На Малой Вече́рни

На Го́споди, воззва́х: стихи́ры, глас 2:

Уте́шительница Блага́я/ яви́лася еси́ ве́рному рабу́ Своему́,/ преподо́бному Иоа́нну Дамаски́ну,/ пода́ждь утеше́ние и нам, рабо́м Твои́м,/ и спаси́ нас моли́твами Твои́ми. к ны Твоея́ чуде́сным прише́ствием/ яви́ла еси́ Твое́ к нам благоволе́ние,/ те́мже Афо́н ра́дуется,/ оби́тель Хиланда́рская ликовству́ет,/ с ни́ми же и вся страна́ Се́рбская.

Покрови́тельница Се́рбския земли́/ и помо́щница всегда́ была́ еси́, Богоро́дице,/ наипа́че же оби́тели Хиланда́рския,/ не пре́зри и ны́не моли́твы ве́рных рабо́в Твои́х,/ но всех, хва́лящих Тя, защити́.

Ико́на Твоя́, Богоро́дице, Троеру́чица/ духо́вное врачевство́ всем ве́рным есть,/ к ней же прибега́юще, Тебе́ припа́даем и мо́лимся:/ не забу́ди нас никогда́,/ о Ма́ти на́ша Милосе́рдая.

Сла́ва, и ны́не, глас 1:

Небе́сных чино́в ра́дование/ и на земли́ всех ве́рных весе́лие,/ Защи́тнице всего́ ро́да се́рбскаго,/ его́же избра́ла еси́ в жили́ще Себе́ на земли́,/ два́жды бо оби́тель Се́рбскую учреди́ла еси́/ во оби́тель честны́х ико́н Свои́х:/ Пе́кскую патриархи́ю – первопи́санней,/ Хиланда́р же – Троеру́чице,/ сего́ ра́ди, зря́ще ико́ну Твою́, Тебе́ покланя́емся/ и, благодаря́ще, вопие́м Ти:/ Ма́ти Благода́тная,/ сла́ва Ти и хвала́ во вся ве́ки.

На стихо́вне стихи́ры, глас 3:

Хва́лим Тя, Богоро́дице Пречи́стая,/ я́ко прише́ствием пречестны́я ико́ны Твоея́ Троеру́чицы/ всех нас освяща́еши.

Стих: Воскресни́, Го́споди, в поко́й Твой,/ Ты и Киво́т святы́ни Твоея́.

Прише́ствием ико́ны Твоея́, Всенепоро́чная,/ мно́жеством благода́ти испо́лнихомся,/ сего́ ра́ди восхваля́ем Тя, Ма́ти Безневе́стная.

Стих: Кля́тся Госпо́дь Дави́ду и́стиною/ и не отве́ржется ея́.

Исцеле́ния и цельбы́ оби́льно подаю́тся/ от святы́я ико́ны Твоея́/ всем, с ве́рою приходя́щим к ней,/ ду́шу мою́ и те́ло исцели́,/ еди́на Всепе́тая.

Сла́ва, и ны́не, глас 6:

Гото́вися, оби́тель Хиланда́рская,/ красу́йся, свята́я Горо́ Афо́нская,/ се бо из Се́рбии ше́ствует чу́дная ико́на Богома́тере,/ на осля́ти, ники́мже води́мем, носи́мая,/ прии́де на го́ру Афо́нскую/ ко врато́м оби́тели Хиланда́рския,/ неизрече́нным све́том сия́ющая,/ вся́кий мрак прогоня́ющи/ и всех озаря́ющи луча́ми Своея́ ми́лости.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 2:

Прииди́те, возра́дуемся Присноде́ве/ за мно́гую благосты́ню Ея́,/ прииди́те, поклони́мся Цари́це на́шей Богоро́дице,/ прииди́те, припаде́м и целу́ем ико́ну Ея́ Троеру́чицу,/ я́же по во́ли Всенепоро́чныя Де́вы/ на осля́ти, ники́мже води́мем,/ принесе́на бысть во оби́тель Хиланда́рскую./ Е́йже покланя́ющеся, уми́льно помо́лимся:/ о Всеми́лостивая Покрови́тельнице и Засту́пнице на́ша,/ покры́й нас и заступи́ от всех бед/ и нужд душе́вных и теле́сных/ и да́руй нам житие́ безгре́шно,/ зача́ти и роди́ти плоды́ покая́ния.

Богоро́дице Де́во, Ма́ти Милосе́рдая,/ всех больны́х и печа́льных ско́рое утеше́ние,/ яви́ ми́лость Свою́ и на нас,/ в печа́ли су́щих и во гресе́х пребыва́ющих,/ сердца́ на́ша, неразу́мием омраче́нная,/ благоразу́мием освети́ и льсти тьму разори́.

Достохва́льныя да́ры прино́сят Тебе́ вси ро́ди челове́честии,/ я́ко Цари́це и Ма́тери Бо́жии,/ архиере́е Тя пропове́дают,/ свяще́нницы благословля́ют,/ мона́си и прости́и благогове́ют,/ всяк во́зраст и вся́ко преспе́яние, под кров Твой прибега́ем,/ покры́й и соблюди́ нас моли́твами Твои́ми/ и спаси́ от бед ду́ши на́ша.

И́ны стихи́ры, глас 4:

Пресвята́я Влады́чице на́ша Богоро́дице,/ пове́дающе сла́ву Бо́жию,/ Небеса́ пове́дают и Твою́ сла́ву,/ пречу́дным бо ше́ствием ико́ны Твоея́ Троеру́чицы/ всю Се́рбскую страну́ удиви́ла еси́;/ ди́вным явле́нием ея́ весь Афо́н освяти́ся,/ прише́ствием же ея́ Хиланда́рская оби́тель вельми́ возра́довася./ Те́мже и мы вопие́м Ти:/ Ты Ма́ти еси́ на́ша и наде́жда,/ бу́ди нам покро́в, заступле́ние и по́мощь.

Пречи́стая Де́во, Ма́ти Го́спода Вы́шняго,/ кто по Бо́зе подо́бен Тебе́ на Небеси́ и на земли́?/ И́бо сла́вою и че́стию превосхо́диши Небожи́телей и всех земноро́дных./ Ты пришла́ еси́ ико́ною Твое́ю честно́ю Троеру́чицею/ во оби́тель Хиланда́рскую,/ иде́же и ны́не водворя́ешися/ и се́ю настоя́тельствуеши,/ неотсту́пна бу́ди во ве́ки,/ подаю́щи нам ве́лию и бога́тую ми́лость.

Преблага́я Де́во Богороди́тельнице,/ Твои́м милосе́рдным присеще́нием/ оби́тель Хиланда́рская я́ко Небе́сный град явля́ется/ и храм присносве́тел,/ в не́мже чу́дная ико́на Твоя́ Троеру́чица/ я́ко вели́кое сокро́вище показу́ется,/ е́йже мы покланя́ющеся,/ ра́достию и стра́хом целу́ем ю́ и вопие́м Ти:/ озари́ и нас заре́ю благода́ти Твоего́ заступле́ния.

Сла́ва, и ны́не, глас 5:

Ра́дуются днесь вси христолюби́вии зе́мли/ и свята́я богохвали́мая Гора́ Афо́нская,/ лику́ет и весели́тся честна́я оби́тель Хиланда́рская,/ сла́ва бо Ма́тере Бо́жия всем возсия́/ пресла́вным ше́ствием ико́ны Ея́ Троеру́чицы,/ ю́же целу́юще с любо́вию,/ благогове́йно взира́ем к Присноде́ве и вопие́м Ей:/ о Всемилосе́рдая Влады́чице,/ Ты иногда́ рекла́ еси́:/ с сим о́бразом благода́ть Моя́ и си́ла./ Мы же и́стинно ве́руем, я́ко се рекла́ еси́, Богоро́дице,/ и́бо сим о́бразом досе́ле с на́ми была́ еси́ вы́ну,/ сего́ ра́ди вопие́м Ти:/ ми́лость Твоя́ неизрече́нная,/ и отсе́ле бу́ди с на́ми во ве́ки.

Вход. Проки́мен дне. Чте́ния 3.

Бытия́ чте́ние (глава́ 28):

Изы́де Иа́ков от студенца́ кля́твеннаго и и́де в Харра́нь./ И обре́те ме́сто, и спа та́мо, за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще по́йдеши./ И возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий, и сия́ врата́ Небе́сная.

Проро́чества Иезеки́илева чте́ние (главы́ 43 и 44):

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет А́донай Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же пре́йдет сквозе́ их,/ я́ко Госпо́дь, Бог Изра́илев, про́йдет и́ми и бу́дут затворе́на,/ я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х,/ су́щих к се́веру, пря́мо хра́му, и ви́дех,/ и се испо́лнь сла́вы храм Госпо́день.

При́тчей чте́ние (глава́ 9):

Прему́дрость созда́ Себе́ дом/ и утверди́ столпо́в седмь./ Закла́ Своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне,/ и тре́бующим ума́ рече́:/ прииди́те, яди́те Мой хлеб, и пи́йте вино́: е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго опоро́чит себе,/ обличе́ние бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет,/ сказу́й пра́ведному, и приложи́т приима́ти./ Нача́ло прему́дрости – страх Госпо́день, и сове́т святы́х – ра́зум:/ разуме́ти бо зако́н, по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.

На лити́и стихи́ры, глас 1. Самогла́сны:

Ра́дуйся, Ма́ти Ми́лости,/ неистощи́мо бо излива́еши на нас, гре́шных, да́ры благода́ти Твоея́,/ Твои́м предста́тельством к Возлю́бленному Сы́ну Твоему́ и Бо́гу на́шему/ я́звы на́ша грехо́вныя врачу́ются./ Коли́ко гре́шников, из самы́я бе́здны паде́ния/ к Тебе́ со слеза́ми воззва́вших,/ Ты премилосе́рдно исхи́тила еси́/ и в ра́дость ве́чно блаже́нную вни́ти сподо́била еси́./ Сего́ ра́ди вопие́м Ти:/ сла́ва Тебе́, Премилосе́рдая Ма́ти.

Земны́й А́нгел и Небе́сный челове́к,/ преподо́бный Иоа́нн Дамаски́н,/ име́я к Тебе́, Богоро́дице Де́во, те́плую любо́вь,/ пред ико́ною Твое́ю уми́льно моля́шеся,/ но, по наве́ту беззако́ннаго царя́ иконобо́рца,/ отсечена́ бысть десни́ца его́./ Он же, испроси́в ю от безбо́жнаго мучи́теля,/ пред честно́ю ико́ною Твое́ю сле́зно к Тебе́ моля́шеся,/ о е́же исцели́тися ей,/ Ты же моли́тву его́ ско́ро услы́шала еси́/ и, предста́в ему во сне, усече́нней руце́ его́ исцеле́ние дарова́ла еси́.

Глас 2: Ве́лие чу́до соверши́ся/ ико́ною Твое́ю, о Богома́ти Всепе́тая,/ е́же никто́же мо́жет изъясни́ти:/ ка́ко отсече́нная десни́ца преподо́бнаго/ во еди́ну нощь цела́ и здра́ва обре́теся,/ то́кмо червле́ный знак на ней бы́вшия я́звы оста́влен бысть,/ но мы, ве́дуще Тя скорбя́щих Уте́шительницу/ и Цели́тельницу душ и теле́с, ве́мы и́стинно,/ я́ко ничто́же невозмо́жно Тебе́,/ от всея́ души́ вопие́м Ти:/ сла́ва Тебе́, Небе́сная Цари́це.

Сла́ва, и ны́не, глас 3. Самогла́сен:

Да веселя́тся Небеса́, земноро́днии вси да ра́дуются,/ я́ко яви́ ми́лость Свою́ Богоро́дица,/ исцели́вши отсече́нную десни́цу преподо́бнаго/ и ико́ну Свою́ Боже́ственную Троеру́чицу/ поста́вивши на игу́менстем ме́сте/ во святе́й оби́тели Хиланда́рстей,/ откры́вши же еди́ному от и́ноков,/ я́ко та Сама́ хо́щет ико́ною Свое́ю честно́ю/ настоя́тельствовати во оби́тели сей,/ иде́же досе́ле водворя́ется/ и всеси́льным Свои́м предста́тельством/ непреста́нно всем да́рует ве́лию ми́лость.

На стихо́вне стихи́ры, глас 1:

Не́бо и земля́ согла́сно да восхваля́ют Тя,/ Богоро́дице Чи́стая,/ Боже́ственную реку́ вод живо́тных,/ ра́йских двере́й отверзе́ние/ и всего́ ми́ра очище́ние.

Стих: Помяну́ и́мя Твое́/ во вся́ком ро́де и ро́де.

Ра́дости и весе́лия вси исполня́емся,/ сла́вяще святы́я ико́ны Твоея́ Троеру́чицы пресла́вное прише́ствие,/ всех и́ноков Хиланда́рския оби́тели моле́ния приими́/ и проше́ния испо́лни.

Стих: Слы́ши, Дщи, и виждь,/ и приклони́ у́хо Твое́.

А́нгельстии чи́нове Тебе́, всех Цари́це, раболе́пно слу́жат/ и благогове́йно почита́ют святу́ю Твою́ ико́ну,/ ка́ко же Тя возмо́жем досто́йно пе́ти,/ мы, смире́ннии и недосто́йнии?

Сла́ва, и ны́не, глас то́йже. Самогла́сен:

Прииди́те, ве́рнии, поклони́мся о́бразу Пречи́стыя Де́вы,/ и поклони́мся ико́не Троеру́чице,/ поклони́мся и припаде́м к Цари́це на́шей Богоро́дице,/ с любо́вию вопию́ще:/ испроси́, о Благосе́рдая, у Сы́на Твоего́, Христа́ Бо́га на́шего,/ благода́ть и ми́лость нам, рабо́м Твои́м,/ и всему́ христолюби́вому ро́ду се́рбскому.

Тропа́рь Богоро́дице, глас 4:

Яко звезда́ светозаря́ющая,/ из Се́рбии на Афо́н чуде́сно прии́де/ всечестна́я ико́на Твоя́ Троеру́чица,/ ю́же оби́тель Хиланда́рская благогове́йно восприе́мши,/ я́ко Боже́ственный дар свы́ше,/ прославля́ет Тя, Влады́чицу,/ и уми́льно вопие́т:/ не оста́ви ми́лость Твою́ от нас,/ но пребу́ди с на́ми во ве́ки.

Ин тропа́рь, глас то́йже:

Днесь всеми́рная ра́дость возсия́ нам ве́лия:/ дарова́ся святе́й Горе́ Афо́нстей/ цельбоно́сная Твоя́, Влады́чице Богоро́дице, ико́на,/ со изображе́нием тричи́сленно и неразде́льно пречи́стых рук Твои́х/ в прославле́ние Святы́я Тро́ицы,/ созыва́еши бо ве́рных и моля́щихся Тебе́ о сем позна́ти,/ я́ко двема́ и́маши Сы́на и Го́спода держа́ти,/ тре́тию же яви́ на прибе́жище и покро́в чту́щим Тя,/ от вся́ких напа́стей и бед избавля́ти,/ да вси, притека́ющии к Тебе́ ве́рою, прие́млют неоску́дно от всех зол свобожде́ние,/ от враго́в защище́ние,/ сего́ ра́ди и мы вку́пе со Афо́ном вопие́м:/ ра́дуйся, Благода́тная, Госпо́дь с Тобо́ю.

Ин тропа́рь, глас то́йже:

Днесь све́тло красу́ется ца́рствующий град Москва́,/ име́ющи в себе́, о Всеми́лостивейшая, всея́ тва́ри Честне́йшая,/ Засту́пнице на́ша Де́во Богоро́дице,/ честны́й о́браз Твой,/ и́мже подсо́лнечныя концы́ земли́ удивля́еши/ и мир ми́рови да́руеши,/ во о́браз бо Святы́я Тро́ицы явля́еши три ру́ки:/ двема́ у́бо Сы́на Своего́, Христа́ Бо́га на́шего, но́сиши,/ тре́тиею от напа́стей и бед/ ве́рно к Тебе́ прибега́ющих избавля́еши,/ и от потопле́ния изыма́еши,/ и всем поле́зная да́руеши,/ и преподо́бному Михаи́лу Малео́нскую го́ру показа́,/ и всех всегда́ ми́луеши,/ честно́ю ри́зою Свое́ю покрыва́еши жи́тельство сие́/ и вся гра́ды и страны́ на́ша, да зове́м Ти:/ ра́дуйся, Обра́дованная.

НА У́ТРЕНИ

На Бог Госпо́дь: тропа́рь Богоро́дицы, три́жды.

По 1-м стихосло́вии седа́лен, глас 1: Благода́рственное пе́ние прино́сим Ти, Богоро́дице,/ пред свято́ю ико́ною Твое́ю Троеру́чицею,/ я́же свиде́тельствует Твою́ неизрече́нную ми́лость ко преподо́бному отцу́ Иоа́нну Дамаски́ну,/ е́юже спаси́ нас и всех, благоче́стно покланя́ющихся ей.

Сла́ва, и ны́не, то́йже.

По 2-м стихосло́вии седа́лен, глас 2:

О Всепе́тая Де́во Влады́чице,/ спаси́ вся, на Тя наде́ющияся/ и к честне́й ико́не Твое́й притека́ющия,/ я́же есть зало́г Твоего́ к нам благоволе́ния,/ ю́же лобыза́юще, Тебе́ зове́м:/ не забу́ди нас, о Недре́млющая на́ша Храни́тельнице.

Сла́ва, и ны́не, то́йже.

Велича́ние:

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ с ве́рою всем притека́ющим.

Псало́м избра́нный Богоро́дичен.

По полиеле́и седа́лен, глас 8:

Просвети́ нас Твои́м све́том, Всечи́стая,/ и даждь нам ру́ку по́мощи,/ ве́мы бо и испове́дуем,/ я́ко лу́чше есть со́лнцу уга́снути,/ не́жели лиши́тися нам Твоего́ за нас к Бо́гу хода́тайства.

Сла́ва, и ны́не, то́йже.

Степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Отры́гну се́рдце мое́ сло́во бла́го, глаго́лю аз дела́ моя́ Царе́ви. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 6:

Припа́дающе о́бразу Твоему́ честно́му,/ Пречи́стая Богоро́дице,/ покланя́емся Тебе́,/ Тя бо еди́ну и́мамы вси прибе́жище и сте́ну/ и Тя сла́вим немо́лчно, Ма́ти Чадолюби́вая.

Кано́н Богоро́дице, глас 4, его́же краегране́сие: Под Твою́ ми́лость прибега́ем, Богородице. Творе́ние протоиере́я Ми́рка.

Песнь 1

Ирмо́с: Несть Тебе́ подо́бен, Препросла́вленный Го́споди:/ руко́ю бо кре́пкою изба́вил еси́ лю́ди,/ я́же стяжа́л еси́, Человеколю́бче.

Просвети́ ду́шу мою́, ум и се́рдце, Преми́лостивая Ма́ти Бо́жия,/ и даждь ми дар воспе́ти Тя,/ кре́пкую Предста́тельницу, благи́х Хода́таицу и в печа́лех сла́дкое утеше́ние.

О́блак светоза́рный яви́лася еси́ преподо́бному Иоа́нну Дамаски́ну,/ егда́ моли́тву его́ ско́ро услы́шала еси́/ и отсече́нную десни́цу его́ здра́ву сотвори́ла еси́.

Днесь согла́сно торжеству́ют вси концы́ земли́, вку́пе Тя воспева́юще,/ тве́рдую По́мощь и Храни́тельницу жи́зни на́шея.

Твою́ всечестну́ю и чудотво́рную ико́ну Троеру́чицу стяжа́вши,/ свята́я оби́тель Хиланда́р вопие́т Ти:/ ра́дуйся, стено́ неруши́мая и кре́пкое заступле́ние оби́тели сея́.

Песнь 3

Ирмо́с: Свят еси́, Го́споди Бо́же наш,/ утверди́ и на́ша сердца́ непреста́нно вопи́ти Тебе́:/ пра́веден несть, па́че Тебе́, Го́споди.

Ве́рных собо́ри совокупля́ются днесь к прославле́нию Твоего́ благосе́рдия,/ е́же яви́ла еси́ преподо́бному Иоа́нну Дамаски́ну,/ исцели́вши отсече́нную десни́цу его́.

О́чи серде́ц на́ших воспуща́ем к Тебе́, Влады́чице,/ егда́ взира́ем на чудотво́рную ико́ну Троеру́чицу,/ бу́ди нам держа́ва и огражде́ние и Вы́шняго прича́стия сподо́би нас.

Ю́же славосло́вят си́лы Небе́сныя,/ пое́м Тя, Всепе́тая Де́во,/ спаси́ ны от грехо́внаго плене́ния/ и вся́кия ско́рби, находя́щия на ны.

Моли́, Его́же родила́ еси́, Ма́ти Безневе́стная,/ о всех, притека́ющих к честне́й ико́не Твое́й,/ я́ко да защити́т их и просвети́т.

Седа́лен, глас 4:

Егда́ и́ноцы Хиланда́рстии ви́деша пречестну́ю ико́ну Твою́, Влады́чице,/ на осля́ти, ники́мже води́мем, ко врато́м оби́тели Хиланда́рския принесе́нную,/ ра́достию ве́лиею возра́довашася/ и, покланя́ющеся ей, прославля́ху Твое́ к ним благоволе́ние.

Сла́ва, и ны́не, то́йже.

Песнь 4

Ирмо́с: Услы́шах слух Твой, Го́споди,/ я́ко яви́лся еси́ на земли́,/ и просла́вих Твою́ си́лу.

Исто́чника Приснотеку́щаго источи́ла еси́, Пречи́стая Де́во,/ вся удо́лия напая́юща,/ погрузи́ и вся на́ша собла́зны и до конца́ потреби́.

Ле́ствицу Иа́ковлю, Гедео́ново руно́,/ ра́дости Хода́таицу, кре́пость и похвалу́ всех ве́рных,/ прииди́те, вси воспои́м, глаго́люще:/ ра́дуйся, Де́во Чи́стая.

О́браз Твой честны́й целу́юще, Всечи́стая,/ к Твое́й бла́гости прибега́ем/ и, коле́на преклоня́юще, с пла́чем мо́лим Тя:/ не пре́зри на́шего воздыха́ния,/ но в День су́дный бу́ди нам покро́в и Помо́щница.

Сло́во Бо́жие ро́ждшая,/ посети́ нас благода́тию Твое́ю,/ и омраче́нныя на́ша ду́ши и сердца́ просвети́,/ и пода́ждь нам от бед избавле́ние и всех грехо́в оставле́ние.

Песнь 5

Ирмо́с: Зако́ном за́поведей Твои́х,/ Еди́не Человеколю́бче,/ просвети́ се́рдце мое́,/ молю́ся, Го́споди, и поми́луй мя.

Твоя́ всечестна́я ико́на Троеру́чица/ я́сно всем свиде́тельствует,/ я́ко Ты кре́пость на́ша и си́ла еси́,/ сего́ ра́ди прославля́ем ма́тернее Твое́ к нам милосе́рдие.

Преподо́бный Иоа́нн Дамаски́н сле́зно моли́шеся Тебе́ пред честно́ю ико́ною Твое́ю,/ Ты же моли́тву его́ ско́ро услы́шала еси́/ и усече́нней руце́ его́ исцеле́ние дарова́ла еси́.

Ра́дости Хода́таице,/ мольбы́ раб Твои́х приими́,/ вся проти́вных враго́в сове́ты разжени́/ и ста́до Твое́ невреди́мо сохрани́/ и от всех скорбе́й спаси́.

Избавля́еми прегреше́ний Твои́ми святы́ми моли́твами, Благослове́нная Богоро́дице,/ благоразу́мно Тя вси ублажа́ем.

Песнь 6

Ирмо́с: Ве́чер, и у́тро, и полу́дне/ хва́лим Тя, Го́споди Бо́же наш,/ услы́ши глас наш.

Блажи́м Тя и сла́вим, Богоро́дице Де́во,/ и́бо Ты, о Благода́тная, благода́тию Твое́ю всегда́ нас осеня́еши,/ покрыва́ющи, и заступа́ющи, и от лука́вых враго́в избавля́ющи.

Е́здяй на Херуви́мех и Пева́емый от Серафи́м/ из Твои́х ложе́сн яви́ся, и все челове́чество спасе́но бысть,/ сего́ ра́ди сла́вим Тя, я́ко Засту́пницу на́шу Непосты́дную.

Гряди́те, лю́дие, на поклоне́ние Бо́жией Ма́тери,/ благода́ть бо све́та Ей и нам возсия́ и научи́ пе́ти:/ сподо́би нас, о Благода́тная, Вы́шняго прича́стия.

А́нгелов ра́дость Ты еси, Богоро́дице,/ и всех челове́ков вои́стинну весе́лие;/ спаси́ ду́ши всех, пою́щих Тя, Чи́стая.

Конда́к, глас 3.

Подо́бен: Де́ва днесь:

Де́ва днесь благоволе́ние к нам явля́ет,/ Гора́ же Афо́н благодаре́ние Ей прино́сит,/ А́нгели и и́ноцы славосло́вят,/ Троеру́чица из Се́рбии чуде́сно путеше́ствует:/ нас бо ра́ди прии́де/ и всели́ся во святу́ю оби́тель Хиланда́рскую.

И́кос:

Вои́стинну пречу́дное явле́ние:/ пресла́вная ико́на Твоя́ Троеру́чица,/ ю́же первосвяти́тель се́рбский, Са́вва,/ от святы́я Ла́вры Са́ввы Освяще́ннаго,/ со благогове́нием, я́ко многоце́нен дар, в страну́ Се́рбскую принесе́,/ на безслове́снем осля́ти от Се́рбии на Афо́н чуде́сно прино́сится/ и ко святе́й оби́тели Хиланда́рстей прии́де./ И́ноцы же оби́тели сея́, восприи́мше сию́ с ра́достию, я́ко дар Небе́сный,/ поста́виша ю в олтари́ собо́рныя це́ркве оби́тели,/ и́бо разуме́ша сбытие́ сие́ я́ко я́вное Твое́ к ним благоволе́ние./ Сего́ ра́ди с ра́достию и любо́вию покланя́хуся всечестне́й ико́не Твое́й, целу́юще ю и Тебе́ воспева́юще:/ ра́дуйся, святу́ю ико́ну Твою́ зало́гом ми́лости нам дарова́вшая,/ всем ве́рным ско́рое поможе́ние.

Песнь 7

Ирмо́с: В нача́ле Безнача́льное Сло́во,/ со Отце́м и Ду́хом/ Сын Единоро́дный, благослове́н еси́,/ и превозноси́мый Бо́же оте́ц на́ших.

Еди́ну Тя обре́те Чи́стую Соде́тель всех/ и всели́ся в Тя, я́ко в храм прекра́сный,/ сего́ ра́ди пое́м Ти:/ Христа́ Бо́га на́шего Ма́ти, благослове́на еси́.

Ми́лостию Твое́ю весь мир обогаща́еши/ и ду́ши просвеща́еши, Еди́на Всепе́тая,/ те́мже воспева́ем Ти:/ Христа́ Бо́га на́шего Ма́ти, благослове́на еси́.

Безневе́стная Де́во,/ многопло́дное дре́во яви́лася еси́,/ сне́дию Небе́сною вся насыща́ющее,/ доброде́яния всем источи́, да вси пое́м Ти:/ Христа́ Бо́га на́шего Ма́ти, благослове́на еси́.

О́браза Твоего́ прише́ствием от злых избавля́емся/ и посрамля́ются вси, рабо́м Твои́м зла́я явля́ющии,/ сего́ ра́ди вопие́м:/ благослове́на еси́, Ма́ти Христа́ Бо́га на́шего.

Песнь 8

Ирмо́с: Во о́бразе А́нгела,/ я́вльшагося в пещи́ о́гненней песносло́вцем,/ Христа́ Бо́га по́йте, о́троцы,/ свяще́нницы, благослови́те,/ лю́дие, превозноси́те во вся ве́ки.

Гла́сы моле́бными, прииди́те, вси воспое́м Чи́стую Де́ву,/ се бо ны́не весе́лие приближа́ется, ве́рнии спаса́ются, и воскли́кнем в весе́лии:/ Богоро́дицу по́йте и превозноси́те во вся ве́ки.

Очи́ма а́нгельскима глубина́ неудобозри́мая,/ челове́ческими по́мыслы высота́ неудобовосходи́мая/ прии́де к нам во о́бразе Троеру́чицы,/ поклони́мся у́бо честно́му о́бразу и возопии́м:/ Богоро́дицу по́йте и превозноси́те во вся ве́ки.

Ра́дующеся, приступа́ем о́бразу Твоему́ честно́му/ и, уми́льно моля́щеся, из глубины́ души́ взыва́ем:/ Богоро́дицу по́йте и превозноси́те во вся ве́ки.

Огне́м возгара́шеся гора́ Сина́йская,/ не терпя́ше бо сни́тия сла́вы Бо́жия,/ Ты же, весь Боже́ственный Огнь сущ,/ Бо́жие Сло́во во чре́ве Твое́м неопа́льно носи́ла еси́,/ сего́ ра́ди пое́м:/ Богоро́дицу по́йте и превозноси́те во вся ве́ки.

Песнь 9

Ирмо́с: Безсе́менное Рождество́ Твое́, Богоро́дице Чи́стая,/ Христа́ Бо́га на́шего/ пе́сньми немо́лчными велича́ем.

Днесь ра́дуется Правосла́вная Се́рбия и вся Гора́ Афо́нская,/ изря́днее же оби́тель Хиланда́рская,/ и́бо прии́де и всели́ся в ню всечестна́я ико́на Троеру́чица,/ явля́ющи к нам благоволе́ние Бо́жия Ма́тере.

Име́ющи святу́ю ико́ну Твою́ Троеру́чицу во игу́мена себе́,/ я́коже Твоя́ во́ля бысть, Богоро́дице,/ оби́тель Хиланда́рская благоуха́нием святы́ни исполня́ется/ и непреста́нно славосло́вит и́мя Твое́.

Цве́те прекра́сный, облагоуха́яй вся,/ проти́вных нахожде́ния отгоня́яй и весе́лия всех исполня́яй,/ бу́ди нам стена́, и огражде́ние, и спаси́тельное прибе́жище.

Его́же воспева́ют А́нгели, родила́ еси́,/ но и Де́вою пребыла́ еси́,/ сего́ ра́ди вопие́м Ти:/ ра́дуйся, ско́рая Помо́щнице и кре́пкая Засту́пнице всего́ ми́ра.

Свети́лен:

Све́том благосе́рдия Твоего́ всех озаря́ющи,/ вся́кую боле́знь и неду́г исцеля́еши,/ не забу́ди и нас, ве́рных раб Твои́х,/ но да зна́менается на нас свет лица́ Твоего́/ во вся дни живота́ на́шего.

Сла́ва, и ны́не:

Ико́на Твоя́ пречу́дная, Богоро́дице,/ да бу́дет нам столп о́гненный, руководя́щий нас к ве́чному насле́дию,/ и да зна́менается на нас свет лица́ Твоего́/ во вся дни живота́ на́шего.

На хвали́тех стихи́ры на 4, глас 4:

Прови́дя Тя издале́ча, проро́к Дави́д/ богодухнове́нно глаго́ла:/ лицу́ Твоему́ помо́лятся бога́тии лю́дстии,/ се бо днесь вси ве́рнии Твои́, Благослове́нная Богоро́дице,/ покланя́ются Тебе́ и лобыза́ют честну́ю ико́ну Твою́ Троеру́чицу,/ освяща́ются душа́ми, ку́пно и телесы́/ и от всея́ души́ и се́рдца вопию́т Ти:/ Ты на́ша наде́жда еси́ и упова́ние,/ бу́ди с на́ми во ве́ки.

Ра́дуется днесь, Богоро́дице, оби́тель Хиланда́рская,/ име́ющи всечестну́ю ико́ну Троеру́чицу/ я́ко зало́г спасе́ния,/ и с ве́рою и любо́вию взыва́ет Ти:/ сохрани́, о Всеми́лостивая, оби́тель на́шу и оте́чество/ от тлетво́рных уче́ний неве́рия и суеве́рия,/ умно́жи же любо́вь и единомы́слие/ и сподо́би, о Всеблага́я, всегда́ пе́ти Тя.

Преукраше́нная Присноде́во,/ во вся ве́ки Благослове́нная,/ не пре́зри моли́твы призыва́ющих Тя,/ но услы́ши серде́чное воздыха́ние взира́ющих к Тебе́/ и, я́коже преподо́бному Иоа́нну ско́ро притекла́ еси́ в по́мощь,/ притецы́ с кро́тостию к душа́м на́шим./ Бу́ди нам Путеводи́тельница к Небе́сному оте́честву/ и сопричти́ нас к блаже́нному собо́ру избра́нных Бо́жиих.

Пресвята́я, Преблагослове́нная,/ ве́мы Тя Милосе́рдую,/ и́бо о́чи Твои́ на ни́щия призира́ют/ и ру́це Твои́ к сирота́м просте́рты,/ се, коленопреклоня́ющеся пред свято́ю ико́ною Твое́ю, мо́лим Тя:/ не оста́ви нас в печа́ли,/ но Ма́тернее лице́ Твое́ обрати́ на моли́твы на́ша/ и не помяни́ беззако́ний на́ших,/ но, я́ко Милосе́рдая, спаси́ ду́ши на́ша.

Сла́ва, и ны́не, глас 8:

Зря́ще пречу́дный о́браз Твой, Богома́ти Милосе́рдая,/ Саму́ю Тя вои́стинну зрим, Богоро́дицу су́щую,/ и слы́шим глас Твой сладковеща́нный,/ его́же к первопи́санней ико́не Твое́й со вла́стию рекла́ еси́:/ с то́ю Моя́ благода́ть./ Та же благода́ть и в подобообра́зных и́стинствует/ и во ико́не Троеру́чице преизбы́точествует,/ ю́же почита́юще, благодаре́ние Тебе́ прино́сим:/ ра́дуйся, Благода́тная, с Тобо́ю Госпо́дь,/ Тебе́ же ра́ди и с на́ми,/ спаса́я нас всегда́.

Славосло́вие вели́кое. Ектении́ и отпу́ст.

НА ЛИТУРГИ́И

Блаже́нны от кано́на Богоро́дицы, пе́сни 3-я и 6-я. Проки́мен, глас 3, песнь Богоро́дицы: Вели́чит душа́ Моя́ Го́спода,/ и возра́довася дух Мой о Бо́зе, Спа́се Мое́м. Стих: Я́ко призре́ на смире́ние Рабы́ Своея́, се бо отны́не ублажа́т Мя вси ро́ди. Апо́стол к Филипписи́ем, зача́ло 240. Аллилу́ия, глас 8: Слы́ши, Дщи, и виждь, и приклони́ у́хо Твое́. Стих: Лицу́ Твоему́ помо́лятся бога́тии лю́дстии. Ева́нгелие от Луки́, зача́ло 54. Прича́стен: Ча́шу спасе́ния прииму́:

Моли́тва

О Пресвята́я Госпоже́ Влады́чице Богоро́дице, ве́лие чу́до свято́му Иоа́нну Дамаски́ну яви́вшая, я́ко ве́ру и́стинную и наде́жду несумне́нную показа́вшему! Услы́ши нас, гре́шных, пред чудотво́рною Твое́ю ико́ною усе́рдно моля́щихся и прося́щих Твоей по́мощи: не отри́ни моле́ния сего́ мно́гих ра́ди прегреше́ний на́ших, но, я́ко Ма́ти милосе́рдия и щедро́т, изба́ви нас от боле́зней, скорбе́й и печа́лей, прости́ соде́янныя на́ми грехи́, испо́лни ра́дости и весе́лия всех, чту́щих святу́ю ико́ну Твою́, да ра́достно воспое́м и любо́вию просла́вим и́мя Твое́, я́ко Ты еси́ от всех родо́в избра́нная и благослове́нная во ве́ки веко́в. Ами́нь.

И́на моли́тва

О Пресвята́я и Преблагослове́нная Де́во Богоро́дице Мари́е! Припа́даем и покланя́емся Ти пред свято́ю ико́ною Твое́ю, воспомина́юще пресла́вное чу́до Твое́, исцеле́нием усе́ченныя десни́цы преподо́бнаго Иоа́нна Дамаски́на, от ико́ны сея́ явле́нное, его́же зна́мение доны́не ви́димо есть на ней, во о́бразе тре́тия руки́, к изображе́нию Твоему́ приложе́нныя. Мо́лимся Ти и про́сим Тя, Всеблагу́ю и Всеще́друю ро́да на́шего Засту́пницу: услы́ши нас, моля́щих Ти ся, и я́коже блаже́ннаго Иоа́нна, в ско́рби и боле́зни к Тебе́ возопи́вшаго, услы́шала еси́, та́ко и нас не пре́зри, скорбя́щих и боле́знующих ра́нами страсте́й многоразли́чных и к Тебе́ от души́ сокруше́нныя и смире́нныя усе́рдно прибега́ющих. Ты зри́ши, Госпоже́ Всеми́лостивая, не́мощи на́ша, озлобле́ние на́ше, ну́жду, потре́бу на́шу в Твое́й по́мощи и заступле́нии, я́ко отвсю́ду враги́ окруже́ни есмы́, и несть помога́ющаго, ниже́ заступа́ющаго, а́ще не Ты умилосе́рдишися о нас, Влады́чице. Ей, мо́лим Ти ся, вонми́ гла́су боле́зненному на́шему и помози́ нам святооте́ческую Правосла́вную ве́ру до конца́ дней на́ших непоро́чно сохрани́ти, во всех за́поведех Госпо́дних неукло́нно ходи́ти, покая́ние и́стинное о гресе́х на́ших всегда́ Бо́гу приноси́ти и сподо́битися ми́рныя христиа́нския кончи́ны и до́браго отве́та на Стра́шнем Суде́ Сы́на Твоего́ и Бо́га на́шего, Его́же умоли́ за нас Ма́тернею моли́твою Твое́ю, да не осу́дит нас по беззако́нием на́шим, но да поми́лует нас по вели́цей и неизрече́нней ми́лости Свое́й. О Всеблага́я! услы́ши нас и не лиши́ нас по́мощи Твоея́ держа́вныя, да, Тобо́ю спасе́ние получи́вше, воспое́м и просла́вим Тя на земли́ живы́х и ро́ждшагося от Тебе́ Искупи́теля на́шего, Го́спода Иису́са Христа́, Ему́же подоба́ет сла́ва и держа́ва, честь и поклоне́ние, ку́пно со Отце́м и Святы́м Ду́хом, всегда́, ны́не, и при́сно, и во ве́ки веко́в. Ами́нь.

ВЕ́ЧЕР

На Го́споди, воззва́х: стихи́ры, глас 1.

Подо́бен: Небе́сных чино́в:

Многови́дныя му́ки претерпе́вше,/ светови́дныя венцы́ прия́сте вку́пе,/ Ила́рие и Про́кле./ Те́мже ва́шу всепра́зднственную па́мять/ ве́рно сотворя́ем,/ моля́щеся приле́жно, е́же моли́ти о всех нас.

Растерза́ния пло́ти твоея́,/ Про́кле, претерпе́л еси́,/ ве́чную сла́ву прозря́, блаже́нне,/ и ра́йское пребыва́ние, и Свет невече́рний,/ в не́мже сый, моли́/ и нам просвети́тися, пою́щим тя.

Я́коже два свети́ла,/ мир просвеща́ете чуде́с луче́ю,/ страстоте́рпцы Госпо́дни, Ила́рие и Про́кле,/ омраче́ние страсте́й отгоня́ще./ Те́мже вас воспева́ем ра́достно,/ пра́зднующе па́мять ва́шу.

И́ны стихи́ры преподо́бнаго, глас 5.

Подо́бен: Преподо́бне о́тче:

Преподо́бне о́тче,/ от ю́ности равноа́нгельное облобыза́л еси́ житие́/ и, ми́ра кра́сная, я́ко уме́ты, вмени́в/ и яко се́на, сла́вы вре́менныя,/ не су́щия, отбе́гл еси́,/ сла́вы Боже́ственныя не забыва́я./ Ея́же ны́не причаща́ешися,/ отве́ргся уз до́лу плотски́х,/ и предстоя́ Све́ту трисо́лнечному,/ и насыща́яся Христо́ва светоли́тия./ Того́ моли́, Тому́ моли́ся всегда́/ дарова́ти Це́ркви единомы́слие,/ мир и ве́лию ми́лость.

Преподо́бне о́тче,/ сия́ние умиле́ния, свети́льниче су́щим во тьме отча́яния,/ незаходи́мая денни́ца,/ покая́ния угль пречестны́я,/ доброде́телей Боже́ственный би́сер/ и ми́лостыня, све́щник вели́к моли́твам,/ си́рым предста́тель и вдови́цам,/ зако́нное пра́вило Це́ркве/ и де́тельный свети́льник воздержа́ния,/ Христа́ моли́, Христо́ви моли́ся всегда́/ дарова́ти Це́ркви единомы́слие,/ мир и ве́лию ми́лость.

Преподо́бне о́тче,/ освяти́лся еси́ пре́жде рожде́ния,/ я́коже Иереми́я свяще́ннейший:/ тебе́ бо ро́ждшей/ Госпо́дня Ма́ти прорече́ тя да́ти плод,/ и́же и дан бы́сть е́й от пеле́н,/ и провозвести́ я́ве./ И прия́т а́бие мы́слию пра́вою,/ жития́ мяте́ж бежа́ща тя, Богому́дре,/ и безмо́лвное житие́ возлюби́вша,/ е́же и проше́л еси́./ Я́ко песо́к, собо́ри единообра́зных/ насади́л еси́ при исхо́дищих вод Бо́жия Ду́ха.

Сла́ва, глас 6:

Преподо́бне о́тче Михаи́ле,/ во всю зе́млю изы́де веща́ние исправле́ний твои́х./ Тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ без поро́ка поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

И ны́не, Богоро́дичен: Кто Тебе́ не ублажи́т: А́ще не пра́зднуеши, Богоро́дичен или́ Кре́стобогородичен.

Подо́бен: Тридне́вен:

На дре́ве Живо́т наш зря́щи Всенепоро́чная Богоро́дица ви́сящ,/ ма́терски рыда́ющи, вопия́ше:/ Сы́не Мой и Бо́же Мой,/ спаси́ любо́вию пою́щия Тя.

Вход. Проки́мен дне. И чте́ния преподо́бническая (зри день 19-й).

На стихо́вне стихи́ры, глас 1.

Подо́бен: Небе́сных чино́в:

Моще́й твои́х ра́ка, Богому́дре преподо́бне,/ всех собира́ет/ и, бога́тно име́ющи исцеле́ние, всеблаже́нне,/ всем подае́т, ве́рою притека́ющим к тебе́./ Непреста́нно моли́ о нас, е́же спасти́ ду́ши на́ша.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Ра́йскую добро́ту бога́тно зри́ши/ и дово́льно пожина́еши нетле́ния кла́сы,/ и́же процвето́ша ми́рови духо́вне./ И́хже причаща́ющеся, тя почита́ем,/ тем и всечестну́ю па́мять твою́ пра́зднующе, мо́лим:/ сотвори́ мольбы́ о нас,/ и́же ве́рою тя сла́вящих всегда́.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Единожи́тельством сам украси́лся еси́,/ о Михаи́ле треблаже́нне,/ и яви́ся всем свети́льник Со́лнца,/ Божества́ Трисия́тельнаго,/ и просвеща́еши всех, блаже́нне,/ притека́ющих к тебе́ че́стне/ и пра́зднующих твою́ па́мять.

Сла́ва, глас 8:

Мона́хов мно́жества/ наста́вника тя почита́ем, о́тче наш Михаи́ле:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен: Безневе́стная Де́во:

Аще не пра́зднуеши, Богоро́дичен или́ Крестобогоро́дичен:

Ю́ница Нескве́рная,/ Юнца́ ви́дящи, на дре́ве пригвожда́ема во́лею,/ рыда́ющи жа́лостне, –/ увы́ Мне, – вопия́ше, – люби́мейшее Ча́до!/ Что́ Ти сонм воздаде́ безблагода́тный евре́йский,/ хотя́ Мя обезча́дствовати от Тебе́, Вселюбе́зне?

Тропа́рь му́чеником о́бщий, глас 4:

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего,/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

Тропа́рь преподо́бнаго, глас 8:

Крила́ми мы́сленными к Богове́дению возлете́в разу́мно,/ мяте́ж ми́ра оста́вил еси́, блаже́нне,/ презре́в пло́ти мудрова́ния,/ му́дрость Вы́шнюю взыска́л еси́, е́же жи́ти с Бо́гом,/ и всем о́браз дав собо́ю, глаго́ля:/ добро́ есть с Бо́гом жи́ти, Михаи́ле преподо́бне.

Ин тропа́рь преподо́бнаго, глас то́йже:

В тебе́, о́тче, изве́стно спасе́ся, е́же по о́бразу:/ прии́м бо крест, после́довал еси́ Христу́/ и, де́я, учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со А́нгелы сра́дуется, преподо́бне Михаи́ле, дух твой.

НА У́ТРЕНИ

По 1-м стихосло́вии седа́лен, глас 1.

Подо́бен: Гроб Твой, Спа́се:

Многосве́тлая звезда́ и́нокующим показа́ся и степе́нь изве́стен,/ воздержа́ния же преде́л, пресве́тлое зерца́ло разсужде́ния, преподо́бне./ И́же па́мять твою́ ра́достно соверша́ющим,/ разреше́ние проси́ согреше́ний, преблаже́нне, Бо́гови предстоя́.

Сла́ва, и ны́не, Богоро́дичен:

Наста́ви ны на путь покая́ния, уклоня́ющияся при́сно ко злым безпу́тием/ и Преблага́го прогне́вающия Го́спода,/ Неискусобра́чная Благослове́нная Мари́е, Прибе́жище отча́янных челове́ков, Бо́жие обита́лище.

По 2-м стихосло́вии седа́лен, глас 5.

Подо́бен: Собезнача́льное Сло́во:

По́стника Госпо́дня пе́сньми почти́м,/ я́ко умертви́вша вся прило́ги страсте́й воздержа́нием и тве́рдым терпе́нием вои́стинну,/ и посрами́вша зело́ противобо́рца врага́ и всю сего́ горды́ню,/ и ны́не моля́щася Го́сподеви поми́ловатися душа́м на́шим.

Сла́ва, и ны́не, Богоро́дичен:

Ужа́сно чу́до зача́тия и несказа́нен о́браз Рождества́ в Тебе́ позна́ся, Чи́стая Присноде́во,/ ужаса́ет мой ум и удивля́ет по́мысл,/ сла́ва Твоя́, Богоро́дице, всем простре́ся во спасе́ние душ на́ших.

По полиеле́и седа́лен, глас 8.

Подо́бен: Прему́дрости:

Виде́ние и дея́ние восприи́м, чу́вствия, преподо́бне, украша́я,/ житие́ напра́вил еси́ к Боже́ственным повеле́нием./ Мона́хом бо яви́лся еси́ свети́льник све́тел,/ наставля́я и просвеща́я нас к позна́нию./ Те́мже, восхваля́юще, велича́ем любо́вию исхо́дную па́мять твою́, Богоно́се Михаи́ле,/ сего́ ра́ди вопие́м ти:/ моли́ Христа́ Бо́га прегреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Небе́сную дверь и ковче́г, всесвяту́ю го́ру, све́тлый о́блак воспои́м,/ неопали́мую купину́, слове́сный рай, Е́вино свобожде́ние,/ вселе́нныя всея́ вели́кий сосу́д,/ я́ко спасе́ние в Ней соде́лася ми́ру и оставле́ние дре́вних согреше́ний./ Те́мже и вопие́м Ей:/ моли́ Христа́ Бо́га прегреше́ний оставле́ние дарова́ти/ благоче́стно покланя́ющимся пресвято́му рождеству́ Твоему́.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче,/ до́бру обре́те ле́ствицу,/ е́юже взы́де на высоту́,/ я́коже обре́те Илия́ колесни́цу о́гненную,/ но о́наго у́бо вы́шний путь ины́м не оста́ся,/ ты же и по сме́рти и́маши па́ству твою́,/ небе́сный челове́че, земны́й а́нгеле,/ свети́льниче неугаси́мый вселе́нней,/ Михаи́ле Боже́ственне преподо́бне,/ моли́ спасти́ся душа́м на́шим.

А́ще не пра́зднуеши, еди́н кано́н Окто́иха и святы́х два кано́на.

Кано́н му́чеников, глас 4. Творе́ние Ио́сифово.

Песнь 1

Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Соедини́вшеся с Бо́гом и Боже́ственными заря́ми освеща́еми при́сно, до́блии страда́льцы,/ ду́шу мою́ просвети́те, пою́щу светоно́сное и честно́е ва́ше страда́ние/ умиле́нием се́рдца, блаже́ннии.

Воспери́ вас Небе́сное жела́ние,/ те́мже вся кра́сная жития́, страда́льцы, вмени́сте уме́ты,/ манове́ньми к Бо́гу обожи́вшеся и всю безбо́жную кре́пость смири́вше.

Огне́м Богонача́льныя вже́гшеся Тро́ицы,/ злоче́стия разжже́ния угаси́сте, му́дрии, кро́вными тече́нии./ Те́мже исцеле́ний чи́стыми одожде́нии страсте́й на́ших скве́рну отмы́йте.

Безпеча́льную жизнь, Небе́сную сла́ву, ра́йское наслажде́ние,/ свет мы́сленный, кра́сное ра́дование, му́ченицы, взыску́юще,/ лю́тая претерпе́сте треволне́ния до́блественным умо́м.

Небе́снии ли́цы ва́шему терпе́нию удиви́шася, му́дрии:/ бие́ния бо пло́ти, и многоплете́нныя му́ки, му́ченицы,/ доблему́дренно претерпе́сте, ра́дующеся/ и врага́ зло́бу сокрушивше.

Богоро́дичен: Яд уше́с прама́тере Е́вы/ Гаврии́л, Тебе́ провозглаша́я, ра́дуйся,/ вои́стинну оттрясе́, Влады́чице:/ еди́на бо Ты Посека́теля зло́бы зми́евы/ па́че ума́ же и сло́ва родила́ еси́.

Ин кано́н преподо́бнаго, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Светолу́чными мо́лниями Ду́ха освеща́емь и Того́ дохнове́нием испо́лнен,/ я́коже орга́н, преблаже́нне, оглаша́емь, души́ моея́ мрак отжени́/ и пода́ждь ми сло́во по достоя́нию пе́ти тя.

Роди́телей любве́ предпоче́л еси́ Соде́телеву,/ и теку́щаго жития́ – житие́ равноа́нгельно,/ и мирски́я красоты́ – нетле́нное вои́стинну украше́ние всех Царя́,/ и́миже наслажда́ешися, ра́дуяся.

Восто́ка трисо́лнечнаго был еси́ заря́ всесве́тлая,/ трисия́нным све́том жития́ твоего́ земли́ все лице́ осия́ бога́тно/ и греха́ тьму, о́тче, разоря́я словесы́ твои́ми.

Богоро́дичен: Клещя́, ю́же ви́де Иса́ия Ду́хом, угль нося́щая, Ты издале́ча яви́лася еси́,/ угль Божествя́ – Христа́ во чре́ве носи́вши, Пресвята́я неопа́льно/ и на объя́тиих поноси́вши ма́нием вся Нося́щаго.

Песнь 3

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́,/ несть бо свят, па́че Тебе́, Человеколю́бче.

Прему́дростию слове́с Боже́ственных нему́дрыя обличи́л еси́/ и терза́ния плотска́я кре́постию ду́ха претерпе́л еси́,/ Про́кле всеблаже́нне, му́чениче Богодохнове́нне.

Распя́ту тебе́ бы́вшу, неми́лостивно повеле́ дра́ти тя безу́мный,/ к Бо́гу душе́вныя о́чи простира́юща и терпе́нием ти удобря́ема.

Сокруше́ние удо́в му́жески претерпе́л еси́, прему́дре,/ кро́вию же разжже́ние безбо́жия погаси́л еси́, Про́кле,/ укрепля́емь Боже́ственною благода́тию.

Богоро́дичен: Разреши́, Де́во, соу́з зол мои́х,/ сосвяза́ющи мя любви́ из Тебе́ рожде́ннаго Сло́ва, Всенепоро́чная,/ и спаси́ мя, Влады́чице, моли́твами Твои́ми.

Ин

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят,/ па́че Тебе́, еди́не Человеколю́бче.

Возненави́дев от души́ сласте́й го́ресть и до́льния возгнуша́вся сла́вы,/ мирска́го са́на во́лею по́яс отве́рг,/ су́щих на земли́ царе́й предпоче́т всех Царя́.

От пеле́н освяще́н, от ложе́сн избра́н яви́лся еси́:/ честне́й бо ма́тери твое́й Ро́ждшая Христа́ обеща́ да́ти тя/ и, я́ко освяще́н дар, тя а́бие прия́т.

Ми́ром ты мы́сленным ду́шу и ум очи́стив/ и те́ло а́лчбою истни́в, всели́л еси́ Христа́,/ глаго́люща Сего́ име́я в себе́, и ходя́ща, и мир благоуха́юща.

Богоро́дичен: Во утро́бе Твое́й, Чи́стая, Отцу́ сопресто́льное Сло́во все́лься,/ от чи́стых Твои́х крове́й вопло́щся и ро́ждься,/ тварь очи́стив идолонеи́стовства кропле́нием Своей кро́ве.

Конда́к му́чеников, глас 4.

Подо́бен: Вознесы́йся:

Я́ко денни́ца звезда́, возсия́/ му́чеников Про́кла и Ила́рия честно́е страда́ние,/ предозаря́ющи нас чуде́с светлостьми́./ Те́мже пра́зднуем па́мять ва́шу:/ Христа́ Бога́ моли́те, да спасе́т ду́ши на́ша.

Седа́лен, глас 1.

Подо́бен: Гроб Твой, Спа́се:

Ила́рия, ве́рнии, и сла́внаго Про́кла, страда́вшия тве́рдо/ и врага́ низложи́вшия, согла́сно почти́м, Христа́ велича́юще:/ си́и бо чудесы́ страсте́й мглу отго́нят, просвеща́юще ве́рою к ним притека́ющия.

Сла́ва, преподо́бнаго, глас 8.

Подо́бен: Прему́дрости:

Христо́в а́гнец слове́сный, упасы́й на зла́це доброде́телей преподо́бно о́вцы Госпо́дня,/ удивляемь есть от А́нгел, му́жеством посрами́в де́моны,/ в челове́цех поживе́, я́ко безпло́тен./ Те́мже и Тро́ице предста́ досто́йно, упра́вити ста́до моли́твами не престае́т./ К нему́же возопие́м:/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

И ны́не, Богоро́дичен:

В напа́сти многоплете́нныя впад от враг ви́димых и неви́димых,/ бу́рею одержи́м безчи́сленных согреше́ний мои́х,/ и я́ко к те́плому заступле́нию и покро́ву моему́, Чи́стая,/ ко приста́нищу притека́ю Твоей бла́гости./ Те́мже, Пречи́стая, И́же из Тебе́ воплоще́нному безсе́менно/ моли́ся приле́жно о всех рабе́х Твои́х,/ непреста́нно моля́щих Ти ся, Богоро́дице Пречи́стая,/ моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

А́ще не пра́зднуеши, Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

После́дова твои́м словесе́м ве́щи тве́рдостное,/ и́бо кровоя́дец возбраня́ше ити́ к пре́дним,/ до́ндеже Христа́, всех еди́наго Го́спода, испове́дал еси́, Про́кле, Бо́га пресу́щна.

Непобеди́мым дерзнове́нием и до́блим умо́м, страстоте́рпче Про́кле,/ стал еси́ пред суди́щем, воплоще́ние велегла́сно пропове́дуя/ излия́вшаго Себе́ да́же до ра́бияго о́браза, Изба́вителя на́шего.

Безсту́дно у́бо гони́тель мудреце́м пока́зоваше мук ви́ды и ну́жднейшую смерть,/ непобеди́мыя же ви́дя, дивля́шеся/ и, побежде́ние зря свое́, не домышля́шеся.

Богоро́дичен: Сокруше́нное преступле́нием рук Твои́х творе́ние ущедря́я, Сло́ве,/ в ложесна́ Неискусобра́чныя все́лься,/ и во двою́ существу́ прише́л еси́,/ нетле́ния обновля́я пути́ ве́дущим Тя.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Струя́ жи́зни твою́ мысль напои́ Боже́ственнаго Ду́ха де́йством,/ отню́дуже го́ресть сласте́й отри́нувши, Боже́ственныя сла́дости напо́лнися./ Е́юже сы́тости непреста́нныя прие́млющи, пое́т:/ си́ле Твое́й сла́ва, Человеколю́бче.

Огнь искуше́ний и страсте́й пещь слеза́ми твои́х, о́тче, тече́ний/ и духо́вною бога́тною угаси́л еси́ росо́ю, соблю́дся неопале́н,/ опаля́емь бо любо́вию всех Царя́, ве́щная увяди́л еси́ жела́ния.

Ум возне́с к житию́ Небе́сному,/ плотско́е, о́тче, облегчи́л еси́, отягча́вшее ве́щи страсте́й,/ те́мже Тро́ице неукло́нно послужи́л еси́./ Моисе́я же нрав и Илиино́ житие́ подража́я, ви́дел еси́ Го́спода.

Богоро́дичен: Вся добра́ Ты еси́, Чи́стая, бли́жняя моя́,/ Сын Твой, Влады́чице, зове́т Тебе́, святе́йшу А́нгельскаго естества́ обре́т Тя,/ и багряни́цу те́ла истка́ неизрече́нно от чи́стых Твои́х крове́й,/ и сла́вит Того́ сла́вящия.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Ты, Го́споди, кре́пость му́чеников/ и утвержде́ние, Ты, Свя́те, святы́х,/ непоколеби́мая стено́ стра́ждущих усе́рдно.

Жела́нием Боже́ственным ду́шу опаля́я,/ терпе́л еси́, свеща́ми опаля́емь,/ Про́кле преблаже́нне досточу́дне.

Огня́ то́чию ужаса́юся ве́чнаго,/ взыва́л еси́, опаля́емь, му́чениче Про́кле,/ повеле́нии мучи́теля и во́лею умерщвля́емь.

Богоро́дичен: Кто мо́жет сказа́ти Твое́ та́инство, о Влады́чице Богоро́дице!/ Зижди́теля бо всех несказа́нно воплоти́ла еси́.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Дрема́ние уны́ния о́чи се́рдца твоего́ не покры́,/ но ума́ твоего́ и жела́ния Боже́ственнаго жа́лом уязвля́емь, всено́щным стоя́нием/ и в моли́тве терпе́л еси́, пло́ти не покрыва́я бро́ви.

Смиреному́дрие сожи́тельно име́я от ю́ности,/ виде́нии Боже́ственными и поуче́нии ум просвеща́я, льсти́ваго по́мыслом не укра́лся еси́,/ но смире́нно име́л еси́ мудрова́ние.

Богоро́дичен: Я́ко красну́ добро́тою, доброде́телей обре́т Тя пала́ту, кра́сное Сло́во/ в Твоя́ нетле́нная ложесна́ всели́ся/ и из Тебе́ роди́тися неизме́нно благоизво́ли, ве́рных украша́я ли́ца.

Песнь 6

Ирмо́с: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой, Многоми́лостиве.

Ни огнь, ниже́ ра́ны, ни зве́рие,/ ниже́ сме́ртное искуше́ние, до́блии,/ вас разлучи́ти Бо́жия чи́стыя и непоро́чныя любве́ возмого́ша.

Зако́ном хва́льным не порабо́тает му́ченик вои́стинну до кро́ве му́жество,/ еди́н сих сла́вяй Госпо́дь велича́ет я́ко уго́дники.

Благопла́вно пучи́ну преше́дше лю́тых мук,/ устреми́стеся к Боже́ственному приста́нищу,/ е́же о Христе́, страстоте́рпцы му́ченицы, присносу́щнаго наслажде́ния.

Богоро́дичен: Се, Де́ва, – Иса́ия вопия́ше дре́вле, –/ Сове́та А́нгела Вели́каго ражда́ет,/ Емману́ила, Бо́га и Го́спода, и Спа́са душ на́ших.

Ин

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Умертви́в сла́сти, оживи́лся еси́ ду́хом,/ и, связа́в кре́пкаго, сосу́ды расхи́тил еси́ его́,/ и благопотре́бным доброде́телем прия́телища разшири́л еси́ уче́нии твои́ми.

Малосло́вие ле́ностное ума́ отгна́в,/ хлеб живо́тный, и е́же ко изоби́лию, руко́ю и язы́ком твои́м раздава́я, о́тче,/ сугу́б хотя́щим был еси́.

И́же тала́нт от Бо́жия уче́ния обре́т,/ я́ко сый Боже́ственным спе́хом возрасти́в без ме́ры,/ глас Влады́ки твоего́ слы́шиши ра́достен, к лу́чшим зову́щ тя.

Богоро́дичен: Зако́нных кроме́ в Тебе́ Вы́шний вочелове́чися,/ и, плоть непрело́жно я́влься, с челове́ки поживе́,/ и к Небе́сней возвы́ситися стези́ хотя́щим показа́.

Конда́к, глас 2.

Подо́бен: Тве́рдыя:

Плотску́ю тяготу́ утончи́л еси́ де́лы,/ душе́вную же бы́стрость впери́л еси́ просвеще́нием, Михаи́ле,/ и яви́лся еси́ Тро́ице жили́ще,/ Ю́же зря, блаже́нне, я́сно,/ моли́ непреста́нно о всех нас.

И́кос:

Моли́тв неподви́жимый столп,/ соверше́ние любве́ го́рняго благоу́мия, умиле́ния бе́здна,/ не в тре́тию часть взят был еси́ высоты́,/ но иде́же незаходи́мое Божество́ я́сно зрят Херуви́ми,/ и, си́ми виде́нии сия́я, покланя́ешися,/ и сла́ву пребоже́ственную прие́млеши, отону́ду обожа́емь./ Тем пе́ти тя досто́йно не возмога́ем/ и про́сим проще́ния, взыва́юще ку́пно:/ моли́ непреста́нно о всех нас.

Песнь 7

Ирмо́с: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.

Телеса́ ра́нам преда́вше, любо́вию вопло́щшагося Сло́ва, му́ченицы,/ от Сего́ вене́ц пра́вды прия́сте в ле́поту.

Све́том Боже́ственным ум просве́щше,/ ве́рою муче́ния тьму претеко́сте, вопию́ще, прехва́льнии:/ оте́ц на́ших Бо́же, благослове́н еси́.

Тече́нием твои́х усте́н медото́чных слове́с, преблаже́нне Про́кле,/ я́ко Боже́ственным исцеле́нием напоя́еши пою́щия:/ оте́ц на́ших Бо́же, благослове́н еси́.

Си́лою Боже́ственною ум укре́пль,/ мук го́рькия ви́ды претерпе́л еси́, зовы́й, Ила́рие:/ оте́ц на́ших Бо́же, благослове́н еси́.

Богоро́дичен: Я́ко вы́шши всех тва́рей, ражда́еши всех Зижди́теля,/ пребы́вши Де́вою, Нескве́рная, Благослове́нная,/ еди́на при́сно Препросла́вленная.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Се́мя прие́м в се́рдцы за́поведей Бо́жиих/ па́че стори́ц, и ты́сяща плод прине́сл еси́ клас Боже́ственный – мона́хов, вопию́щих:/ благослове́н Бог оте́ц на́ших.

Ду́ха сосу́д Пресвята́го яви́шася устне́ твои́/ и я́коже наводне́нии язы́к честна́я уче́ния, Тро́ице согла́сно зову́щим:/ благослове́н Бог оте́ц на́ших.

Богоро́дичен: Без се́мене всели́ся во чре́во Твое́ созда́вый мя,/ и из Тебе́ плотоно́сец Бог и Челове́к про́йде,/ не во две раздели́ся ипоста́си, ни смеше́ния подъя́т,/ отце́в Бог благослове́нный.

Песнь 8

Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

По мно́гих му́ках стреля́нию свире́пый враг тя предае́т,/ от ни́хже ссеца́емь, всехва́льный Про́кле,/ ра́дуяся, в ру́це Бо́жии пре́дал еси́ дух твой.

Уязви́ся честно́е те́ло твое́ непреста́нными стреля́нии, свя́те,/ и неисце́льно уязви́ враги́ безпло́тныя, не пою́щия:/ благослови́те, вся дела́ Госпо́дня, Го́спода.

Просвеща́емь заре́ю благода́ти, я́коже ка́мень, на земли́ валя́емь,/ сокруши́л еси́, Ила́рие, утвержде́ние пре́лести, поя́ в кре́пости:/ благослови́те, вся дела́ Госпо́дня, Го́спода.

Ка́пли крове́й твои́х, поте́кше, нече́стия огнь угаси́ша,/ ве́рныя же напои́ша, пою́щия непреста́нно:/ благослови́те, вся дела́ Госпо́дня, Го́спода.

Богоро́дичен: Вопло́щся от чи́стых крове́й Твои́х, Бог, сотвори́вый и созда́вый мя,/ Богороди́тельнице Влады́чице, обнови́ мир, вопию́щий:/ благослови́те, вся дела́ Госпо́дня, Го́спода.

Ин

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

И́же пренепости́жную Госпо́дню красоту́ ели́ко жела́ние бя́ше, во пло́ти зря ума́ све́тлостию,/ ны́не персть оста́вль и к Небеси́ до конца́ пресели́вся,/ пред лице́м предстои́ши Тро́ицы, зовы́й:/ лю́дие, превозноси́те Го́спода во вся ве́ки.

Многоце́нный тебе́ вене́ц, по́двиг сконча́вшу, и́же на де́моны, Влады́ка подаде́,/ зла́та светле́йши и би́сера красне́йши, ца́рства и безсме́ртия, о о́тче,/ сия́я па́че со́лнца, зове́ши:/ лю́дие, превозноси́те Го́спода во вся ве́ки.

О, сла́дкаго язы́ка твоего́, и́мже прему́дро улови́л еси́ поглоще́нныя враго́м льсти́вым!/ И ко измене́нию Боже́ственному премени́л еси́,/ водрузи́в единообра́зно се́ни, я́ко песо́к, и зовя́ непреста́нно:/ свяще́нницы, благослови́те, лю́дие, превозноси́те Го́спода во вся ве́ки.

Богоро́дичен: Умерщвле́нныя жа́лом всепа́губным змии́ным,/ еди́на, Живода́вца Бо́га ро́ждшая, Де́во, оживи́ла еси́./ Его́же приле́жно моли́ воста́ния страсте́й утиши́ти, любо́вию пою́щих:/ свяще́нницы, благослови́те, лю́дие, превозноси́те Его́ во вся ве́ки.

Песнь 9

Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.

Се светоза́рная, и свяще́нная, и благонаро́читая му́ченик па́мять возсия́,/ всю зе́млю просвеща́ющи, мрак зло́бы отъе́млющи,/ и о́блак душа́м отгоня́ющи, и исцеле́ний благода́ть точа́щи.

Я́коже два сосца́ духо́вна, пролива́юща исцеле́ний млеко́, му́ченицы,/ вся́ка напитава́ете сердца́, го́ресть неду́гов отгоня́ще и стра́сти лю́тыя исцеля́юще./ Те́мже досто́йно блажи́ми есте́.

Ка́плями крове́й свяще́нных омочи́вше багряни́цу, пресла́внии,/ и сию́ красно́ нося́ще, со Христо́м ца́рствуете всегда́,/ еди́нем Царе́м и Бо́гом на́шим, о ми́ре моля́щеся.

Земля́ благослови́ся ва́шими кровьми́ и моще́й положе́нием,/ перворо́дных Це́рковь Ду́хом боже́ственне светле́ется,/ в не́йже с му́ченики, я́ко му́ченицы, о ми́ре моли́теся.

Богоро́дичен: Све́та жили́ще, Чи́стая, Твое́, Пречи́стая, бысть чре́во, Влады́чице,/ Тебе́ ра́ди Я́вльшагося в ве́щи зри́ме теле́сней и вся су́щия во тьме Просве́щша./ Те́мже Тя ве́рою ублажа́ем.

Ин

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к. / Те́мже Пречи́стую Богоро́дицу, ве́рнии, велича́ем.

Днесь вся земля́ прии́де, пропове́дающи Христо́во Боже́ственное и́мя,/ пресла́вную и Боже́ственную па́мять твою́ торжеству́я:/ ты бо онебеси́л еси́ ю монахообра́зными уче́ньми/ и уясни́л еси́ а́нгельским ревну́ющия чино́м.

Свети́ша мо́лнии твои́х чуде́с вся концы́,/ моля́щим бо ся ве́рою ра́ка твоя́ источа́ет исцеле́ния./ И тебе́ у́бо и́мать не́бо, земля́ же земну́ю сень те́ла,/ ю́же пре́жде гро́ба истни́вшуюся воздержа́нием твои́м.

Зе́млен ум не мо́жет свет он разуме́ти,/ пресве́тлый и пренеизглаго́ланный Тро́ический,/ его́же ны́не прия́л еси́, и́мже и обожа́емь я́ве./ Помина́ющих тя, преблаже́нне, помяни́, Тро́ице Святе́й предстоя́.

Богоро́дичен: Яви́хомся жи́зни Боже́ственныя отпаде́ни дре́ва ра́ди разу́мнаго;/ Ты же родила́ еси́ жи́зни дре́во, Христа́ Бо́га,/ И́же от а́довых те́мных жили́щ изведе́/ и к неотъе́млемей введе́ жи́зни пою́щия Тя.

Свети́лен.

Подо́бен: Не́бо звезда́ми:

А́нгельскаго жития́ жела́я, удали́л еси́ себе́ всех кра́сных жития́,/ всели́лся еси́ во дво́рех за́поведей Госпо́дних/ и со А́нгелы ра́дуешися.

Сла́ва, и ны́не, Богоро́дичен:

Я́же от Бо́га ми́рови пода́нным благи́м Ты вина́ еси́, Богоро́дице,/ но и ны́не ми́лостивна сотвори́ о о́бщем спасе́нии благопреме́ннаго Бо́га.

На хвали́тех стихи́ры, глас 4:

Воздержа́нием мудрова́ния пло́ти умертви́л еси́/ и ду́шу оживи́л еси́ пусты́нным селе́нием/ и доброде́телей соверше́нием./ Тем и яви́ся соверше́н вои́стинну,/ я́ко бо сон вмени́ся тебе́ смерть,/ и, к Бо́гу предста́в, в ру́це ду́шу пре́дал еси́ Тому́,/ Михаи́ле о́тче всесла́вне.

Стра́сти успи́л еси́ жела́ний свои́х, преподо́бне,/ бде́нием всено́щным,/ я́ко име́я послуша́ние и смире́ние,/ на основа́нии Боже́ственных Писа́ний,/ и се́рдце чи́сто, и ум непрело́жен./ Тем бысть и прия́телище Ду́ха Свята́го,/ луча́ми чуде́с просвеща́я концы́.

Ду́ха сия́ние я́ве насле́довал еси́,/ лука́выя же ду́хи отгна́л еси́/ и священному́дрием ду́шу насели́л еси́,/ и́мже спаса́ются мно́зи наставля́еми/ и почита́ют ве́рою твою́ па́мять тве́рдо,/ по́двиги же и чудеса́ пресла́вная,/ Михаи́ле, отце́м похвало́.

Сла́ва, глас 5:

Преподо́бне о́тче,/ не дал еси́ сна твои́ма очи́ма,/ ни ве́ждома твои́ма дрема́ния,/ до́ндеже ду́шу и те́ло от страсте́й свободи́л еси́/ и себе́ угото́вал еси́ Ду́ху жили́ще,/ прише́д бо Христо́с со Отце́м,/ оби́тель в тебе́ сотвори́./ Единосу́щныя Тро́ицы уго́дник быв,/ вели́кий пропове́дниче, о́тче наш,/ моли́ о душа́х на́ших.

И ны́не, Богоро́дичен.

Аще не пра́зднуеши, Крестобогоро́дичен.

Подо́бен: Ра́дуйся:

А́гнца Своего́ А́гница иногда́ зря́щи, к заколе́нию тща́щася,/ усе́рдно после́доваше, сия́ вопию́щи Ему́:/ ка́мо и́деши, Ча́до Мое́ Сладча́йшее, Христе́?/ чесо́ ра́ди ско́рое тече́ние сие́, Долготерпели́ве, тече́ши неле́ностно?/ Иису́се Вожделе́ннейший, Безгре́шне, Многоми́лостиве Го́споди,/ даждь Ми сло́во, Рабе́ Твое́й,/ Сы́не Мой Вселюбе́знейший,/ не пре́зри, Ще́дре, молча́,/ Тя стра́нно Ро́ждшую, Бо́же Всеще́дре,/ да́руяй ми́рови ве́лию ми́лость.

На стихо́вне во Окто́ихе.

Сла́ва, глас 6: Преподо́бне о́тче,/ до́бру обре́те ле́ствицу: пи́сана по 50-м псалме́.

НА ВЕЧЕ́РНИ

На Го́споди, воззва́х: стихи́ры, глас 1.

Подо́бен: Всехва́льнии му́ченицы:

О́тче преподо́бне Си́моне,/ твоя́ кра́сная па́мять/ по́стников собра́ние весели́т до́бре,/ твое́ же житие́ и чуде́с благода́ть/ к похвале́нию созыва́ет чту́щия тя./ Христа́ моли́ дарова́ти душа́м на́шим/ мир и ве́лию ми́лость.

Отче преподо́бне Си́моне,/ твоего́ уста́ва по́стнаго/ проти́внии убоя́шася/ и про́кляти бы́ша твои́ми моли́твами непреста́нными, всехва́льне,/ Христа́ бо соде́тельствующа стяжа́в,/ Его́же моли́ дарова́ти душа́м на́шим/ мир и ве́лию ми́лость.

О́тче преподо́бне Си́моне,/ Христа́ возлюби́в,/ вся́ко Того́ Боже́ственным стопа́м после́довал еси́,/ крест взем, плоть умертви́в,/ живе́ши, Богоно́се, ду́хом,/ и ны́не моли́ дарова́ти душа́м на́шим/ мир и ве́лию ми́лость.

Сла́ва, глас 5:

Преподо́бне о́тче,/ не дал е́си сна очи́ма твои́ма,/ ни ве́ждома твои́ма дрема́ния,/ до́ндеже ду́шу и те́ло от страсте́й свободи́л еси́/ и себе́ угото́вал еси́ Ду́ха жили́ще,/ прише́д бо, Христо́с со Отце́м/ оби́тель в тебе́ сотвори́./ Единосу́щныя Тро́ицы благода́ть прии́м,/ великопропове́дниче преподо́бне,/ моли́ся о душа́х на́ших.

И ны́не, Богоро́дичен.

Вход. Проки́мен дне. И чте́ния преподо́бническая (зри день 19-й).

На стихо́вне стихи́ры, глас 1.

Подо́бен: Всехва́льнии му́ченицы:

Прехва́льне Си́моне,/ твое́ житие́ возложи́л еси́/ доброде́телей попече́ние,/ песносло́вием бо ве́рнии/ ве́рою Христа́ похваля́ют,/ твои́ми покаря́ющеся уче́нии,/ и́мже утверди́тися в ми́ре,/ предстоя́, умоли́ Боже́ственнаго Ду́ха.

Стих: Честна́ пред Го́сподем/ смерть преподо́бных Его.

Богодухнове́нне му́чениче Си́моне,/ твое́ житие́ у́бо ра́вно А́нгелом/ земны́м объяви́ся,/ Небе́сным же я́ко благово́нная же́ртва/ и до́брое кади́ло/ твое́ испове́дание принесе́ся./ И ны́не моли́ся/ дарова́ти душа́м на́шим/ мир и ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Дарова́нии Ду́ха/ Боже́ственными сия́нии просве́щся,/ приснопа́мятне Си́моне,/ свети́льник показа́ся конце́м,/ боле́зней, зол и страсте́й тьму отгоня́я моли́твами,/ избавля́я неду́г, и скорбе́й, и бед/ и́же ве́рою соверша́ющих при́сно честну́ю па́мять твою́.

Сла́ва, глас 2:

Пусты́ня, я́же пре́жде бесо́вская жили́ща иму́щи,/ ны́не же, Си́моне, ученико́в твои́х мно́жеством украша́ется,/ иде́же и храм прече́стен в сла́ву Воздви́жения Животворя́щаго Креста́ воздви́гл еси́,/ разли́чными добро́тами укра́шен,/ те́мже в нем днесь соше́дшеся/ и честны́й гроб твой обстоя́ще любе́зно,/ мо́лимся, покланя́ющеся и глаго́люще:/ Церква́м единомы́слие да́руй,/ правосла́вному во́инству на враги́ спосо́бствуй моли́твами твои́ми/ и нам испроси́ мир и душа́м на́шим ве́лию ми́лость.

И ны́не, Богоро́дичен.

Тропа́рь, глас 4:

От ю́ности твоея́ впери́в ум твой к Бо́гу, блаже́нне Си́моне,/ ми́ра же отве́ргся, всели́лся еси́ в пусты́ню непроходи́мую,/ и та́мо, от Го́спода укрепля́емь,/ в моли́твах и поще́ниих до́блественне пожи́л еси́,/ и жизнь твою́ страда́льчески убие́нием от сыно́в противле́ния сконча́л еси́./ Сего́ ра́ди со преподо́бными и му́ченики венча́лся еси́,/ с ни́ми же и ны́не предстои́ши Престо́лу Пресвяты́я Тро́ицы./ Сию́ моли́, мо́лим тя, оставле́ние пода́ти согреше́ний на́ших/ и дарова́ти нам ве́лию ми́лость.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4.

Подо́бен: Вознесы́йся:

Земны́х и тле́ющих наслажде́ния небре́гл еси́/ и в пусты́ни житие́ возлюби́л еси́,/ ми́ра красоты́ и пи́щи вре́менныя возненави́дел еси́/ и отсю́ду сподо́бился еси́ му́ченическому сочета́тися ли́ку./ С ни́миже моли́ спасти́ рабы́ твоя́.

Сла́ва, и ны́не, Богоро́дичен:

На Престо́ле херуви́мстем седи́й/ и в не́дрех О́тчих водворя́яйся,/ я́ко на престо́ле святе́м седи́т Свое́м, Влады́чице, в не́дрех Твои́х./ Вопло́щся бо Бог и́стинно воцари́ся над все́ми язы́ки,/ и разу́мно ны́не пое́м Ему́./ Его́же умоли́ спасти́ся рабо́м Твои́м.

По 2-м стихосло́вии седа́лен, глас 8.

Подо́бен: Прему́дрости:

Иоа́нновы нра́вы Крести́теля и Илии́ Фесви́тянина доброде́тели посто́м подража́я,/ безпло́тно пожи́л еси́, со А́нгелы сла́вя Святу́ю Тро́ицу Боже́ственную/ и бесо́вская нахожде́ния побежда́я му́жеством./ Тем и страда́нием кре́пко подвиза́вся,/ Христо́ву Боже́ственному воплоще́нию кла́няяся с Божество́м, Си́моне блаже́нне,/ Его́же моли́ грехо́в оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, безсе́менно ро́ждшую Бо́га пло́тию,/ вси ублажа́ем, ро́ди челове́честии,/ О́гнь бо всели́ся в Тя Божества́,/ и, я́ко Младе́нца, дои́ши Зижди́теля и Го́спода./ Тем, а́нгельский собо́р и челове́ческий род, досто́йно сла́вим всесвято́е рождество́ Твое́ и согла́сно вопие́м Ти:/ моли́ Христа́ Бо́га прегреше́ний оставле́ние дарова́ти/ досто́йно пою́щим сла́ву Твою́.

Велича́ние:

Ублажа́ем тя,/ преподобному́чениче Си́моне,/ и чтим святу́ю па́мять твою́,/ наста́вниче мона́хов/ и собесе́дниче А́нгелов.

Псало́м избра́нный: Терпя́, потерпе́х Го́спода: По полиеле́и седа́лен, глас 8.

Подо́бен: Прему́дрости:

В пусты́ню, блаже́нне, всели́вся/ и в ней пречестны́й храм Честна́го и Животворя́щаго Креста́ воздви́г,/ мно́жество и́ночествующих та́мо собра́л еси́./ Благослови́ с тобо́ю рабо́тающия,/ и́хже сохраня́й от вся́каго вре́да лука́ваго,/ да всегда́ благода́рственно вопие́м ти, преблаже́нне Си́моне:/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

О Тебе́ ра́дуется, Благода́тная, вся́кая тварь,/ а́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́, из Нея́же Бог воплоти́ся и Младе́нец бысть, пре́жде век Сый Бог наш./ Ложесна́ бо Твоя́ престо́л сотвори́/ и чре́во Твое́ простра́ннее небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Мир возненави́дев,/ Христа́ возлюби́л еси́/ и, То́му после́довав, власяни́цу тя́жку на те́ле свое́м носи́л еси́,/ посто́м и бде́нием себе́ удручи́в,/ я́ко безпло́тен на земли́ пожи́л еси́/ и, ду́шу пресве́тлу Бо́гови предста́вив,/ дарова́ний чуде́с сподо́бися./ Тем мо́лимся, о́тче преподо́бне Си́моне:/ моли́ Христа́ Бо́га/ спасти́ся душа́м на́шим.

Кано́н преподобному́ченику Си́мону, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца, спасе́,/ песнь Бо́гови воспева́юща.

Сло́во ми даждь, Сло́ве Бо́жий, Светода́вче Христе́,/ воспе́ти све́тлое и светоно́сное житие́ Твоего́ уго́дника, преподо́бнаго Си́мона./ Моли́твами его́ разори́ мрак се́рдца моего́/ и Твои́м све́том ду́шу озари́, молю́ся.

Влады́чнему любостра́нству, преподо́бне, подо́бяся,/ сего́ ра́ди и сам стра́нствовати изво́лил еси́,/ те́мже и Всеви́дящее О́ко, ви́дев твое́ благо́е изволе́ние,/ да́ром чуде́с обогати́ тя, Си́моне преподобнопа́мятне.

Трисо́лнечным сия́нием озаря́емь, Богому́дре,/ зло́е бесо́в шата́ние и вра́жия преще́ния, блаже́нне,/ ра́нами боле́зней, я́ко паучи́ну, разори́л еси́,/ Бо́жиим Ду́хом разжига́емь, Си́моне блаже́нне.

Богоро́дичен: Я́ко Бо́жия Ма́ти, дерзнове́ние иму́щи к ро́ждшемуся из Тебе́ Единоро́дному Сло́ву,/ Отцу́ собезнача́льну и сра́слену Ду́ху Свято́му,/ моля́щи не преста́й от бед спасти́ся, Всенепоро́чная,/ и́же Тя, Богоро́дицу, сла́вящим.

Песнь 3

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

Кто изрещи́ мо́жет на земли́ твоя́ боле́зни, о́тче, и по́двиги,/ и́хже ра́ди досто́йную мзду насле́дова от Бо́га/ и был еси́ прия́телище Боже́ственному Ду́ху,/ преподо́бен и и́стинен, преди́вен и непоро́чен.

Укрепи́л еси́ ум ра́зумом Боже́ственным, о́тче Си́моне,/ прему́дростию духо́вною и сло́вом украси́лся еси́,/ тем привлече́ мно́гих ду́ши во спасе́ние,/ яви́в и́ноком изве́стное жития́ прописа́ние.

Зло́бы нача́льник, враг, хотя́ тебе́ па́кость сотвори́ти, преподо́бне Си́моне,/ лука́вых челове́ков на тя вооружа́ет,/ тебе́ прирази́вся, постыде́ся,/ Христу́ бо тя соблюда́ющу.

Богоро́дичен: Херуви́мов и Серафи́мов превы́шши явилася еси́, Богоро́дице,/ Ты бо еди́на прия́ла еси́ Невмести́маго Бо́га во чре́ве Твое́м, Нескве́рная./ Те́мже Тя вси, ве́рнии, пе́сньми, Чи́стая, ублажа́ем.

Седа́лен, глас 8.

Подо́бен: Прему́дрости:

Христо́вою любо́вию связа́в свою́ ду́шу,/ поще́ния страда́нием утверди́вся,/ зла́та светле́йше благоче́стием облиста́ и чи́стое прия́телище бысть Ду́хови,/ лука́вых духо́в тьму разгна́л еси́./ Тем, собра́в и́ночествующих мно́жества,/ па́стырь им бысть и свети́льник све́тел, Си́моне преподо́бне./ Моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Всенепоро́чная Неве́ста Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́нию мя су́ща скве́рно жили́ще и де́монов игра́лище в ра́зуме бы́вша,/ потщи́ся от сих злоде́йствия мя изба́вити, све́тло жили́ще доброде́тельми соде́лавши,/ Светода́тельная и Нетле́нная, разжени́ о́блак страсте́й и Вы́шняго прича́стия сподо́би/ и све́та невече́рняго моли́твами Твои́ми.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Све́тлое твое́ житие́ я́ко пра́вило изве́стно вся́кия доброде́тели, о́тче, показа́ся,/ в моли́твах бо, и поще́ниих, и бде́ниих же и мольба́х пребыва́л еси,/ и́же ко Христу́ Человеколю́бцу.

Сна свои́ма очи́ма не дал еси́, блаже́нне Си́моне,/ ни ве́ждома дрема́ния,/ до́ндеже сподо́бися преди́вных селе́ний,/ и́же угото́ва Бог, преподо́бне, лю́бящим Его́.

Стеня́, и пля́ча, и се́туя умиле́нием,/ слезя́ми кропя́ зе́млю при́сно,/ о́тче Богому́дре, соверша́ше путь свой,/ до́ндеже обре́те Боже́ственное во гра́де Бо́жии жили́ще/ и со все́ми святы́ми, преподо́бне, всели́ся.

Богоро́дичен: Бо́га, И́же из Тебе́ воплоще́ннаго непрело́жно, моли́,/ пребы́вша естество́м ра́вна Отцу́ и Тебе́, Ро́ждшей,/ проще́ние согреше́нием и душа́м спасе́ние пою́щим Тя ве́рою дарова́ти.

Песнь 5

Ирмо́с: Вску́ю мя отри́ нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ мои́ напра́ви, молю́ся.

Погаси́в стра́сти росо́ю по́двиг твои́х, о́тче блаже́нне,/ бога́тно возже́гл еси́ огне́м любве́ и ве́ры воздержа́ния свети́льник/ и просвеще́ние безстра́стия и дне сын яви́лся еси́.

Исцеле́ний тебе́ благода́ть Христо́с в неду́зех разли́чных дарова́/ и на ду́хи нечи́стыя власть, му́дре,/ естество́ бо, о́тче, победи́л еси́,/ и́же па́че естества́ дарова́ний сподо́бися Ду́ха.

Ра́йскую добро́ту жела́я, преподо́бне Си́моне,/ и тоя́ ра́ди в слеза́х, и воздыха́ниих, и бде́ниих, и моли́твах свою́ жизнь проводи́л еси́./ Сего́ ра́ди и по сме́рти от Христа́ чудесы́ просла́вися.

Богоро́дичен: Тя сте́ну иму́ще и заступле́нием Твои́м соблюда́еми,/ Твое́ю Боже́ственною сла́вою хва́лящеся, Тя ублажа́ем,/ Ты бо, Пречи́стая, душа́м на́шим источа́еши весе́лие и ра́дование.

Песнь 6

Ирмо́с: Очи́сти мя, Спа́се,/ мно́га бо беззако́ния мои́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Главы́ враго́в мы́сленных сокруши́ти мо́лимся/ и ви́димыя под но́зе покори́ти правосла́вному во́инству на́шему;/ моли́ся, преподобному́чениче, о чту́щих любо́вию святу́ю пя́мять твою́.

Жития́ твоего́ исправле́ния и веща́ния, о́тче,/ всю обтеко́ша отню́д вселе́нную,/ и в пресла́вную высоту́ дости́гл еси́, Бо́гу тя просла́вльшу/ и сла́вна всем сотво́ршу.

Ни́щим строи́тель и вдови́цам предста́тель,/ промы́сленник сирота́м, печа́льным уте́ха,/ па́дшим исправле́ние, оби́димым засту́пник скор был еси́,/ своему́, о́тче, подо́бяся учи́телю.

Богоро́дичен: Возвы́сила еси́ вои́стинну па́дшее челове́ческое существо́,/ И́же О́бразом Боже́ственным и Отца́ Ра́венством,/ ви́димым Сы́ном неизме́нным, Богома́ти,/ без се́мене во чре́ве поноси́вши.

Конда́к, глас 8:

Возложи́в себе́ Бо́гу, па́че всех возлю́бленному,/ от ю́ности, преподобному́чениче, Тому́ от всея́ души́ любо́вию после́довал еси́,/ ми́ра же тле́нная ни во что же вмени́в,/ и в непроходи́мую пусты́ню всели́лся еси́,/ и в ней до́бре проти́ву неви́димаго врага́ подвиза́вся,/ и, я́ко светоза́рное со́лнце, во вся концы́ возсия́л еси́,/ и от челове́ков ненави́стных ну́ждную смерть, и мечно́е посече́ние,/ и ножи́ разбоде́ние, и о́гненное опале́ние прия́л еси́,/ и, ра́дуяся, прише́л еси́ к Небе́сным черто́гом./ И ны́не со Безпло́тными ли́ки Влады́чнему Престо́лу предстоя́,/ помина́й нас, чту́щих па́мять твою́, да зове́м ти:/ ра́дуйся, Си́моне преподо́бне, пусты́нный жи́телю.

И́кос:

Зва́нию Го́спода своего́ после́довал еси́ приле́жно, блаже́нне,/ вся, я́же в ми́ре кра́сная, Его́ ра́ди преоби́дев,/ те́мже вопие́м ти:/ ра́дуйся, я́ко Христа́ измла́да возлюби́вый/ и си́лою Его́ претерпе́вый пусты́нное озлобле́ние усе́рдно./ Ра́дуйся, я́ко Вы́шняго по́мощию бесо́вскую пре́лесть попра́л еси́;/ ра́дуйся, я́ко прече́стен храм Воздви́жения Честна́го Креста́ воздви́гл еси́./ Ра́дуйся, я́ко в нем тобо́ю Бог прославля́ется;/ ра́дуйся, я́ко собра́л еси́ ученико́в мно́жество./ Ра́дуйся, я́ко с те́ми приле́жно Го́сподеви рабо́тал еси́;/ ра́дуйся, я́ко удиви́ А́нгелы житие́м свои́м./ Ра́дуйся, я́ко тобо́ю челове́цы по́льзовашася;/ ра́дуйся, Правосла́вныя Руси́ похвало́./ Ра́дуйся, христолюби́вому во́инству утвержде́ние;/ ра́дуйся, я́ко моли́твами твои́ми сопроти́внии побежда́ются./ Ра́дуйся, Си́моне преподо́бне, пусты́ный жи́телю.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Истощи́ лу́ки стрел враг вселука́вый,/ устраши́ти тя не возмо́же,/ си́лою бо Вы́шняго укрепля́емь и Того́ по́мощию вооружа́емь, преподо́бне, поя́ше:/ благослове́н еси́, Бо́же оте́ц на́ших.

Бу́дущия жи́зни взыска́в, сла́ву маловре́менную небре́гл еси́/ и, в пусты́ню всели́вся, блаже́нне,/ со зве́ри жи́ти изво́лил еси́, поя́:/ благослове́н еси́, Бо́же оте́ц на́ших.

Враг, прирази́вся тебе́, преподо́бне, разбо́йники на тя посыла́ет,/ постыде́вся же Боже́ственнаго хра́ма непоколеби́ма,/ утвержде́н бо бе на ка́мени.

Богоро́дичен: Го́ру Тя проро́к Дании́л Боже́ственным Ду́хом нарече́, Де́во,/ из нея́же ка́мень, Христо́с, без руку́ отсече́ся/ и сокруше́ние соде́я истука́нных пре́лести.

Песнь 8

Ирмо́с:С едмери́цею пещь/ халде́йский мучи́тель/ Богочести́вым неи́стовно разжже́,/ си ́ лою же лу́чшею спасе́ны сии́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Царе́ви всех и Бо́гу со святы́ми предстоя́, Си́моне,/ моли́ся стране́ на́шей побе́ды на ва́рвары дарова́ти/ и грехо́в оставле́ние твою́ па́мять почита́ющим и пою́щим вы́ну:/ свяще́нницы, воспо́йте, лю́дие, превозноси́те во вся ве́ки.

Госпо́дним за́поведем изве́стен храни́тель был еси́,/ раздробля́я а́лчущим хлеб свой, преподо́бне./ Та́ющую гла́дом доброде́телей ду́шу мою́ насы́ти, блаже́нне, пою́ща любо́вию:/ свяще́нницы, воспо́йте, лю́дие, превозноси́те во вся ве́ки.

Разбо́йник иногда́ наше́ствие, к пусты́ни твое́й устреми́вшихся,/ Боже́ственною си́лою устраши́л еси́,/ и ны́не на нас мы́сленных враго́в устремле́ния моли́твами свои́ми разори́, пою́щих:/ свяще́нницы, воспо́йте, лю́дие, превозноси́те во вся ве́ки.

Богоро́дичен: К Богоро́дице все свое́ упова́ние име́л еси́, Си́моне,/ и Той призыва́нием вра́жия се́ти вся прете́рл еси́ и лю́тых воста́ние низложи́./ С Не́ю же, преподо́бне, моли́ся/ о и́же любо́вию честну́ю твою́ па́мять чту́щих и вопию́щих:/ свяще́нницы, воспо́йте, лю́дие, превозноси́те во вся ве́ки.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с,/ Тем Тя, Богоро́дицу,/ А́нгелов и челове́к чинонача́лия велича́ют.

Бе́гая сла́вы от челове́к, в пусты́ню всели́лся еси́,/ вся, и́же в ми́ре кра́сная, во уме́ты вмени́в, да Христа́ еди́наго приобря́щеши./ Его́же ра́ди пусты́нная озлобле́ния претерпе́,/ да тле́нными нетле́нная измени́ши, Си́моне преподо́бне.

От ме́ста отогня́ти тя враг покуша́ется:/ челове́ки на убие́ние твое́ поощря́ет, Си́моне преподо́бне,/ и́хже до́бре уче́нием твои́м наказа́л еси́/ и, я́коже свои́, при́сно тех возлюби́л еси́.

Не забу́ди посеще́ния чад свои́х, Си́моне преподо́бне,/ и́же к ра́це моще́й твои́х притека́ющих и любо́вию па́мять твою́ торжеству́ющих,/ от всех искуше́ний вра́жиих изба́витися всех Влады́це моли́ся, блаже́нне.

Богоро́дичен: Зачала́ еси́, Де́во, без се́мене/ И́же вся́ческая созда́вшаго, Сло́во Бо́жие, кроме́ хоте́ния и пло́ти,/ и без истле́ния родила́ еси́, кроме́ боле́зней ма́терних./ Тем Тя, Богоро́дице, язы́ком и се́рдцем испове́дающе, велича́ем.

Свети́лен:

Вся су́етная ми́ра сего́ оста́вль,/ Христа́ приобре́л еси́/ и, трудополо́жно пожи́в, смерть ну́ждную восприял еси́./ Тем па́мять твою́, Си́моне блаже́нне, почита́ем.

Сла́ва, и ны́не, Богоро́дичен:

Бо́га нам, Пречи́стая, родила́ еси́,/ и вси, прароди́тельныя кля́твы изба́вльшеся,/ воспева́ем Тя, Препе́тая.

На хвали́тех стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ В после́дних ро́дех/ просия́ в доброде́телех посты́ и моли́твами,/ и труды́ теле́сными, и ины́ми мно́гими страда́нии,/ во все вре́мя своего́ жития́/ ум вперя́я к Бо́гу,/ подвиза́яся неосла́бно, о́тче Си́моне.

Ве́рою соше́дшеся,/ вси я́ко по́стника Христо́ва тя почита́ем, Си́моне,/ ра́дуяся бо, ше́ствовал еси́ в пусты́ни непроходи́мей, му́дре,/ наста́вник был еси́ че́стен./ Те́мже тебе́ мы ве́рою взыва́ем:/ о всебла́женне, по́стником похвало́,/ о нас моли́ся ко Го́споду/ поми́ловатися душа́м на́шим.

Преподо́бне о́тче Си́моне,/ бу́дущия ра́ди жи́зни/ в лес те́мный всели́ся,/ ника́коже боя́ся неви́димых враго́в,/ а́ще и, мно́ги ско́рби творя́ще, приидо́ша к тебе́,/ ты же моли́твами свои́ми сих без ве́сти творя́ше,/ о терпели́вый душе́ю, пусты́нный жи́телю,/ тем тя ве́рою вси почита́ем и ублажа́ем.

Сла́ва, глас 2:

Прииди́те, пе́сньми венча́ем страда́льца Христо́ва,/ я́ко крин се́льный и рая́ Боже́ственнаго благора́сленный цвет,/ правосла́вных овча́, чистоты́ добро́та,/ ве́ры утвержде́ние, сла́ва воздержа́ния/ яви́ся я́вственно ми́рови./ Те́мже вене́ц прия́т Ца́рствия непреме́нен.

И ны́не, Богоро́дичен, глас то́йже: Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

НА ЛИТУРГИ́И

Блаже́нны от кано́на, пе́сни 3-я и 6-я. Апо́стол к Ри́мляном, зача́ло 99. Ева́нгелие от Луки́, зача́ло 64. Прича́стен: Ра́дуйтеся, пра́веднии:

Тропа́рь, глас 4:

Оте́чество свое́ и род оста́вил еси́,/ Христу́ прилепи́ся,/ и Вели́каго Новагра́да дости́гл еси́,/ и в нем во юро́дстве трудолю́бное твое́ те́ло изнури́л еси́/ мно́гим посто́м и воздержа́нием,/ и проро́чествия дар прия́ти сподо́бися,/ и многошве́нныя ри́зы изво́лил еси́ на себе́ носи́ти,/ и, те́ло в нем предложи́в,/ оби́тель себе́ в преми́рнем Ца́рствии у Христа́, всех Бо́га, сотвори́л еси́./ Его́же моли́, свя́те Арсе́ние преподо́бне,/ Це́ркви и стране́ на́шей в ми́ре пребыва́ти от всех наве́т вра́жиих,/ уще́дрити нас, почита́ющих твое́ торжество́,/ и спасти́ ду́ши на́ша.

Ин тропа́рь, глас 1:

Боже́ственною любо́вию возгоре́вся,/ вся мирска́я пристра́стия отри́нул еси́,/ крест же Христо́в на ра́мо взем,/ восле́д Его́ изво́лил еси́ ходи́ти,/ оте́чество твое́ оста́вив, Вели́каго Новагра́да дости́гл еси́/ и, рабо́тая Бо́гови невозвра́тным по́мыслом,/ дарова́ния чудотворе́ний сподо́бился еси́./ Те́мже, чту́ще тя, преподо́бне Арсе́ние, вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Сла́ва, и ны́не, Богоро́дичен.

Кано́н преподо́бнаго Арсе́ния, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Иису́су:Поми́луй мя, Всеси́льне Царю, Человеколю́бче Спа́се,/ и не омерзи́ мене́ во отча́янии уны́ния,/ к Те бе́ бо молю́ся и припа́даю, я́ко Милосе́рдному Влады́це.

Преподо́бному: Преподо́бне ста́рче Бо́жий Арсе́ние,/ ты, от ю́ности Христа́ возлюби́в и крест взем,/ восле́д Его́ хожда́ше,/ и мно́га моле́ния ны́не за всех возсыла́еши.

Мно́ги труды́ и по́двиги подъя́т в мирсте́м пребыва́нии,/ те́мже к Бо́гу тща́ние име́яше с ве́рою, преподо́бне о́тче Арсе́ние,/ моли́, да сподо́бит нас десна́го стоя́ния в день стра́шнаго Его́ прише́ствия.

Богоро́дичен: Всем еси́, Цари́це, Небе́снаго Царя́ Ма́ти,/ Христа́ Бо́га моли́,/ да изба́вит нас от пре́лести вра́жия и от всех его́ многоплете́нных сете́й,/ да спасе́мся, Пречи́стая, Твои́ми моли́твами.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Вели́ка тя стяжа́ во благоюро́дии твоя́ страна́,/ я́ко стра́нным прижи́тием на земли́ пожи́л еси́, преподо́бне о́тче Арсе́ние.

Приобре́л еси́ еди́наго Христа́ во многостяжа́тельней твое́й ку́пли/ и Тому́ прилепи́лся еси́ усе́рдно,/ пресла́вне блаже́нне Арсе́ние преподо́бне.

Бога́тство земно́е и сла́ву привре́менную ни во что́же вмени́в,/ жела́я дости́гнути Небе́снаго Ца́рствия,/ его́же и получи́л еси́ восприя́тие.

Богоро́дичен: Богороди́тельнице, Ты еси́ упова́ющим на Тя Блага́я Помо́щнице,/ помози́ мольба́ми Твои́ми к Сы́ну Своему́, Христу́ и Бо́гу на́шему,/ да изба́вимся от вся́кия я́звы Твои́м предста́тельством.

Седа́лен, глас 5:

О сме́рти роди́телей твои́х, в ми́ре сый, во мно́зе чистоте́ пребыва́я,/ Вели́каго Новагра́да дости́гл еси́/ и та́мо усе́рдно восприя́л еси́ и́ноческое пребыва́ние,/ преподо́бне о́тче Арсе́ние, моли́ Человеколю́бца Христа́ Бо́га спасти́ся душа́м на́шим.

Сла́ва, и ны́не, Богоро́дичен:

Препе́тая Богоро́дице,/ приими́ мольбы́ к Тебе́ приходя́щих и моля́щихся Тебе́,/ да изба́вимся от собла́знов вся́каго обстоя́ния,/ молю́тися, Преблага́я Богороди́тельнице.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Прорече́ свое́ к Бо́гу отше́ствие, преподо́бне Арсе́ние, благове́рному госуда́рю Иоа́нну/ и сказа́ ему́ о преставле́нии свое́м:/ гото́в бу́ду отыти́ к Бо́гу.

По преставле́нии свое́м, преподо́бне о́тче Арсе́ние, и по отше́ствии в ве́чныя оби́тели/ многоразли́чная исцеле́ния подае́ши/ с ве́рою приходя́щим и прося́щим от Тебе́ ве́лия ми́лости.

Егда́ честно́е и многотру́дное те́ло твое́ предаде́ся пе́рсти земне́й,/ стеко́шася Вели́каго Новагра́да архиепи́скоп и свяще́нный приче́т и весь сонм гра́дский,/ надгро́бныя пе́сни принося́ще.

Богоро́дичен: Царя́ ца́рствующаго Ма́ти,/ моли́ Сы́на Твоего́, Христа́ Бо́га,/ да изба́вимся от шу́ияго стоя́ния,/ мо́лимтися, Препе́тая Богороди́тельнице.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

В нощи́ уны́ния моего́ припа́даю ти, преподо́бне,/ молю́тися, мо́щи твоя́ зря и гро́бу твоему́ каса́яся,/ пода́ждь, прему́дре, разреше́ние.

Многошве́нныя ри́зы стяжа́л еси́, блаже́нне Арсе́ние,/ та́коже и мно́га дарова́ния от Христа́ прия́л еси́ ко исцеле́нию боле́зней на́ших,/ молю́тися, да не отри́неши и мене́ тща и неисце́льна.

Вар со́лнечный и зи́мныя сту́дени ни во что́же вмени́в,/ то́кмо Еди́ному Христу́ Бо́гу прилепи́лся еси́ все́ю мы́слию свое́ю,/ и Того́ и́го взем, и по Нем и́де, и бысть Ему́ учени́к.

Богоро́дичен: Моли́твенница те́плая, ку́пно и стена́, Ты еси́, Пречи́стая Богоро́дице,/ Тобо́ю избавля́емся вся́каго наи́тия вра́жия,/ спаси́ ны, Влады́чице, к Тебе́ притека́ющих.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Фарисе́йскаго киче́ния избе́г, преподо́бне,/ вся плотска́я мудрова́ния от себе́ до конца́ отри́нул еси́,/ посто́м и бде́нием к Бо́гу прибли́жився,/ моли́ о творя́щих па́мять твою́.

Процвете́ твое́ многотрудолю́бное те́ло, прему́дре Арсе́ние,/ те́плый хода́таю за рабы́ твоя́, приходя́щия ко гро́бу твоему́,/ и́бо и по сме́рти оби́льныя подае́ши цельбы́ от разли́чных скорбе́й.

Треволне́ния и миросуе́тия от себе́ отри́нув,/ Вели́каго Новагра́да дости́гл еси́,/ в не́мже те́ло свое́, я́ко не́кое неистощи́мое бога́тство, преподо́бне Арсе́ние, положи́л еси́.

Богоро́дичен: Всесвята́я Богороди́тельнице,/ Ты нам помози́ и исцели́ неисце́льныя на́ша я́зи грехо́вныя./ Мо́лимтися, Пречи́стая, да Тобо́ю исцеле́ние получи́м.

Конда́к, глас 4:

Тяжелоно́сныя во́лны тиме́ния отгна́,/ и вся плотска́я двиза́ния/ и по́хоти паля́щия ни во что́же вмени́в,/ взем крест и по́йде вслед Христа́,/ И́мже наставля́емь,/ лука́выя се́ти до конца́ раздра́/ и под нога́ми предложи́,/ мо́лимтися, преподо́бне о́тче Арсе́ние,/ изба́ви нас от належа́щих на ны собла́зн,/ ты бо еси́ Вели́кому Новугра́ду похвала́ и утвержде́ние/ и су́щим в печа́лех ра́дость.

И́кос:

Ка́ко, преподо́бне о́тче, возмогу́ восхвали́ти тя от ма́лаго своего́ скудоу́мия/ и вели́ку похвалу́ принести́ к твоему́ преподо́бию,/ и кто твоя́, преблаже́нне, по́двиги и воздержа́ние мо́жет испове́дати,/ прему́дре о́тче Арсе́ние, небе́сный челове́че, земны́й а́нгеле, многосве́тлый свети́льниче и моли́твенниче к Бо́гу!/ К твоему́ многочуде́сному гро́бу приходя́щим и устна́ми прикаса́ющимся к цельбоно́сней твое́й ри́зе/ отира́еши о́чи и мно́гим подае́ши здра́вие телесе́м, а душа́м спасе́ние./ Сего́ ра́ди вопие́м ти:/ ра́дуйся, я́ко подъя́л еси́ на земли́ вели́кия труды́ и по́двиги;/ ра́дуйся, я́ко сподо́бися в немерца́ющем све́те пребыва́ти,/ иде́же вси святи́и лику́ют в Небе́сных селе́ниих./ Ра́дуйся, я́ко обеща́лся еси́ спосо́бствовати и моле́ние и мольбы́ приноси́ти за град и лю́ди;/ ра́дуйся, Вели́кому Новугра́ду похвала́ и утвержде́ние и су́щим в печа́лех ра́дость.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Ще́дра тя и ми́лостива к Бо́гу и ко Пречи́стей Богоро́дице за рабы́ твоя́ хода́тая стяжа́вше,/ мо́лим, преподо́бне Арсе́ние:/ изба́ви нас от вся́каго премене́ния моли́твами твои́ми, свя́те.

Вели́кий Но́вград и́мать мо́щи твоя́ в себе́,/ я́ко не́кое многоце́нное сокро́вище, прему́дре Арсе́ние,/ и вся страна́ Ру́сская тебе́ похваля́ет,/ иму́щи такова́ к Бо́гу моли́твенника о душа́х на́ших.

Хода́тайствуй и моле́ние приноси́ за чту́щия тя и за вся правосла́вныя христиа́ны/ и гобзова́ния плодо́в земны́х и на враги́ побе́ду и одоле́ние испроси́, свя́те.

Богоро́дичен: На́ше спасе́ние я́коже восхоте́л еси́, Спа́се, устро́ити,/ во утро́бу Де́выя всели́лся еси́,/ Юже ми́ру Предста́тельницу показа́л еси́,/ оте́ц на́ших Бо́же, благослове́н еси́.

Песнь 8

Ирмо́с: Царя́ Небе́снаго,/ Его́же пою́т во́и а́нгельстии,/ хвали́те и превозноси́те во вся ве́ки.

Потща́вся избе́гнути су́етных прираже́ний,/ вдал еси́ себе́ во мно́гия труды́/ и, не пощадя́ своея́ пло́ти,/ пожи́л еси́, я́ко А́нгел на земли́, преподо́бне.

Добронра́вие и смире́ние стяжа́в от ю́ности, преподо́бне,/ суету́ ми́ра сего́ возненави́дел еси́,/ до́ндеже и пресели́ся в ве́чный поко́й.

Житие́м свои́м, преподо́бне Арсе́ние,/ потща́лся еси́ дости́гнути Вели́кий град, Го́рний Иерусали́м,/ иде́же есть немерца́ющий свет и неизрече́нная ра́дость, та́мо и весе́лие.

Богоро́дичен: По́мощи, я́же от Тебе́, тре́бующия не пре́зри, Де́во,/ пою́щия и превознося́щия Тя во ве́ки.

Песнь 9

Ирмо́с: Чу́жде ма́терем де́вство,/ и стра́нно де́вам деторожде́ние:/ на Тебе́, Богоро́дице, обоя́ устро́ишася./ Тем Тя, вся племена́ земна́я,/ непреста́нно велича́ем.

Любому́др яви́лся еси́ ко всем, преподо́бне о́тче Арсе́ние,/ спаси́ нас от вся́каго бесо́вскаго наи́тия/ и потщи́ся умоли́ти Бо́га за вся рабы́, упова́ющия на тя/ и и́мя твое́ призыва́ющия.

Ну́дим по́мыслом ко твое́й свя́тости принести́ похвалу́,/ а́ще и недосто́йный раб, но наде́юся на твое́ беззло́бие, преподо́бне Арсе́ние,/ да за мя умо́лиши Судию́ в день стра́шнаго Его́ преще́ния/ изба́витися твои́ми моли́твами ве́чнаго о́наго муче́ния,/ да тя при́сно ублажа́ем.

Богоро́дичен: То́ка слез мои́х не отврати́ся, Богороди́тельнице,/ да и мы, изба́вльшеся Тобо́ю, Госпоже́, шу́ияго стоя́ния,/ сподо́бимся, Влады́чице, одесну́ю предстоя́ти Сы́на Твоего́./ Тем Тя благоче́стно в пе́снех велича́ем.

Моли́тва

О преподо́бне о́тче наш Арсе́ние, услы́ши мя, раба́ твоего́, моля́щагося тебе́ и призыва́ющаго в моли́твах свято́е твое́ и́мя, и ми́лостив бу́ди и скор за многогре́шныя рабы́ твоя́ принести́ моли́твы и моле́ния ко Вседержи́телю Го́споду на́шему Иису́су Христу́ и Пречи́стей Его́ Ма́тери и Присноде́ве Мари́и, да твои́ми святы́ми моли́твами изба́вимся вся́каго наи́тия зла́го, и поми́луй нас, на тя упова́ющих, ны́не, и при́сно, и во ве́ки веко́в. Ами́нь.

Тропа́рь, глас 1:

Чудотво́рней Твое́й ико́не, Богоро́дице Де́во,/ всеблагогове́йно покланя́емся и лобыза́ем ю́,/ подае́ши бо то́ю исцеле́ния,/ здра́вие же и кре́пость душа́м и телесе́м вои́стинну./ Те́мже любо́вию Тебе́ взыва́ем:/ сла́ва промышле́нию Твоему́ о нас, Чи́стая,/ сла́ва милосе́рдию Твоему́ к ве́рным,/ сла́ва Тебе́, самоизобрази́вшейся, Всеблага́я Влады́чице.

Конда́к, глас 8.

Подо́бен: Взбра́нной Воево́де:

Богома́тери воспои́м боже́ственне,/ припа́дающе Боже́ственному о́бразу Ея́,/ пресла́вно бо на том самонаписа́ся,/ и источа́ет чуде́с струи́ с ве́рою притека́ющим,/ и избавля́ет от зол зову́щих Ея́:/ ра́дуйся, Неве́сто Неневе́стная.

Тропа́рь, глас 2:

Страстоте́рпцы Госпо́дни,/ Фео́доре со Иоа́нном о́троком, сла́внии!/ Блаже́нна земля́ Ру́сская, напи́вшаяся кровьми́ ва́шими,/ и ра́дуется оте́чество на́ше,/ в не́мже вы пе́рвии, и́долы посрами́вше,/ Христа́ со дерзнове́нием испове́дасте/ и за Него́ пострада́сте./ Того́, я́ко Бла́га, моли́те,/ до сконча́ния ве́ка в стране́ на́шей Це́рковь Правосла́вную непоколеби́му утверди́ти/ и всех ру́сских люде́й во и́стинней ве́ре и благоче́стии сохрани́ти.