НА ВЕЧЕ́РНИ

На Го́споди, воззва́х: стихи́ры святы́я Анны на 6, глас 4.

Подо́бен: Дал еси́ зна́мение:

Зако́ны оправда́ния соблюда́ющи невреди́мо/ и Бо́гу Вседержи́телю непоро́чно рабо́тающи,/ сподо́билася еси́, А́нно, ма́ти бы́ти/ по пло́ти Христа́ ро́ждшей Чи́стей Богоотрокови́це,/ с Не́юже тя ублажа́ем/ и свято́е твое́ успе́ние/ ра́достною мы́слию пра́зднуем днесь.

Жи́зни пала́ту, А́нно Богому́драя, ро́ждши,/ к жи́зни преста́вилася еси́ вои́стинну нетле́нней/ и совокупля́ешися с ли́ки пра́ведных,/ пита́ющих тя бога́тно Влады́чнею ра́достию;/ те́мже твое́ преставле́ние соверша́ем, приснопомина́емая,/ и ве́рно почита́ем, Богому́дрии, днесь.

Дверь Небе́сную, А́нно Богому́драя, ро́ждши,/ к Небе́сному селе́нию востекла́ еси́, сла́вная,/ и сла́вы Боже́ственныя ны́не наслажда́ешися./ Е́йже и нас, честно́е твое́ успе́ние пра́зднующих,/ моли́твами твои́ми сподо́би,/ страсте́й мрак разоря́ющи/ и лю́тых обстоя́ний мглу отгоня́щи.

И́ны стихи́ры, глас 1.

Подо́бен: О, ди́внаго чудесе́:

Се светоза́рное торжество́/ и све́тлый день и ми́ру, ра́достный,/ успе́ние честно́е и достохва́льное А́нны благосла́вныя,/ из нея́же роди́ся Жизнь ро́ждшая,/ одушевле́нный киво́т, невмести́мое Сло́во вмести́вшая,/ печа́ли разреше́ние и ра́дости Хода́таица,/ подаю́щая всем ве́рным ве́лию ми́лость.

О, пресла́внаго чудесе́!/ Исто́чник жи́зни пресла́вно ро́ждшая,/ еди́ну в жена́х благослове́нную Чи́стую,/ преставля́ется от вре́менныя жи́зни к безконе́чней/ А́нна благосла́вная,/ от земли́ взе́мшися к Небе́сным,/ днесь сра́доватися а́нгельским собо́ром,/ ея́же ны́не свято́е пра́зднуем торжество́.

Днесь све́тлое торжество́, ве́рных ли́цы,/ успе́ние твое́ честно́е почита́ем всеблагогове́йно/ Боже́ственным Ду́хом:/ наста́ бо нам исцеле́ний блиста́ющая благода́ть,/ и попаля́ющая возду́шных духо́в лука́вых совокупле́ния,/ и све́том наставля́ющая мы́сли/ ве́рою воспева́ющих твое́, досточу́дная А́нно/ честно́е преставле́ние.

Сла́ва, и ны́не, глас 8. Анато́лиево:

И́же от непло́дных чресл/ жезл святы́й, Богоро́дицу, прозя́бший/ из Нейже спасе́ние ми́ру возсия́ – Христо́с Бог,/ супру́г непоро́чный и дво́ице свята́я, Иоаки́м и А́нна;/ си́и бо, преста́вльшеся к Небе́сным селе́нием,/ со Дще́рию свое́ю Пречи́стою Де́вою/ и со А́нгелы лику́ют,/ о ми́ре моли́тву творя́ще./ И́хже и мы, соше́дшеся, благоче́стно пою́ще, глаго́лем:/ и́же Богоотрокови́цы ра́ди и Пречи́стыя Мари́и,/ пра́отцы Христо́вы бы́вше,/ моли́теся о душа́х на́ших.

На стихо́вне стихи́ры, глас 5.

Подо́бен: Ра́дуйся:

Ра́дуйся, мы́сленная ла́стовице,/ ве́сну благода́ти нам возвести́вшая,/ непоро́чно в целому́дрии жи́тельствовавши до́бре,/ и де́вства сокро́вище,/ че́стно боле́зновавшая,/ Непоро́чную Богоро́дицу,/ а́гнице честна́я, я́же ро́ждшая Ю́ницу,/ взе́млющаго А́гнца ми́ра прегреше́ния,/ сло́вом Сло́во ро́ждшую, еди́ну Неискусому́жную,/ А́нно, прама́ти Госпо́дня, тя от земли́ пресе́льшаго./ Его́же ны́не моли́ душа́м на́шим дарова́ти ве́лию ми́лость.

Стих: Ра́дуйтеся, пра́веднии, о Го́споде,/ пра́вым подоба́ет похвала́.

Ра́дуйся, вожделе́нная Бо́гу,/ избра́нная святостьми́ сия́ний зако́на,/ дво́ице честна́я,/ я́же изъявле́ния до́бре Боже́ственною благода́тию предлага́ющая,/ Христа́ ро́ждшую, Нача́льника жи́зни на́шея, Та роди́вши,/ Иоаки́м Богоприя́тный и Боже́ственная А́нна всечестна́я,/ свети́льницы, возсия́вшии свещу́ безсе́нную,/ благопра́вящии благода́ть, Пречи́стую Богоро́дицу./ С Не́юже моли́теся/ душа́м на́шим дарова́ти ве́лию ми́лость.

Стих: Блаже́ни вси, боя́щиися Го́спода,/ ходя́щии в путе́х Его́.

Ра́дуйся, благослове́нная земле́,/ я́же Богопрозя́бшую ми́рови зе́млю процве́тшая,/ я́же в зако́не Боже́ственнем безпреста́ни поуча́ющаяся/ и благода́ть всем подписа́вшая,/ сою́з непло́дствия рождество́м свои́м избе́гшая,/ и сме́ртию нетле́ние воздава́ющая,/ и к Боже́ственней преста́вльшаяся све́тлости А́нна Богоблаже́нная,/ прама́ти Христа́ Бо́га,/ я́же светоно́сный свети́льник – Богоро́дицу ро́ждшая./ С Не́юже испроси́ душа́м на́шим дарова́ти ве́лию ми́лость.

Сла́ва, и ны́не, глас 8:

Прииди́те, вся тварь, в кимва́лех псало́мски, соше́дшеся,/ восхва́лим А́нну Богому́друю,/ Боже́ственную го́ру ро́ждшую от ложе́сн свои́х/ и к горе́ мы́сленней и ра́йским селе́нием/ днесь премину́вшую, и к ней возопие́м:/ блаже́нное чре́во твое́,/ носи́вшее вои́стинну Свет ми́рови внутрь во чре́ве носи́вшую,/ и сосца́ твоя́ кра́сная, я́же сса́ше дои́вшая Христа́,/ пищу жи́зни на́шея./ Его́же моли́ изба́вити нас от вся́кия ско́рби и прило́га вра́жия/ и спасти́ ду́ши на́ша.

Тропа́рь, глас 4:

Жизнь ро́ждшую во чре́ве носи́ла еси́, Чи́стую Богома́терь,/ Богому́драя А́нно./ Те́мже к прия́тию Небе́сному, иде́же веселя́щихся жили́ще,/ в сла́ве ра́дующися, ны́не преста́вилася еси́,/ чту́щим тя любо́вию/ прегреше́ний прося́щи очище́ние,/ присноблаже́нная.

На повече́рии кано́н святы́х жен, его́же краегране́сие: Честны́м жена́м честно́е пою́ пе́ние. Глас 8, Ио́сиф.

Песнь 1

Ирмо́с: Колесницегони́теля фарао́ня погрузи́/ чудотворя́и́ иногда́,/ Моисе́и́скии́ жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Плотско́ю не́мощию си́льнаго врага́ низложи́сте,/ и присво́истеся к Бо́гу, преподо́бныя жены́,/ моля́щеся си́лу всем нам пода́ти спаси́тельную.

Уязви́стеся добро́тою Женихо́вою и во след Его́ прилепи́стеся псало́мски,/ после́дующе живоно́сным стопа́м Его́,/ и сего́ ра́ди низложи́сте врага́ зми́я.

Увяди́вше труды́ по́стническими теле́сныя добро́ты,/ украси́сте ва́ша ду́ши/ и со Христо́м Женихо́м в черто́ги све́тлыя внидо́сте, преподо́бныя.

Богоро́дичен: Неве́стник показа́ся светови́ден утро́ба Твоя́, Де́во,/ ми́лости ра́ди теле́сно из Тебе́ воплоти́вшагося Го́спода/ и вся́ческая Богоразу́мия луча́ми просве́щшаго.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́и́,/ жела́нии́ кра́ю, ве́рных утвержде́ние,/ Еди́не Человеколю́бче.

Презре́ла еси́ добро́ту теле́сную, пречестна́я,/ и мимогряду́щую сла́ву, я́ко сон, вмени́ла еси́,/ во смире́нии же, Олимпиа́до, и поще́нии Бо́га взыска́ла еси́, Богоблаже́нная.

Младе́нствующи ле́ты, нас ра́ди Младе́нца Сло́ва, на зе́млю, Евпракси́е, прише́дшаго,/ ве́рою возлюби́ла еси́/ и Того́ о́бразу ду́шу связа́ла еси́, непрело́жна пребы́вши.

Отверго́стеся ми́ра и пло́ти мудрова́ния,/ воздержа́нием же и труды́ стяжа́вше Христа́, Жениха́ Пречи́стаго,/ черто́г Небе́сный, подаю́щаго вам Боже́ственное наслажде́ние.

Богоро́дичен: Свяще́нных проро́к свяще́нныя трубы́ дре́вле Тя провозвести́ша,/ дверь Све́та ро́ждшую и сви́ток одушевле́нный,/ на не́мже не рука́ми Сло́во написа́ся па́че сло́ва, Пречи́стая Де́во.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Странноприе́мница усе́рднейша была́ еси́, собо́р свяще́нных упокоева́ющи/ и Христа́ о сем веселя́щи, за милосе́рдие стра́нна бы́вшаго.

Добро́ту пречи́стую люби́маго ви́девши Жениха́ твоего́, Евпракси́е,/ увяди́ла еси́ пло́ти добро́ту воздержа́нием.

Дрема́ние отри́нувше от душе́вных ве́ждей свяще́нныя жены́,/ успи́сте двиза́ния теле́сная воздержа́нием.

Богоро́дичен: Воплоти́вшагося Тебе́, Го́споди, от Пречи́стыя Де́вы преподо́бныя возлюби́вше,/ в воню́ ми́ра Твоего́ потеко́ша,/ Твое́ю уязви́вшеся Боже́ственною любо́вию.

Песнь 5

Ирмо́с: Вску́ю мя отри́иул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

От исто́чника напая́ема, вселе́нную всезлаты́ми уче́нии свяще́ннаго па́стыря напои́вшаго,/ кла́сы прозябла́ еси́ до́брыя де́тели, Олимпиа́до,/ и́миже пита́еши сердца́ нас, чту́щих тя.

Блаже́нными наде́ждами твою́ сла́вную ду́шу укре́пльши/ и пи́щею невеще́ственною пита́ема, ума́ чистото́ю де́ньми мно́гими/ терпели́вно а́лчбу, Евпракси́е, претерпе́ла еси́, ра́дующися.

Умертви́вшеся ми́рови, насле́довасте жизнь безсме́ртную/ и черто́га Боже́ственнага сподо́бистеся, Богоблаже́нныя,/ свещи́ ва́ша по́стническим еле́ем неугаси́мы соблю́дше, всечестны́я.

Богоро́дичен: Бо́жие Бог Сло́во во утро́бу Неискусобра́чную во́лею всели́ся/ и Челове́к узре́н бысть, И́же Де́вою соблюды́й Тя, Пречи́стая,/ Его́же жела́юще, отрокови́цы по́стнически Сему́ после́доваша житие́м све́тлым.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Ио́на су́щи, Евпракси́я боле́зней усе́рдием, благочести́вым по́мыслом/ ве́тхаго запина́теля попира́ше в не́мощи же́нстей телесе́:/ утвержда́ше бо сию́ Христо́с, И́же в на́шу обо́лкся не́мощь.

Воздержа́ние и смире́нное се́рдце, бде́ние с ми́лостынею,/ ра́зум, и ве́ру пра́ву, и соверше́нну любо́вь, Олимпиа́до, стяжа́вши, сла́вная,/ была́ еси́ храм Бо́жий и чуде́с исто́чник неоску́дный.

Устрани́вше себе́ жите́йских сласте́й терпе́нием боле́зней по́стнических,/ на зе́млю Соше́дшаго нас ра́ди и во́лею Стра́нствовавша/ вы, честны́я, сего́ ра́ди стяжа́сте на Небесе́х, странноприи́мствовавша вас, досточу́дныя.

Богоро́дичен: Чистоты́ Тя и че́стна де́вства чи́стый сосу́д, Отрокови́це, Соде́тель обре́т,/ сло́вом в пречи́стое Твое́ чре́во всели́ся/ и всю вра́жию от челове́к зло́бу изгна́.

Седа́лен, глас 8.

Подо́бен: Повеле́нное:

В моли́твах та́йных бдя́ще и насла́ждшеся писа́ньми Богодохнове́нными,/ Олимпиа́да и Евпракси́я сла́вная/ на ра́му Госпо́день взя́ша Крест и, Сему́ после́дующе воздержа́тельно,/ всю лесть зми́я низложи́ша, зову́ще Христу́:/ Женише́ Небе́сный, Ты бу́ди нам утвержде́ние.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Сла́ву тле́ющую на нетле́нную премени́ша любо́вию, преподо́бныя,/ ея́же наслажда́ющеся при́сно, ра́дующеся и веселя́щеся, пою́т:/ благослове́н Бог оте́ц на́ших.

О, ка́ко претерпе́ стоя́ние, а́лчбу же на дни мно́ги, Евпракси́е,/ Христу́ вопию́щи, Жениху́:/ благослове́н Бог оте́ц на́ших.

Вели́к тя сосу́д узре́в Боже́ственнаго Ду́ха, Олимпиа́до,/ бога́тно вели́кими свои́ми исполня́ет тя уче́нии/ в патриа́рсех вели́кий Златосло́в, блаже́нная.

Богоро́дичен: Разреши́ла еси́ еди́на кля́тву прама́тернюю/ всех благослове́ньми венча́ющаго Христа́ ро́ждши, Де́во, Ему́же пое́м:/ Го́споди Бо́же, благослове́н еси́ во ве́ки.

Песнь 8

Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще, о́троцы вопия́ху:/ благослови́те, вся дела́ Госпо́дня, Го́спода.

По́мыслу, де́во, стра́сти безслове́сныя повину́ла еси́,/ и Жениху́ Сло́ву уневе́стившися, непоро́чная чи́стая, вопию́щи:/ благослови́те, вся дела́, Го́спода, по́йте и превозноси́те Его́ во ве́ки.

Ва́шими по́двиги те́мнаго кня́зя низло́жше,/ вене́ц нетле́ния нам исхода́таиша, и ра́йския вхо́ды, отрокови́це,/ и Боже́ственное наслажде́ние в ра́дости души́ во ве́ки.

Распе́ншеся ми́ру и Бо́жиею любо́вню уязви́вшеся, свяще́нныя де́вы,/ вкуше́нием сла́дким Е́ву уязви́вшаго, воздержа́ния стрела́ми уязви́сте,/ воспева́юще Христа́ во ве́ки.

Богоро́дичен: Иису́са ро́ждшая, от чи́стых крове́й Твои́х воплоще́нна,/ де́вы вся собрала́ еси́, Пречи́стая Де́во Ма́ти, и с ни́ми вопию́щи:/ благослови́те, вся дела́, Го́спода и превозноси́те Его́ во ве́ки.

Песнь 9

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Кра́сныя Влады́це, и богоглаго́ливыя го́рлицы,/ и ла́стовицы све́тлыя и чистолюби́выя,/ в добро́ты Небе́сныя приведе́ни бы́сте.

Сочта́стеся с Вы́шними ликостоя́нии и во избра́нных собо́рех всели́стеся,/ о нас моля́щеся любо́вию ще́дрому Бо́гу.

Па́мять Евпракси́и и Олимпиа́ды, я́ко со́лнце, ми́рови возсия́,/ ве́рных мы́сли просвеща́ющи, Христа́ велича́ющих при́сно.

Богоро́дичен: Све́та су́щи прия́телище,/ просвети́, Де́во, омраче́нную страстьми́ ду́шу мою́/ и кроме́шния тьмы изба́ви мя мольба́ми Твои́ми.

Стихи́ры святы́х жен, глас 1.

Подо́бен: Небе́сных чино́в:

Тайносло́вца проро́ка/ и учи́теля на́шего/ учени́цу в пе́снех/ Олимпиа́ду согла́сно почти́м досто́йно/ и с не́ю восхваля́юще целому́дренную и чи́стую Евпракси́ю,/ я́ко Христу́ моля́щуюся спасти́ся нам.

Благоче́стия исча́дие/ и удобре́ние мона́шествующих су́щу,/ пе́сньми досто́йно почти́м согла́сно, вси ве́рнии,/ Евпракси́ю целому́дренную,/ я́ко моля́щую Зижди́теля о нас,/ спасти́ся душа́м на́шим.

Слава:

Ты, земну́ю красоту́ совле́кши,/ до́бре благу́ю часть избра́ла еси́, Богому́драя,/ ю́же обре́те Мари́я,/ и, вся а́бие оста́вльши вре́менная,/ доброде́телию прия́ла еси́/ мы́сленный би́сер многоце́нный.

И ны́не: Досто́йно есть:

НА У́ТРЕНИ

На Бог Госпо́дь: тропа́рь А́нны святы́я, три́жды. Богоро́дична не глаго́лем.

По 1-й кафи́зме седа́лен, глас 4.

Подо́бен: Ско́ро предвари́:

Твое́ пра́зднуем, пра́ведная А́нно, успе́ние,/ сла́вою бо неизрече́нною просла́ви тя Христо́с Бог, я́ко прама́терь Свою́./ Те́мже, преста́вльшися, Того́ моли́ мир моли́твами твои́ми пода́ти нам,/ покрыва́ющи от сопроти́вных ду́ши на́ша.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к животу́ нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.

По 2-й кафи́зме седа́лен, глас 4.

Подо́бен: Удиви́ся Ио́сиф:

В ру́це нас ра́ди от Де́вы вочелове́чшагося преда́вши ду́шу,/ и́бо Зижди́тель твой и Бог к нетле́нней жи́зни преста́ви тя./ Те́мже ны́не че́стно ублажа́ем тя,/ я́ко еди́ной Честне́й и непоро́чней вои́стинну Богоро́дице су́щую ма́терь, и согла́сно взыва́ем:/ Зижди́теля Твоего́ и Бо́га, Христа́ Спа́са на́шего, моли́/ спасти́ся душа́м на́шим.

Сла́ва, и ны́не, Богоро́дичен:

Удиви́ся Ио́сиф, е́же па́че естества́ зря/ и внима́ше мы́слию, и́же на руно́ дождь, в безсе́менном зача́тии Твое́м, Богоро́дице,/ купину́, огне́м неопали́мую, жезл Ааро́нов прозя́бший,/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет и по рождестве́ па́ки Де́вою пребыва́ет.

А́ще пра́зднуеши, велича́ние:

Велича́ем тя,/ свята́я пра́ведная А́нно,/ прама́ти Христа́ Бо́га на́шего,/ и всечестно́е сла́вим/ успе́ние твое́.

Кано́ны Окто́иха о́ба без му́ченична и святы́я на 6, глас 4.

Песнь 1

Ирмо́с: Отве́рзу уста́ моя́/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Согреше́ний проще́ние, и злых избавле́ние,/ и житии́ исправле́ние ны́не ми испроси́,/ твою́ светоно́сную па́мять почита́ющему днесь, А́нно всехва́льная.

Живо́т ро́ждшую боголе́пно родила́ еси́,/ те́мже к присножи́зненней жи́зни преста́вилася еси́,/ наслажда́ющися ра́дости неизглаго́ланныя и Све́та невече́рняго, А́нно Богозва́нная.

Благода́ть Боже́ственная к ра́дости преста́ви,/ без се́мене ю́же роди́ Дщи сея́ Чи́стая,/ и предстои́т со мно́гим дерзнове́нием,/ Го́сподеви моля́щися спасти́ся всем.

Пра́ведно и преподо́бно пожи́вши, всехва́льная,/ к Пра́ведному Го́споду ны́не преста́вилася еси́/ ра́доватися с пра́ведными, и́же от ве́ка,/ те́мже, соше́дшеся, тя ве́рою почита́ем.

Богоро́дичен: Из Тебе́ нам возсия́ Со́лнце пра́ведное,/ и всю озари́ Богоразу́мием зе́млю,/ и разори́ мглу неразу́мия, Чи́стая, Всенепоро́чная, и Всеблаже́нная.

Катавасия: Отве́рзу уста́ моя́:

Песнь 3

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́,/ несть бо свят, па́че Тебе́, Человеколю́бче.

Заче́ншую Содержа́щаго вся зачала́ еси́/ и родила́ еси́ па́че сло́ва Христа́ ро́ждшую,/ те́мже твое́ успе́ние, А́нно, почита́ем.

С похвала́ми соверша́ется сла́вная па́мять твоя́,/ я́ко родила́ еси́ нам хвале́ний превы́шшую,/ Чи́стую Богома́терь, А́нно Богоприя́тная.

Я́коже со́лнце с луно́ю, А́нне совокупля́яся,/ сла́вный Иоаки́м, де́вства зарю́ ражда́ет,/ Ея́же ра́ди Божества́ луча́ просия́.

Го́ру Боже́ственную из чресл твои́х родила́ еси́/ и к гора́м мы́сленным и рая́ селе́нием, А́нно, премину́ла еси́, Богоблаже́нная.

Богоро́дичен: Тя Предста́тельницу тве́рдую, Богороди́тельнице, стяжа́хом,/ упова́ние на Тя возложи́вше, спаса́емся/ и, к Тебе́ бо прибега́юще, огражда́емся.

Седа́лен, глас 8.

Подо́бен: Прему́дрости:

Ма́тере Влады́ки и Творца́/ ма́ти была́ еси́, А́нно всехва́льная, Того́ повеле́ния при́сно храня́щи,/ сего́ ра́ди, уме́рши, к жи́зни безсме́ртней преста́вилася еси́ вои́стинну/ и к Све́ту невече́рнему./ Те́мже светоно́сную и святу́ю твою́ па́мять соверша́ем,/ ду́хом просвеща́еми всегда́, и согла́сно вопие́м ти:/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, то́йже.

Песнь 4

Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Я́же в зако́не пи́саная, поуча́ющися, соверши́ла еси́/ и Законода́вца Ма́тере ма́ти была́ еси́,/ те́мже тебе́ вся тварь по до́лгу ны́не сотворя́ет твою́ ра́достно па́мять.

Блаже́нное чре́во твое́ вои́стинну,/ носи́вшее Свет ми́ра внутрь во чре́ве носи́вшую,/ и сосца́ твоя́ кра́сная,/ я́ко дои́вшая дои́вшую, А́нно, Христа́, Пита́теля на́шего.

Я́ко пожи́вши непоро́чно, Ю́же непоро́чно родила́ еси́, Богоро́дицу Отрокови́цу,/ Сло́во О́тчее породи́вшую,/ и к Нему́ со сла́вою всели́лася еси́,/ обожена́ честны́ми вои́стинну прича́стии.

Богоро́дичен: Де́вы чре́во – стог, я́коже на гумне́, вои́стинну яви́ся,/ клас неде́ланен иму́щи, и́мже пита́ется вся́кое естество́, зову́щее:/ Всеси́льне, сла́ва, Христе́, си́ле Твое́й.

Песнь 5

Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия Сла́вы Сия́ние Божества́,/ от но́щи у́тренююще,/ воспева́ем Тя, Человеколю́бче.

Не́бо родила́ еси́ на земли́ вои́стинну, ро́ждшую Небесе́ Творца́,/ днесь тя преставля́юща к Небе́сным со сла́вою, А́нно пресла́вная.

С невеще́ственными чи́нми невеще́ственным умо́м лику́еши ра́достно,/ исполня́ема сия́ния Богатода́вца,/ но нас помина́й, ве́рою хва́лящих тя.

От ко́рене Иессе́ева прозя́бшая я́ве,/ благоцвету́щий жезл, Чи́стую, израсти́ла еси́, сла́вная,/ израсти́вшую цвет неувяда́ющий, Иису́са, Изба́вителя на́шего.

Богоро́дичен: К Тебе́ прибега́ю еди́ней держа́вней, ве́рных покро́ву,/ на Тя наде́жду возлага́ю спасе́ния моего́,/ Пресвята́я Влады́чице Богоро́дице, не пре́зри мене́.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Го́спода Иису́са Бо́га пра́отцы,/ Иоаки́м же и А́нна, пра́вдою укра́шени,/ по достоя́нию в пе́снех да восхва́лятся днесь.

Вся́ческих похва́л А́нна превзы́де,/ я́ко вся́кия похвалы́ превозше́дшую родила́ есть,/ сего́ ра́ди в ли́це пра́ведных водворя́ется.

Светоно́сия и све́тлости испо́лнена па́мять твоя́,/ сия́ния же в ми́ре спаси́тельная испуща́ющи,/ целому́дренная А́нно, дарова́ний вся́ческих испо́лни.

Ру́чку, ма́нну Боже́ственную вмести́вшую, во чре́ве носи́ла еси́, А́нно,/ и, с Не́ю ны́не на Небесе́х живу́щи,/ о всех мо́лишися, прехва́льная.

Богоро́дичен: От А́нны ми́рови роди́лася еси́,/ Цари́це, всех Царя́ ро́ждшая,/ и, де́вствующи по Рождестве́, Херуви́м превы́шши, Пренепоро́чная.

Конда́к, глас 2.

Подо́бен: Вы́шних ища́:

Прароди́телей Христо́вых па́мять пра́зднуем,/ тех ве́рно прося́ще по́мощи/ изба́витися всем от вся́кия ско́рби, зову́щим:/ Бог наш с на́ми, сих прославле́й, я́коже благоволи́.

И́кос:

Проро́чески сни́демся вси досто́йно пе́ти прама́тере Христо́вы блаже́нное преставле́ние:/ днесь бо от вре́менныя преста́вися жи́зни,/ на Небесе́х с ра́достию ше́ствие творя́щи, ра́дуется,/ я́ко су́щи ма́ти и́стинныя су́щия Богоро́дицы, и взыва́ет ве́рно:/ вели́чит душа́ моя́ Го́спода, я́ко роди́х Сего́ Ма́терь на земли́,/ И́же Сию́ прославле́й, я́коже благоволи́.

Песнь 7

Ирмо́с: Спасы́й во огни́ авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,/ Бо́же оте́ц на́ших благослове́н еси́.

Я́ко жи́зни и́стинныя, А́нно, Ма́терь ро́ждши,/ к жи́зни и́стинней преста́вилася еси́ ко све́ту, взыва́ющи:/ препе́тый Го́споди, Бо́же оте́ц на́ших, благослове́н еси́.

И́же Ма́тери Изба́вителя ма́ти су́щи, А́нно,/ от земли́ к Небеси́, доброде́тельми укра́шена, востече́, во хвале́нии зову́щи:/ Бо́же оте́ц на́ших, благослове́н еси́.

К несконча́емей жи́зни, к простра́нней широте́ ра́йския пи́щи,/ к невече́рнему све́ту отшла́ еси́, Богоно́сице, зову́щи:/ Бо́же оте́ц на́ших, благослове́н еси́.

Испещре́на доброде́тельми, добро́тою Боже́ственных дарова́ний укра́шена,/ к Бо́гу преложи́ся, непреста́нно зову́щи:/ препе́тый Го́споди, Бо́же оте́ц на́ших, благослове́н еси́.

Богоро́дичен: Укра́шена добро́тами доброде́телей,/ кра́снаго па́че сыно́в челове́ческих и родила́ еси́ Сло́во, Пренепоро́чная,/ кра́сными ле́потами украша́ющаго Тебе́ песносло́вящих.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́ емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Ма́ти еди́ныя Богоро́дицы, я́же непло́ды пре́жде, ны́не же прама́ти Христо́ва,/ я́коже непло́дства, си́це и ме́ртвости, совле́кши оде́жду, во стране́ живу́щих вопие́т:/ Го́спода по́йте, дела́, и превозноси́те Его́ во вся ве́ки.

Христо́с тебе́ две́ри Вы́шния отве́рзе, ра́достно тя прия́т,/ я́ко дверь родила́ еси́, е́юже Сам про́йде и затворе́ну яви́ по исхожде́нии,/ Богому́драя достойнопе́тая А́нно,/ те́мже тя почита́ем, ве́рнии, во ве́ки.

Свя́то житие́ сконча́вши, Святы́я Присноде́вы ма́ти была́ еси́,/ Я́же Пресвято́е Сло́во породи́, освяще́ние и избавле́ние нам подаю́ща,/ Богому́драя и досточу́дная А́нно,/ те́мже тя пое́м при́сно, ве́рнии, во ве́ки.

Богоро́дичен: Мно́гими мя содержи́ма беда́ми и бу́рею грехо́вною бе́дствующаго,/ ко приста́нищу невла́емому дыха́ний Ду́ха, Богороди́тельнице Влады́чице, ны́не наста́ви:/ приста́нище бо еси́ христиа́н./ Те́мже Тя пое́м во вся ве́ки.

Песнь 9

Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.

От земли́ чре́ва твоего́ вои́стинну роди́ся земля́ свята́я,/ неде́ланен клас прозя́бши безсе́менно, ми́рови Пита́теля и Го́спода,/ тебе́ к пи́щи неиждива́емой, А́нно, прему́дро преста́вльшаго.

Па́мять твоя́ днесь нам возсия́, со́лнца светле́йши,/ сия́нием бога́тых даро́в нас просвеща́ющи, всечестна́я, и мрак страсте́й изыма́ющи,/ ю́же соверша́ющих сохрани́.

Боже́ственный нас Иоаки́м и А́нна Богому́драя и всесла́вная,/ супру́г честны́й и светоно́сный, созыва́ют боже́ственне весели́тися сих пра́здником,/ его́же уясни́ Светода́вец всех Госпо́дь.

Богоро́дичен: Мари́е Госпоже́ всех, вся́кими мя порабоще́на согреше́нии ны́не свободи́:/ Сама́ бо Свободи́теля родила́ еси́ всех,/ рабо́ты нас изба́вльшаго грехо́вныя, Боже́ственным манове́нием.

Свети́лен.

Подо́бен: Со ученики́:

Достодо́лжно воспое́м Богозва́нную А́нну:/ Богоро́дицу бо та Де́ву Мари́ю ро́ждши па́че наде́жды,/ сро́дница по пло́ти Христа́, Изба́вителя на́шего, яви́ся,/ сию́ боголе́пно прие́мшаго днесь в Вы́шних, о нас моля́щуюся и о умире́нии ми́ра.

Сла́ва, и ны́не.

Подо́бен: Не́бо звезда́ми:

Не́бо ро́ждши, А́нно, но́вое, Мари́ю, Е́юже возсия́ сла́вы Со́лнце,/ днесь от земли́ к Небе́сным прехо́диши,/ Христу́ сра́дующися, пресла́вная.

На хвали́тех стихи́ры на 4, глас 1.

Подо́бен: Небе́сных чино́в:

Па́мять соверша́юще честну́ю,/ Тебе́ воспева́ем, Христе́,/ пресла́вно А́нну от жи́зни привре́менныя/ к непрестаю́щей сла́ве преста́вльшаго ны́не,/ я́ко ма́терь су́щую без се́мене ро́ждшия Тя па́че естества́/ Богоро́дицы и Присноде́вы Ма́тере.

Па́мять святу́ю соверша́юще пра́отец Христо́вых/ Иоаки́ма и А́нны, честны́х и непоро́чных,/ прославля́ем непреста́нно Изба́вителя/ и Ще́драго Го́спода,/ сих преста́вльшаго к жи́зни/ нестаре́емей и нетле́нней.

К невеще́ственным лико́м и пра́ведных селе́нием,/ иде́же а́нгельстии чи́ни,/ иде́же святы́х собо́р,/ ра́дость пра́зднующих соверша́ется,/ и ны́не ду́хи пра́ведных Иоаки́ма и А́нны всели́,/ и́хже благоче́стно восхваля́юще, ублажи́м.

Сла́ва, и ны́не, глас 2:

Прииди́те, любоде́вственнии вси/ и чистоты́ рачи́телие,/ прииди́те, пра́зднуем А́ннино честно́е успе́ние:/ и́бо та породи́ па́че естества́ исто́чника жи́зни,/ Мари́ю Богоотрокови́цу,/ из Нея́же роди́ся Изба́витель,/ просвеща́яй и освяща́яй ду́ши на́ша.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Гала́том, зача́ло 210. Аллилу́ия, глас 1: Спасе́ние пра́ведным от Го́спода, и защи́титель им есть во вре́мя ско́рби. Ева́нгелие от Луки́, зача́ло 36. Прича́стен: Ра́дуйтеся:

ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры, глас 2.

Подо́бен: Ки́ими похва́льными:

Го́споди, даждь ми язы́к светлогла́сен/ уго́ждшаго Тебе́ преблаже́ннаго отца́ па́мять/ ве́рным лю́дем Твои́м возвести́ти,/ я́коже рече́ песнопи́сец Дави́д:/ честна́ пред Го́сподем смерть преподо́бных Его́./ О́тче Богому́дре, пресве́тлый свети́льниче Мака́рие,/ мно́га у́бо воздая́ния от Бо́га прия́л еси́,/ твои́ми чудесы́ озаря́я нас,/ пога́ныя посрами́л еси́,/ моли́твами же твои́ми бесо́вская кова́рства вся потреби́л еси́,/ моли́ Христа́ Бо́га/ спасти́ и просвети́ти ду́ши на́ша.

Глас проро́ка Твоего́, Го́споди, испо́лнити хотя́,/ рече́ бо Богооте́ц Дави́д,/ поя́ и моля́ся не престая́ день и нощь:/ удали́хся, бе́гая, и водвори́хся в пусты́ню,/ ча́ях Бо́га, спаса́ющаго мя./ А́ще бы пусты́ня уха́ла струя́ми слез твои́х,/ се бы, я́ко громогла́сная труба́,/ не бы почи́ла вопи́ти трудополо́жных по́двиг твои́х:/ А́нгелы возвесели́л еси́ и челове́ки удиви́л еси́, о́тче Мака́рие./ Преподо́бне и приснопа́мятне,/ моли́ Христа́ Бо́га/ спасти́ся душа́м на́шим.

Богоно́се о́тче Мака́рие,/ ты от младе́нства жесто́ким и приско́рбным путе́м ше́ствовал еси́,/ доброде́тельми же твои́ми,/ я́ко плодови́т виногра́д, на высоту́ возше́л еси́,/ любо́вию Влады́це твоему́ неле́стно после́довав./ Сего́ ра́ди Небе́сный граждани́н был еси́/ и та́мо нам у Христа́ Бо́га покро́в испроси́ от бесо́вских искуше́ний,/ Его́же моли́ дарова́ти душа́м на́шим/ мир и ве́лию ми́лость.

Сла́ва, глас 4:

Ра́дуйся, всеблаже́нная главо́,/ и́же от млады́х ногте́й/ кре́постню ума́ Бо́га Вседержи́теля утвержда́емь,/ духо́вную пи́щу Христа́ па́че всех возлюби́л еси́,/ земны́я красоты́, и пи́щи, и поко́й отню́д возненави́дел еси́,/ того́ ра́ди Небе́сным си́лам собесе́дник яви́лся еси́, преподо́бне./ С ни́миже Христа́ Бо́га моли́ непреста́нно о всех нас,/ ве́рно чту́щих па́мять твою́.

И ны́не, Богоро́дичен: И́же Тебе́ ра́ди:

Вход. Проки́мен дне. Чте́ния 3 (зри день 30-й).

На стихо́вне стихи́ры, глас 5:

Егда́ в честно́е успе́ние твое́/ град и су́щия ве́си вся,/ я́ко от фимиа́ма церко́внаго, напо́лнишася благово́ния,/ тогда́ позна́ша лю́дие твое́ преподо́бное преставле́ние/ и стеко́шася вси:/ луча́ми бо чуде́с всех озари́л еси́./ Тем и ны́не Христа́ Бо́га моли́/ спасти́ся душа́м на́шим.

Стих: Честна́ пред Го́сподем/ смерть преподо́бных Его́.

Днесь правове́рнии лю́дие стеко́шася/ в честно́е успе́ние твое́,/ тогда́ обре́тше, я́ко безце́нное сокро́вище некра́домое,/ лице́ же твое́, па́че со́лнечнаго све́та сия́юще,/ всю́ду благово́ния испо́лни./ Су́щим же хромы́м хожде́ние/ и слепы́м зре́ние дарова́л еси́./ Моли́ Христа́ Бо́га/ пода́ти отпуще́ние согреше́нием на́шим/ пресла́вно соверша́ющим па́мять твою́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Те́ло и ум очи́стив,/ себе́ при́сно Свята́го Ду́ха жили́ще соде́лал еси́,/ и ны́не, я́ко свети́ло, сия́еши,/ и от многоцеле́бнаго гро́ба твоего́ непреста́нно чудеса́ излива́еши,/ правове́рных же люде́й неизглаго́ланною ра́достию возвесели́л еси́./ Моли́ Христа́ Бо́га спасти́ся душа́м нашим.

Сла́ва, глас 5:

Востру́бим духо́вными пе́сньми/ во псалме́х и пе́ниих,/ стеце́мся в це́рковь Бо́жию/ и услы́шим засту́пника гра́ду на́шему Га́личу,/ его́же моли́твами свои́ми соблюда́ет всегда́ от наше́ствия сопроти́вных./ Те́мже ему́ вси та́ко рцем:/ о́тче Мака́рие приснопа́мятне,/ предвари́ и изба́ви нас от искуше́ний вся́ческих,/ любо́вию моля́щих тя,/ я́ко те́пла предста́теля ко Спа́су всех Бо́гу за лю́ди твоя́,/ да спасе́т ду́ши на́ша.

И ны́не, Богоро́дичен: Храм и дверь еси́:

Та́же,Ны́не отпуща́еши:

Тропа́рь, глас 5:

Днесь град твой Га́лич тобо́ю хва́лится,/ в конце́х бо его́ пресве́тло,/ я́ко ве́лие со́лнце, возсия́л еси́/ и чудесы́ твои́ми, преподо́бне Мака́рие, вся озари́л еси́./ И ны́не моли́ся Го́сподеви/ изба́витися душа́м на́шим от пре́лести вра́жия/ и спасти́ся гра́ду твоему́ от пога́нскаго наи́тия.

Ин тропа́рь, глас 4:

Богому́дрый Желтово́дския оби́тели первозда́телю,/ Бо́гом поста́вленный мона́шескаго жития́ сто́лпе,/ благопи́санный досточу́днаго по́стничества о́бразе,/ Богозда́нный Ду́ха Свята́го сосу́де,/ златоза́рное Ру́сския земли́ свети́ло всесве́тлое,/ мо́лим тя, о́тче Мака́рие,/ светоза́рною моли́тв твои́х луче́ю разреша́й мра́чных страсте́й на́ших о́блак.

Сла́ва, и ны́не, Богоро́дичен по гла́су.

НА У́ТРЕНИ

На Бог Госпо́дь: тропа́рь преподо́бнаго два́жды. Сла́ва, и ны́не, Богоро́дичен.

По 1-й стихоло́гии седа́лен, глас 4.

Подо́бен: Ско́ро предвари́:

Зва́нию Го́спода твоего́ после́довал еси́, мир оста́вив/ и вся, я́же в ми́ре, красова́ния, преблаже́нне Мака́рие:/ претерпе́л еси́ усе́рдно пусты́нное озлобле́ние,/ полки́ же бесо́вския отри́нул еси́ му́жески./ Те́мже па́мять твою́ при́сно восхваля́ем пе́сньми ве́рно.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к животу́ нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.

По 2-й стихоло́гии седа́лен, глас 5.

Подо́бен: Собезнача́льное Сло́во:

По́стника Госпо́дня пе́сньми почти́м,/ я́ко умертви́вша вся прило́ги страсте́й воздержа́нием тве́рдым/ и кре́пким терпе́нием вои́стинну, и посрами́вша зело́ сопроти́внаго всю горды́ню,/ и ны́не моля́щася Го́сподеви поми́ловатися душа́м на́шим.

Сла́ва, и ны́не, Богоро́дичен:

Ужа́сно чу́до зача́тия и несказа́нен о́браз Рождества́ в Тебе́ позна́ся, Присноде́во Чи́стая,/ ужаса́ет мой ум, и удивля́ет помышле́ние./ Сла́ва Твоя́, Богоро́дице, во всех простре́ся ко спасе́нию душа́м на́шим.

По полиеле́и седа́лен, глас 1.

Подо́бен: Гроб Твой, Спа́се:

Погре́бл еси́ страсте́й все воста́ние умерщвле́нием пло́ти, свяще́нный о́тче,/ жизнь безконе́чную по сме́рти прия́л еси́./ Те́мже днесь Христо́ва Це́рковь пра́зднует твою́ досточу́дную па́мять,/ преподо́бных украше́ние.

Сла́ва, и ны́не, Богоро́дичен:

Наста́ви нас на путь покая́ния, укло́ньшияся при́сно к безпу́тием зол/ и Преблага́го прогне́вавшия Го́спода,/ Неискусобра́чная благослове́нная Мари́е,/ прибе́жище отча́янных челове́ков, Бо́жие жили́ще.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси полки́/ и а́нгельския дости́гл еси́ чи́ны,/ и́хже житию́ без поро́ка поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

Кано́н, глас 4.

Песнь 1

Ирмо́с: Колесни́цы фарао́новы и си́лу его́/ вве́рже в мо́ре Кре́пкий в бра́нех,/ воспое́м песнь но́вую, я́ко просла́вися.

Весь освяще́н быв благода́тию Христо́вою, Мака́рие преподо́бне,/ вои́стинну, я́ко избра́н сосу́д, Бо́гови показа́лся еси́/ и жили́ще че́стно Свята́го Ду́ха.

От ю́ности Бо́га возлюби́л еси́, преподо́бне Мака́рие,/ и Тому́ от всея́ души́ порабо́тал еси́, преблаже́нне./ И ны́не помина́й нас, пресве́тло соверша́ющих па́мять твою́.

От страсте́й душетле́нных ми́ра сего́ избе́гл еси́, преподо́бне,/ и в пусты́ню всели́лся еси́ глубо́кую./ Ны́не же у́бо ра́дуется дух твой в Небе́сных оби́телех.

Богоро́дичен: О Тебе́ ра́дуется вся́кое созда́ние Бо́жие, Ма́ти Бо́га Вы́шняго,/ Его́же понесла́ еси́, нося́щаго вся́ческая./ И мы, чту́ще Тя вои́стинну, я́ко Богоро́дицу в пе́снех велича́ем.

Песнь 3

Ирмо́с: Утвержда́яй гром и созида́яй дух,/ утверди́ мене́, Го́споди,/ да Тя пою́ и́стинно/ и творю́ во́лю Твою́,/ я́ко несть свят, я́ко Ты, Бо́же наш.

Уха́ет твоя́ ра́ка бога́тно и дае́т незави́стно всем исцеле́ние,/ ду́ши же от бесо́вских наве́т избавля́еши моли́твами твои́ми, преподо́бне.

Отгна́л еси́, преподо́бне, от люде́й твои́х бесо́вская озлобле́ния,/ и гряду́щая их ополче́ния, я́же на нас, мо́лим тя укроти́ти,/ я́ко да при́сно соверша́ем па́мять твою́.

Утверди́ се́рдце мое́ све́тло воспева́ти па́мять твою́, о́тче всеблаже́нне Мака́рие:/ поще́нием бо и бде́нием, я́ко А́нгел, показа́лся еси́,/ в моли́твах воспева́я Бо́га, подаю́щаго нам тобо́ю всем исцеле́ние.

Богоро́дичен: Всепе́тая Ма́ти Бо́жия, ро́ждшая нам Жизнода́вца и Спа́са всех Бо́га,/ Того́ у́бо, Госпоже́, моли́ бо́дренною Твое́ю моли́твою, да спасе́т ду́ши на́ша.

Седа́лен, глас 3:

Моля́ приле́жно Го́спода и Того́ ра́ди свы́ше ве́лие дерзнове́ние прия́л еси́,/ я́коже и инове́рнии чудесе́м твои́м дивля́хуся вои́стинну, прехва́льне Мака́рие:/ их бо ага́рянское безбо́жное шата́ние посрами́л еси́/ и моли́твами твои́ми до конца́ их ослепи́л еси́,/ град же и вся су́щия лю́ди в нем неврежде́нны соблю́л еси́./ И ны́не, преподо́бне, Христа́ Бо́га моли́ ми́лостива быти нам днесь и во ве́ки.

Сла́ва, и ны́не, Богоро́дичен:

Устраши́ся вся́кое земноро́дное слы́шание,/ от недр Оте́ческих в деви́чу утро́бу всели́вшася слы́шаще,/ Его́же у́бо проро́цы провозвести́ша, из Тебе́ воплоще́нна бы́ти Сы́на Бо́жия,/ Ма́ти Де́во Всепе́тая,/ Его́же моли́ спасти́ ста́до Твое́, Богоро́дице.

Песнь 4

Ирмо́с: Услы́шах, Бо́же, слух Твой и убоя́хся,/ разуме́х дела́ Твои́ и ужасо́хся, Го́споди,/ я́ко Твоего́ хвале́ния испо́лнь земли́.

Се удали́лся еси́, бе́гая ми́ра и су́щих в нем/ и прилепи́лся еси́ Го́сподеви твоему́, Влады́це и Бо́гу всех,/ Ему́же, при́сно поя́, благоугоди́л еси́, му́дре Мака́рие.

Удиви́шася а́нгельстии ли́цы твоему́ трудолю́бию, блаже́нне,/ и мы, ве́рнии, при́сно тя сла́вим,/ я́ко да моли́твами твои́ми изба́вимся бу́дущаго осужде́ния.

Украша́ется днесь ве́рных собо́р,/ торжеству́я, преподо́бне, в па́мять твою́,/ пога́ных же со́нмища ужаса́ются,/ ви́дяще тя кре́пка засту́пника гра́ду твоему́ и живу́щим в нем.

Богоро́дичен: Исцели́, Де́во, боле́зни серде́ц на́ших,/ Тебе́ бо и́мамы Помо́щницу и Хода́таицу к Сы́ну Твоему́ и Бо́гу на́шему,/ Его́же родила́ еси́, Спа́са и Врача́ всех, источи́вшаго спасе́ние душа́м на́шим.

Песнь 5

Ирмо́с: Возсия́й ми, Го́споди, свет повеле́ний Твои́х,/ я́ко к Тебе́ дух мой у́тренюет и пое́т Тя:/ Ты бо еси́ Бог наш,/ и к Тебе́ прибега́ю, Царю́ ми́ра.

В пусты́ни я́сно возсия́л еси́, Богодохнове́нне Мака́рие,/ нося́ во усте́х твои́х непреста́нныя моли́твы./ Тем мра́чныя собла́зны и бесо́вския полки́ до конца́ потреби́л еси́.

Возгреме́ Илия́ на колесни́це,/ ты же, свя́те, воспева́л еси́ богодохнове́нную песнь в пусты́ни,/ со А́нгелы вся́ческих Влады́ку умоля́я, е́же улучи́ти Го́рнее пребыва́ние.

Водвори́лся еси́, блаже́нне, в Небе́сныя оби́тели,/ и со А́нгелы, преподо́бне, лику́еши в Го́рних селе́ниих,/ и та́мо Вседержи́теля вы́ну зри́ши Бо́га,/ Его́же непреста́нно моли́ о всех нас.

Богоро́дичен: Вы́шша естества́ Бо́га пло́тию породила́ еси́, Де́во, я́коже Сам восхоте́./ Тем, ве́рнии, мо́лим Тя,/ изба́витися нам Рождество́м Твои́м ве́чнаго муче́ния.

Песнь 6

Ирмо́с: Бу́ря мя помышле́ний, пости́гши,/ во глубину́ низвлачи́т мя безме́рных грехо́в,/ но Ты, Упра́вителю Благи́й,/ предвари́в, упра́ви,/ я́ко проро́ка, и спаси́ мя.

Безпло́тных житие́ подража́л еси́, преподо́бне, я́ко А́нгел непоро́чно на земли́ пожи́в,/ воздержа́нием плотски́я стра́сти умертви́л еси́, о́тче Мака́рие,/ сла́ву же ми́ра сего́ возненави́дел еси́, Богому́дре.

Боже́ственный глас вня́л еси́ себе́, прему́дре,/ тем и в пусты́ню водвори́лся еси́, послуша́нием любе́зно нося́ Крест Его́./ И сего́ ра́ди потща́лся еси́ чи́ста себе́ сохрани́ти до конца́, преподо́бне.

Боже́ственным манове́нием тебе́ зве́рие ди́вии в пусты́ни покори́шася:/ стра́сти бо тебе́ плотски́я вся умири́шася./ Сего́ ра́ди и бесо́вская льще́ния посрами́л еси́.

Богоро́дичен: Боже́ственное селе́ние Ты еси́, Пречи́стая Богоро́дице:/ от Твоея́ бо утро́бы произы́де Сло́во О́тчее и бысть Бог и Челове́к,/ я́ко да за неизрече́нное милосе́рдие спасе́т челове́ческий род.

Конда́к, глас 2:

Вторы́й Моисе́й яви́лся еси́, преподо́бне:/ он бо жезло́м мо́ре раздели́,/ ты же стра́сти, я́ко Амали́ка, победи́л еси́/ и непрохо́дную пусты́ню немяте́жным умо́м проше́л еси́,/ в не́йже моли́твами твои́ми ве́лие чу́до сотвори́л еси́:/ гла́дныя лю́ди до изоби́лия прекорми́л еси́./ И ны́не моли́ся Го́сподеви/ пода́ти всем печа́льным утеше́ние,/ Мака́рие, о́тче приснопа́мятне,/ и́же Га́личестей стране́ и всей Ру́сстей земли́/ похвала́ и утвержде́ние.

И́кос:

Я́ко светоза́рная луча́, вселе́нней свет возвеща́я, днесь ты, всему́дре о́тче Мака́рие,/ озари́л еси́ Га́лическую страну́ и всю зе́млю Ру́сскую чудесы́ твои́ми,/ и́миже тя Христо́с Бог обогати́./ Тем и вопие́м ти:/ ра́дуйся, пребога́те о́тче Мака́рие,/ ра́дуйся, е́же всех по́стничествующих всечестно́е сосло́вие./ Ра́дуйся, я́ко ли́ку святы́х всему́дрое сочета́ние показа́лся еси́,/ ра́дуйся, преподо́бных всех удобре́ние и отце́в похвало́./ Ра́дуйся, крестоно́сное после́дование по гла́су Го́спода твоего́,/ ра́дуйся, и́же у Христа́ ве́рному во́инству на́шему на сопроти́вныя побе́ды испроша́еши./ Ра́дуйся, я́ко град наш от ва́рварскаго наи́тия невреди́м сохраня́еши,/ ра́дуйся, я́ко пусты́нным селе́нием светоли́чен вене́ц себе́ сплел еси́./ Ра́дуйся, я́ко Небе́снаго жи́тельства смиренному́дрия ра́ди твоего́ дости́гнути сподо́бился еси́,/ ра́дуйся, я́ко у престо́ла Вседержи́теля Бо́га со А́нгелы лику́еши./ Ра́дуйся, я́ко усе́рдно Того́ за ве́рныя рабы́ мо́лиши,/ ра́дуйся, Мака́рие приснопа́мятне,/ и́же Га́личестей стране́ и всей Ру́сской земли́ вели́кая похвала́ и утвержде́ние.

Песнь 7

Ирмо́с: Глаго́лавый на горе́ с Моисе́ом/ и о́браз де́вства явле́й в купине́,/ благослове́н еси́, Бо́же оте́ц на́ших.

Гла́сом любе́зным Тро́ицу воспева́я,/ и я́ко Богодохнове́нен орга́н яви́лся еси́, Мака́рие преподо́бне, и́же велегла́сно всем зовы́й:/ благослове́н Бог оте́ц на́ших.

Пусты́нная вита́ния бога́тно получи́в, свя́те Мака́рие,/ ю́же прехожда́л еси́ непреста́нною моли́твою,/ и та́мо получи́в духо́вную пи́щу, зовы́й:/ благослове́н Бог оте́ц на́ших.

Глаго́л Госпо́день исполня́я,/ за́поведи Бо́га твоего́ от ю́ности сохрани́л еси́, о́тче Мака́рие,/ и Того́ благода́тию возмо́гл еси́ пога́ных собо́рища твои́ми чудесы́ удиви́ти./ Сего́ ра́ди зове́м:/ благослове́н Бог оте́ц на́ших.

Богоро́дичен: Глаго́л Деви́ч Ио́сиф Тя нарече́, я́ко пра́во есть:/ утро́бу же не деви́чу, но Небе́сный круг и земну́ю широту́./ Во Твое́й бо утро́бе Отчее Сло́во бысть, благослове́н Бог оте́ц на́ших.

Песнь 8

Ирмо́с: Земля́ и вся, я́же на ней,/ мо́ре и вси исто́чницы,/ Небеса́ небе́с, свет и тьма, мраз и зной,/ сы́нове челове́честии,/ свяще́нницы, благослови́те Го́спода/ и превозноси́те Его́ во ве́ки.

Земна́я вся оста́вив, пи́щу же и сла́ву ми́ра сего́, я́ко прах, вмени́л еси́/ и еди́наго Бо́га возжеле́л еси́, о́тче,/ Его́же моли́ пла́мень страсте́й угаси́ти в нас,/ пою́щих и превознося́щих Его́ во ве́ки.

Зе́млю от младе́нства слеза́ми твои́ми, я́ко ту́чами, напои́л еси́, блаже́нне,/ по́ты же и по́двиги трудо́в твои́х кто́ испове́сть?/ И́хже ра́ди венча́ тя Христо́с в Ца́рствии Свое́м,/ Е́го́же пое́м и превозно́сим во ве́ки.

Земля́ я́ко плодови́та, яви́лся еси́, о́тче Мака́рие:/ изне́сл бо еси богосажде́нный плод, ве́рных напитава́ющ сердца́/ бра́шном живоно́сным Ева́нгельскаго уче́ния Христо́вых усте́н,/ Его́же пое́м и превозно́сим во ве́ки.

Богоро́дичен: Земле́ свята́я и Непоро́чная Де́во,/ из Тебе́ бо напосле́док прозябе́ Христо́с Бог,/ я́коже кля́лся есть Авраа́му, рабу́ Своему́, е́же умно́жити се́мя его́/ и Тобо́ю спасти́ седя́щия во тьме./ Спаси́, Влады́чице, всех, пою́щих Тя и превознося́щих Го́спода во ве́ки.

Песнь 9

Ирмо́с: Я́ко сотвори́ Мне вели́чия Си́льный,/ и Свя́то И́мя Его́,/ и ми́лость Его́/ в род и род боя́щимся Его́.

Я́ко те́пла засту́пника стяжа́хом тя в бране́х, о́тче Мака́рие:/ плене́нныя бо моли́твами твои́ми свобожда́еши и неве́рныя со́нмища посрамля́еши.

Я́ко со́лнце светоно́сное, чудесы́ сия́еши, Мака́рие,/ и равноа́нгельно на земли́ пожи́л еси́, Богому́дре,/ Боже́ственней же сла́ве со А́нгелы предстоя́ти сподо́бился еси́.

Прекра́сен дом Свята́го Ду́ха яви́лся еси́/ и Царя́ всех Христа́ Бо́га от всея́ души́ возлюби́л еси́,/ Его́же ра́ди в чудесе́х прославля́ешися, досточу́дне о́тче Мака́рие преподо́бне.

Богоро́дичен: Вся тварь воспева́ет Тя, Богоро́дице,/ и Небе́снии чи́нове Тебе́ велича́ют непреста́нно:/ Бо́га бо и Царя́ всех родила́ еси́, Де́во Чи́стая./ Его́же моли́ вся гра́ды и страны́ ве́рныя соблюсти́ от наве́та вра́жия.

Свети́лен:

Влады́чню престо́лу ны́не с преподо́бными ли́ки предстоя́, Богому́дре,/ моли́тися не преста́й дарова́ти побе́ды во́инству на́шему на сопроти́вныя вся,/ и междоусо́бныя бра́ни укроти́ти,/ и мир ми́рови устро́ити, о́тче Мака́рие,/ и спасти́ ду́ши на́ша.

Сла́ва, и ны́не, Богоро́дичен:

От нерукотворе́нных пеле́н небе́сных о́блак/ в смире́нныя пелены́ тле́нныя облече́ся Сло́во О́тчее,/ из Де́вы неизрече́нно без се́мене роди́вся,/ Ю́же, Чи́стую Ма́терь, Пресла́вную Богоро́дицу,/ непреста́нно пое́м и славосло́вим во ве́ки.

На хвали́тех поста́вим стихо́в 4, глас 8:

О́тче Богому́дре Мака́рие,/ в ме́ру похвалы́ преподо́бных дости́гл еси́:/ смиренному́дрия же ра́ди де́монов вы́и сокруши́л еси́,/ слеза́ми же пото́ки и по́стными труды́/ ва́рваров ро́ги сломи́л еси́./ Христу́ приле́жно моли́ся, преподо́бне,/ соверше́нне испроси́ти оте́честву побе́ды на сопроти́вныя.

Преподо́бне о́тче Мака́рие,/ нача́льниче мона́шествующих,/ егда́ у́бо бы́вшу гне́ву Бо́жию на лю́ди,/ тогда́ ва́рвары оби́тель твоея́ па́ствы плени́ша,/ и ча́да твои́ мечи́, я́ко кла́сы пожа́ша;/ моли́твами же и моле́нием твои́м/ к невече́рнему Све́ту их посла́л еси́,/ иде́же от Влады́ки всех Бо́га досто́йныя венцы́ прия́ша;/ Его́же приле́жно моли́ дарова́ти нам ве́лию ми́лость.

В Вы́шних ве́чная взыска́л еси́,/ до́льняя же вся, я́ко мимоше́дшая, вмени́л еси́/ и та́ко изя́щен моли́твенник показа́лся еси́./ Егда́ же у́бо от шата́ния безбо́жных ва́рвар/ непрохо́дными пусты́нями ше́ствовал еси́,/ тогда́ моли́твами твои́ми до изоби́лия бра́шно лю́дем твои́м испроси́л еси́./ И ны́не нам па́че духо́вную пи́щу от Христа́ испроси́,/ о́тче Мака́рие, преподо́бне,/ я́ко да, любо́вию в па́мять твою́ соше́дшеся,/ тебе́ почита́ем.

Сла́ва, глас 6:

Псало́мски пе́сньми днесь почти́м преподо́бнаго/ с весе́лием о Го́споде и па́ки рцем:/ ра́дуйся, блаже́нства тезоимени́те Мака́рие,/ ра́йскаго ра́дования напо́лнивыйся,/ и от Христа́ Бо́га нетле́нный вене́ц прия́л еси́,/ и, я́ко свети́льник пресве́тлый, ду́шу твою́ просвети́л еси́./ И ны́не та́ко пе́сньми вси возопие́м:/ ра́дуйся, преподо́бне о́тче наш.

И ны́не, Богоро́дичен. Славосло́вие вели́кое.

И отпу́ст.

НА ЛИТУРГИ́И СЛУ́ЖБА ПРЕПОДО́БНИЧЕСКАЯ.

Моли́тва

О преподо́бне и Богоно́сне о́тче наш Мака́рие! Ве́руем, я́ко ты, предстоя́ Престо́лу Пресвяты́я Тро́ицы, ве́лие и́маши дерзнове́ние в моли́твах ко Всеми́лостивому Го́споду Бо́гу, И́же всегда́ послу́шает тебе́, ве́рнаго раба́ и уго́дника Своего́. Сего́ ра́ди с умиле́нием смире́нно припа́даем к тебе́, свя́тче Бо́жий, не премолчи́ о нас моли́тися ко Го́споду Бо́гу, в Тро́ице покланя́емому и сла́вимому, да ми́лостиво призре́в на ны, не попу́стит нам поги́бнути во гресе́х на́ших, но да возста́вит па́дших, да пода́ст исправле́ние зло́му и окая́нному на́шему житию́, от гряду́щих грехопаде́ний восхища́я, и да прости́т нам вся, ели́ка са́ми собо́ю или́ чрез други́х кого́ согреши́хом мы́слию, сло́вом и де́лом, от рожде́ния до сего́ часа́. Ты, подви́жниче доброде́телей, о́тче наш Мака́рие, ве́си не́мощь естества́ на́шего и тя́жесть и скорбь време́н настоя́щих, моли́ у́бо вы́ну Го́спода Бо́га, да николи́же нас оставля́ет Его́ неизрече́нное милосе́рдие, но да храни́т нас от мирски́х искуше́ний, от диа́вольских сете́й и от плотски́х по́хотей, да прии́мем от Го́спода Бо́га тобо́ю и вся потре́бная к жи́зни вре́менней, освобожде́ние от бед и напа́стей, а среди́ их неосла́бное терпе́ние до конца́. Испроси́ нам у Го́спода Бо́га в ми́ре и покая́нии сконча́ти живо́т наш и невозбра́нно преити́ от земли́ на Не́бо, мыта́рств же и бесо́в возду́шных и ве́чныя му́ки изба́витися и сподо́битися Ца́рства Небе́снаго, с тобо́ю и со все́ми святы́ми, угоди́вшими Го́споду Бо́гу и Спаси́телю на́шему Иису́су Христу́, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м и с Пресвяты́м, и Благи́м, и Животворя́щим Его́ Ду́хом, ны́не, и при́сно, и во ве́ки веко́в. Ами́нь.

И́ на моли́тва

Преподо́бне и Богоблаже́нне о́тче наш Мака́рие! Свети́льниче всеми́рный, мона́хов и подви́жников удобре́ние, Га́личския страны́ и всея́ Ру́сския земли́ засту́пниче! Неусыпа́емый и те́плый за ны, гре́шныя, моли́твенниче ко Всеми́лостивому Спа́су на́шему и Бо́гу Иису́су Христу́ и ко Пресвяте́й и Пречи́стей Ма́тери Его́, Влады́чице на́шей Богоро́дице и Присноде́ве Мари́и! Мо́лим твою́ всечестну́ю святы́ню, недосто́йнии ученицы́ твои́, не забу́ди ны, смире́нная ча́да твои́, но я́ко чадолюби́вый оте́ц посеща́й ду́хом при́сно душ на́ших не́мощь. И́ испроси́ моли́твами твои́ми у Христа́ Бо́га на́шего, я́ко да освяти́т ду́ши на́ша и телеса́, и просвети́т наш ум и ра́зум, и очи́стит со́весть на́шу от вся́кия скве́рны, и от нечи́стых по́мыслов, и лука́вых умышле́ний, и вре́дных разуме́ний, и губи́тельнаго уны́ния, и изба́вит нас от вся́ких де́монских непреста́нных наве́тов же и озлобле́ний дневны́х и нощны́х. Да́рует же нам и́скреннее покая́ние, сокруше́ние се́рдцу, сле́зы и умиле́ние, воздержа́ние и тре́звость, смиренному́дрие, кро́тость же и безмо́лвие, и чистоту́ душе́вную и теле́сную, нищелю́бие же и страннолю́бие, и нелицеме́рную ко друг дру́гу любо́вь и милосе́рдие, и вся́кое и́ноческое благогове́ние. О всеблаже́нне о́тче наш Мака́рие, сподо́би ны после́довати, по си́ле на́шей, свято́му твоему́ и равноа́нгельному житию́! Я́ко да всеми́лостивым предста́тельством Преблагослове́нныя и Препросла́вленныя Присноде́вы Мари́и Богоро́дицы, Небе́сныя Цари́цы, христиа́нския Засту́пницы и Покрови́тельницы, и твои́ми святы́ми моли́твами Преблаги́й Христо́с Бог наш пока́жет на нас, гре́шных рабе́х Свои́х, благода́ть и ми́лость Свою́, и настоя́щих зол и бу́дущих мук ве́чных свободи́т нас, и сподо́бит ны насле́дники бы́ти Ца́рствия Своего́ Небе́снаго, сла́вящих и велича́ющих Его́ ку́пно, со Безнача́льным Его́ Отце́м, и Пресвяты́м, и Благи́м, и Животворя́щим Его́ Ду́хом, ны́не, и при́сно, и во ве́ки веко́в. Ами́нь.