НА ВЕЛИ́ЦЕЙ ВЕЧЕ́РНИ
По предначина́тельном псалме́, Блаже́н муж: 1-й антифо́н. На Го́споди, воззва́х: стихи́ры на 8, глас 4:
Прииди́те, празднолю́бцы,/ и днесь собо́рне притецы́те:/ пра́здник соверша́ется све́тлый и благознамени́тый,/ в о́ньже трапе́зу доброде́телей вся́ческих/ предлага́ет нам ми́лостивый вои́стинну Филаре́т./ моли́твы убо наслажде́ние и весе́лия Небе́снаго исто́чник явля́ется:/ жа́ждущим, приступи́те.
Прииди́те, веселя́щеся,/ и, я́ко на ве́чери духо́вней ликовству́юще,/ возгласи́м пе́сни досто́йныя:/ о́тче Филаре́те,/ ты вои́стинну, по и́мени своему́, вся́кую доброде́тель возлюби́л еси́,/ и́мени бо твоему́ согла́сная показал еси́ дея́ния,/ в ни́хже обре́л еси́ ле́ствицу восхожде́ния на Не́бо.
Дал еси́ убо́гим,/ расточа́я бога́тство твое, ми́лостиве Филаре́те,/ сего́ ра́ди пребыва́ет пра́вда твоя́, я́коже Дави́д глаго́лет,/ и в па́мять ве́чную ве́рным бу́дет, всехва́льне./ Днесь у́бо всечестну́ю па́мять твою́ любо́вию пра́зднующе,/ досто́йно чтим тя,/ я́ко изря́дна Бога́тства раздая́теля.
Ника́коже земля́ изно́сит тебе́ в де́лех твои́х/ по зако́ну кля́твы те́рния и во́лчцы в наказа́ние,/ я́коже дре́вле пра́отцу Ада́му,/ но благослове́ния ороше́нием/ клас возраща́ет ти многопло́дный./ Сего́ ра́ди умно́жился еси́ ми́лостынею ко убо́гим,/ от нея́же но́сиши проименова́ние, ми́лостиве Филаре́те.
Я́коже А́вель пра́ведный избра́нная от ста́да принесе́ Го́споду,/ та́кожде и ты, я́ко благи́й земледе́латель, в житии́ твое́м/ не то́чию нача́тки плодо́в,/ но и вся, я́же приима́л еси́, блаже́нне,/ подава́л еси́ нужда́ющимся,/ в нищете́ же и сам жи́тельствовал еси́,/ нападе́нием де́монским/ не изме́нен быв во твое́м произволе́нии.
Восприял еси́ криле́,/ и́хже дре́вле вожделе́ Дави́д,/ любо́вь к Бо́гу и бли́жнему/ и подража́ние Христу́, Богому́дре,/ и́миже возлете́л еси́, о́тче, на го́ры мы́сленныя соверше́нства/ и та́мо почи́л еси́,/ веселя́ся со все́ми пра́ведными и преподо́бными,/ блаже́нне Филаре́те.
Сла́ва, глас 6:
Дая́ние челове́ка распространя́ет его́,/ глаго́лет при́тча,/ и с си́льными посажда́ет его́./ Вои́стинну и ты, распространя́емь, жи́тельствовал еси́, всесла́вне Филаре́те:/ зане́ отверза́я, отверза́л еси́/ ру́це твои́ бра́ту твоему́ ни́щему./ Последи́ же и из про́ста в сла́вна возведе́н был еси́,/ при́сным быв Христоимени́таго царя́,/ Бо́гу тя в ско́рби распространя́ющу,/ я́ко возлюби́вшу твое́ благосострада́тельное произволе́ние:/ Бо́гу бо возлю́блена есть ми́лостыня.
И ны́не, глас то́йже:
Сио́не, торжеству́й, Иерусали́ме, весели́ся,/ гра́де Христа́ Бо́га, приими́ Зижди́теля,/ в верте́пе и я́слех полага́емаго;/ отве́рзите ми врата́,/ вшед в ня, узрю́ я́ко Младе́нца повива́емаго,/ дла́нию же содержа́щего тварь./ его́же пою́т А́нгели непреста́нным гла́сом,/ Жизнода́вца Го́спода,/ спаса́ющаго род наш.
Вход. Све́те ти́хий:
Проки́мен дне.
Бытия́ чте́ние
(глава 18):
Яви́ся Авраа́му Бог у ду́ба Мамври́йска,/ седя́щу ему́ пред две́рьми се́ни своея́ в полу́дни./ Воззре́в же очи́ма свои́ма, ви́де,/ и се Трие́ Му́жие стоя́ху над ним,/ и, ви́дев, притече́ в сре́тение Им от двере́й се́ни своея́,/ и поклони́ся до земли́, и рече́:/ Го́споди, а́ще у́бо обрето́х благода́ть пред Тобо́ю,/ не мини́ раба́ Твоего́./ Да принесе́тся вода́, и омы́ются но́ги Ва́ши,/ и прохладите́ся под дре́вом./ И принесу́ хлеб, да я́сте,/ и посе́м по́йдете в путь Свой,/ его́же ра́ди уклони́стеся к рабу́ Ва́шему./ И реко́ша:/ та́ко сотвори́, я́коже глаго́лал еси́./ И потща́ся Авраа́м в сень к Са́рре и рече́ ей:/ ускори́, и смеси́ три ме́ры муки́ чи́сты,/ и сотвори́ потре́бники./ И тече́ Авраа́м ко кра́вам,/ и взя тельца́ мла́да и до́бра,/ и даде́ рабу́, и ускори́ пригото́вите е./ И взя ма́сло, и млеко́, и тельца́, его́же пригото́ва,/ и предложи́ им, и ядо́ша,/ сам же стоя́ше пред Ни́ми под дре́вом./ Госпо́дь же рече́:/ еда́ утаю́ Аз от Авраа́ма, раба́ Моего́,/ я́же Аз творю́?/ Авраа́м же, быва́я, бу́дет в язы́к вели́к и мног,/ и благословя́тся о нем вси язы́цы земни́и./ Вем бо, я́ко запове́сть сыно́м свои́м/ и до́му своему́ по себе́,/ и сохраня́т пути́ Госпо́дни, твори́ти пра́вду и суд.
И́ова чте́ние
(глава 1):
Челове́к не́кий бя́ше во стране́ Авситиди́йстей,/ ему́же и́мя И́ов./ И бе челове́к он и́стинен,/ непоро́чен, пра́веден, благочести́в,/ удаля́яйся от вся́кия лука́выя ве́щи./ Бы́ша же ему́ сы́нове седмь и дще́ри три./ И бя́ху ско́ти его́:/ ове́ц седмь ты́сящ,/ велблю́дов три ты́сящи,/ супру́г воло́в пять сот,/ и осли́ц пасо́мых пять сот,/ и слуг мно́го зело́,/ и дела́ ве́лия бя́ху ему́ на земли́,/ и бе челове́к о́ный благоро́днейший су́щих от восто́к со́лнца./ И бысть я́ко день сей,/ сы́нове И́овлевы и дще́ри его́ пия́ху вино́ в до́му бра́та своего́ старе́йшаго./ И се ве́стник прии́де ко Ио́ву, и рече́ ему́:/ супру́ги воло́в оря́ху,/ и осли́цы пася́хуся близ их./ И, прише́дше, плени́тели плени́ша их/ и о́троки изби́ша мече́м,/ и спасо́хся аз еди́н,/ и приидо́х возвести́ти тебе́./ Еще́ сему́ глаго́лющу,/ прии́де ин ве́стник, и рече́ ко И́ову:/ огнь спаде́ с небесе́, и пожже́ о́вцы,/ и па́стыри пояде́ подо́бне,/ спасо́хся же аз еди́н/ и приидо́х возвести́ти тебе́./ Еще сему́ глаго́лющу, прии́де ин ве́стник, и рече́ ко И́ову:/ ко́нницы сотвори́ша нача́льства три,/ и окружи́ша велблю́ды, и плени́ша их,/ и о́троки изби́ша мечми́,/ спасо́хся же аз еди́н/ и приидо́х возвести́ти тебе́./ Еще́ сему́ глаго́лющу, ин ве́стник прии́де, глаго́ля И́ову:/ сыно́м твои́м и дще́рем твои́м/ яду́щим и пию́щим у бра́та своего́ старе́йшаго,/ внеза́пу ветр вели́к на́йде от пусты́ни/ и косне́ся четыре́м угло́м хра́мины,/ и паде́ хра́мина на де́ти твоя́, и сконча́шася,/ спасо́хся же аз еди́н/ и приидо́х возвести́ти тебе́./ Та́ко (услы́шав) И́ов,/ воста́в, растерза́ ри́зы своя́,/ и остриже́ власы́ главы́ своея́,/ (и посы́па пе́рстию главу́ свою́),/ и, пад на зе́млю, поклони́ся (Го́сподеви), и рече́:/ сам наг изыдо́х от чре́ва ма́тере моея́,/ наг и оты́ду та́мо./ Госпо́дь даде́, Госпо́дь отъят,/ я́ко Го́сподеви изво́лися, та́ко бысть./ Бу́ди И́мя Госпо́дне благослове́но во ве́ки./ Во всех сих, приключи́вшихся ему́, ничто́же согреши́ И́ов пред Го́сподем, (ниже́ устна́ма свои́ма),/ и не даде́ безу́мия Бо́гу./ Госпо́дь же благослови́ после́дняя И́овля, не́же пре́жняя.
Прему́дрости Соломо́новы чте́ние
(глава 5):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Приймет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же пото́пят я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
На литии́ стихи́ры, глас 1:
О, кре́пкия и адама́нтовыя души́ твоея́,/ достоублажа́еме Филаре́те!/ ты бо, Небе́сных всем жела́нием взыску́я,/ су́щая на земли́ нивочто́же вменя́л еси́./ сего́ ра́ди ни десна́я, ни шу́яя возмого́ша сокруши́ти кре́пость предложе́ния твоего́,/ благоизво́льне же ско́рби прия́л еси́, подража́я Христу́./ Я́ко у́бо сла́вно улучи́вый жела́ние твое́,/ помина́й нас, чту́щих тя, о́тче пресла́вный.
Глас 2:
Дал еси́ от души́ а́лчущим хлеб твой/ и ду́ши смире́нныя насы́тил еси́,/ Христоподража́тельне Филаре́те,/ сего́ ра́ди возсия́, по проро́ку, во тьме свет твой,/ и тьма твоя́ бысть, я́ко полу́дне./ Бог бе с тобо́ю при́сно./ Испо́лнися душа́ твоя́, и ко́сти твоя́ утучне́ша,/ я́ко вертогра́д напое́нный,/ ему́же не оскуде́ вода́:/ се́яй бо во благослове́нии,/ во благослове́нии и пожнет.
О́ко был еси́ слепы́м, нога́ хромы́м/ и оте́ц немощны́м, всему́дре Филаре́те,/ ве́дый, я́ко слепе́ц ми́луемый/ благи́й вождь есть в Ца́рствие Небе́сное,/ и стена́м приража́яйся и па́даяй в ров от не́мощи,/ руко́ю же милосе́рдия подъе́млемый/ уготовля́ет путь восхожде́нию на Не́бо./ Си́це у́бо и ты, возше́д к Седя́щему на высо́ких,/ вы́ну предстои́ши ему́, моля́ спасти́ся от вся́каго зла/ соверша́ющим и любо́вию чту́щим святу́ю па́мять твою́.
Сла́ва, глас 5:
Ве́лия ми́лостыни си́ла:/ с ве́лиим бо дерзнове́нием вво́дит в Ца́рствие Небе́сное,/ зна́ема су́щи храня́щим две́ри черто́га Небе́снаго,/ и а́ще ки́их позна́ет, чту́щих ю,/ с ве́лиим вво́дит дерзнове́нием./ Сие́ начерта́ трость Богосло́вская,/ твоя́ же щедрода́тельная рука́ де́лом утверди́, Филаре́те:/ благодерзнове́нно бо восходи́л еси́/ и невозбра́нно вшел еси́ в Ца́рствие Небе́сное,/ я́ко ми́лостивый, всеблаже́нне.
И ны́не, глас то́йже:
Ублажа́ем Тя, Богоро́дице Де́во,/ и сла́вим Тя, ве́рнии, по до́лгу,/ град су́щую непоколеби́мый, и сте́ну необоримую,/ и предста́тельство и прибе́жище душ на́ших.
На стихо́вне стихи́ры, глас 1.
Подо́бен: Небе́сных чино́в:
Возсия́вает на тве́рди це́рко́вней/ светоно́сная, о́тче, па́мять твоя́,/ я́ко заря́ Со́лнца Непристу́пнаго,/ из о́блака све́тла возсия́вающаго в Вифлее́ме/ и лесть мра́чную многобо́жия потребля́ющаго.
Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
Па́че со́лнца возсия́вшее ми́ру житие́ твое/ лучи́ милосе́рдия испусти́,/ разгоня́ющия ни́щеты мра́чный о́блак/ и мра́зом скорбе́й одержи́мым жи́зненную теплоту́ подаю́щия,/ всеблаже́нне Филаре́те.
Стих: Весь день ми́лует и взаи́м дае́т пра́ведный,/ и се́мя его́ во благослове́ние бу́дет.
Соверша́ющим нам ве́рою всесве́тлую па́мять твою́,/ моли́, о́тче, по мно́гому твоему́ к Бо́гу дерзнове́нию,/ изба́вится мра́ка страсте́й и вся́ких напа́стей жити́я/ и улучи́ти с тобо́ю ра́дости несконча́емыя.
Сла́ва, глас 8:
Бога́тством изоби́луяй и ста́ды,/ я́ко но́вый И́ов, во благода́ти показу́ешися,/ не то́чию во оби́лии пра́веден, но и в терпе́нии непоро́чен:/ внеза́пу бо, я́коже он, всего́ стяжа́ния лиши́вся,/ ниже́ усты́ проти́ву Го́спода согреши́л еси́,/ ниже́ дал еси́ безу́мия Бо́гу, терпели́вейший./ сего́ ра́ди еще и в сем животе́/ бо́льшими, па́че пре́жних, бла́гами воздаде́ пра́вде твое́й Госпо́дь правосу́дный,/ последи́ же, к Нему отше́дша,/ венце́м терпе́ния уве́нчаннаго, Себе́ предста́ви./ Дерзнове́ние у́бо стяжа́в к Нему́,/ моли́ся приле́жно спасти́ся нам, Филаре́те пресла́вне.
И ны́не, глас то́йже:
Вифлее́ме, угото́вися,/ украси́теся, я́сли,/ верте́пе, приими́ Гряду́щаго с Небесе́:/ Бог из Де́вы яви́ся челове́ком,/ восприи́м наш о́браз и обожи́в восприя́тие./ сего́ ра́ди обновля́ется Ада́м со Е́вою, взыва́я:/ на земли́ яви́ся благоволе́ние,/ во е́же спасти́ род наш.
Тропа́рь, глас 4:
Авраа́му в ве́ре подража́я,/ И́ову же в терпе́нии после́дуя,/ о́тче Филаре́те,/ бла́гая земли́ разделя́л еси́ неиму́щим/ и лише́ние сих терпе́л еси́ му́жественне./ сего́ ра́ди све́тлым тя венце́м увенча́ Подвигополо́жник, Христо́с Бог наш,/ Его́же моли́ спасти́ся душа́м на́шим.
Ин тропа́рь, глас 8:
В терпе́нии твое́м стяжа́л еси́ мзду свою́, пра́ведне,/ и в за́поведех Госпо́дних соверше́ние пожи́л,/ ни́щих возлюби́л и сих удово́лил еси́,/ но моли́ся Христу́ Бо́гу, блаже́нне,/ спасти́ся душа́м на́шим.
Сла́ва, и ны́не, Богоро́дичен.
НА У́ТРЕНИ
На Бог Госпо́дь: тропа́рь свята́го два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1:
Зе́млю, я́ко земледе́латель, плу́гом разсека́я/ и с упова́нием семена́ поверга́я,/ плоды́ изря́дны собра́л еси́, я́же, серпо́м благотворе́ния пожа́вши,/ в жи́тницы Небе́сныя положи́л еси́, прему́дре:/ ни́щим бо раздая́л еси́ ще́дро,/ а́лчущия пита́я и тре́бующим подава́я с любо́вию, ми́лостиве Филаре́те.
Сла́ва, и ны́не, Богоро́дичен:
Преклони́вый Небеса ́ и всели́выйся во утро́бу Де́вы/ гряде́т пло́тию роди́тися в верте́пе Вифлее́мстем, я́коже пи́сано есть:/ да у́зрится я́ко Младе́нец, младе́нцы животворя́й во чре́ве./ сему́, ра́дующеся, изы́дем ны́не во сре́тение вси сердца́ми пра́выми.
По 2-м стихосло́вии седа́лен, глас 5:
Боже́ственнаго Па́вла словесе́м вы́ну повину́яся/ и де́лом ты́я исполня́я,/ раздая́л еси́ вся в простоте́, Филаре́те ми́лостиве,/ и милосе́рдовал еси́ на ки́йждо день со ще́дростию и весе́лием,/ а не от ско́рби, ни от ну́жды, ниже́ с пощаде́нием, я́коже он повелева́ет.
Сла́ва, и ны́не, Богоро́дичен: Вифлее́ме, угото́ви я́же к сре́тению Мари́и Де́вы и Богома́тере:/ се бо гряде́т к тебе́ нося́щая во утро́бе Своей Младе́нца Христа́,/ Отцу́ и Свято́му Ду́ху Собезнача́льна,/ его́же роди́т в верте́пе и по рождестве́ па́ки Де́ва пребу́дет.
По полиеле́и седа́лен, глас 8:
Се терпя́щий лише́ние во всем и уничиже́ние,/ просте́ц и нищ, в ца́рстем до́ме быва́ет, я́ко князь,/ Бога́т же, и при́сный царе́м, и сла́вен пред все́ми явля́ется,/ я́ков же бе и пре́жде, нра́ва ра́ди и жити́я непоро́чнаго.
Сла́ва, и ны́не, Богоро́дичен:
Де́вы, предначни́те ра́дование Де́вы,/ ма́тери, хвала́ми Ма́терь Христа́ Бо́га сря́щите,/ волсви́, со звездо́ю предыди́те, па́стырие со А́нгелы, воспо́йте:/ гряде́т бо Де́ва во гра́де Вифлее́ме роди́ти Сы́на./ Ея́же моли́твами, Бо́же, спаси́ нас.
Степе́нна, 1-й антифо́н 4-го гла́са. Проки́мен, глас 4: Весь день ми́лует и взаи́м дае́т пра́ведный,/ и се́мя его́ во благослове́ние бу́дет.
Стих:
Что возда́м Го́сподеви о всех, я́же воздаде́ ми?
Ева́нгелие от Матфе́я, зачало 16.
По 50-м псалме́ стихи́ра, глас 2: Благотворя́й от Бо́га есть,/ глаго́лет Богосло́в,/ и ты у́бо от Бо́га еси́, ми́лостиве Филаре́те./ Я́коже бо Бо́жие есть, та́ко и твое бысть де́ло,/ е́же благоде́яти,/ Того у́бо по естеству ́, твое́ же по прича́стию.
Кано́н свята́го на 8, глас 1.
Песнь 1
Ирмо́с:
Христо́с ражда́ется – сла́вите!/ Христо́с с Небе́с – сря́щите!/ Христо́с на земли́ – возноси́теся!/ По́йте Го́сподеви, вся земля́,/ и весе́лием воспо́и́те, лю́дие,/ я́ко просла́вися.
Недоуме́нным язы́ком и устна́ми/ хвалу́ кра́ткую принося́ твоему́, Филаре́те, Богоподража́тельному житию, молю́ тя:/ я́ко ми́лостивый, Спа́са и Бо́га ми́лость испроси́ ми твои́ми моли́твами.
Укрепля́ема тя си́лою ду́ха,/ ничто́же от до́льних преклони́ти тя возмо́же,/ горе́ взира́юща при́сно умо́м/ и вожделева́юща непрестаю́щее улучи́ти блаже́нство.
Благода́ть ду́ха, обре́тши се́рдце твое́ таково́, яково́ же уго́дно есть ей,/ всели́ся в не и обита́ет в нем,/ неоску́дный вои́стинну в нем явля́я ми́лости исто́чник,/ доброде́тели же вся́кия вмести́лище, досточу́дне.
Богоро́дичен: Безсе́менне во чре́ве прия́ла еси́ Сло́во, еди́наго от Тро́ицы, Всенепоро́чная,/ и Сего́ по пло́ти родила́ еси́, пребы́вши по рождестве́, я́коже пре́жде рождества́, Де́ва./ сего́, я́ко Сы́на Твоего́ и Бо́га, о нас при́сно моли́.
Песнь 3
Ирмо́с:
Пре́жде век от Отца́ рожде́нному нетле́нно Сы́ну/ и в после́дняя от Де́вы/ воплоще́нному безсе́менно,/ Христу́ Бо́гу возопии́м:/ вознесы́й рог наш,/ Свят еси́, Го́споди.
Пре́жде век от Отца́ неизрече́нно рожде́ннаго Сы́на/ и в после́дняя от Де́вы воплоще́ннаго безсе́менне Христа́ подража́тель быв,/ по достоя́нию Христоподража́тельный глаго́лешися, Филаре́те.
Ве́лие твое, блаже́нне, милосе́рдие Го́спода возвесели́:/ напита́л бо еси́ а́лчуща, оде́ял еси́ на́га,/ стра́нна ввел еси́ в дом твой/ и не́мощна раде́тельне посети́л еси́, свя́те.
Вся страна́ Пафлаго́нская весели́тся днесь, чту́щи твою́ па́мять всечестну́ю,/ А́мния же пелена́ми твои́ми хва́лится, вопию́щи:/ возвели́чихся и аз тобо́ю, свя́те Филаре́те.
Богоро́дичен: Святе́йшая А́нгел и всея́ тва́ри/ вели́каго О́тчаго Сове́та А́нгела днесь ражда́ет пло́тию/ во спасе́ние всех, пою́щих ему́ непреста́нно:/ Свят еси́, Го́споди.
Ин Кондак, глас 4: Доброде́тельми украша́яся и стра́хом Бо́жиим,/ преди́вен во всех яви́ся Ца́рскаго гра́да1,/ ни́щим сокро́вище бога́тства разда́в/ и нетле́нно благи́х бога́тство на Небесе́х прие́м./ Те́мже всю́ду и везде́, Филаре́те, чту́щих тя помина́й,/ сла́во пра́ведным и похвало́.
Седа́лен, глас 8:
Милостинолю́бный по́мысл восприя́в,/ благосострада́телен яви́лся еси́ ни́щим и нужда́ющимся, всеблаже́нне,/ сего́ ра́ди зва́ние, дея́нию сро́дное, у всех но́сиши, ве́рно чту́щих тя./ Темже и Пода́тель благ ве́лиею ми́лостию поми́лова и сла́вно просла́ви тя, ми́лостиве Филаре́те./ Христа́ у́бо моли́ грехо́в оставле́ние дарова́ти/ пра́зднующим любо́вию святу́ю па́мять твою́.
Сла́ва, и ны́не, Богоро́дичен:
Рождества́ Христова предпра́зднственная соверша́юще, ве́рнии, торжеству́им/ и досто́йне вси предусря́щим, я́коже волсви́, даронося́ще доброде́тели/ и пою́ще А́нгелов песнь но́вую/ от Де́вы Богоотрокови́цы в Вифлее́ме без се́мене ражда́ющемуся Бо́гу на́шему,/ его́же сла́вят вся́ческая.
Песнь 4
Ирмо́с:
Жезл из ко́рене Иессе́ова/ и цвет от него́, Христе́,/ от Де́вы прозя́бл еси́,/ из горы́, Хвальный, приосене́нныя ча́щи/ прише́л еси́, вопло́щся/ от Неискусому́жныя, Невеще́ственный и Бо́же./ Сла́ва си́ле Твоей, Го́споди.
Храни́тель за́поведей Христо́вых был еси́ тща́тельнейший и исполни́тель непосты́дный:/ Бо́га бо от се́рдца и бра́та, я́ко себе́ сама́го, возлюби́л еси́,/ обои́м воздава́я, всесла́вне, подоба́ющая.
От Бо́га изрече́нное за преслуша́ние Ада́му осужде́ние:/ в по́те лица́ твоего́ сне́си хлеб твой, –/ обнося́ в по́мысле, смире́нне зе́млю возде́ловал еси́,/ я́же и подава́ше тебе потре́бная к житию́ оби́льне.
Избавле́ние души́ му́жа – свое́ ему́ бога́тство, глаго́лет при́тча./ Но, о, му́жества!/ ты отда́л еси́ после́дняго от двою́ вола́ бли́жнему́ твоему́/ и сего́ ра́ди поноси́мый от супру́ги твоея́, я́ко неразу́мный и неключи́мый,/ благослове́ниями той возда́л еси́.
Богоро́дичен: Ты вои́стинну вы́сшая челове́ков и А́нгел честне́йшая, Богоро́дице Де́во, яви́лася еси́:/ вся́ческих бо Творца́ во чре́ве прия́ла и родила́ еси́ без се́мене,/ благоволи́вшаго вочелове́читися от Тебе́ во спасе́ние душ на́ших.
Песнь 5
Ирмо́с:
Бог Сый ми́ра, Оте́ц ще́дрот,/ Вели́каго Сове́та Твоего́ А́нгела,/ мир подава́юща, посла́л еси́ нам./ Тем, Богоразу́мия к све́ту наста́вльшеся,/ от но́щи у́тренююще,/ сла́восло́вим Тя, Человеколю́бче.
Скор сый в раздая́ний и ми́ловании,/ отдава́л еси́ и после́дняя твоя́ тре́бующим,/ те́мже Ева́нгелию Христо́ву вои́стинну после́довал еси́,/ подража́я в милосе́рдии Отцу́ Небе́сному.
Слы́ша стропти́вая словеса́ жены́ и чад твои́х, укоря́ющих тя за милосе́рдие,/ благоду́шне терпе́л еси́, всеблаже́нне, я́коже И́ов,/ оба́че и предре́кл еси́ им, я́ко прови́дец,/ от Бо́га возда́яние благотворе́ния твоего́, сла́вне.
Объе́млется печа́лию и го́рестию мно́гою со ча́ды супру́жница твоя́,/ слы́шащи глас дои́лицы, ю́ницу свою́ зову́щия,/ ты же, безпеча́лен пребыва́я в лише́ниях,/ о прося́щих тя сле́зно па́че боле́зновал еси́.
Богоро́дичен: Спаси́тельный кров и всех ра́дование, предваря́ющая ско́ро и спаса́ющая,/ умилосе́рдися и ны́не, взыва́ем к Тебе́, Чи́стая,/ о нас, призыва́ющих Тя всегда́ во обстоя́нии:/ предста́тельства бо у Бо́га ина́го равномо́щнаго не и́мамы.
Песнь 6
Ирмо́с:
Из утро́бы Ио́ну младе́нца изблева́ морски́й зверь,/ якова́ прия́т;/ в Де́ву же все́льшееся Сло́во/ и плоть прие́мшее про́йде, сохра́ншее нетле́нну:/ его́же, бо не пострада́ истле́ния,/ Ро́ждшую сохрани́ неврежде́нну.
Благонаме́рения твоего́ неизме́нность ве́лие есть вои́стинну соверше́нство:/ ше́ствуя бо в житии́ путе́м ца́рским,/ вшел еси́ со дерзнове́нием в Ца́рствие непрестаю́щее,/ иде́же соца́рствуеши ве́чному Царю́ Сла́вы, ми́лостиве Филаре́те.
Ино́го Авраа́ма показа́ тя ми́рови ве́ра вкупе и Человеколю́бие твое́:/ боголю́бне бо ко всем благо́е расположе́ние явля́л еси́,/ доброхо́тне же всем тре́бующим подава́л еси́./ сего́ ра́ди Бога́тне возда́яше тебе́ Бог в де́лех твои́х.
Что ми зла́то, что ми бога́тство,/ сла́ва же и вся земна́я мимотеку́щая?/ Ничто́же суть вся́ко, поне́же в ничто́ обраща́ются,/ многолюбе́зно же ми еди́но бога́тство Небе́сное, всегда́ пребыва́ющее, –/ Филаре́та язы́к провеща́ваше.
Богоро́дичен: Недр не отлучи́вся Безнача́льнаго Роди́теля,/ Сын безма́терний во утро́бу Чи́стыя Де́вы вселяется,/ без отца́ вопло́щаемь, Царь пра́вды, Бог./ Того род стра́шен, неисповеди́мь и неизсле́димь.
Кондак, глас 3.
Подо́бен: Де́ва днесь:
И́стинно всеизря́дная твоя́ ку́пля зри́тся/ и му́дрою бы́ти су́дится все́ми благому́дрствующими:/ отда́л бо еси́ до́льняя и кратковре́менная, взыску́я Го́рних и ве́чных./ Те́мже и досто́йно стяжа́л еси́ ве́чную сла́ву, ми́лостиве Филаре́те.
И́кос:
Го́спода услы́шал еси́, во Ева́нгелии законополага́юща:/ продади́те име́ния ваша и дади́те ми́лостыню,/ сотвори́те себе́ влага́лища неветша́юща, сокро́вище неоску́дева́ющее на Небесе́х,/ иде́же ни тать краде́т, ни моль истлева́ет./ сего́ Боже́ственнаго и к соверше́нству возводя́щаго законоположе́ния ре́вностный исполни́тель был еси́:/ прода́л бо еси́ вся и дал еси́ ми́лостыню,/ сотвори́л еси́ себе́ влага́лища нетле́нна/ и сокро́виществовал еси́ сокро́вище на Небесе́х некрадо́мое./ сего́ ра́ди и блаже́нствуеши со благослове́нными Отца́ Небе́снаго,/ я́ко насле́дник от сложе́ния ми́ра угото́ваннаго Ца́рствия, ми́лостиве Филаре́те.
Песнь 7
Ирмо́с:
О́троцы, благоче́стию совоспита́ни,/ злочести́ваго веле́ния небре́гше,/ о́гненнаго преще́ния не убоя́шася,/ но, посреди́ пла́мене стоя́ще, поя́ху:/ отце́в Бо́же, благослове́н еси́.
В тебе́, не то́чию не изме́ншемся от диа́воля нападе́ния,/ но па́че в доброде́тели укре́пльшемся, Филаре́те,/ вои́стинну Христо́с просла́вися,/ враг же, искуша́яй тя, постыде́ся./ Сего́ ра́ди взыва́л еси́:/ Бо́же, благослове́н еси́.
На предложе́ние твое́, блаже́нне, призира́ет Христо́с/ и воздае́т ти мно́гими благи́ми пе́рвее, по искуше́нии же и бо́льшими./ Сего́ ра́ди и взыва́л еси́:/ Бо́же, благослове́н еси́.
Нрав твой страннолюби́вому нраву Авраа́мову подо́бится, блаже́нне Филаре́те:/ ты бо, я́коже той, пу́тники не оставля́л еси́ мимоити́,/ но сам во сре́тение им текл еси́, взыва́я:/ Бо́же, благослове́н еси́.
Богоро́дичен: От всех прие́млющи проше́ния, Богоро́дице,/ моли́ся Сы́ну Твоему́ и Бо́гу от всех зол изба́витися нам,/ чту́щим Тя и ко Го́споду взыва́ющим:/ отце́в Бо́же, благослове́н еси́.
Песнь 8
Ирмо́с:
Чу́да преесте́ственнаго/ росода́тельная изобрази́ пещь о́браз:/ не бо, я́же прия́т, пали́т ю́ныя,/ я́ко ниже́ огнь Бо́жества – Де́вы,/ в Ню́же вни́де утро́бу./ Тем, воспева́юще, воспои́м:/ да благослови́т тварь вся Го́спода/ и превозно́си́т во вся ве́ки.
Гостеприи́мство твое́, ми́лостиве, чу́да бысть вои́стинну вино́вно,/ егда́ благоприя́тен показа́ся невестоводи́телем царя́/ и самому́ царю́ Христоиме́нному вну́ки твоея́ о́браз./ Сего́ ра́ди и жре́бий благи́й устро́ися ей/ ку́пно с тобо́ю Бо́жиим смотре́нием, вся пра́вящим.
Глаго́лы му́дрости, о́тче, прия́л еси́ во глубину́ души́ твоея́,/ сего́ ра́ди от бла́гаго сокро́вища се́рдца твоего́ благи́я плоды́ изне́сл еси́./ Те́мже восприя́л еси́ бла́гая и в животе́ твое́м,/ быв сро́дник царе́в сла́вный и Бога́тый,/ по успе́нии же твое́м Ца́рствие Небе́сное насле́довал еси́.
Вели́ка и́стинно показа́ тя ра́зума твоего́ и́стина, блаже́нне,/ а не от челове́к сла́ва и све́тлость привре́меннаго достои́нства,/ я́ко при́сно пребыва́ющих взыску́я, к тем вся́чески стреми́лся еси́./ Те́мже тя восхваля́ем, Филаре́те Богому́дре.
Богоро́дичен: Стра́ннаго собы́тия́ о́браз показа́ купина́,/ неопа́льно горя́щая дре́вле на горе́ Сина́и,/ та́инство рождества́ Твоего́ прообразу́ющи, Пренепоро́чная Де́во:/ огнь бо в Тебе́ Бо́жества́ все́льшийся неврежде́нну Тя сохрани́./ Сего́ ра́ди Тя пое́м во вся ве́ки.
Песнь 9
Ирмо́с:
Та́инство стра́нное ви́жу и пресла́вное:/ Не́бо – верте́п, престо́л Херуви́мский – Де́ву,/ я́сли – вмести́лище,/ в ни́хже возлеже́ Невмести́мый – Христо́с Бог,/ его́же, воспева́юще, велича́ем.
Чудесы́ Бог прославля́ет и кончи́ну твою́, Филаре́те:/ прикоснове́нием бо ко гро́бу твоему́ прогоня́ется де́мон,/ стужа́яй от рожде́ния ни́щему,/ всегда́ тобо́ю ми́луемому, сострада́тельне.
Предрека́еши, я́ко ины́й Иа́ков, ча́дом твои́м иму́щая бы́ти,/ ку́пно же и законополага́еши им ми́лостивым бы́ти, я́коже ты;/ и́хже и благословя́, пре́дал еси́ в ру́це Бо́жии святу́ю твою́ ду́шу, блаже́нне.
Приими́ от нас, Филаре́те, я́ко досто́йную, сию песнь малобде́нную,/ я́коже и Христо́с прия́т вдови́цы две ле́пте,/ и испроси́ нам, всеблаже́нне, у Христа́ Бо́га на́шего ве́лию и Бога́тую ми́лость.
Богоро́дичен: Спасе́ся вся тварь Рождество́м Твои́м,/ и отъя́ Госпо́дь плач и рыда́ние, и вся́ку сле́зу/ от вся́каго лица́, Чи́стая Богоро́дице, Всенепоро́чная,/ те́мже досто́йно ублажа́ем Тя, А́нгелов и челове́ков Ра́досте.
Ексапостила́рий:
Филаре́та па́мять ми́лостиваго, ве́рнии, почти́м досто́йно,/ я́ко долго́в оставле́ние и разреше́ние согреше́ний/ того моли́твами улуча́ем вси.
На хвали́тех стихи́ры, глас 8:
О́тче ми́лостиве преподо́бне,/ ты, Бо́га от души́ возлюби́в,/ был еси́ испо́лни́тель за́поведи,/ ю́же пе́рвою и бо́льшею Госпо́дь нарече́:/ вои́стинну бо пе́рвее и па́че всего́ подоба́ет люби́ти Бо́га,/ вся ви́димая и неви́димая из ничего́ прему́дро сотво́ршаго.
О́тче всехва́льне,/ ты, я́ко себе́ самого́, бли́жняго возлюби́л еси́,/ сего́ ра́ди испо́лнил еси́ за́поведь,/ я́же втора́я, но подо́бная пе́рвей, полага́ется,/ я́ко от сея́ исходя́щая и к сей обраща́ющаяся./ Любя́й бо Бо́га, глаго́лет Богосло́в, да люби́т и бра́та,/ еже ты де́лом показа́л еси́.
Де́лы вся́ческими показа́л еси́,/ я́ко и́стинную к Бо́гу и бли́жнему́, Филаре́те, любо́вь стяжа́л еси́ в се́рдце, и теплоту́,/ наипа́че же яви́л еси́ сие́ гото́вностию подая́ти ни́щим,/ в не́йже позна́вается и начертава́ется любы́ к Бо́гу и бли́жнему́.
Вои́стинну досто́йно и́мени твоего́ пожи́л еси́ на земли́, Филаре́те,/ начерта́в в се́рдце твое́м, блаже́нне, доброде́тели:/ му́жество, и пра́вду, и му́дрость, и воздержа́ние./ Сего́ ра́ди досто́йным ны́не на Небеси́/ наслажда́ешися возда́янием жити́я твоего́, сла́вне.
Сла́ва, глас 8:
Прииди́те, доброде́тели люби́телие вси,/ духо́вный лик соста́вльше,/ Филаре́та ми́лостиваго ублажи́м,/ сокро́вище убо́гих, пита́теля а́лчущих/ и помо́щника неоску́днаго нужда́ющихся./ Сей бо, я́ко живописа́тель не́кий изря́дный,/ взира́я при́сно на пе́рвое и госпо́дственное бла́го,/ е́же есть Бог, и в себе́ само́м я́ко не́кое начерта́ние и подо́бие бла́гости живописа́в,/ всех благотворя́, ми́лует./ Сего́ ра́ди и и́мя досто́йно прия́,/ и Боже́ственнаго блаже́нства пра́ведно сподо́бися:/ блаже́ни бо ми́лостивии,/ я́ко ти́и поми́ловани бу́дут,/ глаго́лет ми́лостивый Изба́витель и Спас душ на́ших.
И ны́не, глас то́йже:
Свети́ся, Вифлее́ме, гра́де Бо́жий,/ Свет бо незаходи́мый в тебе́ роди́тися гряде́т./ А́нгели, удиви́теся на Небеси́,/ челове́цы, просла́вите на земли́,/ волсви́, от Перси́ды тро́ичный дар принеси́те,/ па́стырие, свиря́юще, трисвяту́ю песнь сла́дце воспо́йте./ Вся́кое дыхание да хва́лит Го́спода Вседе́теля.
Славосло́вие вели́кое.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 4: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
Стих:
Насажде́ни в до́му Госпо́дни, во дворе́х Бо́га на́шего процвету́т.
Апо́стол к Колосса́ем, зачало 258. Ева́нгелие от Луки́, зачало 26. Прича́стен:
В па́мять ве́чную:
И́на слу́жба свята́го пра́веднаго Филаре́та Ми́лостиваго
ВЕ́ЧЕР
На Го́споди, воззва́х: стихи́ры на 6, глас 4:
Расточи́в, разда́л еси́ тре́бующим/ хлеб твой, Филаре́те,/ ми́лостию подо́бяся ми́лостивейшему, блаже́нне, Влады́це,/ тем твоя́ пребыва́ет и́стинно во век па́мять, свя́те,/ ю́же ве́рою пра́зднующия/ твои́ми моли́твами спаса́й/ и искуше́ний и скорбе́й, досточу́дне всебога́те.
Вся проше́ния твоего́ се́рдца/ Госпо́дь, Богоблаже́нне, подаде́,/ вся бо соблю́л еси́/ законоположе́ния спаси́тельная,/ Бо́га бо всеконе́чно и бли́жняго,/ я́ко себе́ самого́, возлюби́л еси́/ и тре́бующия удово́лил еси́,/ сего́ ра́ди тя днесь, Филаре́те, почита́ем.
Ми́лости Да́тель,/ одари́в ми́лостивное,/ пра́ведниче, твое помышле́ние,/ поми́лова мно́гия Боже́ственным твои́м хода́тайством,/ был еси́ во утеше́ние душ/ о ни́щих промышле́ние,/ Филаре́те всему́дре, Богоблаже́нне преподо́бне.
Ми́лостию ми́лость стяжа́л еси́,/ расточи́вши, разда́л еси́ убо́гим,/ пра́вда твоя́ пребыва́ет ве́чно/ и и́же от сея́ приобре́тение тебе́ неветша́емое,/ Филаре́те блаже́нне,/ тем тя чтим и ублажа́ем.
Ми́лования твоего́ бога́тство,/ я́коже река́, бысть,/ напая́ющи вся́кая ни́щих сердца́,/ Филаре́те сла́вне,/ бога́тство некрадо́мо обре́л еси́ на Небесе́х неистощи́мое.
Боже́ственная повеле́ния соверша́ющи со тща́нием,/ расточи́в, разда́л еси́/ хлеб твой ни́щим,/ после́довал еси́ Христу́, распе́ншемуся пло́тию,/ Еди́ному Бо́гу на́шему.
Сла́ва, глас 2:
Ми́лости исто́чник/ тре́бующим умножа́ет/ благосострада́тельныя ще́дро́ты,/ Христо́в подо́бник,/ свети́ло Пафлаго́нии,/ прииди́те, насы́тимся, ни́щии ду́хом,/ подража́ющии того милосе́рдию/ любоблагоутро́бным нра́вом,/ Христа́ стра́нствовавшаго чрез ни́щия угости́в,/ я́ко дре́вле Авраа́м,/ блаже́нства удосто́ися/ и со дерзнове́нием мо́лится о душа́х на́ших.
И ны́не, Богоро́дичен: Пре́йде сень зако́нная:
На стихо́вне стихи́ры, глас 8:
Мно́гое милосе́рдие/ милосе́рдаго Го́спода, о́тче, подража́я,/ за милосе́рдие обнища́вшаго пло́тию,/ ни́щия удово́лил еси́,/ стра́нныя и безкро́вныя ущедря́я,/ испо́лнитель повеле́ний Боже́ственных был еси́,/ Филаре́те Богому́дре.
Стих: Возвесели́тся пра́ведник о Го́споде/ и упова́ет на Него.
За́поведей Госпо́дних, Филаре́те,/ непосты́дный был еси́ де́латель,/ Всеще́дрому подража́я,/ испо́лни́тель благи́х его́,/ ны́не в селе́ниих святы́х водворя́яся.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Мно́гое милосе́рдие твое́, Филаре́те,/ Госпо́дь внима́я благосе́рдый,/ ду́шу твою́ обогати́ нищелю́бием,/ проро́чествуеши бу́дущее,/ жи́зни преми́рныя сподо́бился еси́.
Сла́ва, глас 8:
Ми́лостив нрав прии́м,/ благосе́рд яви́лся еси́/ и пода́телей ни́щим и тре́бующим,/ Филаре́те блаже́нне,/ сего́ ра́ди зва́нием, дея́нию подо́бно,/ обогати́ тя зело́/ Пода́тель благи́х Христо́с,/ ему́же, пра́ведниче, моли́ся/ грехо́в оставле́ние нам пода́ти и ве́лию ми́лость.
И ны́не, Богоро́дичен: Безневе́стная Де́во:
Тропа́рь, глас 8:
Втерпе́нии твое́м стяжа́л еси́ мзду твою́, о́тче преподо́бие,/ в моли́твах непреста́нно терпе́вый,/ ни́щия возлюби́вый и сия удовли́вый,/ но моли́ся Христу́ Бо́гу, Филаре́те ми́лостиве блаже́нне,/ спасти́ся душа́м на́шим.
НА У́ТРЕНИ
По 1-м стихосло́вии седа́лен, глас 3: Доброде́телей твои́х, Богому́дре Филаре́те, исправле́ние уясни́ша ве́рных сердца́:/ кто бо безме́рному твоему́ смире́нию не удиви́тся,/ е́же ко всем ти́хости,/ к скорбя́щим ми́лование, су́щим в бе́дах ско́рое поможе́ние,/ вся боголе́пно предвари́, досточу́дне,/ и ны́не неувяда́емым венце́м венча́лся еси́ от Бо́га,/ его́же моли́ спасти́ся душа́м на́шим.
Сла́ва, и ны́не, Богоро́дичен:
Спаси́ мя, ро́ждшая всех Изба́вителя и Благоде́теля,/ разори́ души́ моея́ о́блаки,/ Све́та о́блаче, Свята́я Влады́чице,/ и си́льна соде́лай на стра́сти, борю́щия мя.
По 2-м стихосло́вии седа́лен, глас 8:
Име́я ду́шу ми́лостиву, и чист по́мысл, и се́рдце бо́дро,/ ве́ру небла́зненну, любо́вь нелицеме́рну,/ от земли́ преста́вился еси́ к Небе́сным и с ли́ки пра́ведных водворя́ешися,/ те́мже тя почита́ем свяще́нными пе́сньми/ и благоче́стно вси сла́вим, Богому́дре Филаре́те.
Сла́ва, и ны́не, Богоро́дичен:
Му́дрость Ипоста́сную, и Сло́во Пресу́щное, и Врача́ всех поро́ждшая, Де́во,/ стру́пы и я́звы души́ моея́ исцели́,/ лю́тыя, и многовре́менныя, и стра́стныя утоли́ се́рдца моего́ помышле́ния.
Кано́н, глас 8.
Песнь 1
Ирмо́с:
Посече́нный несеко́маго пресече́,/ и ви́де со́лнце зе́млю, ю́же не ви́де,/ лю́таго врага́ вода́ пото́пи́,/ и непроходи́мое про́йде Израиль./ Песнь же воспева́шеся:/ Го́сподеви пои́м, сла́вно бо просла́вися.
Любо́вию Христо́вою, о́тче, озаря́ем и сострада́нием ума́ просвеща́ем,/ еди́наго ми́лостиваго Бо́га прия́телище чисте́йшее был еси́, Филаре́те,/ тем тя ублажа́ем.
Му́дрым смы́слом смотря́я в при́сно пребыва́ющее, о́тче блаже́нне,/ измени́л еси́ тле́нная во ве́ки нетле́нными/ и ны́не на Небесе́х живе́ши, с Безпло́тными вопие́ши:/ сла́вно бо просла́вися.
Был еси́, о́тче, во утеше́ние всех скорбя́щих о ни́щих промышле́ние,/ ми́лости Да́тель бо одари́ ми́лостивным тя промышле́нием,/ и с Небе́сными ли́ки вопие́ши:/ сла́вно бо просла́вися.
Богоро́дичен: Бла́гослове́нная, Чи́стая и Всепе́тая,/ еди́на, ро́ждшая воплоще́ннаго Бо́га, приснотеку́щий Исто́чник нам,/ моли́, его́же родила́ еси́, дарова́ти ми́ру ве́лию ми́лость.
Катава́сия:
Христо́с ражда́ется:
Песнь 3
Ирмо́с:
Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Прича́стием, е́же к Бо́гу, преподо́бне Филаре́те, свет был еси́/ и к Нему́ отлучи́лся еси́, блаже́нне, жела́нием кра́йним,/ благи́м наде́ждам свои́м исполне́ние прия́л еси́.
Жела́нием, е́же к Бо́гу и к бли́жнему́ распала́ем,/ мирско́е пристра́стие отри́нул,/ Христа́ во о́бразе ни́щих возлюби́л еси́, Филаре́те сла́вне,/ стезю́ любве́ спаси́тельную проше́л еси́, ра́дуяся.
Бога́тство и сла́ву вре́менную, му́дре,/ и пи́щу мимотеку́щую, и мирско́е достоя́ние му́жественно отри́нул еси́,/ обогати́вся ве́чным нетле́нным бога́тством.
Богоро́дичен: Кра́сную, и избра́нную, и всечестну́ю разуме́в Тя,/ Сын Бо́жий, Пренепоро́чная, Сын Твой бысть,/ сы́ны сотвори́ благода́тию, Богоро́дице, чту́щия Тя.
Катава́сия:
Пре́жде век:
Седа́лен:
Яви́лся еси́ чу́ден в терпе́нии твое́м,/ вся́чески Христу́ угоди́л еси́, блаже́нне ми́лостиве Филаре́те,/ му́дрою мы́слию утверди́л еси́ ду́шу твою́,/ благи́й нрав стяжа́л еси́, обогати́лся Небе́сным возда́я́нием,/ сего́ ра́ди мо́лим тя:/ моли́ Христа́ Бо́га спасти́ ду́ши на́ша.
Сла́ва, и ны́не, Богоро́дичен:
Тя велича́ем, Богоро́дице, вопию́щи:/ Ты еси́, Благослове́нная,/ из Тебе́ бо неизрече́нно роди́ся Христо́с, Спас душ на́ших.
Песнь 4
Ирмо́с:
Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Усе́рдно возлюби́л еси́ бли́жняго, о себе́ неради́в,/ упова́ние возлага́я на Вы́шняго,/ в наде́жде не посрами́лся еси́.
Мно́гия твоя́ щедро́ты Госпо́дь прие́млет, блаже́нне Филаре́те,/ подража́тель бо яви́лся еси́ Всеми́лостивейшему/ и от Него́ прия́л еси́ стори́чное воздая́ние.
Испо́лнитель был еси́ Христо́вых слове́с, в Ева́нгелии рече́нных:/ блаже́ни ми́лостивии, – сих непосты́дный де́латель яви́лся еси́,/ сего́ ра́ди ны́не в Небе́сных кро́вех водворя́ешися.
Богоро́дичен: Очище́ние на́ших неве́дений, я́ко Безгре́шен,/ и умири́ мир Твой, Бо́же,/ моли́твами Ро́ждшия Тя.
Катава́сия:
Жезл из ко́рене:
Песнь 5
Ирмо́с:
От но́щи неве́дения/ Богове́дением просвети́вый концы́,/ просвети́ мя у́тром Человеколю́бия Твоего́, Го́споди.
Блаже́нства А́нгельскаго удостои́лся еси́,/ кро́ток, сострада́тельнейший, и а́лчущих хлеб неиждива́емый,/ и ни́щим пода́телен, Филаре́те блаже́нне.
Боже́ственными манове́ньми удобря́ем,/ одея́ние наготству́ющим яви́лся еси́, Филаре́те,/ сего́ ра́ди жи́зни преми́рныя сподо́бился еси́, достосла́вне.
Умертви́вшемуся за ми́лость ме́ртвостию во́льною, о́тче му́дре Филаре́те, подража́я,/ не порабо́тал еси́ сему́ ми́ру,/ но, Вы́шних взыску́я все́ю душе́ю,/ на любо́вь к бли́жнему подви́глся еси́,/ того́ ра́ди и получи́л еси́ Небе́сное воздая́ние.
Богоро́дичен: Усты́, и по́мыслом, и се́рдцем, Пресвята́я Богоро́дице, Тя пропове́дуем,/ Тобо́ю Бо́гу примири́хомся, отринове́ннии преступле́нием пе́рвее пра́отца́.
Катава́сия:
Бог Сый ми́ра:
Песнь 6
Ирмо́с:
Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Ми́лостынею и посто́м упражня́яся, при́сно Бо́га моля́,/ Боже́ственных воздая́ний сподо́бился еси́, Богому́дре Филаре́те,/ науча́еши па́че ума́ и по́мысла чистото́ю.
Ум твой весь к Бо́гу простира́я,/ непреста́нными ми́лостынями плотски́я любве́ не пощаде́л еси́,/ благи́х себе́ сокро́виществовал еси́, Филаре́те, присвое́ние.
Ты, плотски́х му́дрова́ний вы́шше име́я по́мысл,/ не уязви́лся еси́ красо́тами ми́ра сего́,/ безстра́стие стяжа́л еси́, му́дре Филаре́те.
Богоро́дичен: Не преста́й о нас моля́щися, Пресвята́я Богоро́дице Де́во,/ я́ко ве́рных утвержде́ние Ты еси́,/ и наде́ждою Твоею кре́пимся,/ и любо́вию Тя, из Тебе́ Вопло́щшагося, непреста́нно сла́вим.
Катава́сия:
Из утро́бы Ио́ну:
Кондак, глас 2:
Бога́тство твое́ расточи́л еси́ убо́гим/ и Небе́сное бога́тство ны́не восприя́л еси́, Филаре́те всеблаже́нне,/ сего́ ра́ди тя почита́ем, соверша́юще па́мять твою́, доброде́тели о тезоимени́те.
И́кос:
Упова́я на ми́лость Бо́жию, Филаре́те, щедро́тами от Того́ и дарми́ обогати́вся,/ отону́дуже яви́лся еси ми́лостив, я́ко Он, вся ущедря́я,/ те́мже, мою́ ни́щету уще́дрив, пода́ждь мне бога́тство твоея́ моли́твы/ и а́лчущее се́рдце мое́ испо́лни благ Боже́ственных, Богому́дре, я́коже пре́жде а́лчущия пита́л еси́,/ ми́лости и доброде́тели о тезоимени́те.
Песнь 7
Ирмо́с:
О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.
Напита́л еси́, о́тче, оби́льно вся́каго стра́нна, и на́га, и мимоходя́ща,/ с патриа́рхи при́сно и с пра́ведными ны́не ра́дуешися све́тло,/ иде́же бога́тство и сла́дость,/ иде́же при́сносу́щное спа́саемых упова́ние,/ иде́же всем бога́тство, Христо́с.
Словеса́ Спа́сова де́лы извести́л еси́/ и ублажа́емых сочета́лся еси́ ли́ку,/ ми́лостив быв и весь духо́вен, Богоно́се Филаре́те.
Бога́тному бо твоему́ внима́я произволе́нию,/ Творе́ц бога́тныя тебе́ даде́ воздая́ния, всему́дре Филаре́те.
Богоро́дичен: Тя, ра́дость апо́столов, страстоте́рпцев сла́ву,/ Богоро́дице, мо́лим ве́рою:/ ра́дости ве́чныя сподо́би ны, пою́щия Тя непреста́нно.
Катава́сия:
О́троцы, благоче́стию:
Песнь 8
Ирмо́с:
Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.
Содержи́м Христоподо́бною, о́тче Филаре́те, Боже́ственною любо́вию,/ ми́ловал ни́щих и убо́гих, ра́достно всегда́ вопия́:/ благослове́н еси́ в хра́ме сла́вы Твоея́, Го́споди.
Ми́лостынею и милосе́рдием па́че всех наре́клся еси́,/ ми́лостив всегда́, со о́троки вопия́:/ благослове́н еси́ в хра́ме сла́вы Твоея́, Го́споди.
Яви́лся еси́ кро́ток и ми́лостив, бла́осострада́телен и незло́бив, о́тче,/ бога́тство ни́щих, одея́ние наги́х, поя́ ве́рно:/ благослове́н еси́ в хра́ме сла́вы Твоея́, Го́споди.
Тро́ичен: Тро́ицы Све́том Невече́рним просвеща́ем, уго́дниче Тро́ицы,/ чту́щия тя ны́не просвеща́еши и пою́щия:/ благослове́н еси́ в хра́ме сла́вы Твоея́, Го́споди.
Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́нна Ты в жена́х еси́, Всенепоро́чная Влады́чице.
Катава́сия:
Чу́да преесте́ственнаго:
Песнь 9
Ирмо́с:
Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Жела́нием Боже́ственным соедини́вся и воздержа́нием просвеща́емь,/ бу́дущих благ в прича́стие быв, Филаре́те Богоблаже́нне.
Всем се́рдцем, Филаре́те, Челове́колюбца Го́спода возлюби́в и тому́ подража́я,/ от него́ лучи́ бла́годе́тельно прии́м,/ ны́не со А́нгелы лику́еши.
Христу́, над все́ми Бо́гу на́шему, непоро́чным житие́м благоугоди́л еси́,/ тре́бующим бога́тство расточи́л еси́,/ те́мже и обре́л еси́ на Небесе́х неистощи́мое,/ моли́ непреста́нно о всех нас.
Вдов и ни́щих тя Христо́с показа́ прие́мника,/ оби́димых засту́пника и предста́теля в бе́дах,/ восхваля́ем тя, Филаре́те, о́тче наш.
Богоро́дичен: Боголе́пная Де́во,/ озло́бленную ду́шу мою́ грехо́м облагодати́,/ Блага́го ро́ждшая Бо́га и Го́спода.
Катава́сия: Та́инство стра́нное:
Свети́лен:
Доброде́телию укра́шен, егда́ спаси́тельное сло́во испо́лнил еси́,/ расточи́вши, по́дал еси́ тьмы твоего́ зла́та ни́щим и убо́гим,/ тогда́ Небе́сное бога́тство восприя́л еси́, пра́вдою обогати́вшися во ве́ки,/ те́мже чтим твою́ па́мять и мо́лим тя приле́жно:/ моли́ Зижди́теля спасти́ души на́ша.
Сла́ва:
Ра́ка, иде́же лежа́т, о́тче Филаре́те, свяще́нныя святы́я твоя́ мо́щи,/ исто́чник чуде́с всем, с ве́рою к тебе́ притека́ющим.
И ны́не, Богоро́дичен:
И́же от Бо́га ми́ру да́нных благ Ты вина́ еси́, Богоро́дице,/ но и ны́не ми́лостива сотвори́ Благоуве́тливаго Бо́га.
На хвали́тех стихи́ры, глас 4:
Пра́веден и незло́бив,/ и́стинен же и непоро́чен,/ уклоня́яся от вся́кия лука́выя мы́сли,/ показа́лся еси́, Филаре́те блаже́нне,/ просвеще́н доброде́тельми и благоче́стием сия́я,/ тем тя ублажа́ем/ и свято́е твое́ и честно́е пра́зднуем успе́ние.
Ми́лость подража́я Бо́га любоще́драго,/ тре́бующим бога́тство расточи́л еси́, Филаре́те блаже́нне,/ тем и бога́тство прия́л еси́ на Небесе́х неистощи́мое,/ того́ ра́ди ны́не мо́лимся:/ моли́ся непреста́нно о душа́х на́ших.
Блаже́нством Ева́нгельским, я́ко багряни́цею, оде́яся,/ наде́ждою бу́дущих, я́ко Боже́ственным венце́м, увя́злся еси́,/ и ны́не Царю́ сил предстои́ши, Иису́су Всеми́лостивому/ и Спа́су душ на́ших.
Ми́лостив яви́лся еси́,/ кро́ток, благосострада́телен, незло́бив, о́тче Филаре́те,/ бога́тство ни́щих и одея́ние наги́х возлюби́л еси́,/ те́мже Иису́с Человеколю́бец/ всели́л тя во све́тлости святы́х Свои́х.
Сла́ва, глас 8:
На ми́лость Бо́жию упова́в,/ щедро́тами от того́ и дарми́, Филаре́те, обогати́лся еси́,/ отону́дуже яви́лся еси́ ми́лостив, я́коже Он, вся ущедря́я,/ те́мже, ни́щету́ на́шу уще́дрив,/ пода́ждь нам бога́тство моли́твы твоея́,/ я́коже ни́щия и а́лчущия пита́л еси́,/ та́ко и ны́не моли́ся спасти́ся душа́м на́шим.
И ны́не, Богоро́дичен:
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
Праведный Филарет милостивый жил в VIII веке в городе Амнии Пафлагонской области (Малая Азия). Родители святого, Георгий и Анна, воспитали сына в правилах строгого христианского благочестия и страхе Божием. У него была жена Феозва и трое детей: сын Иоанн и дочери Ипатия и Еванфия.
Праведный Филарет стал знатным вельможей, но не считал, что земное благополучие – цель его жизни, и часто повторял слова апостола Павла: «Мы ничего не принесли в мир; явно, что ничего не можем и вынести из него…» (1Тим. 6:7). Испытывая чувство глубокого сострадания к обездоленным и бедным, праведный Филарет возлюбил Христа во образе нищих, раздавал «малым сим» (Мф. 25:40) свое богатство и получил прозвание милостивого.
Измаильтяне (арабы) разорили Пафлагонию, и Филарет лишился почти всего имущества: у него остались два вола, корова с теленком, несколько ульев и дом. Праведник радовался бедности, как многие радуются богатству, говорил, что бедному легче войти в Небесное Царство, и отдавал последнее крестьянам: одному – волов, другому – корову и теленка, а когда кончился хлеб, раздавал нуждающимся мед. Кончился и мед, отдавать было нечего – праведный Филарет снял с себя верхнюю одежду и отдал постучавшемуся к нему нищему. Жена и дети упрекали святого в расточительности и безрассудстве. Он кротко утешал их и говорил, что Господь никого не оставляет без помощи, исполняющего его святую заповедь: «Просящему у тебя дай, и от хотящего занять у тебя не отвращайся» (Мф. 5:42) вознаградит сторицею. Вскоре друг праведного Филарета прислал голодавшей семье сорок мер пшеницы. По просьбе жены, 35 мер Филарет отделил для пропитания семьи и возвращения долга. Свою часть, пять мер зерна, в течение двух дней раздал бедным. Жена разгневалась и стала питаться с детьми отдельно, та́ино от него. Однажды блаженный Филарет случайно застал семью за обедом и сказал: «Дети, примите и меня пообедать вместе с вами, не как ва́шего отца, но как гостя и странника».
Через много лет внучка праведного Филарета Мария стала женой византийского императора Константина Порфирородного (780–797). Почести и богатство вновь вернулись к праведному Филарету. Старец попросил устроить особенный обед и сказал родным, что на пир придет сам Царь и вельможи. Когда все было готово, блаженный Филарет пригласил в свой дом около 200 нищих, слепых, хромых, старых и беспомощных. Родственники поняли, кого ожидал праведный Филарет, веруя, что в образе нищих Сам Господь посетит его дом.
Старец продал дарованное ему императором имущество, а вырученные деньги роздал бедным. Теперь родные не укоряли его, а просили прощения за прежнее нетерпение и ропот. «Мы убедились, – говорили они, – что Господь еще в здешней жизни с избытком награждает тех, кто милует нищего. За милости твои к бедным и нас благословил теперь Господь богатством».
Праведный старец скончался в 792 году, в возрасте 90 лет. В момент его кончины комната наполнилась благоуханием. Завещая детям и внукам подражать его жизни, он, подобно патриарху Иакову, предсказал им их судьбы. Погребен праведный Филарет в обители Суда Родольфия в Константинополе. Множество нищих оплакали блаженную кончину праведника. При погребении святого проявилась особая благодать Божия. Господь показал святость праведного Филарета: одержимый нечистым духом человек припал к его гробу и исцелился.
После кончины святого Филарета милостивого его жена Феозва возвратилась в Пафлагонию. Состояние свое она употребила на возобновление и построение новых храмов, монастырей, странноприимных домов и больниц для бедных. Затем вернулась в Константинополь, стараясь оставшееся время своей жизни на земле угодить Богу, и мирно скончалась. Погребена она около своего праведного мужа.