А́ще изво́лит настоя́тель, аллилу́ия или́ тропа́рь, да пое́т по уста́ву.

На Го́споди, воззва́х: стихи́ры, глас 1.

Подо́бен: Всехва́льнии му́ченицы:

Отче Пата́пие,/ пло́ти стремле́ния воздержа́нием увяди́в разжже́ние,/ в пусты́ню всели́лся еси́,/ я́ко Или́я дре́вле,/ ум очища́я непреста́нными к Бо́гу моли́твами./ И ны́не моли́ дарова́ти душа́м на́шим/ ми́р и ве́лию ми́лость.

О́тче Пата́пие,/ лико́м по́стническим причи́слился еси́,/ безстра́стием украша́лся,/ и всели́лся еси́ во оби́телех преподо́бных,/ иде́же Свет незаходи́мый,/ иде́же есть дре́во жи́зни./ И ны́не моли́ дарова́ти душа́м на́шим/ ми́р и ве́лию ми́лость.

О́тче Пата́пие,/ свети́льник из Еги́пта возсия́л еси́,/ просвеща́я подсо́лнечную чуде́с светлостьми́,/ душетле́нных неду́г отгоня́я мрак,/ де́монов охужда́я тьму./ И ны́не моли́ Христа́/ дарова́ти душа́м на́шим/ ми́р и ве́лию ми́лость.

И́ны стихи́ры Пресвяте́й Богоро́дице, глас и подо́бен то́йже:

Нетле́нно родила́ еси́ Бо́га,/ тлю потре́бльшаго и нетле́ние источи́вшаго,/ Нетле́нная Непоро́чная./ Те́мже молю́ Тя:/ лю́тыми истле́вшаго мя/ моли́твами Твои́ми, Чи́стая, обнови́, да сла́влю Тя,/ да любо́вию велича́ю Тя,/ род наш возвели́чившую.

Всепе́тая Влады́чице,/ наде́жде ве́рных и утвержде́ние,/ прибе́жище и по́мощь, Тя мо́лим:/ от вся́ких бед рабы́ твоя́ сохрани́,/ ве́рою покланя́ющияся Рождеству́ Твоему́./ Христу́ моли́ся дарова́ти душа́м на́шим ми́р и ве́лию ми́лость.

Увы́ мне, что бу́ду,/ ум, и ду́шу, и те́ло оскверни́в прегреше́ньми?/ что сотворю́? ка́ко же избе́гну пла́мене неугаси́маго/ и нереши́мых уз ве́чных?/ но, о Всенепоро́чная,/ пре́жде конца́ умоли́ Сы́на Твоего́/ пода́ти ми оставле́ние.

Сла́ва, и ны́не, Богоро́дичен. Подо́бен то́йже:

Огнь Божества́,/ Христа́ во утро́бе носи́ла еси́,/ его́же ны́не моли́, Всечи́стая,/ удобопали́мую вещь страсте́й мои́х угаси́ти всю,/ и изба́вити мя огня́ ве́чнующаго,/ и све́тлости пра́ведных сподо́бити мя,/ егда́ прии́дет суди́ти вся́ческая.

Крестобогоро́дичен:

Своего́ А́гнца/ А́гница и непоро́чная Влады́чица/ на Кресте́ я́ко ви́де,/ зра́ка не иму́ща, ниже́ добро́ты,/ увы́ Мне! – рыда́ющи, глаго́лаше:/ где добро́та Твоя́ зайде, Сладча́йший?/ где бла́голе́пие?/ где благода́ть блиста́ющая о́браза Твоего́,/ Сы́не Мой вселюбе́знейший?

На стихо́вне Окто́иха.

Тропа́рь, глас 8:

В тебе́, о́тче, изве́стно спасе́ся е́же по о́бразу:/ прии́м бо крест, после́довал еси́ Христу́/ и, дея, учил еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со А́нгелы сра́дуется, преподо́бне Пата́пие, дух твой.

Сла́ва, и ны́не, Богоро́дичен.

НА У́ТРЕНИ

Оба кано́на Окто́иха и преподо́бнаго на 4, глас 2.

Песнь 1

Ирмо́с:

Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

Све́тлаго твоего́ жития́ све́тлая хотя́щу исправле́ния похвали́ти,/ молю́ся тебе́, преподо́бне,/ лучу́ богатода́тну с Небесе́ ми дарова́ти Го́споду помоли́ся,/ о́блак отгоня́щу неве́дения моего́, Пата́пие.

Еги́птяны пе́рвее глубино́ю покрывы́й Боже́ственным манове́нием,/ я́ко из глубины́ мирска́го смеше́ния тя восприи́м,/ просвети́ Боже́ственными осия́нии/ и всесве́тлу тя показа́ звезду́, о́тче преподо́бне.

Разже́гся, я́ко угль мы́сленный, теплото́ю ду́ха,/ мраз де́монский ты растопи́л еси́;/ разжже́нныя же стре́лы грехо́вныя угаси́л еси́, преподо́бне,/ и к безстра́стия высоте́ возве́лся еси́ чисте́йш.

Богоро́дичен: Дре́вния избавле́ние кля́твы ми́ру подава́я, Изба́витель/ из Тебе́, Де́во, ражда́ется, Челове́к быв,/ и́же преподо́бнаго Пата́пия показа́ исто́чник исцеле́ний/ всем, ве́рою к нему́ прири́щущим.

Песнь 3

Ирмо́с:

Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

Слез тече́ньми напои́в изря́дно душе́вную твою́ бразду,/ пшени́цу Боже́ственную прине́сл еси́ дея́ний,/ в жи́тницах вы́шних соблю́дшему.

Любо́вию вооружа́емь, я́коже мече́м, преподо́бне,/ и щито́м покрыва́емь,/ Боже́ственным твои́м смире́нием де́монов полки́ потреби́л еси́.

Воздержа́ния цве́том, я́коже крин, процве́л еси́,/ благово́нствуя, преподо́бне, сердца́ воспева́ющих тя/ и соверша́ющих ве́рою па́мять твою́.

Богоро́дичен: На объя́тиих носи́мь ро́ждшия Тя, Го́споди,/ еги́петския и́долы си́лою Твое́ю сокруши́л еси́,/ из него́же мно́жество преподо́бных прозя́бе́.

Седа́лен, глас 8.

Подо́бен: Прему́дрости:

Воздержа́ния по́ты по́стническими угаси́л еси́ пла́мень страсте́й,/ всем источи́в чуде́с пучи́ну,/ и в ней, я́коже вторы́й Моисе́й,/ потопи́л еси́ ле́стная стремле́ния де́монов полки́./ Те́мже, соше́дшеся, по до́лгу почита́ем всечестну́ю па́мять твою́ моле́бную,/ преподо́бне Богоно́се Пата́пие:/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Ми́лостиваго Сло́ва и милосе́рдаго я́ко ро́ждшая, Влады́чице всех,/ поми́луй вся, к Тебе́ прибега́ющия,/ и напа́стей, и боле́зней, и вся́каго озло́бления,/ и ве́чнующаго пла́мене свободи́,/ я́ко да благода́рственно мно́гих щедро́т Твои́х бога́тство просла́вим и безме́рную ми́лость/ и вопие́м Ти всегда́:/ моли́ Христа́ Бо́га грехо́в оставле́ние пода́ти/ покланя́ющимся ве́рою Рождеству́ Твоему́.

Крестобогоро́дичен:

Де́ва и Ма́ти Изба́вителя, Кресту предстоя́щи,/ боле́зненно со слеза́ми рыда́ющи, ма́терски вопии́те:/ что стра́нное сие́ и пресла́вное, Сы́не?/ Источа́яй всем челове́ком безстра́стие/ посреде́ осужде́нною на Кресте́ распя́тся,/ в ре́бра пробода́емь и же́лчию напоя́емь от рук, я́же созда́;/ но воста́ни и да́руй прегреше́ний оставле́ние/ ве́рою пою́щим Боже́ственная Твоя́ страда́ния.

Песнь 4

Ирмо́с:

Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Бе́здна те́плых твои́х слез/ потопи́ де́монская во́инства и грехо́вныя во́лны;/ пучи́на же чуде́с су́щим во глубине́ страсте́й показа́ся.

Смире́ние, бде́ние, и спротяже́нную моли́тву,/ и любо́вь нелицеме́рну, и ве́ру,/ и наде́жду стяжа́в,/ был еси́ собесе́дник Небе́сным А́нгелом, о́тче преподо́бне.

Успи́л еси́ страсте́й многообра́зных волне́ния/ Боже́ственными восхожде́нии и непреста́нными очище́нии./ Те́мже к невече́рнему́ сия́нию по успе́нии отше́л еси́.

Богоро́дичен: Возсия́л еси́ из Де́вы, я́ко из о́блака со́лнце,/ зве́зды озаря́ющия показа́в преподо́бныя Твоя́,/ ми́ру и страсте́м распе́ншихся, Ще́дре, си́лою Твое́ю.

Песнь 5

Ирмо́с:

Просвеще́ние во тьме лежа́щих,/ спасе́ние отча́янных, Христе́ Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, Бо́га не знаю.

Просвеще́ние во тьме лежа́щих,/ возсия́й ми зарю́ Боже́ственными преподо́бнаго Твоего́ моли́твами,/ разори́ о́блаки окая́нныя души́ моея́,/ одожди́ ми струю́ оставле́ния:/ ино́го бо, ра́зве Тебе́, Бо́га не вем.

Скве́рны страсте́й очи́стив о́ко мы́сленное, о́тче Богоно́се, воздержа́нием,/ Боже́ственною же моли́твою ты отве́рзл еси́ зе́ницы ослепле́ныя/ и разори́л еси́ сия́нием исцеле́ний лю́тых омраче́ние.

Здра́вие душе́вное, здра́вие теле́сное,/ вси незави́стную благода́ть, прииди́те, почерпе́м,/ я́ко от исто́чника, Боже́ственныя ра́ки му́драго Пата́пия:/ чудеса́ бо источа́ет, я́ко во́ды,/ ве́рою несомне́нною к нему́ притека́ющим.

Богоро́дичен: Да́теля жи́зни, вся́ческих содержа́щаго,/ родила́ еси́ неизрече́нным Рождество́м,/ во святы́х сла́вимаго, Отрокови́це,/ и на преподо́бных почива́ющаго,/ его́же о нас моли́, Богоневе́сто.

Песнь 6

Ирмо́с:

В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Светле́йшими ум просвеща́яй, о́тче, восхожде́нии,/ я́коже безпло́тен, с пло́тию пожи́л еси́,/ не умокри́вся грехми́, Пата́пие.

Или́ю Фесви́тянина подража́я и после́дуя Иоа́нну Предте́чи,/ в пусты́ню пе́рвее всели́лся еси́,/ безмо́лвием ум очи́стив.

Из Еги́пта свети́льник Богоза́рнейший,/ в Константи́нове гра́де сия́нием исцеле́ний просвеща́емь,/ облиста́л еси́, светле́йший о́тче Пата́пие.

Богоро́дичен: На о́блаце ле́гце седя́й,/ дре́вле во Еги́пет Христо́с прии́де/ и, низложи́в и́долы, и преподо́бных ли́ки собра.

Конда́к, глас 3.

Подо́бен: Де́ва днесь:

Храм твой, свя́те, духо́вное врачевство́ лю́дие обре́тше,/ со тща́нием к нему́ приходя́ще,/ цельбу́ неду́гов про́сят прия́ти,/ реше́ние же в житии́ прегреше́нных:/ ты бо всех су́щих в ну́ждах предста́тель яви́лся еси́,/ Пата́пие преподо́бне.

Песнь 7

Ирмо́с:

О́бразу зла́тому, на поле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́ема, поя́ху:/ благослове́н еси́, Бо́же оте́ц на́ших.

Огне́м мы́сленным разже́гл еси́ душе́вная чу́вствия,/ огнь грехо́вный испепели́л еси́ соде́йством ду́ха/ и светови́ден яви́лся еси́, воспева́я, Пата́пие:/ благослове́н еси́, Бо́же оте́ц на́ших.

Слепы́я воочи́вый соде́йством Боже́ственным, Богоблаже́нне,/ стра́сти разли́чныя исцели́л еси́/ и Боже́ственными призыва́нии полки́ лука́выя де́монов отгна́л еси́, воспева́я:/ благослове́н еси́, Бо́же оте́ц на́ших.

Чуде́с глубина́, врачева́ний река́,/ исто́чник непреста́нен, струя́, ника́коже оскуде́ема,/ твой гроб показа́ся, о́тче, ве́рно приступа́ющим и те́пле взыва́ющим:/ благослове́н еси́, Бо́же оте́ц на́ших.

Богоро́дичен: Обожа́ет мя из Тебе́, Де́во, Пребоже́ственный Бог, ра́бий зрак прие́м,/ обновля́ет же стези́ зна́ния, я́коже преде́лы естества́,/ мно́жество мона́хов и преподо́бных приве́д, пою́щих:/ благослове́н еси́, Бо́же оте́ц на́ших.

Песнь 8

Ирмо́с:

В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки.

Очи́стив тя сама́го от ти́ны страсте́й попече́нием,/ светле́йшее яви́лся еси́, о́тче, прия́телище Бо́жие, взыва́я:/ по́йте Го́спода и превозноси́те во вся ве́ки.

Устро́ив твою́ жи́знь Боголе́пно, преподо́бне о́тче,/ строи́тель показа́лся еси́,/ служи́в до́бре потре́бам святы́х, преподо́бне,/ с ни́миже сподо́бился еси́ Вы́шняго насле́дия.

Ко Го́споду моли́твами очи́сти ны от вся́кия скве́рны,/ те́плою твое́ю моли́твою от треволне́ния страсте́й, и боле́зней, и скорбе́й изба́ви/ тя досто́йно, Пата́пие, чту́щия.

Богоро́дичен: Я́же онебеси́вшая на́ше земное и тле́нное, Чи́стая, существо́,/ А́нгелов сла́ва и преподо́бных ра́дость, еди́на тва́рей Влады́чица,/ я́ко Бо́га ро́ждшая, да пое́тся во ве́ки.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

День спаси́тельный па́мять твоя́ возсия́,/ су́щая во тьме сердца́ просвеща́ющий и страсте́й мглу реша́щий,/ сы́ны све́та показу́яй, о́тче,/ ны́не чту́щия тя, Госпо́дня уго́дника.

Фиве́анов прозябе́ние, пусты́ни хвале́ние,/ мона́шествующих сла́ву и благоле́пие,/ византи́йскаго свети́льника, на земли́ А́нгела я́вльшася,/ Пата́пия вси досто́йно ублажи́м.

А́нгелов собесе́дник, преподо́бных равностоя́тель,/ проро́ков и апо́столов, му́чеников, иера́рхов, преподо́бне, соприча́стник быв,/ и Честне́й Тро́ице служа́ ума́ чистото́ю,/ о всех нас моли́ся.

Богоро́дичен: Вели́кое та́инство, е́же па́че ума́, рождества́ Твоего́,/ ужаса́ет А́нгелы, Богора́дованная,/ услажда́ет преподо́бных собо́ры, Чи́стая,/ свяще́нный весели́т отцы́,/ Боже́ственно пою́щия Тя, Богоро́дице Неискусобра́чная.

НА МАЛОЙ ВЕЧЕ́РНИ

На Го́споди, воззва́х: стихи́ры на 4, глас 1.

Подо́бен: Небе́сным чино́м:

Наста́, Богоно́се, со́лнца светле́йший твой пра́здник/ озаря́ет приходя́щия к тебе́ ве́рою,/ и безсме́ртием облагоуха́ет,/ и душа́м источа́ет исцеле́ние,/ Кири́лле преподо́бне,/ моли́твенниче о душа́х на́ших.

Чу́вственныя стра́сти теле́сныя победи́в воздержа́ния брозда́ми,/ чудоде́йственниче Кири́лле,/ и ре́вности Безпло́тных на земли́ показа́в,/ вся плотска́я жела́ния ду́хови пови́нул еси́,/ тем ны́не в Небе́сных селе́ниих водворя́яся,/ моли́ о душа́х на́ших.

Блаже́нне Кири́лле,/ основа́ние положи́в доброде́тели,/ дре́вняго челове́ка совлече́ся с по́хотьми́/ и во Христа́ облече́ся вои́стинну,/ тем и обличи́л еси́, преподо́бне,/ мно́гая вра́жия ополче́ния,/ жи́тель пусты́нный был еси́,/ моли́ спасти́ся душа́м на́шим.

Сла́ва, глас 8: Преподо́бне и Богоно́се о́тче наш Кири́лле:

(зри сла́вник на литии́).

И ны́не, Богоро́дичен: Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

На стихо́вне стихи́ры, глас 2.

Подо́бен: До́ме Евфра́фов:

Дом Отцу́ Безнача́льному был еси́,/ преподо́бне Кири́лле, о́тче наш,/ того́ моли́ пода́ти ми́р Це́ркви его́/ и душа́м на́шим ве́лию ми́лость.

Стих: Честна́ пред Го́сподем/ смерть преподо́бных Его́.

Дом и оби́тель Безнача́льнаго Отца́/ Единоро́дному Сы́ну был еси́,/ преподо́бне Кири́лле, о́тче наш,/ того́ моли́ поми́ловати лю́ди/ и пода́ти душа́м на́шим ве́лию ми́лость.

Стих: Блаже́н муж, боя́йся Г оспода,/ в за́поведех Его́ восхо́щет зело́.

Дом и жили́ще Ду́ху Пресвято́му/ был еси́, преподо́бне о́тче наш Кири́лле,/ того́ моли́ ми́р всему́ Правосла́вию пода́ти/ и душа́м на́шим ве́лию ми́лость.

Сла́ва, глас и подо́бен то́йже:

Дом и пребыва́ние Пресвяте́й и Безнача́льней Тро́ице был еси́,/ Кири́лле преподо́бне, о́тче наш,/ ю́же моли́ ми́р оби́тели твое́й пода́ти/ и душа́м на́шим ве́лию ми́лость.

И ны́не: Дом и Це́рковь воздви́жена/ во оби́тели твое́й, преподо́бне,/ в похвалу́ и сла́ву Пречи́стей Богоро́дице Мари́и,/ ю́же моли́, блаже́нне Кири́лле, о́тче наш,/ дарова́ти душа́м на́шим ве́лию ми́лость.

Тропа́рь, глас 4: Днесь возсия́:

(зри день сей ниже).

Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 4.

Подо́бен: Я́ко до́бля:

Преподо́бне и Богоно́се о́тче наш Кири́лле,/ любве́ ра́ди Христо́вы вся оста́вил еси́/ и, в пусты́ню всели́вся,/ ника́коже устраши́лся еси́ неви́димых враго́в боре́ния,/ а́ще бо и мно́гажды прише́дше на тя мечта́нии свои́ми,/ привиде́ния стра́шная показу́юще,/ ты же моли́твами твои́ми, я́ко прах, без ве́сти тех отгна́л еси́./ О, непоро́чныя твое́я души́ и кре́пкаго терпе́ния!/ Христа́ непреста́нно моли́/ спасти́ся душа́м на́шим.

Преподо́бне и Богоно́се о́тче наш Кири́лле,/ житие́ свое проше́д нескве́рно,/ терпе́ние же, и кро́тость,/ и любо́вь име́л еси́ нелицеме́рну,/ воздержа́ние безме́рное,/ всено́щное стоя́ние, умиле́нние Боже́ственно,/ ве́ру и наде́жду и́стинну/ с ми́лованием, о́тче, стяжа́в,/ я́ко А́нгел, пожи́л еси́ на земли́ с те́лом, Кири́лле блаже́нне,/ моли́твенниче о душа́х на́ших.

Преподо́бне и Богоблаже́нне о́тче Кири́лле,/ умертви́л еси́ пло́ти свое́й мудрова́ние,/ Боже́ственными разуме́нии теле́сных превы́ше страсте́й был еси́/ и смеше́н до́льними, нося́ начерта́нии,/ изобража́я в себе́ Боже́ственную добро́ту,/ и показа́лся еси́ весь светови́ден де́йством Свята́го ду́ха,/ Кири́лле преподо́бне, о́тче наш,/ моли́ спасти́ся душа́м на́шим.

Преподо́бне и Богоблаже́нне о́тче Кири́лле,/ благода́тию Свята́го ду́ха ум свой озари́в,/ от него́ же пресве́тлыми заря́ми се́рдце твое́ просвети́в/ и светови́ден весь вои́стинну был еси́,/ искуси́теля же вся́чески победи́л еси́,/ темже ны́не на Небесе́х лику́еши со А́нгелы и со все́ми святы́ми,/ помина́й нас всегда́, блажа́щих тя на земли́,/ и пра́зднующих пречестно́е успе́ние твое, и почита́ющих.

Сла́ва, глас 5:

Ра́дуйся, вои́стинну по́стнических по́двиг соверше́ние;/ ра́дуйся, благово́нный сосу́де,/ ты бо крест Христо́в на ра́мо взем/ и Влады́це Христу́ себе́, преблаже́нне, возложи́л еси́,/ плоть попра́л еси́,/ до́лу влеку́щее мудрова́ние пови́нул еси́,/ доброде́тельми же свои́ми ду́шу просвети́л еси́/ и к Боже́ственному дости́г жела́нию,/ темже, всесвяту́ю па́мять твою́ пра́зднующе, прехва́льне Кири́лле,/ Боже́ственнаго Человеколю́бия про́сим получи́ти твои́ми к Бо́гу моли́твами/ и ми́рови дарова́ти ве́лию ми́лость.

И ны́не, Богоро́дичен: В Чермне́м мо́ри:

Вход. Чтения преподо́бническая

(зри день 5-й).

На литии́ стихи́ры, глас 8:

В пусты́ню дости́гл еси́, Преблаги́м Бо́гом наставля́ем,/ преподо́бне о́тче Кири́лле,/ в не́йже, я́ко дре́во благопло́дно, насажде́н еси́,/ всегда́ поуча́яся в зако́не Госпо́дни,/ плоды́ воздержа́ния стяжа́л еси́,/ Всесвяте́й Тро́ице предстоя́,/ ю́же, преподо́бне, моли́ ве́рою притека́ющим к моще́м твои́м/ благода́ть исцеле́ния дарова́ти,/ спасти́ и просвети́ти ду́ши на́ша.

В пусты́ню всели́вся, Преблаги́м Христо́м Бо́гом направля́ем,/ преподо́бне о́тче Кири́лле,/ в нейже, я́ко дре́во при вода́х, насади́вся/ и в зако́не Госпо́дни поучи́вся день и нощь,/ духо́вныя плоды́ прине́сл еси́ Христу́ Бо́гу,/ его́же моли́ ве́рою притека́ющим к моще́м твои́м/ благода́ть исцеле́ния дарова́ти,/ спасти́ и просвети́ти ду́ши на́ша.

В пусты́ню водвори́лся еси́ благода́тию Христа́ Бо́га,/ преблаже́нне о́тче Кири́лле,/ в не́йже, я́ко лоза́ благопло́дная при вода́х, насажде́н еси́,/ доброде́телей плоды́ Христу́ Бо́гу приноша́я,/ к жи́зни ве́чней наставля́я/ ве́рою пра́зднующих честну́ю па́мять твою́,/ Христа́ Бо́га моли́ от тли и бед изба́витися,/ спасти́ и просвети́ти ду́ши на́ша.

Сла́ва, глас то́йже:

Преподо́бне и Богоно́се о́тче наш Кири́лле,/ ты усе́рдно в пусты́ни подвиза́лся еси́ в ну́ждней и непроходи́мей,/ любве́ ра́ди Го́спода своего́/ и воздая́ния ра́ди е́же со все́ми святы́ми бу́дущих его́ благ,/ и житие́м свои́м по́стническим,/ я́ко А́нгел на земли́, челове́ки удиви́л еси́,/ бе́сы же, па́че и самаго́ диа́вола, устраши́л еси́,/ и воста́ющия на тя злотво́рныя и неми́лостивыя разбо́йники/ по́мощию Бо́жиею посрами́л еси́,/ и ны́не, преподо́бне, уго́дниче Христо́в,/ преблаже́нне о́тче наш Кири́лле,/ моли́ о нас ми́лостиваго Бо́га,/ пода́ти ми́р ми́рови/ и душа́м на́шим ве́лию ми́лость.

И ны́не, Богоро́дичен: Безневе́стная Де́во:

На стихо́вне стихи́ры, глас 4: Преподо́бне о́тче Кири́лле,/ яви́ся нам Небе́сный челове́к/ и земны́й А́нгел пропове́дешися днесь,/ его́же житию́ удиви́шася А́нгели,/ и вострепета́ша ду́си лука́вии,/ той на́ми пра́зднуется днесь,/ и, того торжество́ лику́юще, вопие́м:/ моли́, преподо́бне, Христа́ Бо́га,/ да твои́ми моли́твами от враг свободи́мся.

Стих: Честна́ пред Го́сподем/ смерть преподо́бных Его́.

Соше́дшеся днесь, ве́рнии,/ восхва́лим преподо́бнаго отца́ на́шего Кири́лла,/ духо́вно веселя́щеся и па́мять его́ све́тло пра́зднующе,/ я́ко вра́жия полки́ прогна́вшаго/ и злотво́рцы посрами́вшаго,/ ве́рныя же ба́нею Свята́го ду́ха обно́вльшаго,/ и ны́не сия́еши чудесы́, Кири́лле преподо́бне,/ я́ко да твои́ми моли́твами/ да́рует нам Христо́с ве́лию и бога́тую ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Преподо́бне о́тче Кири́лле,/ а́нгельски на земли́ пожи́л еси́/ и по́стническим лико́м сочета́лся еси́,/ крест бо на ра́мо свое́ взем,/ после́довал еси́ Христу́ Бо́гу,/ на горе́ святе́й всели́вся./ При вода́х дово́льних ну́ждною пи́щею плотски́я стра́сти душетле́нныя/ воздержа́нием, преподо́бне, увяди́л еси́/ и был еси́ духо́вно прия́телище/ и сосу́д чист Го́сподеви,/ те́мже вопие́м ти:/ моли́ Христа́ Бо́га спасти́ся душа́м на́шим.

Сла́ва, глас 6:

Прииди́те, мона́хов мно́жество,/ прииди́те, пустыннолю́бное воспита́ние,/ прииди́те, лик соста́вим,/ днесь бо торжеству́ем па́мять преблаже́ннаго отца́ на́шего Кири́лла,/ прииди́те, стеце́мся, мирсти́и наро́ди, к ра́це его́,/ любе́зно целу́им, моля́щеся,/ и нам оби́льно источа́ет, ве́рным, исцеле́ния разли́чна,/ и к нему́ возопие́м:/ о́тче преподо́бне Кири́лле,/ моли́, мо́лим тя,/ испроси́ нам у Христа́ ми́ра и ве́лия ми́лости.

И ны́не, Богоро́дичен: Творец и Изба́витель мой, Пречи́стая:

Таже, Ны́не отпущаеши:

Тропа́рь, глас 4:

Днесь возсия́ нам пресве́тлая па́мять твоя́, сла́вне,/ я́ко со́лнце светоза́рное,/ луча́ми благода́ти озаря́ющи весь ми́р/ и тьму но́щи злых духо́в и от нас отгоня́ющи./ Днесь Небе́сныя си́лы святы́х А́нгел, и мирски́й наро́д,/ и ду́ши пра́ведных мы́сленно торжеству́ют, ра́дующеся,/ днесь и мы, гре́шнии, припа́дающе, мо́лимся:/ о́тче преподо́бне Кири́лле,/ Христа́ Бо́га моли́ непреста́нно/ спасти́ град и лю́ди,/ и́же любе́зно тебе́ почита́ющия.

НА У́ТРЕНИ

На Бог Госпо́дь: тропа́рь, глас 4, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 8: Яви́ся, преподо́бне, чу́ден в по́стнических терпе́ниих,/ вся́чески Христу́ угоди́л еси́, преблаже́нне Кири́лле,/ му́дрою мы́слию утверди́л еси́ ду́шу свою́,/ покори́ плотско́е мудрова́ние ду́хови/ и возлюби́ до́брая тружда́тися Го́сподеви своему́,/ те́мже, преблаже́нне о́тче Кири́лле,/ моли́ Христа́ Бо́га спасти́ся душа́м на́шим.

Сла́ва, и ны́не, Богоро́дичен:

Богоро́дице Цари́це, правосла́вным похвало́,/ ерети́ческая шата́ния разори́ и ли́ца их посрами́,/ не кла́няющихся о́бразу Твоему́ потреби́,/ мы же, раби́, Богома́ти, Сы́на Твоего́, Христа́ Бо́га на́шего,/ покланя́емся о́бразу Твоему́/ и мо́лим Тя в День Су́дный изба́вити нас муче́ния/ и сподо́бити нас Ца́рствия Небе́снаго, Ма́ти Христа́ Бо́га на́шего.

По 2-м стихосло́вии седа́лен, глас 5: Духо́вно торжеству́ем в па́мять чу́днаго Кири́лла,/ он бо А́нгелы удиви́ и челове́ки пра́здновати научи́,/ Христа́ сла́вити, прославля́ющего святы́х Свои́х,/ просла́ви бо тя Госпо́дь, преподо́бне Кири́лле сла́вне,/ и сла́вы Своея́ Небе́сныя зре́ти сподо́би,/ не забу́ди нас, му́дре, творя́щих святу́ю па́мять твою́.

Сла́ва, и ны́не, Богоро́дичен: Богоро́дице возопие́м, ве́рнии, любо́вию:/ ра́дуйся, Бо́жие селе́ние;/ ра́дуйся, па́дшим возста́ние./ Ра́дуйся, ме́ртвым Тебе́ ра́ди воскресе́ние;/ ра́дуйся, ве́рным спасе́ние./ Ра́дуйся, ненаде́жным наде́жда изве́стная;/ ра́дуйся, преподо́бным сла́ва и весе́лие./ Ра́дуйся, А́нгелом торжество́ с ли́ки святы́х;/ ра́дуйся, Благода́тная, Госпо́дь с Тобо́ю и Тебе́ ра́ди с на́ми.

По полиеле́е Седа́лен, глас 6:

От ю́ности, преподо́бне, сосу́д избра́н яви́ся,/ и жили́ще Свята́го ду́ха бысть, и кре́постию ума́ непоколеби́м пребы́сть,/ и над страстьми́ воцари́ся, великоду́шне, блаже́нне Кири́лле,/ и презре́ мирска́я пристра́стия, и процве́л еси́, я́ко крин се́льный,/ и оде́явся доброде́тельми свои́ми, я́ко ри́зою све́та,/ и яви́ся крепкостоя́телен проти́ву неви́димых враго́в,/ алка́нием и жа́ждею те́ло свое́ изсуши́в,/ после́дова Христу́ Бо́гу на́шему,/ его́же крест на ра́ме поне́сл еси́,/ безпреста́нно распина́яся ему́,/ его́же моли́ ми́р вселе́нней дарова́ти и душа́м на́шим ве́лию ми́лость.

Сла́ва, и ны́не, Богоро́дичен:

Пречи́стая Де́во Благослове́нная и от родо́в избра́нная, земны́м спасе́ние,/ ду́шу мою́, во гресе́х вся́ческих лю́те обурева́ему,/ наста́ви, Влады́чице, на стезю́ покая́ния,/ да воспою́ Ти, ра́дуяся:/ благослове́нна Ты в жена́х, Всенепоро́чная Де́во Чи́стая.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных его́.

Стих: Что возда́м Го́сподеви о всех, я́же воздаде́ ми?

Ева́нгелие от Луки́, зача́ло 24.

По 50-м псалме́ стихи́ра, глас 6:

Преподо́бне и преблаже́нне о́тче наш Кири́лле,/ презира́тель до́льних и пресе́льник с Вы́шними показа́ся,/ вооружи́лся еси́ над страстьми́, я́ко во́ин Христо́в,/ те́ло свое вдал еси́ на терпе́ние и всено́щное стоя́ние,/ и прогна́л еси́ ду́хи те́мныя от себе́,/ и ны́не то́чиши исцеле́ния да́ры, преподо́бне Кири́лле,/ всем нам повеле́вый пра́здновати/ и́же к Бо́гу твое отше́ствие,/ и моли́ спасти́ся нам.

Кано́н преподо́бному Кири́ллу, глас 4, его́же краегране́сие: Блаже́ннаго Кири́лла дерза́ю воспе́ти.

Песнь 1

Ирмо́с:

Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зными Моисе́овыма рука́ма/ Амали́кову си́лу в пусты́ни победи́л есть.

Лю́тыми страстьми́ жития́ побежда́ем есмь окая́нный аз/ и сего́ ра́ди молю́ Тя, Христе́ Бо́же, от сих изба́витися,/ я́ко да досто́йно возмогу́ восхвали́ти Твоего́ уго́дника, Кири́лла преподо́бнаго.

Лю́тых мя смуще́ний свободи́, о́тче,/ да, наставля́ем твои́ми моли́твами,/ све́тло воспою́ твое́ торжество́, Кири́лле преподо́бне.

Разуме́х, преподо́бне, аз свое́ недосто́инство/ и со стра́хом косну́хся к твоему́ хвале́нию,/ но ты, блаже́нне, приими́ с ве́рою тебе́ прино́симое хвале́ние, о́тче Кири́лле.

Богоро́дичен: Пречи́стая Богоро́дице,/ Ты ми бу́ди кре́пкая По́мощнице, рабу́ Твоему́,/ и изба́ви ду́шу мою́ от се́ти диа́воли,/ и спаси́ мя, лю́те потопля́ема волна́ми грехо́вными,/ моли́твами Твоего́ уго́дника, Кири́лла.

Катава́сия: Христо́с ражда́ется:

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

От неразу́мия страсте́й мои́х возведи́ мя, свя́те, и да́руй ми свет у́мный,/ да возмогу́, недосто́йный, от гру́баго ума́ моего́/ худое сие́ плете́ние принести́ к похвале́нию чуде́с пресла́внаго твоего́ торже́ства́.

Ве́ру в души́ неоску́дну имел еси́, преподо́бне,/ и да́нный ти тала́нт трудолю́бно возделал еси́,/ да всем нам по́даси дар, разли́чно боля́щим,/ душе́вных страсте́й и теле́сных боле́зней исцеле́ние,/ творя́щим святу́ю па́мять твою́.

Процве́л еси́, я́ко кедр, в пусты́не непроходи́мей, о́тче преподо́бне Кири́лле,/ приноша́я плоды́ ду́ха, во мно́зе терпе́нии те́ло свое́ удруча́я,/ от бесо́в и злых челове́к прие́мля озло́бление,/ и сих ра́ди прия́т ве́чное насле́дие.

Богоро́дичен: Аз, Де́во Свята́я Богоро́дице, наде́жду име́я на Тя, спасу́ся,/ потреби́, Влады́чице, враги́ души́ мое́й/ и наста́ви мя на путь жи́зни, да, спа́сся, вопию́ Ти:/ ра́дуйся, По́мощнице ми́ру и наде́ждо ве́рным;/ ра́дуйся, Де́во, христиа́ном похвало́.

Седа́лен, глас 8:

Всели́ся, преподо́бне, в пусты́ню/ и поживе́ в ней во а́лчбе мно́зе и в про́чих злострада́ниих,/ не дая́ покоя те́лу своему́ и зе́млю де́лая свои́ма рука́ма,/ за е́же получи́ти бу́дущий покой,/ но получи́л еси́ оную ра́дость лю́бящим Бо́га,/ ты же помина́й чад свои́х и не забу́ди, я́ко обеща́ся, да вси вопие́м ти:/ о́тче Кири́лле преподо́бне, моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен: Прибе́жище су́щим в напа́стех лю́тых,/ премене́ние к Бо́гу, согреша́ющим спасе́ние,/ Пречи́стая Влады́чице, спаси́ нас от вся́каго обстоя́ния, и озлобле́ния челове́ческаго,/ и стра́шнаго муче́ния, и страсте́й безче́стия,/ несумне́нною ве́рою Тя при́сно призыва́ющих,/ Де́во Всепе́тая, моли́ Христа́ Бо́га грехо́в оставле́ние дарова́ти/ благоче́стно сла́вящим Тя.

Песнь 4

Ирмо́с:

Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Боже́ственною Пресвята́го ду́ха блиста́яся благода́тию, светоно́сне о́тче Кири́лле,/ честно́е творя́щих твое́ успе́ние/ све́тлою твое́ю моли́твою страсте́й на́ших мглу очи́сти.

Я́коже со́лнце на земли́,/ доброде́телей просвеще́ннем просия́л еси́ в пусты́ни,/ всех ду́ши, преподо́бне, духо́вною благода́тию просвеща́я.

Победи́в плотска́го наве́та мудрова́ния,/ ду́ха Свята́го благода́ть прия́л еси́ отгоня́ти неду́ги и боля́щия греха́ми цели́ти ду́ши,/ о́тче Кири́лле досточу́дне.

Богоро́дичен: Неискусобра́чно родила́ еси́, Де́во,/ и по Рождестве́ я́вльшися де́вствующи па́ки,/ те́мже гла́сы немо́лчными, е́же ра́дуйся, Влады́чице, ве́рою несу́мне́нною Тебе́ вопие́м.

Песнь 5

Ирмо́с:

Ты, Го́споди, мой Свет,/ в ми́р прише́л еси́,/ Свет Святый, обраща́яй из мра́чна неве́дения/ ве́рою воспева́ющия Тя.

Боже́ственною любо́вию, о́тче Кири́лле, распаля́ем,/ не убоя́лся еси́ долготы́ пу́тныя, в непроходи́мую пусты́ню дойде́,/ ниже́ та́мо нечести́вых челове́к супротивле́ния и о изгна́нии от ме́ста того́,/ но с любо́вию вся претерпе́л еси́.

О, чудо! ка́ко от еди́наго тобо́ю призыва́ния/ иногда́ злотво́рцы разбо́йницы, прише́дше на тя, восхоте́ша сме́рти преда́ти тя,/ ви́девши чу́до пресла́вно от о́браза Богома́тере, посрами́шася.

Све́ту вели́ку я́ко неве́стник ны́не предстои́ши, о́тче Кири́лле, блаже́нне,/ помина́й изря́дное свое́ достоя́ние,/ е́же мно́гими труды́, о́тче, стяжа́л еси́.

Богоро́дичен: Тя ору́жие непобеди́мое на враги́ предлага́ем,/ Тя, Де́во, утвержде́ние и наде́жду на́шему спасе́нию, Богоневе́сто, стяжа́хом.

Песнь 6

Ирмо́с:

Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Ра́лом Богому́дрых слове́с твои́х, о́тче преподо́бне,/ олядене́вшая чу́дска язы́ка люде́й се́рдца́ возде́ловая,/ и Боже́ственное се́мя покая́ния в них всея́в,/ плод зре́лый своему́ Влады́це, блаже́нне, прине́сл еси́.

Быстри́нами медото́чных слове́с твои́х/ чу́дскаго язы́ка диа́вольскую пре́лесть и и́дольское служе́ние, преподо́бне Кири́лле, угаси́л еси́,/ Боже́ственными уче́ниями ве́рно се́рдца́ их утвердйл еси́.

И́же к Бо́гу жела́нием страсте́й успи́л еси́ воста́ния/ и всено́щным стоя́нием дарова́ния восприя́л еси́ виде́ти су́щая та́мо неизрече́нныя добро́ты, Кири́лле чу́дне.

Богоро́дичен: О, чу́до, и́же всех чуде́с нове́йши,/ ка́ко Де́вая во утро́бе и́же вся́ческая Содержа́щаго/ сло́вом неискусому́жно прие́мши и нете́сно вмести́вши.

Конда́к, глас 8.

Подо́бен: Прему́дрости:

От ю́ности, преподо́бне, вся оста́вль жите́йская, кра́сная же и ле́потная,/ и в пусты́ню всели́вся, усе́рдно после́довал еси́ Зва́вшему тебе́, преблаже́нне,/ в труде́х же и посте́х, о́тче, те́ло свое́ изнури́л еси́,/ отоню́дуже тя па́стыря Свои́м овца́м до́бре устроя́ет всебога́тый Госпо́дь,/ Кири́лле чудоде́йственниче, моли́ Христа́ Бо́га/ о приходя́щих с ве́рою и прося́щих свои́х согреше́ний оставле́ние дарова́ти,/ чту́щим любо́вию святу́ю па́мять твою́.

И́кос:

Уясни́ ми язы́к и укрепи́ мой ум, Христе́ Бо́же, моли́твами Пречи́стыя Твоея́ Ма́тере,/ пода́ждь ми благ язы́к глаго́лати на похвалу́ и моле́ние Твоего́ уго́дника, и свещу́ умиле́ния,/ ю́же, воздрема́вся, угаси́х нераде́нием,/ но моли́твами преподо́бнаго Кири́лла возжги́,/ и не отлучи́ мене, Христе́, многосогре́шша, ли́ка преподо́бных Твои́х,/ все у́бо упова́ние к Тебе́ возлага́ю,/ Ты бо и град наш сохраня́еши и святу́ю оби́тель моли́твами преподо́бнаго,/ прося́щим согреше́ний оставле́ние дарова́ти/ чту́щим любо́вию святу́ю па́мять его́.

Песнь 7

Ирмо́с:

В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Поще́нием огради́вея от ю́ности, преподо́бне,/ тем те́ло свое украша́я и бла́гопокорну ду́шу соде́ловая,/ к сему́ же и стра́сти побежда́я, без стуже́ния от сих пребы́л еси́, поя́:/ благослове́н Бог оте́ц на́ших.

Нищету́ самово́льную Христа́ ра́ди стяжа́в,/ и от всех жите́йских безыме́нен был еси́, доброде́тельми обогати́вся,/ и мно́гих к ре́вности научи́ пе́ти:/ благослове́н Бог оте́ц на́ших.

Позна́л еси́, о́тче преблаже́нне, кова́рствия лука́ваго де́мона,/ хотя́щаго ке́ллию твою́ во е́зеро воврещи́,/ и сего́ до конца́ низложи́л еси́, и нас на моли́тву воздви́гни днесь,/ да ве́рою лику́ем, па́мять твою́ пою́ще:/ благослове́н Бог оте́ц на́ших.

Богоро́дичен: Ми́лостива мне Суди́ю и Сы́на Своего́, Богоро́дице Де́во,/ и Изба́вителя лю́тых мои́х согреше́ний/ Твои́ми моли́твами бы́ти в День Суда́, Ма́ти, сотвори́,/ к Тебе́ бо Еди́ной упова́ние возлага́ю.

Песнь 8

Ирмо́с:

Ру́це распросте́р, Дани́ил/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Смире́ние стяжа́в попремно́гу и чистоту́ теле́сную, я́коже подоба́ет святы́м,/ и и́стинное же целому́дрие вельми́ удержа́л еси́/ и ско́рбных нанесе́ние, ра́дуяся прие́мля, поя́:/ благослови́те, вся дела́ Госпо́дня, Го́спода.

Страх Бо́жий стяжа́в в себе́ и сим показа́в чу́вства своя́,/ е́же не преступи́ти свои́х уста́в, ни повреди́тися от сих у́мному де́ланию,/ Бо́гови угоди́в, во смире́нии поя́:/ благослови́те, вся дела́ Госпо́дня, Го́спода.

Со зверьми́ ди́виими в пусты́не, преподо́бне, живы́й,/ приходя́ще к тебе́, кро́тцы быва́ху от благода́ти Бо́жия, пребыва́ющия в тебе́,/ но повеле́нию твоему́ повинова́хуся, поя́:/ благослови́те, вся дела́ Госпо́дня, Го́спода.

Богоро́дичен: Ты Еди́на во всех ро́дех, Де́во Пречи́стая Ма́ти, яви́ся Бо́гу,/ Ты Бо́жеству́ бысть пребыва́ние, Всенепоро́чная, не опали́ся Огне́м непристу́пнаго Све́та,/ те́мже Тя вси благослови́м, Мари́е Богоневе́сто.

Песнь 9

Ирмо́с:

Ка́мень нерукосе́чный/ от несеко́мыя горы, Тебе́, Де́во,/ краеуго́льный отсече́ся,/ Христо́с, совокупи́вши разстоя́щаяся естества́./ Тем, веселя́щеся, Тя, Богоро́дице, велича́ем.

Пребы́вшу ти, о́тче Кири́лле, мно́га ле́та в пусты́не в безмо́лвии, и поще́нии,/ и всех ско́рбных в терпе́нии и попремно́гу Бо́гу угоди́вшу,/ отню́дуже и Он тя прославля́ет, я́ко Своего́ уго́дника.

Поще́нием насажде́н быв, я́ко дре́во при вода́х, блаже́нне Кири́лле,/ воздержа́ния процве́л еси́ доброде́тельми свои́ми,/ и в ме́ру дости́г во́зраста исполне́ния Христо́ва,/ и духо́внаго соверше́ния получи́л еси́, я́ко же мо́щно челове́ку.

Ты у́бо, преподо́бне о́тче, хотя́ утаи́тися от челове́к и еди́н Еди́ному Бо́гу безмо́лвствовати,/ но не оста́ви Он тебе́ неве́дома бы́ти,/ но всем, тре́бующим спасе́ния, я́ве показа́ тя, житие́ твое́ доброде́тельное,/ на по́льзу хотя́щим стопа́м твои́м после́довати.

Богоро́дичен: И́же все́ми владе́ющи тва́рьми,/ лю́дем Твои́м да́руй побе́ду и одоле́ние на непокори́выя язы́ки,/ да Тя, я́ко Богоро́дицу, велича́ем.

Свети́лен: По́стнический яви́ся свети́льник, блаже́нне о́тче Кири́лле,/ после́дуя стопа́м преподо́бных Анто́ния и Варлаама,/ отту́ду научи́вся и показа́ся чу́ден свети́льник,/ в се́верных страна́х ны́не предстои́ши во Све́те Святы́я Тро́ицы, ра́дуяся.

Сла́ва, и ны́не, Богоро́дичен:

Велича́ем Ма́терь Бо́га на́шего, тебе́, преподо́бне, сохра́ньшую,/ ю́же вси ро́ди блажа́т от ны́не и до ве́ка,/ ю́же и мы, гре́шнии, воспева́ем, велича́юще:/ ра́дуйся, Обра́дованная, Госпо́дь с Тобо́ю.

На хвали́тех стихи́ры, глас 6.

Подо́бен: Все отло́жше:

Все отложи́в мирско́е мудрова́ние,/ и потече́, ра́дуяся, восле́д Влады́ки Христа́ Бо́га на́шего,/ ему́же нело́жно рабо́тая/ во всем живо́те́ свое́м,/ и показа́ труды́ и по́двиги пусты́нныя,/ и по́льзу мно́гим сотвори́л еси́,/ да во всем послушли́в за́поведем Христо́вым был еси́,/ ему́же со дерзнове́нием моли́ся о душа́х на́ших.

Преподо́бне о́тче Кири́лле,/ вся оста́вил еси́ ми́ра сего́ красова́ния,/ и вся презре́л еси́ плотска́я мудрова́ния,/ и был еси́ Христо́в учени́к избра́нный,/ и моли́ся о нас,/ ве́рою пра́зднующих свято́е успе́ние твое́.

Преподо́бне и всеблаже́нне о́тче наш Кири́лле,/ все возложи́ упова́ние на щедро́ты Христа́ Бо́га на́шего/ и ны́не прия́л еси́ от него́ проти́ву трудо́в твои́х жи́знь ве́чную на Небесе́х,/ его́же со дерзнове́нием моли́ о душа́х на́ших.

Сла́ва, глас 6:

Днесь духо́вно торжеству́ем/ па́мять преподо́бнаго отца́ на́шего Кири́лла чу́днаго,/ сей бо А́нгелы удиви́/ и мечта́ния диа́воля устраши́ свои́ми бде́нными моли́твами,/ днесь бо любе́зно пра́зднуем преставле́ние его́,/ Христа́ сла́вяще,/ прославля́ющаго святы́х Свои́х,/ но не забу́ди нас, преподо́бне о́тче Кири́лле,/ творя́щих па́мять твою́,/ те́мже вопие́м ти:/ моли́ Христа́ Бо́га спасти́ся душа́м на́шим.

И ны́не: Богоро́дице, Ты еси́ лоза́ и́стинная:

Славосло́вие вели́кое и отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я и проча́я слу́жба преподо́бническая.

Моли́тва

О блаже́нная и пречестна́я и благода́ти Свята́го ду́ха испо́лненная главо́, сосу́де избра́нный Святы́я Тро́ицы, преподо́бне о́тче наш Кири́лле, услы́ши нас, гре́шных, предстоя́щих ны́не пред тобо́ю и уми́льно моля́щих тя: помоли́ся о нас, рабе́х твои́х, ко Всеми́лостивому Влады́це Иису́су Христу́ Бо́гу на́шему и его́ ро́ждшей Ма́тери, Влады́чице на́шей Богоро́дице и Присноде́ве Мари́и, е́же отпусти́ти нам согреше́ния на́ша, я́же соде́яхом. Ве́мы бо, о́тче наш, а́ще пло́тию и в пе́рсти почива́еши, но ду́хом зде с на́ми неотсту́пно и неви́димо пребыва́еши, назира́я нас и нази́дая по твоему́ нело́жному обеща́нию, сохраня́еши от вся́ких обстоя́ний. И я́коже мно́го дерзнове́ние стяжа́вый ко Го́споду по́стническими твои́ми по́двиги, умоли́ его́ святы́ми твои́ми моли́твами пода́ти ми́ру мир, Це́ркви его́ Святе́й – единомы́слие, стране́ – на враги́ побе́ду, служа́щим же ти – друг ко дру́гу любо́вь и согла́сие и всем лю́дем, притека́ющим к тебе́ с ве́рою, испроси́ у Го́спода к по́льзе душе́вней и теле́сней ми́лость, мир, благослове́ние, во е́же изба́витися нам всем в День Су́дный стра́шный, шу́ия части спасти́ся, ста́ти же одесну́ю со избра́нными его́ к насле́дию Ца́рствия Небе́снаго, я́ко тому́ подоба́ет вся́кая сла́ва, честь и поклоне́ние со Безнача́льным его́ Отце́м и Пресвяты́м и Благи́м и Животворя́щим его́ Ду́хом ны́не, и при́сно, и во ве́ки веков. Ами́нь.