Творе́ние смире́ннаго чернеца́ Григо́рия, оби́тели вели́каго Евфи́мия Су́ждальскаго

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: О, ди́вное чу́до:

О, ди́вное чу́до:/ велича́вый ра́зум погубля́ется днесь/ и рыда́ют вся́ческая лука́вая во́инства,/ ви́дяще ветвь су́щую,/ всеси́льною Боже́ственною благода́тию пресажда́ему,/ све́тло венча́ема от Бо́га вели́каго Васи́лия,/ на́шего нача́льника Креще́ния,/ и́мже све́тло просвети́ лю́ди Своя́/ во всех конце́х страны́ Твоея́ Ру́сския, Бо́же.

Ди́вная пучи́на ты бысть, Васи́лие,/ возрасти́вый нам ве́тви Богонасажде́нныя/ и цве́ты благоуха́нныя нам источи́вый,/ Бори́са чу́днаго и Гле́ба, ревни́теля благоче́стию,/ ка́плющих всем ве́рным оби́льно чудеса́./ С ни́миже предстоя́ Христу́, моли́ся/ во́инству на́шему пода́ти побе́ды на неве́рныя,/ и умири́ти весь мир,/ и спасти́ ду́ши на́ша.

О, ди́вное чу́до:/ посети́л ны еси́, Го́споди, от восто́к свы́ше,/ вели́кия ра́ди ми́лости,/ просвети́ лю́ди Своя́ ба́нею благоче́стия, святы́м Креще́нием,/ и дарова́ нам наста́вников и укрепи́телей ве́ры, преподо́бных оте́ц./ И́хже, соше́дшеся, согла́сно ублажи́м:/ Анто́ния, верх Ру́сския земли́, мона́хом первонача́льника,/ и Диони́сия, доброде́телем наста́вника,/ и́хже моли́твами от тьмы к све́ту приближа́емся.

Сла́ва, глас 8:

Прииди́те, стеце́мся, вси празднолю́бцы,/ к честне́й па́мяти отца́ Ру́сскаго/ и наста́вника на́шего Влади́мира./ Сей бо, от язы́к рожде́йся,/ возлюби́в возлю́бльшаго и́ Христа́,/ к Нему́ же и взы́де, ра́дуяся,/ с прама́терию блаже́нною Ольгою,/ вся лю́ди научи́ ве́ровати/ и покланя́тися в Тро́ице Еди́ному Бо́гу,/ и́долы же сокруши́в, попра́/ и израсти́ нам своя́ честны́я ле́торасли,/ Рома́на и Дави́да./ Тем и мы, свя́то ны́не, ве́рнии, чту́ще,/ пе́сньми па́мять их пра́зднуем:/ моли́теся ко Го́споду/ мир ми́рови испроси́ти/ и душа́м на́шим ве́лию ми́лость.

И ны́не, Богоро́дичен.

На стихо́вне стихи́ры, глас 6:

Преподо́бне о́тче Анто́ние,/ возсия́л еси́, я́ко со́лнце,/ и озари́л еси́ Ру́сския земли́ концы́,/ земна́я и мимотеку́щая а́ки уме́ты вмени́в,/ и Христа́ еди́наго приобре́л еси́,/ и в Ки́еве пеще́ру, Бо́гом дарова́нную,/ ты а́ки град соде́лал еси́,/ и собра́л еси́ и́нок мно́жество,/ с ни́ми же моли́ся Го́сподеви/ спасти́ся душа́м на́шим.

Стих: Блаже́ни вси, боя́щиися Го́спода,/ ходя́щии в путе́х Его́.

Преподо́бне о́тче Феодо́сие,/ земны́х маловре́менных жития́ избе́гл еси́,/ и́ноческое житие́ па́че возлюби́л еси́,/ А́нгелом собесе́дниче,/ бесо́в полки́ погуби́л еси́./ Мы бо пра́вый путь ше́ствовати тобо́ю позна́хом/ и тя на по́мощь призыва́ем,/ прося́ще тобо́ю мир прия́ти/ и ве́лию ми́лость.

Стих: Восхва́лятся преподо́бнии во сла́ве/ и возра́дуются на ло́жах свои́х.

Преподо́бнии отцы́ и цве́ти духо́внии,/ Ру́сския земли́ похвало́ и утвержде́ние/ и всем благоути́шное приста́нище,/ Ру́сская земля́, пропове́дающи вас, хва́лится:/ име́ю бо, рече́, в себе́ неистощи́мое сокро́вище,/ а́ще бо и теле́сный язы́к умолче́,/ но чудеса́ свиде́тельствуют/ просла́вльшаго вас Го́спода,/ Ему́же моли́теся/ дарова́ти душа́м на́шим ве́лию ми́лость.

Сла́ва, глас 2:

Та́йныя днесь Ду́ха трубы́,/ Богоно́сныя отцы́ восхва́лим:/ Влади́мира преблаже́ннаго,/ ликовству́юще, ку́пно сла́вим Анто́ния, Феодо́сия и Диони́сия,/ наста́вники и́ноком,/ с ни́миже блажи́м Се́ргия, Варлаа́ма и Кири́лла,/ Евфи́мия и Дими́трия,/ Авраа́мия, Пафну́тия и Мака́рия/ и вся про́чия ру́сския свети́льники./ Днесь торжество́ ва́ше све́тло пра́зднуем, преподо́бнии отцы́,/ моли́теся о нас ко Го́споду,/ спасти́ ду́ши на́ша.

И ны́не, Богоро́дичен.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 6. Самогла́сны:

Святи́телю, о́тче блаже́нный Пе́тре,/ многосве́тлый свети́льниче Ру́сския земли́,/ чудесы́ повсю́ду, я́ко второ́е со́лнце, сия́я,/ всех нас помина́й, соверша́ющих па́мять твою́ свяще́нную,/ мы бо вои́стинну ча́да твоя́/ и твою́ па́мять све́тло пра́зднуем./ О́тче преблаже́нный Пе́тре,/ моли́ Христа́ Бо́га/ спасти́ся душа́м на́шим.

Святи́телю о́тче Алекси́е,/ апо́столом насле́дниче,/ ты Ру́сскую зе́млю всю уче́ньми свои́ми просвети́л еси́/ и, прии́м дар чуде́с от Бо́га,/ неве́рнаго царя́ цари́цу,/ прише́д во Орду́, исцели́л еси́./ Не забу́ди о́тчины твоея́, Ру́сския земли́,/ но всех помина́й, предстоя́ во сла́ве всех Бо́га,/ да спасе́т тебе́ ра́ди ду́ши на́ша.

Святи́телей па́мять/ ве́лие есть торжество́ ва́ше, отцы́ преблаже́ннии,/ и, о том хва́лящеся, глаго́лем:/ не забу́дите оте́чества ва́шего, Ру́сския земли́,/ но всех нас помина́йте,/ соверша́ющих па́мять ва́шу,/ вси святи́и отцы́,/ моли́теся о нас ко Го́споду.

И́ны стихи́ры, глас 5.

Подо́бен: Преподо́бне о́тче:

Преподо́бне о́тче,/ ду́шу твою́ с те́лом очи́стил еси́/ и Свято́му Ду́ху прекра́сная оби́тель яви́ся,/ И́же сла́вна тя конце́м соде́я, преблаже́нне Се́ргие./ В чудесе́х тя вели́каго свети́льника,/ просвети́вшаго во мра́це су́щая,/ и наста́вника и́ноком,/ соше́дшеся, велему́дренно ублажа́ем.

Преподо́бне о́тче, сла́вне Евфи́мие,/ по́стником ты бысть похвала́,/ ми́ра красоты́ отню́дь возненави́дев,/ от ю́ности Бо́га возлюби́л еси́/ и те́сным путе́м ше́ствовал еси́./ Су́ждальский све́тлый свети́льниче/ и всея́ Руси́ те́плый засту́пниче,/ моли́ся о нас ко Го́споду,/ поми́ловати ду́ши на́ша.

Преподо́бнии отцы́,/ пое́м и воспева́ем торжество́ ва́ше,/ во псалме́х и пе́снех све́тло почита́ем па́мять ва́шу,/ препре́ли бо есте́ челове́ки небрещи́ сла́дких,/ ны́не же Боже́ственнаго Све́та чистото́ю облиста́емии,/ просвети́те на́ша помышле́ния,/ отцы́ преблаже́ннии.

Сла́ва, глас 8:

Днесь благода́ть Свята́го Ду́ха/ просвети́ и освяти́ зе́млю Ру́сскую,/ грехо́м обветша́вшу:/ Го́споди, Дух Твой посла́л еси́/ в крепкоразу́мную ду́шу благове́рнаго кня́зя Влади́мира,/ позна́ти Тебе́, Еди́наго от Тро́ицы/ и в Тро́ице Христа́ Бо́га./ Сей же Твои́м Креще́нием просвети́/ Богоизбра́нныя своя́, от Тебе́ поруче́нныя ему́ лю́ди,/ и приведе́ я́ к Тебе́,/ ве́рою вопию́щия:/ ускори́, Ще́дрый,/ потщи́ся спасти́ от прегреше́ний ми́ра.

И ны́не, Богоро́дичен: Царь Небе́сный:

Вход. Проки́мен дне. И чте́ния 3.

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́, я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели,/ и Аз Свиде́тель, глаго́лет Госпо́дь Бог,/ и о́трок, его́же избра́х./ Да позна́ете и ве́руете Ми/ и разуме́ете, я́ко Аз есмь,/ пре́жде Мене́ не бысть ин бог, и по Мне не бу́дет./ Аз есмь Бог,/ и несть, ра́зве Мене́, спаса́яй./ Аз возвести́х и спасо́х,/ уничижи́х и не бе в вас чу́ждий./ Вы Мне свиде́тели, и Аз Госпо́дь Бог,/ и еще́ от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ша в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань, разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие – рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие./ Поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я́ на́гло./ Сопроти́в стя́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к./ Я́ко дана́ есть от Го́спода держа́ва вам/ и си́ла от Вы́шняго.

На лити́и стихи́ры, глас 1:

Прииди́те, сни́дитеся, лю́дие ру́сстии,/ к честне́й па́мяти Влади́мира преблаже́ннаго,/ уго́дника Христо́ва пресла́внаго,/ прииди́те и приими́те благода́ть,/ и спасе́ние, и живо́т, и ве́лию ми́лость.

Глас 5: Ра́дуйся, страно́ Ру́сская ве́рная,/ я́же пре́жде бе неве́рна,/ па́че же ны́не ве́рою утверди́ся./ Ра́дуйся, кня́же благове́рный Васи́лие пребога́тый,/ ра́дуйся, О́льго избра́нная:/ вы бо есте́ пе́рвии ко Влады́це всех на́ши хода́таи,/ и нача́льницы Правосла́вия,/ и наста́вницы во и́стинней ве́ре./ Ра́дуйтеся, вся́ко ме́сто, и страно́, и гра́де,/ и́же гра́жданы воспита́вшии Небе́снаго Ца́рства/ и сих в воздержа́нии и боле́зни возрасти́вшии,/ соверше́нны му́жи Го́сподеви показа́вше./ Си́и святи́и свети́ла душа́м на́шим яви́шася,/ я́ко чуде́с заре́ю, и де́лы, и зна́меньми/ просия́ша мы́сленно во вся концы́./ Ны́не Христу́, вси святи́и отцы́, моли́теся/ спасти́ ду́ши на́ша.

Пречестна́я версто́, Бо́гом возлю́бленная,/ му́ченицы преслову́щии, Бори́се и Гле́бе,/ те́плии засту́пницы Ру́сския земли́/ и всем страна́м утвержде́ние,/ Христу́ моли́теся дарова́ти душа́м на́шим/ ве́лию ми́лость.

Прииди́те, вси ве́рнии,/ преподо́бных оте́ц лик воспои́м:/ Анто́ния верхо́внаго,/ Пече́рская свети́ла Феодо́сия и Диони́сия,/ ку́пно же и коего́ждо их всех./ И сих, я́коже в рай други́я пи́щи,/ житие́ мы́сленно преходя́ще,/ красно́ к ним возопии́м:/ Богоно́снии отцы́ преблаже́ннии,/ Христу́ моли́теся спасти́ся душа́м на́шим.

Кто изрече́т от земноро́дных/ чу́дная ва́ша жития́, преподо́бнии отцы́?/ Кий же язы́к изглаго́лет/ свяще́нныя о Ду́се по́двиги и по́ты ва́ша,/ страда́ния, доброде́телей по́чести,/ изможде́ния телеси́, боре́ния страсте́й/ во бде́ниих, и моли́твах, и слеза́х?/ Вы в ми́ре вои́стинну яви́стеся я́коже А́нгели,/ та́ко же и бесо́в си́лу до конца́ погуби́сте,/ сотвори́вше чу́дная и ди́вная зна́мения./ Те́мже моли́теся, преблаже́ннии, о нас ко Го́споду,/ улучи́ти нам неизглаго́ланную ра́дость/ и ве́лию ми́лость.

Сла́ва, глас 6:

Е́же по о́бразу соблю́дше невреди́мо,/ ум влады́ку на стра́сти па́губныя по́стнически поста́вивше,/ во е́же по подо́бию, я́ко мо́щно, возшли́ есте́./ Му́жески бо естество́ пону́дивше,/ потща́лися есте́ ху́ждшее поксори́ти лу́чшему/ и плоть порабо́тити ду́ху./ Те́мже мона́шествующих яви́лися есте́ наста́вницы,/ жи́тели пусты́ннии,/ благотеку́щих обучи́тели,/ пра́вила доброде́тели изве́стнейшая./ И ны́не на Небесе́х, зерца́лом разре́шшимся, отцы́ Богому́дрии,/ чи́сте зри́те Святу́ю Тро́ицу,/ моля́щеся несре́дственне/ о и́же ве́рою и любо́вию чту́щих вас.

И ны́не, Богоро́дичен: Творе́ц и Изба́витель:

На стихо́вне стихи́ры, глас 2:

Свети́ла ру́сская, му́ченики прехва́льныя,/ святи́тели и просвети́тели и ве́ры утвержде́ние,/ преподо́бныя гра́жданы пусты́нныя/ и наста́вники благоче́стию,/ и́хже, соше́дшеся, согла́сно ублажи́м:/ преподо́бнии и пра́веднии и вси святи́и,/ моли́те Христа́ Бо́га/ дарова́ти нам ве́лию ми́лость.

Стих: Блаже́ни вси, боя́щиися Го́спода,/ ходя́щии в путе́х Его́.

Вси помо́лимся Христу́,/ и́же творя́щии па́мять днесь/ отцу́ на́шему Влади́миру,/ нача́льнику просвеще́ния Ру́сския земли́ на́шея./ И с ним вку́пе воспои́м согла́сно/ Боже́ственныя отцы́ на́ша,/ и́же посто́м просия́вшия./ К ни́мже возопии́м, глаго́люще:/ отцы́ вси святи́и,/ моли́теся о нас ко Го́споду,/ дарова́ти нам ве́лию ми́лость.

Стих: Восхва́лятся преподо́бнии во сла́ве/ и возра́дуются на ло́жах свои́х.

Вси пе́сньми духо́вными возопие́м:/ ра́дуйся и весели́ся, гра́де Су́ждале,/ и́же израсти́ нам плод дре́ва ра́йскаго,/ Евфроси́нию благове́рную, по́стником кре́пкое утвержде́ние./ Вку́пе блажи́м с не́ю О́льгу пребога́тую/ и Февро́нию Му́ромскую, пресве́тлую свети́льницу./ Преподо́бныя всеблаже́нныя ма́тери,/ моли́теся о нас ко Го́споду,/ дарова́ти нам ве́лию ми́лость.

Сла́ва, глас 6:

Оте́ческий соста́в, празднолю́бцы, прииди́те, пе́сньми восхва́лим:/ святи́телей Пе́тра, и Алекси́я, и Ио́ну, и Лео́нтия./ С ни́ми же ку́пно преподо́бных Се́ргия и Варлаа́ма блажи́м,/ Кири́лла и Евфи́мия,/ Авраа́мия, Дими́трия, Пафну́тия, Мака́рия,/ и́же Христа́ ра́ди юро́дивых Макси́ма и Васи́лия,/ Иси́дора, Нико́лу и Иоа́нна,/ вку́пе О́льгу и Евфроси́нию,/ и́же в посте́ просия́вшия./ Вси святи́и и преподо́бнии,/ моли́теся о нас ко Го́споду,/ спасти́ и просвети́ти ду́ши на́ша.

И ны́не, Богоро́дичен: Творе́ц и Изба́витель:

Тропа́рь, глас 3:

Пречестна́я версто́, Бо́гом возлю́бленная,/ отцы́ преблаже́ннии, правосла́вию наста́вницы,/ в Небе́сныя оби́тели, я́ко на колесни́це, доброде́тельми взыдо́сте,/ те́плии засту́пницы Ру́сския земли́/ и всем ве́рным стено́ и утвержде́ние,/ Христу́ моли́теся/ дарова́ти нам ве́лию ми́лость.

НА У́ТРЕНИ

По 1-м стихосло́вии седа́лен, глас 8.

Подо́бен: Повеле́нное:

Оте́ческими мо́лниями озари́вшеся, я́ко в рай красе́н входя́ще,/ пи́щи поте́ка наслади́мся/ и, сих до́блести чу́дно смотря́юще, поревну́ем доброде́телем их, Спа́су взыва́юще:/ моли́твами их, Бо́же, Ца́рствию Твоему́ прича́стники нас сотвори́.

Сла́ва, и ны́не, Богоро́дичен:

Повеле́нное та́йно прии́м в ра́зуме,/ в кро́ве Ио́сифове тща́нием предста́ Безпло́тный, глаго́ля Неискусобра́чней:/ Преклони́вый схожде́нием Небеса́ вмеща́ется неизме́нно Весь в Тя,/ Его́же и ви́дя, в ложесна́х Твои́х прие́мша ра́бий зрак, ужаса́юся взыва́ти Ти:/ ра́дуйся, Неве́сто Неневе́стная.

По 2-м стихосло́вии седа́лен, глас 8:

Я́ко в рай, доброде́телей цве́ты взира́юще, богоно́сных по́стник обходя́ще,/ вони́ исполня́емся мироуха́нныя,/ святи́и бо, страда́ньми наостри́вшеся, искуше́ни, те́ло воздержа́нием раболе́пно покори́ша ду́ху,/ а́нгельски на земли́ пожи́вше житие́, те́мже сла́вы сподо́бишася.

Сла́ва, и ны́не, Богоро́дичен:

Непостижи́маго Бо́га Сло́ва, неизрече́нно из Тебе́, Богоро́дице, вопло́щшася па́че ума́,/ моли́ со преподо́бными мир вселе́нней чист дарова́ти и согреше́ний проще́ние/ и Ца́рствия Небе́снаго кра́йнею бла́гостию сподо́бити рабы́ Своя́.

Велича́ние:

Велича́ем вас,/ святи́и вси ру́сстии чудотво́рцы,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

По полиеле́и седа́лен, глас 6:

В па́мяти преподо́бных Твои́х, Го́споди, вся тварь пра́зднует:/ Небеса́ ра́дуются со А́нгелы и земля́ весели́тся с челове́ки./ Тех моли́твами поми́луй нас.

Сла́ва, и ны́не, Богоро́дичен:

Даждь нам по́мощь от печа́ли и спаси́ нас,/ рожде́йся от Де́вы Человеколю́бче.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 11.

По 50-м псалме́ стихи́ра, глас 8:

Незаходи́мое Со́лнце пра́ведное, Христе́ Бо́же,/ моли́твами святы́х Твои́х/ пра́зднующия их светоно́сное торжество́/ све́том Твои́м просвети́/ и Ца́рствия Твоего́ прича́стники сотвори́.

Кано́н, глас 8.

Песнь 1

Ирмо́с: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще,/ пои́м Тебе́, Еди́ному Влады́це.

Припе́в: Вси святи́и чудотво́рцы Ру́сстии, моли́те Бо́га о нас.

Вси пе́сньми духо́вными/ и́же посто́м просия́вшия Боже́ственныя отцы́ воспои́м согла́сно,/ и́хже изнесе́ Ру́сская земля́, вся́ко ме́сто, град и страна́.

Ра́дуйся и красу́йся ду́хом, равноапо́стольне кня́же Влади́мире,/ изря́дно ве́тви богоса́дныя ко Христу́ принесы́й,/ благоизря́дный плод, Бори́са сла́внаго и Гле́ба благочести́ваго./ С ни́миже, предстоя́, у Престо́ла Христо́ва, моли́ся о нас.

Днесь А́нгели ра́дуются на Небесе́х,/ во све́тлую память твою́ святу́ю, Влади́мире:/ спасл бо еси́ всех от вся́каго лука́вствия/ и жертв бесо́вских лю́ди и град изба́ви.

Ра́дуйся, мона́хов пе́рвый наста́вниче, Анто́ние прекра́снейший, Ки́евская сла́во./ Ра́дуйся, держа́во безмо́лвию, Феодо́сие а́нгеле./ Диони́сий духоно́сный с Ни́коном сла́вным/ пе́сньми да почту́тся.

Житие́м богодухнове́нным вои́стинну рай яви́стеся Христо́ве Це́ркви, блаже́ннии отцы́,/ вси по и́мени, о нас ко Го́споду моли́тву сотвори́те.

Тро́ичен:Тро́ице Неразде́льная, Еди́нице Вседе́тельная,/ О́тче и Сы́не и Святы́й Ду́ше,/ Ты Бог мой, и Госпо́дь, и Свет,/ Тебе́ воспева́ю и Тебе́ кла́няюся.

Богоро́дичен: Ра́дуйся, пресвяты́й хра́ме, руно́ Богоно́сное,/ запечатле́нный исто́чниче, безсме́ртия струе́./ Ста́до Твое́, Владычице, сохрани́ от всех борю́щих невое́вано.

Песнь 3

Ирмо́с: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди.

В други́й рай входя́ще, доброде́телей чу́дных оте́ц,/ сих вкуси́м присноживо́тнаго дарова́ния,/ одушевле́нныя пи́щи, восхваля́юще их.

Благоуха́ния ны́не исполня́емся,/ я́ко в рай други́й теку́ще богонасажде́нный доброде́телей,/ я́же в воздержа́ниих и слеза́х процвето́ша святи́и чудотво́рцы Ру́сстии,/ разли́чныя плоды́ принося́ще жития́,/ те́мже Бо́гу присво́ишася.

Пе́сньми свяще́нными восхва́лим вели́каго Се́ргия,/ и́же в Ра́донежстей пусты́ни све́тло пости́вшагося,/ свети́льника многосве́тлаго всей вселе́нней,/ его́же моли́твами вси спаса́емся.

Варлаа́м, Новугра́ду сла́ва и похвала́, днесь да похва́лится,/ и́же в чудесе́х мно́гих, де́лом же и сло́вом, показа́ нам чуде́с све́тлость,/ нача́льник мона́хов и утвержде́ние ве́ры.

Да почте́н бу́дет Евфи́мий, све́тлая звезда́,/ Су́ждальский свети́льник, и́же де́лы и чудесы́ облиста́вый до конца́,/ уго́дник Христо́в, свети́ло неугаси́мое,/ прибега́ющим покро́в и заступле́ние.

Вели́кий Кири́лл Белоезе́рский пти́чие житие́ поживе́, я́ко А́нгел,/ и, а́ки дре́внии отцы́, Са́вва Освяще́нный, житие́м яви́ся свети́льник пусты́нный/ и утвержде́ние и́ноков и учи́тель изя́щный.

Тро́ичен:Триеди́наго Естества́ пою́ Ли́ца соста́вна,/ нерожде́нна Отца́, Сы́на рожде́нна и Ду́ха Свята́го Безнача́льна,/ Ца́рство и Божество́ Еди́но.

Богоро́дичен: Чи́стая – Отроча́ ражда́еши, Де́ва – млеко́м дои́ши./ Ка́ко вку́пе обоя́ де́йствуеши, ро́ждши?/ Бог есть Соде́явый, не изыщи́ мене́, е́же ка́ко.

Седа́лен, глас 8.

Подо́бен: Прему́дрости:

Анто́ниеву кро́тость, и чистоту́ Феодо́сия вели́каго, и чу́днаго Диони́сия по́двиги,/ Се́ргия, сла́внаго в по́стницех, и Евфи́мия, кро́ткаго в разсужде́ниих,/ и про́чих Боже́ственных оте́ц чудеса́, ве́рнии, просла́вим./ И почти́м вку́пе Евфроси́нию Су́ждальскую, жены́ Богому́дрыя воспои́м и согла́сно вопие́м:/ вси святи́и, моли́те Христа́ Бо́га грехо́в оставле́ние дарова́ти/ чту́щим любо́вию святу́ю па́мять ва́шу.

Сла́ва, и ны́не, Богоро́дичен:

Небе́сную дверь и ковче́г, всесвяту́ю го́ру, све́тлый о́блак воспои́м,/ неопали́мую купину́, слове́сный рай, Е́вино свобожде́ние,/ вселе́нныя всея́ вели́кое сокро́вище,/ я́ко спасе́ние в нем соде́лася ми́ру и оставле́ние дре́вних согреше́ний./ Те́мже и вопие́м Ей:/ моли́ Христа́ Бо́га прегреше́ний оставле́ние дарова́ти/ благоче́стно покланя́ющимся пресвято́му рождеству́ Твоему́.

Песнь 4

Ирмо́с: Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися богови́дно усмотри́/ и со стра́ хом славосло́вяше си́лу Твою́.

Еде́мскаго рая́, прииди́те, ви́дим цве́ты присноживо́тныя,/ богора́сленная зда́ния, отце́в тща́ния,/ и́мже де́латель Госпо́дь.

Све́тло да похва́лится Дими́трий, Волого́дская сла́ва, отце́в нача́льник,/ Диони́сий, Глуши́цкая похвала́,/ прибега́ющим покро́в и заступле́ние.

Звезда́м заря́, послуша́ния жизнь лу́чших показа́:/ я́ко два свети́ла, сия́юща нам, Фео́дор и Па́вел Богому́дрии, Росто́вская похвала́,/ житие́м чи́стым Бо́гу присво́ишася.

Ни́кона пою́, ученика́ вели́каго Се́ргия,/ и Са́вву воспева́ю, и́же во Андро́никове пости́вшагося./ Изря́дно с ни́ми да почте́тся пресла́вный Авраа́мий Смоле́нский.

В пе́снех да похва́лится Зоси́ма,/ пости́выйся в Солове́цстем о́строве изря́дно./ С ним да почте́тся Савва́тий, си́лою Христо́вою ору́жия бесо́в сте́рший.

Све́тло да похва́лится свети́лом свети́льник, Косма́ Влади́мирский, и́же на Я́хроме;/ достодо́лжно да почте́тся Мака́рий Каля́зинский;/ Пафну́тий Бо́ровский, Алекса́ндр Ошеве́нский с ни́ми да пою́тся гла́сы.

Тро́ичен: Умови́дно несеко́мо Существо́ единора́сленное в Тро́ицу простира́юще,/ Еди́наго Бо́га испове́даем над все́ми/ и Соста́вы Три пропове́даем.

Богоро́дичен: Ра́дуйся, Бо́жие простра́нное вмести́лище,/ ра́дуйся, ковче́же Но́ваго Заве́та./ Ра́дуйся, ру́чко, из нея́же Ма́нна Небе́сная да́стся всем челове́ком.

Песнь 5

Ирмо́с: Страсте́й мя мглы,/ я́ко от глубо́кия но́щи, избавля́яй,/ у́треневати сподо́би дух мой, молю́ся,/ во све́те дне повеле́ний Твои́х, Христе́.

Чу́дни вси честни́и отцы́,/ и́хже Боже́ственная страда́ния, и́хже чудеса́, и́хже исцеле́ния./ Кто па́че сих показа́ зна́мением кре́пость?

Не́бо четвертосве́тлое яви́ся на земли́ дво́ица сия́:/ Ники́та Переясла́вский тезоимени́тый, и́же на столпе́,/ честь доброде́телем Авраа́мий Росто́вский.

Фео́дор преподо́бный, князь Яросла́вский,/ с сыно́ма свои́ма доброде́тельми блиста́яся, просвеща́ет нас./ Мака́рия же У́нженскаго кто досто́йно просла́вит от земны́х?

Посреди́ звезд а́ки со́лнце,/ и́мже бе нача́льник, Анто́ний облиста́ и Ефре́м чу́дный./ С ни́миже озаря́ет нас и Са́вва Ви́шерский со Алекса́ндром Сви́рским.

Всечестно́е сокро́вище Боже́ственных даро́в и дом прему́дрости,/ Михаи́л Кло́пский и Нико́ла блаже́нный, юро́дивый,/ да похва́лятся а́нгельски.

Всечестны́й Па́вел Обно́рский вку́пе со Стефа́ном Ма́хрищским,/ Макси́м же юро́дивый и Васи́лий Блаже́нный Моско́вский, Иси́дор Росто́вский юро́дивый/ равноа́нгельски да похва́лятся.

Хвалю́ Мефо́диева блага́я дела́./ Высото́ю жития́ небе́снаго бысть Алекса́ндр Не́вский дом прему́дрости и гора́ разу́мная./ С ни́мже да восхва́лится Петр Му́ромский, свети́льник Боже́ственный.

Тро́ичен: Соста́вы Треми́, а́ще естество́м Еди́но, Божество́ есть,/ в Него́же крести́хомся и Еди́ному слу́жим:/ Оте́ц бо Безнача́льный, и Сло́во, и Дух Единосу́щный.

Богоро́дичен: Ра́дуйся, ми́ру сла́во, Богоро́дице Мари́е Всепе́тая,/ ра́дуйся, глави́зно Боже́ственнаго соедине́ния/ Сы́на Бо́жия к челове́ком, Чи́стая.

Песнь 6

Ирмо́с: Содержи́ма мя, приими́, Человеколю́бче, грехи мно́гими,/ и припа́дающа щедро́там Твои́м,/ я́ко проро́ка, Го́споди, и спаси́ мя.

Прииди́те, вни́дем в клеть душе́вную, Го́споду моли́твы воздаю́ще и вопию́ще:/ О́тче, И́же еси́ на Небесе́х, до́лги на́ша осла́би и оста́ви/ святы́х Твои́х моли́твами, Еди́н бо еси́ Милосе́рд.

Увы́ мне, кто бу́ду и что соде́ю, грехи́ содева́я/ и Влады́ки не устраша́яся, несмы́сленный!/ Сего́ ра́ди пре́жде Суда́ вопию́ Ти, Милосе́рде Го́споди:/ святы́х Твои́х моли́твами спаси́ мя.

Свято́е и сла́вное оте́ц мно́жество помя́нутое,/ изба́вите от бед и́же ве́рою творя́щих па́мять ва́шу.

Тро́ичен: Тя, Тро́ице Пребезнача́льная и Боже́ственная Еди́нице,/ Свет и Све́ты пою́, Живо́т и Животы́,/ и Ум, и Сло́во, Дух же Святы́й,/ Свята́го Еди́наго Бо́га.

Богоро́дичен: Из ко́рене Иессе́я прорасте́ Цвет жи́зни,/ взыгра́й, пра́деде,/ от Чи́стыя Отрокови́цы Христо́с Бог, спаса́яй мир.

Конда́к, глас 8.

Подо́бен: Я́ко нача́тки:

Я́ко благоче́стия пропове́дники/ и нече́стия обузда́тели, Го́споди,/ Богоно́сных собо́р уясни́л еси́,/ Ру́сскую зе́млю озаря́я тех моли́твами, в ми́ре соверше́нне./ И Тебе́ сла́вящия и велича́ющия сохрани́,/ пою́щия Ти: аллилу́ия.

И́кос:

На кра́сная воззре́в по́мыслом, ви́дя быва́емая,/ изме́рив тех боле́зни, жизнь челове́ком окаля́х./ Вас же еди́ных ублажи́м, и́же до́брою че́стию избра́вших,/ е́же жела́ти Христа́, и пребыва́ти с Ним,/ и пе́ти при́сно со проро́ком Дави́дом: аллилу́ия.

Песнь 7

Ирмо́с: На по́ле Деи́ре/ иногда́ мучи́тель пещь поста́ви на муче́ние Богоно́сных,/ в не́йже три о́троки песносло́вяху Еди́наго Бо́га,/ тро́ично воспева́ху, глаго́люще:/ отце́в Бо́же, благослове́н еси́.

Прииди́те, принесе́м песнь по до́лгу жена́м, преподо́бно пожи́вшим и равноа́нгельно,/ и́хже моли́твами, воззове́м,/ Бо́же, спаси́ всех нас.

Дверь све́та всем яви́ся, всенепоро́чная О́льго, су́щим во тьме хода́таица спасе́нию,/ укрепи́ вся позна́ти Бо́га и́стиннаго,/ и Богоизбра́нных сла́ву притяжа́ла еси́.

Страстоно́сице Евфроси́ние, звезда́ яви́ся Су́ждалю/ и, а́ки со́лнце, доброде́тельми облиста́ющи Ру́сския земли́ концы́, пребога́тая.

Словесы́ Бо́жиими воспита́на, Богому́драя Евфроси́ние По́лоцкая,/ жела́ющи спасе́нное сло́во, свяще́нных книг науче́ния мзду прия́ла еси́,/ Богоизбра́нных сла́вою обогати́вшися.

Воздержа́ния о́браз, целому́дрия душе́вный вид ве́рным яви́ся,/ хва́лящим твою́ па́мять свяще́нную, Февро́ние.

Тро́ичен: Тро́йчески Еди́ницу воспои́м,/ соедине́нну Естество́м, Соста́вы разделя́ющуся,/ Та есть Госпо́дь Бог Оте́ц.

Богоро́дичен: Ра́дуйся, Мари́е Богоро́дице Де́во./ Ра́дуйся, престо́ле Госпо́день./ Ра́дуйся, ле́ствице, я́же челове́ческий род горе́ возве́дши от земли́ ко Христу́ Бо́гу.

Песнь 8

Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

Па́стыри и му́дрыя учи́тели, святи́тели Христо́вы Це́ркве со преподо́бными/ вси возвели́чим, взыва́юще:/ Го́спода по́йте и превозноси́те Его́ во ве́ки.

Вели́кий во святы́х Петр, Моско́вский и всея́ Руси́ чудотво́рец,/ да почте́н бу́дет, я́ко небе́сный таи́нник./ Алекси́й пребога́тый, а́ки гора́, яви́ся ве́ры тве́рдость.

Ио́на, и Киприя́н, и Макси́м Влади́мирский,/ Богоно́сцы вои́стинну, а́ки апо́столи, свяще́нницы Госпо́дни,/ да воспою́тся с Фо́тием и Фили́ппом, Боже́ственнии свети́льницы.

Лео́нтий, ве́ры ка́мень и основа́ние, победи́ вся́ку лесть и спасе́ челове́ки,/ Богоблаже́нный святи́тель, пропове́дник Христо́в и гра́ду Росто́ву учи́тель.

Иса́ия Боже́ственный, Иа́ков Боже́ственный же и Богоно́сный Игна́тий,/ Боже́ственнии свети́льницы, да пою́тся,/ святи́тели Росто́ву и учи́тели.

Иоа́нну и Фео́дору сла́ва, Су́ждальским свети́льником./ С ни́ми же да пою́тся Ники́та, Иоа́нн и Евфи́мий Брада́тый,/ Новгоро́дстии Боже́ственнии свети́льницы живо́тнии.

Тро́ичен:Еди́ницу Существо́м, пою́ Тя,/ Тро́ицы Ли́ца чту,/ О́тче, и Сы́не, и Ду́ше Пресвяты́й,/ и Безнача́льную Держа́ву Твоего́ Ца́рствия сла́влю во ве́ки.

Богоро́дичен: Ты гора́ Бо́жия яви́ся, Богоро́дице,/ в ню́же Христо́с всели́ся и Боже́ственный храм соде́ла пою́щим:/ Го́спода по́йте и превозноси́те Его́ во ве́ки.

Песнь 9

Ирмо́с: Проявле́нное на горе́ закононоло́жнику во огни́ и купине́/ Рождество́ Присноде́вы/ в на́ше, ве́рных, спасе́ние/ пе́сньми немо́лчными велича́ем.

От врага́ братоуби́йцы убие́ние прия́вшии, святи́и му́ченицы Бори́се и Гле́бе,/ све́том Боже́ственных страда́ний свети́ла яви́стеся,/ и на́ши просвети́те чу́вства.

Прехва́льный му́чениче кня́же Михаи́ле с до́блим боля́рином Фео́дором,/ от нечести́ваго пострада́вше, му́ченическими кровьми́ венча́стеся,/ свети́ла яви́стеся Черни́гову.

Укрепи́вшеся си́лою Бо́жиею, му́чеником сла́во, Мерку́рие и Авраа́мие,/ стяжа́сте Христа́, кре́пкаго Побо́рника на мучи́теля,/ я́ко непобеди́мии.

Преподо́бнии отцы́, святи́тели Госпо́дни, и святи́и му́ченицы,/ и жены́ преподо́бныя, и вси пра́ведницы неимено́ваннии,/ моли́те спасти́ся душа́м на́шим.

Тро́ичен: Тро́ице Свята́я, Неразде́льная Существо́м,/ Единоца́рственная над все́ми, Единонача́льная,/ О́тче, и Сы́не, и Святы́й Ду́ше,/ при́сно рабы́ Своя́ спаса́й.

Богоро́дичен: Ра́дуйся, пала́то всех Царя́,/ ра́дуйся, я́ко Ца́рствие Небе́сное Тобо́ю отве́рзеся су́щим на земли́, Ма́ти Де́во,/ и е́же со А́нгелы селе́ние.

Свети́лен:

В пе́снех восхва́лим и́же посто́м просия́вшия/ преподо́бныя учи́тели и таи́нники Боже́ственнаго Сло́ва с жена́ми святы́ми,/ Христа́ просла́вим, И́же сих возлюби́вшаго и помо́щники нам да́вша во вре́мя ско́рби.

Сла́ва, и ны́не, Богоро́дичен:

Боже́ственное очисти́лище, ковче́г всезлаты́й,/ Богоро́дицу Мари́ю, прииди́те, ве́рнии, соше́дшеся, ублажи́м./ Припаде́м, воспла́чемся, приле́жно возопие́м:/ Богоро́дице Всепе́тая, преподо́бных моли́твами помози́ рабо́м Свои́м.

На хвали́тех стихи́ры, глас 8.

Подо́бен: О, пресла́внаго чудесе́:

Земля́ весели́тся, и не́бо ра́дуется,/ отцы́ преподо́бнии,/ по́двигом и трудо́м ва́шим,/ душе́вному благомо́щию и уму́ непобеди́мому,/ естества́ бо зако́ном не победи́стеся./ О собо́ре святы́й и Боже́ственный по́лче,/ Ру́сскому оте́честву утвержде́ние/ вы есте́ вои́стинну.

Бо́дрии свети́льницы яви́стеся,/ не усну́сте бо когда́ мно́гими прило́ги бесо́вскими,/ похоте́нием ва́шим испо́лнени./ Но а́ки безпло́тнии на земли́ яви́стеся,/ о Боже́ственное во́инство и по́лче всепреподо́бный,/ доброде́тельми победи́вше/ ду́хи лука́выя тве́рдо.

Вся стра́сти умертви́вше/ безстра́стием души́, и ума́ чистото́ю, и обы́чаем про́стым,/ по́двиг проидо́сте,/ посто́м бо и бде́нием ва́шим/ Христу́ сокро́вище и сосу́ди яви́стеся./ О зва́ние свято́е, отцы́ Боже́ственнии,/ ны́не Христу́ моли́теся вси/ спасти́ся нам.

Сла́ва, глас 8:

И́нок мно́жества,/ наста́вники вас чтим, отцы́ всечестни́и,/ ва́ми бо стезю́ вои́стинну пра́вую ходи́ти позна́хом, блаже́ннии,/ о Христе́ укре́пльшеся, вра́жию низложи́сте си́лу,/ Госпо́дни уго́дницы, А́нгелом собесе́дницы, святы́м сожи́телие,/ с ни́ми же моли́теся о нас Го́сподеви,/ поми́ловатися душа́м на́шим.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол и Ева́нгелие Неде́ли Всех святы́х. Прича́стен: Ра́дуйтеся, пра́веднии:

НА ВЕЧЕ́РНИ

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

Афиноге́н сла́вный,/ свяще́нства све́тлым обложе́н одея́нием,/ обагре́нии кро́вными чисте́йшее показа́,/ с ни́мже вшед в це́рковь святу́ю,/ Всеви́дцу явля́яся,/ и служа́ Ему́ с Невеще́ственными чи́ны,/ и прича́стием Боже́ственным просвеща́емый,/ его́же ублажа́ем.

Афиноге́н прему́дрый/ лик приведе́ Христу́ страда́льцев ве́рою,/ тве́рдо пострада́вших и тече́ние сконча́вших,/ с ни́миже победи́в многоко́зненнаго,/ ли́ки му́ченическими восприе́млется,/ прича́стием обожа́емь,/ и мо́лит всегда́ о нас,/ свяще́нную его́ па́мять соверша́ющих при́сно.

Десяти́ца учени́к Богоизбра́нная,/ по́стными по́двиги/ страсте́й взыгра́ния низложи́вши,/ пострада́ и зми́я умертви́,/ Афиноге́на, наста́вника свяще́нна,/ Боже́ственною си́лою приобре́тши./ Сих мольба́ми спаси́ нас, Благоутро́бне,/ всегда́ на Тя упова́ющия, Преблага́го.

Сла́ва, и ны́не, Богоро́дичен, глас и подо́бен то́йже:

Спаси́ мя, Влады́чице Пречи́стая,/ Я́же Спа́са Христа́ неизрече́нно ро́ждшая,/ Тя бо еди́ну стяжа́х Предста́тельницу,/ и необори́мую сте́ну, и покро́в, и ра́дование,/ и души́ моеи́ Боже́ственное утеше́ние./ Ты у́бо мя изба́ви неусыпа́ющаго че́рвия/ и огня́ ве́чнующаго, Ма́ти Христа́ Бо́га.

Крестобогоро́дичен. Подо́бен то́йже:

Что́ зри́мое виде́ние,/ е́же Мои́ма очи́ма ви́дится, о Влады́ко?/ Содержа́й всю тварь, на Дре́во воздви́жен быв,/ и умира́еши, всем дая́й жизнь, –/ Богоро́дица, пла́чущися, глаго́лаше,/ егда́ узре́ на Кресте́ возноси́ма/ из Нея́ неизрече́нно возсия́вшаго Бо́га и Челове́ка.

Тропа́рь, глас 8:

Свяще́нный Бо́гу Афиноге́н, в же́ртве служи́тель,/ свяще́нное учени́к свои́х принесе́ Христу́ заколе́ние,/ па́стырь со слове́сными о́вцами и́де в Небе́сную огра́ду,/ победи́в свере́пеющия неве́рием язы́ки./ Му́ченик Твои́х моли́твами, Христе́ Бо́же,/ спаси́ ста́до Твое́ от волко́в, губя́щих е́.

НА У́ТРЕНИ

Кано́н, его́же краегране́сие: Твои́х страда́льцев пою́, Христе́, сла́ву. Ио́сиф, глас 8.

Песнь 1

Ирмо́с: Пои́м Го́сподеви,/ прове́дшему лю́ди Свои́ сквозе́ Чермно́е мо́ре,/ я́ко Еди́н сла́вно просла́вися.

С чи́нми Небе́сными ны́не лику́я, достосла́вне святи́телю и му́чениче,/ пою́щия тя ве́рою спаса́й.

Зако́ны Влады́чними собо́р наставля́емь честны́й Христо́вых страда́лец,/ беззако́нных сове́ты разори́сте.

Я́коже непоро́чно заколе́ние, весь соже́гся, Богоблаже́нне,/ огне́м мук приве́лся еси́ к Бо́гу ве́ры ра́ди.

Богоро́дичен: Плоть бы́вшаго от Твои́х крове́й, Неискусобра́чная,/ Преве́чное Сло́во па́че ума́ же и сло́ва родила́ еси́.

Песнь 3

Ирмо́с: Утверди́ наш ум и сердца́,/ Небеси́ сло́вом утвержде́й,/ во е́же пе́ти и сла́вити Тя/ во спасе́ние душ на́ших.

Разори́в вра́жия лю́тая кова́рства к Бо́гу неразори́мою любо́вию,/ Афиноге́н, му́ченик и святи́тель, со ученики́ сла́вы сподо́бися.

Притупи́ша врагу́ стре́лы и жа́ла терпели́вным противле́нием Боже́ственнии/ и озаря́ют всех мы́сли светолу́чными свои́ми сия́нии.

Просте́р, тве́рдым реме́нем безу́мный стру́жает неща́дно, ураня́я непреста́нно,/ но не поколеба́ сих по́мысла, е́же па́че сло́ва тве́рдость.

Богоро́дичен: Херуви́мов и Серафи́мов превы́шши яви́лася еси́, Богоро́дице:/ Ты бо еди́на прия́ла еси́ Невмести́маго Бо́га в Твое́м чре́ве, Нескве́рная./ Те́мже Тя, ве́рнии вси, пе́сньми, Чи́стая, ублажа́ем.

Седа́лен, глас 4.

Подо́бен: Ско́ро предвари́:

Воздержа́нием пе́рвее предочи́стив ду́шу,/ страда́нием второ́е и соверше́нным умо́м Бо́гу угоди́л еси́, святи́тель и му́ченик быв, Богоно́се./ Собо́р же приве́л еси́ учени́к Влады́це,/ с ни́миже о нас моли́ся приле́жно, сла́вне.

Сла́ва, и ны́не, Богоро́дичен:

Чи́стая, Всенепоро́чная и Неискусому́жная,/ Я́же еди́на Безле́тнаго Сы́на и Сло́ва Бо́жия в ле́то ро́ждши,/ Сего́ со святы́ми и честны́ми патриа́рхи и му́ченики, и проро́ки, и преподо́бными моли́/ дарова́ти нам очище́ние и ве́лию ми́лость.

Крестобогоро́дичен:

Де́во Пренепоро́чная, Ма́ти Христа́ Бо́га,/ ору́жие про́йде Твою́ пресвяту́ю ду́шу,/ егда́ распина́ема ви́дела еси́ во́лею Сы́на и Бо́га Твоего́,/ Его́же, Благослове́нная, моля́щи не преста́й проще́ние прегреше́ний нам дарова́ти.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Ума́ вся́каго превы́шши Боже́ственными мечта́еми восхожде́нии,/ плотски́х не убоя́шася го́рьких ран, Богому́дрии.

Христопропове́дник Богоприя́тен и священному́ченик непоро́чен быв,/ сподо́бися Афиноге́н Боже́ственныя благода́ти.

Вети́йствующе му́ченицы воплоще́ние Сло́ва,/ претерпе́сте ра́ны и смерть, к безсме́ртию преше́дше.

Богоро́дичен: Равноси́льна, сопресто́льна Роди́телю,/ Пресу́щнаго воплоти́ла еси́, Пренепоро́чная,/ земны́м за милосе́рдие приобщи́вшагося.

Песнь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Загради́в безстра́стием мудрова́ние пло́ти твоей,/ страсть изобрази́л еси́ Безстра́стнаго, досточу́дне.

Боже́ственными предповеле́нии/ приведе́ Влады́це ученико́в лик Афиноге́н сла́вный.

Све́тлу сотвори́ па́мять твою́, му́чениче, Светода́вец,/ исполня́я проше́ния твоя́ к тем, и́же ве́рою тебе́ притека́ющим.

Богоро́дичен: Ма́терь и Де́ву ве́дуще Тя, Пресвята́я,/ согла́сно почита́ем и благоче́стно ублажа́ем.

Песнь 6

Ирмо́с: Очи́сти мя, Спа́се,/ мно́га бо беззако́ния мои́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Благозва́ние му́ченическое Афиноге́н получи́,/ и с ним ученико́в лик венча́ся,/ пости́вся пе́рвее и де́монския побе́ждь ко́зни.

Све́тлу содева́ет твою́ честну́ю па́мять Влады́ка Христо́с,/ исполня́я твоя́ я́же к Нему́ моле́ния, блаже́нне:/ се бо еле́нь свое́ тебе́ исча́дие приво́дит Боже́ственным манове́нием.

Рай мы́сленный яви́лся еси́, достосла́вне, и́же дре́во жи́зни посреди́ име́я,/ и Боже́ственных цвето́в благово́нием вся благоуха́еши я́сне.

Богоро́дичен: Я́ко мы́сленный ковче́г, Законода́вца носи́ла еси́,/ я́ко све́щник светоза́рен, Свет породила́ еси́,/ я́ко ко́рень ненапое́н, жи́зни грозд, Богоро́дице, прозябла́ еси́.

Конда́к, глас 4.

Подо́бен: Вознесы́йся:

Влады́чню рече́нию после́довав, я́ко па́стырь изря́дный/ ду́шу твою́ положи́л еси́ за Христо́вы о́вцы, священному́чениче Афиноге́не,/ сего́ ра́ди восхваля́ем тя/ и с тобо́ю десяти́ну учени́к твои́х,/ и́же пострада́ша, стра́хом Бо́жиим и твои́м уче́нием наставля́еми./ Тем угоди́вших Влады́ка венча́ вас живонача́льною десни́цею,/ Его́же о всех нас моли́те.

Песнь 7

Ирмо́с: Халде́йская пещь, огне́м распала́емая,/ ороша́шеся Ду́хом, Бо́жиим предстоя́нием,/ о́троцы поя́ху:/ благослове́н еси́, Бо́же оте́ц на́ших.

То́ками крове́й твои́х пре́лести угаси́в пла́мень,/ огне́м по́двиг твои́х попали́л еси́ вещь зло́бы, блаже́нне,/ благослове́н, – вопия́, – Бог оте́ц на́ших.

Пло́ти взыгра́ния воздержа́ния боле́зньми/ и пре́лести служе́ния кро́вными ту́чами потре́бльше, му́ченицы,/ я́ко во́ини Христо́вы, да восхва́лятся.

Глав отсече́нием беззако́нных повеле́нием,/ и пло́ти строга́нием, и многообра́зными му́ками,/ я́ко столпи́ непрекло́нни, не поколеба́стеся, преподобному́ченицы.

Богоро́дичен: Изба́вльшеся, Пренепоро́чная, Тебе́ ра́ди пе́рваго прароди́тельнаго паде́ния,/ ра́дуйся, Тебе́ вопие́м и ве́рою сла́вим Тобо́ю нас от тли Изба́вльшаго.

Песнь 8

Ирмо́с: Богоглаго́ливии о́троцы, в пещи́/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.

Взира́я к Боже́ственным светозаре́нием,/ и́дольския ле́сти Афиноге́н разори́ глубо́кую тьму,/ и свет был есть.

А́нгельский лик и му́ченик, святи́телей и преподо́бных/ в па́мяти веселя́тся честны́х страстоте́рпец, сла́вяще Го́спода.

Приче́лся еси́ му́ченическим стадо́м со ученики́ десятьми́,/ на муче́ние иды́й, святи́телю,/ с ни́миже тя ве́рно ублажа́ем.

Богоро́дичен: Его́же породила́ еси́ Сло́ва па́че сло́ва, Богороди́тельнице Мари́е,/ о нас моли́, ве́рно Тя пою́щих и ублажа́ющих, Пречи́стая.

Песнь 9

Ирмо́с: Проявле́нное на горе́ законополо́жнику во огни́ и купине́/ Рождество́ Присноде́вы/ в на́ше, ве́рных, спасе́ние/ пе́сньми немо́лчными велича́ем.

Се светоза́рный день днесь му́ченик, облиста́ющ благода́тию/ и Боже́ственными светлостьми́ озара́ющ ве́рных сердца́,/ прииди́те, просвеще́ние почерпе́м.

Я́гоже приноше́ния чи́стая/ и непоро́нии а́гнцы, приведо́стеся, му́ченицы, нас ра́ди Закла́вшемуся,/ от Него́ венцы́ побе́ды, я́ко от Подвигополо́жника, прие́мше.

Ка́плют сла́дость твоя́, страда́льче, боле́зни и го́ресть вся́ку страсте́й отго́нят,/ ве́рою хра́му твоему́ притека́ющим и па́мять твою́ пра́зднующим спаси́тельную.

Богоро́дичен: Но́сиши на руку́ Бо́га, нося́щаго вся́ческая,/ пита́еши Пита́теля, Чи́стая, нам уподо́бльшася,/ Его́же моли́ лю́дем Твои́м дарова́ти всех лю́тых избавле́ние.

Слу́жбу сей ико́не, кроме́ тропаря́ и кондака́, пое́м по слу́жбе Миро́жской ико́не Пресвяты́я Богоро́дицы (зри Мине́я-Сентя́брь, М., 1978, 24-й день.)

Тропа́рь, глас 4:

Я́ко необори́мую сте́ну и исто́чник чуде́с,/ стяжа́вше Тя, раби́ Твои́,/ Богоро́дице Пречи́стая,/ сопроти́вных ополче́ния низлага́ем./ Те́мже мо́лим Тя:/ мир гра́ду Твоему́ да́руй/ и душа́м на́шим ве́лию ми́лость.

Конда́к, глас то́йже:

Подо́бен: Яви́лся еси́ днесь:

Честна́го о́браза Твоего́ зна́мение пра́зднующе,/ лю́дие Твои́, Богороди́тельнице,/ и́мже ди́вную побе́ду на сопроти́вныя гра́ду Твоему́ дарова́ла еси́,/ те́мже Тебе́ ве́рою взыва́ем:/ ра́дуйся, Де́во, христиа́н похвало́.

В неделю ближаишую к 16 июля

Ве́стно бу́ди, я́ко в сий 16-й день, а́ще случи́тся неде́ля, слу́жба пое́тся святы́х оте́ц в сию́ неде́лю; а́ще же в сре́ду или́ вто́рник, пое́тся слу́жба их в мимоше́дшую неде́лю; а́ще же в четверто́к, пое́тся слу́жба их в прииду́щую неде́лю. Па́мять соверша́ем святы́х Вселе́нских Шести́ Собо́ров; прилучи́вшагося же свята́го пое́м на повече́рии.

В суббо́ту на ма́лой вече́рни стихи́ры воскре́сны и Богоро́дице, по обы́чаю.

По обы́чном псалме́ пое́м: Блаже́н муж: кафи́зму всю. На Го́споди, воззва́х: стихи́ры воскре́сны 4 и отце́в 6, глас 6.

Из чре́ва роди́лся еси́ пре́жде денни́цы,/ от Отца́ безма́терен пре́жде век;/ а́ще и А́рий тварь Тя, а не Бо́га сла́вит,/ де́рзостию смеша́я Тя, Зижди́теля, тва́рем безу́мно,/ вещество́ огня́ ве́чнаго себе́ сокро́вщуствуяй./ Но Собо́р, и́же в Нике́и,/ Сы́на Бо́жия Тя пропове́да, Го́споди,/ Отцу́ и Ду́ху сопресто́льна.

Раздра́нную Христо́ву ри́зу/ и растерза́нную пе́сиими че́люстьми/ му́дре сши́сте, честни́и отцы́,/ зре́ти наготу́ Сего́ ника́коже терпя́ще,/ я́коже Сим и Иа́феф оте́ческую дре́вле,/ посрами́сте несмы́сленнаго/ и того́ единомы́сленники,/ А́рия, гне́ву тезоимени́таго.

Македо́няны, и несториа́ны,/ и евтихи́аны, и диоско́ряны,/ аполлинариа́ны же, и савеллиа́ны, и севи́ряны,/ во́лки тя́жкия, прише́дшия в ко́жах о́вчиих,/ дале́че от ста́да Спа́сова/ я́коже и́стиннии па́стырие отгна́сте,/ на́ги от кож о́вчиих треокая́нныя поста́вльше изря́дне./ Те́мже вы ублажа́ем.

Сла́ва, глас 6. Самогла́сен:

Та́йныя днесь Ду́ха трубы́,/ Богоно́сныя отцы́, восхва́лим,/ воспе́вшия посреде́ Це́ркве/ песнь сли́чную Богосло́вия,/ Тро́ицу Еди́ну непреме́нную,/ Существо́ же и Божество́,/ низложи́тели А́риевы/ и правосла́вных побо́рники,/ моля́щияся всегда́ Го́сподеви/ поми́ловатися душа́м на́шим.

И ны́не, Богоро́дичен пе́рвый, гла́са. Вход. Проки́мен дне. Чте́ния три.

Бытия́ чте́ние (глава́ 14):

Слы́шав Авра́м, я́ко плене́н бысть Лот, брата́нич его́,/ сочте́ свои́х си домоча́дец, три́ста и осмьна́десять,/ и погна́ во след их да́же до Да́на,/ и нападе́ на ня но́щию, сам и о́троцы его́ с ним,/ и порази́ их, и гони́ их до Хова́ла,/ е́же есть ошу́юю Дама́ска./ И возврати́ вся́каго коня́ Содо́мскаго, и Ло́та брата́нича своего́ возврати́,/ и вся име́ния его́, и жены́, и лю́ди./ Изы́де же царь Содо́мский во сре́тение ему́,/ повнегда́ возврати́тися ему́ от се́ча Ходологомо́рскаго,/ и с царьми́, иже с ним, во удо́ль Са́вин:/ сие́ же бя́ше по́ле царе́во./ И Мелхиседе́к, царь Сали́мский, изнесе́ хле́бы и вино́,/ бя́ше же свяще́нник Бо́га Вы́шняго./ И благослови́ Авра́ма, и рече́:/ благослове́н Авра́м Бо́гом Вы́шним,/ Иже созда́ не́бо и зе́млю,/ и благослове́н Бог Вы́шний,/ Иже предаде́ враги́ твоя́ под ру́ки тебе́.

Втора́го зако́на чте́ние (глава́ 1):

Во днех о́нех рече́ Моисе́й к сыно́м Изра́илевым:/ ви́дите, преда́х пред лице́м ва́шим зе́млю,/ вше́дше, насле́дуйте зе́млю, ю́же кля́тся Госпо́дь отце́м ва́шим,/ Авраа́му, и Исаа́ку, и Иа́кову, да́ти им и се́мени их по них./ И реко́х к вам во вре́мя оно, глаго́ля:/ не возмогу́ еди́н води́ти вас./ Госпо́дь Бог наш умно́жил вы есть,/ и се есте́ днесь, я́ко зве́зды небе́сныя мно́жеством,/ Госпо́дь Бог оте́ц на́ших да приложи́т вам, я́ко да бу́дете ты́сящами сугу́бо,/ и да благослови́т вас, я́коже глаго́ла вам./ И взях от вас му́жи му́дры, и све́домы, и смы́сленны,/ и поста́вих их владе́ти над ва́ми,/ тысященача́льники, и стонача́льники, и пятдесятонача́льники, и десятонача́льники,/ и письмовводи́тели судия́м ва́шим,/ и запове́дах судия́м ва́шим во вре́мя о́но, глаго́ля:/ разслу́шайте посреде́ бра́тий ва́ших и суди́те пра́ведно посреде́ му́жа,/ и посреде́ бра́та его́, и посреде́ прише́льца его́./ Да не позна́ете лица́ в суде́,/ ма́лому и вели́кому су́диши,/ и не устыди́шися лица́ челове́ческа,/ я́ко суд Бо́жий есть.

Втора́го зако́на чте́ние (глава́ 10):

Во днех о́нех рече́ Моисе́й к сыно́м Изра́илевым:/ се Го́спода Бо́га твоего́ не́бо и не́бо небесе́,/ земля́ и вся, ели́ка суть на ней./ Оба́че отцы́ ва́ша произво́ли Госпо́дь люби́ти я/ и избра́ се́мя их по них, вас, па́че всех язы́к, в день сей./ И обре́жите жестосе́рдие ва́ше/ и вы́я ва́ша не ожесточи́те ктому́./ И́бо Госпо́дь Бог наш, Сей Бог бого́в и Госпо́дь господе́й,/ Бог вели́кий, и кре́пкий, и стра́шный,/ И́же не диви́тся лицу́, ниже́ взе́млет дар./ Творя́й суд прише́льцу, и сироте́, и вдове́,/ и лю́бит прише́льца, да́ти ему́ хлеб и ри́зу./ И возлюби́те прише́льца, прише́льцы бо бе́сте в земли́ еги́петстей./ Го́спода Бо́га твоего́ да убои́шися, и Тому́ еди́ному послу́жиши,/ и к Нему́ прилепи́шися, и и́менем Его́ клене́шися./ Той хвала́ твоя́, и Той Бог твой,/ И́же сотвори́ тебе́ вели́кая и сла́вная сия́,/ я́же ви́деста о́чи твои́.

На лити́и стихи́ра хра́ма. Сла́ва, глас 3:

Апо́стольских преда́ний/ изве́стнии храни́телие бы́сте, святи́и отцы́,/ Святы́я бо Тро́ицы единосу́щное правосла́вно пропове́давше,/ А́риево хуле́ние собо́рне низложи́сте,/ с ни́мже и Македо́ния духобо́рца обличи́вше,/ осуди́сте Несто́рия,/ Евти́хия и Диоско́ра,/ Саве́ллия же и Севи́ра безгла́внаго./ И́хже пре́лести испроси́те изба́витися нам/ и нескве́рну на́шему житию́/ в ве́ре сохрани́тися, мо́лимся.

И ны́не, Богоро́дичен: Без се́мене от Боже́ственнаго:

На стихо́вне Окто́иха. Сла́ва, глас 4:

Моле́бную па́мять днесь Богоно́сных отце́в,/ от всея́ вселе́нныя собра́вшихся/ во све́тлем гра́де Нике́йстем,/ правосла́вных собра́ния,/ благоче́ствующе ве́рно, пра́зднуем./ Си́и бо лю́таго А́рия безбо́жное веле́ние благочестному́дренне низложи́ша,/ и от Собо́рныя Це́ркве собо́рне того́ изгна́ша,/ и я́сно Сы́на Бо́жия Единосу́щна и Соприсносу́щна,/ пре́жде век Су́ща,/ всех научи́ша испове́дати во изображе́нии ве́ры,/ изве́стно и благоче́стно сие́ изложи́вше./ Те́мже и мы, Боже́ственным их повеле́нием после́дствующе,/ изве́стно ве́рующе, слу́жим/ со Отце́м Сы́ну и Ду́ху Всесвято́му во Еди́ном Божестве́,/ Тро́ице Единосу́щней.

И ны́не, Богоро́дичен: При́зри на моле́ния:

На благослове́нии хле́бов тропа́рь: Богоро́дице Де́во: два́жды.

И отце́в, глас 8:

Препросла́влен еси́, Христе́ Бо́же наш,/ свети́ла на земли́ отцы́ на́ша основа́вый/ и те́ми ко и́стинней ве́ре вся ны наста́вивый,/ Многоблагоутро́бне, сла́ва Тебе́. (Еди́ножды).

НА У́ТРЕНИ

На Бог Госпо́дь: тропа́рь воскре́сный, два́жды. Сла́ва, отце́в. И ны́не, Богоро́дичен: И́же нас ра́ди рожде́йся: По кафи́змах седа́льны Окто́иха.

Кано́н воскре́сный со ирмосо́м на 4, и Богоро́дицы на 2, и отце́в на 8. Творе́ние свяще́ннаго и вселе́нскаго Патриа́рха кир Ге́рмана, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по́ бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

И́же от Нике́и, я́коже от не́коего небесе́,/ всю́ду возгреме́вше Сло́во Жива́го Отца́ и Сего́ показа́вше враги́, гро́мом избие́ны,/ свяще́нными словесы́ да почту́тся.

Духобо́рцев дух лука́вый Святы́м Ду́хом Христо́с от Своея́ Це́ркве дале́че отгна́,/ вторы́м де́йством Собо́ра совокупи́в.

Христобо́рца пре́лесть изгна́ Несто́рия Кири́лл, Собо́ра нача́льник,/ и́же я́сно Де́ву Мари́ю испове́да, Бо́гу Ма́терь Чи́стую.

Богоро́дичен: Несозда́нныя Тро́ицы Еди́наго Христа́ во двою́ естеству́ и хоте́нию, Чи́стая, ражда́еши,/ соедине́ние челове́ком и А́нгелом Тебе́ ра́ди соде́лавшаго.

Други́й кано́н святы́х отце́в, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Оте́ц благочести́вое собра́ние, сте́кшееся иногда́ на Евти́ха,/ вои́стинну Спа́са пропове́да в неразде́льных естества́х сугу́бых,/ Боже́ственнаго отца́ Кири́лла уче́нием ше́ствующее я́ве и пребыва́ющее.

Число́ шестьсо́т тридеся́тое благочести́вейших муже́й,/ Евти́хову пре́лесть и Севи́рову е́ресь низло́жше,/ достиго́ша воспе́ти си́це:/ Христа́ во двою́ существу́ пропове́дуем,/ ше́ствующе рече́нием Кири́лла блаже́ннаго.

И́же не пропове́дует во двою́ естеству́ и де́йствиих Христа́, Сло́во Отчее,/ прии́мет ана́фему,/ четве́ртый бо Собо́р святы́х оте́ц единому́дренно си́це пропове́да./ Вси у́бо их да ублажи́м.

Богоро́дичен: Пресла́вная о Тебе́ возглаго́лашася в ро́дех родо́в,/ Я́же Бо́га Сло́ва во чре́ве вмести́вшая, чиста́ же пребы́вши, Богоро́дице Мари́е,/ тем Тя вси почита́ем, по Бо́зе Предста́тельницу на́шу.

Катава́сия: Отве́рзу уста́ моя́:

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Тва́ри служи́тель я́влься А́рий безу́мный,/ и Македо́ний па́ки ме́рзок я́влься,/ в гее́нне о́гненней ра́вно му́чатся со е́ллины.

Седмию́ Собо́ры свяще́нными святы́х оте́ц/ честну́ю Це́рковь уясни́л еси́, Христе́,/ я́коже седми́х свети́льник све́том пре́лести тьму прогна́в дале́че.

Ста́до Твое́, Сло́ве, погубля́ет многообра́зная кра́ста ерети́к,/ па́стырие же Твои́х слове́сных ове́ц уче́нием сие́ премени́ша.

Богоро́дичен: Еди́наго родила́ еси́, Пречи́стая,/ от Несозда́нныя Тро́ицы во двою́ существу́ и хоте́нию,/ Его́же о́бразу честно́му покланя́емся, благода́ти исполня́еми.

Ин

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́,/ Еди́не Человеколю́бче.

И́же Севи́ра безсту́дно прекло́ншеся словесе́м, я́да смертото́чнаго испо́лненным,/ посрами́теся при́сно, отлуча́ющеся вси Це́ркве,/ я́коже во́лцы и пси хи́щнии.

Лико́вственницы и ве́рнии, Вседе́теля и Спа́са/ во двою́ неразде́льных существа́х и хоте́ниих сугу́бых и де́йствиих почита́ем,/ те́мже Севи́ра пре́лести вконе́ц отвраща́емся.

Прииди́те, Севи́ра и Иа́кова неблагополу́чных пре́лесть,/ с си́ми Феодо́сия, Диоско́ра отме́щем я́ве,/ четве́ртый же Собо́р благочести́вых оте́ц воспое́м пе́сньми Боже́ственными.

Богоро́дичен: Херуви́м и Серафи́м яви́лася еси́ вы́шши, Богоро́дице:/ Ты бо еди́на прия́ла еси́ Невмести́маго Бо́га во Твое́м чре́ве, Нескве́рная./ Те́мже Тя, вси ве́рнии, пе́сньми, Чи́стая, ублажа́ем.

Конда́к и и́кос воскре́сный, та́же седа́лен отце́в, глас 4.

Подо́бен: Ско́ро предвари́:

Свети́льницы пресве́тлии и́стины Христо́вы ми́ру яви́стеся на земли́,/ вои́стинну блаже́ннейшии, отцы́ Боговеща́ннии,/ изсуши́вше е́реси ху́льных языковре́дий/ и угаси́вше пламенови́дная злосла́вных смуще́ния:/ те́мже, я́ко святи́телие Христо́вы, моли́теся спасти́ся нам.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к животу́ нетле́ния./ Те́мже Тя по до́лгу блажи́м вси, Де́во Препросла́вленная, я́коже прорекла́ еси́.

Песнь 4

Ирмо́с: Христо́с моя́ си́ла,/ Бог и Госпо́дь, честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Врази́ Твои́ возшуме́ша, и ненави́дящии Тя главу́ воздвиго́ша, Спа́се, вма́ле,/ но а́бие падо́ша, не терпя́ще гла́са труб духо́вных.

Со́лнца Со́лнцы сугу́бо озари́ша,/ Сын и Дух от Отца́, несозда́ни, Собезнача́льни:/ Обои́м Оте́ц Еди́н вино́вен ве́руется.

Седмь у́бо духо́в, и́же почи́ша на Христе́, Иса́ия сие́ рече́,/ на седми́х же Собо́рех почи́ Христо́с со Отце́м и Боже́ственным Ду́хом.

Богоро́дичен: Бо́га родила́ еси́, плоть носи́вшаго,/ от чи́стых Твои́х крове́й, Отрокови́це Чи́стая,/ Его́же, сугу́ба естество́м, во Ипоста́си же еди́ней, отцы́ пропове́даша.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Рцы нам, безу́мный Севи́ре и су́етный:/ еди́но естество́ сло́жно безнача́льно, свет Сло́во О́тчее и Сы́на?/ А́ще бо си́це рече́ши, и друго́е естество́ знамена́л еси́:/ плоть бо и Сло́во, не еди́но существо́, но сугу́бо су́щее, окая́нне.

Еди́но ре́кши естество́ Сло́ва, наведе́ вопло́щшееся естество́ челове́чества,/ кроме́ измене́ния вся́чески и смеше́ния,/ александри́ом учи́тель же и председа́тель,/ я́сно два естества́ и хоте́ния науча́я правосла́вно му́дрствовати хотя́щих.

Два естества́ Христо́ва вси пропове́даем неслия́нно,/ вся́кое нече́стие Евти́хия, ве́рнии, а́бие и Диоско́ра безу́мнаго попира́юще,/ после́дуем преде́лу святы́х оте́ц и Кири́лла Боже́ственнаго рече́нием.

Богоро́дичен: Херуви́мское носи́ло Ты, Богома́ти Чи́стая,/ Ты вмести́лище, Ты и прия́телище Сло́ва О́тча и Бо́га,/ от пречи́стых ложе́сн в плоть обле́кшагося./ Те́мже, во двою́ существу́ из Тебе́ Вопло́щшемуся покланя́ющеся, непреста́нно сла́вим.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиииаго Бо́га,/ от мра́ка грехо́внаго взыва́юща.

Боже́ственный виногра́д Христо́в, и́же от Еги́пта пренесе́н,/ те́мнаго отча́янна губи́теля зве́рие пе́рвее пояда́ху,/ пра́щею же святы́х оте́ц дале́че отгна́шася.

Боже́ственным сия́нием трисия́нным ум просве́щше,/ честни́и отцы́ Еди́наго пропове́даша Честны́я Тро́ицы Христа́ Го́спода,/ сугу́ба естествы́ и хоте́нии.

Тро́ичен: В ве́щных, я́коже в серафи́мских, му́дрыми отцы́, о Тро́ице,/ Це́рковь онебеси́ся, Трисвяту́ю песнь при́сно Тебе́ пою́щи,/ собира́ет Тро́ическое Твое́ Еди́но Божество́.

Богоро́дичен: Ма́ти и раба́ Твоего́ Сы́на была́ еси́, Чи́стая,/ и́бо И́же из Тебе́ пре́жде Тебе́ бя́ше, я́ко Соде́тель Твой,/ Его́же во двою́ существу́ познава́ем и соединя́ем Сло́вом Ипоста́сным.

Ин

Ирмо́с: Вску́ю мя отри́нул еси́/ от лица́ Твоего́, Свете Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

О Севи́ре! Есте́ств Христо́вых не слива́й лю́те, законопресту́пне,/ и́бо жри́телие и преблаже́ннии учи́телие вси,/ во двою́ существу́ и во Еди́ном Христо́вом Лице́ провозвести́вше, всем изложи́ша.

Прия́т естество́ челове́ческое я́ве Безнача́льный, Отчее Сло́во,/ я́ко Человеколю́бец, хотя́ уще́дрити нас, поги́бших./ Те́мже Того́ пропове́дую во двою́ существу́ и хоте́нию.

Низложи́в Севи́ра четве́ртый Собо́р и Диоско́ра, Христа́ ху́лящия,/ извеща́я сви́ток Лео́нта, первоседа́льника Ри́мскаго, зело́ до́бре,/ сугу́ба естества́ Спа́сова несеко́мо явля́я.

Богоро́дичен: Ма́тернее дерзнове́ние, е́же к Сы́ну Твоему́ иму́щи, Всечи́стая,/ сро́днаго промышле́ния, е́же о нас, не пре́зри, мо́лимся,/ я́ко Тебе́ и еди́ну, христиа́не, ко Влады́це очище́ние ми́лостивно предлага́ем.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Бог бого́в Госпо́дь, – Дави́д, пре́жде воспе́в, глаго́ла/ и призва́ от восто́к, от коне́ц всея́ земли́, да́же до за́пад их,/ Вселе́нския Собо́ры оте́ц назна́менуя.

Седмь столпо́в утверди́ прему́дрость Бо́жия,/ Твою́ Це́рковь, Влады́ко, седмочи́сленными Собо́ры свяще́нных оте́ц/ неукло́нну соблюда́ему от вся́ких ересе́й.

Стыд лица́ да покры́ет Евти́хия и Диоско́ра, слия́ние буесло́вивших естества́ Христо́ва:/ не в привиде́нии бо, но во обоже́нии естество́ земноро́дных прия́т.

Богоро́дичен: Да во́змется Несто́рий во евре́йския те́мныя собо́ры,/ и язы́к же отсече́тся ху́льный:/ Бо́га бо роди́ Де́ва Мари́я, Плотоно́сца нам.

Ин

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Два посла́ния Кири́лла, я́же ко Си́нгелу по́сланная иногда́,/ восто́ку преоблада́ющу, облича́ют Севи́рову всю пре́лесть,/ благоче́стно Христа́ пропове́дующая.

Кири́лл Христа́ пропове́дует во двою́ естеству́ и де́йствиих сугу́бых,/ Севи́ра несмы́сленнаго е́ресь отсеца́я./ Те́мже вси во уче́ниих того́ пребу́дем.

Богоро́дичен: Де́ву Тя и Чи́стую Пресла́вную, Богороди́тельнице Мари́е,/ благочести́вии, вои́стинну пропове́дуем,/ загражда́юще безсту́дная уста́ Несто́рия и Диоско́ра зломы́слие.

Конда́к, глас 8.

Подо́бен: Я́ко нача́тки:

Апо́стол пропове́дание и оте́ц догма́ты/ Це́ркве еди́ну ве́ру запечатле́ша,/ я́же и ри́зу нося́щи и́стины, истка́нну от е́же свы́ше Богосло́вия,/ исправля́ет и сла́вит благоче́стия вели́кое та́инство.

И́кос:

Высо́ким пропове́данием Бо́жию Це́рковь услы́шим, вопию́щу:/ жа́ждай, да гряде́т ко мне и пие́т ча́шу, ю́же держу́,/ ча́ша есть прему́дрости./ Сие́ питие́ и́стины сло́вом почерпо́х, во́ду пролива́ющую не прекосло́вия,/ но испове́дания, ю́же пия́, ны́нешний Изра́иль Бо́га зрит, веща́юща:/ ви́дите, ви́дите, я́ко Сам Аз есмь и не пременя́юся:/ Аз Бог пе́рвый, Аз же и по сих, и ра́зве Мене́, несть ино́го отню́д./ Отсю́ду причаща́ющиися насы́тятся/ и восхва́лят благоче́стия вели́кое та́инство.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Вавило́нскаго у́бо зми́я разрази́ Дании́л пе́рвее,/ моли́твами же оте́ц прося́деся лю́тый еги́петский змий,/ я́ве А́рий, пояда́ющий Христо́во ста́до.

Непроще́ным нече́стием негодова́ волк Македо́ний,/ прирази́вся Ду́ху, обожа́ющему челове́ки/ и вся ба́нею Креще́ния на пе́рвую добро́ту вообража́ющу ве́рныя.

Диоско́р, и Евти́х, и Севи́р Левиафа́м,/ трие́, слива́ющии и смеша́ющии Христо́ва существа́ смеше́нием у́мным,/ к Тро́ице Честне́й прирази́шася де́рзостию.

Богоро́дичен: Плотска́го Твоего́ зра́ка о́браз, Влады́ко, че́стно облобыза́ем,/ и Ма́тере Твоея́, и святы́х всех,/ по́честь ве́дяще пра́вым по́мыслом преходи́ти до́бре к первообра́зному.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тннце, лику́юще, поя́ху:/ благослове́н еси́, Бо́же оте́ц на́ших.

Во двою́ у́бо естеству́ и де́йствиях испове́дающе Христа́,/ несли́тне, непрело́жне, пре́лесть Севи́ра побежда́ем,/ те́мже, пло́ти прия́тием страсть претерпе́вшему, вопие́м Ему́:/ благослове́н Бог оте́ц на́ших.

Еди́наго разуме́ем, И́же на дре́ве и в не́дрех Оте́ческих,/ я́ко Бо́га в Вы́шних и во гро́бе, я́ко совокупле́нна пло́тию./ Ему́же пое́м, согла́сно взыва́юще:/ благослове́н еси́, Бо́же оте́ц на́ших.

А́риево истоща́ние, пресече́ние же, Бо́га умаля́ющаго, ве́рнии,/ соединомы́слие а́бие Саве́ллиево,/ Тро́ическия враги́ возненави́девше, Тро́ице возопие́м:/ благослове́н Бог оте́ц на́ших.

Тро́ичен: Всех у́бо Госпо́дь, Еди́наго же то́чию Единоро́днаго Сы́на,/ правосла́вно Отца́ богосло́вяще, Тя возвеща́ем,/ и Еди́н ве́дяще Твой исходя́щий Дух, прав, сра́слен и Соприсносу́щен.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твориши, Христе́, то́кмо е́же хоте́ти./ Тя превозно́сим во вся ве́ки.

Я́коже еди́наго ко́рене о́трасли Богоса́дны, Сын и Дух возсия́вше:/ и́бо Оте́ц Единовино́вен есть, Безле́тный, Безле́тным Ли́цам Единоче́стен.

Из чре́ва невеще́ственна безле́тно возсия́л еси́,/ Единосу́щное Сло́во Отцу́ и Ду́ху,/ но нас ра́ди в ле́тнюю всели́ся веще́ственную утро́бу еди́ныя Богоро́дицы.

Разжже́нныя стре́лы огне́м духо́вным/ в студе́ная сердца́ враго́в вонзо́шася еретико́в и на смерть удави́ша их/ совокупле́нии оте́ц седмочи́сленных и Боже́ственных.

Богоро́дичен: Не ли́цы Еди́наго Христа́ сла́вим, не смеше́нием существа́ Сего́ соединя́ем:/ Еди́н бо Сый и То́йже Лице́м, раздвоя́ется естествы́,/ Де́во, Твой Сы́на и Соде́тель.

Ин

Ирмо́с: Седмери́цею пещь/ халде́нский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Избави́телю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Да постыдя́тся ли́ца, и да заградя́тся уста́,/ не пропове́дающих во двою́ естеству́/ несеко́мо, непрело́жно же и несли́тно, Еди́наго Сы́на:/ благочести́вии бо мы прославля́ем,/ и́нако у́бо и и́нако, де́йствовати же и хоте́ти Христу́,/ не у́бо ли́цы, но во двои́х естества́х.

И́же Иа́кова иму́щии Кенто́на назва́ние, того́жде и́мя себе́ напису́ющии, отвеща́йте нам:/ а́ще в назва́нии его́ вы в купе́ли крести́стеся дре́вле?/ Те́мже сих ра́ди благода́ти Христа́ отступи́сте вои́стинну,/ во́лею со лжи́вым сим безсту́дствующе.

В Халкидо́не Собо́р четве́ртый Диоско́ра, Евти́ха же и Севи́ра лю́тых низложи́/ и до конца́ отсече́ терно́вную их пре́лесть,/ слия́тельную суще́ств Спа́совых, от Це́ркве Христа́ и Влады́ки;/ с не́юже правосла́вящии, возненави́дим сих.

Тро́ичен: Трисве́тлую Божества́ еди́нственную сия́ющую зарю́ от Еди́наго Триипоста́снаго Естества́:/ Роди́теля Безнача́льна, сра́слена же Сло́ва О́тча и сца́рствующий Единосу́щный Дух,/ де́ти, благослови́те, свяще́нницы, воспо́йте,/ лю́дие, превозноси́те Его́ во вся ве́ки.

Богоро́дичен: Богороди́тельнице Пречи́стая, души́ моея́ я́звы и грехо́вныя собла́зны очи́сти,/ исто́чником омыва́ющи из ребр Сы́на Твоего́ и и́же из них исте́кшими струя́ми,/ к Тебе́ бо взыва́ю, и к Тебе́ прибега́ю, и Тебе́ призыва́ю, Богоблагода́тную.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Не подоба́ет приложи́ти или́ оста́вити что Свяще́ннаго Преда́ния правосла́вныя на́шея ве́ры:/ в не́йже бо ве́рно крести́хомся,/ а и́же приложи́тели сея́ ве́ры впра́вду пре́дани бу́дут преще́нию прокля́тия.

Ра́достию се́рдца вси взыгра́им, свяще́нныя Собо́ры оте́ц совоку́пльше:/ тех бо ра́ди свет ви́дехом правосла́вия./ Свети́льницы бо яви́шася, вся наставля́юще к пра́вым уче́ния обре́тением.

Душа́м испро́сим очище́ние и благоче́стно житие́ препроводи́ти потщи́мся,/ я́ко да прича́стницы бу́дем святы́м отце́м,/ и́же скры́ша пра́вых уче́ний бога́тство нам, ча́дом их.

Богоро́дичен: Бог от боку́ Твое́ю возсия́, Ма́ти Бо́жия, и челове́ческий род обожи́,/ и сла́вы Своея́ сподо́би, и насле́дники вся показа́,/ и́же Тя Богоро́дицу вои́стинну при́сно пропове́дающия.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Преше́д Севи́р Христо́ву благосла́вную Це́рковь льсти́вый,/ и отмще́ние сове́том оте́ц благочести́вых хуле́ния ра́ди и хитростносло́вия своего́ прия́т пра́ведно,/ и отрева́ется учи́телей сосло́вия, осужде́нный.

Естества́ Христо́ва что́ слива́еши и смеше́ние вво́диши и сли́тие,/ Кре́стную страсть и погребе́ние прилага́яй безстра́стному Божеству́/ Единоро́днаго Сло́ва Бо́жия, о окая́нне Севи́ре?/ Те́мже вели́каго твоего́ хуле́ния гнуша́емся.

Богоро́дичен: Бро́ви и де́рзость вку́пе вражде́бных рожде́йся от Де́вы низложи́/ и сове́ты злосло́вящих Соде́теля,/ ве́рных же Собо́р утверди́ непоколе́блем, я́ко Бог,/ рог вознесы́й и ве́рою укрепи́вый, да Тя вси велича́ем.

Свети́лен.

Подо́бен: Жены́, услы́шите:

Оте́ц Боже́ственных днесь пя́мять пра́зднующе, моле́ньми тех мо́лим, Всеще́дре:/ вся́каго вре́да ересе́й изба́ви люди Твоя́, Го́споди,/ и вся сподо́би Отца́, Сло́во сла́вити и Всесвята́го Ду́ха.

Богоро́дичен. Подо́бен:

Ра́дуйся, Бо́жия пала́то./ Ра́дуйся, горо́ присе́нная./ Ра́дуйся, Неопали́мая купино́./ Ра́дуйся, престо́ле сла́вы./ Ра́дуйся, Боже́ственная трапе́зо./ Ра́дуйся, ру́чко всезла́тая./ Ра́дуйся, свети́льниче всесве́тлый./ Ра́дуйся, ле́гкий о́блаче, Де́во Ма́ти Мари́е.

На хвали́тех стихи́ры воскре́сны 4 и отце́в 4, глас 6.

Подо́бен: Все отло́жше:

Все собра́вше душе́вное худо́жество,/ и Боже́ственным Ду́хом сразсмотри́вше,/ Небе́сный и честны́й Симво́л ве́ры/ честни́и отцы́ богопи́санне начерта́ша,/ в не́мже я́вственнейше/ Ро́ждшему Собезнача́льнаго Сло́ва науча́ют/ и всеи́стинно Единосу́щнаго,/ апо́стольским после́дующе я́ве уче́нием,/ благосла́внии и пребога́тии,/ вои́стинну и Богому́дрии.

Стих: Благослове́н еси́, Го́споди, Бо́же оте́ц на́ших,/ и хва́льно и просла́влено И́мя Твое́ во ве́ки.

Все прие́мше, у́мное сия́ние Свята́го Ду́ха,/ преесте́ственное благосло́вие/ кра́ткими глаго́лы и мно́гим ра́зумом/ богодухнове́нно провеща́ша,/ я́ко Христо́вы пропове́дницы,/ Ева́нгельских предста́телие уче́ний, блаже́ннии,/ и благочести́вых преда́ний,/ свы́ше прие́мше сих открове́ние я́ве/ и просве́щшеся, изложи́ша ве́ру Богонауче́нную.

Стих: Собери́те Ему́/ преподо́бныя Его́.

Все собра́вше па́стырское иску́сство/ и я́рость подви́гше ны́не пра́веднейшую,/ отмсти́тельне тя́жкия отгна́ша и па́губныя во́лки,/ пра́щею Ду́ха изве́ргше от церко́внаго исполне́ния,/ па́дшия я́ко к сме́рти/ и я́ко неисце́льно неду́говавшия,/ Боже́ственнии па́стырие,/ я́ко раби́ и́стиннейшии Христо́вы,/ и Боже́ственнаго пропове́дания таи́нницы свяще́ннейшии.

Сла́ва, глас 8. Гео́ргия Никомиди́йскаго:

Святы́х отце́в лик,/ от коне́ц вселе́нныя сте́кшийся,/ Отца́, и Сы́на, и Ду́ха Свята́го/ Еди́но Существо́ научи́ша и естество́/ и та́йну Богосло́вия я́сно преда́ша Це́ркви./ И́хже похваля́юще, ве́рою ублажи́м, глаго́люще:/ о Боже́ственный по́лче,/ Богоглаго́ливии ору́жницы ополче́ния Госпо́дня,/ зве́зды многосве́тлыя мы́сленныя тве́рди,/ таи́нственнаго Сио́на необори́мии столпи́,/ миродохнове́ннии цве́ти ра́йстии,/ всезлата́я уста́ Сло́ва,/ нике́йская похвало́, вселе́нныя украше́ние,/ приле́жно моли́теся о душа́х на́ших.

И ны́не: Преблагослове́нна еси́, Богоро́дице Де́во: Славосло́вие вели́кое.

По трисвято́м тропа́рь воскре́сный то́чию: Ектении́. И отпу́ст. И оглаше́ние Студи́тово. И исхожде́ние в притво́р. Сла́ва, и ны́не, стихи́ра Ева́нгельская. И час 1-й. И коне́чный отпу́ст. На часе́х тропа́рь воскре́сный: Сла́ва, отце́в: И ны́не, Богоро́дичен часо́в. По Отче наш: конда́к воскре́сный.

НА ЛИТУРГИ́И

Блаже́нны Окто́иха на 6 и отце́в песнь 3-я, на 4. По входе тропа́рь воскре́сный и отце́в. Та́же конда́к воскре́сный: Сла́ва, отце́в. И ны́не, хра́ма Богоро́дицы, или́ Предстательство христиа́н: Проки́мен гла́са. И отце́в песнь глас 4: Благослове́н еси́, Го́споди Бо́же оте́ц на́ших,/ и хва́льно и просла́влено И́мя Твое́ во ве́ки. Апо́стол дне. И отце́в, ко Евре́ем, зача́ло 334. Аллилу́ия, гла́са. И отце́в, глас 1: Бог бого́в Госпо́дь глаго́ла: Стих: Собери́те Ему́ преподо́бныя Его́. Ева́нгелие дне. И отце́в, от Иоа́нна, зача́ло 56. Прича́стен: Хвали́те Го́спода с Небе́с: И отце́в: Ра́дуйтеся, пра́веднии, о Го́споде: