Аще храм или́ настоя́тель изво́лит, твори́м бде́ние.

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 4.

Подо́бен: Я́ко до́бля:

Всесвята́я, све́тлая/ и многопра́зднственная возсия́ па́мять ва́ша/ Ру́сским страна́м днесь,/ сла́вный Рома́не с кро́тким Дави́дом,/ просвеща́ющи ду́ши ве́рою/ чту́щих страда́ния ва́ша./ Тем моли́теся, преблаже́ннии,/ дарова́ти душа́м на́шим очище́ние и ве́лию ми́лость.

Прииди́те вси, о новоизбра́нное ста́до Христо́во,/ духо́вно соше́дшеся, восхва́лим/ благочестиваго вку́пе и ца́рскаго ко́рене святу́ю о́трасль,/ Рома́на с до́блим Дави́дом днесь,/ Христа́ возлюби́вшия,/ и Сего́ ра́ди бра́тнее непра́ведное заколе́ние претерпе́вшия,/ и Христу́ моля́щияся всегда́/ спасти́ся душа́м на́шим.

Да ра́дуется ра́достию все челове́чество днесь,/ и да пое́т, лику́ющи, Боже́ственными пе́сньми Христо́ва Це́рковь,/ хва́лящи новопросвеще́нныя кня́зи же и му́ченики:/ Христа́ бо ра́ди преходя́щее ца́рство земно́е оста́вльше,/ Го́спода от всея́ души́ возлюби́ша/ и мо́лят спасти́ся душа́м на́шим.

Сла́ва, глас 6, самогла́сен:

Побежда́еми жела́нием бу́дущих,/ па́че же любо́вию Христо́вою,/ ца́рство земно́е и сла́ву возненави́деша,/ чистоту́ же возлюби́ша/ и непра́ведное уби́йство претерпе́ша,/ ника́коже проти́вящеся закала́ющему вы бра́ту,/ тем и Христо́с да́ры чуде́с вас обогати́./ О дво́ице свяще́нная,/ о светоза́рный по́лче,/ о Боже́ственный супру́же,/ моли́те спасти́ся душа́м на́шим.

И ны́не, Богоро́дичен.

На стихо́вне стихи́ры, глас 2.

Подо́бен: До́ме Евфро́фов:

Дом себе́/ Ду́ху Сято́му очи́стивше,/ Тому́ и нас жили́ще/ соде́лайте, святи́и,/ моли́твами ва́шими.

Стих: Воззва́ша пра́веднии,/ и Госпо́дь услы́ша их.

Боже́ственная/ и чу́дная дво́ице,/ потреби́тели пре́лести/ и се́ятели благоче́стия,/ моли́те спасти́ся душа́м на́шим.

Стих: Мно́ги ско́рби пра́ведным,/ и от всех их изба́вит я Госпо́дь.

Пресве́тлыя зве́зды я́вльшеся,/ непобеди́мии страда́льцы,/ озари́те нас,/ почита́ющих ве́рою/ свяще́нная ва́ша страда́ния.

Сла́ва, глас 8:

Ра́ка, иде́же лежа́т честны́я и свяще́нныя мо́щи ва́ша,/ версто́ прехва́льная,/ Боже́ственная исцеле́ния приступа́ющим оби́льно источа́ет,/ дре́внюю тьму идолобе́сия отгоня́щи/ и свет благоче́стия осия́ющи./ Но мо́лим вы: моли́теся, святи́и,/ без вре́да сохрани́ти оте́чество ва́ше/ и спасти́ся душа́м на́шим.

И ны́не, Богоро́дичен.

Тропа́рь, глас 2: Правди́вая страстоте́рпца: зри на вели́цей вече́рни.

Сла́ва, и ны́не, Богоро́дичен. И отпу́ст.

НА ВЕЛИ́ЦЕЙ ВЕЧЕРНИ

Блаже́н муж: 1-й антифо́н. На Го́споди, воззва́х: стихи́ры на 8, глас 8.

Подо́бен: О, пресла́внаго чудесе́:

О, пресла́внаго чудесе́!/ Верста́ Боже́ственная же и честна́я/ прехва́льных самобра́тий нам облиста́ днесь,/ созыва́ющи но́выя лю́ди/ похвали́ти предо́блия му́ченики:/ Рома́на у́бо, я́ко усе́рдно пострада́вша,/ Дави́да же, я́ко созаколе́на/ Нескве́рному А́гнцу, пожре́ному нас ра́ди,/ Спа́су душ на́ших.

Пе́рвее у́бо, прехва́льнии,/ повину́вше багряни́цу ца́рствия Христу́/ и Того́ позна́вше,/ и́стиннаго Бо́га и Царя́ всех,/ пра́отеческих же су́етных бого́в уклони́стеся./ Тем и Христо́с да́ры чуде́с вас обогати́/ и вме́сто тле́нных ве́чная вам дарова́,/ прославля́емый во святы́х Спас душ на́ших.

Блаже́нно оте́чество и град,/ в не́мже воспита́стеся,/ честны́й же храм, телеса́ ва́ша восприе́мый,/ я́ко венце́м ца́рствия украси́ся,/ храни́телие благоприя́тнии,/ враги́ устраша́ющии/ и дале́че не́где от оте́чествия ва́шего отгоня́щии,/ Рома́не сла́вне и Дави́де пречу́дне,/ моли́те спасти́ся душа́м на́шим.

И́ны стихи́ры, глас 2.

Подо́бен: Ки́ими похва́льными:

Ки́ими похва́льными венцы́ венча́ем пева́емыя?/ Разделе́ныя телесы́ и совокупле́ныя ду́хом,/ ве́рных люде́й те́плыя засту́пники,/ земли́ Ру́сския удобре́ние/ и всея́ вселе́нныя наслажде́ние,/ мужеу́мным смы́слом бесо́вскую держа́ву разруши́вшия,/ Христа́ посо́бием,/ подаю́щаго ми́ру ве́лию ми́лость.

Ки́ими похва́льными добро́тами украси́м пева́емыя?/ Рома́на, си́лу иму́щаго над страстьми́ до́блественне,/ и Дави́да ку́пно ревни́теля,/ о́ба свети́ла вку́пе сия́ющая,/ озаря́ющая све́том доброде́тели благочести́выя вся:/ Христо́вым бо научи́вшеся за́поведем, просла́вишася сла́вно,/ моля́ще Подаю́щаго всем ве́лию ми́лость.

Ки́ими духо́вными словесы́/ соста́вим пра́здник че́стен пресла́вных му́ченик, / и́же Христа́ ра́ди оста́виша тле́нную сла́ву земну́ю?/ Ов бо прободе́ние в ре́бра прия́т,/ ов же, я́ко а́гнец, закла́н бысть;/ и́же от Христа́ досто́йно просла́вишася,/ и прия́ша исцеле́ний дар,/ всем прося́ще досто́йно ве́лию ми́лость.

Сла́ва, глас 6:

Прииди́те, восхва́лим чудотво́рцев и му́чеников:/ си́и бо, зако́нно пострада́вше,/ победи́ша сопроти́внаго врага́/ и ны́не, све́тло укра́шени, предстоя́т Христу́, ра́дующеся./ Тем и мы пе́сньми па́мять их/ ве́село любо́вию похва́лим, вопию́ще:/ ра́дуйтеся, вселе́нныя засту́пницы/ и побо́рники на враги́;/ ра́дуйтеся, вра́чеве боля́щих,/ бесо́в прогони́телие;/ ра́дуйтеся, о любе́зная версто́,/ бра́тия прекра́снии,/ Рома́не сла́вный и Дави́де чу́дный,/ люби́мии Христу́,/ за ны моля́ще Святу́ю Тро́ицу,/ умири́ти мир и спасти́ ду́ши на́ша.

И ны́не, Богоро́дичен. Та́же вход. Проки́мен дне. Чте́ния три.

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них,/ кто́ возвести́т сия́ в них?/ Или́ я́же от нача́ла, кто́ слы́шана сотвори́т вам?/ Да приведу́т свиде́тели своя́, и оправдя́тся, и да услы́шат,/ и да реку́т и́стину./ Бу́дите Ми свиде́тели, и Аз Свиде́тель,/ глаго́лет Госпо́дь Бог,/ и о́трок, его́же избра́х,/ да позна́ете, и ве́руете Ми, и разуме́ете, я́ко Аз есмь,/ пре́жде Мене́ не бысть ин бог и по Мне не бу́дет./ Аз есмь Бог, и несть, ра́зве Мене́, спаса́яй./ Аз возвести́х и спасо́х, уничижи́х и не бе в вас чу́ждий./ Вы Мне свиде́тели, и Аз Госпо́дь Бог, и еще́ от нача́ла Аз есмь,/ и несть от рук Мои́х избавля́яй,/ сотворю́, и кто́ отврати́т то?/ Си́це глаго́лет Госпо́дь Бог, избавля́яй вас,/ Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 4. Самогла́сны:

А́ще и земна́го ца́рствия/ но́вый Ка́ин богоненави́стник и братоненави́стный/ уби́йственне лиши́ вас,/ Христо́с же непреходя́щее и безконе́чное Ца́рство вам дарова́,/ Ему́же со а́нгельскими во́ннствы предстоя́ще, моли́теся/ спасти́ любо́вию пою́щия/ всечестну́ю и многопра́зднственную па́мять ва́шу.

Земля́ освяти́ся кро́вию всечестно́ю ва́шею,/ и челове́цы обогати́шася ва́ми,/ исцеле́ние незави́стно прие́млют,/ Богому́дрии уго́дницы Христо́вы,/ сла́вне Рома́не с незло́бивым Дави́дом,/ моли́теся Го́сподеви,/ Ему́же от ю́ности прилепи́стеся,/ спасти́ ве́рою пою́щия вас.

Сла́ва, глас 5:

Ра́достию вси пра́зднуем днесь па́мять великому́чеников,/ пе́сньми и пе́ньми прославля́юще Спа́са Христа́,/ на земли́ удиви́вшаго святы́я Своя́ чудесы́/ и благода́ти разли́чными исцеле́нии,/ к ни́мже взыва́юще, ра́достно рцем:/ ра́дуйтеся, я́ко благода́ть прие́мшии на стра́сти разли́чныя./ Ра́дуйтеся, я́ко кро́вию ва́шею всели́стеся в ве́чную жизнь./ Ра́дуйтеся, ско́рии послу́шатели су́щих в ско́рбех/ и от напа́стей избавля́ющии оте́чество ва́ше,/ Богоприя́тне Бори́се с Гле́бом,/ моли́теся Го́сподеви поми́ловатися душа́м на́шим.

И ны́не, Богоро́дичен.

На стихо́вне стихи́ры святы́м, глас 4.

Подо́бен: Дал еси́ зна́мение:

Прииди́те, целому́дрия люби́тели,/ честну́ю дво́ицу почти́м, Христа́ возлюби́вшую,/ все́ми владу́щаго,/ чи́стым се́рдцем и душе́ю сокруше́нною,/ страстоно́сца Рома́на сла́внаго/ и кро́ткаго Дави́да досточу́днаго,/ и́же душа́ми и телесы́ чи́стии/ и сокруши́вшии де́монския полки́.

Стих: Воззва́ша пра́веднии,/ и Госпо́дь услы́ша их.

От ко́рене израсто́сте че́стна/ бра́тия сла́вная и благоро́дная,/ и благоро́дство вои́стинну возлю́бльшая,/ нетле́нныя вожделе́сте сла́вы,/ изво́ливше живо́т и Ца́рство неразруши́мое/ и по пра́вде пострада́вше/ венцы́ побе́ды восприя́сте,/ страстоте́рпцы блаже́ннии/ и моли́твенницы о душа́х на́ших.

Стих: Мно́ги ско́рби пра́ведным,/ и от всех их изба́вит я Госпо́дь.

Де́лы и уче́нии Христо́вы исполня́юще за́поведи/ и Того́ повеле́ния, враго́м не враждова́сте,/ на убие́ние прише́дшим ва́ше непра́ведно,/ но, я́ко Стефа́ну подо́бницы первому́ченику,/ моля́щеся, глаго́ласте:/ не поста́ви им греха́, Человеколю́бче,/ Иису́се Бо́же наш/ и Спа́се душ на́ших.

Сла́ва, глас 8:

Прииди́те, новокреще́ннии Ру́сстии собо́ри,/ и ви́дите, ка́ко без вины́ суд прие́млет му́ченик Бори́с:/ копие́м ре́бра его́ прободо́ша/ и кровопроли́тие сотвори́ша от наважде́ния диа́воля;/ Глеб же от того́жде бра́та Святопо́лка,/ я́ко а́гнец, закла́н бысть./ Но си́и венча́шася, а он без па́мяти поги́бе./ И си́и сла́вими суть, а он в гее́нне му́чится./ Си́и же Христа́ Бо́га мо́лят/ о душа́х на́ших.

И ны́не, Богоро́дичен: Безневе́стная Де́во: Тропа́рь, глас 2:

Правди́вая страстоте́рпца/ и и́стинная Ева́нгелия Христо́ва послу́шателя,/ целому́дренный Рома́не с незло́бивым Дави́дом,/ не сопроти́в ста́ста врагу́ су́щу бра́ту,/ убива́ющему телеса́ ва́ша,/ душа́м же косну́тися не могу́щу./ Да пла́чется у́бо злый властолю́бец,/ вы же, ра́дующеся с ли́ки А́нгельскими,/ предстоя́ще Святе́й Тро́ице,/ моли́теся о держа́ве сро́дников ва́ших богоуго́дней бы́ти/ и сыново́м Ру́сским спасти́ся.

Ин тропа́рь, глас 4:

Я́ко плодови́та виногра́да, о́трасли доброде́телей су́ще,/ Небе́сный дождь Христо́в прия́сте,/ источа́юще оте́честву своему́ струю́ Правосла́вия,/ Бори́се пречу́дне с до́блим Гле́бом,/ вку́пе моли́теся Го́сподеви сохрани́ти град и лю́ди,/ и на враги́ посо́бствовати,/ и душа́м на́шим дарова́ти ве́лию ми́лость.

Ин тропа́рь, глас то́йже:

Му́ченическою кро́вию порфи́ру окропи́вше све́тло,/ укра́шени предстои́те, страда́льцы сла́внии, Царю́ Безсме́ртному,/ и, венцы́ сла́вы от Него́ прии́мше,/ моли́теся стране́ на́шей пода́ти на враги́ одоле́ние/ и душа́м на́шим ве́лию ми́лость.

Сла́ва, и ны́не, Богоро́дичен.

НА У́ТРЕНИ

На Бог Госпо́дь: тропа́рь святы́х, два́жды. Сла́ва, и ны́не, Богоро́дичен.

По 1-й стихоло́гии седа́лен, глас 1.

Подо́бен: Лик А́нгельский:

Терпе́нием и му́жеством твои́м твою́ страсть подъе́мля, Бори́се кня́же,/ любо́вию Христо́вою взира́я на Ми́лостиваго и Человеколю́бца Бо́га,/ подаю́щаго ми́рови ве́лию ми́лость.

Сла́ва, и ны́не, Богоро́дичен:

Безма́терняго на Небеси́ па́че мы́сли и слу́ха на земли́ без отца́ родила́ еси́,/ Того́, Богоро́дице, моли́ о душа́х на́ших.

По 2-й стихоло́гии седа́лен, глас 1.

Подо́бен: Лик А́нгельский:

Измла́да Христа́ возлюби́вше ку́пно, бра́тие честни́и,/ жизнь безстра́стную стяжа́вше, сла́внии,/ целому́дрие изво́листе и поще́ние от страсте́й душе́вных и теле́сных;/ поспеше́ние же Бо́жиею благода́тию прие́мше, исцеля́ете вас пою́щия.

Сла́ва, и ны́не, Богоро́дичен:

Еди́на кре́пкая и те́плая Предста́тельнице ро́ду челове́ческому, Богоро́дице Де́во,/ непреста́нно моли́ со проро́ки и му́ченики,/ со святи́тели же, и по́стники, и преподо́бными,/ Его́же родила́ еси́ па́че естества́ Бо́га Сло́ва, спасти́ вся́ческая.

По полиеле́и седа́лен, глас 8.

Подо́бен: Прему́дрости:

Христо́вы уве́девше за́поведи благи́я,/ Того́ возлю́бльше, страстоно́сцы сла́внии,/ о убие́нии теле́с неради́сте,/ ду́ши же прекра́сныя в ру́це Христа́ преда́сте./ Ов, копие́м пробода́емь, веселя́шеся,/ други́й же, я́ко а́гня незло́биво, без ми́лости закала́емь, моля́шеся./ Сего́ ра́ди прие́мше дар исцеле́ний, му́ченицы самобра́тнии,/ моли́те Христа́ Бо́га грехо́в оставле́ние дарова́ти/ чту́щим любо́вию святу́ю па́мять ва́шу.

Сла́ва, и ны́не, Богоро́дичен:

Со́лнца о́блаче разу́мнаго, Боже́ственнаго Све́та свети́льниче златокова́нный,/ Нескве́рная, Небла́зная, Всенепоро́чная Влады́чице,/ омраче́нную ду́шу мою́ ослепле́нием страсте́й безстра́стия заре́ю просвети́, молю́ся,/ и оскверне́нное мое́ се́рдце омы́й пото́ки умиле́ния, покая́ния же слеза́ми/ и от тиме́ния мя очи́сти дел мои́х, да любо́вию зову́ Ти:/ Богоро́дице Присноде́во, моли́ Христа́ Бо́га прегреше́ний оставле́ние пода́ти ми,/ Тебе́ бо име́ю наде́жду, раб Твой.

Степе́нна, 1-й антифо́н 4-го гла́са. Проки́мен: Воззва́ша пра́веднии,/ и Госпо́дь услы́ша их. Стих: Мно́ги ско́рби пра́ведным, и от всех их изба́вит я Госпо́дь. Ева́нгелие от Луки́, зача́ло 106.

По 50-м псалме́ стихи́ра, глас 8. Самогла́сен:

Бра́тия прекра́сная, Бори́се и Гле́бе,/ ва́ша стра́сти на́ша боле́зни и неду́ги исцеля́ют,/ притека́ющих ве́рно,/ ту́не прия́сте, ту́не же и дади́те боля́щим исцеле́ние./ Но, я́ко иму́щии дерзнове́ние,/ Христа́ Бо́га моли́те о душа́х на́ших.

Кано́н Богоро́дицы на 6, глас 2, его́же краегране́сие:Пою́ хвалу́ живоно́сныя Отрокови́цы.

Песнь 1

Ирмо́с: Нетре́ну, необы́чну,/ немо́кренно морску́ю ше́ствовав стезю́,/ избра́нный вопия́ше Изра́иль:/ Го́сподеви поим, я́ко просла́вися.

Невеще́ственная дре́вле ле́ствица и стра́нно олядене́вший путь мо́ря/ Твое́ явля́ше Рождество́, Чи́стая,/ Ю́же пое́м вси, я́ко просла́вися.

Си́ла Вы́шняго Ипоста́сь соверше́нная, Бо́жия Му́дрость,/ вопло́щшаяся, Пречи́стая, из Тебе́, к челове́ком бесе́дова,/ я́ко просла́вися.

Про́йде сквозе́ дверь непрохо́дную заключе́нныя утро́бы Твоея́ пра́вды Со́лнце, Чи́стая,/ и ми́рови возсия́, я́ко просла́вися.

И святы́х два кано́на, на 8, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав, Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Богому́драя дво́ице, вели́цыи страда́льцы, со святы́ми Тро́ице предстоя́ще,/ моли́теся очище́ние мне дарова́ти, вас похваля́ющему.

Боже́ственное бога́тство исцеле́ний и ми́ро благово́нное храм ваш, святи́и,/ в не́мже пое́м Христа́ Бо́га, вас просла́вльшаго.

Незаходи́маго Со́лнца в себе́ стяжа́вше,/ Христа́ Бо́га на́шего, пресла́вне Рома́не с Дави́дом,/ освяти́те нас, честну́ю па́мять ва́шу почита́ющих.

Богоро́дичен: Кра́сную, и избра́нную, и всечестну́ю разуме́в Тебе́,/ Бо́жий, Пренепоро́чная, Сын Твой Сын бысть:/ сы́ны сотвори́ благода́тию, Богоро́дицу Тя чту́щия.

Ин кано́н святы́м, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Даждь ми отпу́ст мно́гих прегреше́ний мои́х, Спа́се, прему́дрость мне подая́,/ я́ко да пе́сньми похвалю́ Тя, просла́вльшаго святы́я Твоя́.

Воспое́м песнь, благочести́вии, просла́вленных целому́дренным смы́слом,/ Рома́на сла́внаго и Дави́да благочести́ваго ку́пно сла́вяще.

Дар благода́рства от Бо́га прия́ша о́ба,/ благоро́дство душе́вное возлюби́вше па́че,/ целому́дрием и доброде́телию удобря́ющеся.

Богоро́дичен: Избра́нную от родо́в всех досто́йно похва́лим, ве́рнии, Де́ву,/ вои́стинну па́че сло́ва Бо́га Сло́ва пло́тию ро́ждшую.

Катава́сия: Отве́рзу уста́ моя́:

Песнь 3

Ирмо́с: Лук сокруши́ся си́льных/ держа́вою Твое́ю, Христе́,/ и си́лою немощству́ющии препоя́сашася.

Иже вре́мене превы́шший вся́каго, я́ко времено́м Творе́ц,/ из Тебе́, Де́во, во́лею Младе́нец созда́ся.

Чре́во, простра́ннейшее Небе́с, воспои́м,/ и́мже Ада́м на Небесе́х, ра́дуяся, живе́т.

Ин

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Весе́лием весели́тся Христо́ва Це́рковь/ в па́мяти ва́шей, святи́и, и Творцу́ вопие́т:/ Ты моя́, Го́споди, кре́пость, и прибе́жище, и утвержде́ние.

До́блия вене́чники и страда́льцы Христо́вы вси восхва́лим све́тло,/ научи́вшия нас Христу́ вопи́ти:/ Свят еси́, Го́споди.

Ни ца́рства жела́ния, ни пи́щи наслажде́ния, ни сребра́ и зла́та возжеле́ша,/ но Христу́ еди́ному вопия́ху:/ Свят еси́, Го́споди.

Богоро́дичен: Избавля́ющаго челове́ки преслуша́ния и лю́таго паде́ния,/ всему́ Вино́внаго, Чи́стая и Всенепоро́чная, родила́ еси́.

Ин

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Все помышле́ние к Бо́гу, му́дрии, иму́ще,/ бра́тнею любо́вию совоку́пльшеся, благоче́стно пожи́сте.

Ве́щи возненави́десте тле́нныя и мимотеку́щия/ и доброде́тели яви́стеся сосу́ди, сла́внии, от ю́ности.

Мла́ди у́бо те́лом, душа́ми же ку́пно свя́ти, я́ко благочести́ви,/ тем и и́скренно Бо́га возлюби́сте.

Богоро́дичен: Еди́на Ты породила́ еси́ несказа́нно нетле́нная,/ тле́ния вои́стинну Потреби́теля и мир спасла́ еси́.

Ин конда́к, глас 8.

Подо́бен: А́ще и во Гроб:

А́ще и убие́ни бы́сте и во гробе́х положе́ни,/ но на Вы́шнее Ца́рство преидо́сте,/ о́ваго бо ко́пии насу́нуша,/ друга́го же, я́ко а́гнца незло́бива, ноже́м заре́заша,/ тем и кровь ва́ша бысть исцеле́ние ми́ру,/ ве́рою призыва́ющим вас, святи́и, на по́мощь.

Ин и́кос:

Плотско́е бога́тство возненави́девше, сла́внии,/ благоро́дство душе́вное я́ко Бо́жие па́че вожделе́ли есте́,/ Христа́ бо возлюби́сте и вся́ко весе́лие мирско́е оплева́сте/ и стремле́ние страсте́й обузда́сте,/ сосу́ди честни́и Пресвята́го Духа яви́стеся,/ се бо враг, пра́веднии, зави́дя ва́шему целому́дрию,/ мучи́теля вам уби́йцу бра́та воздви́же./ Но все злосмеше́ние и уби́йства ра́зум/ на о́наго же Бо́жиим судо́м вско́ре прии́де, ору́жие секу́щее./ Вы же, убие́ни, па́че живете́/ и, Небе́сное Ца́рство иму́ще, чудотвори́те безпреста́ни,/ вас же Христо́с звезды́ светоно́сны показа́/ и Руси́ вы похвала́ есте́ и утвержде́ние,/ ва́ши гро́би, я́ко безме́зднии вра́чеве, предлежа́т стране́ на́шей,/ к ним бо слепи́и приходя́ще ве́рою, просвеща́ются;/ хроми́и, влеку́щеся, ска́чуще отхо́дят;/ неду́жнии исцеля́ются и бесну́ющиися бесо́в свобожда́ются./ Вы кня́зи князе́м,/ вы в напа́стех утеше́ние и в темни́цах су́щим свобожде́ние./ Но, о супру́зи святи́и, Рома́не и Дави́де,/ не преста́ните моля́щеся Христу́,/ ве́чно сохрани́ти Правосла́вную ве́ру невре́дну в оте́чествии ва́шем.

Седа́лен, глас 1.

Подо́бен: Лик А́нгельский:

Измла́да Христа́ возлюби́вше ку́пно, бра́тия честна́я,/ жизнь безстра́стную стяжа́вше, сла́внии, целому́дрие изво́листе/ и поще́ние от страсте́й душе́вных и теле́сных,/ поспеше́ние Бо́жиею благода́тию прие́мше, исцеля́ете вас пою́щия.

Сла́ва, и ны́не, Богоро́дичен:

Безневе́стная, Чи́стая Богоро́дице Де́во,/ еди́на ве́рных Предста́тельнице и покро́ве,/ бед, и скорбе́й, и лю́тых обстоя́ний всех изба́ви,/ на Тя упова́ние, Отрокови́це, иму́щих,/ и ду́ши на́ша спаси́ Боже́ственными моли́твами Твои́ми.

Песнь 4

Ирмо́с: Услы́шах, Го́споди,/ сла́вное Твое́ смотре́ние/ и просла́вих, Человеколю́бче,/ непостижи́мую Твою́ си́лу.

Се превознесе́ся Боже́ственная гора́ до́му Госпо́дня превы́шше сил,/ Богома́терь я́вственнейши.

Зако́нов есте́ственных кроме́, еди́на, Де́во, ро́ждши Влады́чествующаго тва́рию,/ сподо́билася еси́ Боже́ственнаго зва́ния.

Ин

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Я́ко два свети́ла возсия́вшая, просвеща́ете лю́ди ва́ша, Богоно́сцы,/ но и ны́не изба́вите нас враго́в обстоя́ния,/ да почита́ем вас, с Бо́гом заступле́ние на́ше.

Врачевство́ неистощи́мое ра́ка ва́ша показа́ся, блаже́ннии, и приста́нище небу́рное:/ вси бо, ве́рою притека́ющии, обрета́ем от злых напа́стей избавле́ние.

Любо́вию ко Христу́ привяза́еми,/ тем и даро́в сподо́бльшеся стра́сти разли́чныя исцеля́ти,/ сего́ ра́ди ва́ше соверша́ем пра́зднество, Богому́дрии.

Богоро́дичен: Седя́й на престо́ле Херуви́мсте и превознесе́не,/ я́ко престо́л имы́й, на руку́ Твое́ю почи́в, Мари́е Богоневе́сто,/ препросла́вленный Бог.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мои́ Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Ю́ношески подви́гшеся, Богоблаже́ннии, во́зрастом цве́та и ю́ностию,/ о сласте́х любве́ плотски́я попече́ния не име́сте отню́д, Боже́ственныя кни́ги почита́юще,/ тем и просве́щшеся за́поведьми Боже́ственными, те́мнаго погуби́сте кня́зя.

Всемы́сленно оте́ческим после́дуя, я́ко мудр, стопа́м, блаже́нне,/ сревни́теля име́л еси́ до́брым, Рома́не Богому́дре, Дави́да, вои́стинну приснопа́мятнаго:/ бра́тия у́бо вку́пе, благоче́стно совоку́плени душа́ми и те́лом, яви́стеся.

Зако́ны Бо́жия от души́ возлюби́вше, прозря́ще жизнь гряду́щую,/ смысл простира́юще, святи́и, честь земну́ю и власть возненави́десте/ и нетле́нное ца́рство и сла́ву умному́дрии измени́сте.

Богоро́дичен: Глаго́лом Твои́м после́дующе, Непоро́чная,/ Блаже́нну Тебе́ имену́ем, христиа́нстии вси ро́ди,/ я́ко Бо́га ро́ждшую вои́стинну, а не мечта́нием,/ соверше́нна обои́ми, Божества́ естество́м и зако́ном челове́чества.

Песнь 5

Ирмос: Угль Иса́ии проявле́ийся,/ Со́лнце из де́вственныя утро́бы/ возсия́ во тьме заблу́ждшим,/ Богоразу́мия просвеще́ние да́руя.

О́блацы, весе́лия сла́дость кропи́те су́щим на земли́,/ я́ко Отроча́ даде́ся, Сый пре́жде век, от Де́вы вопло́щся, Бог наш.

Житию́ и пло́ти мое́й свет возсия́, и дря́хлость греха́ разруши́,/ напосле́док от Де́вы без се́мене вопло́щся, Вы́шний.

Ин

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Наста́ всечестны́й пра́здник и свяще́нное торжество́ сла́внаго Рома́на с Дави́дом,/ нося́ нам ра́дость ве́чную, в не́йже сла́вим Го́спода, просла́вльшаго их.

Доброде́тели укра́шени благоле́пием, све́тлый Рома́не с Гле́бом, страда́нием венча́вшеся,/ врага́ же и бра́та посра́мльше, за Христа́ прия́сте заколе́ние.

Слы́шано бысть во всем ми́ре честно́е и свяще́нное страда́нне ва́ше,/ и всяк язы́к возставля́ет сла́вити Христа́, вас просла́вльшаго.

Богоро́дичен: Преста́ у́бо тле́ние челове́ка:/ Де́ва бо роди́ нетле́нно Бо́га Сло́ва, па́че естества́ и сло́ва,/ и Де́ва па́ки пребы́сть.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Я́ко отца́ благочести́ва ча́да, любо́вию свя́зана и того́ лю́бяще,/ благоче́стия све́тлостию в Руси́ возсия́вше, бра́тия же па́че возлю́бленнии./ Сего́ ра́ди зави́стными стрела́ми искуше́ни бы́сте.

Разгне́вася братоуби́йца, я́ко Ка́ин пре́жде, Святопо́лк окая́нный,/ явя́ся же законопресту́пник и к за́висти уби́йство приплете́, сла́стию прельсти́вся властолю́бия./ Те́мже отмще́ния пра́веднаго не убеже́.

От кро́ве своея́ препру́ду нося́ще, пресла́внии,/ и Крест за ски́петр в десну́ю ру́ку ны́не иму́ще,/ сца́рствовати Христу́ сподо́бишася Рома́н и Дави́д,/ во́ини Христо́вы непобеди́мии.

Богоро́дичен: Вы́шшу Тя всех и святе́йшу чино́в прославля́ем Небе́сных,/ я́ко до́льная с Го́рними совокупи́вшу,/ но, о Ма́ти Бо́жия,/ певцы́ Твоя́ посеща́ющи, пога́ных уставля́й шата́ния.

Песнь 6

Ирмо́с: Глас глаго́л моле́бных/ от боле́зненныя, Влады́ко, души́ услы́шав,/ от лю́тых мя изба́ви:/ Еди́н бо еси́ на́шего спасе́ния вино́вен.

Естество́ челове́ческое, рабо́тающее греху́, Влады́чице Чи́стая,/ Тобо́ю свобо́ду улучи́:/ Твой бо Сын, я́ко А́гнец, за всех закала́ется.

Вопие́м Ти вси, и́стинней Богома́тери Бо́жии:/ прогне́вавшия рабы́ изба́ви,/ Еди́на бо дерзнове́ние к Сы́ну и́маши.

Ин

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

О и́же све́тлый ваш пра́здник соверша́ющих, блаже́ннии, моли́теся,/ и оте́чество ва́ше храни́ти от враг ненаве́тно,/ и ми́рно строе́ние дарова́ти моли́твами ва́шими.

Небе́снаго Ца́рствия рачи́телие бы́вше, блаже́ннии,/ Влады́це Христу́ чи́стою со́вестию послужи́вше,/ и Тому́ предстоя́ще, моли́теся, спасти́ вас восхваля́ющих.

Прилепи́вшеся Христу́ и на Него́ все упова́ние возложи́вше, блаже́ннии,/ сего́ ра́ди убие́ни бы́вше, ве́чно с Ним ца́рствуете.

Богоро́дичен: Усты́, по́мыслом и се́рдцем, Пречи́стая, Тя, Богоро́дицу, пропове́даем:/ Тобо́ю бо Бо́гу примири́хомся,/ отринове́нии преступле́нием пе́рвее пра́отца.

Ин

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся:/ к Тебе́ бо возопи́х, и услы́ши мя,/ Бо́же спасе́ния моего́.

Но́щи и тьмы сы́нове нареко́шася проти́внии,/ в нощи́ тя, к Бо́гу пе́ние принося́ща, ко́пии сбодо́ша,/ хода́таи твоему́ венцу́, Рома́не, Боже́ственному бы́вше.

Я́ко вои́стинну сый подо́бник Бо́га вопло́щшагося,/ за убива́ющия тя те́пле моли́лся еси́, свя́те,/ я́ко вторы́й му́ченик Христо́в вели́кий Стефа́н,/ сего́ ра́ди и с ним просла́вился еси́.

Ю́ношески хра́брствовавше, му́жески победи́ша лю́таго ратобо́рца/ свяще́нный Рома́н ку́пно с Дави́дом, де́лом и сло́вом победи́тели показа́шася/ и побе́дный вене́ц от Бо́га прия́ша сла́внии.

Богоро́дичен: Уясня́ют проро́честии гла́си Бо́жию Роди́тельницу,/ пое́м же Тя и мы, ви́дяще сбытие́ честны́х прорица́ний,/ де́вства вои́стинну и чистоты́ вмести́лище.

Конда́к, глас 3.

Подо́бен: Де́ва днесь:

Возсия́ днесь пресла́вная па́мять ва́ша,/ благоро́днии страстоте́рпцы Христо́вы, Рома́не и Дави́де,/ созыва́ющи нас к похвале́нию Христа́ Бо́га на́шего./ Тем, притека́юще к ра́це моще́й ва́ших,/ исцеле́ния дар прие́млем моли́твами ва́шими, святи́и:/ вы бо боже́ственнии вра́чеве есте́.

И́кос:

Разу́мное житие́ соверша́я, преблаже́нне,/ ца́рским венце́м от ю́ности укра́шен, всебога́тый Рома́не,/ власть ве́лия был еси́ твоему́ оте́честву, во всей земли́ Ру́сстей./ Тем, ви́дя твой успе́х, Христо́с Бог судо́м Свои́м на муче́ние тя призва́,/ кре́пость тебе́ пода́в с Небесе́, да победи́ши врага́ му́жески/ с Дави́дом, бра́том твои́м, пострада́вшим с тобо́ю:/ вы бо Боже́ственнии вра́чеве есте́.

Песнь 7

Ирмо́с: Вети́и яви́шася о́троцы любому́дрейшии дре́вле,/ от Богоприя́тныя бо души́, богосло́вяще устна́ми, поя́ху:/ Пребоже́ственный отце́в и наш Бо́же,/ благослове́н еси́.

Зря́ще в нощи́, у́бо Иа́ков я́ко в гада́нии Бо́га,/ воплоще́н же из Тебе́, све́тлостию яви́ся пою́щим:/ Пребоже́ственный отце́в Бог и препросла́влен./ Зна́мения е́же в Тебе́ неизрече́ннаго проявля́я сплете́ния, со Иа́ковом бо́рется:/ и́мже во́лею соедини́ся челове́ком, Чи́стая,/ Пребоже́ственный отце́в Бог и препросла́влен.

Ме́рзок, и́же не пропове́дует еди́наго Де́вы Тя Сы́на от Препе́тыя Тро́ицы,/ и несумне́нною мы́слию, и язы́ком вопия́:/ Пребоже́ственный отце́в Бог и препросла́влен.

Ин

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твое́й, Го́споди.

Боже́ственная и пресве́тлая па́мять ва́ша, я́ко Не́бо светоза́рное, показа́ся,/ и я́ко со́лнце светоно́сно, просвеща́я без сумне́ния Христу́ вопию́щия:/ благослове́н еси́ в хра́ме сла́вы Твоея́, Го́споди.

Кто не удиви́тся и кто не воспое́т и просла́вит ве́рно/ пресла́вных му́ченик Христо́вых, Бори́са с Гле́бом,/ Христо́ва ра́ди смире́ния возненави́девших диади́му и ца́рство?

Мглу безбо́жия отгна́вше,/ све́тло научи́ша лю́ди своя́ чести́ в Тро́ице Еди́наго Бо́га и усе́рдно пе́ти:/ благослове́н еси́ в хра́ме сла́вы Твоея́, Го́споди.

Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, вопию́щим:/ благослове́на Ты в жена́х еси́, Всенепоро́чная Влады́чице.

Ин

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щныи́ попра́ша, пою́ще:/ отце́в Бо́же, благослове́н еси́.

Пресла́вно просла́ви Боже́ственная благода́ть вас, прехва́льнии,/ я́ко сою́з вои́стинну братолю́бия и благоче́стия, и све́тло научи́ вопи́ти:/ благослове́н Бог оте́ц на́ших.

О му́жества страстоте́рпец!/ О, чистоты́ кре́пости!/ О, ра́зума непрекло́нна!/ я́ко уязвля́еми вельми́ и закала́еми неми́лостивно/ яви́стеся страстоно́сцы вели́цыи, Рома́не и Дави́де./ И́хже восхва́лим, ве́рнии, вопию́ще:/ благослове́н Бо́г оте́ц на́ших.

Пострада́ти Христа́ ра́ди изво́листе и сего́ ра́ди возме́здие от Бо́га обрето́сте,/ стра́сти и неду́ги от земны́х отгоня́ти, хва́лящих и вопию́щих:/ благослове́н Бог оте́ц на́ших.

Богоро́дичен: Ка́пля Богото́чная, И́же от Тебе́ ро́ждшися,/ мир освяти́вша, Богоро́дице Де́во,/ ка́плю ми́лости ми источи́, освяща́ющу ду́ши и помышле́ния земны́х.

Песнь 8

Ирмо́с: О подо́бии зла́те небре́гше треблаже́ннии ю́ноши,/ неизме́нный и живы́й Бо́жий о́браз ви́девше,/ среди́ огни́ воспева́ху:/ осуществова́нная да пое́т Го́спода вся тварь/ и превозно́сит во вся ве́ки.

Ви́ден бысть на земли́ Тобо́ю и с челове́ки поживе́, И́же бла́гостию несравне́нный и си́лою./ Ему́же пою́ще, вси ве́рнии, зове́м:/ осуществова́нная да пое́т Го́спода вся тварь/ и превозно́сит во вся ве́ки.

Вои́стинну Тя, Чи́стую, пропове́дающе, сла́вим, Богоро́дице:/ Ты бо Еди́наго родила́ еси́ от Тро́ицы воплоще́нна./ Ему́же со Отце́м и Ду́хом вси пое́м:/ да пое́т Го́спода вся тварь и превозно́сит во вся ве́ки.

Ин

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Просия́вши днесь пресве́тлая па́мять ва́ша, блаже́ннии,/ ве́рныя созыва́ет на торжество́, просла́вити терпе́ния ва́ша, Христу́ же вопи́ти:/ благослови́те, вся дела́ Госпо́дня, Го́спода.

Богоявле́ннии и но́вии страда́льцы Тебе́, Христе́, еди́наго возлюби́ша/ и лю́ди наста́виша пе́ти Тя, Творца́ всех:/ благослови́те, вся дела́ Госпо́дня, Го́спода.

Пра́вды свети́льницы возсия́вшии, укра́шени добро́тою муче́ния,/ просвеща́юще сердца́ ве́рных, неду́ги отго́нят от вопию́щих ве́рно:/ благослови́те, вся дела́ Госпо́дня, Го́спода.

Богоро́дичен: Избавля́я нас, возсия́ из Тебе́ Госпо́дь, Де́во Чи́стая,/ Его́же моли́, Влады́чице, просвети́ти пою́щия Тя и обстоя́ния изба́вити вопию́щия:/ благослови́те, вся дела́ Госпо́дня, Го́спода.

Ин

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Не дово́льни бы́вше о уби́йстве окая́ннии,/ но и телеса́ ва́ша небрего́ма пове́ргше, не устыде́шася благоро́дия,/ но благода́ть Бо́жия храня́ше я хране́нием А́нгелов,/ с ни́миже лику́ете во ве́ки.

Челове́цы, и́же тогда́ в гора́х ло́ва и́щуще,/ ви́деша свет, от твоего́ телесе́ сия́ющ, Богодохнове́нне Дави́де,/ что виде́ние? – друг дру́гу глаго́лаху./ Ви́девше же чу́до, пропове́даша всем, Христа́ хва́ляще, тебе́ сохра́ньшаго.

Пресвята́я ва́ша па́мять, освяща́ющая мир, наста́ ны́не, прехва́льнии страстоно́сцы,/ в ню́же мо́лим получи́ти ва́ше заступле́ние, Рома́не и Дави́де,/ Христа́ пою́щим во ве́ки.

Богоро́дичен: Све́та сосу́д, Чи́стая, бы́вши, просвети́ мя,/ в повеле́ниих Све́та ходи́ти ми поспеши́, Всечи́стая,/ от чре́ва Твоего́ возсия́вшаго и просвети́вша ве́рных сердца́,/ Его́же превозно́сим во ве́ки.

Песнь 9

Ирмо́с: Весь еси́ жела́ние, весь сла́дость,/ Сло́ве Бо́жий, Де́вы Сы́не,/ Бо́же бого́в, Го́споди, святы́х Пресвяты́й,/ тем Тя вси с Ро́ждшею велича́ем.

Жезл кре́пости даде́ся естеству́ тле́нному, Сло́во Бо́жие во утро́бе Твое́й, Чи́стая,/ и сие́ возста́ви, до а́да попо́лзшееся./ Те́мже Тя, Всечи́стая, я́ко Бороро́дицу, велича́ем.

Ю́же изво́лил еси́, Влады́ко, приими́ ми́лостивно Моли́твенницу, Ма́терь Твою́, о нас,/ и Твоея́ бла́гости вся́ческая испо́лнятся,/ да Тя вси, я́ко Благоде́теля, велича́ем.

Ин

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Испещре́ни бы́вши Боже́ственными добро́тами, страда́нии ва́шими к Бо́гу востеко́сте,/ венцы́ побе́ды от Него́ прие́млюще,/ тем ва́ша певцы́ помина́йте, да вас непреста́нно велича́ем.

О Боже́ственная дво́ице, самобра́тная и светоза́рная!/ Моли́теся дарова́ти очище́ние согреше́ний и пре́жде конца́ жития́ исправле́ние,/ да вас непреста́нно велича́ем.

От мла́да во́зраста освяти́ вас Вседе́тель Бог/ и окорми́тели изря́дны пла́вающим в мо́ри жития́ показа́,/ тем согла́сно почита́ем па́мять ва́шу.

Богоро́дичен: Спаси́ мя, всех ро́ждшая Изба́вителя,/ разори́ души́ моея́ о́блаки, Све́та о́блаче, Всесвята́я Влады́чице,/ и си́льна соде́лай на стра́сти, борю́щия мя.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́инейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

А́ще и на земли́ положе́ни бы́сте я́ко ме́ртви, –/ но на Небесе́х прославля́етеся с рабы́ Бо́жиими./ Тем дерзнове́ния от Него́ сподо́бльшеся, сла́внии,/ нечи́стаго, верху́ стоя́ща над гро́бом ва́шим,/ стра́хом о́гненным отгна́сте, блаже́ннии.

Здра́вы творите́ боля́щия благочести́выя и хромы́м тече́ние подае́те,/ и послушеству́ет здрав бы́вый у ва́шея ра́ки, о дво́ице преди́вная!/ Тем и нам всем помо́щницы поспе́шни быва́ете свы́ше,/ уставля́юще боле́зни и пога́ных шата́ния.

Боже́ственная и светоза́рная вои́стинну верста́/ Рома́не и Дави́де, добропобе́днии страстоно́сцы,/ на Небеси́ ны́не Тро́ице Вседержа́вней предстоите́,/ избавле́ния прося́ще прегреше́ний лю́тых/ ве́рно на земли́ па́мять ва́шу торжеству́ющим.

Богоро́дичен: О, чудесе́, пребо́льша ума́, чу́до ве́лие вои́стинну и пресла́вно!/ Ка́ко вмести́ся во утро́бу Твою́ Бог, ника́коже вмести́мый?/ Его́же за хва́лящия Тя благочести́вно моли́, Де́во, от бед избавля́ти/ и от беззако́нных язы́к всегда́.

Свети́лен.

Подо́бен: Посети́л ны:

Я́ко вои́стинну пресве́тлии свети́льницы,/ всю вселе́нную просвети́сте ве́рою, Богоприя́тне Рома́не с Дави́дом./ Тем пе́сньми воспое́м возвели́чившаго вас Христа́ Бо́га на́шего.

Сла́ва, ин свети́лен:

Сия́ет днесь страстоте́рпец па́мять, я́ко заря́,/ лик А́нгельский торжеству́ет,/ род челове́ческий пра́зднует./ Те́мже моли́те Христа́ поми́ловати ду́ши на́ша.

И ны́не, Богоро́дичен:

Богоро́дицу пе́сньми немо́лчными благоче́стно пое́м, вопию́ще:/ ра́дуйся, горо́ свята́я, ра́дуйся, престо́ле огнено́сный всех Царя́,/ ра́дуйся, А́нгелов ра́досте и му́чеников сла́во.

На хвали́тех стихи́ры на 4, глас 1.

Подо́бен: Небе́сных чино́в:

Светоза́рная, и свята́я, и благообра́зная/ му́чеников Бори́са и Гле́ба/ всепра́зднственная возсия́ па́мять,/ и́же, всю зе́млю просвеща́юще/ и и́дольский мрак отгоня́ще,/ целе́б благода́ть источа́ют.

Честны́ми ка́плями крове́й ва́ших/ обагри́сте ри́зы ва́ша,/ блаже́ннии Рома́не и Дави́де./ Тем, ве́рою па́мять ва́шу пра́зднующе,/ моли́теся, мо́лим вас, умири́ти мир/ и спасти́ ду́ши на́ша.

Я́ко еди́н свет во двою́ телеси́,/ мир просвеща́ете чуде́сными блиста́нии,/ страстоте́рпцы Госпо́дни,/ мрак неве́дения отгоня́ще./ Тем воспева́ем ра́достно,/ похваля́юще ва́шу па́мять.

Сла́ва, глас 4:

Днесь, празднолю́бных собо́ри, соше́дшеся,/ ра́достным лице́м и чи́стым се́рдцем,/ духо́вне соста́вим лик:/ не в кимва́лех иуде́йски,/ но в сокруше́нных сердца́х похваля́юще Христа́,/ и́стиннаго Бо́га на́шего,/ прославля́ющаго святы́я Своя́,/ до́бляго Рома́на с Дави́дом./ И́хже ны́не многоцеле́бную и чудотво́рную ра́ку обстоя́ще,/ любе́зно облобыза́ем, глаго́люще:/ ра́дуйтеся, яко́ Христо́вы за́поведи по о́бразу соблю́дшии./ Ра́дуйтеся, я́ко смире́ние Христо́во восприи́мшии,/ и ника́коже сопроти́вистеся бра́ту и врагу́,/ неми́лостивно убива́ющему телеса́ ва́ша./ Ра́дуйтеся, я́ко лю́ди ва́ша ко и́стинней ве́ре наставля́ющии,/ Рома́не пречу́дне и незло́биве Дави́де,/ оте́честву ва́шему пресве́тлии свети́льницы/ и моли́твенницы дерзнове́ннии о душа́х на́ших.

И ны́не, Богоро́дичен. Славосло́вие вели́кое. И отпу́ст.

НА ЛИТУРГИ́И

Блаже́нны обою́ кано́нов, пе́сни 3-я и 6-я. Проки́мен, глас 4: Святы́м, и́же суть на земли́ Его́,/ удиви́ Госпо́дь вся хоте́ния Свои́ в них. Стих: Предзре́х Го́спода предо мно́ю вы́ну: Апо́стол к Ри́мляном, зача́ло 99. Аллилу́ия, глас 4: Воззва́ша пра́веднии, и Госпо́дь услы́ша их. Стих: Мно́ги ско́рби пра́ведным, и от всех их изба́вит я Госпо́дь. Ева́нгелие от Иоа́нна, зача́ло 36. Прича́стен: Ра́дуйтеся:

Моли́тва

О дво́ице свяще́нная, бра́тия прекра́сная, до́блии страстоте́рпцы Бори́се и Гле́бе, от ю́ности Христу́ ве́рою, чистото́ю и любо́вию послужи́вшии, и кровьми́ свои́ми, я́ко багряни́цею, украси́вшиися, и ны́не со Христо́м ца́рствующии! Не забу́дите и нас, су́щих на земли́, но, я́ко те́плии засту́пницы, ва́шим си́льным хода́тайством пред Христо́м Бо́гом сохрани́те ю́ных во святе́й ве́ре и чистоте́ неврежде́нных от вся́каго прило́га неве́рия и нечистоты́, огради́те всех нас от вся́кия ско́рби, озлобле́ний и напра́сныя сме́рти, укроти́те вся́кую вражду́ и зло́бу, де́йством диа́вола воздвиза́емую от бли́жних и чу́ждих. Мо́лим вас, христолюби́вии страстоте́рпцы, испроси́те у Великодарови́таго Влады́ки всем нам оставле́ние прегреше́ний на́ших, единомы́слие и здра́вие, избавле́ние от наше́ствия иноплеме́нных, междоусо́бныя бра́ни, я́звы и гла́да. Снабдева́йте свои́м заступле́нием страну́ на́шу и всех, чту́щих святу́ю па́мять ва́шу, во ве́ки веко́в. Ами́нь.

НА ВЕЧЕ́РНИ

На Го́споди, воззва́х: стихи́ры му́ченицы на 6, глас 4.

Подо́бен: Я́ко до́бля:

Христоиме́ннаго тя зва́ния/ по достоя́нию сподо́би/ Стро́яй вся про́мыслом./ Лу́чший бо коне́ц име́ла еси́ во обои́х,/ зва́нию дела́ твоя́,/ уневе́стившися Христу́ благоче́стно ве́рою,/ бы́вши же дщи Царя́ Небе́снаго,/ ра́дуешися с Ним, му́ченице, о нас моля́щися.

Отца́ возжела́вши Небе́снаго, сла́вная,/ нечести́ва роди́теля преоби́дела еси́,/ ма́терь же возлюби́вши, Вы́шний Иерусали́м,/ пристра́стия ма́терни любве́ отри́нула еси́/ и, обогати́вшися Христо́м вме́сто всех,/ посе́м ду́шу положи́ла еси́, му́ченице,/ не убоя́вшися мук.

Ни роди́телей пристра́стие,/ ни пи́щи наслажде́ние,/ ни бога́тства име́ние, сла́вная,/ ни преще́ния, ни му́ки,/ ни огнь, ни меч, ни глубина́, ни ко́ло,/ ни звере́й стремле́ния/ возмого́ша тя от любве́ Зижди́теля разлучи́ти,/ де́во му́ченице Христи́но,/ сла́ва му́чеников и похвала́.

Сла́ва, глас 2:

Я́коже многоце́нное ми́ро,/ кровь твою́ принесла́ еси́ Жениху́ твоему́ Христу́,/ Христи́но му́ченице, страстоно́сице непобеди́мая,/ возме́здие же прия́ла еси́ вене́ц нетле́нен от Него́, досточу́дная,/ тем уме́ршаго угрызе́нии ядови́тых зми́ев/ глаго́лом твои́м жи́ва воздви́гла еси́,/ призва́нием Пресвята́го Ду́ха./ Сего́ ра́ди и Небе́сных тя черто́гов сподо́би Иису́с Человеколю́бец/ и Спас душ на́ших.

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

Боле́зни претерпе́вши мно́гия/ в распя́тии Сы́на и Бо́га Твоего́, Пречи́стая,/ стеня́ше, слезя́щи и восклица́ющи:/ увы́ Мне, Ча́до сла́дкое!/ Без пра́вды ка́ко стра́ждеши,/ хотя́ изба́вити я́же от Ада́ма земноро́дныя?/ Те́мже, Пречи́стая Де́во,/ Тебе́ мо́лим ве́рою:/ ми́лостива нам Того́ соде́лай.

На стихо́вне Окто́иха.

Сла́ва, глас 2. Анато́лиево:

Христоимени́тому зва́нию де́ло/ сугу́бо показа́ла еси́, я́ко вои́стинну,/ де́вства твоего́ чистото́ю уневе́стившися Христу́,/ благоволе́нием Отца́ и де́йством Ду́ха,/ муче́ния же боре́ньми тве́рдыми/ облиста́ла еси́ светле́е со́лнечных луч./ Те́мже, я́ко же́ртва чи́стая и непоро́чная,/ на Небе́сную принесла́ся еси́ трапе́зу,/ с деви́ческими и му́ченическими ли́ки во ве́ки веселя́щися,/ с ни́миже проси́, Христи́но тезоимени́тая,/ дарова́тися чту́щим тя ми́ру/ и ве́лией ми́лости.

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

Егда́ Тя беззако́ннии лю́дие, Спа́се,/ Жизнь всех, на Дре́во вознесо́ша,/ тогда́ Чи́стая и Пренепоро́чная Ма́ти Твоя́,/ предстоя́щи и рыда́ющи, взыва́ше:/ Ча́до Мое́ сла́дкое,/ Све́те Мои́ма очи́ма,/ увы́ Мне, ка́ко посреде́ злоде́ю на Кресте́ пригвозди́тися претерпе́л еси́,/ И́же зе́млю пове́шей на вода́х?

Тропа́рь, глас 4:

Зва́нием ева́нгельски Христу́ уневе́стившися,/ Христи́но сла́вная,/ сла́ву ми́ра сего́ и по́хоть бре́нную вмени́ла еси́ ни во что же,/ о само́м телеси́ небрегу́щи,/ му́ки претерпе́ла еси́ до́блественно,/ тем твое́ страда́ние хвала́ми почита́ем,/ му́ченице, Христу́ тезоимени́тая.

Ин тропа́рь, о́бщий, глас то́йже:

А́гница Твоя́, Иису́се, Христи́на/ зове́т ве́лиим гла́сом:/ Тебе́, Женише́ мой, люблю́,/ и, Тебе́ и́щущи, страда́льчествую,/ и сраспина́юся, и спогреба́юся креще́нию Твоему́,/ и стражду́ Тебе́ ра́ди,/ я́ко да ца́рствую в Тебе́,/ и умира́ю за Тя, да и живу́ с Тобо́ю,/ но, я́ко же́ртву непоро́чную, приими́ мя, с любо́вию поже́ршуюся Тебе́./ Тоя́ моли́твами,/ я́ко Ми́лостив, спаси́ ду́ши на́ша.

НА У́ТРЕНИ

На Бог Госпо́дь: тропа́рь святы́я, два́жды. Сла́ва, и ны́не, Богоро́дичен.

Кано́н святы́я на 6, его́же краегране́сие: Христо́ву тя пою́ тезоиме́нную отрокови́цу. Творе́ние Ио́сифово, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Благи́ми наде́ждами утверди́вся, ум твой, Христи́но, впери́ся/ и к Бо́гу, му́ченице, вознесе́ся от теку́щих,/ измени́вся во оби́тели пребыва́ющия.

Разсе́дшася и лежа́ща пред нога́ми отрокови́цы страстоно́сицы зря́ще злочести́ваго,/ хвалу́ Спаси́телю дади́м вси,/ победоно́сицу сию́ показа́вшему.

Ви́дети Жениха́ Царя́ добро́ту кра́сную вожделе́ла еси́ чи́сто,/ те́мже Боже́ственными, страстоте́рпице, страда́ньми све́тло себе́ украси́ла еси́.

Богоро́дичен: Зачала́ еси́ Сло́во О́тчее,/ пло́ти соедини́вшееся по ипоста́си из Тебе́, па́че сло́ва, Ма́ти Чи́стая,/ Его́же возжела́вши, Христи́на муче́ния сла́ву стяжа́ла есть.

Песнь 3

Ирмо́с: Ты еси́ утвержде́ние/ притека́ющих к Тебе, Го́споди,/ Ты еси́ Свет омраче́нных,/ и пое́т Тя дух мой.

Просте́рши о́чи и мысль, сла́вная, на Не́бо,/ тва́рьми твоего́ Зижди́теля позна́ла еси́.

Бога́тство неотъе́млемо – е́же к Бо́гу име́ла еси́ ве́ру, честна́я,/ те́мже нищету́ и́дольскую оста́вила еси́.

Пе́ние благода́рственно Творцу́ Христу́ пе́ла еси́,/ к дре́ву лю́те, му́ченице, привя́зана и строга́ния претерпева́ющи.

Богоро́дичен: Уста́ви мое́ смуще́ние помышле́ний, Чи́стая Влады́чице,/ и ути́ши души́ вся́ку печа́ль, Христа́ ро́ждшая.

Седа́лен, глас 1.

Подо́бен: Гроб Твой:

Кровь твою́, честна́я, я́коже алава́стр ми́ра, принесла́ еси́ Христу́,/ Жениху́ твоему́, любо́вию,/ возме́здие же прия́ла еси́ от Него́, досточу́дная,/ вене́ц Боже́ственный и нетле́нен, му́ченице./ Те́мже прия́ла еси́ исцеле́ний благода́ть си́лою духо́вною.

Слава, и ны́не, Богоро́дичен:

Безневе́стная Чи́стая Богоро́дице Де́во, еди́на ве́рных Предста́тельнице и покро́ве,/ бед, и скорбе́й, и лю́тых обстоя́ний всех изба́ви,/ на Тя упова́ние, Отрокови́це, иму́щих,/ и ду́ши на́ша спаси́ Боже́ственными моли́твами Твои́ми.

Крестобогоро́дичен:

Зря́щи Тя, Христе́, Всенепоро́чная Ма́ти, ме́ртва на Кресте́ просте́рта, вопия́ше:/ Сы́не Мой, собезнача́льне Отцу́ и Ду́ху,/ что́ неизрече́нное Твое́ сие́ смотре́ние,/ и́мже спасл еси́ пречи́стых рук Твои́х, Ще́дре, созда́ние?

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Пита́лася еси́, ра́нами Боже́ственными наслажда́ема,/ му́ченице христоимени́тая, виде́нии Жениха́ твоего́,/ и на Того́ добро́ту взира́ющи.

Велича́ю Тя, Го́споди, –/ му́ченице, привя́зана бы́вши к колесе́м, возопи́ла еси́, –/ и сла́влю и́мя Твое́, укрепля́ющаго лю́бящия Тя.

Прилепи́хся к Тебе́, жела́нием уязвля́ема Твоея́ любве́,/ победоно́сицу мя покажи́ в страда́нии, –/ му́ченица взыва́ше.

Богоро́дичен: Во проро́цех Тя сла́вный дре́вле Иса́ия жезл именова́,/ цвет нося́щу, Го́спода, Богоро́дице Ма́ти Присноде́во.

Песнь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Я́ко А́нгел во пло́ти, му́ченице, бы́вши,/ Небе́снии А́нгели пи́щею а́нгельскою тя пита́ху.

Ка́меня жи́зни не отве́рглася еси́, Христи́но,/ те́мже к ка́меню тя привяза́вше, врази́ в во́ду вверго́ша.

Восхи́тилася еси́ к высоте́, возлете́вши, я́коже го́рлица, крилы́ Боже́ственнаго Ду́ха,/ и у Зижди́теля почи́ла еси́.

Богоро́дичен: Ме́ртва грехо́м бы́вша, оживи́ мя,/ Жизнь безсме́ртную, Де́во Ма́ти, ро́ждшая.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли мои́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Услади́ся твое́ добро́тами се́рдце пресла́дкаго Рачи́теля, страстоте́рпице,/ и в воню́ Того́ страсте́й спе́шно текла́ еси́, зову́щи:/ Женише́ мой, Твоея́ ра́ди закала́юся ны́не любве́.

Отца́ Небе́снаго тя, му́ченице, роди́тель ви́дев лю́бящу,/ ва́рварский показа́ нрав и многообра́зными обложи́ му́ками:/ преде́ла бо злочести́вый своего́ не разуме́ естества́.

Я́ко крин, в му́ченических удо́лиях, я́ко сладково́нный процвела́ еси́ ши́пок,/ ми́рну иска́пающи благода́ть, и ве́рных сердца́ пома́зала еси́,/ христоимени́тая му́ченице честна́я,/ святы́х Ангел соприча́стнице.

Богоро́дичен: Разуме́вше Богогла́снии проро́цы та́инства Твоего́, Де́во, глубину́,/ проро́чески провозвести́ша, Боже́ственным просвещаеми издале́ча Ду́хом,/ Ма́терь Тя всеи́стинну всех Влады́ки бы́ти.

Конда́к, глас 4.

Подо́бен: Вознесы́йся:

Светови́дная голуби́ца позна́лася еси́, криле́ иму́щи зла́те,/ и к высоте́ Небе́сней возлете́ла еси́, Христи́но честна́я./ Те́мже твой сла́вный пра́здник соверша́ем,/ ве́рою покланя́ющеся твои́х моще́й ра́це,/ из нея́же истека́ет всем оби́льно/ исцеле́ние Боже́ственное,/ душа́м же и те́лом.

И́кос:

Песносло́вящи благоче́стно Тро́ицу Святу́ю, честна́я де́во му́ченице,/ показа́ла еси́ су́щим тогда́ омраче́нным мгло́ю лю́таго гне́ва,/ ка́ко сия́ние Тоя́ просвеща́ет ве́рныя./ Мучи́теля же от руки́ избе́гла еси́, я́коже друга́я Фе́кла, избе́гши от беззако́нных,/ произшла́ же еси́ посреде́ сете́й./ Те́мже вои́стинну, пою́ще, почита́ем преставле́ние твое́, благодаря́ще еди́наго Бо́га,/ тебе́ ра́ди дарова́вшаго исцеле́ние Боже́ственное душа́м же и те́лом.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Пе́ние всех Благоде́телю, клоко́щущему огню́ прибли́жившися, взыва́ла еси́,/ твое́ ороша́ющему се́рдце:/ благослове́н еси́, Го́споди Бо́же, во ве́ки.

Еди́наго Бо́га получи́ти возжела́вши, неради́ла еси́ удо́м опаля́емым,/ не отве́рглася еси́ Христа́, деви́це, пою́щи:/ благослове́н еси́, Го́споди Бо́же, во ве́ки.

Ту́чами крове́й твои́х струи́ изсуши́ла еси́ идолонеи́стовства,/ одождя́еши же ны́не исцеле́ний пучи́ну, де́во му́ченице,/ уста́вила еси́ пла́мень страсте́й.

Богоро́дичен: Зако́ны, Де́во, превозше́дши естества́ Боже́ственным Твои́м зача́тием,/ па́че естества́ Бо́га родила́ еси́, вопию́щи:/ благослове́н еси́, Го́споди Бо́же, во ве́ки.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Волну́ющееся мо́ре напа́стей мук Боже́ственным окормле́нием невре́дно преплыла́ еси́,/ зми́я погрузи́вши твои́х по́двиг, му́ченице, глубино́ю./ Те́мже ра́йская небу́рно приста́нища дости́гла еси́, вопию́щи:/ свяще́нницы, воспо́йте, лю́дие, превозноси́те во вся ве́ки.

Зми́я лю́таго умертви́ла еси́ животво́рными по́двиги,/ и моли́тв твои́х стоя́нии неукроти́мыя зве́ри успи́ла еси́,/ и от сих вре́да кроме́ пребы́ла еси́, Зижди́телю пою́щи, Христи́но:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Глаго́лом живы́м воздви́гла еси́ уме́ршаго угрызе́нием, му́ченице страстоно́сице, я́да змии́на:/ Бог бо, смерть попра́вый Боже́ственным погребе́нием, твои́х моли́тв послу́ша, Христи́но./ К Нему́же вопие́ши непреста́нно:/ о́троцы, благослови́те, свяще́нницы, воспо́йте, лю́дие, превозноси́те во вся ве́ки.

Богоро́дичен: Тве́рдая помо́щнице ве́рным, Присноде́во,/ изба́ви мя ле́сти лука́ваго зми́я, лю́те борю́щаго и смири́ти тща́щагося./ Ты бо неле́стна на Тя наде́ющимся еси́ наста́вница, вопию́щим непреста́нно:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Песнь 9

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Ви́дети сподо́билася еси́, укра́шена/ и муче́ния оде́ждами блиста́ющи, твоего́ Жениха́, Христи́но,/ му́ченице многострада́льная.

Кра́сная твоя́ добро́та, я́коже возлюби́ла еси́,/ И́же па́че всех добро́т красне́йши Христо́с,/ Небе́сных черто́гов тя сподо́би.

Совокупи́лася еси́ со Безпло́тными, сла́вная, ли́ки/ и со страда́льческими собо́ры причла́ся еси́,/ о нас моля́щи Всеще́драго.

Со́лнца светле́йши яви́ся твоя́ па́мять, блиста́нии благода́тными Ду́ха/ тя чту́щия, Христи́но, просвеща́ющи.

Богоро́дичен: Благолюби́вая Де́во, озло́бленную грехми́ ду́шу мою́ ублажи́/ и ве́чнаго пла́мене мя изба́ви моли́твами Твои́ми.

Свети́лен.

Подо́бен: Жены́, услы́шате:

Я́ко шипо́к красне́йший, от терно́внаго прозябла́ еси́ ко́рене, де́во Христи́но,/ оброще́нием, му́ченице, свяще́ннаго страда́ния обагри́вшися кро́вию,/ и ны́не, Боже́ственную твою́ па́мять творя́щия любо́вию спаса́й от бед.

Богоро́дичен:

Стоя́ще о́крест Тебе́ де́вы Богому́дрыя, Богороди́тельнице Мари́е,/ я́коже цари́цы ро́дом, Твоему́ Сы́ну приведо́шася невестоле́пно, Пречи́стая, я́ко Царю́ вся́ческих,/ Его́же, Ма́ти Де́во Отрокови́це, о нас моли́.

На хвали́тех стихи́ры на 4, глас 4. Самогла́сны:

Крест, я́ко ору́жие держа́вно,/ Христи́но му́ченице, держа́щи рука́ми,/ ве́ру, я́ко щит, наде́жду, я́ко броня́,/ любо́вь, я́ко лук,/ мучи́телей томле́ния победи́ла еси́ му́жески,/ де́монов кова́рствия упраздни́ла еси́ боже́ственне;/ во главу́ же усекнове́на бы́вши,/ лику́еши со Христо́м,/ непреста́нно моля́щи о душа́х на́ших.

Бога́тство оста́вльши оте́ческое,/ Христа́ же жела́ющи и́стинно,/ сла́ву обре́те му́ченица и бога́тство Небе́сное/ и, при́сною моли́твою огражде́на благода́тною,/ ору́жием Креста́ попра́ мучи́теля./ Те́мже А́нгели, подвиго́м чудя́щеся, глаго́лаху:/ паде́ся враг, жено́ю побежде́н быв,/ венцено́сица яви́ся му́ченица./ И Христо́с во ве́ки ца́рствует, я́ко Бог,/ подая́й ми́рови ве́лию ми́лость.

Сла́вим Твое́, Христе́, мно́гое милосе́рдие,/ и бла́гость, е́же на нас бы́вшую,/ я́ко и жены́ упраздни́ша пре́лесть идолонеи́стовства/ си́лою Креста́ Твоего́, Человеколю́бче,/ мучи́теля не убоя́шася, льсти́ваго попра́ша,/ возмого́ша же во след Тебе́ приити́,/ в вопю́ ми́ра Твоего́ теча́ху,/ моля́щеся о душа́х на́ших.

Чудоде́йствова, Христе́, Креста́ Твоего́ си́ла,/ я́ко и Христи́на му́ченица страда́льческим по́двигом подвиза́ся,/ отону́дуже немощно́е естества́ отве́ргши,/ до́блественне сопроти́вися мучи́телем,/ те́мже и вене́ц побе́ды прие́мши,/ мо́лится о душа́х на́ших.

Сла́ва, глас 5:

Де́вства твоего́ красоты́ восхоте́ Царь сла́вы Христо́с,/ я́ко непоро́чну тя неве́сту/ Себе́ обручи́ совокупле́нием нетле́нным,/ и́бо во́лею Свое́ю пода́в добро́те твое́й си́лу,/ на враги́ же и стра́сти непобеди́му показа́,/ претерпе́вшую ра́ны го́рькия/ и му́ки свире́пыя,/ сугу́бым венце́м увязе́ тя/ и поста́ви одесну́ю Себе́, я́ко цари́цу испещре́ну./ Того́ моли́, му́ченице честна́я и многострада́льная Христи́но,/ певце́м твои́м спасе́ние и жизнь пода́ти/ и ве́лию ми́лость.

И ны́не, Богоро́дичен или́ Крестобогоро́дичен.

Подо́бен: Ра́дуйся:

Избавле́ние нас ра́ди и це́ну вели́кую,/ пречи́стую кровь Твою́ изво́лил еси́ да́ти,/ безгре́шне Христе́ мой,/ всем хотя́ спасе́ние получи́ти./ Те́мже Тя зря́щи пригвожде́на Ма́ти Твоя́,/ рыда́ющи, власы́ терза́ше Си, глаго́лющи:/ Ча́до, А́гнче Всенепоро́чный,/ мир хотя́ изба́вити честно́ю Твое́ю кро́вию,/ от о́чию Мое́ю ка́ко заше́л еси́, Спа́се,/ незаходи́мое Со́лнце,/ И́же всем подая́й просвеще́ние,/ и мир, и ве́лию ми́лость.

На стихо́вне Окто́иха.

Сла́ва, глас 1:

С Вы́шними си́лами причла́ся еси́, сла́вная,/ мир оста́вльши и Христа́ возжела́вши,/ Христи́но о всечестна́я!/ Проси́ нам ве́лия ми́лости.

И ны́не, Богоро́дичен или́ Крестобогоро́дичен.

Подо́бен: Небе́сных чино́в:

У Креста́ предстоя́щи Сы́на и Бо́га Твоего́/ и долготерпе́ние Того́ смотря́ющи,/ глаго́лаше, пла́чущи, Ма́ти Чи́стая:/ увы́ Мне, Ча́до сладча́йшее,/ что́ сия́ стра́ждеши непра́ведно, Сло́ве Бо́жий,/ да спасе́ши челове́чество?

НА ЛИТУРГИ́И

Блаже́нны Окто́иха, на 4 и святы́я песнь 3-я, на 4. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Кори́нфяном, зача́ло 181. Аллилу́ия, глас 1: Терпя́, потерпе́х Го́спода, и внят ми. Ева́нгелие от Луки́, зача́ло 33. Прича́стен: В па́мять ве́чную бу́дет пра́ведник:

Тропа́рь, глас 4:

Тезоимени́т зва́нию твоему́,/ я́ко многопло́дное дре́во,/ насажде́н сый во оби́тели Бо́жия Ма́тере,/ мно́гая и чу́дная тща́нием твои́м исправле́ния показа́вый,/ му́дре Полика́рпе,/ моли́ Христа́ Бо́га о нас,/ я́ко да и мы, мно́гия плоды́ доброде́телей Ему́ прине́сше, спасе́мся.

Конда́к, глас 8:

Я́ко преподо́бным Пече́рским совсе́льника/ и жити́й их в себе́ де́лом и писа́нием изобрази́теля нело́жна,/ вку́пе же сла́вы Небе́сныя с те́ми о́бщника я́вльшагося,/ прииди́те, ве́рнии, пе́сньми свяще́нными преподо́бнаго Полика́рпа ублажи́м, зову́ще:/ ра́дуйся, архимандри́тов Пече́рских похвало́.

Тропа́рь, глас 4:

От ю́ности освяще́н бысть Го́сподеви,/ преподо́бне о́тче Боголе́пе,/ ми́ра сего́ красоту́ оста́вил еси́,/ жела́я дре́внему оте́честву насле́довати,/ сохраня́й град сей и лю́ди,/ с ве́рою притека́ющия ко гро́бу твоему́ целе́бному,/ прося́ще по́мощи и заступле́ния,/ да вси́ воспои́м ти:/ ра́дуйся, о́тче Боголе́пе.

Конда́к, глас 8:

Изво́ли Го́сподеви от ю́ности рабо́тати, о́тче Боголе́пе,/ Крест Христо́в на ра́мо взем, и́ понесе́,/ моли́ся Пресвяте́й Тро́ице/ о ве́рою прося́щих в ско́рбех исцеле́ний/ и в напа́стех свобожде́ний,/ всей Ру́сстей земли́ похвало́ и утвержде́ние.