Аще храм проро́ка Илии́, или́ изво́лит настоя́тель, твори́м бде́ние.

НА МАЛОЙ ВЕЧЕ́РНИ

На Го́споди, воззва́х: стихи́ры на 4, глас 1.

Подо́бен: Небе́сных чино́в:

Трисо́лнечным све́том Боже́ственнаго сия́ния,/ ума́ чистото́ю нечести́ваго царя́ я́ко законопресту́пника/ пра́ведным судо́м обличи́л еси́,/ и небеса́ заключи́л еси́,/ и вдови́цу с сы́ном препита́л еси́./ Моли́, проро́че, спасти́ся душа́м на́шим.

Боже́ственным Боговиде́нием досто́йно проро́ческим са́ном/ и ра́зумом почте́н быв, Боже́ственный проро́че,/ прорица́еши да́льная, я́ко близ су́щая,/ царя́ я́ко непра́ведна обличи́л еси́/ и сту́дныя свяще́нники ноже́м закла́л еси́./ Моли́ Христа́ Бо́га спасти́ся душа́м на́шим.

Нечести́вый царь, не терпя́ твоего́ обличе́ния,/ тебе́, Боже́ственный проро́че, глаго́лет:/ ты ли еси́, томя́ и развраща́я Изра́иля?/ Ты же рекл еси́,/ не аз, о царю́,/ но ты и дом отца́ твоего́,/ поне́же Бо́га твоего́, сотво́ршаго тя, оста́вил еси́/ и чужды́я ввел еси́./ Но моли́твами, Христе́, Твоего́ проро́ка/ от таковы́я пре́лести изба́ви нас/ и спаси́ ду́ши на́ша.

Сла́ва, глас 6:

Боже́ственный проро́че Илие́,/ ты, непра́вдовавша царя о Навуфе́еве уби́йстве/ и о восхище́нии виногра́да обличи́в,/ дерзнове́нно рекл еси́:/ поне́же без пра́вды уби́л еси́ му́жа изра́ильтянина,/ си́це и сам убие́н бу́деши,/ и пси кровь твою́ поли́жут,/ и блудни́цы в кро́ви твое́й измы́ются./ Но моли́твами, Христе́, Твоего́ проро́ка,/ ку́пно и уго́дника,/ такова́го преще́ния изба́ви нас/ и ду́ши на́ша спаси́, я́ко Человеколю́бец.

И ны́не, Богоро́дичен.

На стихо́вне стихи́ры, глас 2.

Подо́бен: До́ме Евфра́фов:

Боже́ственный проро́че,/ ты, ревну́я по Го́споде Вседержи́тели,/ моли́твою небеса́ заключи́л еси́, рек:/ дождь и роса́ да не сни́дет на зе́млю,/ то́кмо глаго́лом уст мои́х.

Стих: Моисе́й и Ааро́н во иере́ех Его́/ и Саму́ил в призыва́ющих Имя Его́.

Боже́ственный проро́че,/ ты моли́твою и ми́лованием/ па́ки небеса́ отверза́еши/ и дождь жа́ждущим лю́дем/ бога́тно да́руеши.

Стих: Ты еси́ иере́й во ве́ки,/ по чи́ну Мелхиседе́кову.

Боже́ственный проро́че,/ ты вдови́цу с сы́ном препита́л еси́/ и моли́твою горсть муки́ и чва́нец ма́сла умно́жив./ По глаго́лу Госпо́дню,/ горсть муки́ и чва́нец ма́сла не ума́лися.

Сла́ва, глас и подо́бен то́йже:

Боже́ственный проро́че,/ ты моли́твою твое́ю огнь с Небесе́ свел еси́/ и царя́ уве́рил еси́ глаго́лати:/ вои́стинну Еди́н Бог,/ И́же Илие́ю пропове́даемый.

И ны́не, Богоро́дичен:

Влады́чице Блага́я,/ святи́и Твои́ ру́це/ к Сы́ну Твоему́ воздежи́,/ душелюби́вому Соде́телю,/ уще́дрити рабы́ Твоя́.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 1.

Подо́бен: Небе́сных чино́в:

И́же Фесви́тянина Илию́/ колесни́цею о́гненною/ от земли́, Ще́дре, преложи́вый, Сло́ве,/ сего́ моли́твами спаси́ нас, ве́рно Тя сла́вящих/ и того́ творя́щих ра́достно/ Боже́ственную па́мять и спасе́ную.

В тру́се и ви́хре то́нце/ ви́дел еси́ Бо́жие прише́ствие, Илие́ Богоблаже́нне,/ просвеща́ющее тя дре́вле:/ на колесни́це же седя́ четвероко́нней,/ не́бо преежда́л еси́ странноле́пно,/ удивля́емь, Богодухнове́нне.

Иере́и сту́дныя ноже́м закла́л еси́,/ не́бо язы́ком на зе́млю не дожди́ти удержа́л еси́,/ ре́вностию Боже́ственною разже́гся,/ Елиссе́я же испо́лнил еси́,/ ми́лоти пода́нием сугу́бым, му́дре Илие́,/ Боже́ственныя благода́ти.

И́ны стихи́ры, глас 2, самогла́сны.

Иоа́нна архиепи́скопа:

Свети́льники возсия́ша вселе́нней два,/ всесве́тлый Илия́ и Елиссе́й:/ ов у́бо Боже́ственным сло́вом/ небе́сныя ка́пли затвори́ и царя́ обличи́,/ на колесни́це же о́гненней на небеса́ вознесе́ся;/ ов же безча́дныя во́ды исцели́/ и сугу́бу благода́ть прия́т,/ Иорда́нския струи́ раздели́./ И ны́не со А́нгелы лику́юще,/ о нас мо́лят, спасти́ся душа́м на́шим.

Я́же на возду́се колесни́ца тя подъе́мши огнено́сна,/ я́ко в тру́се, на Небеса́,/ огнедохнове́нную благода́ть тебе́ чуде́с подаде́,/ Илие́ Фесви́тянине,/ нетле́нна тя сотво́рши,/ е́же не ви́дети сме́рти,/ до́ндеже у́бо пропове́си вся́ческим кончи́ну./ Те́мже прииди́, подая́ нам/ твои́х исправле́ний наказа́ние.

Свети́льниче невече́рний Церкве́й,/ Боже́ственною ре́вностию разжига́емь, Илие́ проро́че,/ небе́сныя ка́пли затвори́л еси́,/ и, вра́ном пита́н быв,/ царя́ обличи́л еси́,/ и свяще́нники умори́л еси́;/ огнь с небесе́ свел еси́,/ и, пятьдеся́тника два умори́в,/ напита́л еси́ вдови́цу еле́ем/ и муки́ ма́лою го́рстию,/ и сы́на ея́ моли́твою воскреси́л еси́./ О́гнь разже́гл еси́ в воде́,/ Иорда́нския струи́ пеш преше́л еси́,/ колесни́цею же о́гненною на небеса́ возне́слся еси́,/ Елиссе́ю благода́ть сугу́бую по́дал еси́./ Моли́ся непреста́нно Бо́гу/ спасти́ся душа́м на́шим.

Сла́ва, глас 6. Византи́ево:

Прииди́те, правосла́вных совокупле́ние,/ соше́дшеся днесь в пречестне́м хра́ме Богоглаго́ливых проро́к,/ псало́мски воспое́м сли́чную песнь/ сих просла́вльшему Христу́ Бо́гу на́шему/ и весе́лием и ра́достию возопие́м:/ ра́дуйся, земны́й А́нгеле и Небе́сный челове́че,/ Илие́ великоимени́те./ Ра́дуйся, и́же сугу́бую благода́ть от Бо́га прие́мый./ Елиссе́е всече́стне./ Ра́дуйтеся, засту́пницы те́плии, и предста́тели,/ и вра́чеве душ и теле́с христолюби́вых люде́й,/ от вся́каго прило́га сопроти́вна, и обстоя́ния, и вся́ких бед/ изба́вите ве́рно соверша́ющия всепра́зднственную па́мять ва́шу.

И ны́не, Богоро́дичен: Кто Тебе́ не ублажи́т:

Ца́рств тре́тиих чте́ние (глава́ 17):

Бысть сло́во Госпо́дне ко Илии́ проро́ку,/ и рече́ ко Аха́ву:/ жив Госпо́дь Бог сил, Бог Изра́илев,/ Ему́же предстою́ днесь пред Ним,/ а́ще бу́дет в ле́та сия́ роса́ или́ дождь, а́ще не словесы́ уст мои́х./ И бысть глаго́л Госпо́день ко Илии́, глаго́ля:/ иди́ отсю́ду на восто́к и скры́йся в пото́це Хора́фове, при реце́ Иорда́нове,/ и бу́дет вода́ от пото́ка, и пие́ши ю,/ и вра́ном повелю́ пита́ти тя та́мо./ И и́де Илия́, и сотвори́ по глаго́лу Госпо́дню,/ и се́де при пото́це Хора́фове, пред лице́м Иорда́новым,/ и вра́нове приноша́ху ему́ хле́бы зау́тра и мяса́ к ве́черу,/ и от пото́ка пия́ше во́ду./ И бысть по днех и́зсше пото́к, я́ко не бе дождя́ на зе́млю./ И бысть глаго́л Госпо́день ко Илии́, глаго́ля:/ воста́ни, и иди́ в Саре́ффу Сидо́нскую, и пребу́ди та́мо;/ се бо запове́дах жене́ вдови́це препита́ти тя./ И, воста́в, и́де в Саре́ффу Сидо́нскую,/ и прии́де во врата́ гра́да, и се та́мо жена́ вдова́ собира́ше дрова́,/ и возопи́ Илия́ в след ея́, и рече́ ей:/ принеси́ ми у́бо ма́ло воды́ в сосу́де, да пию́./ И и́де взя́ти воды́, и возопи́ Илия́ во след ея́, и рече́ ей:/ приими́ у́бо мне и укру́х хле́ба в руце́ твое́й, и да ям./ И рече́ жена́:/ жив Госпо́дь Бог мой, а́ще есть у мене́ опресно́к,/ но ра́зве ели́ко горсть муки́ в водоно́се и ма́ло еле́я во чва́нце./ И се аз собира́ю два поле́нца,/ и вни́ду, и сотворю́ себе́ и ча́дом мои́м, и сне́мы, и у́мрем./ И рече́ к ней Илия́:/ дерза́й, и вни́ди, и не сотвори́ по глаго́лу твоему́,/ но сотвори́ мне отту́ду опресно́к мал пре́жде, и изнесе́ши ми,/ себе́ же и ча́дом твои́м сотвори́ши последи́./ Я́ко та́ко глаго́лет Госпо́дь, Бог Изра́илев:/ водоно́с муки́ не оскуде́ет, и чва́нец еле́я не ума́лится/ до дне, до́ндеже даст Госпо́дь дождь на зе́млю./ И и́де жена́, и сотвори́ по глаго́лу Илиину́,/ и даде́ ему́, и ядя́ше той, и та, и ча́да ея́./ И от того́ дне водоно́с муки́ не оскуде́, и чва́нец еле́я не ума́лися,/ по глаго́лу Госпо́дню, И́же глаго́ла руко́ю Илино́ю./ И бысть по глаго́лех сих, и разболе́ся сын жены́ госпожи́ до́му,/ и бе боле́знь его́ крепка́ зело́, до́ндеже не оста́ в нем дух./ И рече́ жена́ ко Илии́:/ что́ мне и тебе́, челове́че Бо́жий,/ вшел еси́ ко мне воспомяну́ти грехи́ моя́ и умори́ти сы́на моего́?/ И рече́ Илия́ к жене́:/ даждь ми сы́на твоего́./ И взят его́ от ло́на ея́, и вознесе́ его́ в го́рницу, в не́йже сам почива́ше,/ и положи́ его́ на одре́ свое́м./ И возопи́ Илия́ ко Го́споду, и рече́:/ увы́ мне, Го́споди, Свиде́телю вдовы́, у нея́же аз пребыва́ю,/ Ты озло́бил еси́, е́же умори́ти сы́на ея́./ И ду́ну на о́трочища трикра́ты, и призва́ Го́спода, и рече́:/ Го́споди Бо́же мой, да возврати́тся у́бо душа́ о́трочища сего́ в онь./ И бысть та́ко./ И возопи́ Илия́, и услы́ша Госпо́дь глас Илии́н,/ и возврати́ся душа́ о́трочища, и оживе́./ И поя́т Илия́ о́трочища, и сведе́ и́ от го́рницы в дом,/ и даде́ и́ ма́тери его́./ И рече́ Илия́ к ней:/ виждь, я́ко жив есть сын твой./ И рече́ жена́ ко Илии́:/ се разуме́х, я́ко челове́к Бо́жий еси́ ты/ и глаго́л Госпо́день во усте́х твои́х и́стинен.

Ца́рств тре́тиих чте́ние (главы́ 18 и 19):

Бысть глаго́л Бо́жий ко Илии́ Фесви́тянину/ в тре́тие ле́то ца́рства Аха́вля, глаго́ля:/ иди́ и яви́ся Аха́ву, дам бо дождь на лице́ земли́./ И бысть, я́ко ви́де Аха́в Илию́ и рече́ к нему́:/ а́ще ты еси́, развраща́яй Изра́иля?/ И рече́ Илия́:/ не развраща́ю аз Изра́иля, но ты и дом отца́ твоего́,/ внегда́ оста́висте вы Го́спода Бо́га своего́ и идо́сте в след Ваа́ла./ И ны́не посли́ и собери́ ко мне весь Изра́иль, на го́ру Карми́льскую,/ и проро́ки сту́дныя Ваа́ловы, и́хже три́ста и пятьдеся́т,/ и проро́к ме́рзских четы́реста яду́щих трапе́зу Иезаве́лину./ И по глаго́лу Илиину́ посла́ Аха́в в весь Изра́иль,/ и собра́ вся проро́ки на го́ру Карми́льскую, и приведе́ ко всем им Илию́./ И рече́ им Илия́:/ доко́ле вы хра́млете на о́ба коле́на ва́ша?/ А́ще есть Госпо́дь Бог, иди́те в след Его́,/ а́ще ли Ваа́л есть, то иди́те за ним./ И не отвеща́ша ему́ лю́дие словесе́./ И рече́ Илия́ к лю́дем:/ аз есмь оста́х проро́к Госпо́день еди́н,/ и проро́цы Ваа́ловы, и́хже три́ста и пятьдеся́т муже́й,/ и проро́ков ме́рзских четы́реста./ И рече́ Илия́:/ дади́те ми два юнца́, да изберете́ себе́ еди́наго,/ и растеши́те и́ на у́ды, и возложи́те и́ на дрова́, да не приложите́ огня́./ И аз растешу́ юнца́ друга́го, и возложу́ на дрова́, и огня́ не возгнещу́./ И да призовете́ имена́ бого́в ва́ших,/ и аз призову́ И́мя Го́спода Бо́га моего́./ И бу́дет Бог, И́же а́ще послу́шает огне́м, Той есть Бог./ И отвеща́ша вси лю́дие, и ре́ша:/ добр глаго́л Илии́н, и́же глаго́ла, да бу́дет та́ко./ И рече́ Илия́ проро́ком сту́дным:/ избери́те себе́ юнца́ еди́наго, и сотвори́те вы пре́жде, я́ко вас есть мно́жество,/ и призови́те имена́ бого́в ва́ших, и огня́ не пригнеща́йте./ И поя́ша юнца́, и сотвори́ша та́ко./ И призыва́ху и́мя Ваа́лово от у́тра и до полу́дне, и ре́ша:/ послу́шай нас, Ваа́ле, послу́шай нас./ И не бе гла́са, ни послуша́ния,/ и рыска́ху о́коло же́ртвенника, и́же сотвори́ша си́и./ И бысть полу́дне, и поруга́ся им Илия́ Фесви́тянин, и рече́:/ зови́те гла́сом вели́ким, я́ко бо́гу ва́шему непра́зднство есть,/ да еда́ что и́ное стро́ит или́ усну́л есть, да убудите́ его́!/ И зовя́ху гла́сом вели́ким, и кроя́хуся по обы́чаю своему́ ножи́,/ и мно́зи би́ша себе́ бичьми́ до проли́тия кро́ве своея́./ И прорица́ху, и бысть до ве́чера, я́ко бы́ти вре́мя взы́ти же́ртве, и не бе гла́са./ И глаго́ла Илия́ к проро́ком сту́дным, глаго́ля:/ отступи́те ны́не, да и аз сотворю́ же́ртву мою́./ И отступи́ша ти́и, и умо́лкнуша./ И рече́ Илия́ к лю́дем:/ приступи́те ко мне./ И приступи́ша к нему́ вси лю́дие./ И прия́т Илия́ двана́десять ка́мений, по числу́ коле́н сыно́в Изра́илевых,/ я́коже глаго́ла ему́ Госпо́дь:/ Изра́иль бу́дет и́мя твое́./ И созда́ ка́мение во И́мя Госпо́дне, и исцели́ олта́рь раско́панный,/ и сотвори́ мо́ре, вмеща́ющее две ме́ре се́мене, о́крест олтаря́./ И воскладе́ поле́на на олта́рь, и́же сотвори́,/ и растеса́ на у́ды всесожига́емое, и возложи́ на поле́на, и обы́де олта́рь./ И рече́ Илия́:/ принеси́те ми четы́ре водоно́сы воды́/ и возлива́йте на всесожже́ния и на поле́на./ И сотвори́ша та́ко./ И рече́: удво́йте./ И удво́иша./ И рече́: утро́йте./ И утро́иша./ И прохожда́ше вода́ о́крест олтаря́, и мо́ре испо́лнися воды́./ И возопи́ Илия́ на не́бо, и рече́:/ Го́споди Бо́же Авраа́мов, и Исаа́ков, и Иа́ковль,/ послу́шай мене́, Го́споди, послу́шай мене́ днесь огне́м:/ да разуме́ют вси лю́дие си́и, я́ко Ты еси́ Еди́н Госпо́дь Бог Изра́илев,/ и аз раб Твой, и Тебе́ ра́ди сотвори́х дела́ сия́ вся,/ и Ты обрати́ сердца́ люде́й сих в след Тебе́./ И паде́ огнь от Го́спода с небесе́, и пояде́ всесожже́ния,/ и поле́на, и ка́мение, и персть, и во́ду, я́же бе в мо́ри, вся полиза́ огнь./ И падо́ша вси лю́дие на лицы́ свое́м и ре́ша:/ вои́стинну Госпо́дь Бог, Той есть Бог./ И рече́ Илия́ к лю́дем:/ поима́йте проро́ки Ваа́ловы, да ни еди́н скры́ется от них./ И я́ша их, и веде́ я Илия́ на пото́к Ки́ссов, и ту их закла́./ И рече́ Илия́ посе́м Аха́вови:/ се глас хожде́ния дожде́внаго, впрязи́ колесни́цу твою́/ и сни́ди, да не пости́гнет тебе́ дождь./ И взы́де Илия́ на Карми́льскую го́ру, и прекло́нься на зе́млю,/ и положи́ лице́ свое́ между́ коле́нома свои́ма, и помоли́ся ко Го́споду./ И не́бо помрачи́ся о́блаки и ду́хом,/ и бысть дождь ве́лий,/ и пла́чася Аха́в, и́де до Иезрае́ля./ И рука́ Госпо́дня бысть на Илии́./ И стягну́в чре́сла своя́, и тече́ пред Аха́вом до Иезрае́ля./ И возвести́ Аха́в жене́ свое́й Иезаве́ли вся, ели́ка сотвори́ Илия́,/ и я́ко закла́ проро́ки ноже́м./ И посла́ Иезаве́ль ко Илии́, глаго́лющи:/ у́тро в се́йже час положу́ ду́шу твою́, я́коже ду́шу еди́наго от сих./ И слы́ша, и убоя́ся Илия́, и, воста́в, и́де души́ ра́ди своея́,/ и прии́де в Вирсави́ю, зе́млю Иу́дову./ И оста́ви о́трочища своего́ та́мо, и и́де в пусты́ню дне путь./ И, прише́д, се́де под сме́рчием, и проси́ души́ свое́й сме́рти, и рече́:/ довле́ет ми, Го́споди, приими́ у́бо ду́шу мою́ от мене́,/ я́ко несмь аз па́че оте́ц мои́х./ И ля́же, и успе́ под са́дом./ И се А́нгел Госпо́день косну́ся ему́, и рече́ ему́:/ воста́ни, яждь и пий./ И воззре́в Илия́, и се, при возгла́вии его́ опресно́к ячме́нный и корча́г воды́./ И воста́, и яде́, и пит, и, обра́щся, у́спе./ И обра́щся А́нгел Госпо́день втори́цею, и косну́ся ему́, и рече́ ему́:/ воста́ни, яждь и пий, я́ко мног от Тебе́ путь./ И воста́, и яде́, и пит,/ и и́де в кре́пости я́ди тоя́ четы́редесять дней и четы́редесять ноще́й до горы́ Хори́вския./ И вни́де та́мо в пеще́ру, и всели́ся в ней./ И се глаго́л Госпо́день к нему́, и рече́ ему́ Госпо́дь:/ что ты зде, Илие́?/ И рече́ Илия́:/ ревну́я, поревнова́х по Го́споде Бо́зе Вседержи́тели,/ я́ко оста́виша Тя сы́нове Изра́илевы, и олтари́ Твоя́ раскопа́ша,/ и проро́ки Твоя́ ору́жием изби́ша,/ и оста́х аз еди́н, и и́щут души́ моея́, изъя́ти ю./ И рече́ А́нгел:/ изы́ди у́тро и ста́ни в горе́ пред Го́сподем, и се мимои́дет Госпо́дь./ И дух ве́лий и кре́пок, разоря́я го́ры и сокруша́я ка́мение пред Го́сподем:/ не в ду́се Госпо́дь./ И по ду́се вихр, и не в ви́хре Госпо́дь./ И по ви́хре огнь, и не во огни́ Госпо́дь./ И по огни́ глас хла́да то́нка, и та́мо Госпо́дь./ И бысть, я́ко услы́ша Илия́,/ покры́ лице́ свое́ ми́лотию свое́ю, и изы́де, и ста при пеще́ре./ И се к нему́ бысть глас и рече́:/ что зде ты, Илие́?/ И рече́ Илия́:/ ревну́я, поревнова́х по Го́споде Бо́зе Вседержи́тели,/ я́ко оста́виша заве́т Твой сы́нове Изра́илевы, и олтари́ Твоя́ раскопа́ша,/ и проро́ки Твоя́ изби́ша ору́жием,/ и оста́х аз еди́н, и и́щут души́ моея́, изъя́ти ю./ И рече́ Госпо́дь к нему́:/ иди́, возврати́ся путе́м твои́м,/ и по́йдеши в путь пусты́ни Дама́сковы,/ и пома́жеши Азаи́ла на ца́рство во Ассири́и;/ и Ииу́я, сы́на Амесси́ина, пома́жеши в цара́ Изра́илю;/ и Елиссе́я, сы́на Асафа́това, пома́жеши вме́сто себе́ проро́ка.

Царств четве́ртых чте́ние (глава́ 2):

Бысть во дни о́ны,/ обре́те Илия́ Елиссе́я, сы́на Асафа́това, и той ора́ше вола́ми./ И и́де Илия́ к нему́, и пове́рже Илиа́ ми́лоть свою́ на нем,/ и оста́ви Елиссе́й волы́, и тече́ созади́ Илии́, и служа́ше ему́./ И бысть, егда́ взя́ту бы́ти Илии́ Го́сподем в ви́хре я́ко на не́бо,/ и идо́ста Илия́ и Елиссей в Галга́лы./ Рече́ Илия́ ко Елиссе́ю:/ седи́ у́бо зде, я́ко Госпо́дь посла́ мя до Иорда́на./ И рече́ Елиссе́й:/ жив Госпо́дь, и жива́ душа́ твоя́, а́ще оста́влю тебе́./ И поидо́ста о́ба, и пятьдеся́т муже́й от сыно́в проро́ческих/ приидо́ша и ста́ша пря́мо издале́ча./ О́ба же ста́ста при Иорда́не./ И прия́т Илия́ ми́лоть свою́, и свит ю, и порази́ е́ю во́ды,/ и раздели́ся вода́ сю́ду и сю́ду, и преидо́ста о́ба по су́ху./ И бысть, я́ко преидо́ста, и рече́ Илия́ Елиссе́ю:/ проси́, что́ сотворю́ тебе́, пре́жде да́же не взят бу́ду от Тебе́./ И рече́ Елиссе́й:/ да бу́дет у́бо дух, и́же в тебе́, сугу́б во мне./ И рече́ Илия́:/ ожесточи́л еси́ проси́ти;/ оба́че а́ще уви́диши мя, взе́млема от Тебе́, бу́дет ти та́ко,/ а́ще ли же не уви́диши, не бу́дет./ И бысть иду́щим им и глаго́лющим,/ и се колесни́ца о́гненна и ко́ни о́гненни и раздели́ между́ обе́ма,/ и взя́тся Илия́ тру́сом, я́ко на не́бо./ И Елиссе́й зря́ше, и той вопия́ше:/ о́тче, о́тче, колесни́ца Изра́илева и ко́ни его́!/ И не ви́де его́ ктому́./ И я́тся Елиссе́й за ри́зы своя́, и раздра́ я на дво́е./ И взят ми́лоть Илиину́ Елиссе́й, па́дшую верху́ его́./ И обрати́ся Елиссе́й, и ста на бре́зе Иорда́на./ И прия́т Елиссе́й ми́лоть Илиину́, па́дшую верху́ его́,/ и уда́ри во́ды, и не раздели́шася./ И рече́ Елиссе́й:/ где у́бо есть Бог Илии́н, Апфо́?/ И уда́ри Елиссе́й во́ды второ́е, и раздели́шася во́ды,/ и пре́йде по су́ху.

На лити́и стихи́ра хра́ма и свята́го самогла́сны, глас 4:

Нетле́ннаго соедине́ния прича́стник,/ блаже́нне проро́че, был еси́./ О Бо́зе, Спа́се мое́м, моли́твою Иорда́н раздели́в,/ по су́ху преше́л еси́/ и на о́гненней колесни́це я́ко на небеса́ восхище́н был еси́,/ сугу́бую благода́ть Елиссе́ю оста́вль./ Те́мже мо́лим тя,/ а́ще и те́лом восхище́н был еси́,/ но ду́хом от нас не разлуча́йся/ и всегда́ Христу́ моли́ся/ спасти́ся душа́м на́шим.

Светоза́рен о́блак, Боже́ственный проро́че, яви́лся еси́,/ иска́пая ту́чу Богоразу́мия всем ве́рным,/ напая́я бога́тно вино́м весе́лия всех,/ ве́рою прити́чущих к Боже́ственнейшему хра́му твоему́./ Те́мже мо́лим тя,/ Боже́ственный проро́че и Богови́дче Илие́,/ побе́ды на враги́ во́инству на́шему да́руй/ и душа́м на́шим ве́лию ми́лость.

Самоде́ржцу уму́ плоть покори́л еси́,/ Боже́ственный Илие́ проро́че,/ усе́рдно восхожде́ния, я́ко по степе́нем, в се́рдцы твое́м полага́я./ Те́мже и непра́вдовавша царя́ обличи́в,/ гне́ва Бо́жия запреще́ние изре́к,/ и сту́дныя свяще́нники я́ко непра́ведны ноже́м погуби́л еси́,/ и всех научи́л еси́ я́сно вопи́ти:/ вои́стинну еди́н есть Бог, Его́же Илия́ пропове́да.

Сла́ва, глас 6:

О, нечести́ва царя́ повеле́ния!/ О, поста́, испо́лнена кро́ве и беззако́ния!/ Запове́да пост, да уби́йство сотвори́т,/ и а́бие убие́н бысть Навуфе́й изра́ильтянин./ Что же, проро́че, к сим рекл еси́?/ Я́ко та́ко глаго́лет Госпо́дь:/ поне́же без пра́вды му́жа изра́ильтянина уби́л еси́,/ та́кожде и твоя́ кровь пролие́на бу́дет,/ и блудни́цы в кро́ви твое́й измы́ются./ Но моли́твами, Христе́, Твоего́ проро́ка и пропове́дника/ такова́го безчелове́чества изба́ви ду́ши на́ша,/ я́ко Человеколю́бец.

И ны́не: Богоро́дице, Ты еси́ лоза́:

На стихо́вне стихи́ры, глас 8.

Подо́бен: О, пресла́внаго чудесе́:

Илия́, проро́к преди́вный,/ заре́ю ум просвети́в,/ весь бысть Боже́ствен/ и, царя́ нечести́ва суд непра́ведный зря, негоду́ет,/ те́мже и судо́м Бо́жиим отрече́ние посыла́ет на него́./ Та́кожде и цари́цу,/ я́ко неми́лостиву и златолюби́ву,/ суду́ Бо́жию предаде́./ Но моли́твами, Христе́, Твоего́ проро́ка Илии́/ спаси́ всех нас, я́ко Милосе́рд.

Стих: Моисе́й и Ааро́н во иере́ех Его́/ и Саму́ил в призыва́ющих и́мя Его́.

Доко́ле, Го́споди, путь нечести́вых спе́ется?/ проро́че, рекл еси́:/ Ты насади́л еси́, и вкорени́шася,/ и сотвори́ша плод беззако́ния,/ вои́стинну и са́ми зле погибо́ша нече́стием свои́м,/ возопию́т к Тебе́, и не услы́шиши./ Вску́ю ми показа́л еси́ нече́стие/ суде́й законопресту́пных?

Стих: Ты еси́ иере́й во ве́ки,/ по чи́ну Мелхиседе́кову.

И́же честно́е твое́ восхожде́ние,/ честны́й во проро́цех вели́кий Илие́,/ пра́зднующих твои́ми моли́твами/ от бед избавля́й, и скорбе́й, и лю́тых нахожде́ний:/ да всегда́ тебе́, пресла́вный проро́че,/ христоимени́тии лю́дие, почита́ем и ублажа́ем.

Сла́ва, глас 6:

Проро́че, пропове́дниче Христо́в,/ престо́ла вели́чествия никогда́же отступа́еши/ и коему́ждо боля́щу при́сно предстои́ши;/ в Вы́шних служа́, вселе́нную благословля́еши,/ всю́ду прославля́емь;/ проси́ очище́ние душа́м на́шим.

И ны́не, Богоро́дичен: Творе́ц и Изба́витель:

Тропа́рь, глас 4:

Во пло́ти А́нгел,/ проро́ков основа́ние,/ вторы́й Предте́ча прише́ствия Христо́ва, Илия́ сла́вный,/ свы́ше посла́вый Елиссе́еви благода́ть/ неду́ги отгоня́ти/ и прокаже́нныя очища́ти,/ те́мже и почита́ющим его́ то́чит исцеле́ния.

Сла́ва, и ны́не, Богоро́дичен:Еже от ве́ка утае́ное:

НА У́ТРЕНИ

На Бог Госпо́дь: тропа́рь, два́жды. Сла́ва, и ны́не, Богоро́дичен.

По 1-й стихоло́гии седа́лен, глас 1:

На о́гненную колесни́цу, я́ко на крилу́ ве́тренню, возше́д, Боже́ственный проро́че,/ к небесе́м пресла́вно ше́ствие днесь твори́ши,/ свы́ше сугу́бую благода́ть и ми́лоть Елиссе́еви оста́вль.

Сла́ва, и ны́не, Богоро́дичен:

Ма́терь Тя Бо́жию мо́лим вси, Де́ву вои́стинну, и по рождестве́ я́вльшуюся,/ любо́вию прибега́ющии к Твое́й бла́гости:/ Тебе́ бо и́мамы, гре́шнии, Предста́тельницу,/ Тебе́ стяжа́хом в напа́стех спасе́ние, еди́ну Всенепоро́чную.

По 2-й стихоло́гии седа́лен, глас 3:

Храм твой Боже́ственный всем исцеле́ния незави́стно источа́ет,/ проро́че пречу́дне, с Елиссе́ем преди́вным Христу́ вку́пе моля́щеся/ низпосла́ти мир ми́рови и лю́дем, чту́щим вас, ве́лию ми́лость.

Сла́ва, и ны́не, Богоро́дичен:

Ки́йждо, иде́же спаса́ется, та́мо пра́ведно и притека́ет;/ и ко́е ино́е таково́е прибе́жище,/ я́ко Ты, Богоро́дице, покрыва́ющее ду́ши на́ша?

Велича́ние:

Велича́ем тя,/ святы́й сла́вный проро́че Бо́жий Илие́,/ и чтим, е́же на Небеса́/ на колесни́це о́гненней,/ пресла́вное восхожде́ние твое́.

И́но велича́ние:

Велича́ем тя,/ проро́че Илие́ сла́вне,/ и почита́ем, е́же на Небеса́ с пло́тию,/ о́гненное восхожде́ние твое́.

И́но велича́ние:

Велича́ем тя,/ проро́че и предте́че прише́ствия Госпо́дня, Илие́ сла́вный,/ и чтим, е́же на Небеса́ с пло́тию,/ о́гненное восхожде́ние твое́.

По полиеле́и седа́лен, глас 8:

Прему́дрости я́ко рачи́тель быв, проро́че всече́стне,/ непра́ведна царя́ непра́вдующа я́ве обличи́в и уве́рил еси́ вопи́ти:/ вои́стинну Бог Еди́н есть, И́же Илие́ю пропове́дуемый./ Отсю́ду же Иезаве́ль о восхище́нии и о златолю́бии обличи́л еси́,/ проро́че и Предте́че прише́ствия Христо́ва, Илие́ великоимени́те,/ моли́ Христа́ Бо́га грехо́в оставле́ние дарова́ти/ восхожде́ние твое́ ве́рно сла́вящим.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ О́гнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Та́же степе́нна, 1-й антифо́н 4-го гла́са. Проки́мен, глас 4: Ты еси́ иере́й во ве́ки,/ по чи́ну Мелхиседе́кову. Стих: Рече́ Госпо́дь Го́сподеви моему́: седи́ одесну́ю Мене́, до́ндеже положу́ враги́ Твоя́ подно́жие ног Твои́х. Вся́кое дыха́ние: Ева́нгелие от Луки́, зача́ло 14.

По 50-м псалме́ стихи́ра, глас 4:

На о́гненней колесни́це на о́блак взя́лся еси́/ и во страну́ светови́дну преложи́лся еси́,/ о Фесви́тянине Илие́,/ сту́дныя проро́ки посрами́в./ И́же не́бо сло́вом связа́вый, та́ко разреши́ и на́ша согреше́ния/ ко Го́споду моли́твами твои́ми/ и спаси́ ду́ши на́ша.

Кано́н Богоро́дицы со ирмосо́м на 6, глас 8.Во́ду проше́д: И проро́ка два кано́на, на 8. Пе́рвый кано́н, глас 2.

Песнь 1

Ирмо́с: Пои́м Го́сподеви,/ в мо́ри дре́вле лю́ди наста́вльшему/ и в нем фарао́на со всево́инством погрузи́вшему,/ песнь побе́дную, я́ко просла́вися.

Ви́дети жела́ющии Илии́ чуде́с огнедохнове́нную си́лу,/ огнезра́чнаго и честна́го язы́ка, ду́ха кре́пость, по достоя́нию собра́хомся.

Устне́, Богоно́се, и недоуме́ннаго язы́ка тесноту́ же и худогла́сие,/ де́йством, е́же в тебе́, Ду́ха отве́рзи/ и уясни́ к пе́нию чуде́с твои́х.

Дае́ши па́че естества́ повину́вшимся, Сло́ве, честны́м Твои́м повеле́нием/ и покоря́еши дождю́ две́ри ду́хом,/ утвержда́емо сло́во содева́я.

Богоро́дичен: Пое́м Го́сподеви, от Де́вы рожде́нному, и мир обно́вльшему,/ и Тоя́ ра́ди нам жизнь Боже́ственную дарова́вшему,/ песнь побе́дную, я́ко просла́вися.

Други́й кано́н, творе́нне иеромона́ха Пахо́мия, его́же краегране́сие: Пою́ хвалу́ вели́кому Илии́. Глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Орга́н яви́лся еси́, ударя́емь Боже́ственным бряца́лом, проро́че пречу́дный,/ Всеве́дца Бо́га воспева́я,/ отмще́ние пра́ведно всем даю́ща по дело́м их.

И́же не терпя́ пре́лести, проро́че чу́дный,/ царя́ обличи́л еси́, непра́вдующа о беззако́нии./ Те́мже суд Бо́жий, полн гне́ва, тому́ нане́сл еси́ осужде́ния.

Проро́че и Предте́че благода́ти, Боже́ственный Илие́,/ Аха́ва, нечести́ваго царя́, ты я́ко законопресту́пника обличи́в,/ сту́дныя свяще́нники, я́ко непреподо́бны погуби́л еси́.

Богоро́дичен: Христо́ву Ма́терь в пе́снех воспе́ти досто́йно, ве́рнии, потщи́мся,/ я́ко Спа́са всех ро́ждшую, живото́м и сме́ртию влады́чествующаго.

Катава́сия: Отве́рзу уста́ моя́:

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Я́ко изря́ден, проро́че, Учрежди́тель, И́же вра́ном твори́ тебе́ гоще́ние,/ еди́ный, насыща́яй вся́ко живо́тно благоволе́ния./ Ему́же вси зове́м:/ Ты еси́ Бог наш, и несть свя́та, па́че Тебе́, Го́споди.

Благода́ть Благоде́телю и Строи́телю,/ вдови́цу и проро́ка напита́вшему неизрече́нным промышле́нием./ Ему́же вси зове́м:/ Ты еси́ Бог наш, и несть свя́та, па́че Тебе́, Го́споди.

Затвори́вый тучено́сныя о́блаки одожди́ти,/ пи́щи лиша́еме Саре́ффе, оста́нок бра́шна непреста́нно роси́ти сотвори́./ Ты же взыва́л еси́:/ несть свя́та, па́че Тебе́, Го́споди.

Богоро́дичен: Ты еди́на па́че всех от ве́ка вели́ким сподо́билася еси́ и па́че естества́:/ Бо́га бо, Невмести́маго все́ю тва́рию, во чре́ве прия́ла еси́ и воплоти́ла еси́./ Те́мже Богоро́дицу Тя вси почита́ем.

Ин

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ еди́не Человеколю́бче.

Всех ми́лостивно, проро́че, наказу́еши и всех ми́луеши,/ к тебе́ ве́рою притека́ющих во храм твой,/ и по́мощи от Тебе́ прося́щии, ника́коже погреши́ша.

Аха́ва, нечести́ваго царя, ты, Боже́ственный проро́че, обличи́л еси́/ и я́ко престу́пника зако́на судо́м Бо́жиим осуди́л еси́.

Безсту́дная цари́ца Иезаве́ль/ тебе́, Боже́ственнейший проро́че, иска́ше уби́ти,/ я́ко на той несвяще́нныя свяще́нники по достойнию суд сме́ртный наве́л еси́.

Богоро́дичен: Ме́сто свяще́ния сла́вы и мы́сленную, Чи́стая, трапе́зу,/ хлеб, Христа́, жизнь всех прие́мшую, пое́м Тя, Влады́чице.

Седа́лен, глас 8.

Подо́бен: Прему́дрости:

Исто́чника чуде́с, проро́ков удобре́ние/ вси пе́сненно, ве́рнии, восхва́лим, Фесви́тянина Илию́:/ с пло́тию бо еще́ сый безсме́ртен, я́ко мертв уверя́ет ме́ртвых воста́ние./ Те́мже дерзнове́ние к Бо́гу име́я, подава́ет исцеле́ния ве́рою прося́щим/ и мо́лится Христу́ приле́жно согреше́ний оставле́ние пода́ти/ пра́зднующим любо́вию святу́ю па́мять его́.

Сла́ва, и ны́не, Богоро́дичен:

В напа́сти многоплете́нныя впад от враг ви́димых и неви́димых,/ бу́рею одержи́м безчи́сленных согреше́ний мои́х,/ и я́ко к те́плому заступле́нию и покро́ву моему́, Чи́стая,/ ко приста́нищу притека́ю Твоея́ бла́гости./ Те́мже, Пречи́стая, из Тебе́ Воплоще́нному без се́мене/ моли́ся приле́жно о всех рабе́х Твои́х, непреста́нно моля́щих Ти ся, Богоро́дице Пречи́стая,/ моля́щи Его́ при́сно согреше́ний оставле́ние дарова́ти/ воспева́ющим досто́йно сла́ву Твою́.

Песнь 4

Ирмо́с: Услы́шах, Го́споди,/ слух Твоего́ смотре́ния/ и просла́вих Тя,/ еди́не Человеколю́бче.

Кореносека́тель у́бо яви́лся еси́ зло́бы, му́дре проро́че,/ доброде́тели же насади́тель, те́мже́ тя ублажа́ем.

Укоря́ше тя словесы́ вдови́ца,/ пи́щею сме́рти, проро́че, о́трока воста́ние уверя́ющи.

Назна́менова сла́ву Тро́ическую я́ве дунове́нием тричи́сленным,/ ма́тери де́тища жи́ва дарова́.

Коль разже́глся еси́, паля́ Боже́ственным огне́м и ре́вностию, о проро́че,/ царя́ облича́я, творя́ща беззако́ния.

Богоро́дичен: Мо́лим Тя, Чи́стая, Бо́га без се́мене заче́ншую,/ при́сно моли́тися за рабы́ Твоя́.

Ин

Ирмо́с: Услы́шах, Го́споди, слух Твой и убоя́хся,/ я́ко неизрече́нным Сове́том,/ Бог сый Присносу́щный,/ от Де́вы проше́л еси́, вопло́щся./ Сла́ва снизхожде́нию Твоему́, Христе́/ сла́ва си́ле Твое́й.

Венча́ тя Госпо́дь проро́ка, прему́дре,/ и благода́ть тебе́ да́руя прорица́ти бу́дущая, я́ко настоя́щая./ Те́мже, ны́не словесе́м сбытие́ зря́ще,/ хвала́ми при́сно тя, я́ко и́стиннаго проро́ка, ублажа́ем.

Ели́ко попремно́гу смиренному́дрием укра́шена/ проро́ка Твоего́ душа́, Христе́ Бо́же, толи́ко па́че огня́ ре́вностию распала́ема,/ сту́дныя свяще́нники погуби́.

Лице́м, я́ко зерца́лом разре́шшимся, лицу́ Христо́ву предстои́ши, пречу́дне проро́че,/ отону́дуже, нас ми́лостивно посеща́й,/ да вси тя хвала́ми, я́ко проро́ка, ублажа́ем.

Богоро́дичен: Наде́жду, и утвержде́ние, и спасе́ния сте́ну неруши́му/ Тя стяжа́вше, Всепе́тая, зло́бы вся́кия избавля́емся.

Песнь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Зако́н оте́ческий тя я́ко моли́твенника всеи́стинна показа́,/ чудоде́йственника, обраща́юща естества́ стихи́й, Илие́,/ и преподо́бну же́ртву попаля́юща вода́ми.

Посрами́л еси́ изря́дно, я́ко и́стины служи́телю, преподо́бне,/ скве́рнаго студа́ проро́ки, всеблаже́нне Илие́,/ я́ве начерта́в Тро́ическую си́лу.

Сло́вом благода́ти свяще́нствуя, Илие́,/ закла́л еси́ свяще́нники сту́дныя непови́нными твои́ми рука́ми,/ я́коже огне́м, ре́вностию опаля́емь.

Богоро́дичен: Тебе́, ро́ждшей Христа́, всему́ Соде́теля, взыва́ем:/ ра́дуйся, Чи́стая, ра́дуйся, Свет возсия́вшая нам,/ ра́дуйся, вмести́вшая Бо́га Невмести́маго.

Ин

Ирмо́с: Вску́ю мя отри́нул еси́/ от лица́ Твоего́, Свете Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ мои́ напра́ви, молю́ся.

И́же Боже́ственная благода́ти явле́на незаходи́мая заря́/ и ум Боже́ственнейший, проро́че Илие́, и́скренно стяжа́в,/ благочести́вых к пе́нию возставля́еши.

Кто не удиви́тся Боже́ственней ре́вности твое́й, проро́че всече́стне?/ Кто ли не воспое́т Христа́, толи́ку кре́пость тебе́ дарова́вшаго?

От Бо́га, проро́че, украси́лся еси́ проро́чеством, Илие́ пречу́дне,/ отню́д Бо́гу весь соедини́вся,/ пре́лесть облича́я, изра́ильтяны к Бо́жию позна́нию приве́л еси́.

Богоро́дичен: Со́лнце ро́ждши, Богоро́дице, незаходи́мое,/ всего́ мя просвети́, омраче́ннаго страстьми́,/ и испо́лни мя Боже́ственнаго све́та.

Песнь 6

Ирмо́с: Бе́здна согреше́ний обы́де мя после́дняя,/ но, я́ко проро́ка Ио́ну, Го́споди,/ Го́споди, возведи́/ из истле́ния живо́т мой.

Столп благоче́стия и жития́ чи́стаго,/ сади́тель чистоты́ был еси́,/ А́нгелом же подо́бник, чу́дный Илие́ Богоно́се.

Гнев тя пророкоуби́йцы жены́ устраши́в,/ вяза́ти и реши́ти прии́мша дожде́в тече́ние, чу́дный Илие́, бе́гати твори́т.

Возвы́сил еси́, коле́на преклони́в, ума́ превознесе́нное о́ко,/ мольбо́ю изря́дною реше́ние творя́, и бразды́ земны́я упои́л еси́ ту́чами.

Богоро́дичен: Купина́ Тя в Сина́и, неопа́льно прибли́жився огню́,/ преднапису́ет Ма́терь Присноде́ву, Всепе́тая Богоро́дице Мари́е.

Ин

Ирмо́с: Очи́сти мя, Спа́се,/ мно́га бо беззако́ння моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Моле́бное пе́ние приноси́ к Бо́гу, проро́че всечестны́й,/ о всех, в Боже́ственный храм твой притека́ющих,/ да тя всегда́, я́ко вели́ка засту́пника, почита́ем.

Ум челове́ч не дости́гнет житие́ твое́, проро́че, по досто́инству похвали́ти:/ па́че у́бо у́мных чино́в возвели́чился еси́,/ зря Христо́во преображе́ние.

И́же вся́ческих Госпо́дь и Творе́ц нам яви́ся,/ по твоему́ проро́честву, блаже́нне Илие́,/ вся челове́ки призыва́я к позна́нию Своему́, я́ко Человеколю́бец.

Богоро́дичен: Мари́е, чи́стый де́вства сосу́де,/ очи́сти мой ум от страстна́го омраче́ния/ и испо́лни благода́ти и пра́вды се́рдце мое́, Всенепоро́чная.

Конда́к, глас 2:

Проро́че и прови́дче вели́ких дел Бо́га на́шего,/ Илие́ великоимени́те,/ веща́нием твои́м уста́вивый водото́чныя о́блаки,/ моли́ о нас еди́наго Человеколю́бца.

И́кос:

Мно́гое челове́ков беззако́ние, Бо́жие же мно́гое человеколю́бие зря,/ проро́к смуща́шеся Илия́, яря́ся,/ и словеса́ неми́лостивна к Ми́лостивному подви́же,/ прогне́вайся, возопи́в, на отме́щущияся Тебе́, Судие́ пра́ведный!/ Но утро́бу Блага́го ника́коже подви́же, е́же му́чити Того́ отмета́ющияся:/ при́сно бо покая́ния всех ждет еди́ный Человеколю́бец.

Песнь 7

Ирмо́с: Купина́ в горе́ огненеопа́льная/ и росоно́сная пещь халде́йская/ я́ве предписа́ Тя, Богоневе́сто:/ Боже́ственный бо Невеще́ственный/ в веще́ственнем чре́ве О́гнь неопа́льно прия́ла еси./ Тем из Тебе́ Ро́ждшемуся пое́м:/ благослове́н еси́, Бо́же оте́ц на́ших.

Пресла́вно Боже́ственною ты воображе́ною си́лою обле́клся,/ пи́щею четыредесятодне́вною, Илие́ чу́дный, до́лгий ше́ствовал еси́ путь./ Те́мже в Хори́ве глаго́лал еси́:/ благослове́н Бог оте́ц на́ших.

Xлад кро́ток показа́ и то́нок Го́спода тебе́, Илие́,/ по Бо́зе ревну́ющу Вседержи́тели, не дух бу́рен, ни трус, ни огнь страща́яй./ Те́мже Иису́су кро́ткому пел еси́:/ благослове́н еси́, Бо́же оте́ц на́ших.

Богоявле́ния сподо́бился еси́ и проро́чества, я́коже вели́кий Моисе́й,/ проро́ки помазу́я Ду́хом и цари́, Илие́ чу́дный./ И, сла́вы на Фаво́ре Христо́вы зри́тель быв, пел еси́:/ благослове́н еси́, Бо́же оте́ц на́ших.

Богоро́дичен: Ражда́еши без се́мене Безнача́льнаго и Преве́чнаго Го́спода,/ О́тча Сы́на, му́дрость же и си́лу, напосле́док, Пречи́стая,/ па́че естества́ пло́тию, на обновле́ние земны́х./ Те́мже из Тебе́ ро́ждшемуся зове́м:/ благослове́н Бог оте́ц на́ших.

Ин

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Лю́ди Изра́илевы, с пятидесятонача́льником к тебе́, Боже́ственный Илие́, прише́дшия,/ огне́м с небесе́, я́ко недосто́йныя, попали́л еси́.

И́же Боговиде́нием осия́емь,/ досто́йно Боже́ственнейший проро́к был еси́, Илие́ всечестны́й,/ и Ваа́ловы же́ртвы отню́д упраздни́л еси́.

Ели́ко Дух Пресвяты́й подаде́ прорица́ти, всечестны́й проро́че Илие́,/ проре́кл еси́ о прише́ствии Сы́на Бо́жия и не погреши́л, всеблаже́нне./ Ему́же пое́м: благослове́н Бог оте́ц на́ших.

Сту́дным свяще́нником, трапе́зу Иезаве́лину непра́ведно яду́щим,/ вои́стинну судо́м Бо́жиим и проро́ка руко́ю яд сме́рти по достоя́нию отры́гнуся.

Богоро́дичен: Спаси́ мя, Ма́ти Бо́жия, содержи́ма глубино́ю согреше́ний,/ и вся́кия враго́в исхити́ зло́бы, да Твое́, спаса́емь, велича́ю заступле́ние.

Песнь 8

Ирмо́с: Устраши́ся отроко́в благочести́вых/ сообра́знаго души́ нескве́рнаго те́ла/ и устрани́ся воспита́нный в безме́рном веществе́/ неутружде́н огнь,/ присноживу́щу же, изувя́дшу пла́меню,/ ве́чнующая песнь воспева́шеся:/ Го́спода, вся дела́, по́йте/ и превозноси́те во вся ве́ки.

Изря́дно обре́те Аха́в ро́да отраже́нне всегуби́тельное,/ проро́ка обличе́нием, скве́рнаго уби́йства ме́рзское муче́ние:/ Фесви́тянин же от огнедохнове́нна ума́ Жизнода́телю песнь воспева́ше:/ Го́спода, вся дела́, по́йте и превозноси́те во вся ве́ки.

Дожди́т тебе́ огнь с небесе́, попаля́я, Илие́, одержи́мых пятьдеся́т сугу́бо,/ я́ко Бо́жию изря́дну служи́телю:/ Держа́щему бо присноживо́тную жизнь боголе́пно песнь взыва́л еси́:/ Го́спода, вся дела́, по́йте и превозноси́те во вся ве́ки.

Таи́нника тя показа́ Христо́с, я́ко чистоты́ сади́теля/ и де́вства Пребоже́ственное прозябе́ние на Фаво́ре Боже́ственнаго воплоще́ния,/ Божества́ непостижи́мый свет во Свое́й пло́ти показа́в тебе́, зову́щу:/ Го́спода, вся дела́, по́йте и превозноси́те во вся ве́ки.

Богоро́дичен: Всебога́тна бысть утро́ба Бо́жия Ма́тере,/ я́ко прии́мши Сло́во дебельство́м пло́ти,/ от Нея́ сме́шена земна́го зра́ка по ипоста́си яви́ся град Бо́жий,/ в не́мже Вы́шний жи́ти благоволи́./ Ему́же пое́м:/ Го́спода, вся дела́, по́йте и превозноси́те во вся ве́ки.

Ин

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

И́же вся ве́дый, я́ко Бог, бу́дущих и бы́ти хотя́щих ра́зум,/ тебе́, Илие́, я́ко ве́рну су́щу вверя́ет/ и дале́че су́щая, я́ко близ, показу́ет.

Благочести́вым дерзнове́нием вжили́в ум твой, блаже́нне проро́че,/ прорица́еши разстоя́щаяся, я́ко близ су́щая, всечестны́й проро́че.

Очи́стив от вся́кия скве́рны, Боже́ственный проро́че, твой ум,/ тем и весь свят был еси́,/ к Боже́ственному све́ту всех наставля́я.

Богоро́дичен: Его́же родила́ еси́, Сло́во, па́че сло́ва, Богороди́тельнице Чи́стая,/ о нас моли́, ве́рно чту́щих Тя.

Песнь 9

Ирмо́с: Я́же пре́жде со́лнца свети́льника Бо́га возсия́вшаго,/ пло́тски к нам прише́дшаго из боку́ Деви́чу,/ неизрече́нно воплоти́вшая, Благослове́нная, Всечи́стая,/ Тя, Богоро́дице, велича́ем.

Нетре́нное челове́ки ше́ствие на земли́ пожи́в,/ ми́лотию струю́ Иорда́нскую Фесви́тянин преше́д, ору́жник возду́шный,/ неботе́чное соверши́ стра́нное ше́ствие Ду́хом.

Благоче́стия ре́вностию Фесви́тянин опаля́емь, на огнезра́чней колесни́це взима́ется,/ ми́лоть же све́рже, е́юже, утаи́тися не возмо́же Елиссе́й, оде́явся,/ прие́млет Боже́ственную благода́ть.

Открове́нне Богови́дец Фесви́тянин с Моисе́ем зрит,/ я́же о́ко не ви́де, и у́хо не слы́ша, и на се́рдце челове́к земноро́дных не взы́де,/ воплоще́нна Го́спода, на Фаво́ре Вседержи́теля.

Богоро́дичен: Напра́снаго дре́вняго отъя́тельницу осужде́ния и прама́тере исправле́ние,/ ю́же ро́да к Бо́гу вину́ присвое́ние, к Зижди́телю мост,/ Тя, Богоро́дице, велича́ем.

Ин

Ирмо́с: Вои́стинну Богоро́дицу,/ Тя испове́дуем,/ спасе́нши Тобо́ю, Де́во Чи́стая,/ с Безпло́тными ли́ки Тя велича́юще.

Заре́ю невеще́ственною Живонача́льныя Тро́ицы, проро́че Илие́, обожа́емь,/ тем тебе́ вси к Бо́гу о ми́ре моли́твенника приво́дим, блаже́нне.

На земли́ тя А́нгела позна́хом, Боже́ственный проро́че,/ и на Небеси́ отню́д челове́ка Бо́жия, я́коже и Сам Госпо́дь рече́:/ поне́же Илия́ челове́к же́сток еси́, согреша́ющу Изра́илю терпе́ти не мо́жеши,/ взы́ди ты ко Мне, да Аз до́ле сни́ду.

На земли́, Боже́ственный проро́че, я́ко безпло́тен, пожи́л еси́/ и ны́не, на Небеса́ возноси́м, со а́нгельскими ли́ки ликовству́еши;/ нас свы́ше назира́й, пою́щих тя, блаже́нне.

Богоро́дичен: Но́сиши на объя́тиях Бо́га, нося́щаго вся́ческая,/ и пита́еши Пита́теля, Чи́стая, нам уподо́бльшася,/ Его́же моли́ лю́дем Твои́м дарова́ти всех лю́тых избавле́ние.

Свети́лен.

Подо́бен: Све́те неизме́нный:

Свет, на о́гненней четвероко́нней колесни́це/ небоше́ственна тя показа́вый ору́жника, Илие́, не пожре́ вконе́ц:/ огнь бо язы́ком о́гненным привле́кл еси́ ни́зу и изсуши́л еси́ ту́чи.

Сла́ва: На Небе́сныя кру́ги о́гненною колесни́цею возне́слся еси́,/ ны́не твою́ соверша́ющия па́мять ве́рно назира́я, я́ко Све́та близ сый,/ свет мы́сленный нам дава́й.

И ны́не, Богоро́дичен:

И́же от Бо́га ми́рови пода́нным благи́м Ты вина́ была́ еси́, Богоро́дице,/ но и ны́не моли́ о о́бщем спасе́нии благопреме́ннаго Бо́га.

На хвали́тех стихи́ры на 6, глас 8.

Подо́бен: Что́ вас нарече́н:

Егда́ ты, проро́че чу́дный,/ Бо́гу доброде́телию и житие́м чи́стым/ сраствори́вся с Ним, о́бласть прие́м,/ тварь по ра́зуму изме́рил еси́,/ и две́ри дожде́вныя во́лею затвори́л еси́,/ и свы́ше огнь низве́л еси́,/ и враги́ погуби́л еси́./ Моли́ спасти́ся душа́м на́шим.

Ре́вностию Госпо́днею распала́емь,/ беззако́нныя цари́ ты изобличи́л еси́ я́ве,/ сту́дныя свяще́нники ты умори́л еси́ те́пле,/ вжег огнь в воде́, блаже́нне,/ пи́щу же неде́ланную источи́л еси́/ и во́ды Иорда́нския ми́лотию твое́ю пресе́кл еси́./ Моли́ спасти́ся душа́м на́шим.

Егда́ ты, проро́че, показа́л еси́/ на земли́ я́ко вои́стинну ю́же на Небеси́ жизнь,/ жи́знию су́щею в тебе́ соста́вною обогате́яся,/ о́трока ме́ртва твои́м вдохнове́нием воскреси́л еси́,/ сме́рти кроме́ на ле́та лу́чша пребыва́еши,/ на колесни́цу о́гненну всел еси́,/ на высоту́ возвыша́емь./ Моли́ спасти́ся душа́м на́шим.

И́ны стихи́ры, глас 1, самогла́сны. Ге́рмана:

Илия́ ревни́вый и страсте́й самоде́ржец/ на возду́се носи́м бя́ше днесь,/ всеми́рнаго таи́нник спасе́ния начина́тель./ О, сла́вы честны́я,/ е́йже сподо́бися небопа́рный проро́к/ и проро́ков изря́дное удобре́ние!/ Сей бо во пло́ти А́нгел/ и безпло́тен челове́к показа́ся исправле́ньми./ Его́же хва́ляще, рцем:/ заступи́ нас, му́дре, в День су́дный.

Духо́вными пе́сньми проро́ки Христо́вы вси восхва́лим:/ Илия́ бо Фесви́тянин небоше́ственник бысть,/ и ми́лотию Елиссе́й благода́ть прия́т сугу́бу от Бо́га,/ и свети́льницы све́тлии вселе́нней яви́шася,/ моля́ще непреста́нно о душа́х на́ших.

Дави́дски днесь, ве́рнии,/ проро́ка Госпо́дня пе́сньми почти́м,/ Илию́ Фесви́тянина, и ревни́теля пресве́тла:/ сей бо язы́ком не́бо, я́ко ко́жу, затвори́/ и зе́млю плодови́тую непло́дну сотвори́./ О, пресла́внаго чудесе́!/ Зе́млен челове́к небесе́м одожди́ти дождя́ не даде́./ О, чудесе́! тле́нен челове́к в нетле́ние оде́яся/ и на Небеса́ востече́ о́гненною колесни́цею,/ ми́лотию же Елиссе́ю сугу́бу благода́ть дарова́в,/ царя́ облича́я,/ и лю́ди непокори́выя гла́дом растлева́ет,/ иере́и сту́дныя вся посрами́/ и вдови́ча сы́на сло́вом воскреси́./ Того мольба́ми, Христе́ Бо́же наш,/ в ми́ре сохрани́ оте́чество на́ше/ и побе́ды одоле́ния на враги́ да́руй.

Сла́ва, глас 8:

Проро́ков верхо́вники/ и всесве́тлыя свети́льники вселе́нныя/ в пе́снех почти́м, ве́рнии, Илию́ и Елиссе́я,/ и Христу́ возопие́м ра́достно:/ Благоутро́бне Го́споди,/ пода́ждь лю́дем Твои́м мольба́ми проро́к Твои́х/ оставле́ние грехо́в и ве́лию ми́лость.

И ны́не, Богоро́дичен: Влады́чице, приими́ моли́твы раб Твои́х:

Славосло́вие вели́кое. И отпу́ст.

НА ЛИТУРГИ́И

Блаже́нны пе́рваго кано́на, песнь 3-я, и втора́го, 6-я. Проки́мен, глас 4: Ты еси́ иере́й во век,/ по чи́ну Мелхиседе́кову. Стих: Рече́ Госпо́дь Го́сподеви моему́: седи́ одесну́ю Мене́, до́ндеже положу́ враги́ Твоя́ подно́жие ног Твои́х. Апо́стол Иа́ковля посла́ния, зача́ло 57. Аллилу́ия, глас 4: Моисе́й и Ааро́н во иере́ех Его́ и Саму́ил в призыва́ющих И́мя Его́. Ева́нгелие от Луки́, зача́ло 14. Прича́стен: В па́мять ве́чную бу́дет пра́ведник:

Ве́стно бу́ди, я́ко в гре́ческих Мине́ях печа́тных и уста́вах рукопи́сных, та́кожде и в славе́нских рукопи́сных и в печатных уста́вах, положена́ слу́жба Илии́ проро́ка шестери́чная со Окто́ихом.

Ве́чер: Обы́чная кафи́зма. На Го́споди, воззва́х: стихи́ры на 6, глас 1. Подо́бен: Небе́сных чино́в: И самогла́сны, глас 2. Сла́ва, глас 6: Прииди́те, правосла́вных: И ны́не, Богоро́дичен или́ Крестобогоро́дичен. На стихо́вне Окто́иха. Сла́ва, глас 6: Проро́че, пропове́дниче Христо́в: И ны́не, Богоро́дичен. Тропа́рь, глас 4: Во пло́ти А́нгел: Сла́ва, и ны́не, Богоро́дичен или́ Крестобогоро́дичен.

На у́трени, наБог Госпо́дь: тропарь проро́ка, два́жды. Сла́ва, и ны́не, Богоро́дичен или́ Крестобогоро́дичен, обы́чныя кафи́змы и седа́льны Окто́иха. О́ба кано́на Окто́иха и свята́го на 6. По 3-й пе́сни седа́лен. По 6-й пе́сни конда́к, и и́кос, и про́лог. По 9-й пе́сни свети́лен проро́ка.

На хвали́тех стихи́ры на 6. Сла́ва, глас 8: Проро́ков верхо́вники: И ны́не, Богоро́дичен. На стихо́вне Окто́иха. Сла́ва, глас 4: На о́гненней колесни́це:

На Литурги́и: Блаже́нны проро́ка, от кано́на пе́сни 3-я и 6-я. Проки́мен, глас 4: Ты еси́ иере́й во век,/ по чи́ну Мелхиседе́кову. Стих: Рече́ Госпо́дь Го́сподеви моему́: седи́ одесну́ю Мене́: Апо́стол Собо́рнаго посла́ния Иа́ковля, зача́ло 57. Аллилу́ия, глас 5: Моисе́й и Ааро́н во иере́ех Его́: Ева́нгелие от Луки́, зача́ло 14. Прича́стен: В па́мять ве́чную: В не́киих же уста́вех обрета́ются и чте́ния 3 на вече́рни, и славосло́вие на у́трени.

Моли́тва

О прехва́льный и пречу́дный проро́че Бо́жий Илие́, просия́вый на земли́ равноа́нгельным житие́м твои́м, пла́меннейшею ре́вностию по Го́споде Бо́зе Вседержи́теле, еще́ же зна́мении и чудесы́ пресла́вными, та́же, по кра́йнему благоволе́нию к тебе́ Бо́жию, преесте́ственно восхище́нный на о́гненней колесни́це с пло́тию твое́ю на не́бо, сподо́бивыйся бесе́довати с преобрази́вшимся на Фаво́ре Спаси́телем ми́ра и ны́не в ра́йских селе́ниих вы́ну пребыва́яй и предстоя́й Престо́лу Небе́снаго Царя́! Услы́ши нас, гре́шных и непотре́бных, в час сей предстоя́щих пред свято́ю твое́ю ико́ною и усе́рдно прибега́ющих к хода́тайству твоему́. Моли́ о нас Человеколю́бца Бо́га, да пода́ст нам дух покая́ния и сокруше́ния о гресе́х на́ших и всеси́льною Свое́ю благода́тию да помо́жет нам оста́вити пути́ нече́стия, приспева́ти же во вся́ком де́ле бла́зе, да укрепи́т нас в борьбе́ со страстьми́ и похотьми́ на́шими; да всади́т в се́рдце на́ше дух смире́ния и кро́тости, дух братолю́бия и незло́бия, дух терпе́ния и целому́дрия, дух ре́вности к сла́ве Бо́жией и спасе́нию бли́жних. Упраздни́ моли́твами твои́ми, проро́че, злы́я обы́чаи ми́ра, па́че же поги́бельный и тлетво́рный дух ве́ка сего́, заража́ющий христиа́нский род неуваже́нием к Боже́ственней Правосла́вней ве́ре, к уста́вом Святы́я Це́ркве и к за́поведем Госпо́дним, непочте́нием к роди́телем и власте́м предержа́щим и низверга́ющий люде́й в бе́здну нече́стия, развраще́ния и поги́бели. Отврати́ от нас, пречу́дне проро́че, предста́тельством твои́м пра́ведный гнев Бо́жий и изба́ви вся гра́ды и ве́си от бездо́ждия и гла́да, от стра́шных бурь и землетрясе́ний, от смертоно́сных язв и боле́зней, от наше́ствия враго́в и междоусо́бныя бра́ни. Испроси́, проро́че Бо́жий, от Го́спода па́стырем на́шим святу́ю ре́вность по Бо́зе, серде́чное попече́ние о спасе́нии пасо́мых, му́дрость в уче́нии и управле́нии, благоче́стие и кре́пость во искуше́ниих, судия́м испроси́ нелицеприя́тие и безкоры́стие, правоту́ и сострада́ние к оби́димым, всем нача́льствующим попече́ние о подчине́нных, ми́лость и правосу́дие, подчине́нным же поко́рность и послуша́ние ко власте́м и усе́рдное исполне́ние свои́х обя́занностей; да, та́ко в ми́ре и благоче́стии пожи́вше в сем ве́це, сподо́бимся прича́стия ве́чных благ в Ца́рствии Го́спода и Спа́са на́шего Иису́са Христа́, Ему́же подоба́ет честь и поклоне́ние, со Безнача́льным Его́ Отце́м и Пресвяты́м Ду́хом, во ве́ки веко́в. Ами́нь.

И́на моли́тва, во вре́мя бездо́ждия.

О вели́кий и пресла́вный проро́че Бо́жий Илие́, ре́вности ра́ди твоея́ по сла́ве Го́спода Бо́га Вседержи́теля не терпе́вый зре́ти идолослуже́ния и нече́стия сыно́в Изра́илевых, облича́вый законопресту́пнаго царя́ Аха́ва и в наказа́ние тех триле́тний глад на зе́млю Изра́илеву моли́твою твое́ю от Го́спода испроси́вый, да, отве́ргше ме́рзкия и́долы и отсту́пльше от непра́вд и беззако́ний, обратя́тся ко Еди́ному И́стинному Бо́гу и исполне́нию святы́х Его́ за́поведей, вдови́цу Саре́птскую в гла́де пречу́дно препита́вый и сы́на ея́ уме́рша моли́твою твое́ю воскреси́вый, по проше́ствии же пронарече́ннаго вре́мене гла́да, собра́нный на го́ру Карми́льскую наро́д изра́ильский в богоотсту́пстве и нече́стии укори́вый, та́же огнь моли́твою на же́ртву твою́ с небесе́ испроси́вый и чу́дом сим Изра́иля ко Го́споду обрати́вый, сту́дныя же проро́ки Ваа́ловы посрами́вый и умертви́вый, по сих же моли́твою па́ки не́бо разреши́вый и оби́льный дождь на зе́млю испроси́вый и лю́ди Изра́илевы возвесели́вый! К тебе́, преди́вный уго́дниче Бо́жий, усе́рдно прибега́ем, гре́шнии и смире́ннии, томи́ми бездо́ждием и зно́ем: испове́дуем, я́ко недосто́йни есмы́ ми́лости и благодея́ний Бо́жиих, досто́йни же па́че лю́тых преще́ний гне́ва Его́, ско́рби же и ну́жды и вся́ких зол и боле́зней. Не бо ходи́хом в стра́се Бо́жии и в путе́х за́поведей Его́, но в по́хотех развраще́нных серде́ц на́ших и вся́кий вид греха́ безчи́сленно сотвори́хом; беззако́ния на́ша превзыдо́ша главу́ на́шу, и не́смы досто́йни яви́тися пред лице́ Бо́жие и зре́ти на не́бо. Испове́дуем, я́ко и мы, я́коже дре́вний Изра́иль, отступи́хом от Го́спода Бо́га на́шего, а́ще не ве́рою, то беззако́ньми на́шими, и а́ще не покланя́емся Ваа́лу и други́м ме́рзким и́долом, то раболе́пствуем страсте́м и по́хотем на́шим, служа́ще и́долу чревоуго́дия и сластолю́бия, и́долу корыстолю́бия и честолю́бия, и́долу го́рдости и тщесла́вия, и вслед хо́дим богопроти́вным иноплеме́нным обы́чаем и поги́бельному ду́ху вре́мене. Испове́дуем, я́ко сего́ ра́ди заключи́ся не́бо и сотвори́ся а́ки ме́дяно, я́ко заключи́ся се́рдце на́ше от милосе́рдия и и́стинныя любве́ ко бли́жнему; сего́ ра́ди отверде́ земля́ и соде́лася безпло́дна, я́ко не прино́сим Го́споду на́шему плодо́в до́брых дел; сего́ ра́ди несть дождя́ и росы́, я́ко не и́мамы слез умиле́ния и животво́рныя росы́ Богомы́слия; сего́ ра́ди увяде́ всяк злак и трава́ се́льная, я́ко и́зсше в нас вся́кое благо́е чу́вство; сего́ ра́ди омрачи́ся возду́х, я́ко ум наш омрачи́ся сту́дными помышле́ньми и се́рдце на́ше оскверни́ся беззако́нными похоте́ньми. Испове́дуем, я́ко и тебе́, проро́че Бо́жий, проси́ти мы недосто́йни есмы́. Ты бо, подобостра́стен быв нам челове́к, А́нгелом в житии́ твое́м уподо́бился еси́ и, а́ки безпло́тный, на не́бо восхище́н еси́, мы же сту́дными по́мыслы и дея́ньми на́шими безслове́сным ското́м уподо́бихомся и ду́шу на́шу я́ко пло́ть сотвори́хом. Ты посто́м и бде́нием удиви́л еси́ А́нгелов и челове́ков, мы же, предаю́щеся невоздержа́нию и сластолю́бию, ското́м несмы́сленным уподобля́емся. Ты презе́льною ре́вностию о сла́ве Бо́жией вы́ну горе́л еси́, мы же небреже́м о сла́ве на́шего Творца́ и Го́спода и стыди́мся испове́дывати достопокланя́емое И́мя Его́. Ты нече́стие и злы́я обы́чаи искореня́л еси́, мы же ра́бствуем ду́ху ве́ка сего́, поставля́юще богопроти́вныя обы́чаи ми́ра па́че за́поведей Бо́жиих и уста́вов Святы́я Це́ркве. И кий грех и непра́вду не сотвори́хом мы, окая́ннии? Истощи́хом беззако́ньми на́шими долготерпе́ние Бо́жие. Те́мже правосу́дный Госпо́дь прогне́вася на нас и во гне́ве Свое́м наказа́ нас. Оба́че ве́дуще ве́лие дерзнове́ние твое́ пред Го́сподем и наде́ющеся на любо́вь твою́ к ро́ду челове́ческому, дерза́ем моли́ти тя, прехва́льне проро́че: ми́лостив бу́ди к нам, недосто́йным и непотре́бным. Умоли́ Великодарови́таго и Всеще́драго Бо́га, да не до конца́ прогне́вается на ны и не погуби́т нас со беззако́ньми на́шими, но да низпо́слет на жа́ждущую и изсо́хшую зе́млю дождь оби́льный и ми́рный, да да́рует ей плодоно́сие и благорастворе́ние возду́ха. Преклони́ де́йственным твои́м хода́тайством на ми́лость Цари́ Небе́снаго, а́ще не ра́ди нас, гре́шных и скве́рных, но ра́ди избра́нных рабо́в Его́, не преклони́вших коле́на своя́ пред Ваа́лом ми́ра сего́, ра́ди незло́бивых и несмы́сленных младе́нцев, ра́ди безслове́сных ското́в и птиц небе́сных, стра́ждущих за на́ша беззако́ния и истаева́ющих от гла́да, зно́я и жа́жды. Испроси́ нам твои́ми благоприя́тными моли́твами от Го́спода дух покая́ния и серде́чнаго умиле́ния, дух кро́тости и воздержа́ния, дух любве́ и терпе́ния, дух стра́ха Бо́жия и благоче́стия, да та́ко, возврати́вшеся от стезе́й нече́стия на пра́вый путь доброде́тели, хо́дим во све́те за́поведей Бо́жиих и дости́гнем обетова́нных нам благи́х, благоволе́нием Безнача́льнаго Бо́га Отца́, человеколю́бием Единоро́днаго Сы́на Его́ и благода́тию Всесвята́го Ду́ха, ны́не, и при́сно, и во ве́ки веко́в. Ами́нь.