Стихи́ры, глас 4.

Подо́бен: Я́ко до́бля:

Я́ко звезда́, возсия́в,/ и ве́рныя просвети́л еси́/ свяще́нными светлостьми́ догма́тов твои́х,/ и е́реси омрачи́л еси́,/ и до конца́ победи́в,/ и, я́ко раб, да́нный тебе́ тала́нт умно́жил еси́,/ благоугоди́в Влады́це, Богому́дре./ Ему́же в ру́це отложи́л еси́ твой дух,/ Богоблаже́нне Кири́лле.

Прему́дростию слове́с твои́х/ и сия́нием жития́ твоего́,/ я́ко звезда́ многосве́тлая, досточу́дне,/ посреди́ собо́ра просия́л еси́ отце́в,/ безбо́жнаго Македо́ния/ жи́лами удави́л еси́ благода́ти,/ и Святы́й и оживля́ющий вся Боже́ственный Дух/ хули́вшаго безу́мно/ и проявле́нно беззако́нновавшаго.

Ум па́губный посрами́л еси́/ пребезу́мнаго Ма́нента,/ обличи́в предо́бре и мудре́йше/ скве́рная уче́ния сего́ бу́йства,/ учи́телей нача́льниче,/ иере́ев благоле́пие,/ Боже́ственный побо́рниче Христо́вы Це́ркве./ Сего́ ра́ди свято́е, веселя́щеся,/ соверша́ем твое́ успе́ние.

Сла́ва, и ны́не, Богоро́дичен, глас и подо́бен то́йже:

Покая́ние изря́дное/ и спаси́тельное врачевство́,/ я́же Бо́га ро́ждшая, Спа́са моего́,/ и слез то́ки,/ и часа́ по́мысл гро́знаго и стра́шнаго/ и Суда́ неумы́тнаго/ Ты ми да́руй избежа́ти моли́твами Твои́ми,/ о Де́во, муче́ния тре́петнаго/ и Боже́ственную улучи́ти благода́ть.

Крестобогоро́дичен. Подо́бен то́йже:

На Кресте́ Тя я́ко узре́/ пригвожде́на, Го́споди,/ А́гница и Ма́ти Твоя́ дивля́шеся/ и – что виде́ние сие́, – взыва́ше, –/ Сы́не вожделе́ние?/ Сия́ Тебе́ неве́рный собо́р воздаде́ беззако́нный,/ и́же мно́гих Твои́х чуде́с наслади́выйся./ Но сла́ва неизглаго́ланному/ соше́ствию Твоему́, Влады́ко.

Кано́н, его́же краегране́сие: Кири́лла пою́, предста́теля Иерусали́мскаго. Кир Феофа́на. Глас 4.

Пе́снь 1

Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Украси́в ду́шу доброде́телей ви́ды,/ благода́тей прия́тельну Ду́ха сию́ Свята́го соверши́л еси́,/ отню́дуже бе́здну прему́дрости отры́гнул еси́,/ ересе́й пучи́ны изсуша́ющу, Кири́лле.

Превы́шший ум ве́щных соде́лал еси́, невеще́ственных служи́телей соо́бщник показа́вся,/ огне́м же слове́с твои́х всю попали́л еси́ ве́щь ересе́й, Кири́лле,/ церко́вное свети́ло неусыпа́ющее.

Глаго́л твои́х воня́ми сладкодыха́тельными неи́стовства тезоимени́тнаго, прему́дре,/ ересе́й всех нестерпи́мый кал отгна́в,/ дале́че сотвори́л еси́, я́ко па́стырь и́стиннейший,/ я́ко Христо́во благово́ние быв.

Богоро́дичен: От тиме́ния страсте́й, помышле́ний треволне́ния,/ от стрел лука́ваго, от вся́каго прило́га сопроти́внаго спаси́, Чи́стая Богороди́тельнице,/ ду́ши воспева́ющих Твое́ несказа́нное рождество́, Всенепоро́чная.

Пе́снь 3

Ирмо́с: Я́ко непло́ды, ро́ди от язы́к Це́рковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:/ свят еси́, Го́споди.

Сия́я светлостьми́ духо́вныя прему́дрости,/ трисия́нное Божество́ Тро́ицы, о́тче, све́тло су́щим на земли́ уясни́л еси́,/ и́мже тьмы́ пре́лести изба́вихомся.

Цевни́ца яви́лся еси́ Всесвята́го Ду́ха, Богому́дре,/ возглаша́ющи пе́снь явле́ния Христо́ва,/ Его́же во дву естества́х пропове́дал еси́, услажда́я ду́ши на́ша.

Дом святы́ни твоя́ душа́ показа́ся,/ в него́же Оте́ц, и Сын, и Дух Живонача́льный преесте́ственно всели́ся,/ Ему́же пое́м:/ Свят еси́, Го́споди.

Богоро́дичен: Ниже́ ум Небе́сный па́че ума́ рождества́ Твоего́ мо́жет сказа́ти, Отрокови́це,/ Ума́ бо Пе́рваго во утро́бе Сло́во, Чи́стая, зачала́ еси́,/ вся́ческая сло́вом соста́вльшаго.

Седа́лен, глас 8.

Подо́бен: Прему́дрости:

Прему́дростию Сло́ва обогате́в, отры́гнул еси́ уче́ний ре́ки живо́тныя,/ и вся́ку напои́л еси́ благочести́вых мы́сль,/ и па́лицею Боже́ственною упа́сл еси́ ста́до на зла́це,/ Боже́ственнаго напита́л еси́ ра́зума./ Те́мже я́ко па́стыря и учи́теля вели́ка и ве́рных засту́пника/ восхваля́ем тя, Кири́лле святи́телю, зову́ще:/ моли́ Христа́ Бо́га грехо́в оставле́ние пода́ти/ честву́ющим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ О́гнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Пе́снь 4

Ирмо́с: Небеса́ доброде́тель Твоя́ покры́ла е́сть,/ и земля́ испо́лнися сла́вы Твоея́, Христе́./ Те́мже ве́рно вопие́м:/ сла́ва си́ле Твое́й, Го́споди.

Преми́рныя му́дрости струю́, преподо́бне, твое́ се́рдце прие́мшо,/ отры́гну уче́ния бе́здну, умы́ нече́ствующих погружа́ющую.

Еди́ну кре́пость, еди́но Существо́, еди́ну во́лю Триипоста́снаго Божества́ пропове́дал еси́/ и многобо́жия, Кири́лле, пре́лести пото́к изсуши́л еси́.

Ум ка́льный и пребезу́мный Ма́нентов,/ я́ко ум имы́й и Богонауче́н, блаже́нне, блиста́нии слове́с твои́х попали́в,/ я́ве обличи́л еси́.

Богоро́дичен: Я́ко вы́шши всех тва́рей, Чи́стая, Творца́ тва́ри зачала́ еси́/ и па́че естества́ ро́ждши, естество́ на́ше обно́вльшаго.

Пе́снь 5

Ирмо́с: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Жезло́м честны́я, святи́телю, прему́дрости твоея́/ упа́сл еси́ на воде́ правосла́внаго служе́ния па́ству твою́, блаже́нне.

Сло́во твое́ све́том Боже́ственным облиста́емо, о Кири́лле!/ просвеще́нных во Иерусали́ме мглу неразу́мия разруши́л еси́.

Богоро́дичен: Но́щь, Пречи́стая, страсте́й и злых очерне́ния покрыва́ет ду́шу мою́,/ Светода́вца ро́ждшая, озари́ мя, молю́ся.

Пе́снь 6

Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.

Река́ ты я́ко, из ино́го Еде́ма изше́л еси́,/ жизното́чных испо́лнена вод Ду́ха,/ и церко́вныя, святи́телю, напоя́еши бразды́.

Глаго́л твои́х луче́м, я́ко от бу́ри морски́я нече́стия спаса́еши лю́ди, освяще́ннейше,/ к ти́хому приста́нищу правосла́вия тех призыва́я.

Богоро́дичен: Онебеси́ла еси́ озе́мльствованное естество́, Всенепоро́чная, челове́ческое/ и истле́вшее сие́ новосоде́лала еси́,/ сего́ ра́ди, Отрокови́це, вси немо́лчными гла́сы Тя сла́вим.

Конда́к, глас 4:

Язы́ком твои́м, му́дре,/ Боже́ственными вдохнове́ньми просвети́л еси́ твоя́ лю́ди/ еди́ну че́сти Тро́ицу,/ Естество́м неразде́льну, разделя́ему же Ли́цы./ Те́мже, ра́дующеся, всесвяту́ю твою́ па́мять пра́зднуем,/ и́же к Бо́гу моли́твенника тя предлага́ющии.

Пе́снь 7

Ирмо́с: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,/ Бо́же оте́ц на́ших.

Име́я о́гнь во уме́, о́тче, стра́ха Бо́жия,/ ве́щь испепели́л еси́ сласте́й, воспева́я:/ благослове́н еси́, Го́споди, Бо́же оте́ц на́ших.

Слеза́ми страсте́й пла́мень погаси́в, блаже́нне,/ све́тлость сохрани́л еси́ неугаси́му твоея́ души́, взыва́я:/ благослове́н еси́, Го́споди, Бо́же оте́ц на́ших.

Струю́ живу́ю име́я лия́нием Ду́ха, в души́, Богому́дре,/ источи́л еси́, о́тче, ре́ки уче́ний, Це́рковь напоя́ющия,/ благоче́стно тя честву́ющую.

Богоро́дичен: Всю Тя освяща́ет Святы́й,/ от Твоея́ пло́ти заи́мствовавый пло́ть Себе́, Богоро́дице,/ во святы́х Госпо́дь живы́й, Бог наш.

Пе́снь 8

Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Дрема́ние небреже́ния, блаже́нне, от ве́ждей душе́вных отри́нув,/ пра́ведным прили́чным ны́не усну́л еси́ сном/ и ко дню невече́рняго Све́та преше́л еси́.

Мо́лниями слове́с твои́х попали́л еси́ хвра́стную  е́ресь, приснопа́мятне,/ и ве́рныя просвети́л еси́ еди́ну че́сти Тро́ицу начерта́ньми,/ во Еди́нице су́щую Естества́.

Освяти́в себе́ поще́ньми, ме́ртву тебе́ ра́ди Бы́вшу/ ты безкро́вно же́ртвовал еси́, я́ко святи́тель Боже́ственный,/ я́ко та́ин неизрече́нных служи́тель, Кири́лле.

Богоро́дичен: Изба́вльшеся кля́твы прама́терния Тобо́ю, Чи́стая Богома́ти,/ Благослове́нная Влады́чице,/ благослови́м, Деви́це препросла́вленная, пресвято́е рождество́ Твое́, Всечи́стая.

Пе́снь 9

Ирмо́с: Е́ва у́бо неду́гом преслуша́ния/ кля́тву всели́ла е́сть,/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́./ Тем Тя вси велича́ем.

Ви́дети жела́я Христо́ву неизрече́нную, святи́телю, сла́ву,/ потща́лся еси́ стра́сти умертви́ти душетле́нныя,/ прия́телище се́рдце сотвори́ти прему́дрости бо́льшия и лу́чшия./ Те́мже тя ве́рою ублажа́ем.

Звезду́ многосве́тлую, Христо́с Со́лнце, на церко́вней высоте́ положи́ тя, Кири́лле,/ луча́ми уче́ний свяще́нных озаря́юща се́рдца/ ве́рно соверша́ющих твою́ светоно́сную па́мять, преподо́бне.

Собесе́дник и сослужи́тель был еси́ А́нгелом,/ я́ко бо безпло́тен, о́тче, на земли́ пожи́в,/ преподо́бным яви́лся еси́ соприча́стник и святи́телем равностоя́тель;/ с ни́миже лику́я, нас помина́й.

Богоро́дичен: Непло́дствующее Боже́ственных доброде́телей, Пречи́стая Богоро́дице,/ се́рдце мое́ покажи́, Де́во, плодоно́сно,/ я́же от непло́дове ро́ждшаяся/ во́лею вся претворя́ющего манове́нием,/ да Тя пою́, Всепе́тую.