди,/ отве́рзи ны́не и на́ша се́рдца к разуме́нию вели́чия Твоего́ и Ма́тери Твое́я,/ да с Не́ю боголе́пно просла́вим Тя.

Отве́рсти толку́щим две́ри милосе́рдия Твоего́ обетова́вый, Влады́ко наш,/ отве́рзи нам утро́бы человеколю́бия Твоего́,/ име́я на сие́ моля́щую Тя Хода́таицу.

Отве́рсто иногда́ бы́сть моли́твою Илиино́ю не́бо,/ ра́ди беззако́нновавшаго Изра́иля заключе́нное,/ отве́рст да бу́дет и нам, гре́шным, вход в Небе́сная предста́тельством Твои́м, Богороди́тельнице.

Отве́рзшая рождество́м Твои́м врата́ ве́чная, Богороди́тельница Пречи́стая,/ отве́рзи предста́тельством Твои́м заключе́нный серде́ц на́ших две́ри,/ да Сын Твой и Бог наш вни́дет и освяти́т я.

Пе́снь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Твоего́ плотска́го е́же на земли́ смотре́ния/ да незабве́нно устро́иши воспомина́ние,/ дал еси́ нам, Влады́ко, ико́ну Твою́ и Ро́ждшия Тя,/ те́мже, взира́юще на о́ную, мо́лим Тя:/ руководи́ нас к позна́нию и любле́нию Тебе́,/ воплоще́ннаго Бо́га и Спа́са душ на́ших.

Твое́й Пренепоро́чныя Ма́тере всечестны́й о́браз любо́вию объе́млюще,/ из глубины́ души́ взыва́ем к Тебе́, живу́щему на Небесе́х:/ начертай на сердца́х на́ших кра́сный о́браз доброде́телей Ея́,/ да велича́ем Тя, Го́спода и Спа́са на́шего.

Твой всечестны́й о́браз, Влады́чице, любе́зно на земли́ прие́млюще,/ зове́м к Тебе́, су́щей во сла́ве Небе́сней,/ да при́сно хода́тайствуеши нам благода́ть мы́слити и твори́ти досто́йная Твоего́ вели́чия,/ е́же сотвори́ Тебе́ Си́льный.

Твои́х благодея́ний воспомина́ние, твори́мое дне́сь,/ дви́жет се́рдца на́ша со устна́ми к благохвале́нию Твоему́, Влады́чице,/ но сотвори́, да и кра́сный лик Твои́х доброде́телей/ привлече́т се́рдца на́ша к любле́нию и подража́нию о́ных.

Седа́лен, глас 3:

Си́и лю́дие устна́ми чтут Мя,/ се́рдце же их дале́че отстои́т от Мене́, –/ рече́ иногда́ Госпо́дь Вседержи́тель ко иуде́ем, еди́н вне́шний вид благоче́стия являющим./ Но да и мы не ту́южде с ни́ми ча́сть и осужде́ние восприи́мем, бра́тие,/ вся́чески блюде́мся дел, подо́бных лицеме́рию./ Сего́ ра́ди пра́зднующе и всечестны́й сей пра́здник,/ да не яви́мся извне́ то́чию благогове́йны,/ вну́трь же у́ду зли и нечести́вии пред Испыту́ющим се́рдца и утро́бы,/ в простоте́ се́рдца поклони́мся Ему́, я́коже Сам рече́, Ду́хом и и́стиною,/ да та́ко бу́дем подража́тели Пресвяте́й Де́ве,/ в Не́йже не глас то́чию, но па́че душа́ велича́ше Го́спода/ и Дух ра́довашеся о Бо́зе, Спа́се Свое́м.

Сла́ва, и ны́не:

Покро́ва Твоего́ Боже́ственнаго, Пречи́стая Богоро́дице Влады́чице,/ да не отъи́меши от рабо́в Твои́х, мо́лят Тя уго́дники Сы́на Твоего́:/ великому́ченик Фео́дор Стратила́т и преподо́бнии чудотво́рцы,/ страны́ сея́ Костромски́я и Га́лицкия засту́пницы,/ и́хже моле́ние приими́ и поми́луй нас.

Пе́снь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спа́се зову́щия:/ сла́ва, Христе́, си́ле Твое́й.

Седя́й одесну́ю Престо́ла вели́чествия на высо́ких,/ снизше́л еси́ к дольнейшим страна́м земли́/ и, всели́вся во чре́во смиренному́дрыя Ма́тере Де́вы,/ яви́л еси́ ми́рови, я́ко Ты призира́еши на смире́ние рабо́в Твои́х/ и дае́ши им благода́ть Твою́,/ ея́же да и мы сподо́бимся, да́руй нам бы́ти ревни́тели смиренному́дрыя Твое́я Ма́тере.

Седя́й на ра́мех Херуви́м и Серафи́м,/ благоволи́л еси́ пло́тию седе́ти на объя́тиях Чисте́йшия Отрокови́цы,/ да сим пока́жеши нам, я́ко Ты, Свя́те святы́х,/ обита́еши в сердца́х еди́ных любителей чистоты́ и целому́дрия,/ его́же рачи́тели и нас покажи́ моли́твами ро́ждшия Тя.

Седя́щему во сла́ве на Престо́ле Божества́/ сподо́билася еси́ Ма́терь бы́ти,/ ра́ди изя́щнейшия чистоты́ и смиренному́дрия,/ и́хже люби́тели и нас покажи́ моли́твами Твои́ми,/ да и мы сподо́бимся ча́сти, угото́ванной рачи́телем чистоты́ и смиренному́дрия Твоего́.

Седе́ти во сла́ве Сы́на Твоего́ сподо́бившаяся, Пренепоро́чная Де́во,/ не преста́й моля́щи бла́гость Его́,/ да и мы, взира́юще на о́браз святы́я жи́зни Твое́я/ и о́ному на́шим жи́тельством сообразу́ющеся,/ тоя́жде сла́вы на Небесе́х бу́дем прича́стницы.

Пе́снь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Ужаса́хуся и смуща́хуся костромсти́и жи́телие,/ мне́вше зна́мение Твоего́ о них про́мысла,/ ико́ну Ма́тере Твое́й, во пла́мени сгоре́вшу,/ но сие́ смуще́ние премени́л еси́ в ра́дость, Го́споди,/ показа́в им а́бие о́браз сей, от огня́ и пе́пела невреди́м./ Си́це да и мы, по обурева́ющих нас искуше́ниях и напа́стех,/ при́сно ра́дуемся о Твое́м, е́же о нас благоволе́нии,/ мо́лим Тя, Человеколю́бче.

Ужасо́шася иногда́ полки́ наше́дших на град Кострому́ супоста́тов,/ егда́ от воображе́ния зра́ка лица́ Твоего́, Го́споди, и Пресвяты́я Твое́й Ма́тере/ пусти́л еси́ на сих стре́лы мо́лниины,/ но сей у́жас да вложи́ши в се́рдца/ и всех, стремящихся ратобо́рствовати достоя́ние Твое́,/ мо́лим Тя с Хода́таицею на́шего избавле́ния.

Ужа́сни и ско́рбни бы́вше жи́телие Городца́,/ узре́вше ико́ну Твою́, Богома́ти, пренесе́ну во град Кострому́:/ мня́ху бо себе́ сим пренесе́нием лише́нных бы́ти Твоего́ о них Ма́терняго благоволе́ния,/ но да не и мы, таково́ю же иногда́ ско́рбию объя́ти,/ бу́дем лише́ни зна́мений Твоего́ покровительства,/ не преста́й, Влады́чице, пребыва́ющи с на́ми Твое́ю ми́лостию.

Я́ко о́чи рабы́ни в ру́ку госпожи́ свое́й,/ та́ко о́чи на́ши всегда́ к Тебе́ возводи́м,/ о Многоблагоутро́бная Госпоже́ на́ша и Спаси́тельнице Всесвята́я Богоро́дице!/ При́зри у́бо на ны ми́лостивно,/ ца́рствующая на Небеси́ с Сыно́м твои́м и Бо́гом,/ и уще́дрити ны, гре́шныя, потщи́ся,/ я́ко вся Тебе́ возмо́жна су́ть.

Пе́снь 6

Ирмо́с: Боже́ственное сне и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Боже́ственное Твое́ разуме́ем истоща́ние, Иису́се, Бо́же наш,/ егда́, взира́юще на о́браз Ма́тере Твое́я,/ зрим Тя с Не́ю я́ко Младе́нца, рука́ми Ея́ держи́ма,/ те́мже благодаря́ще сему́ Твоему́ е́же к нам снизхожде́нию,/ мо́лим Тя, нас ра́ди младе́нствовавшаго,/ бы́ти нам ми́лостива о гресе́х на́ших.

Боже́ственнаго Твоего́ воплоще́ния е́же от Де́вы, да при́сно сла́вится та́инство,/ дарова́л еси́ нам, Христе́ Царю́, всечестну́ю Ма́тере Твое́я ико́ну/ с воображе́нным на ней ви́дом Пречи́стаго лица́ Твоего́,/ те́мже и мо́лим Тя, Вседарови́тый Го́споди,/ да да́си нам при́сно сла́вити воплоще́ние Твое́,/ и́мже челове́цы Божеству́ соединихомся.

Боже́ственнаго Ду́ха наше́ствие бы́сть на де́вственную утро́бу Твою́, Богома́ти,/ егда́ Сы́на Преве́чнаго пло́тию зачала́ еси́,/ Его́же да и мы в сердца́х на́ших при́сно и́мамы,/ хода́тайствуй нам благода́ть Того́жде Всесвята́го Ду́ха,/ е́юже быва́ют челове́цы та́инственною оби́телию Отца́ и Сы́на.

Боже́ственных писа́ний любомудрое раче́ние с при́сным во хра́ме Госпо́дни пребыва́нием/ сотвори́ Тя избра́нный ипоста́сныя Бо́жия прему́дрости Храм,/ но да и мы устро́имся хра́мы Того́жде Бо́га Жи́ва,/ исхода́тайствуй нам благода́ть усе́рдно внима́ти и после́довати Сы́на Твоего́ гла́су,/ И́же при́сно во хра́мех Его́ пропове́дуется.

Конда́к, глас 8:

Благода́рственная принося́ще Ти, раби́ Твои́, Богороди́тельнице, о всех,/ и́миже благоде́яла еси́ гра́ду на́шему,/ из глубины́ души́ взыва́ем к Тебе́ и ми́ли ся де́ем:/ не преста́ни, Влады́чице,/ Ма́терними к Сы́ну Твоему́ и Бо́гу на́шему моли́твами/ подава́ти вся блага́я и спаси́тельная всем,/ ве́рою и любо́вию вопию́щим Ти:/ ра́дуйся, Де́во, христиа́н похвале́.

И́кос:

Стена́ еси́ де́вам, Богоро́дице Де́во,/ и всем, к Тебе́ прибега́ющим,/ и́бо Небесе́ и земли́ Творе́ц устро́и Тя, Пречи́стая, все́лься во утро́бе Твое́й/ и вся приглаша́ти Тебе́ научи́в:/ ра́дуйся, сто́лпе де́вства;/ ра́дуйся, две́рь спасе́ния./ Ра́дуйся, Нача́льнице мы́сленнаго назда́ния;/ ра́дуйся, Пода́тельнице Боже́ственныя бла́гости./ Ра́дуйся, Ты бо обнови́ла еси́ зача́тыя сту́дно;/ ра́дуйся, Ты бо наказа́ла еси́ окра́денныя умо́м./ Ра́дуйся, тли́теля смы́слов упраждня́ющая;/ ра́дуйся, Се́ятеля чистоты́ ро́ждшая./ Ра́дуйся, черто́же безсе́меннаго уневе́щения;/ ра́дуйся, ве́рных Го́сподеви сочета́вшая./ Ра́дуйся, до́брая Младопита́тельнице де́вам;/ ра́дуйся, Невестокраси́тельнице душ святы́х./ Ра́дуйся, Неве́сто Неневе́стная.

Пе́снь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Не служи́ти тва́ри па́че Творца́ законоположи́вый челове́ком, Спа́се наш,/ сотвори́, усе́рдно мо́лим Тя с Богоро́дицею,/ да Ду́хом Твои́м просвеща́еми,/ не к рукотворе́нным изображе́нием отно́сим Боголе́пное служе́ние,/ но чрез о́браз Твой возно́симся умы́ и се́рдцы,/ к Еди́ному Тебе́, отце́в Бо́гу благослове́нному.

Не послужи́ша бы́вшии в пещи́ Вавило́нстей му́дрии ю́ноши безду́шному истукану,/ но Еди́ному Тебе́, во о́бразе А́нгела посреде́ пла́мене я́вльшемуся Сы́ну Бо́жию, поклони́шася,/ и́хже ли́ку и ча́сти сопричти́ и всех, изображе́нием сладча́йшаго зра́ка Твоего́ дви́жимых/ к прославле́нию Тебе́, отце́в Бо́га благослове́ннаго.

Не послужи́ла еси́ Бо́гу нра́вом плотски́х иуде́ев, Пренепоро́чная Де́во,/ но ду́хом и и́стиною, я́ко и́стинная Раба́ Его́, покланя́лася еси́ Ему́./ Те́мже да и мы с Тобо́ю и́стиннии бу́дем покло́нницы Его́,/ хода́тайствуй нам благода́ть,/ е́же не в суеве́рном Богопочита́нии, но во и́стинном благоче́стии и ве́ре/ служи́ти отце́в Бо́гу благослове́нному.

Не послужи́ла еси́ ми́ру и суете́ его́, Богороди́тельнице,/ но, всему́ предпоче́тши еди́наго Бо́га и зако́н Его́,/ была́ еси́ усе́рднейшая всех Раба́ Госпо́дня,/ те́мже и сподо́билася еси́ послужи́ти ве́лией та́йне Бо́жия воплоще́ния, я́ко Богома́терь,/ но сотвори́, да и мы, отве́ргшеся ми́ра и я́же су́ть в ми́ре,/ вседу́шно прилепи́мся в послу́жим Еди́ному Отце́в Бо́гу благослове́нному.

Пе́снь 8

Ирмо́с: О́троки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́: Го́спода по́йте, дела́,/ и превозноси́те Его́ во вся ве́ки.

Отроча́ мла́до на́шего ра́ди спасе́ния был еси́, Безле́тный Бо́же наш Иису́се,/ Его́же воображе́ние зря́ще на свяще́нней ико́не,/ усе́рдною в Тя ве́рою вопие́м Ти:/ бу́ди Воспита́тель, Наста́вник и Покрови́тель младе́нцем и отроко́м на́шим,/ да и си́и во и́стинней ве́ре навы́кнут глаго́лати Тебе́:/ Го́спода по́йте, дела́,/ и превозноси́те Его́ во вся ве́ки.

О́трок дванадесятоле́тен бы́вый, Иису́се,/ посреде́ ста́рец и учи́телей во святи́лищи пребыва́я, послу́шал еси́ их/ и, совопрошася с ни́ми, явля́л еси́ святу́ю ре́вность к Боже́ственному зако́ну,/ да сим и на́ша о́троки наста́вший/ тща́тися во вре́мя ю́ности стяжава́ти духо́вную, я́же от зако́на Твоего́ прему́дрость,/ да и они́ науча́тся се́рдцы и усты́,/ словесы́ же и де́лы превозноси́ти Тя во вся ве́ки.

О́троки от пещи́ Вавило́нския изба́вльшему Го́споду/ моли́ся приле́жно, Богоневе́стная Отрокови́це,/ да да́рует всем, под кров Твой прибега́ющим,/ неврежде́нным бы́ти от огня́ искуше́ний и пла́мене похоте́й,/ да, та́ко Тобо́ю изба́вльшеся,/ чи́стыми душа́ми и нескве́рными устна́ми благослови́м с Тобо́ю Еди́наго Изба́вителя Го́спода/ и превозно́сим Его́ во вся ве́ки.

Отрокови́цам Твое́ целому́дрие и чистота́ да бу́дет красота́ и сла́ва,/ чревонося́щим Твое́ безболе́зненное и свято́е рождество́/ да бу́дет сла́дкое утеше́ние и отра́да,/ всем же, вся́каго по́ла и во́зраста чту́щим Тя, Богоневе́сто,/ доброде́тели Твоя́ да бу́дут еди́ным упражне́нием их,/ я́ко си́ми то́кмо досто́йне от челове́ка прославля́ется Госпо́дь, живы́й во ве́ки.

Пе́снь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Вся́кое коле́но Небе́сных, и земны́х, и преиспо́дних да покланя́ется Тебе́,/ я́ко нося́щему в Себе́ неизме́нный Преблаже́ннаго Отца́ Твоего́ о́браз, Иису́се./ С ни́миже и мы, ве́рою просвеща́еми,/ Тя, И́стиннаго Бо́га, о́браз челове́ч от Де́вы прии́мшаго, боголе́пно велича́ем.

Вся́ка уста́ да заградя́тся суесло́вящих,/ я́ко не́сть досто́йно чествова́ти Твою́ и Пречи́стыя Ма́тере Твое́й ико́ну, Влады́ке:/ се бо, просла́вив сию́ чудеса́ми,/ научи́л еси́ достоя́ние Твое́ Тебе́ и во о́бразе пло́ти Твое́й/ с Пренепоро́чною Твое́ю Ма́терию прославля́ти и велича́ти.

Вси ро́ди ве́рных, по прорече́нию Твоему́, блажа́т Тя,/ Благослове́нная, Христа́ Бо́га на́шего Ма́ти./ С ни́ми же и мы, ве́рою совоку́плени,/ благогове́йно чту́ще свяще́нное лица́ Твоего́ изображе́ние,/ прославля́ем Твоя́ вели́чия, я́же сотвори́ Тебе́ Госпо́дь сил,/ с Ним же Тя велича́ем.

Всяк язы́к сме́ртных, по достоя́нию, изнемога́ет велича́ти Тя,/ над все́ми превознесе́нную, о Богоневе́сто!/ Те́мже и мы, прославля́юще Тя дне́сь, испове́дуем на́ше кра́йнее неможе́ние,/ но, сие́ испове́дующе, мо́лим Тя,/ да по мно́жеству щедро́т Твои́х, прии́меши ма́лое сие́ приноше́ние,/ во зна́мение мно́гия любве́ и усе́рдия нас, велича́ющих Тя.

Свети́лен:

Свет Лица́ Твоего́ и Пресвяты́я Твое́я Ма́тере/ яви́вый нам, Влады́ко, во всечестне́й ико́не сей,/ сотвори́ нас, я́ко ча́да све́та ходи́ти во све́те за́поведей Твои́х,/ да, егда́ яви́шися во сла́ве с Ро́ждшею Тя,/ сообра́зны бу́дем светле́йшему со́лнца о́бразу Твое́й сла́вы.

Сла́ва, и ны́не:

Бо́жия тезоимени́тый да́ра страда́лец Христо́в Фео́дор/ Боже́ственный вои́стинну дар, пречестну́ю Пречи́стыя Богома́тере ико́ну,/ гра́ду на́шему Костроме́ прине́с, вруча́ет,/ ю́же мы с неизрече́нною ра́достию, я́ко Небе́сное сокро́вище, прие́млюще,/ играим духо́вне и ликовству́ем, просвеща́еми све́том Боже́ственнаго лица́ Мари́и При́сноде́вы,/ от Нея́же возсия́ Пра́ведное Со́лнце – Христо́с,/ просвеща́яй вся́каго челове́ка, гряду́щаго в мир.

На хвали́тех стихи́ры на 4, глас 1:

Хвали́мый по мно́жеству вели́чествия Твоего́ от Небе́сных сил,/ приими́ и от на́ших бре́нных усте́н пе́снь благодаре́ния,/ е́же возсыла́ем Тебе́ за мно́жество щедро́т,/ и́миже при́сно благоде́еши нам,/ дарова́в Пречи́стыя Богома́тере ико́ну/ во утвержде́ние, и защище́ние, и спасе́ние на́ше.

В наро́читый сей пра́здника на́шего де́нь/ соста́вим благокра́сны ли́ки,/ орга́нами усте́н на́ших прославля́юще/ посети́вшую град наш чуде́сною Свое́ю ико́ною Богоро́дицу,/ Ея́же предста́тельством прекланя́емь, Всевы́шний Влады́ка/ подае́т нам со мно́жеством щедро́т/ мир и ве́лию ми́лость.

Пра́зднующе всечестны́й сей Богома́тере пра́здник,/ да не бу́дем, бра́тие, я́ко ме́дь звеня́щи/ или́ кимва́л звяца́яй,/ но да ве́рою живо́ю/ и одушевля́ющею вся на́ша дела́/ любо́вию ликовству́ем дне́сь:/ сицево́е бо то́кмо чествова́ние Богома́тери/ и сицево́е славосло́вие Сы́ну Ея́ и Бо́гу на́шему благоприя́тно е́сть./ Те́мже глаго́лем или́ де́ем дне́сь,/ ве́рою и любо́вию нам да быва́ют.

Сла́ва, и ны́не, глас 8:

Прииди́те, вси Русстии ве́рных собо́ри,/ воспо́йте дне́сь с на́ми Го́сподеви пе́снь Богокра́сную,/ прославля́юще благодея́ния и щедро́ты Его́,/ да мы си́ми вы́ну наслажда́ющеся,/ непреста́нно хва́лим, благослови́м и велича́ем Спаси́теля на́шего,/ из глубины́ души́ вопию́ще к Нему́:/ о Влады́ко, всех Прещедре и Всеси́льне!/ не преста́й и ны́не продолжа́ти к нам дре́вния о́ныя Твоя́ ми́лости,/ сохраня́я Боже́ственным Твои́м Про́мыслом лю́ди Твоя́,/ да,в ми́ре и тишине́ живу́ще,/ непреста́нно с Ро́ждшею Тя велича́ем.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 3, пе́снь Богоро́дицы: Вели́чит душа́ Моя́ Го́спода,/ и возра́довася дух Мой о Бо́зе, Спа́се Мое́м. Стих: Я́ко призре́ на смире́ние рабы́ Своея́, се бо от ны́не ублажа́т Мя вси ро́ди.

 Апо́стол к Филипписи́ем, зача́ло 240. Ева́нгелие от Луки́, зача́ло 54. Прича́стен: Ча́шу спасе́ния прииму́ и И́мя Госпо́дне призову́.

Моли́тва

О Премилосе́рдая Госпоже́, Цари́це, Богоро́дице, приими́ смире́нное моле́ние на́ше, и не отри́ни нас, заступле́ние и прибе́жище на́ше, и не возгнуша́йся нас, недосто́йных, но, я́ко Милосе́рдая, не преста́ни моля́щи, Его́же родила́ еси́, да да́рует нам проще́ние мно́гих согреше́ний на́ших, да спасе́т нас, и́миже ве́сть судьба́ми. Поми́луй нас, Влады́чице, поми́луй нас, не́смь бо нам спасе́ние от дел. Те́мже ве́рно вопие́м Ти: поми́луй рабы́ Твоя́ и непло́дное се́рдце на́ше покажи́ плодоно́сно благи́х дел. При́зри на нас, недосто́йных, Ты бо упова́ние и покро́в наш, жи́знь и свет се́рдцу на́шему. Я́ко Невече́рний Свет от чре́ва Твоего́ воздви́гшая, озари́ ду́шу на́шу, Чи́стая, и отжени́ вся́ку мглу се́рдца на́шего. Да́руй нам умиле́ние, покая́ние и сокруше́ние серде́чное. Сподо́би нас по вся дни живота́ на́шего твори́ти во́лю Сы́на Твоего́ и Бо́га на́шего и во всем благоугожда́ти Ему́ Еди́ному. О Богома́ти, не преста́ни моля́щи Ро́ждшагося от Тебе́ за вся, притека́ющия с ве́рою к сему́ чудотво́рному о́бразу Твоему́, и подава́й им ско́рую по́мощь и утеше́ние в ско́рбех и напа́стех и злострада́ниих, изба́ви их от клеветы́ и зло́бы челове́ческия, от враг ви́димых и неви́димых и ве́яния ну́жды и печа́ли. Спаси́ оте́чество на́ше, град сей и вся гра́ды и страны́ от вся́ких бед и нужд и сотвори́ ми́лостива нам бы́ти Бо́га на́шего, отврати́ вся́кий гнев Его́, на ны дви́жимый, и изба́ви ны от належа́щаго и пра́веднаго Его́ преще́ния. О Боголюби́вая Влады́чице, А́нгелов украше́ние, му́чеников сла́во и всех святы́х ра́досте, с ни́ми моли́ Го́спода, да сподо́бит нас в покая́нии сконча́ти живота́ на́шего тече́ние. В сме́рти же час, Пресвята́я Де́во, изба́ви нас от вла́сти бесо́вския и осужде́ния, и отве́та, и стра́шнаго испыта́ния, и мыта́рств го́рьких, и огня́ ве́чнаго, да, сподо́бльшеся сла́внаго Ца́рствия Бо́жия, велича́ем Тя и сла́вим вопло́щшагося от Тебе́ Христа́, Бо́га на́шего, Ему́же сла́ва со Отце́м и Святы́м Ду́хом, ны́не, и при́сно, и во ве́ки веко́в. Ами́нь.

Преподобнаго отца нашего Венедикта