НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 6:

Прииди́те, благове́рных люде́й мно́жества,/ све́тло пра́зднуим па́мять свята́го по́стника,/ прему́драго наста́вника,/ преподо́бнаго ста́рца Евфроси́на,/ чудотво́рца Синеезе́рскаго,/ с любо́вию вопию́ще к нему́:/ твои́ми моли́твами ко Христу́ Бо́гу/ от вся́кия ско́рби и беды́ изба́ви нас.

Науче́н быв изде́тства любви́ ко Христу́/ от благочести́вых роди́телей твои́х,/ пресла́вне о́тче наш Евфроси́не,/ все житие́ твое́ на земли́ на служе́ние Бо́гу посвяти́л еси́,/ при кончи́не же твое́й му́ченическим венце́м увенча́лся еси́/ и всели́лся еси́ в Го́рняя со А́нгелы святы́ми./ Те́мже мо́лим тя, уго́дниче Бо́жий:/ осеня́й с Небе́с моли́твами твои́ми/ усе́рдно чту́щия па́мять твою́.

Спасе́ния иски́й, о́тче Евфроси́не пречу́дне,/ во оби́тель сла́вную Валаа́мскую всели́лся еси́,/ та́же веле́нием Бо́жиим/ церко́вный чтец ве́си До́лоцкия поста́влен был еси́,/ презре́в же земна́я и тле́нная,/ прия́л еси́ чин и́ноческий во оби́тели Ти́хвинстей,/ отону́дуже ра́достно пресели́лся еси́ в пусты́ню Синеезе́рскую/ и, та́мо оби́тель основа́в,/ му́ченически сконча́лся еси́,/ свети́ло церко́вное и преподо́бных ра́дование.

Сра́дуйтеся нам, вся ве́рных мно́жества,/ сликовству́й, Новгоро́дская вся Це́рковь/ и вся Русь правосла́вная,/ наста́ бо све́тлый де́нь па́мяти ди́внаго пусты́нника,/ процве́тшаго, я́ко фи́никс,/ облагоуха́нный Боже́ственными дарова́нии,/ то́чит бо исцеле́ния душ и теле́с/ всем, с ве́рою прибега́ющим к моще́м его́./ Сего́ ра́ди воспои́м ему́ усе́рдно:/ святы́й преподо́бному́чениче Евфроси́не,/ Го́сподеви моли́ся о душа́х на́ших.

Сла́ва, глас 5:

Преподо́бне о́тче Евфроси́не,/ не дал еси́ сна очи́ма твои́ма,/ ни ве́ждома твои́ма дрема́ния,/ до́ндеже ду́шу и те́ло от страсте́й свободи́л еси́/ и себе́ в храм Госпо́день угото́вал еси́,/ прише́д бо, Христо́с сотвори́ у тебе́ оби́тель Единосу́щныя Тро́ицы/ и дарова́ ти благода́ть вразумля́ти ко спасе́нию/ вся, к тебе́ приходя́щия./ Те́мже мо́лим тя:/ моли́ся Христу́ Бо́гу/ спасти́ся нам, чту́щим тя.

И ны́не, Богоро́дичен: В Чермне́м мо́ри:

Вход, проки́мен дне и чте́ния три (зри 17-ое марта).

На лити́и стихи́ра свято́му, глас 4:

Досто́йно хва́лим труды́ и по́двиги твоя́,/ о́тче Евфроси́не Богому́дре,/ щито́м бо преподо́бия огради́вся,/ во́ин духо́вный непобеди́м вои́стинну яви́лся еси́,/ а́ще и ме́чное усече́ние и главы́ разбие́ние претерпе́л еси́,/ те́мже и вене́ц сла́вы прия́л еси́ от руки́ Вседержи́теля/ и мо́лишися о душа́х на́ших.

Сла́ва, глас 5:

На Небесе́х ны́не ликовству́еши,/ преблаже́нне о́тче наш Евфроси́не,/ и о спасе́нии почита́ющих тя мо́лишися,/ заступле́нием же твои́м ду́хи лука́выя отгоня́еши,/ и исцеля́еши неду́ги неисце́льныя,/ и блиста́нием чуде́с твои́х се́рдца ве́рных просвеща́еши./ Те́мже дне́сь гла́сы немо́лчными воспева́ем/ пресве́тлую и светоно́сную па́мять твою́.

И ны́не, Богоро́дичен:

Храм и две́рь еси́,/ пала́та и престо́л Царе́в,/ Де́во Всечестна́я,/ Е́юже Изба́витель мой, Христо́с Госпо́дь,/ во тьме́ спя́щим яви́ся,/ Со́лнце Сый Пра́вды,/ просвети́ти хотя́, я́же созда́ по о́бразу Своему́ руко́ю Свое́ю./ Те́мже, Всепе́тая,/ я́ко ма́тернее дерзнове́ние к Нему́ стяжа́вшая,/ непреста́нно моли́ спасти́ся душа́м на́шим.

На стихо́вне стихи́ры, глас 1:

Прехва́льне о́тче Евфроси́не,/ по и́мени твоему́ бы́сть и житие́ твое́,/ зане́ испо́лнен был еси́/ ве́лия целому́дрия и нищеты́ ду́ха/ во вся дни жития́ твоего́,/ того́ ра́ди дом Свято́му Ду́ху/ свят и че́стен сотвори́л еси́ себе́,/ доброде́тельными дея́ньми/ и чуде́с дарова́ньми обогати́вся.

Стих: Честна́ пред Го́сподем/ сме́рть преподо́бных Его́.

На тебе́, уго́дниче Бо́жий,/ почи́ дух прему́дрости и ра́зума,/ и́мже умудри́лся еси́/ бы́ти лю́дем во спасе́ние,/ дух сове́та и кре́пости,/ и́мже возмо́гл еси́ вопроша́ющим отвещава́ти,/ дух ве́дения и благоче́стия,/ и́мже благоче́стно научи́л еси́/ и́щущия ду́ха и се́рдца но́ваго/ ве́дети Святу́ю Тро́ицу.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ве́тхаго челове́ка/ совле́клся еси́, Евфроси́не,/ и во Христа́ обле́клся еси́ вои́стинну,/ победи́в же вра́жия ополче́ния,/ яви́лся еси́ кре́пкий ду́хом нача́льник пусты́нныя оби́тели/ и му́дрый наста́вник к тебе́ приходя́щим/ и с во́плем, я́ко ста́рцу, взыва́ющим:/ возми́ мою́ кро́вь, да́ждь ми твой дух./ Сего́ ра́ди мо́лим тя:/ умудри́ нас моли́твами твои́ми спаса́тися/ и испроси́ душа́м на́шим ве́лию ми́лость.

Сла́ва, глас 8:

На земли́ яви́лся еси́, о́тче,/ я́ко А́нгел безпло́тный,/ вся плотска́я жела́ния ду́хови покори́в,/ те́мже по преставле́нии в Небе́сных селе́ниих водвори́лся еси́./ Сего́ ра́ди, свя́те, вопие́м ти:/ А́нгеле земны́й, Небе́сный же челове́че,/ моли́ся Христу́ Бо́гу/ о спасе́нии душ на́ших.

И ны́не, Богоро́дичен, глас то́йже:

Изба́ви нас от бед, Ма́ти Бо́жия,/ ро́ждшая всех Творца́,/ да вси зове́м Ти:/ Ра́дуйся, еди́но предста́тельство душ на́ших.

По благослове́нии хле́бов тропа́рь преподо́бному́ченику, два́жды, и Богоро́дице Де́во: еди́ножды.

Тропа́рь преподо́бному́ченику, глас 4:

От ю́ности твоея́ впери́в ум твой к Бо́гу,/ блаже́нне Евфроси́не,/ ми́ра же отве́ргся,/ всели́лся еси́ в пусты́ню непроходи́мую,/ и та́мо, от Го́спода укрепля́емь,/ в моли́твах и поще́ниих до́блественне ножи́л еси́,/ и жи́знь твою́ страда́льчески/ убие́нием от сыно́в противле́ния сконча́л еси́,/ сего́ ра́ди со преподо́бными и му́ченики венча́лся еси́,/ с ни́миже и ны́не предстои́ши Престо́лу Пресвяты́я Тро́ицы./ Сию́ моли́, мо́лим тя,/ оставле́ние пода́ти согреше́ний на́ших/ и дарова́ти нам ве́лию ми́лость.

Ин тропа́рь, глас 1:

От ю́ности впери́в ум свой к Бо́гу,/ блаже́нне Евфроси́не,/ и бе́гая суеты́ ми́ра сего́,/ дости́гл еси́ в пусты́ню непроходи́мую,/ иде́же Бо́гу, тя укрепля́ющу,/ а́нгельское житие́ стяжа́в,/ порабо́тал еси́ дово́льно Влады́це своему́ Христу́/ в поще́нии, и в моли́твах, и во всено́щных бде́ниях/ и сподо́бился еси́ да́ра Ду́ха Пресвята́го,/ е́же прорица́ти бу́дущая,/ наставля́я на стезю́ покая́ния/ притека́ющих к тебе́ и послу́шающих тя./ Те́мже Всеблаги́й Бог, ви́дя вели́кую твою́ к Себе́ ве́ру,/ нелицеме́рную любо́вь и несумне́нную наде́жду,/ дарова́ тебе́ не то́чию е́же ве́ровати в Него́,/ но е́же и страда́ти по Нем,/ егда́ от проти́вных сыно́в в то́йже пусты́ни кро́вь твоя́ неща́дно излия́ся./ И досе́ле, я́ко А́велева, вопие́т к Бо́гу,/ свиде́тельствующу о сем нетле́нием моще́й твои́х./ На ня́же взира́юще, уми́льно вопие́м:/ сла́ва Христу́, дарова́вшему тебе́ благода́ть толи́ку,/ Его́же и моли́ о нас.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 3:

Тече́ние соверши́в и́стинное,/ мучи́телей де́рзость победи́л еси́, преподо́бному́чениче,/ прии́м же вене́ц от руки́ Вседержи́теля,/ А́нгелом соприча́стник показа́лся еси́.

Сла́ва, и ны́не, Богоро́дичен:

Покро́в бу́ди нам и предста́тельство,/ и заступле́ние, и похвала́, Де́во Богоро́дице,/ я́ко Ты еси́ безпомо́щных си́ла необори́мая и безнаде́жных наде́жда.

По 2-м стихосло́вии седа́лен, глас 1:

Наста́, Богоно́сне о́тче Евфроси́не, све́тлый де́нь па́мяти твоея́,/ те́мже, вси ве́рнии, собра́вшеся в пусты́ню твою́,/ све́тло ра́дующеся, припа́даем с ве́рою к моще́м твои́м/ и восхваля́ем Го́спода, просла́вльшаго тя.

Сла́ва, и ны́не, Богоро́дичен:

Бо́га, из Тебе́ воплоти́вшагося, позна́хом, Богоро́дице Де́во./ Того́ моли́ о спасе́нии страны́ на́шея правосла́вныя/ и всех, запечатле́нных И́менем Сы́на Твоего́.

На полиеле́и велича́ние о́бщее преподо́бным.

По полиеле́и седа́лен, глас 8:

Де́латель иску́сен яви́вся в поще́ниих,/ просия́л еси́ и во страда́вших,/ ве́рныя же просвети́л еси́ твои́ми уче́ньми, блаже́нне Евфроси́не,/ те́мже тя вси согла́сно велича́ем.

Сла́ва, и ны́не, Богоро́дичен:

Наде́ждо непосты́дная на Тя упова́ющих,/ ро́ждшая па́че естества́ пло́тию Христа́, Бо́га на́шего,/ Того́, Влады́чице, моли́ пода́ти всем нам пре́жде конца́ исправле́ние и ве́лию ми́лость.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми?

Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Да испо́лнятся уста́ на́ша/ хвале́ния Твоего́, Го́споди,/ я́ко да воспое́м сла́ву Твоего́ уго́дника,/ преподо́бному́ченика Евфроси́на,/ в неду́зех цели́теля,/ в ско́рбех уте́шителя,/ о всех же, чту́щих святу́ю его́ па́мять,/ те́плаго моли́твенника.

Кано́н Пресвяте́й Богоро́дице со ирмосо́м на 6 и свято́му на 8. Кано́н преподо́бному́ченику Евфроси́ну, глас 6.

Пе́снь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь пои́м, вопия́ше.

Страда́льче преподо́бне Евфроси́не,/ моли́твами твои́ми умири́ на́ша души́/ и сподо́би воспе́ти по́стнический по́двиги твоя́, страда́ния и чудеса́,/ и́миже Госпо́дь наш сла́вно просла́вися.

Изше́д в са́не и́ночестем от Ти́хвинския оби́тели, преподо́бне о́тче наш,/ ты, я́ко пти́ца, прелете́л еси́ в гнездо́ свое́,/ во излю́бленное тобо́ю ме́сто пусты́нное,/ и зде, на о́строве, во бла́тех непроходи́мых,/ при мно́гих е́зерех всели́лся еси́,/ направля́емь руко́ю Живонача́льнаго.

Водрузи́в на ме́сте твоего́ вселе́ния Животворя́щий Крест/ и ископа́в себе́ ма́лую пеще́ру,/ вручи́л еси́ себе́ Бо́жию промышле́нию, страда́льче преподо́бне,/ пребыва́я же та́мо в по́двизех, бы́лием тра́вным пита́лся еси́,/ до́ндеже обрето́ша тя веле́нием Бо́жии и́щущии спасе́ния.

Глаго́лов и зако́нов Бо́жиих испо́лнитель быв,/ испо́лнился еси́ в пусты́ни мно́гих дарова́ний Ду́ха,/ о ни́хже рече́ Боже́ственный Па́вел Апо́стол во свои́х писа́ниих.

Кре́постию Христа́, Его́же возлюби́л еси́ изде́тства все́ю кре́постию се́рдца твоего́,/ возмо́гл еси́ низложи́ти си́лу вра́жию,/ сего́ ра́ди дарова́ ти Бог дар прозорли́вства/ и си́лу твори́ти чудеса́.

Богоро́дичен: Стра́сти пло́ти моея́ и непостоя́ние ума́ моего́/ отжени́ от Мене́, Пречи́стая Де́во,/ и наста́ви мя на стезю́ спасе́ния.

Пе́снь 3

Ирмо́с: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бли́же,/ и утверди́вый нас на ка́мени/ испове́дания Твоего́.

Благи́ми нра́вы украси́вся,/ плотски́я стра́сти умертви́л еси́ ве́лиим воздержа́нием/ и к ве́чней жи́зни му́ченически преста́вился еси́, прехва́льне о́тче наш.

Ве́сь прилежа́ Вседержи́телю, прему́дре о́тче Евфроси́не,/ ве́лиими по́двиги отгна́л еси́ от себе́ диа́вола,/ смири́в горды́ню его́ твои́м преподо́бническим смире́нием.

А́нгельски пожи́в на земли́,/ возвы́сился еси́, о́тче, к лицезре́нию красоты́ Небе́сныя,/ и́мже ны́не наслажда́яся, мо́лишися о спасе́нии на́шем.

Име́я споспешеству́ющую тебе́ Бо́жию си́лу, преподо́бному́чениче,/ по сме́рти твое́й оби́льно источа́еши чудеса́/ прибега́ющим к тебе́ с ве́рою.

Ско́ро прише́л еси́ на по́мощь, я́ко бы́вый сам чтец,/ ко чтецу́ пусты́нныя це́ркве Иоа́нну,/ тя́жко страда́вшему от нападе́ния лю́таго зве́ря лесна́го,/ и, прикосну́вся боле́зненней его́ главе́, яви́л еси́ на нем дела́ Бо́жия./ Моли́, чудотво́рче, Христа́ Бо́га на́шего,/ да исцели́т от мра́ка грехо́внаго духо́вная на́ша очеса́.

Богоро́дичен: Тве́рдое упова́ние на Тя возлага́юще, Богороди́тельнице,/ Тебе́ усе́рдно мо́лимся:/ сохрани́ ве́сь сию́ и вся ве́си и гра́ды страны́ Русская/ от вся́ких бед, находя́щих челове́ком согреша́ющим.

Седа́лен, глас 4:

Покори́л еси́ ду́хови, пресла́вне о́тче наш, вся плотска́я мудрова́ния,/ ве́лиим же воздержа́нием и те́плыми ко Христу́ моли́твами/ возсия́л еси́ в пусты́ни, я́ко луча́ со́лнечная./ Сего́ ра́ди воспева́ем хвалу́ тебе́,/ по достоя́нию тя ублажа́юще.

Сла́ва, и ны́не, Богоро́дичен:

Стена́ необори́мая христиа́ном еси́, Богоро́дице Де́во,/ к Тебе́ бо прибега́юще, невреди́ми пребыва́ем/ и, согреша́юще, и́мамы тя моли́твенницу./ Те́мже благода́рственно вопие́м Ти:/ ра́дуйся, Благода́тная, Госпо́дь с Тобо́ю.

Пе́снь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Процвела́ е́сть, я́ко крин, пусты́ня Синеезе́рская,/ егда́ преподо́бнии ру́це твои́ и притека́ющих к тебе́ бра́тии/ сотвори́сте в ней храм Бо́жий,/ тобо́ю же, о́тче, основа́на бы́сть та́мо и оби́тель и́ноческая,/ в не́йже и́щущия спасе́ния на пу́ть пра́вый наставля́л еси́.

Ве́льми му́дрый путево́ждь к Ца́рствию Бо́жию, о́тче, был еси́,/ не то́кмо бо и́ноцы, но и вси, приходи́вшии к тебе́,/ а́ки от исто́чника, почерпа́ху от Тебе́ свято́е уче́ние:/ вели́к бо ра́зум име́л еси́, све́дущ в Боже́ственных догма́тех,/ зане́ изде́тства к науче́нию в Боже́ственных Пи́саниих попремно́гу прилежа́л еси́.

Оби́тель твоя́, о́тче,/ в годи́ну сму́ты в Русстей земли́/ яви́ся убе́жище мно́зем правосла́вным христиа́ном:/ тогда́ бо Рустии лю́дие мече́м злове́рных ля́хов;/ а́ки кла́сы серпо́м, пожина́хуся,/ сего́ ра́ди укрыва́хуся во твое́й оби́тели,/ обрета́юще та́мо душ и теле́с спасе́ние.

Соде́яв ду́шу твою́ храм Свята́го Ду́ха, пресла́вне о́тче наш,/ насле́дник Го́рняго Ца́рствия и сожи́тель Вы́шних сил яви́лся еси́/ и прия́л еси́ от Бо́га дар содева́ти зна́мения и чудеса́.

Я́коже Госпо́дь наш прикосну́ся ру́це те́щи Петро́вы,/ огне́м жего́мыя, и а́бие исцели́ ю,/ та́ко и ты, уго́дниче Христо́в,/ предста́тельством твои́м пред Го́сподем/ укроти́л еси́ огневи́цу отрокови́цы Мари́и,/ на одре́ сме́рти лежа́вшия,/ внегда́ призва́ тя на по́мощь иере́й Проко́пий в моли́тве свое́й.

Богоро́дичен: Де́ва пребыла́ еси́ по рождестве́,/ я́коже и пре́жде рождества́ была́ еси́,/ зане́ Бо́га Сло́ва родила́ еси́,/ изба́вльшаго нас от тле́ния кре́стною сме́ртию Свое́ю,/ Де́во Пренепоро́чная.

Пе́снь 5

Ирмо́с: Бо́жиим све́том Твои́м, Бла́же,/ у́тренюющих Ти души́ любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

У́мныма очи́ма, я́ко прозорливец,/ предзре́л еси́ кончи́ну твою́ от иноплеме́нных/ и истребле́ние и́ми твоея́ оби́тели,/ те́мже умоля́л еси́, о́тче, укрыва́вшияся в ней прише́льцы и са́мыя и́ноки/ ра́ди сохране́ния жи́зни изы́ти из оби́тели./ Сам же ты, си́лою Свята́го Ду́ха огради́вся,/ я́ко началово́ждь, в сре́тение супоста́том изше́л еси́,/ и безтре́петно стал еси́ у креста́,/ водруже́ннаго тобо́ю при основа́нии оби́тели,/ и та́ко приве́л еси́ сам себе́, я́коже овча́, на закла́ние.

Бе́снии ля́хове, ви́девше тя, о́тче, безтре́петно стоя́ща у креста́/ и разуме́вше, я́ко ты еси́ нача́льник оби́тели, ре́ша ти де́рзостно:/ да́ждь нам име́ние монастыря́ твоего́./ Ты же со смире́нием и́ноческим отве́тствовал еси́,/ указу́я на созда́нный тобо́ю храм:/ все име́ние мое́ обрета́ется в сем хра́ме Пречи́стыя Богоро́дицы.

Услы́шавше безбоя́зненный отве́т твой о име́нии,/ дерзостнии ля́хове разъяри́шася,/ и се еди́н от во́ин вы́ю  твою́ пресече́ мече́м до полу́,/ други́й же раздроби́ честну́ю главу́ твою́,/ и та́ко пре́дал еси́ чи́стую ду́шу твою́ в ру́це Го́сподеви.

На уби́йцы укрепи́вый тя, о́тче, Подвигополо́жник Христо́с,/ прии́м твой дух в Небе́сная селе́ния по сконча́нии твое́м,/ сотвори́ тя исто́чник чуде́с/ с любо́вию и ве́рою к тебе́ прибега́ющим.

От нанесе́ния главотя́жей  и убру́сцев  апо́стола Па́вла ве́рующий исцеля́хуся,/ я́коже Богоглаго́ливый Лука́ повеству́ет./ Не про́сты же си́лы твори́т Госпо́дь прикоснове́нием и твои́х веще́й:/ нагла́вник бо твой, о́тче,/ и пе́рсть от гро́ба твоего́,/ и еле́й от лампа́ды у ра́ки моще́й твои́х/ источа́ют, твои́ми моли́твами о нас, исцеле́ния боля́щим.

Богоро́дичен: Исцели́, Пречи́стая, неду́гующаго ума́ моего́ помраче́ние,/ Врача́ ро́ждшая, Христа́, Всенепоро́чная Де́во.

Пе́снь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Прии́м му́ченическую теле́сную кончи́ну, о́тче,/ возне́слся еси́ ду́хом твои́м в Го́рняя селе́ния моли́тися о нас Вседержи́телю,/ моща́ми же твои́ми с на́ми пребыва́еши,/ явля́я те́ми мно́гая зна́мения и чудеса́.

Глаго́лом Бо́жиим свиде́тельствована бы́сть си́ла чуде́с твои́х, о́тче Евфроси́не:/ одержи́ма бо су́щи ве́лиим бесо́вским пла́чем,/ раба́ Бо́жия Ага́фия, егда́ бы́сть в ра́зуме, слы́ша глас свы́ше:/ гряди́ в пусты́ню Синеезе́рскую,/ помоли́ся чудотво́рцу Евфроси́ну и исцеле́еши./ Та́яже прии́де, и помоли́ся, и исцеле́.

Ели́цы притека́ху с ве́рою к моще́м твои́м, ско́рый помо́щниче и моли́твенниче, вси исцеля́хуся,/ мо́лим тя у́бо:/ по́мощию твое́ю посети́ и ны,/ те́лом и душе́ю немощству́ющих.

Умиле́нно призыва́юще свято́е и просла́вленное и́мя твое́, о́тче,/ кре́пость и исцеле́ние приима́ху от Тебе́ немощству́ющии пло́тию и ду́хом,/ ско́рбнии же и удруче́ннии печа́льми жите́йскими/ обрета́ху от Тебе́ ско́рую по́мощь и утеше́ние.

Невозмо́жно е́сть исчи́слити мно́гое мно́жество чуде́с твои́х,/ цели́телю душ и теле́с на́ших, о́тче Евфроси́не,/ сего́ ра́ди творя́ще па́мять твою́,/ благода́рственно благословля́ем просла́вльшаго тя,/ отце́в Бо́га благослове́ннаго.

Богоро́дичен: Отцу́ Собезнача́льнаго Сы́на пло́тию родила́ еси́, Пренепоро́чная Де́во,/ Его́же моли́ со преподобному́чеником Евфроси́ном,/ да сотвори́т ны сы́ны Своего́ Ца́рствия/ и насле́дники обетова́ния ве́чнаго.

Конда́к, глас 8:

Подража́я житию́ дре́вних отце́в,/ Богому́дре о́тче Евфроси́не,/ красоту́ ми́ра сего́ возненави́дел еси́,/ и, в пусты́ню всели́вся,/ ве́ру Христо́ву, я́коже щит, в се́рдце твое́ прия́л еси́,/ с не́юже изше́л еси́, я́ко добр во́ин Царя́ Небе́снаго,/ не на бра́нь проти́ву пло́ти и кро́ве,/ но на бра́нь проти́ву ко́зней неви́димаго врага́,/ и сего́ вознесе́нную горды́ню,/ по да́нней тебе́ от Ду́ха Свята́го благода́ти,/ глубо́ким смире́нием твои́м низложи́л еси́,/ и от Небе́снаго Мздовозда́теля неувяда́емым венце́м побе́ды венча́лся еси́./ Сего́ ра́ди, соше́дшеся любо́вию, вопие́м ти:/ ра́дуйся, о́тче Евфроси́не, пусты́нное украше́ние.

И́кос:

А́нгельски пожи́в на земли́,/ дости́гл еси́, о́тче, лицезре́ния красоты́ Бо́жия,/ и́мже наслажда́яся на Небеси́, мо́лишися о спасе́нии на́шем./ Сего́ ра́ди мы, земни́и, дне́сь па́мять твою́ пра́зднующе, любо́вию вопие́м ти:/ ра́дуйся, благочести́ваго ко́рене правосла́вных роди́телей пречестна́я о́трасле;/ ра́дуйся, от младе́нства Христа́ возлюби́вый./ Ра́дуйся, в де́тстве и ю́ности и́ноческим подвиго́м научи́выйся;/ ра́дуйся, дре́вним пусты́нником подража́телю./ Ра́дуйся, Новгоро́дстей Це́ркви в чи́не чтеца́ церко́внаго послужи́вый;/ ра́дуйся, кри́не, посреде́ блат пусты́нных процветы́й./ Ра́дуйся, му́дрый наста́вниче и́щущим душе́внаго спасе́ния;/ ра́дуйся, цели́телю душ и теле́с прося́щим твоего́ пред Бо́гом заступле́ния./ Ра́дуйся, похвало́ мона́шествующих;/ ра́дуйся, дар прозорли́вства и си́лу чуде́с от Бо́га прие́мый./ Ра́дуйся, о́тче Евфроси́не, пусты́нное украше́ние.

Пе́снь 7

Ирмо́с: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Распали́в се́рдце твое́ любо́вию кре́пкою ко Христу́, о́тче,/ пла́мень по́хоти плотски́я и о́гнь я́рости ея́ претвори́л еси́ в ро́су/ и всю си́лу их угаси́л еси́, поя́ Бо́гу в безмо́лвии пусты́ннем:/ благослове́н еси́, Го́споди Бо́же оте́ц на́ших.

Пло́ти твое́й не послужи́л еси́,/ но, апо́стольски распина́я ю со страстьми́ и похотьми́, покори́л еси́ ду́ху/ и че́стен храм Ду́ху Свято́му себе́ сотвори́л еси́, взыва́я:/ благослове́н еси́, Го́споди Бо́же оте́ц на́ших.

Просвети́в твое́ се́рдце смиренному́дрием,/ ве́рен был еси́ нача́льник собо́ра и́ноков,/ наставля́я, и уча́, и вся приводя́ к Бо́жией во́ли, пою́щия:/ благослове́н еси́, Го́споди Бо́же оте́ц на́ших.

Ве́лиим благоразу́мием, о́тче наш Евфроси́не,/ покори́л еси́ ду́хови го́рдость ума́ жите́йскаго, со смире́нием поя́:/ благослове́н еси́, Го́споди Бо́же оте́ц на́ших.

Прекра́сный цвет, о́тче, в до́му Бо́жий произра́сл еси́,/ мно́гими доброде́тельми красу́яйся/ и арома́ты чуде́с благоуха́яй.

Богоро́дичен: Ум наш плени́ в послуша́ние ве́ры,/ дух и ду́шу всесоверше́нны сотвори́/ и те́ло в прише́ствие Го́спода на́шего Иису́са Христа́/ соблюди́ непоро́чно моли́твами Твои́ми, Всенепоро́чная Богороди́тельнице.

Пе́снь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Широ́кий пу́ть, вводя́щий в па́губу, презре́л еси́, страда́льче преподо́бне,/ и те́сными враты́ вшел еси́ в Небе́сное Ца́рствие./ Те́мже мо́лим тя:/ укрепи́ нас моли́твами твои́ми понести́ благо́е и ле́гкое и́го креста́,/ да и мы во вре́мя благопотре́бное/ вни́дем в поко́й Бо́га благослове́ннаго.

Бо́дренным ума́ трезве́нием и те́плым ко Христу́ моле́нием/ диа́вола посрами́л еси́, прехва́льне страстоте́рпче,/ стра́стныя же того́ прило́ги отгна́л еси́,/ кре́пкою ве́рою во Христа́ вооружи́вся,/ и та́ко вшел еси́ в поко́й Бо́га благослове́ннаго.

А́нгельски, о́тче, на земли́ пожи́л еси́,/ те́мже ны́не со А́нгелы лику́ет на Небеси́ дух твой,/ моли́ у́бо о нас, чту́щих па́мять твою́, Небе́сный жи́телю,/ да всели́т Христо́с и нас в поко́й Бо́га благослове́ннаго.

Во вся дни жития́ твоего́/ неукло́нно ше́ствовал еси́, прему́дре о́тче наш, стезя́ми Боже́ственными к Небеси́,/ иде́же ны́не пребыва́я,/ с ли́ки А́нгельскими ра́достно воспева́еши отце́в Бо́га благослове́ннаго.

Предстои́ши ны́не Престо́лу Вседержи́теля, преблаже́нне о́тче Евфроси́не,/ нам же, на земли́ су́щим, явля́ешися вои́стинну А́нгел храни́тель,/ утвержда́я ны в ве́ре уче́ньми твои́ми и зна́меньми чуде́сными/ и соблюда́я ны в чи́стем испове́дании отце́в Бо́га благослове́ннаго.

Богоро́дичен: Богоуго́дне пожи́вшему и страда́льчески житие́ сконча́вшему/ преподо́бному́ченику Евфроси́ну после́довати наста́ви нас, Веенепоро́чная,/ потребля́ющи от душ на́ших прило́ги лука́вых де́монов/ и возводя́щи при́сно умы́ на́ша к зре́нию и исполне́нию за́поведей Сы́на Твоего́, Бо́га на́шего.

Пе́снь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Изба́вився от сете́й ловя́щих тя,/ почи́л еси́ во благоуха́нии святы́ни/ и Го́сподеви ны́не предстои́ши, поя́ со Безпло́тными:/ Свят, Свят, Свят еси́, Бо́же, Тро́ице Вседе́тельная.

Я́ко победи́тель мы́сленных враго́в, прехва́льне о́тче,/ венце́м побе́ды неувяда́емым увенча́лся еси́ от Царя́ всех./ Сего́ ра́ди мо́лим тя усе́рдно:/ моли́ бла́гость Вседержи́теля/ дарова́ти правосла́вным лю́дем на супоста́ты побе́ду.

Я́ко предста́телю на́шему и ско́рому помо́щнику,/ су́щему в Небе́сных оби́телех, мо́лимся тебе́:/ Влады́ку всех моли́/ сохрани́т от гла́да, тру́са, пото́па, огня́, меча́,/ от наше́ствия иноплеме́нников и междоусо́бныя бра́ни ве́сь сию́/ и вся ве́си, гра́ды и страны́ христиа́нския/ и вся ны спасти́, благоче́стно тя почита́ющия.

Честна́я ра́ка святы́х моще́й твои́х, о́тче пречу́дне,/ бога́тно источа́ет исцеле́ния приходя́щим к тебе́ с ве́рою/ и воздвиза́ет ве́рныя сла́вити ве́лия твоя́ по́двиги и чудеса́.

Приими́, преблаже́нне о́тче наш Евфроси́не,/ хвале́бная на́ша песнопе́ния, любо́вию тебе́ возноси́мая,/ осеня́й нас твои́ми моли́твами/ и ускори́ на по́мощь благода́тным заступле́нием твои́м во вре́мя благопотре́бное.

Богоро́дичен: Ка́мень краеуго́льный – Христо́с – ве́рным е́сть основа́ние,/ неве́рным же ка́мень претыка́ния и собла́зна;/ на ве́рнем ка́мени, Влады́чице, утверди́ мое́ помышле́ние/ и спаси́ мя Ма́терним Твои́м дерзнове́нием к Сы́ну Твоему́, Бо́гу на́шему.

Свети́лен:

Све́та Пода́тель, Госпо́дь,/ поста́ви тя свети́льника све́тла Це́ркви Свое́й, о́тче пресла́вне Евфроси́не,/ озари́ у́бо све́том твои́м и вся ны,/ почита́ющия святу́ю па́мять твою́.

Сла́ва, и ны́не, Богоро́дичен:

Свеще́ та́инственная, Богоневе́сто,/ возсия́й свет ра́зума су́щим во тьме́ неразу́мия/ и спаси́ вся ны, благоче́стно пою́щия Тя/ и я́ко Ма́терь Бо́жию велича́ющия.

На хвали́тех стихи́ры, глас 8:

Богоно́сне, преблаже́нне о́тче Евфроси́не,/ вся плотска́я мудрова́ния ду́хови покори́л еси́,/ посто́м же и моли́твою утверди́вся,/ я́ко зла́то, в горни́ле искуше́но, просия́л еси́/ и храм Свята́го Ду́ха яви́лся еси́,/ собра́в же мона́шествующих мно́жества,/ уче́ньми твои́ми, я́коже ле́ствицею,/ на высоту́ доброде́телей сия́ возве́л еси́./ Помина́й ны, чту́щия па́мять твою́,/ и моли́ спасти́ся душа́м на́шим.

Возсия́ дне́сь пресла́вная и всепра́зднственная па́мять твоя́,/ пресла́вне о́тче Евфроси́не,/ созыва́ющи многочи́сленное по́стников сосло́вие/ и преподо́бных ликостоя́ния,/ челове́ки же вся и А́нгелы/ к похвале́нию ди́внаго во святы́х Свои́х/ Христа́ Бо́га на́шего:/ притека́юще бо ко святы́м моще́м твои́м,/ исцеле́ния да́ры оби́льно прие́млем/ и тебе́ венча́вшаго Христа́ прославля́ем,/ Спа́са душ на́ших.

О́тче Богому́дре Евфроси́не,/ изде́тства Христа́ возлюби́в,/ ты о И́мени Его́ мно́гия труды́ и ско́рби поне́сл еси́/ и да́же до сме́рти пострада́л еси́./ Предстоя́ у́бо ны́не Престо́лу Вседержи́теля/ и неизрече́нныя добро́ты Его́ наслажда́яся,/ моли́ся о нас, све́тло пра́зднующих честну́ю па́мять твою́/ и просла́вившаго тя Христа́ велича́ющих.

Сла́ва, глас 2:

Прииди́те, вси ве́рнии,/ в пе́снех возвели́чим Христо́ва уго́дника,/ преблаже́ннаго ста́рца Евфроси́на:/ сей бо, измла́да пло́ть ду́хови покори́в,/ по стопа́м Госпо́дним в житии́ свое́м ше́ствова,/ те́мже и насле́дова Небе́сное Ца́рствие./ Сего́ ра́ди к нему́ си́це возопии́м:/ ра́дуйся, преподо́бне о́тче наш, му́чениче Евфроси́не,/ вели́каго да́ра чудотворе́ний от Христа́ сподо́бивыйся,/ ра́дуйся, те́плый предста́телю наш пред Го́сподем/ и моли́твенниче о душа́х на́ших.

И ны́не, Богоро́дичен:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

Славосло́вие вели́кое.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 8: Восхва́лятся преподо́бнии во сла́ве/ и возра́дуются на ло́жах свои́х. Стих: Воспо́йте Го́сподеви пе́снь но́ву, я́ко ди́вна сотвори́ Госпо́дь. 

Апо́стол к Тимофе́ю, зача́ло 291. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́ .

Ева́нгелие от Ма́рка, зача́ло 37. Прича́стен: Ра́дуйтеся, пра́веднии, о Го́споде:

Моли́тва

О святы́й преподо́бному́чениче Евфроси́не! Услы́ши усе́рдное на́ше, приноси́мое тебе́ моле́ние. Огради́ и сохрани́ святы́ми моли́твами твои́ми ве́сь сию́ и вся ве́си и гра́ды правосла́внаго оте́чества на́шего от гла́да, тру́са, пото́па, огня́, меча́, наше́ствия иноплеме́нников, междоусо́бныя бра́ни и смертоно́сныя я́звы, от вся́кия беды́, ско́рби и зла. Умоли́ Го́спода Бо́га и Спа́са на́шего дарова́ти мир Це́ркви Его́, под зна́мением Креста́ во́инствующей, архипа́стырем и па́стырем на́шим пра́во пра́вити сло́во и́стины Ева́нгельския хода́тайством твои́м помози́ и всем правосла́вным христиа́ном проще́ние согреше́ний их во́льных и нево́льных испроси́, в неду́зех же пребыва́ющим пода́ждь предста́тельством твои́м от неду́гов исцеле́ние, да тебе́ ра́ди сла́вится пречестно́е и великоле́пое И́мя Пресвяты́я Тро́ицы, Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.