НА ВЕЧЕ́РНИ

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

Му́чениче Богому́дре Каллини́че,/ па́че е́же жи́ти,/ умре́ти благоче́стно жела́я,/ Христо́ву смерть вои́стинну изобрази́л еси́,/ отону́дуже безсме́ртие получи́л, еси́/ и невече́рнее блаже́нство,/ иде́же чи́нове А́нгелов суть,/ и, страда́лец всех, ра́дуяся, всели́лся еси́, сла́вне.

Цвет, исцеле́ния испуща́яй,/ и река́, нело́жных дарова́ний испо́лнена,/ врачева́ние безме́здно, ковче́г свяще́ния/ твои́х моще́й ра́ка яви́ся,/ из нея́же почерпа́ем здра́вие присноживо́тно,/ приходя́щии ве́рно, му́чениче сла́вне,/ Тебе́ ра́ди вои́стинну,/ чу́днаго Бо́га сла́вим.

Му́чениче преблаже́нне Каллини́че,/ на неви́димых враго́в/ неви́димаго Бо́га/ по́мощь непобеди́му име́я,/ возста́вил еси́ безсме́ртия побе́ды:/ и́же погуби́ти зе́млю и мо́ре хва́лящагося,/ боре́нием страда́ний твои́х низло́ж,/ крове́й твои́х потопи́л еси́ тече́нием.

Сла́ва, глас то́йже:

Благоче́стия побо́рника, и губи́теля вра́жия,/ и му́чеников собесе́дника,/ и храм Ду́ха Свята́го бы́вшаго,/ во́ина Царя́ Христа́,/ исцеле́ний неиждива́емое вои́стинну сокро́вище,/ ве́рных утвержде́ние,/ чу́днаго днесь Каллини́ка пе́сньми почти́м.

И ны́не, Богоро́дичен, глас и подо́бен то́йже:

Плоть от крове́й Твои́х прие́м,/ Первове́чный Бог/ Тя Предста́тельницу показа́ челове́ком, Чи́стая./ Те́мже изба́ви рабы́ Твоя́/ от вся́кия беды́ и обстоя́ния/ и се́тей лука́ваго врага́/ и сия́ния причасти́тися сподо́би избра́нных/ вся, сла́вящия и покланя́ющияся Тебе́.

Крестобогоро́дичен, глас и подо́бен то́йже:

Что́ зри́мое виде́ние,/ е́же Мои́ма очи́ма ви́дится, о Влады́ко?/ Содержа́й всю тварь, на Дре́во воздви́жен быв,/ и умира́еши, всем дая́й жизнь, –/ Богоро́дица, пла́чущися, глаго́лаше,/ егда́ узре́ на Кресте́ возноси́ма,/ из Нея́ неизрече́нно возсия́вшаго/ Бо́га и Челове́ка.

Тропа́рь, глас 4:

Му́ченик Твой, Го́споди, Каллини́к/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ ду́ши на́ша.

НА У́ТРЕНИ

Кано́н, глас 4.

Песнь 1

Ирмо́с: Колесни́цы фарао́новы и си́лу его́/ вве́рже в мо́ре Кре́пкий в бра́нех,/ воспое́м песнь но́вую, я́ко просла́вися.

На колесни́цу мы́сленную всед,/ я́ко вои́стинну триста́ты потопи́л еси́ мы́сленнаго Еги́пта/ во струя́х кро́ви твоея́, му́чеников похвало́ Каллини́че.

Боже́ственною оде́ждею оде́явся, му́дре,/ оде́жды земны́я совле́клся еси́, преблаже́нне,/ и к по́двигу поте́кл еси́, и врага́ посрами́л еси́.

Разори́в вра́жия многоплете́нныя ко́зни у́зами страда́ний твои́х,/ неде́йственна сего́ пове́ргл еси́ на зе́млю, Каллини́че,/ и нога́ми твои́ми попра́л еси́.

Богоро́дичен: Ю́же проро́ческий прови́де лик,/ я́ко дверь Небе́сную и неопали́мую купину́,/ Тя, Де́во Ма́ти Чи́стая, Бо́га ро́ждшую, позна́хом.

Песнь 3

Ирмо́с: Утвержда́яй гром и созида́яй дух,/ утверди́ мене́, Го́споди,/ да Тя пою́ и́стинно/ и творю́ во́лю Твою́,/ я́ко несть свят, я́ко Ты, Бо́же наш.

Христо́вою любо́вию уязвла́емь, му́ченик взыва́ше, в по́двизех претерпева́я:/ во благово́ние теку́ ми́ра, после́дуя стра́сти Твое́й страда́нием кро́ве.

Без наве́та соблю́лся еси́ от стрел змии́ных:/ твою́ бо па́ту мудре́ц в ра́нах прете́р, главу́ свою́ сокруши́,/ Каллини́че, во страда́ниих твои́х.

Посе́к пре́лести те́рние мече́м духо́вным,/ Христо́вы ве́ры неле́стно плод прине́сл еси́, всеблаже́нне,/ стори́чный боле́зней твои́х Влады́це твоему́.

Богоро́дичен: Несказа́нна Рождества́ рожде́ния Ты еди́на Ма́ти была́ еси́,/ во утро́бе Твое́й заче́нши И́же пре́жде Тебе́ Бо́га Сло́ва,/ и млеко́м пита́ла еси́, Пречи́стая, я́ко Младе́нца, Безнача́льнаго.

Седа́лен, глас 3.

Подо́бен: Боже́ственныя ве́ры:

Ре́вность Боже́ственную в души́ твое́й име́я, сла́вне,/ беззако́ннующия всу́е терпели́вно обличи́л еси́/ и, прибли́жився му́кам, проше́л еси́ твой по́двиг до́блим умо́м, му́чениче Каллини́че./ Христа́ Бо́га моли́ дарова́ти нам ве́лию ми́лость.

Сла́ва, и ны́не, Богоро́дичен:

Боже́ственнаго естества́ не отлу́чся, плоть быв во чре́ве Твое́м,/ но Бог вочелове́чся и пребы́сть,/ И́же по рождестве́ Ма́терь Тя Де́ву,/ я́ко пре́жде рождества́, сохрани́в Всенепоро́чну, еди́н Госпо́дь./ Того́ приле́жно моли́ дарова́ти нам ве́лию ми́лость.

Крестобогоро́дичен:

Нескве́рная А́гница Сло́ва, Нетле́нная Де́ва Ма́ти,/ на Кресте́ зря́щи пове́шена из Нея́ без боле́зни прозя́бшаго,/ ма́терски подо́бно рыда́ющи, вопия́ше:/ увы́ Мне, Ча́до Мое!/ Ка́ко стра́ждеши во́лею,/ хотя́ изба́вити от страсте́й безче́стия челове́ка?

Песнь 4

Ирмо́с: Услы́шах, Бо́же, слух Твой и убоя́хся,/ разуме́х дела́ Твоя́, и ужасо́хся, Го́споди,/ я́ко Твоего́ хвале́ния испо́лнь земля́.

Омыва́яся в струя́х твои́х крове́й, преблаже́нне, яви́лся еси́ чисте́йший ду́хом/ и в наслажде́ние дости́гл еси безпло́тных, му́чениче Каллини́че.

Ка́мень че́стен вои́стинну назда́лся еси́ Це́ркви,/ и хра́мы и́дольския стрясл еси́, и на зе́млю низложи́л еси́/ неукло́нным сопротивле́нием страда́ний твои́х.

Смертоно́сная враго́в ласка́ния/ вои́стинну отри́нул еси́, му́чениче, словесы́ духо́вными/ и, душе́ю укрепля́емь, на пре́лесть поста́вил еси́ побе́ду.

Богоро́дичен: Ны́не Тя купину́, ю́же в Сина́и, пропису́я,/ Моисе́й вели́кий неопа́льну ви́дяше,/ Огнь во утро́бе нося́щу, Чи́стая, позна́хом.

Песнь 5

Ирмо́с: Возсия́й ми, Го́споди, свет повеле́ний Твои́х,/ я́ко к Тебе́ дух мой у́тренюет и пое́т Тя:/ Ты бо еси́ Бог наш,/ и к Тебе́ прибега́ю, Царю́ ми́ра.

В ти́ну попо́лзся непостоя́нную, Го́споди, и во глубину́ грехо́в мои́х,/ и в бу́рю лю́тых мои́х дея́ний впад, зову́ Ти:/ Ты бу́ди ми Помо́щник.

Стопа́ми пригвожде́н ног, му́чениче, пел еси́:/ в пути́ свиде́ний Твои́х бога́тно наслади́хся, Влады́ко,/ терпя́ ра́ны, Страстополо́жниче, наде́ждею воздая́ний.

Ми́лости еле́ем ты, до́бре ку́плю соде́лав муче́ния,/ свещу́ твою́ уясни́л еси́, преблаже́нне,/ те́мже весь был еси́ же́ртва непоро́чная, всесожже́ние прия́тно.

Богоро́дичен: Проро́ков пропове́дание, и апо́столов похвало́,/ и му́чеников удобре́ние Ты еси́, Богоро́дице,/ Боже́ственное Сло́во нося́щи па́че сло́ва, Пречи́стая,/ е́же пре́жде век из Отца́.

Песнь 6

Ирмо́с: Бу́рею грехо́вною погружа́емь,/ я́ко во чре́ве ки́тове содержи́м,/ с проро́ком зову́ Ти:/ возведи́ от тли живо́т мой,/ Го́споди, и спаси́ мя.

Ста́да твоего́ огра́да невре́дна от звере́й соблюде́ся ересе́й:/ твои́х бо страда́ний держа́щи, сла́вне, тве́рду па́лицу,/ волко́в яви́ся отгони́тельница.

Нощь отбеже́ пре́лести страда́нием твои́м, и ве́ры добро́та возсия́,/ во испове́дании твое́м, пресла́вне, Тро́ицы побо́рниче,/ я́ко со́лнце, в конце́х.

Я́ко ве́ры пропове́дник изве́стен, беззако́ннующему вопия́ше гото́во:/ что́ прети́ши иму́щему не умягче́ну душе́вную тве́рдость?/ Стре́лы бо безбо́жных легки́.

Богоро́дичен: Пребыва́еши по рождестве́, Неискусобра́чная, я́ко пре́жде рождества́,/ Де́ва и Нетле́нная,/ и́бо е́же в Тебе́ та́инство, Богоневе́сто,/ па́че ума́ вся́каго и всего́ сло́ва познава́ется.

Конда́к, глас 2.

Подо́бен: Вы́шних ища́:

Го́рняя кра́сная досто́йно ны́не насле́довал еси́:/ Христо́вою бо зело́ любо́вию разже́гся,/ на огнь, Каллини́че, тем му́жественно дерзну́л еси́,/ Ему́же и ны́не предстоя́,/ не преста́й моля́ о всех нас.

Песнь 7

Ирмо́с: Огнь, паля́ в пещи́, истряса́шеся,/ о́троцы ороша́хуся/ и, пою́ще, глаго́лаху:/ благослове́н еси́, Еди́н Сый/ Бо́же оте́ц на́ших.

Сла́дости мне хода́тайственна суть мук страши́лища,/ ни бо огнь, ни ра́ны и́стиннаго Рачи́теля моего́, – му́ченик вопия́ше, – разлуча́т мя.

Вжиля́емь, сла́вне, посо́бием Христо́вым,/ на зе́млю сопротивоборца́, побори́в, низве́ргл еси́/ и тезоимени́т яви́лся еси́ на мучи́теля добропобе́дник.

Диа́вола посрами́л еси́, и А́нгелы возвесели́л еси́ страда́нии твои́ми, сла́вне,/ и Христу́ взыва́л еси́:/ благослове́н еси́, еди́н сый Бо́же оте́ц на́ших.

Богоро́дичен: Разреши́ла еси́ рождество́м Твои́м, Де́во Пречи́стая, Е́вы прама́тере кля́тву:/ Ма́ти бо еси́ всех Влады́ки, Я́же всем ра́дость исхода́таивши.

Песнь 8

Ирмо́с: Вся́ческая, Влады́ко, прему́дростию Твое́ю соста́вил еси́,/ земли́ же па́ки утверди́л еси́, я́коже ве́си, дно,/ основа́нием водрузи́выи́ на вода́х безме́рных./ Тем вси вопие́м, воспева́юще:/ благослови́те, дела́ Госпо́дня, непреста́нно Го́спода.

Ра́дуйся, наслажде́ние страда́льцев и́стинных;/ ра́дуйся, удобре́ние ве́ры и украше́ние;/ ра́дуйся, пресве́тлый му́чеников светоно́сец, и́же лесть разори́в страда́нием твои́м/ и свет просия́вый ми́рови, Каллини́че прему́дре.

Мучи́тель посрами́ся по́двиги твоего́ противле́ния,/ побежде́ни бы́ша злоде́и ра́нами твои́ми, блаже́нне./ Гвоздьми́ пя́ты твоя́ уязви́шася,/ пре́лесть же попали́ся вся, и потреби́шася и́дольстии хра́ми, Богому́дре,/ огне́м страда́ния твоего́.

О чту́щих тя к Бо́гу твои́м дерзнове́нием, Каллини́че,/ прекло́нься, моли́ непреста́нно,/ ста́ду твоему́ предста́ни, изыма́я сие́ от разли́чных се́тей льсти́ваго, и утверди́ ве́рою:/ тобо́ю бо расте́т и крепи́тся.

Богоро́дичен: Ду́хом проро́цы Тя, Де́ву, прообрази́ша:/ сень же, и трапе́зу, и ру́чку, и све́щник, и го́ру пресвяту́ю,/ и о́блак, и скрижа́ли, ковче́г же, и жезл, и дверь Боже́ственну,/ е́юже всем челове́ком отве́рзеся дре́вний рай.

Песнь 9

Ирмо́с: Безсе́менное Рождество́ Твое́, Богоро́дице Чи́стая,/ Христа́ Бо́га на́шего,/ пе́сньми немо́лчными велича́ем.

Истка́ся тебе́ свы́ше ри́за ве́ры,/ е́юже обнажи́л еси́ врага́ на суди́щи, му́чениче сла́вне.

Непщева́ше мучи́тель прельсти́ти ласка́ньми му́ченика,/ но той в ве́ре утвержда́шеся.

Чи́сто всесожже́ние и прия́тна же́ртва,/ Каллини́че сла́вне, огне́м по́двигов прине́слся еси́ Бо́гу.

Красны́ но́ги твои́, страда́льче Каллини́че, гвоздьми́ пригвожде́ны/ и к пропове́данию Боже́ственному иду́щи.

Богоро́дичен: Покро́в Тя стяжа́хом, и приста́нище, Чи́стая, и ору́жие, и забра́ло,/ и тве́рду наде́жду в беда́х при́сно.

ВЕ́ЧЕР

На Го́споди, воззва́х: стихи́ры, глас 8:

Егда́ наста́ стра́шный день гоне́ния,/ ты нечести́ваго иге́мона не устраши́ся,/ свята́я му́ченице Серафи́мо,/ и же́ртвы богоме́рзким бого́м приноси́ти отве́ржеся,/ служи́тельница и́стинному Бо́гу яви́ся,/ Тому́ себе́ в же́ртву прине́сши,/ и за излия́ние кро́ве твоея́/ на Небеси́ венча́лася еси́.

Любве́ ра́ди Христо́вы/ ме́чное усече́ние претерпе́вши,/ от Царя́ и Влады́ки му́ченическим венце́м венча́лася еси́/ и с ли́ки святы́х А́нгел и Арха́нгел/ в неизрече́нней сла́ве ны́не предстои́ши Престо́лу Влады́чню./ Помина́й и нас, соверша́ющих святу́ю па́мять твою́/ и ублажа́ющих му́ченическая страда́ния твоя́,/ свята́я му́ченице Серафи́мо.

Серафи́мскою любо́вию Го́спода возлюби́ла еси́,/ свята́я му́ченице Серафи́мо,/ и за страда́ния твоя́/ Небе́снаго Ца́рствия насле́дница яви́лася еси́,/ тем тя ублажа́ем/ и сла́вим страда́ния твоя́.

Сла́ва, и ны́не, Богоро́дичен:

Не умолчи́м, ве́рнии, хвала́ми ублажа́ти Пречи́стую Богоро́дицу,/ Та бо есть Хода́таица на́шего спасе́ния,/ на Ню́же упова́юще, никогда́же посрами́мся,/ я́ко, богоно́снеи ру́це к Сы́ну Своему́ простира́ющи,/ мо́лится о душа́х на́ших.

Крестобогоро́дичен:

На Кресте́ зря́щи, Пречи́стая, Возлю́бленное Твое́ Ча́до,/ пе́рси Твои́ бию́щи, го́рько вопия́ше:/ Ча́до Мое́ Возлю́бленное,/ Све́те о́чию Мое́ю,/ ка́ко Мя оставля́еши еди́ну, Ма́терь Твою́?

Тропа́рь, глас 8:

Неве́сто Христо́ва возлю́бленная, Серафи́мо,/ насле́днице Ца́рствия Небе́снаго,/ до́бре за Го́спода пострада́вшая/ и кро́вию твое́ю обагре́нная/ и, а́ки ца́рскою багряни́цею, украше́нная,/ помина́й нас, соверша́ющих святу́ю па́мять твою́.

НА У́ТРЕНИ

Кано́н, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Вся кра́сная ми́ра сего́ возненави́девши, Серафи́мо,/ па́че же Го́спода возлюби́вши, за Него́ страда́ти изво́ли;/ Того́ моли́ спасти́ся душа́м на́шим.

Егда́ наста́ стра́шный день гоне́ния,/ ты, Серафи́мо,/ не убоя́вшися, дерзнове́нно Го́спода испове́да,/ серафи́мскою любо́вию Того́ возлюби́вши.

Благода́тию Бо́жиею, Серафи́мо, в тебе́ сия́ющею,/ блаже́нную Сави́ну и и́же с не́ю/ ко Христу́ привела́ еси́ уче́нии твои́ми.

Богоро́дичен: Предста́тельнице на́ша те́плая и Моли́твеннице к Сы́ну Твоему́,/ призыва́ющих Тя на по́мощь вско́ре заступи́ и спаси́.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Егда́ нечести́вый иге́мон Вири́лл посла́ слуги́ своя́ привести́ тя на суди́ще,/ тогда́ блаже́нная Сави́на возбраня́ше им,/ и, а́ки чи́стую голуби́цу, храня́ше тя.

Ты, свята́я неве́сто Христо́ва Серафи́мо,/ вели́кия ре́вности испо́лнилася еси́ ко Христу́/ и, не убоя́вшися нечести́вых слуг иге́мона, но после́довавши им,/ блаже́нную Сави́ну увеща́ше то́кмо моли́ти Го́спода о тебе́.

Ты, Серафи́мо, глаго́лаше:/ аз же упова́ю на Го́спода Иису́са Христа́ и ве́рую,/ а́ще и недосто́йна и грешна́ есмь,/ но да предста́нет мне Иису́с Христо́с и укрепи́т мя бы́ти рабо́ю Его́.

Богоро́дичен: Несть нам ины́я наде́жды по Бо́зе,/ то́кмо Ты, еди́на на́ша Засту́пнице и Помо́щнице,/ спаси́ нас, упова́ющих на Тя.

Седа́лен, глас 4:

Вмести́лище Свята́го Ду́ха яви́лася еси́, свята́я му́ченице Серафи́мо,/ себе́ Бо́гу в же́ртву прине́сши,/ и дом Святы́я Тро́ицы сподо́билася еси́ бы́ти;/ моли́ спасти́ся душа́м на́шим.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Блаже́нная Сави́на, не вверя́ющи рука́м слуг нечести́вых тебе́, святы́я деви́цы,/ сама́ с тобо́ю ку́пно по́йде к иге́мону,/ хотя́щи изба́вити тя, Серафи́мо.

Егда́ иге́мон устыде́ся сена́торскаго благоро́дства Сави́ны,/ тогда́ отпусти́ти тя повеле́ в дом ея́,/ но по трие́х днех па́ки посла́ слуг, да предста́вят тя на суди́ще, Серафи́мо.

Втори́цею блаже́нная Сави́на после́дова тебе́, Серафи́мо,/ но егда́ ви́де, я́ко от рук нечести́вых изъя́ти тя не возмо́же,/ а́бие оты́де в дом свой, рыда́ющи.

Богоро́дичен: Ты моя́ ра́дость и наде́жда в го́рести мое́й,/ Ты прибе́жище и весе́лие души́ моея́,/ спаси́ мя, Влады́чице, моли́твами Твои́ми.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Предста́ свята́я а́гница Христова на суде́ нечести́ваго иге́мона,/ све́том благода́ти Христо́вы озаря́ема,/ и егда́ повеле́ иге́мон принести́ же́ртвы ло́жным бого́м,/ тогда́ дерзнове́нно Го́спода испове́да/ и Тому́ в же́ртву принесе́ся.

Ты глаго́лаше, Серафи́мо:/ Бо́гу моему́ есть уго́дная же́ртва,/ да саму́ себе́ непоро́чну соблюду́ в чистоте́ де́вства моего́/ и ины́х к тому́ же приведу́ по́мощию Его́ всеси́льною.

Ублажи́м, ве́рнии, неве́сту Христо́ву, прекра́сную Серафи́му,/ красоты́ ю́ности не пощади́вшую и на му́ки дерзну́вшую любве́ ра́ди Христо́вы,/ безче́стие, бие́ние, ра́ны и смерть претерпе́вшую.

Богоро́дичен: Ма́ти пресла́дкаго Све́та моего́, Го́спода,/ не посрами́ мя, всю наде́жду на Тя возлага́ющу,/ спаси́ мя, Пречи́стая, моли́твами Твои́ми.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Ничто́же тя услади́ти возмо́же, неве́сто Христо́ва, от ми́ра сего́,/ то́кмо еди́на любы́ ко Го́споду распаля́ше се́рдце твое́,/ и, я́ко а́гница на па́жить, ско́ро тече́ на муче́ние,/ во е́же а́бие узре́ти Возлю́бленнаго Жениха́ Христа́,/ Его́же все́ю душе́ю возлюби́ла еси́/ и Его́же ра́ди муче́ния претерпе́.

Любо́вию к Бо́гу разжиза́ющися, небе́сным серафи́мом уподо́билася еси́,/ тоя́ любве́ и нам сподо́битися моли́,/ почита́ющим и лю́бящим тя, Серафи́мо.

Ты, по словеси́ твоему́, вои́стинну це́рковь Бо́жия яви́лася еси́/ и вмести́лище Ду́ха Свята́го, Серафи́мо,/ я́ко не пощади́ пло́ти твоея́ и муче́ния претерпе́.

Богоро́дичен: Бу́ди мне тве́рдый щит в ско́рби мое́й,/ егда́ бу́ря злых челове́к возста́нет на мя,/ тогда́ Сама́ укрепи́ мя и на тве́рдем ка́мени ве́ры поста́ви но́зе мои́.

Конда́к, глас 2:

Серафи́мскою любо́вию Го́спода возлюби́ла еси́,/ свята́я де́во Серафи́мо,/ и всю себе́ за Го́спода на муче́ние предаде́,/ до́ндеже дости́гла еси́ Ца́рствия Небе́снаго.

И́кос:

Пренебреже́ мирску́ю суету́, свята́я му́ченице Серафи́мо,/ Еди́наго то́кмо иму́щи пред очи́ма твои́ма, Нетле́ннаго Жениха́ Твоего́,/ все жела́ние твое́ бысть Еди́н Госпо́дь,/ к Нему́же все́ю душе́ю устреми́ся,/ и предста́ с неизрече́нною ра́достию Престо́лу Влады́чню,/ и лице́м к лицу́ узре́, Его́же возлюби́ла еси́,/ тогда́ вои́стинну дости́гла еси́ Ца́рствия Небе́снаго.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Егда́ по повеле́нию иге́мона/ безсту́дным еги́петским ю́ношам на оскверне́ние отдана́ бысть, Серафи́мо,/ тогда́ призыва́нием И́мене Госпо́дня сих студа́ и ослепле́ния испо́лни,/ сама́ же воспева́ше Христу́:/ оте́ц на́ших Бо́же, благослове́н еси́.

Егда́ ви́де ско́рую по́мощь от Го́спода, Серафи́мо,/ тогда́ возде́ ру́це твои́, Тому́ пою́щи:/ оте́ц на́ших Бо́же, благослове́н еси́.

Мо́лим тя, де́во свята́я Серафи́мо,/ и ны́не у Престо́ла Влады́чня воздви́гни ру́це твои́ за нас,/ соверша́ющих па́мять твою́, прося́щих твоея́ по́мощи и пою́щих:/ оте́ц на́ших Бо́же, благослове́н еси́.

Богоро́дичен: Укрепи́ мя, Влады́чице и Ма́ти Пресладкаго Све́та моего́, Го́спода,/ и научи́ мя взыва́ти Сы́ну Твоему́:/ оте́ц на́ших Бо́же, благослове́н еси́.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Повеле́ иге́мон те́ло твое́ свеща́ми опаля́ти, Серафи́мо,/ но а́бие све́щи угасо́ша, опаля́ющии тя са́ми на зе́млю падо́ша,/ ты же воспела еси́, зову́щи:/ Го́спода по́йте, дела́, и превозноси́те во вся ве́ки.

Егда́ па́лицами бие́на бысть, Серафи́мо,/ тогда́ трус ве́лий земли́ сотвори́ся, но нечести́вии не позна́ша си́лы Бо́жия,/ мы же, удивля́ющеся чудеси́, зове́м:/ Го́спода по́йте, дела́, и превозноси́те во вся ве́ки.

Го́спода в по́мощь призыва́ше, Серафи́мо,/ и вся ко́зни вра́жия победи́ла еси, пою́щи:/ Го́спода по́йте, дела́, и превозноси́те во вся ве́ки.

Богоро́дичен: Богоро́дице, А́нгелов ра́досте и челове́ков спасе́ние,/ обурева́емую мя лю́тыми волна́ми жите́йских страсте́й спаси́ и научи́ пе́ти:/ Го́спода по́йте, дела́, и превозноси́те во вся ве́ки.

Песнь 9

Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Мече́м усе́чена бысть, му́ченице Серафи́мо, и, а́ки чи́стая голуби́ца, возлете́ла еси́ к Бо́гу,/ блаже́нная же Сави́на свято́е те́ло твое́, я́ко сокро́вище и маргари́ту дража́йшую,/ в свое́м гро́бе погребе́.

Страда́льческим ше́ствовавши путе́м, до́блественная му́ченице,/ претерпе́ бие́ния, опале́ния и вся́ческая муче́ния,/ и до конца́ сте́рла еси́ главу́ зми́еву,/ и победи́тельница яви́лася еси́ благода́тию Свята́го Ду́ха.

Ны́не наслажда́ешися неизрече́нныя сла́вы Го́спода, свята́я му́ченице Серафи́мо,/ о нас Христа́ Бо́га моли́, соверша́ющих святу́ю па́мять твою́/ и ублажа́ющих страда́ния Твоя́.

Богоро́дичен: Простри́ ру́ку по́мощи изнемога́ющей души́ мое́й, Влады́чице моя́ Пресла́дкая,/ и не посрами́ наде́жды моея́, ю́же на Тя возлага́ю,/ но ми́рною стезе́ю под кро́вом Твои́м приведи́ мя к Сы́ну Твоему́/ и пресла́дкому Све́ту моему́.

Свети́лен:

Уневе́стившися Христу́, Жениху́ твоему́, вслед Его́ тече́, му́ченице Серафи́мо,/ и скороше́ственною стезе́ю возлете́ла еси́ в черто́ги Небе́сныя,/ иде́же ли́цы му́ченик и святы́х А́нгелов ра́достно срето́ша тя.

Сла́ва, и ны́не, Богоро́дичен:

Тя, Ма́терь Бо́жию, немо́лчными хвала́ми ублажа́ем и мо́лим Тя:/ спаса́й нас моли́твами Твои́ми/ и приведи́ к ти́хому Приста́нищу Сы́на Твоего́.

Тропа́рь, глас 4:

Чу́дное и сла́вное рождество́ твое́, святи́телю Нико́лае,/ Це́рковь днесь правосла́вных све́тло пра́зднует,/ и́бо стоя́нием ногу́ твое́ю/ яви́ тя Госпо́дь и провозвести́ бы́ти свети́льника и учи́теля ми́ряном,/ весь мир обогаща́юща и просвеща́юща чудесы́./ Тем вопие́м ти:/ моли́ Христа́ Бо́га спасти́ся душа́м на́шим.

Конда́к, глас 2.

Подо́бен: В Ми́рех, свя́те:

В Ми́рех ро́ждься, свя́те Нико́лае,/ от благоро́дна ко́рене,/ я́ко благопло́дна ветвь, прозя́бл еси́,/ испо́лнь бо быв Боже́ственных даро́в,/ я́ко со́лнце заря́ми, весь мир чудесы́ просвети́л еси́./ Сего́ ра́ди прославля́ем тя,/ я́ко ученика́ и таи́нника Бо́жия благода́ти.

Тропа́рь, глас 3:

Я́ко драгоце́нное бога́тство,/ прии́де к нам от Вели́кия реки́ Вя́тки/ в ца́рствующий сей град наш Москву́/ честна́я ико́на о́браза твоего́, святи́телю Нико́лае,/ и мно́гая у́бо чудеса́ в прише́ствии свое́м сотвори́,/ боля́щия исцели́ и вся челове́ки удиви́./ Сего́ ра́ди повеле́нием самоде́ржца царя́/ списа́ся с нея́ сия́ честна́я ико́на твоя́/ на просвеще́ние и моле́ние всем лю́дем ца́рска гра́да,/ ю́же днесь зрим и покланя́емся ей,/ моля́ще тя, таи́нника Христо́ва:/ моли́, свя́те, о всех нас,/ дарова́ти нам мир и ве́лию ми́лость.

Конда́к, глас 4.

Подо́бен: Вознесы́йся:

Днесь всеусе́рдне восхваля́ем тя, святи́телю о́тче Нико́лае,/ и честны́й сей о́браз твой ве́рно почита́ем,/ и любе́зно целу́ем и́,/ я́ко ве́лие таково́е дарова́ние нам от Христа́ Бо́га дарова́ся,/ па́че бо сапфи́ра и топа́зия,/ принесе́ся к нам от ме́ста, реко́маго Вя́тка, в ца́рский град,/ на исцеле́ние всем приходя́щим к нему́ с ве́рою./ Тем спрославля́ем твою́ святу́ю па́мять,/ моли́ спасти́ся душа́м на́шим.

Тропа́рь, глас 3:

Я́ко вели́каго во отце́х Варлаа́ма учени́к,/ прехва́льне Константи́не,/ и сам ча́до послуша́ния, блаже́ннаго Косму́, возрасти́л еси́,/ те́мже, преподо́бнии, вку́пе Престо́лу Влады́чню ны́не предстоя́щии,/ моли́твами ва́шими в ве́ре Правосла́вней нас утверди́те,/ в послуша́нии Це́ркви Святе́й укрепи́те/ и вся поле́зная душа́м на́шим испроси́те.

Тропа́рь, глас 4:

От ю́ности горя́чим жела́нием Боже́ственныя любве́ разжига́емь,/ жите́йския молвы́ оста́вль, преподо́бне,/ учени́к вели́каго Се́ргия был еси́,/ безмо́лвием и жесто́ким пребыва́нием,/ бде́нием и моли́твою, посто́м после́дуя Христу́;/ сего́ ра́ди избра́нием учи́теля твоего́ свяще́нства сподобля́ешися/ от руки́ блаже́ннаго Алекси́я/ и па́стырь поставля́ешися оби́тели, я́же на Киржаче́,/ в не́йже трудолю́бно пожи́в, ко Го́споду отхо́диши,/ Рома́не преподо́бне,/ моли́ о нас Христа́ Бо́га,/ со учи́телем твои́м преподо́бным Се́ргием,/ спасти́ся душа́м на́шим.

Конда́к, глас 8:

Жития́ треволне́ния и мяте́ж мирски́й/ и страстна́я взыгра́ния в ничто́же вмени́в,/ пусты́нный трудолю́бник показа́лся еси́,/ мона́хов наста́вник, Рома́не преподо́бне,/ и́ноков собира́тель и моле́бный ко Го́споду честны́й рачи́тель,/ моли́ о нас Христа́ Бо́га, со учи́телем твои́м преподо́бным Се́ргием,/ спасти́ся душа́м на́шим.