ВЕ́ЧЕР

На Го́споди, воззва́х: стихи́ры, глас 2.

Подо́бен: Егда́ от Дре́ва:

Егда́ верхо́вный ученико́в, обходи́, мир весь утверди́,/ тогда́ обре́т тя, я́ко ка́мень честны́й,/ Це́ркве основа́ние положи́, блаже́нне,/ столпы́ разория́юща и́дольския/ и хра́мы Боже́ственною си́лою Сло́ва,/ пло́тию примеси́тися, о́тче,/ челове́ком благоволи́вшаго.

Сло́вом отгони́ лука́выя ду́хи зло́бы,/ соверши́л еси́ духо́вны лю́ди/ Ду́ха благода́тию,/ му́чениче Панкра́тие,/ возде́лая ни́ву сих серде́чную/ и влага́я се́мя Боже́ственное,/ е́же Де́лателю приноша́л еси́ Небе́сному,/ моли́ о восхвали́ющих тя ве́рно.

За́пад сия́нии мы́сленными ты восто́к соде́лал еси́,/ со́лнца нося́щ Бо́жия позна́ния,/ от Де́вы нам па́че ума́ возсия́вшаго,/ и, заше́д страда́нием, о́тче,/ возсия́л еси́ к Све́ту невече́рнему,/ иде́же, зерца́лом разре́шшимся,/ зри́ши жела́емуто добро́ту Подвигополо́жника твоего́, Панкра́тие.

Сла́ва, глас 6:

Свяще́нник зако́ннейший/ да́же до кончи́ны твоей был е́си,/ блаже́нне Панкра́тие,/ священноде́йствуя бо Боже́ственная и неизглаго́ланная та́инства,/ кровь излия́л еси́ за Христа́ Бо́га/ и же́ртву благоприя́тну себе́ приве́л еси́./ Тем, дерзнове́ние име́я к Нему́,/ приле́жно моли́ся/ о ве́рою и любо́вию соверша́ющих твою́ пречестну́ю па́мять,/ и почита́ющим сию́ изба́витися напа́стей,/ и вся́ких бед и обстоя́ний.

И ны́не, Богоро́дичен: Кто Тебе́ не ублажи́т:

А́ще не пра́зднуеши, Сла́ва, и ны́не, Богоро́дичен, глас 2:

Еди́на Невмести́маго Бо́га/ нетесноме́стно во чре́ве носи́ла еси́,/ Челове́ка бы́вша за бла́гость,/ Пресвята́я Богоневе́сто./ Те́мже молю́ Тя:/ утесня́ющих мя страсте́й измени́,/ я́ко да, те́сную и пра́вую стезю́ ше́ствовав,/ дости́гну я́же к животу́, Де́во, водя́щую.

Крестобогоро́дичен:

Дре́ву Кре́стному Тя, Иису́се, пригвожде́на/ зря́щи Неискусобра́чная,/ пла́чущи, глаго́лаше:/ Ча́до сла́дкое,/ почто́ оста́вил еси́ Мене́, ро́ждшую Тя еди́ну?/ Све́те непристу́пный Пребезнача́льнаго Отца́,/ потщи́ся и просла́вися,/ я́ко да сла́ву получа́т Боже́ственную/ Боже́ственныя стра́сти Твоя́ сла́вящии.

Вход. Проки́мен дне. И чте́ния:

Проро́чества Иса́иина чте́ние: Та́ко глаго́лет Госпо́дь: и Прему́дрости Соломо́новы чте́ние: Пра́ведных ду́ши в руце́ Бо́жией: (зри в 3-й день святы́х страстоте́рпцев благове́рных князе́й Васи́лия и Константи́на, Яросла́вских), а тре́тие Прему́дрости Соломо́новы чте́ние: Пра́ведник а́ще пости́гнет сконча́тися: (зри в то́йже день святи́теля Фили́ппа, митрополи́та Моско́вскаго).

На стихо́вне стихи́ры, глас 1.

Подо́бен: Всехва́льные му́ченицы:

Прехва́льне Богому́дре, блаже́нне,/ очервле́нием своея́ кро́ве/ свяще́нную свою́ и боже́ственную оде́жду уясни́л еси́,/ от си́лы бо благоче́стно в си́лу,/ от сла́вы в сла́ву премину́л еси́,/ и ны́не моли́ся дарова́ти душа́м на́шим/ мир и ве́лию ми́лость.

Стих: Честна́ пред Го́сподем/ смерть преподо́бных Его́.

Же́ртву пе́рвее Бо́гови принося́ Безкро́вную,/ я́ко свяще́нник Боже́ственен,/ я́ко всепло́дие прия́тно,/ прия́тну же́ртву сам себе́ кро́вию, я́ко му́ченик и́стинен,/ по́слежде Христо́ви приве́д,/ Богоглаго́ливе всече́стне Панкра́тие,/ Его́же моли́ о пою́щих тя.

Стих: Что возда́м Го́сподеви о всех,/ я́же воздаде́ ми?

Нача́льники во́инства Христо́ви приве́д/ уче́нии свои́ми, Панкра́тие, и наказа́нии, уча́ и наказу́я,/ и я́ве о́браз, Богому́дре, себе́ предложи́в,/ с ни́миже моли́ся дарова́ти душа́м на́шим/ мир и ве́лию ми́лость.

Сла́ва, глас 4. Самогла́сен:

Тавромени́йскому вели́кому гра́ду/ всяк град и страна́ спра́зднует днесь/ в па́мять честна́го его́ граждани́на,/ и́бо концы́ земны́я собира́ет,/ веселя́щияся ны́нешним торжество́м священному́ченика,/ сему́ же и мы, пе́сньми, я́ко цве́тцы, вене́ц испле́тше, возопии́м:/ ра́дуйся, па́стырю до́брый,/ и́же ду́шу положи́вый по овца́х,/ же́ртво и заколе́ние, святи́телю и о́вча, тебе́ мо́лимся,/ с пострада́вшими с тобо́ю Христа́, Панкра́тие, моли́/ ста́до твое́ сие́ от иноплеме́нных волк изба́вити/ и Небе́снаго гра́да с тобо́ю сподо́битися.

И ны́не, Богоро́дичен, глас то́йже:

Изба́ви нас от бед на́ших, Ма́ти Христа́ Бо́га,/ ро́ждшая всех Творца́,/ да вси вопие́м Ти:/ ра́дуйся, еди́на Предста́тельнице душ на́ших.

Тропа́рь, глас 8:

Я́ко стрела́ огнезра́чная,/ от Верхо́внаго по́слан был еси́ Тагромени́йскому престо́лу/ уязвля́ти безбо́жных злоче́стие,/ ве́рных же сердца́ просвеща́ти,/ я́же боговеща́нными твои́ми словесы́ в ве́ре утверди́в/ и тече́ние соверши́в, пострада́л еси́ до кро́ве,/ священному́чениче Панкра́тие,/ моли́ за вся, пою́щия па́мять твою́.

Ин тропа́рь, глас 4:

И нра́вом прича́стник,/ и престо́лом наме́стник апо́столом быв,/ дея́ние обре́л еси́, Богодохнове́нне,/ в виде́ния восхо́д,/ сего́ ра́ди сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Панкра́тие./ Моли́ Христа́ Бо́га/ спасти́ся душа́м на́шим.

НА У́ТРЕНИ

На Бог Госпо́дь: тропа́рь дважды. Сла́ва, и ны́не, Богоро́дичен.

По 1-м стихосло́вии седа́лен, глас 1.

Подо́бен: Лик а́нгельский:

Кровь твоя́, му́дре, та́йно вопия́ше от земли́ к Бо́гу, я́коже А́велева, Богому́дре,/ я́ве бо пропове́дал еси́ Тро́ицу Несозда́нную,/ те́мже, Панкра́тие, па́стырски просия́в, отгна́л еси́ ерети́ческия зве́ри,/ я́ко храни́тель ве́ры.

Сла́ва, и ны́не, Богоро́дичен:

Упова́ние христиа́н, Пресвята́я Де́во,/ Его́же родила́ еси́, Бо́га, па́че ума́ же и сло́ва,/ непреста́нно моли́ с Вы́шними си́лами да́ти оставле́ние грехо́в на́ших и исправле́ние житию́/ ве́рою и любо́вию при́сно Тя сла́вящим.

По 2-м стихосло́вии седа́лен, глас 4.

Подо́бен: Ско́ро предвари́:

Сугу́б тебе́ вене́ц нетле́ния Христо́с, всеблаже́нне, дарова́,/ я́ко страда́льцу че́стну, святи́телю Панкра́тие,/ Тому́ бо Безкро́вныя прине́сл еси́ Же́ртвы./ Того́ Боже́ственную страсть неле́стно подража́я,/ Того́ нестаре́ющияся пи́щи, блаже́нне, наслади́лся еси́.

Сла́ва, и ны́не, Богоро́дичен:

Пречи́стыя ру́ки Твоя́, Де́во Ма́ти, просте́рши,/ покры́й упова́ющия на Тя и Сы́ну Твоему́ зову́щия:/ всем пода́ждь, Христе́, ми́лости Твоя́.

По полиеле́и седа́лен, глас 3:

Бо́жиим Ду́хом просвеще́н,/ де́рзость мечта́тельную со дерзнове́нием, священному́чениче великому́дре, посрами́л еси́,/ и преплы́л еси́ льсти́вную пучи́ну,/ и к приста́нищу Боже́ственному, окормл я́ емь, прите́кл еси́, о́тче преподо́бне Панкра́тие,/ Христа́ Бо́га моли́ дарова́ти нам ве́лию ми́лость.

Сла́ва, и ны́не, Богоро́дичен:

Боже́ственная ски́ния была́ еси́, Сло́ва, Еди́на Пречи́стая Де́во Ма́ти,/ чистото́ю А́нгелы превозше́дшая,/ па́че всех мене́, персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех,/ я́же воздаде́ ми? Вс я́ кое дыха́ние: Ева́нгелие от Луки́, зача́ло 24.

По 50-м псалме́ стихи́ра, глас 6:

Предповеле́н от Бо́га,/ апо́столом служи́тель быв и А́нгелом согла́сник,/ не преста́й мол я́ Христа́ Бо́га спасти́ся нам,/ да тя восхвал я́ ем, священному́чениче Панкра́тие всему́дре.

Кано́н, глас 1.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Пречестны́й ка́мень тя Це́рковь познава́ет, Панкра́тие,/ водруже́нием слове́с твои́х утвержда́ема при́сно,/ и сего́ ра́ди твою́ почита́ем па́мять днесь.

Обнови́л еси́ ра́лом твои́х Боже́ственных слове́с сердца́, Панкра́тие,/ олядене́вшая пе́рвее злове́рия мгло́ю,/ плодоно́сна показа́л еси́ я́ве ве́ры ра́ди.

Еди́ницу тричи́сленную, соединя́ему в то́жде естество́, возвеща́я,/ погаси́л еси́ безбо́жия мглу и светолу́чными уче́нии лю́ди просвети́л еси́.

Богоро́дичен: Из Тебе́ возсия́ Светода́вец, просвеща́я концы́,/ Иису́с Госпо́дь, Чи́стая Влады́чице,/ И́мже и́же во тьме и се́ни свет ви́деша.

Песнь 3

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е/ и основа́вый на вода́х зе́млю, Всеси́льне.

Ду́хом утвержда́емь, лука́выя отгна́л еси́ ду́хи/ и трудо́м моли́тв хра́мы разори́л еси и́дольския,/ це́ркви возставля́я, досточу́дне.

Сечи́тельным сло́вом твои́м посе́кл еси́ злоче́стия, преподо́бне, те́рние/ и насади́л еси́ душа́м спаси́тельная уче́ния доброде́телей,/ оби́лующа плодо́в, свяще́нне.

Сосу́д обре́т тя, Боже́ственнаго Ду́ха чи́стыя зари́ прие́млюща, верхо́вный учени́к,/ к за́паду посла́ безбо́жия изгна́ти мглу, всече́стне.

Богоро́дичен: Тя, о́блак всесве́тел, ковче́г и ста́мну всезла́ту, простра́ннейшу небе́с,/ и превознесе́нную ле́ствицу, Неискусобра́чная Де́во,/ ве́рнии, ублажа́ем.

Седа́лен, глас 4.

Подо́бен: Яви́лся еси́ днесь:

Благоче́стия побо́рник, победоно́сец, свяще́нне Панкра́тие, показа́вся,/ на Небесе́х со Безпло́тными ны́не предстои́ши Го́сподеви,/ моли́ спасти́ся нам.

Сла́ва, и ны́не, Богоро́дичен:

Те́плое заступле́ние су́щим в беда́х, и Помо́щницу на́шу,/ и к Бо́гу премене́ние, Е́юже тли изба́вихомся,/ Богоро́дицу, ве́рнии, ублажа́ем.

А́ще не пра́зднуеши, Крестобогоро́дичен:

На Дре́ве ви́дящи воздви́жена Сы́на Твоего́, Пречи́стая,/ утро́бою ма́тернею растерза́ема, жа́лостно взыва́ла еси́:/ увы́ Мне, ка́ко заше́л еси́, Све́те Мой Безле́тный?

Песнь 4

Ирмо́с: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том, позна́ешися,/ внегда́ приити́ вре́мени, пока́жешися./ Сла́ва си́ле Твое́й, Го́споди.

Огне́м Уте́шителя огнедохнове́нен я́влься, лесть попали́л еси́, Панкра́тие му́дре,/ и, возсия́в, я́ко све́щник, в мо́ри потопля́емым неве́дения,/ ко приста́нищем Боже́ственныя вво́диши во́ли.

От Ка́мене некраесеко́ма Петр напои́вся и насы́щся,/ я́ко и́ну тя посыла́ет реку́, олядене́вшия напои́ти ду́ши, Богому́дре,/ и нече́стия ре́ки изсуши́ти тече́нием Боже́ственнаго пропове́дания.

Глаго́л тво́их веща́ние излия́ся, му́дре, сия́нием просвеща́емь ра́зума Христо́ва./ Те́мже и е́ллинская му́дрость обуи́ся, и зло́бы мудре́ц сожже́ся,/ му́чениче святи́телю Панкра́тие.

Житие́ твое́, Боже́ственными блиста́яся добро́тами,/ вся омрачи́ де́монская стремле́ния и, разори́г тьму безбо́жия,/ сы́ны дне показа́, любо́вию твои́м уче́нием покори́вшияся.

Богоро́дичен: Воплоща́ема Сло́ва во двою́ существу́, Отрокови́це, и хоте́нии,/ родила́ еси́, Чи́стая,/ восхо́ды сказа́вшаго пресла́вно спасе́ния ле́стию порабоще́нным,/ Чи́стая Де́во Всепе́тая.

Песнь 5

Ирмо́с: Твой мир даждь нам,/ Сы́не Бо́жий:/ ино́го бо, ра́зве Тебе́, бо́га не зна́ем,/ и́мя Твое́ имену́ем,/ я́ко Бог живы́х и ме́ртвых еси́.

Чуде́с показа́нии улови́л еси́ лю́ди,/ сло́вом же тре́бища разори́л еси́/ и созда́л еси́, свяще́нне, церкве́й добро́ты во обновле́ние челове́ком.

Кровьми́ обагри́л еси́ оде́жду свяще́нную,/ кровь же де́монскую изсуши́л еси́/ и победоно́сец возше́л еси к Небеси́, побе́ды прии́м вене́ц.

Разсе́деся пред лице́м твои́м храм и́дольский, дверь же отве́рзеся язы́ком,/ и даде́ся благода́ть Боже́ственная ве́рных в сердца́,/ священнотаи́нниче о́тче.

Богоро́дичен: Я́ко дождь, во утро́бу Твою́ сни́де Христо́с, Чи́стая,/ и ту́чи изсуши́ многобо́жия, и изведе́ Богоразу́мия во́ду/ су́щим в пла́мени ле́стнем.

Песнь 6

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Облагодати́в твой ум и просвети́в бога́тно,/ Иису́с, просвеще́ние всех и Бог,/ сло́вом твои́м безслове́сия лю́ди изба́ви.

Священноде́йствовав Бо́жие Ева́нгелие, му́дре,/ Боже́ственная уче́ния запеча́тствовал еси́ све́тло кро́вию,/ священнотаи́нниче му́чениче Панкра́тие.

Кропле́ний и́дольских и крове́й скве́рных изба́вил еси́ лю́ди/ и, поже́рся, я́коже а́гнец, Панкра́тие,/ же́ртва жива́ Бо́гу прине́слся еси́.

Богоро́дичен: Соуда́влена прило́ги непло́дных помы́шле́ний,/ возведи́ к све́ту спасе́ния и жи́зни, Всенепоро́чная,/ Я́же Спа́са Христа́ ро́ждшая.

Конда́к, глас 4.

Подо́бен: Яви́лся еси́:

Све́тлая тавромени́ом, Панкра́тие, звезда́ показа́лся еси́/ и священнострада́лец яви́лся еси́ за Христа́,/ Ему́же ны́не предстоя́, моли́ за чту́щия тя, блаже́нне.

И́кос:

Пода́й ми ра́зум боже́ствен,/ мрак неве́дения от моего́ се́рдца отжени́ моли́твами твои́ми,/ я́ко да пою́ твою́ ве́рно святу́ю па́мять,/ в ню́же а́нгельстии ли́цы с му́ченическими днесь веселя́тся боже́ственне/ и челове́цы пе́сньми хва́льными твою́ главу́, я́коже цве́ты спле́тше, венчава́ют досто́йно,/ прося́ще от Тебе́ прия́ти согреше́ний оставле́ние и злых жития́ разреше́ние,/ враг же ви́димых изба́витися и неви́димых твои́ми моли́твами, о́тче наш Панкра́тие блаже́нне.

Песнь 7

Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.

Кро́вию крести́лся еси́ твое́ю, Панкра́тие,/ пе́рвее в воде́ крести́в лю́ди,/ и ко Христу́ преше́л еси́, ра́дуяся;/ с ни́миже водворя́яся, прича́стием обожа́ешися све́тло при́сно, преблаже́нне.

Сла́ностию погруже́нныя лю́тых у́дицею твои́х слове́с возве́л еси́, свяще́нне,/ и моли́тв чи́стым одожде́нием му́тную изсуши́л еси́ злове́рия глубину́,/ священнотаи́нниче Христо́в.

Ка́мень тя вои́стинну неразсе́дный основа́ние положи́/ и степе́нь недви́жим, свяще́нныя священнояви́тель Це́ркве,/ в не́йже сокруша́ется вся́ка зло́ба, му́дре, младе́нствующаго врага́.

Богоро́дичен: Чисте́йшу еди́ну Тя обре́т, Всенепоре́чная, Сло́во, Пречи́стая, Бо́жие,/ из Твоего́ чре́ва поро́ждся, ве́рныя очища́ет скве́рны, Богоневе́сто,/ прибы́вшия нам от невоздержа́ния зол.

Песнь 8

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

Огне́м изнуря́емь разли́чных искуше́ний, невреди́м пребы́л еси́/ и, изостри́в ум све́тлыми виде́нии, яви́лся еси́, му́дре, меч,/ посека́я вещь многобо́жия.

Лю́ди приводя́ в ра́зум Христо́в, зна́мения и чудеса́ твори́л еси́ яве́,/ предглаго́ля хотя́щая бы́ти, я́ко проро́к Бо́жий,/ Уте́шителя, Богому́дре, дохнове́ньми.

Образ Зижди́теля показу́я лю́дем, Его́же волею поне́сл есть, соединя́яся нам,/ зна́мения и си́лы тем сотворя́еши, многобо́жия де́рзость отгоня́.

Богоро́дичен: Я́ко дождь, во утро́бу Твою́ сни́де Христо́с/ и всю напои́ тварь, вои́стинну, изсуши́в, Де́во, му́тныя ре́ки идолонеи́стовства,/ еди́ный Благоде́тель.

Песнь 9

Ирмо́с: Живоприе́мный исто́чник приснотеку́щий,/ светоно́сный свети́льник благода́ти,/ храм одушевле́нный, сень пречи́стую,/ Небесе́ и земли́ простра́ннейшую,/ Богоро́дицу, ве́рнии, велича́ем.

Светолу́чными Петра́ сия́нии просве́щся душе́ю и мы́слию,/ я́ко звезда́ многосве́тлая, к за́паду дости́гл еси́,/ просвеща́я уче́нии заше́дшия в неве́дения, Панкра́тие, глубину́.

Ико́нную честь преходя́щу в первообра́зную ты ве́дый,/ всю́ду честну́ю поставля́л еси́, сла́вне, Иису́са и Бо́га на́шего ико́ну/ ка́пищем де́монским на потребле́ние.

Светоно́сное твое́ сие́ торжество́/ град и собо́р сотворя́ет, ра́дуяся, чу́дный Панкра́тие, тя ве́рно почита́юще./ И́хже благослови́ти я́ко пастырь не преста́й, о всех моли́тву творя́.

Богоро́дичен: Пощади́ нас, пою́щия Тя, Го́споди, от Де́вы несказа́нно рожде́йся,/ напа́стей избавля́я, и страсте́й, и скорбе́й Твоя́ рабы́ моли́твами Ея́,/ я́ко Благоде́тель и еди́н Человеколю́бец.

Свети́лен:

Му́чеников лик приведи́ днесь моле́бен весь, Тавромени́йский гра́де, ра́дуяся,/ до́браго па́стыря твоего́ и назира́теля просла́вити и взыгра́й,/ мы же, соблюда́юще па́мять твою́, Панкра́тие, от вреда́ враг свобожда́емся.

Сла́ва, и ны́не, Богоро́дичен:

Со апо́столы моли́, Богоро́дице, Твоего́ Сы́на и Бо́га/ поми́ловатися всем, пою́щим Тя и сла́вящим, и на ико́нах Тя чту́щим,/ и покланя́ющимся досто́йно, и любо́вию облобыза́ющим.

На хвали́тех стихи́ры, глас 4.

Подо́бен: Я́ко до́бля:

Доброде́тельми просвеща́яся, благоче́стием украша́емь,/ святи́тель Боже́ственный был еси́,/ я́ко многосве́тлое со́лнце, мир проте́кл еси́,/ всева́я всю́ду ве́рное пропове́дание,/ пре́лесть же искореня́я серпо́м твоего́ язы́ка,/ святи́телю Богому́дре, великопропове́дателю Панкра́тие.

К боле́зненным страда́нием и му́жественным боре́нием,/ к я́звам и ра́нам устреми́лся еси́,/ и́бо, мно́жеством ка́мений посыпа́емь, Панкра́тие,/ и сотвори́в я́, я́ко степе́нь и ле́ствицу,/ взы́де к Бо́гу вене́чник/ и совокупи́ся во́инству Небе́сному.

Одея́ние свое́ кро́вию муче́ния соверши́л еси́ светле́йшее,/ благода́тию Боже́ственнаго Ду́ха,/ и свяще́нно во свята́я Вы́шняя востече́,/ я́коже Иоа́нн Предте́ча,/ побе́ды вене́ц от Бо́га прие́м со все́ми,/ честно́ю кро́вию сконча́вшимися, Панкра́тие.

Сла́ва, глас 6:

Кто досто́йно доброде́телей твои́х испове́сть побе́ды?/ Ка́я уста́ муче́ния терпе́ние изреку́т?/ В обои́х бо благоугоди́, Панкра́тие,/ но не преста́й моля́, уго́дниче Христо́в,/ спасти́ ду́ши на́ша,/ я́ко имы́й, священному́чениче,/ дерзнове́ние мно́го.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы/ поми́ловати ду́ши на́ша.

НА ЛИТУРГИ́И

Блаже́нны от кано́на, пе́снь 3-я и 6-я, на 4. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ша, Бо́же, глас мой, внегда́ моли́тимися к Тебе́. Апо́стол к Кори́нфяном, зача́ло 166. Аллилу́ия, глас 4: Пра́ведник, я́ко фи́никс, процвете́т/ и, я́ко кедр, и́же в Лива́не, умно́жится. Стих: Насажде́ни в дому́ Госпо́дни во дво́рех Бо́га на́шего процвету́т. Ева́нгелие от Иоа́нна, зачало 36. Прича́стен: В па́мять ве́чную:

Тропа́рь, глас 4:

Апо́столом подража́тель/ и боже́ственных уче́ний столп бысть,/ тем ко Христу́ притече́,/ моле́нием, блаже́нне, Моа́вия царя́ све́том Креще́ния просвеще́на показа́, Фео́доре,/ и испове́дания ра́ди кровь свою́ излия́л есть,/ исхода́тайствен тому́ яви́ся вене́ц от Христа́ Царя́,/ Его́же моли́ спасти́ ду́пи на́ша.

Ин тропа́рь, глас то́йже:

Нево́лею па́ству святи́тельскую прии́м,/ но во́лею подви́гнувся о Бо́жии Це́ркви,/ и пе́рстию Христо́ва гро́ба неве́рнаго Моа́вия царя́ уве́рив,/ и с теле́сною слепото́ю вку́пе и душе́вную ему́ исцели́в, благове́рна показа́,/ с ни́мже и еретики́ от Бо́жия Це́ркве, я́ко во́лки, отгна́в,/ честны́й святи́телю Фео́доре,/ моли́ спасти́ся душа́м на́шим.

Конда́к, глас 4:

Я́ко со́лнце, осиява́я све́тлым житие́м, Фео́доре, я́ве,/ вавило́нскому царю́ яви́ся чудесы́/ и сего́ уго́дника Христу́, святи́телю, показа́,/ с ни́мже ны́не Тро́ице предстоя́,/ нас помина́й, све́тло торжеству́ющих па́мять твою́, му́дре.

Ин конда́к, глас то́йже:

Благохоте́ния ра́ди/ просвеще́ннаго тобо́ю по благода́ти ча́да, честна́го Моа́вия,/ животворя́щаго дре́ва получе́ния,/ подви́гнуся во ца́рствующий град,/ и та́мо Христо́вою пе́рстию до́блей цари́це Феодо́ре о́ка зре́ние очи́сти,/ и отту́ду с жела́емым сокро́вищем па́ки в Вавило́не честна́го Моа́вия по Христе́ на муче́ние утверди́,/ сего́ ра́ди ти вопие́м:/ ра́дуйся, честны́й Фео́доре,/ учениче́ Христо́в, пасту́ше до́брый.

Тропа́рь, глас 2:

Несумне́нно Христа́ иски́й,/ Христо́во бога́тство прия́ти наде́явся,/ зла́та грома́ду безнаде́жну сотво́рь,/ ско́ро прескочи́, я́ко я́же посреди́ Ла́заря и бога́таго про́пасть,/ и легко́ воспря́ну во авраа́мское не́дро,/ пусты́нный Иоа́нне, тезоимени́те благода́ти и прозра́чному го́луби,/ тем и от Бо́га прии́мый прозре́ния дар/ и честно́му Фео́дору епи́скопу изреки́й неви́денное писа́ние/ и благочести́ву царю́ Моа́вию му́ченический по́двиг./ Те́мже мо́лим тя, о́тче:/ умоли́ Христа́ за ны, чту́щия тя.

Конда́к, глас то́йже:

Неявле́н бра́ту быв по взя́тии зла́та,/ но ничто́же утае́но ти бысть о житии́ его́/ от Бо́га да́нным ти прозре́ния да́ром,/ целому́дренный Иоа́нне,/ живя́ше бо не себе́, но Христу́,/ тем и я́ди своея́ сла́достию царя́ честна́го Моа́вия преудиви́./ Сего́ ра́ди зове́м ти:/ ра́дуйся, обреты́й наде́жду в небе́снем Христо́ве бога́тстве.

Тропа́рь, глас 3:

Пре́жде заче́нся бога́тственною се́тию, я́ко челове́к,/ но последи́ нището́ю нестяжа́ния посрами́л еси́ врага́/ и моли́твами твои́ми, честны́й Феодо́сие,/ прия́т от Бо́га прозре́ния дар./ Тем и честно́му епи́скопу Фео́дору прорече́ о Святе́й Це́ркви,/ е́же на враги́ одоле́ние,/ и ны́не моли́ся Христо́ви за чту́щих тя.

Конда́к, глас то́йже:

Прему́дрости Бо́жия науче́нием/ недомы́слимо веща́ние столпа́ глаго́ля,/ от неразу́мных челове́к несмы́слен мня́шеся,/ но от Бо́га па́че прему́др проявля́шеся,/ ди́вный Феодо́сие,/ честна́го бо епи́скопа Фео́дора/ свои́ми словесы́ кре́пце вооружи́в, я́ко во́ина, на церко́вныя враги́,/ сего́ ра́ди от Бо́га на Небесе́х прии́м честны́х твои́х трудо́в воздая́ние.

Тропа́рь, глас 5:

От до́бляго наста́вника Фео́дора/ чистоту́ тве́рдо извы́че,/ и от нече́стия цари́цы Сеи́ды/ целому́дрием по о́бразу Ио́сифа сохрани́ся,/ та́коже и нечести́ваго царя́ Адрамеле́ха/ прему́дрыми твои́ми глаго́лы пре́ния и ласка́ния низложи́в,/ и по Христе́ муче́ния венце́м увязе́ся,/ Богому́дрый Михаи́ле,/ Его́же моли́ спасти́ ду́ши на́ша.

Конда́к, глас то́йже:

В ю́ности цве́та свет небе́сный получи́л еси́,/ му́чениче Михаи́ле,/ наказа́нием честна́го твоего́ наста́вника Фео́дора,/ богода́нною же твое́ю си́лою/ в погребе́нии твое́м разсла́бленнаго стягну́л еси́,/ те́мже хва́ляще твоя́ страда́ния,/ Бо́гу сла́ву возсыла́ем.

Тропа́рь, глас 6:

И́же ко Христу́ ве́рою/ боле́знь теле́снуто исцели́, с не́юже и душе́вную,/ наставля́емь от честна́го твоего́ учи́теля Фео́дора,/ сла́вный царю́ Моа́виею Иоа́нне,/ и, страда́ние по Христе́ ку́пно с ве́рными твои́ми треми́ о́троки сконча́в,/ яви́ся в царе́х му́ченик, в му́ченицех же царь,/ по Христе́ тече́ние сконча́в, от свои́х раб во́лею пострада́,/ и, сугу́бу честь от Бо́га прии́м,/ Его́же моли́ ку́пно с треми́ ве́рными твои́ми о́троки/ спасти́ся душа́м на́шим.

Конда́к, глас то́йже:

Пре́жде бы́вших вавило́нских царе́й неве́рие попра́в/ и одоле́в Новуходоно́сорову суровству́,/ честны́й царю́ Моа́вие Иоа́нне,/ он бо дре́вле три о́троки от Бо́га не одоле́, но посрами́ся,/ ты же, с собо́ю три о́троки име́я, врага́ одоле́/ и сих к Бо́гу приве́л еси́./ Сего́ ра́ди ти зове́м:/ ра́дуйся, премени́вый тле́нное ца́рство на нетле́нное.

Тропа́рь, глас 3:

Гла́сом боже́ственным от темни́цы изведе́н,/ в Ри́ме бра́тию в боже́ственней ве́ре утверди́л еси́,/ и, от А́нгела глаго́лы прии́м о святи́тельстей па́стве,/ во страда́нии свое́м па́ки гла́су с Небесе́ сподо́бися,/ богоповеле́нный святи́телю и страда́льче Кири́лле,/ моли́ за ду́ши на́ша.

Конда́к, глас то́йже:

Ви́дев себе́ ра́ди темни́чныя две́ри отве́рсты в полу́нощи/ и и́долы сокруше́ны,/ и Горти́нскую па́ству святи́тельскую,/ от Бо́га повеле́нную, до́бре упа́с,/ и по Христе́ наде́ждно пострада́в,/ священному́чениче Кири́лле,/ моли́ся за чту́щия тя.